꧑꧖. ꦧꦤ꧀ꦣꦸꦗꦷꦮꦏꦮꦒ꧀ꦒꦺꦴ

꧑. ꦧꦤ꧀ꦣꦸꦗꦷꦮꦏꦠ꧀ꦡꦺꦫꦄꦥꦢꦴꦤꦁ

꧑. ‘‘ꦕꦤ꧀ꦢꦁꦮ ꦮꦶꦩꦭꦁ ꦱꦸꦢ꧀ꦣꦁ, ꦮꦶꦥ꧀ꦥꦱꦤ꧀ꦤꦩꦤꦴꦮꦶꦭꦁ;

ꦤꦤ꧀ꦢꦷꦨꦮꦥꦫꦶꦏ꧀ꦑꦷꦟꦁ, ꦠꦶꦟ꧀ꦟꦁ ꦭꦺꦴꦏꦺ ꦮꦶꦱꦠ꧀ꦠꦶꦏꦁ.

꧒. ‘‘ꦤꦶꦧ꧀ꦧꦴꦥꦪꦤ꧀ꦠꦁ ꦗꦤꦠꦁ, ꦠꦶꦟ꧀ꦟꦁ [ꦢꦶꦱ꧀ꦮꦴ (?)] ꦠꦴꦫꦪꦠꦁ ꦮꦫꦁ [ꦠꦴꦫꦪꦠꦁ ꦩꦸꦤꦶꦁ (ꦱ꧀ꦪꦴ.)];

ꦩꦸꦤꦶꦁ ꦮꦤꦩ꧀ꦲꦶ ꦙꦴꦪꦤ꧀ꦠꦁ [ꦮꦤꦱ꧀ꦩꦶꦁ ꦙꦴꦪꦩꦴꦤꦁ ꦠꦁ (ꦱꦷ. ꦱ꧀ꦪꦴ.)], ꦌꦏꦒ꧀ꦒꦁ ꦱꦸꦱꦩꦴꦲꦶꦠꦁ.

꧓. ‘‘ꦧꦤ꧀ꦣꦸꦗꦷꦮꦏꦥꦸꦥ꧀ꦦꦴꦤꦶ, ꦭꦒꦺꦠ꧀ꦮꦴ ꦱꦸꦠ꧀ꦠꦏꦺꦤꦲꦁ;

ꦧꦸꦢ꧀ꦣꦱ꧀ꦱ ꦄꦨꦶꦫꦺꦴꦥꦪꦶꦁ, ꦱꦶꦑꦶꦤꦺꦴ ꦭꦺꦴꦏꦧꦤ꧀ꦣꦸꦤꦺꦴ.

꧔. ‘‘ꦌꦏꦠ꧀ꦠꦶꦁꦱꦺ ꦆꦠꦺꦴ ꦏꦥ꧀ꦥꦺ, ꦪꦁ ꦏꦩ꧀ꦩꦩꦏꦫꦶꦁ ꦠꦢꦴ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦧꦸꦢ꧀ꦣꦥꦹꦗꦴꦪꦶꦢꦁ ꦦꦭꦁ.

꧕. ‘‘ꦆꦠꦺꦴ ꦱꦠ꧀ꦠꦩꦏꦺ ꦏꦥ꧀ꦥꦺ, ꦩꦤꦸꦗꦶꦤ꧀ꦢꦺꦴ ꦩꦲꦴꦪꦱꦺꦴ;

ꦱꦩꦤ꧀ꦠꦕꦏ꧀ꦑꦸ ꦤꦴꦩꦴꦱꦶ, ꦕꦏ꧀ꦏꦮꦠ꧀ꦠꦷ ꦩꦲꦧ꧀ꦧꦭꦺꦴ.

꧖. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ, ꦮꦶꦩꦺꦴꦏ꧀ꦑꦴꦥꦶ ꦕ ꦄꦛ꧀ꦜꦶꦩꦺ;

ꦖꦭ꦳ꦨꦶꦚ꧀ꦚꦴ ꦱꦕ꧀ꦖꦶꦏꦠꦴ, ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦧꦤ꧀ꦣꦸꦗꦷꦮꦏꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦧꦤ꧀ꦣꦸꦗꦷꦮꦏꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦥꦜꦩꦁ.

꧒. ꦠꦩ꧀ꦧꦥꦸꦥ꧀ꦦꦶꦪꦠ꧀ꦡꦺꦫꦄꦥꦢꦴꦤꦁ

꧗. ‘‘ꦥꦫꦏꦩ꧀ꦩꦴꦪꦤꦺ ꦪꦸꦠ꧀ꦠꦺꦴ, ꦄꦥꦫꦴꦣꦁ ꦄꦏꦴꦱꦲꦁ;

ꦮꦤꦤ꧀ꦠꦁ ꦄꦨꦶꦣꦴꦮꦶꦱ꧀ꦱꦁ, ꦨꦪꦮꦺꦫꦱꦩꦥ꧀ꦥꦶꦠꦺꦴ.

꧘. ‘‘ꦥꦸꦥ꧀ꦦꦶꦠꦁ ꦥꦴꦢꦥꦁ ꦢꦶꦱ꧀ꦮꦴ, ꦥꦶꦟ꧀ꦝꦶꦧꦤ꧀ꦣꦁ ꦱꦸꦤꦶꦩ꧀ꦩꦶꦠꦁ;

ꦠꦩ꧀ꦧꦥꦸꦥ꧀ꦦꦁ ꦒꦲꦺꦠ꧀ꦮꦴꦤ, ꦧꦺꦴꦣꦶꦪꦁ ꦎꦏꦶꦫꦶꦁ ꦄꦲꦁ.

꧙. ‘‘ꦱꦩ꧀ꦩꦗ꧀ꦗꦶꦠ꧀ꦮꦴꦤ ꦠꦁ ꦧꦺꦴꦣꦶꦁ, ꦥꦴꦛꦭꦶꦁ ꦥꦴꦢꦥꦸꦠ꧀ꦠꦩꦁ;

ꦥꦭ꧀ꦭꦔ꧀ꦏꦁ ꦄꦴꦨꦸꦗꦶꦠ꧀ꦮꦴꦤ, ꦧꦺꦴꦣꦶꦩꦹꦭꦺ ꦈꦥꦴꦮꦶꦱꦶꦁ.

꧑꧐. ‘‘ꦒꦠꦩꦒ꧀ꦒꦁ ꦒꦮꦺꦱꦤ꧀ꦠꦴ, ꦄꦴꦒꦕ꧀ꦖꦸꦁ ꦩꦩ ꦱꦤ꧀ꦠꦶꦏꦁ;

ꦠꦺ ꦕ ꦢꦶꦱ꧀ꦮꦴꦤꦲꦁ ꦠꦠ꧀ꦡ, ꦄꦴꦮꦗ꧀ꦗꦶꦁ ꦧꦺꦴꦣꦶꦩꦸꦠ꧀ꦠꦩꦁ.

꧑꧑. ‘‘ꦮꦤ꧀ꦢꦶꦠ꧀ꦮꦴꦤ ꦄꦲꦁ ꦧꦺꦴꦣꦶꦁ, ꦮꦶꦥ꧀ꦥꦱꦤ꧀ꦤꦺꦤ ꦕꦺꦠꦱꦴ;

ꦄꦤꦺꦏꦠꦴꦭꦺ ꦥꦥꦠꦶꦁ, ꦒꦶꦫꦶꦢꦸꦒ꧀ꦒꦺ ꦨꦪꦴꦤꦏꦺ.

꧑꧒. ‘‘ꦌꦏꦤꦮꦸꦠꦶꦠꦺꦴ ꦏꦥ꧀ꦥꦺ, ꦪꦁ ꦥꦸꦥ꧀ꦦꦩꦨꦶꦫꦺꦴꦥꦪꦶꦁ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦧꦺꦴꦣꦶꦥꦹꦗꦴꦪꦶꦢꦁ ꦦꦭꦁ.

꧑꧓. ‘‘ꦆꦠꦺꦴ ꦕ ꦠꦠꦶꦪꦺ ꦏꦥ꧀ꦥꦺ, ꦫꦴꦗꦴ ꦱꦸꦱꦚ꧀ꦚꦠꦺꦴ ꦄꦲꦁ [ꦱꦁꦡꦸꦱꦶꦠꦺꦴ ꦄꦲꦸꦁ (ꦱꦷ.)];

ꦱꦠ꧀ꦠꦫꦠꦤꦱꦩ꧀ꦥꦤ꧀ꦤꦺꦴ, ꦕꦏ꧀ꦏꦮꦠ꧀ꦠꦷ ꦩꦲꦧ꧀ꦧꦭꦺꦴ.

꧑꧔. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦠꦩ꧀ꦧꦥꦸꦥ꧀ꦦꦶꦪꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦠꦩ꧀ꦧꦥꦸꦥ꧀ꦦꦶꦪꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦢꦸꦠꦶꦪꦁ.

꧓. ꦮꦷꦡꦶꦱꦩ꧀ꦩꦗ꧀ꦗꦏꦠ꧀ꦡꦺꦫꦄꦥꦢꦴꦤꦁ

꧑꧕. ‘‘ꦈꦢꦺꦤ꧀ꦠꦁ ꦱꦠꦫꦁꦱꦶꦁꦮ, ꦥꦷꦠꦫꦁꦱꦶꦁꦮ [ꦱꦶꦠꦫꦁꦱꦶꦁꦮ (ꦱꦷ. ꦱ꧀ꦪꦴ.)] ꦨꦴꦟꦸꦩꦁ;

ꦥꦤ꧀ꦤꦫꦱꦺ ꦪꦡꦴ ꦕꦤ꧀ꦢꦁ, ꦤꦶꦪ꧀ꦪꦤ꧀ꦠꦁ ꦭꦺꦴꦏꦤꦴꦪꦏꦁ.

꧑꧖. ‘‘ꦄꦛ꧀ꦜꦱꦛ꧀ꦜꦶꦱꦲꦱ꧀ꦱꦴꦤꦶ, ꦱꦧ꧀ꦧꦺ ꦑꦷꦟꦴꦱꦮꦴ ꦄꦲꦸꦁ;

ꦥꦫꦶꦮꦴꦫꦶꦁꦱꦸ ꦱꦩ꧀ꦧꦸꦢ꧀ꦣꦁ, ꦢ꧀ꦮꦶꦥꦢꦶꦤ꧀ꦢꦁ ꦤꦫꦴꦱꦨꦁ.

꧑꧗. ‘‘ꦱꦩ꧀ꦩꦗ꧀ꦗꦶꦠ꧀ꦮꦴꦤ ꦠꦁ ꦮꦷꦡꦶꦁ, ꦤꦶꦪ꧀ꦪꦤ꧀ꦠꦺ ꦭꦺꦴꦏꦤꦴꦪꦏꦺ;

ꦈꦱ꧀ꦱꦴꦥꦺꦱꦶꦁ ꦣꦗꦁ ꦠꦠ꧀ꦡ, ꦮꦶꦥ꧀ꦥꦱꦤ꧀ꦤꦺꦤ ꦕꦺꦠꦱꦴ.

꧑꧘. ‘‘ꦌꦏꦤꦮꦸꦠꦶꦠꦺꦴ ꦏꦥ꧀ꦥꦺ, ꦪꦁ ꦣꦗꦁ ꦄꦨꦶꦫꦺꦴꦥꦪꦶꦁ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦣꦗꦢꦴꦤꦱ꧀ꦱꦶꦢꦁ ꦦꦭꦁ.

꧑꧙. ‘‘ꦆꦠꦺꦴ ꦕꦠꦸꦠ꧀ꦡꦏꦺ ꦏꦥ꧀ꦥꦺ, ꦫꦴꦗꦴꦲꦺꦴꦱꦶꦁ ꦩꦲꦧ꧀ꦧꦭꦺꦴ;

ꦱꦧ꧀ꦧꦴꦏꦴꦫꦺꦤ ꦱꦩ꧀ꦥꦤ꧀ꦤꦺꦴ, ꦱꦸꦣꦗꦺꦴ ꦆꦠꦶ ꦮꦶꦱ꧀ꦱꦸꦠꦺꦴ.

꧒꧐. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦮꦷꦡꦶꦱꦩ꧀ꦩꦗ꧀ꦗꦏꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦮꦷꦡꦶꦱꦩ꧀ꦩꦗ꧀ꦗꦏꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦠꦠꦶꦪꦁ.

꧔. ꦏꦏ꧀ꦏꦴꦫꦸꦥꦸꦥ꧀ꦦꦥꦹꦗꦏꦠ꧀ꦡꦺꦫꦄꦥꦢꦴꦤꦁ

꧒꧑. ‘‘ꦢꦺꦮꦥꦸꦠ꧀ꦠꦺꦴ ꦄꦲꦁ ꦱꦤ꧀ꦠꦺꦴ, ꦥꦹꦗꦪꦶꦁ ꦱꦶꦑꦶꦤꦴꦪꦏꦁ;

ꦏꦏ꧀ꦏꦴꦫꦸꦥꦸꦥ꧀ꦦꦁ ꦥꦒ꧀ꦒꦪ꧀ꦲ, ꦧꦸꦢ꧀ꦣꦱ꧀ꦱ ꦄꦨꦶꦫꦺꦴꦥꦪꦶꦁ.

꧒꧒. ‘‘ꦌꦏꦠ꧀ꦠꦶꦁꦱꦺ ꦆꦠꦺꦴ ꦏꦥ꧀ꦥꦺ, ꦪꦁ ꦥꦸꦥ꧀ꦦꦩꦨꦶꦫꦺꦴꦥꦪꦶꦁ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦧꦸꦢ꧀ꦣꦥꦹꦗꦴꦪꦶꦢꦁ ꦦꦭꦁ.

꧒꧓. ‘‘ꦆꦠꦺꦴ ꦕ ꦤꦮꦩꦺ ꦏꦥ꧀ꦥꦺ, ꦫꦴꦗꦴ ꦱꦠ꧀ꦠꦸꦠ꧀ꦠꦩꦺꦴ ꦄꦲꦸꦁ;

ꦱꦠ꧀ꦠꦫꦠꦤꦱꦩ꧀ꦥꦤ꧀ꦤꦺꦴ, ꦕꦏ꧀ꦏꦮꦠ꧀ꦠꦷ ꦩꦲꦧ꧀ꦧꦭꦺꦴ.

꧒꧔. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦏꦏ꧀ꦏꦴꦫꦸꦥꦸꦥ꧀ꦦꦥꦹꦗꦏꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦏꦏ꧀ꦏꦴꦫꦸꦥꦸꦥ꧀ꦦꦥꦹꦗꦏꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦕꦠꦸꦠ꧀ꦡꦁ.

꧕. ꦩꦤ꧀ꦢꦴꦫꦮꦥꦸꦥ꧀ꦦꦥꦹꦗꦏꦠ꧀ꦡꦺꦫꦄꦥꦢꦴꦤꦁ

꧒꧕. ‘‘ꦢꦺꦮꦥꦸꦠ꧀ꦠꦺꦴ ꦄꦲꦁ ꦱꦤ꧀ꦠꦺꦴ, ꦥꦹꦗꦪꦶꦁ ꦱꦶꦑꦶꦤꦴꦪꦏꦁ;

ꦩꦤ꧀ꦢꦴꦫꦮꦺꦤ ꦥꦸꦥ꧀ꦦꦺꦤ, ꦧꦸꦢ꧀ꦣꦱ꧀ꦱ ꦄꦨꦶꦫꦺꦴꦥꦪꦶꦁ.

꧒꧖. ‘‘ꦱꦠ꧀ꦠꦴꦲꦁ ꦖꦢꦤꦁ ꦄꦴꦱꦶ, ꦢꦶꦧ꧀ꦧꦁ ꦩꦴꦭꦁ ꦠꦡꦴꦒꦠꦺ;

ꦱꦧ꧀ꦧꦺ ꦗꦤꦴ ꦱꦩꦴꦒꦤ꧀ꦠ꧀ꦮꦴ, ꦤꦩꦱ꧀ꦱꦶꦁꦱꦸ ꦠꦡꦴꦒꦠꦁ.

꧒꧗. ‘‘ꦌꦏꦠ꧀ꦠꦶꦁꦱꦺ ꦆꦠꦺꦴ ꦏꦥ꧀ꦥꦺ, ꦪꦁ ꦥꦸꦥ꧀ꦦꦩꦨꦶꦥꦹꦗꦪꦶꦁ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦧꦸꦢ꧀ꦣꦥꦹꦗꦴꦪꦶꦢꦁ ꦦꦭꦁ.

꧒꧘. ‘‘ꦆꦠꦺꦴ ꦕ ꦢꦱꦩꦺ ꦏꦥ꧀ꦥꦺ, ꦫꦴꦗꦴꦲꦺꦴꦱꦶꦁ ꦗꦸꦠꦶꦤ꧀ꦣꦫꦺꦴ;

ꦱꦠ꧀ꦠꦫꦠꦤꦱꦩ꧀ꦥꦤ꧀ꦤꦺꦴ, ꦕꦏ꧀ꦏꦮꦠ꧀ꦠꦷ ꦩꦲꦧ꧀ꦧꦭꦺꦴ.

꧒꧙. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦩꦤ꧀ꦢꦴꦫꦮꦥꦸꦥ꧀ꦦꦥꦹꦗꦏꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦩꦤ꧀ꦢꦴꦫꦮꦥꦸꦥ꧀ꦦꦥꦹꦗꦏꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦥꦚ꧀ꦕꦩꦁ.

꧖. ꦏꦢꦩ꧀ꦧꦥꦸꦥ꧀ꦦꦶꦪꦠ꧀ꦡꦺꦫꦄꦥꦢꦴꦤꦁ

꧓꧐. ‘‘ꦲꦶꦩꦮꦤ꧀ꦠꦱ꧀ꦱꦴꦮꦶꦢꦹꦫꦺ, ꦏꦸꦏ꧀ꦏꦸꦛꦺꦴ ꦤꦴꦩ ꦥꦧ꧀ꦧꦠꦺꦴ;

ꦠꦩ꧀ꦲꦶ ꦥꦧ꧀ꦧꦠꦥꦴꦢꦩ꧀ꦲꦶ, ꦱꦠ꧀ꦠ ꦧꦸꦢ꧀ꦣꦴ ꦮꦱꦤ꧀ꦠꦶ ꦠꦺ.

꧓꧑. ‘‘ꦏꦢꦩ꧀ꦧꦁ ꦥꦸꦥ꧀ꦦꦶꦠꦁ ꦢꦶꦱ꧀ꦮꦴ, ꦢꦷꦥꦫꦴꦗꦁꦮ ꦈꦒ꧀ꦒꦠꦁ;

ꦈꦨꦺꦴ ꦲꦠ꧀ꦡꦺꦲꦶ ꦥꦒ꧀ꦒꦪ꧀ꦲ, ꦱꦠ꧀ꦠ ꦧꦸꦢ꧀ꦣꦺ ꦱꦩꦺꦴꦏꦶꦫꦶꦁ.

꧓꧒. ‘‘ꦕꦠꦸꦤ꧀ꦤꦮꦸꦠꦶꦠꦺꦴ ꦏꦥ꧀ꦥꦺ, ꦪꦁ ꦥꦸꦥ꧀ꦦꦩꦨꦶꦫꦺꦴꦥꦪꦶꦁ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦧꦸꦢ꧀ꦣꦥꦹꦗꦴꦪꦶꦢꦁ ꦦꦭꦁ.

꧓꧓. ‘‘ꦢ꧀ꦮꦺꦤꦮꦸꦠꦺ ꦆꦠꦺꦴ ꦏꦥ꧀ꦥꦺ, ꦱꦠ꧀ꦠꦴꦱꦸꦁ ꦥꦸꦥ꧀ꦦꦤꦴꦩꦏꦴ;

ꦱꦠ꧀ꦠꦫꦠꦤꦱꦩ꧀ꦥꦤ꧀ꦤꦴ, ꦕꦏ꧀ꦏꦮꦠ꧀ꦠꦷ ꦩꦲꦧ꧀ꦧꦭꦴ.

꧓꧔. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦏꦢꦩ꧀ꦧꦥꦸꦥ꧀ꦦꦶꦪꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ;

ꦏꦢꦩ꧀ꦧꦥꦸꦥ꧀ꦦꦶꦪꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦖꦛ꧀ꦜꦁ.

꧗. ꦠꦶꦟꦱꦹꦭꦏꦠ꧀ꦡꦺꦫꦄꦥꦢꦴꦤꦁ

꧓꧕. ‘‘ꦲꦶꦩꦮꦤ꧀ꦠꦱ꧀ꦱꦴꦮꦶꦢꦹꦫꦺ, ꦨꦹꦠꦒꦟꦺꦴ ꦤꦴꦩ ꦥꦧ꧀ꦧꦠꦺꦴ;

ꦮꦱꦠꦺꦏꦺꦴ ꦗꦶꦤꦺꦴ ꦠꦠ꧀ꦡ, ꦱꦪꦩ꧀ꦨꦹ ꦭꦺꦴꦏꦤꦶꦱ꧀ꦱꦛꦺꦴ.

꧓꧖. ‘‘ꦠꦶꦟꦱꦹꦭꦁ ꦒꦲꦺꦠ꧀ꦮꦴꦤ, ꦧꦸꦢ꧀ꦣꦱ꧀ꦱ ꦄꦨꦶꦫꦺꦴꦥꦪꦶꦁ;

ꦌꦏꦹꦤꦱꦠꦱꦲꦱ꧀ꦱꦁ, ꦏꦥ꧀ꦥꦁ ꦤ ꦮꦶꦤꦶꦥꦴꦠꦶꦏꦺꦴ.

꧓꧗. ‘‘ꦆꦠꦺꦴ ꦌꦏꦴꦢꦱꦺ ꦏꦥ꧀ꦥꦺ, ꦌꦏꦺꦴꦱꦶꦁ ꦣꦫꦟꦷꦫꦸꦲꦺꦴ;

ꦱꦠ꧀ꦠꦫꦠꦤꦱꦩ꧀ꦥꦤ꧀ꦤꦺꦴ, ꦕꦏ꧀ꦏꦮꦠ꧀ꦠꦷ ꦩꦲꦧ꧀ꦧꦭꦺꦴ.

꧓꧘. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦠꦶꦟꦱꦹꦭꦏꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦠꦶꦟꦱꦹꦭꦏꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦱꦠ꧀ꦠꦩꦁ.

꧘. ꦤꦴꦒꦥꦸꦥ꧀ꦦꦶꦪꦠ꧀ꦡꦺꦫꦄꦥꦢꦴꦤꦁ

꧓꧙. ‘‘ꦱꦸꦮꦕ꧀ꦖꦺꦴ ꦤꦴꦩ ꦤꦴꦩꦺꦤ, ꦧ꧀ꦫꦴꦲ꧀ꦩꦟꦺꦴ ꦩꦤ꧀ꦠꦥꦴꦫꦒꦹ;

ꦥꦸꦫꦏ꧀ꦑꦠꦺꦴ ꦱꦱꦶꦱ꧀ꦱꦺꦲꦶ, ꦮꦱꦠꦺ ꦥꦧ꧀ꦧꦠꦤ꧀ꦠꦫꦺ.

꧔꧐. ‘‘ꦥꦢꦸꦩꦸꦠ꧀ꦠꦫꦺꦴ ꦤꦴꦩ ꦗꦶꦤꦺꦴ, ꦄꦴꦲꦸꦠꦷꦤꦁ ꦥꦛꦶꦒ꧀ꦒꦲꦺꦴ;

ꦩꦩꦸꦢ꧀ꦣꦫꦶꦠꦸꦏꦴꦩꦺꦴ ꦱꦺꦴ, ꦄꦴꦒꦕ꧀ꦖꦶ ꦩꦩ ꦱꦤ꧀ꦠꦶꦏꦁ.

꧔꧑. ‘‘ꦮꦺꦲꦴꦱꦩ꧀ꦲꦶ ꦕꦔ꧀ꦏꦩꦠꦶ, ꦣꦹꦥꦴꦪꦠꦶ ꦗꦭꦠꦺ ꦠꦡꦴ;

ꦲꦴꦱꦁ ꦩꦩꦁ ꦮꦶꦢꦶꦠ꧀ꦮꦴꦤ, ꦥꦏ꧀ꦏꦴꦩꦶ ꦥꦴꦕꦶꦤꦴꦩꦸꦑꦺꦴ.

꧔꧒. ‘‘ꦠꦚ꧀ꦕ ꦄꦕ꧀ꦖꦫꦶꦪꦁ ꦢꦶꦱ꧀ꦮꦴ, ꦄꦧ꧀ꦨꦸꦠꦁ ꦭꦺꦴꦩꦲꦁꦱꦤꦁ;

ꦤꦴꦒꦥꦸꦥ꧀ꦦꦁ ꦒꦲꦺꦠ꧀ꦮꦴꦤ, ꦒꦠꦩꦒ꧀ꦒꦩ꧀ꦲꦶ ꦎꦏꦶꦫꦶꦁ.

꧔꧓. ‘‘ꦱꦠꦱꦲꦱ꧀ꦱꦶꦠꦺꦴ ꦏꦥ꧀ꦥꦺ, ꦪꦁ ꦥꦸꦥ꧀ꦦꦁ ꦎꦏꦶꦫꦶꦁ ꦄꦲꦁ;

ꦠꦺꦤ ꦕꦶꦠ꧀ꦠꦥ꧀ꦥꦱꦴꦢꦺꦤ, ꦢꦸꦒ꧀ꦒꦠꦶꦁ ꦤꦸꦥꦥꦗ꧀ꦗꦲꦁ.

꧔꧔. ‘‘ꦌꦏꦠ꧀ꦠꦶꦁꦱꦺ ꦏꦥ꧀ꦥꦱꦠꦺ [ꦌꦏꦠꦶꦁꦱꦺ ꦆꦠꦺꦴ ꦏꦩ꧀ꦩꦺ (ꦱ꧀ꦪꦴ.)], ꦫꦴꦗꦴ ꦄꦴꦱꦶ ꦩꦲꦴꦫꦲꦺꦴ;

ꦱꦠ꧀ꦠꦫꦠꦤꦱꦩ꧀ꦥꦤ꧀ꦤꦺꦴ, ꦕꦏ꧀ꦏꦮꦠ꧀ꦠꦷ ꦩꦲꦧ꧀ꦧꦭꦺꦴ.

꧔꧕. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦤꦴꦒꦥꦸꦥ꧀ꦦꦶꦪꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦤꦴꦒꦥꦸꦥ꧀ꦦꦶꦪꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦄꦛ꧀ꦜꦩꦁ.

꧙. ꦥꦸꦤ꧀ꦤꦴꦒꦥꦸꦥ꧀ꦦꦶꦪꦠ꧀ꦡꦺꦫꦄꦥꦢꦴꦤꦁ

꧔꧖. ‘‘ꦏꦴꦤꦤꦁ ꦮꦤꦩꦺꦴꦒꦪ꧀ꦲ, ꦮꦱꦴꦩꦶ ꦭꦸꦢ꧀ꦢꦏꦺꦴ ꦄꦲꦁ;

ꦥꦸꦤ꧀ꦤꦴꦒꦁ ꦥꦸꦥ꧀ꦦꦶꦠꦁ ꦢꦶꦱ꧀ꦮꦴ, ꦧꦸꦢ꧀ꦣꦱꦺꦛ꧀ꦜꦁ ꦄꦤꦸꦱ꧀ꦱꦫꦶꦁ.

꧔꧗. ‘‘ꦠꦁ ꦥꦸꦥ꧀ꦦꦁ ꦎꦕꦶꦤꦶꦠ꧀ꦮꦴꦤ, ꦱꦸꦒꦤ꧀ꦣꦁ ꦒꦤ꧀ꦣꦶꦠꦁ ꦱꦸꦨꦁ;

ꦡꦹꦥꦁ ꦏꦫꦶꦠ꧀ꦮꦴ ꦥꦸꦭꦶꦤꦺ, ꦧꦸꦢ꧀ꦣꦱ꧀ꦱ ꦄꦨꦶꦫꦺꦴꦥꦪꦶꦁ.

꧔꧘. ‘‘ꦢ꧀ꦮꦺꦤꦮꦸꦠꦺ ꦆꦠꦺꦴ ꦏꦥ꧀ꦥꦺ, ꦪꦁ ꦥꦸꦥ꧀ꦦꦩꦨꦶꦥꦹꦗꦪꦶꦁ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦧꦸꦢ꧀ꦣꦥꦹꦗꦴꦪꦶꦢꦁ ꦦꦭꦁ.

꧔꧙. ‘‘ꦌꦏꦩ꧀ꦲꦶ ꦤꦮꦸꦠꦺ ꦏꦥ꧀ꦥꦺ, ꦌꦏꦺꦴ ꦄꦴꦱꦶꦁ ꦠꦩꦺꦴꦤꦸꦢꦺꦴ;

ꦱꦠ꧀ꦠꦫꦠꦤꦱꦩ꧀ꦥꦤ꧀ꦤꦺꦴ, ꦕꦏ꧀ꦏꦮꦠ꧀ꦠꦷ ꦩꦲꦧ꧀ꦧꦭꦺꦴ.

꧕꧐. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦥꦸꦤ꧀ꦤꦴꦒꦥꦸꦥ꧀ꦦꦶꦪꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦥꦸꦤ꧀ꦤꦴꦒꦥꦸꦥ꧀ꦦꦶꦪꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦤꦮꦩꦁ.

꧑꧐. ꦏꦸꦩꦸꦢꦢꦴꦪꦏꦠ꧀ꦡꦺꦫꦄꦥꦢꦴꦤꦁ

꧕꧑. ‘‘ꦲꦶꦩꦮꦤ꧀ꦠꦱ꧀ꦱꦴꦮꦶꦢꦹꦫꦺ, ꦩꦲꦴꦗꦴꦠꦱ꧀ꦱꦫꦺꦴ ꦄꦲꦸ;

ꦥꦢꦸꦩꦸꦥ꧀ꦥꦭꦱꦚ꧀ꦖꦤ꧀ꦤꦺꦴ, ꦥꦸꦟ꧀ꦝꦫꦷꦏꦱꦩꦺꦴꦠ꧀ꦡꦛꦺꦴ.

꧕꧒. ‘‘ꦏꦸꦏꦸꦠ꧀ꦡꦺꦴ ꦤꦴꦩ ꦤꦴꦩꦺꦤ, ꦠꦠ꧀ꦡꦴꦱꦶꦁ ꦱꦏꦸꦟꦺꦴ ꦠꦢꦴ;

ꦱꦷꦭꦮꦴ ꦧꦸꦢ꧀ꦣꦶꦱꦩ꧀ꦥꦤ꧀ꦤꦺꦴ, ꦥꦸꦚ꧀ꦚꦴꦥꦸꦚ꧀ꦚꦺꦱꦸ ꦏꦺꦴꦮꦶꦢꦺꦴ.

꧕꧓. ‘‘ꦥꦢꦸꦩꦸꦠ꧀ꦠꦫꦺꦴ ꦭꦺꦴꦏꦮꦶꦢꦹ, ꦄꦴꦲꦸꦠꦷꦤꦁ ꦥꦛꦶꦒ꧀ꦒꦲꦺꦴ;

ꦗꦴꦠꦱ꧀ꦱꦫꦱ꧀ꦱꦴꦮꦶꦢꦹꦫꦺ, ꦱꦚ꧀ꦕꦫꦶꦠ꧀ꦡ ꦩꦲꦴꦩꦸꦤꦶ.

꧕꧔. ‘‘ꦗꦭꦗꦁ ꦏꦸꦩꦸꦢꦁ ꦖꦺꦠ꧀ꦮꦴ, ꦈꦥꦤꦺꦱꦶꦁ ꦩꦲꦺꦱꦶꦤꦺꦴ;

ꦩꦩ ꦱꦔ꧀ꦏꦥ꧀ꦥꦩꦚ꧀ꦚꦴꦪ, ꦥꦛꦶꦒ꧀ꦒꦲꦶ ꦩꦲꦴꦩꦸꦤꦶ.

꧕꧕. ‘‘ꦠꦚ꧀ꦕ ꦢꦴꦤꦁ ꦢꦢꦶꦠ꧀ꦮꦴꦤ, ꦱꦸꦏ꧀ꦏꦩꦹꦭꦺꦤ ꦕꦺꦴꦢꦶꦠꦺꦴ;

ꦏꦥ꧀ꦥꦴꦤꦁ ꦱꦠꦱꦲꦱ꧀ꦱꦁ, ꦢꦸꦒ꧀ꦒꦠꦶꦁ ꦤꦸꦥꦥꦗ꧀ꦗꦲꦁ.

꧕꧖. ‘‘ꦱꦺꦴꦭ꦳ꦱꦺꦠꦺꦴ ꦏꦥ꧀ꦥꦱꦠꦺ, ꦄꦴꦱꦸꦁ ꦮꦫꦸꦟꦤꦴꦩꦏꦴ;

ꦄꦛ꧀ꦜ ꦌꦠꦺ ꦗꦤꦴꦣꦶꦥꦴ, ꦕꦏ꧀ꦏꦮꦠ꧀ꦠꦷ ꦩꦲꦧ꧀ꦧꦭꦴ.

꧕꧗. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦏꦸꦩꦸꦢꦢꦴꦪꦏꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦏꦸꦩꦸꦢꦢꦴꦪꦏꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦢꦱꦩꦁ.

ꦧꦤ꧀ꦣꦸꦗꦷꦮꦏꦮꦒ꧀ꦒꦺꦴ ꦱꦺꦴꦭ꦳ꦱꦩꦺꦴ.