꧑꧐. ꦩꦺꦴꦓꦫꦴꦗꦠ꧀ꦡꦺꦫꦄꦥꦢꦴꦤꦁ

꧓꧒꧗. ‘‘ꦥꦢꦸꦩꦸꦠ꧀ꦠꦫꦺꦴ ꦤꦴꦩ ꦗꦶꦤꦺꦴ, ꦱꦧ꧀ꦧꦭꦺꦴꦏꦮꦶꦢꦹ ꦩꦸꦤꦶ;

ꦆꦠꦺꦴ ꦱꦠꦱꦲꦱ꧀ꦱꦩ꧀ꦲꦶ, ꦏꦥ꧀ꦥꦺ ꦈꦥ꧀ꦥꦗ꧀ꦗꦶ ꦕꦏ꧀ꦑꦸꦩꦴ.

꧓꧒꧘. ‘‘ꦎꦮꦴꦢꦏꦺꦴ ꦮꦶꦚ꧀ꦚꦴꦥꦏꦺꦴ, ꦠꦴꦫꦏꦺꦴ ꦱꦧ꧀ꦧꦥꦴꦟꦶꦤꦁ;

ꦢꦺꦱꦤꦴꦏꦸꦱꦭꦺꦴ ꦧꦸꦢ꧀ꦣꦺꦴ, ꦠꦴꦫꦺꦱꦶ ꦗꦤꦠꦁ ꦧꦲꦸꦁ.

꧓꧒꧙. ‘‘ꦄꦤꦸꦏꦩ꧀ꦥꦏꦺꦴ ꦏꦴꦫꦸꦟꦶꦏꦺꦴ, ꦲꦶꦠꦺꦱꦷ ꦱꦧ꧀ꦧꦥꦴꦟꦶꦤꦁ;

ꦱꦩ꧀ꦥꦠ꧀ꦠꦺ ꦠꦶꦠ꧀ꦡꦶꦪꦺ ꦱꦧ꧀ꦧꦺ, ꦥꦚ꧀ꦕꦱꦷꦭꦺ ꦥꦠꦶꦛ꧀ꦜꦥꦶ.

꧓꧓꧐. ‘‘ꦌꦮꦁ ꦤꦶꦫꦴꦏꦸꦭꦁ ꦄꦴꦱꦶ, ꦱꦸꦚ꧀ꦚꦠꦁ ꦠꦶꦠ꧀ꦡꦶꦪꦺꦲꦶ ꦕ;

ꦮꦶꦕꦶꦠ꧀ꦠꦁ ꦄꦫꦲꦤ꧀ꦠꦺꦲꦶ, ꦮꦱꦷꦨꦹꦠꦺꦲꦶ ꦠꦴꦢꦶꦨꦶ.

꧓꧓꧑. ‘‘ꦫꦠꦤꦴꦤꦛ꧀ꦜꦥꦚ꧀ꦚꦴꦱꦁ, ꦈꦒ꧀ꦒꦠꦺꦴ ꦱꦺꦴ ꦩꦲꦴꦩꦸꦤꦶ;

ꦏꦚ꧀ꦕꦤꦒ꧀ꦓꦶꦪꦱꦔ꧀ꦏꦴꦱꦺꦴ, ꦧꦴꦠ꧀ꦠꦶꦁꦱꦮꦫꦭꦏ꧀ꦑꦟꦺꦴ.

꧓꧓꧒. ‘‘ꦮꦱ꧀ꦱꦱꦠꦱꦲꦱ꧀ꦱꦴꦤꦶ, ꦄꦴꦪꦸ ꦮꦶꦗ꧀ꦗꦠꦶ ꦠꦴꦮꦢꦺ;

ꦠꦴꦮꦠꦴ ꦠꦶꦛ꧀ꦜꦩꦴꦤꦺꦴ ꦱꦺꦴ, ꦠꦴꦫꦺꦱꦶ ꦗꦤꦠꦁ ꦧꦲꦸꦁ.

꧓꧓꧓. ‘‘ꦠꦢꦴꦲꦁ ꦲꦁꦱꦮꦠꦶꦪꦁ, ꦏꦸꦭꦺ ꦄꦚ꧀ꦚꦠꦫꦺ ꦄꦲꦸꦁ;

ꦥꦫꦏꦩ꧀ꦩꦴꦪꦤꦺ ꦪꦸꦠ꧀ꦠꦺꦴ, ꦤꦠ꧀ꦡꦶ ꦩꦺ ꦏꦶꦚ꧀ꦕꦶ ꦱꦁꦣꦤꦁ.

꧓꧓꧔. ‘‘ꦥꦛꦶꦏ꧀ꦏꦩꦤꦱꦴꦭꦴꦪꦁ, ꦮꦱꦤ꧀ꦠꦺꦴ ꦏꦠꦨꦹꦩꦶꦪꦁ;

ꦄꦒ꧀ꦒꦶꦁ ꦈꦗ꧀ꦗꦴꦭꦪꦶꦁ ꦠꦠ꧀ꦡ, ꦢꦭ꦳꧀ꦲꦁ ꦏꦟ꧀ꦲꦴꦱꦶ ꦱꦴ [ꦏꦟ꧀ꦲꦴ ꦱꦶꦪꦴ (ꦱꦷ. ꦥꦷ.), ꦝꦪ꧀ꦲꦏꦟ꧀ꦲꦴ ꦱꦶꦭꦴ (ꦱ꧀ꦪꦴ.)] ꦲꦷ.

꧓꧓꧕. ‘‘ꦠꦢꦴ ꦥꦫꦶꦱꦠꦶꦁ ꦤꦴꦡꦺꦴ, ꦕꦠꦸꦱꦕ꧀ꦕꦥꦏꦴꦱꦏꦺꦴ;

ꦱꦴꦮꦏꦁ ꦱꦩ꧀ꦥꦏꦶꦠ꧀ꦠꦺꦱꦶ, ꦭꦹꦑꦕꦷꦮꦫꦣꦴꦫꦏꦁ.

꧓꧓꧖. ‘‘ꦠꦱ꧀ꦱ ꦠꦩ꧀ꦲꦶ ꦒꦸꦟꦺ ꦠꦸꦛ꧀ꦜꦺꦴ, ꦥꦟꦶꦥꦕ꧀ꦕ [ꦥꦠꦶꦥꦗ꧀ꦗ (ꦱ꧀ꦪꦴ.)] ꦠꦡꦴꦒꦠꦁ;

ꦭꦹꦑꦕꦷꦮꦫꦣꦴꦫꦒ꧀ꦒꦁ, ꦥꦠ꧀ꦡꦪꦶꦁ ꦜꦴꦤꦩꦸꦠ꧀ꦠꦩꦁ.

꧓꧓꧗. ‘‘ꦠꦢꦴ ꦄꦮꦺꦴꦕ ꦨꦒꦮꦴ, ꦱꦴꦮꦏꦺ ꦥꦢꦸꦩꦸꦠ꧀ꦠꦫꦺꦴ;

‘ꦥꦱ꧀ꦱꦡꦺꦠꦁ ꦥꦸꦫꦶꦱꦏꦁ, ꦏꦸꦕꦺꦭꦁ ꦠꦤꦸꦢꦺꦲꦏꦁ.

꧓꧓꧘. ‘‘‘ꦥꦷꦠꦶꦥ꧀ꦥꦱꦤ꧀ꦤꦮꦢꦤꦁ, ꦱꦢ꧀ꦣꦴꦣꦤꦱꦩꦤ꧀ꦮꦶꦠꦁ [ꦱꦢ꧀ꦣꦴꦱ꧀ꦤꦺꦲꦱꦩꦤ꧀ꦮꦠꦁ (ꦏ.)];

ꦈꦢꦒ꧀ꦒꦠꦤꦸꦗꦁ ꦲꦛ꧀ꦜꦁ, ꦄꦕꦭꦁ ꦱꦴꦭꦥꦶꦟ꧀ꦝꦶꦠꦁ.

꧓꧓꧙. ‘‘‘ꦌꦱꦺꦴ ꦥꦠ꧀ꦡꦺꦠꦶ ꦠꦁ ꦜꦴꦤꦁ, ꦱꦕ꧀ꦕꦱꦺꦤꦱ꧀ꦱ ꦨꦶꦏ꧀ꦑꦸꦤꦺꦴ;

ꦭꦹꦑꦕꦷꦮꦫꦣꦴꦫꦶꦱ꧀ꦱ, ꦠꦱ꧀ꦱ ꦮꦟ꧀ꦟꦱꦶꦠꦴꦱꦪꦺꦴ [ꦮꦟ꧀ꦟꦒꦠꦴꦱꦪꦺꦴ (ꦱꦷ. ꦱ꧀ꦪꦴ. ꦥꦷ.)].

꧓꧔꧐. ‘‘ꦠꦁ ꦱꦸꦠ꧀ꦮꦴ ꦩꦸꦢꦶꦠꦺꦴ ꦲꦸꦠ꧀ꦮꦴ, ꦤꦶꦥꦕ꧀ꦕ ꦱꦶꦫꦱꦴ ꦗꦶꦤꦁ;

ꦪꦴꦮꦗꦷꦮꦁ ꦱꦸꦨꦁ ꦏꦩ꧀ꦩꦁ, ꦏꦫꦶꦠ꧀ꦮꦴ ꦗꦶꦤꦱꦴꦱꦤꦺ.

꧓꧔꧑. ‘‘ꦠꦺꦤ ꦏꦩ꧀ꦩꦺꦤ ꦱꦸꦏꦠꦺꦤ, ꦕꦺꦠꦤꦴꦥꦟꦶꦣꦷꦲꦶ ꦕ;

ꦗꦲꦶꦠ꧀ꦮꦴ ꦩꦴꦤꦸꦱꦁ ꦢꦺꦲꦁ, ꦠꦴꦮꦠꦶꦁꦱꦹꦥꦒꦺꦴ ꦄꦲꦁ.

꧓꧔꧒. ‘‘ꦥꦛꦶꦏ꧀ꦏꦩꦤꦱꦴꦭꦴꦪꦁ, ꦨꦹꦩꦶꦢꦴꦲꦏꦏꦩ꧀ꦩꦸꦤꦴ;

ꦱꦩꦱꦲꦱ꧀ꦱꦁ ꦤꦶꦫꦪꦺ, ꦄꦢꦪ꧀ꦲꦶꦁ ꦮꦺꦢꦤꦴꦛ꧀ꦛꦶꦠꦺꦴ.

꧓꧔꧓. ‘‘ꦠꦺꦤ ꦏꦩ꧀ꦩꦴꦮꦱꦺꦱꦺꦤ, ꦥꦚ꧀ꦕ ꦗꦴꦠꦶꦱꦠꦴꦤꦶꦲꦁ;

ꦩꦤꦸꦱ꧀ꦱꦺꦴ ꦏꦸꦭꦗꦺꦴ ꦲꦸꦠ꧀ꦮꦴ, ꦗꦴꦠꦶꦪꦴ ꦭꦏ꧀ꦑꦟꦔ꧀ꦏꦶꦠꦺꦴ.

꧓꧔꧔. ‘‘ꦥꦚ꧀ꦕ ꦗꦴꦠꦶꦱꦠꦴꦤꦺꦮ, ꦏꦸꦛ꧀ꦜꦫꦺꦴꦒꦱꦩꦥ꧀ꦥꦶꦠꦺꦴ;

ꦩꦲꦴꦢꦸꦏ꧀ꦑꦁ ꦄꦤꦸꦨꦮꦶꦁ, ꦠꦱ꧀ꦱ ꦏꦩ꧀ꦩꦱ꧀ꦱ ꦮꦴꦲꦱꦴ.

꧓꧔꧕. ‘‘ꦆꦩꦱ꧀ꦩꦶꦁ ꦨꦢ꧀ꦢꦏꦺ ꦏꦥ꧀ꦥꦺ, ꦈꦥꦫꦶꦛ꧀ꦜꦁ ꦪꦱꦱ꧀ꦱꦶꦤꦁ;

ꦥꦶꦟ꧀ꦝꦥꦴꦠꦺꦤ ꦠꦥ꧀ꦥꦺꦱꦶꦁ, ꦥꦱꦤ꧀ꦤꦩꦴꦤꦱꦺꦴ ꦄꦲꦁ.

꧓꧔꧖. ‘‘ꦠꦺꦤ ꦏꦩ꧀ꦩꦮꦶꦱꦺꦱꦺꦤ, ꦕꦺꦠꦤꦴꦥꦟꦶꦣꦷꦲꦶ ꦕ;

ꦗꦲꦶꦠ꧀ꦮꦴ ꦩꦴꦤꦸꦱꦁ ꦢꦺꦲꦁ, ꦠꦴꦮꦠꦶꦁꦱꦩꦒꦕ꧀ꦖꦲꦁ.

꧓꧔꧗. ‘‘ꦥꦕ꧀ꦖꦶꦩꦺ ꦨꦮꦺ ꦱꦩ꧀ꦥꦠ꧀ꦠꦺ, ꦄꦗꦴꦪꦶꦁ ꦑꦠ꧀ꦠꦶꦪꦺ ꦏꦸꦭꦺ;

ꦥꦶꦠꦸꦤꦺꦴ ꦄꦕ꧀ꦕꦪꦺꦤꦴꦲꦁ, ꦩꦲꦴꦫꦗ꧀ꦗꦱꦩꦥ꧀ꦥꦶꦠꦺꦴ.

꧓꧔꧘. ‘‘ꦏꦸꦛ꧀ꦜꦫꦺꦴꦒꦴꦣꦶꦨꦹꦠꦺꦴꦲꦁ, ꦤ ꦫꦠꦶꦁ ꦤ ꦱꦸꦑꦁ ꦭꦨꦺ;

ꦩꦺꦴꦓꦁ ꦫꦗ꧀ꦗꦁ ꦱꦸꦑꦁ ꦪꦱ꧀ꦩꦴ, ꦩꦺꦴꦓꦫꦴꦗꦴ ꦠꦠꦺꦴ ꦄꦲꦁ.

꧓꧔꧙. ‘‘ꦏꦴꦪꦱ꧀ꦱ ꦢꦺꦴꦱꦁ ꦢꦶꦱ꧀ꦮꦴꦤ, ꦥꦧ꧀ꦧꦗꦶꦁ ꦄꦤꦒꦴꦫꦶꦪꦁ;

ꦧꦴꦮꦫꦶꦱ꧀ꦱ ꦢꦶꦗꦒ꧀ꦒꦱ꧀ꦱ, ꦱꦶꦱ꧀ꦱꦠ꧀ꦠꦁ ꦄꦗ꧀ꦙꦸꦥꦴꦒꦩꦶꦁ.

꧓꧕꧐. ‘‘ꦩꦲꦠꦴ ꦥꦫꦶꦮꦴꦫꦺꦤ, ꦈꦥꦺꦕ꧀ꦕ ꦤꦫꦤꦴꦪꦏꦁ;

ꦄꦥꦸꦕ꧀ꦖꦶꦁ ꦤꦶꦥꦸꦟꦁ ꦥꦚ꧀ꦲꦁ, ꦠꦁ ꦮꦷꦫꦁ ꦮꦴꦢꦶꦱꦹꦢꦤꦁ.

꧓꧕꧑. ‘‘‘ꦄꦪꦁ ꦭꦺꦴꦏꦺꦴ ꦥꦫꦺꦴ ꦭꦺꦴꦏꦺꦴ, ꦧ꧀ꦫꦲ꧀ꦩꦭꦺꦴꦏꦺꦴ ꦱꦢꦺꦮꦏꦺꦴ;

ꦢꦶꦛ꧀ꦜꦶꦁ ꦤꦺꦴ [ꦢꦶꦛ꧀ꦜꦴ ꦤꦺꦴ (ꦱꦷ.), ꦢꦶꦛ꧀ꦜꦁ ꦤꦺꦴ (ꦥꦷ.), ꦢꦶꦛ꧀ꦜꦶꦁ ꦠꦺ (ꦱ꧀ꦪꦴ.)] ꦤꦴꦨꦶꦗꦴꦤꦴꦩꦶ, ꦒꦺꦴꦠꦩꦱ꧀ꦱ ꦪꦱꦱ꧀ꦱꦶꦤꦺꦴ.

꧓꧕꧒. ‘‘‘ꦌꦮꦴꦨꦶꦏ꧀ꦏꦤ꧀ꦠꦢꦱ꧀ꦱꦴꦮꦶꦁ, ꦄꦠ꧀ꦡꦶ ꦥꦚ꧀ꦲꦺꦤ ꦄꦴꦒꦩꦁ;

ꦏꦡꦁ ꦭꦺꦴꦏꦁ ꦄꦮꦺꦏ꧀ꦑꦤ꧀ꦠꦁ, ꦩꦕ꧀ꦕꦸꦫꦴꦗꦴ ꦤ ꦥꦱ꧀ꦱꦠꦶ’.

꧓꧕꧓. ‘‘‘ꦱꦸꦚ꧀ꦚꦠꦺꦴ ꦭꦺꦴꦏꦁ ꦄꦮꦺꦏ꧀ꦑꦱ꧀ꦱꦸ, ꦩꦺꦴꦓꦫꦴꦗ ꦱꦢꦴ ꦱꦠꦺꦴ;

ꦄꦠ꧀ꦠꦴꦤꦸꦢꦶꦛ꧀ꦜꦶꦁ ꦈꦲꦕ꧀ꦕ, ꦌꦮꦁ ꦩꦕ꧀ꦕꦸꦠꦫꦺꦴ ꦱꦶꦪꦴ.

꧓꧕꧔. ‘‘‘ꦌꦮꦁ ꦭꦺꦴꦏꦁ ꦄꦮꦺꦏ꧀ꦑꦤ꧀ꦠꦁ, ꦩꦕ꧀ꦕꦸꦫꦴꦗꦴ ꦤ ꦥꦱ꧀ꦱꦠꦶ’;

ꦆꦠꦶ ꦩꦁ ꦄꦨꦟꦶ ꦧꦸꦢ꧀ꦣꦺꦴ, ꦱꦧ꧀ꦧꦫꦺꦴꦒꦠꦶꦏꦶꦕ꧀ꦖꦏꦺꦴ.

꧓꧕꧕. ‘‘ꦱꦲ ꦒꦴꦡꦴꦮꦱꦴꦤꦺꦤ, ꦏꦺꦱꦩꦱ꧀ꦱꦸꦮꦶꦮꦗ꧀ꦗꦶꦠꦺꦴ;

ꦏꦴꦱꦴꦮꦮꦠ꧀ꦡꦮꦱꦤꦺꦴ, ꦄꦴꦱꦶꦁ ꦨꦶꦏ꧀ꦑꦸ ꦠꦡꦴꦫꦲꦴ.

꧓꧕꧖. ‘‘ꦱꦔ꧀ꦓꦶꦏꦺꦱꦸ ꦮꦶꦲꦴꦫꦺꦱꦸ, ꦤ ꦮꦱꦶꦁ ꦫꦺꦴꦒꦥꦷꦭ꦳ꦶꦠꦺꦴ;

ꦩꦴ ꦮꦶꦲꦴꦫꦺꦴ ꦥꦢꦸꦱ꧀ꦱꦷꦠꦶ, ꦮꦴꦠꦫꦺꦴꦒꦺꦲꦶ ꦥꦷꦭ꦳ꦶꦠꦺꦴ [ꦮꦴꦕꦴꦪꦴꦨꦶꦱꦸꦥꦷꦭ꦳ꦶꦠꦺꦴ (ꦱ꧀ꦪꦴ. ꦥꦷ.), ꦮꦴꦠꦫꦺꦴꦒꦷ ꦱꦸꦥꦷꦭ꦳ꦶꦠꦺꦴ (ꦏ.)].

꧓꧕꧗. ‘‘ꦱꦔ꧀ꦏꦴꦫꦏꦹꦛꦴ ꦄꦴꦲꦶꦠ꧀ꦮꦴ, ꦱꦸꦱꦴꦤꦴ ꦫꦡꦶꦏꦴꦲꦶ ꦕ;

ꦠꦠꦺꦴ ꦱꦔ꧀ꦓꦴꦛꦶꦁ ꦏꦫꦶꦠ꧀ꦮꦴ, ꦣꦴꦫꦪꦶꦁ ꦭꦹꦑꦕꦷꦮꦫꦁ.

꧓꧕꧘. ‘‘ꦩꦲꦴꦨꦶꦱꦏ꧀ꦏꦺꦴ ꦠꦱ꧀ꦩꦶꦁ ꦩꦺ, ꦒꦸꦟꦺ ꦠꦸꦛ꧀ꦜꦺꦴ ꦮꦶꦤꦴꦪꦏꦺꦴ;

ꦭꦹꦑꦕꦷꦮꦫꦣꦴꦫꦷꦤꦁ, ꦌꦠꦢꦒ꧀ꦒꦺ ꦜꦥꦺꦱꦶ ꦩꦁ.

꧓꧕꧙. ‘‘ꦥꦸꦚ꧀ꦚꦥꦴꦥꦥꦫꦶꦏ꧀ꦑꦷꦟꦺꦴ, ꦱꦧ꧀ꦧꦫꦺꦴꦒꦮꦶꦮꦗ꧀ꦗꦶꦠꦺꦴ;

ꦱꦶꦑꦷꦮ ꦄꦤꦸꦥꦴꦢꦴꦤꦺꦴ, ꦤꦶꦧ꧀ꦧꦴꦪꦶꦱ꧀ꦱꦩꦤꦴꦱꦮꦺꦴ.

꧓꧖꧐. ‘‘ꦏꦶꦭꦺꦱꦴ ꦙꦴꦥꦶꦠꦴ ꦩꦪ꧀ꦲꦁ…ꦥꦺ… ꦮꦶꦲꦫꦴꦩꦶ ꦄꦤꦴꦱꦮꦺꦴ.

꧓꧖꧑. ‘‘ꦱ꧀ꦮꦴꦒꦠꦁ ꦮꦠ ꦩꦺ ꦄꦴꦱꦶ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ.

꧓꧖꧒. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦩꦺꦴꦓꦫꦴꦗꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ

ꦄꦨꦴꦱꦶꦠ꧀ꦡꦴꦠꦶ.

ꦩꦺꦴꦓꦫꦴꦗꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦢꦱꦩꦁ.

ꦏꦕ꧀ꦕꦴꦪꦤꦮꦒ꧀ꦒꦺꦴ ꦕꦠꦸꦥꦚ꧀ꦚꦴꦱꦩꦺꦴ.