꧕꧐. ꦏꦶꦔ꧀ꦏꦟꦶꦥꦸꦥ꧀ꦦꦮꦒ꧀ꦒꦺꦴ

꧑. ꦠꦶꦏꦶꦔ꧀ꦏꦟꦶꦥꦸꦥ꧀ꦦꦶꦪꦠ꧀ꦡꦺꦫꦄꦥꦢꦴꦤꦁ

꧑. ‘‘ꦏꦟꦶꦏꦴꦫꦁꦮ ꦗꦺꦴꦠꦤ꧀ꦠꦁ, ꦤꦶꦱꦶꦤ꧀ꦤꦁ ꦥꦧ꧀ꦧꦠꦤ꧀ꦠꦫꦺ;

ꦄꦢ꧀ꦢꦱꦁ ꦮꦶꦫꦗꦁ ꦧꦸꦢ꧀ꦣꦁ, ꦮꦶꦥꦱ꧀ꦱꦶꦁ ꦭꦺꦴꦏꦤꦴꦪꦏꦁ.

꧒. ‘‘ꦠꦷꦟꦶ ꦏꦶꦔ꧀ꦏꦟꦶꦥꦸꦥ꧀ꦦꦴꦤꦶ, ꦥꦒ꧀ꦒꦪ꧀ꦲ ꦄꦨꦶꦫꦺꦴꦥꦪꦶꦁ;

ꦱꦩ꧀ꦧꦸꦢ꧀ꦣꦩꦨꦶꦥꦹꦗꦺꦠ꧀ꦮꦴ, ꦒꦕ꧀ꦖꦴꦩꦶ ꦢꦏ꧀ꦑꦶꦟꦴꦩꦸꦑꦺꦴ.

꧓. ‘‘ꦠꦺꦤ ꦏꦩ꧀ꦩꦺꦤ ꦱꦸꦏꦠꦺꦤ, ꦕꦺꦠꦤꦴꦥꦟꦶꦣꦷꦲꦶ ꦕ;

ꦗꦲꦶꦠ꧀ꦮꦴ ꦩꦴꦤꦸꦱꦁ ꦢꦺꦲꦁ, ꦠꦴꦮꦠꦶꦁꦱꦩꦒꦕ꧀ꦖꦲꦁ.

꧔. ‘‘ꦌꦏꦤꦮꦸꦠꦶꦠꦺꦴ ꦏꦥ꧀ꦥꦺ, ꦪꦁ ꦧꦸꦢ꧀ꦣꦩꦨꦶꦥꦹꦗꦪꦶꦁ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦧꦸꦢ꧀ꦣꦥꦹꦗꦴꦪꦶꦢꦁ ꦦꦭꦁ.

꧕. ‘‘ꦏꦶꦭꦺꦱꦴ ꦙꦴꦥꦶꦠꦴ ꦩꦪ꧀ꦲꦁ, ꦨꦮꦴ ꦱꦧ꧀ꦧꦺ ꦱꦩꦹꦲꦠꦴ;

ꦤꦴꦒꦺꦴꦮ ꦧꦤ꧀ꦣꦤꦁ ꦖꦺꦠ꧀ꦮꦴ, ꦮꦶꦲꦫꦴꦩꦶ ꦄꦤꦴꦱꦮꦺꦴ.

꧖. ‘‘ꦱ꧀ꦮꦴꦒꦠꦁ ꦮꦠ ꦩꦺ ꦄꦴꦱꦶ, ꦩꦩ ꦧꦸꦢ꧀ꦣꦱ꧀ꦱ ꦱꦤ꧀ꦠꦶꦏꦺ;

ꦠꦶꦱ꧀ꦱꦺꦴ ꦮꦶꦗ꧀ꦗꦴ ꦄꦤꦸꦥ꧀ꦥꦠ꧀ꦠꦴ, ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ.

꧗. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ, ꦮꦶꦩꦺꦴꦏ꧀ꦑꦴꦥꦶ ꦕ ꦄꦛ꧀ꦜꦶꦩꦺ;

ꦖꦭ꦳ꦨꦶꦚ꧀ꦚꦴ ꦱꦕ꧀ꦖꦶꦏꦠꦴ, ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦠꦶꦏꦶꦔ꧀ꦏꦟꦶꦥꦸꦥ꧀ꦦꦶꦪꦺꦴ ꦡꦺꦫꦺꦴ ꦆꦩꦴ

ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦠꦶꦏꦶꦔ꧀ꦏꦟꦶꦥꦸꦥ꧀ꦦꦶꦪꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦥꦜꦩꦁ.

꧒. ꦥꦁꦱꦸꦏꦹꦭꦥꦹꦗꦏꦠ꧀ꦡꦺꦫꦄꦥꦢꦴꦤꦁ

꧘. ‘‘ꦲꦶꦩꦮꦤ꧀ꦠꦱ꧀ꦱꦴꦮꦶꦢꦹꦫꦺ, ꦈꦢꦔ꧀ꦒꦟꦺꦴ ꦤꦴꦩ ꦥꦧ꧀ꦧꦠꦺꦴ;

ꦠꦠ꧀ꦡꦢ꧀ꦢꦱꦁ ꦥꦁꦱꦸꦏꦹꦭꦁ, ꦢꦸꦩꦒ꧀ꦒꦩ꧀ꦲꦶ ꦮꦶꦭꦩ꧀ꦧꦶꦠꦁ.

꧙. ‘‘ꦠꦷꦟꦶ ꦏꦶꦔ꧀ꦏꦟꦶꦥꦸꦥ꧀ꦦꦴꦤꦶ, ꦎꦕꦶꦤꦶꦠ꧀ꦮꦴꦤꦲꦁ ꦠꦢꦴ;

ꦲꦛ꧀ꦜꦺꦴ ꦲꦛ꧀ꦜꦺꦤ ꦕꦶꦠ꧀ꦠꦺꦤ, ꦥꦁꦱꦸꦏꦹꦭꦩꦥꦹꦗꦪꦶꦁ.

꧑꧐. ‘‘ꦠꦺꦤ ꦏꦩ꧀ꦩꦺꦤ ꦱꦸꦏꦠꦺꦤ, ꦕꦺꦠꦤꦴꦥꦟꦶꦣꦷꦲꦶ ꦕ;

ꦗꦲꦶꦠ꧀ꦮꦴ ꦩꦴꦤꦸꦱꦁ ꦢꦺꦲꦁ, ꦠꦴꦮꦠꦶꦁꦱꦩꦒꦕ꧀ꦖꦲꦁ.

꧑꧑. ‘‘ꦌꦏꦤꦮꦸꦠꦶꦠꦺꦴ ꦏꦥ꧀ꦥꦺ, ꦪꦁ ꦏꦩ꧀ꦩꦩꦏꦫꦶꦁ ꦠꦢꦴ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦥꦹꦗꦶꦠ꧀ꦮꦴ ꦄꦫꦲꦢ꧀ꦣꦗꦁ.

꧑꧒. ‘‘ꦏꦶꦭꦺꦱꦴ ꦙꦴꦥꦶꦠꦴ ꦩꦪ꧀ꦲꦁ…ꦥꦺ… ꦮꦶꦲꦫꦴꦩꦶ ꦄꦤꦴꦱꦮꦺꦴ.

꧑꧓. ‘‘ꦱ꧀ꦮꦴꦒꦠꦁ ꦮꦠ ꦩꦺ ꦄꦴꦱꦶ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ.

꧑꧔. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦥꦁꦱꦸꦏꦹꦭꦥꦹꦗꦏꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ

ꦄꦨꦴꦱꦶꦠ꧀ꦡꦴꦠꦶ.

ꦥꦁꦱꦸꦏꦹꦭꦥꦹꦗꦏꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦢꦸꦠꦶꦪꦁ.

꧓. ꦏꦺꦴꦫꦟ꧀ꦝꦥꦸꦥ꧀ꦦꦶꦪꦠ꧀ꦡꦺꦫꦄꦥꦢꦴꦤꦁ

꧑꧕. ‘‘ꦮꦤꦏꦩ꧀ꦩꦶꦏꦺꦴ ꦥꦸꦫꦺ ꦄꦴꦱꦶꦁ, ꦥꦶꦠꦸꦩꦴꦠꦸꦩꦠꦺꦤꦲꦁ [ꦥꦶꦠꦸꦥꦺꦠꦴꦩꦲꦺꦤꦲꦁ (ꦱꦷ. ꦱ꧀ꦪꦴ. ꦥꦷ.)];

ꦥꦱꦸꦩꦴꦫꦺꦤ ꦗꦷꦮꦴꦩꦶ, ꦏꦸꦱꦭꦁ ꦩꦺ ꦤ ꦮꦶꦗ꧀ꦗꦠꦶ.

꧑꧖. ‘‘ꦩꦩ ꦄꦴꦱꦪꦱꦴꦩꦤ꧀ꦠꦴ, ꦠꦶꦱ꧀ꦱꦺꦴ ꦭꦺꦴꦏꦒ꧀ꦒꦤꦴꦪꦏꦺꦴ;

ꦥꦢꦴꦤꦶ ꦠꦷꦟꦶ ꦢꦱ꧀ꦱꦺꦱꦶ, ꦄꦤꦸꦏꦩ꧀ꦥꦴꦪ ꦕꦏ꧀ꦑꦸꦩꦴ.

꧑꧗. ‘‘ꦄꦏ꧀ꦏꦤ꧀ꦠꦺ ꦕ ꦥꦢꦺ ꦢꦶꦱ꧀ꦮꦴ, ꦠꦶꦱ꧀ꦱꦤꦴꦩꦱ꧀ꦱ ꦱꦠ꧀ꦡꦸꦤꦺꦴ;

ꦲꦛ꧀ꦜꦺꦴ ꦲꦛ꧀ꦜꦺꦤ ꦕꦶꦠ꧀ꦠꦺꦤ, ꦥꦢꦺ ꦕꦶꦠ꧀ꦠꦁ ꦥꦱꦴꦢꦪꦶꦁ.

꧑꧘. ‘‘ꦏꦺꦴꦫꦟ꧀ꦝꦁ ꦥꦸꦥ꧀ꦦꦶꦠꦁ ꦢꦶꦱ꧀ꦮꦴ, ꦥꦴꦢꦥꦁ ꦣꦫꦟꦷꦫꦸꦲꦁ;

ꦱꦏꦺꦴꦱꦏꦁ ꦒꦲꦺꦠ꧀ꦮꦴꦤ, ꦥꦢꦱꦺꦛ꧀ꦜꦩꦥꦹꦗꦪꦶꦁ [ꦥꦢꦱꦺꦛ꧀ꦜꦺ ꦄꦥꦹꦗꦪꦶꦁ (ꦱꦷ. ꦥꦷ.)].

꧑꧙. ‘‘ꦠꦺꦤ ꦏꦩ꧀ꦩꦺꦤ ꦱꦸꦏꦠꦺꦤ, ꦕꦺꦠꦤꦴꦥꦟꦶꦣꦷꦲꦶ ꦕ;

ꦗꦲꦶꦠ꧀ꦮꦴ ꦩꦴꦤꦸꦱꦁ ꦢꦺꦲꦁ, ꦠꦴꦮꦠꦶꦁꦱꦩꦒꦕ꧀ꦖꦲꦁ.

꧒꧐. ‘‘ꦪꦁ ꦪꦁ ꦪꦺꦴꦤꦸꦥꦥꦗ꧀ꦗꦴꦩꦶ, ꦢꦺꦮꦠ꧀ꦠꦁ ꦄꦡ ꦩꦴꦤꦸꦱꦁ;

ꦏꦺꦴꦫꦟ꧀ꦝꦏꦖꦮꦶ ꦲꦺꦴꦩꦶ, ꦱꦸꦥ꧀ꦥꦨꦴꦱꦺꦴ [ꦱꦥꦨꦴꦱꦺꦴ (ꦱꦷ. ꦱ꧀ꦪꦴ. ꦥꦷ. ꦏ.)] ꦨꦮꦴꦩꦲꦁ.

꧒꧑. ‘‘ꦢ꧀ꦮꦺꦤꦮꦸꦠꦺ ꦆꦠꦺꦴ ꦏꦥ꧀ꦥꦺ, ꦪꦁ ꦏꦩ꧀ꦩꦩꦏꦫꦶꦁ ꦠꦢꦴ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦥꦢꦥꦹꦗꦴꦪꦶꦢꦁ ꦦꦭꦁ.

꧒꧒. ‘‘ꦏꦶꦭꦺꦱꦴ ꦙꦴꦥꦶꦠꦴ ꦩꦪ꧀ꦲꦁ…ꦥꦺ… ꦮꦶꦲꦫꦴꦩꦶ ꦄꦤꦴꦱꦮꦺꦴ.

꧒꧓. ‘‘ꦱ꧀ꦮꦴꦒꦠꦁ ꦮꦠ ꦩꦺ ꦄꦴꦱꦶ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ.

꧒꧔. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦏꦺꦴꦫꦟ꧀ꦝꦥꦸꦥ꧀ꦦꦶꦪꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ

ꦄꦨꦴꦱꦶꦠ꧀ꦡꦴꦠꦶ.

ꦏꦺꦴꦫꦟ꧀ꦝꦥꦸꦥ꧀ꦦꦶꦪꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦠꦠꦶꦪꦁ.

꧔. ꦏꦶꦁꦱꦸꦏꦥꦸꦥ꧀ꦦꦶꦪꦠ꧀ꦡꦺꦫꦄꦥꦢꦴꦤꦁ

꧒꧕. ‘‘ꦏꦶꦁꦱꦸꦏꦁ ꦥꦸꦥ꧀ꦦꦶꦠꦁ ꦢꦶꦱ꧀ꦮꦴ, ꦥꦒ꧀ꦒꦲꦺꦠ꧀ꦮꦴꦤ ꦄꦚ꧀ꦗꦭꦶꦁ;

ꦧꦸꦢ꧀ꦣꦱꦺꦛ꧀ꦜꦁ ꦱꦫꦶꦠ꧀ꦮꦴꦤ, ꦄꦴꦏꦴꦱꦺ ꦄꦨꦶꦥꦹꦗꦪꦶꦁ.

꧒꧖. ‘‘ꦠꦺꦤ ꦏꦩ꧀ꦩꦺꦤ ꦱꦸꦏꦠꦺꦤ, ꦕꦺꦠꦤꦴꦥꦟꦶꦣꦷꦲꦶ ꦕ;

ꦗꦲꦶꦠ꧀ꦮꦴ ꦩꦴꦤꦸꦱꦁ ꦢꦺꦲꦁ, ꦠꦴꦮꦠꦶꦁꦱꦩꦒꦕ꧀ꦖꦲꦁ.

꧒꧗. ‘‘ꦌꦏꦠꦶꦁꦱꦺ ꦆꦠꦺꦴ ꦏꦥ꧀ꦥꦺ, ꦪꦁ ꦏꦩ꧀ꦩꦩꦏꦫꦶꦁ ꦠꦢꦴ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦧꦸꦢ꧀ꦣꦥꦹꦗꦴꦪꦶꦢꦁ ꦦꦭꦁ.

꧒꧘. ‘‘ꦏꦶꦭꦺꦱꦴ ꦙꦴꦥꦶꦠꦴ ꦩꦪ꧀ꦲꦁ…ꦥꦺ… ꦮꦶꦲꦫꦴꦩꦶ ꦄꦤꦴꦱꦮꦺꦴ.

꧒꧙. ‘‘ꦱ꧀ꦮꦴꦒꦠꦁ ꦮꦠ ꦩꦺ ꦄꦴꦱꦶ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ.

꧓꧐. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦏꦶꦁꦱꦸꦏꦥꦸꦥ꧀ꦦꦶꦪꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ

ꦄꦨꦴꦱꦶꦠ꧀ꦡꦴꦠꦶ.

ꦏꦶꦁꦱꦸꦏꦥꦸꦥ꧀ꦦꦶꦪꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦕꦠꦸꦠ꧀ꦡꦁ.

꧕. ꦈꦥꦝ꧀ꦞꦢꦸꦱ꧀ꦱꦢꦴꦪꦏꦠ꧀ꦡꦺꦫꦄꦥꦢꦴꦤꦁ

꧓꧑. ‘‘ꦥꦢꦸꦩꦸꦠ꧀ꦠꦫꦨꦒꦮꦠꦺꦴ, ꦱꦸꦗꦴꦠꦺꦴ ꦤꦴꦩ ꦱꦴꦮꦏꦺꦴ;

ꦥꦁꦱꦸꦏꦹꦭꦁ ꦒꦮꦺꦱꦤ꧀ꦠꦺꦴ, ꦱꦔ꧀ꦏꦴꦫꦺ ꦕꦫꦠꦺ [ꦕꦫꦠꦷ (ꦱꦷ. ꦏ.)] ꦠꦢꦴ.

꧓꧒. ‘‘ꦤꦒꦫꦺ ꦲꦁꦱꦮꦠꦶꦪꦴ, ꦥꦫꦺꦱꦁ ꦨꦠꦏꦺꦴ ꦄꦲꦁ;

ꦈꦥꦝ꧀ꦞꦢꦸꦱ꧀ꦱꦁ ꦢꦠ꧀ꦮꦴꦤ, ꦱꦶꦫꦱꦴ ꦄꦨꦶꦮꦴꦢꦪꦶꦁ.

꧓꧓. ‘‘ꦠꦺꦤ ꦏꦩ꧀ꦩꦺꦤ ꦱꦸꦏꦠꦺꦤ, ꦕꦺꦠꦤꦴꦥꦟꦶꦣꦷꦲꦶ ꦕ;

ꦗꦲꦶꦠ꧀ꦮꦴ ꦩꦴꦤꦸꦱꦁ ꦢꦺꦲꦁ, ꦠꦴꦮꦠꦶꦁꦱꦩꦒꦕ꧀ꦖꦲꦁ.

꧓꧔. ‘‘ꦠꦺꦠ꧀ꦠꦶꦁꦱꦏ꧀ꦑꦠ꧀ꦠꦸꦁ ꦢꦺꦮꦶꦤ꧀ꦢꦺꦴ, ꦢꦺꦮꦫꦗ꧀ꦗꦩꦏꦴꦫꦪꦶꦁ;

ꦱꦠ꧀ꦠꦱꦠ꧀ꦠꦠꦶꦏ꧀ꦑꦠ꧀ꦠꦸꦚ꧀ꦕ, ꦕꦏ꧀ꦏꦮꦠ꧀ꦠꦷ ꦄꦲꦺꦴꦱꦲꦁ.

꧓꧕. ‘‘ꦥꦢꦺꦱꦫꦗ꧀ꦗꦁ ꦮꦶꦥꦸꦭꦁ, ꦒꦟꦤꦴꦠꦺꦴ ꦄꦱꦔ꧀ꦑꦶꦪꦁ;

ꦈꦥꦝ꧀ꦞꦢꦸꦱ꧀ꦱꦢꦴꦤꦺꦤ, ꦩꦺꦴꦢꦴꦩꦶ ꦄꦏꦸꦠꦺꦴꦨꦪꦺꦴ.

꧓꧖. ‘‘ꦆꦕ꧀ꦖꦩꦴꦤꦺꦴ ꦕꦲꦁ ꦄꦗ꧀ꦗ, ꦱꦏꦴꦤꦤꦁ ꦱꦥꦧ꧀ꦧꦠꦁ;

ꦑꦺꦴꦩꦢꦸꦱ꧀ꦱꦺꦲꦶ ꦖꦴꦢꦺꦪ꧀ꦪꦁ, ꦄꦝ꧀ꦞꦢꦸꦱ꧀ꦱꦱ꧀ꦱꦶꦢꦁ ꦦꦭꦁ.

꧓꧗. ‘‘ꦱꦠꦱꦲꦱ꧀ꦱꦶꦠꦺꦴ ꦏꦥ꧀ꦥꦺ, ꦪꦁ ꦢꦴꦤꦩꦢꦢꦶꦁ ꦠꦢꦴ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦄꦝ꧀ꦞꦢꦸꦱ꧀ꦱꦱ꧀ꦱꦶꦢꦁ ꦦꦭꦁ.

꧓꧘. ‘‘ꦏꦶꦭꦺꦱꦴ ꦙꦴꦥꦶꦠꦴ ꦩꦪ꧀ꦲꦁ…ꦥꦺ… ꦮꦶꦲꦫꦴꦩꦶ ꦄꦤꦴꦱꦮꦺꦴ.

꧓꧙. ‘‘ꦱ꧀ꦮꦴꦒꦠꦁ ꦮꦠ ꦩꦺ ꦄꦴꦱꦶ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ.

꧔꧐. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦈꦥꦝ꧀ꦞꦢꦸꦱ꧀ꦱꦢꦴꦪꦏꦺꦴ ꦡꦺꦫꦺꦴ ꦆꦩꦴ

ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦈꦥꦝ꧀ꦞꦢꦸꦱ꧀ꦱꦢꦴꦪꦏꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦥꦚ꧀ꦕꦩꦁ.

꧖. ꦓꦠꦩꦟ꧀ꦝꦢꦴꦪꦏꦠ꧀ꦡꦺꦫꦄꦥꦢꦴꦤꦁ

꧔꧑. ‘‘ꦱꦸꦕꦶꦤ꧀ꦠꦶꦠꦁ ꦨꦒꦮꦤ꧀ꦠꦁ, ꦭꦺꦴꦏꦗꦺꦛ꧀ꦜꦁ ꦤꦫꦴꦱꦨꦁ;

ꦈꦥꦮꦶꦛ꧀ꦜꦁ ꦩꦲꦴꦫꦚ꧀ꦚꦁ, ꦮꦴꦠꦴꦧꦴꦣꦺꦤ ꦥꦷꦭ꦳ꦶꦠꦁ.

꧔꧒. ‘‘ꦢꦶꦱ꧀ꦮꦴ ꦕꦶꦠ꧀ꦠꦁ ꦥꦱꦴꦢꦺꦠ꧀ꦮꦴ, ꦓꦠꦩꦟ꧀ꦝꦩꦸꦥꦴꦤꦪꦶꦁ;

ꦏꦠꦠ꧀ꦠꦴ ꦄꦴꦕꦶꦠꦠ꧀ꦠꦴ [ꦈꦥꦕꦶꦠꦠ꧀ꦠꦴ (ꦱ꧀ꦪꦴ. ꦏ.)] ꦕ, ꦒꦔ꧀ꦒꦴ ꦨꦴꦒꦷꦫꦡꦷ ꦄꦪꦁ.

꧔꧓. ‘‘ꦩꦲꦴꦱꦩꦸꦢ꧀ꦢꦴ ꦕꦠ꧀ꦠꦴꦫꦺꦴ, ꦓꦠꦁ ꦱꦩ꧀ꦥꦗ꧀ꦗꦫꦺ ꦩꦩ;

ꦄꦪꦚ꧀ꦕ ꦥꦡꦮꦷ ꦓꦺꦴꦫꦴ, ꦄꦥ꧀ꦥꦩꦴꦟꦴ ꦄꦱꦔ꧀ꦑꦶꦪꦴ.

꧔꧔. ‘‘ꦩꦩ ꦱꦔ꧀ꦏꦥ꧀ꦥꦩꦚ꧀ꦚꦴꦪ, ꦨꦮꦠꦺ ꦩꦣꦸꦱꦏ꧀ꦏꦫꦴ [ꦩꦣꦸꦱꦏ꧀ꦑꦫꦴ (ꦱ꧀ꦪꦴ. ꦏ.)];

ꦕꦴꦠꦸꦢ꧀ꦢꦷꦥꦴ ꦆꦩꦺ ꦫꦸꦏ꧀ꦑꦴ, ꦥꦴꦢꦥꦴ ꦣꦫꦟꦷꦫꦸꦲꦴ.

꧔꧕. ‘‘ꦩꦩ ꦱꦔ꧀ꦏꦥ꧀ꦥꦩꦚ꧀ꦚꦴꦪ, ꦏꦥ꧀ꦥꦫꦸꦏ꧀ꦑꦴ ꦨꦮꦤ꧀ꦠꦶ ꦠꦺ;

ꦥꦚ꧀ꦚꦴꦱꦏ꧀ꦑꦠ꧀ꦠꦸꦁ ꦢꦺꦮꦶꦤ꧀ꦢꦺꦴ, ꦢꦺꦮꦫꦗ꧀ꦗꦩꦏꦴꦫꦪꦶꦁ.

꧔꧖. ‘‘ꦌꦏꦥꦚ꧀ꦚꦴꦱꦏ꧀ꦑꦠ꧀ꦠꦸꦚ꧀ꦕ, ꦕꦏ꧀ꦏꦮꦠ꧀ꦠꦷ ꦄꦲꦺꦴꦱꦲꦁ;

ꦥꦢꦺꦱꦫꦗ꧀ꦗꦁ ꦮꦶꦥꦸꦭꦁ, ꦒꦟꦤꦴꦠꦺꦴ ꦄꦱꦔ꧀ꦑꦶꦪꦁ.

꧔꧗. ‘‘ꦕꦠꦸꦤ꧀ꦤꦮꦸꦠꦶꦠꦺꦴ [ꦖꦤꦮꦸꦠꦺ ꦆꦠꦺꦴ (ꦱꦷ.)] ꦏꦥ꧀ꦥꦺ, ꦪꦁ ꦢꦴꦤꦩꦢꦢꦶꦁ ꦠꦢꦴ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦓꦠꦩꦟ꧀ꦝꦱ꧀ꦱꦶꦢꦁ ꦦꦭꦁ.

꧔꧘. ‘‘ꦏꦶꦭꦺꦱꦴ ꦙꦴꦥꦶꦠꦴ ꦩꦪ꧀ꦲꦁ…ꦥꦺ… ꦮꦶꦲꦫꦴꦩꦶ ꦄꦤꦴꦱꦮꦺꦴ.

꧔꧙. ‘‘ꦱ꧀ꦮꦴꦒꦠꦁ ꦮꦠ ꦩꦺ ꦄꦴꦱꦶ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ.

꧕꧐. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦓꦠꦩꦟ꧀ꦝꦢꦴꦪꦏꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ

ꦄꦨꦴꦱꦶꦠ꧀ꦡꦴꦠꦶ.

ꦓꦠꦩꦟ꧀ꦝꦢꦴꦪꦏꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦖꦛ꧀ꦜꦁ.

꧗. ꦈꦢꦏꦢꦴꦪꦏꦠ꧀ꦡꦺꦫꦄꦥꦢꦴꦤꦁ

꧕꧑. ‘‘ꦥꦢꦸꦩꦸꦠ꧀ꦠꦫꦧꦸꦢ꧀ꦣꦱ꧀ꦱ, ꦨꦶꦏ꧀ꦑꦸꦱꦔ꧀ꦓꦺ ꦄꦤꦸꦠ꧀ꦠꦫꦺ;

ꦥꦱꦤ꧀ꦤꦕꦶꦠ꧀ꦠꦺꦴ ꦱꦸꦩꦤꦺꦴ, ꦥꦴꦤꦷꦓꦛꦩꦥꦹꦫꦪꦶꦁ.

꧕꧒. ‘‘ꦥꦧ꧀ꦧꦠꦒ꧀ꦒꦺ ꦢꦸꦩꦒ꧀ꦒꦺ ꦮꦴ, ꦄꦴꦏꦴꦱꦺ ꦮꦴꦡ ꦨꦹꦩꦶꦪꦁ;

ꦪꦢꦴ ꦥꦴꦤꦷꦪꦩꦶꦕ꧀ꦖꦴꦩꦶ, ꦑꦶꦥ꧀ꦥꦁ ꦤꦶꦧ꧀ꦧꦠ꧀ꦠꦠꦺ ꦩꦩ.

꧕꧓. ‘‘ꦱꦠꦱꦲꦱ꧀ꦱꦶꦠꦺꦴ ꦏꦥ꧀ꦥꦺ, ꦪꦁ ꦢꦴꦤꦩꦢꦢꦶꦁ ꦠꦢꦴ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦢꦏꦢꦴꦤꦱ꧀ꦱꦶꦢꦁ ꦦꦭꦁ.

꧕꧔. ‘‘ꦏꦶꦭꦺꦱꦴ ꦙꦴꦥꦶꦠꦴ ꦩꦪ꧀ꦲꦁ…ꦥꦺ… ꦮꦶꦲꦫꦴꦩꦶ ꦄꦤꦴꦱꦮꦺꦴ.

꧕꧕. ‘‘ꦱ꧀ꦮꦴꦒꦠꦁ ꦮꦠ ꦩꦺ ꦄꦴꦱꦶ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ.

꧕꧖. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦈꦢꦏꦢꦴꦪꦏꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ

ꦄꦨꦴꦱꦶꦠ꧀ꦡꦴꦠꦶ.

ꦈꦢꦏꦢꦴꦪꦏꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦱꦠ꧀ꦠꦩꦁ.

꧘. ꦥꦸꦭꦶꦤꦡꦹꦥꦶꦪꦠ꧀ꦡꦺꦫꦄꦥꦢꦴꦤꦁ

꧕꧗. ‘‘ꦲꦶꦩꦮꦤ꧀ꦠꦱ꧀ꦱꦴꦮꦶꦢꦹꦫꦺ, ꦪꦩꦏꦺꦴ ꦤꦴꦩ ꦥꦧ꧀ꦧꦠꦺꦴ;

ꦄꦱ꧀ꦱꦩꦺꦴ ꦱꦸꦏꦠꦺꦴ ꦩꦪ꧀ꦲꦁ, ꦥꦟ꧀ꦟꦱꦴꦭꦴ ꦱꦸꦩꦴꦥꦶꦠꦴ.

꧕꧘. ‘‘ꦤꦴꦫꦢꦺꦴ ꦤꦴꦩ ꦤꦴꦩꦺꦤ, ꦗꦛꦶꦭꦺꦴ ꦈꦒ꧀ꦒꦠꦴꦥꦤꦺꦴ;

ꦕꦠꦸꦢ꧀ꦢꦱꦱꦲꦱ꧀ꦱꦴꦤꦶ, ꦱꦶꦱ꧀ꦱꦴ ꦥꦫꦶꦕꦫꦤ꧀ꦠꦶ ꦩꦁ.

꧕꧙. ‘‘ꦥꦛꦶꦱꦭ꧀ꦭꦷꦤꦏꦺꦴ ꦱꦤ꧀ꦠꦺꦴ, ꦌꦮꦁ ꦕꦶꦤ꧀ꦠꦺꦱꦲꦁ ꦠꦢꦴ;

‘ꦱꦧ꧀ꦧꦺꦴ ꦗꦤꦺꦴ ꦩꦁ ꦥꦹꦗꦺꦠꦶ, ꦤꦴꦲꦁ ꦥꦹꦗꦺꦩꦶ ꦏꦶꦚ꧀ꦕꦤꦁ.

꧖꧐. ‘‘‘ꦤ ꦩꦺ ꦎꦮꦴꦢꦏꦺꦴ ꦄꦠ꧀ꦡꦶ, ꦮꦠ꧀ꦠꦴ ꦏꦺꦴꦕꦶ ꦤ ꦮꦶꦗ꧀ꦗꦠꦶ;

ꦄꦤꦴꦕꦫꦶꦪꦸꦥꦗ꧀ꦙꦴꦪꦺꦴ, ꦮꦤꦺ ꦮꦴꦱꦁ ꦈꦥꦺꦩꦲꦁ.

꧖꧑. ‘‘‘ꦈꦥꦴꦱꦩꦴꦤꦺꦴ ꦪꦩꦲꦁ, ꦒꦫꦸꦕꦶꦠ꧀ꦠꦁ ꦈꦥꦛ꧀ꦜꦲꦺ;

ꦱꦺꦴ ꦩꦺ ꦄꦴꦕꦫꦶꦪꦺꦴ ꦤꦠ꧀ꦡꦶ, ꦮꦤꦮꦴꦱꦺꦴ ꦤꦶꦫꦠ꧀ꦡꦏꦺꦴ.

꧖꧒. ‘‘‘ꦄꦴꦪꦴꦒꦁ ꦩꦺ ꦒꦮꦺꦱꦶꦱ꧀ꦱꦁ, ꦒꦫꦸꦁ ꦨꦴꦮꦤꦶꦪꦁ ꦠꦡꦴ;

ꦱꦴꦮꦱ꧀ꦱꦪꦺꦴ ꦮꦱꦶꦱ꧀ꦱꦴꦩꦶ, ꦤ ꦏꦺꦴꦕꦶ ꦒꦫꦲꦶꦱ꧀ꦱꦠꦶ’.

꧖꧓. ‘‘ꦈꦠ꧀ꦠꦴꦤꦏꦹꦭꦴ ꦤꦢꦶꦏꦴ, ꦱꦸꦥꦠꦶꦠ꧀ꦡꦴ ꦩꦤꦺꦴꦫꦩꦴ;

ꦱꦁꦱꦸꦢ꧀ꦣꦥꦸꦭꦶꦤꦴꦏꦶꦟ꧀ꦟꦴ, ꦄꦮꦶꦢꦹꦫꦺ ꦩꦩꦱ꧀ꦱꦩꦁ.

꧖꧔. ‘‘ꦤꦢꦶꦁ ꦄꦩꦫꦶꦏꦁ ꦤꦴꦩ, ꦈꦥꦒꦤ꧀ꦠ꧀ꦮꦴꦤꦲꦁ ꦠꦢꦴ;

ꦱꦁꦮꦝ꧀ꦞꦪꦶꦠ꧀ꦮꦴ ꦥꦸꦭꦶꦤꦁ, ꦄꦏꦁ ꦥꦸꦭꦶꦤꦕꦺꦠꦶꦪꦁ.

꧖꧕. ‘‘ꦪꦺ ꦠꦺ ꦄꦲꦺꦱꦸꦁ ꦱꦩ꧀ꦧꦸꦢ꧀ꦣꦴ, ꦨꦮꦤ꧀ꦠꦏꦫꦟꦴ ꦩꦸꦤꦷ;

ꦠꦺꦱꦁ ꦌꦠꦴꦢꦶꦱꦺꦴ ꦡꦹꦥꦺꦴ, ꦠꦁ ꦤꦶꦩꦶꦠ꧀ꦠꦁ ꦏꦫꦺꦴꦩꦲꦁ.

꧖꧖. ‘‘ꦏꦫꦶꦠ꧀ꦮꦴ ꦥꦸꦭꦶꦤꦁ [ꦥꦸꦭ꦳ꦶꦤꦺ (ꦱꦷ. ꦱ꧀ꦪꦴ. ꦥꦷ.)] ꦡꦹꦥꦁ, ꦱꦺꦴꦮꦟ꧀ꦟꦁ ꦩꦴꦥꦪꦶꦁ ꦄꦲꦁ;

ꦱꦺꦴꦟ꧀ꦟꦏꦶꦔ꧀ꦏꦟꦶꦥꦸꦥ꧀ꦦꦴꦤꦶ, ꦱꦲꦱ꧀ꦱꦺ ꦠꦷꦟꦶ ꦥꦹꦗꦪꦶꦁ.

꧖꧗. ‘‘ꦱꦴꦪꦥꦴꦠꦁ ꦤꦩꦱ꧀ꦱꦴꦩꦶ, ꦮꦺꦢꦗꦴꦠꦺꦴ ꦏꦠꦚ꧀ꦗꦭꦷ;

ꦱꦩ꧀ꦩꦸꦑꦴ ꦮꦶꦪ ꦱꦩ꧀ꦧꦸꦢ꧀ꦣꦁ, ꦮꦤ꧀ꦢꦶꦁ ꦥꦸꦭꦶꦤꦕꦺꦠꦶꦪꦁ.

꧖꧘. ‘‘ꦪꦢꦴ ꦏꦶꦭꦺꦱꦴ ꦗꦴꦪꦤ꧀ꦠꦶ, ꦮꦶꦠꦏ꧀ꦏꦴ ꦒꦺꦲꦤꦶꦱ꧀ꦱꦶꦠꦴ;

ꦱꦫꦴꦩꦶ ꦱꦸꦏꦠꦁ ꦡꦹꦥꦁ, ꦥꦕ꧀ꦕꦮꦺꦏ꧀ꦑꦴꦩꦶ ꦠꦴꦮꦢꦺ.

꧖꧙. ‘‘ꦈꦥꦤꦶꦱ꧀ꦱꦴꦪ ꦮꦶꦲꦫꦁ, ꦱꦠ꧀ꦡꦮꦴꦲꦁ ꦮꦶꦤꦴꦪꦏꦁ;

ꦏꦶꦭꦺꦱꦺ ꦱꦁꦮꦱꦺꦪ꧀ꦪꦴꦱꦶ, ꦤ ꦪꦸꦠ꧀ꦠꦁ ꦠꦮ ꦩꦴꦫꦶꦱ.