꧗. ꦌꦏꦣꦩ꧀ꦩꦱ꧀ꦱꦮꦤꦶꦪꦠ꧀ꦡꦺꦫꦄꦥꦢꦴꦤꦁ

꧘꧘. ‘‘ꦥꦢꦸꦩꦸꦠ꧀ꦠꦫꦺꦴ ꦤꦴꦩ ꦗꦶꦤꦺꦴ, ꦱꦧ꧀ꦧꦣꦩ꧀ꦩꦴꦤ ꦥꦴꦫꦒꦹ;

ꦕꦠꦸꦱꦕ꧀ꦕꦁ ꦥꦏꦴꦱꦺꦤ꧀ꦠꦺꦴ, ꦱꦤ꧀ꦠꦴꦫꦺꦱꦶ ꦧꦲꦸꦁ ꦗꦤꦁ.

꧘꧙. ‘‘ꦄꦲꦁ ꦠꦺꦤ ꦱꦩꦪꦺꦤ, ꦗꦛꦶꦭꦺꦴ ꦈꦒ꧀ꦒꦠꦴꦥꦤꦺꦴ;

ꦣꦸꦤꦤ꧀ꦠꦺꦴ ꦮꦴꦏꦕꦷꦫꦴꦤꦶ, ꦒꦕ꧀ꦖꦴꦩꦶ ꦄꦩ꧀ꦧꦫꦺ ꦠꦢꦴ.

꧙꧐. ‘‘ꦧꦸꦢ꧀ꦣꦱꦺꦛ꧀ꦜꦱ꧀ꦱ ꦈꦥꦫꦶ, ꦒꦤ꧀ꦠꦸꦁ ꦤ ꦮꦶꦱꦲꦴꦩꦲꦁ;

ꦥꦏ꧀ꦑꦷꦮ ꦱꦺꦭꦩꦴꦱꦗ꧀ꦗ, ꦒꦩꦤꦁ ꦤ ꦭꦨꦴꦩꦲꦁ.

꧙꧑. ‘‘ꦈꦢꦏꦺ ꦮꦺꦴꦏ꧀ꦏꦩꦶꦠ꧀ꦮꦴꦤ, ꦌꦮꦁ ꦒꦕ꧀ꦖꦴꦩꦶ ꦄꦩ꧀ꦧꦫꦺ;

ꦤ ꦩꦺ ꦆꦢꦁ ꦨꦹꦠꦥꦸꦧ꧀ꦧꦁ, ꦆꦫꦶꦪꦴꦥꦡꦮꦶꦏꦺꦴꦥꦤꦁ.

꧙꧒. ‘‘ꦲꦤ꧀ꦢ ꦩꦺꦠꦁ ꦒꦮꦺꦱꦶꦱ꧀ꦱꦁ, ꦄꦥ꧀ꦥꦺꦮꦠ꧀ꦡꦁ ꦭꦨꦺꦪ꧀ꦪꦲꦁ;

ꦎꦫꦺꦴꦲꦤ꧀ꦠꦺꦴ ꦄꦤ꧀ꦠꦭꦶꦏ꧀ꦑꦴ, ꦱꦢ꧀ꦢꦩꦱ꧀ꦱꦺꦴꦱꦶ ꦱꦠ꧀ꦡꦸꦤꦺꦴ.

꧙꧓. ‘‘ꦱꦫꦺꦤ ꦫꦗꦤꦷꦪꦺꦤ, ꦱꦮꦤꦷꦪꦺꦤ ꦮꦒ꧀ꦒꦸꦤꦴ;

ꦄꦤꦶꦕ꧀ꦕꦠꦁ ꦏꦡꦺꦤ꧀ꦠꦱ꧀ꦱ, ꦠꦚ꧀ꦚꦺꦮ ꦈꦒ꧀ꦒꦲꦶꦁ ꦠꦢꦴ;

ꦄꦤꦶꦕ꧀ꦕꦱꦚ꧀ꦚꦩꦸꦒ꧀ꦒꦪ꧀ꦲ, ꦄꦒꦩꦴꦱꦶꦁ ꦩꦩꦱ꧀ꦱꦩꦁ.

꧙꧔. ‘‘ꦪꦴꦮꦠꦴꦪꦸꦁ ꦮꦱꦶꦠ꧀ꦮꦴꦤ, ꦠꦠ꧀ꦡ ꦏꦴꦭꦔ꧀ꦏꦠꦺꦴ ꦄꦲꦁ;

ꦕꦫꦶꦩꦺ ꦮꦠ꧀ꦠꦩꦴꦤꦩ꧀ꦲꦶ, ꦱꦢ꧀ꦣꦩ꧀ꦩꦱ꧀ꦱꦮꦤꦁ ꦱꦫꦶꦁ.

꧙꧕. ‘‘ꦠꦺꦤ ꦏꦩ꧀ꦩꦺꦤ ꦱꦸꦏꦠꦺꦤ, ꦕꦺꦠꦤꦴꦥꦟꦶꦣꦷꦲꦶ ꦕ;

ꦗꦲꦶꦠ꧀ꦮꦴ ꦩꦴꦤꦸꦱꦁ ꦢꦺꦲꦁ, ꦠꦴꦮꦠꦶꦁꦱꦩꦒꦕ꧀ꦖꦲꦁ.

꧙꧖. ‘‘ꦠꦶꦁꦱꦏꦥ꧀ꦥꦱꦲꦱ꧀ꦱꦴꦤꦶ, ꦢꦺꦮꦭꦺꦴꦏꦺ ꦫꦩꦶꦁ ꦄꦲꦁ;

ꦌꦏꦥꦚ꧀ꦚꦴꦱꦏ꧀ꦑꦠ꧀ꦠꦸꦚ꧀ꦕ, ꦢꦺꦮꦫꦗ꧀ꦗꦩꦏꦴꦫꦪꦶꦁ.

꧙꧗. ‘‘ꦌꦏꦮꦷꦱꦠꦶꦏ꧀ꦑꦠ꧀ꦠꦸꦚ꧀ꦕ [ꦌꦏꦠꦶꦁꦱꦠꦶ… (ꦱ꧀ꦪꦴ.)], ꦕꦏ꧀ꦏꦮꦠ꧀ꦠꦷ ꦄꦲꦺꦴꦱꦲꦁ;

ꦥꦢꦺꦱꦫꦗ꧀ꦗꦁ ꦮꦶꦥꦸꦭꦁ, ꦒꦟꦤꦴꦠꦺꦴ ꦄꦱꦔ꧀ꦑꦶꦪꦁ.

꧙꧘. ‘‘ꦄꦤꦸꦨꦺꦴꦩꦶ ꦱꦏꦁ ꦥꦸꦚ꧀ꦚꦁ, ꦱꦸꦑꦶꦠꦺꦴꦲꦁ ꦨꦮꦴꦨꦮꦺ;

ꦄꦤꦸꦱ꧀ꦱꦫꦴꦩꦶ ꦠꦁ ꦱꦚ꧀ꦚꦁ, ꦱꦁꦱꦫꦤ꧀ꦠꦺꦴ ꦨꦮꦴꦨꦮꦺ;

ꦤ ꦏꦺꦴꦛꦶꦁ ꦥꦛꦶꦮꦶꦗ꧀ꦙꦴꦩꦶ, ꦤꦶꦧ꧀ꦧꦴꦤꦁ ꦄꦕ꧀ꦕꦸꦠꦁ ꦥꦢꦁ.

꧙꧙. ‘‘ꦥꦶꦠꦸꦒꦺꦲꦺ ꦤꦶꦱꦷꦢꦶꦠ꧀ꦮꦴ, ꦱꦩꦟꦺꦴ ꦨꦴꦮꦶꦠꦶꦤ꧀ꦢ꧀ꦫꦶꦪꦺꦴ;

ꦏꦡꦁꦱ [ꦏꦡꦪꦁ (ꦱꦷ. ꦥꦷ. ꦏ.)] ꦥꦫꦶꦢꦷꦥꦺꦤ꧀ꦠꦺꦴ, ꦄꦤꦶꦕ꧀ꦕꦠꦩꦸꦢꦴꦲꦫꦶ.

꧑꧐꧐. ‘‘‘ꦄꦤꦶꦕ꧀ꦕꦴ ꦮꦠ ꦱꦔ꧀ꦑꦴꦫꦴ, ꦈꦥ꧀ꦥꦴꦢꦮꦪꦣꦩ꧀ꦩꦶꦤꦺꦴ;

ꦈꦥ꧀ꦥꦗ꧀ꦗꦶꦠ꧀ꦮꦴ ꦤꦶꦫꦸꦗ꧀ꦙꦤ꧀ꦠꦶ, ꦠꦺꦱꦁ ꦮꦹꦥꦱꦩꦺꦴ ꦱꦸꦑꦺꦴ’.

꧑꧐꧑. ‘‘ꦱꦲ ꦒꦴꦡꦁ ꦱꦸꦟꦶꦠ꧀ꦮꦴꦤ, ꦥꦸꦧ꧀ꦧꦱꦚ꧀ꦚꦩꦤꦸꦱ꧀ꦱꦫꦶꦁ;

ꦌꦏꦴꦱꦤꦺ ꦤꦶꦱꦷꦢꦶꦠ꧀ꦮꦴ, ꦄꦫꦲꦠ꧀ꦠꦩꦥꦴꦥꦸꦟꦶꦁ.

꧑꧐꧒. ‘‘ꦗꦴꦠꦶꦪꦴ ꦱꦠ꧀ꦠꦮꦱ꧀ꦱꦺꦤ, ꦄꦫꦲꦠ꧀ꦠꦩꦥꦴꦥꦸꦟꦶꦁ;

ꦈꦥꦱꦩ꧀ꦥꦴꦢꦪꦷ ꦧꦸꦢ꧀ꦣꦺꦴ, ꦣꦩ꧀ꦩꦱ꧀ꦱꦮꦤꦱ꧀ꦱꦶꦢꦁ ꦦꦭꦁ.

꧑꧐꧓. ‘‘ꦱꦠꦱꦲꦱ꧀ꦱꦶꦠꦺꦴ ꦏꦥ꧀ꦥꦺ, ꦪꦁ ꦣꦩ꧀ꦩꦩꦱꦸꦟꦶꦁ ꦠꦢꦴ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦣꦩ꧀ꦩꦱ꧀ꦱꦮꦤꦱ꧀ꦱꦶꦢꦁ ꦦꦭꦁ.

꧑꧐꧔. ‘‘ꦏꦶꦭꦺꦱꦴ ꦙꦴꦥꦶꦠꦴ ꦩꦪ꧀ꦲꦁ…ꦥꦺ… ꦮꦶꦲꦫꦴꦩꦶ ꦄꦤꦴꦱꦮꦺꦴ.

꧑꧐꧕. ‘‘ꦱ꧀ꦮꦴꦒꦠꦁ ꦮꦠ ꦩꦺ ꦄꦴꦱꦶ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ.

꧑꧐꧖. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦌꦏꦣꦩ꧀ꦩꦱ꧀ꦱꦮꦤꦶꦪꦺꦴ ꦡꦺꦫꦺꦴ ꦆꦩꦴ

ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦌꦏꦣꦩ꧀ꦩꦱ꧀ꦱꦮꦤꦶꦪꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦱꦠ꧀ꦠꦩꦁ.