꧔. ꦩꦲꦴꦱꦸꦢꦱ꧀ꦱꦤꦕꦫꦶꦪꦴ

꧒꧘. ‘‘ꦏꦸꦱꦴꦮꦠꦶꦩ꧀ꦲꦶ ꦤꦒꦫꦺ, ꦪꦢꦴ ꦄꦴꦱꦶꦁ ꦩꦲꦷꦥꦠꦶ;

ꦩꦲꦴꦱꦸꦢꦱ꧀ꦱꦤꦺꦴ ꦤꦴꦩ, ꦕꦏ꧀ꦏꦮꦠ꧀ꦠꦷ ꦩꦲꦧ꧀ꦧꦭꦺꦴ.

꧒꧙. ‘‘ꦠꦠ꧀ꦡꦴꦲꦁ ꦢꦶꦮꦱꦺ ꦠꦶꦏ꧀ꦑꦠ꧀ꦠꦸꦁ, ꦓꦺꦴꦱꦴꦥꦺꦩꦶ ꦠꦲꦶꦁ ꦠꦲꦶꦁ;

‘ꦏꦺꦴ ꦏꦶꦁ ꦆꦕ꧀ꦖꦠꦶ ꦥꦠ꧀ꦡꦺꦠꦶ, ꦏꦱ꧀ꦱ ꦏꦶꦁ ꦢꦷꦪꦠꦹ ꦣꦤꦁ.

꧓꧐. ‘‘‘ꦏꦺꦴ ꦖꦴꦠꦏꦺꦴ ꦏꦺꦴ ꦠꦱꦶꦠꦺꦴ, ꦏꦺꦴ ꦩꦴꦭꦁ ꦏꦺꦴ ꦮꦶꦭꦺꦥꦤꦁ;

ꦤꦴꦤꦴꦫꦠ꧀ꦠꦴꦤꦶ ꦮꦠ꧀ꦡꦴꦤꦶ, ꦏꦺꦴ ꦤꦒ꧀ꦒꦺꦴ ꦥꦫꦶꦢꦲꦶꦱ꧀ꦱꦠꦶ.

꧓꧑. ‘‘‘ꦏꦺꦴ ꦥꦡꦺ ꦖꦠ꧀ꦠꦩꦴꦢꦺꦠꦶ, ꦏꦺꦴꦥꦴꦲꦤꦴ ꦩꦸꦢꦹ ꦱꦸꦨꦴ’;

ꦆꦠꦶ ꦱꦴꦪꦚ꧀ꦕ ꦥꦴꦠꦺꦴ ꦕ, ꦓꦺꦴꦱꦴꦥꦺꦩꦶ ꦠꦲꦶꦁ ꦠꦲꦶꦁ.

꧓꧒. ‘‘ꦤ ꦠꦁ ꦢꦱꦱꦸ ꦜꦴꦤꦺꦱꦸ, ꦤꦥꦶ ꦜꦴꦤꦱꦠꦺꦱꦸ ꦮꦴ;

ꦄꦤꦺꦏꦱꦠꦜꦴꦤꦺꦱꦸ, ꦥꦛꦶꦪꦠ꧀ꦠꦁ ꦪꦴꦕꦏꦺ ꦣꦤꦁ.

꧓꧓. ‘‘ꦢꦶꦮꦴ ꦮꦴ ꦪꦢꦶ ꦮꦴ ꦫꦠ꧀ꦠꦶꦁ, ꦪꦢꦶ ꦌꦠꦶ ꦮꦤꦶꦧ꧀ꦧꦏꦺꦴ;

ꦭꦢ꧀ꦣꦴ ꦪꦢꦶꦕ꧀ꦖꦏꦁ ꦨꦺꦴꦒꦁ, ꦥꦹꦫꦲꦠ꧀ꦡꦺꦴꦮ ꦒꦕ꧀ꦖꦠꦶ.

꧓꧔. ‘‘ꦌꦮꦫꦹꦥꦁ ꦩꦲꦴꦢꦴꦤꦁ, ꦄꦢꦴꦱꦶꦁ ꦪꦴꦮꦗꦷꦮꦶꦏꦁ;

ꦤꦥꦴꦲꦁ ꦢꦺꦱ꧀ꦱꦁ ꦣꦤꦁ ꦢꦩ꧀ꦩꦶ, ꦤꦥꦶ ꦤꦠ꧀ꦡꦶ ꦤꦶꦕꦪꦺꦴ ꦩꦪꦶ.

꧓꧕. ‘‘ꦪꦡꦴꦥꦶ ꦄꦴꦠꦸꦫꦺꦴ ꦤꦴꦩ, ꦫꦺꦴꦒꦠꦺꦴ ꦥꦫꦶꦩꦸꦠ꧀ꦠꦶꦪꦴ;

ꦣꦤꦺꦤ ꦮꦺꦗ꧀ꦗꦁ ꦠꦥ꧀ꦥꦺꦠ꧀ꦮꦴ, ꦫꦺꦴꦒꦠꦺꦴ ꦥꦫꦶꦩꦸꦕ꧀ꦕꦠꦶ.

꧓꧖. ‘‘ꦠꦡꦺꦮꦴꦲꦁ ꦗꦴꦤꦩꦴꦤꦺꦴ, ꦥꦫꦶꦥꦹꦫꦺꦠꦸꦩꦱꦺꦱꦠꦺꦴ;

ꦈꦴꦤꦩꦤꦁ ꦥꦹꦫꦪꦶꦠꦸꦁ, ꦢꦺꦩꦶ ꦢꦴꦤꦁ ꦮꦤꦶꦧ꧀ꦧꦏꦺ;

ꦤꦶꦫꦴꦭꦪꦺꦴ ꦄꦥꦕ꧀ꦕꦴꦱꦺꦴ, ꦱꦩ꧀ꦧꦺꦴꦣꦶꦩꦤꦸꦥꦠ꧀ꦠꦶꦪꦴ’’ꦠꦶ.

ꦩꦲꦴꦱꦸꦢꦱ꧀ꦱꦤꦕꦫꦶꦪꦁ ꦕꦠꦸꦠ꧀ꦡꦁ.