꧓. ꦠꦠꦶꦪꦥꦴꦫꦴꦗꦶꦏꦁ

ꦠꦠꦶꦪꦁ ꦠꦷꦲꦶ ꦱꦸꦢ꧀ꦣꦺꦤ, ꦪꦁ ꦧꦸꦢ꧀ꦣꦺꦤ ꦮꦶꦨꦴꦮꦶꦠꦁ;

ꦥꦴꦫꦴꦗꦶꦏꦁ ꦠꦱ꧀ꦱ ꦢꦴꦤꦶ, ꦥꦠ꧀ꦠꦺꦴ ꦱꦁꦮꦟ꧀ꦟꦤꦴꦏ꧀ꦏꦩꦺꦴ.

ꦪꦱ꧀ꦩꦴ ꦠꦱ꧀ꦩꦴ ꦱꦸꦮꦶꦚ꧀ꦚꦺꦪ꧀ꦪꦁ, ꦪꦁ ꦥꦸꦧ꧀ꦧꦺ ꦕ ꦥꦏꦴꦱꦶꦠꦁ;

ꦠꦁ ꦮꦗ꧀ꦗꦪꦶꦠ꧀ꦮꦴ ꦄꦱ꧀ꦱꦴꦥꦶ, ꦲꦺꦴꦠꦶ ꦱꦁꦮꦟ꧀ꦟꦤꦴ ꦄꦪꦁ.

ꦥꦜꦩꦥꦚ꧀ꦚꦠ꧀ꦠꦶꦤꦶꦢꦴꦤꦮꦟ꧀ꦟꦤꦴ

꧑꧖꧒. ꦠꦺꦤ ꦱꦩꦪꦺꦤ ꦧꦸꦢ꧀ꦣꦺꦴ ꦨꦒꦮꦴ ꦮꦺꦱꦴꦭꦶꦪꦁ ꦮꦶꦲꦫꦠꦶ ꦩꦲꦴꦮꦤꦺ ꦏꦹꦛꦴꦒꦴꦫꦱꦴꦭꦴꦪꦤ꧀ꦠꦶ ꦌꦠ꧀ꦡ ꦮꦺꦱꦴꦭꦶꦪꦤ꧀ꦠꦶ ꦌꦮꦁꦤꦴꦩꦏꦺ ꦆꦠ꧀ꦡꦶꦭꦶꦔ꧀ꦒꦮꦱꦺꦤ ꦥꦮꦠ꧀ꦠꦮꦺꦴꦲꦴꦫꦺ ꦤꦒꦫꦺ. ꦠꦚ꧀ꦲꦶ ꦤꦒꦫꦁ ꦠꦶꦏ꧀ꦑꦠ꧀ꦠꦸꦁ ꦥꦴꦏꦴꦫꦥꦫꦶꦏ꧀ꦑꦺꦥꦮꦝ꧀ꦞꦤꦺꦤ ꦮꦶꦱꦴꦭꦷꦨꦹꦠꦠ꧀ꦠꦴ ‘‘ꦮꦺꦱꦴꦭꦷ’’ꦠꦶ ꦮꦸꦕ꧀ꦕꦠꦶ. ꦆꦢꦩ꧀ꦥꦶ ꦕ ꦤꦒꦫꦁ ꦱꦧ꧀ꦧꦚ꧀ꦚꦸꦠꦥ꧀ꦥꦠ꧀ꦠꦺꦪꦺꦮ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺ ꦱꦧ꧀ꦧꦴꦏꦴꦫꦺꦤ ꦮꦺꦥꦸꦭ꧀ꦭꦁ ꦥꦠ꧀ꦠꦤ꧀ꦠꦶ ꦮꦺꦢꦶꦠꦧ꧀ꦧꦁ. ꦌꦮꦁ ꦒꦺꦴꦕꦫꦒꦴꦩꦁ ꦢꦱ꧀ꦱꦺꦠ꧀ꦮꦴ ꦤꦶꦮꦴꦱꦛ꧀ꦜꦴꦤ ꦩꦴꦲ – ‘‘ꦩꦲꦴꦮꦤꦺ ꦏꦹꦛꦴꦒꦴꦫꦱꦴꦭꦴꦪ’’ꦤ꧀ꦠꦶ. ꦠꦠ꧀ꦡ ꦩꦲꦴꦮꦤꦁ ꦤꦴꦩ ꦱꦪꦁꦗꦴꦠꦁ ꦄꦫꦺꦴꦥꦶꦩꦁ ꦱꦥꦫꦶꦕ꧀ꦖꦺꦢꦁ ꦩꦲꦤ꧀ꦠꦁ ꦮꦤꦁ. ꦏꦥꦶꦭꦮꦠ꧀ꦡꦸꦱꦴꦩꦤ꧀ꦠꦴ ꦥꦤ ꦩꦲꦴꦮꦤꦁ ꦲꦶꦩꦮꦤ꧀ꦠꦺꦤ ꦱꦲ ꦌꦏꦴꦧꦢ꧀ꦣꦁ ꦄꦥꦫꦶꦕ꧀ꦖꦺꦢꦁ ꦲꦸꦠ꧀ꦮꦴ ꦩꦲꦴꦱꦩꦸꦢ꧀ꦢꦁ ꦄꦴꦲꦕ꧀ꦕ ꦜꦶꦠꦁ. ꦆꦢꦁ ꦠꦴꦢꦶꦱꦁ ꦤ ꦲꦺꦴꦠꦶ, ꦱꦥꦫꦶꦕ꧀ꦖꦺꦢꦁ ꦩꦲꦤ꧀ꦠꦁ ꦮꦤꦤ꧀ꦠꦶ ꦩꦲꦴꦮꦤꦁ. ꦏꦹꦛꦴꦒꦴꦫꦱꦴꦭꦴ ꦥꦤ ꦩꦲꦴꦮꦤꦁ ꦤꦶꦱ꧀ꦱꦴꦪ ꦏꦠꦺ ꦄꦴꦫꦴꦩꦺ ꦏꦹꦛꦴꦒꦴꦫꦁ ꦄꦤ꧀ꦠꦺꦴ ꦏꦠ꧀ꦮꦴ ꦲꦁꦱꦮꦛ꧀ꦛꦏꦕ꧀ꦖꦢꦤꦺꦤ ꦏꦠꦴ ꦱꦧ꧀ꦧꦴꦏꦴꦫꦱꦩ꧀ꦥꦤ꧀ꦤꦴ ꦧꦸꦢ꧀ꦣꦱ꧀ꦱ ꦨꦒꦮꦠꦺꦴ ꦒꦤ꧀ꦣꦏꦸꦛꦶ ꦮꦺꦢꦶꦠꦧ꧀ꦧꦴ.

ꦄꦤꦺꦏꦥꦫꦶꦪꦴꦪꦺꦤ ꦄꦱꦸꦨꦏꦡꦁ ꦏꦡꦺꦠꦷꦠꦶ ꦄꦤꦺꦏꦺꦲꦶ ꦏꦴꦫꦟꦺꦲꦶ ꦄꦱꦸꦨꦴꦏꦴꦫꦱꦤ꧀ꦢꦱ꧀ꦱꦤꦥ꧀ꦥꦮꦠ꧀ꦠꦁ ꦏꦴꦪꦮꦶꦕ꧀ꦖꦤ꧀ꦢꦤꦶꦪꦏꦡꦁ ꦏꦡꦺꦠꦶ. ꦱꦺꦪ꧀ꦪꦡꦶꦢꦁ – ‘‘ꦄꦠ꧀ꦡꦶ ꦆꦩꦱ꧀ꦩꦶꦁ ꦏꦴꦪꦺ ꦏꦺꦱꦴ ꦭꦺꦴꦩꦴ…ꦥꦺ. … ꦩꦸꦠ꧀ꦠ’’ꦤ꧀ꦠꦶ. ꦏꦶꦁ ꦮꦸꦠ꧀ꦠꦁ ꦲꦺꦴꦠꦶ? ꦨꦶꦏ꧀ꦑꦮꦺ, ꦆꦩꦱ꧀ꦩꦶꦁ ꦧ꧀ꦪꦴꦩꦩꦠ꧀ꦠꦺ ꦏꦭ꦳ꦺꦮꦫꦺ ꦱꦧ꧀ꦧꦴꦏꦴꦫꦺꦤꦥꦶ ꦮꦶꦕꦶꦤꦤ꧀ꦠꦺꦴ ꦤ ꦏꦺꦴꦕꦶ ꦏꦶꦚ꧀ꦕꦶ ꦩꦸꦠ꧀ꦠꦁ ꦮꦴ ꦩꦟꦶꦁ ꦮꦴ ꦮꦺꦭ꦳ꦸꦫꦶꦪꦁ ꦮꦴ ꦄꦒꦫꦸꦁ ꦮꦴ ꦕꦤ꧀ꦢꦤꦁ ꦮꦴ ꦏꦸꦔ꧀ꦏꦸꦩꦁ ꦮꦴ ꦏꦥ꧀ꦥꦹꦫꦁ ꦮꦴ ꦮꦴꦱꦕꦸꦟ꧀ꦟꦴꦢꦷꦤꦶ ꦮꦴ ꦄꦟꦸꦩꦠ꧀ꦠꦩ꧀ꦥꦶ ꦱꦸꦕꦶꦨꦴꦮꦁ ꦥꦱ꧀ꦱꦠꦶ. ꦄꦡ ꦑꦺꦴ ꦥꦫꦩꦢꦸꦒ꧀ꦒꦤ꧀ꦣꦁ ꦗꦺꦒꦸꦕ꧀ꦖꦁ ꦄꦱ꧀ꦱꦶꦫꦷꦏꦢꦱ꧀ꦱꦤꦁ ꦏꦺꦱꦭꦺꦴꦩꦴꦢꦶꦤꦴꦤꦥ꧀ꦥꦏꦴꦫꦁ ꦄꦱꦸꦕꦶꦁꦪꦺꦮ ꦥꦱ꧀ꦱꦠꦶ. ꦠꦱ꧀ꦩꦴ ꦤ ꦌꦠ꧀ꦡ ꦖꦤ꧀ꦢꦺꦴ ꦮꦴ ꦫꦴꦒꦺꦴ ꦮꦴ ꦏꦫꦟꦷꦪꦺꦴ. ꦪꦺꦥꦶ ꦲꦶ ꦈꦠ꧀ꦠꦩꦔ꧀ꦒꦺ ꦱꦶꦫꦱ꧀ꦩꦶꦁ ꦗꦴꦠꦴ ꦏꦺꦱꦴ ꦤꦴꦩ, ꦠꦺꦥꦶ ꦄꦱꦸꦨꦴ ꦕꦺꦮ ꦄꦱꦸꦕꦶꦤꦺꦴ ꦕ ꦥꦛꦶꦏ꧀ꦏꦹꦭꦴ ꦕ. ꦱꦺꦴ ꦕ ꦤꦺꦱꦁ ꦄꦱꦸꦨꦴꦱꦸꦕꦶꦥꦛꦶꦏ꧀ꦏꦹꦭꦨꦴꦮꦺꦴ ꦮꦟ꧀ꦟꦠꦺꦴꦥꦶ ꦱꦟ꧀ꦜꦴꦤꦠꦺꦴꦥꦶ ꦒꦤ꧀ꦣꦠꦺꦴꦥꦶ ꦄꦴꦱꦪꦠꦺꦴꦥꦶ ꦎꦏꦴꦱꦠꦺꦴꦥꦷꦠꦶ ꦥꦚ꧀ꦕꦲꦶ ꦏꦴꦫꦟꦺꦲꦶ ꦮꦺꦢꦶꦠꦧ꧀ꦧꦺꦴ. ꦌꦮꦁ ꦭꦺꦴꦩꦴꦢꦷꦤꦤ꧀ꦠꦶ. ꦄꦪꦩꦺꦠ꧀ꦡ ꦱꦔ꧀ꦑꦺꦥꦺꦴ, ꦮꦶꦠ꧀ꦡꦴꦫꦺꦴ ꦥꦤ ꦮꦶꦱꦸꦢ꧀ꦣꦶꦩꦒ꧀ꦒꦺ (ꦮꦶꦱꦸꦢ꧀ꦣꦶ. ꧑.꧑꧘꧒) ꦮꦸꦠ꧀ꦠꦤꦪꦺꦤ ꦮꦺꦢꦶꦠꦧ꧀ꦧꦺꦴ. ꦆꦠꦶ ꦨꦒꦮꦴ ꦌꦏꦩꦺꦏꦱ꧀ꦩꦶꦁ ꦏꦺꦴꦛ꧀ꦜꦴꦱꦺ ꦥꦚ꧀ꦕꦥꦚ꧀ꦕꦥ꧀ꦥꦨꦺꦢꦺꦤ ꦄꦤꦺꦏꦥꦫꦶꦪꦴꦪꦺꦤ ꦄꦱꦸꦨꦏꦡꦁ ꦏꦡꦺꦠꦶ.

ꦄꦱꦸꦨꦴꦪ ꦮꦟ꧀ꦟꦁ ꦨꦴꦱꦠꦷꦠꦶ ꦈꦢ꧀ꦣꦸꦩꦴꦠꦏꦴꦢꦶꦮꦱꦺꦤ ꦄꦱꦸꦨꦩꦴꦠꦶꦏꦁ ꦤꦶꦏ꧀ꦑꦶꦥꦶꦠ꧀ꦮꦴ ꦥꦢꦨꦴꦗꦤꦷꦪꦺꦤ ꦠꦁ ꦮꦶꦨꦗꦤ꧀ꦠꦺꦴ ꦮꦟ꧀ꦟꦺꦤ꧀ꦠꦺꦴ ꦱꦁꦮꦟ꧀ꦟꦺꦤ꧀ꦠꦺꦴ ꦄꦱꦸꦨꦴꦪ ꦮꦟ꧀ꦟꦁ ꦨꦴꦱꦠꦶ. ꦄꦱꦸꦨꦨꦴꦮꦤꦴꦪ ꦮꦟ꧀ꦟꦁ ꦨꦴꦱꦠꦷꦠꦶ ꦪꦴ ꦄꦪꦁ ꦏꦺꦱꦴꦢꦷꦱꦸ ꦮꦴ ꦈꦢ꧀ꦣꦸꦩꦴꦠꦏꦴꦢꦷꦱꦸ ꦮꦴ ꦄꦗ꧀ꦙꦠ꧀ꦠꦧꦲꦶꦢ꧀ꦣꦴꦮꦠ꧀ꦡꦹꦱꦸ ꦄꦱꦸꦨꦴꦏꦴꦫꦁ ꦒꦲꦺꦠ꧀ꦮꦴ ꦥꦮꦠ꧀ꦠꦱ꧀ꦱ ꦕꦶꦠ꧀ꦠꦱ꧀ꦱ ꦨꦴꦮꦤꦴ ꦮꦝ꧀ꦞꦤꦴ ꦦꦴꦠꦶꦏꦩ꧀ꦩꦁ, ꦠꦱ꧀ꦱꦴ ꦄꦱꦸꦨꦨꦴꦮꦤꦴꦪ ꦄꦴꦤꦶꦱꦁꦱꦁ ꦢꦱ꧀ꦱꦺꦤ꧀ꦠꦺꦴ ꦮꦟ꧀ꦟꦁ ꦨꦴꦱꦠꦶ, ꦒꦸꦟꦁ ꦥꦫꦶꦏꦶꦠ꧀ꦠꦺꦠꦶ. ꦱꦺꦪ꧀ꦪꦡꦶꦢꦁ – ‘‘ꦄꦱꦸꦨꦨꦴꦮꦤꦴꦨꦶꦪꦸꦠ꧀ꦠꦺꦴ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦏꦺꦱꦴꦢꦷꦱꦸ ꦮꦴ ꦮꦠ꧀ꦡꦹꦱꦸ ꦈꦢ꧀ꦣꦸꦩꦴꦠꦏꦴꦢꦷꦱꦸ ꦮꦴ ꦥꦚ꧀ꦕꦔ꧀ꦒꦮꦶꦥ꧀ꦥꦲꦷꦤꦁ ꦥꦚ꧀ꦕꦔ꧀ꦒꦱꦩꦤ꧀ꦤꦴꦒꦠꦁ ꦠꦶꦮꦶꦣꦏꦭ꧀ꦪꦴꦟꦁ ꦢꦱꦭꦏ꧀ꦑꦟꦱꦩ꧀ꦥꦤ꧀ꦤꦁ ꦥꦜꦩꦁ ꦙꦴꦤꦁ ꦥꦛꦶꦭꦨꦠꦶ. ꦱꦺꦴ ꦠꦁ ꦥꦜꦩꦗ꧀ꦙꦴꦤꦱꦔ꧀ꦑꦴꦠꦁ ꦕꦶꦠ꧀ꦠꦩꦚ꧀ꦗꦹꦱꦁ ꦤꦶꦱ꧀ꦱꦴꦪ ꦮꦶꦥꦱ꧀ꦱꦤꦁ ꦮꦝ꧀ꦞꦺꦠ꧀ꦮꦴ ꦈꦠ꧀ꦠꦩꦠ꧀ꦡꦁ ꦄꦫꦲꦠ꧀ꦠꦁ ꦥꦴꦥꦸꦟꦴꦠꦷ’’ꦠꦶ.

ꦠꦠ꧀ꦫꦶꦩꦴꦤꦶ ꦥꦜꦩꦱ꧀ꦱ ꦙꦴꦤꦱ꧀ꦱ ꦢꦱ ꦭꦏ꧀ꦑꦟꦴꦤꦶ – ꦥꦴꦫꦶꦥꦤ꧀ꦡꦶꦏꦠꦺꦴ ꦕꦶꦠ꧀ꦠꦮꦶꦱꦸꦢ꧀ꦣꦶ, ꦩꦗ꧀ꦙꦶꦩꦱ꧀ꦱ ꦱꦩꦴꦣꦶꦤꦶꦩꦶꦠ꧀ꦠꦱ꧀ꦱ ꦥꦛꦶꦥꦠ꧀ꦠꦶ, ꦠꦠ꧀ꦡ ꦕꦶꦠ꧀ꦠꦥꦏ꧀ꦑꦤ꧀ꦢꦤꦁ, ꦮꦶꦱꦸꦢ꧀ꦣꦱ꧀ꦱ ꦕꦶꦠ꧀ꦠꦱ꧀ꦱ ꦄꦗ꧀ꦙꦸꦥꦺꦏ꧀ꦑꦤꦁ, ꦱꦩꦡꦥ꧀ꦥꦛꦶꦥꦤ꧀ꦤꦱ꧀ꦱ ꦄꦗ꧀ꦙꦸꦥꦺꦏ꧀ꦑꦤꦁ, ꦌꦏꦠ꧀ꦠꦸꦥꦛ꧀ꦜꦴꦤꦱ꧀ꦱ ꦄꦗ꧀ꦙꦸꦥꦺꦏ꧀ꦑꦤꦁ, ꦠꦠ꧀ꦡ ꦗꦴꦠꦴꦤꦁ ꦣꦩ꧀ꦩꦴꦤꦁ ꦄꦤꦠꦶꦮꦠ꧀ꦠꦤꦛ꧀ꦜꦺꦤ ꦱꦩ꧀ꦥꦲꦁꦱꦤꦴ, ꦆꦤ꧀ꦢ꧀ꦫꦶꦪꦴꦤꦁ ꦌꦏꦫꦱꦛ꧀ꦜꦺꦤ ꦠꦢꦸꦥꦒꦮꦷꦫꦶꦪꦮꦴꦲꦤꦛ꧀ꦜꦺꦤ ꦄꦴꦱꦺꦮꦤꦛ꧀ꦜꦺꦤ ꦱꦩ꧀ꦥꦲꦁꦱꦤꦴꦠꦶ.

ꦠꦠ꧀ꦫꦴꦪꦁ ꦥꦴꦭ꦳ꦶ – ‘‘ꦥꦜꦩꦱ꧀ꦱ ꦙꦴꦤꦱ꧀ꦱ ꦏꦺꦴ ꦄꦴꦢꦶ, ꦏꦶꦁ ꦩꦗ꧀ꦙꦺ, ꦏꦶꦁ ꦥꦫꦶꦪꦺꦴꦱꦴꦤꦁ? ꦥꦜꦩꦱ꧀ꦱ ꦙꦴꦤꦱ꧀ꦱ ꦥꦛꦶꦥꦢꦴꦮꦶꦱꦸꦢ꧀ꦣꦶ ꦄꦴꦢꦶ, ꦈꦥꦺꦏ꧀ꦑꦴꦤꦸꦧ꧀ꦫꦹꦲꦤꦴ ꦩꦗ꧀ꦙꦺ, ꦱꦩ꧀ꦥꦲꦁꦱꦤꦴ ꦥꦫꦶꦪꦺꦴꦱꦴꦤꦁ. ꦥꦜꦩꦱ꧀ꦱ ꦙꦴꦤꦱ꧀ꦱ ꦥꦛꦶꦥꦢꦴꦮꦶꦱꦸꦢ꧀ꦣꦶ ꦄꦴꦢꦶ, ꦄꦴꦢꦶꦱ꧀ꦱ ꦏꦠꦶ ꦭꦏ꧀ꦑꦟꦴꦤꦶ? ꦄꦴꦢꦶꦱ꧀ꦱ ꦠꦷꦟꦶ ꦭꦏ꧀ꦑꦟꦴꦤꦶ – ꦪꦺꦴ ꦠꦱ꧀ꦱ ꦥꦫꦶꦥꦤ꧀ꦡꦺꦴ ꦠꦠꦺꦴ ꦕꦶꦠ꧀ꦠꦁ ꦮꦶꦱꦸꦗ꧀ꦙꦠꦶ, ꦮꦶꦱꦸꦢ꧀ꦣꦠ꧀ꦠꦴ ꦕꦶꦠ꧀ꦠꦁ ꦩꦗ꧀ꦙꦶꦩꦁ ꦱꦩꦡꦤꦶꦩꦶꦠ꧀ꦠꦁ ꦥꦛꦶꦥꦗ꧀ꦗꦠꦶ, ꦥꦛꦶꦥꦤ꧀ꦤꦠ꧀ꦠꦴ ꦠꦠ꧀ꦡ ꦕꦶꦠ꧀ꦠꦁ ꦥꦏ꧀ꦑꦤ꧀ꦢꦠꦶ. ꦪꦚ꧀ꦕ ꦥꦫꦶꦥꦤ꧀ꦡꦠꦺꦴ ꦕꦶꦠ꧀ꦠꦁ ꦮꦶꦱꦸꦗ꧀ꦙꦠꦶ, ꦪꦚ꧀ꦕ ꦮꦶꦱꦸꦢ꧀ꦣꦠ꧀ꦠꦴ ꦕꦶꦠ꧀ꦠꦁ ꦩꦗ꧀ꦙꦶꦩꦁ ꦱꦩꦡꦤꦶꦩꦶꦠ꧀ꦠꦁ ꦥꦛꦶꦥꦗ꧀ꦗꦠꦶ, ꦪꦚ꧀ꦕ ꦥꦛꦶꦥꦤ꧀ꦤꦠ꧀ꦠꦴ ꦠꦠ꧀ꦡ ꦕꦶꦠ꧀ꦠꦁ ꦥꦏ꧀ꦑꦤ꧀ꦢꦠꦶ. ꦥꦜꦩꦱ꧀ꦱ ꦙꦴꦤꦱ꧀ꦱ ꦥꦛꦶꦥꦢꦴꦮꦶꦱꦸꦢ꧀ꦣꦶ ꦄꦴꦢꦶ, ꦄꦴꦢꦶꦱ꧀ꦱ ꦆꦩꦴꦤꦶ ꦠꦷꦟꦶ ꦭꦏ꧀ꦑꦟꦴꦤꦶ. ꦠꦺꦤ ꦮꦸꦕ꧀ꦕꦠꦶ – ‘ꦥꦜꦩꦁ ꦙꦴꦤꦁ ꦄꦴꦢꦶꦏꦭ꧀ꦪꦴꦟꦚ꧀ꦕꦺꦮ ꦲꦺꦴꦠꦶ ꦠꦶꦭꦏ꧀ꦑꦟꦱꦩ꧀ꦥꦤ꧀ꦤꦚ꧀ꦕ’.

‘‘ꦥꦜꦩꦱ꧀ꦱ ꦙꦴꦤꦱ꧀ꦱ ꦈꦥꦺꦏ꧀ꦑꦴꦤꦸꦧ꧀ꦫꦹꦲꦤꦴ ꦩꦗ꧀ꦙꦺ, ꦩꦗ꧀ꦙꦱ꧀ꦱ ꦏꦠꦶ ꦭꦏ꧀ꦑꦟꦴꦤꦶ? ꦩꦗ꧀ꦙꦱ꧀ꦱ ꦠꦷꦟꦶ ꦭꦏ꧀ꦑꦟꦴꦤꦶ – ꦮꦶꦱꦸꦢ꧀ꦣꦁ ꦕꦶꦠ꧀ꦠꦁ ꦄꦗ꧀ꦙꦸꦥꦺꦏ꧀ꦑꦠꦶ, ꦱꦩꦡꦥ꧀ꦥꦛꦶꦥꦤ꧀ꦤꦁ ꦄꦗ꧀ꦙꦸꦥꦺꦏ꧀ꦑꦠꦶ, ꦌꦏꦠ꧀ꦠꦸꦥꦛ꧀ꦜꦴꦤꦁ ꦄꦗ꧀ꦙꦸꦥꦺꦏ꧀ꦑꦠꦶ. ꦪꦚ꧀ꦕ ꦮꦶꦱꦸꦢ꧀ꦣꦁ ꦕꦶꦠ꧀ꦠꦁ ꦄꦗ꧀ꦙꦸꦥꦺꦏ꧀ꦑꦠꦶ, ꦪꦚ꧀ꦕ ꦱꦩꦡꦥ꧀ꦥꦛꦶꦥꦤ꧀ꦤꦁ ꦄꦗ꧀ꦙꦸꦥꦺꦏ꧀ꦑꦠꦶ, ꦪꦚ꧀ꦕ ꦌꦏꦠ꧀ꦠꦸꦥꦛ꧀ꦜꦴꦤꦁ ꦄꦗ꧀ꦙꦸꦥꦺꦏ꧀ꦑꦠꦶ. ꦥꦜꦩꦱ꧀ꦱ ꦙꦴꦤꦱ꧀ꦱ ꦈꦥꦺꦏ꧀ꦑꦴꦤꦸꦧ꧀ꦫꦹꦲꦤꦴ ꦩꦗ꧀ꦙꦺ, ꦩꦗ꧀ꦙꦱ꧀ꦱ ꦆꦩꦴꦤꦶ ꦠꦷꦟꦶ ꦭꦏ꧀ꦑꦟꦴꦤꦶ. ꦠꦺꦤ ꦮꦸꦕ꧀ꦕꦠꦶ – ‘ꦥꦜꦩꦁ ꦙꦴꦤꦁ ꦩꦗ꧀ꦙꦺꦏꦭ꧀ꦪꦴꦟꦚ꧀ꦕꦺꦮ ꦲꦺꦴꦠꦶ ꦠꦶꦭꦏ꧀ꦑꦟꦱꦩ꧀ꦥꦤ꧀ꦤꦚ꧀ꦕ’.

‘‘ꦥꦜꦩꦱ꧀ꦱ ꦙꦴꦤꦱ꧀ꦱ ꦱꦩ꧀ꦥꦲꦁꦱꦤꦴ ꦥꦫꦶꦪꦺꦴꦱꦴꦤꦁ, ꦥꦫꦶꦪꦺꦴꦱꦴꦤꦱ꧀ꦱ ꦏꦠꦶ ꦭꦏ꧀ꦑꦟꦴꦤꦶ? ꦥꦫꦶꦪꦺꦴꦱꦴꦤꦱ꧀ꦱ ꦕꦠ꧀ꦠꦴꦫꦶ ꦭꦏ꧀ꦑꦟꦴꦤꦶ – ꦠꦠ꧀ꦡ ꦗꦴꦠꦴꦤꦁ ꦣꦩ꧀ꦩꦴꦤꦁ ꦄꦤꦠꦶꦮꦠ꧀ꦠꦤꦛ꧀ꦜꦺꦤ ꦱꦩ꧀ꦥꦲꦁꦱꦤꦴ, ꦆꦤ꧀ꦢ꧀ꦫꦶꦪꦴꦤꦁ ꦌꦏꦫꦱꦛ꧀ꦜꦺꦤ ꦱꦩ꧀ꦥꦲꦁꦱꦤꦴ, ꦠꦢꦸꦥꦒꦮꦷꦫꦶꦪꦮꦴꦲꦤꦛ꧀ꦜꦺꦤ ꦱꦩ꧀ꦥꦲꦁꦱꦤꦴ, ꦄꦴꦱꦺꦮꦤꦛ꧀ꦜꦺꦤ ꦱꦩ꧀ꦥꦲꦁꦱꦤꦴ. ꦥꦜꦩꦱ꧀ꦱ ꦙꦴꦤꦱ꧀ꦱ ꦱꦩ꧀ꦥꦲꦁꦱꦤꦴ ꦥꦫꦶꦪꦺꦴꦱꦴꦤꦁ, ꦥꦫꦶꦪꦺꦴꦱꦴꦤꦱ꧀ꦱ ꦆꦩꦴꦤꦶ ꦕꦠ꧀ꦠꦴꦫꦶ ꦭꦏ꧀ꦑꦟꦴꦤꦶ. ꦠꦺꦤ ꦮꦸꦕ꧀ꦕꦠꦶ – ‘ꦥꦜꦩꦁ ꦙꦴꦤꦁ ꦥꦫꦶꦪꦺꦴꦱꦴꦤꦏꦭ꧀ꦪꦴꦟꦚ꧀ꦕꦺꦮ ꦲꦺꦴꦠꦶ ꦕꦠꦸꦭꦏ꧀ꦑꦟꦱꦩ꧀ꦥꦤ꧀ꦤꦚ꧀ꦕ. ‘‘ꦌꦮꦁ ꦠꦶꦮꦶꦣꦠ꧀ꦠꦒꦠꦁ ꦕꦶꦠ꧀ꦠꦁ ꦠꦶꦮꦶꦣꦏꦭ꧀ꦪꦴꦟꦏꦁ ꦢꦱꦭꦏ꧀ꦑꦟꦱꦩ꧀ꦥꦤ꧀ꦤꦁ ꦮꦶꦠꦏ꧀ꦏꦱꦩ꧀ꦥꦤ꧀ꦤꦚ꧀ꦕꦺꦮ ꦲꦺꦴꦠꦶ ꦮꦶꦕꦴꦫꦱꦩ꧀ꦥꦤ꧀ꦤꦚ꧀ꦕ ꦥꦷꦠꦶꦱꦩ꧀ꦥꦤ꧀ꦤꦚ꧀ꦕ ꦱꦸꦑꦱꦩ꧀ꦥꦤ꧀ꦤꦚ꧀ꦕ ꦕꦶꦠ꧀ꦠꦱ꧀ꦱ ꦄꦣꦶꦛ꧀ꦜꦴꦤꦱꦩ꧀ꦥꦤ꧀ꦤꦚ꧀ꦕ ꦱꦢ꧀ꦣꦴꦱꦩ꧀ꦥꦤ꧀ꦤꦚ꧀ꦕ ꦮꦷꦫꦶꦪꦱꦩ꧀ꦥꦤ꧀ꦤꦚ꧀ꦕ ꦱꦠꦶꦱꦩ꧀ꦥꦤ꧀ꦤꦚ꧀ꦕ ꦱꦩꦴꦣꦶꦱꦩ꧀ꦥꦤ꧀ꦤꦚ꧀ꦕ ꦥꦚ꧀ꦚꦴꦱꦩ꧀ꦥꦤ꧀ꦤꦚ꧀ꦕꦴ’’ꦠꦶ (ꦥꦛꦶ. ꦫꦺꦴ. ꧑.꧑꧕꧘).

ꦄꦴꦢꦶꦱ꧀ꦱ ꦄꦴꦢꦶꦱ꧀ꦱ ꦄꦱꦸꦨꦱꦩꦴꦥꦠ꧀ꦠꦶꦪꦴ ꦮꦟ꧀ꦟꦁ ꦨꦴꦱꦠꦷꦠꦶ ‘‘ꦌꦮꦩ꧀ꦥꦶ ꦆꦠ꧀ꦡꦩ꧀ꦥꦷ’’ꦠꦶ ꦥꦸꦤꦥ꧀ꦥꦸꦤꦁ ꦮꦮꦠ꧀ꦡꦴꦤꦁ ꦏꦠ꧀ꦮꦴ ꦄꦴꦢꦶꦱꦤ꧀ꦠꦺꦴ ꦄꦱꦸꦨꦱꦩꦴꦥꦠ꧀ꦠꦶꦪꦴ ꦮꦟ꧀ꦟꦁ ꦨꦴꦱꦠꦶ, ꦄꦴꦤꦶꦱꦁꦱꦁ ꦏꦡꦺꦠꦶ, ꦒꦸꦟꦁ ꦥꦫꦶꦏꦶꦠ꧀ꦠꦺꦠꦶ. ꦱꦺꦪ꧀ꦪꦡꦶꦢꦁ – ‘‘ꦄꦱꦸꦨꦱꦚ꧀ꦚꦴꦥꦫꦶꦕꦶꦠꦺꦤ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦺꦴ ꦕꦺꦠꦱꦴ ꦧꦲꦸꦭꦁ ꦮꦶꦲꦫꦠꦺꦴ ꦩꦺꦡꦸꦤꦣꦩ꧀ꦩꦱꦩꦴꦥꦠ꧀ꦠꦶꦪꦴ ꦕꦶꦠ꧀ꦠꦁ ꦥꦛꦶꦭꦷꦪꦠꦶ ꦥꦛꦶꦏꦸꦛꦠꦶ ꦥꦛꦶꦮꦛ꧀ꦛꦠꦶ, ꦤ ꦱꦩ꧀ꦥꦱꦴꦫꦷꦪꦠꦶ, ꦈꦥꦺꦏ꧀ꦑꦴ ꦮꦴ ꦥꦴꦛꦶꦏꦸꦭ꧀ꦪꦠꦴ ꦮꦴ ꦱꦟ꧀ꦜꦴꦠꦶ. ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ, ꦏꦸꦏ꧀ꦏꦸꦛꦥꦠ꧀ꦠꦁ ꦮꦴ ꦤ꧀ꦲꦴꦫꦸꦢꦢ꧀ꦢꦸꦭꦁ ꦮꦴ ꦄꦒ꧀ꦒꦶꦩ꧀ꦲꦶ ꦥꦏ꧀ꦑꦶꦠ꧀ꦠꦁ ꦥꦛꦶꦭꦷꦪꦠꦶ ꦥꦛꦶꦏꦸꦛꦠꦶ ꦥꦛꦶꦮꦛ꧀ꦛꦠꦶ, ꦤ ꦱꦩ꧀ꦥꦱꦴꦫꦷꦪꦠꦶ; ꦌꦮꦩꦺꦮ ꦑꦺꦴ, ꦨꦶꦏ꧀ꦑꦮꦺ, ꦄꦱꦸꦨꦱꦚ꧀ꦚꦴꦥꦫꦶꦕꦶꦠꦺꦤ ꦨꦶꦏ꧀ꦑꦸꦤꦺꦴ ꦕꦺꦠꦱꦴ ꦧꦲꦸꦭꦁ ꦮꦶꦲꦫꦠꦺꦴ ꦩꦺꦡꦸꦤꦣꦩ꧀ꦩꦱꦩꦴꦥꦠ꧀ꦠꦶꦪꦴ ꦕꦶꦠ꧀ꦠꦁ ꦥꦛꦶꦭꦷꦪꦠꦶ ꦥꦛꦶꦏꦸꦛꦠꦶ ꦥꦛꦶꦮꦛ꧀ꦛꦠꦶ, ꦤ ꦱꦩ꧀ꦥꦱꦴꦫꦷꦪꦠꦷ’’ꦠꦶ (ꦄ. ꦤꦶ. ꧗.꧔꧙).

ꦆꦕ꧀ꦖꦴꦩꦲꦁ, ꦨꦶꦏ꧀ꦑꦮꦺ, ꦄꦢ꧀ꦣꦩꦴꦱꦁ ꦥꦛꦶꦱꦭ꧀ꦭꦷꦪꦶꦠꦸꦤ꧀ꦠꦶ ꦄꦲꦁ ꦨꦶꦏ꧀ꦑꦮꦺ ꦌꦏꦁ ꦄꦢ꧀ꦣꦩꦴꦱꦁ ꦥꦛꦶꦱꦭ꧀ꦭꦷꦪꦶꦠꦸꦁ ꦤꦶꦭꦷꦪꦶꦠꦸꦁ ꦌꦏꦺꦴꦮ ꦲꦸꦠ꧀ꦮꦴ ꦮꦶꦲꦫꦶꦠꦸꦁ ꦆꦕ꧀ꦖꦴꦩꦷꦠꦶ ꦄꦠ꧀ꦡꦺꦴ. ꦤꦩ꧀ꦲꦶ ꦏꦺꦤꦕꦶ ꦈꦥꦱꦔ꧀ꦏꦩꦶꦠꦧ꧀ꦧꦺꦴ ꦄꦚ꧀ꦚꦠ꧀ꦫ ꦌꦏꦺꦤ ꦥꦶꦟ꧀ꦝꦥꦴꦠꦤꦷꦲꦴꦫꦏꦺꦤꦴꦠꦶ ꦪꦺꦴ ꦄꦠ꧀ꦠꦤꦴ ꦥꦪꦸꦠ꧀ꦠꦮꦴꦕꦁ ꦄꦏꦠ꧀ꦮꦴ ꦩꦩꦠ꧀ꦡꦴꦪ ꦱꦢ꧀ꦣꦺꦱꦸ ꦏꦸꦭꦺꦱꦸ ꦥꦛꦶꦪꦠ꧀ꦠꦁ ꦥꦶꦟ꧀ꦝꦥꦴꦠꦁ ꦤꦷꦲꦫꦶꦠ꧀ꦮꦴ ꦩꦪ꧀ꦲꦁ ꦈꦥꦤꦴꦩꦺꦠꦶ, ꦠꦁ ꦥꦶꦟ꧀ꦝꦥꦴꦠꦤꦷꦲꦴꦫꦏꦁ ꦌꦏꦁ ꦨꦶꦏ꧀ꦑꦸꦁ ꦜꦥꦺꦠ꧀ꦮꦴ ꦤꦩ꧀ꦲꦶ ꦄꦚ꧀ꦚꦺꦤ ꦏꦺꦤꦕꦶ ꦨꦶꦏ꧀ꦑꦸꦤꦴ ꦮꦴ ꦒꦲꦛ꧀ꦜꦺꦤ ꦮꦴ ꦈꦥꦱꦔ꧀ꦏꦩꦶꦠꦧ꧀ꦧꦺꦴꦠꦶ.

ꦏꦱ꧀ꦩꦴ ꦥꦤ ꦌꦮꦩꦴꦲꦴꦠꦶ? ꦄꦠꦷꦠꦺ ꦏꦶꦫ ꦥꦚ꧀ꦕꦱꦠꦴ ꦩꦶꦒꦭꦸꦢ꧀ꦢꦏꦴ ꦩꦲꦠꦷꦲꦶ ꦢꦟ꧀ꦝꦮꦴꦒꦸꦫꦴꦲꦶ ꦄꦫꦚ꧀ꦚꦁ ꦥꦫꦶꦏ꧀ꦑꦶꦥꦶꦠ꧀ꦮꦴ ꦲꦛ꧀ꦜꦠꦸꦛ꧀ꦜꦴ ꦌꦏꦠꦺꦴꦪꦺꦮ ꦪꦴꦮꦗꦷꦮꦁ ꦩꦶꦒꦥꦏ꧀ꦑꦶꦓꦴꦠꦏꦩ꧀ꦩꦺꦤ ꦗꦷꦮꦶꦏꦁ ꦏꦥ꧀ꦥꦺꦠ꧀ꦮꦴ ꦤꦶꦫꦪꦺ ꦈꦥꦥꦤ꧀ꦤꦴ; ꦠꦺ ꦠꦠ꧀ꦡ ꦥꦕ꧀ꦕꦶꦠ꧀ꦮꦴ ꦥꦸꦧ꧀ꦧꦺ ꦏꦠꦺꦤ ꦏꦺꦤꦕꦶꦢꦺꦮ ꦏꦸꦱꦭꦏꦩ꧀ꦩꦺꦤ ꦩꦤꦸꦱ꧀ꦱꦺꦱꦸ ꦈꦥꦥꦤ꧀ꦤꦴ ꦏꦭ꧀ꦪꦴꦟꦹꦥꦤꦶꦱ꧀ꦱꦪꦮꦱꦺꦤ ꦱꦧ꧀ꦧꦺꦥꦶ ꦨꦒꦮꦠꦺꦴ ꦱꦤ꧀ꦠꦶꦏꦺ ꦥꦧ꧀ꦧꦗ꧀ꦗꦚ꧀ꦕ ꦈꦥꦱꦩ꧀ꦥꦢꦚ꧀ꦕ ꦭꦨꦶꦁꦱꦸ; ꦠꦺꦱꦁ ꦠꦠꦺꦴ ꦩꦹꦭꦴꦏꦸꦱꦭꦏꦩ꧀ꦩꦠꦺꦴ ꦄꦮꦶꦥꦏ꧀ꦏꦮꦶꦥꦴꦏꦴ ꦄꦥꦫꦴꦥꦫꦕꦺꦠꦤꦴ ꦠꦱ꧀ꦩꦶꦁ ꦄꦢ꧀ꦣꦩꦴꦱꦧ꧀ꦨꦤ꧀ꦠꦫꦺ ꦄꦠ꧀ꦠꦹꦥꦏ꧀ꦏꦩꦺꦤ ꦕ ꦥꦫꦹꦥꦏ꧀ꦏꦩꦺꦤ ꦕ ꦗꦷꦮꦠꦸꦥꦕ꧀ꦖꦺꦢꦴꦪ ꦎꦏꦴꦱꦩꦏꦴꦱꦶ, ꦠꦁ ꦨꦒꦮꦴ ꦄꦢ꧀ꦢꦱ. ꦏꦩ꧀ꦩꦮꦶꦥꦴꦏꦺꦴ ꦤꦴꦩ ꦤ ꦱꦏ꧀ꦏꦴ ꦏꦺꦤꦕꦶ ꦥꦛꦶꦧꦴꦲꦶꦠꦸꦁ. ꦠꦺꦱꦸ ꦕ ꦨꦶꦏ꧀ꦑꦹꦱꦸ ꦥꦸꦡꦸꦗ꧀ꦗꦤꦴꦥꦶ ꦄꦠ꧀ꦡꦶ ꦱꦺꦴꦠꦴꦥꦤ꧀ꦤꦱꦏꦢꦴꦒꦴꦩꦷꦄꦤꦴꦒꦴꦩꦷꦑꦷꦟꦴꦱꦮꦴꦥꦶ. ꦠꦠ꧀ꦡ ꦑꦷꦟꦴꦱꦮꦴ ꦄꦥ꧀ꦥꦛꦶꦱꦤ꧀ꦣꦶꦏꦴ, ꦆꦠꦫꦺ ꦄꦫꦶꦪꦱꦴꦮꦏꦴ ꦤꦶꦪꦠꦒꦠꦶꦏꦴ ꦱꦸꦒꦠꦶꦥꦫꦴꦪꦟꦴ, ꦥꦸꦡꦸꦗ꧀ꦗꦤꦴꦤꦁ ꦥꦤ ꦒꦠꦶ ꦄꦤꦶꦪꦠꦴ. ꦄꦡ ꦨꦒꦮꦴ ꦕꦶꦤ꧀ꦠꦺꦱꦶ – ‘‘ꦆꦩꦺ ꦄꦠ꧀ꦠꦨꦴꦮꦺ ꦖꦤ꧀ꦢꦫꦴꦒꦺꦤ ꦩꦫꦟꦨꦪꦨꦷꦠꦴ ꦤ ꦱꦏ꧀ꦑꦶꦱ꧀ꦱꦤ꧀ꦠꦶ ꦒꦠꦶꦁ ꦮꦶꦱꦺꦴꦣꦺꦠꦸꦁ, ꦲꦤ꧀ꦢ ꦤꦺꦱꦁ ꦖꦤ꧀ꦢꦫꦴꦒꦥ꧀ꦥꦲꦴꦤꦴꦪ ꦄꦱꦸꦨꦏꦡꦁ ꦏꦡꦺꦩꦶ. ꦠꦁ ꦱꦸꦠ꧀ꦮꦴ ꦄꦠ꧀ꦠꦨꦴꦮꦺ ꦮꦶꦒꦠꦕ꧀ꦖꦤ꧀ꦢꦫꦴꦒꦠꦴꦪ ꦒꦠꦶꦮꦶꦱꦺꦴꦣꦤꦁ ꦏꦠ꧀ꦮꦴ ꦱꦒ꧀ꦒꦺ ꦥꦛꦶꦱꦤ꧀ꦣꦶꦁ ꦒꦟ꧀ꦲꦶꦱ꧀ꦱꦤ꧀ꦠꦶ. ꦌꦮꦁ ꦤꦺꦱꦁ ꦩꦩ ꦱꦤ꧀ꦠꦶꦏꦺ ꦥꦧ꧀ꦧꦗ꧀ꦗꦴ ꦱꦴꦠ꧀ꦡꦶꦏꦴ ꦨꦮꦶꦱ꧀ꦱꦠꦷ’’ꦠꦶ.

ꦠꦠꦺꦴ ꦠꦺꦱꦁ ꦄꦤꦸꦒ꧀ꦒꦲꦴꦪ ꦄꦱꦸꦨꦏꦡꦁ ꦏꦡꦺꦱꦶ ꦏꦩ꧀ꦩꦛ꧀ꦜꦴꦤꦱꦷꦱꦺꦤ, ꦤꦺꦴ ꦩꦫꦟꦮꦟ꧀ꦟꦱꦁꦮꦟ꧀ꦟꦤꦴꦣꦶꦥ꧀ꦥꦴꦪꦺꦤ. ꦏꦡꦺꦠ꧀ꦮꦴ ꦕ ꦥꦤꦱ꧀ꦱ ꦌꦠꦢꦲꦺꦴꦱꦶ – ‘‘ꦱꦕꦺ ꦩꦁ ꦆꦩꦁ ꦄꦢ꧀ꦣꦩꦴꦱꦁ ꦨꦶꦏ꧀ꦑꦹ ꦥꦱ꧀ꦱꦶꦱ꧀ꦱꦤ꧀ꦠꦶ, ‘ꦄꦗ꧀ꦗ ꦌꦏꦺꦴ ꦨꦶꦏ꧀ꦑꦸ ꦩꦠꦺꦴ, ꦄꦗ꧀ꦗ ꦢ꧀ꦮꦺ…ꦥꦺ… ꦄꦗ꧀ꦗ ꦢꦱꦴ’ꦠꦶ ꦄꦴꦒꦤ꧀ꦠ꧀ꦮꦴ ꦄꦴꦒꦤ꧀ꦠ꧀ꦮꦴ ꦄꦴꦫꦺꦴꦕꦺꦱ꧀ꦱꦤ꧀ꦠꦶ. ꦄꦪꦚ꧀ꦕ ꦏꦩ꧀ꦩꦮꦶꦥꦴꦏꦺꦴ ꦤ ꦱꦏ꧀ꦏꦴ ꦩꦪꦴ ꦮꦴ ꦄꦚ꧀ꦚꦺꦤ ꦮꦴ ꦥꦛꦶꦧꦴꦲꦶꦠꦸꦁ. ꦱ꧀ꦮꦴꦲꦁ ꦠꦁ ꦱꦸꦠ꧀ꦮꦴꦥꦶ ꦏꦶꦁ ꦏꦫꦶꦱ꧀ꦱꦴꦩꦶ? ꦏꦶꦁ ꦩꦺ ꦄꦤꦠ꧀ꦡꦏꦺꦤ ꦄꦤꦪꦧ꧀ꦪꦱꦤꦺꦤ ꦱꦸꦠꦺꦤ? ꦲꦤ꧀ꦢꦴꦲꦁ ꦨꦶꦏ꧀ꦑꦹꦤꦁ ꦄꦢꦱ꧀ꦱꦤꦁ ꦈꦥꦒꦕ꧀ꦖꦴꦩꦷ’’ꦠꦶ. ꦠꦱ꧀ꦩꦴ ꦌꦮꦩꦴꦲ – ‘‘ꦆꦕ꧀ꦖꦴꦩꦲꦁ, ꦨꦶꦏ꧀ꦑꦮꦺ, ꦄꦢ꧀ꦣꦩꦴꦱꦁ ꦥꦠꦶꦱꦭ꧀ꦭꦷꦪꦶꦠꦸꦁ; ꦤꦩ꧀ꦲꦶ ꦏꦺꦤꦕꦶ ꦈꦥꦱꦔ꧀ꦏꦩꦶꦠꦧ꧀ꦧꦺꦴ ꦄꦚ꧀ꦚꦠ꧀ꦫ ꦌꦏꦺꦤ ꦥꦶꦟ꧀ꦝꦥꦴꦠꦤꦷꦲꦴꦫꦏꦺꦤꦴ’’ꦠꦶ.

ꦄꦥꦫꦺ ꦥꦤꦴꦲꦸ – ‘‘ꦥꦫꦹꦥꦮꦴꦢꦮꦶꦮꦗ꧀ꦗꦤꦠ꧀ꦡꦁ ꦌꦮꦁ ꦮꦠ꧀ꦮꦴ ꦥꦛꦶꦱꦭ꧀ꦭꦷꦤꦺꦴ’’ꦠꦶ. ꦥꦫꦺ ꦏꦶꦫ ꦨꦒꦮꦤ꧀ꦠꦁ ꦈꦥꦮꦢꦶꦱ꧀ꦱꦤ꧀ꦠꦶ – ‘‘ꦄꦪꦁ ‘ꦱꦧ꧀ꦧꦚ꧀ꦚꦹ, ꦄꦲꦁ ꦱꦢ꧀ꦣꦩ꧀ꦩꦮꦫꦕꦏ꧀ꦏꦮꦠ꧀ꦠꦷ’ꦠꦶ ꦥꦛꦶꦗꦴꦤꦩꦴꦤꦺꦴ ꦄꦠ꧀ꦠꦤꦺꦴꦥꦶ ꦱꦴꦮꦏꦺ ꦄꦚ꧀ꦚꦩꦚ꧀ꦚꦁ ꦓꦴꦠꦺꦤ꧀ꦠꦺ ꦤꦶꦮꦴꦫꦺꦠꦸꦁ ꦤ ꦱꦏ꧀ꦏꦺꦴꦠꦶ. ꦏꦶꦩꦚ꧀ꦚꦁ ꦱꦏ꧀ꦑꦶꦱ꧀ꦱꦠꦷ’’ꦠꦶ? ꦠꦠ꧀ꦡ ꦥꦟ꧀ꦝꦶꦠꦴ ꦮꦏ꧀ꦑꦤ꧀ꦠꦶ – ‘‘ꦨꦒꦮꦴ ꦥꦛꦶꦱꦭ꧀ꦭꦴꦤꦩꦤꦸꦪꦸꦠ꧀ꦠꦺꦴ ꦤꦪꦶꦩꦁ ꦥꦮꦠ꧀ꦠꦶꦁ ꦗꦴꦤꦴꦠꦶ, ꦏꦺꦴꦕꦶꦱ꧀ꦱ ꦄꦴꦫꦺꦴꦕꦪꦶꦠꦴꦥꦶ ꦤꦠ꧀ꦡꦶ, ꦱꦕꦺ ꦗꦴꦤꦺꦪ꧀ꦪ ꦄꦢ꧀ꦣꦴ ꦤꦶꦮꦴꦫꦺꦪ꧀ꦪꦴ’’ꦠꦶ. ꦆꦢꦁ ꦥꦤ ꦆꦕ꧀ꦖꦴꦩꦠ꧀ꦠꦁ, ꦥꦜꦩꦩꦺꦮꦺꦠ꧀ꦡ ꦏꦴꦫꦟꦁ. ꦤꦴꦱ꧀ꦱꦸꦣꦴꦠꦶ ꦌꦠ꧀ꦡ ‘‘ꦄꦱ꧀ꦱꦸꦣꦴ’’ꦠꦶ ꦥꦢꦥꦹꦫꦟꦩꦠ꧀ꦠꦺ ꦄꦮꦣꦴꦫꦟꦠ꧀ꦡꦺ ꦮꦴ ꦤꦶꦥꦴꦠꦺꦴ; ꦤꦺꦮ ꦏꦺꦴꦕꦶ ꦨꦒꦮꦤ꧀ꦠꦁ ꦈꦥꦱꦔ꧀ꦏꦩꦠꦷꦠꦶ ꦄꦠ꧀ꦡꦺꦴ.

ꦄꦤꦺꦏꦺꦲꦶ ꦮꦟ꧀ꦟꦱꦟ꧀ꦜꦴꦤꦴꦢꦷꦲꦶ ꦏꦴꦫꦟꦺꦲꦶ ꦮꦺꦴꦏꦴꦫꦺꦴ ꦄꦱ꧀ꦱꦴꦠꦶ ꦄꦤꦺꦏꦴꦏꦴꦫꦮꦺꦴꦏꦴꦫꦺꦴ; ꦄꦤꦺꦏꦴꦏꦴꦫꦮꦺꦴꦏꦶꦟ꧀ꦟꦺꦴ ꦄꦤꦺꦏꦏꦴꦫꦟꦱꦩ꧀ꦩꦶꦱ꧀ꦱꦺꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦏꦺꦴ ꦱꦺꦴ? ꦄꦱꦸꦨꦨꦴꦮꦤꦴꦤꦸꦪꦺꦴꦒꦺꦴ, ꦠꦁ ꦄꦤꦺꦏꦴꦏꦴꦫꦮꦺꦴꦏꦴꦫꦁ ꦄꦱꦸꦨꦨꦴꦮꦤꦴꦤꦸꦪꦺꦴꦒꦁ ꦄꦤꦸꦪꦸꦠ꧀ꦠꦴ ꦮꦶꦲꦫꦤ꧀ꦠꦷꦠꦶ ꦪꦸꦠ꧀ꦠꦥꦪꦸꦠ꧀ꦠꦴ ꦮꦶꦲꦫꦤ꧀ꦠꦶ. ꦄꦛ꧀ꦛꦷꦪꦤ꧀ꦠꦷꦠꦶ ꦱꦏꦺꦤ ꦏꦴꦪꦺꦤ ꦄꦛ꧀ꦛꦴ ꦢꦸꦏ꧀ꦑꦶꦠꦴ ꦲꦺꦴꦤ꧀ꦠꦶ. ꦲꦫꦴꦪꦤ꧀ꦠꦷꦠꦶ ꦭꦗ꧀ꦗꦤ꧀ꦠꦶ. ꦗꦶꦒꦸꦕ꧀ꦖꦤ꧀ꦠꦷꦠꦶ ꦱꦚ꧀ꦗꦴꦠꦗꦶꦒꦸꦕ꧀ꦖꦴ ꦲꦺꦴꦤ꧀ꦠꦶ. ꦢꦲꦫꦺꦴꦠꦶ ꦠꦫꦸꦟꦺꦴ. ꦪꦸꦮꦴꦠꦶ ꦪꦺꦴꦧ꧀ꦧꦤꦺꦤ ꦱꦩꦤ꧀ꦤꦴꦒꦠꦺꦴ. ꦩꦟ꧀ꦝꦤꦏꦗꦴꦠꦶꦏꦺꦴꦠꦶ ꦩꦟ꧀ꦝꦤꦏꦥꦏꦠꦶꦏꦺꦴ. ꦱꦷꦱꦁꦤ꧀ꦲꦴꦠꦺꦴꦠꦶ ꦱꦷꦱꦺꦤ ꦱꦢ꧀ꦣꦶꦁ ꦤ꧀ꦲꦴꦠꦺꦴ. ꦢꦲꦫꦺꦴ ꦪꦸꦮꦴꦠꦶ ꦕꦺꦠ꧀ꦡ ꦢꦲꦫꦮꦕꦤꦺꦤ ꦥꦜꦩꦪꦺꦴꦧ꧀ꦧꦤꦨꦴꦮꦁ ꦢꦱ꧀ꦱꦺꦠꦶ. ꦥꦜꦩꦪꦺꦴꦧ꧀ꦧꦤꦺ ꦲꦶ ꦱꦠ꧀ꦠꦴ ꦮꦶꦱꦺꦱꦺꦤ ꦩꦟ꧀ꦝꦤꦏꦗꦴꦠꦶꦏꦴ ꦲꦺꦴꦤ꧀ꦠꦶ. ꦱꦷꦱꦁꦤ꧀ꦲꦴꦠꦺꦴꦠꦶ ꦆꦩꦶꦤꦴ ꦩꦟ꧀ꦝꦤꦴꦤꦸꦪꦺꦴꦒꦏꦴꦭꦁ. ꦪꦸꦮꦴꦥꦶ ꦲꦶ ꦏꦶꦚ꧀ꦕꦶ ꦏꦩ꧀ꦩꦁ ꦏꦠ꧀ꦮꦴ ꦱꦁꦏꦶꦭꦶꦛ꧀ꦜꦱꦫꦷꦫꦺꦴ ꦤ ꦩꦟ꧀ꦝꦤꦴꦤꦸꦪꦸꦠ꧀ꦠꦺꦴ ꦲꦺꦴꦠꦶ; ꦱꦷꦱꦁꦤ꧀ꦲꦴꦠꦺꦴ ꦥꦤ ꦱꦺꦴ ꦩꦟ꧀ꦝꦤꦩꦺꦮꦴꦤꦸꦪꦸꦚ꧀ꦗꦠꦶ. ꦄꦲꦶꦏꦸꦟꦥꦴꦢꦷꦤꦶ ꦢꦛ꧀ꦜꦸꦩ꧀ꦥꦶ ꦤ ꦆꦕ꧀ꦖꦠꦶ. ꦱꦺꦴ ꦠꦱ꧀ꦩꦶꦁ ꦑꦟꦺ ꦄꦲꦶꦏꦸꦟꦥꦺꦤ ꦮꦴ ꦏꦸꦏ꧀ꦏꦸꦫꦏꦸꦟꦥꦺꦤ ꦮꦴ ꦩꦤꦸꦱ꧀ꦱꦏꦸꦟꦥꦺꦤ ꦮꦴ ꦏꦟ꧀ꦜꦺ ꦄꦴꦱꦠ꧀ꦠꦺꦤ ꦏꦺꦤꦕꦶꦢꦺꦮ ꦥꦕ꧀ꦕꦠ꧀ꦡꦶꦏꦺꦤ ꦄꦴꦤꦺꦠ꧀ꦮꦴ ꦏꦟ꧀ꦜꦺ ꦧꦢ꧀ꦣꦺꦤ ꦥꦛꦶꦩꦸꦏ꧀ꦏꦺꦤ ꦪꦡꦴ ꦄꦛ꧀ꦛꦷꦪꦺꦪ꧀ꦪ ꦲꦫꦴꦪꦺꦪ꧀ꦪ ꦗꦶꦒꦸꦕ꧀ꦖꦺꦪ꧀ꦪ; ꦌꦮꦩꦺꦮ ꦠꦺ ꦨꦶꦏ꧀ꦑꦹ ꦱꦏꦺꦤ ꦏꦴꦪꦺꦤ ꦄꦛ꧀ꦛꦷꦪꦤ꧀ꦠꦴ ꦲꦫꦴꦪꦤ꧀ꦠꦴ ꦗꦶꦒꦸꦕ꧀ꦖꦤ꧀ꦠꦴ ꦱꦺꦴ ꦮꦶꦪ ꦥꦸꦫꦶꦱꦺꦴ ꦠꦁ ꦏꦸꦟꦥꦁ ꦮꦶꦒꦠꦕ꧀ꦖꦤ꧀ꦢꦫꦴꦒꦠꦴꦪ ꦄꦠ꧀ꦠꦤꦺꦴ ꦏꦴꦪꦁ ꦥꦫꦶꦕ꧀ꦕꦗꦶꦠꦸꦏꦴꦩꦴ ꦲꦸꦠ꧀ꦮꦴ ꦱꦠ꧀ꦡꦁ ꦄꦴꦢꦴꦪ ꦄꦠ꧀ꦠꦤꦴꦥꦶ ꦄꦠ꧀ꦠꦴꦤꦁ ꦗꦷꦮꦶꦠꦴ ꦮꦺꦴꦫꦺꦴꦥꦺꦤ꧀ꦠꦶ. ‘‘ꦠ꧀ꦮꦁ ꦩꦁ ꦗꦷꦮꦶꦠꦴ ꦮꦺꦴꦫꦺꦴꦥꦺꦲꦶ; ꦄꦲꦁ ꦠ’’ꦤ꧀ꦠꦶ ꦌꦮꦁ ꦄꦚ꧀ꦚꦩꦚ꧀ꦚꦩ꧀ꦥꦶ ꦗꦷꦮꦶꦠꦴ ꦮꦺꦴꦫꦺꦴꦥꦺꦤ꧀ꦠꦶ.

ꦩꦶꦒꦭꦟ꧀ꦝꦶꦏꦩ꧀ꦥꦶ ꦱꦩꦟꦏꦸꦠ꧀ꦠꦏꦤ꧀ꦠꦶ ꦩꦶꦒꦭꦟ꧀ꦝꦶꦏꦺꦴꦠꦶ ꦠꦱ꧀ꦱ ꦤꦴꦩꦁ; ꦱꦩꦟꦏꦸꦠ꧀ꦠꦏꦺꦴꦠꦶ ꦱꦩꦟꦮꦺꦱꦣꦴꦫꦏꦺꦴ. ꦱꦺꦴ ꦏꦶꦫ ꦱꦶꦑꦴꦩꦠ꧀ꦠꦁ ꦜꦥꦺꦠ꧀ꦮꦴ ꦱꦷꦱꦁ ꦩꦸꦟ꧀ꦝꦺꦠ꧀ꦮꦴ ꦌꦏꦁ ꦏꦴꦱꦴꦮꦁ ꦤꦶꦮꦴꦱꦺꦠ꧀ꦮꦴ ꦌꦏꦁ ꦄꦁꦱꦺ ꦏꦠ꧀ꦮꦴ ꦮꦶꦲꦴꦫꦁꦪꦺꦮ ꦈꦥꦤꦶꦱ꧀ꦱꦴꦪ ꦮꦶꦓꦴꦱꦴꦢꦨꦴꦮꦺꦤ ꦗꦷꦮꦠꦶ. ꦠꦩ꧀ꦥꦶ ꦩꦶꦒꦭꦟ꧀ꦝꦶꦏꦁ ꦱꦩꦟꦏꦸꦠ꧀ꦠꦏꦁ ꦈꦥꦱꦔ꧀ꦏꦩꦶꦠ꧀ꦮꦴ ꦌꦮꦁ ꦮꦢꦤ꧀ꦠꦶ. ꦱꦴꦣꦹꦠꦶ ꦄꦴꦪꦴꦕꦤꦠ꧀ꦡꦺ ꦤꦶꦥꦴꦠꦺꦴ. ꦤꦺꦴꦠꦶ ꦈꦥꦪꦺꦴꦒꦧꦲꦸꦮꦕꦤꦁ, ꦱꦴꦣꦸ ꦄꦴꦮꦸꦱꦺꦴ ꦄꦩ꧀ꦲꦺ ꦗꦷꦮꦶꦠꦴ ꦮꦺꦴꦫꦺꦴꦥꦺꦲꦷꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦌꦠ꧀ꦡ ꦕ ꦄꦫꦶꦪꦴ ꦤꦺꦮ ꦥꦴꦟꦴꦠꦶꦥꦴꦠꦁ ꦏꦫꦶꦁꦱꦸ ꦤ ꦱꦩꦴꦢꦥꦺꦱꦸꦁ, ꦤ ꦱꦩꦤꦸꦚ꧀ꦚꦴ ꦄꦲꦺꦱꦸꦁ. ꦥꦸꦡꦸꦗ꧀ꦗꦤꦴ ꦥꦤ ꦱꦧ꧀ꦧꦩꦏꦁꦱꦸ. ꦭꦺꦴꦲꦶꦠꦏꦤ꧀ꦠꦶ ꦭꦺꦴꦲꦶꦠꦩꦏ꧀ꦑꦶꦠꦁ. ꦪꦺꦤ ꦮꦒ꧀ꦒꦸꦩꦸꦢꦴꦤꦢꦷꦠꦶ ꦮꦒ꧀ꦒꦸꦩꦠꦴ ꦭꦺꦴꦏꦱ꧀ꦱ ꦥꦸꦚ꧀ꦚꦱꦩ꧀ꦩꦠꦴ ꦤꦢꦷ. ꦱꦺꦴꦥꦶ ꦏꦶꦫ ‘‘ꦠꦁ ꦥꦴꦥꦁ ꦠꦠ꧀ꦡ ꦥꦮꦴꦲꦺꦱ꧀ꦱꦴꦩꦷ’’ꦠꦶ ꦱꦚ꧀ꦚꦴꦪ ꦒꦠꦺꦴ, ꦤꦢꦶꦪꦴ ꦄꦴꦤꦸꦨꦴꦮꦺꦤ ꦄꦥ꧀ꦥꦩꦠ꧀ꦠꦏꦩ꧀ꦥꦶ ꦥꦴꦥꦁ ꦥꦲꦷꦤꦁ ꦤꦴꦩ ꦤꦠ꧀ꦡꦶ.

꧑꧖꧓. ꦄꦲꦸꦢꦺꦮ ꦏꦸꦏ꧀ꦏꦸꦕ꧀ꦕꦤ꧀ꦠꦶ ꦠꦺꦱꦸ ꦏꦶꦫ ꦨꦶꦏ꧀ꦑꦹꦱꦸ ꦏꦺꦤꦕꦶꦥꦶ ꦏꦴꦪꦮꦶꦏꦴꦫꦺꦴ ꦮꦴ ꦮꦕꦷꦮꦶꦏꦴꦫꦺꦴ ꦮꦴ ꦤ ꦏꦠꦺꦴ, ꦱꦧ꧀ꦧꦺ ꦱꦠꦴ ꦱꦩ꧀ꦥꦗꦴꦤꦴ ꦢꦏ꧀ꦑꦶꦟꦺꦤ ꦥꦱ꧀ꦱꦺꦤ ꦤꦶꦥꦗ꧀ꦗꦶꦁꦱꦸ. ꦠꦁ ꦄꦤꦸꦱ꧀ꦱꦫꦠꦺꦴ ꦠꦱ꧀ꦱ ꦏꦸꦏ꧀ꦏꦸꦕ꧀ꦕꦁ ꦄꦲꦺꦴꦱꦶꦪꦺꦮ. ꦄꦲꦸ ꦮꦶꦥ꧀ꦥꦛꦶꦱꦴꦫꦺꦴꦠꦶ ꦠꦱ꧀ꦱꦺꦮ ꦏꦸꦏ꧀ꦏꦸꦕ꧀ꦕꦱ꧀ꦱ ꦱꦨꦴꦮꦤꦶꦪꦩꦤꦠ꧀ꦡꦩꦺꦠꦁ ꦮꦸꦠ꧀ꦠꦁ. ꦮꦶꦥ꧀ꦥꦛꦶꦱꦴꦫꦏꦸꦏ꧀ꦏꦸꦕ꧀ꦕꦁ ꦄꦲꦺꦴꦱꦶ, ꦤ ꦮꦶꦤꦪꦏꦸꦏ꧀ꦏꦸꦕ꧀ꦕꦤ꧀ꦠꦶ. ꦄꦭꦴꦨꦴ ꦮꦠ ꦩꦺꦠꦶꦄꦴꦢꦶ ꦏꦸꦏ꧀ꦏꦸꦕ꧀ꦕꦱ꧀ꦱ ꦥꦮꦠ꧀ꦠꦶꦄꦴꦏꦴꦫꦢꦱ꧀ꦱꦤꦠ꧀ꦡꦁ ꦮꦸꦠ꧀ꦠꦁ. ꦠꦠ꧀ꦡ ꦄꦭꦴꦨꦴ ꦮꦠ ꦩꦺꦠꦶ ꦄꦴꦪꦠꦶꦁ ꦢꦴꦤꦶ ꦩꦩ ꦲꦶꦠꦱꦸꦑꦭꦴꦨꦴ ꦤꦴꦩ ꦤꦠ꧀ꦡꦷꦠꦶ ꦄꦤꦸꦠ꧀ꦡꦸꦤꦴꦠꦶ. ‘‘ꦤ ꦮꦠ ꦩꦺ ꦭꦴꦨꦴ’’ꦠꦶꦆꦩꦶꦤꦴ ꦥꦤ ꦠꦩꦺꦮꦠ꧀ꦡꦁ ꦢꦭ꦳꧀ꦲꦁ ꦏꦫꦺꦴꦠꦶ. ꦄꦪꦚ꧀ꦲꦺꦠ꧀ꦡ ꦄꦣꦶꦥ꧀ꦥꦴꦪꦺꦴ – ꦱꦕꦺꦥꦶ ꦏꦺꦴꦕꦶ ‘‘ꦭꦴꦨꦴ ꦠꦺ’’ꦠꦶ ꦮꦢꦺꦪ꧀ꦪ, ꦠꦁ ꦩꦶꦕ꧀ꦖꦴ, ꦤ ꦮꦠ ꦩꦺ ꦭꦴꦨꦴꦠꦶ. ꦢꦸꦭ꧀ꦭꦢ꧀ꦣꦁ ꦮꦠ ꦩꦺꦠꦶ ꦏꦸꦱꦭꦴꦤꦸꦨꦴꦮꦺꦤ ꦭꦢ꧀ꦣꦩ꧀ꦥꦶ ꦆꦢꦁ ꦩꦤꦸꦱ꧀ꦱꦠ꧀ꦠꦁ ꦢꦸꦭ꧀ꦭꦢ꧀ꦣꦁ ꦮꦠ ꦩꦺ. ꦤ ꦮꦠ ꦩꦺ ꦱꦸꦭꦢ꧀ꦣꦤ꧀ꦠꦶꦆꦩꦶꦤꦴ ꦥꦤ ꦠꦩꦺꦮꦠ꧀ꦡꦁ ꦢꦭ꦳꧀ꦲꦁ ꦏꦫꦺꦴꦠꦶ. ꦄꦪꦚ꧀ꦲꦺꦠ꧀ꦡ ꦄꦣꦶꦥ꧀ꦥꦴꦪꦺꦴ – ꦱꦕꦺꦥꦶ ꦏꦺꦴꦕꦶ ‘‘ꦱꦸꦭꦢ꧀ꦣꦁ ꦠꦺ’’ꦠꦶ ꦮꦢꦺꦪ꧀ꦪ, ꦠꦁ ꦩꦶꦕ꧀ꦖꦴ; ꦤ ꦮꦠ ꦩꦺ ꦱꦸꦭꦢ꧀ꦣꦤ꧀ꦠꦶ. ꦄꦥꦸꦚ꧀ꦚꦁ ꦥꦱꦸꦠꦤ꧀ꦠꦶ ꦄꦥꦸꦚ꧀ꦚꦁ ꦈꦥꦕꦶꦠꦁ ꦗꦤꦶꦠꦁ ꦮꦴ. ꦏꦱ꧀ꦩꦴꦠꦶ ꦕꦺ? ꦪꦺꦴꦲꦁ ꦨꦶꦏ꧀ꦑꦹ…ꦥꦺ… ꦮꦺꦴꦫꦺꦴꦥꦺꦱꦶꦤ꧀ꦠꦶ. ꦠꦱ꧀ꦱꦠ꧀ꦡꦺꦴ – ꦪꦺꦴ ꦄꦲꦁ ꦱꦷꦭꦮꦤ꧀ꦠꦺ ꦠꦴꦪ ꦌꦮ ꦱꦷꦭꦮꦤ꧀ꦠꦠꦴꦪ ꦏꦭ꧀ꦪꦴꦟꦣꦩ꧀ꦩꦺ ꦈꦠ꧀ꦠꦩꦣꦩ꧀ꦩꦺ ꦱꦺꦛ꧀ꦜꦣꦩ꧀ꦩꦺ ꦨꦶꦏ꧀ꦑꦹ ꦗꦷꦮꦶꦠꦴ ꦮꦺꦴꦫꦺꦴꦥꦺꦱꦶꦤ꧀ꦠꦶ.

ꦄꦚ꧀ꦚꦠꦫꦴ ꦩꦴꦫꦏꦴꦪꦶꦏꦴꦠꦶ ꦤꦴꦩꦮꦱꦺꦤ ꦄꦥꦴꦏꦛꦴ ꦌꦏꦴ ꦨꦸꦩ꧀ꦩꦢꦺꦮꦠꦴ ꦩꦶꦕ꧀ꦖꦴꦢꦶꦛ꧀ꦜꦶꦏꦴ ꦩꦴꦫꦥꦏ꧀ꦑꦶꦏꦴ ꦩꦴꦫꦱ꧀ꦱꦤꦸꦮꦠ꧀ꦠꦶꦏꦴ ‘‘ꦌꦮꦩꦪꦁ ꦩꦴꦫꦣꦺꦪ꧀ꦪꦁ ꦩꦴꦫꦮꦶꦱꦪꦁ ꦤꦴꦠꦶꦏ꧀ꦏꦩꦶꦱ꧀ꦱꦠꦷ’’ꦠꦶ ꦕꦶꦤ꧀ꦠꦺꦠ꧀ꦮꦴ ꦱꦧ꧀ꦧꦴꦨꦫꦟꦮꦶꦨꦹꦱꦶꦠꦴ ꦲꦸꦠ꧀ꦮꦴ ꦄꦠ꧀ꦠꦤꦺꦴ ꦄꦴꦤꦸꦨꦴꦮꦁ ꦢꦱ꧀ꦱꦪꦩꦴꦤꦴ ꦄꦨꦶꦗ꧀ꦗꦩꦴꦤꦺ ꦈꦢꦏꦺ ꦥꦡꦮꦷꦠꦭꦺ ꦕꦔ꧀ꦏꦩꦩꦴꦤꦴ ꦮꦶꦪ ꦄꦴꦒꦤ꧀ꦠ꧀ꦮꦴ ꦩꦶꦒꦭꦟ꧀ꦝꦶꦏꦁ ꦱꦩꦟꦏꦸꦠ꧀ꦠꦏꦁ ꦌꦠꦢꦮꦺꦴꦕ. ꦱꦴꦣꦸ ꦱꦴꦣꦹꦠꦶ ꦱꦩ꧀ꦥꦲꦁꦱꦤꦠ꧀ꦡꦺ ꦤꦶꦥꦴꦠꦺꦴ; ꦠꦱ꧀ꦩꦴ ꦌꦮ ꦢ꧀ꦮꦶꦮꦕꦤꦁ ꦏꦠꦁ. ꦄꦠꦶꦟ꧀ꦟꦺ ꦠꦴꦫꦺꦱꦷꦠꦶ ꦱꦁꦱꦴꦫꦠꦺꦴ ꦄꦠꦶꦟ꧀ꦟꦺ ꦆꦩꦶꦤꦴ ꦗꦷꦮꦶꦠꦴꦮꦺꦴꦫꦺꦴꦥꦤꦺꦤ ꦠꦴꦫꦺꦱꦶ ꦥꦫꦶꦩꦺꦴꦕꦺꦱꦷꦠꦶ. ꦄꦪꦁ ꦏꦶꦫ ꦌꦠꦶꦱ꧀ꦱꦴ ꦢꦺꦮꦠꦴꦪ ꦧꦴꦭꦴꦪ ꦢꦸꦩ꧀ꦩꦺꦣꦴꦪ ꦭꦢ꧀ꦣꦶ ‘‘ꦪꦺ ꦤ ꦩꦠꦴ, ꦠꦺ ꦱꦁꦱꦴꦫꦠꦺꦴ ꦤ ꦩꦸꦠ꧀ꦠꦴ. ꦪꦺ ꦩꦠꦴ, ꦠꦺ ꦩꦸꦠ꧀ꦠꦴ’’ꦠꦶ. ꦠꦱ꧀ꦩꦴ ꦱꦁꦱꦴꦫꦩꦺꦴꦕꦏꦩꦶꦭꦏ꧀ꦑꦴ ꦮꦶꦪ ꦌꦮꦁꦭꦢ꧀ꦣꦶꦏꦴ ꦲꦸꦠ꧀ꦮꦴ ꦠꦩ꧀ꦥꦶ ꦠꦠ꧀ꦡ ꦤꦶꦪꦺꦴꦗꦺꦤ꧀ꦠꦷ ꦌꦮꦩꦴꦲ. ꦄꦡ ꦑꦺꦴ ꦩꦶꦒꦭꦟ꧀ꦝꦶꦏꦺꦴ ꦱꦩꦟꦏꦸꦠ꧀ꦠꦏꦺꦴ ꦠꦴꦮ ꦨꦸꦱꦁ ꦈꦥ꧀ꦥꦤ꧀ꦤꦮꦶꦥ꧀ꦥꦛꦶꦱꦴꦫꦺꦴꦥꦶ ꦠꦁ ꦢꦺꦮꦠꦴꦪ ꦄꦴꦤꦸꦨꦴꦮꦁ ꦢꦶꦱ꧀ꦮꦴ ‘‘ꦄꦪꦁ ꦢꦺꦮꦠꦴ ꦌꦮꦩꦴꦲ – ꦄꦢ꧀ꦣꦴ ꦆꦩꦶꦤꦴ ꦄꦠ꧀ꦡꦺꦤ ꦌꦮꦩꦺꦮ ꦨꦮꦶꦠꦧ꧀ꦧ’’ꦤ꧀ꦠꦶ ꦤꦶꦛ꧀ꦜꦁ ꦒꦤ꧀ꦠ꧀ꦮꦴ ‘‘ꦭꦴꦨꦴ ꦏꦶꦫ ꦩꦺ’’ꦠꦶꦄꦴꦢꦷꦤꦶ ꦥꦫꦶꦏꦶꦠ꧀ꦠꦪꦤ꧀ꦠꦺꦴ. ꦮꦶꦲꦴꦫꦺꦤ ꦮꦶꦲꦴꦫꦁ ꦥꦫꦶꦮꦺꦟꦺꦤ ꦥꦫꦶꦮꦺꦟꦁ ꦈꦥꦱꦔ꧀ꦏꦩꦶꦠ꧀ꦮꦴ ꦌꦮꦁ ꦮꦢꦺꦠꦷꦠꦶ ꦠꦁ ꦠꦁ ꦮꦶꦲꦴꦫꦚ꧀ꦕ ꦥꦫꦶꦮꦺꦟꦚ꧀ꦕ ꦈꦥꦱꦔ꧀ꦏꦩꦶꦠ꧀ꦮꦴ ꦢ꧀ꦮꦴꦫꦁ ꦮꦶꦮꦫꦶꦠ꧀ꦮꦴ ꦄꦤ꧀ꦠꦺꦴ ꦥꦮꦶꦱꦶꦠ꧀ꦮꦴ ꦨꦶꦏ꧀ꦑꦹ ꦌꦮꦁ ꦮꦢꦠꦶ – ‘‘ꦏꦺꦴ ꦄꦠꦶꦟ꧀ꦟꦺꦴ, ꦏꦁ ꦠꦴꦫꦺꦩꦷ’’ꦠꦶ?

ꦲꦺꦴꦠꦶꦪꦺꦮ ꦨꦪꦤ꧀ꦠꦶ ꦩꦫꦟꦁ ꦥꦛꦶꦕ꧀ꦕ ꦕꦶꦠ꧀ꦠꦸꦠ꧀ꦫꦴꦱꦺꦴ ꦲꦺꦴꦠꦶ. ꦲꦺꦴꦠꦶ ꦖꦩ꧀ꦨꦶꦠꦠ꧀ꦠꦤ꧀ꦠꦶ ꦲꦢꦪꦩꦁꦱꦁ ꦄꦴꦢꦶꦁ ꦏꦠ꧀ꦮꦴ ꦠꦱ꧀ꦩꦴ ꦱꦫꦷꦫꦕꦭꦤꦁ ꦲꦺꦴꦠꦶ; ꦄꦠꦶꦨꦪꦺꦤ ꦡꦢ꧀ꦣꦱꦫꦷꦫꦠ꧀ꦠꦤ꧀ꦠꦶꦥꦶ ꦌꦏꦺ, ꦡꦩ꧀ꦨꦶꦠꦠ꧀ꦠꦚ꧀ꦲꦶ ꦖꦩ꧀ꦨꦶꦠꦠ꧀ꦠꦤ꧀ꦠꦶ ꦮꦸꦕ꧀ꦕꦠꦶ. ꦭꦺꦴꦩꦲꦁꦱꦺꦴꦠꦶ ꦈꦢ꧀ꦣꦁꦜꦶꦠꦭꦺꦴꦩꦠꦴ, ꦑꦷꦟꦴꦱꦮꦴ ꦥꦤ ꦱꦠ꧀ꦠꦱꦸꦚ꧀ꦚꦠꦴꦪ ꦱꦸꦢꦶꦛ꧀ꦜꦠ꧀ꦠꦴ ꦩꦫꦟꦏꦱꦠ꧀ꦠꦩꦺꦮ ꦤ ꦥꦱ꧀ꦱꦤ꧀ꦠꦶ, ꦠꦱ꧀ꦩꦴ ꦠꦺꦱꦁ ꦱꦧ꧀ꦧꦩ꧀ꦥꦺꦠꦁ ꦤꦴꦲꦺꦴꦱꦷꦠꦶ ꦮꦺꦢꦶꦠꦧ꧀ꦧꦁ. ꦌꦏꦩ꧀ꦥꦶ ꦨꦶꦏ꧀ꦑꦸꦁ ꦢ꧀ꦮꦺꦥꦶ…ꦥꦺ… ꦱꦛ꧀ꦜꦶꦩ꧀ꦥꦶ ꦨꦶꦏ꧀ꦑꦹ ꦌꦏꦴꦲꦺꦤ ꦗꦷꦮꦶꦠꦴ ꦮꦺꦴꦫꦺꦴꦥꦺꦱꦷꦠꦶ ꦌꦮꦁ ꦒꦟꦤꦮꦱꦺꦤ ꦱꦧ꧀ꦧꦴꦤꦶꦥꦶ ꦠꦴꦤꦶ ꦥꦚ꧀ꦕ ꦨꦶꦏ꧀ꦑꦸꦱꦠꦴꦤꦶ ꦗꦷꦮꦶꦠꦴ ꦮꦺꦴꦫꦺꦴꦥꦺꦱꦶ.

꧑꧖꧔. ꦥꦛꦶꦱꦭ꧀ꦭꦴꦤꦴ ꦮꦸꦛ꧀ꦜꦶꦠꦺꦴꦠꦶ ꦠꦺꦱꦁ ꦥꦚ꧀ꦕꦤ꧀ꦤꦁ ꦨꦶꦏ꧀ꦑꦸꦱꦠꦴꦤꦁ ꦗꦷꦮꦶꦠꦏ꧀ꦑꦪꦥꦠ꧀ꦠꦨꦴꦮꦁ ꦚꦠ꧀ꦮꦴ ꦠꦠꦺꦴ ꦌꦏꦷꦨꦴꦮꦠꦺꦴ ꦮꦸꦛ꧀ꦜꦶꦠꦺꦴ ꦗꦴꦤꦤ꧀ꦠꦺꦴꦥꦶ ꦄꦗꦴꦤꦤ꧀ꦠꦺꦴ ꦮꦶꦪ ꦏꦡꦴꦱꦩꦸꦛ꧀ꦜꦴꦥꦤꦠ꧀ꦡꦁ ꦄꦴꦪꦱ꧀ꦩꦤ꧀ꦠꦁ ꦄꦴꦤꦤ꧀ꦢꦁ ꦄꦴꦩꦤ꧀ꦠꦺꦱꦶ. ꦏꦶꦁ ꦤꦸ ꦑꦺꦴ ꦄꦴꦤꦤ꧀ꦢ ꦠꦤꦸꦨꦹꦠꦺꦴ ꦮꦶꦪ ꦨꦶꦏ꧀ꦑꦸꦱꦔ꧀ꦓꦺꦴꦠꦶ ꦄꦴꦤꦤ꧀ꦢ ꦆꦠꦺꦴ ꦥꦸꦧ꧀ꦧꦺ ꦧꦲꦹ ꦨꦶꦏ꧀ꦑꦹ ꦌꦏꦠꦺꦴ ꦈꦥꦛ꧀ꦜꦴꦤꦁ ꦄꦴꦒꦕ꧀ꦖꦤ꧀ꦠꦶ, ꦈꦢ꧀ꦢꦺꦱꦁ ꦥꦫꦶꦥꦸꦕ꧀ꦖꦁ ꦒꦟ꧀ꦲꦤ꧀ꦠꦶ ꦱꦗ꧀ꦙꦴꦪꦤ꧀ꦠꦶ, ꦌꦏꦥꦗ꧀ꦗꦺꦴꦠꦺꦴ ꦮꦶꦪ ꦄꦴꦫꦴꦩꦺꦴ ꦢꦶꦱ꧀ꦱꦠꦶ, ꦆꦢꦴꦤꦶ ꦥꦤ ꦄꦢ꧀ꦣꦩꦴꦱꦩꦠ꧀ꦠꦱ꧀ꦱ ꦄꦕ꧀ꦕꦪꦺꦤ ꦠꦤꦸꦨꦹꦠꦺꦴ ꦮꦶꦪ ꦠꦤꦸꦏꦺꦴ ꦩꦤ꧀ꦢꦺꦴ ꦄꦥ꧀ꦥꦏꦺꦴ ꦮꦶꦫꦭ꦳ꦮꦶꦫꦭ꦳ꦺꦴ ꦮꦶꦪ ꦗꦴꦠꦺꦴ ꦨꦶꦏ꧀ꦑꦸꦱꦔ꧀ꦓꦺꦴ. ꦏꦶꦤ꧀ꦤꦸ ꦑꦺꦴ ꦏꦴꦫꦟꦁ, ꦏꦶꦁ ꦢꦶꦱꦴꦱꦸ ꦥꦏ꧀ꦏꦤ꧀ꦠꦴ ꦨꦶꦏ꧀ꦑꦹꦠꦶ?

ꦄꦡꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦏꦩ꧀ꦩꦮꦶꦥꦴꦏꦺꦤ ꦠꦺꦱꦁ ꦗꦷꦮꦶꦠꦏ꧀ꦑꦪꦥ꧀ꦥꦠ꧀ꦠꦶꦁ ꦄꦱꦭ꧀ꦭꦏ꧀ꦑꦺꦤ꧀ꦠꦺꦴ ꦄꦱꦸꦨꦏꦩ꧀ꦩꦛ꧀ꦜꦴꦤꦴꦤꦸꦪꦺꦴꦒꦥꦕ꧀ꦕꦪꦴ ꦥꦤ ꦱꦭ꧀ꦭꦏ꧀ꦑꦺꦤ꧀ꦠꦺꦴ ‘‘ꦠꦡꦴ ꦲꦶ ꦥꦤ ꦨꦤ꧀ꦠꦺ ꦨꦒꦮꦴ’’ꦠꦶꦄꦴꦢꦶꦁ ꦮꦠ꧀ꦮꦴ ꦨꦶꦏ꧀ꦑꦹꦤꦁ ꦄꦫꦲꦠ꧀ꦠꦥ꧀ꦥꦠ꧀ꦠꦶꦪꦴ ꦄꦚ꧀ꦚꦁ ꦏꦩ꧀ꦩꦛ꧀ꦜꦴꦤꦁ ꦪꦴꦕꦤ꧀ꦠꦺꦴ ‘‘ꦱꦴꦣꦸ ꦨꦤ꧀ꦠꦺ ꦨꦒꦮꦴ’’ꦠꦶꦄꦴꦢꦶꦩꦴꦲ. ꦠꦱ꧀ꦱꦠ꧀ꦡꦺꦴ – ꦱꦴꦣꦸ ꦨꦤ꧀ꦠꦺ ꦨꦒꦮꦴ ꦄꦚ꧀ꦚꦁ ꦏꦴꦫꦟꦁ ꦄꦴꦕꦶꦏ꧀ꦑꦠꦸ, ꦪꦺꦤ ꦨꦶꦏ꧀ꦑꦸꦱꦔ꧀ꦓꦺꦴ ꦄꦫꦲꦠ꧀ꦠꦺ ꦥꦠꦶꦛ꧀ꦜꦲꦺꦪ꧀ꦪ; ꦩꦲꦴꦱꦩꦸꦢ꧀ꦢꦁ ꦎꦫꦺꦴꦲꦟꦠꦶꦠ꧀ꦡꦴꦤꦶ ꦮꦶꦪ ꦲꦶ ꦄꦚ꧀ꦚꦴꦤꦶꦥꦶ ꦢꦱꦴꦤꦸꦱ꧀ꦱꦠꦶꦢꦱꦏꦱꦶꦟꦕꦠꦸꦣꦴꦠꦸꦮꦮꦠ꧀ꦡꦴꦤꦧ꧀ꦫꦲ꧀ꦩꦮꦶꦲꦴꦫꦴꦤꦴꦥꦴꦤꦱꦠꦶꦥ꧀ꦥꦨꦺꦢꦴꦤꦶ ꦧꦲꦹꦤꦶ ꦤꦶꦧ꧀ꦧꦴꦤꦺꦴꦫꦺꦴꦲꦟꦏꦩ꧀ꦩꦛ꧀ꦜꦴꦤꦴꦤꦶ ꦱꦤ꧀ꦠꦶ. ꦠꦺꦱꦸ ꦨꦒꦮꦴ ꦨꦶꦏ꧀ꦑꦹ ꦱꦩꦱ꧀ꦱꦴꦱꦺꦠ꧀ꦮꦴ ꦄꦚ꧀ꦚꦠꦫꦁ ꦏꦩ꧀ꦩꦛ꧀ꦜꦴꦤꦁ ꦄꦴꦕꦶꦏ꧀ꦑꦠꦹꦠꦶ ꦄꦣꦶꦥ꧀ꦥꦴꦪꦺꦴ.

ꦄꦡ ꦨꦒꦮꦴ ꦠꦡꦴ ꦏꦴꦠꦸꦏꦴꦩꦺꦴ ꦡꦺꦫꦁ ꦈꦪ꧀ꦪꦺꦴꦗꦺꦤ꧀ꦠꦺꦴ ‘‘ꦠꦺꦤꦲꦴꦤꦤ꧀ꦢꦴ’’ꦠꦶꦄꦴꦢꦶꦩꦴꦲ. ꦠꦠ꧀ꦡ ꦮꦺꦱꦴꦭꦶꦁ ꦈꦥꦤꦶꦱ꧀ꦱꦴꦪꦴꦠꦶ ꦮꦺꦱꦴꦭꦶꦁ ꦈꦥꦤꦶꦱ꧀ꦱꦴꦪ ꦱꦩꦤ꧀ꦠꦴ ꦒꦴꦮꦸꦠꦺꦥꦶ ꦄꦢ꧀ꦣꦪꦺꦴꦗꦤꦺꦥꦶ ꦪꦴꦮꦠꦶꦏꦴ ꦨꦶꦏ꧀ꦑꦹ ꦮꦶꦲꦫꦤ꧀ꦠꦶ, ꦠꦺ ꦱꦧ꧀ꦧꦺ ꦱꦤ꧀ꦤꦶꦥꦴꦠꦺꦲꦷꦠꦶ ꦄꦠ꧀ꦡꦺꦴ. ꦠꦺ ꦱꦧ꧀ꦧꦺ ꦈꦥꦛ꧀ꦜꦴꦤꦱꦴꦭꦴꦪꦁ ꦱꦤ꧀ꦤꦶꦥꦴꦠꦺꦠ꧀ꦮꦴꦠꦶ ꦄꦠ꧀ꦠꦤꦴ ꦒꦤ꧀ꦠꦸꦁ ꦪꦸꦠ꧀ꦠꦛ꧀ꦜꦴꦤꦁ ꦱꦪꦁ ꦒꦤ꧀ꦠ꧀ꦮꦴ ꦄꦚ꧀ꦚꦠ꧀ꦡ ꦢꦲꦫꦨꦶꦏ꧀ꦑꦹ ꦥꦲꦶꦟꦶꦠ꧀ꦮꦴ ꦩꦸꦲꦸꦠ꧀ꦠꦺꦤꦺꦮ ꦄꦤꦮꦱꦺꦱꦺ ꦨꦶꦏ꧀ꦑꦹ ꦈꦥꦛ꧀ꦜꦴꦤꦱꦴꦭꦴꦪꦁ ꦱꦩꦹꦲꦁ ꦏꦠ꧀ꦮꦴ. ꦪꦱ꧀ꦱ ꦢꦴꦤꦶ ꦨꦤ꧀ꦠꦺ ꦨꦒꦮꦴ ꦏꦴꦭꦁ ꦩꦚ꧀ꦚꦠꦷꦠꦶ ꦌꦠ꧀ꦡ ꦄꦪꦩꦣꦶꦥ꧀ꦥꦴꦪꦺꦴ – ꦨꦒꦮꦴ ꦨꦶꦏ꧀ꦑꦸꦱꦔ꧀ꦓꦺꦴ ꦱꦤ꧀ꦤꦶꦥꦠꦶꦠꦺꦴ ꦌꦱ ꦏꦴꦭꦺꦴ ꦨꦶꦏ꧀ꦑꦹꦤꦁ ꦣꦩ꧀ꦩꦏꦡꦁ ꦏꦴꦠꦸꦁ, ꦄꦤꦸꦱꦴꦱꦤꦶꦁ ꦢꦴꦠꦸꦁ, ꦆꦢꦴꦤꦶ ꦪꦱ꧀ꦱ ꦠꦸꦩ꧀ꦲꦺ ꦏꦴꦭꦁ ꦗꦴꦤꦴꦡ, ꦠꦁ ꦏꦠ꧀ꦠꦧ꧀ꦧꦤ꧀ꦠꦶ.

ꦄꦴꦤꦴꦥꦴꦤꦱ꧀ꦱꦠꦶꦱꦩꦴꦣꦶꦏꦡꦴ

꧑꧖꧕. ꦄꦡ ꦑꦺꦴ ꦨꦒꦮꦴ…ꦥꦺ… ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ – ꦄꦪꦩ꧀ꦥꦶ ꦑꦺꦴ ꦨꦶꦏ꧀ꦑꦮꦺꦠꦶ ꦄꦴꦩꦤ꧀ꦠꦺꦠ꧀ꦮꦴ ꦕ ꦥꦤ ꦨꦶꦏ꧀ꦑꦹꦤꦁ ꦄꦫꦲꦠ꧀ꦠꦥ꧀ꦥꦠ꧀ꦠꦶꦪꦴ ꦥꦸꦧ꧀ꦧꦺ ꦄꦴꦕꦶꦏ꧀ꦑꦶꦠꦄꦱꦸꦨꦏꦩ꧀ꦩꦛ꧀ꦜꦴꦤꦠꦺꦴ ꦄꦚ꧀ꦚꦁ ꦥꦫꦶꦪꦴꦪꦁ ꦄꦴꦕꦶꦏ꧀ꦑꦤ꧀ꦠꦺꦴ ‘‘ꦄꦴꦤꦴꦥꦴꦤꦱ꧀ꦱꦠꦶꦱꦩꦴꦣꦷ’’ꦠꦶ ꦄꦴꦲ.

ꦆꦢꦴꦤꦶ ꦪꦱ꧀ꦩꦴ ꦨꦒꦮꦠꦴ ꦨꦶꦏ꧀ꦑꦹꦤꦁ ꦱꦤ꧀ꦠꦥꦟꦷꦠꦏꦩ꧀ꦩꦛ꧀ꦜꦴꦤꦢꦱ꧀ꦱꦤꦠ꧀ꦡꦩꦺꦮ ꦄꦪꦁ ꦥꦴꦭ꦳ꦶ ꦮꦸꦠ꧀ꦠꦴ, ꦠꦱ꧀ꦩꦴ ꦄꦥꦫꦶꦲꦴꦥꦺꦠ꧀ꦮꦴ ꦄꦠ꧀ꦡꦪꦺꦴꦗꦤꦴꦏ꧀ꦏꦩꦁ ꦌꦠ꧀ꦡ ꦮꦟ꧀ꦟꦤꦁ ꦏꦫꦶꦱ꧀ꦱꦴꦩꦶ. ꦠꦠ꧀ꦫ ‘‘ꦄꦪꦩ꧀ꦥꦶ ꦑꦺꦴ ꦨꦶꦏ꧀ꦑꦮꦺ’’ꦠꦶ ꦆꦩꦱ꧀ꦱ ꦠꦴꦮ ꦥꦢꦱ꧀ꦱ ꦄꦪꦁ ꦪꦺꦴꦗꦤꦴ – ꦨꦶꦏ꧀ꦑꦮꦺ ꦤ ꦏꦺꦮꦭꦁ ꦄꦱꦸꦨꦨꦴꦮꦤꦴꦪꦺꦮ ꦏꦶꦭꦺꦱꦥ꧀ꦥꦲꦴꦤꦴꦪ ꦱꦁꦮꦠ꧀ꦠꦠꦶ, ꦄꦥꦶꦕ ꦄꦪꦩ꧀ꦥꦶ ꦑꦺꦴ ꦄꦴꦤꦴꦥꦴꦤꦱ꧀ꦱꦠꦶꦱꦩꦴꦣꦶ…ꦥꦺ… ꦮꦹꦥꦱꦩꦺꦠꦷꦠꦶ.

ꦄꦪꦁ ꦥꦤꦺꦠ꧀ꦡ ꦄꦠ꧀ꦡꦮꦟ꧀ꦟꦤꦴ – ꦄꦴꦤꦴꦥꦴꦤꦱ꧀ꦱꦠꦷꦠꦶ ꦄꦱ꧀ꦱꦴꦱꦥꦱ꧀ꦱꦴꦱꦥꦫꦶꦒ꧀ꦒꦴꦲꦶꦏꦴ ꦱꦠꦶ. ꦮꦸꦠ꧀ꦠꦚ꧀ꦲꦺꦠꦁ ꦥꦛꦶꦱꦩ꧀ꦨꦶꦢꦴꦪꦁ –

‘‘ꦄꦴꦤꦤ꧀ꦠꦶ ꦄꦱ꧀ꦱꦴꦱꦺꦴ, ꦤꦺꦴ ꦥꦱ꧀ꦱꦴꦱꦺꦴ. ꦄꦥꦴꦤꦤ꧀ꦠꦶ ꦥꦱ꧀ꦱꦴꦱꦺꦴ, ꦤꦺꦴ ꦄꦱ꧀ꦱꦴꦱꦺꦴ. ꦄꦱ꧀ꦱꦴꦱꦮꦱꦺꦤ ꦈꦥꦛ꧀ꦜꦴꦤꦁ ꦱꦠꦶ, ꦥꦱ꧀ꦱꦴꦱꦮꦱꦺꦤ ꦈꦥꦛ꧀ꦜꦴꦤꦁ ꦱꦠꦶ. ꦪꦺꦴ ꦄꦱ꧀ꦱꦱꦠꦶ ꦠꦱ꧀ꦱꦸꦥꦛ꧀ꦜꦴꦠꦶ, ꦪꦺꦴ ꦥꦱ꧀ꦱꦱꦠꦶ ꦠꦱ꧀ꦱꦸꦥꦛ꧀ꦜꦴꦠꦷ’’ꦠꦶ (ꦥꦛꦶ. ꦩ. ꧑.꧑꧖꧐).

ꦱꦩꦴꦣꦷꦠꦶ ꦠꦴꦪ ꦄꦴꦤꦴꦥꦴꦤꦥꦫꦶꦒ꧀ꦒꦴꦲꦶꦏꦴꦪ ꦱꦠꦶꦪꦴ ꦱꦢ꧀ꦣꦶꦁ ꦈꦥ꧀ꦥꦤ꧀ꦤꦴ ꦕꦶꦠ꧀ꦠꦺꦏꦒ꧀ꦒꦠꦴ; ꦱꦩꦴꦣꦶꦱꦷꦱꦺꦤ ꦕꦴꦪꦁ ꦢꦺꦱꦤꦴ, ꦤ ꦱꦠꦶꦱꦷꦱꦺꦤ. ꦠꦱ꧀ꦩꦴ ꦄꦴꦤꦴꦥꦴꦤꦱ꧀ꦱꦠꦶꦪꦴ ꦪꦸꦠ꧀ꦠꦺꦴ ꦱꦩꦴꦣꦶ ꦄꦴꦤꦴꦥꦴꦤꦱ꧀ꦱꦠꦶꦱꦩꦴꦣꦶ, ꦄꦴꦤꦴꦥꦴꦤꦱ꧀ꦱꦠꦶꦪꦁ ꦮꦴ ꦱꦩꦴꦣꦶ ꦄꦴꦤꦴꦥꦴꦤꦱ꧀ꦱꦠꦶꦱꦩꦴꦣꦷꦠꦶ ꦌꦮꦩꦺꦠ꧀ꦡ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ꦨꦴꦮꦶꦠꦺꦴꦠꦶ ꦈꦥ꧀ꦥꦴꦢꦶꦠꦺꦴ ꦮꦝ꧀ꦞꦶꦠꦺꦴ ꦕ. ꦧꦲꦸꦭꦷꦏꦠꦺꦴꦠꦶ ꦥꦸꦤꦥ꧀ꦥꦸꦤꦁ ꦏꦠꦺꦴ. ꦱꦤ꧀ꦠꦺꦴ ꦕꦺꦮ ꦥꦟꦷꦠꦺꦴ ꦕꦴꦠꦶ ꦱꦤ꧀ꦠꦺꦴ ꦕꦺꦮ ꦥꦟꦷꦠꦺꦴ ꦕꦺꦮ, ꦈꦨꦪꦠ꧀ꦡ ꦌꦮꦱꦢ꧀ꦢꦺꦤ ꦤꦶꦪꦩꦺꦴ ꦮꦺꦢꦶꦠꦧ꧀ꦧꦺꦴ. ꦏꦶꦁ ꦮꦸꦠ꧀ꦠꦁ ꦲꦺꦴꦠꦶ? ꦄꦪꦚ꧀ꦲꦶ ꦪꦡꦴ ꦄꦱꦸꦨꦏꦩ꧀ꦩꦛ꧀ꦜꦴꦤꦁ ꦏꦺꦮꦭꦁ ꦥꦛꦶꦮꦺꦣꦮꦱꦺꦤ ꦱꦤ꧀ꦠꦚ꧀ꦕ ꦥꦟꦷꦠꦚ꧀ꦕ ꦎꦭ꦳ꦴꦫꦶꦏꦴꦫꦩ꧀ꦩꦟꦠ꧀ꦠꦴ ꦥꦤ ꦥꦛꦶꦏꦹꦭꦴꦫꦩ꧀ꦩꦟꦠ꧀ꦠꦴ ꦕ ꦄꦴꦫꦩ꧀ꦩꦟꦮꦱꦺꦤ ꦤꦺꦮ ꦱꦤ꧀ꦠꦁ ꦤ ꦥꦟꦷꦠꦁ, ꦤ ꦌꦮꦁ ꦏꦺꦤꦕꦶ ꦥꦫꦶꦪꦴꦪꦺꦤ ꦄꦱꦤ꧀ꦠꦺꦴ ꦮꦴ ꦄꦥ꧀ꦥꦟꦷꦠꦺꦴ ꦮꦴ, ꦄꦥꦶꦕ ꦑꦺꦴ ꦄꦴꦫꦩ꧀ꦩꦟꦱꦤ꧀ꦠꦠꦴꦪꦥꦶ ꦱꦤ꧀ꦠꦺꦴ ꦮꦹꦥꦱꦤ꧀ꦠꦺꦴ ꦤꦶꦧ꧀ꦧꦸꦠꦺꦴ ꦥꦛꦶꦮꦺꦣꦱꦔ꧀ꦑꦴꦠꦄꦔ꧀ꦒꦱꦤ꧀ꦠꦠꦴꦪꦥꦶ ꦄꦴꦫꦩ꧀ꦩꦟꦥ꧀ꦥꦟꦷꦠꦠꦴꦪꦥꦶ ꦥꦟꦷꦠꦺꦴ ꦄꦠꦶꦠ꧀ꦠꦶꦏꦫꦺꦴ ꦄꦔ꧀ꦒꦥ꧀ꦥꦟꦷꦠꦠꦴꦪꦥꦷꦠꦶ. ꦠꦺꦤ ꦮꦸꦠ꧀ꦠꦁ – ‘‘ꦱꦤ꧀ꦠꦺꦴ ꦕꦺꦮ ꦥꦟꦷꦠꦺꦴ ꦕꦴ’’ꦠꦶ.

ꦄꦱꦺꦕꦤꦏꦺꦴ ꦕ ꦱꦸꦑꦺꦴ ꦕ ꦮꦶꦲꦴꦫꦺꦴꦠꦶ ꦌꦠ꧀ꦡ ꦥꦤ ꦤꦴꦱ꧀ꦱ ꦱꦺꦕꦤꦤ꧀ꦠꦶ ꦄꦱꦺꦕꦤꦏꦺꦴ ꦄꦤꦴꦱꦶꦠ꧀ꦠꦏꦺꦴ ꦄꦧ꧀ꦧꦺꦴꦏꦶꦟ꧀ꦟꦺꦴ ꦥꦴꦛꦺꦏ꧀ꦏꦺꦴ ꦄꦴꦮꦺꦟꦶꦏꦺꦴ, ꦤꦠ꧀ꦡꦺꦠ꧀ꦡ ꦥꦫꦶꦏꦩ꧀ꦩꦺꦤ ꦮꦴ ꦈꦥꦕꦴꦫꦺꦤ ꦮꦴ ꦱꦤ꧀ꦠꦠꦴ ꦄꦴꦢꦶꦩꦤꦱꦶꦏꦴꦫꦠꦺꦴ ꦥꦨꦸꦠꦶ ꦄꦠ꧀ꦠꦤꦺꦴ ꦱꦨꦴꦮꦺꦤꦺꦮ ꦱꦤ꧀ꦠꦺꦴ ꦕ ꦥꦟꦷꦠꦺꦴ ꦕꦴꦠꦶ ꦄꦠ꧀ꦡꦺꦴ. ꦏꦺꦕꦶ ꦥꦤ ꦄꦱꦺꦕꦤꦏꦺꦴꦠꦶ ꦄꦤꦴꦱꦶꦠ꧀ꦠꦏꦺꦴ ꦎꦗꦮꦤ꧀ꦠꦺꦴ ꦱꦨꦴꦮꦺꦤꦺꦮ ꦩꦣꦸꦫꦺꦴꦠꦶ ꦮꦢꦤ꧀ꦠꦶ. ꦌꦮꦩꦪꦁ ꦄꦱꦺꦕꦤꦏꦺꦴ ꦕ ꦄꦥ꧀ꦥꦶꦠꦥ꧀ꦥꦶꦠꦏ꧀ꦑꦟꦺ ꦏꦴꦪꦶꦏꦕꦺꦠꦱꦶꦏꦱꦸꦑꦥ꧀ꦥꦛꦶꦭꦴꦨꦴꦪ ꦱꦁꦮꦠ꧀ꦠꦤꦠꦺꦴ ꦱꦸꦑꦺꦴ ꦕ ꦮꦶꦲꦴꦫꦺꦴꦠꦶ ꦮꦺꦢꦶꦠꦧ꧀ꦧꦺꦴ.

ꦈꦥ꧀ꦥꦤ꧀ꦤꦸꦥ꧀ꦥꦤ꧀ꦤꦺꦠꦶ ꦄꦮꦶꦏ꧀ꦑꦩ꧀ꦨꦶꦠꦺ ꦄꦮꦶꦏ꧀ꦑꦩ꧀ꦨꦶꦠꦺ. ꦥꦴꦥꦏꦺꦠꦶ ꦭꦴꦩꦏꦺ. ꦄꦏꦸꦱꦭꦺ ꦣꦩ꧀ꦩꦺꦠꦶ ꦄꦏꦺꦴꦱꦭ꧀ꦭꦱꦩ꧀ꦨꦹꦠꦺ ꦣꦩ꧀ꦩꦺ. ꦜꦴꦤꦱꦺꦴ ꦄꦤ꧀ꦠꦫꦣꦴꦥꦺꦠꦷꦠꦶ ꦑꦟꦺꦤꦺꦮ ꦄꦤ꧀ꦠꦫꦣꦴꦥꦺꦠꦶ ꦮꦶꦏ꧀ꦑꦩ꧀ꦨꦺꦠꦶ. ꦮꦹꦥꦱꦩꦺꦠꦷꦠꦶ ꦱꦸꦛ꧀ꦜꦸ ꦈꦥꦱꦩꦺꦠꦶ, ꦤꦶꦧ꧀ꦧꦺꦣꦨꦴꦒꦶꦪꦠ꧀ꦠꦴ ꦮꦴ ꦄꦤꦸꦥꦸꦧ꧀ꦧꦺꦤ ꦄꦫꦶꦪꦩꦒ꧀ꦒꦮꦸꦝ꧀ꦞꦶꦥ꧀ꦥꦠꦺꦴ ꦱꦩꦸꦕ꧀ꦖꦶꦤ꧀ꦢꦠꦶ ꦥꦛꦶꦥ꧀ꦥꦱ꧀ꦱꦩ꧀ꦨꦺꦠꦷꦠꦶꦥꦶ ꦄꦠ꧀ꦡꦺꦴ.

ꦱꦺꦪ꧀ꦪꦡꦴꦥꦷꦠꦶ ꦎꦥꦩ꧀ꦩꦤꦶꦢꦱ꧀ꦱꦤꦩꦺꦠꦁ. ꦒꦶꦩ꧀ꦲꦴꦤꦁ ꦥꦕ꧀ꦖꦶꦩꦺ ꦩꦴꦱꦺꦠꦶ ꦄꦴꦱꦴꦭ꦳꧀ꦲꦩꦴꦱꦺ. ꦈꦴꦲꦠꦁ ꦫꦗꦺꦴꦗꦭ꧀ꦭꦤ꧀ꦠꦶ ꦄꦢ꧀ꦣꦩꦴꦱꦺ ꦮꦴꦠꦴꦠꦥꦱꦸꦏ꧀ꦑꦴꦪ ꦒꦺꦴꦩꦲꦶꦁꦱꦴꦢꦶꦥꦴꦢꦥ꧀ꦥꦲꦴꦫꦱꦩ꧀ꦨꦶꦤ꧀ꦤꦴꦪ ꦥꦡꦮꦶꦪꦴ ꦈꦢ꧀ꦣꦁ ꦲꦠꦁ ꦈꦴꦲꦠꦁ ꦄꦴꦏꦴꦱꦺ ꦱꦩꦸꦛ꧀ꦜꦶꦠꦁ ꦫꦗꦚ꧀ꦕ ꦫꦺꦟꦸꦚ꧀ꦕ. ꦩꦲꦴ ꦄꦏꦴꦭꦩꦺꦓꦺꦴꦠꦶ ꦱꦧ꧀ꦧꦁ ꦤꦨꦁ ꦄꦗ꧀ꦙꦺꦴꦠ꧀ꦡꦫꦶꦠ꧀ꦮꦴ ꦈꦛ꧀ꦜꦶꦠꦺꦴ ꦄꦴꦱꦴꦭ꦳꧀ꦲꦗꦸꦟ꧀ꦲꦥꦏ꧀ꦑꦺ ꦱꦏꦭꦁ ꦄꦢ꧀ꦣꦩꦴꦱꦁ ꦮꦱ꧀ꦱꦤꦏꦩꦺꦓꦺꦴ. ꦱꦺꦴ ꦲꦶ ꦄꦱꦩ꧀ꦥꦠ꧀ꦠꦺ ꦮꦱ꧀ꦱꦏꦴꦭꦺ ꦈꦥ꧀ꦥꦤ꧀ꦤꦠ꧀ꦠꦴ ꦄꦏꦴꦭꦩꦺꦓꦺꦴꦠꦶ ꦆꦣꦴꦣꦶꦥ꧀ꦥꦺꦠꦺꦴ. ꦜꦴꦤꦱꦺꦴ ꦄꦤ꧀ꦠꦫꦣꦴꦥꦺꦠꦶ ꦮꦹꦥꦱꦩꦺꦠꦷꦠꦶ ꦑꦟꦺꦤꦺꦮ ꦄꦢꦱ꧀ꦱꦤꦁ ꦤꦺꦠꦶ, ꦥꦡꦮꦶꦪꦁ ꦱꦤ꧀ꦤꦶꦱꦷꦢꦴꦥꦺꦠꦶ. ꦌꦮꦩꦺꦮ ꦑꦺꦴꦠꦶ ꦎꦥꦩ꧀ꦩꦱꦩ꧀ꦥꦛꦶꦥꦴꦢꦤꦩꦺꦠꦁ. ꦠꦠꦺꦴ ꦥꦫꦁ ꦮꦸꦠ꧀ꦠꦤꦪꦩꦺꦮ.

ꦆꦢꦴꦤꦶ ꦏꦡꦁ ꦨꦴꦮꦶꦠꦺꦴ ꦕ ꦨꦶꦏ꧀ꦑꦮꦺ ꦄꦴꦤꦴꦥꦴꦤꦱ꧀ꦱꦠꦶꦱꦩꦴꦣꦷꦠꦶ ꦌꦠ꧀ꦡ ꦏꦡꦤ꧀ꦠꦶ ꦄꦴꦤꦴꦥꦴꦤꦱ꧀ꦱꦠꦶꦱꦩꦴꦣꦶꦨꦴꦮꦤꦁ ꦤꦴꦤꦥ꧀ꦥꦏꦴꦫꦠꦺꦴ ꦮꦶꦠ꧀ꦡꦴꦫꦺꦠꦸꦏꦩ꧀ꦪꦠꦴꦥꦸꦕ꧀ꦖꦴ. ꦨꦴꦮꦶꦠꦺꦴ ꦕ ꦨꦶꦏ꧀ꦑꦮꦺ ꦄꦴꦤꦴꦥꦴꦤꦱ꧀ꦱꦠꦶꦱꦩꦴꦣꦷꦠꦶ ꦤꦴꦤꦥ꧀ꦥꦏꦴꦫꦠꦺꦴ ꦮꦶꦠ꧀ꦡꦴꦫꦺꦠꦸꦏꦩ꧀ꦪꦠꦴꦪ ꦥꦸꦛ꧀ꦜꦣꦩ꧀ꦩꦤꦶꦢꦱ꧀ꦱꦤꦁ. ꦌꦱ ꦤꦪꦺꦴ ꦢꦸꦠꦶꦪꦥꦢꦺꦥꦶ. ꦄꦪꦁ ꦥꦤꦺꦠ꧀ꦡ ꦱꦔ꧀ꦑꦺꦥꦠ꧀ꦡꦺꦴ – ꦨꦶꦏ꧀ꦑꦮꦺ ꦏꦺꦤꦥꦏꦴꦫꦺꦤ ꦏꦺꦤꦴꦏꦴꦫꦺꦤ ꦏꦺꦤ ꦮꦶꦣꦶꦤꦴ ꦨꦴꦮꦶꦠꦺꦴ ꦄꦴꦤꦴꦥꦴꦤꦱ꧀ꦱꦠꦶꦱꦩꦴꦣꦶ ꦏꦺꦤꦥꦏꦴꦫꦺꦤ ꦧꦲꦸꦭꦷꦏꦠꦺꦴ ꦱꦤ꧀ꦠꦺꦴ ꦕꦺꦮ…ꦥꦺ… ꦮꦹꦥꦱꦩꦺꦠꦷꦠꦶ.

ꦆꦢꦴꦤꦶ ꦠꦩꦠ꧀ꦡꦁ ꦮꦶꦠ꧀ꦡꦴꦫꦺꦤ꧀ꦠꦺꦴ ‘‘ꦆꦣ ꦨꦶꦏ꧀ꦑꦮꦺ’’ꦠꦶꦄꦴꦢꦶꦩꦴꦲ. ꦠꦠ꧀ꦡ ꦆꦣ ꦨꦶꦏ꧀ꦑꦮꦺ ꦨꦶꦏ꧀ꦑꦹꦠꦶ ꦨꦶꦏ꧀ꦑꦮꦺ ꦆꦩꦱ꧀ꦩꦶꦁ ꦱꦴꦱꦤꦺ ꦨꦶꦏ꧀ꦑꦸ. ꦄꦪꦚ꧀ꦲꦺꦠ꧀ꦡ ꦆꦣꦱꦢ꧀ꦢꦺꦴ ꦱꦧ꧀ꦧꦥ꧀ꦥꦏꦴꦫꦄꦴꦤꦴꦥꦴꦤꦱ꧀ꦱꦠꦶꦱꦩꦴꦣꦶꦤꦶꦧ꧀ꦧꦠ꧀ꦠꦏꦱ꧀ꦱ ꦥꦸꦒ꧀ꦒꦭꦱ꧀ꦱ ꦱꦤ꧀ꦤꦶꦱ꧀ꦱꦪꦨꦹꦠꦱꦴꦱꦤꦥꦫꦶꦢꦷꦥꦤꦺꦴ ꦄꦚ꧀ꦚꦱꦴꦱꦤꦱ꧀ꦱ ꦠꦡꦴꦨꦴꦮꦥꦛꦶꦱꦺꦣꦤꦺꦴ ꦕ. ꦮꦸꦠ꧀ꦠꦚ꧀ꦲꦺꦠꦁ – ‘‘ꦆꦣꦺꦮ, ꦨꦶꦏ꧀ꦑꦮꦺ, ꦱꦩꦟꦺꦴ…ꦥꦺ… ꦱꦸꦚ꧀ꦚꦴ ꦥꦫꦥ꧀ꦥꦮꦴꦢꦴ ꦱꦩꦟꦺꦨꦶ ꦄꦚ꧀ꦚꦺꦲꦷ’’ꦠꦶ (ꦩ. ꦤꦶ. ꧑.꧑꧓꧙). ꦠꦺꦤ ꦮꦸꦠ꧀ꦠꦁ – ‘‘ꦆꦩꦱ꧀ꦩꦶꦁ ꦱꦴꦱꦤꦺ ꦨꦶꦏ꧀ꦑꦹ’’ꦠꦶ.

ꦄꦫꦚ꧀ꦚꦒꦠꦺꦴ ꦮꦴ…ꦥꦺ… ꦱꦸꦚ꧀ꦚꦴꦒꦴꦫꦒꦠꦺꦴ ꦮꦴꦠꦶ ꦆꦢꦩꦱ꧀ꦱ ꦄꦴꦤꦴꦥꦴꦤꦱ꧀ꦱꦠꦶꦱꦩꦴꦣꦶꦨꦴꦮꦤꦴꦤꦸꦫꦹꦥꦱꦺꦤꦴꦱꦤꦥꦫꦶꦒ꧀ꦒꦲꦥꦫꦶꦢꦷꦥꦤꦁ. ꦆꦩꦱ꧀ꦱ ꦲꦶ ꦨꦶꦏ꧀ꦑꦸꦤꦺꦴ ꦢꦷꦓꦫꦠ꧀ꦠꦁ ꦫꦹꦥꦴꦢꦷꦱꦸ ꦄꦴꦫꦩ꧀ꦩꦟꦺꦱꦸ ꦄꦤꦸꦮꦶꦱꦛꦁ ꦕꦶꦠ꧀ꦠꦁ ꦄꦴꦤꦴꦥꦴꦤꦱ꧀ꦱꦠꦶꦱꦩꦴꦣꦶꦄꦴꦫꦩ꧀ꦩꦟꦁ ꦄꦨꦶꦫꦸꦲꦶꦠꦸꦁ ꦤ ꦆꦕ꧀ꦖꦠꦶ. ꦏꦹꦛꦒꦺꦴꦟꦪꦸꦠ꧀ꦠꦫꦡꦺꦴ ꦮꦶꦪ ꦈꦥ꧀ꦥꦡꦩꦺꦮ ꦣꦴꦮꦠꦶ. ꦠꦱ꧀ꦩꦴ ꦱꦺꦪ꧀ꦪꦡꦴꦥꦶ ꦤꦴꦩ ꦒꦺꦴꦥꦺꦴ ꦏꦹꦛꦣꦺꦤꦸꦪꦴ ꦱꦧ꧀ꦧꦁ ꦑꦷꦫꦁ ꦥꦶꦮꦶꦠ꧀ꦮꦴ ꦮꦝ꧀ꦞꦶꦠꦁ ꦏꦹꦛꦮꦕ꧀ꦖꦁ ꦢꦩꦺꦠꦸꦏꦴꦩꦺꦴ ꦣꦺꦤꦸꦠꦺꦴ ꦄꦥꦤꦺꦠ꧀ꦮꦴ ꦌꦏꦩꦤ꧀ꦠꦺ ꦩꦲꦤ꧀ꦠꦁ ꦡꦩ꧀ꦨꦁ ꦤꦶꦑꦟꦶꦠ꧀ꦮꦴ ꦠꦠ꧀ꦡ ꦪꦺꦴꦠ꧀ꦠꦺꦤ ꦧꦤ꧀ꦣꦺꦪ꧀ꦪ. ꦄꦡꦱ꧀ꦱ ꦱꦺꦴ ꦮꦕ꧀ꦖꦺꦴ ꦆꦠꦺꦴ ꦕꦶꦠꦺꦴ ꦕ ꦮꦶꦥ꧀ꦦꦤ꧀ꦢꦶꦠ꧀ꦮꦴ ꦥꦭꦴꦪꦶꦠꦸꦁ ꦄꦱꦏ꧀ꦏꦺꦴꦤ꧀ꦠꦺꦴ ꦠꦩꦺꦮ ꦡꦩ꧀ꦨꦁ ꦈꦥꦤꦶꦱꦷꦢꦺꦪ꧀ꦪ ꦮꦴ ꦈꦥꦤꦶꦥꦗ꧀ꦗꦺꦪ꧀ꦪ ꦮꦴ; ꦌꦮꦩꦺꦮ ꦆꦩꦶꦤꦴꦥꦶ ꦨꦶꦏ꧀ꦑꦸꦤꦴ ꦢꦷꦓꦫꦠ꧀ꦠꦁ ꦫꦹꦥꦴꦫꦩ꧀ꦩꦟꦴꦢꦶꦫꦱꦥꦴꦤꦮꦝ꧀ꦞꦶꦠꦁ ꦢꦸꦛ꧀ꦜꦕꦶꦠ꧀ꦠꦁ ꦢꦩꦺꦠꦸꦏꦴꦩꦺꦤ ꦫꦹꦥꦴꦢꦶꦄꦴꦫꦩ꧀ꦩꦟꦠꦺꦴ ꦄꦥꦤꦺꦠ꧀ꦮꦴ ꦄꦫꦚ꧀ꦚꦁ ꦮꦴ…ꦥꦺ… ꦱꦸꦚ꧀ꦚꦴꦒꦴꦫꦁ ꦮꦴ ꦥꦮꦺꦱꦺꦠ꧀ꦮꦴ ꦠꦠ꧀ꦡ ꦄꦱ꧀ꦱꦴꦱꦥꦱ꧀ꦱꦴꦱꦡꦩ꧀ꦨꦺ ꦱꦠꦶꦪꦺꦴꦠ꧀ꦠꦺꦤ ꦧꦤ꧀ꦣꦶꦠꦧ꧀ꦧꦁ. ꦌꦮꦩꦱ꧀ꦱ ꦠꦁ ꦕꦶꦠ꧀ꦠꦁ ꦆꦠꦺꦴ ꦕꦶꦠꦺꦴ ꦕ ꦮꦶꦥ꧀ꦦꦤ꧀ꦢꦶꦠ꧀ꦮꦴꦥꦶ ꦥꦸꦧ꧀ꦧꦺ ꦄꦴꦕꦶꦟ꧀ꦟꦴꦫꦩ꧀ꦩꦟꦁ ꦄꦭꦨꦩꦴꦤꦁ ꦱꦠꦶꦪꦺꦴꦠ꧀ꦠꦁ ꦖꦶꦤ꧀ꦢꦶꦠ꧀ꦮꦴ ꦥꦭꦴꦪꦶꦠꦸꦁ ꦄꦱꦏ꧀ꦏꦺꦴꦤ꧀ꦠꦁ ꦠꦩꦺꦮꦴꦫꦩ꧀ꦩꦟꦁ ꦈꦥꦕꦴꦫꦥ꧀ꦥꦤꦴꦮꦱꦺꦤ ꦈꦥꦤꦶꦱꦷꦢꦠꦶ ꦕꦺꦮ ꦈꦥꦤꦶꦥꦗ꧀ꦗꦠꦶ ꦕ. ꦠꦺꦤꦴꦲꦸ ꦥꦺꦴꦫꦴꦟꦴ –

‘‘ꦪꦡꦴ ꦡꦩ꧀ꦨꦺ ꦤꦶꦧꦤ꧀ꦣꦺꦪ꧀ꦪ, ꦮꦕ꧀ꦖꦁ ꦢꦩ꧀ꦩꦁ ꦤꦫꦺꦴ ꦆꦣ;

ꦧꦤ꧀ꦣꦺꦪ꧀ꦪꦺꦮꦁ ꦱꦏꦁ ꦕꦶꦠ꧀ꦠꦁ, ꦱꦠꦶꦪꦴꦫꦩ꧀ꦩꦟꦺ ꦢꦭ꦳꧀ꦲ’’ꦤ꧀ꦠꦶ. (ꦮꦶꦱꦸꦢ꧀ꦣꦶ. ꧑.꧒꧑꧗; ꦢꦷ. ꦤꦶ. ꦄꦛ꧀ꦜ. ꧒.꧓꧗꧔; ꦩ. ꦤꦶ. ꦄꦛ꧀ꦜ. ꧑.꧑꧐꧗; ꦥꦛꦶ. ꦩ. ꦄꦛ꧀ꦜ. ꧒.꧑.꧑꧖꧓);

ꦌꦮꦩꦱ꧀ꦱꦺꦠꦁ ꦱꦺꦤꦴꦱꦤꦁ ꦨꦴꦮꦤꦴꦤꦸꦫꦹꦥꦁ ꦲꦺꦴꦠꦶ. ꦠꦺꦤ ꦮꦸꦠ꧀ꦠꦁ – ‘‘ꦆꦢꦩꦱ꧀ꦱ ꦄꦴꦤꦴꦥꦴꦤꦱ꧀ꦱꦠꦶꦱꦩꦄꦴꦣꦶꦨꦴꦮꦤꦴꦤꦸꦫꦹꦥꦱꦺꦤꦴꦱꦤꦥꦫꦶꦒ꧀ꦒꦲꦥꦫꦶꦢꦷꦥꦤ’’ꦤ꧀ꦠꦶ.

ꦄꦡ ꦮꦴ ꦪꦱ꧀ꦩꦴ ꦆꦢꦁ ꦏꦩ꧀ꦩꦛ꧀ꦜꦴꦤꦥ꧀ꦥꦨꦺꦢꦺ ꦩꦸꦢ꧀ꦣꦨꦹꦠꦁ ꦱꦧ꧀ꦧꦚ꧀ꦚꦸꦧꦸꦢ꧀ꦣꦥꦕ꧀ꦕꦺꦏꦧꦸꦢ꧀ꦣꦧꦸꦢ꧀ꦣꦱꦴꦮꦏꦴꦤꦁ ꦮꦶꦱꦺꦱꦴꦣꦶꦒꦩꦢꦶꦛ꧀ꦜꦣꦩ꧀ꦩꦱꦸꦑꦮꦶꦲꦴꦫꦥꦢꦛ꧀ꦜꦴꦤꦁ ꦄꦴꦤꦴꦥꦴꦤꦱ꧀ꦱꦠꦶꦏꦩ꧀ꦩꦛ꧀ꦜꦴꦤꦁ ꦆꦠ꧀ꦡꦶꦥꦸꦫꦶꦱꦲꦠ꧀ꦡꦶꦄꦱ꧀ꦱꦴꦢꦶꦱꦢ꧀ꦢꦱꦩꦴꦏꦸꦭꦁ ꦒꦴꦩꦤ꧀ꦠꦁ ꦄꦥꦫꦶꦕ꧀ꦕꦗꦶꦠ꧀ꦮꦴ ꦤ ꦱꦸꦏꦫꦁ ꦱꦩ꧀ꦥꦴꦢꦺꦠꦸꦁ, ꦱꦢ꧀ꦢꦏꦟ꧀ꦛꦏꦠ꧀ꦠꦴ ꦙꦴꦤꦱ꧀ꦱ. ꦄꦒꦴꦩꦏꦺ ꦥꦤ ꦄꦫꦚ꧀ꦚꦺ ꦱꦸꦏꦫꦁ ꦪꦺꦴꦒꦴꦮꦕꦫꦺꦤ ꦆꦢꦁ ꦏꦩ꧀ꦩꦛ꧀ꦜꦴꦤꦁ ꦥꦫꦶꦒ꧀ꦒꦲꦺꦠ꧀ꦮꦴ ꦄꦴꦤꦴꦥꦴꦤꦕꦠꦸꦠ꧀ꦡꦗ꧀ꦙꦴꦤꦁ ꦤꦶꦧ꧀ꦧꦠ꧀ꦠꦺꦠ꧀ꦮꦴ ꦠꦢꦺꦮ ꦕ ꦥꦴꦢꦏꦁ ꦏꦠ꧀ꦮꦴ ꦱꦔ꧀ꦑꦴꦫꦺ ꦱꦩ꧀ꦩꦱꦶꦠ꧀ꦮꦴ ꦄꦒ꧀ꦒꦦꦭꦁ ꦄꦫꦲꦠ꧀ꦠꦁ ꦱꦩ꧀ꦥꦴꦥꦸꦟꦶꦠꦸꦁ, ꦠꦱ꧀ꦩꦴꦱ꧀ꦱ ꦄꦤꦸꦫꦹꦥꦁꦱꦺꦤꦴꦱꦤꦁ ꦢꦱ꧀ꦱꦺꦤ꧀ꦠꦺꦴ ꦨꦒꦮꦴ ‘‘ꦄꦫꦚ꧀ꦚꦒꦠꦺꦴ ꦮꦴ’’ꦠꦶꦄꦴꦢꦶꦩꦴꦲ.

ꦮꦠ꧀ꦡꦸꦮꦶꦗ꧀ꦗꦴꦕꦫꦶꦪꦺꦴ ꦮꦶꦪ ꦲꦶ ꦨꦒꦮꦴ, ꦱꦺꦴ ꦪꦡꦴ ꦮꦠ꧀ꦡꦸꦮꦶꦗ꧀ꦗꦴꦕꦫꦶꦪꦺꦴ ꦤꦒꦫꦨꦹꦩꦶꦁ ꦥꦱ꧀ꦱꦶꦠ꧀ꦮꦴ ꦱꦸꦛ꧀ꦜꦸ ꦈꦥꦥꦫꦶꦏ꧀ꦑꦶꦠ꧀ꦮꦴ ‘‘ꦌꦠ꧀ꦡ ꦤꦒꦫꦁ ꦩꦴꦥꦺꦡꦴ’’ꦠꦶ ꦈꦥꦢꦶꦱꦠꦶ, ꦱꦺꦴꦠ꧀ꦡꦶꦤꦴ ꦕ ꦤꦒꦫꦺ ꦤꦶꦛ꧀ꦜꦶꦠꦺ ꦫꦴꦗꦏꦸꦭꦠꦺꦴ ꦩꦲꦴꦱꦏ꧀ꦏꦴꦫꦁ ꦭꦨꦠꦶ; ꦌꦮꦩꦺꦮ ꦪꦺꦴꦒꦴꦮꦕꦫꦱ꧀ꦱ ꦄꦤꦸꦫꦹꦥꦱꦺꦤꦴꦱꦤꦁ ꦈꦥꦥꦫꦶꦏ꧀ꦑꦶꦠ꧀ꦮꦴ ꦌꦠ꧀ꦡ ꦏꦩ꧀ꦩꦛ꧀ꦜꦴꦤꦁ ꦄꦤꦸꦪꦸꦚ꧀ꦗꦶꦠꦧ꧀ꦧꦤ꧀ꦠꦶ ꦈꦥꦢꦶꦱꦠꦶ. ꦠꦠꦺꦴ ꦠꦠ꧀ꦡ ꦏꦩ꧀ꦩꦛ꧀ꦜꦴꦤꦁ ꦄꦤꦸꦪꦸꦠ꧀ꦠꦺꦤ ꦪꦺꦴꦒꦶꦤꦴ ꦏꦩꦺꦤ ꦄꦫꦲꦠ꧀ꦠꦺ ꦥꦠ꧀ꦠꦺ ‘‘ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ ꦮꦠ ꦱꦺꦴ ꦨꦒꦮꦴ’’ꦠꦶ ꦩꦲꦤ꧀ꦠꦁ ꦱꦏ꧀ꦏꦴꦫꦁ ꦭꦨꦠꦶ. ꦄꦪꦁ ꦥꦤ ꦨꦶꦏ꧀ꦑꦸ ‘‘ꦢꦷꦥꦶꦱꦢꦶꦱꦺꦴ’’ꦠꦶ ꦮꦸꦕ꧀ꦕꦠꦶ. ꦪꦡꦴ ꦲꦶ ꦩꦲꦴꦢꦷꦥꦶꦫꦴꦗꦴ ꦄꦫꦚ꧀ꦚꦺ ꦠꦶꦟꦒꦲꦤꦁ ꦮꦴ ꦮꦤꦒꦲꦤꦁ ꦮꦴ ꦥꦧ꧀ꦧꦠꦒꦲꦤꦁ ꦮꦴ ꦤꦶꦱ꧀ꦱꦴꦪ ꦤꦶꦭꦷꦪꦶꦠ꧀ꦮꦴ ꦮꦤꦩꦲꦶꦁꦱꦒꦺꦴꦏꦟ꧀ꦟꦱꦹꦏꦫꦴꦢꦪꦺꦴ ꦩꦶꦒꦺ ꦒꦟ꧀ꦲꦴꦠꦶ; ꦌꦮꦩꦺꦮꦴꦪꦁ ꦄꦫꦚ꧀ꦚꦴꦢꦷꦱꦸ ꦏꦩ꧀ꦩꦛ꧀ꦜꦴꦤꦁ ꦄꦤꦸꦪꦸꦚ꧀ꦗꦤ꧀ꦠꦺꦴ ꦨꦶꦏ꧀ꦑꦸ ꦪꦡꦴꦏ꧀ꦏꦩꦺꦤ ꦱꦺꦴꦠꦴꦥꦠ꧀ꦠꦶꦱꦏꦢꦴꦒꦴꦩꦶꦄꦤꦴꦒꦴꦩꦶꦄꦫꦲꦠ꧀ꦠꦩꦒ꧀ꦒꦺ ꦕꦺꦮ ꦄꦫꦶꦪꦦꦭꦚ꧀ꦕ ꦒꦟ꧀ꦲꦴꦠꦷꦠꦶ ꦮꦺꦢꦶꦠꦧ꧀ꦧꦺꦴ. ꦠꦺꦤꦴꦲꦸ ꦥꦺꦴꦫꦴꦟꦴ –

‘‘ꦪꦡꦴꦥꦶ ꦢꦷꦥꦶꦏꦺꦴ ꦤꦴꦩ, ꦤꦶꦭꦷꦪꦶꦠ꧀ꦮꦴ ꦒꦟ꧀ꦲꦠꦷ ꦩꦶꦒꦺ;

ꦠꦡꦺꦮꦴꦪꦁ ꦧꦸꦢ꧀ꦣꦥꦸꦠ꧀ꦠꦺꦴ, ꦪꦸꦠ꧀ꦠꦪꦺꦴꦒꦺꦴ ꦮꦶꦥꦱ꧀ꦱꦏꦺꦴ;

ꦄꦫꦚ꧀ꦚꦁ ꦥꦮꦶꦱꦶꦠ꧀ꦮꦴꦤ, ꦒꦟ꧀ꦲꦴꦠꦶ ꦦꦭꦩꦸꦠ꧀ꦠꦩ’’ꦤ꧀ꦠꦶ. (ꦩꦶ. ꦥ. ꧖.꧑.꧕);

ꦠꦺꦤꦱ꧀ꦱ ꦥꦫꦏ꧀ꦏꦩꦗꦮꦪꦺꦴꦒ꧀ꦒꦨꦹꦩꦶꦁ ꦄꦫꦚ꧀ꦚꦱꦺꦤꦴꦱꦤꦁ ꦢꦱ꧀ꦱꦺꦤ꧀ꦠꦺꦴ ꦨꦒꦮꦴ ‘‘ꦄꦫꦚ꧀ꦚꦒꦠꦺꦴ ꦮꦴ’’ꦠꦶꦄꦴꦢꦶꦩꦴꦲ.

ꦠꦠ꧀ꦡ ꦄꦫꦚ꧀ꦚꦒꦠꦺꦴ ꦮꦴꦠꦶ ꦄꦫꦚ꧀ꦚꦤ꧀ꦠꦶ ‘‘ꦤꦶꦏ꧀ꦑꦩꦶꦠ꧀ꦮꦴ ꦧꦲꦶ ꦆꦤ꧀ꦢꦑꦷꦭꦴ ꦱꦧ꧀ꦧꦩꦺꦠꦁ ꦄꦫꦚ꧀ꦚ’’ꦤ꧀ꦠꦶ (ꦮꦶꦨ. ꧕꧒꧙) ꦕ ‘‘ꦄꦴꦫꦚ꧀ꦚꦏꦁ ꦤꦴꦩ ꦱꦺꦤꦴꦱꦤꦁ ꦥꦚ꧀ꦕꦣꦤꦸꦱꦠꦶꦏꦁ ꦥꦕ꧀ꦖꦶꦩ’’ꦤ꧀ꦠꦶ (ꦥꦴꦫꦴ. ꧖꧕꧓) ꦕ ꦌꦮꦁ ꦮꦸꦠ꧀ꦠꦭꦏ꧀ꦑꦟꦺꦱꦸ ꦄꦫꦚ꧀ꦚꦺꦱꦸ ꦄꦤꦸꦫꦹꦥꦁ ꦪꦁꦏꦶꦚ꧀ꦕꦶ ꦥꦮꦶꦮꦺꦏꦱꦸꦑꦁ ꦄꦫꦚ꧀ꦚꦁ ꦒꦠꦺꦴ. ꦫꦸꦏ꧀ꦑꦩꦹꦭꦒꦠꦺꦴ ꦮꦴꦠꦶ ꦫꦸꦏ꧀ꦑꦱꦩꦷꦥꦁ ꦒꦠꦺꦴ. ꦱꦸꦚ꧀ꦚꦴꦒꦴꦫꦒꦠꦺꦴ ꦮꦴꦠꦶ ꦱꦸꦚ꧀ꦚꦁ ꦮꦶꦮꦶꦠ꧀ꦠꦺꦴꦏꦴꦱꦁ ꦒꦠꦺꦴ. ꦌꦠ꧀ꦡ ꦕ ꦜꦥꦺꦠ꧀ꦮꦴ ꦄꦫꦚ꧀ꦚꦚ꧀ꦕ ꦫꦸꦏ꧀ꦑꦩꦹꦭꦚ꧀ꦕ ꦄꦮꦱꦺꦱꦱꦠ꧀ꦠꦮꦶꦣꦱꦺꦤꦴꦱꦤꦒꦠꦺꦴꦥꦶ ꦱꦸꦚ꧀ꦚꦴꦒꦴꦫꦒꦠꦺꦴꦠꦶ ꦮꦠ꧀ꦠꦸꦁ ꦮꦛ꧀ꦛꦠꦶ. ꦌꦮꦩꦱ꧀ꦱ ꦈꦠꦸꦠ꧀ꦠꦪꦴꦤꦸꦏꦹꦭꦁ ꦣꦴꦠꦸꦕꦫꦶꦪꦴꦤꦸꦏꦹꦭꦚ꧀ꦕ ꦄꦴꦤꦴꦥꦴꦤꦱ꧀ꦱꦠꦶꦨꦴꦮꦤꦴꦤꦸꦫꦹꦥꦁ ꦱꦺꦤꦴꦱꦤꦁ ꦈꦥꦢꦶꦱꦶꦠ꧀ꦮꦴ ꦄꦭꦷꦤꦴꦤꦸꦢ꧀ꦣꦕ꧀ꦕꦥꦏ꧀ꦑꦶꦏꦁ ꦱꦤ꧀ꦠꦩꦶꦫꦶꦪꦴꦥꦡꦁ ꦈꦥꦢꦶꦱꦤ꧀ꦠꦺꦴ ‘‘ꦤꦶꦱꦷꦢꦠꦷ’’ꦠꦶ ꦄꦴꦲ. ꦄꦡꦱ꧀ꦱ ꦤꦶꦱꦗ꧀ꦗꦴꦪ ꦢꦭ꦳꧀ꦲꦨꦴꦮꦁ ꦄꦱ꧀ꦱꦴꦱꦥꦱ꧀ꦱꦴꦱꦴꦤꦁ ꦥꦮꦠ꧀ꦠꦤꦱꦸꦑꦠꦁ ꦄꦴꦫꦩ꧀ꦩꦟꦥꦫꦶꦒ꧀ꦒꦲꦹꦥꦴꦪꦚ꧀ꦕ ꦢꦱ꧀ꦱꦺꦤ꧀ꦠꦺꦴ ‘‘ꦥꦭ꧀ꦭꦔ꧀ꦏꦁ ꦄꦴꦨꦸꦗꦶꦠ꧀ꦮꦴ’’ꦠꦶꦄꦴꦢꦶꦩꦴꦲ.

ꦠꦠ꧀ꦡ ꦥꦭ꧀ꦭꦔ꧀ꦏꦤ꧀ꦠꦶ ꦱꦩꦤ꧀ꦠꦠꦺꦴ ꦈꦴꦫꦸꦧꦢ꧀ꦣꦴꦱꦤꦁ. ꦄꦴꦨꦸꦗꦶꦠ꧀ꦮꦴꦠꦶ ꦄꦴꦧꦤ꧀ꦣꦶꦠ꧀ꦮꦴ. ꦈꦗꦸꦁ ꦏꦴꦪꦁ ꦥꦟꦶꦣꦴꦪꦴꦠꦶ ꦈꦥꦫꦶꦩꦁ ꦱꦫꦷꦫꦁ ꦈꦗꦸꦏꦁ ꦜꦥꦺꦠ꧀ꦮꦴ, ꦄꦛ꧀ꦜꦴꦫꦱ ꦥꦶꦛ꧀ꦜꦶꦏꦟ꧀ꦛꦏꦺ ꦏꦺꦴꦛꦶꦪꦴ ꦏꦺꦴꦛꦶꦁ ꦥꦛꦶꦥꦴꦢꦺꦠ꧀ꦮꦴ. ꦌꦮꦚ꧀ꦲꦶ ꦤꦶꦱꦶꦤ꧀ꦤꦱ꧀ꦱ ꦕꦩ꧀ꦩꦩꦁꦱꦤ꧀ꦲꦴꦫꦹꦤꦶ ꦤ ꦥꦟꦩꦤ꧀ꦠꦶ. ꦄꦡꦱ꧀ꦱ ꦪꦴ ꦠꦺꦱꦁ ꦥꦟꦩꦤꦥ꧀ꦥꦕ꧀ꦕꦪꦴ ꦑꦟꦺ ꦑꦟꦺ ꦮꦺꦢꦤꦴ ꦈꦥ꧀ꦥꦗ꧀ꦗꦺꦪ꧀ꦪꦸꦁ, ꦠꦴ ꦤ ꦈꦥ꧀ꦥꦗ꧀ꦗꦤ꧀ꦠꦶ. ꦠꦴꦱꦸ ꦄꦤꦸꦥ꧀ꦥꦗ꧀ꦗꦩꦴꦤꦴꦱꦸ ꦕꦶꦠ꧀ꦠꦁ ꦌꦏꦒ꧀ꦒꦁ ꦲꦺꦴꦠꦶ. ꦏꦩ꧀ꦩꦛ꧀ꦜꦴꦤꦁ ꦤ ꦥꦫꦶꦥꦠꦠꦶ. ꦮꦸꦝ꧀ꦞꦶꦁ ꦦꦴꦠꦶꦁ ꦈꦥꦒꦕ꧀ꦖꦠꦶ.

ꦥꦫꦶꦩꦸꦑꦁ ꦱꦠꦶꦁ ꦈꦥꦛ꧀ꦜꦥꦺꦠ꧀ꦮꦴꦠꦶ ꦏꦩ꧀ꦩꦛ꧀ꦜꦴꦤꦴꦨꦶꦩꦸꦑꦁ ꦱꦠꦶꦁ ꦜꦥꦪꦶꦠ꧀ꦮꦴ. ꦄꦡ ꦮꦴ ‘‘ꦥꦫꦷ’’ꦠꦶ ꦥꦫꦶꦒ꧀ꦒꦲꦛ꧀ꦜꦺꦴ; ‘‘ꦩꦸꦑ’’ꦤ꧀ꦠꦶ ꦤꦶꦪ꧀ꦪꦴꦤꦛ꧀ꦜꦺꦴ; ‘‘ꦱꦠꦷ’’ꦠꦶ ꦈꦥꦛ꧀ꦜꦴꦤꦛ꧀ꦜꦺꦴ; ꦠꦺꦤ ꦮꦸꦕ꧀ꦕꦠꦶ – ‘‘ꦥꦫꦶꦩꦸꦑꦁ ꦱꦠꦶꦁ ꦈꦥꦛ꧀ꦜꦥꦺꦠ꧀ꦮꦴ’’ꦠꦶ. ꦌꦮꦁ ꦥꦛꦶꦱꦩ꧀ꦨꦶꦢꦴꦪꦁ (ꦥꦛꦶ. ꦩ. ꧑.꧑꧖꧔-꧑꧖꧕) ꦮꦸꦠ꧀ꦠꦤꦪꦺꦤꦥꦺꦠ꧀ꦡ ꦄꦠ꧀ꦡꦺꦴ ꦢꦛ꧀ꦜꦧ꧀ꦧꦺꦴ. ꦠꦠ꧀ꦫꦴꦪꦁ ꦱꦔ꧀ꦑꦺꦥꦺꦴ – ‘‘ꦥꦫꦶꦒ꧀ꦒꦲꦶꦠꦤꦶꦪ꧀ꦪꦴꦤꦁ ꦱꦠꦶꦁ ꦏꦠ꧀ꦮꦴ’’ꦠꦶ. ꦱꦺꦴ ꦱꦠꦺꦴꦮ ꦄꦱ꧀ꦱꦱꦠꦷꦠꦶ ꦱꦺꦴ ꦨꦶꦏ꧀ꦑꦸ ꦌꦮꦁ ꦤꦶꦱꦷꦢꦶꦠ꧀ꦮꦴ ꦌꦮꦚ꧀ꦕ ꦱꦠꦶꦁ ꦈꦥꦛ꧀ꦜꦥꦺꦠ꧀ꦮꦴ ꦠꦁ ꦱꦠꦶꦁ ꦄꦮꦶꦗꦲꦤ꧀ꦠꦺꦴ ꦱꦠꦺꦴꦌꦮ ꦄꦱ꧀ꦱꦱꦠꦶ, ꦱꦠꦺꦴ ꦥꦱ꧀ꦱꦱꦠꦶ, ꦱꦠꦺꦴꦏꦴꦫꦷ ꦲꦺꦴꦠꦷꦠꦶ ꦮꦸꦠ꧀ꦠꦁ ꦲꦺꦴꦠꦶ.

ꦆꦢꦴꦤꦶ ꦪꦺꦲꦴꦏꦴꦫꦺꦲꦶ ꦱꦠꦺꦴꦏꦴꦫꦷ ꦲꦺꦴꦠꦶ, ꦠꦺ ꦢꦱ꧀ꦱꦺꦤ꧀ꦠꦺꦴ ‘‘ꦢꦷꦓꦁ ꦮꦴ ꦄꦱ꧀ꦱꦱꦤ꧀ꦠꦺꦴ’’ꦠꦶꦄꦴꦢꦶꦩꦴꦲ. ꦮꦸꦠ꧀ꦠꦚ꧀ꦲꦺꦠꦁ ꦥꦛꦶꦱꦩ꧀ꦨꦶꦢꦴꦪꦁ – ‘‘ꦱꦺꦴ ꦱꦠꦺꦴꦮ ꦄꦱ꧀ꦱꦱꦠꦶ, ꦱꦠꦺꦴ ꦥꦱ꧀ꦱꦱꦠꦷ’’ꦠꦶ ꦌꦠꦱ꧀ꦱꦺꦮ ꦮꦶꦨꦔ꧀ꦒꦺ –

‘‘ꦧꦴꦠ꧀ꦠꦶꦁꦱꦴꦪ ꦄꦴꦏꦴꦫꦺꦲꦶ ꦱꦠꦺꦴꦏꦴꦫꦷ ꦲꦺꦴꦠꦶ. ꦢꦷꦓꦁ ꦄꦱ꧀ꦱꦴꦱꦮꦱꦺꦤ ꦕꦶꦠ꧀ꦠꦱ꧀ꦱ ꦌꦏꦒ꧀ꦒꦠꦁ ꦄꦮꦶꦏ꧀ꦑꦺꦥꦁ ꦥꦗꦴꦤꦠꦺꦴ ꦱꦠꦶ ꦈꦥꦛ꧀ꦜꦶꦠꦴ ꦲꦺꦴꦠꦶ. ꦠꦴꦪ ꦱꦠꦶꦪꦴ ꦠꦺꦤ ꦚꦴꦟꦺꦤ ꦱꦠꦺꦴꦏꦴꦫꦷ ꦲꦺꦴꦠꦶ. ꦢꦷꦓꦁ ꦥꦱ꧀ꦱꦴꦱꦮꦱꦺꦤ…ꦥꦺ… ꦥꦛꦶꦤꦶꦱ꧀ꦱꦒ꧀ꦒꦴꦤꦸꦥꦱ꧀ꦱꦷ ꦄꦱ꧀ꦱꦴꦱꦮꦱꦺꦤ ꦥꦛꦶꦤꦶꦱ꧀ꦱꦒ꧀ꦒꦴꦤꦸꦥꦱ꧀ꦱꦷ ꦥꦱ꧀ꦱꦴꦱꦮꦱꦺꦤ ꦕꦶꦠ꧀ꦠꦱ꧀ꦱ ꦌꦏꦒ꧀ꦒꦠꦁ ꦄꦮꦶꦏ꧀ꦑꦺꦥꦁ ꦥꦗꦴꦤꦠꦺꦴ ꦱꦠꦶ ꦈꦥꦛ꧀ꦜꦶꦠꦴ ꦲꦺꦴꦠꦶ. ꦠꦴꦪ ꦱꦠꦶꦪꦴ ꦠꦺꦤ ꦚꦴꦟꦺꦤ ꦱꦠꦺꦴꦏꦴꦫꦷ ꦲꦺꦴꦠꦷ’’ꦠꦶ (ꦥꦛꦶ. ꦩ. ꧑.꧑꧖꧕).

ꦠꦠ꧀ꦡ ꦢꦷꦓꦁ ꦮꦴ ꦄꦱ꧀ꦱꦱꦤ꧀ꦠꦺꦴꦠꦶ ꦢꦷꦓꦁ ꦮꦴ ꦄꦱ꧀ꦱꦴꦱꦁ ꦥꦮꦠ꧀ꦠꦺꦤ꧀ꦠꦺꦴ. ‘‘ꦄꦱ꧀ꦱꦴꦱꦺꦴ’’ꦠꦶ ꦧꦲꦶ ꦤꦶꦏ꧀ꦑꦩꦤꦮꦴꦠꦺꦴ. ‘‘ꦥꦱ꧀ꦱꦴꦱꦺꦴ’’ꦠꦶ ꦄꦤ꧀ꦠꦺꦴ ꦥꦮꦶꦱꦤꦮꦴꦠꦺꦴ. ꦱꦸꦠ꧀ꦠꦤ꧀ꦠꦛ꧀ꦜꦏꦡꦴꦱꦸ ꦥꦤ ꦈꦥ꧀ꦥꦛꦶꦥꦴꦛꦶꦪꦴ ꦄꦴꦒꦠꦁ.

ꦠꦠ꧀ꦡ ꦱꦧ꧀ꦧꦺꦱꦩ꧀ꦥꦶ ꦒꦧ꧀ꦨꦱꦺꦪ꧀ꦪꦏꦴꦤꦁ ꦩꦴꦠꦸꦏꦸꦕ꧀ꦖꦶꦠꦺꦴ ꦤꦶꦏ꧀ꦑꦩꦤꦏꦴꦭꦺ ꦥꦜꦩꦁ ꦄꦧ꧀ꦨꦤ꧀ꦠꦫꦮꦴꦠꦺꦴ ꦧꦲꦶ ꦤꦶꦏ꧀ꦑꦩꦠꦶ. ꦥꦕ꧀ꦖꦴ ꦧꦴꦲꦶꦫꦮꦴꦠꦺꦴ ꦱꦸꦑꦸꦩꦁ ꦫꦗꦁ ꦒꦲꦺꦠ꧀ꦮꦴ ꦄꦧ꧀ꦨꦤ꧀ꦠꦫꦁ ꦥꦮꦶꦱꦤ꧀ꦠꦺꦴ ꦠꦴꦭꦸꦁ ꦄꦴꦲꦕ꧀ꦕ ꦤꦶꦧ꧀ꦧꦴꦪꦠꦶ. ꦌꦮꦁ ꦠꦴꦮ ꦄꦱ꧀ꦱꦴꦱꦥꦱ꧀ꦱꦴꦱꦴ ꦮꦺꦢꦶꦠꦧ꧀ꦧꦴ. ꦪꦴ ꦥꦤ ꦠꦺꦱꦁ ꦢꦷꦓꦫꦱ꧀ꦱꦠꦴ, ꦱꦴ ꦄꦢ꧀ꦣꦴꦤꦮꦱꦺꦤ ꦮꦺꦢꦶꦠꦧ꧀ꦧꦴ. ꦪꦡꦴ ꦲꦶ ꦎꦏꦴꦱꦢ꧀ꦣꦴꦤꦁ ꦦꦫꦶꦠ꧀ꦮꦴ ꦜꦶꦠꦁ ꦈꦢꦏꦁ ꦮꦴ ꦮꦴꦭꦶꦏꦴ ꦮꦴ ‘‘ꦢꦷꦓꦩꦸꦢꦏꦁ ꦢꦷꦓꦴ ꦮꦴꦭꦶꦏꦴ, ꦫꦱ꧀ꦱꦩꦸꦢꦏꦁ ꦫꦱ꧀ꦱꦴ ꦮꦴꦭꦶꦏꦴ’’ꦠꦶ ꦮꦸꦕ꧀ꦕꦠꦶ. ꦌꦮꦁ ꦕꦸꦟ꧀ꦟꦮꦶꦕꦸꦟ꧀ꦟꦴꦥꦶ ꦄꦱ꧀ꦱꦴꦱꦥꦱ꧀ꦱꦴꦱꦴ ꦲꦠ꧀ꦡꦶꦱꦫꦷꦫꦺ ꦄꦲꦶꦱꦫꦷꦫꦺ ꦕ ꦠꦺꦱꦁ ꦄꦠ꧀ꦠꦨꦴꦮꦱꦔ꧀ꦑꦴꦠꦁ ꦢꦷꦓꦁ ꦄꦢ꧀ꦣꦴꦤꦁ ꦱꦟꦶꦏꦁ ꦥꦹꦫꦺꦠ꧀ꦮꦴ ꦱꦟꦶꦏꦩꦺꦮ ꦤꦶꦏ꧀ꦑꦩꦤ꧀ꦠꦶ, ꦠꦱ꧀ꦩꦴ ‘‘ꦢꦷꦓꦴ’’ꦠꦶ ꦮꦸꦕ꧀ꦕꦤ꧀ꦠꦶ. ꦱꦸꦤꦑꦱꦱꦴꦢꦷꦤꦁ ꦄꦠ꧀ꦠꦨꦴꦮꦱꦔ꧀ꦑꦴꦠꦁ ꦫꦱ꧀ꦱꦁ ꦄꦢ꧀ꦣꦴꦤꦁ ꦱꦷꦓꦁ ꦥꦹꦫꦺꦠ꧀ꦮꦴ ꦱꦷꦓꦩꦺꦮ ꦤꦶꦏ꧀ꦑꦩꦤ꧀ꦠꦶ, ꦠꦱ꧀ꦩꦴ ‘‘ꦫꦱ꧀ꦱꦴ’’ꦠꦶ ꦮꦸꦕ꧀ꦕꦤ꧀ꦠꦶ. ꦩꦤꦸꦱ꧀ꦱꦺꦱꦸ ꦥꦤ ꦏꦺꦕꦶ ꦲꦠ꧀ꦡꦶꦄꦲꦶꦄꦴꦢꦪꦺꦴ ꦮꦶꦪ ꦏꦴꦭꦢ꧀ꦣꦴꦤꦮꦱꦺꦤ ꦢꦷꦓꦁ ꦄꦱ꧀ꦱꦱꦤ꧀ꦠꦶ ꦕ ꦥꦱ꧀ꦱꦱꦤ꧀ꦠꦶ ꦕ. ꦏꦺꦕꦶ ꦱꦸꦤꦑꦱꦱꦴꦢꦪꦺꦴ ꦮꦶꦪ ꦫꦱ꧀ꦱꦁ. ꦠꦱ꧀ꦩꦴ ꦠꦺꦱꦁ ꦏꦴꦭꦮꦱꦺꦤ ꦢꦷꦓꦩꦢ꧀ꦣꦴꦤꦁ ꦤꦶꦏ꧀ꦑꦩꦤ꧀ꦠꦴ ꦕ ꦥꦮꦶꦱꦤ꧀ꦠꦴ ꦕ ꦠꦺ ꦢꦷꦓꦴ. ꦆꦠ꧀ꦠꦫꦩꦢ꧀ꦣꦴꦤꦁ ꦤꦶꦏ꧀ꦑꦩꦤ꧀ꦠꦴ ꦕ ꦥꦮꦶꦱꦤ꧀ꦠꦴ ꦕ ‘‘ꦫꦱ꧀ꦱꦴ’’ꦠꦶ ꦮꦺꦢꦶꦠꦧ꧀ꦧꦴ. ꦠꦠ꧀ꦫꦴꦪꦁ ꦨꦶꦏ꧀ꦑꦸ ꦤꦮꦲꦴꦏꦴꦫꦺꦲꦶ ꦢꦷꦓꦁ ꦄꦱ꧀ꦱꦱꦤ꧀ꦠꦺꦴ ꦕ ꦥꦱ꧀ꦱꦱꦤ꧀ꦠꦺꦴ ꦕ ‘‘ꦢꦷꦓꦁ ꦄꦱ꧀ꦱꦱꦴꦩꦶ ꦥꦱ꧀ꦱꦱꦴꦩꦷ’’ꦠꦶ ꦥꦗꦴꦤꦴꦠꦶ. ꦌꦮꦁ ꦥꦗꦴꦤꦠꦺꦴ ꦕꦱ꧀ꦱ ꦌꦏꦺꦤꦴꦏꦴꦫꦺꦤ ꦏꦴꦪꦴꦤꦸꦥꦱ꧀ꦱꦤꦴꦱꦠꦶꦥꦛ꧀ꦜꦴꦤꦨꦴꦮꦤꦴ ꦱꦩ꧀ꦥꦗ꧀ꦗꦠꦷꦠꦶ ꦮꦺꦢꦶꦠꦧ꧀ꦧꦴ. ꦪꦡꦴꦲ ꦥꦛꦶꦱꦩ꧀ꦨꦶꦢꦴꦪꦁ –

‘‘ꦏꦡꦁ ꦢꦷꦓꦁ ꦄꦱ꧀ꦱꦱꦤ꧀ꦠꦺꦴ ‘ꦢꦷꦓꦁ ꦄꦱ꧀ꦱꦱꦴꦩꦷ’ꦠꦶ ꦥꦗꦴꦤꦴꦠꦶ, ꦢꦷꦓꦁ ꦥꦱ꧀ꦱꦱꦤ꧀ꦠꦺꦴ ‘ꦢꦷꦓꦁ ꦥꦱ꧀ꦱꦱꦴꦩꦷ’ꦠꦶ ꦥꦗꦴꦤꦴꦠꦶ? ꦢꦷꦓꦁ ꦄꦱ꧀ꦱꦴꦱꦁ ꦄꦢ꧀ꦣꦴꦤꦱꦔ꧀ꦑꦴꦠꦺ ꦄꦱ꧀ꦱꦱꦠꦶ, ꦢꦷꦓꦁ ꦥꦱ꧀ꦱꦴꦱꦁ ꦄꦢ꧀ꦣꦴꦤꦱꦔ꧀ꦑꦴꦠꦺ ꦥꦱ꧀ꦱꦱꦠꦶ, ꦢꦷꦓꦁ ꦄꦱ꧀ꦱꦴꦱꦥꦱ꧀ꦱꦴꦱꦁ ꦄꦢ꧀ꦣꦴꦤꦱꦔ꧀ꦑꦴꦠꦺ ꦄꦱ꧀ꦱꦱꦠꦶꦥꦶ ꦥꦱ꧀ꦱꦱꦠꦶꦥꦶ. ꦢꦷꦓꦁ ꦄꦱ꧀ꦱꦴꦱꦥꦱ꧀ꦱꦴꦱꦁ ꦄꦢ꧀ꦣꦴꦤꦱꦔ꧀ꦑꦴꦠꦺ ꦄꦱ꧀ꦱꦱꦠꦺꦴꦥꦶ ꦥꦱ꧀ꦱꦱꦠꦺꦴꦥꦶ ꦖꦤ꧀ꦢꦺꦴ ꦈꦥ꧀ꦥꦗ꧀ꦗꦠꦶ; ꦖꦤ꧀ꦢꦮꦱꦺꦤ ꦠꦠꦺꦴ ꦱꦸꦑꦸꦩꦠꦫꦁ ꦢꦷꦓꦁ ꦄꦱ꧀ꦱꦴꦱꦁ ꦄꦢ꧀ꦣꦴꦤꦱꦔ꧀ꦑꦴꦠꦺ ꦄꦱ꧀ꦱꦱꦠꦶ, ꦖꦤ꧀ꦢꦮꦱꦺꦤ ꦠꦠꦺꦴ ꦱꦸꦑꦸꦩꦠꦫꦁ ꦢꦷꦓꦁ ꦥꦱ꧀ꦱꦴꦱꦁ ꦄꦢ꧀ꦣꦴꦤꦱꦔ꧀ꦑꦴꦠꦺ ꦥꦱ꧀ꦱꦱꦠꦶ, ꦖꦤ꧀ꦢꦮꦱꦺꦤ ꦠꦠꦺꦴ ꦱꦸꦑꦸꦩꦠꦫꦁ ꦢꦷꦓꦁ ꦄꦱ꧀ꦱꦴꦱꦥꦱ꧀ꦱꦴꦱꦁ ꦄꦢ꧀ꦣꦴꦤꦱꦔ꧀ꦑꦴꦠꦺ ꦄꦱ꧀ꦱꦱꦠꦶꦥꦶ ꦥꦱ꧀ꦱꦱꦠꦶꦥꦶ. ꦖꦤ꧀ꦢꦮꦱꦺꦤ ꦠꦠꦺꦴ ꦱꦸꦑꦸꦩꦠꦫꦁ ꦢꦷꦓꦁ ꦄꦱ꧀ꦱꦴꦱꦥꦱ꧀ꦱꦴꦱꦁ ꦄꦢ꧀ꦣꦴꦤꦱꦔ꧀ꦑꦴꦠꦺ ꦄꦱ꧀ꦱꦱꦠꦺꦴꦥꦶ ꦥꦱ꧀ꦱꦱꦠꦺꦴꦥꦶ ꦥꦴꦩꦺꦴꦗ꧀ꦗꦁ ꦈꦥ꧀ꦥꦗ꧀ꦗꦠꦶ; ꦥꦴꦩꦺꦴꦗ꧀ꦗꦮꦱꦺꦤ ꦠꦠꦺꦴ ꦱꦸꦑꦸꦩꦠꦫꦁ ꦢꦷꦓꦁ ꦄꦱ꧀ꦱꦴꦱꦁ ꦄꦢ꧀ꦣꦴꦤꦱꦔ꧀ꦑꦴꦠꦺ ꦄꦱ꧀ꦱꦱꦠꦶ, ꦥꦴꦩꦺꦴꦗ꧀ꦗꦮꦱꦺꦤ ꦠꦠꦺꦴ ꦱꦸꦑꦸꦩꦠꦫꦁ ꦢꦷꦓꦁ ꦥꦱ꧀ꦱꦴꦱꦁ…ꦥꦺ… ꦢꦷꦓꦁ ꦄꦱ꧀ꦱꦴꦱꦥꦱ꧀ꦱꦴꦱꦁ ꦄꦢ꧀ꦣꦴꦤꦱꦔ꧀ꦑꦴꦠꦺ ꦄꦱ꧀ꦱꦱꦠꦶꦥꦶ ꦥꦱ꧀ꦱꦱꦠꦶꦥꦶ. ꦥꦴꦩꦺꦴꦗ꧀ꦗꦮꦱꦺꦤ ꦠꦠꦺꦴ ꦱꦸꦑꦸꦩꦠꦫꦁ ꦢꦷꦓꦁ ꦄꦱ꧀ꦱꦴꦱꦥꦱ꧀ꦱꦴꦱꦁ ꦄꦢ꧀ꦣꦴꦤꦱꦔ꧀ꦑꦴꦠꦺ ꦄꦱ꧀ꦱꦱꦠꦺꦴꦥꦶ ꦥꦱ꧀ꦱꦱꦠꦺꦴꦥꦶ ꦢꦷꦓꦁ ꦄꦱ꧀ꦱꦴꦱꦥꦱ꧀ꦱꦴꦱꦴ ꦕꦶꦠ꧀ꦠꦁ ꦮꦶꦮꦠ꧀ꦠꦠꦶ, ꦈꦥꦺꦏ꧀ꦑꦴ ꦱꦟ꧀ꦜꦴꦠꦶ. ꦆꦩꦺꦲꦶ ꦤꦮꦲꦶ ꦄꦴꦏꦴꦫꦺꦲꦶ ꦢꦷꦓꦁ ꦄꦱ꧀ꦱꦴꦱꦥꦱ꧀ꦱꦴꦱꦴ ꦏꦴꦪꦺꦴ; ꦈꦥꦛ꧀ꦜꦴꦤꦁ ꦱꦠꦶ; ꦄꦤꦸꦥꦱ꧀ꦱꦤꦴ ꦚꦴꦟꦁ; ꦏꦴꦪꦺꦴ ꦈꦥꦛ꧀ꦜꦴꦤꦁ, ꦤꦺꦴ ꦱꦠꦶ; ꦱꦠꦶ ꦈꦥꦛ꧀ꦜꦴꦤꦚ꧀ꦕꦺꦮ ꦱꦠꦶ ꦕ. ꦠꦴꦪ ꦱꦠꦶꦪꦴ ꦠꦺꦤ ꦚꦴꦟꦺꦤ ꦠꦁ ꦏꦴꦪꦁ ꦄꦤꦸꦥꦱ꧀ꦱꦠꦶ. ꦠꦺꦤ ꦮꦸꦕ꧀ꦕꦠꦶ – ‘‘ꦏꦴꦪꦺ ꦏꦴꦪꦴꦤꦸꦥꦱ꧀ꦱꦤꦴꦱꦠꦶꦥꦛ꧀ꦜꦴꦤꦨꦴꦮꦤꦴ’’ꦠꦶ (ꦥꦛꦶ. ꦩ. ꧑.꧑꧖꧖).

ꦌꦱꦺꦮ ꦤꦪꦺꦴ ꦫꦱ꧀ꦱꦥꦢꦺꦥꦶ. ꦄꦪꦁ ꦥꦤ ꦮꦶꦱꦺꦱꦺꦴ – ‘‘ꦪꦡꦴ ꦌꦠ꧀ꦡ ‘ꦢꦷꦓꦁ ꦄꦱ꧀ꦱꦴꦱꦁ ꦄꦢ꧀ꦣꦴꦤꦱꦔ꧀ꦑꦴꦠꦺ’ꦠꦶ ꦮꦸꦠ꧀ꦠꦁ; ꦌꦮꦩꦶꦣ ‘ꦫꦱ꧀ꦱꦁ ꦄꦱ꧀ꦱꦴꦱꦁ ꦆꦠ꧀ꦠꦫꦱꦔ꧀ꦑꦴꦠꦺ ꦄꦱ꧀ꦱꦱꦠꦷ’’ꦠꦶ ꦄꦴꦒꦠꦁ. ꦠꦱ꧀ꦩꦴ ꦠꦱ꧀ꦱ ꦮꦱꦺꦤ ꦪꦴꦮ ‘‘ꦠꦺꦤ ꦮꦸꦕ꧀ꦕꦠꦶ ꦏꦴꦪꦺ ꦏꦴꦪꦴꦤꦸꦥꦱ꧀ꦱꦤꦴꦱꦠꦶꦥꦛ꧀ꦜꦴꦤꦨꦴꦮꦤꦴ’’ꦠꦶ ꦠꦴꦮ ꦪꦺꦴꦗꦺꦠꦧ꧀ꦧꦁ. ꦌꦮꦩꦪꦁ ꦄꦢ꧀ꦣꦴꦤꦮꦱꦺꦤ ꦆꦠ꧀ꦠꦫꦮꦱꦺꦤ ꦕ ꦆꦩꦺꦲꦴꦏꦴꦫꦺꦲꦶ ꦄꦱ꧀ꦱꦴꦱꦥꦱ꧀ꦱꦴꦱꦺ ꦥꦗꦴꦤꦤ꧀ꦠꦺꦴ ꦢꦷꦓꦁ ꦮꦴ ꦄꦱ꧀ꦱꦱꦤ꧀ꦠꦺꦴ ‘‘ꦢꦷꦓꦁ ꦄꦱ꧀ꦱꦱꦴꦩꦷ’’ꦠꦶ ꦥꦗꦴꦤꦴꦠꦶ…ꦥꦺ… ꦫꦱ꧀ꦱꦁ ꦮꦴ ꦥꦱ꧀ꦱꦱꦤ꧀ꦠꦺꦴ ‘‘ꦫꦱ꧀ꦱꦁ ꦥꦱ꧀ꦱꦱꦴꦩꦷ’’ꦠꦶ ꦥꦗꦴꦤꦴꦠꦷꦠꦶ ꦮꦺꦢꦶꦠꦧ꧀ꦧꦺꦴ.

ꦌꦮꦁ ꦥꦗꦴꦤꦠꦺꦴ ꦕꦱ꧀ꦱ –

‘‘ꦢꦷꦓꦺꦴ ꦫꦱ꧀ꦱꦺꦴ ꦕ ꦄꦱ꧀ꦱꦴꦱꦺꦴ;

ꦥꦱ꧀ꦱꦴꦱꦺꦴꦥꦶ ꦕ ꦠꦴꦢꦶꦱꦺꦴ;

ꦕꦠ꧀ꦠꦴꦫꦺꦴ ꦮꦟ꧀ꦟꦴ ꦮꦠ꧀ꦠꦤ꧀ꦠꦶ;

ꦤꦴꦱꦶꦏꦒ꧀ꦒꦺꦮ ꦨꦶꦏ꧀ꦑꦸꦤꦺꦴ’’ꦠꦶ. (ꦮꦶꦱꦸꦢ꧀ꦣꦶ. ꧑.꧒꧑꧙; ꦥꦛꦶ. ꦩ. ꦄꦛ꧀ꦜ. ꧒.꧑.꧑꧖꧓);

ꦱꦧ꧀ꦧꦏꦴꦪꦥ꧀ꦥꦛꦶꦱꦁꦮꦺꦢꦷ ꦄꦱ꧀ꦱꦱꦶꦱ꧀ꦱꦴꦩꦶ…ꦥꦺ… ꦥꦱ꧀ꦱꦱꦶꦱ꧀ꦱꦴꦩꦷꦠꦶ ꦱꦶꦏ꧀ꦑꦠꦷꦠꦶ ꦱꦏꦭꦱ꧀ꦱ ꦄꦱ꧀ꦱꦴꦱꦏꦴꦪꦱ꧀ꦱ ꦄꦴꦢꦶꦩꦗ꧀ꦙꦥꦫꦶꦪꦺꦴꦱꦴꦤꦁ ꦮꦶꦢꦶꦠꦁ ꦏꦫꦺꦴꦤ꧀ꦠꦺꦴ ꦥꦴꦏꦛꦁ ꦏꦫꦺꦴꦤ꧀ꦠꦺꦴ ‘‘ꦄꦱ꧀ꦱꦱꦶꦱ꧀ꦱꦴꦩꦷ’’ꦠꦶ ꦱꦶꦏ꧀ꦑꦠꦶ. ꦱꦏꦭꦱ꧀ꦱ ꦥꦱ꧀ꦱꦴꦱꦏꦴꦪꦱ꧀ꦱ ꦄꦴꦢꦶꦩꦗ꧀ꦙꦥꦫꦶꦪꦺꦴꦱꦴꦤꦁ ꦮꦶꦢꦶꦠꦁ ꦏꦫꦺꦴꦤ꧀ꦠꦺꦴ ꦥꦴꦏꦛꦁ ꦏꦫꦺꦴꦤ꧀ꦠꦺꦴ ‘‘ꦥꦱ꧀ꦱꦱꦶꦱ꧀ꦱꦴꦩꦷ’’ꦠꦶ ꦱꦶꦏ꧀ꦑꦠꦶ. ꦌꦮꦁ ꦮꦶꦢꦶꦠꦁ ꦏꦫꦺꦴꦤ꧀ꦠꦺꦴ ꦥꦴꦏꦛꦁ ꦏꦫꦺꦴꦤ꧀ꦠꦺꦴ ꦚꦴꦟꦱꦩ꧀ꦥꦪꦸꦠ꧀ꦠꦕꦶꦠ꧀ꦠꦺꦤ ꦄꦱ꧀ꦱꦱꦠꦶ ꦕꦺꦮ ꦥꦱ꧀ꦱꦱꦠꦶ ꦕ; ꦠꦱ꧀ꦩꦴ ‘‘ꦄꦱ꧀ꦱꦱꦶꦱ꧀ꦱꦴꦩꦶ ꦥꦱ꧀ꦱꦱꦶꦱ꧀ꦱꦴꦩꦷ’’ꦠꦶ ꦱꦶꦏ꧀ꦑꦠꦷꦠꦶ ꦮꦸꦕ꧀ꦕꦠꦶ. ꦌꦏꦱ꧀ꦱ ꦲꦶ ꦨꦶꦏ꧀ꦑꦸꦤꦺꦴ ꦕꦸꦟ꧀ꦟꦮꦶꦕꦸꦟ꧀ꦟꦮꦶꦱꦛꦺ ꦄꦱ꧀ꦱꦴꦱꦏꦴꦪꦺ ꦥꦱ꧀ꦱꦴꦱꦏꦴꦪꦺ ꦮꦴ ꦄꦴꦢꦶ ꦥꦴꦏꦛꦺꦴ ꦲꦺꦴꦠꦶ, ꦤ ꦩꦗ꧀ꦙꦥꦫꦶꦪꦺꦴꦱꦴꦤꦁ. ꦱꦺꦴ ꦄꦴꦢꦶꦩꦺꦮ ꦥꦫꦶꦒ꧀ꦒꦲꦺꦠꦸꦁ ꦱꦏ꧀ꦏꦺꦴꦠꦶ, ꦩꦗ꧀ꦙꦥꦫꦶꦪꦺꦴꦱꦴꦤꦺ ꦏꦶꦭꦩꦠꦶ. ꦌꦏꦱ꧀ꦱ ꦩꦗ꧀ꦙꦁ ꦥꦴꦏꦛꦁ ꦲꦺꦴꦠꦶ, ꦤ ꦄꦴꦢꦶꦥꦫꦶꦪꦺꦴꦱꦴꦤꦁ. ꦱꦺꦴ ꦩꦗ꧀ꦙꦩꦺꦮ ꦥꦫꦶꦒ꧀ꦒꦲꦺꦠꦸꦁ ꦱꦏ꧀ꦏꦺꦴꦠꦶ, ꦄꦴꦢꦶꦥꦫꦶꦪꦺꦴꦱꦴꦤꦺ ꦏꦶꦭꦩꦠꦶ. ꦌꦏꦱ꧀ꦱ ꦥꦫꦶꦪꦺꦴꦱꦴꦤꦁ ꦥꦴꦏꦛꦁ ꦲꦺꦴꦠꦶ, ꦤ ꦄꦴꦢꦶꦩꦗ꧀ꦙꦁ. ꦱꦺꦴ ꦥꦫꦶꦪꦺꦴꦱꦴꦤꦁꦪꦺꦮ ꦥꦫꦶꦒ꧀ꦒꦲꦺꦠꦸꦁ ꦱꦏ꧀ꦏꦺꦴꦠꦶ, ꦄꦴꦢꦶꦩꦗ꧀ꦙꦺ ꦏꦶꦭꦩꦠꦶ. ꦌꦏꦱ꧀ꦱ ꦱꦧ꧀ꦧꦩ꧀ꦥꦶ ꦥꦴꦏꦛꦁ ꦲꦺꦴꦠꦶ, ꦱꦺꦴ ꦱꦧ꧀ꦧꦩ꧀ꦥꦶ ꦥꦫꦶꦒ꧀ꦒꦲꦺꦠꦸꦁ ꦱꦏ꧀ꦏꦺꦴꦠꦶ, ꦤ ꦏꦠ꧀ꦡꦕꦶ ꦏꦶꦭꦩꦠꦶ. ꦠꦴꦢꦶꦱꦺꦤ ꦨꦮꦶꦠꦧ꧀ꦧꦤ꧀ꦠꦶ ꦢꦱ꧀ꦱꦺꦤ꧀ꦠꦺꦴ ꦄꦴꦲ – ‘‘ꦱꦧ꧀ꦧꦏꦴꦪꦥ꧀ꦥꦛꦶꦱꦁꦮꦺꦢꦷ ꦄꦱ꧀ꦱꦱꦶꦱ꧀ꦱꦴꦩꦶ…ꦥꦺ… ꦥꦱ꧀ꦱꦱꦶꦱ꧀ꦱꦴꦩꦷꦠꦶ ꦱꦶꦏ꧀ꦑꦠꦷ’’ꦠꦶ.

ꦠꦠ꧀ꦡ ꦱꦶꦏ꧀ꦑꦠꦷꦠꦶ ꦌꦮꦁ ꦓꦛꦠꦶ ꦮꦴꦪꦩꦠꦶ. ꦪꦺꦴ ꦮꦴ ꦠꦡꦴꦨꦹꦠꦱ꧀ꦱ ꦱꦁꦮꦫꦺꦴ; ꦄꦪꦩꦺꦠ꧀ꦡ ꦄꦣꦶꦱꦷꦭꦱꦶꦏ꧀ꦑꦴ. ꦪꦺꦴ ꦠꦡꦴꦨꦹꦠꦱ꧀ꦱ ꦱꦩꦴꦣꦶ; ꦄꦪꦁ ꦄꦣꦶꦕꦶꦠ꧀ꦠꦱꦶꦏ꧀ꦑꦴ. ꦪꦴ ꦠꦡꦴꦨꦹꦠꦱ꧀ꦱ ꦥꦚ꧀ꦚꦴ; ꦄꦪꦁ ꦄꦣꦶꦥꦚ꧀ꦚꦴꦱꦶꦏ꧀ꦑꦴꦠꦶ. ꦆꦩꦴ ꦠꦶꦱ꧀ꦱꦺꦴ ꦱꦶꦏ꧀ꦑꦴꦪꦺꦴ ꦠꦱ꧀ꦩꦶꦁ ꦄꦴꦫꦩ꧀ꦩꦟꦺ ꦠꦴꦪ ꦱꦠꦶꦪꦴ ꦠꦺꦤ ꦩꦤꦱꦶꦏꦴꦫꦺꦤ ꦱꦶꦏ꧀ꦑꦠꦶ ꦄꦴꦱꦺꦮꦠꦶ ꦨꦴꦮꦺꦠꦶ ꦧꦲꦸꦭꦷꦏꦫꦺꦴꦠꦷꦠꦶ ꦌꦮꦩꦺꦠ꧀ꦡ ꦄꦠ꧀ꦡꦺꦴ ꦢꦛ꧀ꦜꦧ꧀ꦧꦺꦴ. ꦠꦠ꧀ꦡ ꦪꦱ꧀ꦩꦴ ꦥꦸꦫꦶꦩꦤꦪꦺ ꦏꦺꦮꦭꦁ ꦄꦱ꧀ꦱꦱꦶꦠꦧ꧀ꦧꦁ ꦥꦱ꧀ꦱꦱꦶꦠꦧ꧀ꦧꦩꦺꦮ ꦕ, ꦤ ꦄꦚ꧀ꦚꦁ ꦏꦶꦚ꧀ꦕꦶ ꦏꦴꦠꦧ꧀ꦧꦁ; ꦆꦠꦺꦴ ꦥꦛ꧀ꦜꦴꦪ ꦥꦤ ꦚꦴꦟꦸꦥ꧀ꦥꦴꦢꦤꦴꦢꦷꦱꦸ ꦪꦺꦴꦒꦺꦴ ꦏꦫꦟꦷꦪꦺꦴ. ꦠꦱ꧀ꦩꦴ ꦠꦠ꧀ꦡ ‘‘ꦄꦱ꧀ꦱꦱꦴꦩꦷꦠꦶ ꦥꦗꦴꦤꦴꦠꦶ ꦥꦱ꧀ꦱꦱꦴꦩꦷꦠꦶ ꦥꦗꦴꦤꦴꦠꦶ’’ꦕ꧀ꦕꦺꦮ ꦮꦠ꧀ꦠꦩꦴꦤꦏꦴꦭꦮꦱꦺꦤ ꦥꦴꦭ꦳ꦶꦁ ꦮꦠ꧀ꦮꦴ ꦆꦠꦺꦴ ꦥꦛ꧀ꦜꦴꦪ ꦏꦠ꧀ꦠꦧ꧀ꦧꦱ꧀ꦱ ꦚꦴꦟꦸꦥ꧀ꦥꦴꦢꦤꦴꦢꦶꦤꦺꦴ ꦄꦴꦏꦴꦫꦱ꧀ꦱ ꦢꦱ꧀ꦱꦤꦠ꧀ꦡꦁ ‘‘ꦱꦧ꧀ꦧꦏꦴꦪꦥ꧀ꦥꦛꦶꦱꦁꦮꦺꦢꦷ ꦄꦱ꧀ꦱꦱꦶꦱ꧀ꦱꦴꦩꦷ’’ꦠꦶꦄꦴꦢꦶꦤꦴ ꦤꦪꦺꦤ ꦄꦤꦴꦒꦠꦮꦕꦤꦮꦱꦺꦤ ꦥꦴꦭ꦳ꦶ ꦄꦴꦫꦺꦴꦥꦶꦠꦴꦠꦶ ꦮꦺꦢꦶꦠꦧ꧀ꦧꦴ.

ꦥꦱ꧀ꦱꦩ꧀ꦨꦪꦁ ꦏꦴꦪꦱꦔ꧀ꦑꦴꦫꦁ ꦄꦱ꧀ꦱꦱꦶꦱ꧀ꦱꦴꦩꦶ…ꦥꦺ… ꦥꦱ꧀ꦱꦱꦶꦱ꧀ꦱꦴꦩꦷꦠꦶ ꦱꦶꦏ꧀ꦑꦠꦷꦠꦶ ꦎꦭ꦳ꦴꦫꦶꦏꦁ ꦏꦴꦪꦱꦔ꧀ꦑꦴꦫꦁ ꦥꦱ꧀ꦱꦩ꧀ꦨꦺꦤ꧀ꦠꦺꦴ ꦥꦛꦶꦥ꧀ꦥꦱ꧀ꦱꦩ꧀ꦨꦺꦤ꧀ꦠꦺꦴ ꦤꦶꦫꦺꦴꦣꦺꦤ꧀ꦠꦺꦴ ꦮꦹꦥꦱꦩꦺꦤ꧀ꦠꦺꦴ ꦄꦱ꧀ꦱꦱꦶꦱ꧀ꦱꦴꦩꦶ ꦥꦱ꧀ꦱꦱꦶꦱ꧀ꦱꦴꦩꦷꦠꦶ ꦱꦶꦏ꧀ꦑꦠꦶ.

ꦠꦠ꧀ꦫꦺꦮꦁ ꦎꦭ꦳ꦴꦫꦶꦏꦱꦸꦑꦸꦩꦠꦴ ꦕ ꦥꦱ꧀ꦱꦢ꧀ꦣꦶ ꦕ ꦮꦺꦢꦶꦠꦧ꧀ꦧꦴ. ꦆꦩꦱ꧀ꦱ ꦲꦶ ꦨꦶꦏ꧀ꦑꦸꦤꦺꦴ ꦥꦸꦧ꧀ꦧꦺ ꦄꦥꦫꦶꦒ꧀ꦒꦲꦶꦠꦏꦴꦭꦺ ꦏꦴꦪꦺꦴ ꦕ ꦕꦶꦠ꧀ꦠꦚ꧀ꦕ ꦱꦢꦫꦡꦴ ꦲꦺꦴꦤ꧀ꦠꦶ. ꦎꦭ꦳ꦴꦫꦶꦏꦴꦤꦁ ꦏꦴꦪꦕꦶꦠ꧀ꦠꦴꦤꦁ ꦎꦭ꦳ꦴꦫꦶꦏꦠ꧀ꦠꦺ ꦄꦮꦹꦥꦱꦤ꧀ꦠꦺ ꦄꦱ꧀ꦱꦴꦱꦥꦱ꧀ꦱꦴꦱꦴꦥꦶ ꦎꦭ꦳ꦴꦫꦶꦏꦴ ꦲꦺꦴꦤ꧀ꦠꦶ, ꦧꦭꦮꦠꦫꦴ ꦲꦸꦠ꧀ꦮꦴ ꦥꦮꦠ꧀ꦠꦤ꧀ꦠꦶ, ꦤꦴꦱꦶꦏꦴ ꦤꦥ꧀ꦥꦲꦺꦴꦠꦶ, ꦩꦸꦑꦺꦤ ꦄꦱ꧀ꦱꦱꦤ꧀ꦠꦺꦴꦥꦶ ꦥꦱ꧀ꦱꦱꦤ꧀ꦠꦺꦴꦥꦶ ꦠꦶꦛ꧀ꦜꦠꦶ. ꦪꦢꦴ ꦥꦤꦱ꧀ꦱ ꦏꦴꦪꦺꦴꦥꦶ ꦕꦶꦠ꧀ꦠꦩ꧀ꦥꦶ ꦥꦫꦶꦒ꧀ꦒꦲꦶꦠꦴ ꦲꦺꦴꦤ꧀ꦠꦶ, ꦠꦢꦴ ꦠꦺ ꦱꦤ꧀ꦠꦴ ꦲꦺꦴꦤ꧀ꦠꦶ ꦮꦹꦥꦱꦤ꧀ꦠꦴ. ꦠꦺꦱꦸ ꦮꦹꦥꦱꦤ꧀ꦠꦺꦱꦸ ꦄꦱ꧀ꦱꦴꦱꦥꦱ꧀ꦱꦴꦱꦴ ꦱꦸꦑꦸꦩꦴ ꦲꦸꦠ꧀ꦮꦴ ꦥꦮꦠ꧀ꦠꦤ꧀ꦠꦶ, ‘‘ꦄꦠ꧀ꦡꦶ ꦤꦸ ꦑꦺꦴ ꦤꦠ꧀ꦡꦷ’’ꦠꦶ ꦮꦶꦕꦺꦠꦧ꧀ꦧꦴꦏꦴꦫꦥ꧀ꦥꦠ꧀ꦠꦴ ꦲꦺꦴꦤ꧀ꦠꦶ. ꦱꦺꦪ꧀ꦪꦡꦴꦥꦶ ꦥꦸꦫꦶꦱꦱ꧀ꦱ ꦣꦴꦮꦶꦠ꧀ꦮꦴ ꦥꦧ꧀ꦧꦠꦴ ꦮꦴ ꦎꦫꦺꦴꦲꦶꦠ꧀ꦮꦴ ꦩꦲꦴꦨꦴꦫꦁ ꦮꦴ ꦱꦷꦱꦠꦺꦴ ꦎꦫꦺꦴꦥꦺꦠ꧀ꦮꦴ ꦜꦶꦠꦱ꧀ꦱ ꦎꦭ꦳ꦴꦫꦶꦏꦴ ꦄꦱ꧀ꦱꦴꦱꦥꦱ꧀ꦱꦴꦱꦴ ꦲꦺꦴꦤ꧀ꦠꦶ, ꦤꦴꦱꦶꦏꦴ ꦤꦥ꧀ꦥꦲꦺꦴꦠꦶ, ꦩꦸꦑꦺꦤ ꦄꦱ꧀ꦱꦱꦤ꧀ꦠꦺꦴꦥꦶ ꦥꦱ꧀ꦱꦱꦤ꧀ꦠꦺꦴꦥꦶ ꦠꦶꦛ꧀ꦜꦠꦶ. ꦪꦢꦴ ꦥꦤꦺꦱ ꦠꦁ ꦥꦫꦶꦱ꧀ꦱꦩꦁ ꦮꦶꦤꦺꦴꦢꦺꦠ꧀ꦮꦴ ꦤ꧀ꦲꦠ꧀ꦮꦴ ꦕ ꦥꦶꦮꦶꦠ꧀ꦮꦴ ꦕ ꦄꦭ꧀ꦭꦱꦴꦛꦏꦁ ꦲꦢꦪꦺ ꦏꦠ꧀ꦮꦴ ꦱꦷꦠꦴꦪ ꦖꦴꦪꦴꦪ ꦤꦶꦥꦤ꧀ꦤꦺꦴ ꦲꦺꦴꦠꦶ, ꦄꦡꦱ꧀ꦱ ꦠꦺ ꦄꦱ꧀ꦱꦴꦱꦥꦱ꧀ꦱꦴꦱꦴ ꦱꦸꦑꦸꦩꦴ ꦲꦺꦴꦤ꧀ꦠꦶ, ‘‘ꦄꦠ꧀ꦡꦶ ꦤꦸ ꦑꦺꦴ ꦤꦠ꧀ꦡꦷ’’ꦠꦶ ꦮꦶꦕꦺꦠꦧ꧀ꦧꦴꦏꦴꦫꦥ꧀ꦥꦠ꧀ꦠꦴ. ꦌꦮꦩꦺꦮ ꦆꦩꦱ꧀ꦱ ꦨꦶꦏ꧀ꦑꦸꦤꦺꦴ ꦥꦸꦧ꧀ꦧꦺ ꦄꦥꦫꦶꦒ꧀ꦒꦲꦶꦠꦏꦴꦭꦺ ꦏꦴꦪꦺꦴ ꦕ…ꦥꦺ… ꦮꦶꦕꦺꦠꦧ꧀ꦧꦴꦏꦴꦫꦥ꧀ꦥꦠ꧀ꦠꦴ ꦲꦺꦴꦤ꧀ꦠꦶ. ꦠꦁ ꦏꦶꦱ꧀ꦱ ꦲꦺꦠꦸ? ꦠꦡꦴ ꦲꦶꦱ꧀ꦱ ꦥꦸꦧ꧀ꦧꦺ ꦄꦥꦫꦶꦒ꧀ꦒꦲꦶꦠꦏꦴꦭꦺ ‘‘ꦎꦭ꦳ꦴꦫꦶꦏꦺꦴꦭ꦳ꦴꦫꦶꦏꦺ ꦏꦴꦪꦱꦔ꧀ꦑꦴꦫꦺ ꦥꦱ꧀ꦱꦩ꧀ꦨꦺꦩꦷ’’ꦠꦶ ꦄꦴꦨꦺꦴꦒꦱꦩꦤ꧀ꦤꦴꦲꦴꦫꦩꦤꦱꦶꦏꦴꦫꦥꦕ꧀ꦕꦮꦺꦏ꧀ꦑꦟꦴ ꦤꦠ꧀ꦡꦶ, ꦥꦫꦶꦒ꧀ꦒꦲꦶꦠꦏꦴꦭꦺ ꦥꦤ ꦄꦠ꧀ꦡꦶ. ꦠꦺꦤꦱ꧀ꦱ ꦄꦥꦫꦶꦒ꧀ꦒꦲꦶꦠꦏꦴꦭꦠꦺꦴ ꦥꦫꦶꦒ꧀ꦒꦲꦶꦠꦏꦴꦭꦺ ꦏꦴꦪꦱꦔ꧀ꦑꦴꦫꦺꦴ ꦱꦸꦑꦸꦩꦺꦴ ꦲꦺꦴꦠꦶ. ꦠꦺꦤꦴꦲꦸ ꦥꦺꦴꦫꦴꦟꦴ –

‘‘ꦱꦴꦫꦢ꧀ꦣꦺ ꦏꦴꦪꦺ ꦕꦶꦠ꧀ꦠꦺ ꦕ, ꦄꦣꦶꦩꦠ꧀ꦠꦁ ꦥꦮꦠ꧀ꦠꦠꦶ;

ꦄꦱꦴꦫꦢ꧀ꦣꦩ꧀ꦲꦶ ꦏꦴꦪꦩ꧀ꦲꦶ, ꦱꦸꦑꦸꦩꦁ ꦱꦩ꧀ꦥꦮꦠ꧀ꦠꦠꦷ’’ꦠꦶ. (ꦮꦶꦱꦸꦢ꧀ꦣꦶ. ꧑.꧒꧒꧐; ꦥꦛꦶ. ꦩ. ꦄꦛ꧀ꦜ. ꧒.꧑.꧑꧖꧓);

ꦥꦫꦶꦒ꧀ꦒꦲꦺꦥꦶ ꦎꦭ꦳ꦴꦫꦶꦏꦺꦴ, ꦥꦜꦩꦗ꧀ꦙꦴꦤꦹꦥꦕꦴꦫꦺ ꦱꦸꦑꦸꦩꦺꦴ; ꦠꦱ꧀ꦩꦶꦩ꧀ꦥꦶ ꦎꦭ꦳ꦴꦫꦶꦏꦺꦴ ꦥꦜꦩꦗ꧀ꦙꦴꦤꦺ ꦱꦸꦑꦸꦩꦺꦴ. ꦥꦜꦩꦗ꧀ꦙꦴꦤꦺ ꦕ ꦢꦸꦠꦶꦪꦗ꧀ꦙꦴꦤꦹꦥꦕꦴꦫꦺ ꦕ ꦎꦭ꦳ꦴꦫꦶꦏꦺꦴ, ꦢꦸꦠꦶꦪꦗ꧀ꦙꦴꦤꦺ ꦱꦸꦑꦸꦩꦺꦴ. ꦢꦸꦠꦶꦪꦗ꧀ꦙꦴꦤꦺ ꦕ ꦠꦠꦶꦪꦗ꧀ꦙꦴꦤꦹꦥꦕꦴꦫꦺ ꦕ ꦎꦭ꦳ꦴꦫꦶꦏꦺꦴ, ꦠꦠꦶꦪꦗ꧀ꦙꦴꦤꦺ ꦱꦸꦑꦸꦩꦺꦴ. ꦠꦠꦶꦪꦗ꧀ꦙꦴꦤꦺ ꦕ ꦕꦠꦸꦠ꧀ꦡꦗ꧀ꦙꦴꦤꦹꦥꦕꦴꦫꦺ ꦕ ꦎꦭ꦳ꦴꦫꦶꦏꦺꦴ, ꦕꦠꦸꦠ꧀ꦡꦗ꧀ꦙꦴꦤꦺ ꦄꦠꦶꦱꦸꦑꦸꦩꦺꦴ ꦄꦥ꧀ꦥꦮꦠ꧀ꦠꦶꦩꦺꦮ ꦥꦴꦥꦸꦟꦴꦠꦶ. ꦆꦢꦁ ꦠꦴꦮ ꦢꦷꦓꦨꦴꦟꦏꦱꦁꦪꦸꦠ꧀ꦠꦨꦴꦟꦏꦴꦤꦁ ꦩꦠꦁ.

ꦩꦗ꧀ꦙꦶꦩꦨꦴꦟꦏꦴ ꦥꦤ ‘‘ꦥꦜꦩꦗ꧀ꦙꦴꦤꦺ ꦎꦭ꦳ꦴꦫꦶꦏꦺꦴ, ꦢꦸꦠꦶꦪꦗ꧀ꦙꦴꦤꦹꦥꦕꦴꦫꦺ ꦱꦸꦑꦸꦩꦺꦴ’’ꦠꦶ ꦌꦮꦁ ꦲꦺꦛ꧀ꦜꦶꦩꦲꦺꦛ꧀ꦜꦶꦩꦗ꧀ꦙꦴꦤꦠꦺꦴ ꦈꦥꦫꦹꦥꦫꦶꦗ꧀ꦙꦴꦤꦹꦥꦕꦴꦫꦺꦥꦶ ꦱꦸꦑꦸꦩꦠꦫꦁ ꦆꦕ꧀ꦖꦤ꧀ꦠꦶ. ꦱꦧ꧀ꦧꦺꦱꦁꦪꦺꦮ ꦥꦤ ꦩꦠꦺꦤ ꦄꦥꦫꦶꦒ꧀ꦒꦲꦶꦠꦏꦴꦭꦺ ꦥꦮꦠ꧀ꦠꦏꦴꦪꦱꦔ꧀ꦑꦴꦫꦺꦴ ꦥꦫꦶꦒ꧀ꦒꦲꦶꦠꦏꦴꦭꦺ ꦥꦛꦶꦥ꧀ꦥꦱ꧀ꦱꦩ꧀ꦨꦠꦶ, ꦥꦫꦶꦒ꧀ꦒꦲꦶꦠꦏꦴꦭꦺ ꦥꦮꦠ꧀ꦠꦏꦴꦪꦱꦔ꧀ꦑꦴꦫꦺꦴ ꦥꦜꦩꦗ꧀ꦙꦴꦤꦹꦥꦕꦴꦫꦺ…ꦥꦺ… ꦕꦠꦸꦠ꧀ꦡꦗ꧀ꦙꦴꦤꦹꦥꦕꦴꦫꦺ ꦥꦮꦠ꧀ꦠꦏꦴꦪꦱꦔ꧀ꦑꦴꦫꦺꦴ ꦕꦠꦸꦠ꧀ꦡꦗ꧀ꦙꦴꦤꦺ ꦥꦛꦶꦥ꧀ꦥꦱ꧀ꦱꦩ꧀ꦨꦠꦶ. ꦄꦪꦁ ꦠꦴꦮ ꦱꦩꦡꦺ ꦤꦪꦺꦴ.

ꦮꦶꦥꦱ꧀ꦱꦤꦴꦪꦁ ꦥꦤ ꦄꦥꦫꦶꦒ꧀ꦒꦲꦺ ꦥꦮꦠ꧀ꦠꦺꦴ ꦏꦴꦪꦱꦔ꧀ꦑꦴꦫꦺꦴ ꦎꦭ꦳ꦴꦫꦶꦏꦺꦴ, ꦩꦲꦴꦨꦹꦠꦥꦫꦶꦒ꧀ꦒꦲꦺ ꦱꦸꦑꦸꦩꦺꦴ. ꦱꦺꦴꦥꦶ ꦎꦭ꦳ꦴꦫꦶꦏꦺꦴ, ꦈꦥꦴꦢꦴꦫꦹꦥꦥꦫꦶꦒ꧀ꦒꦲꦺ ꦱꦸꦑꦸꦩꦺꦴ. ꦱꦺꦴꦥꦶ ꦎꦭ꦳ꦴꦫꦶꦏꦺꦴ, ꦱꦏꦭꦫꦹꦥꦥꦫꦶꦒ꧀ꦒꦲꦺ ꦱꦸꦑꦸꦩꦺꦴ. ꦱꦺꦴꦥꦶ ꦎꦭ꦳ꦴꦫꦶꦏꦺꦴ, ꦄꦫꦹꦥꦥꦫꦶꦒ꧀ꦒꦲꦺ ꦱꦸꦑꦸꦩꦺꦴ. ꦱꦺꦴꦥꦶ ꦎꦭ꦳ꦴꦫꦶꦏꦺꦴ, ꦫꦹꦥꦴꦫꦹꦥꦥꦫꦶꦒ꧀ꦒꦲꦺ ꦱꦸꦑꦸꦩꦺꦴ. ꦱꦺꦴꦥꦶ ꦎꦭ꦳ꦴꦫꦶꦏꦺꦴ, ꦥꦕ꧀ꦕꦪꦥꦫꦶꦒ꧀ꦒꦲꦺ ꦱꦸꦑꦸꦩꦺꦴ. ꦱꦺꦴꦥꦶ ꦎꦭ꦳ꦴꦫꦶꦏꦺꦴ, ꦱꦥ꧀ꦥꦕ꧀ꦕꦪꦤꦴꦩꦫꦹꦥꦥꦫꦶꦒ꧀ꦒꦲꦺ ꦱꦸꦑꦸꦩꦺꦴ. ꦱꦺꦴꦥꦶ ꦎꦭ꦳ꦴꦫꦶꦏꦺꦴ, ꦭꦏ꧀ꦑꦟꦴꦫꦩ꧀ꦩꦟꦶꦏꦮꦶꦥꦱ꧀ꦱꦤꦴꦪ ꦱꦸꦑꦸꦩꦺꦴ. ꦱꦺꦴꦥꦶ ꦢꦸꦧ꧀ꦧꦭꦮꦶꦥꦱ꧀ꦱꦤꦴꦪ ꦎꦭ꦳ꦴꦫꦶꦏꦺꦴ, ꦧꦭꦮꦮꦶꦥꦱ꧀ꦱꦤꦴꦪ ꦱꦸꦑꦸꦩꦺꦴ. ꦠꦠ꧀ꦡ ꦥꦸꦧ꧀ꦧꦺ ꦮꦸꦠ꧀ꦠꦤꦪꦺꦤꦺꦮ ꦥꦸꦫꦶꦩꦱ꧀ꦱ ꦥꦸꦫꦶꦩꦱ꧀ꦱ ꦥꦕ꧀ꦖꦶꦩꦺꦤ ꦥꦕ꧀ꦖꦶꦩꦺꦤ ꦥꦱ꧀ꦱꦢ꧀ꦣꦶ ꦮꦺꦢꦶꦠꦧ꧀ꦧꦴ. ꦌꦮꦩꦺꦠ꧀ꦡ ꦎꦭ꦳ꦴꦫꦶꦏꦱꦸꦑꦸꦩꦠꦴ ꦕ ꦥꦱ꧀ꦱꦢ꧀ꦣꦶ ꦕ ꦮꦺꦢꦶꦠꦧ꧀ꦧꦴ.

ꦥꦛꦶꦱꦩ꧀ꦨꦶꦢꦴꦪꦁ ꦥꦤꦱ꧀ꦱ ꦱꦢ꧀ꦣꦶꦁ ꦕꦺꦴꦢꦤꦴꦱꦺꦴꦣꦤꦴꦲꦶ ꦌꦮꦩꦠ꧀ꦡꦺꦴ ꦮꦸꦠ꧀ꦠꦺꦴ – ‘‘ꦏꦡꦁ ꦥꦱ꧀ꦱꦩ꧀ꦨꦪꦁ ꦏꦴꦪꦱꦔ꧀ꦑꦴꦫꦁ ꦄꦱ꧀ꦱꦱꦶꦱ꧀ꦱꦴꦩꦶ…ꦥꦺ… ꦥꦱ꧀ꦱꦱꦶꦱ꧀ꦱꦴꦩꦷ’’ꦠꦶ ꦱꦶꦏ꧀ꦑꦠꦶ? ꦏꦠꦩꦺ ꦏꦴꦪꦱꦔ꧀ꦑꦴꦫꦴ? ꦢꦷꦓꦁ ꦄꦱ꧀ꦱꦴꦱꦴ ꦏꦴꦪꦶꦏꦴ ꦌꦠꦺ ꦣꦩ꧀ꦩꦴ ꦏꦴꦪꦥ꧀ꦥꦛꦶꦧꦢ꧀ꦣꦴ ꦏꦴꦪꦱꦔ꧀ꦑꦴꦫꦴ, ꦠꦺ ꦏꦴꦪꦱꦔ꧀ꦑꦴꦫꦺ ꦥꦱ꧀ꦱꦩ꧀ꦨꦺꦤ꧀ꦠꦺꦴ ꦤꦶꦫꦺꦴꦣꦺꦤ꧀ꦠꦺꦴ ꦮꦹꦥꦱꦩꦺꦤ꧀ꦠꦺꦴ ꦱꦶꦏ꧀ꦑꦠꦶ. ꦢꦷꦓꦁ ꦥꦱ꧀ꦱꦴꦱꦴ ꦏꦴꦪꦶꦏꦴ ꦌꦠꦺ ꦣꦩ꧀ꦩꦴ…ꦥꦺ… ꦫꦱ꧀ꦱꦁ ꦄꦱ꧀ꦱꦴꦱꦴ…ꦥꦺ… ꦫꦱ꧀ꦱꦁ ꦥꦱ꧀ꦱꦴꦱꦴ… ꦱꦧ꧀ꦧꦏꦴꦪꦥ꧀ꦥꦛꦶꦱꦁꦮꦺꦢꦷ ꦄꦱ꧀ꦱꦴꦱꦴ… ꦱꦧ꧀ꦧꦏꦴꦪꦥ꧀ꦥꦛꦶꦱꦁꦮꦺꦢꦷ ꦥꦱ꧀ꦱꦴꦱꦴ ꦏꦴꦪꦶꦏꦴ ꦌꦠꦺ ꦣꦩ꧀ꦩꦴ ꦏꦴꦪꦥ꧀ꦥꦛꦶꦧꦢ꧀ꦣꦴ ꦏꦴꦪꦱꦔ꧀ꦑꦴꦫꦴ, ꦠꦺ ꦏꦴꦪꦱꦔ꧀ꦑꦴꦫꦺ ꦥꦱ꧀ꦱꦩ꧀ꦨꦺꦤ꧀ꦠꦺꦴ ꦤꦶꦫꦺꦴꦣꦺꦤ꧀ꦠꦺꦴ ꦮꦹꦥꦱꦩꦺꦤ꧀ꦠꦺꦴ ꦱꦶꦏ꧀ꦑꦠꦶ.

ꦪꦡꦴꦫꦹꦥꦺꦲꦶ ꦏꦴꦪꦱꦔ꧀ꦑꦴꦫꦺꦲꦶ ꦪꦴ ꦏꦴꦪꦱ꧀ꦱ ꦄꦴꦤꦩꦤꦴ ꦮꦶꦤꦩꦤꦴ ꦱꦤ꧀ꦤꦩꦤꦴ ꦥꦟꦩꦤꦴ ꦆꦚ꧀ꦗꦤꦴ ꦦꦤ꧀ꦢꦤꦴ ꦕꦭꦤꦴ ꦏꦩ꧀ꦥꦤꦴ ꦥꦱ꧀ꦱꦩ꧀ꦨꦪꦁ ꦏꦴꦪꦱꦔ꧀ꦑꦴꦫꦁ ꦄꦱ꧀ꦱꦱꦶꦱ꧀ꦱꦴꦩꦷꦠꦶ ꦱꦶꦏ꧀ꦑꦠꦶ, ꦥꦱ꧀ꦱꦩ꧀ꦨꦪꦁ ꦏꦴꦪꦱꦔ꧀ꦑꦴꦫꦁ ꦥꦱ꧀ꦱꦱꦶꦱ꧀ꦱꦴꦩꦷꦠꦶ ꦱꦶꦏ꧀ꦑꦠꦶ.

ꦪꦡꦴꦫꦹꦥꦺꦲꦶ ꦏꦴꦪꦱꦔ꧀ꦑꦴꦫꦺꦲꦶ ꦪꦴ ꦏꦴꦪꦱ꧀ꦱ ꦤ ꦄꦴꦤꦩꦤꦴ ꦤ ꦮꦶꦤꦩꦤꦴ ꦤ ꦱꦤ꧀ꦤꦩꦤꦴ ꦤ ꦥꦟꦩꦤꦴ ꦄꦤꦶꦚ꧀ꦗꦤꦴ ꦄꦦꦤ꧀ꦢꦤꦴ ꦄꦕꦭꦤꦴ ꦄꦏꦩ꧀ꦥꦤꦴ, ꦱꦤ꧀ꦠꦁ ꦱꦸꦑꦸꦩꦁ ꦥꦱ꧀ꦱꦩ꧀ꦨꦪꦁ ꦏꦴꦪꦱꦔ꧀ꦑꦴꦫꦁ ꦄꦱ꧀ꦱꦱꦶꦱ꧀ꦱꦴꦩꦷꦠꦶ ꦱꦶꦏ꧀ꦑꦠꦶ, ꦥꦱ꧀ꦱꦩ꧀ꦨꦪꦁ ꦏꦴꦪꦱꦔ꧀ꦑꦴꦫꦁ ꦥꦱ꧀ꦱꦱꦶꦱ꧀ꦱꦴꦩꦷꦠꦶ ꦱꦶꦏ꧀ꦑꦠꦶ.

ꦆꦠꦶ ꦏꦶꦫ ꦥꦱ꧀ꦱꦩ꧀ꦨꦪꦁ ꦏꦴꦪꦱꦔ꧀ꦑꦴꦫꦁ ꦄꦱ꧀ꦱꦱꦶꦱ꧀ꦱꦴꦩꦷꦠꦶ ꦱꦶꦏ꧀ꦑꦠꦶ, ꦥꦱ꧀ꦱꦩ꧀ꦨꦪꦁ ꦏꦴꦪꦱꦔ꧀ꦑꦴꦫꦁ ꦥꦱ꧀ꦱꦱꦶꦱ꧀ꦱꦴꦩꦷꦠꦶ ꦱꦶꦏ꧀ꦑꦠꦶ. ꦌꦮꦁ ꦱꦤ꧀ꦠꦺ ꦮꦴꦠꦹꦥꦭꦢ꧀ꦣꦶꦪꦴ ꦕ ꦥꦨꦴꦮꦤꦴ ꦤ ꦲꦺꦴꦠꦶ, ꦄꦱ꧀ꦱꦴꦱꦥꦱ꧀ꦱꦴꦱꦴꦤꦚ꧀ꦕ ꦥꦨꦴꦮꦤꦴ ꦤ ꦲꦺꦴꦠꦶ, ꦄꦴꦤꦴꦥꦴꦤꦱ꧀ꦱꦠꦶꦪꦴ ꦕ ꦥꦨꦴꦮꦤꦴ ꦤ ꦲꦺꦴꦠꦶ, ꦄꦴꦤꦴꦥꦴꦤꦱ꧀ꦱꦠꦶꦱꦩꦴꦣꦶꦱ꧀ꦱ ꦕ ꦥꦨꦴꦮꦤꦴ ꦤ ꦤ ꦲꦺꦴꦠꦶ, ꦤ ꦕ ꦤꦁ ꦠꦁ ꦱꦩꦴꦥꦠ꧀ꦠꦶꦁ ꦥꦟ꧀ꦝꦶꦠꦴ ꦱꦩꦴꦥꦗ꧀ꦗꦤ꧀ꦠꦶꦥꦶ ꦮꦸꦛ꧀ꦜꦲꦤ꧀ꦠꦶꦥꦶ.

ꦆꦠꦶ ꦏꦶꦫ ꦥꦱ꧀ꦱꦩ꧀ꦨꦪꦁ ꦏꦴꦪꦱꦔ꧀ꦑꦴꦫꦁ ꦄꦱ꧀ꦱꦱꦶꦱ꧀ꦱꦴꦩꦶ…ꦥꦺ… ꦥꦱ꧀ꦱꦱꦶꦱ꧀ꦱꦴꦩꦷꦠꦶ ꦱꦶꦏ꧀ꦑꦠꦶ. ꦌꦮꦁ ꦱꦤ꧀ꦠꦺ ꦮꦴꦠꦹꦥꦭꦢ꧀ꦣꦶꦪꦴ ꦕ ꦥꦨꦴꦮꦤꦴ ꦲꦺꦴꦠꦶ, ꦄꦱ꧀ꦱꦴꦱꦥꦱ꧀ꦱꦴꦱꦴꦤꦚ꧀ꦕ ꦥꦨꦴꦮꦤꦴ ꦲꦺꦴꦠꦶ, ꦄꦴꦤꦴꦥꦴꦤꦱ꧀ꦱꦠꦶꦪꦴ ꦕ ꦥꦨꦴꦮꦤꦴ ꦲꦺꦴꦠꦶ, ꦄꦴꦤꦴꦥꦴꦤꦱ꧀ꦱꦠꦶꦱꦩꦴꦣꦶꦱ꧀ꦱ ꦕ ꦥꦨꦴꦮꦤꦴ ꦲꦺꦴꦠꦶ, ꦠꦚ꧀ꦕ ꦤꦁ ꦱꦩꦴꦥꦠ꧀ꦠꦶꦁ ꦥꦟ꧀ꦝꦶꦠꦴ ꦱꦩꦴꦥꦗ꧀ꦗꦤ꧀ꦠꦶꦥꦶ ꦮꦸꦛ꧀ꦜꦲꦤ꧀ꦠꦶꦥꦶ.

ꦪꦡꦴ ꦏꦡꦁ ꦮꦶꦪ? ꦱꦺꦪ꧀ꦪꦡꦴꦥꦶ ꦏꦁꦱꦺ ꦄꦴꦏꦺꦴꦛꦶꦠꦺ ꦥꦜꦩꦁ ꦎꦭ꦳ꦴꦫꦶꦏꦴ ꦱꦢ꧀ꦢꦴ ꦥꦮꦠ꧀ꦠꦤ꧀ꦠꦶ, ꦎꦭ꦳ꦴꦫꦶꦏꦴꦤꦁ ꦱꦢ꧀ꦢꦴꦤꦁ ꦤꦶꦩꦶꦠ꧀ꦠꦁ ꦱꦸꦒ꧀ꦒꦲꦶꦠꦠ꧀ꦠꦴ ꦱꦸꦩꦤꦱꦶꦏꦠꦠ꧀ꦠꦴ ꦱꦹꦥꦣꦴꦫꦶꦠꦠ꧀ꦠꦴ ꦤꦶꦫꦸꦢ꧀ꦣꦺꦥꦶ ꦎꦭ꦳ꦴꦫꦶꦏꦺ ꦱꦢ꧀ꦢꦺ ꦄꦡ ꦥꦕ꧀ꦖꦴ ꦱꦸꦑꦸꦩꦏꦴ ꦱꦢ꧀ꦢꦴ ꦥꦮꦠ꧀ꦠꦤ꧀ꦠꦶ, ꦱꦸꦑꦸꦩꦏꦴꦤꦁ ꦱꦢ꧀ꦢꦴꦤꦁ ꦤꦶꦩꦶꦠ꧀ꦠꦁ ꦱꦸꦒ꧀ꦒꦲꦶꦠꦠ꧀ꦠꦴ ꦱꦸꦩꦤꦱꦶꦏꦠꦠ꧀ꦠꦴ ꦱꦹꦥꦣꦴꦫꦶꦠꦠ꧀ꦠꦴ ꦤꦶꦫꦸꦢ꧀ꦣꦺꦥꦶ ꦱꦸꦑꦸꦩꦏꦺ ꦱꦢ꧀ꦢꦺ ꦄꦡ ꦥꦕ꧀ꦖꦴ ꦱꦸꦑꦸꦩꦱꦢ꧀ꦢꦤꦶꦩꦶꦠ꧀ꦠꦴꦫꦩ꧀ꦩꦟꦠꦴꦥꦶ ꦕꦶꦠ꧀ꦠꦁ ꦥꦮꦠ꧀ꦠꦠꦶ; ꦌꦮꦩꦺꦮ ꦥꦜꦩꦁ ꦎꦭ꦳ꦴꦫꦶꦏꦴ ꦄꦱ꧀ꦱꦴꦱꦥꦱ꧀ꦱꦴꦱꦴ ꦥꦮꦠ꧀ꦠꦤ꧀ꦠꦶ, ꦎꦭ꦳ꦴꦫꦶꦏꦴꦤꦁ ꦄꦱ꧀ꦱꦴꦱꦥꦱ꧀ꦱꦴꦱꦴꦤꦁ ꦤꦶꦩꦶꦠ꧀ꦠꦁ ꦱꦸꦒ꧀ꦒꦲꦶꦠꦠ꧀ꦠꦴ ꦱꦸꦩꦤꦱꦶꦏꦠꦠ꧀ꦠꦴ ꦱꦹꦥꦣꦴꦫꦶꦠꦠ꧀ꦠꦴ ꦤꦶꦫꦸꦢ꧀ꦣꦺꦥꦶ ꦎꦭ꦳ꦴꦫꦶꦏꦺ ꦄꦱ꧀ꦱꦴꦱꦥꦱ꧀ꦱꦴꦱꦺ ꦄꦡ ꦥꦕ꧀ꦖꦴ ꦱꦸꦑꦸꦩꦏꦴ ꦄꦱ꧀ꦱꦴꦱꦥꦱ꧀ꦱꦴꦱꦴ ꦥꦮꦠ꧀ꦠꦤ꧀ꦠꦶ, ꦱꦸꦑꦸꦩꦏꦴꦤꦁ ꦄꦱ꧀ꦱꦴꦱꦥꦱ꧀ꦱꦴꦱꦴꦤꦁ ꦤꦶꦩꦶꦠ꧀ꦠꦁ ꦱꦸꦒ꧀ꦒꦲꦶꦠꦠ꧀ꦠꦴ ꦱꦸꦩꦤꦱꦶꦏꦠꦠ꧀ꦠꦴ ꦱꦹꦥꦣꦴꦫꦶꦠꦠ꧀ꦠꦴ ꦤꦶꦫꦸꦢ꧀ꦣꦺꦥꦶ ꦱꦸꦑꦸꦩꦏꦺ ꦄꦱ꧀ꦱꦴꦱꦥꦱ꧀ꦱꦴꦱꦺ ꦄꦡ ꦥꦕ꧀ꦖꦴ ꦱꦸꦑꦸꦩꦄꦱ꧀ꦱꦴꦱꦥꦱ꧀ꦱꦴꦱꦤꦶꦩꦶꦠ꧀ꦠꦴꦫꦩ꧀ꦩꦟꦠꦴꦥꦶ ꦕꦶꦠ꧀ꦠꦁ ꦤ ꦮꦶꦏ꧀ꦑꦺꦥꦁ ꦒꦕ꧀ꦖꦠꦶ.

ꦌꦮꦁ ꦱꦤ꧀ꦠꦺ ꦮꦴꦠꦹꦥꦭꦢ꧀ꦣꦶꦪꦴ ꦕ ꦥꦨꦴꦮꦤꦴ ꦲꦺꦴꦠꦶ, ꦄꦱ꧀ꦱꦴꦱꦥꦱ꧀ꦱꦴꦱꦴꦤꦚ꧀ꦕ ꦥꦨꦴꦮꦤꦴ ꦲꦺꦴꦠꦶ, ꦄꦴꦤꦴꦥꦴꦤꦱ꧀ꦱꦠꦶꦪꦴ ꦕ ꦥꦨꦴꦮꦤꦴ ꦲꦺꦴꦠꦶ, ꦄꦴꦤꦴꦥꦴꦤꦱ꧀ꦱꦠꦶꦱꦩꦴꦣꦶꦱ꧀ꦱ ꦕ ꦥꦨꦴꦮꦤꦴ ꦲꦺꦴꦠꦶ, ꦠꦚ꧀ꦕ ꦤꦁ ꦱꦩꦴꦥꦠ꧀ꦠꦶꦁ ꦥꦟ꧀ꦝꦶꦠꦴ ꦱꦩꦴꦥꦗ꧀ꦗꦤ꧀ꦠꦶꦥꦶ ꦮꦸꦛ꧀ꦜꦲꦤ꧀ꦠꦶꦥꦶ.

ꦥꦱ꧀ꦱꦩ꧀ꦨꦪꦁ ꦏꦴꦪꦱꦔ꧀ꦑꦴꦫꦤ꧀ꦠꦶ ꦄꦱ꧀ꦱꦴꦱꦥꦱ꧀ꦱꦴꦱꦴ ꦏꦴꦪꦺꦴ, ꦈꦥꦛ꧀ꦜꦴꦤꦁ ꦱꦠꦶ, ꦄꦤꦸꦥꦱ꧀ꦱꦤꦴ ꦚꦴꦟꦁ. ꦏꦴꦪꦺꦴ ꦈꦥꦛ꧀ꦜꦴꦤꦁ ꦤꦺꦴ ꦱꦠꦶ, ꦱꦠꦶ ꦈꦥꦛ꧀ꦜꦴꦤꦚ꧀ꦕꦺꦮ ꦱꦠꦶ ꦕ, ꦠꦴꦪ ꦱꦠꦶꦪꦴ ꦠꦺꦤ ꦚꦴꦟꦺꦤ ꦠꦁ ꦏꦴꦪꦁ ꦄꦤꦸꦥꦱ꧀ꦱꦠꦶ. ꦠꦺꦤ ꦮꦸꦕ꧀ꦕꦠꦶ – ‘‘ꦏꦴꦪꦺ ꦏꦴꦪꦴꦤꦸꦥꦱ꧀ꦱꦤꦴ ꦱꦠꦶꦥꦛ꧀ꦜꦴꦤꦨꦴꦮꦤꦴꦠꦶ (ꦥꦛꦶ. ꦩ. ꧑.꧑꧗꧑).

ꦄꦪꦁ ꦠꦴꦮꦺꦠ꧀ꦡ ꦏꦴꦪꦴꦤꦸꦥꦱ꧀ꦱꦤꦴꦮꦱꦺꦤ ꦮꦸꦠ꧀ꦠꦱ꧀ꦱ ꦥꦜꦩꦕꦠꦸꦏ꧀ꦏꦱ꧀ꦱ ꦄꦤꦸꦥꦸꦧ꧀ꦧꦥꦢꦮꦟ꧀ꦟꦤꦴ.

ꦪꦱ꧀ꦩꦴ ꦥꦤꦺꦠ꧀ꦡ ꦆꦢꦩꦺꦮ ꦕꦠꦸꦏ꧀ꦏꦁ ꦄꦴꦢꦶꦏꦩ꧀ꦩꦶꦏꦱ꧀ꦱ ꦏꦩ꧀ꦩꦛ꧀ꦜꦴꦤꦮꦱꦺꦤ ꦮꦸꦠ꧀ꦠꦁ, ꦆꦠꦫꦴꦤꦶ ꦥꦤ ꦠꦷꦟꦶ ꦕꦠꦸꦏ꧀ꦏꦴꦤꦶ ꦌꦠ꧀ꦡ ꦥꦠ꧀ꦠꦗ꧀ꦙꦴꦤꦱ꧀ꦱ ꦮꦺꦢꦤꦴꦕꦶꦠ꧀ꦠꦣꦩ꧀ꦩꦴꦤꦸꦥꦱ꧀ꦱꦤꦴꦮꦱꦺꦤ ꦮꦸꦠ꧀ꦠꦴꦤꦶ, ꦠꦱ꧀ꦩꦴ ꦆꦢꦁ ꦏꦩ꧀ꦩꦛ꧀ꦜꦴꦤꦁ ꦨꦴꦮꦺꦠ꧀ꦮꦴ ꦄꦴꦤꦴꦥꦴꦤꦱ꧀ꦱꦠꦶꦕꦠꦸꦠ꧀ꦡꦗ꧀ꦙꦴꦤꦥꦢꦛ꧀ꦜꦴꦤꦴꦪ ꦮꦶꦥꦱ꧀ꦱꦤꦴꦪ ꦱꦲ ꦥꦛꦶꦱꦩ꧀ꦨꦶꦢꦴꦲꦶ ꦄꦫꦲꦠ꧀ꦠꦁ ꦥꦴꦥꦸꦟꦶꦠꦸꦏꦴꦩꦺꦤ ꦧꦸꦢ꧀ꦣꦥꦸꦠ꧀ꦠꦺꦤ ꦪꦁ ꦏꦴꦠꦧ꧀ꦧꦁ ꦠꦁ ꦱꦧ꧀ꦧꦁ ꦆꦣꦺꦮ ꦠꦴꦮ ꦄꦴꦢꦶꦏꦩ꧀ꦩꦶꦏꦱ꧀ꦱ ꦏꦸꦭꦥꦸꦠ꧀ꦠꦱ꧀ꦱ ꦮꦱꦺꦤ ꦄꦴꦢꦶꦠꦺꦴ ꦥꦨꦸꦠꦶ ꦌꦮꦁ ꦮꦺꦢꦶꦠꦧ꧀ꦧꦁ. ꦕꦠꦸꦧ꧀ꦧꦶꦣꦁ ꦠꦴꦮ ꦱꦷꦭꦁ ꦮꦶꦱꦺꦴꦣꦺꦠꦧ꧀ꦧꦁ. ꦠꦠ꧀ꦡ ꦠꦶꦮꦶꦣꦴ ꦮꦶꦱꦺꦴꦣꦤꦴ – ꦄꦤꦴꦥꦗ꧀ꦗꦤꦁ, ꦄꦴꦥꦤ꧀ꦤꦮꦸꦛ꧀ꦜꦴꦤꦁ, ꦏꦶꦭꦺꦱꦺꦲꦶ ꦕ ꦄꦥ꧀ꦥꦠꦶꦥꦷꦭ꦳ꦤꦁ. ꦌꦮꦁ ꦮꦶꦱꦸꦢ꧀ꦣꦱꦷꦭꦱ꧀ꦱ ꦲꦶ ꦨꦴꦮꦤꦴ ꦱꦩ꧀ꦥꦗ꧀ꦗꦠꦶ. ꦪꦩ꧀ꦥꦶꦢꦁ ꦕꦺꦠꦶꦪꦔ꧀ꦒꦟꦮꦠ꧀ꦠꦁ ꦧꦺꦴꦣꦶꦪꦔ꧀ꦒꦟꦮꦠ꧀ꦠꦁ ꦈꦥꦗ꧀ꦙꦴꦪꦮꦠ꧀ꦠꦁ ꦄꦴꦕꦫꦶꦪꦮꦠ꧀ꦠꦁ ꦗꦤ꧀ꦠꦴꦓꦫꦮꦠ꧀ꦠꦁ ꦈꦥꦺꦴꦱꦡꦴꦒꦴꦫꦮꦠ꧀ꦠꦁ ꦢ꧀ꦮꦺꦄꦱꦷꦠꦶ ꦑꦤ꧀ꦣꦏꦮꦠ꧀ꦠꦴꦤꦶ ꦕꦸꦢ꧀ꦢꦱꦮꦶꦣꦁ ꦩꦲꦴꦮꦠ꧀ꦠꦤ꧀ꦠꦶ ꦆꦩꦺꦱꦁ ꦮꦱꦺꦤ ꦄꦴꦨꦶꦱꦩꦴꦕꦴꦫꦶꦏꦱꦷꦭꦁ ꦮꦸꦕ꧀ꦕꦠꦶ, ꦠꦩ꧀ꦥꦶ ꦱꦴꦣꦸꦏꦁ ꦥꦫꦶꦥꦹꦫꦺꦠꦧ꧀ꦧꦁ. ꦪꦺꦴ ꦲꦶ ‘‘ꦄꦲꦁ ꦱꦷꦭꦁ ꦫꦏ꧀ꦑꦴꦩꦶ, ꦏꦶꦁ ꦄꦴꦨꦶꦱꦩꦴꦕꦴꦫꦶꦏꦺꦤ ꦏꦩ꧀ꦩ’’ꦤ꧀ꦠꦶ ꦮꦢꦺꦪ꧀ꦪ, ꦠꦱ꧀ꦱ ꦱꦷꦭꦁ ꦥꦫꦶꦥꦹꦫꦺꦱ꧀ꦱꦠꦷꦠꦶ ꦤꦺꦠꦁ ꦜꦴꦤꦁ ꦮꦶꦗ꧀ꦗꦠꦶ. ꦄꦴꦨꦶꦱꦩꦴꦕꦴꦫꦶꦏꦮꦠ꧀ꦠꦺ ꦥꦤ ꦥꦫꦶꦥꦹꦫꦺ ꦱꦷꦭꦁ ꦥꦫꦶꦥꦹꦫꦠꦶ, ꦱꦷꦭꦺ ꦥꦫꦶꦥꦹꦫꦺ ꦱꦩꦴꦣꦶ ꦒꦧ꧀ꦨꦁ ꦒꦟ꧀ꦲꦴꦠꦶ. ꦮꦸꦠ꧀ꦠꦚ꧀ꦲꦺꦠꦁ ꦨꦒꦮꦠꦴ – ‘‘ꦱꦺꦴ ꦮꦠ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦄꦴꦨꦶꦱꦩꦴꦕꦴꦫꦶꦏꦁ ꦣꦩ꧀ꦩꦁ ꦄꦥꦫꦶꦥꦹꦫꦺꦠ꧀ꦮꦴ ‘ꦱꦷꦭꦴꦤꦶ ꦥꦫꦶꦥꦹꦫꦺꦱ꧀ꦱꦠꦷ’ꦠꦶ ꦤꦺꦠꦁ ꦜꦴꦤꦁ ꦮꦶꦗ꧀ꦗꦠꦷ’’ꦠꦶ (ꦄ. ꦤꦶ. ꧕.꧒꧑) ꦮꦶꦠ꧀ꦡꦴꦫꦺꦠꦧ꧀ꦧꦁ. ꦠꦱ꧀ꦩꦴ ꦠꦺꦤ ꦪꦩ꧀ꦥꦶꦢꦁ ꦕꦺꦠꦶꦪꦔ꧀ꦒꦟꦮꦠ꧀ꦠꦴꦢꦶ ꦄꦴꦨꦶꦱꦩꦴꦕꦴꦫꦶꦏꦱꦷꦭꦁ ꦮꦸꦕ꧀ꦕꦠꦶ, ꦠꦩ꧀ꦥꦶ ꦱꦴꦣꦸꦏꦁ ꦥꦫꦶꦥꦹꦫꦺꦠꦧ꧀ꦧꦁ. ꦠꦠꦺꦴ –

‘‘ꦄꦴꦮꦴꦱꦺꦴ ꦕ ꦏꦸꦭꦁ ꦭꦴꦨꦺꦴ, ꦒꦟꦺꦴ ꦏꦩ꧀ꦩꦚ꧀ꦕ ꦥꦚ꧀ꦕꦩꦁ;

ꦄꦢ꧀ꦣꦴꦤꦁ ꦚꦴꦠꦶ ꦄꦴꦧꦴꦣꦺꦴ, ꦒꦤ꧀ꦡꦺꦴ ꦆꦢ꧀ꦣꦷꦠꦶ ꦠꦺ ꦢꦱꦴ’’ꦠꦶ.

ꦌꦮꦁ ꦮꦸꦠ꧀ꦠꦺꦱꦸ ꦢꦱꦱꦸ ꦥꦭꦶꦧꦺꦴꦣꦺꦱꦸ ꦪꦺꦴ ꦥꦭꦶꦧꦺꦴꦣꦺꦴ ꦄꦠ꧀ꦡꦶ, ꦱꦺꦴ ꦈꦥꦕ꧀ꦖꦶꦤ꧀ꦢꦶꦠꦧ꧀ꦧꦺꦴ.

ꦌꦮꦁ ꦈꦥꦕ꧀ꦖꦶꦤ꧀ꦤꦥꦭꦶꦧꦺꦴꦣꦺꦤ ꦏꦩ꧀ꦩꦛ꧀ꦜꦴꦤꦁ ꦈꦒ꧀ꦒꦲꦺꦠꦧ꧀ꦧꦁ. ꦠꦩ꧀ꦥꦶ ꦢꦸꦮꦶꦣꦁ ꦲꦺꦴꦠꦶ – ꦱꦧ꧀ꦧꦠ꧀ꦡꦏꦏꦩ꧀ꦩꦛ꧀ꦜꦴꦤꦚ꧀ꦕ ꦥꦴꦫꦶꦲꦴꦫꦶꦪꦏꦩ꧀ꦩꦛ꧀ꦜꦴꦤꦚ꧀ꦕ. ꦠꦠ꧀ꦡ ꦱꦧ꧀ꦧꦠ꧀ꦡꦏꦏꦩ꧀ꦩꦛ꧀ꦜꦴꦤꦁ ꦤꦴꦩ ꦨꦶꦏ꧀ꦑꦸꦱꦔ꧀ꦓꦴꦢꦷꦱꦸ ꦩꦺꦠ꧀ꦠꦴ ꦩꦫꦟꦱ꧀ꦱꦠꦶ ꦕ ꦄꦱꦸꦨꦱꦚ꧀ꦚꦴꦠꦶꦥꦶ ꦌꦏꦺ. ꦏꦩ꧀ꦩꦛ꧀ꦜꦴꦤꦶꦏꦺꦤ ꦲꦶ ꦨꦶꦏ꧀ꦑꦸꦤꦴ ꦥꦜꦩꦁ ꦠꦴꦮ ꦥꦫꦶꦕ꧀ꦖꦶꦤ꧀ꦢꦶꦠ꧀ꦮꦴ ꦱꦷꦩꦛ꧀ꦜꦏꦨꦶꦏ꧀ꦑꦸꦱꦔ꧀ꦓꦺ ꦩꦺꦠ꧀ꦠꦴ ꦨꦴꦮꦺꦠꦧ꧀ꦧꦴ; ꦠꦠꦺꦴ ꦱꦷꦩꦛ꧀ꦜꦏꦢꦺꦮꦠꦴꦱꦸ, ꦠꦠꦺꦴ ꦒꦺꦴꦕꦫꦒꦴꦩꦺ ꦆꦱ꧀ꦱꦫꦗꦤꦺ, ꦠꦠꦺꦴ ꦠꦠ꧀ꦡ ꦩꦤꦸꦱ꧀ꦱꦺ ꦈꦥꦴꦢꦴꦪ ꦱꦧ꧀ꦧꦱꦠ꧀ꦠꦺꦱꦸ. ꦱꦺꦴ ꦲꦶ ꦨꦶꦏ꧀ꦑꦸꦱꦔ꧀ꦓꦺ ꦩꦺꦠ꧀ꦠꦴꦪ ꦱꦲꦮꦴꦱꦷꦤꦁ ꦩꦸꦢꦸꦕꦶꦠ꧀ꦠꦠꦁ ꦗꦤꦺꦠꦶ, ꦄꦡꦱ꧀ꦱ ꦱꦸꦑꦱꦁꦮꦴꦱꦠꦴ ꦲꦺꦴꦠꦶ. ꦱꦷꦩꦛ꧀ꦜꦏꦢꦺꦮꦠꦴꦱꦸ ꦩꦺꦠ꧀ꦠꦴꦪ ꦩꦸꦢꦸꦏꦠꦕꦶꦠ꧀ꦠꦴꦲꦶ ꦢꦺꦮꦠꦴꦲꦶ ꦣꦩ꧀ꦩꦶꦏꦴꦪ ꦫꦏ꧀ꦑꦴꦪ ꦱꦸꦱꦁꦮꦶꦲꦶꦠꦴꦫꦏ꧀ꦑꦺꦴ ꦲꦺꦴꦠꦶ. ꦒꦺꦴꦕꦫꦒꦴꦩꦺ ꦆꦱ꧀ꦱꦫꦗꦤꦺ ꦩꦺꦠ꧀ꦠꦴꦪ ꦩꦸꦢꦸꦏꦠꦕꦶꦠ꧀ꦠꦱꦤ꧀ꦠꦴꦤꦺꦲꦶ ꦆꦱ꧀ꦱꦫꦺꦲꦶ ꦣꦩ꧀ꦩꦶꦏꦴꦪ ꦫꦏ꧀ꦑꦴꦪ ꦱꦸꦫꦏ꧀ꦑꦶꦠꦥꦫꦶꦏ꧀ꦑꦴꦫꦺꦴ ꦲꦺꦴꦠꦶ. ꦠꦠ꧀ꦡ ꦩꦤꦸꦱ꧀ꦱꦺꦱꦸ ꦩꦺꦠ꧀ꦠꦴꦪ ꦥꦱꦴꦢꦶꦠꦕꦶꦠ꧀ꦠꦺꦲꦶ ꦠꦺꦲꦶ ꦄꦥꦫꦶꦨꦹꦠꦺꦴ ꦲꦸꦠ꧀ꦮꦴ ꦮꦶꦕꦫꦠꦶ. ꦱꦧ꧀ꦧꦱꦠ꧀ꦠꦺꦱꦸ ꦩꦺꦠ꧀ꦠꦴꦪ ꦱꦧ꧀ꦧꦠ꧀ꦡ ꦄꦥ꧀ꦥꦛꦶꦲꦠꦕꦴꦫꦺꦴ ꦲꦺꦴꦠꦶ.

ꦩꦫꦟꦱ꧀ꦱꦠꦶꦪꦴ ꦥꦤ ‘‘ꦄꦮꦱ꧀ꦱꦁ ꦩꦫꦶꦠꦧ꧀ꦧ’’ꦤ꧀ꦠꦶ ꦕꦶꦤ꧀ꦠꦺꦤ꧀ꦠꦺꦴ ꦄꦤꦺꦱꦤꦁ ꦥꦲꦴꦪ ꦈꦥꦫꦹꦥꦫꦶꦮꦝ꧀ꦞꦩꦴꦤꦱꦁꦮꦺꦒꦺꦴ ꦄꦤꦺꦴꦭꦷꦤꦮꦸꦠ꧀ꦠꦶꦏꦺꦴ ꦲꦺꦴꦠꦶ. ꦄꦱꦸꦨꦱꦚ꧀ꦚꦴꦪ ꦢꦶꦧ꧀ꦧꦺꦱꦸꦥꦶ ꦄꦴꦫꦩ꧀ꦩꦟꦺꦱꦸ ꦠꦟ꧀ꦲꦴ ꦤꦸꦥ꧀ꦥꦗ꧀ꦗꦠꦶ. ꦠꦺꦤꦱ꧀ꦱꦺꦠꦁ ꦠꦪꦁ ꦌꦮꦁ ꦧꦲꦹꦥꦏꦴꦫꦠ꧀ꦠꦴ ‘‘ꦱꦧ꧀ꦧꦠ꧀ꦡ ꦄꦠ꧀ꦡꦪꦶꦠꦧ꧀ꦧꦁ ꦆꦕ꧀ꦖꦶꦠꦧ꧀ꦧ’’ꦤ꧀ꦠꦶ ꦏꦠ꧀ꦮꦴ ꦄꦣꦶꦥ꧀ꦥꦺꦠꦱ꧀ꦱ ꦕ ꦪꦺꦴꦒꦴꦤꦸꦪꦺꦴꦒꦏꦩ꧀ꦩꦱ꧀ꦱ ꦥꦢꦛ꧀ꦜꦴꦤꦠ꧀ꦠꦴ ‘‘ꦱꦧ꧀ꦧꦠ꧀ꦡꦏꦏꦩ꧀ꦩꦛ꧀ꦜꦴꦤ’’ꦤ꧀ꦠꦶ ꦮꦸꦕ꧀ꦕꦠꦶ.

ꦄꦛ꧀ꦜꦠꦶꦁꦱꦴꦫꦩ꧀ꦩꦟꦺꦱꦸ ꦥꦤ ꦪꦁ ꦪꦱ꧀ꦱ ꦕꦫꦶꦠꦴꦤꦸꦏꦹꦭꦁ, ꦠꦁ ꦠꦱ꧀ꦱ ꦤꦶꦕ꧀ꦕꦁ ꦥꦫꦶꦲꦫꦶꦠꦧ꧀ꦧꦠ꧀ꦠꦴ ꦪꦡꦴꦮꦸꦠ꧀ꦠꦺꦤꦺꦮ ꦤꦪꦺꦤ ‘‘ꦥꦴꦫꦶꦲꦴꦫꦶꦪꦏꦩ꧀ꦩꦛ꧀ꦜꦴꦤ’’ꦤ꧀ꦠꦶꦥꦶ ꦮꦸꦕ꧀ꦕꦠꦶ. ꦆꦣ ꦥꦤ ꦆꦢꦩꦺꦮ ꦄꦴꦤꦴꦥꦴꦤꦱ꧀ꦱꦠꦶꦏꦩ꧀ꦩꦛ꧀ꦜꦴꦤꦁ ‘‘ꦥꦴꦫꦶꦲꦴꦫꦶꦪꦏꦩ꧀ꦩꦛ꧀ꦜꦴꦤ’’ꦤ꧀ꦠꦶ ꦮꦸꦕ꧀ꦕꦠꦶ. ꦄꦪꦩꦺꦠ꧀ꦡ ꦱꦔ꧀ꦑꦺꦥꦺꦴ. ꦮꦶꦠ꧀ꦡꦴꦫꦺꦴ ꦥꦤ ꦱꦷꦭꦮꦶꦱꦺꦴꦣꦤꦏꦡꦁ ꦥꦭꦶꦧꦺꦴꦣꦸꦥꦕ꧀ꦖꦺꦢꦏꦡꦚ꧀ꦕ ꦆꦕ꧀ꦖꦤ꧀ꦠꦺꦤ ꦮꦶꦱꦸꦢ꧀ꦣꦶꦩꦒ꧀ꦒꦠꦺꦴ ꦒꦲꦺꦠꦧ꧀ꦧꦺꦴ.

ꦌꦮꦁ ꦮꦶꦱꦸꦢ꧀ꦣꦱꦷꦭꦺꦤ ꦥꦤ ꦈꦥꦕ꧀ꦖꦶꦤ꧀ꦤꦥꦭꦶꦧꦺꦴꦣꦺꦤ ꦕ ꦆꦢꦁ ꦏꦩ꧀ꦩꦛ꧀ꦜꦴꦤꦁ ꦈꦒ꧀ꦒꦟ꧀ꦲꦤ꧀ꦠꦺꦤ ꦆꦩꦶꦤꦴꦮ ꦏꦩ꧀ꦩꦛ꧀ꦜꦴꦤꦺꦤ ꦕꦠꦸꦠ꧀ꦡꦗ꧀ꦙꦴꦤꦁ ꦤꦶꦧ꧀ꦧꦠ꧀ꦠꦺꦠ꧀ꦮꦴ ꦮꦶꦥꦱ꧀ꦱꦤꦁ ꦮꦝ꧀ꦞꦺꦠ꧀ꦮꦴ ꦄꦫꦲꦠ꧀ꦠꦁ ꦥꦠ꧀ꦠꦱ꧀ꦱ ꦧꦸꦢ꧀ꦣꦥꦸꦠ꧀ꦠꦱ꧀ꦱ ꦱꦤ꧀ꦠꦶꦏꦺ ꦈꦒ꧀ꦒꦲꦺꦠꦧ꧀ꦧꦁ. ꦠꦁ ꦄꦭꦨꦤ꧀ꦠꦺꦤ ꦄꦤꦴꦒꦴꦩꦶꦱ꧀ꦱ, ꦠꦩ꧀ꦥꦶ ꦄꦭꦨꦤ꧀ꦠꦺꦤ ꦱꦏꦢꦴꦒꦴꦩꦶꦱ꧀ꦱ, ꦠꦩ꧀ꦥꦶ ꦄꦭꦨꦤ꧀ꦠꦺꦤ ꦱꦺꦴꦠꦴꦥꦤ꧀ꦤꦱ꧀ꦱ, ꦠꦩ꧀ꦥꦶ ꦄꦭꦨꦤ꧀ꦠꦺꦤ ꦄꦴꦤꦴꦥꦴꦤꦕꦠꦸꦠ꧀ꦡꦗ꧀ꦙꦴꦤꦭꦴꦨꦶꦱ꧀ꦱ, ꦠꦩ꧀ꦥꦶ ꦄꦭꦨꦤ꧀ꦠꦺꦤ ꦥꦴꦭ꦳ꦶꦪꦴ ꦄꦛ꧀ꦜꦏꦡꦴꦪ ꦕ ꦄꦱꦩ꧀ꦩꦹꦭ꦳꧀ꦲꦱ꧀ꦱ ꦮꦶꦤꦶꦕ꧀ꦖꦪꦴꦕꦫꦶꦪꦱ꧀ꦱ ꦱꦤ꧀ꦠꦶꦏꦺ ꦈꦒ꧀ꦒꦲꦺꦠꦧ꧀ꦧꦁ. ꦄꦫꦲꦤ꧀ꦠꦴꦢꦪꦺꦴ ꦲꦶ ꦄꦠ꧀ꦠꦤꦴ ꦄꦣꦶꦒꦠꦩꦒ꧀ꦒꦩꦺꦮ ꦄꦴꦕꦶꦏ꧀ꦑꦤ꧀ꦠꦶ. ꦄꦪꦁ ꦥꦤ ꦒꦲꦤꦥꦢꦺꦱꦺ ꦩꦲꦴꦲꦠ꧀ꦡꦶꦥꦡꦁ ꦤꦷꦲꦫꦤ꧀ꦠꦺꦴ ꦮꦶꦪ ꦱꦧ꧀ꦧꦠ꧀ꦡ ꦄꦱꦩ꧀ꦩꦹꦭ꦳꧀ꦲꦺꦴ ꦱꦥ꧀ꦥꦴꦪꦴꦱꦥ꧀ꦥꦴꦪꦁ ꦥꦫꦶꦕ꧀ꦖꦶꦤ꧀ꦢꦶꦠ꧀ꦮꦴ ꦏꦡꦺꦠꦶ.

ꦠꦠ꧀ꦫꦴꦪꦁ ꦄꦤꦸꦥꦸꦧ꧀ꦧꦶꦏꦡꦴ – ꦠꦺꦤ ꦨꦶꦏ꧀ꦑꦸꦤꦴ ꦱꦭ꧀ꦭꦲꦸꦏꦮꦸꦠ꧀ꦠꦶꦤꦴ ꦮꦶꦤꦪꦴꦕꦴꦫꦱꦩ꧀ꦥꦤ꧀ꦤꦺꦤ ꦮꦸꦠ꧀ꦠꦥ꧀ꦥꦏꦴꦫꦩꦴꦕꦫꦶꦪꦁ ꦈꦥꦱꦔ꧀ꦏꦩꦶꦠ꧀ꦮꦴ ꦮꦠ꧀ꦠꦥꦛꦶꦥꦠ꧀ꦠꦶꦪꦴ ꦄꦴꦫꦴꦣꦶꦠꦕꦶꦠ꧀ꦠꦱ꧀ꦱ ꦠꦱ꧀ꦱ ꦱꦤ꧀ꦠꦶꦏꦺ ꦥꦚ꧀ꦕꦱꦤ꧀ꦣꦶꦏꦁ ꦏꦩ꧀ꦩꦛ꧀ꦜꦴꦤꦁ ꦈꦒ꧀ꦒꦲꦺꦠꦧ꧀ꦧꦁ. ꦠꦠ꧀ꦫꦶꦩꦺ ꦥꦚ꧀ꦕ ꦱꦤ꧀ꦣꦪꦺꦴ – ꦈꦒ꧀ꦒꦲꦺꦴ, ꦥꦫꦶꦥꦸꦕ꧀ꦖꦴ, ꦈꦥꦛ꧀ꦜꦴꦤꦁ, ꦄꦥ꧀ꦥꦤꦴ, ꦭꦏ꧀ꦑꦟꦤ꧀ꦠꦶ. ꦠꦠ꧀ꦡ ‘‘ꦈꦒ꧀ꦒꦲꦺꦴ’’ ꦤꦴꦩ ꦏꦩ꧀ꦩꦛ꧀ꦜꦴꦤꦱ꧀ꦱ ꦈꦒ꧀ꦒꦟ꧀ꦲꦤꦁ, ‘‘ꦥꦫꦶꦥꦸꦕ꧀ꦖꦴ’’ ꦤꦴꦩ ꦏꦩ꧀ꦩꦛ꧀ꦜꦴꦤꦱ꧀ꦱ ꦥꦫꦶꦥꦸꦕ꧀ꦖꦤꦴ, ‘‘ꦈꦥꦛ꧀ꦜꦴꦤꦁ’’ ꦤꦴꦩ ꦏꦩ꧀ꦩꦛ꧀ꦜꦴꦤꦱ꧀ꦱ ꦈꦥꦛ꧀ꦜꦴꦤꦁ, ‘‘ꦄꦥ꧀ꦥꦤꦴ’’ ꦤꦴꦩ ꦏꦩ꧀ꦩꦛ꧀ꦜꦴꦤꦥ꧀ꦥꦤꦴ, ‘‘ꦭꦏ꧀ꦑꦟꦁ’’ ꦤꦴꦩ ꦏꦩ꧀ꦩꦛ꧀ꦜꦴꦤꦱ꧀ꦱ ꦭꦏ꧀ꦑꦟꦁ. ‘‘ꦌꦮꦁꦭꦏ꧀ꦑꦟꦩꦶꦢꦁ ꦏꦩ꧀ꦩꦛ꧀ꦜꦴꦤ’’ꦤ꧀ꦠꦶ ꦏꦩ꧀ꦩꦛ꧀ꦜꦴꦤꦱꦨꦴꦮꦹꦥꦣꦴꦫꦟꦤ꧀ꦠꦶ ꦮꦸꦠ꧀ꦠꦁ ꦲꦺꦴꦠꦶ.

ꦌꦮꦁ ꦥꦚ꧀ꦕꦱꦤ꧀ꦣꦶꦏꦁ ꦏꦩ꧀ꦩꦛ꧀ꦜꦴꦤꦁ ꦈꦒ꧀ꦒꦟ꧀ꦲꦤ꧀ꦠꦺꦴ ꦄꦠ꧀ꦠꦤꦴꦥꦶ ꦤ ꦏꦶꦭꦩꦠꦶ, ꦄꦴꦕꦫꦶꦪꦩ꧀ꦥꦶ ꦤ ꦮꦶꦲꦺꦜꦺꦠꦶ; ꦠꦱ꧀ꦩꦴ ꦡꦺꦴꦏꦁ ꦈꦢ꧀ꦢꦶꦱꦴꦥꦺꦠ꧀ꦮꦴ ꦧꦲꦸꦏꦴꦭꦁ ꦱꦗ꧀ꦙꦴꦪꦶꦠ꧀ꦮꦴ ꦌꦮꦁ ꦥꦚ꧀ꦕꦱꦤ꧀ꦣꦶꦏꦁ ꦏꦩ꧀ꦩꦛ꧀ꦜꦴꦤꦁ ꦈꦒ꧀ꦒꦲꦺꦠ꧀ꦮꦴ ꦱꦕꦺ ꦠꦠ꧀ꦡ ꦱꦥ꧀ꦥꦴꦪꦁ ꦲꦺꦴꦠꦶ, ꦠꦠ꧀ꦡꦺꦮ ꦮꦱꦶꦠꦧ꧀ꦧꦁ. ꦤꦺꦴ ꦕꦺ ꦠꦠ꧀ꦡ ꦱꦥ꧀ꦥꦴꦪꦁ ꦲꦺꦴꦠꦶ, ꦄꦴꦕꦫꦶꦪꦁ ꦄꦴꦥꦸꦕ꧀ꦖꦶꦠ꧀ꦮꦴ ꦱꦕꦺ ꦩꦤ꧀ꦢꦥꦚ꧀ꦚꦺꦴ ꦪꦺꦴꦗꦤꦥꦫꦩꦁ ꦒꦤ꧀ꦠ꧀ꦮꦴ, ꦱꦕꦺ ꦠꦶꦏ꧀ꦑꦥꦚ꧀ꦚꦺꦴ ꦢꦹꦫꦩ꧀ꦥꦶ ꦒꦤ꧀ꦠ꧀ꦮꦴ ꦄꦛ꧀ꦜꦴꦫꦱꦱꦺꦤꦴꦱꦤꦢꦺꦴꦱꦮꦶꦮꦗ꧀ꦗꦶꦠꦁ, ꦥꦚ꧀ꦕꦱꦺꦤꦴꦱꦤꦔ꧀ꦒꦱꦩꦤ꧀ꦤꦴꦒꦠꦁ ꦱꦺꦤꦴꦱꦤꦁ ꦈꦥꦒꦩ꧀ꦩ ꦠꦠ꧀ꦡ ꦮꦱꦤ꧀ꦠꦺꦤ ꦈꦥꦕ꧀ꦖꦶꦤ꧀ꦤꦑꦸꦢ꧀ꦢꦏꦥꦭꦶꦧꦺꦴꦣꦺꦤ ꦏꦠꦨꦠ꧀ꦠꦏꦶꦕ꧀ꦕꦺꦤ ꦨꦠ꧀ꦠꦱꦩ꧀ꦩꦢꦁ ꦥꦛꦶꦮꦶꦤꦺꦴꦢꦺꦠ꧀ꦮꦴ ꦫꦠꦤꦠ꧀ꦠꦪꦒꦸꦟꦴꦤꦸꦱ꧀ꦱꦫꦟꦺꦤ ꦕꦶꦠ꧀ꦠꦁ ꦱꦩ꧀ꦥꦲꦁꦱꦺꦠ꧀ꦮꦴ ꦄꦴꦕꦫꦶꦪꦸꦒ꧀ꦒꦲꦠꦺꦴ ꦌꦏꦥꦢꦩ꧀ꦥꦶ ꦄꦱꦩ꧀ꦩꦸꦱ꧀ꦱꦤ꧀ꦠꦺꦤ ꦆꦢꦁ ꦄꦴꦤꦴꦥꦴꦤꦱ꧀ꦱꦠꦶꦏꦩ꧀ꦩꦛ꧀ꦜꦴꦤꦁ ꦩꦤꦱꦶꦏꦴꦠꦧ꧀ꦧꦁ. ꦄꦪꦩꦺꦠ꧀ꦡ ꦱꦔ꧀ꦑꦺꦥꦺꦴ. ꦮꦶꦠ꧀ꦡꦴꦫꦺꦴ ꦥꦤ ꦆꦩꦁ ꦏꦡꦴꦩꦒ꧀ꦒꦁ ꦆꦕ꧀ꦖꦤ꧀ꦠꦺꦤ ꦮꦶꦱꦸꦢ꧀ꦣꦶꦩꦒ꧀ꦒꦠꦺꦴ (ꦮꦶꦱꦸꦢ꧀ꦣꦶ. ꧑.꧕꧕) ꦒꦲꦺꦠꦧ꧀ꦧꦺꦴ.

ꦪꦁ ꦥꦤ ꦮꦸꦠ꧀ꦠꦁ ‘‘ꦆꦢꦁ ꦄꦴꦤꦴꦥꦴꦤꦱ꧀ꦱꦠꦶꦏꦩ꧀ꦩꦛ꧀ꦜꦴꦤꦁ ꦩꦤꦱꦶꦏꦴꦠꦧ꧀ꦧ’’ꦤ꧀ꦠꦶ ꦠꦠ꧀ꦫꦴꦪꦁ ꦩꦤꦱꦶꦏꦴꦫꦮꦶꦣꦶ –

‘‘ꦒꦟꦤꦴ ꦄꦤꦸꦧꦤ꧀ꦣꦤꦴ, ꦦꦸꦱꦤꦴ ꦜꦥꦤꦴ ꦱꦭ꧀ꦭꦏ꧀ꦑꦟꦴ;

ꦮꦶꦮꦛ꧀ꦛꦤꦴ ꦥꦴꦫꦶꦱꦸꦢ꧀ꦣꦶ, ꦠꦺꦱꦚ꧀ꦕ ꦥꦛꦶꦥꦱ꧀ꦱꦤꦴ’’ꦠꦶ. (ꦮꦶꦱꦸꦢ꧀ꦣꦶ. ꧑.꧒꧒꧓; ꦥꦛꦶ. ꦩ. ꦄꦛ꧀ꦜ. ꧒.꧑.꧑꧖꧓);

‘‘ꦒꦟꦤꦴ’’ꦠꦶ ꦒꦟꦤꦴꦪꦺꦮ. ‘‘ꦄꦤꦸꦧꦤ꧀ꦣꦤꦴ’’ꦠꦶ ꦄꦤꦸꦮꦲꦤꦴ. ‘‘ꦦꦸꦱꦤꦴ’’ꦠꦶ ꦦꦸꦛ꧀ꦜꦛ꧀ꦜꦴꦤꦁ. ‘‘ꦜꦥꦤꦴ’’ꦠꦶ ꦄꦥ꧀ꦥꦤꦴ. ‘‘ꦱꦭ꧀ꦭꦏ꧀ꦑꦟꦴ’’ꦠꦶ ꦮꦶꦥꦱ꧀ꦱꦤꦴ. ‘‘ꦮꦶꦮꦛ꧀ꦛꦤꦴ’’ꦠꦶ ꦩꦒ꧀ꦒꦺꦴ. ‘‘ꦥꦴꦫꦶꦱꦸꦢ꧀ꦣꦷ’’ꦠꦶ ꦦꦭꦁ. ‘‘ꦠꦺꦱꦚ꧀ꦕ ꦥꦛꦶꦥꦱ꧀ꦱꦤꦴ’’ꦠꦶ ꦥꦕ꧀ꦕꦮꦺꦏ꧀ꦑꦟꦴ. ꦠꦠ꧀ꦡ ꦆꦩꦶꦤꦴ ꦄꦴꦢꦶꦏꦩ꧀ꦩꦶꦏꦏꦸꦭꦥꦸꦠ꧀ꦠꦺꦤ ꦥꦜꦩꦁ ꦒꦟꦤꦴꦪ ꦆꦢꦁ ꦏꦩꦛ꧀ꦜꦴꦤꦁ ꦩꦤꦱꦶꦏꦴꦠꦧ꧀ꦧꦁ. ꦒꦟꦺꦤ꧀ꦠꦺꦤ ꦕ ꦥꦚ꧀ꦕꦤ꧀ꦤꦁ ꦲꦺꦛ꧀ꦜꦴ ꦤ ꦜꦥꦺꦠꦧ꧀ꦧꦁ, ꦢꦱꦤ꧀ꦤꦁ ꦈꦥꦫꦶ ꦤ ꦤꦺꦠꦧ꧀ꦧꦁ, ꦄꦤ꧀ꦠꦫꦺ ꦑꦟ꧀ꦝꦁ ꦤ ꦢꦱ꧀ꦱꦺꦠꦧ꧀ꦧꦁ. ꦥꦚ꧀ꦕꦤ꧀ꦤꦁ ꦲꦺꦛ꧀ꦜꦴ ꦜꦥꦺꦤ꧀ꦠꦱ꧀ꦱ ꦲꦶ ꦱꦩ꧀ꦧꦴꦣꦺ ꦎꦏꦴꦱꦺ ꦕꦶꦠ꧀ꦠꦸꦥ꧀ꦥꦴꦢꦺꦴ ꦮꦶꦥ꧀ꦦꦤ꧀ꦢꦠꦶ, ꦱꦩ꧀ꦧꦴꦣꦺ ꦮꦗꦺ ꦱꦤ꧀ꦤꦶꦫꦸꦢ꧀ꦣꦒꦺꦴꦒꦟꦺꦴ ꦮꦶꦪ. ꦢꦱꦤ꧀ꦤꦁ ꦈꦥꦫꦶ ꦤꦺꦤ꧀ꦠꦱ꧀ꦱ ꦒꦟꦤꦴꦤꦶꦱ꧀ꦱꦶꦠꦺꦴꦮ ꦕꦶꦠ꧀ꦠꦸꦥ꧀ꦥꦴꦢꦺꦴ ꦲꦺꦴꦠꦶ. ꦄꦤ꧀ꦠꦫꦴ ꦑꦟ꧀ꦝꦁ ꦢꦱ꧀ꦱꦺꦤ꧀ꦠꦱ꧀ꦱ ‘‘ꦱꦶꦑꦴꦥ꧀ꦥꦠ꧀ꦠꦁ ꦤꦸ ꦑꦺꦴ ꦩꦺ ꦏꦩ꧀ꦩꦛ꧀ꦜꦴꦤꦁ, ꦤꦺꦴ’’ꦠꦶ ꦕꦶꦠ꧀ꦠꦁ ꦮꦶꦏꦩ꧀ꦥꦠꦶ. ꦠꦱ꧀ꦩꦴ ꦌꦠꦺ ꦢꦺꦴꦱꦺ ꦮꦗ꧀ꦗꦺꦠ꧀ꦮꦴ ꦒꦟꦺꦠꦧ꧀ꦧꦁ.

ꦒꦟꦺꦤ꧀ꦠꦺꦤ ꦕ ꦥꦜꦩꦁ ꦢꦤ꧀ꦣꦒꦟꦤꦴꦪ ꦣꦚ꧀ꦚꦩꦴꦥꦏꦒꦟꦤꦴꦪ ꦒꦟꦺꦠꦧ꧀ꦧꦁ. ꦣꦚ꧀ꦚꦩꦴꦥꦏꦺꦴ ꦲꦶ ꦤꦴꦭ꦳ꦶꦁ ꦥꦹꦫꦺꦠ꧀ꦮꦴ ‘‘ꦌꦏ’’ꦤ꧀ꦠꦶ ꦮꦠ꧀ꦮꦴ ꦎꦏꦶꦫꦠꦶ. ꦥꦸꦤ ꦥꦹꦫꦺꦤ꧀ꦠꦺꦴ ꦏꦶꦚ꧀ꦕꦶ ꦏꦕꦮꦫꦁ ꦢꦶꦱ꧀ꦮꦴ ꦠꦁ ꦖꦝ꧀ꦝꦺꦤ꧀ꦠꦺꦴ ‘‘ꦌꦏꦁ ꦌꦏ’’ꦤ꧀ꦠꦶ ꦮꦢꦠꦶ. ꦌꦱ ꦤꦪꦺꦴ ‘‘ꦢ꧀ꦮꦺ ꦢ꧀ꦮꦺ’’ꦠꦶꦄꦴꦢꦷꦱꦸ. ꦌꦮꦩꦺꦮ ꦆꦩꦶꦤꦴꦥꦶ ꦄꦱ꧀ꦱꦴꦱꦥꦱ꧀ꦱꦴꦱꦺꦱꦸ ꦪꦺꦴ ꦈꦥꦛ꧀ꦜꦴꦠꦶ ꦠꦁ ꦒꦲꦺꦠ꧀ꦮꦴ ‘‘ꦌꦏꦁ ꦌꦏ’’ꦤ꧀ꦠꦶ ꦄꦴꦢꦶꦁꦏꦠ꧀ꦮꦴ ꦪꦴꦮ ‘‘ꦢꦱ ꦢꦱꦴ’’ꦠꦶ ꦥꦮꦠ꧀ꦠꦩꦴꦤꦁ ꦥꦮꦠ꧀ꦠꦩꦴꦤꦁ ꦈꦥꦭꦏ꧀ꦑꦺꦠ꧀ꦮꦴꦮ ꦒꦟꦺꦠꦧ꧀ꦧꦁ. ꦠꦱ꧀ꦱꦺꦮꦁ ꦒꦟꦪꦠꦺꦴ ꦤꦶꦏ꧀ꦑꦩꦤ꧀ꦠꦴ ꦕ ꦥꦮꦶꦱꦤ꧀ꦠꦴ ꦕ ꦄꦱ꧀ꦱꦴꦱꦥꦱ꧀ꦱꦴꦱꦴ ꦥꦴꦏꦛꦴ ꦲꦺꦴꦤ꧀ꦠꦶ.

ꦄꦡꦴꦤꦺꦤ ꦠꦁ ꦢꦤ꧀ꦣꦒꦟꦤꦁ ꦣꦚ꧀ꦚꦩꦴꦥꦏꦒꦟꦤꦁ ꦥꦲꦴꦪ ꦱꦷꦓꦒꦟꦤꦴꦪ ꦒꦺꦴꦥꦴꦭꦏꦒꦟꦤꦴꦪ ꦒꦟꦺꦠꦧ꧀ꦧꦁ. ꦖꦺꦏꦺꦴ ꦲꦶ ꦒꦺꦴꦥꦴꦭꦏꦺꦴ ꦱꦏ꧀ꦑꦫꦴꦪꦺꦴ ꦈꦕ꧀ꦖꦔ꧀ꦒꦺꦤ ꦒꦲꦺꦠ꧀ꦮꦴ ꦫꦗ꧀ꦗꦸꦢꦟ꧀ꦝꦲꦠ꧀ꦡꦺꦴ ꦥꦴꦠꦺꦴꦮ ꦮꦗꦁ ꦒꦤ꧀ꦠ꧀ꦮꦴ ꦒꦴꦮꦺꦴ ꦥꦶꦛ꧀ꦜꦶꦪꦁ ꦥꦲꦫꦶꦠ꧀ꦮꦴ ꦥꦭꦶꦓꦠ꧀ꦡꦩ꧀ꦨꦩꦠ꧀ꦡꦏꦺ ꦤꦶꦱꦶꦤ꧀ꦤꦺꦴ ꦢ꧀ꦮꦴꦫꦁ ꦥꦠ꧀ꦠꦁ ꦥꦠ꧀ꦠꦁꦪꦺꦮ ꦒꦴꦮꦁ ‘‘ꦌꦏꦺꦴ ꦢ꧀ꦮꦺ’’ꦠꦶ ꦱꦏ꧀ꦑꦫꦁ ꦑꦶꦥꦶꦠ꧀ꦮꦴ ꦑꦶꦥꦶꦠ꧀ꦮꦴ ꦒꦟꦺꦠꦶ. ꦠꦶꦪꦴꦩꦫꦠ꧀ꦠꦶꦁ ꦱꦩ꧀ꦧꦴꦣꦺ ꦎꦏꦴꦱꦺ ꦢꦸꦏ꧀ꦑꦁ ꦮꦸꦠ꧀ꦡꦒꦺꦴꦒꦟꦺꦴ ꦤꦶꦏ꧀ꦑꦩꦤ꧀ꦠꦺꦴ ꦄꦚ꧀ꦚꦩꦚ꧀ꦚꦁ ꦈꦥꦤꦶꦓꦁꦱꦤ꧀ꦠꦺꦴ ꦮꦺꦒꦺꦤ ꦮꦺꦒꦺꦤ ꦥꦸꦚ꧀ꦗꦺꦴ ꦥꦸꦚ꧀ꦗꦺꦴ ꦲꦸꦠ꧀ꦮꦴ ꦤꦶꦏ꧀ꦑꦩꦠꦶ. ꦱꦺꦴ ꦮꦺꦒꦺꦤ ꦮꦺꦒꦺꦤ ‘‘ꦠꦷꦟꦶ ꦕꦠ꧀ꦠꦴꦫꦶ ꦥꦚ꧀ꦕ ꦢꦱꦴ’’ꦠꦶ ꦒꦟꦺꦠꦶꦪꦺꦮ. ꦌꦮꦩꦶꦩꦱ꧀ꦱꦴꦥꦶ ꦥꦸꦫꦶꦩꦤꦪꦺꦤ ꦒꦟꦪꦠꦺꦴ ꦄꦱ꧀ꦱꦴꦱꦥꦱ꧀ꦱꦴꦱꦴ ꦥꦴꦏꦛꦴ ꦲꦸꦠ꧀ꦮꦴ ꦱꦷꦓꦁ ꦱꦷꦓꦁ ꦥꦸꦤꦥ꧀ꦥꦸꦤꦁ ꦱꦚ꧀ꦕꦫꦤ꧀ꦠꦶ. ꦠꦠꦺꦴ ꦠꦺꦤ ‘‘ꦥꦸꦤꦥ꧀ꦥꦸꦤꦁ ꦱꦚ꧀ꦕꦫꦤ꧀ꦠꦷ’’ꦠꦶ ꦚꦠ꧀ꦮꦴ ꦄꦤ꧀ꦠꦺꦴ ꦕ ꦧꦲꦶ ꦕ ꦄꦒ꧀ꦒꦲꦺꦠ꧀ꦮꦴ ꦢ꧀ꦮꦴꦫꦥ꧀ꦥꦠ꧀ꦠꦁ ꦢ꧀ꦮꦴꦫꦥ꧀ꦥꦠ꧀ꦠꦁꦪꦺꦮ ꦒꦲꦺꦠ꧀ꦮꦴ ‘‘ꦌꦏꦺꦴ ꦢ꧀ꦮꦺ ꦠꦷꦟꦶ ꦕꦠ꧀ꦠꦴꦫꦶ ꦥꦚ꧀ꦕ, ꦌꦏꦺꦴ ꦢ꧀ꦮꦺ ꦠꦷꦟꦶ ꦕꦠ꧀ꦠꦴꦫꦶ ꦥꦚ꧀ꦕ ꦖ, ꦌꦏꦺꦴ ꦢ꧀ꦮꦺ ꦠꦷꦟꦶ ꦕꦠ꧀ꦠꦴꦫꦶ ꦥꦚ꧀ꦕ ꦖ ꦱꦠ꧀ꦠ…ꦥꦺ… ꦄꦛ꧀ꦜ… ꦤꦮ… ꦢꦱꦴ’’ꦠꦶ ꦱꦷꦓꦁ ꦱꦷꦓꦁ ꦒꦟꦺꦠꦧ꧀ꦧꦩꦺꦮ. ꦒꦟꦤꦴꦥꦛꦶꦧꦢ꧀ꦣꦺ ꦲꦶ ꦏꦩ꧀ꦩꦛ꧀ꦜꦴꦤꦺ ꦒꦟꦤꦴꦧꦭꦺꦤꦺꦮ ꦕꦶꦠ꧀ꦠꦁ ꦌꦏꦒ꧀ꦒꦁ ꦲꦺꦴꦠꦶ ꦄꦫꦶꦠ꧀ꦠꦹꦥꦠ꧀ꦡꦩ꧀ꦨꦤꦮꦱꦺꦤ ꦕꦟ꧀ꦝꦱꦺꦴꦠꦺ ꦤꦴꦮꦴꦜꦥꦤꦩꦶꦮ.

ꦠꦱ꧀ꦱꦺꦮꦁ ꦱꦷꦓꦁ ꦱꦷꦓꦁ ꦒꦟꦪꦠꦺꦴ ꦏꦩ꧀ꦩꦛ꧀ꦜꦴꦤꦁ ꦤꦶꦫꦤ꧀ꦠꦫꦥ꧀ꦥꦮꦠ꧀ꦠꦁ ꦮꦶꦪ ꦲꦸꦠ꧀ꦮꦴ ꦈꦥꦛ꧀ꦜꦴꦠꦶ. ꦄꦡ ‘‘ꦤꦶꦫꦤ꧀ꦠꦫꦁ ꦥꦮꦠ꧀ꦠꦠꦷ’’ꦠꦶ ꦚꦠ꧀ꦮꦴ ꦄꦤ꧀ꦠꦺꦴ ꦕ ꦧꦲꦶ ꦕ ꦮꦴꦠꦁ ꦄꦥꦫꦶꦒ꧀ꦒꦲꦺꦠ꧀ꦮꦴ ꦥꦸꦫꦶꦩꦤꦪꦺꦤꦺꦮ ꦮꦺꦒꦺꦤ ꦮꦺꦒꦺꦤ ꦒꦟꦺꦠꦧ꧀ꦧꦁ. ꦄꦤ꧀ꦠꦺꦴꦥꦮꦶꦱꦤꦮꦴꦠꦺꦤ ꦲꦶ ꦱꦢ꧀ꦣꦶꦁ ꦕꦶꦠ꧀ꦠꦁ ꦥꦮꦺꦱꦪꦠꦺꦴ ꦄꦧ꧀ꦨꦤ꧀ꦠꦫꦁ ꦮꦴꦠꦧ꧀ꦨꦴꦲꦠꦁ ꦩꦺꦢꦥꦹꦫꦶꦠꦁ ꦮꦶꦪ ꦲꦺꦴꦠꦶ, ꦧꦲꦶꦤꦶꦏ꧀ꦑꦩꦤꦮꦴꦠꦺꦤ ꦱꦢ꧀ꦣꦶꦁ ꦕꦶꦠ꧀ꦠꦁ ꦤꦷꦲꦫꦠꦺꦴ ꦧꦲꦶꦢ꧀ꦣꦴ ꦥꦸꦡꦸꦠ꧀ꦠꦴꦫꦩ꧀ꦩꦟꦺ ꦕꦶꦠ꧀ꦠꦁ ꦮꦶꦏ꧀ꦑꦶꦥꦠꦶ. ꦦꦸꦛ꧀ꦜꦺꦴꦏꦴꦱꦺ ꦥꦤ ꦱꦠꦶꦁ ꦜꦥꦺꦠ꧀ꦮꦴ ꦨꦴꦮꦺꦤ꧀ꦠꦱ꧀ꦱꦺꦮ ꦨꦴꦮꦤꦴ ꦱꦩ꧀ꦥꦗ꧀ꦗꦠꦶ. ꦠꦺꦤ ꦮꦸꦠ꧀ꦠꦁ – ‘‘ꦄꦤ꧀ꦠꦺꦴ ꦕ ꦧꦲꦶ ꦕ ꦮꦴꦠꦁ ꦄꦥꦫꦶꦒ꧀ꦒꦲꦺꦠ꧀ꦮꦴ ꦥꦸꦫꦶꦩꦤꦪꦺꦤꦺꦮ ꦮꦺꦒꦺꦤ ꦮꦺꦒꦺꦤ ꦒꦟꦺꦠꦧ꧀ꦧ’’ꦤ꧀ꦠꦶ.

ꦏꦷꦮ ꦕꦶꦫꦁ ꦥꦤꦺꦠꦁ ꦒꦟꦺꦠꦧ꧀ꦧꦤ꧀ꦠꦶ? ꦪꦴꦮ ꦮꦶꦤꦴ ꦒꦟꦤꦴꦪ ꦄꦱ꧀ꦱꦴꦱꦥꦱ꧀ꦱꦴꦱꦴꦫꦩ꧀ꦩꦟꦺ ꦱꦠꦶ ꦱꦤ꧀ꦠꦶꦛ꧀ꦜꦠꦶ. ꦧꦲꦶ ꦮꦶꦱꦛꦮꦶꦠꦏ꧀ꦏꦮꦶꦕ꧀ꦖꦺꦢꦁ ꦏꦠ꧀ꦮꦴ ꦄꦱ꧀ꦱꦴꦱꦥꦱ꧀ꦱꦴꦱꦴꦫꦩ꧀ꦩꦟꦺ ꦱꦠꦶ ꦱꦟ꧀ꦜꦥꦤꦠ꧀ꦡꦁꦪꦺꦮ ꦲꦶ ꦒꦟꦤꦴꦠꦶ.

ꦌꦮꦁ ꦒꦟꦤꦴꦪ ꦩꦤꦱꦶꦏꦠ꧀ꦮꦴ ꦄꦤꦸꦧꦤ꧀ꦣꦤꦴꦪ ꦩꦤꦱꦶꦏꦴꦠꦧ꧀ꦧꦁ. ꦄꦤꦸꦧꦤ꧀ꦣꦤꦴ ꦤꦴꦩ ꦒꦟꦤꦁ ꦥꦛꦶꦱꦁꦲꦫꦶꦠ꧀ꦮꦴ ꦱꦠꦶꦪꦴ ꦤꦶꦫꦤ꧀ꦠꦫꦁ ꦄꦱ꧀ꦱꦴꦱꦥꦱ꧀ꦱꦴꦱꦴꦤꦁ ꦄꦤꦸꦒꦩꦤꦁ; ꦠꦚ꧀ꦕ ꦑꦺꦴ ꦤ ꦄꦴꦢꦶꦩꦗ꧀ꦙꦥꦫꦶꦪꦺꦴꦱꦴꦤꦴꦤꦸꦒꦩꦤꦮꦱꦺꦤ. ꦧꦲꦶꦤꦶꦏ꧀ꦑꦩꦤꦮꦴꦠꦱ꧀ꦱ ꦲꦶ ꦤꦴꦨꦶ ꦄꦴꦢꦶ, ꦲꦢꦪꦁ ꦩꦗ꧀ꦙꦁ, ꦤꦴꦱꦶꦏꦒ꧀ꦒꦁ ꦥꦫꦶꦪꦺꦴꦱꦴꦤꦁ. ꦄꦧ꧀ꦨꦤ꧀ꦠꦫꦥꦮꦶꦱꦤꦮꦴꦠꦱ꧀ꦱ ꦤꦴꦱꦶꦏꦒ꧀ꦒꦁ ꦄꦴꦢꦶ, ꦲꦢꦪꦁ ꦩꦗ꧀ꦙꦁ, ꦤꦴꦨꦶ ꦥꦫꦶꦪꦺꦴꦱꦴꦤꦁ. ꦠꦚ꧀ꦕꦱ꧀ꦱ ꦄꦤꦸꦒꦕ꧀ꦖꦠꦺꦴ ꦮꦶꦏ꧀ꦑꦺꦥꦒꦠꦁ ꦕꦶꦠ꧀ꦠꦁ ꦱꦴꦫꦢ꧀ꦣꦴꦪ ꦕꦺꦮ ꦲꦺꦴꦠꦶ ꦆꦚ꧀ꦗꦤꦴꦪ ꦕ. ꦪꦡꦴꦲ –

‘‘ꦄꦱ꧀ꦱꦴꦱꦴꦢꦶꦩꦗ꧀ꦙꦥꦫꦶꦪꦺꦴꦱꦴꦤꦁ ꦱꦠꦶꦪꦴ ꦄꦤꦸꦒꦕ꧀ꦖꦠꦺꦴ ꦄꦗ꧀ꦙꦠ꧀ꦠꦁ ꦮꦶꦏ꧀ꦑꦺꦥꦒꦠꦺꦤ ꦕꦶꦠ꧀ꦠꦺꦤ ꦏꦴꦪꦺꦴꦥꦶ ꦕꦶꦠ꧀ꦠꦩ꧀ꦥꦶ ꦱꦴꦫꦢ꧀ꦣꦴ ꦕ ꦲꦺꦴꦤ꧀ꦠꦶ ꦆꦚ꧀ꦗꦶꦠꦴ ꦕ ꦦꦤ꧀ꦢꦶꦠꦴ ꦕ. ꦥꦱ꧀ꦱꦴꦱꦴꦢꦶꦩꦗ꧀ꦙꦥꦫꦶꦪꦺꦴꦱꦴꦤꦁ ꦱꦠꦶꦪꦴ ꦄꦤꦸꦒꦕ꧀ꦖꦠꦺꦴ ꦧꦲꦶꦢ꧀ꦣꦴ ꦮꦶꦏ꧀ꦑꦺꦥꦒꦠꦺꦤ ꦕꦶꦠ꧀ꦠꦺꦤ ꦏꦴꦪꦺꦴꦥꦶ ꦕꦶꦠ꧀ꦠꦩ꧀ꦥꦶ ꦱꦴꦫꦢ꧀ꦣꦴ ꦕ ꦲꦺꦴꦤ꧀ꦠꦶ ꦆꦚ꧀ꦗꦶꦠꦴ ꦕ ꦦꦤ꧀ꦢꦶꦠꦴ ꦕꦴ’’ꦠꦶ (ꦥꦛꦶ. ꦩ. ꧑.꧑꧕꧗).

ꦠꦱ꧀ꦩꦴ ꦄꦤꦸꦧꦤ꧀ꦣꦤꦴꦪ ꦩꦤꦱꦶꦏꦫꦺꦴꦤ꧀ꦠꦺꦤ ꦤ ꦄꦴꦢꦶꦩꦗ꧀ꦙꦥꦫꦶꦪꦺꦴꦱꦴꦤꦮꦱꦺꦤ ꦩꦤꦱꦶꦏꦴꦠꦧ꧀ꦧꦁ. ꦄꦥꦶꦕ ꦑꦺꦴ ꦦꦸꦱꦤꦴꦮꦱꦺꦤ ꦕ ꦜꦥꦤꦴꦮꦱꦺꦤ ꦕ ꦩꦤꦱꦶꦏꦴꦠꦧ꧀ꦧꦁ. ꦒꦟꦤꦴꦤꦸꦧꦤ꧀ꦣꦤꦴꦮꦱꦺꦤ ꦮꦶꦪ ꦲꦶ ꦦꦸꦱꦤꦴꦜꦥꦤꦴꦮꦱꦺꦤ ꦮꦶꦱꦸꦁ ꦩꦤꦱꦶꦏꦴꦫꦺꦴ ꦤꦠ꧀ꦡꦶ. ꦦꦸꦛ꧀ꦜꦦꦸꦛ꧀ꦜꦛ꧀ꦜꦴꦤꦺꦪꦺꦮ ꦥꦤ ꦒꦟꦺꦤ꧀ꦠꦺꦴ ꦒꦟꦤꦴꦪ ꦕ ꦦꦸꦱꦤꦴꦪ ꦕ ꦩꦤꦱꦶ ꦏꦫꦺꦴꦠꦶ. ꦠꦠ꧀ꦡꦺꦮ ꦒꦟꦤꦁ ꦥꦛꦶꦱꦁꦲꦫꦶꦠ꧀ꦮꦴ ꦠꦺ ꦱꦠꦶꦪꦴ ꦄꦤꦸꦧꦤ꧀ꦣꦤ꧀ꦠꦺꦴ ꦄꦥ꧀ꦥꦤꦴꦮꦱꦺꦤ ꦕ ꦕꦶꦠ꧀ꦠꦁ ꦜꦥꦺꦤ꧀ꦠꦺꦴ ‘‘ꦄꦤꦸꦧꦤ꧀ꦣꦤꦴꦪ ꦕ ꦦꦸꦱꦤꦴꦪ ꦕ ꦜꦥꦤꦴꦪ ꦕ ꦩꦤꦱꦶ ꦏꦫꦺꦴꦠꦷ’’ꦠꦶ ꦮꦸꦕ꧀ꦕꦠꦶ. ꦱ꧀ꦮꦴꦪꦩꦠ꧀ꦡꦺꦴ ꦄꦛ꧀ꦜꦏꦡꦴꦪꦁ ꦮꦸꦠ꧀ꦠꦥꦔ꧀ꦒꦸꦭ꦳ꦢꦺꦴꦮꦴꦫꦶꦏꦺꦴꦥꦩꦴꦲꦶ ꦥꦛꦶꦱꦩ꧀ꦨꦶꦢꦴꦪꦁ ꦮꦸꦠ꧀ꦠꦏꦏꦕꦺꦴꦥꦩꦴꦪ ꦕ ꦮꦺꦢꦶꦠꦧ꧀ꦧꦺꦴ.

ꦠꦠ꧀ꦫꦴꦪꦁ ꦥꦔ꧀ꦒꦸꦭ꦳ꦺꦴꦥꦩꦴ – ‘‘ꦱꦺꦪ꧀ꦪꦡꦴꦥꦶ ꦥꦔ꧀ꦒꦸꦭ꦳ꦺꦴ ꦢꦺꦴꦭꦴꦪ ꦏꦷꦭ꦳ꦠꦁ ꦩꦴꦠꦴꦥꦸꦠ꧀ꦠꦴꦤꦁ ꦢꦺꦴꦭꦁ ꦑꦶꦥꦶꦠ꧀ꦮꦴ ꦠꦠ꧀ꦡꦺꦮ ꦢꦺꦴꦭꦠ꧀ꦡꦩ꧀ꦨꦩꦹꦭꦺ ꦤꦶꦱꦶꦤ꧀ꦤꦺꦴ ꦏꦩꦺꦤ ꦄꦴꦒꦕ꧀ꦖꦤ꧀ꦠꦱ꧀ꦱ ꦕ ꦒꦕ꧀ꦖꦤ꧀ꦠꦱ꧀ꦱ ꦕ ꦢꦺꦴꦭꦴꦦꦭꦏꦱ꧀ꦱ ꦈꦨꦺꦴ ꦏꦺꦴꦛꦶꦪꦺꦴ ꦩꦗ꧀ꦙꦚ꧀ꦕ ꦥꦱ꧀ꦱꦠꦶ, ꦤ ꦕ ꦈꦨꦺꦴꦏꦺꦴꦛꦶꦩꦗ꧀ꦙꦴꦤꦁ ꦢꦱ꧀ꦱꦤꦠ꧀ꦡꦁ ꦧ꧀ꦪꦴꦮꦛꦺꦴ ꦲꦺꦴꦠꦶ. ꦌꦮꦩꦺꦮꦴꦪꦁ ꦨꦶꦏ꧀ꦑꦸ ꦱꦠꦶꦮꦱꦺꦤ ꦈꦥꦤꦶꦧꦤ꧀ꦣꦤꦠ꧀ꦡꦩ꧀ꦨꦩꦹꦭꦺ ꦜꦠ꧀ꦮꦴ ꦄꦱ꧀ꦱꦴꦱꦥꦱ꧀ꦱꦴꦱꦢꦺꦴꦭꦁ ꦑꦶꦥꦶꦠ꧀ꦮꦴ ꦠꦠ꧀ꦡꦺꦮ ꦤꦶꦩꦶꦠ꧀ꦠꦺ ꦱꦠꦶꦪꦴ ꦤꦶꦱꦶꦤ꧀ꦤꦺꦴ ꦏꦩꦺꦤ ꦄꦴꦒꦕ꧀ꦖꦤ꧀ꦠꦴꦤꦚ꧀ꦕ ꦒꦕ꧀ꦖꦤ꧀ꦠꦴꦤꦚ꧀ꦕ ꦦꦸꦛ꧀ꦜꦛ꧀ꦜꦴꦤꦺ ꦄꦱ꧀ꦱꦴꦱꦥꦱ꧀ꦱꦴꦱꦴꦤꦁ ꦄꦴꦢꦶꦩꦗ꧀ꦙꦥꦫꦶꦪꦺꦴꦱꦴꦤꦁ ꦱꦠꦶꦪꦴ ꦄꦤꦸꦒꦕ꧀ꦖꦤ꧀ꦠꦺꦴ ꦠꦠ꧀ꦡ ꦕ ꦕꦶꦠ꧀ꦠꦁ ꦜꦥꦺꦤ꧀ꦠꦺꦴ ꦥꦱ꧀ꦱꦠꦶ, ꦤ ꦕ ꦠꦺꦱꦁ ꦢꦱ꧀ꦱꦤꦠ꧀ꦡꦁ ꦧ꧀ꦪꦴꦮꦛꦺꦴ ꦲꦺꦴꦠꦶ. ꦄꦪꦁ ꦥꦔ꧀ꦒꦸꦭ꦳ꦺꦴꦥꦩꦴ.

ꦄꦪꦁ ꦥꦤ ꦢꦺꦴꦮꦴꦫꦶꦏꦺꦴꦥꦩꦴ – ‘‘ꦱꦺꦪ꧀ꦪꦡꦴꦥꦶ ꦢꦺꦴꦮꦴꦫꦶꦏꦺꦴ ꦤꦒꦫꦱ꧀ꦱ ꦄꦤ꧀ꦠꦺꦴ ꦕ ꦧꦲꦶ ꦕ ꦥꦸꦫꦶꦱꦺ ‘ꦏꦺꦴ ꦠ꧀ꦮꦁ, ꦏꦸꦠꦺꦴ ꦮꦴ ꦄꦴꦒꦠꦺꦴ, ꦏꦸꦲꦶꦁ ꦮꦴ ꦒꦕ꧀ꦖꦱꦶ, ꦏꦶꦁ ꦮꦴ ꦠꦺ ꦲꦠ꧀ꦡꦺ’ꦠꦶ ꦤ ꦮꦷꦩꦁꦱꦠꦶ, ꦤ ꦲꦶ ꦠꦱ꧀ꦱ ꦠꦺ ꦨꦴꦫꦴ. ꦢ꧀ꦮꦴꦫꦥ꧀ꦥꦠ꧀ꦠꦁ ꦢ꧀ꦮꦴꦫꦥ꧀ꦥꦠ꧀ꦠꦁꦪꦺꦮ ꦥꦤ ꦮꦷꦩꦁꦱꦠꦶ; ꦌꦮꦩꦺꦮ ꦆꦩꦱ꧀ꦱ ꦨꦶꦏ꧀ꦑꦸꦤꦺꦴ ꦄꦤ꧀ꦠꦺꦴ ꦥꦮꦶꦛ꧀ꦜꦮꦴꦠꦴ ꦕ ꦧꦲꦶ ꦤꦶꦏ꧀ꦑꦤ꧀ꦠꦮꦴꦠꦴ ꦕ ꦤ ꦨꦴꦫꦴ ꦲꦺꦴꦤ꧀ꦠꦶ, ꦢ꧀ꦮꦴꦫꦥ꧀ꦥꦠ꧀ꦠꦴ ꦢ꧀ꦮꦴꦫꦥ꧀ꦥꦠ꧀ꦠꦴꦪꦺꦮ ꦨꦴꦫꦴꦠꦶ. ꦄꦪꦁ ꦢꦺꦴꦮꦴꦫꦶꦏꦺꦴꦥꦩꦴ.

ꦏꦏꦕꦺꦴꦥꦩꦴ ꦥꦤ ꦄꦴꦢꦶꦠꦺꦴꦥꦨꦸꦠꦶ ꦌꦮꦁ ꦮꦺꦢꦶꦠꦧ꧀ꦧꦴ. ꦮꦸꦠ꧀ꦠꦚ꧀ꦲꦺꦠꦁ –

‘‘ꦤꦶꦩꦶꦠ꧀ꦠꦁ ꦄꦱ꧀ꦱꦴꦱꦥꦱ꧀ꦱꦴꦱꦴ, ꦄꦤꦴꦫꦩ꧀ꦩꦟꦩꦺꦏꦕꦶꦠ꧀ꦠꦱ꧀ꦱ;

ꦄꦗꦴꦤꦠꦺꦴ ꦕ ꦠꦪꦺꦴ ꦣꦩ꧀ꦩꦺ, ꦨꦴꦮꦤꦴꦤꦸꦥꦭꦧ꧀ꦨꦠꦶ.

‘‘ꦤꦶꦩꦶꦠ꧀ꦠꦁ ꦄꦱ꧀ꦱꦴꦱꦥꦱ꧀ꦱꦴꦱꦴ, ꦄꦤꦴꦫꦩ꧀ꦩꦟꦩꦺꦏꦕꦶꦠ꧀ꦠꦱ꧀ꦱ;

ꦗꦴꦤꦠꦺꦴ ꦕ ꦠꦪꦺꦴ ꦣꦩ꧀ꦩꦺ, ꦨꦴꦮꦤꦴ ꦈꦥꦭꦧ꧀ꦨꦠꦷ’’ꦠꦶ. (ꦥꦛꦶ. ꦩ. ꧑.꧑꧕꧙);

ꦏꦡꦁ ꦆꦩꦺ ꦠꦪꦺꦴ ꦣꦩ꧀ꦩꦴ ꦌꦏꦕꦶꦠ꧀ꦠꦱ꧀ꦱ ꦄꦴꦫꦩ꧀ꦩꦟꦁ ꦤ ꦲꦺꦴꦤ꧀ꦠꦶ, ꦤ ꦕꦶꦩꦺ ꦠꦪꦺꦴ ꦣꦩ꧀ꦩꦴ ꦄꦮꦶꦢꦶꦠꦴ ꦲꦺꦴꦤ꧀ꦠꦶ, ꦤ ꦕ ꦕꦶꦠ꧀ꦠꦁ ꦮꦶꦏ꧀ꦑꦺꦥꦁ ꦒꦕ꧀ꦖꦠꦶ, ꦥꦣꦴꦤꦚ꧀ꦕ ꦥꦚ꧀ꦚꦴꦪꦠꦶ, ꦥꦪꦺꦴꦒꦚ꧀ꦕ ꦱꦴꦣꦺꦠꦶ, ꦮꦶꦱꦺꦱꦩꦣꦶꦒꦕ꧀ꦖꦠꦶ? ꦱꦺꦪ꧀ꦪꦡꦴꦥꦶ ꦫꦸꦏ꧀ꦑꦺꦴ ꦱꦩꦺ ꦨꦹꦩꦶꦨꦴꦒꦺ ꦤꦶꦏ꧀ꦑꦶꦠ꧀ꦠꦺꦴ, ꦠꦩꦺꦤꦁ ꦥꦸꦫꦶꦱꦺꦴ ꦏꦏꦕꦺꦤ ꦖꦶꦤ꧀ꦢꦺꦪ꧀ꦪ, ꦫꦸꦏ꧀ꦑꦺ ꦦꦸꦛ꧀ꦜꦏꦏꦕꦢꦤ꧀ꦠꦴꦤꦁ ꦮꦱꦺꦤ ꦥꦸꦫꦶꦱꦱ꧀ꦱ ꦱꦠꦶ ꦈꦥꦛ꧀ꦜꦶꦠꦴ ꦲꦺꦴꦠꦶ, ꦤ ꦄꦴꦒꦠꦺ ꦮꦴ ꦒꦠꦺ ꦮꦴ ꦏꦏꦕꦢꦤ꧀ꦠꦺ ꦩꦤꦱꦶ ꦏꦫꦺꦴꦠꦶ, ꦤ ꦄꦴꦒꦠꦴ ꦮꦴ ꦒꦠꦴ ꦮꦴ ꦏꦏꦕꦢꦤ꧀ꦠꦴ ꦄꦮꦶꦢꦶꦠꦴ ꦲꦺꦴꦤ꧀ꦠꦶ, ꦥꦣꦴꦤꦚ꧀ꦕ ꦥꦚ꧀ꦚꦴꦪꦠꦶ, ꦥꦪꦺꦴꦒꦚ꧀ꦕ ꦱꦴꦣꦺꦠꦶ.

ꦪꦡꦴ ꦫꦸꦏ꧀ꦑꦺꦴ ꦱꦩꦺ ꦨꦹꦩꦶꦨꦴꦒꦺ ꦤꦶꦏ꧀ꦑꦶꦠ꧀ꦠꦺꦴ; ꦌꦮꦁ ꦈꦥꦤꦶꦧꦤ꧀ꦣꦤꦤꦶꦩꦶꦠ꧀ꦠꦁ. ꦪꦡꦴ ꦏꦏꦕꦢꦤ꧀ꦠꦴ; ꦌꦮꦁ ꦄꦱ꧀ꦱꦴꦱꦥꦱ꧀ꦱꦴꦱꦴ. ꦪꦡꦴ ꦫꦸꦏ꧀ꦑꦺ ꦦꦸꦛ꧀ꦜꦏꦏꦕꦢꦤ꧀ꦠꦴꦤꦁ ꦮꦱꦺꦤ ꦥꦸꦫꦶꦱꦱ꧀ꦱ ꦱꦠꦶ ꦈꦥꦛ꧀ꦜꦶꦠꦴ ꦲꦺꦴꦠꦶ, ꦤ ꦄꦴꦒꦠꦺ ꦮꦴ ꦒꦠꦺ ꦮꦴ ꦏꦏꦕꦢꦤ꧀ꦠꦺ ꦩꦤꦱꦶ ꦏꦫꦺꦴꦠꦶ, ꦤ ꦄꦴꦒꦠꦴ ꦮꦴ ꦒꦠꦴ ꦮꦴ ꦏꦏꦕꦢꦤ꧀ꦠꦴ ꦄꦮꦶꦢꦶꦠꦴ ꦲꦺꦴꦤ꧀ꦠꦶ, ꦥꦣꦴꦤꦚ꧀ꦕ ꦥꦚ꧀ꦚꦴꦪꦠꦶ, ꦥꦪꦺꦴꦒꦚ꧀ꦕ ꦱꦴꦣꦺꦠꦶ, ꦌꦮꦩꦺꦮ ꦨꦶꦏ꧀ꦑꦸ ꦤꦴꦱꦶꦏꦒ꧀ꦒꦺ ꦮꦴ ꦩꦸꦑꦤꦶꦩꦶꦠ꧀ꦠꦺ ꦮꦴ ꦱꦠꦶꦁ ꦈꦥꦛ꧀ꦜꦥꦺꦠ꧀ꦮꦴ ꦤꦶꦱꦶꦤ꧀ꦤꦺꦴ ꦲꦺꦴꦠꦶ, ꦤ ꦄꦴꦒꦠꦺ ꦮꦴ ꦒꦠꦺ ꦮꦴ ꦄꦱ꧀ꦱꦴꦱꦥꦱ꧀ꦱꦴꦱꦺ ꦩꦤꦱꦶ ꦏꦫꦺꦴꦠꦶ, ꦤ ꦄꦴꦒꦠꦴ ꦮꦴ ꦒꦠꦴ ꦮꦴ ꦄꦱ꧀ꦱꦴꦱꦥꦱ꧀ꦱꦴꦱꦴ ꦄꦮꦶꦢꦶꦠꦴ ꦲꦺꦴꦤ꧀ꦠꦶ, ꦥꦣꦴꦤꦚ꧀ꦕ ꦥꦚ꧀ꦚꦴꦪꦠꦶ, ꦥꦪꦺꦴꦒꦚ꧀ꦕ ꦱꦴꦣꦺꦠꦶ, ꦮꦶꦱꦺꦱꦩꦣꦶꦒꦕ꧀ꦖꦠꦶ.

ꦥꦣꦴꦤꦤ꧀ꦠꦶ ꦏꦠꦩꦁ ꦥꦣꦴꦤꦁ? ꦄꦴꦫꦢ꧀ꦣꦮꦷꦫꦶꦪꦱ꧀ꦱ ꦏꦴꦪꦺꦴꦥꦶ ꦕꦶꦠ꧀ꦠꦩ꧀ꦥꦶ ꦏꦩ꧀ꦩꦤꦶꦪꦁ ꦲꦺꦴꦠꦶ – ꦆꦢꦁ ꦥꦣꦴꦤꦁ. ꦏꦠꦩꦺꦴ ꦥꦪꦺꦴꦒꦺꦴ? ꦄꦴꦫꦢ꧀ꦣꦮꦷꦫꦶꦪꦱ꧀ꦱ ꦈꦥꦏ꧀ꦏꦶꦭꦺꦱꦴ ꦥꦲꦷꦪꦤ꧀ꦠꦶ, ꦮꦶꦠꦏ꧀ꦏꦴ ꦮꦹꦥꦱꦩ꧀ꦩꦤ꧀ꦠꦶ – ꦄꦪꦁ ꦥꦪꦺꦴꦒꦺꦴ. ꦏꦠꦩꦺꦴ ꦮꦶꦱꦺꦱꦺꦴ? ꦄꦴꦫꦢ꧀ꦣꦮꦷꦫꦶꦪꦱ꧀ꦱ ꦱꦁꦪꦺꦴꦗꦤꦴ ꦥꦲꦷꦪꦤ꧀ꦠꦶ, ꦄꦤꦸꦱꦪꦴ ꦧ꧀ꦪꦤ꧀ꦠꦷ ꦲꦺꦴꦤ꧀ꦠꦶ – ꦄꦪꦁ ꦮꦶꦱꦺꦱꦺꦴ. ꦌꦮꦁ ꦆꦩꦺ ꦠꦪꦺꦴ ꦣꦩ꧀ꦩꦴ ꦌꦏꦕꦶꦠ꧀ꦠꦱ꧀ꦱ ꦄꦴꦫꦩ꧀ꦩꦟꦴ ꦤ ꦲꦺꦴꦤ꧀ꦠꦶ, ꦤ ꦕꦶꦩꦺ ꦠꦪꦺꦴ ꦣꦩ꧀ꦩꦴ ꦄꦮꦶꦢꦶꦠꦴ ꦲꦺꦴꦤ꧀ꦠꦶ, ꦤ ꦕ ꦕꦶꦠ꧀ꦠꦁ ꦮꦶꦏ꧀ꦑꦺꦥꦁ ꦒꦕ꧀ꦖꦠꦶ, ꦥꦣꦴꦤꦚ꧀ꦕ ꦥꦚ꧀ꦚꦴꦪꦠꦶ, ꦥꦪꦺꦴꦒꦚ꧀ꦕ ꦱꦴꦣꦺꦠꦶ, ꦮꦶꦱꦺꦱꦩꦣꦶꦒꦕ꧀ꦖꦠꦶ.

‘‘ꦄꦴꦤꦴꦥꦴꦤꦱ꧀ꦱꦠꦷ ꦪꦱ꧀ꦱ, ꦥꦫꦶꦥꦸꦟ꧀ꦟꦴ ꦱꦸꦨꦴꦮꦶꦠꦴ;

ꦄꦤꦸꦥꦸꦧ꧀ꦧꦁ ꦥꦫꦶꦕꦶꦠꦴ, ꦪꦡꦴ ꦧꦸꦢ꧀ꦣꦺꦤ ꦢꦺꦱꦶꦠꦴ;

ꦱꦺꦴ ꦆꦩꦁ ꦭꦺꦴꦏꦁ ꦥꦨꦴꦱꦺꦠꦶ, ꦄꦧ꧀ꦨꦴ ꦩꦸꦠ꧀ꦠꦺꦴꦮ ꦕꦤ꧀ꦢꦶꦩꦴ’’ꦠꦶ. (ꦥꦛꦶ. ꦩ. ꧑.꧑꧖꧐);

ꦄꦪꦁ ꦏꦏꦕꦺꦴꦥꦩꦴ. ꦆꦣ ꦥꦤꦱ꧀ꦱ ꦄꦴꦒꦠꦴꦒꦠꦮꦱꦺꦤ ꦄꦩꦤꦱꦶꦏꦴꦫꦩꦠ꧀ꦠꦩꦺꦮ ꦥꦪꦺꦴꦗꦤꦤ꧀ꦠꦶ ꦮꦺꦢꦶꦠꦧ꧀ꦧꦁ. ꦆꦢꦁ ꦏꦩ꧀ꦩꦛ꧀ꦜꦴꦤꦁ ꦩꦤꦱꦶꦏꦫꦺꦴꦠꦺꦴ ꦏꦱ꧀ꦱꦕꦶ ꦤꦕꦶꦫꦺꦤꦺꦮ ꦤꦶꦩꦶꦠ꧀ꦠꦚ꧀ꦕ ꦈꦥ꧀ꦥꦗ꧀ꦗꦠꦶ, ꦄꦮꦱꦺꦱꦗ꧀ꦙꦴꦤꦔ꧀ꦒꦥꦛꦶꦩꦟ꧀ꦝꦶꦠꦴ ꦄꦥ꧀ꦥꦤꦴꦱꦔ꧀ꦑꦴꦠꦴ ꦜꦥꦤꦴ ꦕ ꦱꦩ꧀ꦥꦗ꧀ꦗꦠꦶ. ꦏꦱ꧀ꦱꦕꦶ ꦥꦤ ꦒꦟꦤꦴꦮꦱꦺꦤꦺꦮ ꦩꦤꦱꦶꦏꦴꦫꦏꦴꦭꦠꦺꦴꦥꦨꦸꦠꦶ ꦄꦤꦸꦏ꧀ꦏꦩꦠꦺꦴ ꦎꦭ꦳ꦴꦫꦶꦏꦄꦱ꧀ꦱꦴꦱꦥꦱ꧀ꦱꦴꦱꦤꦶꦫꦺꦴꦣꦮꦱꦺꦤ ꦏꦴꦪꦢꦫꦡꦺ ꦮꦹꦥꦱꦤ꧀ꦠꦺ ꦏꦴꦪꦺꦴꦥꦶ ꦕꦶꦠ꧀ꦠꦩ꧀ꦥꦶ ꦭꦲꦸꦏꦁ ꦲꦺꦴꦠꦶ, ꦱꦫꦷꦫꦁ ꦄꦴꦏꦴꦱꦺ ꦭꦔ꧀ꦓꦤꦴꦏꦴꦫꦥ꧀ꦥꦠ꧀ꦠꦁ ꦮꦶꦪ ꦲꦺꦴꦠꦶ. ꦪꦡꦴ ꦱꦴꦫꦢ꧀ꦣꦏꦴꦪꦱ꧀ꦱ ꦩꦚ꧀ꦕꦺ ꦮꦴ ꦥꦷꦜꦺ ꦮꦴ ꦤꦶꦱꦷꦢꦠꦺꦴ ꦩꦚ꧀ꦕꦥꦷꦜꦁ ꦎꦤꦩꦠꦶ, ꦮꦶꦏꦹꦗꦠꦶ, ꦥꦕ꧀ꦕꦠ꧀ꦡꦫꦟꦁ ꦮꦭꦶꦁ ꦒꦟ꧀ꦲꦴꦠꦶ. ꦄꦱꦴꦫꦢ꧀ꦣꦏꦴꦪꦱ꧀ꦱ ꦥꦤ ꦤꦶꦱꦷꦢꦠꦺꦴ ꦤꦺꦮ ꦩꦚ꧀ꦕꦥꦷꦜꦁ ꦎꦤꦩꦠꦶ, ꦤ ꦮꦶꦏꦹꦗꦠꦶ, ꦤ ꦥꦕ꧀ꦕꦠ꧀ꦡꦫꦟꦁ ꦮꦭꦶꦁ ꦒꦟ꧀ꦲꦴꦠꦶ, ꦠꦹꦭꦥꦶꦕꦸꦥꦹꦫꦶꦠꦁ ꦮꦶꦪ ꦩꦚ꧀ꦕꦥꦷꦜꦁ ꦲꦺꦴꦠꦶ. ꦏꦱ꧀ꦩꦴ? ꦪꦱ꧀ꦩꦴ ꦄꦱꦴꦫꦢ꧀ꦣꦺꦴ ꦏꦴꦪꦺꦴ ꦭꦲꦸꦏꦺꦴ ꦲꦺꦴꦠꦶ; ꦌꦮꦩꦺꦮ ꦒꦟꦤꦴꦮꦱꦺꦤ ꦩꦤꦱꦶꦏꦴꦫꦏꦴꦭꦠꦺꦴꦥꦨꦸꦠꦶ ꦄꦤꦸꦏ꧀ꦏꦩꦠꦺꦴ ꦎꦭ꦳ꦴꦫꦶꦏꦄꦱ꧀ꦱꦴꦱꦥꦱ꧀ꦱꦴꦱꦤꦶꦫꦺꦴꦣꦮꦱꦺꦤ ꦏꦴꦪꦢꦫꦡꦺ ꦮꦹꦥꦱꦤ꧀ꦠꦺ ꦏꦴꦪꦺꦴꦥꦶ ꦕꦶꦠ꧀ꦠꦩ꧀ꦥꦶ ꦭꦲꦸꦏꦁ ꦲꦺꦴꦠꦶ, ꦱꦫꦷꦫꦁ ꦄꦴꦏꦴꦱꦺ ꦭꦔ꧀ꦓꦤꦴꦏꦴꦫꦥ꧀ꦥꦠ꧀ꦠꦁ ꦮꦶꦪ ꦲꦺꦴꦠꦶ.

ꦠꦱ꧀ꦱ ꦎꦭ꦳ꦴꦫꦶꦏꦺ ꦄꦱ꧀ꦱꦴꦱꦥꦱ꧀ꦱꦴꦱꦺ ꦤꦶꦫꦸꦢ꧀ꦣꦺ ꦱꦸꦑꦸꦩꦄꦱ꧀ꦱꦴꦱꦥꦱ꧀ꦱꦴꦱꦤꦶꦩꦶꦠ꧀ꦠꦴꦫꦩ꧀ꦩꦟꦁ ꦕꦶꦠ꧀ꦠꦁ ꦥꦮꦠ꧀ꦠꦠꦶ, ꦠꦱ꧀ꦩꦶꦩ꧀ꦥꦶ ꦤꦶꦫꦸꦢ꧀ꦣꦺ ꦄꦥꦫꦴꦥꦫꦁ ꦠꦠꦺꦴ ꦱꦸꦑꦸꦩꦠꦫꦱꦸꦑꦸꦩꦠꦩꦤꦶꦩꦶꦠ꧀ꦠꦴꦫꦩ꧀ꦩꦟꦁ ꦥꦮꦠ꧀ꦠꦠꦶꦪꦺꦮ. ꦏꦡꦁ? ꦪꦡꦴ ꦥꦸꦫꦶꦱꦺꦴ ꦩꦲꦠꦶꦪꦴ ꦭꦺꦴꦲꦱꦭꦴꦏꦴꦪ ꦏꦁꦱꦠꦴꦭ꦳ꦁ ꦄꦴꦏꦺꦴꦛꦺꦪ꧀ꦪ, ꦌꦏꦥ꧀ꦥꦲꦴꦫꦺꦤ ꦩꦲꦴꦱꦢ꧀ꦢꦺꦴ ꦈꦥ꧀ꦥꦗ꧀ꦗꦺꦪ꧀ꦪ, ꦠꦱ꧀ꦱ ꦎꦭ꦳ꦴꦫꦶꦏꦱꦢ꧀ꦢꦴꦫꦩ꧀ꦩꦟꦁ ꦕꦶꦠ꧀ꦠꦁ ꦥꦮꦠ꧀ꦠꦺꦪ꧀ꦪ, ꦤꦶꦫꦸꦢ꧀ꦣꦺ ꦎꦭ꦳ꦴꦫꦶꦏꦺ ꦱꦢ꧀ꦢꦺ ꦄꦡ ꦥꦕ꧀ꦖꦴ ꦱꦸꦑꦸꦩꦱꦢ꧀ꦢꦤꦶꦩꦶꦠ꧀ꦠꦴꦫꦩ꧀ꦩꦟꦁ, ꦠꦱ꧀ꦩꦶꦩ꧀ꦥꦶ ꦤꦶꦫꦸꦢ꧀ꦣꦺ ꦄꦥꦫꦴꦥꦫꦁ ꦠꦠꦺꦴ ꦱꦸꦑꦸꦩꦠꦫꦱꦸꦑꦸꦩꦠꦩꦱꦢ꧀ꦢꦤꦶꦩꦶꦠ꧀ꦠꦴꦫꦩ꧀ꦩꦟꦁ ꦕꦶꦠ꧀ꦠꦁ ꦥꦮꦠ꧀ꦠꦠꦺꦮ; ꦌꦮꦤ꧀ꦠꦶ ꦮꦺꦢꦶꦠꦧ꧀ꦧꦁ. ꦮꦸꦠ꧀ꦠꦩ꧀ꦥꦶ ꦕꦺꦠꦁ – ‘‘ꦱꦺꦪ꧀ꦪꦡꦴꦥꦶ ꦏꦁꦱꦺ ꦄꦴꦏꦺꦴꦛꦶꦠꦺ’’ꦠꦶ (ꦥꦛꦶ. ꦩ. ꧑.꧑꧗꧑) ꦮꦶꦠ꧀ꦡꦴꦫꦺꦴ.

ꦪꦡꦴ ꦲꦶ ꦄꦚ꧀ꦚꦴꦤꦶ ꦏꦩ꧀ꦩꦛ꧀ꦜꦴꦤꦴꦤꦶ ꦈꦥꦫꦹꦥꦫꦶ ꦮꦶꦨꦹꦠꦴꦤꦶ ꦲꦺꦴꦤ꧀ꦠꦶ, ꦤ ꦠꦡꦴ ꦆꦢꦁ. ꦆꦢꦁ ꦥꦤ ꦈꦥꦫꦹꦥꦫꦶ ꦨꦴꦮꦺꦤ꧀ꦠꦱ꧀ꦱ ꦨꦴꦮꦺꦤ꧀ꦠꦱ꧀ꦱ ꦱꦸꦑꦸꦩꦠ꧀ꦠꦁ ꦒꦕ꧀ꦖꦠꦶ, ꦈꦥꦛ꧀ꦜꦴꦤꦩ꧀ꦥꦶ ꦤ ꦈꦥꦒꦕ꧀ꦖꦠꦶ. ꦌꦮꦁ ꦄꦤꦸꦥꦛ꧀ꦜꦲꦤ꧀ꦠꦺ ꦥꦤ ꦠꦱ꧀ꦩꦶꦁ ꦤ ꦠꦺꦤ ꦨꦶꦏ꧀ꦑꦸꦤꦴ ꦈꦛ꧀ꦜꦴꦪꦴꦱꦤꦴ ꦕꦩ꧀ꦩꦑꦟ꧀ꦝꦁ ꦥꦥ꧀ꦦꦺꦴꦛꦺꦠ꧀ꦮꦴ ꦒꦤ꧀ꦠꦧ꧀ꦧꦁ. ꦏꦶꦁ ꦏꦴꦠꦧ꧀ꦧꦁ? ‘‘ꦄꦴꦕꦫꦶꦪꦁ ꦥꦸꦕ꧀ꦖꦶꦱ꧀ꦱꦴꦩꦷ’’ꦠꦶ ꦮꦴ ‘‘ꦤꦛ꧀ꦜꦁ ꦢꦴꦤꦶ ꦩꦺ ꦏꦩ꧀ꦩꦛ꧀ꦜꦴꦤ’’ꦤ꧀ꦠꦶ ꦮꦴ ꦤ ꦮꦸꦛ꧀ꦜꦴꦠꦧ꧀ꦧꦁ, ꦆꦫꦶꦪꦴꦥꦡꦁ ꦮꦶꦏꦺꦴꦥꦺꦠ꧀ꦮꦴ ꦒꦕ꧀ꦖꦠꦺꦴ ꦲꦶ ꦏꦩ꧀ꦩꦛ꧀ꦜꦴꦤꦁ ꦤꦮꦤꦮꦩꦺꦮ ꦲꦺꦴꦠꦶ. ꦠꦱ꧀ꦩꦴ ꦪꦡꦴꦤꦶꦱꦶꦤ꧀ꦤꦺꦤꦺꦮ ꦢꦺꦱꦠꦺꦴ ꦄꦴꦲꦫꦶꦠꦧ꧀ꦧꦁ.

ꦠꦠ꧀ꦫꦴꦪꦁ ꦄꦴꦲꦫꦟꦹꦥꦴꦪꦺꦴ. ꦠꦺꦤ ꦲꦶ ꦨꦶꦏ꧀ꦑꦸꦤꦴ ꦏꦩ꧀ꦩꦛ꧀ꦜꦴꦤꦱ꧀ꦱ ꦄꦤꦸꦥꦛ꧀ꦜꦲꦤꦨꦴꦮꦁ ꦚꦠ꧀ꦮꦴ ꦆꦠꦶ ꦥꦛꦶꦱꦚ꧀ꦕꦶꦏ꧀ꦑꦶꦠꦧ꧀ꦧꦁ – ‘‘ꦆꦩꦺ ꦄꦱ꧀ꦱꦴꦱꦥꦱ꧀ꦱꦴꦱꦴ ꦤꦴꦩ ꦏꦠ꧀ꦡ ꦄꦠ꧀ꦡꦶ, ꦏꦠ꧀ꦡ ꦤꦠ꧀ꦡꦶ, ꦏꦱ꧀ꦱ ꦮꦴ ꦄꦠ꧀ꦡꦶ, ꦏꦱ꧀ꦱ ꦮꦴ ꦤꦠ꧀ꦡꦷ’’ꦠꦶ. ꦄꦡꦺꦮꦁ ꦥꦛꦶꦱꦚ꧀ꦕꦶꦏ꧀ꦑꦠꦴ ‘‘ꦆꦩꦺ ꦄꦤ꧀ꦠꦺꦴꦩꦴꦠꦸꦏꦸꦕ꧀ꦖꦶꦪꦁ ꦤꦠ꧀ꦡꦶ, ꦈꦢꦏꦺ ꦤꦶꦩꦸꦒ꧀ꦒꦴꦤꦁ ꦤꦠ꧀ꦡꦶ, ꦠꦡꦴ ꦄꦱꦚ꧀ꦚꦷꦨꦹꦠꦴꦤꦁ ꦩꦠꦴꦤꦁ ꦕꦠꦸꦠ꧀ꦡꦗ꧀ꦙꦴꦤꦱꦩꦴꦥꦤ꧀ꦤꦴꦤꦁ ꦫꦹꦥꦴꦫꦹꦥꦨꦮꦱꦩꦔ꧀ꦒꦷꦤꦁ ꦤꦶꦫꦺꦴꦣꦱꦩꦴꦥꦤ꧀ꦤꦴꦤ’’ꦤ꧀ꦠꦶ ꦚꦠ꧀ꦮꦴ ꦌꦮꦁ ꦄꦠ꧀ꦠꦤꦴꦮ ꦄꦠ꧀ꦠꦴ ꦥꦛꦶꦕꦺꦴꦢꦺꦠꦧ꧀ꦧꦺꦴ – ‘‘ꦤꦤꦸ ꦠ꧀ꦮꦁ, ꦥꦟ꧀ꦝꦶꦠ, ꦤꦺꦮ ꦩꦴꦠꦸꦏꦸꦕ꧀ꦖꦶꦒꦠꦺꦴ, ꦤ ꦈꦢꦏꦺ ꦤꦶꦩꦸꦒ꧀ꦒꦺꦴ, ꦤ ꦄꦱꦚ꧀ꦚꦷꦨꦹꦠꦺꦴ, ꦤ ꦩꦠꦺꦴ, ꦤ ꦕꦠꦸꦠ꧀ꦡꦗ꧀ꦙꦴꦤꦱꦩꦄꦴꦥꦤ꧀ꦤꦺꦴ, ꦤ ꦫꦹꦥꦴꦫꦹꦥꦨꦮꦱꦩꦔ꧀ꦒꦷ, ꦤ ꦤꦶꦫꦺꦴꦣꦱꦩꦴꦥꦤ꧀ꦤꦺꦴ, ꦄꦠ꧀ꦡꦶꦪꦺꦮ ꦠꦺ ꦄꦱ꧀ꦱꦴꦱꦥꦱ꧀ꦱꦴꦱꦴ, ꦩꦤ꧀ꦢꦥꦚ꧀ꦚꦠꦴꦪ ꦥꦤ ꦥꦫꦶꦒ꧀ꦒꦲꦺꦠꦸꦁ ꦤ ꦱꦏ꧀ꦏꦺꦴꦱꦷ’’ꦠꦶ. ꦄꦡꦴꦤꦺꦤ ꦥꦏꦠꦶꦦꦸꦛ꧀ꦜꦮꦱꦺꦤꦺꦮ ꦕꦶꦠ꧀ꦠꦁ ꦜꦥꦺꦠ꧀ꦮꦴ ꦩꦤꦱꦶꦏꦴꦫꦺꦴ ꦥꦮꦠ꧀ꦠꦺꦠꦧ꧀ꦧꦺꦴ. ꦆꦩꦺ ꦲꦶ ꦢꦷꦓꦤꦴꦱꦶꦏꦱ꧀ꦱ ꦤꦴꦱꦴ ꦥꦸꦛꦁ ꦓꦛ꧀ꦛꦺꦤ꧀ꦠꦴ ꦥꦮꦠ꧀ꦠꦤ꧀ꦠꦶ, ꦫꦱ꧀ꦱꦤꦴꦱꦶꦏꦱ꧀ꦱ ꦈꦠ꧀ꦠꦫꦺꦴꦛ꧀ꦜꦁ. ꦠꦱ꧀ꦩꦴꦤꦺꦤ ꦆꦩꦁ ꦤꦴꦩ ꦜꦴꦤꦁ ꦓꦛ꧀ꦛꦺꦤ꧀ꦠꦷꦠꦶ ꦤꦶꦩꦶꦠ꧀ꦠꦁ ꦥꦛ꧀ꦜꦥꦺꦠꦧ꧀ꦧꦁ. ꦆꦩꦩꦺꦮ ꦲꦶ ꦄꦠ꧀ꦡꦮꦱꦁ ꦥꦛꦶꦕ꧀ꦕ ꦮꦸꦠ꧀ꦠꦁ ꦨꦒꦮꦠꦴ – ‘‘ꦤꦴꦲꦁ, ꦨꦶꦏ꧀ꦑꦮꦺ, ꦩꦸꦛ꧀ꦜꦱ꧀ꦱꦠꦶꦱ꧀ꦱ ꦄꦱꦩ꧀ꦥꦗꦴꦤꦱ꧀ꦱ ꦄꦴꦤꦴꦥꦴꦤꦱ꧀ꦱꦠꦶꦨꦴꦮꦤꦁ ꦮꦢꦴꦩꦷ’’ꦠꦶ (ꦩ. ꦤꦶ. ꧓.꧑꧔꧙; ꦱꦁ. ꦤꦶ. ꧕.꧙꧙꧒). ꦏꦶꦚ꧀ꦕꦴꦥꦶ ꦲꦶ ꦪꦁꦏꦶꦚ꧀ꦕꦶ ꦏꦩ꧀ꦩꦛ꧀ꦜꦴꦤꦁ ꦱꦠꦱ꧀ꦱ ꦱꦩ꧀ꦥꦗꦴꦤꦱ꧀ꦱꦺꦮ ꦱꦩ꧀ꦥꦗ꧀ꦗꦠꦶ, ꦆꦠꦺꦴ ꦄꦚ꧀ꦚꦁ ꦥꦤ ꦩꦤꦱꦶꦏꦫꦺꦴꦤ꧀ꦠꦱ꧀ꦱ ꦥꦴꦏꦛꦁ ꦲꦺꦴꦠꦶ. ꦆꦢꦁ ꦥꦤ ꦄꦴꦤꦴꦥꦴꦤꦱ꧀ꦱꦠꦶꦏꦩ꧀ꦩꦛ꧀ꦜꦴꦤꦁ ꦒꦫꦸꦏꦁ ꦒꦫꦸꦏꦨꦴꦮꦤꦁ ꦧꦸꦢ꧀ꦣꦥꦕ꧀ꦕꦺꦏꦧꦸꦢ꧀ꦣꦧꦸꦢ꧀ꦣꦥꦸꦠ꧀ꦠꦴꦤꦁ ꦩꦲꦴꦥꦸꦫꦶꦱꦴꦤꦩꦺꦮ ꦩꦤꦱꦶꦏꦴꦫꦨꦹꦩꦶꦨꦹꦠꦁ, ꦤ ꦕꦺꦮ ꦆꦠ꧀ꦠꦫꦁ, ꦤ ꦕ ꦆꦠ꧀ꦠꦫꦱꦠ꧀ꦠꦱꦩꦴꦱꦺꦮꦶꦠꦁ. ꦪꦡꦴ ꦪꦡꦴ ꦩꦤꦱꦶ ꦏꦫꦷꦪꦠꦶ, ꦠꦡꦴ ꦠꦡꦴ ꦱꦤ꧀ꦠꦚ꧀ꦕꦺꦮ ꦲꦺꦴꦠꦶ ꦱꦸꦑꦸꦩꦚ꧀ꦕ. ꦠꦱ꧀ꦩꦴ ꦌꦠ꧀ꦡ ꦧꦭꦮꦠꦷ ꦱꦠꦶ ꦕ ꦥꦚ꧀ꦚꦴ ꦕ ꦆꦕ꧀ꦖꦶꦠꦧ꧀ꦧꦴ.

ꦪꦡꦴ ꦲꦶ ꦩꦛ꧀ꦜꦱꦴꦛꦏꦱ꧀ꦱ ꦠꦸꦤ꧀ꦤꦏꦫꦟꦏꦴꦭꦺ ꦱꦹꦕꦶꦥꦶ ꦱꦸꦑꦸꦩꦴ ꦆꦕ꧀ꦖꦶꦠꦧ꧀ꦧꦴ, ꦱꦹꦕꦶꦥꦴꦱꦮꦺꦣꦤꦩ꧀ꦥꦶ ꦠꦠꦺꦴ ꦱꦸꦑꦸꦩꦠꦫꦁ; ꦌꦮꦩꦺꦮ ꦩꦛ꧀ꦜꦱꦴꦛꦏꦱꦢꦶꦱꦱ꧀ꦱ ꦆꦩꦱ꧀ꦱ ꦏꦩ꧀ꦩꦛ꧀ꦜꦴꦤꦱ꧀ꦱ ꦨꦴꦮꦤꦴꦏꦴꦭꦺ ꦱꦹꦕꦶꦥꦛꦶꦨꦴꦒꦴ ꦱꦠꦶꦥꦶ ꦱꦹꦕꦶꦥꦴꦱꦮꦺꦣꦤꦥꦛꦶꦨꦴꦒꦴ ꦠꦁꦱꦩ꧀ꦥꦪꦸꦠ꧀ꦠꦴ ꦥꦚ꧀ꦚꦴꦥꦶ ꦧꦭꦮꦠꦷ ꦆꦕ꧀ꦖꦶꦠꦧ꧀ꦧꦴ. ꦠꦴꦲꦶ ꦕ ꦥꦤ ꦱꦠꦶꦥꦚ꧀ꦚꦴꦲꦶ ꦱꦩꦤ꧀ꦤꦴꦒꦠꦺꦤ ꦨꦶꦏ꧀ꦑꦸꦤꦴ ꦤ ꦠꦺ ꦄꦱ꧀ꦱꦴꦱꦥꦱ꧀ꦱꦴꦱꦴ ꦄꦚ꧀ꦚꦠ꧀ꦫ ꦥꦏꦠꦶꦦꦸꦛ꧀ꦜꦺꦴꦏꦴꦱꦴ ꦥꦫꦶꦪꦺꦱꦶꦠꦧ꧀ꦧꦴ.

ꦪꦡꦴ ꦥꦤ ꦏꦱ꧀ꦱꦏꦺꦴ ꦏꦱꦶꦁ ꦏꦱꦶꦠ꧀ꦮꦴ ꦧꦭꦶꦧꦢ꧀ꦢꦺ ꦩꦸꦚ꧀ꦕꦶꦠ꧀ꦮꦴ ꦒꦺꦴꦕꦫꦴꦨꦶꦩꦸꦑꦺ ꦏꦠ꧀ꦮꦴ ꦖꦴꦪꦴꦪ ꦤꦶꦱꦶꦤ꧀ꦤꦺꦴ ꦮꦶꦱ꧀ꦱꦩꦺꦪ꧀ꦪ, ꦄꦡꦱ꧀ꦱ ꦠꦺ ꦧꦭꦶꦧꦢ꧀ꦢꦴ ꦮꦺꦒꦺꦤ ꦄꦛꦮꦶꦁ ꦥꦮꦶꦱꦺꦪ꧀ꦪꦸꦁ. ꦪꦺꦴ ꦲꦺꦴꦠꦶ ꦖꦺꦏꦺꦴ ꦏꦱ꧀ꦱꦏꦺꦴ ꦱꦺꦴ ꦥꦸꦤ ꦠꦺ ꦒꦲꦺꦠ꧀ꦮꦴ ꦪꦺꦴꦗꦺꦠꦸꦏꦴꦩꦺꦴ ꦤ ꦠꦺꦱꦁ ꦄꦤꦸꦥꦢꦁ ꦒꦤ꧀ꦠ꧀ꦮꦴ ꦄꦛꦮꦶꦁ ꦄꦴꦲꦶꦟ꧀ꦝꦠꦶ. ꦄꦡ ꦑꦺꦴ ꦫꦱ꧀ꦩꦶꦚ꧀ꦕ ꦥꦠꦺꦴꦢꦚ꧀ꦕ ꦒꦲꦺꦠ꧀ꦮꦴ ꦈꦗꦸꦏꦩꦺꦮ ꦠꦺꦱꦁ ꦤꦶꦥꦴꦠꦠꦶꦠ꧀ꦡꦁ ꦒꦤ꧀ꦠ꧀ꦮꦴ ꦤꦶꦱꦷꦢꦠꦶ ꦮꦴ ꦤꦶꦥꦗ꧀ꦗꦠꦶ ꦮꦴ. ꦄꦡ ꦠꦺ ꦒꦺꦴꦟꦺ ꦢꦶꦮꦱꦨꦴꦒꦁ ꦕꦫꦶꦠ꧀ꦮꦴ ꦤꦶꦥꦴꦠꦠꦶꦠ꧀ꦡꦁ ꦎꦠꦫꦶꦠ꧀ꦮꦴ ꦤ꧀ꦲꦠ꧀ꦮꦴ ꦕ ꦥꦶꦮꦶꦠ꧀ꦮꦴ ꦕ ꦥꦕ꧀ꦕꦸꦠ꧀ꦠꦫꦶꦠ꧀ꦮꦴ ꦜꦶꦠꦺ ꦢꦶꦱ꧀ꦮꦴ ꦫꦱ꧀ꦩꦶꦪꦴ ꦧꦤ꧀ꦣꦶꦠ꧀ꦮꦴ ꦥꦠꦺꦴꦢꦺꦤ ꦮꦶꦗ꧀ꦙꦤ꧀ꦠꦺꦴ ꦄꦴꦤꦺꦠ꧀ꦮꦴ ꦪꦺꦴꦗꦺꦠ꧀ꦮꦴ ꦥꦸꦤ ꦏꦩ꧀ꦩꦁ ꦏꦫꦺꦴꦠꦶ; ꦌꦮꦩꦺꦮ ꦠꦺꦤ ꦨꦶꦏ꧀ꦑꦸꦤꦴ ꦤ ꦠꦺ ꦄꦱ꧀ꦱꦴꦱꦥꦱ꧀ꦱꦴꦱꦴ ꦄꦚ꧀ꦚꦠ꧀ꦫ ꦥꦏꦠꦶꦦꦸꦛ꧀ꦜꦺꦴꦏꦴꦱꦴ ꦥꦫꦶꦪꦺꦱꦶꦠꦧ꧀ꦧꦴ. ꦱꦠꦶꦫꦱ꧀ꦩꦶꦁ ꦥꦤ ꦥꦚ꧀ꦚꦴꦥꦠꦺꦴꦢꦚ꧀ꦕ ꦒꦲꦺꦠ꧀ꦮꦴ ꦥꦏꦠꦶꦦꦸꦛ꧀ꦜꦺꦴꦏꦴꦱꦺ ꦕꦶꦠ꧀ꦠꦁ ꦜꦥꦺꦠ꧀ꦮꦴ ꦩꦤꦱꦶꦏꦴꦫꦺꦴ ꦥꦮꦠ꧀ꦠꦺꦠꦧ꧀ꦧꦺꦴ. ꦌꦮꦚ꧀ꦲꦶꦱ꧀ꦱ ꦩꦤꦱꦶꦏꦫꦺꦴꦠꦺꦴ ꦤꦕꦶꦫꦱ꧀ꦱꦺꦮ ꦠꦺ ꦈꦥꦛ꧀ꦜꦲꦤ꧀ꦠꦶ, ꦤꦶꦥꦴꦠꦠꦶꦠ꧀ꦡꦺ ꦮꦶꦪ ꦒꦺꦴꦟꦴ. ꦠꦠꦺꦴ ꦠꦺꦤ ꦱꦠꦶꦫꦱ꧀ꦩꦶꦪꦴ ꦧꦤ꧀ꦣꦶꦠ꧀ꦮꦴ ꦠꦱ꧀ꦩꦶꦁꦪꦺꦮ ꦜꦴꦤꦺ ꦪꦺꦴꦗꦺꦠ꧀ꦮꦴ ꦥꦚ꧀ꦚꦴꦥꦠꦺꦴꦢꦺꦤ ꦮꦶꦗ꧀ꦙꦤ꧀ꦠꦺꦤ ꦥꦸꦤ ꦏꦩ꧀ꦩꦛ꧀ꦜꦴꦤꦁ ꦄꦤꦸꦪꦸꦚ꧀ꦗꦶꦠꦧ꧀ꦧꦁ; ꦠꦱ꧀ꦱꦺꦮꦩꦤꦸꦪꦸꦚ꧀ꦗꦠꦺꦴ ꦤꦕꦶꦫꦱ꧀ꦱꦺꦮ ꦤꦶꦩꦶꦠ꧀ꦠꦁ ꦈꦥꦛ꧀ꦜꦴꦠꦶ. ꦠꦁ ꦥꦤꦺꦠꦁ ꦤ ꦱꦧ꧀ꦧꦺꦱꦁ ꦌꦏꦱꦢꦶꦱꦁ ꦲꦺꦴꦠꦶ; ꦄꦥꦶꦕ ꦑꦺꦴ ꦏꦱ꧀ꦱꦕꦶ ꦱꦸꦑꦱꦩ꧀ꦦꦱ꧀ꦱꦁ ꦈꦥ꧀ꦥꦴꦢꦪꦩꦴꦤꦺꦴ ꦠꦹꦭꦥꦶꦕꦸ ꦮꦶꦪ, ꦏꦥ꧀ꦥꦴꦱꦥꦶꦕꦸ ꦮꦶꦪ, ꦮꦴꦠꦣꦴꦫꦴ ꦮꦶꦪ ꦕ ꦈꦥꦛ꧀ꦜꦴꦠꦷꦠꦶ ꦌꦏꦕ꧀ꦕꦺ ꦄꦴꦲꦸ.

ꦄꦪꦁ ꦥꦤ ꦄꦛ꧀ꦜꦏꦡꦴꦮꦶꦤꦶꦕ꧀ꦖꦪꦺꦴ – ꦆꦢꦚ꧀ꦲꦶ ꦏꦱ꧀ꦱꦕꦶ ꦠꦴꦫꦏꦫꦹꦥꦁ ꦮꦶꦪ, ꦩꦟꦶꦒꦸꦭ꦳ꦶꦏꦴ ꦮꦶꦪ, ꦩꦸꦠ꧀ꦠꦴꦒꦸꦭ꦳ꦶꦏꦴ ꦮꦶꦪ ꦕ ꦏꦱ꧀ꦱꦕꦶ ꦑꦫꦱꦩ꧀ꦦꦱ꧀ꦱꦁ ꦲꦸꦠ꧀ꦮꦴ ꦏꦥ꧀ꦥꦴꦱꦛ꧀ꦜꦶ ꦮꦶꦪ, ꦱꦴꦫꦢꦴꦫꦸꦱꦹꦕꦶ ꦮꦶꦪ ꦕ ꦏꦱ꧀ꦱꦕꦶ ꦢꦷꦓꦥꦴꦩꦔ꧀ꦒꦱꦸꦠ꧀ꦠꦁ ꦮꦶꦪ, ꦏꦸꦱꦸꦩꦢꦴꦩꦁ ꦮꦶꦪ, ꦣꦹꦩꦱꦶꦑꦴ ꦮꦶꦪ ꦕ ꦏꦱ꧀ꦱꦕꦶ ꦮꦶꦠ꧀ꦡꦠ ꦩꦏ꧀ꦏꦛꦏꦱꦸꦠ꧀ꦠꦁ ꦮꦶꦪ, ꦮꦭꦴꦲꦏꦥꦛꦭꦁ ꦮꦶꦪ, ꦥꦢꦸꦩꦥꦸꦥ꧀ꦦꦁ ꦮꦶꦪ, ꦫꦡꦕꦏ꧀ꦏꦁ ꦮꦶꦪ, ꦕꦤ꧀ꦢꦩꦟ꧀ꦝꦭꦁ ꦮꦶꦪ, ꦱꦹꦫꦶꦪꦩꦟ꧀ꦝꦭꦁ ꦮꦶꦪ ꦕ ꦈꦥꦛ꧀ꦜꦴꦠꦶ. ꦠꦚ꧀ꦕ ꦥꦤꦺꦠꦁ ꦪꦡꦴ ꦱꦩ꧀ꦧꦲꦸꦭꦺꦱꦸ ꦨꦶꦏ꧀ꦑꦹꦱꦸ ꦱꦸꦠ꧀ꦠꦤ꧀ꦠꦁ ꦱꦗ꧀ꦙꦴꦪꦶꦠ꧀ꦮꦴ ꦤꦶꦱꦶꦤ꧀ꦤꦺꦱꦸ ꦌꦏꦺꦤ ꦨꦶꦏ꧀ꦑꦸꦤꦴ ‘‘ꦠꦸꦩ꧀ꦲꦴꦏꦁ ꦏꦷꦢꦶꦱꦁ ꦲꦸꦠ꧀ꦮꦴ ꦆꦢꦁ ꦱꦸꦠ꧀ꦠꦁ ꦈꦥꦛ꧀ꦜꦴꦠꦷ’’ꦠꦶ ꦮꦸꦠ꧀ꦠꦺ ꦌꦏꦺꦴ ‘‘ꦩꦪ꧀ꦲꦁ ꦩꦲꦠꦷ ꦥꦧ꧀ꦧꦠꦺꦪ꧀ꦪꦴ ꦤꦢꦷ ꦮꦶꦪ ꦲꦸꦠ꧀ꦮꦴ ꦈꦥꦛ꧀ꦜꦴꦠꦷ’’ꦠꦶ ꦄꦴꦲ. ꦄꦥꦫꦺꦴ ‘‘ꦩꦪ꧀ꦲꦁ ꦌꦏꦴ ꦮꦤꦫꦴꦗꦶ ꦮꦶꦪ’’. ꦄꦚ꧀ꦚꦺꦴ ‘‘ꦩꦪ꧀ꦲꦁ ꦱꦷꦠꦕ꧀ꦖꦴꦪꦺꦴ ꦱꦴꦑꦴꦱꦩ꧀ꦥꦤ꧀ꦤꦺꦴ ꦦꦭꦨꦴꦫꦨꦫꦶꦠꦫꦸꦏ꧀ꦑꦺꦴ ꦮꦶꦪꦴ’’ꦠꦶ. ꦠꦺꦱꦚ꧀ꦲꦶ ꦠꦁ ꦌꦏꦩꦺꦮ ꦱꦸꦠ꧀ꦠꦁ ꦱꦚ꧀ꦚꦴꦤꦴꦤꦠꦴꦪ ꦤꦴꦤꦠꦺꦴ ꦈꦥꦛ꧀ꦜꦴꦠꦶ. ꦌꦮꦁ ꦌꦏꦩꦺꦮ ꦏꦩ꧀ꦩꦛ꧀ꦜꦴꦤꦁ ꦱꦚ꧀ꦚꦴꦤꦴꦤꦠꦴꦪ ꦤꦴꦤꦠꦺꦴ ꦈꦥꦛ꧀ꦜꦴꦠꦶ. ꦱꦚ꧀ꦚꦗꦚ꧀ꦲꦶ ꦌꦠꦁ ꦱꦚ꧀ꦚꦴꦤꦶꦢꦴꦤꦁ ꦱꦚ꧀ꦚꦴꦥ꧀ꦥꦨꦮꦁ ꦠꦱ꧀ꦩꦴ ꦱꦚ꧀ꦚꦴꦤꦴꦤꦠꦴꦪ ꦤꦴꦤꦠꦺꦴ ꦈꦥꦛ꧀ꦜꦴꦠꦷꦠꦶ ꦮꦺꦢꦶꦠꦧ꧀ꦧꦁ.

ꦌꦠ꧀ꦡ ꦕ ꦄꦚ꧀ꦚꦩꦺꦮ ꦄꦱ꧀ꦱꦴꦱꦴꦫꦩ꧀ꦩꦟꦁ ꦕꦶꦠ꧀ꦠꦁ, ꦄꦚ꧀ꦚꦁ ꦥꦱ꧀ꦱꦴꦱꦴꦫꦩ꧀ꦩꦟꦁ, ꦄꦚ꧀ꦚꦁ ꦤꦶꦩꦶꦠ꧀ꦠꦴꦫꦩ꧀ꦩꦟꦁ ꦪꦱ꧀ꦱ ꦲꦶ ꦆꦩꦺ ꦠꦪꦺꦴ ꦣꦩ꧀ꦩꦴ ꦤꦠ꧀ꦡꦶ, ꦠꦱ꧀ꦱ ꦏꦩ꧀ꦩꦛ꧀ꦜꦴꦤꦁ ꦤꦺꦮ ꦄꦥ꧀ꦥꦤꦁ ꦤ ꦈꦥꦕꦴꦫꦁ ꦥꦴꦥꦸꦟꦴꦠꦶ. ꦪꦱ꧀ꦱ ꦥꦤꦶꦩꦺ ꦠꦪꦺꦴ ꦣꦩ꧀ꦩꦴ ꦄꦠ꧀ꦡꦶ, ꦠꦱ꧀ꦱꦺꦮ ꦏꦩ꧀ꦩꦛ꧀ꦜꦴꦤꦁ ꦄꦥ꧀ꦥꦤꦚ꧀ꦕ ꦈꦥꦕꦴꦫꦚ꧀ꦕ ꦥꦴꦥꦸꦟꦴꦠꦶ. ꦮꦸꦠ꧀ꦠꦚ꧀ꦲꦺꦠꦁ –

‘‘ꦤꦶꦩꦶꦠ꧀ꦠꦁ ꦄꦱ꧀ꦱꦴꦱꦥꦱ꧀ꦱꦴꦱꦴ, ꦄꦤꦴꦫꦩ꧀ꦩꦟꦩꦺꦏꦕꦶꦠ꧀ꦠꦱ꧀ꦱ;

ꦄꦗꦴꦤꦠꦺꦴ ꦕ ꦠꦪꦺꦴ ꦣꦩ꧀ꦩꦺ, ꦨꦴꦮꦤꦴꦤꦸꦥꦭꦧ꧀ꦨꦠꦶ.

‘‘ꦤꦶꦩꦶꦠ꧀ꦠꦁ ꦄꦱ꧀ꦱꦴꦱꦥꦱ꧀ꦱꦴꦱꦴ, ꦄꦤꦴꦫꦩ꧀ꦩꦟꦩꦺꦏꦕꦶꦠ꧀ꦠꦱ꧀ꦱ;

ꦗꦴꦤꦠꦺꦴ ꦕ ꦠꦪꦺꦴ ꦣꦩ꧀ꦩꦺ, ꦨꦴꦮꦤꦴ ꦈꦥꦭꦧ꧀ꦨꦠꦷ’’ꦠꦶ. (ꦮꦶꦱꦸꦢ꧀ꦣꦶ. ꧑.꧒꧓꧑);

ꦌꦮꦁ ꦈꦥꦛ꧀ꦜꦶꦠꦺ ꦥꦤ ꦤꦶꦩꦶꦠ꧀ꦠꦺ ꦠꦺꦤ ꦨꦶꦏ꧀ꦑꦸꦤꦴ ꦄꦴꦕꦫꦶꦪꦱꦤ꧀ꦠꦶꦏꦁ ꦒꦤ꧀ꦠ꧀ꦮꦴ ꦄꦴꦫꦺꦴꦕꦺꦠꦧ꧀ꦧꦁ – ‘‘ꦩꦪ꧀ꦲꦁ, ꦨꦤ꧀ꦠꦺ, ꦌꦮꦫꦹꦥꦁ ꦤꦴꦩ ꦈꦥꦛ꧀ꦜꦴꦠꦷ’’ꦠꦶ. ꦄꦴꦕꦫꦶꦪꦺꦤ ꦥꦤ ‘‘ꦌꦠꦁ ꦤꦶꦩꦶꦠ꧀ꦠ’’ꦤ꧀ꦠꦶ ꦮꦴ ‘‘ꦤ ꦤꦶꦩꦶꦠ꧀ꦠ’’ꦤ꧀ꦠꦶ ꦮꦴ ꦤ ꦮꦠ꧀ꦠꦧ꧀ꦧꦁ. ‘‘ꦌꦮꦁ ꦲꦺꦴꦠꦶ, ꦄꦴꦮꦸꦱꦺꦴ’’ꦠꦶ ꦮꦠ꧀ꦮꦴ ꦥꦤ ‘‘ꦥꦸꦤꦥ꧀ꦥꦸꦤꦁ ꦩꦤꦱꦶ ꦏꦫꦺꦴꦲꦷ’’ꦠꦶ ꦮꦠ꧀ꦠꦧ꧀ꦧꦺꦴ. ‘‘ꦤꦶꦩꦶꦠ꧀ꦠ’’ꦤ꧀ꦠꦶ ꦲꦶ ꦮꦸꦠ꧀ꦠꦺ ꦮꦺꦴꦱꦴꦤꦁ ꦄꦴꦥꦗ꧀ꦗꦺꦪ꧀ꦪ; ‘‘ꦤ ꦤꦶꦩꦶꦠ꧀ꦠ’’ꦤ꧀ꦠꦶ ꦮꦸꦠ꧀ꦠꦺ ꦤꦶꦫꦴꦱꦺꦴ ꦮꦶꦱꦷꦢꦺꦪ꧀ꦪ. ꦠꦱ꧀ꦩꦴ ꦠꦢꦸꦨꦪꦩ꧀ꦥꦶ ꦄꦮꦠ꧀ꦮꦴ ꦩꦤꦱꦶꦏꦴꦫꦺꦪꦺꦮ ꦤꦶꦪꦺꦴꦗꦺꦠꦧ꧀ꦧꦺꦴꦠꦶ. ꦌꦮꦁ ꦠꦴꦮ ꦢꦷꦓꦨꦴꦟꦏꦴ. ꦩꦗ꧀ꦙꦶꦩꦨꦴꦟꦏꦴ ꦥꦤꦴꦲꦸ – ‘‘ꦤꦶꦩꦶꦠ꧀ꦠꦩꦶꦢꦁ, ꦄꦴꦮꦸꦱꦺꦴ, ꦏꦩ꧀ꦩꦛ꧀ꦜꦴꦤꦁ ꦥꦸꦤꦥ꧀ꦥꦸꦤꦁ ꦩꦤꦱꦶ ꦏꦫꦺꦴꦲꦶ ꦱꦥ꧀ꦥꦸꦫꦶꦱꦴꦠꦶ ꦮꦠ꧀ꦠꦧ꧀ꦧꦺꦴ’’ꦠꦶ. ꦄꦡꦴꦤꦺꦤ ꦤꦶꦩꦶꦠ꧀ꦠꦺꦪꦺꦮ ꦕꦶꦠ꧀ꦠꦁ ꦜꦥꦺꦠꦧ꧀ꦧꦁ. ꦌꦮꦩꦱ꧀ꦱꦴꦪꦁ ꦆꦠꦺꦴ ꦥꦨꦸꦠꦶ ꦜꦥꦤꦴꦮꦱꦺꦤ ꦨꦴꦮꦤꦴ ꦲꦺꦴꦠꦶ. ꦮꦸꦠ꧀ꦠꦚ꧀ꦲꦺꦠꦁ ꦥꦺꦴꦫꦴꦟꦺꦲꦶ –

‘‘ꦤꦶꦩꦶꦠ꧀ꦠꦺ ꦜꦥꦪꦁ ꦕꦶꦠ꧀ꦠꦁ, ꦤꦴꦤꦴꦏꦴꦫꦁ ꦮꦶꦨꦴꦮꦪꦁ;

ꦣꦷꦫꦺꦴ ꦄꦱ꧀ꦱꦴꦱꦥꦱ꧀ꦱꦴꦱꦺ, ꦱꦏꦁ ꦕꦶꦠ꧀ꦠꦁ ꦤꦶꦧꦤ꧀ꦣꦠꦷ’’ꦠꦶ. (ꦮꦶꦱꦸꦢ꧀ꦣꦶ. ꧑.꧒꧓꧒; ꦥꦛꦶ. ꦩ. ꦄꦛ꧀ꦜ. ꧒.꧑.꧑꧖꧓);

ꦠꦱ꧀ꦱꦺꦮꦁ ꦤꦶꦩꦶꦠ꧀ꦠꦸꦥꦛ꧀ꦜꦴꦤꦠꦺꦴ ꦥꦨꦸꦠꦶ ꦤꦷꦮꦫꦟꦴꦤꦶ ꦮꦶꦏ꧀ꦑꦩ꧀ꦨꦶꦠꦴꦤꦺꦮ ꦲꦺꦴꦤ꧀ꦠꦶ ꦏꦶꦭꦺꦱꦴ ꦱꦤ꧀ꦤꦶꦱꦶꦤ꧀ꦤꦴꦮ ꦱꦠꦶ ꦈꦥꦛ꧀ꦜꦶꦠꦴꦪꦺꦮ, ꦕꦶꦠ꧀ꦠꦁ ꦱꦩꦴꦲꦶꦠꦩꦺꦮ. ꦆꦢꦚ꧀ꦲꦶ ꦢ꧀ꦮꦷꦲꦴꦏꦴꦫꦺꦲꦶ ꦕꦶꦠ꧀ꦠꦁ ꦱꦩꦴꦲꦶꦠꦁ ꦤꦴꦩ ꦲꦺꦴꦲꦶ – ꦈꦥꦕꦴꦫꦨꦹꦩꦶꦪꦁ ꦮꦴ ꦤꦷꦮꦫꦟꦥ꧀ꦥꦲꦴꦤꦺꦤ, ꦥꦛꦶꦭꦴꦨꦨꦹꦩꦶꦪꦁ ꦮꦴ ꦄꦔ꧀ꦒꦥꦴꦠꦸꦨꦴꦮꦺꦤ. ꦠꦠ꧀ꦡ ‘‘ꦈꦥꦕꦴꦫꦨꦹꦩꦷ’’ꦠꦶ ꦈꦥꦕꦴꦫꦱꦩꦴꦣꦶ; ‘‘ꦥꦛꦶꦭꦴꦨꦨꦹꦩꦷ’’ꦠꦶ ꦄꦥ꧀ꦥꦤꦴꦱꦩꦴꦣꦶ. ꦠꦺꦱꦁ ꦏꦶꦁ ꦤꦴꦤꦴꦏꦫꦟꦁ? ꦈꦥꦕꦴꦫꦱꦩꦴꦣꦶ ꦏꦸꦱꦭꦮꦷꦡꦶꦪꦁ ꦗꦮꦶꦠ꧀ꦮꦴ ꦨꦮꦔ꧀ꦒꦁ ꦎꦠꦫꦠꦶ, ꦄꦥ꧀ꦥꦤꦴꦱꦩꦴꦣꦶ ꦢꦶꦮꦱꦨꦴꦒꦺ ꦄꦥ꧀ꦥꦺꦠ꧀ꦮꦴ ꦤꦶꦱꦶꦤ꧀ꦤꦱ꧀ꦱ ꦢꦶꦮꦱꦨꦴꦒꦩ꧀ꦥꦶ ꦏꦸꦱꦭꦮꦷꦡꦶꦪꦁ ꦗꦮꦠꦶ, ꦤ ꦨꦮꦔ꧀ꦒꦁ ꦎꦠꦫꦠꦶ. ꦆꦩꦺꦱꦸ ꦢ꧀ꦮꦷꦱꦸ ꦱꦩꦴꦣꦷꦱꦸ ꦤꦶꦩꦶꦠ꧀ꦠꦥꦴꦠꦸꦨꦴꦮꦺꦤ ꦈꦥꦕꦴꦫꦱꦩꦴꦣꦶꦤꦴ ꦱꦩꦴꦲꦶꦠꦁ ꦕꦶꦠ꧀ꦠꦁ ꦲꦺꦴꦠꦶ. ꦄꦡꦴꦤꦺꦤ ꦠꦁ ꦤꦶꦩꦶꦠ꧀ꦠꦁ ꦤꦺꦮ ꦮꦟ꧀ꦟꦠꦺꦴ ꦩꦤꦱꦶꦏꦴꦠꦧ꧀ꦧꦁ, ꦤ ꦭꦏ꧀ꦑꦟꦠꦺꦴ ꦥꦕ꧀ꦕꦮꦺꦏ꧀ꦑꦶꦠꦧ꧀ꦧꦁ. ꦄꦥꦶꦕ ꦑꦺꦴ ꦑꦠ꧀ꦠꦶꦪꦩꦲꦺꦱꦶꦪꦴ ꦕꦏ꧀ꦏꦮꦠ꧀ꦠꦶꦒꦧ꧀ꦨꦺꦴ ꦮꦶꦪ ꦏꦱ꧀ꦱꦏꦺꦤ ꦱꦴꦭꦶꦪꦮꦒꦧ꧀ꦨꦺꦴ ꦮꦶꦪ ꦕ ꦄꦥ꧀ꦥꦩꦠ꧀ꦠꦺꦤ ꦫꦏ꧀ꦑꦶꦠꦧ꧀ꦧꦁ; ꦫꦏ꧀ꦑꦶꦠꦁ ꦲꦶꦱ꧀ꦱ ꦦꦭꦢꦁ ꦲꦺꦴꦠꦶ.

‘‘ꦤꦶꦩꦶꦠ꧀ꦠꦁ ꦫꦏ꧀ꦑꦠꦺꦴ ꦭꦢ꧀ꦣ, ꦥꦫꦶꦲꦴꦤꦶ ꦤ ꦮꦶꦗ꧀ꦗꦠꦶ;

ꦄꦴꦫꦏ꧀ꦑꦩ꧀ꦲꦶ ꦄꦱꦤ꧀ꦠꦩ꧀ꦲꦶ, ꦭꦢ꧀ꦣꦁ ꦭꦢ꧀ꦣꦁ ꦮꦶꦤꦱ꧀ꦱꦠꦷ’’ꦠꦶ.

ꦠꦠ꧀ꦫꦴꦪꦁ ꦫꦏ꧀ꦑꦟꦹꦥꦴꦪꦺꦴ – ꦠꦺꦤ ꦨꦶꦏ꧀ꦑꦸꦤꦴ ꦄꦴꦮꦴꦱꦺꦴ, ꦒꦺꦴꦕꦫꦺꦴ, ꦨꦱ꧀ꦱꦁ, ꦥꦸꦒ꧀ꦒꦭꦺꦴ, ꦨꦺꦴꦗꦤꦁ, ꦈꦠꦸ, ꦆꦫꦶꦪꦴꦥꦡꦺꦴꦠꦶ ꦆꦩꦴꦤꦶ ꦱꦠ꧀ꦠ ꦄꦱꦥ꧀ꦥꦴꦪꦴꦤꦶ ꦮꦗ꧀ꦗꦺꦠ꧀ꦮꦴ ꦠꦴꦤꦺꦮ ꦱꦠ꧀ꦠ ꦱꦥ꧀ꦥꦴꦪꦴꦤꦶ ꦱꦺꦮꦤ꧀ꦠꦺꦤ ꦥꦸꦤꦥ꧀ꦥꦸꦤꦁ ꦠꦁ ꦤꦶꦩꦶꦠ꧀ꦠꦁ ꦩꦤꦱꦶꦏꦴꦠꦧ꧀ꦧꦁ.

ꦌꦮꦁ ꦱꦥ꧀ꦥꦴꦪꦱꦺꦮꦤꦺꦤ ꦤꦶꦩꦶꦠ꧀ꦠꦁ ꦡꦶꦫꦁ ꦏꦠ꧀ꦮꦴ ꦮꦸꦝ꧀ꦞꦶꦁ ꦮꦶꦫꦹꦭ꦳꧀ꦲꦶꦁ ꦒꦩꦪꦶꦠ꧀ꦮꦴ ꦮꦠ꧀ꦡꦸꦮꦶꦱꦢꦏꦶꦫꦶꦪꦴ, ꦆꦤ꧀ꦢ꧀ꦫꦶꦪꦱꦩꦠ꧀ꦠꦥꦛꦶꦥꦴꦢꦤꦠꦴ, ꦤꦶꦩꦶꦠ꧀ꦠꦏꦸꦱꦭꦠꦴ, ꦪꦱ꧀ꦩꦶꦁ ꦱꦩꦪꦺ ꦕꦶꦠ꧀ꦠꦁ ꦱꦥꦒ꧀ꦒꦲꦺꦠꦧ꧀ꦧ ꦠꦱ꧀ꦩꦶꦁ ꦱꦩꦪꦺ ꦕꦶꦠ꧀ꦠꦥꦒ꧀ꦒꦟ꧀ꦲꦤꦴ, ꦪꦱ꧀ꦩꦶꦁ ꦱꦩꦪꦺ ꦕꦶꦠ꧀ꦠꦁ ꦤꦶꦒ꧀ꦒꦲꦺꦠꦧ꧀ꦧꦁ ꦠꦱ꧀ꦩꦶꦁ ꦱꦩꦪꦺ ꦕꦶꦠ꧀ꦠꦤꦶꦒ꧀ꦒꦟ꧀ꦲꦤꦴ, ꦪꦱ꧀ꦩꦶꦁ ꦱꦩꦪꦺ ꦕꦶꦠ꧀ꦠꦁ ꦱꦩ꧀ꦥꦲꦁꦱꦺꦠꦧ꧀ꦧꦁ ꦠꦱ꧀ꦩꦶꦁ ꦱꦩꦪꦺ ꦱꦩ꧀ꦥꦲꦁꦱꦺꦠꦧ꧀ꦧꦁ ꦠꦱ꧀ꦩꦶꦁ ꦱꦩꦪꦺ ꦕꦶꦠ꧀ꦠꦱꦩ꧀ꦥꦲꦁꦱꦤꦴ, ꦪꦱ꧀ꦩꦶꦁ ꦱꦩꦪꦺ ꦕꦶꦠ꧀ꦠꦁ ꦄꦗ꧀ꦙꦸꦥꦺꦏ꧀ꦑꦶꦠꦧ꧀ꦧꦁ ꦠꦱ꧀ꦩꦶꦁ ꦱꦩꦪꦺ ꦕꦶꦠ꧀ꦠꦄꦗ꧀ꦙꦸꦥꦺꦏ꧀ꦑꦤꦴ, ꦄꦱꦩꦴꦲꦶꦠꦥꦸꦒ꧀ꦒꦭꦥꦫꦶꦮꦗ꧀ꦗꦤꦴ, ꦱꦩꦴꦲꦶꦠꦥꦸꦒ꧀ꦒꦭꦱꦺꦮꦤꦴ, ꦠꦢꦣꦶꦩꦸꦠ꧀ꦠꦠꦴꦠꦶ ꦆꦩꦴꦤꦶ ꦢꦱ ꦄꦥ꧀ꦥꦤꦴꦏꦺꦴꦱꦭ꧀ꦭꦴꦤꦶ ꦄꦮꦶꦗꦲꦤ꧀ꦠꦺꦤ ꦪꦺꦴꦒꦺꦴ ꦏꦫꦟꦷꦪꦺꦴ.

ꦠꦱ꧀ꦱꦺꦮꦁ ꦄꦤꦸꦪꦸꦠ꧀ꦠꦱ꧀ꦱ ꦮꦶꦲꦫꦠꦺꦴ ꦆꦢꦴꦤꦶ ꦄꦥ꧀ꦥꦤꦴ ꦈꦥ꧀ꦥꦗ꧀ꦗꦶꦱ꧀ꦱꦠꦷꦠꦶ ꦨꦮꦔ꧀ꦒꦁ ꦮꦶꦕ꧀ꦖꦶꦤ꧀ꦢꦶꦠ꧀ꦮꦴ ꦤꦶꦩꦶꦠ꧀ꦠꦴꦫꦩ꧀ꦩꦟꦁ ꦩꦤꦺꦴꦢ꧀ꦮꦴꦫꦴꦮꦗ꧀ꦗꦤꦁ ꦈꦥ꧀ꦥꦗ꧀ꦗꦠꦶ. ꦠꦱ꧀ꦩꦶꦚ꧀ꦕ ꦤꦶꦫꦸꦢ꧀ꦣꦺ ꦠꦢꦺꦮꦴꦫꦩ꧀ꦩꦟꦁ ꦒꦲꦺꦠ꧀ꦮꦴ ꦕꦠ꧀ꦠꦴꦫꦶ ꦥꦚ꧀ꦕ ꦮꦴ ꦗꦮꦤꦴꦤꦶ, ꦪꦺꦱꦁ ꦥꦜꦩꦁ ꦥꦫꦶꦏꦩ꧀ꦩꦁ, ꦢꦸꦠꦶꦪꦁ ꦈꦥꦕꦴꦫꦁ, ꦠꦠꦶꦪꦁ ꦄꦤꦸꦭꦺꦴꦩꦁ, ꦕꦠꦸꦠ꧀ꦡꦁ ꦒꦺꦴꦠ꧀ꦫꦨꦸ, ꦥꦚ꧀ꦕꦩꦁ ꦄꦥ꧀ꦥꦤꦴꦕꦶꦠ꧀ꦠꦁ. ꦥꦜꦩꦁ ꦮꦴ ꦥꦫꦶꦏꦩ꧀ꦩꦚ꧀ꦕꦺꦮ ꦈꦥꦕꦴꦫꦚ꧀ꦕ, ꦢꦸꦠꦶꦪꦁ ꦄꦤꦸꦭꦺꦴꦩꦁ, ꦠꦠꦶꦪꦁ ꦒꦺꦴꦠ꧀ꦫꦨꦸ, ꦕꦠꦸꦠ꧀ꦡꦁ ꦄꦥ꧀ꦥꦤꦴꦕꦶꦠ꧀ꦠꦤ꧀ꦠꦶ ꦮꦸꦕ꧀ꦕꦠꦶ. ꦕꦠꦸꦠ꧀ꦡꦩꦺꦮ ꦲꦶ ꦥꦚ꧀ꦕꦩꦁ ꦮꦴ ꦄꦥ꧀ꦥꦺꦠꦶ, ꦤ ꦖꦛ꧀ꦜꦁ ꦱꦠ꧀ꦠꦩꦁ ꦮꦴ ꦄꦴꦱꦤ꧀ꦤꦨꦮꦔ꧀ꦒꦥꦴꦠꦠ꧀ꦠꦴ.

ꦄꦴꦨꦶꦣꦩ꧀ꦩꦶꦏꦒꦺꦴꦢꦠ꧀ꦠꦠ꧀ꦡꦺꦫꦺꦴ ꦥꦤꦴꦲ – ‘‘ꦄꦴꦱꦺꦮꦤꦥꦕ꧀ꦕꦪꦺꦤ ꦏꦸꦱꦭꦴ ꦣꦩ꧀ꦩꦴ ꦧꦭꦮꦤ꧀ꦠꦺꦴ ꦲꦺꦴꦤ꧀ꦠꦶ; ꦠꦱ꧀ꦩꦴ ꦖꦛ꧀ꦜꦁ ꦱꦠ꧀ꦠꦩꦁ ꦮꦴ ꦄꦥ꧀ꦥꦺꦠꦷ’’ꦠꦶ. ꦠꦁ ꦄꦛ꧀ꦜꦏꦡꦴꦱꦸ ꦥꦛꦶꦏ꧀ꦑꦶꦠ꧀ꦠꦁ. ꦠꦠ꧀ꦡ ꦥꦸꦧ꧀ꦧꦨꦴꦒꦕꦶꦠ꧀ꦠꦴꦤꦶ ꦏꦴꦩꦴꦮꦕꦫꦴꦤꦶ ꦲꦺꦴꦤ꧀ꦠꦶ, ꦄꦥ꧀ꦥꦤꦴꦕꦶꦠ꧀ꦠꦁ ꦥꦤ ꦫꦹꦥꦴꦮꦕꦫꦁ. ꦌꦮꦩꦤꦺꦤ ꦥꦚ꧀ꦕꦔ꧀ꦒꦮꦶꦥ꧀ꦥꦲꦷꦤꦁ, ꦥꦚ꧀ꦕꦔ꧀ꦒꦱꦩꦤ꧀ꦤꦴꦒꦠꦁ, ꦢꦱꦭꦏ꧀ꦑꦟꦱꦩ꧀ꦥꦤ꧀ꦤꦁ, ꦠꦶꦮꦶꦣꦏꦭ꧀ꦪꦴꦟꦁ, ꦥꦜꦩꦗ꧀ꦙꦴꦤꦁ ꦄꦣꦶꦒꦠꦁ ꦲꦺꦴꦠꦶ. ꦱꦺꦴ ꦠꦱ꧀ꦩꦶꦁꦪꦺꦮꦴꦫꦩ꧀ꦩꦟꦺ ꦮꦶꦠꦏ꧀ꦏꦴꦢꦪꦺꦴ ꦮꦹꦥꦱꦩꦺꦠ꧀ꦮꦴ ꦢꦸꦠꦶꦪꦠꦠꦶꦪꦕꦠꦸꦠ꧀ꦡꦗ꧀ꦙꦴꦤꦴꦤꦶ ꦥꦴꦥꦸꦟꦴꦠꦶ. ꦌꦠ꧀ꦠꦴꦮꦠꦴ ꦕ ꦜꦥꦤꦴꦮꦱꦺꦤ ꦨꦴꦮꦤꦴꦪ ꦥꦫꦶꦪꦺꦴꦱꦴꦤꦥ꧀ꦥꦠ꧀ꦠꦺꦴ ꦲꦺꦴꦠꦶ. ꦄꦪꦩꦺꦠ꧀ꦡ ꦱꦔ꧀ꦑꦺꦥꦏꦡꦴ. ꦮꦶꦠ꧀ꦡꦴꦫꦺꦴ ꦥꦤ ꦆꦕ꧀ꦖꦤ꧀ꦠꦺꦤ ꦮꦶꦱꦸꦢ꧀ꦣꦶꦩꦒ꧀ꦒꦠꦺꦴ ꦒꦲꦺꦠꦧ꧀ꦧꦺꦴ.

ꦌꦮꦁ ꦥꦠ꧀ꦠꦕꦠꦸꦠ꧀ꦡꦗ꧀ꦙꦴꦤꦺꦴ ꦥꦤꦺꦠ꧀ꦡ ꦨꦶꦏ꧀ꦑꦸ ꦱꦭ꧀ꦭꦏ꧀ꦑꦟꦴꦮꦶꦮꦛ꧀ꦛꦤꦴꦮꦱꦺꦤ ꦏꦩ꧀ꦩꦛ꧀ꦜꦴꦤꦁ ꦮꦝ꧀ꦞꦺꦠ꧀ꦮꦴ ꦥꦴꦫꦶꦱꦸꦢ꧀ꦣꦶꦁ ꦥꦠ꧀ꦠꦸꦏꦴꦩꦺꦴ ꦠꦢꦺꦮ ꦙꦴꦤꦁ ꦄꦴꦮꦗ꧀ꦗꦤꦱꦩꦴꦥꦗ꧀ꦗꦤꦄꦣꦶꦛ꧀ꦜꦴꦤꦮꦸꦛ꧀ꦜꦴꦤꦥꦕ꧀ꦕꦮꦺꦏ꧀ꦑꦟꦱꦔ꧀ꦑꦴꦠꦺꦲꦶ ꦥꦚ꧀ꦕꦲꦴꦏꦴꦫꦺꦲꦶ ꦮꦱꦶꦥ꧀ꦥꦠ꧀ꦠꦁ ꦥꦒꦸꦟꦁ ꦏꦠ꧀ꦮꦴ ꦄꦫꦹꦥꦥꦸꦧ꧀ꦧꦔ꧀ꦒꦩꦁ ꦮꦴ ꦫꦹꦥꦁ, ꦫꦹꦥꦥꦸꦧ꧀ꦧꦔ꧀ꦒꦩꦁ ꦮꦴ ꦄꦫꦹꦥꦤ꧀ꦠꦶ ꦫꦹꦥꦴꦫꦹꦥꦁ ꦥꦫꦶꦒ꧀ꦒꦲꦺꦠ꧀ꦮꦴ ꦮꦶꦥꦱ꧀ꦱꦤꦁ ꦥꦛ꧀ꦜꦥꦺꦠꦶ. ꦏꦡꦁ? ꦱꦺꦴ ꦲꦶ ꦙꦴꦤꦴ ꦮꦸꦛ꧀ꦜꦲꦶꦠ꧀ꦮꦴ ꦙꦴꦤꦔ꧀ꦒꦴꦤꦶ ꦥꦫꦶꦒ꧀ꦒꦲꦺꦠ꧀ꦮꦴ ꦠꦺꦱꦁ ꦤꦶꦱ꧀ꦱꦪꦁ ꦲꦢꦪꦮꦠ꧀ꦡꦸꦁ ꦠꦁ ꦤꦶꦱ꧀ꦱꦪꦴꦤꦶ ꦕ ꦨꦹꦠꦴꦤꦶ ꦠꦺꦱꦚ꧀ꦕ ꦤꦶꦱ꧀ꦱꦪꦁ ꦱꦏꦭꦩ꧀ꦥꦶ ꦏꦫꦗꦏꦴꦪꦁ ꦥꦱ꧀ꦱꦠꦶ. ꦠꦠꦺꦴ ‘‘ꦙꦴꦤꦔ꧀ꦒꦴꦤꦶ ꦄꦫꦹꦥꦁ, ꦮꦠ꧀ꦡꦴꦢꦷꦤꦶ ꦫꦹꦥ’’ꦤ꧀ꦠꦶ ꦫꦹꦥꦴꦫꦹꦥꦁ ꦮꦮꦠ꧀ꦡꦥꦺꦠꦶ.

ꦄꦡ ꦮꦴ ꦱꦩꦴꦥꦠ꧀ꦠꦶꦠꦺꦴ ꦮꦸꦛ꧀ꦜꦲꦶꦠ꧀ꦮꦴ ꦏꦺꦱꦴꦢꦷꦱꦸ ꦏꦺꦴꦛ꧀ꦜꦴꦱꦺꦱꦸ ꦥꦡꦮꦷꦣꦴꦠꦸꦄꦴꦢꦶꦮꦱꦺꦤ ꦕꦠ꧀ꦠꦴꦫꦶ ꦨꦹꦠꦴꦤꦶ ꦠꦁꦤꦶꦱ꧀ꦱꦶꦠꦫꦹꦥꦴꦤꦶ ꦕ ꦥꦫꦶꦒ꧀ꦒꦲꦺꦠ꧀ꦮꦴ ꦪꦡꦴꦥꦫꦶꦒ꧀ꦒꦲꦶꦠꦫꦹꦥꦴꦫꦩ꧀ꦩꦟꦁ ꦪꦡꦴꦥꦫꦶꦒ꧀ꦒꦲꦶꦠꦫꦹꦥꦮꦠ꧀ꦡꦸꦢ꧀ꦮꦴꦫꦴꦫꦩ꧀ꦩꦟꦁ ꦮꦴ ꦱꦱꦩ꧀ꦥꦪꦸꦠ꧀ꦠꦣꦩ꧀ꦩꦁ ꦮꦶꦚ꧀ꦚꦴꦟꦚ꧀ꦕ ꦥꦱ꧀ꦱꦠꦶ. ꦠꦠꦺꦴ ‘‘ꦨꦹꦠꦴꦢꦷꦤꦶ ꦫꦹꦥꦁ ꦱꦱꦩ꧀ꦥꦪꦸꦠ꧀ꦠꦣꦩ꧀ꦩꦁ ꦮꦶꦚ꧀ꦚꦴꦟꦁ ꦄꦫꦹꦥ’’ꦤ꧀ꦠꦶ ꦮꦮꦠ꧀ꦡꦥꦺꦠꦶ.

ꦄꦡ ꦮꦴ ꦱꦩꦴꦥꦠ꧀ꦠꦶꦠꦺꦴ ꦮꦸꦛ꧀ꦜꦲꦶꦠ꧀ꦮꦴ ꦄꦱ꧀ꦱꦴꦱꦥꦱ꧀ꦱꦴꦱꦴꦤꦁ ꦱꦩꦸꦢꦪꦺꦴ ꦏꦫꦗꦏꦴꦪꦺꦴ ꦕ ꦕꦶꦠ꧀ꦠꦚ꧀ꦕꦴꦠꦶ ꦥꦱ꧀ꦱꦠꦶ. ꦪꦡꦴ ꦲꦶ ꦏꦩ꧀ꦩꦴꦫꦒꦒ꧀ꦒꦫꦶꦪꦴ ꦣꦩꦩꦴꦤꦴꦪ ꦨꦱ꧀ꦠꦚ꧀ꦕ ꦥꦸꦫꦶꦱꦱ꧀ꦱ ꦕ ꦠꦗ꧀ꦗꦁ ꦮꦴꦪꦴꦩꦁ ꦥꦛꦶꦕ꧀ꦕ ꦮꦴꦠꦺꦴ ꦱꦚ꧀ꦕꦫꦠꦶ; ꦌꦮꦩꦺꦮ ꦏꦴꦪꦚ꧀ꦕ ꦕꦶꦠ꧀ꦠꦚ꧀ꦕ ꦥꦛꦶꦕ꧀ꦕ ꦄꦱ꧀ꦱꦴꦱꦥꦱ꧀ꦱꦴꦱꦴꦠꦶ. ꦠꦠꦺꦴ ꦄꦱ꧀ꦱꦴꦱꦥꦱ꧀ꦱꦴꦱꦺ ꦕ ꦏꦴꦪꦚ꧀ꦕ ꦫꦹꦥꦁ, ꦕꦶꦠ꧀ꦠꦚ꧀ꦕ ꦠꦁꦱꦩ꧀ꦥꦪꦸꦠ꧀ꦠꦣꦩ꧀ꦩꦺ ꦕ ꦄꦫꦹꦥꦤ꧀ꦠꦶ ꦮꦮꦠ꧀ꦡꦥꦺꦠꦶ.

ꦌꦮꦁ ꦤꦴꦩꦫꦹꦥꦁ ꦮꦮꦠ꧀ꦡꦥꦺꦠ꧀ꦮꦴ ꦠꦱ꧀ꦱ ꦥꦕ꧀ꦕꦪꦁ ꦥꦫꦶꦪꦺꦱꦠꦶ, ꦥꦫꦶꦪꦺꦱꦤ꧀ꦠꦺꦴ ꦕ ꦠꦁ ꦢꦶꦱ꧀ꦮꦴ ꦠꦷꦱꦸꦥꦶ ꦄꦢ꧀ꦣꦴꦱꦸ ꦤꦴꦩꦫꦹꦥꦱ꧀ꦱ ꦥꦮꦠ꧀ꦠꦶꦁ ꦄꦴꦫꦧ꧀ꦨ ꦏꦔ꧀ꦑꦁ ꦮꦶꦠꦫꦠꦶ. ꦮꦶꦠꦶꦟ꧀ꦟꦏꦔ꧀ꦑꦺꦴ ꦏꦭꦴꦥꦱꦩ꧀ꦩꦱꦤꦮꦱꦺꦤ ꦠꦶꦭꦏ꧀ꦑꦟꦁ ꦄꦴꦫꦺꦴꦥꦺꦠ꧀ꦮꦴ ꦈꦢꦪꦧ꧀ꦧꦪꦴꦤꦸꦥꦱ꧀ꦱꦤꦴꦪ ꦥꦸꦧ꧀ꦧꦨꦴꦒꦺ ꦈꦥ꧀ꦥꦤ꧀ꦤꦺ ꦎꦨꦴꦱꦴꦢꦪꦺꦴ ꦢꦱ ꦮꦶꦥꦱ꧀ꦱꦤꦸꦥꦏ꧀ꦏꦶꦭꦺꦱꦺ ꦥꦲꦴꦪ ꦈꦥꦏ꧀ꦏꦶꦭꦺꦱꦮꦶꦩꦸꦠ꧀ꦠꦁ ꦥꦛꦶꦥꦢꦴꦚꦴꦟꦁ ‘‘ꦩꦒ꧀ꦒꦺꦴ’’ꦠꦶ ꦮꦮꦠ꧀ꦡꦥꦺꦠ꧀ꦮꦴ ꦈꦢꦪꦁ ꦥꦲꦴꦪ ꦨꦔ꧀ꦒꦴꦤꦸꦥꦱ꧀ꦱꦤꦁ ꦥꦠ꧀ꦮꦴ ꦤꦶꦫꦤ꧀ꦠꦫꦁ ꦨꦔ꧀ꦒꦴꦤꦸꦥꦱ꧀ꦱꦤꦺꦤ ꦨꦪꦠꦺꦴ ꦈꦥꦛ꧀ꦜꦶꦠꦺꦱꦸ ꦱꦧ꧀ꦧꦱꦔ꧀ꦑꦴꦫꦺꦱꦸ ꦤꦶꦧ꧀ꦧꦶꦤ꧀ꦢꦤ꧀ꦠꦺꦴ ꦮꦶꦫꦗ꧀ꦗꦤ꧀ꦠꦺꦴ ꦮꦶꦩꦸꦕ꧀ꦕꦤ꧀ꦠꦺꦴ ꦪꦡꦴꦏ꧀ꦏꦩꦁ ꦕꦠ꧀ꦠꦴꦫꦺꦴ ꦄꦫꦶꦪꦩꦒ꧀ꦒꦺ ꦥꦴꦥꦸꦟꦶꦠ꧀ꦮꦴ ꦄꦫꦲꦠ꧀ꦠꦦꦭꦺ ꦥꦠꦶꦛ꧀ꦜꦴꦪ ꦌꦏꦹꦤꦮꦷꦱꦠꦶꦨꦺꦢꦱ꧀ꦱ ꦥꦕ꧀ꦕꦮꦺꦏ꧀ꦑꦟꦚꦴꦟꦱ꧀ꦱ ꦥꦫꦶꦪꦤ꧀ꦠꦥ꧀ꦥꦠ꧀ꦠꦺꦴ ꦱꦢꦺꦮꦏꦱ꧀ꦱ ꦭꦺꦴꦏꦱ꧀ꦱ ꦄꦒ꧀ꦒꦢꦏ꧀ꦑꦶꦟꦺꦪ꧀ꦪꦺꦴ ꦲꦺꦴꦠꦶ. ꦌꦠ꧀ꦠꦴꦮꦠꦴ ꦕꦱ꧀ꦱ ꦒꦟꦤꦁ ꦄꦴꦢꦶꦁ ꦏꦠ꧀ꦮꦴ ꦮꦶꦥꦱ꧀ꦱꦤꦴꦥꦫꦶꦪꦺꦴꦱꦴꦤꦴ ꦄꦴꦤꦴꦥꦴꦤꦱ꧀ꦱꦠꦶꦱꦩꦴꦣꦶꦨꦴꦮꦤꦴ ꦕ ꦱꦩꦠ꧀ꦠꦴ ꦲꦺꦴꦠꦷꦠꦶ.

ꦄꦪꦁ ꦱꦧ꧀ꦧꦴꦏꦴꦫꦠꦺꦴ ꦥꦜꦩꦕꦠꦸꦏ꧀ꦏꦮꦟ꧀ꦟꦤꦴ.

ꦆꦠꦫꦺꦱꦸ ꦥꦤ ꦠꦷꦱꦸ ꦕꦠꦸꦏ꧀ꦏꦺꦱꦸ ꦪꦱ꧀ꦩꦴ ꦮꦶꦱꦸꦁ ꦏꦩ꧀ꦩꦛ꧀ꦜꦴꦤꦨꦴꦮꦤꦴꦤꦪꦺꦴ ꦤꦴꦩ ꦤꦠ꧀ꦡꦶ; ꦠꦱ꧀ꦩꦴ ꦄꦤꦸꦥꦢꦮꦟ꧀ꦟꦤꦴꦤꦪꦺꦤꦺꦮ ꦤꦺꦱꦁ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ꦥꦷꦠꦶꦥ꧀ꦥꦛꦶꦱꦁꦮꦺꦢꦷꦠꦶ ꦥꦷꦠꦶꦁ ꦥꦛꦶꦱꦁꦮꦶꦢꦶꦠꦁ ꦏꦫꦺꦴꦤ꧀ꦠꦺꦴ ꦥꦴꦏꦛꦁ ꦏꦫꦺꦴꦤ꧀ꦠꦺꦴ ꦄꦱ꧀ꦱꦱꦶꦱ꧀ꦱꦴꦩꦶ ꦥꦱ꧀ꦱꦱꦶꦱ꧀ꦱꦴꦩꦷꦠꦶ ꦱꦶꦏ꧀ꦑꦠꦶ. ꦠꦠ꧀ꦡ ꦢ꧀ꦮꦷꦲꦴꦏꦴꦫꦺꦲꦶ ꦥꦷꦠꦶ ꦥꦛꦶꦱꦁꦮꦶꦢꦶꦠꦴ ꦲꦺꦴꦠꦶ – ꦄꦴꦫꦩ꧀ꦩꦟꦠꦺꦴ ꦕ ꦄꦱꦩ꧀ꦩꦺꦴꦲꦠꦺꦴ ꦕ.

ꦏꦡꦁ ꦄꦴꦫꦩ꧀ꦩꦟꦠꦺꦴ ꦥꦷꦠꦶ ꦥꦛꦶꦱꦁꦮꦶꦢꦶꦠꦴ ꦲꦺꦴꦠꦶ? ꦱꦥ꧀ꦥꦷꦠꦶꦏꦺ ꦢ꧀ꦮꦺ ꦙꦴꦤꦺ ꦱꦩꦴꦥꦗ꧀ꦗꦠꦶ, ꦠꦱ꧀ꦱ ꦱꦩꦴꦥꦠ꧀ꦠꦶꦏ꧀ꦑꦟꦺ ꦙꦴꦤꦥꦛꦶꦭꦴꦨꦺꦤ ꦄꦴꦫꦩ꧀ꦩꦟꦠꦺꦴ ꦥꦷꦠꦶ ꦥꦛꦶꦱꦁꦮꦶꦢꦶꦠꦴ ꦲꦺꦴꦠꦶ ꦄꦴꦫꦩ꧀ꦩꦟꦱ꧀ꦱ ꦥꦛꦶꦱꦁꦮꦶꦢꦶꦠꦠ꧀ꦠꦴ.

ꦏꦡꦁ ꦄꦱꦩ꧀ꦩꦺꦴꦲꦠꦺꦴ? ꦱꦥ꧀ꦥꦷꦠꦶꦏꦺ ꦢ꧀ꦮꦺ ꦙꦴꦤꦺ ꦱꦩꦴꦥꦗ꧀ꦗꦶꦠ꧀ꦮꦴ ꦮꦸꦛ꧀ꦜꦴꦪ ꦙꦴꦤꦱꦩ꧀ꦥꦪꦸꦠ꧀ꦠꦏꦥꦷꦠꦶꦁ ꦑꦪꦠꦺꦴ ꦮꦪꦠꦺꦴ ꦱꦩ꧀ꦩꦱꦠꦶ, ꦠꦱ꧀ꦱ ꦮꦶꦥꦱ꧀ꦱꦤꦴꦏ꧀ꦑꦟꦺ ꦭꦏ꧀ꦑꦟꦥꦛꦶꦮꦺꦣꦺꦤ ꦄꦱꦩ꧀ꦩꦺꦴꦲꦠꦺꦴ ꦥꦷꦠꦶ ꦥꦛꦶꦱꦁꦮꦶꦢꦶꦠꦴ ꦲꦺꦴꦠꦶ. ꦮꦸꦠ꧀ꦠꦚ꧀ꦲꦺꦠꦁ ꦥꦛꦶꦱꦩ꧀ꦨꦶꦢꦴꦪꦁ –

‘‘ꦢꦷꦓꦁ ꦄꦱ꧀ꦱꦴꦱꦮꦱꦺꦤ ꦕꦶꦠ꧀ꦠꦱ꧀ꦱ ꦌꦏꦒ꧀ꦒꦠꦁ ꦄꦮꦶꦏ꧀ꦑꦺꦥꦁ ꦥꦗꦴꦤꦠꦺꦴ ꦱꦠꦶ ꦈꦥꦛ꧀ꦜꦶꦠꦴ ꦲꦺꦴꦠꦶ. ꦠꦴꦪ ꦱꦠꦶꦪꦴ ꦠꦺꦤ ꦚꦴꦟꦺꦤ ꦱꦴ ꦥꦷꦠꦶ ꦥꦛꦶꦱꦁꦮꦶꦢꦶꦠꦴ ꦲꦺꦴꦠꦶ. ꦢꦷꦓꦁ ꦥꦱ꧀ꦱꦴꦱꦮꦱꦺꦤ…ꦥꦺ… ꦫꦱ꧀ꦱꦁ ꦄꦱ꧀ꦱꦴꦱꦮꦱꦺꦤ… ꦫꦱ꧀ꦱꦁ ꦥꦱ꧀ꦱꦴꦱꦮꦱꦺꦤ… ꦱꦧ꧀ꦧꦏꦴꦪꦥ꧀ꦥꦛꦶꦱꦁꦮꦺꦢꦷ ꦄꦱ꧀ꦱꦴꦱꦮꦱꦺꦤ… ꦱꦧ꧀ꦧꦏꦴꦪꦥ꧀ꦥꦛꦶꦱꦁꦮꦺꦢꦷ ꦥꦱ꧀ꦱꦴꦱꦮꦱꦺꦤ… ꦥꦱ꧀ꦱꦩ꧀ꦨꦪꦁ ꦏꦴꦪꦱꦔ꧀ꦑꦴꦫꦁ ꦄꦱ꧀ꦱꦴꦱꦮꦱꦺꦤ… ꦥꦱ꧀ꦱꦩ꧀ꦨꦪꦁ ꦏꦴꦪꦱꦔ꧀ꦑꦴꦫꦁ ꦥꦱ꧀ꦱꦴꦱꦮꦱꦺꦤ ꦕꦶꦠ꧀ꦠꦱ꧀ꦱ ꦌꦏꦒ꧀ꦒꦠꦁ ꦄꦮꦶꦏ꧀ꦑꦺꦥꦁ ꦥꦗꦴꦤꦠꦺꦴ ꦱꦠꦶ ꦈꦥꦛ꧀ꦜꦶꦠꦴ ꦲꦺꦴꦠꦶ, ꦠꦴꦪ ꦱꦠꦶꦪꦴ ꦠꦺꦤ ꦚꦴꦟꦺꦤ ꦱꦴ ꦥꦷꦠꦶ ꦥꦛꦶꦱꦁꦮꦶꦢꦶꦠꦴ ꦲꦺꦴꦠꦶ. ꦄꦴꦮꦗ꧀ꦗꦠꦺꦴ ꦱꦴ ꦥꦷꦠꦶ ꦥꦛꦶꦱꦁꦮꦶꦢꦶꦠꦴ ꦲꦺꦴꦠꦶ ꦗꦴꦤꦠꦺꦴ… ꦥꦱ꧀ꦱꦠꦺꦴ… ꦥꦕ꧀ꦕꦮꦺꦏ꧀ꦑꦠꦺꦴ… ꦕꦶꦠ꧀ꦠꦁ ꦄꦣꦶꦛ꧀ꦜꦲꦠꦺꦴ… ꦱꦢ꧀ꦣꦴꦪ ꦄꦣꦶꦩꦸꦕ꧀ꦕꦠꦺꦴ… ꦮꦷꦫꦶꦪꦁ ꦥꦒ꧀ꦒꦟ꧀ꦲꦠꦺꦴ… ꦱꦠꦶꦁ ꦈꦥꦛ꧀ꦜꦴꦥꦪꦠꦺꦴ… ꦕꦶꦠ꧀ꦠꦁ ꦱꦩꦴꦢꦲꦠꦺꦴ… ꦥꦚ꧀ꦚꦴꦪ ꦥꦗꦴꦤꦠꦺꦴ… ꦄꦨꦶꦚ꧀ꦚꦺꦪ꧀ꦪꦁ ꦄꦨꦶꦗꦴꦤꦠꦺꦴ… ꦥꦫꦶꦚ꧀ꦚꦺꦪ꧀ꦪꦁ ꦥꦫꦶꦗꦴꦤꦠꦺꦴ… ꦥꦲꦴꦠꦧ꧀ꦧꦁ ꦥꦗꦲꦠꦺꦴ… ꦨꦴꦮꦺꦠꦧ꧀ꦧꦁ ꦨꦴꦮꦪꦠꦺꦴ… ꦱꦕ꧀ꦖꦶꦏꦴꦠꦧ꧀ꦧꦁ ꦱꦕ꧀ꦖꦶꦏꦫꦺꦴꦠꦺꦴ ꦱꦴ ꦥꦷꦠꦶ ꦥꦛꦶꦱꦁꦮꦶꦢꦶꦠꦴ ꦲꦺꦴꦠꦶ. ꦌꦮꦁ ꦱꦴ ꦥꦷꦠꦶ ꦥꦛꦶꦱꦁꦮꦶꦢꦶꦠꦴ ꦲꦺꦴꦠꦷ’’ꦠꦶ (ꦥꦛꦶ. ꦩ. ꧑.꧑꧗꧒).

ꦌꦠꦺꦤꦺꦮ ꦤꦪꦺꦤ ꦄꦮꦱꦺꦱꦥꦢꦴꦤꦶꦥꦶ ꦄꦠ꧀ꦡꦠꦺꦴ ꦮꦺꦢꦶꦠꦧ꧀ꦧꦴꦤꦶ. ꦆꦢꦁ ꦥꦤꦺꦠ꧀ꦡ ꦮꦶꦱꦺꦱꦩꦠ꧀ꦠꦁ. ꦠꦶꦟ꧀ꦟꦁ ꦙꦴꦤꦴꦤꦁ ꦮꦱꦺꦤ ꦱꦸꦑꦥꦛꦶꦱꦁꦮꦺꦢꦶꦠꦴ ꦕꦠꦸꦤ꧀ꦤꦩ꧀ꦥꦶ ꦮꦱꦺꦤ ꦕꦶꦠ꧀ꦠꦱꦔ꧀ꦑꦴꦫꦥꦛꦶꦱꦁꦮꦺꦢꦶꦠꦴ ꦮꦺꦢꦶꦠꦧ꧀ꦧꦴ. ‘‘ꦕꦶꦠ꧀ꦠꦱꦔ꧀ꦑꦴꦫꦺꦴ’’ꦠꦶ ꦮꦺꦢꦤꦴꦢꦪꦺꦴ ꦢ꧀ꦮꦺ ꦑꦤ꧀ꦣꦴ. ꦱꦸꦑꦥ꧀ꦥꦛꦶꦱꦁꦮꦺꦢꦶꦥꦢꦺ ꦕꦺꦠ꧀ꦡ ꦮꦶꦥꦱ꧀ꦱꦤꦴꦨꦹꦩꦶꦢꦱ꧀ꦱꦤꦠ꧀ꦡꦁ ‘‘ꦱꦸꦑꦤ꧀ꦠꦶ ꦢ꧀ꦮꦺ ꦱꦸꦑꦴꦤꦶ – ꦏꦴꦪꦶꦏꦚ꧀ꦕ ꦱꦸꦑꦁ ꦕꦺꦠꦱꦶꦏꦚ꧀ꦕꦴ’’ꦠꦶ ꦥꦛꦶꦱꦩ꧀ꦨꦶꦢꦴꦪꦁ ꦮꦸꦠ꧀ꦠꦁ. ꦥꦱ꧀ꦱꦩ꧀ꦨꦪꦁ ꦕꦶꦠ꧀ꦠꦱꦔ꧀ꦑꦴꦫꦤ꧀ꦠꦶ ꦎꦭ꦳ꦴꦫꦶꦏꦁ ꦎꦭ꦳ꦴꦫꦶꦏꦁ ꦕꦶꦠ꧀ꦠꦱꦔ꧀ꦑꦴꦫꦁ ꦥꦱ꧀ꦱꦩ꧀ꦨꦺꦤ꧀ꦠꦺꦴ, ꦤꦶꦫꦺꦴꦣꦺꦤ꧀ꦠꦺꦴꦠꦶ ꦄꦠ꧀ꦡꦺꦴ. ꦱꦺꦴ ꦮꦶꦠ꧀ꦡꦴꦫꦠꦺꦴ ꦏꦴꦪꦱꦔ꧀ꦑꦴꦫꦺ ꦮꦸꦠ꧀ꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦺꦴ. ꦄꦥꦶꦕꦺꦠ꧀ꦡ ꦥꦷꦠꦶꦥꦢꦺ ꦥꦷꦠꦶꦱꦷꦱꦺꦤ ꦮꦺꦢꦤꦴ ꦮꦸꦠ꧀ꦠꦴ. ꦱꦸꦑꦥꦢꦺ ꦱꦫꦹꦥꦺꦤꦺꦮ ꦮꦺꦢꦤꦴ. ꦢ꧀ꦮꦷꦱꦸ ꦕꦶꦠ꧀ꦠꦱꦔ꧀ꦑꦴꦫꦥꦢꦺꦱꦸ ‘‘ꦱꦚ꧀ꦚꦴ ꦕ ꦮꦺꦢꦤꦴ ꦕ ꦕꦺꦠꦱꦶꦏꦴ ꦌꦠꦺ ꦣꦩ꧀ꦩꦴ ꦕꦶꦠ꧀ꦠꦥꦛꦶꦧꦢ꧀ꦣꦴ ꦕꦶꦠ꧀ꦠꦱꦔ꧀ꦑꦴꦫꦴ’’ꦠꦶ (ꦥꦛꦶ. ꦩ. ꧑.꧑꧗꧔; ꦩ. ꦤꦶ. ꧑.꧔꧖꧓) ꦮꦕꦤꦠꦺꦴ ꦱꦚ꧀ꦚꦴꦱꦩ꧀ꦥꦪꦸꦠ꧀ꦠꦴ ꦮꦺꦢꦤꦴꦠꦶ. ꦌꦮꦁ ꦮꦺꦢꦤꦴꦤꦸꦥꦱ꧀ꦱꦤꦴꦤꦪꦺꦤ ꦆꦢꦁ ꦕꦠꦸꦏ꧀ꦏꦁ ꦨꦴꦱꦶꦠꦤ꧀ꦠꦶ ꦮꦺꦢꦶꦠꦧ꧀ꦧꦁ.

ꦠꦠꦶꦪꦕꦠꦸꦏ꧀ꦏꦺꦥꦶ ꦕꦠꦸꦤ꧀ꦤꦁ ꦙꦴꦤꦴꦤꦁ ꦮꦱꦺꦤ ꦕꦶꦠ꧀ꦠꦥꦛꦶꦱꦁꦮꦺꦢꦶꦠꦴ ꦮꦺꦢꦶꦠꦧ꧀ꦧꦴ. ꦄꦨꦶꦥ꧀ꦥꦩꦺꦴꦢꦪꦁ ꦕꦶꦠ꧀ꦠꦤ꧀ꦠꦶ ꦕꦶꦠ꧀ꦠꦁ ꦩꦺꦴꦢꦺꦤ꧀ꦠꦺꦴ ꦥꦩꦺꦴꦢꦺꦤ꧀ꦠꦺꦴ ꦲꦴꦱꦺꦤ꧀ꦠꦺꦴ ꦥꦲꦴꦱꦺꦤ꧀ꦠꦺꦴ ꦄꦱ꧀ꦱꦱꦶꦱ꧀ꦱꦴꦩꦶ ꦥꦱ꧀ꦱꦱꦶꦱ꧀ꦱꦴꦩꦷꦠꦶ ꦱꦶꦏ꧀ꦑꦠꦶ. ꦠꦠ꧀ꦡ ꦢ꧀ꦮꦷꦲꦴꦏꦴꦫꦺꦲꦶ ꦄꦨꦶꦥ꧀ꦥꦩꦺꦴꦢꦺꦴ ꦲꦺꦴꦠꦶ – ꦱꦩꦴꦣꦶꦮꦱꦺꦤ ꦕ ꦮꦶꦥꦱ꧀ꦱꦤꦴꦮꦱꦺꦤ ꦕ.

ꦏꦡꦁ ꦱꦩꦴꦣꦶꦮꦱꦺꦤ? ꦱꦥ꧀ꦥꦷꦠꦶꦏꦺ ꦢ꧀ꦮꦺ ꦙꦴꦤꦺ ꦱꦩꦴꦥꦗ꧀ꦗꦠꦶ, ꦱꦺꦴ ꦱꦩꦴꦥꦠ꧀ꦠꦶꦏ꧀ꦑꦟꦺ ꦱꦩ꧀ꦥꦪꦸꦠ꧀ꦠꦴꦪ ꦥꦷꦠꦶꦪꦴ ꦕꦶꦠ꧀ꦠꦁ ꦄꦴꦩꦺꦴꦢꦺꦠꦶ ꦥꦩꦺꦴꦢꦺꦠꦶ. ꦏꦡꦁ ꦮꦶꦥꦱ꧀ꦱꦤꦴꦮꦱꦺꦤ? ꦱꦥ꧀ꦥꦷꦠꦶꦏꦺ ꦢ꧀ꦮꦺ ꦙꦴꦤꦺ ꦱꦩꦴꦥꦗ꧀ꦗꦶꦠ꧀ꦮꦴ ꦮꦸꦛ꧀ꦜꦴꦪ ꦙꦴꦤꦱꦩ꧀ꦥꦪꦸꦠ꧀ꦠꦏꦥꦷꦠꦶꦁ ꦑꦪꦠꦺꦴ ꦮꦪꦠꦺꦴ ꦱꦩ꧀ꦩꦱꦠꦶ; ꦌꦮꦁ ꦮꦶꦥꦱ꧀ꦱꦤꦴꦏ꧀ꦑꦟꦺ ꦙꦴꦤꦱꦩ꧀ꦥꦪꦸꦠ꧀ꦠꦏꦥꦷꦠꦶꦁ ꦄꦴꦫꦩ꧀ꦩꦟꦁ ꦏꦠ꧀ꦮꦴ ꦕꦶꦠ꧀ꦠꦁ ꦄꦴꦩꦺꦴꦢꦺꦠꦶ ꦥꦩꦺꦴꦢꦺꦠꦶ. ꦌꦮꦁ ꦥꦛꦶꦥꦤ꧀ꦤꦺꦴ ‘‘ꦄꦨꦶꦥ꧀ꦥꦩꦺꦴꦢꦪꦁ ꦕꦶꦠ꧀ꦠꦁ ꦄꦱ꧀ꦱꦱꦶꦱ꧀ꦱꦴꦩꦶ ꦥꦱ꧀ꦱꦱꦶꦱ꧀ꦱꦴꦩꦷꦠꦶ ꦱꦶꦏ꧀ꦑꦠꦷ’’ꦠꦶ ꦮꦸꦕ꧀ꦕꦠꦶ.

ꦱꦩꦴꦢꦲꦁ ꦕꦶꦠ꧀ꦠꦤ꧀ꦠꦶ ꦥꦜꦩꦗ꧀ꦙꦴꦤꦴꦢꦶꦮꦱꦺꦤ ꦄꦴꦫꦩ꧀ꦩꦟꦺ ꦕꦶꦠ꧀ꦠꦁ ꦱꦩꦁ ꦄꦴꦢꦲꦤ꧀ꦠꦺꦴ ꦱꦩꦁ ꦜꦥꦺꦤ꧀ꦠꦺꦴ ꦠꦴꦤꦶ ꦮꦴ ꦥꦤ ꦙꦴꦤꦴꦤꦶ ꦱꦩꦴꦥꦗ꧀ꦗꦶꦠ꧀ꦮꦴ ꦮꦸꦛ꧀ꦜꦴꦪ ꦙꦴꦤꦱꦩ꧀ꦥꦪꦸꦠ꧀ꦠꦏꦕꦶꦠ꧀ꦠꦁ ꦑꦪꦠꦺꦴ ꦮꦪꦠꦺꦴ ꦱꦩ꧀ꦩꦱꦠꦺꦴ ꦮꦶꦥꦱ꧀ꦱꦤꦴꦏ꧀ꦑꦟꦺ ꦭꦏ꧀ꦑꦟꦥꦛꦶꦮꦺꦣꦺꦤ ꦈꦥ꧀ꦥꦗ꧀ꦗꦠꦶ ꦑꦟꦶꦏꦕꦶꦠ꧀ꦠꦺꦏꦒ꧀ꦒꦠꦴ; ꦌꦮꦁ ꦈꦥ꧀ꦥꦤ꧀ꦤꦴꦪ ꦑꦟꦶꦏꦕꦶꦠ꧀ꦠꦺꦏꦒ꧀ꦒꦠꦴꦪ ꦮꦱꦺꦤꦥꦶ ꦄꦴꦫꦩ꧀ꦩꦟꦺ ꦕꦶꦠ꧀ꦠꦁ ꦱꦩꦁ ꦄꦴꦢꦲꦤ꧀ꦠꦺꦴ ꦱꦩꦁ ꦜꦥꦺꦤ꧀ꦠꦺꦴ ‘‘ꦱꦩꦴꦢꦲꦁ ꦕꦶꦠ꧀ꦠꦁ ꦄꦱ꧀ꦱꦱꦶꦱ꧀ꦱꦴꦩꦶ ꦥꦱ꧀ꦱꦱꦶꦱ꧀ꦱꦴꦩꦷꦠꦶ ꦱꦶꦏ꧀ꦑꦠꦷ’’ꦠꦶ ꦮꦸꦕ꧀ꦕꦠꦶ.

ꦮꦶꦩꦺꦴꦕꦪꦁ ꦕꦶꦠ꧀ꦠꦤ꧀ꦠꦶ ꦥꦜꦩꦗ꧀ꦙꦴꦤꦺꦤ ꦤꦷꦮꦫꦟꦺꦲꦶ ꦕꦶꦠ꧀ꦠꦁ ꦩꦺꦴꦕꦺꦤ꧀ꦠꦺꦴ ꦮꦶꦩꦺꦴꦕꦺꦤ꧀ꦠꦺꦴ, ꦢꦸꦠꦶꦪꦺꦤ ꦮꦶꦠꦏ꧀ꦏꦮꦶꦕꦴꦫꦺꦲꦶ, ꦠꦠꦶꦪꦺꦤ ꦥꦷꦠꦶꦪꦴ, ꦕꦠꦸꦠ꧀ꦡꦺꦤ ꦱꦸꦑꦢꦸꦏ꧀ꦑꦺꦲꦶ ꦕꦶꦠ꧀ꦠꦁ ꦩꦺꦴꦕꦺꦤ꧀ꦠꦺꦴ ꦮꦶꦩꦺꦴꦕꦺꦤ꧀ꦠꦺꦴ. ꦠꦴꦤꦶ ꦮꦴ ꦥꦤ ꦙꦴꦤꦴꦤꦶ ꦱꦩꦴꦥꦗ꧀ꦗꦶꦠ꧀ꦮꦴ ꦮꦸꦛ꧀ꦜꦴꦪ ꦙꦴꦤꦱꦩ꧀ꦥꦪꦸꦠ꧀ꦠꦏꦕꦶꦠ꧀ꦠꦁ ꦑꦪꦠꦺꦴ ꦮꦪꦠꦺꦴ ꦱꦩ꧀ꦩꦱꦠꦶ. ꦱꦺꦴ ꦮꦶꦥꦱ꧀ꦱꦤꦴꦏ꧀ꦑꦟꦺ ꦄꦤꦶꦕ꧀ꦕꦴꦤꦸꦥꦱ꧀ꦱꦤꦴꦪ ꦤꦶꦕ꧀ꦕꦱꦚ꧀ꦚꦴꦠꦺꦴ ꦕꦶꦠ꧀ꦠꦁ ꦩꦺꦴꦕꦺꦤ꧀ꦠꦺꦴ ꦮꦶꦩꦺꦴꦕꦺꦤ꧀ꦠꦺꦴ, ꦢꦸꦏ꧀ꦑꦴꦤꦸꦥꦱ꧀ꦱꦤꦴꦪ ꦱꦸꦑꦱꦚ꧀ꦚꦴꦠꦺꦴ, ꦄꦤꦠ꧀ꦠꦴꦤꦸꦥꦱ꧀ꦱꦤꦴꦪ ꦄꦠ꧀ꦠꦱꦚ꧀ꦚꦴꦠꦺꦴ, ꦤꦶꦧ꧀ꦧꦶꦢꦴꦤꦸꦥꦱ꧀ꦱꦤꦴꦪ ꦤꦤ꧀ꦢꦶꦠꦺꦴ, ꦮꦶꦫꦴꦒꦴꦤꦸꦥꦱ꧀ꦱꦤꦴꦪ ꦫꦴꦒꦠꦺꦴ, ꦤꦶꦫꦺꦴꦣꦴꦤꦸꦥꦱ꧀ꦱꦤꦴꦪ ꦱꦩꦸꦢꦪꦠꦺꦴ, ꦥꦛꦶꦤꦶꦱ꧀ꦱꦒ꧀ꦒꦴꦤꦸꦥꦱ꧀ꦱꦤꦴꦪ ꦄꦴꦢꦴꦤꦠꦺꦴ ꦕꦶꦠ꧀ꦠꦁ ꦩꦺꦴꦕꦺꦤ꧀ꦠꦺꦴ ꦮꦶꦩꦺꦴꦕꦺꦤ꧀ꦠꦺꦴ ꦄꦱ꧀ꦱꦱꦠꦶ ꦕꦺꦮ ꦥꦱ꧀ꦱꦱꦠꦶ ꦕ. ꦠꦺꦤ ꦮꦸꦠ꧀ꦠꦁ – ‘‘ꦮꦶꦩꦺꦴꦕꦪꦁ ꦕꦶꦠ꧀ꦠꦁ ꦄꦱ꧀ꦱꦱꦶꦱ꧀ꦱꦴꦩꦶ ꦥꦱ꧀ꦱꦱꦶꦱ꧀ꦱꦴꦩꦷꦠꦶ ꦱꦶꦏ꧀ꦑꦠꦷ’’ꦠꦶ. ꦌꦮꦁ ꦕꦶꦠ꧀ꦠꦴꦤꦸꦥꦱ꧀ꦱꦤꦴꦮꦱꦺꦤ ꦆꦢꦁ ꦕꦠꦸꦏ꧀ꦏꦁ ꦨꦴꦱꦶꦠꦤ꧀ꦠꦶ ꦮꦺꦢꦶꦠꦧ꧀ꦧꦁ.

ꦕꦠꦸꦠ꧀ꦡꦕꦠꦸꦏ꧀ꦏꦺ ꦥꦤ ꦄꦤꦶꦕ꧀ꦕꦴꦤꦸꦥꦱ꧀ꦱꦷꦠꦶ ꦌꦠ꧀ꦡ ꦠꦴꦮ ꦄꦤꦶꦕ꧀ꦕꦁ ꦮꦺꦢꦶꦠꦧ꧀ꦧꦁ, ꦄꦤꦶꦕ꧀ꦕꦠꦴ ꦮꦺꦢꦶꦠꦧ꧀ꦧꦴ, ꦄꦤꦶꦕ꧀ꦕꦴꦤꦸꦥꦱ꧀ꦱꦤꦴ ꦮꦺꦢꦶꦠꦧ꧀ꦧꦴ, ꦄꦤꦶꦕ꧀ꦕꦴꦤꦸꦥꦱ꧀ꦱꦷ ꦮꦺꦢꦶꦠꦧ꧀ꦧꦺꦴ. ꦠꦠ꧀ꦡ ‘‘ꦄꦤꦶꦕ꧀ꦕ’’ꦤ꧀ꦠꦶ ꦥꦚ꧀ꦕꦏ꧀ꦑꦤ꧀ꦣꦴ. ꦏꦱ꧀ꦩꦴ? ꦈꦥ꧀ꦥꦴꦢꦮꦪꦚ꧀ꦚꦡꦠ꧀ꦠꦨꦴꦮꦴ. ‘‘ꦄꦤꦶꦕ꧀ꦕꦠꦴ’’ꦠꦶ ꦠꦺꦱꦚ꧀ꦚꦺꦮ ꦈꦥ꧀ꦥꦴꦢꦮꦪꦚ꧀ꦚꦡꦠ꧀ꦠꦁ ꦲꦸꦠ꧀ꦮꦴ ꦄꦨꦴꦮꦺꦴ ꦮꦴ ꦤꦶꦧ꧀ꦧꦠ꧀ꦠꦴꦤꦁ ꦠꦺꦤꦺꦮꦴꦏꦴꦫꦺꦤ ꦄꦜꦠ꧀ꦮꦴ ꦑꦟꦨꦔ꧀ꦒꦺꦤ ꦨꦺꦢꦺꦴꦠꦶ ꦄꦠ꧀ꦡꦺꦴ. ‘‘ꦄꦤꦶꦕ꧀ꦕꦴꦤꦸꦥꦱ꧀ꦱꦤꦴ’’ꦠꦶ ꦠꦱ꧀ꦱꦴ ꦄꦤꦶꦕ꧀ꦕꦠꦴꦪ ꦮꦱꦺꦤ ꦫꦹꦥꦴꦢꦷꦱꦸ ‘‘ꦄꦤꦶꦕ꧀ꦕ’’ꦤ꧀ꦠꦶ ꦄꦤꦸꦥꦱ꧀ꦱꦤꦴ; ‘‘ꦄꦤꦶꦕ꧀ꦕꦴꦤꦸꦥꦱ꧀ꦱꦷ’’ꦠꦶ ꦠꦴꦪ ꦄꦤꦸꦥꦱ꧀ꦱꦤꦴꦪ ꦱꦩꦤ꧀ꦤꦴꦒꦠꦺꦴ; ꦠꦱ꧀ꦩꦴ ꦌꦮꦁ ꦨꦹꦠꦺꦴ ꦄꦱ꧀ꦱꦱꦤ꧀ꦠꦺꦴ ꦕ ꦥꦱ꧀ꦱꦱꦤ꧀ꦠꦺꦴ ꦕ ꦆꦣ ‘‘ꦄꦤꦶꦕ꧀ꦕꦴꦤꦸꦥꦱ꧀ꦱꦷ ꦄꦱ꧀ꦱꦱꦶꦱ꧀ꦱꦴꦩꦶ, ꦥꦱ꧀ꦱꦱꦶꦱ꧀ꦱꦴꦩꦷꦠꦶ ꦱꦶꦏ꧀ꦑꦠꦷ’’ꦠꦶ ꦮꦺꦢꦶꦠꦧ꧀ꦧꦺꦴ.