꧑꧐. ꦠꦺꦮꦶꦗ꧀ꦗꦱꦸꦠ꧀ꦠꦁ

꧙꧙. ꦮꦸꦠ꧀ꦠꦚ꧀ꦲꦺꦠꦁ ꦨꦒꦮꦠꦴ, ꦮꦸꦠ꧀ꦠꦩꦫꦲꦠꦴꦠꦶ ꦩꦺ ꦱꦸꦠꦁ –

‘‘ꦣꦩ꧀ꦩꦺꦤꦴꦲꦁ, ꦨꦶꦏ꧀ꦑꦮꦺ, ꦠꦺꦮꦶꦗ꧀ꦗꦁ ꦧ꧀ꦫꦴꦲ꧀ꦩꦟꦁ ꦥꦚ꧀ꦚꦴꦥꦺꦩꦶ, ꦤꦴꦚ꧀ꦚꦁ ꦭꦥꦶꦠꦭꦴꦥꦤꦩꦠ꧀ꦠꦺꦤ.

‘‘ꦏꦡꦚ꧀ꦕꦴꦲꦁ, ꦨꦶꦏ꧀ꦑꦮꦺ, ꦣꦩ꧀ꦩꦺꦤ ꦠꦺꦮꦶꦗ꧀ꦗꦁ ꦧ꧀ꦫꦴꦲ꧀ꦩꦟꦁ ꦥꦚ꧀ꦚꦴꦥꦺꦩꦶ, ꦤꦴꦚ꧀ꦚꦁ ꦭꦥꦶꦠꦭꦴꦥꦤꦩꦠ꧀ꦠꦺꦤ? ꦆꦣ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦄꦤꦺꦏꦮꦶꦲꦶꦠꦁ ꦥꦸꦧ꧀ꦧꦺꦤꦶꦮꦴꦱꦁ ꦄꦤꦸꦱ꧀ꦱꦫꦠꦶ, ꦱꦺꦪ꧀ꦪꦡꦶꦢꦁ – ꦌꦏꦩ꧀ꦥꦶ ꦗꦴꦠꦶꦁ ꦢ꧀ꦮꦺꦥꦶ ꦗꦴꦠꦶꦪꦺꦴ ꦠꦶꦱ꧀ꦱꦺꦴꦥꦶ ꦗꦴꦠꦶꦪꦺꦴ ꦕꦠꦱ꧀ꦱꦺꦴꦥꦶ ꦗꦴꦠꦶꦪꦺꦴ ꦥꦚ꧀ꦕꦥꦶ ꦗꦴꦠꦶꦪꦺꦴ ꦢꦱꦥꦶ ꦗꦴꦠꦶꦪꦺꦴ ꦮꦷꦱꦩ꧀ꦥꦶ ꦗꦴꦠꦶꦪꦺꦴ ꦠꦶꦁꦱꦩ꧀ꦥꦶ ꦗꦴꦠꦶꦪꦺꦴ ꦕꦠ꧀ꦠꦴꦭꦷꦱꦩ꧀ꦥꦶ ꦗꦴꦠꦶꦪꦺꦴ ꦥꦚ꧀ꦚꦴꦱꦩ꧀ꦥꦶ ꦗꦴꦠꦶꦪꦺꦴ ꦗꦴꦠꦶꦱꦠꦩ꧀ꦥꦶ ꦗꦴꦠꦶꦱꦲꦱ꧀ꦱꦩ꧀ꦥꦶ ꦗꦴꦠꦶꦱꦠꦱꦲꦱ꧀ꦱꦩ꧀ꦥꦶ ꦄꦤꦺꦏꦺꦥꦶ ꦱꦁꦮꦛ꧀ꦛꦏꦥ꧀ꦥꦺ ꦄꦤꦺꦏꦺꦥꦶ ꦮꦶꦮꦛ꧀ꦛꦏꦥ꧀ꦥꦺ ꦄꦤꦺꦏꦺꦥꦶ ꦱꦁꦮꦛ꧀ꦛꦮꦶꦮꦛ꧀ꦛꦏꦥ꧀ꦥꦺ – ‘ꦄꦩꦸꦠ꧀ꦫꦴꦱꦶꦁ ꦌꦮꦁꦤꦴꦩꦺꦴ ꦌꦮꦁꦒꦺꦴꦠ꧀ꦠꦺꦴ ꦌꦮꦁꦮꦟ꧀ꦟꦺꦴ ꦌꦮꦩꦴꦲꦴꦫꦺꦴ ꦌꦮꦁꦱꦸꦑꦢꦸꦏ꧀ꦑꦥ꧀ꦥꦛꦶꦱꦁꦮꦺꦢꦷ ꦌꦮꦩꦴꦪꦸꦥꦫꦶꦪꦤ꧀ꦠꦺꦴ. ꦱꦺꦴ ꦠꦠꦺꦴ ꦕꦸꦠꦺꦴ ꦄꦩꦸꦠ꧀ꦫ ꦈꦢꦥꦴꦢꦶꦁ. ꦠꦠ꧀ꦫꦴꦥꦴꦱꦶꦁ ꦌꦮꦁꦤꦴꦩꦺꦴ ꦌꦮꦁꦒꦺꦴꦠ꧀ꦠꦺꦴ ꦌꦮꦁꦮꦟ꧀ꦟꦺꦴ ꦌꦮꦩꦴꦲꦴꦫꦺꦴ ꦌꦮꦁꦱꦸꦑꦢꦸꦏ꧀ꦑꦥ꧀ꦥꦛꦶꦱꦁꦮꦺꦢꦷ ꦌꦮꦩꦴꦪꦸꦥꦫꦶꦪꦤ꧀ꦠꦺꦴ. ꦱꦺꦴ ꦠꦠꦺꦴ ꦕꦸꦠꦺꦴ ꦆꦣꦹꦥꦥꦤ꧀ꦤꦺꦴ’ꦠꦶ. ꦆꦠꦶ ꦱꦴꦏꦴꦫꦁ ꦱꦈꦢ꧀ꦢꦺꦱꦁ ꦄꦤꦺꦏꦮꦶꦲꦶꦠꦁ ꦥꦸꦧ꧀ꦧꦺꦤꦶꦮꦴꦱꦁ ꦄꦤꦸꦱ꧀ꦱꦫꦠꦶ. ꦄꦪꦩꦱ꧀ꦱ ꦥꦜꦩꦴ ꦮꦶꦗ꧀ꦗꦴ ꦄꦣꦶꦒꦠꦴ ꦲꦺꦴꦠꦶ, ꦄꦮꦶꦗ꧀ꦗꦴ ꦮꦶꦲꦠꦴ, ꦮꦶꦗ꧀ꦗꦴ ꦈꦥ꧀ꦥꦤ꧀ꦤꦴ, ꦠꦩꦺꦴ ꦮꦶꦲꦠꦺꦴ, ꦄꦴꦭꦺꦴꦏꦺꦴ ꦈꦥ꧀ꦥꦤ꧀ꦤꦺꦴ, ꦪꦡꦴ ꦠꦁ ꦄꦥ꧀ꦥꦩꦠ꧀ꦠꦱ꧀ꦱ ꦄꦴꦠꦴꦥꦶꦤꦺꦴ ꦥꦲꦶꦠꦠ꧀ꦠꦱ꧀ꦱ ꦮꦶꦲꦫꦠꦺꦴ.

‘‘ꦥꦸꦤ ꦕꦥꦫꦁ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦢꦶꦧ꧀ꦧꦺꦤ ꦕꦏ꧀ꦑꦸꦤꦴ ꦮꦶꦱꦸꦢ꧀ꦣꦺꦤ ꦄꦠꦶꦏ꧀ꦏꦤ꧀ꦠꦩꦴꦤꦸꦱꦏꦺꦤ ꦱꦠ꧀ꦠꦺ ꦥꦱ꧀ꦱꦠꦶ ꦕꦮꦩꦴꦤꦺ ꦈꦥꦥꦗ꧀ꦗꦩꦴꦤꦺ ꦲꦷꦤꦺ ꦥꦟꦷꦠꦺ ꦱꦸꦮꦟ꧀ꦟꦺ ꦢꦸꦧ꧀ꦧꦟ꧀ꦟꦺ, ꦱꦸꦒꦠꦺ ꦢꦸꦒ꧀ꦒꦠꦺ ꦪꦡꦴꦏꦩ꧀ꦩꦹꦥꦒꦺ ꦱꦠ꧀ꦠꦺ ꦥꦗꦴꦤꦴꦠꦶ – ‘ꦆꦩꦺ ꦮꦠ ꦨꦺꦴꦤ꧀ꦠꦺꦴ ꦱꦠ꧀ꦠꦴ ꦏꦴꦪꦢꦸꦕ꧀ꦕꦫꦶꦠꦺꦤ ꦱꦩꦤ꧀ꦤꦴꦒꦠꦴ ꦮꦕꦷꦢꦸꦕ꧀ꦕꦫꦶꦠꦺꦤ ꦱꦩꦤ꧀ꦤꦴꦒꦠꦴ ꦩꦤꦺꦴꦢꦸꦕ꧀ꦕꦫꦶꦠꦺꦤ ꦱꦩꦤ꧀ꦤꦴꦒꦠꦴ ꦄꦫꦶꦪꦴꦤꦁ ꦈꦥꦮꦴꦢꦏꦴ ꦩꦶꦕ꧀ꦖꦴꦢꦶꦛ꧀ꦜꦶꦏꦴ ꦩꦶꦕ꧀ꦖꦴꦢꦶꦛ꧀ꦜꦶꦏꦩ꧀ꦩꦱꦩꦴꦢꦴꦤꦴ. ꦠꦺ ꦏꦴꦪꦱ꧀ꦱ ꦨꦺꦢꦴ ꦥꦫꦁ ꦩꦫꦟꦴ ꦄꦥꦴꦪꦁ ꦢꦸꦒ꧀ꦒꦠꦶꦁ ꦮꦶꦤꦶꦥꦴꦠꦁ ꦤꦶꦫꦪꦁ ꦈꦥꦥꦤ꧀ꦤꦴ. ꦆꦩꦺ ꦮꦴ ꦥꦤ ꦨꦺꦴꦤ꧀ꦠꦺꦴ ꦱꦠ꧀ꦠꦴ ꦏꦴꦪꦱꦸꦕꦫꦶꦠꦺꦤ ꦱꦩꦤ꧀ꦤꦴꦒꦠꦴ ꦮꦕꦷꦱꦸꦕꦫꦶꦠꦺꦤ ꦱꦩꦤ꧀ꦤꦴꦒꦠꦴ ꦩꦤꦺꦴꦱꦸꦕꦫꦶꦠꦺꦤ ꦱꦩꦤ꧀ꦤꦴꦒꦠꦴ ꦄꦫꦶꦪꦴꦤꦁ ꦄꦤꦸꦥꦮꦴꦢꦏꦴ ꦱꦩ꧀ꦩꦴꦢꦶꦛ꧀ꦜꦶꦏꦴ ꦱꦩ꧀ꦩꦴꦢꦶꦛ꧀ꦜꦶꦏꦩ꧀ꦩꦱꦩꦴꦢꦴꦤꦴ. ꦠꦺ ꦏꦴꦪꦱ꧀ꦱ ꦨꦺꦢꦴ ꦥꦫꦁ ꦩꦫꦟꦴ ꦱꦸꦒꦠꦶꦁ ꦱꦒ꧀ꦒꦁ ꦭꦺꦴꦏꦁ ꦈꦥꦥꦤ꧀ꦤꦴ’ꦠꦶ. ꦆꦠꦶ ꦢꦶꦧ꧀ꦧꦺꦤ ꦕꦏ꧀ꦑꦸꦤꦴ ꦮꦶꦱꦸꦢ꧀ꦣꦺꦤ ꦄꦠꦶꦏ꧀ꦏꦤ꧀ꦠꦩꦴꦤꦸꦱꦏꦺꦤ ꦱꦠ꧀ꦠꦺ ꦥꦱ꧀ꦱꦠꦶ ꦕꦮꦩꦴꦤꦺ ꦈꦥꦥꦗ꧀ꦗꦩꦴꦤꦺ ꦲꦷꦤꦺ ꦥꦟꦷꦠꦺ ꦱꦸꦮꦟ꧀ꦟꦺ ꦢꦸꦧ꧀ꦧꦟ꧀ꦟꦺ, ꦱꦸꦒꦠꦺ ꦢꦸꦒ꧀ꦒꦠꦺ ꦪꦡꦴꦏꦩ꧀ꦩꦹꦥꦒꦺ ꦱꦠ꧀ꦠꦺ ꦥꦗꦴꦤꦴꦠꦶ. ꦄꦪꦩꦱ꧀ꦱ ꦢꦸꦠꦶꦪꦴ ꦮꦶꦗ꧀ꦗꦴ ꦄꦣꦶꦒꦠꦴ ꦲꦺꦴꦠꦶ, ꦄꦮꦶꦗ꧀ꦗꦴ ꦮꦶꦲꦠꦴ, ꦮꦶꦗ꧀ꦗꦴ ꦈꦥ꧀ꦥꦤ꧀ꦤꦴ, ꦠꦩꦺꦴ ꦮꦶꦲꦠꦺꦴ, ꦄꦴꦭꦺꦴꦏꦺꦴ ꦈꦥ꧀ꦥꦤ꧀ꦤꦺꦴ, ꦪꦡꦴ ꦠꦁ ꦄꦥ꧀ꦥꦩꦠ꧀ꦠꦱ꧀ꦱ ꦄꦴꦠꦴꦥꦶꦤꦺꦴ ꦥꦲꦶꦠꦠ꧀ꦠꦱ꧀ꦱ ꦮꦶꦲꦫꦠꦺꦴ.

‘‘ꦥꦸꦤ ꦕꦥꦫꦁ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦄꦴꦱꦮꦴꦤꦁ ꦑꦪꦴ ꦄꦤꦴꦱꦮꦁ ꦕꦺꦠꦺꦴꦮꦶꦩꦸꦠ꧀ꦠꦶꦁ ꦥꦚ꧀ꦚꦴꦮꦶꦩꦸꦠ꧀ꦠꦶꦁ ꦢꦶꦛ꧀ꦜꦺꦮ ꦣꦩ꧀ꦩꦺ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦶ. ꦄꦪꦩꦱ꧀ꦱ ꦠꦠꦶꦪꦴ ꦮꦶꦗ꧀ꦗꦴ ꦄꦣꦶꦒꦠꦴ ꦲꦺꦴꦠꦶ, ꦄꦮꦶꦗ꧀ꦗꦴ ꦮꦶꦲꦠꦴ, ꦮꦶꦗ꧀ꦗꦴ ꦈꦥ꧀ꦥꦤ꧀ꦤꦴ, ꦠꦩꦺꦴ ꦮꦶꦲꦠꦺꦴ, ꦄꦴꦭꦺꦴꦏꦺꦴ ꦈꦥ꧀ꦥꦤ꧀ꦤꦺꦴ, ꦪꦡꦴ ꦠꦁ ꦄꦥ꧀ꦥꦩꦠ꧀ꦠꦱ꧀ꦱ ꦄꦴꦠꦴꦥꦶꦤꦺꦴ ꦥꦲꦶꦠꦠ꧀ꦠꦱ꧀ꦱ ꦮꦶꦲꦫꦠꦺꦴ. ꦌꦮꦁ ꦑꦺꦴ ꦄꦲꦁ, ꦨꦶꦏ꧀ꦑꦮꦺ, ꦣꦩ꧀ꦩꦺꦤ ꦠꦺꦮꦶꦗ꧀ꦗꦁ ꦧ꧀ꦫꦴꦲ꧀ꦩꦟꦁ ꦥꦚ꧀ꦚꦴꦥꦺꦩꦶ, ꦤꦴꦚ꧀ꦚꦁ ꦭꦥꦶꦠꦭꦴꦥꦤꦩꦠ꧀ꦠꦺꦤꦴ’’ꦠꦶ. ꦌꦠꦩꦠ꧀ꦡꦁ ꦨꦒꦮꦴ ꦄꦮꦺꦴꦕ. ꦠꦠ꧀ꦡꦺꦠꦁ ꦆꦠꦶ ꦮꦸꦕ꧀ꦕꦠꦶ –

‘‘ꦥꦸꦧ꧀ꦧꦺꦤꦶꦮꦴꦱꦁ ꦪꦺꦴꦮꦺꦢꦶ [ꦪꦺꦴꦮꦺꦢꦶ (ꦱꦧ꧀ꦧꦠ꧀ꦡ)], ꦱꦒ꧀ꦒꦴꦥꦴꦪꦚ꧀ꦕ ꦥꦱ꧀ꦱꦠꦶ;

ꦄꦡꦺꦴ [ꦄꦡ (ꦱ꧀ꦪꦴ. ꦏ.)] ꦗꦴꦠꦶꦏ꧀ꦑꦪꦁ ꦥꦠ꧀ꦠꦺꦴ, ꦄꦨꦶꦚ꧀ꦚꦴꦮꦺꦴꦱꦶꦠꦺꦴ ꦩꦸꦤꦶ.

‘‘ꦌꦠꦴꦲꦶ ꦠꦷꦲꦶ ꦮꦶꦗ꧀ꦗꦴꦲꦶ, ꦠꦺꦮꦶꦗ꧀ꦗꦺꦴ ꦲꦺꦴꦠꦶ ꦧ꧀ꦫꦴꦲ꧀ꦩꦟꦺꦴ;

ꦠꦩꦲꦁ ꦮꦢꦴꦩꦶ ꦠꦺꦮꦶꦗ꧀ꦗꦁ, ꦤꦴꦚ꧀ꦚꦁ ꦭꦥꦶꦠꦭꦴꦥꦤ’’ꦤ꧀ꦠꦶ.

ꦄꦪꦩ꧀ꦥꦶ ꦄꦠ꧀ꦡꦺꦴ ꦮꦸꦠ꧀ꦠꦺꦴ ꦨꦒꦮꦠꦴ, ꦆꦠꦶ ꦩꦺ ꦱꦸꦠꦤ꧀ꦠꦶ. ꦢꦱꦩꦁ.

ꦥꦚ꧀ꦕꦩꦺꦴ ꦮꦒ꧀ꦒꦺꦴ ꦤꦶꦛ꧀ꦜꦶꦠꦺꦴ.

ꦠꦱ꧀ꦱꦸꦢ꧀ꦢꦴꦤꦁ –

ꦥꦱꦴꦢ ꦗꦷꦮꦶꦠ ꦱꦔ꧀ꦓꦴꦛꦶ, ꦄꦒ꧀ꦒꦶ ꦈꦥꦥꦫꦶꦏ꧀ꦑꦪꦴ;

ꦈꦥꦥꦠ꧀ꦠꦶ [ꦈꦥ꧀ꦥꦠ꧀ꦠꦶ (ꦱꦷ.)] ꦏꦴꦩ ꦏꦭ꧀ꦪꦴꦟꦁ, ꦢꦴꦤꦁ ꦣꦩ꧀ꦩꦺꦤ ꦠꦺ ꦢꦱꦴꦠꦶ.

ꦠꦶꦏꦤꦶꦥꦴꦠꦺꦴ ꦤꦶꦛ꧀ꦜꦶꦠꦺꦴ.