꧑꧐. ꦱꦸꦣꦴꦮꦒ꧀ꦒꦺꦴ

꧑. ꦱꦸꦣꦴꦥꦶꦟ꧀ꦝꦶꦪꦠ꧀ꦡꦺꦫꦄꦥꦢꦴꦤꦁ

꧑. ‘‘ꦥꦹꦗꦴꦫꦲꦺ ꦥꦹꦗꦪꦠꦺꦴ, ꦧꦸꦢ꧀ꦣꦺ ꦪꦢꦶ ꦮ ꦱꦴꦮꦏꦺ;

ꦥꦥꦚ꧀ꦕꦱꦩꦠꦶꦏ꧀ꦏꦤ꧀ꦠꦺ, ꦠꦶꦟ꧀ꦟꦱꦺꦴꦏꦥꦫꦶꦢ꧀ꦢꦮꦺ.

꧒. ‘‘ꦠꦺ ꦠꦴꦢꦶꦱꦺ ꦥꦹꦗꦪꦠꦺꦴ, ꦤꦶꦧ꧀ꦧꦸꦠꦺ ꦄꦏꦸꦠꦺꦴꦨꦪꦺ;

ꦤ ꦱꦏ꧀ꦏꦴ ꦥꦸꦚ꧀ꦚꦁ ꦱꦔ꧀ꦑꦴꦠꦸꦁ, ꦆꦩꦺꦠ꧀ꦠꦩꦥꦶ [ꦆꦢꦩ꧀ꦩꦠ꧀ꦠꦤ꧀ꦠꦶ (ꦱꦷ.), ꦆꦩꦺꦠ꧀ꦡꦩꦥꦶ (ꦏ.)] ꦏꦺꦤꦕꦶ.

꧓. ‘‘ꦕꦠꦸꦤ꧀ꦤꦩꦥꦶ ꦢꦷꦥꦴꦤꦁ, ꦆꦱ꧀ꦱꦫꦁ ꦪꦺꦴꦣ ꦏꦴꦫꦪꦺ;

ꦌꦏꦶꦱ꧀ꦱꦴ ꦥꦹꦗꦤꦴꦪꦺꦠꦁ, ꦏꦭꦁ ꦤꦴꦒ꧀ꦓꦠꦶ ꦱꦺꦴꦭ꦳ꦱꦶꦁ.

꧔. ‘‘ꦱꦶꦢ꧀ꦣꦠ꧀ꦡꦱ꧀ꦱ ꦤꦫꦒ꧀ꦒꦱ꧀ꦱ, ꦕꦺꦠꦶꦪꦺ ꦦꦭꦶꦠꦤ꧀ꦠꦫꦺ;

ꦱꦸꦣꦴꦥꦶꦟ꧀ꦝꦺꦴ ꦩꦪꦴ ꦢꦶꦤ꧀ꦤꦺꦴ, ꦮꦶꦥ꧀ꦥꦱꦤ꧀ꦤꦺꦤ ꦕꦺꦠꦱꦴ.

꧕. ‘‘ꦕꦠꦸꦤ꧀ꦤꦮꦸꦠꦶꦠꦺꦴ ꦏꦥ꧀ꦥꦺ, ꦪꦁ ꦏꦩ꧀ꦩꦩꦏꦫꦶꦁ ꦠꦢꦴ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦥꦛꦶꦱꦔ꧀ꦑꦴꦫꦱ꧀ꦱꦶꦢꦁ ꦦꦭꦁ.

꧖. ‘‘ꦆꦠꦺꦴ ꦠꦶꦁꦱꦠꦶꦏꦥ꧀ꦥꦩ꧀ꦲꦶ, ꦥꦛꦶꦱꦔ꧀ꦑꦴꦫꦱꦮ꧀ꦲꦪꦴ;

ꦱꦠ꧀ꦠꦫꦠꦤꦱꦩ꧀ꦥꦤ꧀ꦤꦴ, ꦠꦺꦫꦱ ꦕꦏ꧀ꦏꦮꦠ꧀ꦠꦶꦤꦺꦴ.

꧗. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ, ꦮꦶꦩꦺꦴꦏ꧀ꦑꦴꦥꦶ ꦕ ꦄꦛ꧀ꦜꦶꦩꦺ;

ꦖꦭ꦳ꦨꦶꦚ꧀ꦚꦴ ꦱꦕ꧀ꦖꦶꦏꦠꦴ, ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦱꦸꦣꦴꦥꦶꦟ꧀ꦝꦶꦪꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦱꦸꦣꦴꦥꦶꦟ꧀ꦝꦶꦪꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦥꦜꦩꦁ.

꧒. ꦱꦸꦕꦶꦤ꧀ꦠꦶꦏꦠ꧀ꦡꦺꦫꦄꦥꦢꦴꦤꦁ

꧘. ‘‘ꦠꦶꦱ꧀ꦱꦱ꧀ꦱ ꦭꦺꦴꦏꦤꦴꦡꦱ꧀ꦱ, ꦱꦸꦢ꧀ꦣꦥꦷꦜꦩꦢꦴꦱꦲꦁ;

ꦲꦛ꧀ꦜꦺꦴ ꦲꦛ꧀ꦜꦺꦤ ꦕꦶꦠ꧀ꦠꦺꦤ, ꦧꦸꦢ꧀ꦣꦱ꧀ꦱꦴꦢꦶꦕ꧀ꦕꦧꦤ꧀ꦣꦸꦤꦺꦴ.

꧙. ‘‘ꦄꦛ꧀ꦜꦴꦫꦱꦺ [ꦄꦛ꧀ꦜꦠꦶꦁꦱꦺ (ꦱꦷ. ꦱ꧀ꦪꦴ.)] ꦆꦠꦺꦴ ꦏꦥ꧀ꦥꦺ, ꦫꦴꦗꦴ ꦄꦴꦱꦶꦁ ꦩꦲꦴꦫꦸꦕꦶ;

ꦨꦺꦴꦒꦺꦴ ꦕ ꦮꦶꦥꦸꦭꦺꦴ ꦄꦴꦱꦶ, ꦱꦪꦤꦚ꧀ꦕ ꦄꦤꦥ꧀ꦥꦏꦁ.

꧑꧐. ‘‘ꦥꦷꦜꦁ ꦧꦸꦢ꧀ꦣꦱ꧀ꦱ ꦢꦠ꧀ꦮꦴꦤ, ꦮꦶꦥ꧀ꦥꦱꦤ꧀ꦤꦺꦤ ꦕꦺꦠꦱꦴ;

ꦄꦤꦸꦨꦺꦴꦩꦶ ꦱꦏꦁ ꦏꦩ꧀ꦩꦁ, ꦥꦸꦧ꧀ꦧꦺ ꦱꦸꦏꦠꦩꦠ꧀ꦠꦤꦺꦴ.

꧑꧑. ‘‘ꦢ꧀ꦮꦺꦤꦮꦸꦠꦺ ꦆꦠꦺꦴ ꦏꦥ꧀ꦥꦺ, ꦪꦁ ꦥꦷꦜꦩꦢꦢꦶꦁ ꦠꦢꦴ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦥꦷꦜꦢꦴꦤꦱ꧀ꦱꦶꦢꦁ ꦦꦭꦁ.

꧑꧒. ‘‘ꦄꦛ꧀ꦜꦠꦶꦁꦱꦺ ꦆꦠꦺꦴ ꦏꦥ꧀ꦥꦺ, ꦠꦪꦺꦴ ꦠꦺ ꦕꦏ꧀ꦏꦮꦠ꧀ꦠꦶꦤꦺꦴ;

ꦫꦸꦕꦶ ꦈꦥꦫꦸꦕꦶ ꦕꦺꦮ, ꦩꦲꦴꦫꦸꦕꦶ ꦠꦠꦶꦪꦏꦺꦴ.

꧑꧓. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦱꦸꦕꦶꦤ꧀ꦠꦶꦏꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦱꦸꦕꦶꦤ꧀ꦠꦶꦏꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦢꦸꦠꦶꦪꦁ.

꧓. ꦄꦝ꧀ꦞꦕꦺꦭ꦳ꦏꦠ꧀ꦡꦺꦫꦄꦥꦢꦴꦤꦁ

꧑꧔. ‘‘ꦠꦶꦱ꧀ꦱꦱ꧀ꦱꦴꦲꦁ ꦨꦒꦮꦠꦺꦴ, ꦈꦥꦝ꧀ꦞꦢꦸꦱ꧀ꦱꦩꦢꦴꦱꦲꦁ;

ꦥꦫꦩꦏꦴꦥꦚ꧀ꦚꦥꦠ꧀ꦠꦺꦴꦩ꧀ꦲꦶ [ꦥꦫꦩꦏꦴꦫꦸꦚ꧀ꦚꦥꦠ꧀ꦠꦺꦴꦩ꧀ꦲꦶ (ꦱ꧀ꦪꦴ. ꦏ.)], ꦢꦸꦒ꧀ꦒꦠꦺꦤ [ꦢꦸꦒ꧀ꦒꦤ꧀ꦣꦺꦤ (ꦱꦷ.)] ꦱꦩꦥ꧀ꦥꦶꦠꦺꦴ.

꧑꧕. ‘‘ꦈꦥꦝ꧀ꦞꦢꦸꦱ꧀ꦱꦁ ꦢꦠ꧀ꦮꦴꦤ, ꦏꦥ꧀ꦥꦁ ꦱꦒ꧀ꦒꦩ꧀ꦲꦶ ꦩꦺꦴꦢꦲꦁ;

ꦄꦮꦱꦺꦱꦺꦱꦸ ꦏꦥ꧀ꦥꦺꦱꦸ, ꦏꦸꦱꦭꦁ ꦏꦴꦫꦶꦠꦁ ꦩꦪꦴ.

꧑꧖. ‘‘ꦢ꧀ꦮꦺꦤꦮꦸꦠꦺ ꦆꦠꦺꦴ ꦏꦥ꧀ꦥꦺ, ꦪꦁ ꦢꦸꦱ꧀ꦱꦩꦢꦢꦶꦁ ꦠꦢꦴ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦢꦸꦱ꧀ꦱꦢꦴꦤꦱ꧀ꦱꦶꦢꦁ ꦦꦭꦁ.

꧑꧗. ‘‘ꦌꦏꦹꦤꦥꦚ꧀ꦚꦴꦱꦏꦥ꧀ꦥꦩ꧀ꦲꦶ [ꦌꦏꦥꦚ꧀ꦚꦴꦱꦏꦥ꧀ꦥꦩ꧀ꦲꦶ (ꦱ꧀ꦪꦴ.)], ꦫꦴꦗꦴꦤꦺꦴ ꦕꦏ꧀ꦏꦮꦠ꧀ꦠꦶꦤꦺꦴ;

ꦱꦩꦤ꧀ꦠꦕ꧀ꦖꦢꦤꦴ ꦤꦴꦩ, ꦧꦴꦠ꧀ꦠꦶꦁꦱꦴꦱꦸꦁ [ꦑꦠ꧀ꦠꦶꦪꦴꦱꦸꦁ (ꦱ꧀ꦪꦴ. ꦏ.)] ꦗꦤꦴꦣꦶꦥꦴ.

꧑꧘. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦄꦝ꧀ꦞꦕꦺꦭ꦳ꦏꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦄꦝ꧀ꦞꦕꦺꦭ꦳ꦏꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦠꦠꦶꦪꦁ.

꧔. ꦱꦹꦕꦶꦢꦴꦪꦏꦠ꧀ꦡꦺꦫꦄꦥꦢꦴꦤꦁ

꧑꧙. ‘‘ꦏꦩ꧀ꦩꦴꦫꦺꦴꦲꦁ ꦥꦸꦫꦺ ꦄꦴꦱꦶꦁ, ꦧꦤ꧀ꦣꦸꦩꦴꦪꦁ ꦥꦸꦫꦸꦠ꧀ꦠꦩꦺ;

ꦱꦹꦕꦶꦢꦴꦤꦁ ꦩꦪꦴ ꦢꦶꦤ꧀ꦤꦁ, ꦮꦶꦥꦱ꧀ꦱꦶꦱ꧀ꦱ ꦩꦲꦺꦱꦶꦤꦺꦴ.

꧒꧐. ‘‘ꦮꦗꦶꦫꦒ꧀ꦒꦱꦩꦁ ꦚꦴꦟꦁ, ꦲꦺꦴꦠꦶ ꦏꦩ꧀ꦩꦺꦤ ꦠꦴꦢꦶꦱꦁ;

ꦮꦶꦫꦴꦒꦺꦴꦩ꧀ꦲꦶ ꦮꦶꦩꦸꦠ꧀ꦠꦺꦴꦩ꧀ꦲꦶ [ꦮꦶꦨꦮꦺꦴꦩ꧀ꦲꦶ ꦮꦶꦨꦠ꧀ꦠꦺꦴꦩ꧀ꦲꦶ (ꦏ.)], ꦥꦠ꧀ꦠꦺꦴꦩ꧀ꦲꦶ ꦄꦴꦱꦮꦏ꧀ꦑꦪꦁ.

꧒꧑. ‘‘ꦄꦠꦷꦠꦺ ꦕ ꦨꦮꦺ ꦱꦧ꧀ꦧꦺ, ꦮꦠ꧀ꦠꦩꦴꦤꦺ ꦕꦤꦴꦒꦠꦺ [ꦄꦠꦷꦠꦴ ꦕ ꦨꦮꦴ ꦱꦧ꧀ꦧꦺ, ꦮꦠ꧀ꦠꦩꦴꦤꦴ ꦕ’ꦤꦴꦒꦠꦴ (ꦱ꧀ꦪꦴ. ꦏ.)];

ꦚꦴꦟꦺꦤ ꦮꦶꦕꦶꦤꦶꦁ ꦱꦧ꧀ꦧꦁ, ꦱꦹꦕꦶꦢꦴꦤꦱ꧀ꦱꦶꦢꦁ ꦦꦭꦁ.

꧒꧒. ‘‘ꦌꦏꦤꦮꦸꦠꦶꦠꦺꦴ ꦏꦥ꧀ꦥꦺ, ꦱꦠ꧀ꦠꦴꦱꦸꦁ ꦮꦗꦶꦫꦮ꧀ꦲꦪꦴ;

ꦱꦠ꧀ꦠꦫꦠꦤꦱꦩ꧀ꦥꦤ꧀ꦤꦴ, ꦕꦏ꧀ꦏꦮꦠ꧀ꦠꦷ ꦩꦲꦧ꧀ꦧꦭꦴ.

꧒꧓. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦱꦹꦕꦶꦢꦴꦪꦏꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦱꦹꦕꦶꦢꦴꦪꦏꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦕꦠꦸꦠ꧀ꦡꦁ.

꧕. ꦒꦤ꧀ꦣꦩꦴꦭꦶꦪꦠ꧀ꦡꦺꦫꦄꦥꦢꦴꦤꦁ

꧒꧔. ‘‘ꦱꦶꦢ꧀ꦣꦠ꧀ꦡꦱ꧀ꦱ ꦨꦒꦮꦠꦺꦴ, ꦒꦤ꧀ꦣꦡꦹꦥꦁ ꦄꦏꦴꦱꦲꦁ;

ꦱꦸꦩꦤꦺꦲꦶ ꦥꦛꦶꦕ꧀ꦖꦤ꧀ꦤꦁ, ꦧꦸꦢ꧀ꦣꦴꦤꦸꦕ꧀ꦖꦮꦶꦏꦁ ꦏꦠꦁ.

꧒꧕. ‘‘ꦏꦚ꧀ꦕꦤꦒ꧀ꦓꦶꦪꦱꦔ꧀ꦏꦴꦱꦁ, ꦧꦸꦢ꧀ꦣꦁ ꦭꦺꦴꦏꦒ꧀ꦒꦤꦴꦪꦏꦁ;

ꦆꦤ꧀ꦢꦷꦮꦫꦁꦮ ꦗꦭꦶꦠꦁ, ꦄꦴꦢꦶꦠ꧀ꦠꦁꦮ ꦲꦸꦠꦴꦱꦤꦁ.

꧒꧖. ‘‘ꦧ꧀ꦪꦒ꧀ꦓꦹꦱꦨꦁꦮ ꦥꦮꦫꦁ, ꦄꦨꦶꦗꦴꦠꦁꦮ ꦏꦺꦱꦫꦶꦁ;

ꦤꦶꦱꦶꦤ꧀ꦤꦁ ꦱꦩꦟꦴꦤꦒ꧀ꦒꦁ, ꦨꦶꦏ꧀ꦑꦸꦱꦔ꧀ꦓꦥꦸꦫꦏ꧀ꦑꦠꦁ.

꧒꧗. ‘‘ꦮꦤ꧀ꦢꦶꦠ꧀ꦮꦴ ꦱꦠ꧀ꦡꦸꦤꦺꦴ ꦥꦴꦢꦺ, ꦥꦏ꧀ꦏꦴꦩꦶꦁ ꦈꦠ꧀ꦠꦫꦴꦩꦸꦑꦺꦴ;

ꦕꦠꦸꦤ꧀ꦤꦮꦸꦠꦶꦠꦺꦴ ꦏꦥ꧀ꦥꦺ, ꦒꦤ꧀ꦣꦩꦴꦭꦁ ꦪꦠꦺꦴ ꦄꦢꦁ.

꧒꧘. ‘‘ꦧꦸꦢ꧀ꦣꦺ ꦏꦠꦱ꧀ꦱ ꦏꦴꦫꦱ꧀ꦱ, ꦦꦭꦺꦤꦴꦲꦁ ꦮꦶꦱꦺꦱꦠꦺꦴ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦧꦸꦢ꧀ꦣꦥꦹꦗꦴꦪꦶꦢꦁ ꦦꦭꦁ.

꧒꧙. ‘‘ꦕꦠ꧀ꦠꦴꦫꦷꦱꦩ꧀ꦲꦶ ꦌꦏꦹꦤꦺ, ꦏꦥ꧀ꦥꦺ ꦄꦴꦱꦶꦁꦱꦸ ꦱꦺꦴꦭ꦳ꦱ;

ꦢꦺꦮꦒꦤ꧀ꦣꦱꦤꦴꦩꦴ ꦠꦺ, ꦫꦴꦗꦴꦤꦺꦴ ꦕꦏ꧀ꦏꦮꦠ꧀ꦠꦶꦤꦺꦴ.

꧓꧐. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦒꦤ꧀ꦣꦩꦴꦭꦶꦪꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦒꦤ꧀ꦣꦩꦴꦭꦶꦪꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦥꦚ꧀ꦕꦩꦁ.

꧖. ꦠꦶꦥꦸꦥ꧀ꦦꦶꦪꦠ꧀ꦡꦺꦫꦄꦥꦢꦴꦤꦁ

꧓꧑. ‘‘ꦩꦶꦒꦭꦸꦢ꧀ꦢꦺꦴ ꦥꦸꦫꦺ ꦄꦴꦱꦶꦁ, ꦄꦫꦚ꧀ꦚꦺ ꦏꦴꦤꦤꦺ ꦄꦲꦁ [ꦧ꧀ꦫꦲꦴ (ꦱ꧀ꦪꦴ.)];

ꦥꦴꦛꦭꦶꦁ ꦲꦫꦶꦠꦁ ꦢꦶꦱ꧀ꦮꦴ, ꦠꦷꦟꦶ ꦥꦸꦥ꧀ꦦꦴꦤꦶ ꦎꦏꦶꦫꦶꦁ.

꧓꧒. ‘‘ꦥꦠꦶꦠꦥꦠ꧀ꦠꦴꦤꦶ [ꦱꦠ꧀ꦠꦥꦠ꧀ꦠꦴꦤꦶ (ꦱꦷ.), ꦱꦠꦥꦠ꧀ꦠꦴꦤꦶ (ꦏ.), ꦱꦸꦏ꧀ꦑꦥꦟ꧀ꦟꦴꦤꦶ (ꦱ꧀ꦪꦴ.)] ꦒꦟ꧀ꦲꦶꦠ꧀ꦮꦴ, ꦧꦲꦶ ꦖꦝ꧀ꦝꦺꦱꦲꦁ ꦠꦢꦴ;

ꦄꦤ꧀ꦠꦺꦴꦱꦸꦢ꧀ꦣꦁ ꦧꦲꦶꦱꦸꦢ꧀ꦣꦁ, ꦱꦸꦮꦶꦩꦸꦠ꧀ꦠꦁ ꦄꦤꦴꦱꦮꦁ.

꧓꧓. ‘‘ꦱꦩ꧀ꦩꦸꦑꦴ ꦮꦶꦪ ꦱꦩ꧀ꦧꦸꦢ꧀ꦣꦁ, ꦮꦶꦥꦱ꧀ꦱꦶꦁ ꦭꦺꦴꦏꦤꦴꦪꦏꦁ;

ꦥꦴꦛꦭꦶꦁ ꦄꦨꦶꦮꦴꦢꦺꦠ꧀ꦮꦴ, ꦠꦠ꧀ꦡ ꦏꦴꦭꦔ꧀ꦏꦠꦺꦴ ꦄꦲꦁ.

꧓꧔. ‘‘ꦌꦏꦤꦮꦸꦠꦶꦠꦺꦴ ꦏꦥ꧀ꦥꦺ, ꦪꦁ ꦧꦺꦴꦣꦶꦩꦨꦶꦥꦹꦗꦪꦶꦁ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦧꦺꦴꦣꦶꦥꦹꦗꦴꦪꦶꦢꦁ ꦦꦭꦁ.

꧓꧕. ‘‘ꦱꦩꦤ꧀ꦠꦥꦴꦱꦴꦢꦶꦏꦴ ꦤꦴꦩ, ꦠꦺꦫꦱꦴꦱꦶꦁꦱꦸ ꦫꦴꦗꦶꦤꦺꦴ;

ꦆꦠꦺꦴ ꦠꦺꦠ꧀ꦠꦶꦁꦱꦏꦥ꧀ꦥꦩ꧀ꦲꦶ [ꦠꦶꦁꦱꦠꦶꦏꦥ꧀ꦥꦩ꧀ꦲꦶ (ꦱ꧀ꦪꦴ.)], ꦕꦏ꧀ꦏꦮꦠ꧀ꦠꦷ ꦩꦲꦧ꧀ꦧꦭꦴ.

꧓꧖. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦠꦶꦥꦸꦥ꧀ꦦꦶꦪꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦠꦶꦥꦸꦥ꧀ꦦꦶꦪꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦖꦛ꧀ꦜꦁ.

꧗. ꦩꦣꦸꦥꦶꦟ꧀ꦝꦶꦏꦠ꧀ꦡꦺꦫꦄꦥꦢꦴꦤꦁ

꧓꧗. ‘‘ꦮꦶꦥꦶꦤꦺ [ꦮꦶꦮꦤꦺ (ꦱ꧀ꦪꦴ. ꦄꦛ꧀ꦜ.)] ꦏꦴꦤꦤꦺ ꦢꦶꦱ꧀ꦮꦴ, ꦄꦥ꧀ꦥꦱꦢ꧀ꦢꦺ ꦤꦶꦫꦴꦏꦸꦭꦺ;

ꦱꦶꦢ꧀ꦣꦠ꧀ꦡꦁ ꦆꦱꦶꦤꦁ ꦱꦺꦛ꧀ꦜꦁ, ꦄꦴꦲꦸꦠꦷꦤꦁ ꦥꦛꦶꦒ꧀ꦒꦲꦁ.

꧓꧘. ‘‘ꦤꦶꦧ꧀ꦧꦸꦠꦠ꧀ꦠꦁ [ꦤꦶꦧ꧀ꦧꦸꦠꦒ꧀ꦒꦁ (ꦏ.), ꦤꦶꦧ꧀ꦧꦹꦠꦶꦏꦁ (ꦱ꧀ꦪꦴ.)] ꦩꦲꦴꦤꦴꦒꦁ, ꦤꦶꦱꦨꦴꦗꦴꦤꦶꦪꦁ ꦪꦡꦴ;

ꦎꦱꦣꦶꦁꦮ ꦮꦶꦫꦺꦴꦕꦤ꧀ꦠꦁ, ꦢꦺꦮꦱꦔ꧀ꦓꦤꦩꦱ꧀ꦱꦶꦠꦁ.

꧓꧙. ‘‘ꦮꦶꦠ꧀ꦠꦶ ꦩꦩꦴꦲꦸ ꦠꦴꦮꦢꦺ [ꦮꦶꦠ꧀ꦠꦶ ꦩꦺ ꦥꦴꦲꦸꦤꦴ ꦠꦴꦮ (ꦱꦷ. ꦱ꧀ꦪꦴ.)], ꦚꦴꦟꦁ ꦈꦥ꧀ꦥꦗ꧀ꦗꦶ ꦠꦴꦮꦢꦺ;

ꦮꦸꦛ꧀ꦜꦶꦠꦱ꧀ꦱ ꦱꦩꦴꦣꦶꦩ꧀ꦲꦴ, ꦩꦣꦸꦁ ꦢꦠ꧀ꦮꦴꦤ ꦱꦠ꧀ꦡꦸꦤꦺꦴ.

꧔꧐. ‘‘ꦮꦤ꧀ꦢꦶꦠ꧀ꦮꦴ ꦱꦠ꧀ꦡꦸꦤꦺꦴ ꦥꦴꦢꦺ, ꦥꦏ꧀ꦏꦴꦩꦶꦁ ꦥꦴꦕꦶꦤꦴꦩꦸꦑꦺꦴ;

ꦕꦠꦸꦠ꧀ꦠꦶꦁꦱꦩ꧀ꦲꦶ ꦏꦥ꧀ꦥꦩ꧀ꦲꦶ, ꦫꦴꦗꦴ ꦄꦴꦱꦶꦁ ꦱꦸꦢꦱ꧀ꦱꦤꦺꦴ.

꧔꧑. ‘‘ꦩꦣꦸ ꦨꦶꦱꦺꦲꦶ ꦱꦮꦠꦶ, ꦨꦺꦴꦗꦤꦩ꧀ꦲꦶ ꦕ ꦠꦴꦮꦢꦺ;

ꦩꦣꦸꦮꦱ꧀ꦱꦁ ꦥꦮꦱ꧀ꦱꦶꦠ꧀ꦡ, ꦥꦸꦧ꧀ꦧꦏꦩ꧀ꦩꦱ꧀ꦱꦶꦢꦁ ꦦꦭꦁ.

꧔꧒. ‘‘ꦕꦠꦸꦤ꧀ꦤꦮꦸꦠꦶꦠꦺꦴ ꦏꦥ꧀ꦥꦺ, ꦪꦁ ꦩꦣꦸꦁ ꦄꦢꦢꦶꦁ ꦠꦢꦴ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦩꦣꦸꦢꦴꦤꦱ꧀ꦱꦶꦢꦁ ꦦꦭꦁ.

꧔꧓. ‘‘ꦕꦠꦸꦠ꧀ꦠꦶꦁꦱꦺ ꦆꦠꦺꦴ ꦏꦥ꧀ꦥꦺ, ꦕꦠ꧀ꦠꦴꦫꦺꦴ ꦠꦺ ꦱꦸꦢꦱ꧀ꦱꦤꦴ;

ꦱꦠ꧀ꦠꦫꦠꦤꦱꦩ꧀ꦥꦤ꧀ꦤꦴ, ꦕꦏ꧀ꦏꦮꦠ꧀ꦠꦷ ꦩꦲꦧ꧀ꦧꦭꦴ.

꧔꧔. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦩꦣꦸꦥꦶꦟ꧀ꦝꦶꦏꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦩꦣꦸꦥꦶꦟ꧀ꦝꦶꦏꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦱꦠ꧀ꦠꦩꦁ.

꧘. ꦱꦺꦤꦴꦱꦤꦢꦴꦪꦏꦠ꧀ꦡꦺꦫꦄꦥꦢꦴꦤꦁ

꧔꧕. ‘‘ꦱꦶꦢ꧀ꦣꦠ꧀ꦡꦱ꧀ꦱ ꦨꦒꦮꦠꦺꦴ, ꦄꦢꦴꦱꦶꦁ ꦥꦟ꧀ꦟꦱꦤ꧀ꦡꦫꦁ;

ꦱꦩꦤ꧀ꦠꦴ ꦈꦥꦲꦴꦫꦚ꧀ꦕ, ꦏꦸꦱꦸꦩꦁ ꦎꦏꦶꦫꦶꦁ ꦄꦲꦁ.

꧔꧖. ‘‘ꦥꦴꦱꦴꦢꦺꦮꦁ ꦒꦸꦟꦁ ꦫꦩ꧀ꦩꦁ [ꦥꦴꦱꦴꦢꦺ ꦕ ꦒꦸꦲꦁ ꦫꦩ꧀ꦩꦁ (ꦱ꧀ꦪꦴ.)], ꦄꦤꦸꦨꦺꦴꦩꦶ ꦩꦲꦴꦫꦲꦁ;

ꦩꦲꦒ꧀ꦓꦴꦤꦶ ꦕ ꦥꦸꦥ꧀ꦦꦴꦤꦶ, ꦱꦪꦤꦺꦨꦶꦱꦮꦤ꧀ꦠꦶ ꦩꦺ.

꧔꧗. ‘‘ꦱꦪꦤꦺꦲꦁ ꦠꦸꦮꦛ꧀ꦛꦴꦩꦶ, ꦮꦶꦕꦶꦠ꧀ꦠꦺ ꦥꦸꦥ꧀ꦦꦱꦤ꧀ꦡꦠꦺ;

ꦥꦸꦥ꧀ꦦꦮꦸꦛ꧀ꦜꦶ ꦕ ꦱꦪꦤꦺ, ꦄꦨꦶꦮꦱ꧀ꦱꦠꦶ ꦠꦴꦮꦢꦺ.

꧔꧘. ‘‘ꦕꦠꦸꦤ꧀ꦤꦮꦸꦠꦶꦠꦺꦴ ꦏꦥ꧀ꦥꦺ, ꦄꦢꦴꦱꦶꦁ ꦥꦟ꧀ꦟꦱꦤ꧀ꦡꦫꦁ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦱꦤ꧀ꦡꦫꦱ꧀ꦱ ꦆꦢꦁ ꦦꦭꦁ.

꧔꧙. ‘‘ꦠꦶꦟꦱꦤ꧀ꦡꦫꦏꦴ ꦤꦴꦩ, ꦱꦠ꧀ꦠꦺꦠꦺ ꦕꦏ꧀ꦏꦮꦠ꧀ꦠꦶꦤꦺꦴ;

ꦆꦠꦺꦴ ꦠꦺ ꦥꦚ꧀ꦕꦩꦺ ꦏꦥ꧀ꦥꦺ, ꦈꦥ꧀ꦥꦗ꧀ꦗꦶꦁꦱꦸ ꦗꦤꦴꦣꦶꦥꦴ.

꧕꧐. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦱꦺꦤꦴꦱꦤꦢꦴꦪꦏꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦱꦺꦤꦴꦱꦤꦢꦴꦪꦏꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦄꦛ꧀ꦜꦩꦁ.

꧙. ꦮꦺꦪ꧀ꦪꦴꦮꦕ꧀ꦕꦏꦠ꧀ꦡꦺꦫꦄꦥꦢꦴꦤꦁ

꧕꧑. ‘‘ꦮꦶꦥꦱ꧀ꦱꦶꦱ꧀ꦱ ꦨꦒꦮꦠꦺꦴ, ꦩꦲꦴꦥꦹꦒꦒꦟꦺꦴ ꦄꦲꦸ;

ꦮꦺꦪ꧀ꦪꦴꦮꦕ꧀ꦕꦏꦫꦺꦴ ꦄꦴꦱꦶꦁ, ꦱꦧ꧀ꦧꦏꦶꦕ꧀ꦕꦺꦱꦸ ꦮꦴꦮꦛꦺꦴ [ꦧ꧀ꦪꦴꦮꦛꦺꦴ (ꦱꦷ. ꦱ꧀ꦪꦴ.)].

꧕꧒. ‘‘ꦢꦺꦪ꧀ꦪꦣꦩ꧀ꦩꦺꦴ ꦕ ꦩꦺ ꦤꦠ꧀ꦡꦶ, ꦱꦸꦒꦠꦱ꧀ꦱ ꦩꦲꦺꦱꦶꦤꦺꦴ;

ꦄꦮꦤ꧀ꦢꦶꦁ ꦱꦠ꧀ꦡꦸꦤꦺꦴ ꦥꦴꦢꦺ, ꦮꦶꦥ꧀ꦥꦱꦤ꧀ꦤꦺꦤ ꦕꦺꦠꦱꦴ.

꧕꧓. ‘‘ꦌꦏꦤꦮꦸꦠꦶꦠꦺꦴ ꦏꦥ꧀ꦥꦺ, ꦮꦺꦪ꧀ꦪꦴꦮꦕ꧀ꦕꦁ ꦄꦏꦴꦱꦲꦁ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦮꦺꦪ꧀ꦪꦴꦮꦕ꧀ꦕꦱ꧀ꦱꦶꦢꦁ ꦦꦭꦁ.

꧕꧔. ‘‘ꦆꦠꦺꦴ ꦕ ꦄꦛ꧀ꦜꦩꦺ ꦏꦥ꧀ꦥꦺ, ꦫꦴꦗꦴ ꦄꦴꦱꦶꦁ ꦱꦸꦕꦶꦤ꧀ꦠꦶꦠꦺꦴ;

ꦱꦠ꧀ꦠꦫꦠꦤꦱꦩ꧀ꦥꦤ꧀ꦤꦺꦴ, ꦕꦏ꧀ꦏꦮꦠ꧀ꦠꦷ ꦩꦲꦧ꧀ꦧꦭꦺꦴ.

꧕꧕. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦮꦺꦪ꧀ꦪꦴꦮꦕ꧀ꦕꦏꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦮꦺꦪ꧀ꦪꦴꦮꦕ꧀ꦕꦏꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦤꦮꦩꦁ.

꧑꧐. ꦧꦸꦢ꧀ꦣꦸꦥꦛ꧀ꦜꦴꦏꦠ꧀ꦡꦺꦫꦄꦥꦢꦴꦤꦁ

꧕꧖. ‘‘ꦮꦶꦥꦱ꧀ꦱꦶꦱ꧀ꦱ ꦨꦒꦮꦠꦺꦴ, ꦄꦲꦺꦴꦱꦶꦁ ꦱꦔ꧀ꦑꦣꦩ꧀ꦩꦏꦺꦴ;

ꦤꦶꦕ꧀ꦕꦸꦥꦛ꧀ꦜꦴꦤꦪꦸꦠ꧀ꦠꦺꦴꦩ꧀ꦲꦶ, ꦱꦸꦒꦠꦱ꧀ꦱ ꦩꦲꦺꦱꦶꦤꦺꦴ.

꧕꧗. ‘‘ꦈꦥꦛ꧀ꦜꦴꦤꦦꦭꦁ ꦥꦱ꧀ꦱ, ꦭꦺꦴꦏꦤꦴꦡꦱ꧀ꦱ ꦠꦴꦢꦶꦤꦺꦴ;

ꦱꦛ꧀ꦜꦶꦠꦹꦫꦶꦪꦱꦲꦱ꧀ꦱꦴꦤꦶ, ꦥꦫꦶꦮꦴꦫꦺꦤ꧀ꦠꦶ ꦩꦁ ꦱꦢꦴ.

꧕꧘. ‘‘ꦌꦏꦤꦮꦸꦠꦶꦠꦺꦴ ꦏꦥ꧀ꦥꦺ, ꦈꦥꦛ꧀ꦜꦲꦶꦁ ꦩꦲꦴꦆꦱꦶꦁ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦈꦥꦛ꧀ꦜꦴꦤꦱ꧀ꦱꦶꦢꦁ ꦦꦭꦁ.

꧕꧙. ‘‘ꦕꦠꦸꦮꦷꦱꦺ [ꦕꦠꦸꦤꦮꦸꦠꦺ (ꦱ꧀ꦪꦴ.)] ꦆꦠꦺꦴ ꦏꦥ꧀ꦥꦺ, ꦩꦲꦴꦤꦶꦒ꧀ꦓꦺꦴꦱꦤꦴꦩꦏꦴ;

ꦱꦺꦴꦭ꦳ꦱꦴꦱꦶꦁꦱꦸ ꦫꦴꦗꦴꦤꦺꦴ, ꦕꦏ꧀ꦏꦮꦠ꧀ꦠꦷ ꦩꦲꦧ꧀ꦧꦭꦴ.

꧖꧐. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦧꦸꦢ꧀ꦣꦸꦥꦛ꧀ꦜꦴꦏꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦧꦸꦢ꧀ꦣꦸꦥꦛ꧀ꦜꦴꦏꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦢꦱꦩꦁ.

ꦱꦸꦣꦴꦮꦒ꧀ꦒꦺꦴ ꦢꦱꦩꦺꦴ.

ꦠꦱ꧀ꦱꦸꦢ꧀ꦢꦴꦤꦁ –

ꦱꦸꦣꦴ ꦱꦸꦕꦶꦤ꧀ꦠꦶ ꦕꦺꦭ꦳ꦚ꧀ꦕ, ꦱꦹꦕꦷ ꦕ ꦒꦤ꧀ꦣꦩꦴꦭꦶꦪꦺꦴ;

ꦠꦶꦥꦸꦥ꧀ꦦꦶꦪꦺꦴ ꦩꦣꦸꦱꦺꦤꦴ, ꦮꦺꦪ꧀ꦪꦴꦮꦕ꧀ꦕꦺꦴ ꦕꦸꦥꦛ꧀ꦜꦏꦺꦴ;

ꦱꦩꦱꦛ꧀ꦜꦶ ꦕ ꦒꦴꦡꦴꦪꦺꦴ, ꦄꦱ꧀ꦩꦶꦁ ꦮꦒ꧀ꦒꦺ ꦥꦏꦶꦠ꧀ꦠꦶꦠꦴ.

ꦄꦡ ꦮꦒ꧀ꦒꦸꦢ꧀ꦢꦴꦤꦁ –

ꦧꦸꦢ꧀ꦣꦮꦒ꧀ꦒꦺꦴ ꦲꦶ ꦥꦜꦩꦺꦴ, ꦱꦷꦲꦴꦱꦤꦶ ꦱꦸꦨꦹꦠꦶ ꦕ;

ꦏꦸꦟ꧀ꦝꦣꦴꦤꦺꦴ ꦈꦥꦴꦭꦶ ꦕ, ꦧꦷꦗꦤꦶꦱꦏꦕꦶꦤ꧀ꦠꦶ ꦕ.