(꧒) ꦥꦴꦢꦠꦭꦕꦏ꧀ꦏꦭꦏ꧀ꦑꦟꦁ

꧒꧐꧔. ‘‘ꦪꦩ꧀ꦥꦶ, ꦨꦶꦏ꧀ꦑꦮꦺ, ꦠꦡꦴꦒꦠꦺꦴ ꦥꦸꦫꦶꦩꦁ ꦗꦴꦠꦶꦁ ꦥꦸꦫꦶꦩꦁ ꦨꦮꦁ ꦥꦸꦫꦶꦩꦁ ꦤꦶꦏꦺꦠꦁ ꦥꦸꦧ꧀ꦧꦺ ꦩꦤꦸꦱ꧀ꦱꦨꦹꦠꦺꦴ ꦱꦩꦴꦤꦺꦴ ꦧꦲꦸꦗꦤꦱ꧀ꦱ ꦱꦸꦑꦴꦮꦲꦺꦴ ꦄꦲꦺꦴꦱꦶ, ꦈꦧ꧀ꦧꦺꦒꦈꦠ꧀ꦠꦴꦱꦨꦪꦁ ꦄꦥꦤꦸꦢꦶꦠꦴ, ꦣꦩ꧀ꦩꦶꦏꦚ꧀ꦕ ꦫꦏ꧀ꦑꦴꦮꦫꦟꦒꦸꦠ꧀ꦠꦶꦁ ꦱꦁꦮꦶꦣꦴꦠꦴ, ꦱꦥꦫꦶꦮꦴꦫꦚ꧀ꦕ ꦢꦴꦤꦁ ꦄꦢꦴꦱꦶ. ꦱꦺꦴ ꦠꦱ꧀ꦱ ꦏꦩ꧀ꦩꦱ꧀ꦱ ꦏꦛꦠ꧀ꦠꦴ ꦈꦥꦕꦶꦠꦠ꧀ꦠꦴ ꦈꦱ꧀ꦱꦤ꧀ꦤꦠ꧀ꦠꦴ ꦮꦶꦥꦸꦭꦠ꧀ꦠꦴ ꦏꦴꦪꦱ꧀ꦱ ꦨꦺꦢꦴ ꦥꦫꦁ ꦩꦫꦟꦴ ꦱꦸꦒꦠꦶꦁ ꦱꦒ꧀ꦒꦁ ꦭꦺꦴꦏꦁ ꦈꦥꦥꦗ꧀ꦗꦠꦶ…ꦥꦺ… ꦱꦺꦴ ꦠꦠꦺꦴ ꦕꦸꦠꦺꦴ ꦆꦠ꧀ꦡꦠ꧀ꦠꦁ ꦄꦴꦒꦠꦺꦴ ꦱꦩꦴꦤꦺꦴ ꦆꦩꦁ ꦩꦲꦴꦥꦸꦫꦶꦱꦭꦏ꧀ꦑꦟꦁ ꦥꦛꦶꦭꦨꦠꦶ. ꦲꦺꦛ꧀ꦜꦴꦥꦴꦢꦠꦭꦺꦱꦸ ꦕꦏ꧀ꦏꦴꦤꦶ ꦗꦴꦠꦴꦤꦶ ꦲꦺꦴꦤ꧀ꦠꦶ ꦱꦲꦱ꧀ꦱꦴꦫꦴꦤꦶ ꦱꦤꦺꦩꦶꦏꦴꦤꦶ ꦱꦤꦴꦨꦶꦏꦴꦤꦶ ꦱꦧ꧀ꦧꦴꦏꦴꦫꦥꦫꦶꦥꦹꦫꦴꦤꦶ ꦱꦸꦮꦶꦨꦠ꧀ꦠꦤ꧀ꦠꦫꦴꦤꦶ.

‘‘ꦱꦺꦴ ꦠꦺꦤ ꦭꦏ꧀ꦑꦟꦺꦤ ꦱꦩꦤ꧀ꦤꦴꦒꦠꦺꦴ ꦱꦕꦺ ꦄꦒꦴꦫꦁ ꦄꦗ꧀ꦙꦴꦮꦱꦠꦶ, ꦫꦴꦗꦴ ꦲꦺꦴꦠꦶ ꦕꦏ꧀ꦏꦮꦠ꧀ꦠꦷ…ꦥꦺ… ꦫꦴꦗꦴ ꦱꦩꦴꦤꦺꦴ ꦏꦶꦁ ꦭꦨꦠꦶ? ꦩꦲꦴꦥꦫꦶꦮꦴꦫꦺꦴ ꦲꦺꦴꦠꦶ; ꦩꦲꦴꦱ꧀ꦱ ꦲꦺꦴꦤ꧀ꦠꦶ ꦥꦫꦶꦮꦴꦫꦴ ꦧ꧀ꦫꦴꦲ꧀ꦩꦟꦒꦲꦥꦠꦶꦏꦴ ꦤꦺꦒꦩꦗꦴꦤꦥꦢꦴ ꦒꦟꦏꦩꦲꦴꦩꦠ꧀ꦠꦴ ꦄꦤꦷꦏꦛ꧀ꦜꦴ ꦢꦺꦴꦮꦴꦫꦶꦏꦴ ꦄꦩꦕ꧀ꦕꦴ ꦥꦴꦫꦶꦱꦗ꧀ꦗꦴ ꦫꦴꦗꦴꦤꦺꦴ ꦨꦺꦴꦒꦶꦪꦴ ꦏꦸꦩꦴꦫꦴ. ꦫꦴꦗꦴ ꦱꦩꦴꦤꦺꦴ ꦆꦢꦁ ꦭꦨꦠꦶ. ꦱꦕꦺ ꦑꦺꦴ ꦥꦤ ꦄꦒꦴꦫꦱ꧀ꦩꦴ ꦄꦤꦒꦴꦫꦶꦪꦁ ꦥꦧ꧀ꦧꦗꦠꦶ, ꦄꦫꦲꦁ ꦲꦺꦴꦠꦶ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ ꦭꦺꦴꦏꦺ ꦮꦶꦮꦛ꧀ꦛꦕ꧀ꦖꦢꦺꦴ. ꦧꦸꦢ꧀ꦣꦺꦴ ꦱꦩꦴꦤꦺꦴ ꦏꦶꦁ ꦭꦨꦠꦶ? ꦩꦲꦴꦥꦫꦶꦮꦴꦫꦺꦴ ꦲꦺꦴꦠꦶ; ꦩꦲꦴꦱ꧀ꦱ ꦲꦺꦴꦤ꧀ꦠꦶ ꦥꦫꦶꦮꦴꦫꦴ ꦨꦶꦏ꧀ꦑꦹ ꦨꦶꦏ꧀ꦑꦸꦤꦶꦪꦺꦴ ꦈꦥꦴꦱꦏꦴ ꦈꦥꦴꦱꦶꦏꦴꦪꦺꦴ ꦢꦺꦮꦴ ꦩꦤꦸꦱ꧀ꦱꦴ ꦄꦱꦸꦫꦴ ꦤꦴꦒꦴ ꦒꦤ꧀ꦣꦧ꧀ꦧꦴ. ꦧꦸꦢ꧀ꦣꦺꦴ ꦱꦩꦴꦤꦺꦴ ꦆꦢꦁ ꦭꦨꦠꦶ’’. ꦌꦠꦩꦠ꧀ꦡꦁ ꦨꦒꦮꦴ ꦄꦮꦺꦴꦕ.

꧒꧐꧕. ꦠꦠ꧀ꦡꦺꦠꦁ ꦮꦸꦕ꧀ꦕꦠꦶ –

‘‘ꦥꦸꦫꦺ ꦥꦸꦫꦠ꧀ꦡꦴ ꦥꦸꦫꦶꦩꦴꦱꦸ ꦗꦴꦠꦶꦱꦸ,

ꦩꦤꦸꦱ꧀ꦱꦨꦹꦠꦺꦴ ꦧꦲꦸꦤꦁ ꦱꦸꦑꦴꦮꦲꦺꦴ;

ꦈꦧ꧀ꦨꦺꦒꦈꦠ꧀ꦠꦴꦱꦨꦪꦴꦥꦤꦹꦢꦤꦺꦴ,

ꦒꦸꦠ꧀ꦠꦷꦱꦸ ꦫꦏ꧀ꦑꦴꦮꦫꦟꦺꦱꦸ ꦈꦱ꧀ꦱꦸꦏꦺꦴ.

‘‘ꦱꦺꦴ ꦠꦺꦤ ꦏꦩ꧀ꦩꦺꦤ ꦢꦶꦮꦁ ꦱꦩꦏ꧀ꦏꦩꦶ,

ꦱꦸꦑꦚ꧀ꦕ ꦑꦶꦝ꧀ꦝꦴꦫꦠꦶꦪꦺꦴ ꦕ ꦄꦤ꧀ꦮꦨꦶ;

ꦠꦠꦺꦴ ꦕꦮꦶꦠ꧀ꦮꦴ ꦥꦸꦤꦫꦴꦒꦠꦺꦴ ꦆꦣ,

ꦕꦏ꧀ꦏꦴꦤꦶ ꦥꦴꦢꦺꦱꦸ ꦢꦸꦮꦺꦱꦸ ꦮꦶꦤ꧀ꦢꦠꦶ.

‘‘ꦱꦩꦤ꧀ꦠꦤꦺꦩꦷꦤꦶ ꦱꦲꦱ꧀ꦱꦫꦴꦤꦶ ꦕ,

ꦧ꧀ꦪꦴꦏꦁꦱꦸ ꦮꦺꦪ꧀ꦪꦚ꧀ꦗꦤꦶꦏꦴ ꦱꦩꦴꦒꦠꦴ;

ꦢꦶꦱ꧀ꦮꦴ ꦏꦸꦩꦴꦫꦁ ꦱꦠꦥꦸꦚ꧀ꦚꦭꦏ꧀ꦑꦟꦁ,

ꦥꦫꦶꦮꦴꦫꦮꦴ ꦲꦺꦱ꧀ꦱꦠꦶ ꦱꦠ꧀ꦠꦸꦩꦢ꧀ꦢꦤꦺꦴ.

ꦠꦡꦴ ꦲꦷ ꦕꦏ꧀ꦏꦴꦤꦶ ꦱꦩꦤ꧀ꦠꦤꦺꦩꦶꦤꦶ,

ꦱꦕꦺ ꦤ ꦥꦧ꧀ꦧꦗ꧀ꦗꦩꦸꦥꦺꦠꦶ ꦠꦴꦢꦶꦱꦺꦴ;

ꦮꦠ꧀ꦠꦺꦠꦶ ꦕꦏ꧀ꦏꦁ ꦥꦡꦮꦶꦁ ꦥꦱꦴꦱꦠꦶ,

ꦠꦱ꧀ꦱꦴꦤꦸꦪꦤ꧀ꦠꦴꦣ [ꦠꦱ꧀ꦱꦴꦤꦸꦪꦸꦠ꧀ꦠꦴ ꦆꦣ (ꦱꦷ. ꦥꦷ.), ꦠꦱ꧀ꦱꦴꦤꦸꦪꦤ꧀ꦠꦴ ꦆꦣ (ꦱ꧀ꦪꦴ. ꦏ.)] ꦨꦮꦤ꧀ꦠꦶ ꦑꦠ꧀ꦠꦶꦪꦴ.

‘‘ꦩꦲꦴꦪꦱꦁ ꦱꦁꦥꦫꦶꦮꦴꦫꦪꦤ꧀ꦠꦶ ꦤꦁ,

ꦱꦕꦺ ꦕ ꦥꦧ꧀ꦧꦗ꧀ꦗꦩꦸꦥꦺꦠꦶ ꦠꦴꦢꦶꦱꦺꦴ;

ꦤꦺꦏ꧀ꦑꦩ꧀ꦩꦖꦤ꧀ꦢꦴꦨꦶꦫꦠꦺꦴ ꦮꦶꦕꦏ꧀ꦑꦟꦺꦴ,

ꦢꦺꦮꦴꦩꦤꦸꦱ꧀ꦱꦴꦱꦸꦫꦱꦏ꧀ꦏꦫꦏ꧀ꦑꦱꦴ [ꦱꦠ꧀ꦠꦫꦏ꧀ꦑꦱꦴ (ꦏ.) ꦱꦷ. ꦱ꧀ꦪꦴꦄꦛ꧀ꦜꦏꦡꦴ ꦎꦭꦺꦴꦏꦺꦠꦧ꧀ꦧꦴ].

‘‘ꦒꦤ꧀ꦣꦧ꧀ꦧꦤꦴꦒꦴ ꦮꦶꦲꦒꦴ ꦕꦠꦸꦥ꧀ꦥꦢꦴ,

ꦄꦤꦸꦠ꧀ꦠꦫꦁ ꦢꦺꦮꦩꦤꦸꦱ꧀ꦱꦥꦹꦗꦶꦠꦁ;

ꦩꦲꦴꦪꦱꦁ ꦱꦁꦥꦫꦶꦮꦴꦫꦪꦤ꧀ꦠꦶ ꦤ’’ꦤ꧀ꦠꦶ.