꧙. ꦥꦕ꧀ꦕꦸꦥꦛ꧀ꦜꦴꦤꦱꦚ꧀ꦚꦏꦠ꧀ꦡꦺꦫꦄꦥꦢꦴꦤꦁ

꧗꧒. ‘‘ꦄꦠ꧀ꦡꦢꦱ꧀ꦱꦶꦩ꧀ꦲꦶ ꦱꦸꦒꦠꦺ, ꦤꦶꦧ꧀ꦧꦸꦠꦺ ꦱꦩꦤꦤ꧀ꦠꦫꦴ;

ꦪꦏ꧀ꦑꦪꦺꦴꦤꦶꦁ ꦈꦥꦥꦗ꧀ꦗꦶꦁ, ꦪꦱꦁ ꦥꦠ꧀ꦠꦺꦴ ꦕꦲꦁ ꦠꦢꦴ.

꧗꧓. ‘‘ꦢꦸꦭ꧀ꦭꦢ꧀ꦣꦁ ꦮꦠ ꦩꦺ ꦄꦴꦱꦶ, ꦢꦸꦥ꧀ꦥꦨꦴꦠꦁ ꦢꦸꦫꦸꦛ꧀ꦜꦶꦠꦁ;

ꦪꦁ ꦩꦺ ꦨꦺꦴꦒꦺ ꦮꦶꦗ꧀ꦗꦩꦴꦤꦺ, ꦥꦫꦶꦤꦶꦧ꧀ꦧꦴꦪꦶ ꦕꦏ꧀ꦑꦸꦩꦴ.

꧗꧔. ‘‘ꦩꦩ ꦱꦔ꧀ꦏꦥ꧀ꦥꦩꦚ꧀ꦚꦴꦪ, ꦱꦴꦒꦫꦺꦴ ꦤꦴꦩ ꦱꦴꦮꦏꦺꦴ;

ꦩꦩꦸꦢ꧀ꦣꦫꦶꦠꦸꦏꦴꦩꦺꦴ ꦱꦺꦴ, ꦄꦴꦒꦕ꧀ꦖꦶ ꦩꦩ ꦱꦤ꧀ꦠꦶꦏꦁ.

꧗꧕. ‘‘ꦏꦶꦁ ꦤꦸ ꦱꦺꦴꦕꦱꦶ ꦩꦴ ꦨꦴꦪꦶ, ꦕꦫ ꦣꦩ꧀ꦩꦁ ꦱꦸꦩꦺꦣꦱ;

ꦄꦤꦸꦥ꧀ꦥꦢꦶꦤ꧀ꦤꦴ ꦧꦸꦢ꧀ꦣꦺꦤ, ꦱꦧ꧀ꦧꦺꦱꦁ ꦧꦷꦗꦱꦩ꧀ꦥꦢꦴ.

꧗꧖. ‘‘ꦱꦺꦴ ꦕꦺ ꦥꦹꦗꦺꦪ꧀ꦪ ꦱꦩ꧀ꦧꦸꦢ꧀ꦣꦁ, ꦠꦶꦛ꧀ꦜꦤ꧀ꦠꦁ ꦭꦺꦴꦏꦤꦴꦪꦏꦁ;

ꦣꦴꦠꦸꦁ ꦱꦴꦱꦥꦩꦠ꧀ꦠꦩ꧀ꦥꦶ, ꦤꦶꦧ꧀ꦧꦸꦠꦱ꧀ꦱꦴꦥꦶ ꦥꦹꦗꦪꦺ.

꧗꧗. ‘‘ꦱꦩꦺ ꦕꦶꦠ꧀ꦠꦥ꧀ꦥꦱꦴꦢꦩ꧀ꦲꦶ, ꦱꦩꦁ ꦥꦸꦚ꧀ꦚꦁ ꦩꦲꦒ꧀ꦒꦠꦁ;

ꦠꦱ꧀ꦩꦴ ꦡꦹꦥꦁ ꦏꦫꦶꦠ꧀ꦮꦴꦤ, ꦥꦹꦗꦺꦲꦶ ꦗꦶꦤꦣꦴꦠꦸꦪꦺꦴ.

꧗꧘. ‘‘ꦱꦴꦒꦫꦱ꧀ꦱ ꦮꦕꦺꦴ ꦱꦸꦠ꧀ꦮꦴ, ꦧꦸꦢ꧀ꦣꦡꦹꦥꦁ ꦄꦏꦴꦱꦲꦁ;

ꦥꦚ꧀ꦕꦮꦱ꧀ꦱꦺ ꦥꦫꦶꦕꦫꦶꦁ, ꦩꦸꦤꦶꦤꦺꦴ ꦡꦹꦥꦩꦸꦠ꧀ꦠꦩꦁ.

꧗꧙. ‘‘ꦠꦺꦤ ꦏꦩ꧀ꦩꦺꦤ ꦢ꧀ꦮꦶꦥꦢꦶꦤ꧀ꦢ, ꦭꦺꦴꦏꦗꦺꦛ꧀ꦜ ꦤꦫꦴꦱꦨ;

ꦱꦩ꧀ꦥꦠ꧀ꦠꦶꦁ ꦄꦤꦸꦨꦺꦴꦠ꧀ꦮꦴꦤ, ꦄꦫꦲꦠ꧀ꦠꦩꦥꦴꦥꦸꦟꦶꦁ.

꧘꧐. ‘‘ꦨꦹꦫꦶꦥꦚ꧀ꦚꦴ ꦕ ꦕꦠ꧀ꦠꦴꦫꦺꦴ, ꦱꦠ꧀ꦠꦏꦥ꧀ꦥꦱꦠꦺ ꦆꦠꦺꦴ;

ꦱꦠ꧀ꦠꦫꦠꦤꦱꦩ꧀ꦥꦤ꧀ꦤꦴ, ꦕꦏ꧀ꦏꦮꦠ꧀ꦠꦷ ꦩꦲꦧ꧀ꦧꦭꦴ.

꧘꧑. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦥꦕ꧀ꦕꦸꦥꦛ꧀ꦜꦴꦤꦱꦚ꧀ꦚꦏꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦥꦕ꧀ꦕꦸꦥꦛ꧀ꦜꦴꦤꦱꦚ꧀ꦚꦏꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦤꦮꦩꦁ.