꧘. ꦫꦛ꧀ꦜꦥꦴꦭꦠ꧀ꦡꦺꦫꦄꦥꦢꦴꦤꦁ

꧙꧗. ‘‘ꦥꦢꦸꦩꦸꦠ꧀ꦠꦫꦱ꧀ꦱ ꦨꦒꦮꦠꦺꦴ, ꦭꦺꦴꦏꦗꦺꦛ꧀ꦜꦱ꧀ꦱ ꦠꦴꦢꦶꦤꦺꦴ;

ꦮꦫꦤꦴꦒꦺꦴ ꦩꦪꦴ ꦢꦶꦤ꧀ꦤꦺꦴ, ꦇꦱꦴꦢꦤ꧀ꦠꦺꦴ ꦈꦫꦹꦭ꦳꧀ꦲꦮꦴ.

꧙꧘. ‘‘ꦱꦺꦠꦕ꧀ꦖꦠ꧀ꦠꦺꦴ ꦥꦱꦺꦴꦨꦶꦠꦺꦴ, ꦱꦏꦥ꧀ꦥꦤꦺꦴ ꦱꦲꦠ꧀ꦡꦶꦥꦺꦴ;

ꦄꦒ꧀ꦓꦴꦥꦺꦠ꧀ꦮꦴꦤ ꦠꦁ ꦱꦧ꧀ꦧꦁ, ꦱꦔ꧀ꦓꦴꦫꦴꦩꦁ ꦄꦏꦴꦫꦪꦶꦁ.

꧙꧙. ‘‘ꦕꦠꦸꦥꦚ꧀ꦚꦴꦱꦱꦲꦱ꧀ꦱꦴꦤꦶ, ꦥꦴꦱꦴꦢꦺ ꦏꦴꦫꦪꦶꦁ ꦄꦲꦁ;

ꦩꦲꦺꦴꦓꦢꦴꦤꦁ [ꦩꦲꦴꦨꦠ꧀ꦠꦁ (ꦱꦷ.), ꦩꦲꦺꦴꦓꦚ꧀ꦕ (ꦏ.), ꦩꦲꦴꦢꦴꦤꦁ (?)] ꦏꦫꦶꦠ꧀ꦮꦴꦤ, ꦤꦶꦪ꧀ꦪꦴꦢꦺꦱꦶꦁ ꦩꦲꦺꦱꦶꦤꦺꦴ.

꧑꧐꧐. ‘‘ꦄꦤꦸꦩꦺꦴꦢꦶ ꦩꦲꦴꦮꦷꦫꦺꦴ, ꦱꦪꦩ꧀ꦨꦹ ꦄꦒ꧀ꦒꦥꦸꦒ꧀ꦒꦭꦺꦴ;

ꦱꦧ꧀ꦧꦺ ꦗꦤꦺ ꦲꦴꦱꦪꦤ꧀ꦠꦺꦴ, ꦢꦺꦱꦺꦱꦶ ꦄꦩꦠꦁ ꦥꦢꦁ.

꧑꧐꧑. ‘‘ꦠꦁ ꦩꦺ ꦧꦸꦢ꧀ꦣꦺꦴ ꦮꦶꦪꦴꦏꦴꦱꦶ, ꦗꦭꦗꦸꦠ꧀ꦠꦫꦤꦴꦩꦏꦺꦴ;

ꦨꦶꦏ꧀ꦑꦸꦱꦔ꧀ꦓꦺ ꦤꦶꦱꦷꦢꦶꦠ꧀ꦮꦴ, ꦆꦩꦴ ꦒꦴꦡꦴ ꦄꦨꦴꦱꦡ.

꧑꧐꧒. ‘‘‘ꦕꦠꦸꦥꦚ꧀ꦚꦴꦱꦱꦲꦱ꧀ꦱꦴꦤꦶ, ꦥꦴꦱꦴꦢꦺ ꦏꦴꦫꦪꦷ ꦄꦪꦁ;

ꦏꦡꦪꦶꦱ꧀ꦱꦴꦩꦶ ꦮꦶꦥꦴꦏꦁ, ꦱꦸꦟꦺꦴꦡ ꦩꦩ ꦨꦴꦱꦠꦺꦴ.

꧑꧐꧓. ‘‘‘ꦄꦛ꧀ꦜꦴꦫꦱꦱꦲꦱ꧀ꦱꦴꦤꦶ, ꦏꦹꦛꦴꦒꦴꦫꦴ ꦨꦮꦶꦱ꧀ꦱꦫꦺ;

ꦧ꧀ꦪꦩ꧀ꦲꦸꦠ꧀ꦠꦩꦩ꧀ꦲꦶ ꦤꦶꦧ꧀ꦧꦠ꧀ꦠꦴ, ꦱꦧ꧀ꦧꦱꦺꦴꦟ꧀ꦟꦩꦪꦴ ꦕ ꦠꦺ.

꧑꧐꧔. ‘‘‘ꦥꦚ꧀ꦚꦴꦱꦏ꧀ꦑꦠ꧀ꦠꦸꦁ ꦢꦺꦮꦶꦤ꧀ꦢꦺꦴ, ꦢꦺꦮꦫꦗ꧀ꦗꦁ ꦏꦫꦶꦱ꧀ꦱꦠꦶ;

ꦄꦛ꧀ꦜꦥꦚ꧀ꦚꦴꦱꦏ꧀ꦑꦠ꧀ꦠꦸꦚ꧀ꦕ, ꦕꦏ꧀ꦏꦮꦠ꧀ꦠꦷ ꦨꦮꦶꦱ꧀ꦱꦠꦶ.

꧑꧐꧕. ‘‘‘ꦏꦥ꧀ꦥꦱꦠꦱꦲꦱ꧀ꦱꦩ꧀ꦲꦶ, ꦎꦏ꧀ꦏꦴꦏꦏꦸꦭꦱꦩ꧀ꦨꦮꦺꦴ;

ꦒꦺꦴꦠꦩꦺꦴ ꦤꦴꦩ ꦒꦺꦴꦠ꧀ꦠꦺꦤ, ꦱꦠ꧀ꦡꦴ ꦭꦺꦴꦏꦺ ꦨꦮꦶꦱ꧀ꦱꦠꦶ.

꧑꧐꧖. ‘‘‘ꦢꦺꦮꦭꦺꦴꦏꦴ ꦕꦮꦶꦠ꧀ꦮꦴꦤ, ꦱꦸꦏ꧀ꦏꦩꦹꦭꦺꦤ ꦕꦺꦴꦢꦶꦠꦺꦴ;

ꦄꦝ꧀ꦞꦺ ꦏꦸꦭꦺ ꦩꦲꦴꦨꦺꦴꦒꦺ, ꦤꦶꦧ꧀ꦧꦠ꧀ꦠꦶꦱ꧀ꦱꦠꦶ ꦠꦴꦮꦢꦺ.

꧑꧐꧗. ‘‘‘ꦱꦺꦴ ꦥꦕ꧀ꦖꦴ ꦥꦧ꧀ꦧꦗꦶꦠ꧀ꦮꦴꦤ, ꦱꦸꦏ꧀ꦏꦩꦹꦭꦺꦤ ꦕꦺꦴꦢꦶꦠꦺꦴ;

ꦫꦛ꧀ꦜꦥꦴꦭꦺꦴꦠꦶ ꦤꦴꦩꦺꦤ, ꦲꦺꦱ꧀ꦱꦠꦶ ꦱꦠ꧀ꦡꦸ ꦱꦴꦮꦏꦺꦴ.

꧑꧐꧘. ‘‘‘ꦥꦣꦴꦤꦥꦲꦶꦠꦠ꧀ꦠꦺꦴ ꦱꦺꦴ, ꦈꦥꦱꦤ꧀ꦠꦺꦴ ꦤꦶꦫꦹꦥꦣꦶ;

ꦱꦧ꧀ꦧꦴꦱꦮꦺ ꦥꦫꦶꦚ꧀ꦚꦴꦪ, ꦤꦶꦧ꧀ꦧꦴꦪꦶꦱ꧀ꦱꦠꦶꦤꦴꦱꦮꦺꦴ’.

꧑꧐꧙. ‘‘ꦈꦛ꧀ꦜꦴꦪ ꦄꦨꦶꦤꦶꦏ꧀ꦑꦩ꧀ꦩ, ꦗꦲꦶꦠꦴ ꦨꦺꦴꦒꦱꦩ꧀ꦥꦢꦴ;

ꦑꦺꦭ꦳ꦥꦶꦟ꧀ꦝꦺꦮ ꦨꦺꦴꦒꦩ꧀ꦲꦶ, ꦥꦺꦩꦁ ꦩꦪ꧀ꦲꦁ ꦤ ꦮꦶꦗ꧀ꦗꦠꦶ.

꧑꧑꧐. ‘‘ꦮꦷꦫꦶꦪꦁ ꦩꦺ ꦣꦸꦫꦣꦺꦴꦫꦪ꧀ꦲꦁ, ꦪꦺꦴꦒꦏ꧀ꦑꦺꦩꦴꦣꦶꦮꦴꦲꦤꦁ;

ꦣꦴꦫꦺꦩꦶ ꦄꦤ꧀ꦠꦶꦩꦁ ꦢꦺꦲꦁ, ꦱꦩ꧀ꦩꦴꦱꦩ꧀ꦧꦸꦢ꧀ꦣꦱꦴꦱꦤꦺ.

꧑꧑꧑. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ, ꦮꦶꦩꦺꦴꦏ꧀ꦑꦴꦥꦶ ꦕ ꦄꦛ꧀ꦜꦶꦩꦺ;

ꦖꦭ꦳ꦨꦶꦚ꧀ꦚꦴ ꦱꦕ꧀ꦖꦶꦏꦠꦴ, ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦫꦛ꧀ꦜꦥꦴꦭꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦫꦛ꧀ꦜꦥꦴꦭꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦄꦛ꧀ꦜꦩꦁ.