꧒. ꦱꦩ꧀ꦩꦴꦢꦶꦛ꧀ꦜꦶꦏꦱꦸꦠ꧀ꦠꦁ

꧗꧑. ꦮꦸꦠ꧀ꦠꦚ꧀ꦲꦺꦠꦁ ꦨꦒꦮꦠꦴ, ꦮꦸꦠ꧀ꦠꦩꦫꦲꦠꦴꦠꦶ ꦩꦺ ꦱꦸꦠꦁ –

‘‘ꦢꦶꦛ꧀ꦜꦴ ꦩꦪꦴ, ꦨꦶꦏ꧀ꦑꦮꦺ, ꦱꦠ꧀ꦠꦴ ꦏꦴꦪꦱꦸꦕꦫꦶꦠꦺꦤ ꦱꦩꦤ꧀ꦤꦴꦒꦠꦴ ꦮꦕꦷꦱꦸꦕꦫꦶꦠꦺꦤ ꦱꦩꦤ꧀ꦤꦴꦒꦠꦴ ꦩꦤꦺꦴꦱꦸꦕꦫꦶꦠꦺꦤ ꦱꦩꦤ꧀ꦤꦴꦒꦠꦴ ꦄꦫꦶꦪꦴꦤꦁ ꦄꦤꦸꦥꦮꦴꦢꦏꦴ ꦱꦩ꧀ꦩꦴꦢꦶꦛ꧀ꦜꦶꦏꦴ ꦱꦩ꧀ꦩꦴꦢꦶꦛ꧀ꦜꦶꦏꦩ꧀ꦩꦱꦩꦴꦢꦴꦤꦴ. ꦠꦺ ꦏꦴꦪꦱ꧀ꦱ ꦨꦺꦢꦴ ꦥꦫꦁ ꦩꦫꦟꦴ ꦱꦸꦒꦠꦶꦁ ꦱꦒ꧀ꦒꦁ ꦭꦺꦴꦏꦁ ꦈꦥꦥꦤ꧀ꦤꦴ.

‘‘ꦠꦁ ꦑꦺꦴ ꦥꦤꦴꦲꦁ, ꦨꦶꦏ꧀ꦑꦮꦺ, ꦤꦴꦚ꧀ꦚꦱ꧀ꦱ ꦱꦩꦟꦱ꧀ꦱ ꦮꦴ ꦧ꧀ꦫꦴꦲ꧀ꦩꦟꦱ꧀ꦱ ꦮꦴ ꦱꦸꦠ꧀ꦮꦴ ꦮꦢꦴꦩꦶ. ꦢꦶꦛ꧀ꦜꦴ ꦩꦪꦴ, ꦨꦶꦏ꧀ꦑꦮꦺ, ꦱꦠ꧀ꦠꦴ ꦏꦴꦪꦱꦸꦕꦫꦶꦠꦺꦤ ꦱꦩꦤ꧀ꦤꦴꦒꦠꦴ ꦮꦕꦷꦱꦸꦕꦫꦶꦠꦺꦤ ꦱꦩꦤ꧀ꦤꦴꦒꦠꦴ ꦩꦤꦺꦴꦱꦸꦕꦫꦶꦠꦺꦤ ꦱꦩꦤ꧀ꦤꦴꦒꦠꦴ ꦄꦫꦶꦪꦴꦤꦁ ꦄꦤꦸꦥꦮꦴꦢꦏꦴ ꦱꦩ꧀ꦩꦴꦢꦶꦛ꧀ꦜꦶꦏꦴ ꦱꦩ꧀ꦩꦴꦢꦶꦛ꧀ꦜꦶꦏꦩ꧀ꦩꦱꦩꦴꦢꦴꦤꦴ. ꦠꦺ ꦏꦴꦪꦱ꧀ꦱ ꦨꦺꦢꦴ ꦥꦫꦁ ꦩꦫꦟꦴ ꦱꦸꦒꦠꦶꦁ ꦱꦒ꧀ꦒꦁ ꦭꦺꦴꦏꦁ ꦈꦥꦥꦤ꧀ꦤꦴ. ꦄꦥꦶ ꦕ, ꦨꦶꦏ꧀ꦑꦮꦺ, ꦪꦢꦺꦮ ꦱꦴꦩꦁ ꦚꦴꦠꦁ ꦱꦴꦩꦁ ꦢꦶꦛ꧀ꦜꦁ ꦱꦴꦩꦁ ꦮꦶꦢꦶꦠꦁ ꦠꦢꦺꦮꦴꦲꦁ ꦮꦢꦴꦩꦶ.

‘‘ꦢꦶꦛ꧀ꦜꦴ ꦩꦪꦴ, ꦨꦶꦏ꧀ꦑꦮꦺ, ꦱꦠ꧀ꦠꦴ ꦏꦴꦪꦱꦸꦕꦫꦶꦠꦺꦤ ꦱꦩꦤ꧀ꦤꦴꦒꦠꦴ ꦮꦕꦷꦱꦸꦕꦫꦶꦠꦺꦤ ꦱꦩꦤ꧀ꦤꦴꦒꦠꦴ ꦩꦤꦺꦴꦱꦸꦕꦫꦶꦠꦺꦤ ꦱꦩꦤ꧀ꦤꦴꦒꦠꦴ ꦄꦫꦶꦪꦴꦤꦁ ꦄꦤꦸꦥꦮꦴꦢꦏꦴ ꦱꦩ꧀ꦩꦴꦢꦶꦛ꧀ꦜꦶꦏꦴ ꦱꦩ꧀ꦩꦴꦢꦶꦛ꧀ꦜꦶꦏꦩ꧀ꦩꦱꦩꦴꦢꦴꦤꦴ. ꦠꦺ ꦏꦴꦪꦱ꧀ꦱ ꦨꦺꦢꦴ ꦥꦫꦁ ꦩꦫꦟꦴ ꦱꦸꦒꦠꦶꦁ ꦱꦒ꧀ꦒꦁ ꦭꦺꦴꦏꦁ ꦈꦥꦥꦤ꧀ꦤꦴ’’ꦠꦶ. ꦌꦠꦩꦠ꧀ꦡꦁ ꦨꦒꦮꦴ ꦄꦮꦺꦴꦕ. ꦠꦠ꧀ꦡꦺꦠꦁ ꦆꦠꦶ ꦮꦸꦕ꧀ꦕꦠꦶ –

‘‘ꦱꦩ꧀ꦩꦴ ꦩꦤꦁ ꦥꦟꦶꦣꦴꦪ, ꦱꦩ꧀ꦩꦴ ꦮꦴꦕꦚ꧀ꦕ ꦨꦴꦱꦶꦪ [ꦱꦩ꧀ꦩꦴ ꦮꦴꦕꦁ ꦄꦨꦴꦱꦶꦪ (ꦱꦧ꧀ꦧꦠ꧀ꦡ)];

ꦱꦩ꧀ꦩꦴ ꦏꦩ꧀ꦩꦴꦤꦶ ꦏꦠ꧀ꦮꦴꦤ, ꦏꦴꦪꦺꦤ ꦆꦣ ꦥꦸꦒ꧀ꦒꦭꦺꦴ.

‘‘ꦧꦲꦸꦱ꧀ꦱꦸꦠꦺꦴ ꦥꦸꦚ꧀ꦚꦏꦫꦺꦴ, ꦄꦥ꧀ꦥꦱ꧀ꦩꦶꦁ ꦆꦣ ꦗꦷꦮꦶꦠꦺ;

ꦏꦴꦪꦱ꧀ꦱ ꦨꦺꦢꦴ ꦱꦥ꧀ꦥꦚ꧀ꦚꦺꦴ, ꦱꦒ꧀ꦒꦁ ꦱꦺꦴ ꦈꦥꦥꦗ꧀ꦗꦠꦷ’’ꦠꦶ.

ꦄꦪꦩ꧀ꦥꦶ ꦄꦠ꧀ꦡꦺꦴ ꦮꦸꦠ꧀ꦠꦺꦴ ꦨꦒꦮꦠꦴ, ꦆꦠꦶ ꦩꦺ ꦱꦸꦠꦤ꧀ꦠꦶ. ꦢꦸꦠꦶꦪꦁ.