꧔. ꦥꦚ꧀ꦚꦴꦥꦫꦶꦲꦷꦤꦱꦸꦠ꧀ꦠꦁ

꧔꧑. ꦮꦸꦠ꧀ꦠꦚ꧀ꦲꦺꦠꦁ ꦨꦒꦮꦠꦴ, ꦮꦸꦠ꧀ꦠꦩꦫꦲꦠꦴꦠꦶ ꦩꦺ ꦱꦸꦠꦁ –

‘‘ꦠꦺ, ꦨꦶꦏ꧀ꦑꦮꦺ, ꦱꦠ꧀ꦠꦴ ꦱꦸꦥꦫꦶꦲꦷꦤꦴ ꦪꦺ ꦄꦫꦶꦪꦴꦪ ꦥꦚ꧀ꦚꦴꦪ ꦥꦫꦶꦲꦷꦤꦴ. ꦠꦺ ꦢꦶꦛ꧀ꦜꦺꦮ ꦣꦩ꧀ꦩꦺ ꦢꦸꦏ꧀ꦑꦁ ꦮꦶꦲꦫꦤ꧀ꦠꦶ ꦱꦮꦶꦓꦴꦠꦁ ꦱꦈꦥꦴꦪꦴꦱꦁ ꦱꦥꦫꦶꦭ꦳ꦴꦲꦁ; ꦏꦴꦪꦱ꧀ꦱ ꦨꦺꦢꦴ ꦥꦫꦁ ꦩꦫꦟꦴ ꦢꦸꦒ꧀ꦒꦠꦶ ꦥꦴꦛꦶꦏꦔ꧀ꦑꦴ. ꦠꦺ [ꦠꦺ ꦕ ꦑꦺꦴ (?)], ꦨꦶꦏ꧀ꦑꦮꦺ, ꦱꦠ꧀ꦠꦴ ꦄꦥꦫꦶꦲꦷꦤꦴ ꦪꦺ ꦄꦫꦶꦪꦴꦪ ꦥꦚ꧀ꦚꦴꦪ ꦄꦥꦫꦶꦲꦷꦤꦴ. ꦠꦺ ꦢꦶꦛ꧀ꦜꦺꦮ ꦣꦩ꧀ꦩꦺ ꦱꦸꦑꦁ ꦮꦶꦲꦫꦤ꧀ꦠꦶ ꦄꦮꦶꦓꦴꦠꦁ ꦄꦤꦸꦥꦴꦪꦴꦱꦁ ꦄꦥꦫꦶꦭ꦳ꦴꦲꦁ; ꦏꦴꦪꦱ꧀ꦱ ꦨꦺꦢꦴ ꦥꦫꦁ ꦩꦫꦟꦴ ꦱꦸꦒꦠꦶ ꦥꦴꦛꦶꦏꦔ꧀ꦑꦴ’’ꦠꦶ. ꦌꦠꦩꦠ꧀ꦡꦁ ꦨꦒꦮꦴ ꦄꦮꦺꦴꦕ. ꦠꦠ꧀ꦡꦺꦠꦁ ꦆꦠꦶ ꦮꦸꦕ꧀ꦕꦠꦶ –

‘‘ꦥꦚ꧀ꦚꦴꦪ ꦥꦫꦶꦲꦴꦤꦺꦤ, ꦥꦱ꧀ꦱ ꦭꦺꦴꦏꦁ ꦱꦢꦺꦮꦏꦁ;

ꦤꦶꦮꦶꦛ꧀ꦜꦁ ꦤꦴꦩꦫꦹꦥꦱ꧀ꦩꦶꦁ, ꦆꦢꦁ ꦱꦕ꧀ꦕꦤ꧀ꦠꦶ ꦩꦚ꧀ꦚꦠꦶ.

‘‘ꦥꦚ꧀ꦚꦴ ꦲꦶ ꦱꦺꦛ꧀ꦜꦴ ꦭꦺꦴꦏꦱ꧀ꦩꦶꦁ, ꦪꦴꦪꦁ ꦤꦶꦧ꧀ꦧꦺꦣꦒꦴꦩꦶꦤꦷ;

ꦪꦴꦪ ꦱꦩ꧀ꦩꦴ ꦥꦗꦴꦤꦴꦠꦶ, ꦗꦴꦠꦶꦨꦮꦥꦫꦶꦏ꧀ꦑꦪꦁ.

‘‘ꦠꦺꦱꦁ ꦢꦺꦮꦴ ꦩꦤꦸꦱ꧀ꦱꦴ ꦕ, ꦱꦩ꧀ꦧꦸꦢ꧀ꦣꦴꦤꦁ ꦱꦠꦷꦩꦠꦁ;

ꦥꦶꦲꦪꦤ꧀ꦠꦶ ꦲꦴꦱꦥꦚ꧀ꦚꦴꦤꦁ [ꦲꦴꦱꦸꦥꦚ꧀ꦚꦴꦤꦁ (ꦱꦷ. ꦄꦛ꧀ꦜ.)], ꦱꦫꦷꦫꦤ꧀ꦠꦶꦩꦣꦴꦫꦶꦤ’’ꦤ꧀ꦠꦶ.

ꦄꦪꦩ꧀ꦥꦶ ꦄꦠ꧀ꦡꦺꦴ ꦮꦸꦠ꧀ꦠꦺꦴ ꦨꦒꦮꦠꦴ, ꦆꦠꦶ ꦩꦺ ꦱꦸꦠꦤ꧀ꦠꦶ. ꦕꦠꦸꦠ꧀ꦡꦁ.