꧑꧐. ꦢꦟ꧀ꦝꦮꦒ꧀ꦒꦺꦴ

꧑꧒꧙. ꦱꦧ꧀ꦧꦺ ꦠꦱꦤ꧀ꦠꦶ ꦢꦟ꧀ꦝꦱ꧀ꦱ, ꦱꦧ꧀ꦧꦺ ꦨꦴꦪꦤ꧀ꦠꦶ ꦩꦕ꧀ꦕꦸꦤꦺꦴ;

ꦄꦠ꧀ꦠꦴꦤꦁ ꦈꦥꦩꦁ ꦏꦠ꧀ꦮꦴ, ꦤ ꦲꦤꦺꦪ꧀ꦪ ꦤ ꦓꦴꦠꦪꦺ.

꧑꧓꧐. ꦱꦧ꧀ꦧꦺ ꦠꦱꦤ꧀ꦠꦶ ꦢꦟ꧀ꦝꦱ꧀ꦱ, ꦱꦧ꧀ꦧꦺꦱꦁ ꦗꦷꦮꦶꦠꦁ ꦥꦶꦪꦁ;

ꦄꦠ꧀ꦠꦴꦤꦁ ꦈꦥꦩꦁ ꦏꦠ꧀ꦮꦴ, ꦤ ꦲꦤꦺꦪ꧀ꦪ ꦤ ꦓꦴꦠꦪꦺ.

꧑꧓꧑. ꦱꦸꦑꦏꦴꦩꦴꦤꦶ ꦨꦹꦠꦴꦤꦶ, ꦪꦺꦴ ꦢꦟ꧀ꦝꦺꦤ ꦮꦶꦲꦶꦁꦱꦠꦶ;

ꦄꦠ꧀ꦠꦤꦺꦴ ꦱꦸꦑꦩꦺꦱꦴꦤꦺꦴ, ꦥꦺꦕ꧀ꦕ ꦱꦺꦴ ꦤ ꦭꦨꦠꦺ ꦱꦸꦑꦁ.

꧑꧓꧒. ꦱꦸꦑꦏꦴꦩꦴꦤꦶ ꦨꦹꦠꦴꦤꦶ, ꦪꦺꦴ ꦢꦟ꧀ꦝꦺꦤ ꦤ ꦲꦶꦁꦱꦠꦶ;

ꦄꦠ꧀ꦠꦤꦺꦴ ꦱꦸꦑꦩꦺꦱꦴꦤꦺꦴ, ꦥꦺꦕ꧀ꦕ ꦱꦺꦴ ꦭꦨꦠꦺ ꦱꦸꦑꦁ.

꧑꧓꧓. ꦩꦴꦮꦺꦴꦕ ꦦꦫꦸꦱꦁ ꦏꦚ꧀ꦕꦶ, ꦮꦸꦠ꧀ꦠꦴ ꦥꦛꦶꦮꦢꦺꦪ꧀ꦪꦸ ꦠꦁ [ꦥꦛꦶꦮꦢꦺꦪ꧀ꦪꦸꦁ ꦠꦁ (ꦏ.)];

ꦢꦸꦏ꧀ꦑꦴ ꦲꦶ ꦱꦴꦫꦩ꧀ꦨꦏꦡꦴ, ꦥꦛꦶꦢꦟ꧀ꦝꦴ ꦦꦸꦱꦺꦪ꧀ꦪꦸ ꦠꦁ [ꦦꦸꦱꦺꦪ꧀ꦪꦸꦁ ꦠꦁ (ꦏ.)].

꧑꧓꧔. ꦱꦕꦺ ꦤꦺꦫꦺꦱꦶ ꦄꦠ꧀ꦠꦴꦤꦁ, ꦏꦁꦱꦺꦴ ꦈꦥꦲꦠꦺꦴ ꦪꦡꦴ;

ꦌꦱ ꦥꦠ꧀ꦠꦺꦴꦱꦶ ꦤꦶꦧ꧀ꦧꦴꦤꦁ, ꦱꦴꦫꦩ꧀ꦨꦺꦴ ꦠꦺ ꦤ ꦮꦶꦗ꧀ꦗꦠꦶ.

꧑꧓꧕. ꦪꦡꦴ ꦢꦟ꧀ꦝꦺꦤ ꦒꦺꦴꦥꦴꦭꦺꦴ, ꦒꦴꦮꦺꦴ ꦥꦴꦗꦺꦠꦶ ꦒꦺꦴꦕꦫꦁ;

ꦌꦮꦁ ꦗꦫꦴ ꦕ ꦩꦕ꧀ꦕꦸ ꦕ, ꦄꦴꦪꦸꦁ ꦥꦴꦗꦺꦤ꧀ꦠꦶ ꦥꦴꦟꦶꦤꦁ.

꧑꧓꧖. ꦄꦡ ꦥꦴꦥꦴꦤꦶ ꦏꦩ꧀ꦩꦴꦤꦶ, ꦏꦫꦁ ꦧꦴꦭꦺꦴ ꦤ ꦧꦸꦗ꧀ꦙꦠꦶ;

ꦱꦺꦲꦶ ꦏꦩ꧀ꦩꦺꦲꦶ ꦢꦸꦩ꧀ꦩꦺꦣꦺꦴ, ꦄꦒ꧀ꦒꦶꦢꦝ꧀ꦞꦺꦴꦮ ꦠꦥ꧀ꦥꦠꦶ.

꧑꧓꧗. ꦪꦺꦴ ꦢꦟ꧀ꦝꦺꦤ ꦄꦢꦟ꧀ꦝꦺꦱꦸ, ꦄꦥ꧀ꦥꦢꦸꦛ꧀ꦜꦺꦱꦸ ꦢꦸꦱ꧀ꦱꦠꦶ;

ꦢꦱꦤ꧀ꦤꦩꦚ꧀ꦚꦠꦫꦁ ꦜꦴꦤꦁ, ꦑꦶꦥ꧀ꦥꦩꦺꦮ ꦤꦶꦒꦕ꧀ꦖꦠꦶ.

꧑꧓꧘. ꦮꦺꦢꦤꦁ ꦦꦫꦸꦱꦁ ꦗꦴꦤꦶꦁ, ꦱꦫꦷꦫꦱ꧀ꦱ ꦕ ꦨꦺꦢꦤꦁ [ꦱꦫꦷꦫꦱ꧀ꦱ ꦥꦨꦺꦢꦤꦁ (ꦱ꧀ꦪꦴ.)];

ꦒꦫꦸꦏꦁ ꦮꦴꦥꦶ ꦄꦴꦧꦴꦣꦁ, ꦕꦶꦠ꧀ꦠꦏ꧀ꦑꦺꦥꦚ꧀ꦕ [ꦕꦶꦠ꧀ꦠꦏ꧀ꦑꦺꦥꦁ ꦮ (ꦱꦷ. ꦱ꧀ꦪꦴ. ꦥꦷ.)] ꦥꦴꦥꦸꦟꦺ.

꧑꧓꧙. ꦫꦴꦗꦠꦺꦴ ꦮꦴ ꦈꦥꦱꦒ꧀ꦒꦁ [ꦈꦥꦱ꧀ꦱꦒ꧀ꦒꦁ (ꦱꦷ. ꦥꦷ.)], ꦄꦧ꧀ꦨꦏ꧀ꦑꦴꦤꦚ꧀ꦕ [ꦄꦧ꧀ꦨꦏ꧀ꦑꦴꦤꦁ ꦮ (ꦱꦷ. ꦥꦷ.)] ꦢꦴꦫꦸꦟꦁ;

ꦥꦫꦶꦏ꧀ꦑꦪꦚ꧀ꦕ [ꦥꦫꦶꦏ꧀ꦑꦪꦁ ꦮ (ꦱꦷ. ꦱ꧀ꦪꦴ. ꦥꦷ.)] ꦚꦴꦠꦷꦤꦁ, ꦨꦺꦴꦒꦴꦤꦚ꧀ꦕ [ꦨꦺꦴꦒꦴꦤꦁ ꦮ (ꦱꦷ. ꦱ꧀ꦪꦴ. ꦥꦷ.)] ꦥꦨꦔ꧀ꦒꦸꦫꦁ [ꦥꦨꦔ꧀ꦒꦸꦤꦁ (ꦏ.)].

꧑꧔꧐. ꦄꦡ ꦮꦴꦱ꧀ꦱ ꦄꦒꦴꦫꦴꦤꦶ, ꦄꦒ꧀ꦒꦶ ꦝꦲꦠꦶ [ꦝꦪ꧀ꦲꦠꦶ (ꦏ.)] ꦥꦴꦮꦏꦺꦴ;

ꦏꦴꦪꦱ꧀ꦱ ꦨꦺꦢꦴ ꦢꦸꦥ꧀ꦥꦚ꧀ꦚꦺꦴ, ꦤꦶꦫꦪꦁ ꦱꦺꦴꦥꦥꦗ꧀ꦗꦠꦶ [ꦱꦺꦴ ꦈꦥꦥꦗ꧀ꦗꦠꦶ (ꦱꦷ. ꦱ꧀ꦪꦴ.)].

꧑꧔꧑. ꦤ ꦤꦒ꧀ꦒꦕꦫꦶꦪꦴ ꦤ ꦗꦛꦴ ꦤ ꦥꦔ꧀ꦏꦴ, ꦤꦴꦤꦴꦱꦏꦴ ꦡꦟ꧀ꦝꦶꦭꦱꦴꦪꦶꦏꦴ ꦮꦴ;

ꦫꦗꦺꦴꦗꦭ꧀ꦭꦁ ꦈꦏ꧀ꦏꦸꦛꦶꦏꦥ꧀ꦥꦣꦴꦤꦁ, ꦱꦺꦴꦣꦺꦤ꧀ꦠꦶ ꦩꦕ꧀ꦕꦁ ꦄꦮꦶꦠꦶꦟ꧀ꦟꦏꦔ꧀ꦑꦁ.

꧑꧔꧒. ꦄꦭꦔ꧀ꦏꦠꦺꦴ ꦕꦺꦥꦶ ꦱꦩꦁ ꦕꦫꦺꦪ꧀ꦪ, ꦱꦤ꧀ꦠꦺꦴ ꦢꦤ꧀ꦠꦺꦴ ꦤꦶꦪꦠꦺꦴ ꦧ꧀ꦫꦲ꧀ꦩꦕꦴꦫꦷ;

ꦱꦧ꧀ꦧꦺꦱꦸ ꦨꦹꦠꦺꦱꦸ ꦤꦶꦣꦴꦪ ꦢꦟ꧀ꦝꦁ, ꦱꦺꦴ ꦧ꧀ꦫꦴꦲ꧀ꦩꦟꦺꦴ ꦱꦺꦴ ꦱꦩꦟꦺꦴ ꦱ ꦨꦶꦏ꧀ꦑꦸ.

꧑꧔꧓. ꦲꦶꦫꦷꦤꦶꦱꦺꦣꦺꦴ ꦥꦸꦫꦶꦱꦺꦴ, ꦏꦺꦴꦕꦶ ꦭꦺꦴꦏꦱ꧀ꦩꦶ ꦮꦶꦗ꧀ꦗꦠꦶ;

ꦪꦺꦴ ꦤꦶꦢ꧀ꦢꦁ [ꦤꦶꦤ꧀ꦢꦁ (ꦱꦷ. ꦥꦷ.) ꦱꦁ. ꦤꦶ. ꧑.꧑꧘] ꦄꦥꦧꦺꦴꦣꦺꦠꦶ [ꦄꦥꦧꦺꦴꦣꦠꦶ (ꦱꦷ. ꦱ꧀ꦪꦴ. ꦥꦷ.)], ꦄꦱ꧀ꦱꦺꦴ ꦨꦢ꧀ꦫꦺꦴ ꦏꦱꦴꦩꦶꦮ.

꧑꧔꧔. ꦄꦱ꧀ꦱꦺꦴ ꦪꦡꦴ ꦨꦢ꧀ꦫꦺꦴ ꦏꦱꦴꦤꦶꦮꦶꦛ꧀ꦜꦺꦴ, ꦄꦴꦠꦴꦥꦶꦤꦺꦴ ꦱꦁꦮꦺꦒꦶꦤꦺꦴ ꦨꦮꦴꦡ;

ꦱꦢ꧀ꦣꦴꦪ ꦱꦷꦭꦺꦤ ꦕ ꦮꦷꦫꦶꦪꦺꦤ ꦕ, ꦱꦩꦴꦣꦶꦤꦴ ꦣꦩ꧀ꦩꦮꦶꦤꦶꦕ꧀ꦖꦪꦺꦤ ꦕ;

ꦱꦩ꧀ꦥꦤ꧀ꦤꦮꦶꦗ꧀ꦗꦴꦕꦫꦟꦴ ꦥꦠꦶꦱ꧀ꦱꦠꦴ, ꦗꦲꦶꦱ꧀ꦱꦡ [ꦥꦲꦱ꧀ꦱꦡ (ꦱꦷ. ꦱ꧀ꦪꦴ. ꦥꦷ.)] ꦢꦸꦏ꧀ꦑꦩꦶꦢꦁ ꦄꦤꦥ꧀ꦥꦏꦁ.

꧑꧔꧕. ꦈꦢꦏꦚ꧀ꦲꦶ ꦤꦪꦤ꧀ꦠꦶ ꦤꦺꦠ꧀ꦠꦶꦏꦴ, ꦈꦱꦸꦏꦴꦫꦴ ꦤꦩꦪꦤ꧀ꦠꦶ ꦠꦺꦗꦤꦁ;

ꦢꦴꦫꦸꦁ ꦤꦩꦪꦤ꧀ꦠꦶ ꦠꦕ꧀ꦖꦏꦴ, ꦄꦠ꧀ꦠꦴꦤꦁ ꦢꦩꦪꦤ꧀ꦠꦶ ꦱꦸꦧ꧀ꦧꦠꦴ.

ꦢꦟ꧀ꦝꦮꦒ꧀ꦒꦺꦴ ꦢꦱꦩꦺꦴ ꦤꦶꦛ꧀ꦜꦶꦠꦺꦴ.