꧒. ꦗꦷꦮꦶꦏꦱꦸꦠ꧀ꦠꦁ

꧙꧑. ꦮꦸꦠ꧀ꦠꦚ꧀ꦲꦺꦠꦁ ꦨꦒꦮꦠꦴ, ꦮꦸꦠ꧀ꦠꦩꦫꦲꦠꦴꦠꦶ ꦩꦺ ꦱꦸꦠꦁ –

‘‘ꦄꦤ꧀ꦠꦩꦶꦢꦁ, ꦨꦶꦏ꧀ꦑꦮꦺ, ꦗꦷꦮꦶꦏꦴꦤꦁ ꦪꦢꦶꦢꦁ ꦥꦶꦟ꧀ꦝꦺꦴꦭ꧀ꦪꦁ. ꦄꦨꦶꦱꦴꦥꦺꦴꦪꦁ [ꦄꦨꦶꦱꦴꦥꦴꦪꦁ (ꦱꦷ.), ꦄꦨꦶꦭꦴꦥꦴꦪꦁ (ꦱ꧀ꦪꦴ. ꦥꦷ.), ꦄꦨꦶꦱꦥꦴꦪꦁ (ꦏ.)], ꦨꦶꦏ꧀ꦑꦮꦺ, ꦭꦺꦴꦏꦱ꧀ꦩꦶꦁ – ‘ꦥꦶꦟ꧀ꦝꦺꦴꦭꦺꦴ ꦮꦶꦕꦫꦱꦶ ꦥꦠ꧀ꦠꦥꦴꦟꦷ’ꦠꦶ. ꦠꦚ꧀ꦕ ꦑꦺꦴ ꦌꦠꦁ, ꦨꦶꦏ꧀ꦑꦮꦺ, ꦏꦸꦭꦥꦸꦠ꧀ꦠꦴ ꦈꦥꦺꦤ꧀ꦠꦶ ꦄꦠ꧀ꦡꦮꦱꦶꦏꦴ, ꦄꦠ꧀ꦡꦮꦱꦁ ꦥꦛꦶꦕ꧀ꦕ; ꦤꦺꦮ ꦫꦴꦗꦴꦨꦶꦤꦷꦠꦴ, ꦤ ꦕꦺꦴꦫꦴꦨꦶꦤꦷꦠꦴ, ꦤ ꦆꦟꦛ꧀ꦛꦴ, ꦤ ꦨꦪꦛ꧀ꦛꦴ, ꦤ ꦄꦴꦗꦷꦮꦶꦏꦴꦥꦏꦠꦴ. ꦄꦥꦶ ꦕ ꦑꦺꦴ ‘ꦎꦠꦶꦟ꧀ꦟꦩ꧀ꦲꦴ ꦗꦴꦠꦶꦪꦴ ꦗꦫꦴꦪ ꦩꦫꦟꦺꦤ ꦱꦺꦴꦏꦺꦲꦶ ꦥꦫꦶꦢꦺꦮꦺꦲꦶ ꦢꦸꦏ꧀ꦑꦺꦲꦶ ꦢꦺꦴꦩꦤꦱ꧀ꦱꦺꦲꦶ ꦈꦥꦴꦪꦴꦱꦺꦲꦶ ꦢꦸꦏ꧀ꦑꦺꦴꦠꦶꦟ꧀ꦟꦴ ꦢꦸꦏ꧀ꦑꦥꦫꦺꦠꦴ, ꦄꦥ꧀ꦥꦺꦮ ꦤꦴꦩ ꦆꦩꦱ꧀ꦱ ꦏꦺꦮꦭꦱ꧀ꦱ ꦢꦸꦏ꧀ꦑꦏ꧀ꦑꦤ꧀ꦣꦱ꧀ꦱ ꦄꦤ꧀ꦠꦏꦶꦫꦶꦪꦴ ꦥꦚ꧀ꦚꦴꦪꦺꦡꦴ’ꦠꦶ. ꦌꦮꦁ ꦥꦧ꧀ꦧꦗꦶꦠꦺꦴ ꦕꦴꦪꦁ, ꦨꦶꦏ꧀ꦑꦮꦺ, ꦏꦸꦭꦥꦸꦠ꧀ꦠꦺꦴ ꦱꦺꦴ ꦕ ꦲꦺꦴꦠꦶ ꦄꦨꦶꦗ꧀ꦙꦴꦭꦸ ꦏꦴꦩꦺꦱꦸ ꦠꦶꦧ꧀ꦧꦱꦴꦫꦴꦒꦺꦴ, ꦧ꧀ꦪꦴꦥꦤ꧀ꦤꦕꦶꦠ꧀ꦠꦺꦴ ꦥꦢꦸꦛ꧀ꦜꦩꦤꦱꦔ꧀ꦏꦥ꧀ꦥꦺꦴ, ꦩꦸꦛ꧀ꦜꦱ꧀ꦱꦠꦶ ꦄꦱꦩ꧀ꦥꦗꦴꦤꦺꦴ ꦄꦱꦩꦴꦲꦶꦠꦺꦴ ꦮꦶꦧ꧀ꦨꦤ꧀ꦠꦕꦶꦠ꧀ꦠꦺꦴ ꦥꦴꦏꦠꦶꦤ꧀ꦢ꧀ꦫꦶꦪꦺꦴ. ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ, ꦖꦮꦴꦭꦴꦠꦁ ꦈꦨꦠꦺꦴꦥꦢꦶꦠ꧀ꦠꦁ ꦩꦗ꧀ꦙꦺ ꦒꦹꦡꦒꦠꦁ ꦤꦺꦮ ꦒꦴꦩꦺ ꦏꦛ꧀ꦜꦠ꧀ꦡꦁ ꦦꦫꦠꦶ ꦤ ꦄꦫꦚ꧀ꦚꦺः ꦠꦡꦹꦥꦩꦴꦲꦁ, ꦨꦶꦏ꧀ꦑꦮꦺ, ꦆꦩꦁ ꦥꦸꦒ꧀ꦒꦭꦁ ꦮꦢꦴꦩꦶ ꦒꦶꦲꦶꦨꦺꦴꦒꦴ ꦥꦫꦶꦲꦷꦤꦺꦴ ꦱꦴꦩꦚ꧀ꦚꦠ꧀ꦡꦚ꧀ꦕ ꦤ ꦥꦫꦶꦥꦹꦫꦺꦠꦷ’’ꦠꦶ. ꦌꦠꦩꦠ꧀ꦡꦁ ꦨꦒꦮꦴ ꦄꦮꦺꦴꦕ. ꦠꦠ꧀ꦡꦺꦠꦁ ꦆꦠꦶ ꦮꦸꦕ꧀ꦕꦠꦶ –

‘‘ꦒꦶꦲꦶꦨꦺꦴꦒꦴ ꦥꦫꦶꦲꦷꦤꦺꦴ, ꦱꦴꦩꦚ꧀ꦚꦠ꧀ꦡꦚ꧀ꦕ ꦢꦸꦧ꧀ꦨꦒꦺꦴ;

ꦥꦫꦶꦣꦁꦱꦩꦴꦤꦺꦴ ꦥꦏꦶꦫꦺꦠꦶ, ꦖꦮꦴꦭꦴꦠꦁꦮ ꦤꦱ꧀ꦱꦠꦶ.

‘‘ꦏꦴꦱꦴꦮꦏꦟ꧀ꦜꦴ ꦧꦲꦮꦺꦴ, ꦥꦴꦥꦣꦩ꧀ꦩꦴ ꦄꦱꦚ꧀ꦚꦠꦴ;

ꦥꦴꦥꦴ ꦥꦴꦥꦺꦲꦶ ꦏꦩ꧀ꦩꦺꦲꦶ, ꦤꦶꦫꦪꦁ ꦠꦺ ꦈꦥꦥꦗ꧀ꦗꦫꦺ.

‘‘ꦱꦺꦪ꧀ꦪꦺꦴ ꦄꦪꦺꦴꦒꦸꦭ꦳ꦺꦴ ꦨꦸꦠ꧀ꦠꦺꦴ, ꦠꦠ꧀ꦠꦺꦴ ꦄꦒ꧀ꦒꦶꦱꦶꦑꦹꦥꦩꦺꦴ;

ꦪꦚ꧀ꦕꦺ ꦨꦸꦚ꧀ꦗꦺꦪ꧀ꦪ ꦢꦸꦱ꧀ꦱꦷꦭꦺꦴ, ꦫꦛ꧀ꦜꦥꦶꦟ꧀ꦝꦩꦱꦚ꧀ꦚꦠꦺꦴ’’ꦠꦶ.

ꦄꦪꦩ꧀ꦥꦶ ꦄꦠ꧀ꦡꦺꦴ ꦮꦸꦠ꧀ꦠꦺꦴ ꦨꦒꦮꦠꦴ, ꦆꦠꦶ ꦩꦺ ꦱꦸꦠꦤ꧀ꦠꦶ. ꦢꦸꦠꦶꦪꦁ.