ꦕꦺꦴꦢꦤꦴꦏꦟ꧀ꦝꦁ

ꦄꦤꦸꦮꦶꦗ꧀ꦗꦏꦏꦶꦕ꧀ꦕꦮꦟ꧀ꦟꦤꦴ

꧓꧖꧐-꧓꧖꧑. ꦆꦢꦴꦤꦶ ꦌꦮꦁ ꦈꦥ꧀ꦥꦤ꧀ꦤꦴꦪ ꦕꦺꦴꦢꦤꦴꦪ ꦮꦶꦤꦪꦣꦫꦺꦤ ꦏꦠ꧀ꦠꦧ꧀ꦧꦏꦶꦕ꧀ꦕꦁ ꦢꦱ꧀ꦱꦺꦠꦸꦁ ꦄꦤꦸꦮꦶꦗ꧀ꦗꦏꦺꦤꦴꦠꦶꦄꦴꦢꦶ ꦄꦴꦫꦢ꧀ꦣꦁ. ꦠꦠ꧀ꦡ ꦢꦶꦛ꧀ꦜꦁ ꦢꦶꦛ꧀ꦜꦺꦤꦴꦠꦶ ꦒꦴꦡꦴꦪ ꦄꦪꦩꦠ꧀ꦡꦺꦴ – ꦌꦏꦺꦤꦺꦏꦺꦴ ꦩꦴꦠꦸꦒꦴꦩꦺꦤ ꦱꦢ꧀ꦣꦶꦁ ꦌꦏꦛ꧀ꦜꦴꦤꦠꦺꦴ ꦤꦶꦏ꧀ꦑꦩꦤ꧀ꦠꦺꦴ ꦮꦴ ꦥꦮꦶꦱꦤ꧀ꦠꦺꦴ ꦮꦴ ꦢꦶꦛ꧀ꦜꦺꦴ, ꦱꦺꦴ ꦠꦁ ꦥꦴꦫꦴꦗꦶꦏꦺꦤ ꦕꦺꦴꦢꦺꦠꦶ, ꦆꦠꦫꦺꦴ ꦠꦱ꧀ꦱ ꦢꦱ꧀ꦱꦤꦁ ꦄꦤꦸꦗꦴꦤꦴꦠꦶ. ꦠꦁ ꦥꦤ ꦢꦱ꧀ꦱꦤꦁ ꦥꦛꦶꦕ꧀ꦕ ꦥꦴꦫꦴꦗꦶꦏꦁ ꦤ ꦈꦥꦺꦠꦶ, ꦤ ꦥꦛꦶꦗꦴꦤꦴꦠꦶ. ꦌꦮꦩꦺꦠ꧀ꦡ ꦪꦁ ꦠꦺꦤ ꦢꦶꦛ꧀ꦜꦁ, ꦠꦁ ꦠꦱ꧀ꦱ ‘‘ꦢꦶꦛ꧀ꦜꦺꦴ ꦩꦪꦴ’’ꦠꦶ ꦆꦩꦶꦤꦴ ꦢꦶꦛ꧀ꦜꦮꦕꦤꦺꦤ ꦱꦩꦺꦠꦶ. ꦪꦱ꧀ꦩꦴ ꦥꦤ ꦆꦠꦫꦺꦴ ꦠꦁ ꦢꦱ꧀ꦱꦤꦁ ꦥꦛꦶꦕ꧀ꦕ ꦢꦺꦴꦱꦁ ꦤ ꦥꦛꦶꦗꦴꦤꦴꦠꦶ, ꦠꦱ꧀ꦩꦴ ꦄꦱꦸꦢ꧀ꦣꦥꦫꦶꦱꦔ꧀ꦏꦶꦠꦺꦴ ꦲꦺꦴꦠꦶ; ꦄꦩꦹꦭꦏꦥꦫꦶꦱꦔ꧀ꦏꦶꦠꦺꦴꦠꦶ ꦄꦠ꧀ꦡꦺꦴ. ꦠꦱ꧀ꦱ ꦥꦸꦒ꧀ꦒꦭꦱ꧀ꦱ ‘‘ꦱꦸꦢ꧀ꦣꦺꦴ ꦄꦲ’’ꦤ꧀ꦠꦶ ꦥꦛꦶꦚ꧀ꦚꦴꦪ ꦠꦺꦤ ꦱꦢ꧀ꦣꦶꦁ ꦈꦥꦺꦴꦱꦡꦺꦴ ꦏꦴꦠꦧ꧀ꦧꦺꦴ. ꦱꦺꦱꦒꦴꦡꦴꦢ꧀ꦮꦪꦺꦥꦶ ꦌꦱꦺꦮ ꦤꦪꦺꦴ. ꦱꦺꦱꦁ ꦱꦧ꧀ꦧꦠ꧀ꦡ ꦈꦠ꧀ꦠꦴꦤꦩꦺꦮꦴꦠꦶ.

ꦄꦤꦸꦮꦶꦗ꧀ꦗꦏꦏꦶꦕ꧀ꦕꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦕꦺꦴꦢꦏꦥꦸꦕ꧀ꦖꦴꦮꦶꦱ꧀ꦱꦗ꧀ꦗꦤꦴꦮꦟ꧀ꦟꦤꦴ

꧓꧖꧒-꧓꧖꧓. ꦕꦺꦴꦢꦤꦴꦪ ꦏꦺꦴ ꦄꦴꦢꦷꦠꦶꦄꦴꦢꦶꦥꦸꦕ꧀ꦖꦴꦤꦁ ꦮꦶꦱ꧀ꦱꦗ꧀ꦗꦤꦺ ꦱꦕ꧀ꦕꦺ ꦕ ꦄꦏꦸꦥ꧀ꦥꦺ ꦕꦴꦠꦶ ꦱꦕ꧀ꦕꦺ ꦥꦠꦶꦛ꧀ꦜꦴꦠꦧ꧀ꦧꦁ ꦄꦏꦸꦥ꧀ꦥꦺ ꦕ. ꦪꦁ ꦏꦠꦁ ꦮꦴ ꦤ ꦏꦠꦁ ꦮꦴ, ꦠꦢꦺꦮ ꦮꦠ꧀ꦠꦧ꧀ꦧꦁ, ꦤ ꦕ ꦕꦺꦴꦢꦏꦺ ꦮꦴ ꦄꦤꦸꦮꦶꦗ꧀ꦗꦏꦺ ꦮꦴ ꦱꦔ꧀ꦓꦺ ꦮꦴ ꦏꦺꦴꦥꦺꦴ ꦈꦥ꧀ꦥꦴꦢꦺꦠꦧ꧀ꦧꦺꦴ. ꦎꦠꦶꦟ꧀ꦟꦴꦤꦺꦴꦠꦶꦟ꧀ꦟꦁ ꦗꦴꦤꦶꦠꦧ꧀ꦧꦤ꧀ꦠꦶ ꦎꦠꦶꦟ꧀ꦟꦚ꧀ꦕ ꦄꦤꦺꦴꦠꦶꦟ꧀ꦟꦚ꧀ꦕ ꦮꦕꦤꦁ ꦗꦴꦤꦶꦠꦧ꧀ꦧꦁ. ꦠꦠ꧀ꦫꦴꦪꦁ ꦗꦴꦤꦤꦮꦶꦣꦶ – ꦌꦠ꧀ꦠꦏꦴ ꦕꦺꦴꦢꦏꦱ꧀ꦱ ꦥꦸꦧ꧀ꦧꦏꦡꦴ, ꦌꦠ꧀ꦠꦏꦴ ꦥꦕ꧀ꦖꦶꦩꦏꦡꦴ, ꦌꦠ꧀ꦠꦏꦴ ꦕꦸꦢꦶꦠꦏꦱ꧀ꦱ ꦥꦸꦧ꧀ꦧꦏꦡꦴ, ꦌꦠ꧀ꦠꦏꦴ ꦥꦕ꧀ꦖꦶꦩꦏꦡꦴꦠꦶ ꦗꦴꦤꦶꦠꦧ꧀ꦧꦴ. ꦕꦺꦴꦢꦏꦱ꧀ꦱ ꦥꦩꦴꦟꦁ ꦒꦟ꧀ꦲꦶꦠꦧ꧀ꦧꦁ, ꦕꦸꦢꦶꦠꦏꦱ꧀ꦱ ꦥꦩꦴꦟꦁ ꦒꦟ꧀ꦲꦶꦠꦧ꧀ꦧꦁ, ꦄꦤꦸꦮꦶꦗ꧀ꦗꦏꦱ꧀ꦱ ꦥꦩꦴꦟꦁ ꦒꦟ꧀ꦲꦶꦠꦧ꧀ꦧꦁ, ꦄꦤꦸꦮꦶꦗ꧀ꦗꦏꦺꦴ ꦄꦥ꧀ꦥꦩꦠ꧀ꦠꦏꦩ꧀ꦥꦶ ꦄꦲꦴꦥꦺꦤ꧀ꦠꦺꦴ ‘‘ꦄꦴꦮꦸꦱꦺꦴ ꦱꦩꦤ꧀ꦤꦴꦲꦫꦶꦠ꧀ꦮꦴ ꦈꦗꦸꦁ ꦏꦠ꧀ꦮꦴ ꦄꦴꦲꦫꦴ’’ꦠꦶ ꦮꦠ꧀ꦠꦧ꧀ꦧꦺꦴ, ꦱꦔ꧀ꦓꦺꦤ ꦌꦮꦁ ꦥꦛꦶꦥꦗ꧀ꦗꦶꦠꦧ꧀ꦧꦁ. ꦪꦺꦤ ꦣꦩ꧀ꦩꦺꦤ ꦪꦺꦤ ꦮꦶꦤꦪꦺꦤ ꦪꦺꦤ ꦱꦠ꧀ꦡꦸꦱꦴꦱꦤꦺꦤ ꦠꦁ ꦄꦣꦶꦏꦫꦟꦁ ꦮꦹꦥꦱꦩ꧀ꦩꦠꦷꦠꦶ ꦌꦠ꧀ꦡ ꦣꦩ꧀ꦩꦺꦴꦠꦶ ꦨꦹꦠꦁ ꦮꦠ꧀ꦡꦸ. ꦮꦶꦤꦪꦺꦴꦠꦶ ꦕꦺꦴꦢꦤꦴ ꦕꦺꦮ ꦱꦴꦫꦟꦴ ꦕ. ꦱꦠ꧀ꦡꦸꦱꦴꦱꦤꦤ꧀ꦠꦶ ꦚꦠ꧀ꦠꦶꦱꦩ꧀ꦥꦢꦴ ꦕꦺꦮ ꦄꦤꦸꦱ꧀ꦱꦴꦮꦤꦱꦩ꧀ꦥꦢꦴ ꦕ. ꦌꦠꦺꦤ ꦲꦶ ꦣꦩ꧀ꦩꦺꦤ ꦕ ꦮꦶꦤꦪꦺꦤ ꦕ ꦱꦠ꧀ꦡꦸꦱꦴꦱꦤꦺꦤ ꦕ ꦄꦣꦶꦏꦫꦟꦁ ꦮꦹꦥꦱꦩꦠꦶ, ꦠꦱ꧀ꦩꦴ ꦄꦤꦸꦮꦶꦗ꧀ꦗꦏꦺꦤ ꦨꦹꦠꦺꦤ ꦮꦠ꧀ꦡꦸꦤꦴ ꦕꦺꦴꦢꦺꦠ꧀ꦮꦴ ꦄꦴꦥꦠ꧀ꦠꦶꦁ ꦱꦴꦫꦺꦠ꧀ꦮꦴ ꦚꦠ꧀ꦠꦶꦱꦩ꧀ꦥꦢꦴꦪ ꦕꦺꦮ ꦄꦤꦸꦱ꧀ꦱꦴꦮꦤꦱꦩ꧀ꦥꦢꦴꦪ ꦕ ꦠꦁ ꦄꦣꦶꦏꦫꦟꦁ ꦮꦹꦥꦱꦩꦺꦠꦧ꧀ꦧꦁ, ꦄꦤꦸꦮꦶꦗ꧀ꦗꦏꦺꦤ ꦌꦮꦁ ꦥꦛꦶꦥꦗ꧀ꦗꦶꦠꦧ꧀ꦧꦁ. ꦱꦺꦱꦩꦺꦠ꧀ꦡ ꦈꦠ꧀ꦠꦴꦤꦩꦺꦮ.

꧓꧖꧔. ꦈꦥꦺꦴꦱꦡꦺꦴ ꦏꦶꦩꦠ꧀ꦡꦴꦪꦴꦠꦶꦄꦴꦢꦶꦥꦸꦕ꧀ꦖꦴꦮꦶꦱ꧀ꦱꦗ꧀ꦗꦤꦩ꧀ꦥꦶ ꦈꦠ꧀ꦠꦴꦤꦩꦺꦮ. ꦄꦮꦱꦴꦤꦒꦴꦡꦴꦱꦸ ꦡꦺꦫꦺ ꦕ ꦥꦫꦶꦨꦴꦱꦠꦷꦠꦶ ꦄꦮꦩꦚ꧀ꦚꦁ ꦏꦫꦺꦴꦤ꧀ꦠꦺꦴ ‘‘ꦏꦶꦁ ꦆꦩꦺ ꦗꦴꦤꦤ꧀ꦠꦷ’’ꦠꦶ ꦥꦫꦶꦨꦴꦱꦠꦶ. ꦑꦠꦺꦴ ꦈꦥꦲꦠꦶꦤ꧀ꦢ꧀ꦫꦶꦪꦺꦴꦠꦶ ꦠꦴꦪ ꦖꦤ꧀ꦢꦴꦢꦶꦒꦴꦩꦶꦠꦴꦪ ꦠꦺꦤ ꦕ ꦥꦫꦶꦨꦴꦱꦤꦺꦤ ꦄꦠ꧀ꦠꦤꦴ ꦄꦠ꧀ꦠꦤꦺꦴ ꦑꦠꦠ꧀ꦠꦴ ꦑꦠꦺꦴ. ꦱꦢ꧀ꦣꦴꦢꦷꦤꦚ꧀ꦕ ꦆꦤ꧀ꦢ꧀ꦫꦶꦪꦴꦤꦁ ꦈꦥꦲꦠꦠ꧀ꦠꦴ ꦈꦥꦲꦠꦶꦤ꧀ꦢ꧀ꦫꦶꦪꦺꦴ. ꦤꦶꦫꦪꦁ ꦒꦕ꧀ꦖꦠꦶ ꦢꦸꦩ꧀ꦩꦺꦣꦺꦴ, ꦤ ꦕ ꦱꦶꦏ꧀ꦑꦴꦪ ꦒꦴꦫꦮꦺꦴꦠꦶ ꦱꦺꦴ ꦑꦠꦺꦴ ꦈꦥꦲꦠꦶꦤ꧀ꦢ꧀ꦫꦶꦪꦺꦴ ꦥꦚ꧀ꦚꦴꦪ ꦄꦨꦴꦮꦠꦺꦴ ꦢꦸꦩ꧀ꦩꦺꦣꦺꦴ ꦠꦷꦱꦸ ꦱꦶꦏ꧀ꦑꦴꦱꦸ ꦄꦱꦶꦏ꧀ꦑꦤꦠꦺꦴ ꦤ ꦕ ꦱꦶꦏ꧀ꦑꦴꦪ ꦒꦴꦫꦮꦺꦴ ꦏꦴꦪꦱ꧀ꦱ ꦨꦺꦢꦴ ꦤꦶꦫꦪꦩꦺꦮ ꦈꦥꦒꦕ꧀ꦖꦠꦶ, ꦠꦱ꧀ꦩꦴ ꦤ ꦕ ꦄꦴꦩꦶꦱꦁ ꦤꦶꦱ꧀ꦱꦴꦪ…ꦥꦺ… ꦪꦡꦴ ꦣꦩ꧀ꦩꦺꦴ ꦠꦡꦴ ꦏꦫꦺꦠꦶ. ꦠꦱ꧀ꦱꦠ꧀ꦡꦺꦴ ꦤ ꦕ ꦄꦴꦩꦶꦱꦁ ꦤꦶꦱ꧀ꦱꦴꦪ ꦏꦫꦺ, ꦕꦸꦢꦶꦠꦏꦕꦺꦴꦢꦏꦺꦱꦸ ꦲꦶ ꦄꦚ꧀ꦚꦠꦫꦺꦤ ꦢꦶꦤ꧀ꦤꦁ ꦕꦷꦮꦫꦴꦢꦶꦄꦴꦩꦶꦱꦁ ꦒꦟ꧀ꦲꦤ꧀ꦠꦺꦴ ꦄꦴꦩꦶꦱꦁ ꦤꦶꦱ꧀ꦱꦴꦪ ꦏꦫꦺꦴꦠꦶ, ꦌꦮꦁ ꦤ ꦏꦫꦺꦪ꧀ꦪ. ꦤ ꦕ ꦤꦶꦱ꧀ꦱꦴꦪ ꦥꦸꦒ꧀ꦒꦭꦤ꧀ꦠꦶ ‘‘ꦄꦪꦁ ꦩꦺ ꦈꦥꦗ꧀ꦙꦴꦪꦺꦴ ꦮꦴ ꦄꦴꦕꦫꦶꦪꦺꦴ ꦮꦴ’’ꦠꦶꦄꦴꦢꦶꦤꦴ ꦤꦪꦺꦤ ꦖꦤ꧀ꦢꦴꦢꦷꦲꦶ ꦒꦕ꧀ꦖꦤ꧀ꦠꦺꦴ ꦥꦸꦒ꧀ꦒꦭꦁ ꦤꦶꦱ꧀ꦱꦴꦪ ꦏꦫꦺꦴꦠꦶ, ꦌꦮꦁ ꦤ ꦏꦫꦺꦪ꧀ꦪ. ꦄꦡ ꦑꦺꦴ ꦈꦨꦺꦴꦥꦺꦠꦺ ꦮꦶꦮꦗ꧀ꦗꦺꦠ꧀ꦮꦴ ꦪꦡꦴ ꦣꦩ꧀ꦩꦺꦴ ꦜꦶꦠꦺꦴ, ꦠꦡꦺꦮ ꦏꦫꦺꦪ꧀ꦪꦴꦠꦶ.

ꦈꦥꦏꦟ꧀ꦟꦏꦁ ꦗꦥ꧀ꦥꦠꦷꦠꦶ ‘‘ꦌꦮꦁ ꦏꦡꦺꦲꦶ, ꦩꦴ ꦌꦮꦁ ꦏꦡꦪꦶꦠ꧀ꦡꦴ’’ꦠꦶ ꦏꦟ꧀ꦟꦩꦹꦭꦺ ꦩꦤ꧀ꦠꦺꦠꦶ. ꦗꦶꦩ꧀ꦲꦁ ꦥꦺꦏ꧀ꦑꦠꦷꦠꦶ ꦢꦺꦴꦱꦩꦺꦮ ꦒꦮꦺꦱꦠꦶ. ꦮꦷꦠꦶꦲꦫꦠꦷꦠꦶ ꦮꦶꦤꦶꦕ꧀ꦖꦪꦁ ꦲꦴꦥꦺꦠꦶ. ꦏꦸꦩ꧀ꦩꦒ꧀ꦒꦁ ꦥꦛꦶꦱꦺꦮꦠꦷꦠꦶ ꦄꦴꦥꦠ꧀ꦠꦶꦁ ꦢꦷꦥꦺꦠꦶ.

ꦄꦏꦴꦭꦺꦤ ꦕ ꦕꦺꦴꦢꦺꦠꦷꦠꦶ ꦄꦤꦺꦴꦏꦴꦱꦺ ꦄꦤꦗ꧀ꦙꦶꦛ꧀ꦜꦺꦴꦮ ꦕꦺꦴꦢꦺꦠꦶ. ꦥꦸꦧ꧀ꦧꦴꦥꦫꦁ ꦤ ꦗꦴꦤꦴꦠꦷꦠꦶ ꦥꦸꦫꦶꦩꦏꦡꦚ꧀ꦕ ꦥꦕ꧀ꦖꦶꦩꦏꦡꦚ꧀ꦕ ꦤ ꦗꦴꦤꦴꦠꦶ.

ꦄꦤꦸꦱꦤ꧀ꦣꦶꦮꦕꦤꦥꦡꦁ ꦤ ꦗꦴꦤꦴꦠꦷꦠꦶ ꦏꦡꦴꦤꦸꦱꦤ꧀ꦣꦶꦮꦶꦤꦶꦕ꧀ꦖꦪꦴꦤꦸꦱꦤ꧀ꦣꦶꦮꦱꦺꦤ ꦮꦕꦤꦁ ꦤ ꦗꦴꦤꦴꦠꦶ. ꦱꦺꦱꦁ ꦱꦧ꧀ꦧꦠ꧀ꦡ ꦈꦠ꧀ꦠꦴꦤꦩꦺꦮꦴꦠꦶ.

ꦕꦺꦴꦢꦤꦴꦏꦟ꧀ꦝꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.