꧓. ꦠꦶꦱꦫꦟꦒꦩꦤꦶꦪꦠ꧀ꦡꦺꦫꦄꦥꦢꦴꦤꦁ

꧑꧐꧖. ‘‘ꦤꦒꦫꦺ ꦕꦤ꧀ꦢꦮꦠꦶꦪꦴ [ꦧꦤ꧀ꦣꦸꦩꦠꦶꦪꦴ (ꦄꦛ꧀ꦜ.)], ꦩꦴꦠꦸꦈꦥꦛ꧀ꦜꦴꦏꦺꦴ [ꦩꦴꦠꦸꦥꦛ꧀ꦜꦴꦪꦏꦺꦴ (ꦱꦷ.), ꦩꦴꦠꦸꦥꦛ꧀ꦜꦴꦤꦏꦺꦴ (ꦱ꧀ꦪꦴ.)] ꦄꦲꦸꦁ;

ꦄꦤ꧀ꦣꦴ ꦩꦴꦠꦴ ꦥꦶꦠꦴ ꦩꦪ꧀ꦲꦁ, ꦠꦺ ꦥꦺꦴꦱꦺꦩꦶ ꦄꦲꦁ ꦠꦢꦴ.

꧑꧐꧗. ‘‘ꦫꦲꦺꦴꦒꦠꦺꦴ ꦤꦶꦱꦷꦢꦶꦠ꧀ꦮꦴ, ꦌꦮꦁ ꦕꦶꦤ꧀ꦠꦺꦱꦲꦁ ꦠꦢꦴ;

ꦥꦺꦴꦱꦺꦤ꧀ꦠꦺꦴ ꦩꦴꦠꦴꦥꦶꦠꦫꦺꦴ, ꦥꦧ꧀ꦧꦗ꧀ꦗꦁ ꦤ ꦭꦨꦴꦩꦲꦁ.

꧑꧐꧘. ‘‘ꦩꦲꦤ꧀ꦣꦏꦴꦫꦥꦶꦲꦶꦠꦴ [ꦠꦩꦤ꧀ꦣꦏꦴꦫꦥꦶꦲꦶꦠꦴ (ꦱ꧀ꦪꦴ.)], ꦠꦶꦮꦶꦣꦒ꧀ꦒꦷꦲꦶ ꦝꦪ꧀ꦲꦫꦺ;

ꦌꦠꦴꦢꦶꦱꦺ ꦨꦮꦺ [ꦨꦪꦺ (ꦱꦷ.)] ꦗꦴꦠꦺ, ꦤꦠ꧀ꦡꦶ ꦏꦺꦴꦕꦶ ꦮꦶꦤꦴꦪꦏꦺꦴ.

꧑꧐꧙. ‘‘ꦧꦸꦢ꧀ꦣꦺꦴ ꦭꦺꦴꦏꦺ ꦱꦩꦸꦥ꧀ꦥꦤ꧀ꦤꦺꦴ, ꦢꦶꦥ꧀ꦥꦠꦶ [ꦢꦶꦧ꧀ꦧꦠꦶ (ꦏ.)] [ꦗꦶꦤꦱꦴꦱꦤꦁ (ꦱꦷ.)] ꦢꦴꦤꦶ ꦱꦴꦱꦤꦁ;

ꦱꦏ꧀ꦏꦴ ꦈꦢ꧀ꦣꦫꦶꦠꦸꦁ ꦄꦠ꧀ꦠꦴ, ꦥꦸꦚ꧀ꦚꦏꦴꦩꦺꦤ ꦗꦤ꧀ꦠꦸꦤꦴ.

꧑꧑꧐. ‘‘ꦈꦒ꧀ꦒꦪ꧀ꦲ ꦠꦷꦟꦶ ꦱꦫꦟꦺ, ꦥꦫꦶꦥꦸꦟ꧀ꦟꦴꦤꦶ ꦒꦺꦴꦥꦪꦶꦁ;

ꦠꦺꦤ ꦏꦩ꧀ꦩꦺꦤ ꦱꦸꦏꦠꦺꦤ, ꦥꦛꦶꦩꦺꦴꦏ꧀ꦑꦴꦩꦶ ꦢꦸꦒ꧀ꦒꦠꦶꦁ.

꧑꧑꧑. ‘‘ꦤꦶꦱꦨꦺꦴ ꦤꦴꦩ ꦱꦩꦟꦺꦴ, ꦧꦸꦢ꧀ꦣꦱ꧀ꦱ ꦄꦒ꧀ꦒꦱꦴꦮꦏꦺꦴ;

ꦠꦩꦲꦁ ꦈꦥꦒꦤ꧀ꦠ꧀ꦮꦴꦤ, ꦱꦫꦟꦒꦩꦤꦁ ꦒꦲꦶꦁ.

꧑꧑꧒. ‘‘ꦮꦱ꧀ꦱꦱꦠꦱꦲꦱ꧀ꦱꦴꦤꦶ, ꦄꦴꦪꦸ ꦮꦶꦗ꧀ꦗꦠꦶ ꦠꦴꦮꦢꦺ;

ꦠꦴꦮꦠꦴ ꦱꦫꦟꦒꦩꦤꦁ, ꦥꦫꦶꦥꦸꦟ꧀ꦟꦁ ꦄꦒꦺꦴꦥꦪꦶꦁ.

꧑꧑꧓. ‘‘ꦕꦫꦶꦩꦺ ꦮꦠ꧀ꦠꦩꦴꦤꦩ꧀ꦲꦶ, ꦱꦫꦟꦁ ꦠꦁ ꦄꦤꦸꦱ꧀ꦱꦫꦶꦁ;

ꦠꦺꦤ ꦏꦩ꧀ꦩꦺꦤ ꦱꦸꦏꦠꦺꦤ, ꦠꦴꦮꦠꦶꦁꦱꦁ ꦄꦒꦕ꧀ꦖꦲꦁ.

꧑꧑꧔. ‘‘ꦢꦺꦮꦭꦺꦴꦏꦒꦠꦺꦴ ꦱꦤ꧀ꦠꦺꦴ, ꦥꦸꦚ꧀ꦚꦏꦩ꧀ꦩꦱꦩꦴꦲꦶꦠꦺꦴ;

ꦪꦁ ꦢꦺꦱꦁ [ꦪꦁ ꦪꦁ ꦢꦺꦱꦁ (ꦱ꧀ꦪꦴ.)] ꦈꦥꦥꦗ꧀ꦗꦴꦩꦶ [ꦈꦥꦒꦕ꧀ꦖꦴꦩꦶ (ꦱꦷ.)], ꦄꦛ꧀ꦜ ꦲꦺꦠꦹ ꦭꦨꦴꦩꦲꦁ.

꧑꧑꧕. ‘‘ꦢꦶꦱꦴꦱꦸ ꦥꦹꦗꦶꦠꦺꦴ ꦲꦺꦴꦩꦶ, ꦠꦶꦏ꧀ꦑꦥꦚ꧀ꦚꦺꦴ ꦨꦮꦴꦩꦲꦁ;

ꦱꦧ꧀ꦧꦺ ꦢꦺꦮꦴꦤꦸꦮꦠ꧀ꦠꦤ꧀ꦠꦶ, ꦄꦩꦶꦠꦨꦺꦴꦒꦁ ꦭꦨꦴꦩꦲꦁ.

꧑꧑꧖. ‘‘ꦱꦸꦮꦟ꧀ꦟꦮꦟ꧀ꦟꦺꦴ ꦱꦧ꧀ꦧꦠ꧀ꦡ, ꦥꦛꦶꦏꦤ꧀ꦠꦺꦴ ꦨꦮꦴꦩꦲꦁ;

ꦩꦶꦠ꧀ꦠꦴꦤꦁ ꦄꦕꦭꦺꦴ ꦲꦺꦴꦩꦶ, ꦪꦱꦺꦴ ꦄꦧ꧀ꦨꦸꦒ꧀ꦒꦠꦺꦴ ꦩꦩꦁ.

꧑꧑꧗. ‘‘ꦄꦱꦷꦠꦶꦏ꧀ꦑꦠ꧀ꦠꦸ ꦢꦺꦮꦶꦤ꧀ꦢꦺꦴ, ꦢꦺꦮꦫꦗ꧀ꦗꦩꦏꦴꦫꦪꦶꦁ;

ꦢꦶꦧ꧀ꦧꦱꦸꦑꦁ ꦄꦤꦸꦨꦮꦶꦁ, ꦄꦕ꧀ꦖꦫꦴꦲꦶ ꦥꦸꦫꦏ꧀ꦑꦠꦺꦴ.

꧑꧑꧘. ‘‘ꦥꦚ꧀ꦕꦱꦠ꧀ꦠꦠꦶꦏ꧀ꦑꦠ꧀ꦠꦸꦚ꧀ꦕ, ꦕꦏ꧀ꦏꦮꦠ꧀ꦠꦷ ꦄꦲꦺꦴꦱꦲꦁ;

ꦥꦢꦺꦱꦫꦗ꧀ꦗꦁ ꦮꦶꦥꦸꦭꦁ, ꦒꦟꦤꦴꦠꦺꦴ ꦄꦱꦔ꧀ꦑꦶꦪꦁ.

꧑꧑꧙. ‘‘ꦥꦕ꧀ꦖꦶꦩꦺ ꦨꦮꦺ ꦱꦩ꧀ꦥꦠ꧀ꦠꦺ, ꦥꦸꦚ꧀ꦚꦏꦩ꧀ꦩꦱꦩꦴꦲꦶꦠꦺꦴ;

ꦥꦸꦫꦺ ꦱꦴꦮꦠ꧀ꦡꦶꦪꦁ ꦗꦴꦠꦺꦴ, ꦩꦲꦴꦱꦴꦭꦺ ꦱꦸꦄꦝ꧀ꦞꦏꦺ.

꧑꧒꧐. ‘‘ꦤꦒꦫꦴ ꦤꦶꦏ꧀ꦑꦩꦶꦠ꧀ꦮꦴꦤ, ꦢꦴꦫꦏꦺꦲꦶ ꦥꦸꦫꦏ꧀ꦑꦠꦺꦴ;

ꦲꦱꦑꦶꦝ꧀ꦝꦱꦩꦔ꧀ꦒꦷꦲꦁ [ꦱꦴꦲꦁ ꦑꦶꦝ꧀ꦝꦱꦩꦔ꧀ꦒꦷ (ꦱ꧀ꦪꦴ.)], ꦱꦔ꧀ꦓꦴꦫꦴꦩꦁ ꦈꦥꦴꦒꦩꦶꦁ.

꧑꧒꧑. ‘‘ꦠꦠ꧀ꦡꦢ꧀ꦢꦱꦴꦱꦶꦁ [ꦠꦠ꧀ꦡꦢ꧀ꦢꦱꦴꦲꦁ (ꦏ.)] ꦱꦩꦟꦁ, ꦮꦶꦥ꧀ꦥꦩꦸꦠ꧀ꦠꦁ ꦤꦶꦫꦹꦥꦣꦶꦁ;

ꦱꦺꦴ ꦩꦺ ꦣꦩ꧀ꦩꦩꦢꦺꦱꦺꦱꦶ, ꦱꦫꦟꦚ꧀ꦕ ꦄꦢꦴꦱꦶ ꦩꦺ.

꧑꧒꧒. ‘‘ꦱꦺꦴꦲꦁ ꦱꦸꦠ꧀ꦮꦴꦤ ꦱꦫꦟꦁ, ꦱꦫꦟꦁ ꦩꦺ ꦄꦤꦸꦱ꧀ꦱꦫꦶꦁ;

ꦌꦏꦴꦱꦤꦺ ꦤꦶꦱꦷꦢꦶꦠ꧀ꦮꦴ, ꦄꦫꦲꦠ꧀ꦠꦩꦥꦴꦥꦸꦟꦶꦁ.

꧑꧒꧓. ‘‘ꦗꦴꦠꦶꦪꦴ ꦱꦠ꧀ꦠꦩꦺ ꦮꦱ꧀ꦱꦺ, ꦄꦫꦲꦠ꧀ꦠꦩꦥꦴꦥꦸꦟꦶꦁ;

ꦈꦥꦱꦩ꧀ꦥꦴꦢꦪꦶ ꦧꦸꦢ꧀ꦣꦺꦴ, ꦒꦸꦟꦩꦚ꧀ꦚꦴꦪ ꦕꦏ꧀ꦑꦸꦩꦴ.

꧑꧒꧔. ‘‘ꦄꦥꦫꦶꦩꦺꦪ꧀ꦪꦺ ꦆꦠꦺꦴ ꦏꦥ꧀ꦥꦺ, ꦱꦫꦟꦴꦤꦶ ꦄꦒꦕ꧀ꦖꦲꦁ;

ꦠꦠꦺꦴ ꦩꦺ ꦱꦸꦏꦠꦁ ꦏꦩ꧀ꦩꦁ, ꦦꦭꦁ ꦢꦱ꧀ꦱꦺꦱꦶ ꦩꦺ ꦆꦣ.

꧑꧒꧕. ‘‘ꦱꦸꦒꦺꦴꦥꦶꦠꦁ ꦩꦺ ꦱꦫꦟꦁ, ꦩꦴꦤꦱꦁ ꦱꦸꦥ꧀ꦥꦟꦷꦲꦶꦠꦁ;

ꦄꦤꦸꦨꦺꦴꦠ꧀ꦮꦴ ꦪꦱꦁ ꦱꦧ꧀ꦧꦁ, ꦥꦠ꧀ꦠꦺꦴꦩ꧀ꦲꦶ ꦄꦕꦭꦁ ꦥꦢꦁ.

꧑꧒꧖. ‘‘ꦪꦺꦱꦁ ꦱꦺꦴꦠꦴꦮꦣꦴꦤꦠ꧀ꦡꦶ, ꦱꦸꦟꦺꦴꦡ ꦩꦩ ꦨꦴꦱꦠꦺꦴ;

ꦄꦲꦁ [ꦄꦠ꧀ꦡꦁ (ꦱ꧀ꦪꦴ.)] ꦮꦺꦴ ꦏꦡꦪꦶꦱ꧀ꦱꦴꦩꦶ, ꦱꦴꦩꦁ ꦢꦶꦛ꧀ꦜꦁ ꦥꦢꦁ ꦩꦩ.

꧑꧒꧗. ‘‘‘ꦧꦸꦢ꧀ꦣꦺꦴ ꦭꦺꦴꦏꦺ ꦱꦩꦸꦥ꧀ꦥꦤ꧀ꦤꦺꦴ, ꦮꦠ꧀ꦠꦠꦺ ꦗꦶꦤꦱꦴꦱꦤꦁ;

ꦄꦩꦠꦴ ꦮꦴꦢꦶꦠꦴ ꦨꦺꦫꦷ, ꦱꦺꦴꦏꦱꦭ꧀ꦭꦮꦶꦤꦺꦴꦢꦤꦴ.

꧑꧒꧘. ‘‘‘ꦪꦡꦴꦱꦏꦺꦤ ꦡꦴꦩꦺꦤ, ꦥꦸꦚ꧀ꦚꦏ꧀ꦑꦺꦠ꧀ꦠꦺ ꦄꦤꦸꦠ꧀ꦠꦫꦺ;

ꦄꦣꦶꦏꦴꦫꦁ ꦏꦫꦺꦪ꧀ꦪꦴꦡ, ꦥꦱ꧀ꦱꦪꦶꦱ꧀ꦱꦡ ꦤꦶꦧ꧀ꦧꦸꦠꦶꦁ.

꧑꧒꧙. ‘‘‘ꦥꦒ꧀ꦒꦪ꧀ꦲ ꦠꦷꦟꦶ ꦱꦫꦟꦺ, ꦥꦚ꧀ꦕꦱꦷꦭꦴꦤꦶ ꦒꦺꦴꦥꦶꦪ;

ꦧꦸꦢ꧀ꦣꦺ ꦕꦶꦠ꧀ꦠꦁ ꦥꦱꦴꦢꦺꦠ꧀ꦮꦴ, ꦢꦸꦏ꧀ꦑꦱ꧀ꦱꦤ꧀ꦠꦁ ꦏꦫꦶꦱ꧀ꦱꦡ.

꧑꧓꧐. ‘‘‘ꦱꦩ꧀ꦩꦴ ꦣꦩ꧀ꦩꦁ ꦨꦴꦮꦺꦠ꧀ꦮꦴꦤ [ꦩꦩꦺꦴꦥꦩꦁ ꦏꦫꦶꦠ꧀ꦮꦴꦤ (ꦱꦷ. ꦱ꧀ꦪꦴ.)], ꦱꦷꦭꦴꦤꦶ ꦥꦫꦶꦒꦺꦴꦥꦶꦪ;

ꦄꦕꦶꦫꦁ ꦄꦫꦲꦠ꧀ꦠꦁ ꦮꦺꦴ, ꦱꦧ꧀ꦧꦺꦥꦶ ꦥꦴꦥꦸꦟꦶꦱ꧀ꦱꦡ.

꧑꧓꧑. ‘‘‘ꦠꦺꦮꦶꦗ꧀ꦗꦺꦴ ꦆꦢ꧀ꦣꦶꦥꦠ꧀ꦠꦺꦴꦩ꧀ꦲꦶ, ꦕꦺꦠꦺꦴꦥꦫꦶꦪꦏꦺꦴꦮꦶꦢꦺꦴ;

ꦱꦴꦮꦏꦺꦴ ꦠꦺ ꦩꦲꦴꦮꦷꦫ, ꦱꦫꦟꦺꦴ [ꦕꦫꦟꦺ (ꦱꦷ. ꦱ꧀ꦪꦴ.)] ꦮꦤ꧀ꦢꦠꦶ ꦱꦠ꧀ꦡꦸꦤꦺꦴ’.

꧑꧓꧒. ‘‘ꦄꦥꦫꦶꦩꦺꦪ꧀ꦪꦺ ꦆꦠꦺꦴ ꦏꦥ꧀ꦥꦺ, ꦱꦫꦟꦁ ꦧꦸꦢ꧀ꦣꦱ꧀ꦱ ꦒꦕ꧀ꦖꦲꦁ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦱꦫꦟꦁ ꦒꦩꦤꦺ ꦦꦭꦁ.

꧑꧓꧓. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ, ꦮꦶꦩꦺꦴꦏ꧀ꦑꦴꦥꦶ ꦕ ꦄꦛ꧀ꦜꦶꦩꦺ;

ꦖꦭ꦳ꦨꦶꦚ꧀ꦚꦴ ꦱꦕ꧀ꦖꦶꦏꦠꦴ, ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦠꦶꦱꦫꦟꦒꦩꦤꦶꦪꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦠꦶꦱꦫꦟꦒꦩꦤꦶꦪꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦠꦠꦶꦪꦁ.