꧓. ꦩꦲꦴꦥꦫꦶꦤꦶꦧ꧀ꦧꦴꦤꦱꦸꦠ꧀ꦠꦁ

꧑꧓꧑. ꦌꦮꦁ ꦩꦺ ꦱꦸꦠꦁ – ꦌꦏꦁ ꦱꦩꦪꦁ ꦨꦒꦮꦴ ꦫꦴꦗꦒꦲꦺ ꦮꦶꦲꦫꦠꦶ ꦒꦶꦗ꧀ꦙꦏꦹꦛꦺ ꦥꦧ꧀ꦧꦠꦺ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦫꦴꦗꦴ ꦩꦴꦒꦣꦺꦴ ꦄꦗꦴꦠꦱꦠ꧀ꦠꦸ ꦮꦺꦢꦺꦲꦶꦥꦸꦠ꧀ꦠꦺꦴ ꦮꦗ꧀ꦗꦷ ꦄꦨꦶꦪꦴꦠꦸꦏꦴꦩꦺꦴ ꦲꦺꦴꦠꦶ. ꦱꦺꦴ ꦌꦮꦩꦴꦲ – ‘‘ꦄꦲꦁ ꦲꦶꦩꦺ ꦮꦗ꧀ꦗꦷ ꦌꦮꦁꦩꦲꦶꦢ꧀ꦣꦶꦏꦺ ꦌꦮꦁꦩꦲꦴꦤꦸꦨꦴꦮꦺ ꦈꦕ꧀ꦖꦺꦕ꧀ꦖꦴꦩꦶ [ꦈꦕ꧀ꦖꦺꦗ꧀ꦗꦴꦩꦶ (ꦱ꧀ꦪꦴ. ꦥꦷ.), ꦈꦕ꧀ꦖꦶꦗ꧀ꦗꦴꦩꦶ (ꦏ.)] ꦮꦗ꧀ꦗꦷ, ꦮꦶꦤꦴꦱꦺꦱ꧀ꦱꦴꦩꦶ ꦮꦗ꧀ꦗꦷ, ꦄꦤꦪꦧ꧀ꦪꦱꦤꦁ ꦄꦴꦥꦴꦢꦺꦱ꧀ꦱꦴꦩꦶ ꦮꦗ꧀ꦗꦷ’’ꦠꦶ [ꦄꦴꦥꦴꦢꦺꦱ꧀ꦱꦴꦩꦶ ꦮꦗ꧀ꦗꦷꦠꦶ (ꦱꦧ꧀ꦧꦠ꧀ꦡ) ꦄ. ꦤꦶ. ꧗.꧒꧒ ꦥꦱ꧀ꦱꦶꦠꦧ꧀ꦧꦁ].

꧑꧓꧒. ꦄꦡ ꦑꦺꦴ ꦫꦴꦗꦴ ꦩꦴꦒꦣꦺꦴ ꦄꦗꦴꦠꦱꦠ꧀ꦠꦸ ꦮꦺꦢꦺꦲꦶꦥꦸꦠ꧀ꦠꦺꦴ ꦮꦱ꧀ꦱꦏꦴꦫꦁ ꦧ꧀ꦫꦴꦲ꧀ꦩꦟꦁ ꦩꦒꦣꦩꦲꦴꦩꦠ꧀ꦠꦁ ꦄꦴꦩꦤ꧀ꦠꦺꦱꦶ – ‘‘ꦌꦲꦶ ꦠ꧀ꦮꦁ, ꦧ꧀ꦫꦴꦲ꧀ꦩꦟ, ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩ; ꦈꦥꦱꦔ꧀ꦏꦩꦶꦠ꧀ꦮꦴ ꦩꦩ ꦮꦕꦤꦺꦤ ꦨꦒꦮꦠꦺꦴ ꦥꦴꦢꦺ ꦱꦶꦫꦱꦴ ꦮꦤ꧀ꦢꦴꦲꦶ, ꦄꦥ꧀ꦥꦴꦧꦴꦣꦁ ꦄꦥ꧀ꦥꦴꦠꦔ꧀ꦏꦁ ꦭꦲꦸꦛ꧀ꦜꦴꦤꦁ ꦧꦭꦁ ꦦꦴꦱꦸꦮꦶꦲꦴꦫꦁ ꦥꦸꦕ꧀ꦖ – ‘ꦫꦴꦗꦴ, ꦨꦤ꧀ꦠꦺ, ꦩꦴꦒꦣꦺꦴ ꦄꦗꦴꦠꦱꦠ꧀ꦠꦸ ꦮꦺꦢꦺꦲꦶꦥꦸꦠ꧀ꦠꦺꦴ ꦨꦒꦮꦠꦺꦴ ꦥꦴꦢꦺ ꦱꦶꦫꦱꦴ ꦮꦤ꧀ꦢꦠꦶ, ꦄꦥ꧀ꦥꦴꦧꦴꦣꦁ ꦄꦥ꧀ꦥꦴꦠꦔ꧀ꦏꦁ ꦭꦲꦸꦛ꧀ꦜꦴꦤꦁ ꦧꦭꦁ ꦦꦴꦱꦸꦮꦶꦲꦴꦫꦁ ꦥꦸꦕ꧀ꦖꦠꦷ’ꦠꦶ. ꦌꦮꦚ꧀ꦕ ꦮꦢꦺꦲꦶ – ‘ꦫꦴꦗꦴ, ꦨꦤ꧀ꦠꦺ, ꦩꦴꦒꦣꦺꦴ ꦄꦗꦴꦠꦱꦠ꧀ꦠꦸ ꦮꦺꦢꦺꦲꦶꦥꦸꦠ꧀ꦠꦺꦴ ꦮꦗ꧀ꦗꦷ ꦄꦨꦶꦪꦴꦠꦸꦏꦴꦩꦺꦴ. ꦱꦺꦴ ꦌꦮꦩꦴꦲ – ‘‘ꦄꦲꦁ ꦲꦶꦩꦺ ꦮꦗ꧀ꦗꦷ ꦌꦮꦁꦩꦲꦶꦢ꧀ꦣꦶꦏꦺ ꦌꦮꦁꦩꦲꦴꦤꦸꦨꦴꦮꦺ ꦈꦕ꧀ꦖꦺꦕ꧀ꦖꦴꦩꦶ ꦮꦗ꧀ꦗꦷ, ꦮꦶꦤꦴꦱꦺꦱ꧀ꦱꦴꦩꦶ ꦮꦗ꧀ꦗꦷ, ꦄꦤꦪꦧ꧀ꦪꦱꦤꦁ ꦄꦴꦥꦴꦢꦺꦱ꧀ꦱꦴꦩꦷ’’’ꦠꦶ. ꦪꦡꦴ ꦠꦺ ꦨꦒꦮꦴ ꦧ꧀ꦪꦴꦏꦫꦺꦴꦠꦶ, ꦠꦁ ꦱꦴꦣꦸꦏꦁ ꦈꦒ꧀ꦒꦲꦺꦠ꧀ꦮꦴ ꦩꦩ ꦄꦴꦫꦺꦴꦕꦺꦪ꧀ꦪꦴꦱꦶ. ꦤ ꦲꦶ ꦠꦡꦴꦒꦠꦴ ꦮꦶꦠꦡꦁ ꦨꦟꦤ꧀ꦠꦷ’’ꦠꦶ.

ꦮꦱ꧀ꦱꦏꦴꦫꦧ꧀ꦫꦴꦲ꧀ꦩꦟꦺꦴ

꧑꧓꧓. ‘‘ꦌꦮꦁ, ꦨꦺꦴ’’ꦠꦶ ꦑꦺꦴ ꦮꦱ꧀ꦱꦏꦴꦫꦺꦴ ꦧ꧀ꦫꦴꦲ꧀ꦩꦟꦺꦴ ꦩꦒꦣꦩꦲꦴꦩꦠ꧀ꦠꦺꦴ ꦫꦚ꧀ꦚꦺꦴ ꦩꦴꦒꦣꦱ꧀ꦱ ꦄꦗꦴꦠꦱꦠ꧀ꦠꦸꦱ꧀ꦱ ꦮꦺꦢꦺꦲꦶꦥꦸꦠ꧀ꦠꦱ꧀ꦱ ꦥꦛꦶꦱ꧀ꦱꦸꦠ꧀ꦮꦴ ꦨꦢ꧀ꦢꦴꦤꦶ ꦨꦢ꧀ꦢꦴꦤꦶ ꦪꦴꦤꦴꦤꦶ ꦪꦺꦴꦗꦺꦠ꧀ꦮꦴ ꦨꦢ꧀ꦢꦁ ꦨꦢ꧀ꦢꦁ ꦪꦴꦤꦁ ꦄꦨꦶꦫꦸꦲꦶꦠ꧀ꦮꦴ ꦨꦢ꧀ꦢꦺꦲꦶ ꦨꦢ꧀ꦢꦺꦲꦶ ꦪꦴꦤꦺꦲꦶ ꦫꦴꦗꦒꦲꦩ꧀ꦲꦴ ꦤꦶꦪ꧀ꦪꦴꦱꦶ, ꦪꦺꦤ ꦒꦶꦗ꧀ꦙꦏꦹꦛꦺꦴ ꦥꦧ꧀ꦧꦠꦺꦴ ꦠꦺꦤ ꦥꦴꦪꦴꦱꦶ. ꦪꦴꦮꦠꦶꦏꦴ ꦪꦴꦤꦱ꧀ꦱ ꦨꦹꦩꦶ, ꦪꦴꦤꦺꦤ ꦒꦤ꧀ꦠ꧀ꦮꦴ, ꦪꦴꦤꦴ ꦥꦕ꧀ꦕꦺꦴꦫꦺꦴꦲꦶꦠ꧀ꦮꦴ ꦥꦠ꧀ꦠꦶꦏꦺꦴꦮ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦠꦴ ꦱꦢ꧀ꦣꦶꦁ ꦱꦩ꧀ꦩꦺꦴꦢꦶ. ꦱꦩ꧀ꦩꦺꦴꦢꦤꦷꦪꦁ ꦏꦡꦁ ꦱꦴꦫꦟꦷꦪꦁ ꦮꦷꦠꦶꦱꦴꦫꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦺꦴ ꦑꦺꦴ ꦮꦱ꧀ꦱꦏꦴꦫꦺꦴ ꦧ꧀ꦫꦴꦲ꧀ꦩꦟꦺꦴ ꦩꦒꦣꦩꦲꦴꦩꦠ꧀ꦠꦺꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦫꦴꦗꦴ, ꦨꦺꦴ ꦒꦺꦴꦠꦩ, ꦩꦴꦒꦣꦺꦴ ꦄꦗꦴꦠꦱꦠ꧀ꦠꦸ ꦮꦺꦢꦺꦲꦶꦥꦸꦠ꧀ꦠꦺꦴ ꦨꦺꦴꦠꦺꦴ ꦒꦺꦴꦠꦩꦱ꧀ꦱ ꦥꦴꦢꦺ ꦱꦶꦫꦱꦴ ꦮꦤ꧀ꦢꦠꦶ, ꦄꦥ꧀ꦥꦴꦧꦴꦣꦁ ꦄꦥ꧀ꦥꦴꦠꦔ꧀ꦏꦁ ꦭꦲꦸꦛ꧀ꦜꦴꦤꦁ ꦧꦭꦁ ꦦꦴꦱꦸꦮꦶꦲꦴꦫꦁ ꦥꦸꦕ꧀ꦖꦠꦶ. ꦫꦴꦗꦴ [ꦌꦮꦚ꧀ꦕ ꦮꦢꦺꦠꦶ ꦫꦴꦗꦴ (ꦏ.)], ꦨꦺꦴ ꦒꦺꦴꦠꦩ, ꦩꦴꦒꦣꦺꦴ ꦄꦗꦴꦠꦱꦠ꧀ꦠꦸ ꦮꦺꦢꦺꦲꦶꦥꦸꦠ꧀ꦠꦺꦴ ꦮꦗ꧀ꦗꦷ ꦄꦨꦶꦪꦴꦠꦸꦏꦴꦩꦺꦴ. ꦱꦺꦴ ꦌꦮꦩꦴꦲ – ‘ꦄꦲꦁ ꦲꦶꦩꦺ ꦮꦗ꧀ꦗꦷ ꦌꦮꦁꦩꦲꦶꦢ꧀ꦣꦶꦏꦺ ꦌꦮꦁꦩꦲꦴꦤꦸꦨꦴꦮꦺ ꦈꦕ꧀ꦖꦺꦕ꧀ꦖꦴꦩꦶ ꦮꦗ꧀ꦗꦷ, ꦮꦶꦤꦴꦱꦺꦱ꧀ꦱꦴꦩꦶ ꦮꦗ꧀ꦗꦷ, ꦄꦤꦪꦧ꧀ꦪꦱꦤꦁ ꦄꦴꦥꦴꦢꦺꦱ꧀ꦱꦴꦩꦷ’’’ꦠꦶ.

ꦫꦴꦗꦄꦥꦫꦶꦲꦴꦤꦶꦪꦣꦩ꧀ꦩꦴ

꧑꧓꧔. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦨꦒꦮꦠꦺꦴ ꦥꦶꦛ꧀ꦜꦶꦠꦺꦴ ꦜꦶꦠꦺꦴ ꦲꦺꦴꦠꦶ ꦨꦒꦮꦤ꧀ꦠꦁ ꦧꦷꦗꦪꦩꦴꦤꦺꦴ [ꦮꦷꦗꦪꦩꦴꦤꦺꦴ (ꦱꦷ.), ꦮꦷꦗꦶꦪꦩꦴꦤꦺꦴ (ꦱ꧀ꦪꦴ.)]. ꦄꦡ ꦑꦺꦴ ꦨꦒꦮꦴ ꦄꦴꦪꦱ꧀ꦩꦤ꧀ꦠꦁ ꦄꦴꦤꦤ꧀ꦢꦁ ꦄꦴꦩꦤ꧀ꦠꦺꦱꦶ – ‘‘ꦏꦶꦤ꧀ꦠꦶ ꦠꦺ, ꦄꦴꦤꦤ꧀ꦢ, ꦱꦸꦠꦁ, ‘ꦮꦗ꧀ꦗꦷ ꦄꦨꦶꦟ꧀ꦲꦁ ꦱꦤ꧀ꦤꦶꦥꦴꦠꦴ ꦱꦤ꧀ꦤꦶꦥꦴꦠꦧꦲꦸꦭꦴ’ꦠꦶ? ‘‘ꦱꦸꦠꦁ ꦩꦺꦠꦁ, ꦨꦤ꧀ꦠꦺ – ‘ꦮꦗ꧀ꦗꦷ ꦄꦨꦶꦟ꧀ꦲꦁ ꦱꦤ꧀ꦤꦶꦥꦴꦠꦴ ꦱꦤ꧀ꦤꦶꦥꦴꦠꦧꦲꦸꦭꦴ’’ꦠꦶ. ‘‘ꦪꦴꦮꦏꦷꦮꦚ꧀ꦕ, ꦄꦴꦤꦤ꧀ꦢ, ꦮꦗ꧀ꦗꦷ ꦄꦨꦶꦟ꧀ꦲꦁ ꦱꦤ꧀ꦤꦶꦥꦴꦠꦴ ꦱꦤ꧀ꦤꦶꦥꦴꦠꦧꦲꦸꦭꦴ ꦨꦮꦶꦱ꧀ꦱꦤ꧀ꦠꦶ, ꦮꦸꦢ꧀ꦣꦶꦪꦺꦮ, ꦄꦴꦤꦤ꧀ꦢ, ꦮꦗ꧀ꦗꦷꦤꦁ ꦥꦴꦛꦶꦏꦔ꧀ꦑꦴ, ꦤꦺꦴ ꦥꦫꦶꦲꦴꦤꦶ.

‘‘ꦏꦶꦤ꧀ꦠꦶ ꦠꦺ, ꦄꦴꦤꦤ꧀ꦢ, ꦱꦸꦠꦁ, ‘ꦮꦗ꧀ꦗꦷ ꦱꦩꦒ꧀ꦒꦴ ꦱꦤ꧀ꦤꦶꦥꦠꦤ꧀ꦠꦶ, ꦱꦩꦒ꧀ꦒꦴ ꦮꦸꦛ꧀ꦜꦲꦤ꧀ꦠꦶ, ꦱꦩꦒ꧀ꦒꦴ ꦮꦗ꧀ꦗꦶꦏꦫꦟꦷꦪꦴꦤꦶ ꦏꦫꦺꦴꦤ꧀ꦠꦷ’ꦠꦶ? ‘‘ꦱꦸꦠꦁ ꦩꦺꦠꦁ, ꦨꦤ꧀ꦠꦺ – ‘ꦮꦗ꧀ꦗꦷ ꦱꦩꦒ꧀ꦒꦴ ꦱꦤ꧀ꦤꦶꦥꦠꦤ꧀ꦠꦶ, ꦱꦩꦒ꧀ꦒꦴ ꦮꦸꦛ꧀ꦜꦲꦤ꧀ꦠꦶ, ꦱꦩꦒ꧀ꦒꦴ ꦮꦗ꧀ꦗꦶꦏꦫꦟꦷꦪꦴꦤꦶ ꦏꦫꦺꦴꦤ꧀ꦠꦷ’’ꦠꦶ. ‘‘ꦪꦴꦮꦏꦷꦮꦚ꧀ꦕ, ꦄꦴꦤꦤ꧀ꦢ, ꦮꦗ꧀ꦗꦷ ꦱꦩꦒ꧀ꦒꦴ ꦱꦤ꧀ꦤꦶꦥꦠꦶꦱ꧀ꦱꦤ꧀ꦠꦶ, ꦱꦩꦒ꧀ꦒꦴ ꦮꦸꦛ꧀ꦜꦲꦶꦱ꧀ꦱꦤ꧀ꦠꦶ, ꦱꦩꦒ꧀ꦒꦴ ꦮꦗ꧀ꦗꦶꦏꦫꦟꦷꦪꦴꦤꦶ ꦏꦫꦶꦱ꧀ꦱꦤ꧀ꦠꦶ, ꦮꦸꦢ꧀ꦣꦶꦪꦺꦮ, ꦄꦴꦤꦤ꧀ꦢ, ꦮꦗ꧀ꦗꦷꦤꦁ ꦥꦴꦛꦶꦏꦔ꧀ꦑꦴ, ꦤꦺꦴ ꦥꦫꦶꦲꦴꦤꦶ.

‘‘ꦏꦶꦤ꧀ꦠꦶ ꦠꦺ, ꦄꦴꦤꦤ꧀ꦢ, ꦱꦸꦠꦁ, ‘ꦮꦗ꧀ꦗꦷ ꦄꦥꦚ꧀ꦚꦠ꧀ꦠꦁ ꦤ ꦥꦚ꧀ꦚꦥꦺꦤ꧀ꦠꦶ, ꦥꦚ꧀ꦚꦠ꧀ꦠꦁ ꦤ ꦱꦩꦸꦕ꧀ꦖꦶꦤ꧀ꦢꦤ꧀ꦠꦶ, ꦪꦡꦴꦥꦚ꧀ꦚꦠ꧀ꦠꦺ ꦥꦺꦴꦫꦴꦟꦺ ꦮꦗ꧀ꦗꦶꦣꦩ꧀ꦩꦺ ꦱꦩꦴꦢꦴꦪ ꦮꦠ꧀ꦠꦤ꧀ꦠꦷ’’’ꦠꦶ? ‘‘ꦱꦸꦠꦁ ꦩꦺꦠꦁ, ꦨꦤ꧀ꦠꦺ – ‘ꦮꦗ꧀ꦗꦷ ꦄꦥꦚ꧀ꦚꦠ꧀ꦠꦁ ꦤ ꦥꦚ꧀ꦚꦥꦺꦤ꧀ꦠꦶ, ꦥꦚ꧀ꦚꦠ꧀ꦠꦁ ꦤ ꦱꦩꦸꦕ꧀ꦖꦶꦤ꧀ꦢꦤ꧀ꦠꦶ, ꦪꦡꦴꦥꦚ꧀ꦚꦠ꧀ꦠꦺ ꦥꦺꦴꦫꦴꦟꦺ ꦮꦗ꧀ꦗꦶꦣꦩ꧀ꦩꦺ ꦱꦩꦴꦢꦴꦪ ꦮꦠ꧀ꦠꦤ꧀ꦠꦷ’’’ꦠꦶ. ‘‘ꦪꦴꦮꦏꦷꦮꦚ꧀ꦕ, ꦄꦴꦤꦤ꧀ꦢ, ‘‘ꦮꦗ꧀ꦗꦷ ꦄꦥꦚ꧀ꦚꦠ꧀ꦠꦁ ꦤ ꦥꦚ꧀ꦚꦥꦺꦱ꧀ꦱꦤ꧀ꦠꦶ, ꦥꦚ꧀ꦚꦠ꧀ꦠꦁ ꦤ ꦱꦩꦸꦕ꧀ꦖꦶꦤ꧀ꦢꦶꦱ꧀ꦱꦤ꧀ꦠꦶ, ꦪꦡꦴꦥꦚ꧀ꦚꦠ꧀ꦠꦺ ꦥꦺꦴꦫꦴꦟꦺ ꦮꦗ꧀ꦗꦶꦣꦩ꧀ꦩꦺ ꦱꦩꦴꦢꦴꦪ ꦮꦠ꧀ꦠꦶꦱ꧀ꦱꦤ꧀ꦠꦶ, ꦮꦸꦢ꧀ꦣꦶꦪꦺꦮ, ꦄꦴꦤꦤ꧀ꦢ, ꦮꦗ꧀ꦗꦷꦤꦁ ꦥꦴꦛꦶꦏꦔ꧀ꦑꦴ, ꦤꦺꦴ ꦥꦫꦶꦲꦴꦤꦶ.

‘‘ꦏꦶꦤ꧀ꦠꦶ ꦠꦺ, ꦄꦴꦤꦤ꧀ꦢ, ꦱꦸꦠꦁ, ‘ꦮꦗ꧀ꦗꦷ ꦪꦺ ꦠꦺ ꦮꦗ꧀ꦗꦷꦤꦁ ꦮꦗ꧀ꦗꦶꦩꦲꦭ꧀ꦭꦏꦴ, ꦠꦺ ꦱꦏ꧀ꦏꦫꦺꦴꦤ꧀ꦠꦶ ꦒꦫꦸꦁ ꦏꦫꦺꦴꦤ꧀ꦠꦶ [ꦒꦫꦸꦏꦫꦺꦴꦤ꧀ꦠꦶ (ꦱꦷ. ꦱ꧀ꦪꦴ. ꦥꦷ.)] ꦩꦴꦤꦺꦤ꧀ꦠꦶ ꦥꦹꦗꦺꦤ꧀ꦠꦶ, ꦠꦺꦱꦚ꧀ꦕ ꦱꦺꦴꦠꦧ꧀ꦧꦁ ꦩꦚ꧀ꦚꦤ꧀ꦠꦷ’’’ꦠꦶ? ‘‘ꦱꦸꦠꦁ ꦩꦺꦠꦁ, ꦨꦤ꧀ꦠꦺ – ‘ꦮꦗ꧀ꦗꦷ ꦪꦺ ꦠꦺ ꦮꦗ꧀ꦗꦷꦤꦁ ꦮꦗ꧀ꦗꦶꦩꦲꦭ꧀ꦭꦏꦴ, ꦠꦺ ꦱꦏ꧀ꦏꦫꦺꦴꦤ꧀ꦠꦶ ꦒꦫꦸꦁ ꦏꦫꦺꦴꦤ꧀ꦠꦶ ꦩꦴꦤꦺꦤ꧀ꦠꦶ ꦥꦹꦗꦺꦤ꧀ꦠꦶ, ꦠꦺꦱꦚ꧀ꦕ ꦱꦺꦴꦠꦧ꧀ꦧꦁ ꦩꦚ꧀ꦚꦤ꧀ꦠꦷ’’’ꦠꦶ. ‘‘ꦪꦴꦮꦏꦷꦮꦚ꧀ꦕ, ꦄꦴꦤꦤ꧀ꦢ, ꦮꦗ꧀ꦗꦷ ꦪꦺ ꦠꦺ ꦮꦗ꧀ꦗꦷꦤꦁ ꦮꦗ꧀ꦗꦶꦩꦲꦭ꧀ꦭꦏꦴ, ꦠꦺ ꦱꦏ꧀ꦏꦫꦶꦱ꧀ꦱꦤ꧀ꦠꦶ ꦒꦫꦸꦁ ꦏꦫꦶꦱ꧀ꦱꦤ꧀ꦠꦶ ꦩꦴꦤꦺꦱ꧀ꦱꦤ꧀ꦠꦶ ꦥꦹꦗꦺꦱ꧀ꦱꦤ꧀ꦠꦶ, ꦠꦺꦱꦚ꧀ꦕ ꦱꦺꦴꦠꦧ꧀ꦧꦁ ꦩꦚ꧀ꦚꦶꦱ꧀ꦱꦤ꧀ꦠꦶ, ꦮꦸꦢ꧀ꦣꦶꦪꦺꦮ, ꦄꦴꦤꦤ꧀ꦢ, ꦮꦗ꧀ꦗꦷꦤꦁ ꦥꦴꦛꦶꦏꦔ꧀ꦑꦴ, ꦤꦺꦴ ꦥꦫꦶꦲꦴꦤꦶ.

‘‘ꦏꦶꦤ꧀ꦠꦶ ꦠꦺ, ꦄꦴꦤꦤ꧀ꦢ, ꦱꦸꦠꦁ, ‘ꦮꦗ꧀ꦗꦷ ꦪꦴ ꦠꦴ ꦏꦸꦭꦶꦠ꧀ꦡꦶꦪꦺꦴ ꦏꦸꦭꦏꦸꦩꦴꦫꦶꦪꦺꦴ, ꦠꦴ ꦤ ꦎꦏ꧀ꦏꦱ꧀ꦱ ꦥꦱꦪ꧀ꦲ ꦮꦴꦱꦺꦤ꧀ꦠꦷ’’’ꦠꦶ? ‘‘ꦱꦸꦠꦁ ꦩꦺꦠꦁ, ꦨꦤ꧀ꦠꦺ – ‘ꦮꦗ꧀ꦗꦷ ꦪꦴ ꦠꦴ ꦏꦸꦭꦶꦠ꧀ꦡꦶꦪꦺꦴ ꦏꦸꦭꦏꦸꦩꦴꦫꦶꦪꦺꦴ ꦠꦴ ꦤ ꦎꦏ꧀ꦏꦱ꧀ꦱ ꦥꦱꦪ꧀ꦲ ꦮꦴꦱꦺꦤ꧀ꦠꦷ’’’ꦠꦶ. ‘‘ꦪꦴꦮꦏꦷꦮꦚ꧀ꦕ, ꦄꦴꦤꦤ꧀ꦢ, ꦮꦗ꧀ꦗꦷ ꦪꦴ ꦠꦴ ꦏꦸꦭꦶꦠ꧀ꦡꦶꦪꦺꦴ ꦏꦸꦭꦏꦸꦩꦴꦫꦶꦪꦺꦴ, ꦠꦴ ꦤ ꦎꦏ꧀ꦏꦱ꧀ꦱ ꦥꦱꦪ꧀ꦲ ꦮꦴꦱꦺꦱ꧀ꦱꦤ꧀ꦠꦶ, ꦮꦸꦢ꧀ꦣꦶꦪꦺꦮ, ꦄꦴꦤꦤ꧀ꦢ, ꦮꦗ꧀ꦗꦷꦤꦁ ꦥꦴꦛꦶꦏꦔ꧀ꦑꦴ, ꦤꦺꦴ ꦥꦫꦶꦲꦴꦤꦶ.

‘‘ꦏꦶꦤ꧀ꦠꦶ ꦠꦺ, ꦄꦴꦤꦤ꧀ꦢ, ꦱꦸꦠꦁ, ‘ꦮꦗ꧀ꦗꦷ ꦪꦴꦤꦶ ꦠꦴꦤꦶ

ꦮꦗ꧀ꦗꦷꦤꦁ ꦮꦗ꧀ꦗꦶꦕꦺꦠꦶꦪꦴꦤꦶ ꦄꦧ꧀ꦨꦤ꧀ꦠꦫꦴꦤꦶ ꦕꦺꦮ ꦧꦴꦲꦶꦫꦴꦤꦶ ꦕ, ꦠꦴꦤꦶ ꦱꦏ꧀ꦏꦫꦺꦴꦤ꧀ꦠꦶ ꦒꦫꦸꦁ ꦏꦫꦺꦴꦤ꧀ꦠꦶ ꦩꦴꦤꦺꦤ꧀ꦠꦶ ꦥꦹꦗꦺꦤ꧀ꦠꦶ, ꦠꦺꦱꦚ꧀ꦕ ꦢꦶꦤ꧀ꦤꦥꦸꦧ꧀ꦧꦁ ꦏꦠꦥꦸꦧ꧀ꦧꦁ ꦣꦩ꧀ꦩꦶꦏꦁ ꦧꦭꦶꦁ ꦤꦺꦴ ꦥꦫꦶꦲꦴꦥꦺꦤ꧀ꦠꦷ’’’ꦠꦶ? ‘‘ꦱꦸꦠꦁ ꦩꦺꦠꦁ, ꦨꦤ꧀ꦠꦺ – ‘ꦮꦗ꧀ꦗꦷ ꦪꦴꦤꦶ ꦠꦴꦤꦶ ꦮꦗ꧀ꦗꦷꦤꦁ ꦮꦗ꧀ꦗꦶꦕꦺꦠꦶꦪꦴꦤꦶ ꦄꦧ꧀ꦨꦤ꧀ꦠꦫꦴꦤꦶ ꦕꦺꦮ ꦧꦴꦲꦶꦫꦴꦤꦶ ꦕ, ꦠꦴꦤꦶ ꦱꦏ꧀ꦏꦫꦺꦴꦤ꧀ꦠꦶ ꦒꦫꦸꦁ ꦏꦫꦺꦴꦤ꧀ꦠꦶ ꦩꦴꦤꦺꦤ꧀ꦠꦶ ꦥꦹꦗꦺꦤ꧀ꦠꦶ ꦠꦺꦱꦚ꧀ꦕ ꦢꦶꦤ꧀ꦤꦥꦸꦧ꧀ꦧꦁ ꦏꦠꦥꦸꦧ꧀ꦧꦁ ꦣꦩ꧀ꦩꦶꦏꦁ ꦧꦭꦶꦁ ꦤꦺꦴ ꦥꦫꦶꦲꦴꦥꦺꦤ꧀ꦠꦷ’’’ꦠꦶ. ‘‘ꦪꦴꦮꦏꦷꦮꦚ꧀ꦕ, ꦄꦴꦤꦤ꧀ꦢ, ꦮꦗ꧀ꦗꦷ ꦪꦴꦤꦶ ꦠꦴꦤꦶ ꦮꦗ꧀ꦗꦷꦤꦁ ꦮꦗ꧀ꦗꦶꦕꦺꦠꦶꦪꦴꦤꦶ ꦄꦧ꧀ꦨꦤ꧀ꦠꦫꦴꦤꦶ ꦕꦺꦮ ꦧꦴꦲꦶꦫꦴꦤꦶ ꦕ, ꦠꦴꦤꦶ ꦱꦏ꧀ꦏꦫꦶꦱ꧀ꦱꦤ꧀ꦠꦶ ꦒꦫꦸꦁ ꦏꦫꦶꦱ꧀ꦱꦤ꧀ꦠꦶ ꦩꦴꦤꦺꦱ꧀ꦱꦤ꧀ꦠꦶ ꦥꦹꦗꦺꦱ꧀ꦱꦤ꧀ꦠꦶ, ꦠꦺꦱꦚ꧀ꦕ ꦢꦶꦤ꧀ꦤꦥꦸꦧ꧀ꦧꦁ ꦏꦠꦥꦸꦧ꧀ꦧꦁ ꦣꦩ꧀ꦩꦶꦏꦁ ꦧꦭꦶꦁ ꦤꦺꦴ ꦥꦫꦶꦲꦴꦥꦺꦱ꧀ꦱꦤ꧀ꦠꦶ, ꦮꦸꦢ꧀ꦣꦶꦪꦺꦮ, ꦄꦴꦤꦤ꧀ꦢ, ꦮꦗ꧀ꦗꦷꦤꦁ ꦥꦴꦛꦶꦏꦔ꧀ꦑꦴ, ꦤꦺꦴ ꦥꦫꦶꦲꦴꦤꦶ.

‘‘ꦏꦶꦤ꧀ꦠꦶ ꦠꦺ, ꦄꦴꦤꦤ꧀ꦢ, ꦱꦸꦠꦁ, ‘ꦮꦗ꧀ꦗꦷꦤꦁ ꦄꦫꦲꦤ꧀ꦠꦺꦱꦸ ꦣꦩ꧀ꦩꦶꦏꦴ ꦫꦏ꧀ꦑꦴꦮꦫꦟꦒꦸꦠ꧀ꦠꦶ ꦱꦸꦱꦁꦮꦶꦲꦶꦠꦴ, ꦏꦶꦤ꧀ꦠꦶ ꦄꦤꦴꦒꦠꦴ ꦕ ꦄꦫꦲꦤ꧀ꦠꦺꦴ ꦮꦶꦗꦶꦠꦁ ꦄꦴꦒꦕ꧀ꦖꦺꦪ꧀ꦪꦸꦁ, ꦄꦴꦒꦠꦴ ꦕ ꦄꦫꦲꦤ꧀ꦠꦺꦴ ꦮꦶꦗꦶꦠꦺ ꦦꦴꦱꦸ ꦮꦶꦲꦫꦺꦪ꧀ꦪꦸ’’’ꦤ꧀ꦠꦶ? ‘‘ꦱꦸꦠꦁ ꦩꦺꦠꦁ, ꦨꦤ꧀ꦠꦺ ‘ꦮꦗ꧀ꦗꦷꦤꦁ ꦄꦫꦲꦤ꧀ꦠꦺꦱꦸ ꦣꦩ꧀ꦩꦶꦏꦴ ꦫꦏ꧀ꦑꦴꦮꦫꦟꦒꦸꦠ꧀ꦠꦶ ꦱꦸꦱꦁꦮꦶꦲꦶꦠꦴ ꦏꦶꦤ꧀ꦠꦶ ꦄꦤꦴꦒꦠꦴ ꦕ ꦄꦫꦲꦤ꧀ꦠꦺꦴ ꦮꦶꦗꦶꦠꦁ ꦄꦴꦒꦕ꧀ꦖꦺꦪ꧀ꦪꦸꦁ, ꦄꦴꦒꦠꦴ ꦕ ꦄꦫꦲꦤ꧀ꦠꦺꦴ ꦮꦶꦗꦶꦠꦺ ꦦꦴꦱꦸ ꦮꦶꦲꦫꦺꦪ꧀ꦪꦸ’’’ꦤ꧀ꦠꦶ. ‘‘ꦪꦴꦮꦏꦷꦮꦚ꧀ꦕ, ꦄꦴꦤꦤ꧀ꦢ, ꦮꦗ꧀ꦗꦷꦤꦁ ꦄꦫꦲꦤ꧀ꦠꦺꦱꦸ ꦣꦩ꧀ꦩꦶꦏꦴ ꦫꦏ꧀ꦑꦴꦮꦫꦟꦒꦸꦠ꧀ꦠꦶ ꦱꦸꦱꦁꦮꦶꦲꦶꦠꦴ ꦨꦮꦶꦱ꧀ꦱꦠꦶ, ꦏꦶꦤ꧀ꦠꦶ ꦄꦤꦴꦒꦠꦴ ꦕ ꦄꦫꦲꦤ꧀ꦠꦺꦴ ꦮꦶꦗꦶꦠꦁ ꦄꦴꦒꦕ꧀ꦖꦺꦪ꧀ꦪꦸꦁ, ꦄꦴꦒꦠꦴ ꦕ ꦄꦫꦲꦤ꧀ꦠꦺꦴ ꦮꦶꦗꦶꦠꦺ ꦦꦴꦱꦸ ꦮꦶꦲꦫꦺꦪ꧀ꦪꦸꦤ꧀ꦠꦶ. ꦮꦸꦢ꧀ꦣꦶꦪꦺꦮ, ꦄꦴꦤꦤ꧀ꦢ, ꦮꦗ꧀ꦗꦷꦤꦁ ꦥꦴꦛꦶꦏꦔ꧀ꦑꦴ, ꦤꦺꦴ ꦥꦫꦶꦲꦴꦤꦷ’’ꦠꦶ.

꧑꧓꧕. ꦄꦡ ꦑꦺꦴ ꦨꦒꦮꦴ ꦮꦱ꧀ꦱꦏꦴꦫꦁ ꦧ꧀ꦫꦴꦲ꧀ꦩꦟꦁ ꦩꦒꦣꦩꦲꦴꦩꦠ꧀ꦠꦁ ꦄꦴꦩꦤ꧀ꦠꦺꦱꦶ – ‘‘ꦌꦏꦩꦶꦢꦴꦲꦁ, ꦧ꧀ꦫꦴꦲ꧀ꦩꦟ, ꦱꦩꦪꦁ ꦮꦺꦱꦴꦭꦶꦪꦁ ꦮꦶꦲꦫꦴꦩꦶ ꦱꦴꦫꦤ꧀ꦢꦢꦺ [ꦱꦴꦤꦤ꧀ꦢꦫꦺ (ꦏ.)] ꦕꦺꦠꦶꦪꦺ. ꦠꦠ꧀ꦫꦴꦲꦁ ꦮꦗ꧀ꦗꦷꦤꦁ ꦆꦩꦺ ꦱꦠ꧀ꦠ ꦄꦥꦫꦶꦲꦴꦤꦶꦪꦺ ꦣꦩ꧀ꦩꦺ ꦢꦺꦱꦺꦱꦶꦁ. ꦪꦴꦮꦏꦷꦮꦚ꧀ꦕ, ꦧ꧀ꦫꦴꦲ꧀ꦩꦟ, ꦆꦩꦺ ꦱꦠ꧀ꦠ ꦄꦥꦫꦶꦲꦴꦤꦶꦪꦴ ꦣꦩ꧀ꦩꦴ ꦮꦗ꧀ꦗꦷꦱꦸ ꦜꦱ꧀ꦱꦤ꧀ꦠꦶ, ꦆꦩꦺꦱꦸ ꦕ ꦱꦠ꧀ꦠꦱꦸ ꦄꦥꦫꦶꦲꦴꦤꦶꦪꦺꦱꦸ ꦣꦩ꧀ꦩꦺꦱꦸ ꦮꦗ꧀ꦗꦷ ꦱꦤ꧀ꦢꦶꦱ꧀ꦱꦶꦱ꧀ꦱꦤ꧀ꦠꦶ, ꦮꦸꦢ꧀ꦣꦶꦪꦺꦮ, ꦧ꧀ꦫꦴꦲ꧀ꦩꦟ, ꦮꦗ꧀ꦗꦷꦤꦁ ꦥꦴꦛꦶꦏꦔ꧀ꦑꦴ, ꦤꦺꦴ ꦥꦫꦶꦲꦴꦤꦷ’’ꦠꦶ.

ꦌꦮꦁ ꦮꦸꦠ꧀ꦠꦺ, ꦮꦱ꧀ꦱꦏꦴꦫꦺꦴ ꦧ꧀ꦫꦴꦲ꧀ꦩꦟꦺꦴ ꦩꦒꦣꦩꦲꦴꦩꦠ꧀ꦠꦺꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦌꦏꦩꦺꦏꦺꦤꦥꦶ, ꦨꦺꦴ ꦒꦺꦴꦠꦩ, ꦄꦥꦫꦶꦲꦴꦤꦶꦪꦺꦤ ꦣꦩ꧀ꦩꦺꦤ ꦱꦩꦤ꧀ꦤꦴꦒꦠꦴꦤꦁ ꦮꦗ꧀ꦗꦷꦤꦁ ꦮꦸꦢ꧀ꦣꦶꦪꦺꦮ ꦥꦴꦛꦶꦏꦔ꧀ꦑꦴ, ꦤꦺꦴ ꦥꦫꦶꦲꦴꦤꦶ. ꦏꦺꦴ ꦥꦤ ꦮꦴꦢꦺꦴ ꦱꦠ꧀ꦠꦲꦶ ꦄꦥꦫꦶꦲꦴꦤꦶꦪꦺꦲꦶ ꦣꦩ꧀ꦩꦺꦲꦶ. ꦄꦏꦫꦟꦷꦪꦴꦮ [ꦄꦏꦫꦟꦷꦪꦴ ꦕ (ꦱ꧀ꦪꦴ. ꦏ.)], ꦨꦺꦴ ꦒꦺꦴꦠꦩ, ꦮꦗ꧀ꦗꦷ [ꦮꦗ꧀ꦗꦷꦤꦁ (ꦏ.)] ꦫꦚ꧀ꦚꦴ ꦩꦴꦒꦣꦺꦤ ꦄꦗꦴꦠꦱꦠ꧀ꦠꦸꦤꦴ ꦮꦺꦢꦺꦲꦶꦥꦸꦠ꧀ꦠꦺꦤ ꦪꦢꦶꦢꦁ ꦪꦸꦢ꧀ꦣꦱ꧀ꦱ, ꦄꦚ꧀ꦚꦠ꧀ꦫ ꦈꦥꦭꦴꦥꦤꦴꦪ ꦄꦚ꧀ꦚꦠ꧀ꦫ ꦩꦶꦡꦸꦨꦺꦢꦴ. ꦲꦤ꧀ꦢ ꦕ ꦢꦴꦤꦶ ꦩꦪꦁ, ꦨꦺꦴ ꦒꦺꦴꦠꦩ, ꦒꦕ꧀ꦖꦴꦩ, ꦧꦲꦸꦏꦶꦕ꧀ꦕꦴ ꦩꦪꦁ ꦧꦲꦸꦏꦫꦟꦷꦪꦴ’’ꦠꦶ. ‘‘ꦪꦱ꧀ꦱꦢꦴꦤꦶ ꦠ꧀ꦮꦁ, ꦧ꧀ꦫꦴꦲ꧀ꦩꦟ, ꦏꦴꦭꦁ ꦩꦚ꧀ꦚꦱꦷ’’ꦠꦶ. ꦄꦡ ꦑꦺꦴ ꦮꦱ꧀ꦱꦏꦴꦫꦺꦴ ꦧ꧀ꦫꦴꦲ꧀ꦩꦟꦺꦴ ꦩꦒꦣꦩꦲꦴꦩꦠ꧀ꦠꦺꦴ ꦨꦒꦮꦠꦺꦴ ꦨꦴꦱꦶꦠꦁ ꦄꦨꦶꦤꦤ꧀ꦢꦶꦠ꧀ꦮꦴ ꦄꦤꦸꦩꦺꦴꦢꦶꦠ꧀ꦮꦴ ꦈꦛ꧀ꦜꦴꦪꦴꦱꦤꦴ ꦥꦏ꧀ꦏꦴꦩꦶ.

ꦨꦶꦏ꧀ꦑꦸꦄꦥꦫꦶꦲꦴꦤꦶꦪꦣꦩ꧀ꦩꦴ

꧑꧓꧖. ꦄꦡ ꦑꦺꦴ ꦨꦒꦮꦴ ꦄꦕꦶꦫꦥꦏ꧀ꦏꦤ꧀ꦠꦺ ꦮꦱ꧀ꦱꦏꦴꦫꦺ ꦧ꧀ꦫꦴꦲ꧀ꦩꦟꦺ ꦩꦒꦣꦩꦲꦴꦩꦠ꧀ꦠꦺ ꦄꦴꦪꦱ꧀ꦩꦤ꧀ꦠꦁ ꦄꦴꦤꦤ꧀ꦢꦁ ꦄꦴꦩꦤ꧀ꦠꦺꦱꦶ – ‘‘ꦒꦕ꧀ꦖ ꦠ꧀ꦮꦁ, ꦄꦴꦤꦤ꧀ꦢ, ꦪꦴꦮꦠꦶꦏꦴ ꦨꦶꦏ꧀ꦑꦹ ꦫꦴꦗꦒꦲꦁ ꦈꦥꦤꦶꦱ꧀ꦱꦴꦪ ꦮꦶꦲꦫꦤ꧀ꦠꦶ, ꦠꦺ ꦱꦧ꧀ꦧꦺ ꦈꦥꦛ꧀ꦜꦴꦤꦱꦴꦭꦴꦪꦁ ꦱꦤ꧀ꦤꦶꦥꦴꦠꦺꦲꦷ’’ꦠꦶ. ‘‘ꦌꦮꦁ, ꦨꦤ꧀ꦠꦺ’’ꦠꦶ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦨꦒꦮꦠꦺꦴ ꦥꦛꦶꦱ꧀ꦱꦸꦠ꧀ꦮꦴ ꦪꦴꦮꦠꦶꦏꦴ ꦨꦶꦏ꧀ꦑꦹ ꦫꦴꦗꦒꦲꦁ ꦈꦥꦤꦶꦱ꧀ꦱꦴꦪ ꦮꦶꦲꦫꦤ꧀ꦠꦶ, ꦠꦺ ꦱꦧ꧀ꦧꦺ ꦈꦥꦛ꧀ꦜꦴꦤꦱꦴꦭꦴꦪꦁ ꦱꦤ꧀ꦤꦶꦥꦴꦠꦺꦠ꧀ꦮꦴ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦄꦛ꧀ꦜꦴꦱꦶ. ꦌꦏꦩꦤ꧀ꦠꦁ ꦜꦶꦠꦺꦴ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦱꦤ꧀ꦤꦶꦥꦠꦶꦠꦺꦴ, ꦨꦤ꧀ꦠꦺ, ꦨꦶꦏ꧀ꦑꦸꦱꦔ꧀ꦓꦺꦴ, ꦪꦱ꧀ꦱꦢꦴꦤꦶ, ꦨꦤ꧀ꦠꦺ, ꦨꦒꦮꦴ ꦏꦴꦭꦁ ꦩꦚ꧀ꦚꦠꦷ’’ꦠꦶ.

ꦄꦡ ꦑꦺꦴ ꦨꦒꦮꦴ ꦈꦛ꧀ꦜꦴꦪꦴꦱꦤꦴ ꦪꦺꦤ ꦈꦥꦛ꧀ꦜꦴꦤꦱꦴꦭꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦥꦚ꧀ꦚꦠ꧀ꦠꦺ ꦄꦴꦱꦤꦺ ꦤꦶꦱꦷꦢꦶ. ꦤꦶꦱꦗ꧀ꦗ ꦑꦺꦴ ꦨꦒꦮꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ – ‘‘ꦱꦠ꧀ꦠ ꦮꦺꦴ, ꦨꦶꦏ꧀ꦑꦮꦺ, ꦄꦥꦫꦶꦲꦴꦤꦶꦪꦺ ꦣꦩ꧀ꦩꦺ ꦢꦺꦱꦺꦱ꧀ꦱꦴꦩꦶ, ꦠꦁ ꦱꦸꦟꦴꦡ, ꦱꦴꦣꦸꦏꦁ ꦩꦤꦱꦶꦏꦫꦺꦴꦡ, ꦨꦴꦱꦶꦱ꧀ꦱꦴꦩꦷ’’ꦠꦶ. ‘‘ꦌꦮꦁ, ꦨꦤ꧀ꦠꦺ’’ꦠꦶ ꦑꦺꦴ ꦠꦺ ꦨꦶꦏ꧀ꦑꦹ ꦨꦒꦮꦠꦺꦴ ꦥꦕ꧀ꦕꦱ꧀ꦱꦺꦴꦱꦸꦁ. ꦨꦒꦮꦴ ꦌꦠꦢꦮꦺꦴꦕ –

‘‘ꦪꦴꦮꦏꦷꦮꦚ꧀ꦕ, ꦨꦶꦏ꧀ꦑꦮꦺ, ꦨꦶꦏ꧀ꦑꦹ ꦄꦨꦶꦟ꧀ꦲꦁ ꦱꦤ꧀ꦤꦶꦥꦴꦠꦴ ꦱꦤ꧀ꦤꦶꦥꦴꦠꦧꦲꦸꦭꦴ ꦨꦮꦶꦱ꧀ꦱꦤ꧀ꦠꦶ, ꦮꦸꦢ꧀ꦣꦶꦪꦺꦮ, ꦨꦶꦏ꧀ꦑꦮꦺ, ꦨꦶꦏ꧀ꦑꦹꦤꦁ ꦥꦴꦛꦶꦏꦔ꧀ꦑꦴ, ꦤꦺꦴ ꦥꦫꦶꦲꦴꦤꦶ.

‘‘ꦪꦴꦮꦏꦷꦮꦚ꧀ꦕ, ꦨꦶꦏ꧀ꦑꦮꦺ, ꦨꦶꦏ꧀ꦑꦹ ꦱꦩꦒ꧀ꦒꦴ ꦱꦤ꧀ꦤꦶꦥꦠꦶꦱ꧀ꦱꦤ꧀ꦠꦶ, ꦱꦩꦒ꧀ꦒꦴ ꦮꦸꦛ꧀ꦜꦲꦶꦱ꧀ꦱꦤ꧀ꦠꦶ, ꦱꦩꦒ꧀ꦒꦴ ꦱꦔ꧀ꦓꦏꦫꦟꦷꦪꦴꦤꦶ ꦏꦫꦶꦱ꧀ꦱꦤ꧀ꦠꦶ, ꦮꦸꦢ꧀ꦣꦶꦪꦺꦮ, ꦨꦶꦏ꧀ꦑꦮꦺ, ꦨꦶꦏ꧀ꦑꦹꦤꦁ ꦥꦴꦛꦶꦏꦔ꧀ꦑꦴ, ꦤꦺꦴ ꦥꦫꦶꦲꦴꦤꦶ.

‘‘ꦪꦴꦮꦏꦷꦮꦚ꧀ꦕ, ꦨꦶꦏ꧀ꦑꦮꦺ, ꦨꦶꦏ꧀ꦑꦹ ꦄꦥꦚ꧀ꦚꦠ꧀ꦠꦁ ꦤ ꦥꦚ꧀ꦚꦥꦺꦱ꧀ꦱꦤ꧀ꦠꦶ, ꦥꦚ꧀ꦚꦠ꧀ꦠꦁ ꦤ ꦱꦩꦸꦕ꧀ꦖꦶꦤ꧀ꦢꦶꦱ꧀ꦱꦤ꧀ꦠꦶ, ꦪꦡꦴꦥꦚ꧀ꦚꦠ꧀ꦠꦺꦱꦸ ꦱꦶꦏ꧀ꦑꦴꦥꦢꦺꦱꦸ ꦱꦩꦴꦢꦴꦪ ꦮꦠ꧀ꦠꦶꦱ꧀ꦱꦤ꧀ꦠꦶ, ꦮꦸꦢ꧀ꦣꦶꦪꦺꦮ, ꦨꦶꦏ꧀ꦑꦮꦺ, ꦨꦶꦏ꧀ꦑꦹꦤꦁ ꦥꦴꦛꦶꦏꦔ꧀ꦑꦴ, ꦤꦺꦴ ꦥꦫꦶꦲꦴꦤꦶ.

‘‘ꦪꦴꦮꦏꦷꦮꦚ꧀ꦕ, ꦨꦶꦏ꧀ꦑꦮꦺ, ꦨꦶꦏ꧀ꦑꦹ ꦪꦺ ꦠꦺ ꦨꦶꦏ꧀ꦑꦹ ꦡꦺꦫꦴ ꦫꦠ꧀ꦠꦚ꧀ꦚꦹ ꦕꦶꦫꦥꦧ꧀ꦧꦗꦶꦠꦴ ꦱꦔ꧀ꦓꦥꦶꦠꦫꦺꦴ ꦱꦔ꧀ꦓꦥꦫꦶꦟꦴꦪꦏꦴ, ꦠꦺ ꦱꦏ꧀ꦏꦫꦶꦱ꧀ꦱꦤ꧀ꦠꦶ ꦒꦫꦸꦁ ꦏꦫꦶꦱ꧀ꦱꦤ꧀ꦠꦶ ꦩꦴꦤꦺꦱ꧀ꦱꦤ꧀ꦠꦶ ꦥꦹꦗꦺꦱ꧀ꦱꦤ꧀ꦠꦶ, ꦠꦺꦱꦚ꧀ꦕ ꦱꦺꦴꦠꦧ꧀ꦧꦁ ꦩꦚ꧀ꦚꦶꦱ꧀ꦱꦤ꧀ꦠꦶ, ꦮꦸꦢ꧀ꦣꦶꦪꦺꦮ, ꦨꦶꦏ꧀ꦑꦮꦺ, ꦨꦶꦏ꧀ꦑꦹꦤꦁ ꦥꦴꦛꦶꦏꦔ꧀ꦑꦴ, ꦤꦺꦴ ꦥꦫꦶꦲꦴꦤꦶ.

‘‘ꦪꦴꦮꦏꦷꦮꦚ꧀ꦕ, ꦨꦶꦏ꧀ꦑꦮꦺ, ꦨꦶꦏ꧀ꦑꦹ ꦈꦥ꧀ꦥꦤ꧀ꦤꦴꦪ ꦠꦟ꧀ꦲꦴꦪ ꦥꦺꦴꦤꦺꦴꦧ꧀ꦨꦮꦶꦏꦴꦪ ꦤ ꦮꦱꦁ ꦒꦕ꧀ꦖꦶꦱ꧀ꦱꦤ꧀ꦠꦶ, ꦮꦸꦢ꧀ꦣꦶꦪꦺꦮ, ꦨꦶꦏ꧀ꦑꦮꦺ, ꦨꦶꦏ꧀ꦑꦹꦤꦁ ꦥꦴꦛꦶꦏꦔ꧀ꦑꦴ, ꦤꦺꦴ ꦥꦫꦶꦲꦴꦤꦶ.

‘‘ꦪꦴꦮꦏꦷꦮꦚ꧀ꦕ, ꦨꦶꦏ꧀ꦑꦮꦺ, ꦨꦶꦏ꧀ꦑꦹ ꦄꦴꦫꦚ꧀ꦚꦏꦺꦱꦸ ꦱꦺꦤꦴꦱꦤꦺꦱꦸ ꦱꦴꦥꦺꦏ꧀ꦑꦴ ꦨꦮꦶꦱ꧀ꦱꦤ꧀ꦠꦶ, ꦮꦸꦢ꧀ꦣꦶꦪꦺꦮ, ꦨꦶꦏ꧀ꦑꦮꦺ, ꦨꦶꦏ꧀ꦑꦹꦤꦁ ꦥꦴꦛꦶꦏꦔ꧀ꦑꦴ, ꦤꦺꦴ ꦥꦫꦶꦲꦴꦤꦶ.

‘‘ꦪꦴꦮꦏꦷꦮꦚ꧀ꦕ, ꦨꦶꦏ꧀ꦑꦮꦺ, ꦨꦶꦏ꧀ꦑꦹ ꦥꦕ꧀ꦕꦠ꧀ꦠꦚ꧀ꦚꦺꦮ ꦱꦠꦶꦁ ꦈꦥꦛ꧀ꦜꦥꦺꦱ꧀ꦱꦤ꧀ꦠꦶ – ‘ꦏꦶꦤ꧀ꦠꦶ ꦄꦤꦴꦒꦠꦴ ꦕ ꦥꦺꦱꦭꦴ ꦱꦧ꧀ꦫꦲ꧀ꦩꦕꦴꦫꦷ ꦄꦴꦒꦕ꧀ꦖꦺꦪ꧀ꦪꦸꦁ, ꦄꦴꦒꦠꦴ ꦕ ꦥꦺꦱꦭꦴ ꦱꦧ꧀ꦫꦲ꧀ꦩꦕꦴꦫꦷ ꦦꦴꦱꦸ [ꦦꦴꦱꦸꦁ (ꦱꦷ. ꦱ꧀ꦪꦴ. ꦥꦷ.)] ꦮꦶꦲꦫꦺꦪ꧀ꦪꦸ’ꦤ꧀ꦠꦶ. ꦮꦸꦢ꧀ꦣꦶꦪꦺꦮ, ꦨꦶꦏ꧀ꦑꦮꦺ, ꦨꦶꦏ꧀ꦑꦹꦤꦁ ꦥꦴꦛꦶꦏꦔ꧀ꦑꦴ, ꦤꦺꦴ ꦥꦫꦶꦲꦴꦤꦶ.

‘‘ꦪꦴꦮꦏꦷꦮꦚ꧀ꦕ, ꦨꦶꦏ꧀ꦑꦮꦺ, ꦆꦩꦺ ꦱꦠ꧀ꦠ ꦄꦥꦫꦶꦲꦴꦤꦶꦪꦴ ꦣꦩ꧀ꦩꦴ ꦨꦶꦏ꧀ꦑꦹꦱꦸ ꦜꦱ꧀ꦱꦤ꧀ꦠꦶ, ꦆꦩꦺꦱꦸ ꦕ ꦱꦠ꧀ꦠꦱꦸ ꦄꦥꦫꦶꦲꦴꦤꦶꦪꦺꦱꦸ ꦣꦩ꧀ꦩꦺꦱꦸ ꦨꦶꦏ꧀ꦑꦹ ꦱꦤ꧀ꦢꦶꦱ꧀ꦱꦶꦱ꧀ꦱꦤ꧀ꦠꦶ, ꦮꦸꦢ꧀ꦣꦶꦪꦺꦮ, ꦨꦶꦏ꧀ꦑꦮꦺ, ꦨꦶꦏ꧀ꦑꦹꦤꦁ ꦥꦴꦛꦶꦏꦔ꧀ꦑꦴ, ꦤꦺꦴ ꦥꦫꦶꦲꦴꦤꦶ.

꧑꧓꧗. ‘‘ꦄꦥꦫꦺꦥꦶ ꦮꦺꦴ, ꦨꦶꦏ꧀ꦑꦮꦺ, ꦱꦠ꧀ꦠ ꦄꦥꦫꦶꦲꦴꦤꦶꦪꦺ ꦣꦩ꧀ꦩꦺ ꦢꦺꦱꦺꦱ꧀ꦱꦴꦩꦶ, ꦠꦁ ꦱꦸꦟꦴꦡ, ꦱꦴꦣꦸꦏꦁ ꦩꦤꦱꦶꦏꦫꦺꦴꦡ, ꦨꦴꦱꦶꦱ꧀ꦱꦴꦩꦷ’’ꦠꦶ. ‘‘ꦌꦮꦁ, ꦨꦤ꧀ꦠꦺ’’ꦠꦶ ꦑꦺꦴ ꦠꦺ ꦨꦶꦏ꧀ꦑꦹ ꦨꦒꦮꦠꦺꦴ ꦥꦕ꧀ꦕꦱ꧀ꦱꦺꦴꦱꦸꦁ. ꦨꦒꦮꦴ ꦌꦠꦢꦮꦺꦴꦕ –

‘‘ꦪꦴꦮꦏꦷꦮꦚ꧀ꦕ, ꦨꦶꦏ꧀ꦑꦮꦺ, ꦨꦶꦏ꧀ꦑꦹ ꦤ ꦏꦩ꧀ꦩꦴꦫꦴꦩꦴ ꦨꦮꦶꦱ꧀ꦱꦤ꧀ꦠꦶ ꦤ ꦏꦩ꧀ꦩꦫꦠꦴ ꦤ ꦏꦩ꧀ꦩꦴꦫꦴꦩꦠꦩꦤꦸꦪꦸꦠ꧀ꦠꦴ, ꦮꦸꦢ꧀ꦣꦶꦪꦺꦮ, ꦨꦶꦏ꧀ꦑꦮꦺ, ꦨꦶꦏ꧀ꦑꦹꦤꦁ ꦥꦴꦛꦶꦏꦔ꧀ꦑꦴ, ꦤꦺꦴ ꦥꦫꦶꦲꦴꦤꦶ.

‘‘ꦪꦴꦮꦏꦷꦮꦚ꧀ꦕ, ꦨꦶꦏ꧀ꦑꦮꦺ, ꦨꦶꦏ꧀ꦑꦹ ꦤ ꦨꦱ꧀ꦱꦴꦫꦴꦩꦴ ꦨꦮꦶꦱ꧀ꦱꦤ꧀ꦠꦶ ꦤ ꦨꦱ꧀ꦱꦫꦠꦴ ꦤ ꦨꦱ꧀ꦱꦴꦫꦴꦩꦠꦩꦤꦸꦪꦸꦠ꧀ꦠꦴ, ꦮꦸꦢ꧀ꦣꦶꦪꦺꦮ, ꦨꦶꦏ꧀ꦑꦮꦺ, ꦨꦶꦏ꧀ꦑꦹꦤꦁ ꦥꦴꦛꦶꦏꦔ꧀ꦑꦴ, ꦤꦺꦴ ꦥꦫꦶꦲꦴꦤꦶ.

‘‘ꦪꦴꦮꦏꦷꦮꦚ꧀ꦕ, ꦨꦶꦏ꧀ꦑꦮꦺ, ꦨꦶꦏ꧀ꦑꦹ ꦤ ꦤꦶꦢ꧀ꦢꦴꦫꦴꦩꦴ ꦨꦮꦶꦱ꧀ꦱꦤ꧀ꦠꦶ ꦤ ꦤꦶꦢ꧀ꦢꦴꦫꦠꦴ ꦤ ꦤꦶꦢ꧀ꦢꦴꦫꦴꦩꦠꦩꦤꦸꦪꦸꦠ꧀ꦠꦴ, ꦮꦸꦢ꧀ꦣꦶꦪꦺꦮ, ꦨꦶꦏ꧀ꦑꦮꦺ, ꦨꦶꦏ꧀ꦑꦹꦤꦁ ꦥꦴꦛꦶꦏꦔ꧀ꦑꦴ, ꦤꦺꦴ ꦥꦫꦶꦲꦴꦤꦶ.

‘‘ꦪꦴꦮꦏꦷꦮꦚ꧀ꦕ, ꦨꦶꦏ꧀ꦑꦮꦺ, ꦨꦶꦏ꧀ꦑꦹ ꦤ ꦱꦔ꧀ꦒꦟꦶꦏꦴꦫꦴꦩꦴ ꦨꦮꦶꦱ꧀ꦱꦤ꧀ꦠꦶ ꦤ ꦱꦔ꧀ꦒꦟꦶꦏꦫꦠꦴ ꦤ ꦱꦔ꧀ꦒꦟꦶꦏꦴꦫꦴꦩꦠꦩꦤꦸꦪꦸꦠ꧀ꦠꦴ, ꦮꦸꦢ꧀ꦣꦶꦪꦺꦮ, ꦨꦶꦏ꧀ꦑꦮꦺ, ꦨꦶꦏ꧀ꦑꦹꦤꦁ ꦥꦴꦛꦶꦏꦔ꧀ꦑꦴ, ꦤꦺꦴ ꦥꦫꦶꦲꦴꦤꦶ.

‘‘ꦪꦴꦮꦏꦷꦮꦚ꧀ꦕ, ꦨꦶꦏ꧀ꦑꦮꦺ, ꦨꦶꦏ꧀ꦑꦹ ꦤ ꦥꦴꦥꦶꦕ꧀ꦖꦴ ꦨꦮꦶꦱ꧀ꦱꦤ꧀ꦠꦶ ꦤ ꦥꦴꦥꦶꦏꦴꦤꦁ ꦆꦕ꧀ꦖꦴꦤꦁ ꦮꦱꦁ ꦒꦠꦴ, ꦮꦸꦢ꧀ꦣꦶꦪꦺꦮ, ꦨꦶꦏ꧀ꦑꦮꦺ, ꦨꦶꦏ꧀ꦑꦹꦤꦁ ꦥꦴꦛꦶꦏꦔ꧀ꦑꦴ, ꦤꦺꦴ ꦥꦫꦶꦲꦴꦤꦶ.

‘‘ꦪꦴꦮꦏꦷꦮꦚ꧀ꦕ, ꦨꦶꦏ꧀ꦑꦮꦺ, ꦨꦶꦏ꧀ꦑꦹ ꦤ ꦥꦴꦥꦩꦶꦠ꧀ꦠꦴ ꦨꦮꦶꦱ꧀ꦱꦤ꧀ꦠꦶ ꦤ ꦥꦴꦥꦱꦲꦴꦪꦴ ꦤ ꦥꦴꦥꦱꦩ꧀ꦥꦮꦔ꧀ꦏꦴ, ꦮꦸꦢ꧀ꦣꦶꦪꦺꦮ, ꦨꦶꦏ꧀ꦑꦮꦺ, ꦨꦶꦏ꧀ꦑꦹꦤꦁ ꦥꦴꦛꦶꦏꦔ꧀ꦑꦴ, ꦤꦺꦴ ꦥꦫꦶꦲꦴꦤꦶ.

‘‘ꦪꦴꦮꦏꦷꦮꦚ꧀ꦕ, ꦨꦶꦏ꧀ꦑꦮꦺ, ꦨꦶꦏ꧀ꦑꦹ ꦤ ꦎꦫꦩꦠ꧀ꦠꦏꦺꦤ ꦮꦶꦱꦺꦱꦴꦣꦶꦒꦩꦺꦤ ꦄꦤ꧀ꦠꦫꦴꦮꦺꦴꦱꦴꦤꦁ ꦄꦴꦥꦗ꧀ꦗꦶꦱ꧀ꦱꦤ꧀ꦠꦶ, ꦮꦸꦢ꧀ꦣꦶꦪꦺꦮ, ꦨꦶꦏ꧀ꦑꦮꦺ, ꦨꦶꦏ꧀ꦑꦹꦤꦁ ꦥꦴꦛꦶꦏꦔ꧀ꦑꦴ, ꦤꦺꦴ ꦥꦫꦶꦲꦴꦤꦶ.

‘‘ꦪꦴꦮꦏꦷꦮꦚ꧀ꦕ, ꦨꦶꦏ꧀ꦑꦮꦺ, ꦆꦩꦺ ꦱꦠ꧀ꦠ ꦄꦥꦫꦶꦲꦴꦤꦶꦪꦴ ꦣꦩ꧀ꦩꦴ ꦨꦶꦏ꧀ꦑꦹꦱꦸ ꦜꦱ꧀ꦱꦤ꧀ꦠꦶ, ꦆꦩꦺꦱꦸ ꦕ ꦱꦠ꧀ꦠꦱꦸ ꦄꦥꦫꦶꦲꦴꦤꦶꦪꦺꦱꦸ ꦣꦩ꧀ꦩꦺꦱꦸ ꦨꦶꦏ꧀ꦑꦹ ꦱꦤ꧀ꦢꦶꦱ꧀ꦱꦶꦱ꧀ꦱꦤ꧀ꦠꦶ, ꦮꦸꦢ꧀ꦣꦶꦪꦺꦮ, ꦨꦶꦏ꧀ꦑꦮꦺ, ꦨꦶꦏ꧀ꦑꦹꦤꦁ ꦥꦴꦛꦶꦏꦔ꧀ꦑꦴ, ꦤꦺꦴ ꦥꦫꦶꦲꦴꦤꦶ.

꧑꧓꧘. ‘‘ꦄꦥꦫꦺꦥꦶ ꦮꦺꦴ, ꦨꦶꦏ꧀ꦑꦮꦺ, ꦱꦠ꧀ꦠ ꦄꦥꦫꦶꦲꦴꦤꦶꦪꦺ ꦣꦩ꧀ꦩꦺ ꦢꦺꦱꦺꦱ꧀ꦱꦴꦩꦶ…ꦥꦺ… ‘‘ꦪꦴꦮꦏꦷꦮꦚ꧀ꦕ, ꦨꦶꦏ꧀ꦑꦮꦺ, ꦨꦶꦏ꧀ꦑꦹ ꦱꦢ꧀ꦣꦴ ꦨꦮꦶꦱ꧀ꦱꦤ꧀ꦠꦶ…ꦥꦺ… ꦲꦶꦫꦶꦩꦤꦴ ꦨꦮꦶꦱ꧀ꦱꦤ꧀ꦠꦶ… ꦎꦠ꧀ꦠꦥ꧀ꦥꦷ ꦨꦮꦶꦱ꧀ꦱꦤ꧀ꦠꦶ… ꦧꦲꦸꦱ꧀ꦱꦸꦠꦴ ꦨꦮꦶꦱ꧀ꦱꦤ꧀ꦠꦶ… ꦄꦴꦫꦢ꧀ꦣꦮꦷꦫꦶꦪꦴ ꦨꦮꦶꦱ꧀ꦱꦤ꧀ꦠꦶ… ꦈꦥꦛ꧀ꦜꦶꦠꦱ꧀ꦱꦠꦷ ꦨꦮꦶꦱ꧀ꦱꦤ꧀ꦠꦶ… ꦥꦚ꧀ꦚꦮꦤ꧀ꦠꦺꦴ ꦨꦮꦶꦱ꧀ꦱꦤ꧀ꦠꦶ, ꦮꦸꦢ꧀ꦣꦶꦪꦺꦮ, ꦨꦶꦏ꧀ꦑꦮꦺ, ꦨꦶꦏ꧀ꦑꦹꦤꦁ ꦥꦴꦛꦶꦏꦔ꧀ꦑꦴ, ꦤꦺꦴ ꦥꦫꦶꦲꦴꦤꦶ. ꦪꦴꦮꦏꦷꦮꦚ꧀ꦕ, ꦨꦶꦏ꧀ꦑꦮꦺ, ꦆꦩꦺ ꦱꦠ꧀ꦠ ꦄꦥꦫꦶꦲꦴꦤꦶꦪꦴ ꦣꦩ꧀ꦩꦴ ꦨꦶꦏ꧀ꦑꦹꦱꦸ ꦜꦱ꧀ꦱꦤ꧀ꦠꦶ, ꦆꦩꦺꦱꦸ ꦕ ꦱꦠ꧀ꦠꦱꦸ ꦄꦥꦫꦶꦲꦴꦤꦶꦪꦺꦱꦸ ꦣꦩ꧀ꦩꦺꦱꦸ ꦨꦶꦏ꧀ꦑꦹ ꦱꦤ꧀ꦢꦶꦱ꧀ꦱꦶꦱ꧀ꦱꦤ꧀ꦠꦶ, ꦮꦸꦢ꧀ꦣꦶꦪꦺꦮ, ꦨꦶꦏ꧀ꦑꦮꦺ, ꦨꦶꦏ꧀ꦑꦹꦤꦁ ꦥꦴꦛꦶꦏꦔ꧀ꦑꦴ, ꦤꦺꦴ ꦥꦫꦶꦲꦴꦤꦶ.

꧑꧓꧙. ‘‘ꦄꦥꦫꦺꦥꦶ ꦮꦺꦴ, ꦨꦶꦏ꧀ꦑꦮꦺ, ꦱꦠ꧀ꦠ ꦄꦥꦫꦶꦲꦴꦤꦶꦪꦺ ꦣꦩ꧀ꦩꦺ ꦢꦺꦱꦺꦱ꧀ꦱꦴꦩꦶ, ꦠꦁ ꦱꦸꦟꦴꦡ, ꦱꦴꦣꦸꦏꦁ ꦩꦤꦱꦶꦏꦫꦺꦴꦡ, ꦨꦴꦱꦶꦱ꧀ꦱꦴꦩꦷ’’ꦠꦶ. ‘‘ꦌꦮꦁ, ꦨꦤ꧀ꦠꦺ’’ꦠꦶ ꦑꦺꦴ ꦠꦺ ꦨꦶꦏ꧀ꦑꦹ ꦨꦒꦮꦠꦺꦴ ꦥꦕ꧀ꦕꦱ꧀ꦱꦺꦴꦱꦸꦁ. ꦨꦒꦮꦴ ꦌꦠꦢꦮꦺꦴꦕ –

‘‘ꦪꦴꦮꦏꦷꦮꦚ꧀ꦕ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦱꦠꦶꦱꦩ꧀ꦧꦺꦴꦗ꧀ꦙꦔ꧀ꦒꦁ ꦨꦴꦮꦺꦱ꧀ꦱꦤ꧀ꦠꦶ…ꦥꦺ… ꦣꦩ꧀ꦩꦮꦶꦕꦪꦱꦩ꧀ꦧꦺꦴꦗ꧀ꦙꦔ꧀ꦒꦁ ꦨꦴꦮꦺꦱ꧀ꦱꦤ꧀ꦠꦶ… ꦮꦷꦫꦶꦪꦱꦩ꧀ꦧꦺꦴꦗ꧀ꦙꦔ꧀ꦒꦁ ꦨꦴꦮꦺꦱ꧀ꦱꦤ꧀ꦠꦶ… ꦥꦷꦠꦶꦱꦩ꧀ꦧꦺꦴꦗ꧀ꦙꦔ꧀ꦒꦁ ꦨꦴꦮꦺꦱ꧀ꦱꦤ꧀ꦠꦶ… ꦥꦱ꧀ꦱꦢ꧀ꦣꦶꦱꦩ꧀ꦧꦺꦴꦗ꧀ꦙꦔ꧀ꦒꦁ ꦨꦴꦮꦺꦱ꧀ꦱꦤ꧀ꦠꦶ… ꦱꦩꦴꦣꦶꦱꦩ꧀ꦧꦺꦴꦗ꧀ꦙꦔ꧀ꦒꦁ ꦨꦴꦮꦺꦱ꧀ꦱꦤ꧀ꦠꦶ… ꦈꦥꦺꦏ꧀ꦑꦴꦱꦩ꧀ꦧꦺꦴꦗ꧀ꦙꦔ꧀ꦒꦁ ꦨꦴꦮꦺꦱ꧀ꦱꦤ꧀ꦠꦶ, ꦮꦸꦢ꧀ꦣꦶꦪꦺꦮ, ꦨꦶꦏ꧀ꦑꦮꦺ, ꦨꦶꦏ꧀ꦑꦹꦤꦁ ꦥꦴꦛꦶꦏꦔ꧀ꦑꦴ, ꦤꦺꦴ ꦥꦫꦶꦲꦴꦤꦶ.

‘‘ꦪꦴꦮꦏꦷꦮꦚ꧀ꦕ, ꦨꦶꦏ꧀ꦑꦮꦺ, ꦆꦩꦺ ꦱꦠ꧀ꦠ ꦄꦥꦫꦶꦲꦴꦤꦶꦪꦴ ꦣꦩ꧀ꦩꦴ ꦨꦶꦏ꧀ꦑꦹꦱꦸ ꦜꦱ꧀ꦱꦤ꧀ꦠꦶ, ꦆꦩꦺꦱꦸ ꦕ ꦱꦠ꧀ꦠꦱꦸ ꦄꦥꦫꦶꦲꦴꦤꦶꦪꦺꦱꦸ ꦣꦩ꧀ꦩꦺꦱꦸ ꦨꦶꦏ꧀ꦑꦹ ꦱꦤ꧀ꦢꦶꦱ꧀ꦱꦶꦱ꧀ꦱꦤ꧀ꦠꦶ, ꦮꦸꦢ꧀ꦣꦶꦪꦺꦮ, ꦨꦶꦏ꧀ꦑꦮꦺ, ꦨꦶꦏ꧀ꦑꦹꦤꦁ ꦥꦴꦛꦶꦏꦔ꧀ꦑꦴ ꦤꦺꦴ ꦥꦫꦶꦲꦴꦤꦶ.

꧑꧔꧐. ‘‘ꦄꦥꦫꦺꦥꦶ ꦮꦺꦴ, ꦨꦶꦏ꧀ꦑꦮꦺ, ꦱꦠ꧀ꦠ ꦄꦥꦫꦶꦲꦴꦤꦶꦪꦺ ꦣꦩ꧀ꦩꦺ ꦢꦺꦱꦺꦱ꧀ꦱꦴꦩꦶ, ꦠꦁ ꦱꦸꦟꦴꦡ, ꦱꦴꦣꦸꦏꦁ ꦩꦤꦱꦶꦏꦫꦺꦴꦡ, ꦨꦴꦱꦶꦱ꧀ꦱꦴꦩꦷ’’ꦠꦶ. ‘‘ꦌꦮꦁ, ꦨꦤ꧀ꦠꦺ’’ꦠꦶ ꦑꦺꦴ ꦠꦺ ꦨꦶꦏ꧀ꦑꦹ ꦨꦒꦮꦠꦺꦴ ꦥꦕ꧀ꦕꦱ꧀ꦱꦺꦴꦱꦸꦁ. ꦨꦒꦮꦴ ꦌꦠꦢꦮꦺꦴꦕ –

‘‘ꦪꦴꦮꦏꦷꦮꦚ꧀ꦕ, ꦨꦶꦏ꧀ꦑꦮꦺ, ꦨꦶꦏ꧀ꦑꦹ ꦄꦤꦶꦕ꧀ꦕꦱꦚ꧀ꦚꦁ ꦨꦴꦮꦺꦱ꧀ꦱꦤ꧀ꦠꦶ…ꦥꦺ… ꦄꦤꦠ꧀ꦠꦱꦚ꧀ꦚꦁ ꦨꦴꦮꦺꦱ꧀ꦱꦤ꧀ꦠꦶ… ꦄꦱꦸꦨꦱꦚ꧀ꦚꦁ ꦨꦴꦮꦺꦱ꧀ꦱꦤ꧀ꦠꦶ… ꦄꦴꦢꦷꦤꦮꦱꦚ꧀ꦚꦁ ꦨꦴꦮꦺꦱ꧀ꦱꦤ꧀ꦠꦶ… ꦥꦲꦴꦤꦱꦚ꧀ꦚꦁ ꦨꦴꦮꦺꦱ꧀ꦱꦤ꧀ꦠꦶ… ꦮꦶꦫꦴꦒꦱꦚ꧀ꦚꦁ ꦨꦴꦮꦺꦱ꧀ꦱꦤ꧀ꦠꦶ… ꦤꦶꦫꦺꦴꦣꦱꦚ꧀ꦚꦁ ꦨꦴꦮꦺꦱ꧀ꦱꦤ꧀ꦠꦶ, ꦮꦸꦢ꧀ꦣꦶꦪꦺꦮ, ꦨꦶꦏ꧀ꦑꦮꦺ, ꦨꦶꦏ꧀ꦑꦹꦤꦁ ꦥꦴꦛꦶꦏꦔ꧀ꦑꦴ, ꦤꦺꦴ ꦥꦫꦶꦲꦴꦤꦶ.

‘‘ꦪꦴꦮꦏꦷꦮꦚ꧀ꦕ, ꦨꦶꦏ꧀ꦑꦮꦺ, ꦆꦩꦺ ꦱꦠ꧀ꦠ ꦄꦥꦫꦶꦲꦴꦤꦶꦪꦴ ꦣꦩ꧀ꦩꦴ ꦨꦶꦏ꧀ꦑꦹꦱꦸ ꦜꦱ꧀ꦱꦤ꧀ꦠꦶ, ꦆꦩꦺꦱꦸ ꦕ ꦱꦠ꧀ꦠꦱꦸ ꦄꦥꦫꦶꦲꦴꦤꦶꦪꦺꦱꦸ ꦣꦩ꧀ꦩꦺꦱꦸ ꦨꦶꦏ꧀ꦑꦹ ꦱꦤ꧀ꦢꦶꦱ꧀ꦱꦶꦱ꧀ꦱꦤ꧀ꦠꦶ, ꦮꦸꦢ꧀ꦣꦶꦪꦺꦮ, ꦨꦶꦏ꧀ꦑꦮꦺ, ꦨꦶꦏ꧀ꦑꦹꦤꦁ ꦥꦴꦛꦶꦏꦔ꧀ꦑꦴ, ꦤꦺꦴ ꦥꦫꦶꦲꦴꦤꦶ.

꧑꧔꧑. ‘‘ꦖ, ꦮꦺꦴ ꦨꦶꦏ꧀ꦑꦮꦺ, ꦄꦥꦫꦶꦲꦴꦤꦶꦪꦺ ꦣꦩ꧀ꦩꦺ ꦢꦺꦱꦺꦱ꧀ꦱꦴꦩꦶ, ꦠꦁ ꦱꦸꦟꦴꦡ, ꦱꦴꦣꦸꦏꦁ ꦩꦤꦱꦶꦏꦫꦺꦴꦡ, ꦨꦴꦱꦶꦱ꧀ꦱꦴꦩꦷ’’ꦠꦶ. ‘‘ꦌꦮꦁ, ꦨꦤ꧀ꦠꦺ’’ꦠꦶ ꦑꦺꦴ ꦠꦺ ꦨꦶꦏ꧀ꦑꦹ ꦨꦒꦮꦠꦺꦴ ꦥꦕ꧀ꦕꦱ꧀ꦱꦺꦴꦱꦸꦁ. ꦨꦒꦮꦴ ꦌꦠꦢꦮꦺꦴꦕ –

‘‘ꦪꦴꦮꦏꦷꦮꦚ꧀ꦕ, ꦨꦶꦏ꧀ꦑꦮꦺ, ꦨꦶꦏ꧀ꦑꦹ ꦩꦺꦠ꧀ꦠꦁ ꦏꦴꦪꦏꦩ꧀ꦩꦁ ꦥꦕ꧀ꦕꦸꦥꦛ꧀ꦜꦴꦥꦺꦱ꧀ꦱꦤ꧀ꦠꦶ ꦱꦧ꧀ꦫꦲ꧀ꦩꦕꦴꦫꦷꦱꦸ ꦄꦴꦮꦶ ꦕꦺꦮ ꦫꦲꦺꦴ ꦕ, ꦮꦸꦢ꧀ꦣꦶꦪꦺꦮ, ꦨꦶꦏ꧀ꦑꦮꦺ, ꦨꦶꦏ꧀ꦑꦹꦤꦁ ꦥꦴꦛꦶꦏꦔ꧀ꦑꦴ, ꦤꦺꦴ ꦥꦫꦶꦲꦴꦤꦶ.

‘‘ꦪꦴꦮꦏꦷꦮꦚ꧀ꦕ, ꦨꦶꦏ꧀ꦑꦮꦺ, ꦨꦶꦏ꧀ꦑꦹ ꦩꦺꦠ꧀ꦠꦁ ꦮꦕꦷꦏꦩ꧀ꦩꦁ ꦥꦕ꧀ꦕꦸꦥꦛ꧀ꦜꦴꦥꦺꦱ꧀ꦱꦤ꧀ꦠꦶ …ꦥꦺ… ꦩꦺꦠ꧀ꦠꦁ ꦩꦤꦺꦴꦏꦩ꧀ꦩꦁ ꦥꦕ꧀ꦕꦸꦥꦛ꧀ꦜꦴꦥꦺꦱ꧀ꦱꦤ꧀ꦠꦶ ꦱꦧ꧀ꦫꦲ꧀ꦩꦕꦴꦫꦷꦱꦸ ꦄꦴꦮꦶ ꦕꦺꦮ ꦫꦲꦺꦴ ꦕ, ꦮꦸꦢ꧀ꦣꦶꦪꦺꦮ, ꦨꦶꦏ꧀ꦑꦮꦺ, ꦨꦶꦏ꧀ꦑꦹꦤꦁ ꦥꦴꦛꦶꦏꦔ꧀ꦑꦴ, ꦤꦺꦴ ꦥꦫꦶꦲꦴꦤꦶ.

‘‘ꦪꦴꦮꦏꦷꦮꦚ꧀ꦕ, ꦨꦶꦏ꧀ꦑꦮꦺ, ꦨꦶꦏ꧀ꦑꦹ, ꦪꦺ ꦠꦺ ꦭꦴꦨꦴ ꦣꦩ꧀ꦩꦶꦏꦴ ꦣꦩ꧀ꦩꦭꦢ꧀ꦣꦴ ꦄꦤ꧀ꦠꦩꦱꦺꦴ ꦥꦠ꧀ꦠꦥꦫꦶꦪꦴꦥꦤ꧀ꦤꦩꦠ꧀ꦠꦩ꧀ꦥꦶ ꦠꦡꦴꦫꦹꦥꦺꦲꦶ ꦭꦴꦨꦺꦲꦶ ꦄꦥ꧀ꦥꦛꦶꦮꦶꦨꦠ꧀ꦠꦨꦺꦴꦒꦷ ꦨꦮꦶꦱ꧀ꦱꦤ꧀ꦠꦶ ꦱꦷꦭꦮꦤ꧀ꦠꦺꦲꦶ ꦱꦧ꧀ꦫꦲ꧀ꦩꦕꦴꦫꦷꦲꦶ ꦱꦴꦣꦴꦫꦟꦨꦺꦴꦒꦷ, ꦮꦸꦢ꧀ꦣꦶꦪꦺꦮ, ꦨꦶꦏ꧀ꦑꦮꦺ, ꦨꦶꦏ꧀ꦑꦹꦤꦁ ꦥꦴꦛꦶꦏꦔ꧀ꦑꦴ, ꦤꦺꦴ ꦥꦫꦶꦲꦴꦤꦶ.

‘‘ꦪꦴꦮꦏꦷꦮꦚ꧀ꦕ, ꦨꦶꦏ꧀ꦑꦮꦺ, ꦨꦶꦏ꧀ꦑꦹ ꦪꦴꦤꦶ ꦏꦴꦤꦶ ꦱꦷꦭꦴꦤꦶ ꦄꦑꦟ꧀ꦝꦴꦤꦶ ꦄꦕ꧀ꦖꦶꦢ꧀ꦢꦴꦤꦶ ꦄꦱꦧꦭꦴꦤꦶ ꦄꦏꦩ꧀ꦩꦴꦱꦴꦤꦶ ꦨꦸꦗꦶꦱ꧀ꦱꦴꦤꦶ ꦮꦶꦚ꧀ꦚꦹꦥꦱꦠ꧀ꦡꦴꦤꦶ [ꦮꦶꦚ꧀ꦚꦸꦥ꧀ꦥꦱꦠ꧀ꦡꦴꦤꦶ (ꦱꦷ.)] ꦄꦥꦫꦴꦩꦛ꧀ꦜꦴꦤꦶ ꦱꦩꦴꦣꦶꦱꦁꦮꦠ꧀ꦠꦤꦶꦏꦴꦤꦶ ꦠꦡꦴꦫꦹꦥꦺꦱꦸ ꦱꦷꦭꦺꦱꦸ ꦱꦷꦭꦱꦴꦩꦚ꧀ꦚꦒꦠꦴ ꦮꦶꦲꦫꦶꦱ꧀ꦱꦤ꧀ꦠꦶ ꦱꦧ꧀ꦫꦲ꧀ꦩꦕꦴꦫꦷꦲꦶ ꦄꦴꦮꦶ ꦕꦺꦮ ꦫꦲꦺꦴ ꦕ, ꦮꦸꦢ꧀ꦣꦶꦪꦺꦮ, ꦨꦶꦏ꧀ꦑꦮꦺ, ꦨꦶꦏ꧀ꦑꦹꦤꦁ ꦥꦴꦛꦶꦏꦔ꧀ꦑꦴ, ꦤꦺꦴ ꦥꦫꦶꦲꦴꦤꦶ.

‘‘ꦪꦴꦮꦏꦷꦮꦚ꧀ꦕ, ꦨꦶꦏ꧀ꦑꦮꦺ, ꦨꦶꦏ꧀ꦑꦹ ꦪꦴꦪꦁ ꦢꦶꦛ꧀ꦜꦶ ꦄꦫꦶꦪꦴ ꦤꦶꦪ꧀ꦪꦴꦤꦶꦏꦴ, ꦤꦶꦪ꧀ꦪꦴꦠꦶ ꦠꦏ꧀ꦏꦫꦱ꧀ꦱ ꦱꦩ꧀ꦩꦴ ꦢꦸꦏ꧀ꦑꦏ꧀ꦑꦪꦴꦪ, ꦠꦡꦴꦫꦹꦥꦴꦪ ꦢꦶꦛ꧀ꦜꦶꦪꦴ ꦢꦶꦛ꧀ꦜꦶꦱꦴꦩꦚ꧀ꦚꦒꦠꦴ ꦮꦶꦲꦫꦶꦱ꧀ꦱꦤ꧀ꦠꦶ ꦱꦧ꧀ꦫꦲ꧀ꦩꦕꦴꦫꦷꦲꦶ ꦄꦴꦮꦶ ꦕꦺꦮ ꦫꦲꦺꦴ ꦕ, ꦮꦸꦢ꧀ꦣꦶꦪꦺꦮ, ꦨꦶꦏ꧀ꦑꦮꦺ, ꦨꦶꦏ꧀ꦑꦹꦤꦁ ꦥꦴꦛꦶꦏꦔ꧀ꦑꦴ, ꦤꦺꦴ ꦥꦫꦶꦲꦴꦤꦶ.

‘‘ꦪꦴꦮꦏꦷꦮꦚ꧀ꦕ, ꦨꦶꦏ꧀ꦑꦮꦺ, ꦆꦩꦺ ꦖ ꦄꦥꦫꦶꦲꦴꦤꦶꦪꦴ ꦣꦩ꧀ꦩꦴ ꦨꦶꦏ꧀ꦑꦹꦱꦸ ꦜꦱ꧀ꦱꦤ꧀ꦠꦶ, ꦆꦩꦺꦱꦸ ꦕ ꦖꦱꦸ ꦄꦥꦫꦶꦲꦴꦤꦶꦪꦺꦱꦸ ꦣꦩ꧀ꦩꦺꦱꦸ ꦨꦶꦏ꧀ꦑꦹ ꦱꦤ꧀ꦢꦶꦱ꧀ꦱꦶꦱ꧀ꦱꦤ꧀ꦠꦶ, ꦮꦸꦢ꧀ꦣꦶꦪꦺꦮ, ꦨꦶꦏ꧀ꦑꦮꦺ, ꦨꦶꦏ꧀ꦑꦹꦤꦁ ꦥꦴꦛꦶꦏꦔ꧀ꦑꦴ, ꦤꦺꦴ ꦥꦫꦶꦲꦴꦤꦷ’’ꦠꦶ.

꧑꧔꧒. ꦠꦠ꧀ꦫ ꦱꦸꦢꦁ ꦨꦒꦮꦴ ꦫꦴꦗꦒꦲꦺ ꦮꦶꦲꦫꦤ꧀ꦠꦺꦴ ꦒꦶꦗ꧀ꦙꦏꦹꦛꦺ ꦥꦧ꧀ꦧꦠꦺ ꦌꦠꦢꦺꦮ ꦧꦲꦸꦭꦁ ꦨꦶꦏ꧀ꦑꦹꦤꦁ ꦣꦩ꧀ꦩꦶꦁ ꦏꦡꦁ ꦏꦫꦺꦴꦠꦶ – ‘‘ꦆꦠꦶ ꦱꦷꦭꦁ, ꦆꦠꦶ ꦱꦩꦴꦣꦶ, ꦆꦠꦶ ꦥꦚ꧀ꦚꦴ. ꦱꦷꦭꦥꦫꦶꦨꦴꦮꦶꦠꦺꦴ ꦱꦩꦴꦣꦶ ꦩꦲꦥ꧀ꦦꦭꦺꦴ ꦲꦺꦴꦠꦶ ꦩꦲꦴꦤꦶꦱꦁꦱꦺꦴ. ꦱꦩꦴꦣꦶꦥꦫꦶꦨꦴꦮꦶꦠꦴ ꦥꦚ꧀ꦚꦴ ꦩꦲꦥ꧀ꦦꦭꦴ ꦲꦺꦴꦠꦶ ꦩꦲꦴꦤꦶꦱꦁꦱꦴ. ꦥꦚ꧀ꦚꦴꦥꦫꦶꦨꦴꦮꦶꦠꦁ ꦕꦶꦠ꧀ꦠꦁ ꦱꦩ꧀ꦩꦢꦺꦮ ꦄꦴꦱꦮꦺꦲꦶ ꦮꦶꦩꦸꦕ꧀ꦕꦠꦶ, ꦱꦺꦪ꧀ꦪꦡꦶꦢꦁ – ꦏꦴꦩꦴꦱꦮꦴ, ꦨꦮꦴꦱꦮꦴ, ꦄꦮꦶꦗ꧀ꦗꦴꦱꦮꦴ’’ꦠꦶ.

꧑꧔꧓. ꦄꦡ ꦑꦺꦴ ꦨꦒꦮꦴ ꦫꦴꦗꦒꦲꦺ ꦪꦡꦴꦨꦶꦫꦤ꧀ꦠꦁ ꦮꦶꦲꦫꦶꦠ꧀ꦮꦴ ꦄꦴꦪꦱ꧀ꦩꦤ꧀ꦠꦁ ꦄꦴꦤꦤ꧀ꦢꦁ ꦄꦴꦩꦤ꧀ꦠꦺꦱꦶ – ‘‘ꦄꦴꦪꦴꦩꦴꦤꦤ꧀ꦢ, ꦪꦺꦤ ꦄꦩ꧀ꦧꦭꦛ꧀ꦜꦶꦏꦴ ꦠꦺꦤꦸꦥꦱꦔ꧀ꦏꦩꦶꦱ꧀ꦱꦴꦩꦴ’’ꦠꦶ. ‘‘ꦌꦮꦁ, ꦨꦤ꧀ꦠꦺ’’ꦠꦶ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦨꦒꦮꦠꦺꦴ ꦥꦕ꧀ꦕꦱ꧀ꦱꦺꦴꦱꦶ. ꦄꦡ ꦑꦺꦴ ꦨꦒꦮꦴ ꦩꦲꦠꦴ ꦨꦶꦏ꧀ꦑꦸꦱꦔ꧀ꦓꦺꦤ ꦱꦢ꧀ꦣꦶꦁ ꦪꦺꦤ ꦄꦩ꧀ꦧꦭꦛ꧀ꦜꦶꦏꦴ ꦠꦢꦮꦱꦫꦶ. ꦠꦠ꧀ꦫ ꦱꦸꦢꦁ ꦨꦒꦮꦴ ꦄꦩ꧀ꦧꦭꦛ꧀ꦜꦶꦏꦴꦪꦁ ꦮꦶꦲꦫꦠꦶ ꦫꦴꦗꦴꦒꦴꦫꦏꦺ. ꦠꦠ꧀ꦫꦴꦥꦶ ꦱꦸꦢꦁ ꦨꦒꦮꦴ ꦄꦩ꧀ꦧꦭꦛ꧀ꦜꦶꦏꦴꦪꦁ ꦮꦶꦲꦫꦤ꧀ꦠꦺꦴ ꦫꦴꦗꦴꦒꦴꦫꦏꦺ ꦌꦠꦢꦺꦮ ꦧꦲꦸꦭꦁ ꦨꦶꦏ꧀ꦑꦹꦤꦁ ꦣꦩ꧀ꦩꦶꦁ ꦏꦡꦁ ꦏꦫꦺꦴꦠꦶ – ‘‘ꦆꦠꦶ ꦱꦷꦭꦁ ꦆꦠꦶ ꦱꦩꦴꦣꦶ ꦆꦠꦶ ꦥꦚ꧀ꦚꦴ. ꦱꦷꦭꦥꦫꦶꦨꦴꦮꦶꦠꦺꦴ ꦱꦩꦴꦣꦶ ꦩꦲꦥ꧀ꦦꦭꦺꦴ ꦲꦺꦴꦠꦶ ꦩꦲꦴꦤꦶꦱꦁꦱꦺꦴ. ꦱꦩꦴꦣꦶꦥꦫꦶꦨꦴꦮꦶꦠꦴ ꦥꦚ꧀ꦚꦴ ꦩꦲꦥ꧀ꦦꦭꦴ ꦲꦺꦴꦠꦶ ꦩꦲꦴꦤꦶꦱꦁꦱꦴ. ꦥꦚ꧀ꦚꦴꦥꦫꦶꦨꦴꦮꦶꦠꦁ ꦕꦶꦠ꧀ꦠꦁ ꦱꦩ꧀ꦩꦢꦺꦮ ꦄꦴꦱꦮꦺꦲꦶ ꦮꦶꦩꦸꦕ꧀ꦕꦠꦶ, ꦱꦺꦪ꧀ꦪꦡꦶꦢꦁ – ꦏꦴꦩꦴꦱꦮꦴ, ꦨꦮꦴꦱꦮꦴ, ꦄꦮꦶꦗ꧀ꦗꦴꦱꦮꦴ’’ꦠꦶ.

꧑꧔꧔. ꦄꦡ ꦑꦺꦴ ꦨꦒꦮꦴ ꦄꦩ꧀ꦧꦭꦛ꧀ꦜꦶꦏꦴꦪꦁ ꦪꦡꦴꦨꦶꦫꦤ꧀ꦠꦁ ꦮꦶꦲꦫꦶꦠ꧀ꦮꦴ ꦄꦴꦪꦱ꧀ꦩꦤ꧀ꦠꦁ ꦄꦴꦤꦤ꧀ꦢꦁ ꦄꦴꦩꦤ꧀ꦠꦺꦱꦶ – ‘‘ꦄꦴꦪꦴꦩꦴꦤꦤ꧀ꦢ, ꦪꦺꦤ ꦤꦴꦭ꦳ꦤ꧀ꦢꦴ ꦠꦺꦤꦸꦥꦱꦔ꧀ꦏꦩꦶꦱ꧀ꦱꦴꦩꦴ’’ꦠꦶ. ‘‘ꦌꦮꦁ, ꦨꦤ꧀ꦠꦺ’’ꦠꦶ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦨꦒꦮꦠꦺꦴ ꦥꦕ꧀ꦕꦱ꧀ꦱꦺꦴꦱꦶ. ꦄꦡ ꦑꦺꦴ ꦨꦒꦮꦴ ꦩꦲꦠꦴ ꦨꦶꦏ꧀ꦑꦸꦱꦔ꧀ꦓꦺꦤ ꦱꦢ꧀ꦣꦶꦁ ꦪꦺꦤ ꦤꦴꦭ꦳ꦤ꧀ꦢꦴ ꦠꦢꦮꦱꦫꦶ, ꦠꦠ꧀ꦫ ꦱꦸꦢꦁ ꦨꦒꦮꦴ ꦤꦴꦭ꦳ꦤ꧀ꦢꦴꦪꦁ ꦮꦶꦲꦫꦠꦶ ꦥꦴꦮꦴꦫꦶꦏꦩ꧀ꦧꦮꦤꦺ.

ꦱꦴꦫꦶꦥꦸꦠ꧀ꦠꦱꦷꦲꦤꦴꦢꦺꦴ

꧑꧔꧕. ꦄꦡ ꦑꦺꦴ ꦄꦴꦪꦱ꧀ꦩꦴ ꦱꦴꦫꦶꦥꦸꦠ꧀ꦠꦺꦴ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦺꦴ ꦑꦺꦴ ꦄꦴꦪꦱ꧀ꦩꦴ ꦱꦴꦫꦶꦥꦸꦠ꧀ꦠꦺꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦌꦮꦁ ꦥꦱꦤ꧀ꦤꦺꦴ ꦄꦲꦁ, ꦨꦤ꧀ꦠꦺ, ꦨꦒꦮꦠꦶ; ꦤ ꦕꦴꦲꦸ ꦤ ꦕ ꦨꦮꦶꦱ꧀ꦱꦠꦶ ꦤ ꦕꦺꦠꦫꦲꦶ ꦮꦶꦗ꧀ꦗꦠꦶ ꦄꦚ꧀ꦚꦺꦴ ꦱꦩꦟꦺꦴ ꦮꦴ ꦧ꧀ꦫꦴꦲ꧀ꦩꦟꦺꦴ ꦮꦴ ꦨꦒꦮꦠꦴ ꦨꦶꦪ꧀ꦪꦺꦴꦨꦶꦚ꧀ꦚꦠꦫꦺꦴ ꦪꦢꦶꦢꦁ ꦱꦩ꧀ꦧꦺꦴꦣꦶꦪ’’ꦤ꧀ꦠꦶ. ‘‘ꦈꦭ꦳ꦴꦫꦴ ꦑꦺꦴ ꦠꦺ ꦄꦪꦁ, ꦱꦴꦫꦶꦥꦸꦠ꧀ꦠ, ꦄꦴꦱꦨꦷ ꦮꦴꦕꦴ [ꦄꦴꦱꦨꦶꦮꦴꦕꦴ (ꦱ꧀ꦪꦴ.)] ꦨꦴꦱꦶꦠꦴ, ꦌꦏꦁꦱꦺꦴ ꦒꦲꦶꦠꦺꦴ, ꦱꦷꦲꦤꦴꦢꦺꦴ ꦤꦢꦶꦠꦺꦴ – ‘ꦌꦮꦁꦥꦱꦤ꧀ꦤꦺꦴ ꦄꦲꦁ, ꦨꦤ꧀ꦠꦺ, ꦨꦒꦮꦠꦶ; ꦤ ꦕꦴꦲꦸ ꦤ ꦕ ꦨꦮꦶꦱ꧀ꦱꦠꦶ ꦤ ꦕꦺꦠꦫꦲꦶ ꦮꦶꦗ꧀ꦗꦠꦶ ꦄꦚ꧀ꦚꦺꦴ ꦱꦩꦟꦺꦴ ꦮꦴ ꦧ꧀ꦫꦴꦲ꧀ꦩꦟꦺꦴ ꦮꦴ ꦨꦒꦮꦠꦴ ꦨꦶꦪ꧀ꦪꦺꦴꦨꦶꦚ꧀ꦚꦠꦫꦺꦴ ꦪꦢꦶꦢꦁ ꦱꦩ꧀ꦧꦺꦴꦣꦶꦪ’ꦤ꧀ꦠꦶ.

‘‘ꦏꦶꦁ ꦠꦺ [ꦏꦶꦁ ꦤꦸ (ꦱ꧀ꦪꦴ. ꦥꦷ. ꦏ.)], ꦱꦴꦫꦶꦥꦸꦠ꧀ꦠ, ꦪꦺ ꦠꦺ ꦄꦲꦺꦱꦸꦁ ꦄꦠꦷꦠꦩꦢ꧀ꦣꦴꦤꦁ ꦄꦫꦲꦤ꧀ꦠꦺꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦴ, ꦱꦧ꧀ꦧꦺ ꦠꦺ ꦨꦒꦮꦤ꧀ꦠꦺꦴ ꦕꦺꦠꦱꦴ ꦕꦺꦠꦺꦴ ꦥꦫꦶꦕ꧀ꦕ ꦮꦶꦢꦶꦠꦴ – ‘ꦌꦮꦁꦱꦷꦭꦴ ꦠꦺ ꦨꦒꦮꦤ꧀ꦠꦺꦴ ꦄꦲꦺꦱꦸꦁ ꦆꦠꦶꦥꦶ, ꦌꦮꦁꦣꦩ꧀ꦩꦴ ꦌꦮꦁꦥꦚ꧀ꦚꦴ ꦌꦮꦁꦮꦶꦲꦴꦫꦷ ꦌꦮꦁꦮꦶꦩꦸꦠ꧀ꦠꦴ ꦠꦺ ꦨꦒꦮꦤ꧀ꦠꦺꦴ ꦄꦲꦺꦱꦸꦁ ꦆꦠꦶꦥꦷ’’’ꦠꦶ? ‘‘ꦤꦺꦴ ꦲꦺꦠꦁ, ꦨꦤ꧀ꦠꦺ’’.

‘‘ꦏꦶꦁ ꦥꦤ ꦠꦺ [ꦏꦶꦁ ꦥꦤ (ꦱ꧀ꦪꦴ. ꦥꦷ. ꦏ.)], ꦱꦴꦫꦶꦥꦸꦠ꧀ꦠ, ꦪꦺ ꦠꦺ ꦨꦮꦶꦱ꧀ꦱꦤ꧀ꦠꦶ ꦄꦤꦴꦒꦠꦩꦢ꧀ꦣꦴꦤꦁ ꦄꦫꦲꦤ꧀ꦠꦺꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦴ, ꦱꦧ꧀ꦧꦺ ꦠꦺ ꦨꦒꦮꦤ꧀ꦠꦺꦴ ꦕꦺꦠꦱꦴ ꦕꦺꦠꦺꦴ ꦥꦫꦶꦕ꧀ꦕ ꦮꦶꦢꦶꦠꦴ – ‘ꦌꦮꦁꦱꦷꦭꦴ ꦠꦺ ꦨꦒꦮꦤ꧀ꦠꦺꦴ ꦨꦮꦶꦱ꧀ꦱꦤ꧀ꦠꦶ ꦆꦠꦶꦥꦶ, ꦌꦮꦁꦣꦩ꧀ꦩꦴ ꦌꦮꦁꦥꦚ꧀ꦚꦴ ꦌꦮꦁꦮꦶꦲꦴꦫꦷ ꦌꦮꦁꦮꦶꦩꦸꦠ꧀ꦠꦴ ꦠꦺ ꦨꦒꦮꦤ꧀ꦠꦺꦴ ꦨꦮꦶꦱ꧀ꦱꦤ꧀ꦠꦶ ꦆꦠꦶꦥꦷ’’’ꦠꦶ? ‘‘ꦤꦺꦴ ꦲꦺꦠꦁ, ꦨꦤ꧀ꦠꦺ’’.

‘‘ꦏꦶꦁ ꦥꦤ ꦠꦺ, ꦱꦴꦫꦶꦥꦸꦠ꧀ꦠ, ꦄꦲꦁ ꦌꦠꦫꦲꦶ ꦄꦫꦲꦁ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ ꦕꦺꦠꦱꦴ ꦕꦺꦠꦺꦴ ꦥꦫꦶꦕ꧀ꦕ ꦮꦶꦢꦶꦠꦺꦴ – ‘‘ꦌꦮꦁꦱꦷꦭꦺꦴ ꦨꦒꦮꦴ ꦆꦠꦶꦥꦶ, ꦌꦮꦁꦣꦩ꧀ꦩꦺꦴ ꦌꦮꦁꦥꦚ꧀ꦚꦺꦴ ꦌꦮꦁꦮꦶꦲꦴꦫꦷ ꦌꦮꦁꦮꦶꦩꦸꦠ꧀ꦠꦺꦴ ꦨꦒꦮꦴ ꦆꦠꦶꦥꦷ’’’ꦠꦶ? ‘‘ꦤꦺꦴ ꦲꦺꦠꦁ, ꦨꦤ꧀ꦠꦺ’’.

‘‘ꦌꦠ꧀ꦡ ꦕ ꦲꦶ ꦠꦺ, ꦱꦴꦫꦶꦥꦸꦠ꧀ꦠ, ꦄꦠꦷꦠꦴꦤꦴꦒꦠꦥꦕ꧀ꦕꦸꦥ꧀ꦥꦤ꧀ꦤꦺꦱꦸ ꦄꦫꦲꦤ꧀ꦠꦺꦱꦸ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦱꦸ ꦕꦺꦠꦺꦴꦥꦫꦶꦪꦚꦴꦟꦁ [ꦕꦺꦠꦺꦴꦥꦫꦶꦚ꧀ꦚꦴꦪꦚꦴꦟꦁ (ꦱ꧀ꦪꦴ.), ꦕꦺꦠꦱꦴ ꦕꦺꦠꦺꦴꦥꦫꦶꦪꦴꦪꦚꦴꦟꦁ (ꦏ.)] ꦤꦠ꧀ꦡꦶ. ꦄꦡ ꦏꦶꦚ꧀ꦕꦫꦲꦶ ꦠꦺ ꦄꦪꦁ, ꦱꦴꦫꦶꦥꦸꦠ꧀ꦠ, ꦈꦭ꦳ꦴꦫꦴ ꦄꦴꦱꦨꦷ ꦮꦴꦕꦴ ꦨꦴꦱꦶꦠꦴ, ꦌꦏꦁꦱꦺꦴ ꦒꦲꦶꦠꦺꦴ, ꦱꦷꦲꦤꦴꦢꦺꦴ ꦤꦢꦶꦠꦺꦴ – ‘ꦌꦮꦁꦥꦱꦤ꧀ꦤꦺꦴ ꦄꦲꦁ, ꦨꦤ꧀ꦠꦺ, ꦨꦒꦮꦠꦶ; ꦤ ꦕꦴꦲꦸ ꦤ ꦕ ꦨꦮꦶꦱ꧀ꦱꦠꦶ ꦤ ꦕꦺꦠꦫꦲꦶ ꦮꦶꦗ꧀ꦗꦠꦶ ꦄꦚ꧀ꦚꦺꦴ ꦱꦩꦟꦺꦴ ꦮꦴ ꦧ꧀ꦫꦴꦲ꧀ꦩꦟꦺꦴ ꦮꦴ ꦨꦒꦮꦠꦴ ꦨꦶꦪ꧀ꦪꦺꦴꦨꦶꦚ꧀ꦚꦠꦫꦺꦴ ꦪꦢꦶꦢꦁ ꦱꦩ꧀ꦧꦺꦴꦣꦶꦪ’’’ꦤ꧀ꦠꦶ?

꧑꧔꧖. ‘‘ꦤ ꦑꦺꦴ ꦩꦺ, ꦨꦤ꧀ꦠꦺ, ꦄꦠꦷꦠꦴꦤꦴꦒꦠꦥꦕ꧀ꦕꦸꦥ꧀ꦥꦤ꧀ꦤꦺꦱꦸ ꦄꦫꦲꦤ꧀ꦠꦺꦱꦸ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦱꦸ ꦕꦺꦠꦺꦴꦥꦫꦶꦪꦚꦴꦟꦁ ꦄꦠ꧀ꦡꦶ, ꦄꦥꦶ ꦕ ꦩꦺ ꦣꦩ꧀ꦩꦤ꧀ꦮꦪꦺꦴ ꦮꦶꦢꦶꦠꦺꦴ. ꦱꦺꦪ꧀ꦪꦡꦴꦥꦶ, ꦨꦤ꧀ꦠꦺ, ꦫꦚ꧀ꦚꦺꦴ ꦥꦕ꧀ꦕꦤ꧀ꦠꦶꦩꦁ ꦤꦒꦫꦁ ꦢꦭ꦳꧀ꦲꦸꦢ꧀ꦣꦴꦥꦁ ꦢꦭ꦳꧀ꦲꦥꦴꦏꦴꦫꦠꦺꦴꦫꦟꦁ ꦌꦏꦢ꧀ꦮꦴꦫꦁ, ꦠꦠ꧀ꦫꦱ꧀ꦱ ꦢꦺꦴꦮꦴꦫꦶꦏꦺꦴ ꦥꦟ꧀ꦝꦶꦠꦺꦴ ꦮꦶꦪꦠ꧀ꦠꦺꦴ ꦩꦺꦣꦴꦮꦷ ꦄꦚ꧀ꦚꦴꦠꦴꦤꦁ ꦤꦶꦮꦴꦫꦺꦠꦴ ꦚꦴꦠꦴꦤꦁ ꦥꦮꦺꦱꦺꦠꦴ. ꦱꦺꦴ ꦠꦱ꧀ꦱ ꦤꦒꦫꦱ꧀ꦱ ꦱꦩꦤ꧀ꦠꦴ ꦄꦤꦸꦥꦫꦶꦪꦴꦪꦥꦡꦁ [ꦄꦤꦸꦕꦫꦶꦪꦴꦪꦥꦡꦁ (ꦱ꧀ꦪꦴ.)] ꦄꦤꦸꦏ꧀ꦏꦩꦩꦴꦤꦺꦴ ꦤ ꦥꦱ꧀ꦱꦺꦪ꧀ꦪ ꦥꦴꦏꦴꦫꦱꦤ꧀ꦣꦶꦁ ꦮꦴ ꦥꦴꦏꦴꦫꦮꦶꦮꦫꦁ ꦮꦴ, ꦄꦤ꧀ꦠꦩꦱꦺꦴ ꦧꦶꦭ꦳ꦴꦫꦤꦶꦏ꧀ꦑꦩꦤꦩꦠ꧀ꦠꦩ꧀ꦥꦶ. ꦠꦱ꧀ꦱ ꦌꦮꦩꦱ꧀ꦱ [ꦤ ꦥꦱ꧀ꦱꦺꦪ꧀ꦪ ꦠꦱ꧀ꦱ ꦌꦮꦩꦱ꧀ꦱ (ꦱ꧀ꦪꦴ.)] – ‘ꦪꦺ ꦑꦺꦴ ꦏꦺꦕꦶ ꦎꦭ꦳ꦴꦫꦶꦏꦴ ꦥꦴꦟꦴ ꦆꦩꦁ ꦤꦒꦫꦁ ꦥꦮꦶꦱꦤ꧀ꦠꦶ ꦮꦴ ꦤꦶꦏ꧀ꦑꦩꦤ꧀ꦠꦶ ꦮꦴ, ꦱꦧ꧀ꦧꦺ ꦠꦺ ꦆꦩꦶꦤꦴꦮ ꦢ꧀ꦮꦴꦫꦺꦤ ꦥꦮꦶꦱꦤ꧀ꦠꦶ ꦮꦴ ꦤꦶꦏ꧀ꦑꦩꦤ꧀ꦠꦶ ꦮꦴ’ꦠꦶ. ꦌꦮꦩꦺꦮ ꦑꦺꦴ ꦩꦺ, ꦨꦤ꧀ꦠꦺ, ꦣꦩ꧀ꦩꦤ꧀ꦮꦪꦺꦴ ꦮꦶꦢꦶꦠꦺꦴ – ‘ꦪꦺ ꦠꦺ, ꦨꦤ꧀ꦠꦺ, ꦄꦲꦺꦱꦸꦁ ꦄꦠꦷꦠꦩꦢ꧀ꦣꦴꦤꦁ ꦄꦫꦲꦤ꧀ꦠꦺꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦴ, ꦱꦧ꧀ꦧꦺ ꦠꦺ ꦨꦒꦮꦤ꧀ꦠꦺꦴ ꦥꦚ꧀ꦕ ꦤꦷꦮꦫꦟꦺ ꦥꦲꦴꦪ ꦕꦺꦠꦱꦺꦴ ꦈꦥꦏ꧀ꦏꦶꦭꦺꦱꦺ ꦥꦚ꧀ꦚꦴꦪ ꦢꦸꦧ꧀ꦧꦭꦷꦏꦫꦟꦺ ꦕꦠꦹꦱꦸ ꦱꦠꦶꦥꦛ꧀ꦜꦴꦤꦺꦱꦸ ꦱꦸꦥꦠꦶꦛ꧀ꦜꦶꦠꦕꦶꦠ꧀ꦠꦴ ꦱꦠ꧀ꦠꦧꦺꦴꦗ꧀ꦙꦔ꧀ꦒꦺ ꦪꦡꦴꦨꦹꦠꦁ ꦨꦴꦮꦺꦠ꧀ꦮꦴ ꦄꦤꦸꦠ꧀ꦠꦫꦁ ꦱꦩ꧀ꦩꦴꦱꦩ꧀ꦧꦺꦴꦣꦶꦁ ꦄꦨꦶꦱꦩ꧀ꦧꦸꦗ꧀ꦙꦶꦁꦱꦸ. ꦪꦺꦥꦶ ꦠꦺ, ꦨꦤ꧀ꦠꦺ, ꦨꦮꦶꦱ꧀ꦱꦤ꧀ꦠꦶ ꦄꦤꦴꦒꦠꦩꦢ꧀ꦣꦴꦤꦁ ꦄꦫꦲꦤ꧀ꦠꦺꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦴ, ꦱꦧ꧀ꦧꦺ ꦠꦺ ꦨꦒꦮꦤ꧀ꦠꦺꦴ ꦥꦚ꧀ꦕ ꦤꦷꦮꦫꦟꦺ ꦥꦲꦴꦪ ꦕꦺꦠꦱꦺꦴ ꦈꦥꦏ꧀ꦏꦶꦭꦺꦱꦺ ꦥꦚ꧀ꦚꦴꦪ ꦢꦸꦧ꧀ꦧꦭꦷꦏꦫꦟꦺ ꦕꦠꦹꦱꦸ ꦱꦠꦶꦥꦛ꧀ꦜꦴꦤꦺꦱꦸ ꦱꦸꦥꦠꦶꦛ꧀ꦜꦶꦠꦕꦶꦠ꧀ꦠꦴ ꦱꦠ꧀ꦠ ꦧꦺꦴꦗ꧀ꦙꦔ꧀ꦒꦺ ꦪꦡꦴꦨꦹꦠꦁ ꦨꦴꦮꦺꦠ꧀ꦮꦴ ꦄꦤꦸꦠ꧀ꦠꦫꦁ ꦱꦩ꧀ꦩꦴꦱꦩ꧀ꦧꦺꦴꦣꦶꦁ ꦄꦨꦶꦱꦩ꧀ꦧꦸꦗ꧀ꦙꦶꦱ꧀ꦱꦤ꧀ꦠꦶ. ꦨꦒꦮꦴꦥꦶ, ꦨꦤ꧀ꦠꦺ, ꦌꦠꦫꦲꦶ ꦄꦫꦲꦁ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ ꦥꦚ꧀ꦕ ꦤꦷꦮꦫꦟꦺ ꦥꦲꦴꦪ ꦕꦺꦠꦱꦺꦴ ꦈꦥꦏ꧀ꦏꦶꦭꦺꦱꦺ ꦥꦚ꧀ꦚꦴꦪ ꦢꦸꦧ꧀ꦧꦭꦷꦏꦫꦟꦺ ꦕꦠꦹꦱꦸ ꦱꦠꦶꦥꦛ꧀ꦜꦴꦤꦺꦱꦸ ꦱꦸꦥꦠꦶꦛ꧀ꦜꦶꦠꦕꦶꦠ꧀ꦠꦺꦴ ꦱꦠ꧀ꦠ ꦧꦺꦴꦗ꧀ꦙꦔ꧀ꦒꦺ ꦪꦡꦴꦨꦹꦠꦁ ꦨꦴꦮꦺꦠ꧀ꦮꦴ ꦄꦤꦸꦠ꧀ꦠꦫꦁ ꦱꦩ꧀ꦩꦴꦱꦩ꧀ꦧꦺꦴꦣꦶꦁ ꦄꦨꦶꦱꦩ꧀ꦧꦸꦢ꧀ꦣꦺꦴ’’’ꦠꦶ.

꧑꧔꧗. ꦠꦠ꧀ꦫꦥꦶ ꦱꦸꦢꦁ ꦨꦒꦮꦴ ꦤꦴꦭ꦳ꦤ꧀ꦢꦴꦪꦁ ꦮꦶꦲꦫꦤ꧀ꦠꦺꦴ ꦥꦴꦮꦴꦫꦶꦏꦩ꧀ꦧꦮꦤꦺ ꦌꦠꦢꦺꦮ ꦧꦲꦸꦭꦁ ꦨꦶꦏ꧀ꦑꦹꦤꦁ ꦣꦩ꧀ꦩꦶꦁ ꦏꦡꦁ ꦏꦫꦺꦴꦠꦶ – ‘‘ꦆꦠꦶ ꦱꦷꦭꦁ, ꦆꦠꦶ ꦱꦩꦴꦣꦶ, ꦆꦠꦶ ꦥꦚ꧀ꦚꦴ. ꦱꦷꦭꦥꦫꦶꦨꦴꦮꦶꦠꦺꦴ ꦱꦩꦴꦣꦶ ꦩꦲꦥ꧀ꦦꦭꦺꦴ ꦲꦺꦴꦠꦶ ꦩꦲꦴꦤꦶꦱꦁꦱꦺꦴ. ꦱꦩꦴꦣꦶꦥꦫꦶꦨꦴꦮꦶꦠꦴ ꦥꦚ꧀ꦚꦴ ꦩꦲꦥ꧀ꦦꦭꦴ ꦲꦺꦴꦠꦶ ꦩꦲꦴꦤꦶꦱꦁꦱꦴ. ꦥꦚ꧀ꦚꦴꦥꦫꦶꦨꦴꦮꦶꦠꦁ ꦕꦶꦠ꧀ꦠꦁ ꦱꦩ꧀ꦩꦢꦺꦮ ꦄꦴꦱꦮꦺꦲꦶ ꦮꦶꦩꦸꦕ꧀ꦕꦠꦶ, ꦱꦺꦪ꧀ꦪꦡꦶꦢꦁ – ꦏꦴꦩꦴꦱꦮꦴ, ꦨꦮꦴꦱꦮꦴ, ꦄꦮꦶꦗ꧀ꦗꦴꦱꦮꦴ’’ꦠꦶ.

ꦢꦸꦱ꧀ꦱꦷꦭꦄꦴꦢꦷꦤꦮꦴ

꧑꧔꧘. ꦄꦡ ꦑꦺꦴ ꦨꦒꦮꦴ ꦤꦴꦭ꦳ꦤ꧀ꦢꦴꦪꦁ ꦪꦡꦴꦨꦶꦫꦤ꧀ꦠꦁ ꦮꦶꦲꦫꦶꦠ꧀ꦮꦴ ꦄꦴꦪꦱ꧀ꦩꦤ꧀ꦠꦁ ꦄꦴꦤꦤ꧀ꦢꦁ ꦄꦴꦩꦤ꧀ꦠꦺꦱꦶ – ‘‘ꦄꦴꦪꦴꦩꦴꦤꦤ꧀ꦢ, ꦪꦺꦤ ꦥꦴꦛꦭꦶꦒꦴꦩꦺꦴ ꦠꦺꦤꦸꦥꦱꦔ꧀ꦏꦩꦶꦱ꧀ꦱꦴꦩꦴ’’ꦠꦶ. ‘‘ꦌꦮꦁ, ꦨꦤ꧀ꦠꦺ’’ꦠꦶ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦨꦒꦮꦠꦺꦴ ꦥꦕ꧀ꦕꦱ꧀ꦱꦺꦴꦱꦶ. ꦄꦡ ꦑꦺꦴ ꦨꦒꦮꦴ ꦩꦲꦠꦴ ꦨꦶꦏ꧀ꦑꦸꦱꦔ꧀ꦓꦺꦤ ꦱꦢ꧀ꦣꦶꦁ ꦪꦺꦤ ꦥꦴꦛꦭꦶꦒꦴꦩꦺꦴ ꦠꦢꦮꦱꦫꦶ. ꦄꦱ꧀ꦱꦺꦴꦱꦸꦁ ꦑꦺꦴ ꦥꦴꦛꦭꦶꦒꦴꦩꦶꦏꦴ ꦈꦥꦴꦱꦏꦴ – ‘‘ꦨꦒꦮꦴ ꦏꦶꦫ ꦥꦴꦛꦭꦶꦒꦴꦩꦁ ꦄꦤꦸꦥ꧀ꦥꦠ꧀ꦠꦺꦴ’’ꦠꦶ. ꦄꦡ ꦑꦺꦴ ꦥꦴꦛꦭꦶꦒꦴꦩꦶꦏꦴ ꦈꦥꦴꦱꦏꦴ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶꦁꦱꦸ; ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶꦁꦱꦸ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦴ ꦑꦺꦴ ꦥꦴꦛꦭꦶꦒꦴꦩꦶꦏꦴ ꦈꦥꦴꦱꦏꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕꦸꦁ – ‘‘ꦄꦣꦶꦮꦴꦱꦺꦠꦸ ꦤꦺꦴ, ꦨꦤ꧀ꦠꦺ, ꦨꦒꦮꦴ ꦄꦴꦮꦱꦡꦴꦒꦴꦫ’’ꦤ꧀ꦠꦶ. ꦄꦣꦶꦮꦴꦱꦺꦱꦶ ꦨꦒꦮꦴ ꦠꦸꦟ꧀ꦲꦷꦨꦴꦮꦺꦤ. ꦄꦡ ꦑꦺꦴ ꦥꦴꦛꦭꦶꦒꦴꦩꦶꦏꦴ ꦈꦥꦴꦱꦏꦴ ꦨꦒꦮꦠꦺꦴ ꦄꦣꦶꦮꦴꦱꦤꦁ ꦮꦶꦢꦶꦠ꧀ꦮꦴ ꦈꦛ꧀ꦜꦴꦪꦴꦱꦤꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦥꦢꦏ꧀ꦑꦶꦟꦁ ꦏꦠ꧀ꦮꦴ ꦪꦺꦤ ꦄꦴꦮꦱꦡꦴꦒꦴꦫꦁ ꦠꦺꦤꦸꦥꦱꦔ꧀ꦏꦩꦶꦁꦱꦸ; ꦈꦥꦱꦔ꧀ꦏꦩꦶꦠ꧀ꦮꦴ ꦱꦧ꧀ꦧꦱꦤ꧀ꦡꦫꦶꦁ [ꦱꦧ꧀ꦧꦱꦤ꧀ꦡꦫꦶꦠꦁ ꦱꦠ꧀ꦡꦠꦁ (ꦱ꧀ꦪꦴ.), ꦱꦧ꧀ꦧꦱꦤ꧀ꦡꦫꦶꦁ ꦱꦤ꧀ꦡꦠꦁ (ꦏ.)] ꦄꦴꦮꦱꦡꦴꦒꦴꦫꦁ ꦱꦤ꧀ꦡꦫꦶꦠ꧀ꦮꦴ ꦄꦴꦱꦤꦴꦤꦶ ꦥꦚ꧀ꦚꦥꦺꦠ꧀ꦮꦴ ꦈꦢꦏꦩꦟꦶꦏꦁ ꦥꦠꦶꦛ꧀ꦜꦴꦥꦺꦠ꧀ꦮꦴ ꦠꦺꦭꦥꦢꦷꦥꦁ ꦄꦴꦫꦺꦴꦥꦺꦠ꧀ꦮꦴ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶꦁꦱꦸ, ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦄꦛ꧀ꦜꦁꦱꦸ. ꦌꦏꦩꦤ꧀ꦠꦁ ꦜꦶꦠꦴ ꦑꦺꦴ ꦥꦴꦛꦭꦶꦒꦴꦩꦶꦏꦴ ꦈꦥꦴꦱꦏꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕꦸꦁ – ‘‘ꦱꦧ꧀ꦧꦱꦤ꧀ꦡꦫꦶꦱꦤ꧀ꦡꦠꦁ [ꦱꦧ꧀ꦧꦱꦤ꧀ꦡꦫꦶꦁ ꦱꦤ꧀ꦡꦠꦁ (ꦱꦷ. ꦱ꧀ꦪꦴ. ꦥꦷ. ꦏ.)], ꦨꦤ꧀ꦠꦺ, ꦄꦴꦮꦱꦡꦴꦒꦴꦫꦁ, ꦄꦴꦱꦤꦴꦤꦶ ꦥꦚ꧀ꦚꦠ꧀ꦠꦴꦤꦶ, ꦈꦢꦏꦩꦟꦶꦏꦺꦴ ꦥꦠꦶꦛ꧀ꦜꦴꦥꦶꦠꦺꦴ, ꦠꦺꦭꦥꦢꦷꦥꦺꦴ ꦄꦴꦫꦺꦴꦥꦶꦠꦺꦴ; ꦪꦱ꧀ꦱꦢꦴꦤꦶ, ꦨꦤ꧀ꦠꦺ, ꦨꦒꦮꦴ ꦏꦴꦭꦁ ꦩꦚ꧀ꦚꦠꦷ’’ꦠꦶ. ꦄꦡ ꦑꦺꦴ ꦨꦒꦮꦴ ꦱꦴꦪꦤ꧀ꦲꦱꦩꦪꦁ [ꦆꦢꦁ ꦥꦢꦁ ꦮꦶꦤꦪꦩꦲꦴꦮꦒ꧀ꦒ ꦤ ꦢꦶꦱ꧀ꦱꦠꦶ]. ꦤꦶꦮꦴꦱꦺꦠ꧀ꦮꦴ ꦥꦠ꧀ꦠꦕꦷꦮꦫꦩꦴꦢꦴꦪ ꦱꦢ꧀ꦣꦶꦁ ꦨꦶꦏ꧀ꦑꦸꦱꦔ꧀ꦓꦺꦤ ꦪꦺꦤ ꦄꦴꦮꦱꦡꦴꦒꦴꦫꦁ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦥꦴꦢꦺ ꦥꦏ꧀ꦑꦴꦭꦺꦠ꧀ꦮꦴ ꦄꦴꦮꦱꦡꦴꦒꦴꦫꦁ ꦥꦮꦶꦱꦶꦠ꧀ꦮꦴ ꦩꦗ꧀ꦙꦶꦩꦁ ꦡꦩ꧀ꦨꦁ ꦤꦶꦱ꧀ꦱꦴꦪ ꦥꦸꦫꦠ꧀ꦡꦴꦨꦶꦩꦸꦑꦺꦴ [ꦥꦸꦫꦠ꧀ꦡꦶꦩꦴꦨꦶꦩꦸꦑꦺꦴ (ꦏ.)] ꦤꦶꦱꦷꦢꦶ. ꦨꦶꦏ꧀ꦑꦸꦱꦔ꧀ꦓꦺꦴꦥꦶ ꦑꦺꦴ ꦥꦴꦢꦺ ꦥꦏ꧀ꦑꦴꦭꦺꦠ꧀ꦮꦴ ꦄꦴꦮꦱꦡꦴꦒꦴꦫꦁ ꦥꦮꦶꦱꦶꦠ꧀ꦮꦴ ꦥꦕ꧀ꦖꦶꦩꦁ ꦨꦶꦠ꧀ꦠꦶꦁ ꦤꦶꦱ꧀ꦱꦴꦪ ꦥꦸꦫꦠ꧀ꦡꦴꦨꦶꦩꦸꦑꦺꦴ ꦤꦶꦱꦷꦢꦶ ꦨꦒꦮꦤ꧀ꦠꦩꦺꦮ ꦥꦸꦫꦏ꧀ꦑꦠ꧀ꦮꦴ. ꦥꦴꦛꦭꦶꦒꦴꦩꦶꦏꦴꦥꦶ ꦑꦺꦴ ꦈꦥꦴꦱꦏꦴ ꦥꦴꦢꦺ ꦥꦏ꧀ꦑꦴꦭꦺꦠ꧀ꦮꦴ ꦄꦴꦮꦱꦡꦴꦒꦴꦫꦁ ꦥꦮꦶꦱꦶꦠ꧀ꦮꦴ ꦥꦸꦫꦠ꧀ꦡꦶꦩꦁ ꦨꦶꦠ꧀ꦠꦶꦁ ꦤꦶꦱ꧀ꦱꦴꦪ ꦥꦕ꧀ꦖꦶꦩꦴꦨꦶꦩꦸꦑꦴ ꦤꦶꦱꦷꦢꦶꦁꦱꦸ ꦨꦒꦮꦤ꧀ꦠꦩꦺꦮ ꦥꦸꦫꦏ꧀ꦑꦠ꧀ꦮꦴ.

꧑꧔꧙. ꦄꦡ ꦑꦺꦴ ꦨꦒꦮꦴ ꦥꦴꦛꦭꦶꦒꦴꦩꦶꦏꦺ ꦈꦥꦴꦱꦏꦺ ꦄꦴꦩꦤ꧀ꦠꦺꦱꦶ – ‘‘ꦥꦚ꧀ꦕꦶꦩꦺ, ꦒꦲꦥꦠꦪꦺꦴ, ꦄꦴꦢꦷꦤꦮꦴ ꦢꦸꦱ꧀ꦱꦷꦭꦱ꧀ꦱ ꦱꦷꦭꦮꦶꦥꦠ꧀ꦠꦶꦪꦴ. ꦏꦠꦩꦺ ꦥꦚ꧀ꦕ? ꦆꦣ, ꦒꦲꦥꦠꦪꦺꦴ, ꦢꦸꦱ꧀ꦱꦷꦭꦺꦴ ꦱꦷꦭꦮꦶꦥꦤ꧀ꦤꦺꦴ ꦥꦩꦴꦢꦴꦣꦶꦏꦫꦟꦁ ꦩꦲꦠꦶꦁ ꦨꦺꦴꦒꦗꦴꦤꦶꦁ ꦤꦶꦒꦕ꧀ꦖꦠꦶ. ꦄꦪꦁ ꦥꦜꦩꦺꦴ ꦄꦴꦢꦷꦤꦮꦺꦴ ꦢꦸꦱ꧀ꦱꦷꦭꦱ꧀ꦱ ꦱꦷꦭꦮꦶꦥꦠ꧀ꦠꦶꦪꦴ.

‘‘ꦥꦸꦤ ꦕꦥꦫꦁ, ꦒꦲꦥꦠꦪꦺꦴ, ꦢꦸꦱ꧀ꦱꦷꦭꦱ꧀ꦱ ꦱꦷꦭꦮꦶꦥꦤ꧀ꦤꦱ꧀ꦱ ꦥꦴꦥꦏꦺꦴ ꦏꦶꦠ꧀ꦠꦶꦱꦢ꧀ꦢꦺꦴ ꦄꦧ꧀ꦨꦸꦒ꧀ꦒꦕ꧀ꦖꦠꦶ. ꦄꦪꦁ ꦢꦸꦠꦶꦪꦺꦴ ꦄꦴꦢꦷꦤꦮꦺꦴ ꦢꦸꦱ꧀ꦱꦷꦭꦱ꧀ꦱ ꦱꦷꦭꦮꦶꦥꦠ꧀ꦠꦶꦪꦴ.

‘‘ꦥꦸꦤ ꦕꦥꦫꦁ, ꦒꦲꦥꦠꦪꦺꦴ, ꦢꦸꦱ꧀ꦱꦷꦭꦺꦴ ꦱꦷꦭꦮꦶꦥꦤ꧀ꦤꦺꦴ ꦪꦚ꧀ꦚꦢꦺꦮ ꦥꦫꦶꦱꦁ ꦈꦥꦱꦔ꧀ꦏꦩꦠꦶ – ꦪꦢꦶ ꦑꦠ꧀ꦠꦶꦪꦥꦫꦶꦱꦁ ꦪꦢꦶ ꦧ꧀ꦫꦴꦲ꧀ꦩꦟꦥꦫꦶꦱꦁ ꦪꦢꦶ ꦒꦲꦥꦠꦶꦥꦫꦶꦱꦁ ꦪꦢꦶ ꦱꦩꦟꦥꦫꦶꦱꦁ – ꦄꦮꦶꦱꦴꦫꦢꦺꦴ ꦈꦥꦱꦔ꧀ꦏꦩꦠꦶ ꦩꦔ꧀ꦏꦸꦨꦹꦠꦺꦴ. ꦄꦪꦁ ꦠꦠꦶꦪꦺꦴ ꦄꦴꦢꦷꦤꦮꦺꦴ ꦢꦸꦱ꧀ꦱꦷꦭꦱ꧀ꦱ ꦱꦷꦭꦮꦶꦥꦠ꧀ꦠꦶꦪꦴ.

‘‘ꦥꦸꦤ ꦕꦥꦫꦁ, ꦒꦲꦥꦠꦪꦺꦴ, ꦢꦸꦱ꧀ꦱꦷꦭꦺꦴ ꦱꦷꦭꦮꦶꦥꦤ꧀ꦤꦺꦴ ꦱꦩ꧀ꦩꦹꦭ꦳꧀ꦲꦺꦴ ꦏꦴꦭꦔ꧀ꦏꦫꦺꦴꦠꦶ. ꦄꦪꦁ ꦕꦠꦸꦠ꧀ꦡꦺꦴ ꦄꦴꦢꦷꦤꦮꦺꦴ ꦢꦸꦱ꧀ꦱꦷꦭꦱ꧀ꦱ ꦱꦷꦭꦮꦶꦥꦠ꧀ꦠꦶꦪꦴ.

‘‘ꦥꦸꦤ ꦕꦥꦫꦁ, ꦒꦲꦥꦠꦪꦺꦴ, ꦢꦸꦱ꧀ꦱꦷꦭꦺꦴ ꦱꦷꦭꦮꦶꦥꦤ꧀ꦤꦺꦴ ꦏꦴꦪꦱ꧀ꦱ ꦨꦺꦢꦴ ꦥꦫꦁ ꦩꦫꦟꦴ ꦄꦥꦴꦪꦁ ꦢꦸꦒ꧀ꦒꦠꦶꦁ ꦮꦶꦤꦶꦥꦴꦠꦁ ꦤꦶꦫꦪꦁ ꦈꦥꦥꦗ꧀ꦗꦠꦶ. ꦄꦪꦁ ꦥꦚ꧀ꦕꦩꦺꦴ ꦄꦴꦢꦷꦤꦮꦺꦴ ꦢꦸꦱ꧀ꦱꦷꦭꦱ꧀ꦱ ꦱꦷꦭꦮꦶꦥꦠ꧀ꦠꦶꦪꦴ. ꦆꦩꦺ ꦑꦺꦴ, ꦒꦲꦥꦠꦪꦺꦴ, ꦥꦚ꧀ꦕ ꦄꦴꦢꦷꦤꦮꦴ ꦢꦸꦱ꧀ꦱꦷꦭꦱ꧀ꦱ ꦱꦷꦭꦮꦶꦥꦠ꧀ꦠꦶꦪꦴ.

ꦱꦷꦭꦮꦤ꧀ꦠꦄꦴꦤꦶꦱꦁꦱ

꧑꧕꧐. ‘‘ꦥꦚ꧀ꦕꦶꦩꦺ, ꦒꦲꦥꦠꦪꦺꦴ, ꦄꦴꦤꦶꦱꦁꦱꦴ ꦱꦷꦭꦮꦠꦺꦴ ꦱꦷꦭꦱꦩ꧀ꦥꦢꦴꦪ. ꦏꦠꦩꦺ ꦥꦚ꧀ꦕ? ꦆꦣ, ꦒꦲꦥꦠꦪꦺꦴ, ꦱꦷꦭꦮꦴ ꦱꦷꦭꦱꦩ꧀ꦥꦤ꧀ꦤꦺꦴ ꦄꦥ꧀ꦥꦩꦴꦢꦴꦣꦶꦏꦫꦟꦁ ꦩꦲꦤ꧀ꦠꦁ ꦨꦺꦴꦒꦏ꧀ꦑꦤ꧀ꦣꦁ ꦄꦣꦶꦒꦕ꧀ꦖꦠꦶ. ꦄꦪꦁ ꦥꦜꦩꦺꦴ ꦄꦴꦤꦶꦱꦁꦱꦺꦴ ꦱꦷꦭꦮꦠꦺꦴ ꦱꦷꦭꦱꦩ꧀ꦥꦢꦴꦪ.

‘‘ꦥꦸꦤ ꦕꦥꦫꦁ, ꦒꦲꦥꦠꦪꦺꦴ, ꦱꦷꦭꦮꦠꦺꦴ ꦱꦷꦭꦱꦩ꧀ꦥꦤ꧀ꦤꦱ꧀ꦱ ꦏꦭ꧀ꦪꦴꦟꦺꦴ ꦏꦶꦠ꧀ꦠꦶꦱꦢ꧀ꦢꦺꦴ ꦄꦧ꧀ꦨꦸꦒ꧀ꦒꦕ꧀ꦖꦠꦶ. ꦄꦪꦁ ꦢꦸꦠꦶꦪꦺꦴ ꦄꦴꦤꦶꦱꦁꦱꦺꦴ ꦱꦷꦭꦮꦠꦺꦴ ꦱꦷꦭꦱꦩ꧀ꦥꦢꦴꦪ.

‘‘ꦥꦸꦤ ꦕꦥꦫꦁ, ꦒꦲꦥꦠꦪꦺꦴ, ꦱꦷꦭꦮꦴ ꦱꦷꦭꦱꦩ꧀ꦥꦤ꧀ꦤꦺꦴ ꦪꦚ꧀ꦚꦢꦺꦮ ꦥꦫꦶꦱꦁ ꦈꦥꦱꦔ꧀ꦏꦩꦠꦶ – ꦪꦢꦶ ꦑꦠ꧀ꦠꦶꦪꦥꦫꦶꦱꦁ ꦪꦢꦶ ꦧ꧀ꦫꦴꦲ꧀ꦩꦟꦥꦫꦶꦱꦁ ꦪꦢꦶ ꦒꦲꦥꦠꦶꦥꦫꦶꦱꦁ ꦪꦢꦶ ꦱꦩꦟꦥꦫꦶꦱꦁ ꦮꦶꦱꦴꦫꦢꦺꦴ ꦈꦥꦱꦔ꧀ꦏꦩꦠꦶ ꦄꦩꦔ꧀ꦏꦸꦨꦹꦠꦺꦴ. ꦄꦪꦁ ꦠꦠꦶꦪꦺꦴ ꦄꦴꦤꦶꦱꦁꦱꦺꦴ ꦱꦷꦭꦮꦠꦺꦴ ꦱꦷꦭꦱꦩ꧀ꦥꦢꦴꦪ.

‘‘ꦥꦸꦤ ꦕꦥꦫꦁ, ꦒꦲꦥꦠꦪꦺꦴ, ꦱꦷꦭꦮꦴ ꦱꦷꦭꦱꦩ꧀ꦥꦤ꧀ꦤꦺꦴ ꦄꦱꦩ꧀ꦩꦹꦭ꦳꧀ꦲꦺꦴ ꦏꦴꦭꦔ꧀ꦏꦫꦺꦴꦠꦶ. ꦄꦪꦁ ꦕꦠꦸꦠ꧀ꦡꦺꦴ ꦄꦴꦤꦶꦱꦁꦱꦺꦴ ꦱꦷꦭꦮꦠꦺꦴ ꦱꦷꦭꦱꦩ꧀ꦥꦢꦴꦪ.

‘‘ꦥꦸꦤ ꦕꦥꦫꦁ, ꦒꦲꦥꦠꦪꦺꦴ, ꦱꦷꦭꦮꦴ ꦱꦷꦭꦱꦩ꧀ꦥꦤ꧀ꦤꦺꦴ ꦏꦴꦪꦱ꧀ꦱ ꦨꦺꦢꦴ ꦥꦫꦁ ꦩꦫꦟꦴ ꦱꦸꦒꦠꦶꦁ ꦱꦒ꧀ꦒꦁ ꦭꦺꦴꦏꦁ ꦈꦥꦥꦗ꧀ꦗꦠꦶ. ꦄꦪꦁ ꦥꦚ꧀ꦕꦩꦺꦴ ꦄꦴꦤꦶꦱꦁꦱꦺꦴ ꦱꦷꦭꦮꦠꦺꦴ ꦱꦷꦭꦱꦩ꧀ꦥꦢꦴꦪ. ꦆꦩꦺ ꦑꦺꦴ, ꦒꦲꦥꦠꦪꦺꦴ, ꦥꦚ꧀ꦕ ꦄꦴꦤꦶꦱꦁꦱꦴ ꦱꦷꦭꦮꦠꦺꦴ ꦱꦷꦭꦱꦩ꧀ꦥꦢꦴꦪꦴ’’ꦠꦶ.

꧑꧕꧑. ꦄꦡ ꦑꦺꦴ ꦨꦒꦮꦴ ꦥꦴꦛꦭꦶꦒꦴꦩꦶꦏꦺ ꦈꦥꦴꦱꦏꦺ ꦧꦲꦸꦢꦺꦮ ꦫꦠ꧀ꦠꦶꦁ ꦣꦩ꧀ꦩꦶꦪꦴ ꦏꦡꦴꦪ ꦱꦤ꧀ꦢꦱ꧀ꦱꦺꦠ꧀ꦮꦴ ꦱꦩꦴꦢꦥꦺꦠ꧀ꦮꦴ ꦱꦩꦸꦠ꧀ꦠꦺꦗꦺꦠ꧀ꦮꦴ ꦱꦩ꧀ꦥꦲꦁꦱꦺꦠ꧀ꦮꦴ ꦈꦪ꧀ꦪꦺꦴꦗꦺꦱꦶ – ‘‘ꦄꦨꦶꦏ꧀ꦏꦤ꧀ꦠꦴ ꦑꦺꦴ, ꦒꦲꦥꦠꦪꦺꦴ, ꦫꦠ꧀ꦠꦶ, ꦪꦱ꧀ꦱꦢꦴꦤꦶ ꦠꦸꦩ꧀ꦲꦺ ꦏꦴꦭꦁ ꦩꦚ꧀ꦚꦡꦴ’’ꦠꦶ. ‘‘ꦌꦮꦁ, ꦨꦤ꧀ꦠꦺ’’ꦠꦶ ꦑꦺꦴ ꦥꦴꦛꦭꦶꦒꦴꦩꦶꦏꦴ ꦈꦥꦴꦱꦏꦴ ꦨꦒꦮꦠꦺꦴ ꦥꦛꦶꦱ꧀ꦱꦸꦠ꧀ꦮꦴ ꦈꦛ꧀ꦜꦴꦪꦴꦱꦤꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦥꦢꦏ꧀ꦑꦶꦟꦁ ꦏꦠ꧀ꦮꦴ ꦥꦏ꧀ꦏꦩꦶꦁꦱꦸ. ꦄꦡ ꦑꦺꦴ ꦨꦒꦮꦴ ꦄꦕꦶꦫꦥꦏ꧀ꦏꦤ꧀ꦠꦺꦱꦸ ꦥꦴꦛꦭꦶꦒꦴꦩꦶꦏꦺꦱꦸ ꦈꦥꦴꦱꦏꦺꦱꦸ ꦱꦸꦚ꧀ꦚꦴꦒꦴꦫꦁ ꦥꦴꦮꦶꦱꦶ.

ꦥꦴꦛꦭꦶꦥꦸꦠ꧀ꦠꦤꦒꦫꦩꦴꦥꦤꦁ

꧑꧕꧒. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦱꦸꦤꦶꦣꦮꦱ꧀ꦱꦏꦴꦫꦴ [ꦱꦸꦤꦷꦣꦮꦱ꧀ꦱꦏꦴꦫꦴ (ꦱ꧀ꦪꦴ. ꦏ.)] ꦩꦒꦣꦩꦲꦴꦩꦠ꧀ꦠꦴ ꦥꦴꦛꦭꦶꦒꦴꦩꦺ ꦤꦒꦫꦁ ꦩꦴꦥꦺꦤ꧀ꦠꦶ ꦮꦗ꧀ꦗꦷꦤꦁ ꦥꦛꦶꦧꦴꦲꦴꦪ. ꦠꦺꦤ ꦱꦩꦪꦺꦤ ꦱꦩ꧀ꦧꦲꦸꦭꦴ ꦢꦺꦮꦠꦴꦪꦺꦴ ꦱꦲꦱ꧀ꦱꦺꦮ [ꦱꦲꦱ꧀ꦱꦱ꧀ꦱꦺꦮ (ꦱꦷ. ꦥꦷ. ꦏ.), ꦱꦲꦱ꧀ꦱꦱꦺꦮ (ꦛꦷꦏꦴꦪꦁ ꦥꦴꦜꦤ꧀ꦠꦫꦁ), ꦱꦲꦱ꧀ꦱꦱꦲꦱ꧀ꦱꦺꦮ (ꦈꦢꦴꦤꦛ꧀ꦜꦏꦡꦴ)] ꦥꦴꦛꦭꦶꦒꦴꦩꦺ ꦮꦠ꧀ꦡꦹꦤꦶ ꦥꦫꦶꦒ꧀ꦒꦟ꧀ꦲꦤ꧀ꦠꦶ. ꦪꦱ꧀ꦩꦶꦁ ꦥꦢꦺꦱꦺ ꦩꦲꦺꦱꦏ꧀ꦑꦴ ꦢꦺꦮꦠꦴ ꦮꦠ꧀ꦡꦹꦤꦶ ꦥꦫꦶꦒ꧀ꦒꦟ꧀ꦲꦤ꧀ꦠꦶ, ꦩꦲꦺꦱꦏ꧀ꦑꦴꦤꦁ ꦠꦠ꧀ꦡ ꦫꦚ꧀ꦚꦁ ꦫꦴꦗꦩꦲꦴꦩꦠ꧀ꦠꦴꦤꦁ ꦕꦶꦠ꧀ꦠꦴꦤꦶ ꦤꦩꦤ꧀ꦠꦶ ꦤꦶꦮꦺꦱꦤꦴꦤꦶ ꦩꦴꦥꦺꦠꦸꦁ. ꦪꦱ꧀ꦩꦶꦁ ꦥꦢꦺꦱꦺ ꦩꦗ꧀ꦙꦶꦩꦴ ꦢꦺꦮꦠꦴ ꦮꦠ꧀ꦡꦹꦤꦶ ꦥꦫꦶꦒ꧀ꦒꦟ꧀ꦲꦤ꧀ꦠꦶ, ꦩꦗ꧀ꦙꦶꦩꦴꦤꦁ ꦠꦠ꧀ꦡ ꦫꦚ꧀ꦚꦁ ꦫꦴꦗꦩꦲꦴꦩꦠ꧀ꦠꦴꦤꦁ ꦕꦶꦠ꧀ꦠꦴꦤꦶ ꦤꦩꦤ꧀ꦠꦶ ꦤꦶꦮꦺꦱꦤꦴꦤꦶ ꦩꦴꦥꦺꦠꦸꦁ. ꦪꦱ꧀ꦩꦶꦁ ꦥꦢꦺꦱꦺ ꦤꦷꦕꦴ ꦢꦺꦮꦠꦴ ꦮꦠ꧀ꦡꦹꦤꦶ ꦥꦫꦶꦒ꧀ꦒꦟ꧀ꦲꦤ꧀ꦠꦶ, ꦤꦷꦕꦴꦤꦁ ꦠꦠ꧀ꦡ ꦫꦚ꧀ꦚꦁ ꦫꦴꦗꦩꦲꦴꦩꦠ꧀ꦠꦴꦤꦁ ꦕꦶꦠ꧀ꦠꦴꦤꦶ ꦤꦩꦤ꧀ꦠꦶ ꦤꦶꦮꦺꦱꦤꦴꦤꦶ ꦩꦴꦥꦺꦠꦸꦁ. ꦄꦢ꧀ꦢꦱꦴ ꦑꦺꦴ ꦨꦒꦮꦴ ꦢꦶꦧ꧀ꦧꦺꦤ ꦕꦏ꧀ꦑꦸꦤꦴ ꦮꦶꦱꦸꦢ꧀ꦣꦺꦤ ꦄꦠꦶꦏ꧀ꦏꦤ꧀ꦠꦩꦴꦤꦸꦱꦏꦺꦤ ꦠꦴ ꦢꦺꦮꦠꦴꦪꦺꦴ ꦱꦲꦱ꧀ꦱꦺꦮ ꦥꦴꦛꦭꦶꦒꦴꦩꦺ ꦮꦠ꧀ꦡꦹꦤꦶ ꦥꦫꦶꦒ꧀ꦒꦟ꧀ꦲꦤ꧀ꦠꦶꦪꦺꦴ. ꦄꦡ ꦑꦺꦴ ꦨꦒꦮꦴ ꦫꦠ꧀ꦠꦶꦪꦴ ꦥꦕ꧀ꦕꦹꦱꦱꦩꦪꦁ ꦥꦕ꧀ꦕꦸꦛ꧀ꦜꦴꦪ ꦄꦴꦪꦱ꧀ꦩꦤ꧀ꦠꦁ ꦄꦴꦤꦤ꧀ꦢꦁ ꦄꦴꦩꦤ꧀ꦠꦺꦱꦶ – ‘‘ꦏꦺ ꦤꦸ ꦑꦺꦴ [ꦏꦺꦴ ꦤꦸ ꦑꦺꦴ (ꦱꦷ. ꦱ꧀ꦪꦴ. ꦥꦷ. ꦏ.)], ꦄꦴꦤꦤ꧀ꦢ, ꦥꦴꦛꦭꦶꦒꦴꦩꦺ ꦤꦒꦫꦁ ꦩꦴꦥꦺꦤ꧀ꦠꦷ’’ꦠꦶ [ꦩꦴꦥꦺꦠꦷꦠꦶ (ꦱꦷ. ꦱ꧀ꦪꦴ. ꦥꦷ. ꦏ.)]? ‘‘ꦱꦸꦤꦶꦣꦮꦱ꧀ꦱꦏꦴꦫꦴ, ꦨꦤ꧀ꦠꦺ, ꦩꦒꦣꦩꦲꦴꦩꦠ꧀ꦠꦴ ꦥꦴꦛꦭꦶꦒꦴꦩꦺ ꦤꦒꦫꦁ ꦩꦴꦥꦺꦤ꧀ꦠꦶ ꦮꦗ꧀ꦗꦷꦤꦁ ꦥꦛꦶꦧꦴꦲꦴꦪꦴ’’ꦠꦶ. ‘‘ꦱꦺꦪ꧀ꦪꦡꦴꦥꦶ, ꦄꦴꦤꦤ꧀ꦢ, ꦢꦺꦮꦺꦲꦶ ꦠꦴꦮꦠꦶꦁꦱꦺꦲꦶ ꦱꦢ꧀ꦣꦶꦁ ꦩꦤ꧀ꦠꦺꦠ꧀ꦮꦴ, ꦌꦮꦩꦺꦮ ꦑꦺꦴ, ꦄꦴꦤꦤ꧀ꦢ, ꦱꦸꦤꦶꦣꦮꦱ꧀ꦱꦏꦴꦫꦴ ꦩꦒꦣꦩꦲꦴꦩꦠ꧀ꦠꦴ ꦥꦴꦛꦭꦶꦒꦴꦩꦺ ꦤꦒꦫꦁ ꦩꦴꦥꦺꦤ꧀ꦠꦶ ꦮꦗ꧀ꦗꦷꦤꦁ ꦥꦛꦶꦧꦴꦲꦴꦪ. ꦆꦣꦴꦲꦁ, ꦄꦴꦤꦤ꧀ꦢ, ꦄꦢ꧀ꦢꦱꦁ ꦢꦶꦧ꧀ꦧꦺꦤ ꦕꦏ꧀ꦑꦸꦤꦴ ꦮꦶꦱꦸꦢ꧀ꦣꦺꦤ ꦄꦠꦶꦏ꧀ꦏꦤ꧀ꦠꦩꦴꦤꦸꦱꦏꦺꦤ ꦱꦩ꧀ꦧꦲꦸꦭꦴ ꦢꦺꦮꦠꦴꦪꦺꦴ ꦱꦲꦱ꧀ꦱꦺꦮ ꦥꦴꦛꦭꦶꦒꦴꦩꦺ ꦮꦠ꧀ꦡꦹꦤꦶ ꦥꦫꦶꦒ꧀ꦒꦟ꧀ꦲꦤ꧀ꦠꦶꦪꦺꦴ. ꦪꦱ꧀ꦩꦶꦁ, ꦄꦴꦤꦤ꧀ꦢ, ꦥꦢꦺꦱꦺ ꦩꦲꦺꦱꦏ꧀ꦑꦴ ꦢꦺꦮꦠꦴ ꦮꦠ꧀ꦡꦹꦤꦶ ꦥꦫꦶꦒ꧀ꦒꦟ꧀ꦲꦤ꧀ꦠꦶ, ꦩꦲꦺꦱꦏ꧀ꦑꦴꦤꦁ ꦠꦠ꧀ꦡ ꦫꦚ꧀ꦚꦁ ꦫꦴꦗꦩꦲꦴꦩꦠ꧀ꦠꦴꦤꦁ ꦕꦶꦠ꧀ꦠꦴꦤꦶ ꦤꦩꦤ꧀ꦠꦶ ꦤꦶꦮꦺꦱꦤꦴꦤꦶ ꦩꦴꦥꦺꦠꦸꦁ. ꦪꦱ꧀ꦩꦶꦁ ꦥꦢꦺꦱꦺ ꦩꦗ꧀ꦙꦶꦩꦴ ꦢꦺꦮꦠꦴ ꦮꦠ꧀ꦡꦹꦤꦶ ꦥꦫꦶꦒ꧀ꦒꦟ꧀ꦲꦤ꧀ꦠꦶ, ꦩꦗ꧀ꦙꦶꦩꦴꦤꦁ ꦠꦠ꧀ꦡ ꦫꦚ꧀ꦚꦁ ꦫꦴꦗꦩꦲꦴꦩꦠ꧀ꦠꦴꦤꦁ ꦕꦶꦠ꧀ꦠꦴꦤꦶ ꦤꦩꦤ꧀ꦠꦶ ꦤꦶꦮꦺꦱꦤꦴꦤꦶ ꦩꦴꦥꦺꦠꦸꦁ. ꦪꦱ꧀ꦩꦶꦁ ꦥꦢꦺꦱꦺ ꦤꦷꦕꦴ ꦢꦺꦮꦠꦴ ꦮꦠ꧀ꦡꦹꦤꦶ ꦥꦫꦶꦒ꧀ꦒꦟ꧀ꦲꦤ꧀ꦠꦶ, ꦤꦷꦕꦴꦤꦁ ꦠꦠ꧀ꦡ ꦫꦚ꧀ꦚꦁ ꦫꦴꦗꦩꦲꦴꦩꦠ꧀ꦠꦴꦤꦁ ꦕꦶꦠ꧀ꦠꦴꦤꦶ ꦤꦩꦤ꧀ꦠꦶ ꦤꦶꦮꦺꦱꦤꦴꦤꦶ ꦩꦴꦥꦺꦠꦸꦁ. ꦪꦴꦮꦠꦴ, ꦄꦴꦤꦤ꧀ꦢ, ꦄꦫꦶꦪꦁ ꦄꦴꦪꦠꦤꦁ ꦪꦴꦮꦠꦴ ꦮꦟꦶꦥ꧀ꦥꦡꦺꦴ ꦆꦢꦁ ꦄꦒ꧀ꦒꦤꦒꦫꦁ ꦨꦮꦶꦱ꧀ꦱꦠꦶ ꦥꦴꦛꦭꦶꦥꦸꦠ꧀ꦠꦁ ꦥꦸꦛꦨꦺꦢꦤꦁ. ꦥꦴꦛꦭꦶꦥꦸꦠ꧀ꦠꦱ꧀ꦱ ꦑꦺꦴ, ꦄꦴꦤꦤ꧀ꦢ, ꦠꦪꦺꦴ ꦄꦤ꧀ꦠꦫꦴꦪꦴ ꦨꦮꦶꦱ꧀ꦱꦤ꧀ꦠꦶ – ꦄꦒ꧀ꦒꦶꦠꦺꦴ ꦮꦴ ꦈꦢꦏꦠꦺꦴ ꦮꦴ ꦩꦶꦡꦸꦨꦺꦢꦴ ꦮꦴ’’ꦠꦶ.

꧑꧕꧓. ꦄꦡ ꦑꦺꦴ ꦱꦸꦤꦶꦣꦮꦱ꧀ꦱꦏꦴꦫꦴ ꦩꦒꦣꦩꦲꦴꦩꦠ꧀ꦠꦴ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶꦁꦱꦸ; ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦠꦴ ꦱꦢ꧀ꦣꦶꦁ ꦱꦩ꧀ꦩꦺꦴꦢꦶꦁꦱꦸ, ꦱꦩ꧀ꦩꦺꦴꦢꦤꦷꦪꦁ ꦏꦡꦁ ꦱꦴꦫꦟꦷꦪꦁ ꦮꦷꦠꦶꦱꦴꦫꦺꦠ꧀ꦮꦴ ꦌꦏꦩꦤ꧀ꦠꦁ ꦄꦛ꧀ꦜꦁꦱꦸ, ꦌꦏꦩꦤ꧀ꦠꦁ ꦜꦶꦠꦴ ꦑꦺꦴ ꦱꦸꦤꦶꦣꦮꦱ꧀ꦱꦏꦴꦫꦴ ꦩꦒꦣꦩꦲꦴꦩꦠ꧀ꦠꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕꦸꦁ – ‘‘ꦄꦣꦶꦮꦴꦱꦺꦠꦸ ꦤꦺꦴ ꦨꦮꦁ ꦒꦺꦴꦠꦩꦺꦴ ꦄꦗ꧀ꦗꦠꦤꦴꦪ ꦨꦠ꧀ꦠꦁ ꦱꦢ꧀ꦣꦶꦁ ꦨꦶꦏ꧀ꦑꦸꦱꦔ꧀ꦓꦺꦤꦴ’’ꦠꦶ. ꦄꦣꦶꦮꦴꦱꦺꦱꦶ ꦨꦒꦮꦴ ꦠꦸꦟ꧀ꦲꦷꦨꦴꦮꦺꦤ. ꦄꦡ ꦑꦺꦴ ꦱꦸꦤꦶꦣꦮꦱ꧀ꦱꦏꦴꦫꦴ ꦩꦒꦣꦩꦲꦴꦩꦠ꧀ꦠꦴ ꦨꦒꦮꦠꦺꦴ ꦄꦣꦶꦮꦴꦱꦤꦁ ꦮꦶꦢꦶꦠ꧀ꦮꦴ ꦪꦺꦤ ꦱꦏꦺꦴ ꦄꦴꦮꦱꦡꦺꦴ ꦠꦺꦤꦸꦥꦱꦔ꧀ꦏꦩꦶꦁꦱꦸ; ꦈꦥꦱꦔ꧀ꦏꦩꦶꦠ꧀ꦮꦴ ꦱꦏꦺ ꦄꦴꦮꦱꦡꦺ ꦥꦟꦷꦠꦁ ꦑꦴꦢꦤꦷꦪꦁ ꦨꦺꦴꦗꦤꦷꦪꦁ ꦥꦛꦶꦪꦴꦢꦴꦥꦺꦠ꧀ꦮꦴ ꦨꦒꦮꦠꦺꦴ ꦏꦴꦭꦁ ꦄꦴꦫꦺꦴꦕꦴꦥꦺꦱꦸꦁ – ‘‘ꦏꦴꦭꦺꦴ, ꦨꦺꦴ ꦒꦺꦴꦠꦩ, ꦤꦶꦛ꧀ꦜꦶꦠꦁ ꦨꦠ꧀ꦠ’’ꦤ꧀ꦠꦶ.

ꦄꦡ ꦑꦺꦴ ꦨꦒꦮꦴ ꦥꦸꦧ꧀ꦧꦟ꧀ꦲꦱꦩꦪꦁ ꦤꦶꦮꦴꦱꦺꦠ꧀ꦮꦴ ꦥꦠ꧀ꦠꦕꦷꦮꦫꦩꦴꦢꦴꦪ ꦱꦢ꧀ꦣꦶꦁ ꦨꦶꦏ꧀ꦑꦸꦱꦔ꧀ꦓꦺꦤ ꦪꦺꦤ ꦱꦸꦤꦶꦣꦮꦱ꧀ꦱꦏꦴꦫꦴꦤꦁ ꦩꦒꦣꦩꦲꦴꦩꦠ꧀ꦠꦴꦤꦁ ꦄꦴꦮꦱꦡꦺꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦥꦚ꧀ꦚꦠ꧀ꦠꦺ ꦄꦴꦱꦤꦺ ꦤꦶꦱꦷꦢꦶ. ꦄꦡ ꦑꦺꦴ ꦱꦸꦤꦶꦣꦮꦱ꧀ꦱꦏꦴꦫꦴ ꦩꦒꦣꦩꦲꦴꦩꦠ꧀ꦠꦴ ꦧꦸꦢ꧀ꦣꦥ꧀ꦥꦩꦸꦑꦁ ꦨꦶꦏ꧀ꦑꦸꦱꦔ꧀ꦓꦁ ꦥꦟꦷꦠꦺꦤ ꦑꦴꦢꦤꦷꦪꦺꦤ ꦨꦺꦴꦗꦤꦷꦪꦺꦤ ꦱꦲꦠ꧀ꦡꦴ ꦱꦤ꧀ꦠꦥ꧀ꦥꦺꦱꦸꦁ ꦱꦩ꧀ꦥꦮꦴꦫꦺꦱꦸꦁ. ꦄꦡ ꦑꦺꦴ ꦱꦸꦤꦶꦣꦮꦱ꧀ꦱꦏꦴꦫꦴ ꦩꦒꦣꦩꦲꦴꦩꦠ꧀ꦠꦴ ꦨꦒꦮꦤ꧀ꦠꦁ ꦨꦸꦠ꧀ꦠꦴꦮꦶꦁ ꦎꦤꦷꦠꦥꦠ꧀ꦠꦥꦴꦟꦶꦁ ꦄꦚ꧀ꦚꦠꦫꦁ ꦤꦷꦕꦁ ꦄꦴꦱꦤꦁ ꦒꦲꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶꦁꦱꦸ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦺ ꦑꦺꦴ ꦱꦸꦤꦶꦣꦮꦱ꧀ꦱꦏꦴꦫꦺ ꦩꦒꦣꦩꦲꦴꦩꦠ꧀ꦠꦺ ꦨꦒꦮꦴ ꦆꦩꦴꦲꦶ ꦒꦴꦡꦴꦲꦶ ꦄꦤꦸꦩꦺꦴꦢꦶ –

‘‘ꦪꦱ꧀ꦩꦶꦁ ꦥꦢꦺꦱꦺ ꦏꦥ꧀ꦥꦺꦠꦶ, ꦮꦴꦱꦁ ꦥꦟ꧀ꦝꦶꦠꦗꦴꦠꦶꦪꦺꦴ;

ꦱꦷꦭꦮꦤ꧀ꦠꦺꦠ꧀ꦡ ꦨꦺꦴꦗꦺꦠ꧀ꦮꦴ, ꦱꦚ꧀ꦚꦠꦺ ꦧ꧀ꦫꦲ꧀ꦩꦕꦴꦫꦪꦺꦴ [ꦧ꧀ꦫꦲ꧀ꦩꦕꦴꦫꦶꦤꦺꦴ (ꦱ꧀ꦪꦴ.)].

‘‘ꦪꦴ ꦠꦠ꧀ꦡ ꦢꦺꦮꦠꦴ ꦄꦴꦱꦸꦁ, ꦠꦴꦱꦁ ꦢꦏ꧀ꦑꦶꦟꦩꦴꦢꦶꦱꦺ;

ꦠꦴ ꦥꦹꦗꦶꦠꦴ ꦥꦹꦗꦪꦤ꧀ꦠꦶ [ꦥꦹꦗꦶꦠꦴ ꦥꦹꦗꦪꦤ꧀ꦠꦶ ꦤꦁ (ꦏ.)], ꦩꦴꦤꦶꦠꦴ ꦩꦴꦤꦪꦤ꧀ꦠꦶ ꦤꦁ.

‘‘ꦠꦠꦺꦴ ꦤꦁ ꦄꦤꦸꦏꦩ꧀ꦥꦤ꧀ꦠꦶ, ꦩꦴꦠꦴ ꦥꦸꦠ꧀ꦠꦁꦮ ꦎꦫꦱꦁ;

ꦢꦺꦮꦠꦴꦤꦸꦏꦩ꧀ꦥꦶꦠꦺꦴ ꦥꦺꦴꦱꦺꦴ, ꦱꦢꦴ ꦨꦢ꧀ꦫꦴꦤꦶ ꦥꦱ꧀ꦱꦠꦷ’’ꦠꦶ.

ꦄꦡ ꦑꦺꦴ ꦨꦒꦮꦴ ꦱꦸꦤꦶꦣꦮꦱ꧀ꦱꦏꦴꦫꦺ ꦩꦒꦣꦩꦲꦴꦩꦠ꧀ꦠꦺ ꦆꦩꦴꦲꦶ ꦒꦴꦡꦴꦲꦶ ꦄꦤꦸꦩꦺꦴꦢꦶꦠ꧀ꦮꦴ ꦈꦛ꧀ꦜꦴꦪꦴꦱꦤꦴ ꦥꦏ꧀ꦏꦴꦩꦶ.

꧑꧕꧔. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦱꦸꦤꦶꦣꦮꦱ꧀ꦱꦏꦴꦫꦴ ꦩꦒꦣꦩꦲꦴꦩꦠ꧀ꦠꦴ ꦨꦒꦮꦤ꧀ꦠꦁ ꦥꦶꦛ꧀ꦜꦶꦠꦺꦴ ꦥꦶꦛ꧀ꦜꦶꦠꦺꦴ ꦄꦤꦸꦧꦤ꧀ꦣꦴ ꦲꦺꦴꦤ꧀ꦠꦶ – ‘‘ꦪꦺꦤꦗ꧀ꦗ ꦱꦩꦟꦺꦴ ꦒꦺꦴꦠꦩꦺꦴ ꦢ꧀ꦮꦴꦫꦺꦤ ꦤꦶꦏ꧀ꦑꦩꦶꦱ꧀ꦱꦠꦶ, ꦠꦁ ꦒꦺꦴꦠꦩꦢ꧀ꦮꦴꦫꦁ ꦤꦴꦩ ꦨꦮꦶꦱ꧀ꦱꦠꦶ. ꦪꦺꦤ ꦠꦶꦠ꧀ꦡꦺꦤ ꦒꦔ꧀ꦒꦁ ꦤꦢꦶꦁ ꦠꦫꦶꦱ꧀ꦱꦠꦶ, ꦠꦁ ꦒꦺꦴꦠꦩꦠꦶꦠ꧀ꦡꦁ ꦤꦴꦩ ꦨꦮꦶꦱ꧀ꦱꦠꦷ’’ꦠꦶ. ꦄꦡ ꦑꦺꦴ ꦨꦒꦮꦴ ꦪꦺꦤ ꦢ꧀ꦮꦴꦫꦺꦤ ꦤꦶꦏ꧀ꦑꦩꦶ, ꦠꦁ ꦒꦺꦴꦠꦩꦢ꧀ꦮꦴꦫꦁ ꦤꦴꦩ ꦄꦲꦺꦴꦱꦶ. ꦄꦡ ꦑꦺꦴ ꦨꦒꦮꦴ ꦪꦺꦤ ꦒꦔ꧀ꦒꦴ ꦤꦢꦷ ꦠꦺꦤꦸꦥꦱꦔ꧀ꦏꦩꦶ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦒꦔ꧀ꦒꦴ ꦤꦢꦷ ꦥꦹꦫꦴ ꦲꦺꦴꦠꦶ ꦱꦩꦠꦶꦠ꧀ꦠꦶꦏꦴ ꦏꦴꦏꦥꦺꦪ꧀ꦪꦴ. ꦄꦥ꧀ꦥꦺꦏꦕ꧀ꦕꦺ ꦩꦤꦸꦱ꧀ꦱꦴ ꦤꦴꦮꦁ ꦥꦫꦶꦪꦺꦱꦤ꧀ꦠꦶ, ꦄꦥ꧀ꦥꦺꦏꦕ꧀ꦕꦺ ꦈꦭ꦳ꦸꦩ꧀ꦥꦁ ꦥꦫꦶꦪꦺꦱꦤ꧀ꦠꦶ, ꦄꦥ꧀ꦥꦺꦏꦕ꧀ꦕꦺ ꦏꦸꦭ꧀ꦭꦁ ꦧꦤ꧀ꦣꦤ꧀ꦠꦶ ꦄꦥꦴꦫꦴ [ꦥꦴꦫꦴ (ꦱꦷ. ꦱ꧀ꦪꦴ. ꦏ.), ꦎꦫꦴ (ꦮꦶ. ꦩꦲꦴꦮꦒ꧀ꦒ)], ꦥꦴꦫꦁ ꦒꦤ꧀ꦠꦸꦏꦴꦩꦴ. ꦄꦡ ꦑꦺꦴ ꦨꦒꦮꦴ – ꦱꦺꦪ꧀ꦪꦡꦴꦥꦶ ꦤꦴꦩ ꦧꦭꦮꦴ ꦥꦸꦫꦶꦱꦺꦴ ꦱꦩꦶꦚ꧀ꦗꦶꦠꦁ ꦮꦴ ꦧꦴꦲꦁ ꦥꦱꦴꦫꦺꦪ꧀ꦪ, ꦥꦱꦴꦫꦶꦠꦁ ꦮꦴ ꦧꦴꦲꦁ ꦱꦩꦶꦚ꧀ꦗꦺꦪ꧀ꦪ, ꦌꦮꦩꦺꦮ – ꦒꦔ꧀ꦒꦴꦪ ꦤꦢꦶꦪꦴ ꦎꦫꦶꦩꦠꦷꦫꦺ ꦄꦤ꧀ꦠꦫꦲꦶꦠꦺꦴ ꦥꦴꦫꦶꦩꦠꦷꦫꦺ ꦥꦕ꧀ꦕꦸꦛ꧀ꦜꦴꦱꦶ ꦱꦢ꧀ꦣꦶꦁ ꦨꦶꦏ꧀ꦑꦸꦱꦔ꧀ꦓꦺꦤ. ꦄꦢ꧀ꦢꦱꦴ ꦑꦺꦴ ꦨꦒꦮꦴ ꦠꦺ ꦩꦤꦸꦱ꧀ꦱꦺ ꦄꦥ꧀ꦥꦺꦏꦕ꧀ꦕꦺ ꦤꦴꦮꦁ ꦥꦫꦶꦪꦺꦱꦤ꧀ꦠꦺ ꦄꦥ꧀ꦥꦺꦏꦕ꧀ꦕꦺ ꦈꦭ꦳ꦸꦩ꧀ꦥꦁ ꦥꦫꦶꦪꦺꦱꦤ꧀ꦠꦺ ꦄꦥ꧀ꦥꦺꦏꦕ꧀ꦕꦺ ꦏꦸꦭ꧀ꦭꦁ ꦧꦤ꧀ꦣꦤ꧀ꦠꦺ ꦄꦥꦴꦫꦴ ꦥꦴꦫꦁ ꦒꦤ꧀ꦠꦸꦏꦴꦩꦺ. ꦄꦡ ꦑꦺꦴ ꦨꦒꦮꦴ ꦌꦠꦩꦠ꧀ꦡꦁ ꦮꦶꦢꦶꦠ꧀ꦮꦴ ꦠꦴꦪꦁ ꦮꦺꦭꦴꦪꦁ ꦆꦩꦁ ꦈꦢꦴꦤꦁ ꦈꦢꦴꦤꦺꦱꦶ –

‘‘ꦪꦺ ꦠꦫꦤ꧀ꦠꦶ ꦄꦟ꧀ꦟꦮꦁ ꦱꦫꦁ, ꦱꦺꦠꦸꦁ ꦏꦠ꧀ꦮꦴꦤ ꦮꦶꦱꦗ꧀ꦗ ꦥꦭ꧀ꦭꦭꦴꦤꦶ;

ꦏꦸꦭ꧀ꦭꦚ꧀ꦲꦶ ꦗꦤꦺꦴ ꦧꦤ꧀ꦣꦠꦶ [ꦏꦸꦭ꧀ꦭꦁ ꦗꦤꦺꦴ ꦕ ꦧꦤ꧀ꦣꦠꦶ (ꦱ꧀ꦪꦴ.), ꦏꦸꦭ꧀ꦭꦁ ꦲꦶ ꦗꦤꦺꦴ ꦥꦧꦤ꧀ꦣꦠꦶ (ꦱꦷ. ꦥꦷ. ꦏ.)], ꦠꦶꦟ꧀ꦟꦴ [ꦤꦶꦠꦶꦟ꧀ꦟꦴ, ꦤ ꦠꦶꦟ꧀ꦟꦴ (ꦏ.)] ꦩꦺꦣꦴꦮꦶꦤꦺꦴ ꦗꦤꦴ’’ꦠꦶ.

ꦥꦜꦩꦨꦴꦟꦮꦴꦫꦺꦴ.

ꦄꦫꦶꦪꦱꦕ꧀ꦕꦏꦡꦴ

꧑꧕꧕. ꦄꦡ ꦑꦺꦴ ꦨꦒꦮꦴ ꦄꦴꦪꦱ꧀ꦩꦤ꧀ꦠꦁ ꦄꦴꦤꦤ꧀ꦢꦁ ꦄꦴꦩꦤ꧀ꦠꦺꦱꦶ – ‘‘ꦄꦴꦪꦴꦩꦴꦤꦤ꧀ꦢ, ꦪꦺꦤ ꦏꦺꦴꦛꦶꦒꦴꦩꦺꦴ ꦠꦺꦤꦸꦥꦱꦔ꧀ꦏꦩꦶꦱ꧀ꦱꦴꦩꦴ’’ꦠꦶ. ‘‘ꦌꦮꦁ, ꦨꦤ꧀ꦠꦺ’’ꦠꦶ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦨꦒꦮꦠꦺꦴ ꦥꦕ꧀ꦕꦱ꧀ꦱꦺꦴꦱꦶ. ꦄꦡ ꦑꦺꦴ ꦨꦒꦮꦴ ꦩꦲꦠꦴ ꦨꦶꦏ꧀ꦑꦸꦱꦔ꧀ꦓꦺꦤ ꦱꦢ꧀ꦣꦶꦁ ꦪꦺꦤ ꦏꦺꦴꦛꦶꦒꦴꦩꦺꦴ ꦠꦢꦮꦱꦫꦶ. ꦠꦠ꧀ꦫ ꦱꦸꦢꦁ ꦨꦒꦮꦴ ꦏꦺꦴꦛꦶꦒꦴꦩꦺ ꦮꦶꦲꦫꦠꦶ. ꦠꦠ꧀ꦫ ꦑꦺꦴ ꦨꦒꦮꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ –

‘‘ꦕꦠꦸꦤ꧀ꦤꦁ, ꦨꦶꦏ꧀ꦑꦮꦺ, ꦄꦫꦶꦪꦱꦕ꧀ꦕꦴꦤꦁ ꦄꦤꦤꦸꦧꦺꦴꦣꦴ ꦄꦥ꧀ꦥꦛꦶꦮꦺꦣꦴ ꦌꦮꦩꦶꦢꦁ ꦢꦷꦓꦩꦢ꧀ꦣꦴꦤꦁ ꦱꦤ꧀ꦣꦴꦮꦶꦠꦁ ꦱꦁꦱꦫꦶꦠꦁ ꦩꦩꦚ꧀ꦕꦺꦮ ꦠꦸꦩ꧀ꦲꦴꦏꦚ꧀ꦕ. ꦏꦠꦩꦺꦱꦁ ꦕꦠꦸꦤ꧀ꦤꦁ? ꦢꦸꦏ꧀ꦑꦱ꧀ꦱ, ꦨꦶꦏ꧀ꦑꦮꦺ, ꦄꦫꦶꦪꦱꦕ꧀ꦕꦱ꧀ꦱ ꦄꦤꦤꦸꦧꦺꦴꦣꦴ ꦄꦥ꧀ꦥꦛꦶꦮꦺꦣꦴ ꦌꦮꦩꦶꦢꦁ ꦢꦷꦓꦩꦢ꧀ꦣꦴꦤꦁ ꦱꦤ꧀ꦣꦴꦮꦶꦠꦁ ꦱꦁꦱꦫꦶꦠꦁ ꦩꦩꦚ꧀ꦕꦺꦮ ꦠꦸꦩ꧀ꦲꦴꦏꦚ꧀ꦕ. ꦢꦸꦏ꧀ꦑꦱꦩꦸꦢꦪꦱ꧀ꦱ, ꦨꦶꦏ꧀ꦑꦮꦺ, ꦄꦫꦶꦪꦱꦕ꧀ꦕꦱ꧀ꦱ ꦄꦤꦤꦸꦧꦺꦴꦣꦴ ꦄꦥ꧀ꦥꦛꦶꦮꦺꦣꦴ ꦌꦮꦩꦶꦢꦁ ꦢꦷꦓꦩꦢ꧀ꦣꦴꦤꦁ ꦱꦤ꧀ꦣꦴꦮꦶꦠꦁ ꦱꦁꦱꦫꦶꦠꦁ ꦩꦩꦚ꧀ꦕꦺꦮ ꦠꦸꦩ꧀ꦲꦴꦏꦚ꧀ꦕ. ꦢꦸꦏ꧀ꦑꦤꦶꦫꦺꦴꦣꦱ꧀ꦱ, ꦨꦶꦏ꧀ꦑꦮꦺ, ꦄꦫꦶꦪꦱꦕ꧀ꦕꦱ꧀ꦱ ꦄꦤꦤꦸꦧꦺꦴꦣꦴ ꦄꦥ꧀ꦥꦛꦶꦮꦺꦣꦴ ꦌꦮꦩꦶꦢꦁ ꦢꦷꦓꦩꦢ꧀ꦣꦴꦤꦁ ꦱꦤ꧀ꦣꦴꦮꦶꦠꦁ ꦱꦁꦱꦫꦶꦠꦁ ꦩꦩꦚ꧀ꦕꦺꦮ ꦠꦸꦩ꧀ꦲꦴꦏꦚ꧀ꦕ. ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦶꦪꦴ ꦥꦛꦶꦥꦢꦴꦪ, ꦨꦶꦏ꧀ꦑꦮꦺ, ꦄꦫꦶꦪꦱꦕ꧀ꦕꦱ꧀ꦱ ꦄꦤꦤꦸꦧꦺꦴꦣꦴ ꦄꦥ꧀ꦥꦛꦶꦮꦺꦣꦴ ꦌꦮꦩꦶꦢꦁ ꦢꦷꦓꦩꦢ꧀ꦣꦴꦤꦁ ꦱꦤ꧀ꦣꦴꦮꦶꦠꦁ ꦱꦁꦱꦫꦶꦠꦁ ꦩꦩꦚ꧀ꦕꦺꦮ ꦠꦸꦩ꧀ꦲꦴꦏꦚ꧀ꦕ. ꦠꦪꦶꦢꦁ, ꦨꦶꦏ꧀ꦑꦮꦺ, ꦢꦸꦏ꧀ꦑꦁ ꦄꦫꦶꦪꦱꦕ꧀ꦕꦁ ꦄꦤꦸꦧꦸꦢ꧀ꦣꦁ ꦥꦛꦶꦮꦶꦢ꧀ꦣꦁ, ꦢꦸꦏ꧀ꦑꦱꦩꦸꦢꦪꦁ [ꦢꦸꦏ꧀ꦑꦱꦩꦸꦢꦪꦺꦴ (ꦱ꧀ꦪꦴ.)] ꦄꦫꦶꦪꦱꦕ꧀ꦕꦁ ꦄꦤꦸꦧꦸꦢ꧀ꦣꦁ ꦥꦛꦶꦮꦶꦢ꧀ꦣꦁ, ꦢꦸꦏ꧀ꦑꦤꦶꦫꦺꦴꦣꦁ [ꦢꦸꦏ꧀ꦑꦤꦶꦫꦺꦴꦣꦺꦴ (ꦱ꧀ꦪꦴ.)] ꦄꦫꦶꦪꦱꦕ꧀ꦕꦁ ꦄꦤꦸꦧꦸꦢ꧀ꦣꦁ ꦥꦛꦶꦮꦶꦢ꧀ꦣꦁ, ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ ꦄꦫꦶꦪꦱꦕ꧀ꦕꦁ ꦄꦤꦸꦧꦸꦢ꧀ꦣꦁ ꦥꦛꦶꦮꦶꦢ꧀ꦣꦁ, ꦈꦕ꧀ꦖꦶꦤ꧀ꦤꦴ ꦨꦮꦠꦟ꧀ꦲꦴ, ꦑꦷꦟꦴ ꦨꦮꦤꦺꦠ꧀ꦠꦶ, ꦤꦠ꧀ꦡꦶꦢꦴꦤꦶ ꦥꦸꦤꦧ꧀ꦨꦮꦺꦴ’’ꦠꦶ. ꦆꦢꦩꦮꦺꦴꦕ ꦨꦒꦮꦴ. ꦆꦢꦁ ꦮꦠ꧀ꦮꦴꦤ ꦱꦸꦒꦠꦺꦴ ꦄꦡꦴꦥꦫꦁ ꦌꦠꦢꦮꦺꦴꦕ ꦱꦠ꧀ꦡꦴ –

‘‘ꦕꦠꦸꦤ꧀ꦤꦁ ꦄꦫꦶꦪꦱꦕ꧀ꦕꦴꦤꦁ, ꦪꦡꦴꦨꦹꦠꦁ ꦄꦢꦱ꧀ꦱꦤꦴ;

ꦱꦁꦱꦶꦠꦁ ꦢꦷꦓꦩꦢ꧀ꦣꦴꦤꦁ, ꦠꦴꦱꦸ ꦠꦴꦱ꧀ꦮꦺꦮ ꦗꦴꦠꦶꦱꦸ.

ꦠꦴꦤꦶ ꦌꦠꦴꦤꦶ ꦢꦶꦛ꧀ꦜꦴꦤꦶ, ꦨꦮꦤꦺꦠ꧀ꦠꦶ ꦱꦩꦹꦲꦠꦴ;

ꦈꦕ꧀ꦖꦶꦤ꧀ꦤꦁ ꦩꦹꦭꦁ ꦢꦸꦏ꧀ꦑꦱ꧀ꦱ, ꦤꦠ꧀ꦡꦶ ꦢꦴꦤꦶ ꦥꦸꦤꦧ꧀ꦨꦮꦺꦴ’’ꦠꦶ.

ꦠꦠ꧀ꦫꦥꦶ ꦱꦸꦢꦁ ꦨꦒꦮꦴ ꦏꦺꦴꦛꦶꦒꦴꦩꦺ ꦮꦶꦲꦫꦤ꧀ꦠꦺꦴ ꦌꦠꦢꦺꦮ ꦧꦲꦸꦭꦁ ꦨꦶꦏ꧀ꦑꦹꦤꦁ ꦣꦩ꧀ꦩꦶꦁ ꦏꦡꦁ ꦏꦫꦺꦴꦠꦶ – ‘‘ꦆꦠꦶ ꦱꦷꦭꦁ, ꦆꦠꦶ ꦱꦩꦴꦣꦶ, ꦆꦠꦶ ꦥꦚ꧀ꦚꦴ. ꦱꦷꦭꦥꦫꦶꦨꦴꦮꦶꦠꦺꦴ ꦱꦩꦴꦣꦶ ꦩꦲꦥ꧀ꦦꦭꦺꦴ ꦲꦺꦴꦠꦶ ꦩꦲꦴꦤꦶꦱꦁꦱꦺꦴ. ꦱꦩꦴꦣꦶꦥꦫꦶꦨꦴꦮꦶꦠꦴ ꦥꦚ꧀ꦚꦴ ꦩꦲꦥ꧀ꦦꦭꦴ ꦲꦺꦴꦠꦶ ꦩꦲꦴꦤꦶꦱꦁꦱꦴ. ꦥꦚ꧀ꦚꦴꦥꦫꦶꦨꦴꦮꦶꦠꦁ ꦕꦶꦠ꧀ꦠꦁ ꦱꦩ꧀ꦩꦢꦺꦮ ꦄꦴꦱꦮꦺꦲꦶ ꦮꦶꦩꦸꦕ꧀ꦕꦠꦶ, ꦱꦺꦪ꧀ꦪꦡꦶꦢꦁ – ꦏꦴꦩꦴꦱꦮꦴ, ꦨꦮꦴꦱꦮꦴ, ꦄꦮꦶꦗ꧀ꦗꦴꦱꦮꦴ’’ꦠꦶ.

ꦄꦤꦴꦮꦠ꧀ꦠꦶꦣꦩ꧀ꦩꦱꦩ꧀ꦧꦺꦴꦣꦶꦥꦫꦴꦪꦟꦴ

꧑꧕꧖. ꦄꦡ ꦑꦺꦴ ꦨꦒꦮꦴ ꦏꦺꦴꦛꦶꦒꦴꦩꦺ ꦪꦡꦴꦨꦶꦫꦤ꧀ꦠꦁ ꦮꦶꦲꦫꦶꦠ꧀ꦮꦴ ꦄꦴꦪꦱ꧀ꦩꦤ꧀ꦠꦁ ꦄꦴꦤꦤ꧀ꦢꦁ ꦄꦴꦩꦤ꧀ꦠꦺꦱꦶ – ‘‘ꦄꦴꦪꦴꦩꦴꦤꦤ꧀ꦢ, ꦪꦺꦤ ꦤꦴꦠꦶꦏꦴ [ꦤꦴꦢꦶꦏꦴ (ꦱ꧀ꦪꦴ. ꦥꦷ.)] ꦠꦺꦤꦸꦥꦔ꧀ꦏꦩꦶꦱ꧀ꦱꦴꦩꦴ’’ꦠꦶ. ‘‘ꦌꦮꦁ, ꦨꦤ꧀ꦠꦺ’’ꦠꦶ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦨꦒꦮꦠꦺꦴ ꦥꦕ꧀ꦕꦱ꧀ꦱꦺꦴꦱꦶ. ꦄꦡ ꦑꦺꦴ ꦨꦒꦮꦴ ꦩꦲꦠꦴ ꦨꦶꦏ꧀ꦑꦸꦱꦔ꧀ꦓꦺꦤ ꦱꦢ꧀ꦣꦶꦁ ꦪꦺꦤ ꦤꦴꦠꦶꦏꦴ ꦠꦢꦮꦱꦫꦶ. ꦠꦠ꧀ꦫꦥꦶ ꦱꦸꦢꦁ ꦨꦒꦮꦴ ꦤꦴꦠꦶꦏꦺ ꦮꦶꦲꦫꦠꦶ ꦒꦶꦚ꧀ꦗꦏꦴꦮꦱꦡꦺ. ꦄꦡ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦺꦴ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦱꦴꦭ꦳꧀ꦲꦺꦴ ꦤꦴꦩ, ꦨꦤ꧀ꦠꦺ, ꦨꦶꦏ꧀ꦑꦸ ꦤꦴꦠꦶꦏꦺ ꦏꦴꦭꦔ꧀ꦏꦠꦺꦴ, ꦠꦱ꧀ꦱ ꦏꦴ ꦒꦠꦶ, ꦏꦺꦴ ꦄꦨꦶꦱꦩ꧀ꦥꦫꦴꦪꦺꦴ? ꦤꦤ꧀ꦢꦴ ꦤꦴꦩ, ꦨꦤ꧀ꦠꦺ, ꦨꦶꦏ꧀ꦑꦸꦤꦷ ꦤꦴꦠꦶꦏꦺ ꦏꦴꦭꦔ꧀ꦏꦠꦴ, ꦠꦱ꧀ꦱꦴ ꦏꦴ ꦒꦠꦶ, ꦏꦺꦴ ꦄꦨꦶꦱꦩ꧀ꦥꦫꦴꦪꦺꦴ? ꦱꦸꦢꦠ꧀ꦠꦺꦴ ꦤꦴꦩ, ꦨꦤ꧀ꦠꦺ, ꦈꦥꦴꦱꦏꦺꦴ ꦤꦴꦠꦶꦏꦺ ꦏꦴꦭꦔ꧀ꦏꦠꦺꦴ, ꦠꦱ꧀ꦱ ꦏꦴ ꦒꦠꦶ, ꦏꦺꦴ ꦄꦨꦶꦱꦩ꧀ꦥꦫꦴꦪꦺꦴ? ꦱꦸꦗꦴꦠꦴ ꦤꦴꦩ, ꦨꦤ꧀ꦠꦺ, ꦈꦥꦴꦱꦶꦏꦴ ꦤꦴꦠꦶꦏꦺ ꦏꦴꦭꦔ꧀ꦏꦠꦴ, ꦠꦱ꧀ꦱꦴ ꦏꦴ ꦒꦠꦶ, ꦏꦺꦴ ꦄꦨꦶꦱꦩ꧀ꦥꦫꦴꦪꦺꦴ? ꦏꦸꦏ꧀ꦏꦸꦛꦺꦴ [ꦏꦏꦸꦣꦺꦴ (ꦱ꧀ꦪꦴ.)] ꦤꦴꦩ, ꦨꦤ꧀ꦠꦺ, ꦈꦥꦴꦱꦏꦺꦴ ꦤꦴꦠꦶꦏꦺ ꦏꦴꦭꦔ꧀ꦏꦠꦺꦴ, ꦠꦱ꧀ꦱ ꦏꦴ ꦒꦠꦶ, ꦏꦺꦴ ꦄꦨꦶꦱꦩ꧀ꦥꦫꦴꦪꦺꦴ? ꦏꦴꦭ꦳ꦶꦩ꧀ꦧꦺꦴ [ꦏꦴꦭꦶꦔ꧀ꦒꦺꦴ (ꦥꦷ.), ꦏꦴꦫꦭ꦳ꦶꦩ꧀ꦧꦺꦴ (ꦱ꧀ꦪꦴ.)] ꦤꦴꦩ, ꦨꦤ꧀ꦠꦺ, ꦈꦥꦴꦱꦏꦺꦴ…ꦥꦺ… ꦤꦶꦏꦛꦺꦴ ꦤꦴꦩ, ꦨꦤ꧀ꦠꦺ, ꦈꦥꦴꦱꦏꦺꦴ… ꦏꦛꦶꦱ꧀ꦱꦲꦺꦴ [ꦏꦛꦶꦱ꧀ꦱꦨꦺꦴ (ꦱꦷ. ꦥꦷ.)] ꦤꦴꦩ, ꦨꦤ꧀ꦠꦺ, ꦈꦥꦴꦱꦏꦺꦴ… ꦠꦸꦛ꧀ꦜꦺꦴ ꦤꦴꦩ, ꦨꦤ꧀ꦠꦺ, ꦈꦥꦴꦱꦏꦺꦴ… ꦱꦤ꧀ꦠꦸꦛ꧀ꦜꦺꦴ ꦤꦴꦩ, ꦨꦤ꧀ꦠꦺ, ꦈꦥꦴꦱꦏꦺꦴ… ꦨꦢ꧀ꦢꦺꦴ [ꦨꦛꦺꦴ (ꦱ꧀ꦪꦴ.)] ꦤꦴꦩ, ꦨꦤ꧀ꦠꦺ, ꦈꦥꦴꦱꦏꦺꦴ… ꦱꦸꦨꦢ꧀ꦢꦺꦴ [ꦱꦸꦨꦛꦺꦴ (ꦱ꧀ꦪꦴ.)] ꦤꦴꦩ, ꦨꦤ꧀ꦠꦺ, ꦈꦥꦴꦱꦏꦺꦴ ꦤꦴꦠꦶꦏꦺ ꦏꦴꦭꦔ꧀ꦏꦠꦺꦴ, ꦠꦱ꧀ꦱ ꦏꦴ ꦒꦠꦶ, ꦏꦺꦴ ꦄꦨꦶꦱꦩ꧀ꦥꦫꦴꦪꦺꦴ’’ꦠꦶ?

꧑꧕꧗. ‘‘ꦱꦴꦭ꦳꧀ꦲꦺꦴ, ꦄꦴꦤꦤ꧀ꦢ, ꦨꦶꦏ꧀ꦑꦸ ꦄꦴꦱꦮꦴꦤꦁ ꦑꦪꦴ ꦄꦤꦴꦱꦮꦁ ꦕꦺꦠꦺꦴꦮꦶꦩꦸꦠ꧀ꦠꦶꦁ ꦥꦚ꧀ꦚꦴꦮꦶꦩꦸꦠ꧀ꦠꦶꦁ ꦢꦶꦛ꧀ꦜꦺꦮ ꦣꦩ꧀ꦩꦺ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦈꦥꦱꦩ꧀ꦥꦗ꧀ꦗ ꦮꦶꦲꦴꦱꦶ. ꦤꦤ꧀ꦢꦴ, ꦄꦴꦤꦤ꧀ꦢ, ꦨꦶꦏ꧀ꦑꦸꦤꦷ ꦥꦚ꧀ꦕꦤ꧀ꦤꦁ ꦎꦫꦩ꧀ꦨꦴꦒꦶꦪꦴꦤꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦎꦥꦥꦴꦠꦶꦏꦴ ꦠꦠ꧀ꦡ ꦥꦫꦶꦤꦶꦧ꧀ꦧꦴꦪꦶꦤꦷ ꦄꦤꦴꦮꦠ꧀ꦠꦶꦣꦩ꧀ꦩꦴ ꦠꦱ꧀ꦩꦴ ꦭꦺꦴꦏꦴ. ꦱꦸꦢꦠ꧀ꦠꦺꦴ, ꦄꦴꦤꦤ꧀ꦢ, ꦈꦥꦴꦱꦏꦺꦴ ꦠꦶꦟ꧀ꦟꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦫꦴꦒꦢꦺꦴꦱꦩꦺꦴꦲꦴꦤꦁ ꦠꦤꦸꦠ꧀ꦠꦴ ꦱꦏꦢꦴꦒꦴꦩꦷ ꦱꦏꦶꦢꦺꦮ ꦆꦩꦁ ꦭꦺꦴꦏꦁ ꦄꦴꦒꦤ꧀ꦠ꧀ꦮꦴ ꦢꦸꦏ꧀ꦑꦱ꧀ꦱꦤ꧀ꦠꦁ ꦏꦫꦶꦱ꧀ꦱꦠꦶ. ꦱꦸꦗꦴꦠꦴ, ꦄꦴꦤꦤ꧀ꦢ, ꦈꦥꦴꦱꦶꦏꦴ ꦠꦶꦟ꧀ꦟꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦱꦺꦴꦠꦴꦥꦤ꧀ꦤꦴ ꦄꦮꦶꦤꦶꦥꦴꦠꦣꦩ꧀ꦩꦴ ꦤꦶꦪꦠꦴ ꦱꦩ꧀ꦧꦺꦴꦣꦶꦥꦫꦴꦪꦟꦴ [ꦥꦫꦴꦪꦤꦴ (ꦱꦷ. ꦱ꧀ꦪꦴ. ꦥꦷ. ꦏ.)]. ꦏꦸꦏ꧀ꦏꦸꦛꦺꦴ, ꦄꦴꦤꦤ꧀ꦢ, ꦈꦥꦴꦱꦏꦺꦴ ꦥꦚ꧀ꦕꦤ꧀ꦤꦁ ꦎꦫꦩ꧀ꦨꦴꦒꦶꦪꦴꦤꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦎꦥꦥꦴꦠꦶꦏꦺꦴ ꦠꦠ꧀ꦡ ꦥꦫꦶꦤꦶꦧ꧀ꦧꦴꦪꦷ ꦄꦤꦴꦮꦠ꧀ꦠꦶꦣꦩ꧀ꦩꦺꦴ ꦠꦱ꧀ꦩꦴ ꦭꦺꦴꦏꦴ. ꦏꦴꦭ꦳ꦶꦩ꧀ꦧꦺꦴ, ꦄꦴꦤꦤ꧀ꦢ, ꦈꦥꦴꦱꦏꦺꦴ…ꦥꦺ… ꦤꦶꦏꦛꦺꦴ, ꦄꦴꦤꦤ꧀ꦢ, ꦈꦥꦴꦱꦏꦺꦴ… ꦏꦛꦶꦱ꧀ꦱꦲꦺꦴ, ꦄꦴꦤꦤ꧀ꦢ, ꦈꦥꦴꦱꦏꦺꦴ… ꦠꦸꦛ꧀ꦜꦺꦴ, ꦄꦴꦤꦤ꧀ꦢ, ꦈꦥꦴꦱꦏꦺꦴ … ꦱꦤ꧀ꦠꦸꦛ꧀ꦜꦺꦴ, ꦄꦴꦤꦤ꧀ꦢ, ꦈꦥꦴꦱꦏꦺꦴ… ꦨꦢ꧀ꦢꦺꦴ, ꦄꦴꦤꦤ꧀ꦢ, ꦈꦥꦴꦱꦏꦺꦴ… ꦱꦸꦨꦢ꧀ꦢꦺꦴ, ꦄꦴꦤꦤ꧀ꦢ, ꦈꦥꦴꦱꦏꦺꦴ ꦥꦚ꧀ꦕꦤ꧀ꦤꦁ ꦎꦫꦩ꧀ꦨꦴꦒꦶꦪꦴꦤꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦎꦥꦥꦴꦠꦶꦏꦺꦴ ꦠꦠ꧀ꦡ ꦥꦫꦶꦤꦶꦧ꧀ꦧꦴꦪꦷ ꦄꦤꦴꦮꦠ꧀ꦠꦶꦣꦩ꧀ꦩꦺꦴ ꦠꦱ꧀ꦩꦴ ꦭꦺꦴꦏꦴ. ꦥꦫꦺꦴꦥꦚ꧀ꦚꦴꦱꦁ, ꦄꦴꦤꦤ꧀ꦢ, ꦤꦴꦠꦶꦏꦺ ꦈꦥꦴꦱꦏꦴ ꦏꦴꦭꦔ꧀ꦏꦠꦴ, ꦥꦚ꧀ꦕꦤ꧀ꦤꦁ ꦎꦫꦩ꧀ꦨꦴꦒꦶꦪꦴꦤꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦎꦥꦥꦴꦠꦶꦏꦴ ꦠꦠ꧀ꦡ ꦥꦫꦶꦤꦶꦧ꧀ꦧꦴꦪꦶꦤꦺꦴ ꦄꦤꦴꦮꦠ꧀ꦠꦶꦣꦩ꧀ꦩꦴ ꦠꦱ꧀ꦩꦴ ꦭꦺꦴꦏꦴ. ꦱꦴꦣꦶꦏꦴ ꦤꦮꦸꦠꦶ [ꦖꦴꦣꦶꦏꦴ ꦤꦮꦸꦠꦶ (ꦱ꧀ꦪꦴ.)], ꦄꦴꦤꦤ꧀ꦢ, ꦤꦴꦠꦶꦏꦺ ꦈꦥꦴꦱꦏꦴ ꦏꦴꦭꦔ꧀ꦏꦠꦴ ꦠꦶꦟ꧀ꦟꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦫꦴꦒꦢꦺꦴꦱꦩꦺꦴꦲꦴꦤꦁ ꦠꦤꦸꦠ꧀ꦠꦴ ꦱꦏꦢꦴꦒꦴꦩꦶꦤꦺꦴ ꦱꦏꦶꦢꦺꦮ ꦆꦩꦁ ꦭꦺꦴꦏꦁ ꦄꦴꦒꦤ꧀ꦠ꧀ꦮꦴ ꦢꦸꦏ꧀ꦑꦱ꧀ꦱꦤ꧀ꦠꦁ ꦏꦫꦶꦱ꧀ꦱꦤ꧀ꦠꦶ. ꦱꦴꦠꦶꦫꦺꦏꦴꦤꦶ [ꦢꦱꦴꦠꦶꦫꦺꦏꦴꦤꦶ (ꦱ꧀ꦪꦴ.)], ꦄꦴꦤꦤ꧀ꦢ, ꦥꦚ꧀ꦕꦱꦠꦴꦤꦶ ꦤꦴꦠꦶꦏꦺ ꦈꦥꦴꦱꦏꦴ ꦏꦴꦭꦔ꧀ꦏꦠꦴ, ꦠꦶꦟ꧀ꦟꦁ ꦱꦁꦪꦺꦴꦗꦤꦴꦤꦁ ꦥꦫꦶꦏ꧀ꦑꦪꦴ ꦱꦺꦴꦠꦴꦥꦤ꧀ꦤꦴ ꦄꦮꦶꦤꦶꦥꦴꦠꦣꦩ꧀ꦩꦴ ꦤꦶꦪꦠꦴ ꦱꦩ꧀ꦧꦺꦴꦣꦶꦥꦫꦴꦪꦟꦴ.

ꦣꦩ꧀ꦩꦴꦢꦴꦱꦣꦩ꧀ꦩꦥꦫꦶꦪꦴꦪꦴ

꧑꧕꧘. ‘‘ꦄꦤꦕ꧀ꦖꦫꦶꦪꦁ ꦑꦺꦴ ꦥꦤꦺꦠꦁ, ꦄꦴꦤꦤ꧀ꦢ, ꦪꦁ ꦩꦤꦸꦱ꧀ꦱꦨꦹꦠꦺꦴ ꦏꦴꦭꦔ꧀ꦏꦫꦺꦪ꧀ꦪ. ꦠꦱ꧀ꦩꦶꦁꦪꦺꦮ [ꦠꦱ꧀ꦩꦶꦁ ꦠꦱ꧀ꦩꦶꦁ ꦕꦺ (ꦱꦷ. ꦥꦷ.), ꦠꦱ꧀ꦩꦶꦁ ꦠꦱ꧀ꦩꦶꦁ ꦑꦺꦴ (ꦱ꧀ꦪꦴ.)] ꦏꦴꦭꦔ꧀ꦏꦠꦺ ꦠꦡꦴꦒꦠꦁ ꦈꦥꦱꦔ꧀ꦏꦩꦶꦠ꧀ꦮꦴ ꦌꦠꦩꦠ꧀ꦡꦁ ꦥꦸꦕ꧀ꦖꦶꦱ꧀ꦱꦡ, ꦮꦶꦲꦺꦱꦴ ꦲꦺꦱꦴ, ꦄꦴꦤꦤ꧀ꦢ, ꦠꦡꦴꦒꦠꦱ꧀ꦱ. ꦠꦱ꧀ꦩꦴꦠꦶꦲꦴꦤꦤ꧀ꦢ, ꦣꦩ꧀ꦩꦴꦢꦴꦱꦁ ꦤꦴꦩ ꦣꦩ꧀ꦩꦥꦫꦶꦪꦴꦪꦁ ꦢꦺꦱꦺꦱ꧀ꦱꦴꦩꦶ, ꦪꦺꦤ ꦱꦩꦤ꧀ꦤꦴꦒꦠꦺꦴ ꦄꦫꦶꦪꦱꦴꦮꦏꦺꦴ ꦄꦴꦏꦔ꧀ꦑꦩꦴꦤꦺꦴ ꦄꦠ꧀ꦠꦤꦴꦮ ꦄꦠ꧀ꦠꦴꦤꦁ ꦧ꧀ꦪꦴꦏꦫꦺꦪ꧀ꦪ – ‘ꦑꦷꦟꦤꦶꦫꦪꦺꦴꦩ꧀ꦲꦶ ꦑꦷꦟꦠꦶꦫꦕ꧀ꦖꦴꦤꦪꦺꦴꦤꦶ ꦑꦷꦟꦥꦺꦠ꧀ꦠꦶꦮꦶꦱꦪꦺꦴ ꦑꦷꦟꦴꦥꦴꦪꦢꦸꦒ꧀ꦒꦠꦶꦮꦶꦤꦶꦥꦴꦠꦺꦴ, ꦱꦺꦴꦠꦴꦥꦤ꧀ꦤꦺꦴꦲꦩꦱ꧀ꦩꦶ ꦄꦮꦶꦤꦶꦥꦴꦠꦣꦩ꧀ꦩꦺꦴ ꦤꦶꦪꦠꦺꦴ ꦱꦩ꧀ꦧꦺꦴꦣꦶꦥꦫꦴꦪꦟꦺꦴ’ꦠꦶ.

꧑꧕꧙. ‘‘ꦏꦠꦩꦺꦴ ꦕ ꦱꦺꦴ, ꦄꦴꦤꦤ꧀ꦢ, ꦣꦩ꧀ꦩꦴꦢꦴꦱꦺꦴ ꦣꦩ꧀ꦩꦥꦫꦶꦪꦴꦪꦺꦴ, ꦪꦺꦤ ꦱꦩꦤ꧀ꦤꦴꦒꦠꦺꦴ ꦄꦫꦶꦪꦱꦴꦮꦏꦺꦴ ꦄꦴꦏꦔ꧀ꦑꦩꦴꦤꦺꦴ ꦄꦠ꧀ꦠꦤꦴꦮ ꦄꦠ꧀ꦠꦴꦤꦁ ꦧ꧀ꦪꦴꦏꦫꦺꦪ꧀ꦪ – ‘ꦑꦷꦟꦤꦶꦫꦪꦺꦴꦩ꧀ꦲꦶ ꦑꦷꦟꦠꦶꦫꦕ꧀ꦖꦴꦤꦪꦺꦴꦤꦶ ꦑꦷꦟꦥꦺꦠ꧀ꦠꦶꦮꦶꦱꦪꦺꦴ ꦑꦷꦟꦴꦥꦴꦪꦢꦸꦒ꧀ꦒꦠꦶꦮꦶꦤꦶꦥꦴꦠꦺꦴ, ꦱꦺꦴꦠꦴꦥꦤ꧀ꦤꦺꦴꦲꦩꦱ꧀ꦩꦶ ꦄꦮꦶꦤꦶꦥꦴꦠꦣꦩ꧀ꦩꦺꦴ ꦤꦶꦪꦠꦺꦴ ꦱꦩ꧀ꦧꦺꦴꦣꦶꦥꦫꦴꦪꦟꦺꦴ’ꦠꦶ?

‘‘ꦆꦣꦴꦤꦤ꧀ꦢ, ꦄꦫꦶꦪꦱꦴꦮꦏꦺꦴ ꦧꦸꦢ꧀ꦣꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦺꦴ ꦲꦺꦴꦠꦶ – ‘ꦆꦠꦶꦥꦶ ꦱꦺꦴ ꦨꦒꦮꦴ ꦄꦫꦲꦁ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ ꦮꦶꦗ꧀ꦗꦴꦕꦫꦟꦱꦩ꧀ꦥꦤ꧀ꦤꦺꦴ ꦱꦸꦒꦠꦺꦴ ꦭꦺꦴꦏꦮꦶꦢꦹ ꦄꦤꦸꦠ꧀ꦠꦫꦺꦴ ꦥꦸꦫꦶꦱꦢꦩ꧀ꦩꦱꦴꦫꦡꦶ ꦱꦠ꧀ꦡꦴ ꦢꦺꦮꦩꦤꦸꦱ꧀ꦱꦴꦤꦁ ꦧꦸꦢ꧀ꦣꦺꦴ ꦨꦒꦮꦴ’ꦠꦶ.

‘‘ꦣꦩ꧀ꦩꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦺꦴ ꦲꦺꦴꦠꦶ – ‘ꦱ꧀ꦮꦴꦏ꧀ꦑꦴꦠꦺꦴ ꦨꦒꦮꦠꦴ ꦣꦩ꧀ꦩꦺꦴ ꦱꦤ꧀ꦢꦶꦛ꧀ꦜꦶꦏꦺꦴ ꦄꦏꦴꦭꦶꦏꦺꦴ ꦌꦲꦶꦥꦱ꧀ꦱꦶꦏꦺꦴ ꦎꦥꦤꦺꦪ꧀ꦪꦶꦏꦺꦴ ꦥꦕ꧀ꦕꦠ꧀ꦠꦁ ꦮꦺꦢꦶꦠꦧ꧀ꦧꦺꦴ ꦮꦶꦚ꧀ꦚꦹꦲꦷ’ꦠꦶ.

‘‘ꦱꦔ꧀ꦓꦺ ꦄꦮꦺꦕ꧀ꦕꦥ꧀ꦥꦱꦴꦢꦺꦤ ꦱꦩꦤ꧀ꦤꦴꦒꦠꦺꦴ ꦲꦺꦴꦠꦶ – ‘ꦱꦸꦥ꧀ꦥꦛꦶꦥꦤ꧀ꦤꦺꦴ ꦨꦒꦮꦠꦺꦴ ꦱꦴꦮꦏꦱꦔ꧀ꦓꦺꦴ, ꦈꦗꦸꦥ꧀ꦥꦛꦶꦥꦤ꧀ꦤꦺꦴ ꦨꦒꦮꦠꦺꦴ ꦱꦴꦮꦏꦱꦔ꧀ꦓꦺꦴ, ꦚꦴꦪꦥ꧀ꦥꦛꦶꦥꦤ꧀ꦤꦺꦴ ꦨꦒꦮꦠꦺꦴ ꦱꦴꦮꦏꦱꦔ꧀ꦓꦺꦴ, ꦱꦴꦩꦷꦕꦶꦥ꧀ꦥꦛꦶꦥꦤ꧀ꦤꦺꦴ ꦨꦒꦮꦠꦺꦴ ꦱꦴꦮꦏꦱꦔ꧀ꦓꦺꦴ ꦪꦢꦶꦢꦁ ꦕꦠ꧀ꦠꦴꦫꦶ ꦥꦸꦫꦶꦱꦪꦸꦒꦴꦤꦶ ꦄꦛ꧀ꦜ ꦥꦸꦫꦶꦱꦥꦸꦒ꧀ꦒꦭꦴ, ꦌꦱ ꦨꦒꦮꦠꦺꦴ ꦱꦴꦮꦏꦱꦔ꧀ꦓꦺꦴ ꦄꦴꦲꦸꦤꦺꦪ꧀ꦪꦺꦴ ꦥꦴꦲꦸꦤꦺꦪ꧀ꦪꦺꦴ ꦢꦏ꧀ꦑꦶꦟꦺꦪ꧀ꦪꦺꦴ ꦄꦚ꧀ꦗꦭꦶꦏꦫꦟꦷꦪꦺꦴ ꦄꦤꦸꦠ꧀ꦠꦫꦁ ꦥꦸꦚ꧀ꦚꦏ꧀ꦑꦺꦠ꧀ꦠꦁ ꦭꦺꦴꦏꦱ꧀ꦱꦴ’ꦠꦶ.

‘‘ꦄꦫꦶꦪꦏꦤ꧀ꦠꦺꦲꦶ ꦱꦷꦭꦺꦲꦶ ꦱꦩꦤ꧀ꦤꦴꦒꦠꦺꦴ ꦲꦺꦴꦠꦶ ꦄꦑꦟ꧀ꦝꦺꦲꦶ ꦄꦕ꧀ꦖꦶꦢ꧀ꦢꦺꦲꦶ ꦄꦱꦧꦭꦺꦲꦶ ꦄꦏꦩ꧀ꦩꦴꦱꦺꦲꦶ ꦨꦸꦗꦶꦱ꧀ꦱꦺꦲꦶ ꦮꦶꦚ꧀ꦚꦹꦥꦱꦠ꧀ꦡꦺꦲꦶ ꦄꦥꦫꦴꦩꦛ꧀ꦜꦺꦲꦶ ꦱꦩꦴꦣꦶꦱꦁꦮꦠ꧀ꦠꦤꦶꦏꦺꦲꦶ.

‘‘ꦄꦪꦁ ꦑꦺꦴ ꦱꦺꦴ, ꦄꦴꦤꦤ꧀ꦢ, ꦣꦩ꧀ꦩꦴꦢꦴꦱꦺꦴ ꦣꦩ꧀ꦩꦥꦫꦶꦪꦴꦪꦺꦴ, ꦪꦺꦤ ꦱꦩꦤ꧀ꦤꦴꦒꦠꦺꦴ ꦄꦫꦶꦪꦱꦴꦮꦏꦺꦴ ꦄꦴꦏꦔ꧀ꦑꦩꦴꦤꦺꦴ ꦄꦠ꧀ꦠꦤꦴꦮ ꦄꦠ꧀ꦠꦴꦤꦁ ꦧ꧀ꦪꦴꦏꦫꦺꦪ꧀ꦪ – ‘ꦑꦷꦟꦤꦶꦫꦪꦺꦴꦩ꧀ꦲꦶ ꦑꦷꦟꦠꦶꦫꦕ꧀ꦖꦴꦤꦪꦺꦴꦤꦶ ꦑꦷꦟꦥꦺꦠ꧀ꦠꦶꦮꦶꦱꦪꦺꦴ ꦑꦷꦟꦴꦥꦴꦪꦢꦸꦒ꧀ꦒꦠꦶꦮꦶꦤꦶꦥꦴꦠꦺꦴ, ꦱꦺꦴꦠꦴꦥꦤ꧀ꦤꦺꦴꦲꦩꦱ꧀ꦩꦶ ꦄꦮꦶꦤꦶꦥꦴꦠꦣꦩ꧀ꦩꦺꦴ ꦤꦶꦪꦠꦺꦴ ꦱꦩ꧀ꦧꦺꦴꦣꦶꦥꦫꦴꦪꦟꦺꦴ’’’ꦠꦶ.

ꦠꦠ꧀ꦫꦥꦶ ꦱꦸꦢꦁ ꦨꦒꦮꦴ ꦤꦴꦠꦶꦏꦺ ꦮꦶꦲꦫꦤ꧀ꦠꦺꦴ ꦒꦶꦚ꧀ꦗꦏꦴꦮꦱꦡꦺ ꦌꦠꦢꦺꦮ ꦧꦲꦸꦭꦁ ꦨꦶꦏ꧀ꦑꦹꦤꦁ ꦣꦩ꧀ꦩꦶꦁ ꦏꦡꦁ ꦏꦫꦺꦴꦠꦶ –

‘‘ꦆꦠꦶ ꦱꦷꦭꦁ ꦆꦠꦶ ꦱꦩꦴꦣꦶ ꦆꦠꦶ ꦥꦚ꧀ꦚꦴ. ꦱꦷꦭꦥꦫꦶꦨꦴꦮꦶꦠꦺꦴ ꦱꦩꦴꦣꦶ ꦩꦲꦥ꧀ꦦꦭꦺꦴ ꦲꦺꦴꦠꦶ ꦩꦲꦴꦤꦶꦱꦁꦱꦺꦴ. ꦱꦩꦴꦣꦶꦥꦫꦶꦨꦴꦮꦶꦠꦴ ꦥꦚ꧀ꦚꦴ ꦩꦲꦥ꧀ꦦꦭꦴ ꦲꦺꦴꦠꦶ ꦩꦲꦴꦤꦶꦱꦁꦱꦴ. ꦥꦚ꧀ꦚꦴꦥꦫꦶꦨꦴꦮꦶꦠꦁ ꦕꦶꦠ꧀ꦠꦁ ꦱꦩ꧀ꦩꦢꦺꦮ ꦄꦴꦱꦮꦺꦲꦶ ꦮꦶꦩꦸꦕ꧀ꦕꦠꦶ, ꦱꦺꦪ꧀ꦪꦡꦶꦢꦁ – ꦏꦴꦩꦴꦱꦮꦴ, ꦨꦮꦴꦱꦮꦴ, ꦄꦮꦶꦗ꧀ꦗꦴꦱꦮꦴ’’ꦠꦶ.

꧑꧖꧐. ꦄꦡ ꦑꦺꦴ ꦨꦒꦮꦴ ꦤꦴꦠꦶꦏꦺ ꦪꦡꦴꦨꦶꦫꦤ꧀ꦠꦁ ꦮꦶꦲꦫꦶꦠ꧀ꦮꦴ ꦄꦴꦪꦱ꧀ꦩꦤ꧀ꦠꦁ ꦄꦴꦤꦤ꧀ꦢꦁ ꦄꦴꦩꦤ꧀ꦠꦺꦱꦶ – ‘‘ꦄꦴꦪꦴꦩꦴꦤꦤ꧀ꦢ, ꦪꦺꦤ ꦮꦺꦱꦴꦭꦷ ꦠꦺꦤꦸꦥꦱꦔ꧀ꦏꦩꦶꦱ꧀ꦱꦴꦩꦴ’’ꦠꦶ. ‘‘ꦌꦮꦁ, ꦨꦤ꧀ꦠꦺ’’ꦠꦶ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦨꦒꦮꦠꦺꦴ ꦥꦕ꧀ꦕꦱ꧀ꦱꦺꦴꦱꦶ. ꦄꦡ ꦑꦺꦴ ꦨꦒꦮꦴ ꦩꦲꦠꦴ ꦨꦶꦏ꧀ꦑꦸꦱꦔ꧀ꦓꦺꦤ ꦱꦢ꧀ꦣꦶꦁ ꦪꦺꦤ ꦮꦺꦱꦴꦭꦷ ꦠꦢꦮꦱꦫꦶ. ꦠꦠ꧀ꦫ ꦱꦸꦢꦁ ꦨꦒꦮꦴ ꦮꦺꦱꦴꦭꦶꦪꦁ ꦮꦶꦲꦫꦠꦶ ꦄꦩ꧀ꦧꦥꦴꦭꦶꦮꦤꦺ. ꦠꦠ꧀ꦫ ꦑꦺꦴ ꦨꦒꦮꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ –

‘‘ꦱꦠꦺꦴ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦮꦶꦲꦫꦺꦪ꧀ꦪ ꦱꦩ꧀ꦥꦗꦴꦤꦺꦴ, ꦄꦪꦁ ꦮꦺꦴ ꦄꦩ꧀ꦲꦴꦏꦁ ꦄꦤꦸꦱꦴꦱꦤꦷ. ꦏꦡꦚ꧀ꦕ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦱꦠꦺꦴ ꦲꦺꦴꦠꦶ? ꦆꦣ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦏꦴꦪꦺ ꦏꦴꦪꦴꦤꦸꦥꦱ꧀ꦱꦷ ꦮꦶꦲꦫꦠꦶ ꦄꦴꦠꦴꦥꦷ ꦱꦩ꧀ꦥꦗꦴꦤꦺꦴ ꦱꦠꦶꦩꦴ ꦮꦶꦤꦺꦪ꧀ꦪ ꦭꦺꦴꦏꦺ ꦄꦨꦶꦗ꧀ꦙꦴꦢꦺꦴꦩꦤꦱ꧀ꦱꦁ. ꦮꦺꦢꦤꦴꦱꦸ ꦮꦺꦢꦤꦴꦤꦸꦥꦱ꧀ꦱꦷ…ꦥꦺ… ꦕꦶꦠ꧀ꦠꦺ ꦕꦶꦠ꧀ꦠꦴꦤꦸꦥꦱ꧀ꦱꦷ…ꦥꦺ… ꦣꦩ꧀ꦩꦺꦱꦸ ꦣꦩ꧀ꦩꦴꦤꦸꦥꦱ꧀ꦱꦷ ꦮꦶꦲꦫꦠꦶ ꦄꦴꦠꦴꦥꦷ ꦱꦩ꧀ꦥꦗꦴꦤꦺꦴ ꦱꦠꦶꦩꦴ ꦮꦶꦤꦺꦪ꧀ꦪ ꦭꦺꦴꦏꦺ ꦄꦨꦶꦗ꧀ꦙꦴꦢꦺꦴꦩꦤꦱ꧀ꦱꦁ. ꦌꦮꦁ ꦑꦺꦴ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦱꦠꦺꦴ ꦲꦺꦴꦠꦶ.

‘‘ꦏꦡꦚ꧀ꦕ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦱꦩ꧀ꦥꦗꦴꦤꦺꦴ ꦲꦺꦴꦠꦶ? ꦆꦣ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦄꦨꦶꦏ꧀ꦏꦤ꧀ꦠꦺ ꦥꦛꦶꦏ꧀ꦏꦤ꧀ꦠꦺ ꦱꦩ꧀ꦥꦗꦴꦤꦏꦴꦫꦷ ꦲꦺꦴꦠꦶ, ꦄꦴꦭꦺꦴꦏꦶꦠꦺ ꦮꦶꦭꦺꦴꦏꦶꦠꦺ ꦱꦩ꧀ꦥꦗꦴꦤꦏꦴꦫꦷ ꦲꦺꦴꦠꦶ, ꦱꦩꦶꦚ꧀ꦗꦶꦠꦺ ꦥꦱꦴꦫꦶꦠꦺ ꦱꦩ꧀ꦥꦗꦴꦤꦏꦴꦫꦷ ꦲꦺꦴꦠꦶ, ꦱꦔ꧀ꦓꦴꦛꦶꦥꦠ꧀ꦠꦕꦷꦮꦫꦣꦴꦫꦟꦺ ꦱꦩ꧀ꦥꦗꦴꦤꦏꦴꦫꦷ ꦲꦺꦴꦠꦶ, ꦄꦱꦶꦠꦺ ꦥꦷꦠꦺ ꦑꦴꦪꦶꦠꦺ ꦱꦴꦪꦶꦠꦺ ꦱꦩ꧀ꦥꦗꦴꦤꦏꦴꦫꦷ ꦲꦺꦴꦠꦶ, ꦈꦕ꧀ꦕꦴꦫꦥꦱ꧀ꦱꦴꦮꦏꦩ꧀ꦩꦺ ꦱꦩ꧀ꦥꦗꦴꦤꦏꦴꦫꦷ ꦲꦺꦴꦠꦶ, ꦒꦠꦺ ꦜꦶꦠꦺ ꦤꦶꦱꦶꦤ꧀ꦤꦺ ꦱꦸꦠ꧀ꦠꦺ ꦗꦴꦒꦫꦶꦠꦺ ꦨꦴꦱꦶꦠꦺ ꦠꦸꦟ꧀ꦲꦷꦨꦴꦮꦺ ꦱꦩ꧀ꦥꦗꦴꦤꦏꦴꦫꦷ ꦲꦺꦴꦠꦶ. ꦌꦮꦁ ꦑꦺꦴ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦱꦩ꧀ꦥꦗꦴꦤꦺꦴ ꦲꦺꦴꦠꦶ. ꦱꦠꦺꦴ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦮꦶꦲꦫꦺꦪ꧀ꦪ ꦱꦩ꧀ꦥꦗꦴꦤꦺꦴ, ꦄꦪꦁ ꦮꦺꦴ ꦄꦩ꧀ꦲꦴꦏꦁ ꦄꦤꦸꦱꦴꦱꦤꦷ’’ꦠꦶ.

ꦄꦩ꧀ꦧꦥꦴꦭꦷꦒꦟꦶꦏꦴ

꧑꧖꧑. ꦄꦱ꧀ꦱꦺꦴꦱꦶ ꦑꦺꦴ ꦄꦩ꧀ꦧꦥꦴꦭꦷ ꦒꦟꦶꦏꦴ – ‘‘ꦨꦒꦮꦴ ꦏꦶꦫ ꦮꦺꦱꦴꦭꦶꦁ ꦄꦤꦸꦥ꧀ꦥꦠ꧀ꦠꦺꦴ ꦮꦺꦱꦴꦭꦶꦪꦁ ꦮꦶꦲꦫꦠꦶ ꦩꦪ꧀ꦲꦁ ꦄꦩ꧀ꦧꦮꦤꦺ’’ꦠꦶ. ꦄꦡ ꦑꦺꦴ ꦄꦩ꧀ꦧꦥꦴꦭꦷ ꦒꦟꦶꦏꦴ ꦨꦢ꧀ꦢꦴꦤꦶ ꦨꦢ꧀ꦢꦴꦤꦶ ꦪꦴꦤꦴꦤꦶ ꦪꦺꦴꦗꦴꦥꦺꦠ꧀ꦮꦴ ꦨꦢ꧀ꦢꦁ ꦨꦢ꧀ꦢꦁ ꦪꦴꦤꦁ ꦄꦨꦶꦫꦸꦲꦶꦠ꧀ꦮꦴ ꦨꦢ꧀ꦢꦺꦲꦶ ꦨꦢ꧀ꦢꦺꦲꦶ ꦪꦴꦤꦺꦲꦶ ꦮꦺꦱꦴꦭꦶꦪꦴ ꦤꦶꦪ꧀ꦪꦴꦱꦶ. ꦪꦺꦤ ꦱꦏꦺꦴ ꦄꦴꦫꦴꦩꦺꦴ ꦠꦺꦤ ꦥꦴꦪꦴꦱꦶ. ꦪꦴꦮꦠꦶꦏꦴ ꦪꦴꦤꦱ꧀ꦱ ꦨꦹꦩꦶ, ꦪꦴꦤꦺꦤ ꦒꦤ꧀ꦠ꧀ꦮꦴ, ꦪꦴꦤꦴ ꦥꦕ꧀ꦕꦺꦴꦫꦺꦴꦲꦶꦠ꧀ꦮꦴ ꦥꦠ꧀ꦠꦶꦏꦴꦮ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦁ ꦑꦺꦴ ꦄꦩ꧀ꦧꦥꦴꦭꦶꦁ ꦒꦟꦶꦏꦁ ꦨꦒꦮꦴ ꦣꦩ꧀ꦩꦶꦪꦴ ꦏꦡꦴꦪ ꦱꦤ꧀ꦢꦱ꧀ꦱꦺꦱꦶ ꦱꦩꦴꦢꦥꦺꦱꦶ ꦱꦩꦸꦠ꧀ꦠꦺꦗꦺꦱꦶ ꦱꦩ꧀ꦥꦲꦁꦱꦺꦱꦶ. ꦄꦡ ꦑꦺꦴ ꦄꦩ꧀ꦧꦥꦴꦭꦷ ꦒꦟꦶꦏꦴ ꦨꦒꦮꦠꦴ ꦣꦩ꧀ꦩꦶꦪꦴ ꦏꦡꦴꦪ ꦱꦤ꧀ꦢꦱ꧀ꦱꦶꦠꦴ ꦱꦩꦴꦢꦥꦶꦠꦴ ꦱꦩꦸꦠ꧀ꦠꦺꦗꦶꦠꦴ ꦱꦩ꧀ꦥꦲꦁꦱꦶꦠꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦄꦣꦶꦮꦴꦱꦺꦠꦸ ꦩꦺ, ꦨꦤ꧀ꦠꦺ, ꦨꦒꦮꦴ ꦱ꧀ꦮꦴꦠꦤꦴꦪ ꦨꦠ꧀ꦠꦁ ꦱꦢ꧀ꦣꦶꦁ ꦨꦶꦏ꧀ꦑꦸꦱꦔ꧀ꦓꦺꦤꦴ’’ꦠꦶ. ꦄꦣꦶꦮꦴꦱꦺꦱꦶ ꦨꦒꦮꦴ ꦠꦸꦟ꧀ꦲꦷꦨꦴꦮꦺꦤ. ꦄꦡ ꦑꦺꦴ ꦄꦩ꧀ꦧꦥꦴꦭꦷ ꦒꦟꦶꦏꦴ ꦨꦒꦮꦠꦺꦴ ꦄꦣꦶꦮꦴꦱꦤꦁ ꦮꦶꦢꦶꦠ꧀ꦮꦴ ꦈꦛ꧀ꦜꦴꦪꦴꦱꦤꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦥꦢꦏ꧀ꦑꦶꦟꦁ ꦏꦠ꧀ꦮꦴ ꦥꦏ꧀ꦏꦴꦩꦶ.

ꦄꦱ꧀ꦱꦺꦴꦱꦸꦁ ꦑꦺꦴ ꦮꦺꦱꦴꦭꦶꦏꦴ ꦭꦶꦕ꧀ꦖꦮꦷ – ‘‘ꦨꦒꦮꦴ ꦏꦶꦫ ꦮꦺꦱꦴꦭꦶꦁ ꦄꦤꦸꦥ꧀ꦥꦠ꧀ꦠꦺꦴ ꦮꦺꦱꦴꦭꦶꦪꦁ ꦮꦶꦲꦫꦠꦶ ꦄꦩ꧀ꦧꦥꦴꦭꦶꦮꦤꦺ’’ꦠꦶ. ꦄꦡ ꦑꦺꦴ ꦠꦺ ꦭꦶꦕ꧀ꦖꦮꦷ ꦨꦢ꧀ꦢꦴꦤꦶ ꦨꦢ꧀ꦢꦴꦤꦶ ꦪꦴꦤꦴꦤꦶ ꦪꦺꦴꦗꦴꦥꦺꦠ꧀ꦮꦴ ꦨꦢ꧀ꦢꦁ ꦨꦢ꧀ꦢꦁ ꦪꦴꦤꦁ ꦄꦨꦶꦫꦸꦲꦶꦠ꧀ꦮꦴ ꦨꦢ꧀ꦢꦺꦲꦶ ꦨꦢ꧀ꦢꦺꦲꦶ ꦪꦴꦤꦺꦲꦶ ꦮꦺꦱꦴꦭꦶꦪꦴ ꦤꦶꦪ꧀ꦪꦶꦁꦱꦸ. ꦠꦠ꧀ꦫ ꦌꦏꦕ꧀ꦕꦺ ꦭꦶꦕ꧀ꦖꦮꦷ ꦤꦷꦭꦴ ꦲꦺꦴꦤ꧀ꦠꦶ ꦤꦷꦭꦮꦟ꧀ꦟꦴ ꦤꦷꦭꦮꦠ꧀ꦡꦴ ꦤꦷꦭꦴꦭꦔ꧀ꦏꦴꦫꦴ, ꦌꦏꦕ꧀ꦕꦺ ꦭꦶꦕ꧀ꦖꦮꦷ ꦥꦷꦠꦴ ꦲꦺꦴꦤ꧀ꦠꦶ ꦥꦷꦠꦮꦟ꧀ꦟꦴ ꦥꦷꦠꦮꦠ꧀ꦡꦴ ꦥꦷꦠꦴꦭꦔ꧀ꦏꦴꦫꦴ, ꦌꦏꦕ꧀ꦕꦺ ꦭꦶꦕ꧀ꦖꦮꦷ ꦭꦺꦴꦲꦶꦠꦴ ꦲꦺꦴꦤ꧀ꦠꦶ ꦭꦺꦴꦲꦶꦠꦮꦟ꧀ꦟꦴ ꦭꦺꦴꦲꦶꦠꦮꦠ꧀ꦡꦴ ꦭꦺꦴꦲꦶꦠꦴꦭꦔ꧀ꦏꦴꦫꦴ, ꦌꦏꦕ꧀ꦕꦺ ꦭꦶꦕ꧀ꦖꦮꦷ ꦎꦢꦴꦠꦴ ꦲꦺꦴꦤ꧀ꦠꦶ ꦎꦢꦴꦠꦮꦟ꧀ꦟꦴ ꦎꦢꦴꦠꦮꦠ꧀ꦡꦴ ꦎꦢꦴꦠꦴꦭꦔ꧀ꦏꦴꦫꦴ. ꦄꦡ ꦑꦺꦴ ꦄꦩ꧀ꦧꦥꦴꦭꦷ ꦒꦟꦶꦏꦴ ꦢꦲꦫꦴꦤꦁ ꦢꦲꦫꦴꦤꦁ ꦭꦶꦕ꧀ꦖꦮꦷꦤꦁ ꦄꦏ꧀ꦑꦺꦤ ꦄꦏ꧀ꦑꦁ ꦕꦏ꧀ꦏꦺꦤ ꦕꦏ꧀ꦏꦁ ꦪꦸꦒꦺꦤ ꦪꦸꦒꦁ ꦥꦛꦶꦮꦛ꧀ꦛꦺꦱꦶ [ꦥꦫꦶꦮꦠ꧀ꦠꦺꦱꦶ (ꦮꦶ. ꦩꦲꦴꦮꦒ꧀ꦒ)]. ꦄꦡ ꦑꦺꦴ ꦠꦺ ꦭꦶꦕ꧀ꦖꦮꦷ ꦄꦩ꧀ꦧꦥꦴꦭꦶꦁ ꦒꦟꦶꦏꦁ ꦌꦠꦢꦮꦺꦴꦕꦸꦁ – ‘‘ꦏꦶꦁ, ꦗꦺ ꦄꦩ꧀ꦧꦥꦴꦭꦶ, ꦢꦲꦫꦴꦤꦁ ꦢꦲꦫꦴꦤꦁ ꦭꦶꦕ꧀ꦖꦮꦷꦤꦁ ꦄꦏ꧀ꦑꦺꦤ ꦄꦏ꧀ꦑꦁ ꦕꦏ꧀ꦏꦺꦤ ꦕꦏ꧀ꦏꦁ ꦪꦸꦒꦺꦤ ꦪꦸꦒꦁ ꦥꦛꦶꦮꦛ꧀ꦛꦺꦱꦷ’’ꦠꦶ? ‘‘ꦠꦡꦴ ꦲꦶ ꦥꦤ ꦩꦺ, ꦄꦪ꧀ꦪꦥꦸꦠ꧀ꦠꦴ, ꦨꦒꦮꦴ ꦤꦶꦩꦤ꧀ꦠꦶꦠꦺꦴ ꦱ꧀ꦮꦴꦠꦤꦴꦪ ꦨꦠ꧀ꦠꦁ ꦱꦢ꧀ꦣꦶꦁ ꦨꦶꦏ꧀ꦑꦸꦱꦔ꧀ꦓꦺꦤꦴ’’ꦠꦶ. ‘‘ꦢꦺꦲꦶ, ꦗꦺ ꦄꦩ꧀ꦧꦥꦴꦭꦶ, ꦌꦠꦁ [ꦌꦏꦁ (ꦏ.)] ꦨꦠ꧀ꦠꦁ ꦱꦠꦱꦲꦱ꧀ꦱꦺꦤꦴ’’ꦠꦶ. ‘‘ꦱꦕꦺꦥꦶ ꦩꦺ, ꦄꦪ꧀ꦪꦥꦸꦠ꧀ꦠꦴ, ꦮꦺꦱꦴꦭꦶꦁ ꦱꦴꦲꦴꦫꦁ ꦢꦱ꧀ꦱꦡ [ꦢꦗ꧀ꦗꦺꦪ꧀ꦪꦴꦡ (ꦮꦶ. ꦩꦲꦴꦮꦒ꧀ꦒ)], ꦌꦮꦩꦲꦁ ꦠꦁ [ꦌꦮꦩ꧀ꦥꦶ ꦩꦲꦤ꧀ꦠꦁ (ꦱ꧀ꦪꦴ.), ꦌꦮꦁ ꦩꦲꦤ꧀ꦠꦁ (ꦱꦷ. ꦥꦷ.)] ꦨꦠ꧀ꦠꦁ ꦤ ꦢꦱ꧀ꦱꦴꦩꦷ’’ꦠꦶ [ꦤꦺꦮ ꦢꦗ꧀ꦗꦴꦲꦁ ꦠꦁ ꦨꦠ꧀ꦠꦤ꧀ꦠꦶ (ꦮꦶ. ꦩꦲꦴꦮꦒ꧀ꦒ)]. ꦄꦡ ꦑꦺꦴ ꦠꦺ ꦭꦶꦕ꧀ꦖꦮꦷ ꦄꦔ꧀ꦒꦸꦭꦶꦁ ꦦꦺꦴꦛꦺꦱꦸꦁ – ‘‘ꦗꦶꦠꦩ꧀ꦲ [ꦗꦶꦠꦩ꧀ꦲꦴ (ꦧꦲꦹꦱꦸ)] ꦮꦠ ꦨꦺꦴ ꦄꦩ꧀ꦧꦏꦴꦪ, ꦗꦶꦠꦩ꧀ꦲ ꦮꦠ ꦨꦺꦴ ꦄꦩ꧀ꦧꦏꦴꦪꦴ’’ꦠꦶ [‘‘ꦗꦶꦠꦩ꧀ꦲꦴ ꦮꦠ ꦨꦺꦴ ꦄꦩ꧀ꦧꦥꦴꦭꦶꦏꦴꦪ ꦮꦚ꧀ꦕꦶꦠꦩ꧀ꦲꦴ ꦮꦠ ꦨꦺꦴ ꦄꦩ꧀ꦧꦥꦴꦭꦶꦏꦴꦪꦴ’’ꦠꦶ (ꦱ꧀ꦪꦴ.)].

ꦄꦡ ꦑꦺꦴ ꦠꦺ ꦭꦶꦕ꧀ꦖꦮꦷ ꦪꦺꦤ ꦄꦩ꧀ꦧꦥꦴꦭꦶꦮꦤꦁ ꦠꦺꦤ ꦥꦴꦪꦶꦁꦱꦸ. ꦄꦢ꧀ꦢꦱꦴ ꦑꦺꦴ ꦨꦒꦮꦴ ꦠꦺ ꦭꦶꦕ꧀ꦖꦮꦷ ꦢꦹꦫꦠꦺꦴꦮ ꦄꦴꦒꦕ꧀ꦖꦤ꧀ꦠꦺ. ꦢꦶꦱ꧀ꦮꦴꦤ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ – ‘‘ꦪꦺꦱꦁ [ꦪꦺꦲꦶ (ꦮꦶ. ꦩꦲꦴꦮꦒ꧀ꦒ)], ꦨꦶꦏ꧀ꦑꦮꦺ, ꦨꦶꦏ꧀ꦑꦹꦤꦁ ꦢꦺꦮꦴ ꦠꦴꦮꦠꦶꦁꦱꦴ ꦄꦢꦶꦛ꧀ꦜꦥꦸꦧ꧀ꦧꦴ, ꦎꦭꦺꦴꦏꦺꦡ, ꦨꦶꦏ꧀ꦑꦮꦺ, ꦭꦶꦕ꧀ꦖꦮꦶꦥꦫꦶꦱꦁ; ꦄꦥꦭꦺꦴꦏꦺꦡ, ꦨꦶꦏ꧀ꦑꦮꦺ, ꦭꦶꦕ꧀ꦖꦮꦶꦥꦫꦶꦱꦁ; ꦈꦥꦱꦁꦲꦫꦡ, ꦨꦶꦏ꧀ꦑꦮꦺ, ꦭꦶꦕ꧀ꦖꦮꦶꦥꦫꦶꦱꦁ – ꦠꦴꦮꦠꦶꦁꦱꦱꦢꦶꦱ’’ꦤ꧀ꦠꦶ. ꦄꦡ ꦑꦺꦴ ꦠꦺ ꦭꦶꦕ꧀ꦖꦮꦷ ꦪꦴꦮꦠꦶꦏꦴ ꦪꦴꦤꦱ꧀ꦱ ꦨꦹꦩꦶ, ꦪꦴꦤꦺꦤ ꦒꦤ꧀ꦠ꧀ꦮꦴ, ꦪꦴꦤꦴ ꦥꦕ꧀ꦕꦺꦴꦫꦺꦴꦲꦶꦠ꧀ꦮꦴ ꦥꦠ꧀ꦠꦶꦏꦴꦮ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶꦁꦱꦸ; ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶꦁꦱꦸ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦺ ꦑꦺꦴ ꦠꦺ ꦭꦶꦕ꧀ꦖꦮꦷ ꦨꦒꦮꦴ ꦣꦩ꧀ꦩꦶꦪꦴ ꦏꦡꦴꦪ ꦱꦤ꧀ꦢꦱ꧀ꦱꦺꦱꦶ ꦱꦩꦴꦢꦥꦺꦱꦶ ꦱꦩꦸꦠ꧀ꦠꦺꦗꦺꦱꦶ ꦱꦩ꧀ꦥꦲꦁꦱꦺꦱꦶ. ꦄꦡ ꦑꦺꦴ ꦠꦺ ꦭꦶꦕ꧀ꦖꦮꦷ ꦨꦒꦮꦠꦴ ꦣꦩ꧀ꦩꦶꦪꦴ ꦏꦡꦴꦪ ꦱꦤ꧀ꦢꦱ꧀ꦱꦶꦠꦴ ꦱꦩꦴꦢꦥꦶꦠꦴ ꦱꦩꦸꦠ꧀ꦠꦺꦗꦶꦠꦴ ꦱꦩ꧀ꦥꦲꦁꦱꦶꦠꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕꦸꦁ – ‘‘ꦄꦣꦶꦮꦴꦱꦺꦠꦸ ꦤꦺꦴ, ꦨꦤ꧀ꦠꦺ, ꦨꦒꦮꦴ ꦱ꧀ꦮꦴꦠꦤꦴꦪ ꦨꦠ꧀ꦠꦁ ꦱꦢ꧀ꦣꦶꦁ ꦨꦶꦏ꧀ꦑꦸꦱꦔ꧀ꦓꦺꦤꦴ’’ꦠꦶ. ꦄꦡ ꦑꦺꦴ ꦨꦒꦮꦴ ꦠꦺ ꦭꦶꦕ꧀ꦖꦮꦷ ꦌꦠꦢꦮꦺꦴꦕ – ‘‘ꦄꦣꦶꦮꦸꦠ꧀ꦡꦁ [ꦄꦣꦶꦮꦴꦱꦶꦠꦁ (ꦱ꧀ꦪꦴ.)] ꦑꦺꦴ ꦩꦺ, ꦭꦶꦕ꧀ꦖꦮꦷ, ꦱ꧀ꦮꦴꦠꦤꦴꦪ ꦄꦩ꧀ꦧꦥꦴꦭꦶꦪꦴ ꦒꦟꦶꦏꦴꦪ ꦨꦠ꧀ꦠ’’ꦤ꧀ꦠꦶ. ꦄꦡ ꦑꦺꦴ ꦠꦺ ꦭꦶꦕ꧀ꦖꦮꦷ ꦄꦔ꧀ꦒꦸꦭꦶꦁ ꦦꦺꦴꦛꦺꦱꦸꦁ – ‘‘ꦗꦶꦠꦩ꧀ꦲ ꦮꦠ ꦨꦺꦴ ꦄꦩ꧀ꦧꦏꦴꦪ, ꦗꦶꦠꦩ꧀ꦲ ꦮꦠ ꦨꦺꦴ ꦄꦩ꧀ꦧꦏꦴꦪꦴ’’ꦠꦶ. ꦄꦡ ꦑꦺꦴ ꦠꦺ ꦭꦶꦕ꧀ꦖꦮꦷ ꦨꦒꦮꦠꦺꦴ ꦨꦴꦱꦶꦠꦁ ꦄꦨꦶꦤꦤ꧀ꦢꦶꦠ꧀ꦮꦴ ꦄꦤꦸꦩꦺꦴꦢꦶꦠ꧀ꦮꦴ ꦈꦛ꧀ꦜꦴꦪꦴꦱꦤꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦥꦢꦏ꧀ꦑꦶꦟꦁ ꦏꦠ꧀ꦮꦴ ꦥꦏ꧀ꦏꦩꦶꦁꦱꦸ.

꧑꧖꧒. ꦄꦡ ꦑꦺꦴ ꦄꦩ꧀ꦧꦥꦴꦭꦷ ꦒꦟꦶꦏꦴ ꦠꦱ꧀ꦱꦴ ꦫꦠ꧀ꦠꦶꦪꦴ ꦄꦕ꧀ꦕꦪꦺꦤ ꦱꦏꦺ ꦄꦴꦫꦴꦩꦺ ꦥꦟꦷꦠꦁ ꦑꦴꦢꦤꦷꦪꦁ ꦨꦺꦴꦗꦤꦷꦪꦁ ꦥꦛꦶꦪꦴꦢꦴꦥꦺꦠ꧀ꦮꦴ ꦨꦒꦮꦠꦺꦴ ꦏꦴꦭꦁ ꦄꦴꦫꦺꦴꦕꦴꦥꦺꦱꦶ – ‘‘ꦏꦴꦭꦺꦴ, ꦨꦤ꧀ꦠꦺ, ꦤꦶꦛ꧀ꦜꦶꦠꦁ ꦨꦠ꧀ꦠ’’ꦤ꧀ꦠꦶ. ꦄꦡ ꦑꦺꦴ ꦨꦒꦮꦴ ꦥꦸꦧ꧀ꦧꦟ꧀ꦲꦱꦩꦪꦁ ꦤꦶꦮꦴꦱꦺꦠ꧀ꦮꦴ ꦥꦠ꧀ꦠꦕꦷꦮꦫꦩꦴꦢꦴꦪ ꦱꦢ꧀ꦣꦶꦁ ꦨꦶꦏ꧀ꦑꦸꦱꦔ꧀ꦓꦺꦤ ꦪꦺꦤ ꦄꦩ꧀ꦧꦥꦴꦭꦶꦪꦴ ꦒꦟꦶꦏꦴꦪ ꦤꦶꦮꦺꦱꦤꦁ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦥꦚ꧀ꦚꦠ꧀ꦠꦺ ꦄꦴꦱꦤꦺ ꦤꦶꦱꦷꦢꦶ. ꦄꦡ ꦑꦺꦴ ꦄꦩ꧀ꦧꦥꦴꦭꦷ ꦒꦟꦶꦏꦴ ꦧꦸꦢ꧀ꦣꦥ꧀ꦥꦩꦸꦑꦁ ꦨꦶꦏ꧀ꦑꦸꦱꦔ꧀ꦓꦁ ꦥꦟꦷꦠꦺꦤ ꦑꦴꦢꦤꦷꦪꦺꦤ ꦨꦺꦴꦗꦤꦷꦪꦺꦤ ꦱꦲꦠ꧀ꦡꦴ ꦱꦤ꧀ꦠꦥ꧀ꦥꦺꦱꦶ ꦱꦩ꧀ꦥꦮꦴꦫꦺꦱꦶ. ꦄꦡ ꦑꦺꦴ ꦄꦩ꧀ꦧꦥꦴꦭꦷ ꦒꦟꦶꦏꦴ ꦨꦒꦮꦤ꧀ꦠꦁ ꦨꦸꦠ꧀ꦠꦴꦮꦶꦁ ꦎꦤꦷꦠꦥꦠ꧀ꦠꦥꦴꦟꦶꦁ ꦄꦚ꧀ꦚꦠꦫꦁ ꦤꦷꦕꦁ ꦄꦴꦱꦤꦁ ꦒꦲꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦴ ꦑꦺꦴ ꦄꦩ꧀ꦧꦥꦴꦭꦷ ꦒꦟꦶꦏꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦆꦩꦴꦲꦁ, ꦨꦤ꧀ꦠꦺ, ꦄꦴꦫꦴꦩꦁ ꦧꦸꦢ꧀ꦣꦥ꧀ꦥꦩꦸꦑꦱ꧀ꦱ ꦨꦶꦏ꧀ꦑꦸꦱꦔ꧀ꦓꦱ꧀ꦱ ꦢꦩ꧀ꦩꦷ’’ꦠꦶ. ꦥꦛꦶꦒ꧀ꦒꦲꦺꦱꦶ ꦨꦒꦮꦴ ꦄꦴꦫꦴꦩꦁ. ꦄꦡ ꦑꦺꦴ ꦨꦒꦮꦴ ꦄꦩ꧀ꦧꦥꦴꦭꦶꦁ ꦒꦟꦶꦏꦁ ꦣꦩ꧀ꦩꦶꦪꦴ ꦏꦡꦴꦪ ꦱꦤ꧀ꦢꦱ꧀ꦱꦺꦠ꧀ꦮꦴ ꦱꦩꦴꦢꦥꦺꦠ꧀ꦮꦴ ꦱꦩꦸꦠ꧀ꦠꦺꦗꦺꦠ꧀ꦮꦴ ꦱꦩ꧀ꦥꦲꦁꦱꦺꦠ꧀ꦮꦴ ꦈꦛ꧀ꦜꦴꦪꦴꦱꦤꦴ ꦥꦏ꧀ꦏꦴꦩꦶ. ꦠꦠ꧀ꦫꦥꦶ ꦱꦸꦢꦁ ꦨꦒꦮꦴ ꦮꦺꦱꦴꦭꦶꦪꦁ ꦮꦶꦲꦫꦤ꧀ꦠꦺꦴ ꦄꦩ꧀ꦧꦥꦴꦭꦶꦮꦤꦺ ꦌꦠꦢꦺꦮ ꦧꦲꦸꦭꦁ ꦨꦶꦏ꧀ꦑꦹꦤꦁ ꦣꦩ꧀ꦩꦶꦁ ꦏꦡꦁ ꦏꦫꦺꦴꦠꦶ – ‘‘ꦆꦠꦶ ꦱꦷꦭꦁ, ꦆꦠꦶ ꦱꦩꦴꦣꦶ, ꦆꦠꦶ ꦥꦚ꧀ꦚꦴ. ꦱꦷꦭꦥꦫꦶꦨꦴꦮꦶꦠꦺꦴ ꦱꦩꦴꦣꦶ ꦩꦲꦥ꧀ꦦꦭꦺꦴ ꦲꦺꦴꦠꦶ ꦩꦲꦴꦤꦶꦱꦁꦱꦺꦴ. ꦱꦩꦴꦣꦶꦥꦫꦶꦨꦴꦮꦶꦠꦴ ꦥꦚ꧀ꦚꦴ ꦩꦲꦥ꧀ꦦꦭꦴ ꦲꦺꦴꦠꦶ ꦩꦲꦴꦤꦶꦱꦁꦱꦴ. ꦥꦚ꧀ꦚꦴꦥꦫꦶꦨꦴꦮꦶꦠꦁ ꦕꦶꦠ꧀ꦠꦁ ꦱꦩ꧀ꦩꦢꦺꦮ ꦄꦴꦱꦮꦺꦲꦶ ꦮꦶꦩꦸꦕ꧀ꦕꦠꦶ, ꦱꦺꦪ꧀ꦪꦡꦶꦢꦁ – ꦏꦴꦩꦴꦱꦮꦴ, ꦨꦮꦴꦱꦮꦴ, ꦄꦮꦶꦗ꧀ꦗꦴꦱꦮꦴ’’ꦠꦶ.

ꦮꦺꦭ꦳ꦸꦮꦒꦴꦩꦮꦱ꧀ꦱꦹꦥꦒꦩꦤꦁ

꧑꧖꧓. ꦄꦡ ꦑꦺꦴ ꦨꦒꦮꦴ ꦄꦩ꧀ꦧꦥꦴꦭꦶꦮꦤꦺ ꦪꦡꦴꦨꦶꦫꦤ꧀ꦠꦁ ꦮꦶꦲꦫꦶꦠ꧀ꦮꦴ ꦄꦴꦪꦱ꧀ꦩꦤ꧀ꦠꦁ ꦄꦴꦤꦤ꧀ꦢꦁ ꦄꦴꦩꦤ꧀ꦠꦺꦱꦶ – ‘‘ꦄꦴꦪꦴꦩꦴꦤꦤ꧀ꦢ, ꦪꦺꦤ ꦮꦺꦭ꦳ꦸꦮꦒꦴꦩꦏꦺꦴ [ꦧꦺꦭ꦳ꦸꦮꦒꦴꦩꦏꦺꦴ (ꦱꦷ. ꦥꦷ.)] ꦠꦺꦤꦸꦥꦱꦔ꧀ꦏꦩꦶꦱ꧀ꦱꦴꦩꦴ’’ꦠꦶ. ‘‘ꦌꦮꦁ, ꦨꦤ꧀ꦠꦺ’’ꦠꦶ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦨꦒꦮꦠꦺꦴ ꦥꦕ꧀ꦕꦱ꧀ꦱꦺꦴꦱꦶ. ꦄꦡ ꦑꦺꦴ ꦨꦒꦮꦴ ꦩꦲꦠꦴ ꦨꦶꦏ꧀ꦑꦸꦱꦔ꧀ꦓꦺꦤ ꦱꦢ꧀ꦣꦶꦁ ꦪꦺꦤ ꦮꦺꦭ꦳ꦸꦮꦒꦴꦩꦏꦺꦴ ꦠꦢꦮꦱꦫꦶ. ꦠꦠ꧀ꦫ ꦱꦸꦢꦁ ꦨꦒꦮꦴ ꦮꦺꦭ꦳ꦸꦮꦒꦴꦩꦏꦺ ꦮꦶꦲꦫꦠꦶ. ꦠꦠ꧀ꦫ ꦑꦺꦴ ꦨꦒꦮꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ – ‘‘ꦌꦡ ꦠꦸꦩ꧀ꦲꦺ, ꦨꦶꦏ꧀ꦑꦮꦺ, ꦱꦩꦤ꧀ꦠꦴ ꦮꦺꦱꦴꦭꦶꦁ ꦪꦡꦴꦩꦶꦠ꧀ꦠꦁ ꦪꦡꦴꦱꦤ꧀ꦢꦶꦛ꧀ꦜꦁ ꦪꦡꦴꦱꦩ꧀ꦨꦠ꧀ꦠꦁ ꦮꦱ꧀ꦱꦁ ꦈꦥꦺꦡ [ꦈꦥꦒꦕ꧀ꦖꦡ (ꦱ꧀ꦪꦴ.)]. ꦄꦲꦁ ꦥꦤ ꦆꦣꦺꦮ ꦮꦺꦭ꦳ꦸꦮꦒꦴꦩꦏꦺ ꦮꦱ꧀ꦱꦁ ꦈꦥꦒꦕ꧀ꦖꦴꦩꦷ’’ꦠꦶ. ‘‘ꦌꦮꦁ, ꦨꦤ꧀ꦠꦺ’’ꦠꦶ ꦑꦺꦴ ꦠꦺ ꦨꦶꦏ꧀ꦑꦹ ꦨꦒꦮꦠꦺꦴ ꦥꦛꦶꦱ꧀ꦱꦸꦠ꧀ꦮꦴ ꦱꦩꦤ꧀ꦠꦴ ꦮꦺꦱꦴꦭꦶꦁ ꦪꦡꦴꦩꦶꦠ꧀ꦠꦁ ꦪꦡꦴꦱꦤ꧀ꦢꦶꦛ꧀ꦜꦁ ꦪꦡꦴꦱꦩ꧀ꦨꦠ꧀ꦠꦁ ꦮꦱ꧀ꦱꦁ ꦈꦥꦒꦕ꧀ꦖꦶꦁꦱꦸ. ꦨꦒꦮꦴ ꦥꦤ ꦠꦠ꧀ꦡꦺꦮ ꦮꦺꦭ꦳ꦸꦮꦒꦴꦩꦏꦺ ꦮꦱ꧀ꦱꦁ ꦈꦥꦒꦕ꧀ꦖꦶ.

꧑꧖꧔. ꦄꦡ ꦑꦺꦴ ꦨꦒꦮꦠꦺꦴ ꦮꦱ꧀ꦱꦹꦥꦒꦠꦱ꧀ꦱ ꦑꦫꦺꦴ ꦄꦴꦧꦴꦣꦺꦴ ꦈꦥ꧀ꦥꦗ꧀ꦗꦶ, ꦧꦴꦭ꦳꧀ꦲꦴ ꦮꦺꦢꦤꦴ ꦮꦠ꧀ꦠꦤ꧀ꦠꦶ ꦩꦴꦫꦟꦤ꧀ꦠꦶꦏꦴ. ꦠꦴ ꦱꦸꦢꦁ ꦨꦒꦮꦴ ꦱꦠꦺꦴ ꦱꦩ꧀ꦥꦗꦴꦤꦺꦴ ꦄꦣꦶꦮꦴꦱꦺꦱꦶ ꦄꦮꦶꦲꦚ꧀ꦚꦩꦴꦤꦺꦴ. ꦄꦡ ꦑꦺꦴ ꦨꦒꦮꦠꦺꦴ ꦌꦠꦢꦲꦺꦴꦱꦶ – ‘‘ꦤ ꦑꦺꦴ ꦩꦺꦠꦁ ꦥꦠꦶꦫꦹꦥꦁ, ꦪ꧀ꦮꦴꦲꦁ ꦄꦤꦴꦩꦤ꧀ꦠꦺꦠ꧀ꦮꦴ ꦈꦥꦛ꧀ꦜꦴꦏꦺ ꦄꦤꦥꦭꦺꦴꦏꦺꦠ꧀ꦮꦴ ꦨꦶꦏ꧀ꦑꦸꦱꦔ꧀ꦓꦁ ꦥꦫꦶꦤꦶꦧ꧀ꦧꦴꦪꦺꦪ꧀ꦪꦁ. ꦪꦁꦤꦹꦤꦴꦲꦁ ꦆꦩꦁ ꦄꦴꦧꦴꦣꦁ ꦮꦷꦫꦶꦪꦺꦤ ꦥꦛꦶꦥꦟꦴꦩꦺꦠ꧀ꦮꦴ ꦗꦷꦮꦶꦠꦱꦔ꧀ꦑꦴꦫꦁ ꦄꦣꦶꦛ꧀ꦜꦴꦪ ꦮꦶꦲꦫꦺꦪ꧀ꦪ’’ꦤ꧀ꦠꦶ. ꦄꦡ ꦑꦺꦴ ꦨꦒꦮꦴ ꦠꦁ ꦄꦴꦧꦴꦣꦁ ꦮꦷꦫꦶꦪꦺꦤ ꦥꦛꦶꦥꦟꦴꦩꦺꦠ꧀ꦮꦴ ꦗꦷꦮꦶꦠꦱꦔ꧀ꦑꦴꦫꦁ ꦄꦣꦶꦛ꧀ꦜꦴꦪ ꦮꦶꦲꦴꦱꦶ. ꦄꦡ ꦑꦺꦴ ꦨꦒꦮꦠꦺꦴ ꦱꦺꦴ ꦄꦴꦧꦴꦣꦺꦴ ꦥꦛꦶꦥꦱ꧀ꦱꦩ꧀ꦨꦶ. ꦄꦡ ꦑꦺꦴ ꦨꦒꦮꦴ ꦒꦶꦭꦴꦤꦴ ꦮꦸꦛ꧀ꦜꦶꦠꦺꦴ [ꦒꦶꦭꦴꦤꦮꦸꦛ꧀ꦜꦶꦠꦺꦴ (ꦱꦢ꧀ꦢꦤꦷꦠꦶ)] ꦄꦕꦶꦫꦮꦸꦛ꧀ꦜꦶꦠꦺꦴ ꦒꦺꦭꦚ꧀ꦚꦴ ꦮꦶꦲꦴꦫꦴ ꦤꦶꦏ꧀ꦑꦩ꧀ꦩ ꦮꦶꦲꦴꦫꦥꦕ꧀ꦖꦴꦪꦴꦪꦁ ꦥꦚ꧀ꦚꦠ꧀ꦠꦺ ꦄꦴꦱꦤꦺ ꦤꦶꦱꦷꦢꦶ. ꦄꦡ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦺꦴ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦢꦶꦛ꧀ꦜꦺꦴ ꦩꦺ, ꦨꦤ꧀ꦠꦺ, ꦨꦒꦮꦠꦺꦴ ꦦꦴꦱꦸ; ꦢꦶꦛ꧀ꦜꦁ ꦩꦺ, ꦨꦤ꧀ꦠꦺ, ꦨꦒꦮꦠꦺꦴ ꦑꦩꦤꦷꦪꦁ, ꦄꦥꦶ ꦕ ꦩꦺ, ꦨꦤ꧀ꦠꦺ, ꦩꦣꦸꦫꦏꦗꦴꦠꦺꦴ ꦮꦶꦪ ꦏꦴꦪꦺꦴ. ꦢꦶꦱꦴꦥꦶ ꦩꦺ ꦤ ꦥꦏ꧀ꦑꦴꦪꦤ꧀ꦠꦶ; ꦣꦩ꧀ꦩꦴꦥꦶ ꦩꦁ ꦤ ꦥꦛꦶꦨꦤ꧀ꦠꦶ ꦨꦒꦮꦠꦺꦴ ꦒꦺꦭꦚ꧀ꦚꦺꦤ, ꦄꦥꦶ ꦕ ꦩꦺ, ꦨꦤ꧀ꦠꦺ, ꦄꦲꦺꦴꦱꦶ ꦏꦴꦕꦶꦢꦺꦮ ꦄꦱ꧀ꦱꦴꦱꦩꦠ꧀ꦠꦴ – ‘ꦤ ꦠꦴꦮ ꦨꦒꦮꦴ ꦥꦫꦶꦤꦶꦧ꧀ꦧꦴꦪꦶꦱ꧀ꦱꦠꦶ, ꦤ ꦪꦴꦮ ꦨꦒꦮꦴ ꦨꦶꦏ꧀ꦑꦸꦱꦔ꧀ꦓꦁ ꦄꦴꦫꦧ꧀ꦨ ꦏꦶꦚ꧀ꦕꦶꦢꦺꦮ ꦈꦢꦴꦲꦫꦠꦷ’’’ꦠꦶ.

꧑꧖꧕. ‘‘ꦏꦶꦁ ꦥꦤꦴꦤꦤ꧀ꦢ, ꦨꦶꦏ꧀ꦑꦸꦱꦔ꧀ꦓꦺꦴ ꦩꦪꦶ ꦥꦕ꧀ꦕꦴꦱꦷꦱꦠꦶ [ꦥꦕ꧀ꦕꦴꦱꦶꦁꦱꦠꦶ (ꦱꦷ. ꦱ꧀ꦪꦴ.)]? ꦢꦺꦱꦶꦠꦺꦴ, ꦄꦴꦤꦤ꧀ꦢ, ꦩꦪꦴ ꦣꦩ꧀ꦩꦺꦴ ꦄꦤꦤ꧀ꦠꦫꦁ ꦄꦧꦴꦲꦶꦫꦁ ꦏꦫꦶꦠ꧀ꦮꦴ. ꦤꦠ꧀ꦡꦴꦤꦤ꧀ꦢ, ꦠꦡꦴꦒꦠꦱ꧀ꦱ ꦣꦩ꧀ꦩꦺꦱꦸ ꦄꦴꦕꦫꦶꦪꦩꦸꦛ꧀ꦜꦶ. ꦪꦱ꧀ꦱ ꦤꦹꦤ, ꦄꦴꦤꦤ꧀ꦢ, ꦌꦮꦩꦱ꧀ꦱ – ‘ꦄꦲꦁ ꦨꦶꦏ꧀ꦑꦸꦱꦔ꧀ꦓꦁ ꦥꦫꦶꦲꦫꦶꦱ꧀ꦱꦴꦩꦷ’ꦠꦶ ꦮꦴ ‘ꦩꦩꦸꦢ꧀ꦢꦺꦱꦶꦏꦺꦴ ꦨꦶꦏ꧀ꦑꦸꦱꦔ꧀ꦓꦺꦴ’ꦠꦶ ꦮꦴ, ꦱꦺꦴ ꦤꦹꦤ, ꦄꦴꦤꦤ꧀ꦢ, ꦨꦶꦏ꧀ꦑꦸꦱꦔ꧀ꦓꦁ ꦄꦴꦫꦧ꧀ꦨ ꦏꦶꦚ꧀ꦕꦶꦢꦺꦮ ꦈꦢꦴꦲꦫꦺꦪ꧀ꦪ. ꦠꦡꦴꦒꦠꦱ꧀ꦱ ꦑꦺꦴ, ꦄꦴꦤꦤ꧀ꦢ, ꦤ ꦌꦮꦁ ꦲꦺꦴꦠꦶ – ‘ꦄꦲꦁ ꦨꦶꦏ꧀ꦑꦸꦱꦔ꧀ꦓꦁ ꦥꦫꦶꦲꦫꦶꦱ꧀ꦱꦴꦩꦷ’ꦠꦶ ꦮꦴ ‘ꦩꦩꦸꦢ꧀ꦢꦺꦱꦶꦏꦺꦴ ꦨꦶꦏ꧀ꦑꦸꦱꦔ꧀ꦓꦺꦴ’ꦠꦶ ꦮꦴ. ꦱꦏꦶꦁ [ꦏꦶꦁ (ꦱꦷ. ꦥꦷ.)], ꦄꦴꦤꦤ꧀ꦢ, ꦠꦡꦴꦒꦠꦺꦴ ꦨꦶꦏ꧀ꦑꦸꦱꦔ꧀ꦓꦁ ꦄꦴꦫꦧ꧀ꦨ ꦏꦶꦚ꧀ꦕꦶꦢꦺꦮ ꦈꦢꦴꦲꦫꦶꦱ꧀ꦱꦠꦶ. ꦄꦲꦁ ꦑꦺꦴ ꦥꦤꦴꦤꦤ꧀ꦢ, ꦌꦠꦫꦲꦶ ꦗꦶꦟ꧀ꦟꦺꦴ ꦮꦸꦢ꧀ꦣꦺꦴ ꦩꦲꦭ꧀ꦭꦏꦺꦴ ꦄꦢ꧀ꦣꦒꦠꦺꦴ ꦮꦪꦺꦴꦄꦤꦸꦥ꧀ꦥꦠ꧀ꦠꦺꦴ. ꦄꦴꦱꦷꦠꦶꦏꦺꦴ ꦩꦺ ꦮꦪꦺꦴ ꦮꦠ꧀ꦠꦠꦶ. ꦱꦺꦪ꧀ꦪꦡꦴꦥꦶ, ꦄꦴꦤꦤ꧀ꦢ, ꦗꦗ꧀ꦗꦫꦱꦏꦛꦁ ꦮꦺꦜꦩꦶꦱ꧀ꦱꦏꦺꦤ [ꦮꦺꦭ꦳ꦸꦩꦶꦱ꧀ꦱꦏꦺꦤ (ꦱ꧀ꦪꦴ.), ꦮꦺꦓꦩꦶꦱ꧀ꦱꦏꦺꦤ (ꦥꦷ.), ꦮꦺꦣꦩꦶꦱ꧀ꦱꦏꦺꦤ, ꦮꦺꦑꦩꦶꦱ꧀ꦱꦏꦺꦤ (ꦏ.)] ꦪꦴꦥꦺꦠꦶ, ꦌꦮꦩꦺꦮ ꦑꦺꦴ, ꦄꦴꦤꦤ꧀ꦢ, ꦮꦺꦜꦩꦶꦱ꧀ꦱꦏꦺꦤ ꦩꦚ꧀ꦚꦺ ꦠꦡꦴꦒꦠꦱ꧀ꦱ ꦏꦴꦪꦺꦴ ꦪꦴꦥꦺꦠꦶ. ꦪꦱ꧀ꦩꦶꦁ, ꦄꦴꦤꦤ꧀ꦢ, ꦱꦩꦪꦺ ꦠꦡꦴꦒꦠꦺꦴ ꦱꦧ꧀ꦧꦤꦶꦩꦶꦠ꧀ꦠꦴꦤꦁ ꦄꦩꦤꦱꦶꦏꦴꦫꦴ ꦌꦏꦕ꧀ꦕꦴꦤꦁ ꦮꦺꦢꦤꦴꦤꦁ ꦤꦶꦫꦺꦴꦣꦴ ꦄꦤꦶꦩꦶꦠ꧀ꦠꦁ ꦕꦺꦠꦺꦴꦱꦩꦴꦣꦶꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦶ, ꦦꦴꦱꦸꦠꦫꦺꦴ, ꦄꦴꦤꦤ꧀ꦢ, ꦠꦱ꧀ꦩꦶꦁ ꦱꦩꦪꦺ ꦠꦡꦴꦒꦠꦱ꧀ꦱ ꦏꦴꦪꦺꦴ ꦲꦺꦴꦠꦶ. ꦠꦱ꧀ꦩꦴꦠꦶꦲꦴꦤꦤ꧀ꦢ, ꦄꦠ꧀ꦠꦢꦷꦥꦴ ꦮꦶꦲꦫꦡ ꦄꦠ꧀ꦠꦱꦫꦟꦴ ꦄꦤꦚ꧀ꦚꦱꦫꦟꦴ, ꦣꦩ꧀ꦩꦢꦷꦥꦴ ꦣꦩ꧀ꦩꦱꦫꦟꦴ ꦄꦤꦚ꧀ꦚꦱꦫꦟꦴ. ꦏꦡꦚ꧀ꦕꦴꦤꦤ꧀ꦢ, ꦨꦶꦏ꧀ꦑꦸ ꦄꦠ꧀ꦠꦢꦷꦥꦺꦴ ꦮꦶꦲꦫꦠꦶ ꦄꦠ꧀ꦠꦱꦫꦟꦺꦴ ꦄꦤꦚ꧀ꦚꦱꦫꦟꦺꦴ, ꦣꦩ꧀ꦩꦢꦷꦥꦺꦴ ꦣꦩ꧀ꦩꦱꦫꦟꦺꦴ ꦄꦤꦚ꧀ꦚꦱꦫꦟꦺꦴ? ꦆꦣꦴꦤꦤ꧀ꦢ, ꦨꦶꦏ꧀ꦑꦸ ꦏꦴꦪꦺ ꦏꦴꦪꦴꦤꦸꦥꦱ꧀ꦱꦷ ꦮꦶꦲꦫꦠꦶ ꦄꦠꦴꦥꦷ ꦱꦩ꧀ꦥꦗꦴꦤꦺꦴ ꦱꦠꦶꦩꦴ, ꦮꦶꦤꦺꦪ꧀ꦪ ꦭꦺꦴꦏꦺ ꦄꦨꦶꦗ꧀ꦙꦴꦢꦺꦴꦩꦤꦱ꧀ꦱꦁ. ꦮꦺꦢꦤꦴꦱꦸ…ꦥꦺ… ꦕꦶꦠ꧀ꦠꦺ…ꦥꦺ… ꦣꦩ꧀ꦩꦺꦱꦸ ꦣꦩ꧀ꦩꦴꦤꦸꦥꦱ꧀ꦱꦷ ꦮꦶꦲꦫꦠꦶ ꦄꦴꦠꦴꦥꦷ ꦱꦩ꧀ꦥꦗꦴꦤꦺꦴ ꦱꦠꦶꦩꦴ, ꦮꦶꦤꦺꦪ꧀ꦪ ꦭꦺꦴꦏꦺ ꦄꦨꦶꦗ꧀ꦙꦴꦢꦺꦴꦩꦤꦱ꧀ꦱꦁ. ꦌꦮꦁ ꦑꦺꦴ, ꦄꦴꦤꦤ꧀ꦢ, ꦨꦶꦏ꧀ꦑꦸ ꦄꦠ꧀ꦠꦢꦷꦥꦺꦴ ꦮꦶꦲꦫꦠꦶ ꦄꦠ꧀ꦠꦱꦫꦟꦺꦴ ꦄꦤꦚ꧀ꦚꦱꦫꦟꦺꦴ, ꦣꦩ꧀ꦩꦢꦷꦥꦺꦴ ꦣꦩ꧀ꦩꦱꦫꦟꦺꦴ ꦄꦤꦚ꧀ꦚꦱꦫꦟꦺꦴ. ꦪꦺ ꦲꦶ ꦏꦺꦕꦶ, ꦄꦴꦤꦤ꧀ꦢ, ꦌꦠꦫꦲꦶ ꦮꦴ ꦩꦩ ꦮꦴ ꦄꦕ꧀ꦕꦪꦺꦤ ꦄꦠ꧀ꦠꦢꦷꦥꦴ ꦮꦶꦲꦫꦶꦱ꧀ꦱꦤ꧀ꦠꦶ ꦄꦠ꧀ꦠꦱꦫꦟꦴ ꦄꦤꦚ꧀ꦚꦱꦫꦟꦴ, ꦣꦩ꧀ꦩꦢꦷꦥꦴ ꦣꦩ꧀ꦩꦱꦫꦟꦴ ꦄꦤꦚ꧀ꦚꦱꦫꦟꦴ, ꦠꦩꦠꦒ꧀ꦒꦺ ꦩꦺ ꦠꦺ, ꦄꦴꦤꦤ꧀ꦢ, ꦨꦶꦏ꧀ꦑꦹ ꦨꦮꦶꦱ꧀ꦱꦤ꧀ꦠꦶ ꦪꦺ ꦏꦺꦕꦶ ꦱꦶꦏ꧀ꦑꦴꦏꦴꦩꦴ’’ꦠꦶ.

ꦢꦸꦠꦶꦪꦨꦴꦟꦮꦴꦫꦺꦴ.

ꦤꦶꦩꦶꦠ꧀ꦠꦺꦴꦨꦴꦱꦏꦡꦴ

꧑꧖꧖. ꦄꦡ ꦑꦺꦴ ꦨꦒꦮꦴ ꦥꦸꦧ꧀ꦧꦟ꧀ꦲꦱꦩꦪꦁ ꦤꦶꦮꦴꦱꦺꦠ꧀ꦮꦴ ꦥꦠ꧀ꦠꦕꦷꦮꦫꦩꦴꦢꦴꦪ ꦮꦺꦱꦴꦭꦶꦁ ꦥꦶꦟ꧀ꦝꦴꦪ ꦥꦴꦮꦶꦱꦶ. ꦮꦺꦱꦴꦭꦶꦪꦁ ꦥꦶꦟ꧀ꦝꦴꦪ ꦕꦫꦶꦠ꧀ꦮꦴ ꦥꦕ꧀ꦖꦴꦨꦠ꧀ꦠꦁ ꦥꦶꦟ꧀ꦝꦥꦴꦠꦥꦛꦶꦏ꧀ꦏꦤ꧀ꦠꦺꦴ ꦄꦴꦪꦱ꧀ꦩꦤ꧀ꦠꦁ ꦄꦴꦤꦤ꧀ꦢꦁ ꦄꦴꦩꦤ꧀ꦠꦺꦱꦶ – ‘‘ꦒꦟ꧀ꦲꦴꦲꦶ, ꦄꦴꦤꦤ꧀ꦢ, ꦤꦶꦱꦷꦢꦤꦁ, ꦪꦺꦤ ꦕꦴꦥꦴꦭꦁ ꦕꦺꦠꦶꦪꦁ [ꦥꦴꦮꦴꦭꦁ (ꦕꦺꦠꦶꦪꦁ (ꦱ꧀ꦪꦴ.)] ꦠꦺꦤꦸꦥꦱꦔ꧀ꦏꦩꦶꦱ꧀ꦱꦴꦩ ꦢꦶꦮꦴ ꦮꦶꦲꦴꦫꦴꦪꦴ’’ꦠꦶ. ‘‘ꦌꦮꦁ, ꦨꦤ꧀ꦠꦺ’’ꦠꦶ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦨꦒꦮꦠꦺꦴ ꦥꦛꦶꦱ꧀ꦱꦸꦠ꧀ꦮꦴ ꦤꦶꦱꦷꦢꦤꦁ ꦄꦴꦢꦴꦪ ꦨꦒꦮꦤ꧀ꦠꦁ ꦥꦶꦛ꧀ꦜꦶꦠꦺꦴ ꦥꦶꦛ꧀ꦜꦶꦠꦺꦴ ꦄꦤꦸꦧꦤ꧀ꦣꦶ. ꦄꦡ ꦑꦺꦴ ꦨꦒꦮꦴ ꦪꦺꦤ ꦕꦴꦥꦴꦭꦁ ꦕꦺꦠꦶꦪꦁ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦥꦚ꧀ꦚꦠ꧀ꦠꦺ ꦄꦴꦱꦤꦺ ꦤꦶꦱꦷꦢꦶ. ꦄꦴꦪꦱ꧀ꦩꦴꦥꦶ ꦑꦺꦴ ꦄꦴꦤꦤ꧀ꦢꦺꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ.

꧑꧖꧗. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦁ ꦑꦺꦴ ꦄꦴꦪꦱ꧀ꦩꦤ꧀ꦠꦁ ꦄꦴꦤꦤ꧀ꦢꦁ ꦨꦒꦮꦴ ꦌꦠꦢꦮꦺꦴꦕ – ‘‘ꦫꦩꦟꦷꦪꦴ, ꦄꦴꦤꦤ꧀ꦢ, ꦮꦺꦱꦴꦭꦷ, ꦫꦩꦟꦷꦪꦁ ꦈꦢꦺꦤꦁ ꦕꦺꦠꦶꦪꦁ, ꦫꦩꦟꦷꦪꦁ ꦒꦺꦴꦠꦩꦏꦁ ꦕꦺꦠꦶꦪꦁ, ꦫꦩꦟꦷꦪꦁ ꦱꦠ꧀ꦠꦩ꧀ꦧꦁ [ꦱꦠ꧀ꦠꦩ꧀ꦧꦏꦁ (ꦥꦷ.)] ꦕꦺꦠꦶꦪꦁ, ꦫꦩꦟꦷꦪꦁ ꦧꦲꦸꦥꦸꦠ꧀ꦠꦁ ꦕꦺꦠꦶꦪꦁ, ꦫꦩꦟꦷꦪꦁ ꦱꦴꦫꦤ꧀ꦢꦢꦁ ꦕꦺꦠꦶꦪꦁ, ꦫꦩꦟꦷꦪꦁ ꦕꦴꦥꦴꦭꦁ ꦕꦺꦠꦶꦪꦁ. ꦪꦱ꧀ꦱ ꦏꦱ꧀ꦱꦕꦶ, ꦄꦴꦤꦤ꧀ꦢ, ꦕꦠ꧀ꦠꦴꦫꦺꦴ ꦆꦢ꧀ꦣꦶꦥꦴꦢꦴ ꦨꦴꦮꦶꦠꦴ ꦧꦲꦸꦭꦷꦏꦠꦴ ꦪꦴꦤꦷꦏꦠꦴ ꦮꦠ꧀ꦡꦸꦏꦠꦴ ꦄꦤꦸꦛ꧀ꦜꦶꦠꦴ ꦥꦫꦶꦕꦶꦠꦴ ꦱꦸꦱꦩꦴꦫꦢ꧀ꦣꦴ, ꦱꦺꦴ ꦄꦴꦏꦔ꧀ꦑꦩꦴꦤꦺꦴ ꦏꦥ꧀ꦥꦁ ꦮꦴ ꦠꦶꦛ꧀ꦜꦺꦪ꧀ꦪ ꦏꦥ꧀ꦥꦴꦮꦱꦺꦱꦁ ꦮꦴ. ꦠꦡꦴꦒꦠꦱ꧀ꦱ ꦑꦺꦴ, ꦄꦴꦤꦤ꧀ꦢ, ꦕꦠ꧀ꦠꦴꦫꦺꦴ ꦆꦢ꧀ꦣꦶꦥꦴꦢꦴ ꦨꦴꦮꦶꦠꦴ ꦧꦲꦸꦭꦷꦏꦠꦴ ꦪꦴꦤꦷꦏꦠꦴ ꦮꦠ꧀ꦡꦸꦏꦠꦴ ꦄꦤꦸꦛ꧀ꦜꦶꦠꦴ ꦥꦫꦶꦕꦶꦠꦴ ꦱꦸꦱꦩꦴꦫꦢ꧀ꦣꦴ, ꦱꦺꦴ ꦄꦴꦏꦔ꧀ꦑꦩꦴꦤꦺꦴ [ꦄꦴꦏꦔ꧀ꦑꦩꦴꦤꦺꦴ (?)], ꦄꦴꦤꦤ꧀ꦢ, ꦠꦡꦴꦒꦠꦺꦴ ꦏꦥ꧀ꦥꦁ ꦮꦴ ꦠꦶꦛ꧀ꦜꦺꦪ꧀ꦪ ꦏꦥ꧀ꦥꦴꦮꦱꦺꦱꦁ ꦮꦴ’’ꦠꦶ. ꦌꦮꦩ꧀ꦥꦶ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦨꦒꦮꦠꦴ ꦎꦭ꦳ꦴꦫꦶꦏꦺ ꦤꦶꦩꦶꦠ꧀ꦠꦺ ꦏꦪꦶꦫꦩꦴꦤꦺ ꦎꦭ꦳ꦴꦫꦶꦏꦺ ꦎꦨꦴꦱꦺ ꦏꦪꦶꦫꦩꦴꦤꦺ ꦤꦴꦱꦏ꧀ꦑꦶ ꦥꦛꦶꦮꦶꦗ꧀ꦙꦶꦠꦸꦁ; ꦤ ꦨꦒꦮꦤ꧀ꦠꦁ ꦪꦴꦕꦶ – ‘‘ꦠꦶꦛ꧀ꦜꦠꦸ, ꦨꦤ꧀ꦠꦺ, ꦨꦒꦮꦴ ꦏꦥ꧀ꦥꦁ, ꦠꦶꦛ꧀ꦜꦠꦸ ꦱꦸꦒꦠꦺꦴ ꦏꦥ꧀ꦥꦁ ꦧꦲꦸꦗꦤꦲꦶꦠꦴꦪ ꦧꦲꦸꦗꦤꦱꦸꦑꦴꦪ ꦭꦺꦴꦏꦴꦤꦸꦏꦩ꧀ꦥꦴꦪ ꦄꦠ꧀ꦡꦴꦪ ꦲꦶꦠꦴꦪ ꦱꦸꦑꦴꦪ ꦢꦺꦮꦩꦤꦸꦱ꧀ꦱꦴꦤ’’ꦤ꧀ꦠꦶ, ꦪꦡꦴ ꦠꦁ ꦩꦴꦫꦺꦤ ꦥꦫꦶꦪꦸꦛ꧀ꦜꦶꦠꦕꦶꦠ꧀ꦠꦺꦴ. ꦢꦸꦠꦶꦪꦩ꧀ꦥꦶ ꦑꦺꦴ ꦨꦒꦮꦴ…ꦥꦺ… ꦠꦠꦶꦪꦩ꧀ꦥꦶ ꦑꦺꦴ ꦨꦒꦮꦴ ꦄꦴꦪꦱ꧀ꦩꦤ꧀ꦠꦁ ꦄꦴꦤꦤ꧀ꦢꦁ ꦄꦴꦩꦤ꧀ꦠꦺꦱꦶ – ‘‘ꦫꦩꦟꦷꦪꦴ, ꦄꦴꦤꦤ꧀ꦢ, ꦮꦺꦱꦴꦭꦷ, ꦫꦩꦟꦷꦪꦁ ꦈꦢꦺꦤꦁ ꦕꦺꦠꦶꦪꦁ, ꦫꦩꦟꦷꦪꦁ ꦒꦺꦴꦠꦩꦏꦁ ꦕꦺꦠꦶꦪꦁ, ꦫꦩꦟꦷꦪꦁ ꦱꦠ꧀ꦠꦩ꧀ꦧꦁ ꦕꦺꦠꦶꦪꦁ, ꦫꦩꦟꦷꦪꦁ ꦧꦲꦸꦥꦸꦠ꧀ꦠꦁ ꦕꦺꦠꦶꦪꦁ, ꦫꦩꦟꦷꦪꦁ ꦱꦴꦫꦤ꧀ꦢꦢꦁ ꦕꦺꦠꦶꦪꦁ, ꦫꦩꦟꦷꦪꦁ ꦕꦴꦥꦴꦭꦁ ꦕꦺꦠꦶꦪꦁ. ꦪꦱ꧀ꦱ ꦏꦱ꧀ꦱꦕꦶ, ꦄꦴꦤꦤ꧀ꦢ, ꦕꦠ꧀ꦠꦴꦫꦺꦴ ꦆꦢ꧀ꦣꦶꦥꦴꦢꦴ ꦨꦴꦮꦶꦠꦴ ꦧꦲꦸꦭꦷꦏꦠꦴ ꦪꦴꦤꦷꦏꦠꦴ ꦮꦠ꧀ꦡꦸꦏꦠꦴ ꦄꦤꦸꦛ꧀ꦜꦶꦠꦴ ꦥꦫꦶꦕꦶꦠꦴ ꦱꦸꦱꦩꦴꦫꦢ꧀ꦣꦴ, ꦱꦺꦴ ꦄꦴꦏꦔ꧀ꦑꦩꦴꦤꦺꦴ ꦏꦥ꧀ꦥꦁ ꦮꦴ ꦠꦶꦛ꧀ꦜꦺꦪ꧀ꦪ ꦏꦥ꧀ꦥꦴꦮꦱꦺꦱꦁ ꦮꦴ. ꦠꦡꦴꦒꦠꦱ꧀ꦱ ꦑꦺꦴ, ꦄꦴꦤꦤ꧀ꦢ, ꦕꦠ꧀ꦠꦴꦫꦺꦴ ꦆꦢ꧀ꦣꦶꦥꦴꦢꦴ ꦨꦴꦮꦶꦠꦴ ꦧꦲꦸꦭꦷꦏꦠꦴ ꦪꦴꦤꦷꦏꦠꦴ ꦮꦠ꧀ꦡꦸꦏꦠꦴ ꦄꦤꦸꦛ꧀ꦜꦶꦠꦴ ꦥꦫꦶꦕꦶꦠꦴ ꦱꦸꦱꦩꦴꦫꦢ꧀ꦣꦴ, ꦱꦺꦴ ꦄꦴꦏꦔ꧀ꦑꦩꦴꦤꦺꦴ, ꦄꦴꦤꦤ꧀ꦢ, ꦠꦡꦴꦒꦠꦺꦴ ꦏꦥ꧀ꦥꦁ ꦮꦴ ꦠꦶꦛ꧀ꦜꦺꦪ꧀ꦪ ꦏꦥ꧀ꦥꦴꦮꦱꦺꦱꦁ ꦮꦴ’’ꦠꦶ. ꦌꦮꦩ꧀ꦥꦶ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦨꦒꦮꦠꦴ ꦎꦭ꦳ꦴꦫꦶꦏꦺ ꦤꦶꦩꦶꦠ꧀ꦠꦺ ꦏꦪꦶꦫꦩꦴꦤꦺ ꦎꦭ꦳ꦴꦫꦶꦏꦺ ꦎꦨꦴꦱꦺ ꦏꦪꦶꦫꦩꦴꦤꦺ ꦤꦴꦱꦏ꧀ꦑꦶ ꦥꦛꦶꦮꦶꦗ꧀ꦙꦶꦠꦸꦁ; ꦤ ꦨꦒꦮꦤ꧀ꦠꦁ ꦪꦴꦕꦶ – ‘‘ꦠꦶꦛ꧀ꦜꦠꦸ, ꦨꦤ꧀ꦠꦺ, ꦨꦒꦮꦴ ꦏꦥ꧀ꦥꦁ, ꦠꦶꦛ꧀ꦜꦠꦸ ꦱꦸꦒꦠꦺꦴ ꦏꦥ꧀ꦥꦁ ꦧꦲꦸꦗꦤꦲꦶꦠꦴꦪ ꦧꦲꦸꦗꦤꦱꦸꦑꦴꦪ ꦭꦺꦴꦏꦴꦤꦸꦏꦩ꧀ꦥꦴꦪ ꦄꦠ꧀ꦡꦴꦪ ꦲꦶꦠꦴꦪ ꦱꦸꦑꦴꦪ ꦢꦺꦮꦩꦤꦸꦱ꧀ꦱꦴꦤ’’ꦤ꧀ꦠꦶ, ꦪꦡꦴ ꦠꦁ ꦩꦴꦫꦺꦤ ꦥꦫꦶꦪꦸꦛ꧀ꦜꦶꦠꦕꦶꦠ꧀ꦠꦺꦴ. ꦄꦡ ꦑꦺꦴ ꦨꦒꦮꦴ ꦄꦴꦪꦱ꧀ꦩꦤ꧀ꦠꦁ ꦄꦴꦤꦤ꧀ꦢꦁ ꦄꦴꦩꦤ꧀ꦠꦺꦱꦶ – ‘‘ꦒꦕ꧀ꦖ ꦠ꧀ꦮꦁ, ꦄꦴꦤꦤ꧀ꦢ, ꦪꦱ꧀ꦱꦢꦴꦤꦶ ꦏꦴꦭꦁ ꦩꦚ꧀ꦚꦱꦷ’’ꦠꦶ. ‘‘ꦌꦮꦁ, ꦨꦤ꧀ꦠꦺ’’ꦠꦶ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦨꦒꦮꦠꦺꦴ ꦥꦛꦶꦱ꧀ꦱꦸꦠ꧀ꦮꦴ ꦈꦛ꧀ꦜꦴꦪꦴꦱꦤꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦥꦢꦏ꧀ꦑꦶꦟꦁ ꦏꦠ꧀ꦮꦴ ꦄꦮꦶꦢꦹꦫꦺ ꦄꦚ꧀ꦚꦠꦫꦱ꧀ꦩꦶꦁ ꦫꦸꦏ꧀ꦑꦩꦹꦭꦺ ꦤꦶꦱꦷꦢꦶ.

ꦩꦴꦫꦪꦴꦕꦤꦏꦡꦴ

꧑꧖꧘. ꦄꦡ ꦑꦺꦴ ꦩꦴꦫꦺꦴ ꦥꦴꦥꦶꦩꦴ ꦄꦕꦶꦫꦥꦏ꧀ꦏꦤ꧀ꦠꦺ ꦄꦴꦪꦱ꧀ꦩꦤ꧀ꦠꦺ ꦄꦴꦤꦤ꧀ꦢꦺ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦌꦏꦩꦤ꧀ꦠꦁ ꦄꦛ꧀ꦜꦴꦱꦶ. ꦌꦏꦩꦤ꧀ꦠꦁ ꦜꦶꦠꦺꦴ ꦑꦺꦴ ꦩꦴꦫꦺꦴ ꦥꦴꦥꦶꦩꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦥꦫꦶꦤꦶꦧ꧀ꦧꦴꦠꦸꦢꦴꦤꦶ, ꦨꦤ꧀ꦠꦺ, ꦨꦒꦮꦴ, ꦥꦫꦶꦤꦶꦧ꧀ꦧꦴꦠꦸ ꦱꦸꦒꦠꦺꦴ, ꦥꦫꦶꦤꦶꦧ꧀ꦧꦴꦤꦏꦴꦭꦺꦴ ꦢꦴꦤꦶ, ꦨꦤ꧀ꦠꦺ, ꦨꦒꦮꦠꦺꦴ. ꦨꦴꦱꦶꦠꦴ ꦑꦺꦴ ꦥꦤꦺꦱꦴ, ꦨꦤ꧀ꦠꦺ, ꦨꦒꦮꦠꦴ ꦮꦴꦕꦴ – ‘ꦤ ꦠꦴꦮꦴꦲꦁ, ꦥꦴꦥꦶꦩ, ꦥꦫꦶꦤꦶꦧ꧀ꦧꦴꦪꦶꦱ꧀ꦱꦴꦩꦶ, ꦪꦴꦮ ꦩꦺ ꦨꦶꦏ꧀ꦑꦹ ꦤ ꦱꦴꦮꦏꦴ ꦨꦮꦶꦱ꧀ꦱꦤ꧀ꦠꦶ ꦮꦶꦪꦠ꧀ꦠꦴ ꦮꦶꦤꦷꦠꦴ ꦮꦶꦱꦴꦫꦢꦴ ꦧꦲꦸꦱ꧀ꦱꦸꦠꦴ ꦣꦩ꧀ꦩꦣꦫꦴ ꦣꦩ꧀ꦩꦴꦤꦸꦣꦩ꧀ꦩꦥ꧀ꦥꦛꦶꦥꦤ꧀ꦤꦴ ꦱꦴꦩꦷꦕꦶꦥ꧀ꦥꦛꦶꦥꦤ꧀ꦤꦴ ꦄꦤꦸꦣꦩ꧀ꦩꦕꦴꦫꦶꦤꦺꦴ, ꦱꦏꦁ ꦄꦴꦕꦫꦶꦪꦏꦁ ꦈꦒ꧀ꦒꦲꦺꦠ꧀ꦮꦴ ꦄꦴꦕꦶꦏ꧀ꦑꦶꦱ꧀ꦱꦤ꧀ꦠꦶ ꦢꦺꦱꦺꦱ꧀ꦱꦤ꧀ꦠꦶ ꦥꦚ꧀ꦚꦥꦺꦱ꧀ꦱꦤ꧀ꦠꦶ ꦥꦛ꧀ꦜꦥꦺꦱ꧀ꦱꦤ꧀ꦠꦶ ꦮꦶꦮꦫꦶꦱ꧀ꦱꦤ꧀ꦠꦶ ꦮꦶꦨꦗꦶꦱ꧀ꦱꦤ꧀ꦠꦶ ꦈꦠ꧀ꦠꦴꦤꦷ [ꦈꦠ꧀ꦠꦴꦤꦶꦁ (ꦏ.), ꦈꦠ꧀ꦠꦴꦤꦶ (ꦱꦷ. ꦥꦷ.)] ꦏꦫꦶꦱ꧀ꦱꦤ꧀ꦠꦶ, ꦈꦥ꧀ꦥꦤ꧀ꦤꦁ ꦥꦫꦥ꧀ꦥꦮꦴꦢꦁ ꦱꦲꦣꦩ꧀ꦩꦺꦤ ꦱꦸꦤꦶꦒ꧀ꦒꦲꦶꦠꦁ ꦤꦶꦒ꧀ꦒꦲꦺꦠ꧀ꦮꦴ ꦱꦥ꧀ꦥꦴꦛꦶꦲꦴꦫꦶꦪꦁ ꦣꦩ꧀ꦩꦁ ꦢꦺꦱꦺꦱ꧀ꦱꦤ꧀ꦠꦷ’ꦠꦶ. ꦌꦠꦫꦲꦶ ꦑꦺꦴ ꦥꦤ, ꦨꦤ꧀ꦠꦺ, ꦨꦶꦏ꧀ꦑꦹ ꦨꦒꦮꦠꦺꦴ ꦱꦴꦮꦏꦴ ꦮꦶꦪꦠ꧀ꦠꦴ ꦮꦶꦤꦷꦠꦴ ꦮꦶꦱꦴꦫꦢꦴ ꦧꦲꦸꦱ꧀ꦱꦸꦠꦴ ꦣꦩ꧀ꦩꦣꦫꦴ ꦣꦩ꧀ꦩꦴꦤꦸꦣꦩ꧀ꦩꦥ꧀ꦥꦛꦶꦥꦤ꧀ꦤꦴ ꦱꦴꦩꦷꦕꦶꦥ꧀ꦥꦛꦶꦥꦤ꧀ꦤꦴ ꦄꦤꦸꦣꦩ꧀ꦩꦕꦴꦫꦶꦤꦺꦴ, ꦱꦏꦁ ꦄꦴꦕꦫꦶꦪꦏꦁ ꦈꦒ꧀ꦒꦲꦺꦠ꧀ꦮꦴ ꦄꦴꦕꦶꦏ꧀ꦑꦤ꧀ꦠꦶ ꦢꦺꦱꦺꦤ꧀ꦠꦶ ꦥꦚ꧀ꦚꦥꦺꦤ꧀ꦠꦶ ꦥꦛ꧀ꦜꦥꦺꦤ꧀ꦠꦶ ꦮꦶꦮꦫꦤ꧀ꦠꦶ ꦮꦶꦨꦗꦤ꧀ꦠꦶ ꦈꦠ꧀ꦠꦴꦤꦷꦏꦫꦺꦴꦤ꧀ꦠꦶ, ꦈꦥ꧀ꦥꦤ꧀ꦤꦁ ꦥꦫꦥ꧀ꦥꦮꦴꦢꦁ ꦱꦲꦣꦩ꧀ꦩꦺꦤ ꦱꦸꦤꦶꦒ꧀ꦒꦲꦶꦠꦁ ꦤꦶꦒ꧀ꦒꦲꦺꦠ꧀ꦮꦴ ꦱꦥ꧀ꦥꦴꦛꦶꦲꦴꦫꦶꦪꦁ ꦣꦩ꧀ꦩꦁ ꦢꦺꦱꦺꦤ꧀ꦠꦶ. ꦥꦫꦶꦤꦶꦧ꧀ꦧꦴꦠꦸꦢꦴꦤꦶ, ꦨꦤ꧀ꦠꦺ, ꦨꦒꦮꦴ, ꦥꦫꦶꦤꦶꦧ꧀ꦧꦴꦠꦸ ꦱꦸꦒꦠꦺꦴ, ꦥꦫꦶꦤꦶꦧ꧀ꦧꦴꦤꦏꦴꦭꦺꦴꦢꦴꦤꦶ, ꦨꦤ꧀ꦠꦺ, ꦨꦒꦮꦠꦺꦴ.

‘‘ꦨꦴꦱꦶꦠꦴ ꦑꦺꦴ ꦥꦤꦺꦱꦴ, ꦨꦤ꧀ꦠꦺ, ꦨꦒꦮꦠꦴ ꦮꦴꦕꦴ – ‘ꦤ ꦠꦴꦮꦴꦲꦁ, ꦥꦴꦥꦶꦩ, ꦥꦫꦶꦤꦶꦧ꧀ꦧꦴꦪꦶꦱ꧀ꦱꦴꦩꦶ, ꦪꦴꦮ ꦩꦺ ꦨꦶꦏ꧀ꦑꦸꦤꦶꦪꦺꦴ ꦤ ꦱꦴꦮꦶꦏꦴ ꦨꦮꦶꦱ꧀ꦱꦤ꧀ꦠꦶ ꦮꦶꦪꦠ꧀ꦠꦴ ꦮꦶꦤꦷꦠꦴ ꦮꦶꦱꦴꦫꦢꦴ ꦧꦲꦸꦱ꧀ꦱꦸꦠꦴ ꦣꦩ꧀ꦩꦣꦫꦴ ꦣꦩ꧀ꦩꦴꦤꦸꦣꦩ꧀ꦩꦥ꧀ꦥꦛꦶꦥꦤ꧀ꦤꦴ ꦱꦴꦩꦷꦕꦶꦥ꧀ꦥꦛꦶꦥꦤ꧀ꦤꦴ ꦄꦤꦸꦣꦩ꧀ꦩꦕꦴꦫꦶꦤꦶꦪꦺꦴ, ꦱꦏꦁ ꦄꦴꦕꦫꦶꦪꦏꦁ ꦈꦒ꧀ꦒꦲꦺꦠ꧀ꦮꦴ ꦄꦴꦕꦶꦏ꧀ꦑꦶꦱ꧀ꦱꦤ꧀ꦠꦶ ꦢꦺꦱꦺꦱ꧀ꦱꦤ꧀ꦠꦶ ꦥꦚ꧀ꦚꦥꦺꦱ꧀ꦱꦤ꧀ꦠꦶ ꦥꦛ꧀ꦜꦥꦺꦱ꧀ꦱꦤ꧀ꦠꦶ ꦮꦶꦮꦫꦶꦱ꧀ꦱꦤ꧀ꦠꦶ ꦮꦶꦨꦗꦶꦱ꧀ꦱꦤ꧀ꦠꦶ ꦈꦠ꧀ꦠꦴꦤꦷꦏꦫꦶꦱ꧀ꦱꦤ꧀ꦠꦶ, ꦈꦥ꧀ꦥꦤ꧀ꦤꦁ ꦥꦫꦥ꧀ꦥꦮꦴꦢꦁ ꦱꦲꦣꦩ꧀ꦩꦺꦤ ꦱꦸꦤꦶꦒ꧀ꦒꦲꦶꦠꦁ ꦤꦶꦒ꧀ꦒꦲꦺꦠ꧀ꦮꦴ ꦱꦥ꧀ꦥꦴꦛꦶꦲꦴꦫꦶꦪꦁ ꦣꦩ꧀ꦩꦁ ꦢꦺꦱꦺꦱ꧀ꦱꦤ꧀ꦠꦷ’ꦠꦶ. ꦌꦠꦫꦲꦶ ꦑꦺꦴ ꦥꦤ, ꦨꦤ꧀ꦠꦺ, ꦨꦶꦏ꧀ꦑꦸꦤꦶꦪꦺꦴ ꦨꦒꦮꦠꦺꦴ ꦱꦴꦮꦶꦏꦴ ꦮꦶꦪꦠ꧀ꦠꦴ ꦮꦶꦤꦷꦠꦴ ꦮꦶꦱꦴꦫꦢꦴ ꦧꦲꦸꦱ꧀ꦱꦸꦠꦴ ꦣꦩ꧀ꦩꦣꦫꦴ ꦣꦩ꧀ꦩꦴꦤꦸꦣꦩ꧀ꦩꦥ꧀ꦥꦛꦶꦥꦤ꧀ꦤꦴ ꦱꦴꦩꦷꦕꦶꦥ꧀ꦥꦛꦶꦥꦤ꧀ꦤꦴ ꦄꦤꦸꦣꦩ꧀ꦩꦕꦴꦫꦶꦤꦶꦪꦺꦴ, ꦱꦏꦁ ꦄꦴꦕꦫꦶꦪꦏꦁ ꦈꦒ꧀ꦒꦲꦺꦠ꧀ꦮꦴ ꦄꦴꦕꦶꦏ꧀ꦑꦤ꧀ꦠꦶ ꦢꦺꦱꦺꦤ꧀ꦠꦶ ꦥꦚ꧀ꦚꦥꦺꦤ꧀ꦠꦶ ꦥꦛ꧀ꦜꦥꦺꦤ꧀ꦠꦶ ꦮꦶꦮꦫꦤ꧀ꦠꦶ ꦮꦶꦨꦗꦤ꧀ꦠꦶ ꦈꦠ꧀ꦠꦴꦤꦷꦏꦫꦺꦴꦤ꧀ꦠꦶ, ꦈꦥ꧀ꦥꦤ꧀ꦤꦁ ꦥꦫꦥ꧀ꦥꦮꦴꦢꦁ ꦱꦲꦣꦩ꧀ꦩꦺꦤ ꦱꦸꦤꦶꦒ꧀ꦒꦲꦶꦠꦁ ꦤꦶꦒ꧀ꦒꦲꦺꦠ꧀ꦮꦴ ꦱꦥ꧀ꦥꦴꦛꦶꦲꦴꦫꦶꦪꦁ ꦣꦩ꧀ꦩꦁ ꦢꦺꦱꦺꦤ꧀ꦠꦶ. ꦥꦫꦶꦤꦶꦧ꧀ꦧꦴꦠꦸꦢꦴꦤꦶ, ꦨꦤ꧀ꦠꦺ, ꦨꦒꦮꦴ, ꦥꦫꦶꦤꦶꦧ꧀ꦧꦴꦠꦸ ꦱꦸꦒꦠꦺꦴ, ꦥꦫꦶꦤꦶꦧ꧀ꦧꦴꦤꦏꦴꦭꦺꦴꦢꦴꦤꦶ, ꦨꦤ꧀ꦠꦺ, ꦨꦒꦮꦠꦺꦴ.

‘‘ꦨꦴꦱꦶꦠꦴ ꦑꦺꦴ ꦥꦤꦺꦱꦴ, ꦨꦤ꧀ꦠꦺ, ꦨꦒꦮꦠꦴ ꦮꦴꦕꦴ – ‘ꦤ ꦠꦴꦮꦴꦲꦁ, ꦥꦴꦥꦶꦩ, ꦥꦫꦶꦤꦶꦧ꧀ꦧꦴꦪꦶꦱ꧀ꦱꦴꦩꦶ, ꦪꦴꦮ ꦩꦺ ꦈꦥꦴꦱꦏꦴ ꦤ ꦱꦴꦮꦏꦴ ꦨꦮꦶꦱ꧀ꦱꦤ꧀ꦠꦶ ꦮꦶꦪꦠ꧀ꦠꦴ ꦮꦶꦤꦷꦠꦴ ꦮꦶꦱꦴꦫꦢꦴ ꦧꦲꦸꦱ꧀ꦱꦸꦠꦴ ꦣꦩ꧀ꦩꦣꦫꦴ ꦣꦩ꧀ꦩꦴꦤꦸꦣꦩ꧀ꦩꦥ꧀ꦥꦛꦶꦥꦤ꧀ꦤꦴ ꦱꦴꦩꦷꦕꦶꦥ꧀ꦥꦛꦶꦥꦤ꧀ꦤꦴ ꦄꦤꦸꦣꦩ꧀ꦩꦕꦴꦫꦶꦤꦺꦴ, ꦱꦏꦁ ꦄꦴꦕꦫꦶꦪꦏꦁ ꦈꦒ꧀ꦒꦲꦺꦠ꧀ꦮꦴ ꦄꦴꦕꦶꦏ꧀ꦑꦶꦱ꧀ꦱꦤ꧀ꦠꦶ ꦢꦺꦱꦺꦱ꧀ꦱꦤ꧀ꦠꦶ ꦥꦚ꧀ꦚꦥꦺꦱ꧀ꦱꦤ꧀ꦠꦶ ꦥꦛ꧀ꦜꦥꦺꦱ꧀ꦱꦤ꧀ꦠꦶ ꦮꦶꦮꦫꦶꦱ꧀ꦱꦤ꧀ꦠꦶ ꦮꦶꦨꦗꦶꦱ꧀ꦱꦤ꧀ꦠꦶ ꦈꦠ꧀ꦠꦴꦤꦷꦏꦫꦶꦱ꧀ꦱꦤ꧀ꦠꦶ, ꦈꦥ꧀ꦥꦤ꧀ꦤꦁ ꦥꦫꦥ꧀ꦥꦮꦴꦢꦁ ꦱꦲꦣꦩ꧀ꦩꦺꦤ ꦱꦸꦤꦶꦒ꧀ꦒꦲꦶꦠꦁ ꦤꦶꦒ꧀ꦒꦲꦺꦠ꧀ꦮꦴ ꦱꦥ꧀ꦥꦴꦛꦶꦲꦴꦫꦶꦪꦁ ꦣꦩ꧀ꦩꦁ ꦢꦺꦱꦺꦱ꧀ꦱꦤ꧀ꦠꦷ’ꦠꦶ. ꦌꦠꦫꦲꦶ ꦑꦺꦴ ꦥꦤ, ꦨꦤ꧀ꦠꦺ, ꦈꦥꦴꦱꦏꦴ ꦨꦒꦮꦠꦺꦴ ꦱꦴꦮꦏꦴ ꦮꦶꦪꦠ꧀ꦠꦴ ꦮꦶꦤꦷꦠꦴ ꦮꦶꦱꦴꦫꦢꦴ ꦧꦲꦸꦱ꧀ꦱꦸꦠꦴ ꦣꦩ꧀ꦩꦣꦫꦴ ꦣꦩ꧀ꦩꦴꦤꦸꦣꦩ꧀ꦩꦥ꧀ꦥꦛꦶꦥꦤ꧀ꦤꦴ ꦱꦴꦩꦷꦕꦶꦥ꧀ꦥꦛꦶꦥꦤ꧀ꦤꦴ ꦄꦤꦸꦣꦩ꧀ꦩꦕꦴꦫꦶꦤꦺꦴ, ꦱꦏꦁ ꦄꦴꦕꦫꦶꦪꦏꦁ ꦈꦒ꧀ꦒꦲꦺꦠ꧀ꦮꦴ ꦄꦴꦕꦶꦏ꧀ꦑꦤ꧀ꦠꦶ ꦢꦺꦱꦺꦤ꧀ꦠꦶ ꦥꦚ꧀ꦚꦥꦺꦤ꧀ꦠꦶ ꦥꦛ꧀ꦜꦥꦺꦤ꧀ꦠꦶ ꦮꦶꦮꦫꦤ꧀ꦠꦶ ꦮꦶꦨꦗꦤ꧀ꦠꦶ ꦈꦠ꧀ꦠꦴꦤꦷꦏꦫꦺꦴꦤ꧀ꦠꦶ, ꦈꦥ꧀ꦥꦤ꧀ꦤꦁ ꦥꦫꦥ꧀ꦥꦮꦴꦢꦁ ꦱꦲꦣꦩ꧀ꦩꦺꦤ ꦱꦸꦤꦶꦒ꧀ꦒꦲꦶꦠꦁ ꦤꦶꦒ꧀ꦒꦲꦺꦠ꧀ꦮꦴ ꦱꦥ꧀ꦥꦴꦛꦶꦲꦴꦫꦶꦪꦁ ꦣꦩ꧀ꦩꦁ ꦢꦺꦱꦺꦤ꧀ꦠꦶ. ꦥꦫꦶꦤꦶꦧ꧀ꦧꦴꦠꦸꦢꦴꦤꦶ, ꦨꦤ꧀ꦠꦺ, ꦨꦒꦮꦴ, ꦥꦫꦶꦤꦶꦧ꧀ꦧꦴꦠꦸ ꦱꦸꦒꦠꦺꦴ, ꦥꦫꦶꦤꦶꦧ꧀ꦧꦴꦤꦏꦴꦭꦺꦴꦢꦴꦤꦶ, ꦨꦤ꧀ꦠꦺ, ꦨꦒꦮꦠꦺꦴ.

‘‘ꦨꦴꦱꦶꦠꦴ ꦑꦺꦴ ꦥꦤꦺꦱꦴ, ꦨꦤ꧀ꦠꦺ, ꦨꦒꦮꦠꦴ ꦮꦴꦕꦴ – ‘ꦤ ꦠꦴꦮꦴꦲꦁ, ꦥꦴꦥꦶꦩ ꦥꦫꦶꦤꦶꦧ꧀ꦧꦴꦪꦶꦱ꧀ꦱꦴꦩꦶ, ꦪꦴꦮ ꦩꦺ ꦈꦥꦴꦱꦶꦏꦴ ꦤ ꦱꦴꦮꦶꦏꦴ ꦨꦮꦶꦱ꧀ꦱꦤ꧀ꦠꦶ ꦮꦶꦪꦠ꧀ꦠꦴ ꦮꦶꦤꦷꦠꦴ ꦮꦶꦱꦴꦫꦢꦴ ꦧꦲꦸꦱ꧀ꦱꦸꦠꦴ ꦣꦩ꧀ꦩꦣꦫꦴ ꦣꦩ꧀ꦩꦴꦤꦸꦣꦩ꧀ꦩꦥ꧀ꦥꦛꦶꦥꦤ꧀ꦤꦴ ꦱꦴꦩꦷꦕꦶꦥ꧀ꦥꦛꦶꦥꦤ꧀ꦤꦴ ꦄꦤꦸꦣꦩ꧀ꦩꦕꦴꦫꦶꦤꦶꦪꦺꦴ, ꦱꦏꦁ ꦄꦴꦕꦫꦶꦪꦏꦁ ꦈꦒ꧀ꦒꦲꦺꦠ꧀ꦮꦴ ꦄꦴꦕꦶꦏ꧀ꦑꦶꦱ꧀ꦱꦤ꧀ꦠꦶ ꦢꦺꦱꦺꦱ꧀ꦱꦤ꧀ꦠꦶ ꦥꦚ꧀ꦚꦥꦺꦱ꧀ꦱꦤ꧀ꦠꦶ ꦥꦛ꧀ꦜꦥꦺꦱ꧀ꦱꦤ꧀ꦠꦶ ꦮꦶꦮꦫꦶꦱ꧀ꦱꦤ꧀ꦠꦶ ꦮꦶꦨꦗꦶꦱ꧀ꦱꦤ꧀ꦠꦶ ꦈꦠ꧀ꦠꦴꦤꦷꦏꦫꦶꦱ꧀ꦱꦤ꧀ꦠꦶ, ꦈꦥ꧀ꦥꦤ꧀ꦤꦁ ꦥꦫꦥ꧀ꦥꦮꦴꦢꦁ ꦱꦲꦣꦩ꧀ꦩꦺꦤ ꦱꦸꦤꦶꦒ꧀ꦒꦲꦶꦠꦁ ꦤꦶꦒ꧀ꦒꦲꦺꦠ꧀ꦮꦴ ꦱꦥ꧀ꦥꦴꦛꦶꦲꦴꦫꦶꦪꦁ ꦣꦩ꧀ꦩꦁ ꦢꦺꦱꦺꦱ꧀ꦱꦤ꧀ꦠꦷ’ꦠꦶ. ꦌꦠꦫꦲꦶ ꦑꦺꦴ ꦥꦤ, ꦨꦤ꧀ꦠꦺ, ꦈꦥꦴꦱꦶꦏꦴ ꦨꦒꦮꦠꦺꦴ ꦱꦴꦮꦶꦏꦴ ꦮꦶꦪꦠ꧀ꦠꦴ ꦮꦶꦤꦷꦠꦴ ꦮꦶꦱꦴꦫꦢꦴ ꦧꦲꦸꦱ꧀ꦱꦸꦠꦴ ꦣꦩ꧀ꦩꦣꦫꦴ ꦣꦩ꧀ꦩꦴꦤꦸꦣꦩ꧀ꦩꦥ꧀ꦥꦛꦶꦥꦤ꧀ꦤꦴ ꦱꦴꦩꦷꦕꦶꦥ꧀ꦥꦛꦶꦥꦤ꧀ꦤꦴ ꦄꦤꦸꦣꦩ꧀ꦩꦕꦴꦫꦶꦤꦶꦪꦺꦴ, ꦱꦏꦁ ꦄꦴꦕꦫꦶꦪꦏꦁ ꦈꦒ꧀ꦒꦲꦺꦠ꧀ꦮꦴ ꦄꦴꦕꦶꦏ꧀ꦑꦤ꧀ꦠꦶ ꦢꦺꦱꦺꦤ꧀ꦠꦶ ꦥꦚ꧀ꦚꦥꦺꦤ꧀ꦠꦶ ꦥꦛ꧀ꦜꦥꦺꦤ꧀ꦠꦶ ꦮꦶꦮꦫꦤ꧀ꦠꦶ ꦮꦶꦨꦗꦤ꧀ꦠꦶ ꦈꦠ꧀ꦠꦴꦤꦷꦏꦫꦺꦴꦤ꧀ꦠꦶ, ꦈꦥ꧀ꦥꦤ꧀ꦤꦁ ꦥꦫꦥ꧀ꦥꦮꦴꦢꦁ ꦱꦲꦣꦩ꧀ꦩꦺꦤ ꦱꦸꦤꦶꦒ꧀ꦒꦲꦶꦠꦁ ꦤꦶꦒ꧀ꦒꦲꦺꦠ꧀ꦮꦴ ꦱꦥ꧀ꦥꦴꦛꦶꦲꦴꦫꦶꦪꦁ ꦣꦩ꧀ꦩꦁ ꦢꦺꦱꦺꦤ꧀ꦠꦶ. ꦥꦫꦶꦤꦶꦧ꧀ꦧꦴꦠꦸꦢꦴꦤꦶ, ꦨꦤ꧀ꦠꦺ, ꦨꦒꦮꦴ, ꦥꦫꦶꦤꦶꦧ꧀ꦧꦴꦠꦸ ꦱꦸꦒꦠꦺꦴ, ꦥꦫꦶꦤꦶꦧ꧀ꦧꦴꦤꦏꦴꦭꦺꦴꦢꦴꦤꦶ, ꦨꦤ꧀ꦠꦺ, ꦨꦒꦮꦠꦺꦴ.

‘‘ꦨꦴꦱꦶꦠꦴ ꦑꦺꦴ ꦥꦤꦺꦱꦴ, ꦨꦤ꧀ꦠꦺ, ꦨꦒꦮꦠꦴ ꦮꦴꦕꦴ – ‘ꦤ ꦠꦴꦮꦴꦲꦁ, ꦥꦴꦥꦶꦩ, ꦥꦫꦶꦤꦶꦧ꧀ꦧꦴꦪꦶꦱ꧀ꦱꦴꦩꦶ, ꦪꦴꦮ ꦩꦺ ꦆꦢꦁ ꦧ꧀ꦫꦲ꧀ꦩꦕꦫꦶꦪꦁ ꦤ ꦆꦢ꧀ꦣꦁ ꦕꦺꦮ ꦨꦮꦶꦱ꧀ꦱꦠꦶ ꦦꦷꦠꦚ꧀ꦕ ꦮꦶꦠ꧀ꦡꦴꦫꦶꦏꦁ ꦧꦴꦲꦸꦗꦚ꧀ꦚꦁ ꦥꦸꦡꦸꦨꦹꦠꦁ ꦪꦴꦮ ꦢꦺꦮꦩꦤꦸꦱ꧀ꦱꦺꦲꦶ ꦱꦸꦥ꧀ꦥꦏꦴꦱꦶꦠ’ꦤ꧀ꦠꦶ. ꦌꦠꦫꦲꦶ ꦑꦺꦴ ꦥꦤ, ꦨꦤ꧀ꦠꦺ, ꦨꦒꦮꦠꦺꦴ ꦧ꧀ꦫꦲ꧀ꦩꦕꦫꦶꦪꦁ ꦆꦢ꧀ꦣꦁ ꦕꦺꦮ ꦦꦷꦠꦚ꧀ꦕ ꦮꦶꦠ꧀ꦡꦴꦫꦶꦏꦁ ꦧꦴꦲꦸꦗꦚ꧀ꦚꦁ ꦥꦸꦡꦸꦨꦹꦠꦁ, ꦪꦴꦮ ꦢꦺꦮꦩꦤꦸꦱ꧀ꦱꦺꦲꦶ ꦱꦸꦥ꧀ꦥꦏꦴꦱꦶꦠꦁ. ꦥꦫꦶꦤꦶꦧ꧀ꦧꦴꦠꦸꦢꦴꦤꦶ, ꦨꦤ꧀ꦠꦺ, ꦨꦒꦮꦴ, ꦥꦫꦶꦤꦶꦧ꧀ꦧꦴꦠꦸ ꦱꦸꦒꦠꦺꦴ, ꦥꦫꦶꦤꦶꦧ꧀ꦧꦴꦤꦏꦴꦭꦺꦴꦢꦴꦤꦶ, ꦨꦤ꧀ꦠꦺ, ꦨꦒꦮꦠꦺꦴ’’ꦠꦶ.

ꦌꦮꦁ ꦮꦸꦠ꧀ꦠꦺ ꦨꦒꦮꦴ ꦩꦴꦫꦁ ꦥꦴꦥꦶꦩꦤ꧀ꦠꦁ ꦌꦠꦢꦮꦺꦴꦕ – ‘‘ꦄꦥ꧀ꦥꦺꦴꦱ꧀ꦱꦸꦏ꧀ꦏꦺꦴ ꦠ꧀ꦮꦁ, ꦥꦴꦥꦶꦩ, ꦲꦺꦴꦲꦶ, ꦤ ꦕꦶꦫꦁ ꦠꦡꦴꦒꦠꦱ꧀ꦱ ꦥꦫꦶꦤꦶꦧ꧀ꦧꦴꦤꦁ ꦨꦮꦶꦱ꧀ꦱꦠꦶ. ꦆꦠꦺꦴ ꦠꦶꦟ꧀ꦟꦁ ꦩꦴꦱꦴꦤꦁ ꦄꦕ꧀ꦕꦪꦺꦤ ꦠꦡꦴꦒꦠꦺꦴ ꦥꦫꦶꦤꦶꦧ꧀ꦧꦴꦪꦶꦱ꧀ꦱꦠꦷ’’ꦠꦶ.

ꦄꦴꦪꦸꦱꦔ꧀ꦑꦴꦫꦎꦱ꧀ꦱꦗ꧀ꦗꦤꦁ

꧑꧖꧙. ꦄꦡ ꦑꦺꦴ ꦨꦒꦮꦴ ꦕꦴꦥꦴꦭꦺ ꦕꦺꦠꦶꦪꦺ ꦱꦠꦺꦴ ꦱꦩ꧀ꦥꦗꦴꦤꦺꦴ ꦄꦴꦪꦸꦱꦔ꧀ꦑꦴꦫꦁ ꦎꦱ꧀ꦱꦗꦶ. ꦎꦱ꧀ꦱꦛ꧀ꦜꦺ ꦕ ꦨꦒꦮꦠꦴ ꦄꦴꦪꦸꦱꦔ꧀ꦑꦴꦫꦺ ꦩꦲꦴꦨꦹꦩꦶꦕꦴꦭꦺꦴ ꦄꦲꦺꦴꦱꦶ ꦨꦶꦁꦱꦤꦏꦺꦴ ꦱꦭꦺꦴꦩꦲꦁꦱꦺꦴ [ꦭꦺꦴꦩꦲꦁꦱꦺꦴ (ꦱ꧀ꦪꦴ.)], ꦢꦺꦮꦢꦸꦤ꧀ꦢꦸꦨꦶꦪꦺꦴ [ꦢꦺꦮꦢꦸꦢ꧀ꦫꦨꦶꦪꦺꦴ (ꦏ.)] ꦕ ꦦꦭꦶꦁꦱꦸ. ꦄꦡ ꦑꦺꦴ ꦨꦒꦮꦴ ꦌꦠꦩꦠ꧀ꦡꦁ ꦮꦶꦢꦶꦠ꧀ꦮꦴ ꦠꦴꦪꦁ ꦮꦺꦭꦴꦪꦁ ꦆꦩꦁ ꦈꦢꦴꦤꦁ ꦈꦢꦴꦤꦺꦱꦶ –

‘‘ꦠꦸꦭꦩꦠꦸꦭꦚ꧀ꦕ ꦱꦩ꧀ꦨꦮꦁ, ꦨꦮꦱꦔ꧀ꦑꦴꦫꦩꦮꦱ꧀ꦱꦗꦶ ꦩꦸꦤꦶ;

ꦄꦗ꧀ꦙꦠ꧀ꦠꦫꦠꦺꦴ ꦱꦩꦴꦲꦶꦠꦺꦴ, ꦄꦨꦶꦤ꧀ꦢꦶ ꦏꦮꦕꦩꦶꦮꦠ꧀ꦠꦱꦩ꧀ꦨꦮ’’ꦤ꧀ꦠꦶ.

ꦩꦲꦴꦨꦹꦩꦶꦕꦴꦭꦲꦺꦠꦸ

꧑꧗꧐. ꦄꦡ ꦑꦺꦴ ꦄꦴꦪꦱ꧀ꦩꦠꦺꦴ ꦄꦴꦤꦤ꧀ꦢꦱ꧀ꦱ ꦌꦠꦢꦲꦺꦴꦱꦶ – ‘‘ꦄꦕ꧀ꦖꦫꦶꦪꦁ ꦮꦠ ꦨꦺꦴ, ꦄꦧ꧀ꦨꦸꦠꦁ ꦮꦠ ꦨꦺꦴ, ꦩꦲꦴ ꦮꦠꦴꦪꦁ ꦨꦹꦩꦶꦕꦴꦭꦺꦴ; ꦱꦸꦩꦲꦴ ꦮꦠꦴꦪꦁ ꦨꦹꦩꦶꦕꦴꦭꦺꦴ ꦨꦶꦁꦱꦤꦏꦺꦴ ꦱꦭꦺꦴꦩꦲꦁꦱꦺꦴ; ꦢꦺꦮꦢꦸꦤ꧀ꦢꦸꦨꦶꦪꦺꦴ ꦕ ꦦꦭꦶꦁꦱꦸ. ꦏꦺꦴ ꦤꦸ ꦑꦺꦴ ꦲꦺꦠꦸ ꦏꦺꦴ ꦥꦕ꧀ꦕꦪꦺꦴ ꦩꦲꦠꦺꦴ ꦨꦹꦩꦶꦕꦴꦭꦱ꧀ꦱ ꦥꦴꦠꦸꦨꦴꦮꦴꦪꦴ’’ꦠꦶ?

ꦄꦡ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶ, ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ, ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦺꦴ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦄꦕ꧀ꦖꦫꦶꦪꦁ, ꦨꦤ꧀ꦠꦺ, ꦄꦧ꧀ꦨꦸꦠꦁ, ꦨꦤ꧀ꦠꦺ, ꦩꦲꦴ ꦮꦠꦴꦪꦁ, ꦨꦤ꧀ꦠꦺ, ꦨꦹꦩꦶꦕꦴꦭꦺꦴ; ꦱꦸꦩꦲꦴ ꦮꦠꦴꦪꦁ, ꦨꦤ꧀ꦠꦺ, ꦨꦹꦩꦶꦕꦴꦭꦺꦴ ꦨꦶꦁꦱꦤꦏꦺꦴ ꦱꦭꦺꦴꦩꦲꦁꦱꦺꦴ; ꦢꦺꦮꦢꦸꦤ꧀ꦢꦸꦨꦶꦪꦺꦴ ꦕ ꦦꦭꦶꦁꦱꦸ. ꦏꦺꦴ ꦤꦸ ꦑꦺꦴ, ꦨꦤ꧀ꦠꦺ, ꦲꦺꦠꦸ ꦏꦺꦴ ꦥꦕ꧀ꦕꦪꦺꦴ ꦩꦲꦠꦺꦴ ꦨꦹꦩꦶꦕꦴꦭꦱ꧀ꦱ ꦥꦴꦠꦸꦨꦴꦮꦴꦪꦴ’’ꦠꦶ?

꧑꧗꧑. ‘‘ꦄꦛ꧀ꦜ ꦑꦺꦴ ꦆꦩꦺ, ꦄꦴꦤꦤ꧀ꦢ, ꦲꦺꦠꦹ, ꦄꦛ꧀ꦜ ꦥꦕ꧀ꦕꦪꦴ ꦩꦲꦠꦺꦴ ꦨꦹꦩꦶꦕꦴꦭꦱ꧀ꦱ ꦥꦴꦠꦸꦨꦴꦮꦴꦪ. ꦏꦠꦩꦺ ꦄꦛ꧀ꦜ? ꦄꦪꦁ, ꦄꦴꦤꦤ꧀ꦢ, ꦩꦲꦴꦥꦡꦮꦷ ꦈꦢꦏꦺ ꦥꦠꦶꦛ꧀ꦜꦶꦠꦴ, ꦈꦢꦏꦁ ꦮꦴꦠꦺ ꦥꦠꦶꦛ꧀ꦜꦶꦠꦁ, ꦮꦴꦠꦺꦴ ꦄꦴꦏꦴꦱꦛ꧀ꦜꦺꦴ. ꦲꦺꦴꦠꦶ ꦑꦺꦴ ꦱꦺꦴ, ꦄꦴꦤꦤ꧀ꦢ, ꦱꦩꦪꦺꦴ, ꦪꦁ ꦩꦲꦴꦮꦴꦠꦴ ꦮꦴꦪꦤ꧀ꦠꦶ. ꦩꦲꦴꦮꦴꦠꦴ ꦮꦴꦪꦤ꧀ꦠꦴ ꦈꦢꦏꦁ ꦏꦩ꧀ꦥꦺꦤ꧀ꦠꦶ. ꦈꦢꦏꦁ ꦏꦩ꧀ꦥꦶꦠꦁ ꦥꦡꦮꦶꦁ ꦏꦩ꧀ꦥꦺꦠꦶ. ꦄꦪꦁ ꦥꦜꦩꦺꦴ ꦲꦺꦠꦸ ꦥꦜꦩꦺꦴ ꦥꦕ꧀ꦕꦪꦺꦴ ꦩꦲꦠꦺꦴ ꦨꦹꦩꦶꦕꦴꦭꦱ꧀ꦱ ꦥꦴꦠꦸꦨꦴꦮꦴꦪ.

‘‘ꦥꦸꦤ ꦕꦥꦫꦁ, ꦄꦴꦤꦤ꧀ꦢ, ꦱꦩꦟꦺꦴ ꦮꦴ ꦲꦺꦴꦠꦶ ꦧ꧀ꦫꦴꦲ꧀ꦩꦟꦺꦴ ꦮꦴ ꦆꦢ꧀ꦣꦶꦩꦴ ꦕꦺꦠꦺꦴꦮꦱꦶꦥ꧀ꦥꦠ꧀ꦠꦺꦴ, ꦢꦺꦮꦺꦴ ꦮꦴ ꦩꦲꦶꦢ꧀ꦣꦶꦏꦺꦴ ꦩꦲꦴꦤꦸꦨꦴꦮꦺꦴ, ꦠꦱ꧀ꦱ ꦥꦫꦶꦠ꧀ꦠꦴ ꦥꦡꦮꦷꦱꦚ꧀ꦚꦴ ꦨꦴꦮꦶꦠꦴ ꦲꦺꦴꦠꦶ, ꦄꦥ꧀ꦥꦩꦴꦟꦴ ꦄꦴꦥꦺꦴꦱꦚ꧀ꦚꦴ. ꦱꦺꦴ ꦆꦩꦁ ꦥꦡꦮꦶꦁ ꦏꦩ꧀ꦥꦺꦠꦶ ꦱꦔ꧀ꦏꦩ꧀ꦥꦺꦠꦶ ꦱꦩ꧀ꦥꦏꦩ꧀ꦥꦺꦠꦶ ꦱꦩ꧀ꦥꦮꦺꦣꦺꦠꦶ. ꦄꦪꦁ ꦢꦸꦠꦶꦪꦺꦴ ꦲꦺꦠꦸ ꦢꦸꦠꦶꦪꦺꦴ ꦥꦕ꧀ꦕꦪꦺꦴ ꦩꦲꦠꦺꦴ ꦨꦹꦩꦶꦕꦴꦭꦱ꧀ꦱ ꦥꦴꦠꦸꦨꦴꦮꦴꦪ.

‘‘ꦥꦸꦤ ꦕꦥꦫꦁ, ꦄꦴꦤꦤ꧀ꦢ, ꦪꦢꦴ ꦧꦺꦴꦣꦶꦱꦠ꧀ꦠꦺꦴ ꦠꦸꦱꦶꦠꦏꦴꦪꦴ ꦕꦮꦶꦠ꧀ꦮꦴ ꦱꦠꦺꦴ ꦱꦩ꧀ꦥꦗꦴꦤꦺꦴ ꦩꦴꦠꦸꦏꦸꦕ꧀ꦖꦶꦁ ꦎꦏ꧀ꦏꦩꦠꦶ, ꦠꦢꦴꦪꦁ ꦥꦡꦮꦷ ꦏꦩ꧀ꦥꦠꦶ ꦱꦔ꧀ꦏꦩ꧀ꦥꦠꦶ ꦱꦩ꧀ꦥꦏꦩ꧀ꦥꦠꦶ ꦱꦩ꧀ꦥꦮꦺꦣꦠꦶ. ꦄꦪꦁ ꦠꦠꦶꦪꦺꦴ ꦲꦺꦠꦸ ꦠꦠꦶꦪꦺꦴ ꦥꦕ꧀ꦕꦪꦺꦴ ꦩꦲꦠꦺꦴ ꦨꦹꦩꦶꦕꦴꦭꦱ꧀ꦱ ꦥꦴꦠꦸꦨꦴꦮꦴꦪ.

‘‘ꦥꦸꦤ ꦕꦥꦫꦁ, ꦄꦴꦤꦤ꧀ꦢ, ꦪꦢꦴ ꦧꦺꦴꦣꦶꦱꦠ꧀ꦠꦺꦴ ꦱꦠꦺꦴ ꦱꦩ꧀ꦥꦗꦴꦤꦺꦴ ꦩꦴꦠꦸꦏꦸꦕ꧀ꦖꦶꦱ꧀ꦩꦴ ꦤꦶꦏ꧀ꦑꦩꦠꦶ, ꦠꦢꦴꦪꦁ ꦥꦡꦮꦷ ꦏꦩ꧀ꦥꦠꦶ ꦱꦔ꧀ꦏꦩ꧀ꦥꦠꦶ ꦱꦩ꧀ꦥꦏꦩ꧀ꦥꦠꦶ ꦱꦩ꧀ꦥꦮꦺꦣꦠꦶ. ꦄꦪꦁ ꦕꦠꦸꦠ꧀ꦡꦺꦴ ꦲꦺꦠꦸ ꦕꦠꦸꦠ꧀ꦡꦺꦴ ꦥꦕ꧀ꦕꦪꦺꦴ ꦩꦲꦠꦺꦴ ꦨꦹꦩꦶꦕꦴꦭꦱ꧀ꦱ ꦥꦴꦠꦸꦨꦴꦮꦴꦪ.

‘‘ꦥꦸꦤ ꦕꦥꦫꦁ, ꦄꦴꦤꦤ꧀ꦢ, ꦪꦢꦴ ꦠꦡꦴꦒꦠꦺꦴ ꦄꦤꦸꦠ꧀ꦠꦫꦁ ꦱꦩ꧀ꦩꦴꦱꦩ꧀ꦧꦺꦴꦣꦶꦁ ꦄꦨꦶꦱꦩ꧀ꦧꦸꦗ꧀ꦙꦠꦶ, ꦠꦢꦴꦪꦁ ꦥꦡꦮꦷ ꦏꦩ꧀ꦥꦠꦶ ꦱꦔ꧀ꦏꦩ꧀ꦥꦠꦶ ꦱꦩ꧀ꦥꦏꦩ꧀ꦥꦠꦶ ꦱꦩ꧀ꦥꦮꦺꦣꦠꦶ. ꦄꦪꦁ ꦥꦚ꧀ꦕꦩꦺꦴ ꦲꦺꦠꦸ ꦥꦚ꧀ꦕꦩꦺꦴ ꦥꦕ꧀ꦕꦪꦺꦴ ꦩꦲꦠꦺꦴ ꦨꦹꦩꦶꦕꦴꦭꦱ꧀ꦱ ꦥꦴꦠꦸꦨꦴꦮꦴꦪ.

‘‘ꦥꦸꦤ ꦕꦥꦫꦁ, ꦄꦴꦤꦤ꧀ꦢ, ꦪꦢꦴ ꦠꦡꦴꦒꦠꦺꦴ ꦄꦤꦸꦠ꧀ꦠꦫꦁ ꦣꦩ꧀ꦩꦕꦏ꧀ꦏꦁ ꦥꦮꦠ꧀ꦠꦺꦠꦶ, ꦠꦢꦴꦪꦁ ꦥꦡꦮꦷ ꦏꦩ꧀ꦥꦠꦶ ꦱꦔ꧀ꦏꦩ꧀ꦥꦠꦶ ꦱꦩ꧀ꦥꦏꦩ꧀ꦥꦠꦶ ꦱꦩ꧀ꦥꦮꦺꦣꦠꦶ. ꦄꦪꦁ ꦖꦛ꧀ꦜꦺꦴ ꦲꦺꦠꦸ ꦖꦛ꧀ꦜꦺꦴ ꦥꦕ꧀ꦕꦪꦺꦴ ꦩꦲꦠꦺꦴ ꦨꦹꦩꦶꦕꦴꦭꦱ꧀ꦱ ꦥꦴꦠꦸꦨꦴꦮꦴꦪ.

‘‘ꦥꦸꦤ ꦕꦥꦫꦁ, ꦄꦴꦤꦤ꧀ꦢ, ꦪꦢꦴ ꦠꦡꦴꦒꦠꦺꦴ ꦱꦠꦺꦴ ꦱꦩ꧀ꦥꦗꦴꦤꦺꦴ ꦄꦴꦪꦸꦱꦔ꧀ꦑꦴꦫꦁ ꦎꦱ꧀ꦱꦗ꧀ꦗꦠꦶ, ꦠꦢꦴꦪꦁ ꦥꦡꦮꦷ ꦏꦩ꧀ꦥꦠꦶ ꦱꦔ꧀ꦏꦩ꧀ꦥꦠꦶ ꦱꦩ꧀ꦥꦏꦩ꧀ꦥꦠꦶ ꦱꦩ꧀ꦥꦮꦺꦣꦠꦶ. ꦄꦪꦁ ꦱꦠ꧀ꦠꦩꦺꦴ ꦲꦺꦠꦸ ꦱꦠ꧀ꦠꦩꦺꦴ ꦥꦕ꧀ꦕꦪꦺꦴ ꦩꦲꦠꦺꦴ ꦨꦹꦩꦶꦕꦴꦭꦱ꧀ꦱ ꦥꦴꦠꦸꦨꦴꦮꦴꦪ.

‘‘ꦥꦸꦤ ꦕꦥꦫꦁ, ꦄꦴꦤꦤ꧀ꦢ, ꦪꦢꦴ ꦠꦡꦴꦒꦠꦺꦴ ꦄꦤꦸꦥꦴꦢꦶꦱꦺꦱꦴꦪ ꦤꦶꦧ꧀ꦧꦴꦤꦣꦴꦠꦸꦪꦴ ꦥꦫꦶꦤꦶꦧ꧀ꦧꦴꦪꦠꦶ, ꦠꦢꦴꦪꦁ ꦥꦡꦮꦷ ꦏꦩ꧀ꦥꦠꦶ ꦱꦔ꧀ꦏꦩ꧀ꦥꦠꦶ ꦱꦩ꧀ꦥꦏꦩ꧀ꦥꦠꦶ ꦱꦩ꧀ꦥꦮꦺꦣꦠꦶ. ꦄꦪꦁ ꦄꦛ꧀ꦜꦩꦺꦴ ꦲꦺꦠꦸ ꦄꦛ꧀ꦜꦩꦺꦴ ꦥꦕ꧀ꦕꦪꦺꦴ ꦩꦲꦠꦺꦴ ꦨꦹꦩꦶꦕꦴꦭꦱ꧀ꦱ ꦥꦴꦠꦸꦨꦴꦮꦴꦪ. ꦆꦩꦺ ꦑꦺꦴ, ꦄꦴꦤꦤ꧀ꦢ, ꦄꦛ꧀ꦜ ꦲꦺꦠꦹ, ꦄꦛ꧀ꦜ ꦥꦕ꧀ꦕꦪꦴ ꦩꦲꦠꦺꦴ ꦨꦹꦩꦶꦕꦴꦭꦱ꧀ꦱ ꦥꦴꦠꦸꦨꦴꦮꦴꦪꦴ’’ꦠꦶ.

ꦄꦛ꧀ꦜ ꦥꦫꦶꦱꦴ