꧖. ꦄꦴꦫꦴꦩꦮꦒ꧀ꦒꦺꦴ

꧑. ꦥꦜꦩꦱꦶꦏ꧀ꦑꦴꦥꦢꦮꦟ꧀ꦟꦤꦴ

꧑꧐꧒꧕. ꦄꦴꦫꦴꦩꦮꦒ꧀ꦒꦱ꧀ꦱ ꦥꦜꦩꦱꦶꦏ꧀ꦑꦴꦥꦢꦺ – ꦥꦫꦶꦏ꧀ꦑꦺꦥꦁ ꦄꦠꦶꦏ꧀ꦏꦴꦩꦺꦤ꧀ꦠꦶꦪꦴ, ꦈꦥꦕꦴꦫꦁ ꦎꦏ꧀ꦏꦩꦤ꧀ꦠꦶꦪꦴꦠꦶ ꦌꦠ꧀ꦡ ꦥꦜꦩꦥꦴꦢꦺ ꦢꦸꦏ꧀ꦏꦛꦁ, ꦢꦸꦠꦶꦪꦥꦴꦢꦺ ꦥꦴꦕꦶꦠ꧀ꦠꦶꦪꦁ.

꧑꧐꧒꧗. ꦱꦷꦱꦴꦤꦸꦭꦺꦴꦏꦶꦏꦴꦠꦶ ꦥꦜꦩꦁ ꦥꦮꦶꦱꦤ꧀ꦠꦷꦤꦁ ꦨꦶꦏ꧀ꦑꦸꦤꦷꦤꦁ ꦱꦷꦱꦁ ꦄꦤꦸꦭꦺꦴꦏꦺꦤ꧀ꦠꦷ ꦥꦮꦶꦱꦠꦶ, ꦄꦤꦴꦥꦠ꧀ꦠꦶ. ꦪꦠ꧀ꦡ ꦨꦶꦏ꧀ꦑꦸꦤꦶꦪꦺꦴꦠꦶ ꦪꦠ꧀ꦡ ꦨꦶꦏ꧀ꦑꦸꦤꦶꦪꦺꦴ ꦥꦜꦩꦠꦫꦁ ꦥꦮꦶꦱꦶꦠ꧀ꦮꦴ ꦱꦗ꧀ꦙꦴꦪꦕꦺꦠꦶꦪꦮꦤ꧀ꦢꦤꦴꦢꦷꦤꦶ ꦏꦫꦺꦴꦤ꧀ꦠꦶ, ꦠꦠ꧀ꦡ ꦠꦴꦱꦁ ꦱꦤ꧀ꦠꦶꦏꦁ ꦒꦕ꧀ꦖꦴꦩꦷꦠꦶ ꦒꦤ꧀ꦠꦸꦁ ꦮꦛ꧀ꦛꦠꦶ. ꦄꦴꦥꦢꦴꦱꦹꦠꦶ ꦏꦺꦤꦕꦶ ꦈꦥꦢ꧀ꦢꦸꦠꦴ ꦲꦺꦴꦠꦶ, ꦌꦮꦫꦹꦥꦴꦱꦸ ꦄꦴꦥꦢꦴꦱꦸ ꦥꦮꦶꦱꦶꦠꦸꦁ ꦮꦛ꧀ꦛꦠꦶ. ꦱꦺꦱꦁ ꦈꦠ꧀ꦠꦴꦤꦩꦺꦮ.

ꦣꦸꦫꦤꦶꦏ꧀ꦑꦺꦥꦱꦩꦸꦛ꧀ꦜꦴꦤꦁ – ꦏꦶꦫꦶꦪꦴꦏꦶꦫꦶꦪꦁ, ꦱꦚ꧀ꦚꦴꦮꦶꦩꦺꦴꦏ꧀ꦑꦁ, ꦱꦕꦶꦠ꧀ꦠꦏꦁ, ꦥꦟ꧀ꦟꦠ꧀ꦠꦶꦮꦗ꧀ꦗꦁ, ꦏꦴꦪꦏꦩ꧀ꦩꦁ, ꦮꦕꦷꦏꦩ꧀ꦩꦁ, ꦠꦶꦕꦶꦠ꧀ꦠꦁ, ꦠꦶꦮꦺꦢꦤꦤ꧀ꦠꦶ.

ꦥꦜꦩꦱꦶꦏ꧀ꦑꦴꦥꦢꦁ.

꧒. ꦢꦸꦠꦶꦪꦱꦶꦏ꧀ꦑꦴꦥꦢꦮꦟ꧀ꦟꦤꦴ

꧑꧐꧒꧘. ꦢꦸꦠꦶꦪꦺ – ꦄꦴꦪꦱ꧀ꦩꦴ ꦏꦥ꧀ꦥꦶꦠꦏꦺꦴꦠꦶ ꦄꦪꦁ ꦗꦛꦶꦭꦱꦲꦱ꧀ꦱꦧ꧀ꦨꦤ꧀ꦠꦫꦺꦴ ꦡꦺꦫꦺꦴ. ꦱꦁꦲꦫꦷꦠꦶ ꦱꦔ꧀ꦏꦴꦩꦺꦱꦶ. ꦱꦁꦲꦛꦺꦴꦠꦶ ꦱꦔ꧀ꦏꦴꦩꦶꦠꦺꦴ. ꦏꦴꦱꦴꦮꦛꦺꦴꦠꦶ ꦤ꧀ꦲꦴꦥꦶꦠꦴ ꦏꦴꦱꦴꦮꦁ ꦤꦶꦮꦴꦱꦺꦠ꧀ꦮꦴ ꦏꦩ꧀ꦩꦁ ꦏꦫꦺꦴꦤ꧀ꦠꦶ, ꦠꦁ ꦱꦤ꧀ꦣꦴꦪꦴꦲꦁꦱꦸ. ꦱꦺꦱꦁ ꦈꦠ꧀ꦠꦴꦤꦩꦺꦮ.

ꦠꦶꦱꦩꦸꦛ꧀ꦜꦴꦤꦁ – ꦏꦶꦫꦶꦪꦁ, ꦱꦚ꧀ꦚꦴꦮꦶꦩꦺꦴꦏ꧀ꦑꦁ, ꦱꦕꦶꦠ꧀ꦠꦏꦁ, ꦭꦺꦴꦏꦮꦗ꧀ꦗꦁ, ꦏꦴꦪꦏꦩ꧀ꦩꦁ, ꦮꦕꦷꦏꦩ꧀ꦩꦁ, ꦄꦏꦸꦱꦭꦕꦶꦠ꧀ꦠꦁ, ꦢꦸꦏ꧀ꦑꦮꦺꦢꦤꦤ꧀ꦠꦶ.

ꦢꦸꦠꦶꦪꦱꦶꦏ꧀ꦑꦴꦥꦢꦁ.

꧓. ꦠꦠꦶꦪꦱꦶꦏ꧀ꦑꦴꦥꦢꦮꦟ꧀ꦟꦤꦴ

꧑꧐꧓꧖. ꦠꦠꦶꦪꦺ – ꦄꦤꦸꦱꦴꦱꦤꦶꦥꦸꦫꦺꦏ꧀ꦑꦴꦫꦴꦪꦴꦠꦶ ꦆꦢꦴꦤꦶꦥꦶ ꦠ꧀ꦮꦁ ꦧꦴꦭꦴ ꦄꦧ꧀ꦪꦠ꧀ꦠꦴꦠꦶꦄꦴꦢꦶꦤꦴ ꦤꦪꦺꦤ ꦄꦤꦸꦱꦴꦱꦤꦶꦥꦏ꧀ꦑꦺ ꦜꦠ꧀ꦮꦴ ꦮꦢꦤ꧀ꦠꦶꦪꦴ ꦄꦤꦴꦥꦠ꧀ꦠꦶ. ꦱꦺꦱꦁ ꦈꦠ꧀ꦠꦴꦤꦩꦺꦮ. ꦱꦩꦸꦛ꧀ꦜꦴꦤꦴꦢꦷꦤꦶ ꦄꦤꦤ꧀ꦠꦫꦱꦶꦏ꧀ꦑꦴꦥꦢꦱꦢꦶꦱꦴꦤꦺꦮꦴꦠꦶ.

ꦠꦠꦶꦪꦱꦶꦏ꧀ꦑꦴꦥꦢꦁ.

꧔. ꦕꦠꦸꦠ꧀ꦡꦱꦶꦏ꧀ꦑꦴꦥꦢꦮꦟ꧀ꦟꦤꦴ

꧑꧐꧓꧗. ꦕꦠꦸꦠ꧀ꦡꦺ – ꦱꦧ꧀ꦧꦁ ꦈꦠ꧀ꦠꦴꦤꦩꦺꦮ. ꦕꦠꦸꦱꦩꦸꦛ꧀ꦜꦴꦤꦁ – ꦏꦴꦪꦠꦺꦴ ꦏꦴꦪꦮꦴꦕꦠꦺꦴ ꦏꦴꦪꦕꦶꦠ꧀ꦠꦠꦺꦴ ꦏꦴꦪꦮꦴꦕꦴꦕꦶꦠ꧀ꦠꦠꦺꦴ ꦕ ꦱꦩꦸꦛ꧀ꦜꦴꦠꦶ. ꦤꦶꦩꦤ꧀ꦠꦶꦠꦴꦪ ꦄꦤꦴꦥꦸꦕ꧀ꦖꦴ ꦨꦸꦚ꧀ꦗꦤ꧀ꦠꦶꦪꦴ ꦄꦴꦥꦠ꧀ꦠꦶꦱꦩ꧀ꦨꦮꦠꦺꦴ ꦱꦶꦪꦴ ꦏꦶꦫꦶꦪꦴꦏꦶꦫꦶꦪꦁ, ꦥꦮꦴꦫꦶꦠꦴꦪ ꦏꦥ꧀ꦥꦶꦪꦁ ꦏꦴꦫꦺꦠ꧀ꦮꦴꦥꦶ ꦄꦏꦴꦫꦺꦠ꧀ꦮꦴꦥꦶ ꦨꦸꦚ꧀ꦗꦤ꧀ꦠꦶꦪꦴ ꦄꦴꦥꦠ꧀ꦠꦶꦱꦩ꧀ꦨꦮꦠꦺꦴ ꦱꦶꦪꦴ ꦏꦶꦫꦶꦪꦁ, ꦤꦺꦴꦱꦚ꧀ꦚꦴꦮꦶꦩꦺꦴꦏ꧀ꦑꦁ, ꦄꦕꦶꦠ꧀ꦠꦏꦁ, ꦥꦟ꧀ꦟꦠ꧀ꦠꦶꦮꦗ꧀ꦗꦁ, ꦏꦴꦪꦏꦩ꧀ꦩꦁ, ꦮꦕꦷꦏꦩ꧀ꦩꦁ, ꦠꦶꦕꦶꦠ꧀ꦠꦁ, ꦠꦶꦮꦺꦢꦤꦤ꧀ꦠꦶ.

ꦕꦠꦸꦠ꧀ꦡꦱꦶꦏ꧀ꦑꦴꦥꦢꦁ.

꧕. ꦥꦚ꧀ꦕꦩꦱꦶꦏ꧀ꦑꦴꦥꦢꦮꦟ꧀ꦟꦤꦴ

꧑꧐꧔꧓. ꦥꦚ꧀ꦕꦩꦺ – ꦏꦸꦭꦺ ꦩꦕ꧀ꦖꦫꦺꦴ ꦏꦸꦭꦩꦕ꧀ꦖꦫꦺꦴ, ꦏꦸꦭꦩꦕ꧀ꦖꦫꦺꦴ ꦌꦠꦶꦱ꧀ꦱꦴ ꦄꦠ꧀ꦡꦷꦠꦶ ꦏꦸꦭꦩꦕ꧀ꦖꦫꦶꦤꦷ ꦏꦸꦭꦁ ꦮꦴ ꦩꦕ꧀ꦖꦫꦴꦪꦠꦷꦠꦶ ꦏꦸꦭꦩꦕ꧀ꦖꦫꦶꦤꦷ. ꦏꦸꦭꦱ꧀ꦱ ꦄꦮꦟ꧀ꦟꦤ꧀ꦠꦶ ꦠꦁ ꦏꦸꦭꦁ ꦄꦱ꧀ꦱꦢ꧀ꦣꦁ ꦄꦥ꧀ꦥꦱꦤ꧀ꦤꦤ꧀ꦠꦶ. ꦨꦶꦏ꧀ꦑꦸꦤꦷꦤꦁ ꦄꦮꦟ꧀ꦟꦤ꧀ꦠꦶ ꦨꦶꦏ꧀ꦑꦸꦤꦶꦪꦺꦴ ꦢꦸꦱ꧀ꦱꦷꦭꦴ ꦥꦴꦥꦣꦩ꧀ꦩꦴꦠꦶ.

꧑꧐꧔꧕. ꦱꦤ꧀ꦠꦁꦪꦺꦮ ꦄꦴꦢꦷꦤꦮꦤ꧀ꦠꦶ ꦏꦸꦭꦱ꧀ꦱ ꦮꦴ ꦨꦶꦏ꧀ꦑꦸꦤꦷꦤꦁ ꦮꦴ ꦱꦤ꧀ꦠꦁ ꦄꦒꦸꦟꦁ. ꦱꦺꦱꦁ ꦈꦠ꧀ꦠꦴꦤꦩꦺꦮ. ꦠꦶꦱꦩꦸꦛ꧀ꦜꦴꦤꦁ – ꦏꦶꦫꦶꦪꦁ, ꦱꦚ꧀ꦚꦴꦮꦶꦩꦺꦴꦏ꧀ꦑꦁ, ꦱꦕꦶꦠ꧀ꦠꦏꦁ, ꦭꦺꦴꦏꦮꦗ꧀ꦗꦁ, ꦏꦴꦪꦏꦩ꧀ꦩꦁ, ꦮꦕꦷꦏꦩ꧀ꦩꦁ, ꦄꦏꦸꦱꦭꦕꦶꦠ꧀ꦠꦁ ꦢꦸꦏ꧀ꦑꦮꦺꦢꦤꦤ꧀ꦠꦶ.

ꦥꦚ꧀ꦕꦩꦱꦶꦏ꧀ꦑꦴꦥꦢꦁ.

꧖. ꦖꦛ꧀ꦜꦱꦶꦏ꧀ꦑꦴꦥꦢꦮꦟ꧀ꦟꦤꦴ

꧑꧐꧔꧘. ꦖꦛ꧀ꦜꦺ – ꦎꦮꦴꦢꦴꦪꦴꦠꦶ ꦒꦫꦸꦣꦩ꧀ꦩꦠ꧀ꦡꦴꦪ. ꦱꦁꦮꦴꦱꦴꦪꦴꦠꦶ ꦈꦥꦺꦴꦱꦡꦥꦮꦴꦫꦟꦴꦥꦸꦕ꧀ꦖꦤꦠ꧀ꦡꦴꦪ. ꦄꦪꦩꦺꦠ꧀ꦡ ꦱꦔ꧀ꦑꦺꦥꦺꦴ. ꦮꦶꦠ꧀ꦡꦴꦫꦺꦴ ꦥꦤ ꦨꦶꦏ꧀ꦑꦸꦤꦺꦴꦮꦴꦢꦏꦱꦶꦏ꧀ꦑꦴꦥꦢꦮꦟ꧀ꦟꦤꦴꦪꦁ ꦮꦸꦠ꧀ꦠꦺꦴꦪꦺꦮ.

ꦌꦭ꦳ꦏꦭꦺꦴꦩꦱꦩꦸꦛ꧀ꦜꦴꦤꦁ – ꦏꦶꦫꦶꦪꦁ, ꦤꦺꦴꦱꦚ꧀ꦚꦴꦮꦶꦩꦺꦴꦏ꧀ꦑꦁ, ꦄꦕꦶꦠ꧀ꦠꦏꦁ, ꦥꦟ꧀ꦟꦠ꧀ꦠꦶꦮꦗ꧀ꦗꦁ, ꦏꦴꦪꦏꦩ꧀ꦩꦁ, ꦠꦶꦕꦶꦠ꧀ꦠꦁ, ꦠꦶꦮꦺꦢꦤꦤ꧀ꦠꦶ.

ꦖꦛ꧀ꦜꦱꦶꦏ꧀ꦑꦴꦥꦢꦁ.

꧗. ꦱꦠ꧀ꦠꦩꦱꦶꦏ꧀ꦑꦴꦥꦢꦮꦟ꧀ꦟꦤꦴ

꧑꧐꧕꧓. ꦱꦠ꧀ꦠꦩꦺ – ꦥꦫꦶꦪꦺꦱꦶꦠ꧀ꦮꦴ ꦤ ꦭꦨꦠꦷꦠꦶ ꦨꦶꦏ꧀ꦑꦸꦤꦶꦁ ꦤ ꦭꦨꦠꦶ. ꦱꦺꦱꦁ ꦈꦠ꧀ꦠꦴꦤꦩꦺꦮ. ꦆꦩꦱ꧀ꦱꦴꦥꦶ ꦮꦶꦠ꧀ꦡꦴꦫꦺꦴ ꦨꦶꦏ꧀ꦑꦸꦤꦺꦴꦮꦴꦢꦏꦺ ꦮꦸꦠ꧀ꦠꦺꦴꦪꦺꦮ.

ꦣꦸꦫꦤꦶꦏ꧀ꦑꦺꦥꦱꦩꦸꦛ꧀ꦜꦴꦤꦁ – ꦄꦏꦶꦫꦶꦪꦁ, ꦱꦚ꧀ꦚꦴꦮꦶꦩꦺꦴꦏ꧀ꦑꦁ, ꦱꦕꦶꦠ꧀ꦠꦏꦁ, ꦭꦺꦴꦏꦮꦗ꧀ꦗꦁ, ꦏꦴꦪꦏꦩ꧀ꦩꦁ, ꦮꦕꦷꦏꦩ꧀ꦩꦁ, ꦄꦏꦸꦱꦭꦕꦶꦠ꧀ꦠꦁ, ꦢꦸꦏ꧀ꦑꦮꦺꦢꦤꦤ꧀ꦠꦶ.

ꦱꦠ꧀ꦠꦩꦱꦶꦏ꧀ꦑꦴꦥꦢꦁ.

꧘. ꦄꦛ꧀ꦜꦩꦱꦶꦏ꧀ꦑꦴꦥꦢꦮꦟ꧀ꦟꦤꦴ

꧑꧐꧕꧖. ꦄꦛ꧀ꦜꦩꦺ – ꦌꦏꦏꦩ꧀ꦩꦤ꧀ꦠꦶꦄꦴꦢꦷꦲꦶ ꦈꦥꦺꦴꦱꦡꦥꦮꦴꦫꦟꦴꦪꦺꦮ ꦮꦸꦠ꧀ꦠꦴ. ꦱꦺꦱꦁ ꦈꦠ꧀ꦠꦴꦤꦩꦺꦮ. ꦆꦩꦱ꧀ꦱꦴꦥꦶ ꦮꦶꦠ꧀ꦡꦴꦫꦺꦴ ꦨꦶꦏ꧀ꦑꦸꦤꦺꦴꦮꦴꦢꦏꦺ ꦮꦸꦠ꧀ꦠꦺꦴꦪꦺꦮ.

ꦥꦜꦩꦥꦴꦫꦴꦗꦶꦏꦱꦩꦸꦛ꧀ꦜꦴꦤꦁ – ꦄꦏꦶꦫꦶꦪꦁ, ꦱꦚ꧀ꦚꦴꦮꦶꦩꦺꦴꦏ꧀ꦑꦁ, ꦱꦕꦶꦠ꧀ꦠꦏꦁ, ꦭꦺꦴꦏꦮꦗ꧀ꦗꦁ, ꦏꦴꦪꦏꦩ꧀ꦩꦁ, ꦄꦏꦸꦱꦭꦕꦶꦠ꧀ꦠꦁ, ꦢꦸꦏ꧀ꦑꦮꦺꦢꦤꦤ꧀ꦠꦶ.

ꦄꦛ꧀ꦜꦩꦱꦶꦏ꧀ꦑꦴꦥꦢꦁ.

꧙. ꦤꦮꦩꦱꦶꦏ꧀ꦑꦴꦥꦢꦮꦟ꧀ꦟꦤꦴ

꧑꧐꧕꧘. ꦤꦮꦩꦺ – ꦱꦧ꧀ꦧꦁ ꦈꦠ꧀ꦠꦴꦤꦩꦺꦮ. ꦆꦩꦱ꧀ꦱꦴꦥꦶ ꦮꦶꦠ꧀ꦡꦴꦫꦺꦴ ꦨꦶꦏ꧀ꦑꦸꦤꦺꦴꦮꦴꦢꦏꦺ ꦮꦸꦠ꧀ꦠꦺꦴꦪꦺꦮ.

ꦣꦸꦫꦤꦶꦏ꧀ꦑꦺꦥꦱꦩꦸꦛ꧀ꦜꦴꦤꦁ – ꦄꦏꦶꦫꦶꦪꦁ, ꦱꦚ꧀ꦚꦴꦮꦶꦩꦺꦴꦏ꧀ꦑꦁ, ꦱꦕꦶꦠ꧀ꦠꦏꦁ, ꦭꦺꦴꦏꦮꦗ꧀ꦗꦁ, ꦏꦴꦪꦏꦩ꧀ꦩꦁ, ꦮꦕꦷꦏꦩ꧀ꦩꦁ, ꦄꦏꦸꦱꦭꦕꦶꦠ꧀ꦠꦁ, ꦢꦸꦏ꧀ꦑꦮꦺꦢꦤꦤ꧀ꦠꦶ.

ꦤꦮꦩꦱꦶꦏ꧀ꦑꦴꦥꦢꦁ.

꧑꧐. ꦢꦱꦩꦱꦶꦏ꧀ꦑꦴꦥꦢꦮꦟ꧀ꦟꦤꦴ

꧑꧐꧖꧒. ꦢꦱꦩꦺ – ꦥꦱꦴꦑꦺꦠꦶ ꦄꦣꦺꦴꦏꦴꦪꦺ. ꦄꦣꦺꦴꦏꦴꦪꦺꦴ ꦲꦶ ꦪꦱ꧀ꦩꦴ ꦠꦠꦺꦴ ꦫꦸꦏ꧀ꦑꦱ꧀ꦱ ꦱꦴꦑꦴ ꦮꦶꦪ ꦈꦨꦺꦴ ꦈꦴꦫꦹ ꦥꦨꦶꦗ꧀ꦗꦶꦠ꧀ꦮꦴ ꦒꦠꦴ, ꦠꦱ꧀ꦩꦴ ꦥꦱꦴꦑꦺꦴꦠꦶ ꦮꦸꦕ꧀ꦕꦠꦶ.

꧑꧐꧖꧕. ꦨꦶꦤ꧀ꦢꦴꦠꦶꦄꦴꦢꦷꦱꦸ ꦱꦕꦺ ‘‘ꦨꦶꦤ꧀ꦢ, ꦦꦴꦭꦺꦲꦷ’’ꦠꦶ ꦱꦧ꧀ꦧꦴꦤꦶ ꦄꦴꦟꦴꦥꦺꦠꦶ, ꦱꦺꦴ ꦕ ꦠꦡꦺꦮ ꦏꦫꦺꦴꦠꦶ, ꦖ ꦄꦴꦟꦠ꧀ꦠꦶꦢꦸꦏ꧀ꦏꦛꦴꦤꦶ ꦖ ꦕ ꦥꦴꦕꦶꦠ꧀ꦠꦶꦪꦴꦤꦶ ꦄꦴꦥꦗ꧀ꦗꦠꦶ. ꦄꦡꦴꦥꦶ ꦌꦮꦁ ꦄꦴꦟꦴꦥꦺꦠꦶ – ‘‘ꦈꦥꦴꦱꦏ, ꦪꦁꦏꦶꦚ꧀ꦕꦶ ꦌꦠ꧀ꦡ ꦏꦴꦠꦧ꧀ꦧꦁ, ꦠꦁ ꦱꦧ꧀ꦧꦁ ꦏꦫꦺꦴꦲꦷ’’ꦠꦶ, ꦱꦺꦴ ꦕ ꦱꦧ꧀ꦧꦴꦤꦶꦥꦶ ꦨꦺꦢꦤꦴꦢꦷꦤꦶ ꦏꦫꦺꦴꦠꦶ; ꦌꦏꦮꦴꦕꦴꦪ ꦖ ꦢꦸꦏ꧀ꦏꦛꦴꦤꦶ ꦖ ꦥꦴꦕꦶꦠ꧀ꦠꦶꦪꦴꦤꦷꦠꦶ ꦢ꧀ꦮꦴꦢꦱ ꦄꦴꦥꦠ꧀ꦠꦶꦪꦺꦴ. ꦱꦕꦺ ꦥꦤ ꦨꦺꦢꦤꦴꦢꦷꦱꦸꦥꦶ ꦌꦏꦁꦪꦺꦮ ꦮꦠ꧀ꦮꦴ ‘‘ꦆꦢꦁ ꦏꦫꦺꦴꦲꦷ’’ꦠꦶ ꦄꦴꦟꦴꦥꦺꦠꦶ, ꦱꦺꦴ ꦕ ꦱꦧ꧀ꦧꦴꦤꦶ ꦏꦫꦺꦴꦠꦶ, ꦪꦁ ꦄꦴꦟꦠ꧀ꦠꦁ, ꦠꦱ꧀ꦱꦺꦮ ꦏꦫꦟꦺ ꦥꦴꦕꦶꦠ꧀ꦠꦶꦪꦁ. ꦱꦺꦱꦺꦱꦸ ꦄꦤꦴꦥꦠ꧀ꦠꦶ. ꦱꦺꦱꦁ ꦈꦠ꧀ꦠꦴꦤꦩꦺꦮ.

ꦏꦡꦶꦤꦱꦩꦸꦛ꧀ꦜꦴꦤꦁ – ꦏꦶꦫꦶꦪꦴꦏꦶꦫꦶꦪꦁ, ꦤꦺꦴꦱꦚ꧀ꦚꦴꦮꦶꦩꦺꦴꦏ꧀ꦑꦁ, ꦄꦕꦶꦠ꧀ꦠꦏꦁ, ꦥꦟ꧀ꦟꦠ꧀ꦠꦶꦮꦗ꧀ꦗꦁ, ꦏꦴꦪꦏꦩ꧀ꦩꦁ, ꦮꦕꦷꦏꦩ꧀ꦩꦁ, ꦠꦶꦕꦶꦠ꧀ꦠꦁ, ꦠꦶꦮꦺꦢꦤꦤ꧀ꦠꦶ.

ꦢꦱꦩꦱꦶꦏ꧀ꦑꦴꦥꦢꦁ.

ꦄꦴꦫꦴꦩꦮꦒ꧀ꦒꦺꦴ ꦖꦛ꧀ꦜꦺꦴ.