꧖. ꦏꦴꦩꦹꦥꦥꦠ꧀ꦠꦶꦱꦸꦠ꧀ꦠꦁ

꧙꧕. ꦮꦸꦠ꧀ꦠꦚ꧀ꦲꦺꦠꦁ ꦨꦒꦮꦠꦴ, ꦮꦸꦠ꧀ꦠꦩꦫꦲꦠꦴꦠꦶ ꦩꦺ ꦱꦸꦠꦁ –

‘‘ꦠꦶꦱ꧀ꦱꦺꦴ ꦆꦩꦴ, ꦨꦶꦏ꧀ꦑꦮꦺ, ꦏꦴꦩꦹꦥꦥꦠ꧀ꦠꦶꦪꦺꦴ [ꦏꦴꦩꦸꦥ꧀ꦥꦠ꧀ꦠꦶꦪꦺꦴ (ꦱꦷ.)]. ꦏꦠꦩꦴ ꦠꦶꦱ꧀ꦱꦺꦴ? ꦥꦕ꧀ꦕꦸꦥꦛ꧀ꦜꦶꦠꦏꦴꦩꦴ, ꦤꦶꦩ꧀ꦩꦴꦤꦫꦠꦶꦤꦺꦴ, ꦥꦫꦤꦶꦩ꧀ꦩꦶꦠꦮꦱꦮꦠ꧀ꦠꦶꦤꦺꦴ – ꦆꦩꦴ ꦑꦺꦴ, ꦨꦶꦏ꧀ꦑꦮꦺ, ꦠꦶꦱ꧀ꦱꦺꦴ ꦏꦴꦩꦹꦥꦥꦠ꧀ꦠꦶꦪꦺꦴ’’ꦠꦶ. ꦌꦠꦩꦠ꧀ꦡꦁ ꦨꦒꦮꦴ ꦄꦮꦺꦴꦕ. ꦠꦠ꧀ꦡꦺꦠꦁ ꦆꦠꦶ ꦮꦸꦕ꧀ꦕꦠꦶ –

‘‘ꦥꦕ꧀ꦕꦸꦥꦛ꧀ꦜꦶꦠꦏꦴꦩꦴ ꦕ, ꦪꦺ ꦢꦺꦮꦴ ꦮꦱꦮꦠ꧀ꦠꦶꦤꦺꦴ;

ꦤꦶꦩ꧀ꦩꦴꦤꦫꦠꦶꦤꦺꦴ ꦢꦺꦮꦴ, ꦪꦺ ꦕꦚ꧀ꦚꦺ ꦏꦴꦩꦨꦺꦴꦒꦶꦤꦺꦴ;

ꦆꦠ꧀ꦡꦨꦴꦮꦚ꧀ꦚꦡꦴꦨꦴꦮꦁ, ꦱꦁꦱꦴꦫꦁ ꦤꦴꦠꦶꦮꦠ꧀ꦠꦫꦺ.

‘‘ꦌꦠꦩꦴꦢꦷꦤꦮꦁ ꦚꦠ꧀ꦮꦴ, ꦏꦴꦩꦨꦺꦴꦒꦺꦱꦸ ꦥꦟ꧀ꦝꦶꦠꦺꦴ;

ꦱꦧ꧀ꦧꦺ ꦥꦫꦶꦕ꧀ꦕꦗꦺ ꦏꦴꦩꦺ, ꦪꦺ ꦢꦶꦧ꧀ꦧꦴ ꦪꦺ ꦕ ꦩꦴꦤꦸꦱꦴ.

‘‘ꦥꦶꦪꦫꦹꦥꦱꦴꦠꦒꦣꦶꦠꦁ, ꦖꦺꦠ꧀ꦮꦴ ꦱꦺꦴꦠꦁ ꦢꦸꦫꦕ꧀ꦕꦪꦁ;

ꦄꦱꦺꦱꦁ ꦥꦫꦶꦤꦶꦧ꧀ꦧꦤ꧀ꦠꦶ, ꦄꦱꦺꦱꦁ ꦢꦸꦏ꧀ꦑꦩꦕ꧀ꦕꦒꦸꦁ.

‘‘ꦄꦫꦶꦪꦢ꧀ꦢꦱꦴ ꦮꦺꦢꦒꦸꦤꦺꦴ, ꦱꦩ꧀ꦩꦢꦚ꧀ꦚꦴꦪ ꦥꦟ꧀ꦝꦶꦠꦴ;

ꦗꦴꦠꦶꦏ꧀ꦑꦪꦩꦨꦶꦚ꧀ꦚꦴꦪ, ꦤꦴꦒꦕ꧀ꦖꦤ꧀ꦠꦶ ꦥꦸꦤꦧ꧀ꦨꦮ’’ꦤ꧀ꦠꦶ.

ꦄꦪꦩ꧀ꦥꦶ ꦄꦠ꧀ꦡꦺꦴ ꦮꦸꦠ꧀ꦠꦺꦴ ꦨꦒꦮꦠꦴ, ꦆꦠꦶ ꦩꦺ ꦱꦸꦠꦤ꧀ꦠꦶ. ꦖꦛ꧀ꦜꦁ.