꧓꧖. ꦱꦢ꧀ꦢꦱꦚ꧀ꦚꦏꦮꦒ꧀ꦒꦺꦴ

꧑. ꦱꦢ꧀ꦢꦱꦚ꧀ꦚꦏꦠ꧀ꦡꦺꦫꦄꦥꦢꦴꦤꦁ

꧑. ‘‘ꦩꦶꦒꦭꦸꦢ꧀ꦢꦺꦴ ꦥꦸꦫꦺ ꦄꦴꦱꦶꦁ, ꦄꦫꦚ꧀ꦚꦺ ꦏꦴꦤꦤꦺ ꦄꦲꦁ;

ꦠꦠ꧀ꦡꦢ꧀ꦢꦱꦴꦱꦶꦁ ꦱꦩ꧀ꦧꦸꦢ꧀ꦣꦁ, ꦢꦺꦮꦱꦔ꧀ꦓꦥꦸꦫꦏ꧀ꦑꦠꦁ.

꧒. ‘‘ꦕꦠꦸꦱꦕ꧀ꦕꦁ ꦥꦏꦴꦱꦺꦤ꧀ꦠꦁ, ꦈꦢ꧀ꦣꦫꦤ꧀ꦠꦁ ꦩꦲꦴꦗꦤꦁ;

ꦄꦱ꧀ꦱꦺꦴꦱꦶꦁ ꦩꦣꦸꦫꦁ ꦮꦴꦕꦁ, ꦏꦫꦮꦷꦏꦫꦸꦢꦺꦴꦥꦩꦁ [ꦫꦸꦠꦺꦴꦥꦩꦁ (?)].

꧓. ‘‘ꦧ꧀ꦫꦲ꧀ꦩꦱꦫꦱ꧀ꦱ ꦩꦸꦤꦶꦤꦺꦴ, ꦱꦶꦑꦶꦤꦺꦴ ꦭꦺꦴꦏꦧꦤ꧀ꦣꦸꦤꦺꦴ;

ꦓꦺꦴꦱꦺ ꦕꦶꦠ꧀ꦠꦁ ꦥꦱꦴꦢꦺꦠ꧀ꦮꦴ, ꦥꦠ꧀ꦠꦺꦴꦩ꧀ꦲꦶ ꦄꦴꦱꦮꦏ꧀ꦑꦪꦁ.

꧔. ‘‘ꦌꦏꦠ꧀ꦠꦶꦁꦱꦺ ꦆꦠꦺꦴ ꦏꦥ꧀ꦥꦺ, ꦪꦁ ꦏꦩ꧀ꦩꦩꦏꦫꦶꦁ ꦠꦢꦴ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦥꦱꦴꦢꦱ꧀ꦱ ꦆꦢꦁ ꦦꦭꦁ.

꧕. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ, ꦮꦶꦩꦺꦴꦏ꧀ꦑꦴꦥꦶ ꦕ ꦄꦛ꧀ꦜꦶꦩꦺ;

ꦖꦭ꦳ꦨꦶꦚ꧀ꦚꦴ ꦱꦕ꧀ꦖꦶꦏꦠꦴ, ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦱꦢ꧀ꦢꦱꦚ꧀ꦚꦏꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦱꦢ꧀ꦢꦱꦚ꧀ꦚꦏꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦥꦜꦩꦁ.

꧒. ꦪꦮꦏꦭꦴꦥꦶꦪꦠ꧀ꦡꦺꦫꦄꦥꦢꦴꦤꦁ

꧖. ‘‘ꦤꦒꦫꦺ ꦄꦫꦸꦟꦮꦠꦶꦪꦴ, ꦄꦴꦱꦶꦁ ꦪꦮꦱꦶꦏꦺꦴ ꦠꦢꦴ;

ꦥꦤ꧀ꦡꦺ ꦢꦶꦱ꧀ꦮꦴꦤ ꦱꦩ꧀ꦧꦸꦢ꧀ꦣꦁ, ꦪꦮꦏꦭꦴꦥꦁ ꦱꦤ꧀ꦡꦫꦶꦁ [ꦪꦮꦏꦭꦴꦥꦩꦮꦠ꧀ꦡꦫꦶꦁ (ꦱꦷ.)].

꧗. ‘‘ꦄꦤꦸꦏꦩ꧀ꦥꦏꦺꦴ ꦏꦴꦫꦸꦟꦶꦏꦺꦴ, ꦱꦶꦑꦷ ꦭꦺꦴꦏꦒ꧀ꦒꦤꦴꦪꦏꦺꦴ;

ꦩꦩ ꦱꦔ꧀ꦏꦥ꧀ꦥꦩꦚ꧀ꦚꦴꦪ, ꦤꦶꦱꦷꦢꦶ ꦪꦮꦱꦤ꧀ꦡꦫꦺ.

꧘. ‘‘ꦢꦶꦱ꧀ꦮꦴ ꦤꦶꦱꦶꦤ꧀ꦤꦁ ꦮꦶꦩꦭꦁ, ꦩꦲꦴꦙꦴꦪꦶꦁ ꦮꦶꦤꦴꦪꦏꦁ;

ꦥꦴꦩꦺꦴꦗ꧀ꦗꦁ ꦗꦤꦪꦶꦠ꧀ꦮꦴꦤ, ꦠꦠ꧀ꦡ ꦏꦴꦭꦔ꧀ꦏꦠꦺꦴ ꦄꦲꦁ.

꧙. ‘‘ꦌꦏꦠ꧀ꦠꦶꦁꦱꦺ ꦆꦠꦺꦴ ꦏꦥ꧀ꦥꦺ, ꦪꦁ ꦏꦩ꧀ꦩꦩꦏꦫꦶꦁ ꦠꦢꦴ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦪꦮꦠ꧀ꦡꦫꦺ ꦆꦢꦁ ꦦꦭꦁ.

꧑꧐. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦪꦮꦏꦭꦴꦥꦶꦪꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦪꦮꦏꦭꦴꦥꦶꦪꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦢꦸꦠꦶꦪꦁ.

꧓. ꦏꦶꦁꦱꦸꦏꦥꦹꦗꦏꦠ꧀ꦡꦺꦫꦄꦥꦢꦴꦤꦁ

꧑꧑. ‘‘ꦏꦶꦁꦱꦸꦏꦁ ꦥꦸꦥ꧀ꦦꦶꦠꦁ ꦢꦶꦱ꧀ꦮꦴ, ꦥꦒ꧀ꦒꦲꦺꦠ꧀ꦮꦴꦤ ꦄꦚ꧀ꦗꦭꦶꦁ;

ꦧꦸꦢ꧀ꦣꦁ ꦱꦫꦶꦠ꧀ꦮꦴ ꦱꦶꦢ꧀ꦣꦠ꧀ꦡꦁ, ꦄꦴꦏꦴꦱꦺ ꦄꦨꦶꦥꦹꦗꦪꦶꦁ.

꧑꧒. ‘‘ꦕꦠꦸꦤ꧀ꦤꦮꦸꦠꦶꦠꦺꦴ ꦏꦥ꧀ꦥꦺ, ꦪꦁ ꦥꦸꦥ꧀ꦦꦩꦨꦶꦥꦹꦗꦪꦶꦁ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦧꦸꦢ꧀ꦣꦥꦹꦗꦴꦪꦶꦢꦁ ꦦꦭꦁ.

꧑꧓. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦏꦶꦁꦱꦸꦏꦥꦹꦗꦏꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦏꦶꦁꦱꦸꦏꦥꦹꦗꦏꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦠꦠꦶꦪꦁ.

꧔. ꦱꦏꦺꦴꦱꦏꦏꦺꦴꦫꦟ꧀ꦝꦢꦴꦪꦏꦠ꧀ꦡꦺꦫꦄꦥꦢꦴꦤꦁ

꧑꧔. ‘‘ꦄꦏ꧀ꦏꦤ꧀ꦠꦚ꧀ꦕ ꦥꦢꦁ ꦢꦶꦱ꧀ꦮꦴ, ꦱꦶꦑꦶꦤꦺꦴ ꦭꦺꦴꦏꦧꦤ꧀ꦣꦸꦤꦺꦴ;

ꦌꦏꦁꦱꦁ ꦄꦗꦶꦤꦁ ꦏꦠ꧀ꦮꦴ, ꦥꦢꦱꦺꦛ꧀ꦜꦁ ꦄꦮꦤ꧀ꦢꦲꦁ.

꧑꧕. ‘‘ꦏꦺꦴꦫꦟ꧀ꦝꦁ ꦥꦸꦥ꧀ꦦꦶꦠꦁ ꦢꦶꦱ꧀ꦮꦴ, ꦥꦴꦢꦥꦁ ꦣꦫꦟꦷꦫꦸꦲꦁ;

ꦱꦏꦺꦴꦱꦏꦁ [ꦱꦏꦺꦴꦛꦏꦁ (ꦱꦷ. ꦱ꧀ꦪꦴ.)] ꦒꦲꦺꦠ꧀ꦮꦴꦤ, ꦥꦢꦕꦏ꧀ꦏꦁ ꦄꦥꦹꦗꦪꦶꦁ.

꧑꧖. ‘‘ꦌꦏꦠ꧀ꦠꦶꦁꦱꦺ ꦆꦠꦺꦴ ꦏꦥ꧀ꦥꦺ, ꦪꦁ ꦏꦩ꧀ꦩꦩꦏꦫꦶꦁ ꦠꦢꦴ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦥꦢꦥꦹꦗꦴꦪꦶꦢꦁ ꦦꦭꦁ.

꧑꧗. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦱꦏꦺꦴꦱꦏ [ꦱꦏꦺꦴꦛꦏ (ꦱꦷ. ꦱ꧀ꦪꦴ.)] ꦏꦺꦴꦫꦟ꧀ꦝꦢꦴꦪꦏꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦱꦏꦺꦴꦱꦏꦏꦺꦴꦫꦟ꧀ꦝꦢꦴꦪꦏꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦕꦠꦸꦠ꧀ꦡꦁ.

꧕. ꦢꦟ꧀ꦝꦢꦴꦪꦏꦠ꧀ꦡꦺꦫꦄꦥꦢꦴꦤꦁ

꧑꧘. ‘‘ꦏꦴꦤꦤꦁ ꦮꦤꦩꦺꦴꦒꦪ꧀ꦲ, ꦮꦺꦭ꦳ꦸꦁ ꦖꦺꦠ꧀ꦮꦴꦤꦲꦁ ꦠꦢꦴ;

ꦄꦴꦭꦩ꧀ꦧꦤꦁ ꦏꦫꦶꦠ꧀ꦮꦴꦤ, ꦱꦔ꧀ꦓꦱ꧀ꦱ ꦄꦢꦢꦁ ꦄꦲꦁ.

꧑꧙. ‘‘ꦠꦺꦤ ꦕꦶꦠ꧀ꦠꦥ꧀ꦥꦱꦴꦢꦺꦤ, ꦱꦸꦧ꧀ꦧꦠꦺ ꦄꦨꦶꦮꦴꦢꦶꦪ;

ꦄꦴꦭꦩ꧀ꦧꦤꦩ꧀ꦥꦶ ꦢꦠ꧀ꦮꦴꦤ, ꦥꦏ꧀ꦏꦴꦩꦶꦁ ꦈꦠ꧀ꦠꦫꦴꦩꦸꦑꦺꦴ.

꧒꧐. ‘‘ꦕꦠꦸꦤ꧀ꦤꦮꦸꦠꦶꦠꦺꦴ ꦏꦥ꧀ꦥꦺ, ꦪꦁ ꦢꦟ꧀ꦝꦩꦢꦢꦶꦁ ꦠꦢꦴ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦢꦟ꧀ꦝꦢꦴꦤꦱ꧀ꦱꦶꦢꦁ ꦦꦭꦁ.

꧒꧑. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦢꦟ꧀ꦝꦢꦴꦪꦏꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦢꦟ꧀ꦝꦢꦴꦪꦏꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦥꦚ꧀ꦕꦩꦁ.

꧖. ꦄꦩ꧀ꦧꦪꦴꦒꦸꦢꦴꦪꦏꦠ꧀ꦡꦺꦫꦄꦥꦢꦴꦤꦁ

꧒꧒. ‘‘ꦱꦠꦫꦁꦱꦷ ꦤꦴꦩ ꦱꦩ꧀ꦧꦸꦢ꧀ꦣꦺꦴ, ꦱꦪꦩ꧀ꦨꦹ ꦄꦥꦫꦴꦗꦶꦠꦺꦴ;

ꦮꦸꦛ꧀ꦜꦲꦶꦠ꧀ꦮꦴ ꦱꦩꦴꦣꦶꦩ꧀ꦲꦴ, ꦨꦶꦏ꧀ꦑꦴꦪ ꦩꦩꦸꦥꦴꦒꦩꦶ.

꧒꧓. ‘‘ꦥꦕ꧀ꦕꦺꦏꦧꦸꦢ꧀ꦣꦁ ꦢꦶꦱ꧀ꦮꦴꦤ, ꦄꦩ꧀ꦧꦪꦴꦒꦸꦁ ꦄꦢꦴꦱꦲꦁ;

ꦮꦶꦥ꧀ꦥꦱꦤ꧀ꦤꦩꦤꦁ ꦠꦱ꧀ꦱ, ꦮꦶꦥ꧀ꦥꦱꦤ꧀ꦤꦺꦤ ꦕꦺꦠꦱꦴ.

꧒꧔. ‘‘ꦕꦠꦸꦤ꧀ꦤꦮꦸꦠꦶꦠꦺꦴ ꦏꦥ꧀ꦥꦺ, ꦪꦁ ꦏꦩ꧀ꦩꦩꦏꦫꦶꦁ ꦠꦢꦴ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦄꦩ꧀ꦧꦪꦴꦒꦸꦪꦶꦢꦁ ꦦꦭꦁ.

꧒꧕. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦄꦩ꧀ꦧꦪꦴꦒꦸꦢꦴꦪꦏꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦄꦩ꧀ꦧꦪꦴꦒꦸꦢꦴꦪꦏꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦖꦛ꧀ꦜꦁ.

꧗. ꦱꦸꦥꦸꦛꦏꦥꦹꦗꦏꦠ꧀ꦡꦺꦫꦄꦥꦢꦴꦤꦁ

꧒꧖. ‘‘ꦢꦶꦮꦴꦮꦶꦲꦴꦫꦴ ꦤꦶꦏ꧀ꦑꦤ꧀ꦠꦺꦴ, ꦮꦶꦥꦱ꧀ꦱꦷ ꦭꦺꦴꦏꦤꦴꦪꦏꦺꦴ;

ꦨꦶꦏ꧀ꦑꦴꦪ ꦮꦶꦕꦫꦤ꧀ꦠꦺꦴ ꦱꦺꦴ, ꦩꦩ ꦱꦤ꧀ꦠꦶꦏꦸꦥꦴꦒꦩꦶ.

꧒꧗. ‘‘ꦠꦠꦺꦴ ꦥꦠꦷꦠꦺꦴ ꦱꦸꦩꦤꦺꦴ, ꦧꦸꦢ꧀ꦣꦱꦺꦛ꧀ꦜꦱ꧀ꦱ ꦠꦴꦢꦶꦤꦺꦴ;

ꦭꦺꦴꦟꦱꦸꦥꦸꦛꦏꦁ ꦢꦠ꧀ꦮꦴ, ꦏꦥ꧀ꦥꦁ ꦱꦒ꧀ꦒꦩ꧀ꦲꦶ ꦩꦺꦴꦢꦲꦁ.

꧒꧘. ‘‘ꦌꦏꦤꦮꦸꦠꦶꦠꦺꦴ ꦏꦥ꧀ꦥꦺ, ꦪꦁ ꦥꦸꦛꦏꦩꦢꦴꦱꦲꦁ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦥꦸꦛꦏꦱ꧀ꦱ ꦆꦢꦁ ꦦꦭꦁ.

꧒꧙. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦱꦸꦥꦸꦛꦏꦥꦹꦗꦏꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦱꦸꦥꦸꦛꦏꦥꦹꦗꦏꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦱꦠ꧀ꦠꦩꦁ.

꧘. ꦩꦚ꧀ꦕꦢꦴꦪꦏꦠ꧀ꦡꦺꦫꦄꦥꦢꦴꦤꦁ

꧓꧐. ‘‘ꦮꦶꦥꦱ꧀ꦱꦶꦤꦺꦴ ꦨꦒꦮꦠꦺꦴ, ꦭꦺꦴꦏꦗꦺꦛ꧀ꦜꦱ꧀ꦱ ꦠꦴꦢꦶꦤꦺꦴ;

ꦌꦏꦁ ꦩꦚ꧀ꦕꦁ ꦩꦪꦴ ꦢꦶꦤ꧀ꦤꦁ, ꦥꦱꦤ꧀ꦤꦺꦤ ꦱꦥꦴꦟꦶꦤꦴ.

꧓꧑. ‘‘ꦲꦠ꧀ꦡꦶꦪꦴꦤꦁ ꦄꦱ꧀ꦱꦪꦴꦤꦁ, ꦢꦶꦧ꧀ꦧꦪꦴꦤꦁ ꦱꦩꦗ꧀ꦙꦒꦁ;

ꦠꦺꦤ ꦩꦚ꧀ꦕꦏꦢꦴꦤꦺꦤ, ꦥꦠ꧀ꦠꦺꦴꦩ꧀ꦲꦶ ꦄꦴꦱꦮꦏ꧀ꦑꦪꦁ.

꧓꧒. ‘‘ꦌꦏꦤꦮꦸꦠꦶꦠꦺꦴ ꦏꦥ꧀ꦥꦺ, ꦪꦁ ꦩꦚ꧀ꦕꦩꦢꦢꦶꦁ ꦠꦢꦴ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦩꦚ꧀ꦕꦢꦴꦤꦱ꧀ꦱꦶꦢꦁ ꦦꦭꦁ.

꧓꧓. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦩꦚ꧀ꦕꦢꦴꦪꦏꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦩꦚ꧀ꦕꦢꦴꦪꦏꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦄꦛ꧀ꦜꦩꦁ.

꧙. ꦱꦫꦟꦒꦩꦤꦶꦪꦠ꧀ꦡꦺꦫꦄꦥꦢꦴꦤꦁ

꧓꧔. ‘‘ꦄꦴꦫꦸꦲꦶꦩ꧀ꦲ ꦠꦢꦴ ꦤꦴꦮꦁ, ꦨꦶꦏ꧀ꦑꦸ ꦕꦴꦗꦷꦮꦏꦺꦴ ꦕꦲꦁ;

ꦤꦴꦮꦴꦪ ꦨꦶꦗ꧀ꦗꦩꦴꦤꦴꦪ, ꦨꦶꦏ꧀ꦑꦸ ꦩꦺ ꦱꦫꦟꦁ ꦄꦢꦴ.

꧓꧕. ‘‘ꦌꦏꦠ꧀ꦠꦶꦁꦱꦺ ꦆꦠꦺꦴ ꦏꦥ꧀ꦥꦺ, ꦪꦚ꧀ꦕ ꦩꦺ ꦱꦫꦟꦁ ꦄꦢꦴ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦱꦫꦟꦴꦒꦩꦤꦺ ꦦꦭꦁ.

꧓꧖. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦱꦫꦟꦒꦩꦤꦶꦪꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦱꦫꦟꦒꦩꦤꦶꦪꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦤꦮꦩꦁ.

꧑꧐. ꦥꦶꦟ꧀ꦝꦥꦴꦠꦶꦏꦠ꧀ꦡꦺꦫꦄꦥꦢꦴꦤꦁ

꧓꧗. ‘‘ꦠꦶꦱ꧀ꦱꦺꦴ ꦤꦴꦩꦴꦱꦶ ꦱꦩ꧀ꦧꦸꦢ꧀ꦣꦺꦴ, ꦮꦶꦲꦴꦱꦶ ꦮꦶꦥꦶꦤꦺ ꦠꦢꦴ;

ꦠꦸꦱꦶꦠꦴ ꦲꦶ ꦆꦣꦴꦒꦤ꧀ꦠ꧀ꦮꦴ, ꦥꦶꦟ꧀ꦝꦥꦴꦠꦁ ꦄꦢꦴꦱꦲꦁ.

꧓꧘. ‘‘ꦱꦩ꧀ꦧꦸꦢ꧀ꦣꦩꦨꦶꦮꦴꦢꦺꦠ꧀ꦮꦴ, ꦠꦶꦱ꧀ꦱꦁ ꦤꦴꦩ ꦩꦲꦴꦪꦱꦁ;

ꦱꦏꦁ ꦕꦶꦠ꧀ꦠꦁ ꦥꦱꦴꦢꦺꦠ꧀ꦮꦴ, ꦠꦸꦱꦶꦠꦁ ꦄꦒꦩꦴꦱꦲꦁ.

꧓꧙. ‘‘ꦢ꧀ꦮꦺꦤꦮꦸꦠꦺ ꦆꦠꦺꦴ ꦏꦥ꧀ꦥꦺ, ꦪꦁ ꦢꦴꦤꦩꦢꦢꦶꦁ ꦠꦢꦴ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦥꦶꦟ꧀ꦝꦥꦴꦠꦱ꧀ꦱꦶꦢꦁ ꦦꦭꦁ.

꧔꧐. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦥꦶꦟ꧀ꦝꦥꦴꦠꦶꦏꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦥꦶꦟ꧀ꦝꦥꦴꦠꦶꦏꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦢꦱꦩꦁ.

ꦱꦢ꧀ꦢꦱꦚ꧀ꦚꦏꦮꦒ꧀ꦒꦺꦴ ꦖꦠ꧀ꦠꦶꦁꦱꦠꦶꦩꦺꦴ.