꧓. ꦤꦶꦱ꧀ꦱꦒ꧀ꦒꦶꦪꦏꦟ꧀ꦝꦁ (ꦨꦶꦏ꧀ꦑꦸꦤꦷꦮꦶꦨꦔ꧀ꦒꦮꦟ꧀ꦟꦤꦴ)
ꦥꦜꦩꦤꦶꦱ꧀ꦱꦒ꧀ꦒꦶꦪꦥꦴꦕꦶꦠ꧀ꦠꦶꦪꦱꦶꦏ꧀ꦑꦴꦥꦢꦮꦟ꧀ꦟꦤꦴ
ꦠꦶꦁꦱ ꦤꦶꦱ꧀ꦱꦒ꧀ꦒꦶꦪꦴ ꦣꦩ꧀ꦩꦴ, ꦨꦶꦏ꧀ꦑꦸꦤꦷꦤꦁ ꦥꦏꦴꦱꦶꦠꦴ;
ꦪꦺ ꦠꦺꦱꦁ ꦢꦴꦤꦶ ꦨꦮꦠꦶ, ꦄꦪꦁ ꦱꦁꦮꦟ꧀ꦟꦤꦴꦏ꧀ꦏꦩꦺꦴ.
꧗꧓꧓. ꦄꦴꦩꦠ꧀ꦠꦶꦏꦴꦥꦟꦤ꧀ꦠꦶ ꦄꦩꦠ꧀ꦠꦴꦤꦶ ꦮꦸꦕ꧀ꦕꦤ꧀ꦠꦶ ꦨꦴꦗꦤꦴꦤꦶ; ꦠꦴꦤꦶ ꦪꦺ ꦮꦶꦏ꧀ꦏꦶꦟꦤ꧀ꦠꦶ, ꦠꦺ ꦮꦸꦕ꧀ꦕꦤ꧀ꦠꦶ ꦄꦴꦩꦠ꧀ꦠꦶꦏꦴ; ꦠꦺꦱꦁ ꦄꦴꦥꦟꦺꦴ ꦄꦴꦩꦠ꧀ꦠꦶꦏꦴꦥꦟꦺꦴ; ꦠꦁ ꦮꦴ ꦥꦱꦴꦫꦺꦱ꧀ꦱꦤ꧀ꦠꦷꦠꦶ ꦄꦠ꧀ꦡꦺꦴ.
꧗꧓꧔. ꦥꦠ꧀ꦠꦱꦤ꧀ꦤꦶꦕꦪꦁ ꦏꦫꦺꦪ꧀ꦪꦴꦠꦶ ꦥꦠ꧀ꦠꦱꦤ꧀ꦤꦶꦣꦶꦁ ꦏꦫꦺꦪ꧀ꦪ; ꦌꦏꦴꦲꦁ ꦄꦤꦣꦶꦛ꧀ꦜꦲꦶꦠ꧀ꦮꦴ ꦮꦴ ꦄꦮꦶꦏꦥ꧀ꦥꦺꦠ꧀ꦮꦴ ꦮꦴ ꦥꦠ꧀ꦠꦁ ꦜꦥꦺꦪ꧀ꦪꦴꦠꦶ ꦄꦠ꧀ꦡꦺꦴ. ꦱꦺꦱꦁ ꦩꦲꦴꦮꦶꦨꦔ꧀ꦒꦺ ꦮꦸꦠ꧀ꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦁ. ꦄꦪꦩꦺꦮ ꦲꦶ ꦮꦶꦱꦺꦱꦺꦴ – ꦠꦠ꧀ꦡ ꦢꦱꦴꦲꦁ ꦥꦫꦶꦲꦴꦫꦺꦴ, ꦆꦣ ꦌꦏꦴꦲꦩ꧀ꦥꦶ ꦤꦠ꧀ꦡꦶ. ꦱꦺꦱꦁ ꦠꦴꦢꦶꦱꦩꦺꦮ.
ꦆꦢꦩ꧀ꦥꦶ ꦏꦡꦶꦤꦱꦩꦸꦛ꧀ꦜꦴꦤꦁ – ꦏꦴꦪꦮꦴꦕꦠꦺꦴ ꦏꦴꦪꦮꦴꦕꦴꦕꦶꦠ꧀ꦠꦠꦺꦴ ꦕ ꦱꦩꦸꦛ꧀ꦜꦴꦠꦶ, ꦄꦏꦶꦫꦶꦪꦁ, ꦤꦺꦴꦱꦚ꧀ꦚꦴꦮꦶꦩꦺꦴꦏ꧀ꦑꦁ, ꦄꦕꦶꦠ꧀ꦠꦏꦁ, ꦥꦟ꧀ꦟꦠ꧀ꦠꦶꦮꦗ꧀ꦗꦁ, ꦏꦴꦪꦏꦩ꧀ꦩꦁ, ꦮꦕꦷꦏꦩ꧀ꦩꦁ, ꦠꦶꦕꦶꦠ꧀ꦠꦁ, ꦠꦶꦮꦺꦢꦤꦤ꧀ꦠꦶ.
ꦥꦜꦩꦱꦶꦏ꧀ꦑꦴꦥꦢꦁ.
ꦢꦸꦠꦶꦪꦤꦶꦱ꧀ꦱꦒ꧀ꦒꦶꦪꦥꦴꦕꦶꦠ꧀ꦠꦶꦪꦱꦶꦏ꧀ꦑꦴꦥꦢꦮꦟ꧀ꦟꦤꦴ
꧗꧓꧘. ꦢꦸꦠꦶꦪꦺ – ꦢꦸꦕ꧀ꦕꦺꦴꦭ꦳ꦴꦠꦶ ꦮꦶꦫꦹꦥꦕꦺꦴꦭ꦳ꦴ; ꦗꦶꦟ꧀ꦟꦕꦺꦴꦭ꦳ꦴꦠꦶ ꦄꦠ꧀ꦡꦺꦴ. ꦄꦥꦪ꧀ꦪꦴꦲꦷꦠꦶ ꦄꦥꦶ ꦄꦪ꧀ꦪꦴꦲꦶ.
꧗꧔꧐. ꦄꦴꦢꦶꦱ꧀ꦱ ꦢꦶꦤ꧀ꦤꦤ꧀ꦠꦶ ꦱꦩ꧀ꦥꦠ꧀ꦠꦴ ꦨꦴꦗꦺꦤ꧀ꦠꦹꦠꦶ ꦮꦠ꧀ꦮꦴꦥꦶ ꦆꦢꦁ ꦒꦟꦱ꧀ꦱ ꦆꦢꦁ ꦠꦸꦩ꧀ꦲꦴꦏꦁ ꦢꦩ꧀ꦩꦷꦠꦶ ꦮꦠ꧀ꦮꦴ ꦮꦴ ꦢꦴꦠꦸꦏꦩ꧀ꦪꦠꦴꦪ ꦥꦴꦢꦩꦹꦭꦺ ꦜꦥꦺꦠ꧀ꦮꦴ ꦮꦴ ꦢꦶꦤ꧀ꦤꦩ꧀ꦥꦶ ꦄꦴꦢꦶꦱ꧀ꦱ ꦢꦶꦤ꧀ꦤꦁ ꦤꦴꦩ ꦲꦺꦴꦠꦶ. ꦌꦠꦁ ꦱꦧ꧀ꦧꦩ꧀ꦥꦶ ꦄꦏꦴꦭꦕꦷꦮꦫꦁ. ꦄꦪ꧀ꦪꦴꦪ ꦢꦩ꧀ꦩꦷꦠꦶ ꦌꦮꦁ ꦥꦛꦶꦭꦢ꧀ꦣꦁ ꦥꦤ ꦪꦡꦴꦢꦴꦤꦺꦪꦺꦮ ꦈꦥꦤꦺꦠꦧ꧀ꦧꦁ. ꦱꦺꦱꦁ ꦈꦠ꧀ꦠꦴꦤꦩꦺꦮ.
ꦠꦶꦱꦩꦸꦛ꧀ꦜꦴꦤꦁ – ꦏꦶꦫꦶꦪꦁ, ꦱꦚ꧀ꦚꦴꦮꦶꦩꦺꦴꦏ꧀ꦑꦁ, ꦱꦕꦶꦠ꧀ꦠꦏꦁ, ꦭꦺꦴꦏꦮꦗ꧀ꦗꦁ, ꦏꦴꦪꦏꦩ꧀ꦩꦁ, ꦮꦕꦷꦏꦩ꧀ꦩꦁ, ꦄꦏꦸꦱꦭꦕꦶꦠ꧀ꦠꦁ, ꦠꦶꦮꦺꦢꦤꦤ꧀ꦠꦶ.
ꦢꦸꦠꦶꦪꦱꦶꦏ꧀ꦑꦴꦥꦢꦁ.
ꦠꦠꦶꦪꦤꦶꦱ꧀ꦱꦒ꧀ꦒꦶꦪꦥꦴꦕꦶꦠ꧀ꦠꦶꦪꦱꦶꦏ꧀ꦑꦴꦥꦢꦮꦟ꧀ꦟꦤꦴ
꧗꧔꧓-꧕. ꦠꦠꦶꦪꦺ – ꦲꦤ꧀ꦢꦴꦠꦶ ꦒꦟ꧀ꦲ. ꦱꦪꦁ ꦄꦕ꧀ꦖꦶꦤ꧀ꦢꦠꦷꦠꦶ ꦌꦏꦁ ꦢꦠ꧀ꦮꦴ ꦌꦏꦁ ꦄꦕ꧀ꦖꦶꦤ꧀ꦢꦤ꧀ꦠꦶꦪꦴ ꦌꦏꦁ ꦤꦶꦱ꧀ꦱꦒ꧀ꦒꦶꦪꦁ, ꦧꦲꦹꦱꦸ ꦧꦲꦹꦤꦶ. ꦱꦕꦺ ꦱꦁꦲꦫꦶꦠ꧀ꦮꦴ ꦜꦥꦶꦠꦴꦤꦶ ꦌꦏꦠꦺꦴ ꦄꦕ꧀ꦖꦶꦤ꧀ꦢꦠꦶ, ꦮꦠ꧀ꦡꦸꦒꦟꦤꦴꦪ ꦄꦴꦥꦠ꧀ꦠꦶꦪꦺꦴ. ꦧꦤ꧀ꦣꦶꦠ꧀ꦮꦴ ꦜꦥꦶꦠꦺꦱꦸ ꦥꦤ ꦌꦏꦴꦮ ꦄꦴꦥꦠ꧀ꦠꦶ. ꦱꦺꦱꦁ ꦈꦠ꧀ꦠꦴꦤꦩꦺꦮ.
ꦠꦶꦱꦩꦸꦛ꧀ꦜꦴꦤꦁ – ꦏꦶꦫꦶꦪꦁ, ꦱꦚ꧀ꦚꦴꦮꦶꦩꦺꦴꦏ꧀ꦑꦁ, ꦱꦕꦶꦠ꧀ꦠꦏꦁ, ꦭꦺꦴꦏꦮꦗ꧀ꦗꦁ, ꦏꦴꦪꦏꦩ꧀ꦩꦁ, ꦮꦕꦷꦏꦩ꧀ꦩꦁ, ꦄꦏꦸꦱꦭꦕꦶꦠ꧀ꦠꦁ, ꦢꦸꦏ꧀ꦑꦮꦺꦢꦤꦤ꧀ꦠꦶ.
ꦠꦠꦶꦪꦱꦶꦏ꧀ꦑꦴꦥꦢꦁ.
ꦕꦠꦸꦠ꧀ꦡꦤꦶꦱ꧀ꦱꦒ꧀ꦒꦶꦪꦥꦴꦕꦶꦠ꧀ꦠꦶꦪꦱꦶꦏ꧀ꦑꦴꦥꦢꦮꦟ꧀ꦟꦤꦴ
꧗꧔꧘. ꦕꦠꦸꦠ꧀ꦡꦺ – ꦏꦪꦺꦤꦴꦠꦶ ꦩꦹꦭꦺꦤ. ꦤ ꦩꦺ ꦄꦴꦮꦸꦱꦺꦴ ꦱꦥ꧀ꦥꦶꦤꦴ ꦄꦠ꧀ꦡꦺꦴ; ꦠꦺꦭꦺꦤ ꦩꦺ ꦄꦠ꧀ꦡꦺꦴꦠꦶ ꦆꦢꦁ ꦏꦶꦫ ꦱꦴ ꦄꦴꦲꦛꦱꦥ꧀ꦥꦶꦁ ꦢꦠ꧀ꦮꦴ ꦠꦺꦭꦩ꧀ꦥꦶ ꦄꦴꦲꦫꦶꦱ꧀ꦱꦠꦷꦠꦶ ꦩꦚ꧀ꦚꦩꦴꦤꦴ ꦄꦴꦲ. ꦮꦶꦚ꧀ꦚꦴꦥꦺꦠ꧀ꦮꦴꦠꦶ ꦗꦴꦤꦴꦥꦺꦠ꧀ꦮꦴ; ꦆꦢꦁ ꦤꦴꦩ ꦄꦴꦲꦫꦴꦠꦶ ꦪꦴꦕꦶꦠ꧀ꦮꦴ ꦮꦴ.
꧗꧕꧒. ꦠꦚ꧀ꦚꦺꦮ ꦮꦶꦚ꧀ꦚꦴꦥꦺꦠꦷꦠꦶ ꦪꦁ ꦥꦜꦩꦁ ꦮꦶꦚ꧀ꦚꦠ꧀ꦠꦁ ꦠꦁ ꦡꦺꦴꦏꦁ ꦤꦥ꧀ꦥꦲꦺꦴꦠꦶ, ꦠꦱ꧀ꦩꦴ ꦥꦸꦤ ꦠꦚ꧀ꦚꦺꦮ ꦮꦶꦚ꧀ꦚꦴꦥꦺꦠꦷꦠꦶ ꦄꦠ꧀ꦡꦺꦴ. ꦄꦚ꧀ꦚꦚ꧀ꦕ ꦮꦶꦚ꧀ꦚꦴꦥꦺꦠꦷꦠꦶ ꦱꦕꦺ ꦥꦜꦩꦁ ꦱꦥ꧀ꦥꦶꦮꦶꦚ꧀ꦚꦠ꧀ꦠꦁ, ꦪꦩꦏꦁ ꦥꦕꦶꦠꦧ꧀ꦧꦤ꧀ꦠꦶ ꦕ ꦮꦺꦗ꧀ꦗꦺꦤ ꦮꦸꦠ꧀ꦠꦠ꧀ꦠꦴ ꦠꦺꦭꦺꦤ ꦄꦠ꧀ꦡꦺꦴ ꦲꦺꦴꦠꦶ, ꦠꦠꦺꦴ ꦠꦺꦭꦺꦤꦴꦥꦶ ꦩꦺ ꦄꦠ꧀ꦡꦺꦴꦠꦶ ꦌꦮꦁ ꦄꦚ꧀ꦚꦚ꧀ꦕ ꦮꦶꦚ꧀ꦚꦴꦥꦺꦠꦶ. ꦄꦴꦤꦶꦱꦁꦱꦁ ꦢꦱ꧀ꦱꦺꦠ꧀ꦮꦴꦠꦶ ꦱꦕꦺ ꦏꦲꦴꦥꦟꦱ꧀ꦱ ꦱꦥ꧀ꦥꦶ ꦄꦴꦨꦠꦁ ꦲꦺꦴꦠꦶ, ꦆꦩꦶꦤꦴ ꦩꦹꦭꦺꦤ ꦢꦶꦒꦸꦟꦁ ꦠꦺꦭꦁ ꦭꦧ꧀ꦨꦠꦶ, ꦠꦺꦤꦴꦥꦶ ꦕ ꦆꦢꦁ ꦏꦶꦕ꧀ꦕꦁ ꦤꦶꦥ꧀ꦦꦗ꧀ꦗꦠꦶ, ꦠꦱ꧀ꦩꦴ ꦠꦺꦭꦁ ꦄꦴꦲꦫꦴꦠꦶ ꦌꦮꦁ ꦄꦴꦤꦶꦱꦁꦱꦁ ꦢꦱ꧀ꦱꦺꦠ꧀ꦮꦴ ꦮꦶꦚ꧀ꦚꦴꦥꦺꦠꦷꦠꦶ. ꦱꦺꦱꦁ ꦈꦠ꧀ꦠꦴꦤꦩꦺꦮ.
ꦖꦱꦩꦸꦛ꧀ꦜꦴꦤꦁ – ꦏꦶꦫꦶꦪꦁ, ꦤꦺꦴꦱꦚ꧀ꦚꦴꦮꦶꦩꦺꦴꦏ꧀ꦑꦁ, ꦄꦕꦶꦠ꧀ꦠꦏꦁ, ꦥꦟ꧀ꦟꦠ꧀ꦠꦶꦮꦗ꧀ꦗꦁ, ꦏꦴꦪꦏꦩ꧀ꦩꦁ, ꦮꦕꦷꦏꦩ꧀ꦩꦁ, ꦠꦶꦕꦶꦠ꧀ꦠꦁ, ꦠꦶꦮꦺꦢꦤꦤ꧀ꦠꦶ.
ꦕꦠꦸꦠ꧀ꦡꦱꦶꦏ꧀ꦑꦴꦥꦢꦁ.
ꦥꦚ꧀ꦕꦩꦤꦶꦱ꧀ꦱꦒ꧀ꦒꦶꦪꦥꦴꦕꦶꦠ꧀ꦠꦶꦪꦱꦶꦏ꧀ꦑꦴꦥꦢꦮꦟ꧀ꦟꦤꦴ
꧗꧕꧓. ꦥꦚ꧀ꦕꦩꦺ – ꦤ ꦩꦺ ꦱꦶꦏ꧀ꦑꦩꦴꦤꦺꦠꦶ ꦆꦢꦁ ꦏꦶꦫ ꦱꦴ ꦏꦸꦭꦣꦷꦠꦴ ‘‘ꦄꦪꦁ ꦄꦢ꧀ꦣꦴ ꦌꦮꦁ ꦮꦸꦠ꧀ꦠꦴ ꦆꦢꦁ ꦠꦺꦭꦁ ꦜꦥꦺꦠ꧀ꦮꦴ ꦱꦥ꧀ꦥꦶꦩ꧀ꦥꦶ ꦩꦺ ꦄꦠ꧀ꦠꦤꦺꦴ ꦏꦸꦭꦓꦫꦴ ꦄꦴꦲꦫꦶꦱ꧀ꦱꦠꦷ’’ꦠꦶ ꦩꦚ꧀ꦚꦩꦴꦤꦴ ꦄꦴꦲ. ꦕꦺꦠꦴꦥꦺꦠ꧀ꦮꦴꦠꦶ ꦗꦴꦤꦴꦥꦺꦠ꧀ꦮꦴ ꦆꦕ꧀ꦕꦺꦮ ꦄꦠ꧀ꦡꦺꦴ. ꦱꦺꦱꦁ ꦱꦧ꧀ꦧꦠ꧀ꦡ ꦕꦠꦸꦠ꧀ꦡꦱꦢꦶꦱꦩꦺꦮꦴꦠꦶ.
ꦥꦚ꧀ꦕꦩꦱꦶꦏ꧀ꦑꦴꦥꦢꦁ.
ꦖꦛ꧀ꦜꦤꦶꦱ꧀ꦱꦒ꧀ꦒꦶꦪꦥꦴꦕꦶꦠ꧀ꦠꦶꦪꦱꦶꦏ꧀ꦑꦴꦥꦢꦮꦟ꧀ꦟꦤꦴ
꧗꧕꧘. ꦖꦛ꧀ꦜꦺ – ꦖꦤ꧀ꦢꦏꦤ꧀ꦠꦶ ‘‘ꦆꦢꦁ ꦤꦴꦩ ꦣꦩ꧀ꦩꦏꦶꦕ꧀ꦕꦁ ꦏꦫꦶꦱ꧀ꦱꦴꦩ, ꦪꦁ ꦱꦏ꧀ꦏꦺꦴꦡ; ꦠꦁ ꦢꦺꦡꦴ’’ꦠꦶ ꦌꦮꦁ ꦥꦫꦺꦱꦁ ꦖꦤ꧀ꦢꦚ꧀ꦕ ꦫꦸꦕꦶꦚ꧀ꦕ ꦈꦥ꧀ꦥꦴꦢꦺꦠ꧀ꦮꦴ ꦒꦲꦶꦠꦥꦫꦶꦏ꧀ꦑꦴꦫꦱ꧀ꦱꦺꦠꦁ ꦄꦣꦶꦮꦕꦤꦁ. ꦄꦚ꧀ꦚꦢꦠ꧀ꦡꦶꦏꦺꦤꦴꦠꦶ ꦄꦚ꧀ꦚꦱ꧀ꦱꦠ꧀ꦡꦴꦪ ꦢꦶꦤ꧀ꦤꦺꦤ. ꦄꦚ꧀ꦚꦸꦢ꧀ꦢꦶꦱꦶꦏꦺꦤꦴꦠꦶ ꦄꦚ꧀ꦚꦁ ꦈꦢ꧀ꦢꦶꦱꦶꦠ꧀ꦮꦴ ꦢꦶꦤ꧀ꦤꦺꦤ. ꦱꦔ꧀ꦓꦶꦏꦺꦤꦴꦠꦶ ꦱꦔ꧀ꦓꦱ꧀ꦱ ꦥꦫꦶꦕ꧀ꦕꦠ꧀ꦠꦺꦤ.
꧗꧖꧒. ꦱꦺꦱꦏꦁ ꦈꦥꦤꦺꦠꦷꦠꦶ ꦪꦢꦠ꧀ꦡꦴꦪ ꦢꦶꦤ꧀ꦤꦺꦴ, ꦠꦁ ꦕꦺꦠꦴꦥꦺꦠ꧀ꦮꦴ ꦄꦮꦱꦺꦱꦁ ꦄꦚ꧀ꦚꦱ꧀ꦱꦠ꧀ꦡꦴꦪ ꦈꦥꦤꦺꦠꦶ. ꦱꦴꦩꦶꦏꦺ ꦄꦥꦭꦺꦴꦏꦺꦠ꧀ꦮꦴꦠꦶ ‘‘ꦠꦸꦩ꧀ꦲꦺꦲꦶ ꦕꦷꦮꦫꦠ꧀ꦡꦴꦪ ꦢꦶꦤ꧀ꦤꦺꦴ, ꦄꦩ꧀ꦲꦴꦏꦚ꧀ꦕ ꦕꦷꦮꦫꦁ ꦄꦠ꧀ꦡꦶ, ꦠꦺꦭꦴꦢꦷꦲꦶ ꦥꦤ ꦄꦠ꧀ꦡꦺꦴ’’ꦠꦶ ꦌꦮꦁ ꦄꦴꦥꦸꦕ꧀ꦖꦶꦠ꧀ꦮꦴ ꦈꦥꦤꦺꦠꦶ. ꦄꦴꦥꦢꦴꦱꦹꦠꦶ ꦠꦡꦴꦫꦹꦥꦺꦱꦸ ꦈꦥꦢ꧀ꦢꦮꦺꦱꦸ; ꦨꦶꦏ꧀ꦑꦸꦤꦶꦪꦺꦴ ꦮꦶꦲꦴꦫꦁ ꦖꦝ꧀ꦝꦺꦠ꧀ꦮꦴ ꦥꦏ꧀ꦏꦩꦤ꧀ꦠꦶ, ꦌꦮꦫꦹꦥꦴꦱꦸ ꦄꦴꦥꦢꦴꦱꦸ ꦪꦁ ꦮꦴ ꦠꦁ ꦮꦴ ꦕꦺꦠꦴꦥꦺꦠꦸꦁ ꦮꦛ꧀ꦛꦠꦶ. ꦱꦺꦱꦁ ꦈꦠ꧀ꦠꦴꦤꦩꦺꦮ.
ꦖꦱꦩꦸꦛ꧀ꦜꦴꦤꦁ – ꦏꦶꦫꦶꦪꦴꦏꦶꦫꦶꦪꦁ, ꦤꦺꦴꦱꦚ꧀ꦚꦴꦮꦶꦩꦺꦴꦏ꧀ꦑꦁ, ꦄꦕꦶꦠ꧀ꦠꦏꦁ, ꦥꦟ꧀ꦟꦠ꧀ꦠꦶꦮꦗ꧀ꦗꦁ, ꦏꦴꦪꦏꦩ꧀ꦩꦁ, ꦮꦕꦷꦏꦩ꧀ꦩꦁ, ꦠꦶꦕꦶꦠ꧀ꦠꦁ, ꦠꦶꦮꦺꦢꦤꦤ꧀ꦠꦶ.
ꦖꦛ꧀ꦜꦱꦶꦏ꧀ꦑꦴꦥꦢꦁ.
ꦱꦠ꧀ꦠꦩꦤꦶꦱ꧀ꦱꦒ꧀ꦒꦶꦪꦥꦴꦕꦶꦠ꧀ꦠꦶꦪꦱꦶꦏ꧀ꦑꦴꦥꦢꦮꦟ꧀ꦟꦤꦴ
꧗꧖꧔. ꦱꦠ꧀ꦠꦩꦺ – ꦱꦚ꧀ꦚꦴꦕꦶꦏꦺꦤꦴꦠꦶ ꦱꦪꦁ ꦪꦴꦕꦶꦠꦏꦺꦤ. ꦌꦠꦢꦺꦮꦺꦠ꧀ꦡ ꦤꦴꦤꦴꦏꦫꦟꦁ. ꦱꦺꦱꦁ ꦖꦛ꧀ꦜꦱꦢꦶꦱꦩꦺꦮꦴꦠꦶ.
ꦱꦠ꧀ꦠꦩꦱꦶꦏ꧀ꦑꦴꦥꦢꦁ.
ꦄꦛ꧀ꦜꦩꦤꦶꦱ꧀ꦱꦒ꧀ꦒꦶꦪꦥꦴꦕꦶꦠ꧀ꦠꦶꦪꦱꦶꦏ꧀ꦑꦴꦥꦢꦮꦟ꧀ꦟꦤꦴ
꧗꧖꧙. ꦄꦛ꧀ꦜꦩꦺ – ꦩꦲꦴꦗꦤꦶꦏꦺꦤꦴꦠꦶ ꦒꦟꦱ꧀ꦱ ꦥꦫꦶꦕ꧀ꦕꦠ꧀ꦠꦺꦤ. ꦌꦠꦢꦺꦮꦺꦠ꧀ꦡ ꦤꦴꦤꦴꦏꦫꦟꦁ.
ꦄꦛ꧀ꦜꦩꦱꦶꦏ꧀ꦑꦴꦥꦢꦁ.
ꦤꦮꦩꦤꦶꦱ꧀ꦱꦒ꧀ꦒꦶꦪꦥꦴꦕꦶꦠ꧀ꦠꦶꦪꦱꦶꦏ꧀ꦑꦴꦥꦢꦮꦟ꧀ꦟꦤꦴ
꧗꧗꧔. ꦤꦮꦩꦱꦶꦏ꧀ꦑꦴꦥꦢꦺ – ꦱꦚ꧀ꦚꦴꦕꦶꦏꦺꦤꦴꦠꦶ ꦆꦢꦁ ꦥꦢꦁ ꦆꦠꦺꦴ ꦄꦣꦶꦏꦠꦫꦁ.
ꦤꦮꦩꦱꦶꦏ꧀ꦑꦴꦥꦢꦁ.
ꦢꦱꦩꦤꦶꦱ꧀ꦱꦒ꧀ꦒꦶꦪꦥꦴꦕꦶꦠ꧀ꦠꦶꦪꦱꦶꦏ꧀ꦑꦴꦥꦢꦮꦟ꧀ꦟꦤꦴ
꧗꧗꧘. ꦢꦱꦩꦺ – ꦥꦫꦶꦮꦺꦟꦁ ꦈꦤ꧀ꦢ꧀ꦫꦶꦪꦠꦷꦠꦶ ꦥꦫꦶꦮꦺꦟꦁ ꦮꦶꦤꦱ꧀ꦱꦠꦶ; ꦥꦫꦶꦥꦠꦠꦷꦠꦶ ꦄꦠ꧀ꦡꦺꦴ. ꦆꦢꦚ꧀ꦕ ꦥꦢꦁ ꦥꦸꦒ꧀ꦒꦭꦶꦏꦺꦤ ꦱꦚ꧀ꦚꦴꦕꦶꦏꦺꦤꦴꦠꦶ ꦆꦢꦚ꧀ꦕ ꦌꦠ꧀ꦠꦏꦩꦺꦮ ꦤꦴꦤꦴꦏꦫꦟꦁ. ꦱꦺꦱꦁ ꦥꦸꦧ꧀ꦧꦱꦢꦶꦱꦩꦺꦮꦴꦠꦶ.
ꦢꦱꦩꦱꦶꦏ꧀ꦑꦴꦥꦢꦁ.
ꦌꦏꦴꦢꦱꦩꦤꦶꦱ꧀ꦱꦒ꧀ꦒꦶꦪꦥꦴꦕꦶꦠ꧀ꦠꦶꦪꦱꦶꦏ꧀ꦑꦴꦥꦢꦮꦟ꧀ꦟꦤꦴ
꧗꧘꧔. ꦌꦏꦴꦢꦱꦩꦺ – ꦒꦫꦸꦥꦴꦮꦸꦫꦟꦤ꧀ꦠꦶ ꦱꦷꦠꦏꦴꦭꦺ ꦥꦴꦮꦸꦫꦟꦁ. ꦕꦠꦸꦏ꧀ꦏꦁꦱꦥꦫꦩꦤ꧀ꦠꦶ ꦌꦠ꧀ꦡ ꦏꦁꦱꦺꦴ ꦤꦴꦩ ꦕꦠꦸꦏ꧀ꦏꦲꦴꦥꦟꦶꦏꦺꦴ ꦲꦺꦴꦠꦶ; ꦠꦱ꧀ꦩꦴ ꦥꦢꦨꦴꦗꦤꦺ ‘‘ꦱꦺꦴꦭ꦳ꦱꦏꦲꦴꦥꦟꦒ꧀ꦓꦤꦏ’’ꦤ꧀ꦠꦶ ꦮꦸꦠ꧀ꦠꦁ.
ꦌꦏꦴꦢꦱꦩꦱꦶꦏ꧀ꦑꦴꦥꦢꦁ.
ꦢ꧀ꦮꦴꦢꦱꦩꦤꦶꦱ꧀ꦱꦒ꧀ꦒꦶꦪꦥꦴꦕꦶꦠ꧀ꦠꦶꦪꦱꦶꦏ꧀ꦑꦴꦥꦢꦮꦟ꧀ꦟꦤꦴ
꧗꧘꧙. ꦢ꧀ꦮꦴꦢꦱꦩꦺ – ꦭꦲꦸꦥꦴꦮꦸꦫꦟꦤ꧀ꦠꦶ ꦈꦟ꧀ꦲꦏꦴꦭꦺ ꦥꦴꦮꦸꦫꦟꦁ. ꦱꦺꦱꦁ ꦱꦶꦏ꧀ꦑꦴꦥꦢꦢ꧀ꦮꦪꦺꦥꦶ ꦈꦠ꧀ꦠꦴꦤꦩꦺꦮ.
ꦖꦱꦩꦸꦛ꧀ꦜꦴꦤꦁ – ꦏꦶꦫꦶꦪꦁ, ꦤꦺꦴꦱꦚ꧀ꦚꦴꦮꦶꦩꦺꦴꦏ꧀ꦑꦁ, ꦄꦕꦶꦠ꧀ꦠꦏꦁ, ꦥꦟ꧀ꦟꦠ꧀ꦠꦶꦮꦗ꧀ꦗꦁ, ꦏꦴꦪꦏꦩ꧀ꦩꦁ, ꦮꦕꦷꦏꦩ꧀ꦩꦁ, ꦠꦶꦕꦶꦠ꧀ꦠꦁ, ꦠꦶꦮꦺꦢꦤꦤ꧀ꦠꦶ.
ꦢ꧀ꦮꦴꦢꦱꦩꦱꦶꦏ꧀ꦑꦴꦥꦢꦁ.
ꦈꦢ꧀ꦢꦶꦛ꧀ꦜꦴ ꦑꦺꦴ ꦄꦪ꧀ꦪꦴꦪꦺꦴ ꦠꦶꦁꦱ ꦤꦶꦱ꧀ꦱꦒ꧀ꦒꦶꦪꦴ ꦥꦴꦕꦶꦠ꧀ꦠꦶꦪꦴ ꦣꦩ꧀ꦩꦴꦠꦶ ꦌꦠ꧀ꦡ ꦩꦲꦴꦮꦶꦨꦔ꧀ꦒꦺ ꦕꦷꦮꦫꦮꦒ꧀ꦒꦠꦺꦴ ꦣꦺꦴꦮꦤꦚ꧀ꦕ ꦥꦛꦶꦒ꧀ꦒꦲꦟꦚ꧀ꦕꦴꦠꦶ ꦢ꧀ꦮꦺ ꦱꦶꦏ꧀ꦑꦴꦥꦢꦴꦤꦶ ꦄꦥꦤꦺꦠ꧀ꦮꦴ ꦄꦏꦴꦭꦕꦷꦮꦫꦁ ꦏꦴꦭꦕꦷꦮꦫꦤ꧀ꦠꦶ ꦄꦣꦶꦛ꧀ꦜꦲꦶꦠ꧀ꦮꦴ ꦨꦴꦗꦶꦠꦱꦶꦏ꧀ꦑꦴꦥꦢꦺꦤ ꦕ ꦥꦫꦶꦮꦠ꧀ꦠꦺꦠ꧀ꦮꦴ ꦄꦕ꧀ꦖꦶꦤ꧀ꦤꦕꦷꦮꦫꦺꦤ ꦕ ꦥꦜꦩꦮꦒ꧀ꦒꦺꦴ ꦥꦹꦫꦺꦠꦧ꧀ꦧꦺꦴ. ꦥꦸꦤ ꦌꦭ꦳ꦏꦭꦺꦴꦩꦮꦒ꧀ꦒꦱ꧀ꦱ ꦄꦴꦢꦶꦠꦺꦴ ꦱꦠ꧀ꦠ ꦱꦶꦏ꧀ꦑꦴꦥꦢꦴꦤꦶ ꦄꦥꦤꦺꦠ꧀ꦮꦴ ꦱꦠ꧀ꦠ ꦄꦚ꧀ꦚꦢꦠ꧀ꦡꦶꦏꦴꦤꦶ ꦥꦏ꧀ꦑꦶꦥꦶꦠ꧀ꦮꦴ ꦢꦸꦠꦶꦪꦮꦒ꧀ꦒꦺꦴ ꦥꦹꦫꦺꦠꦧ꧀ꦧꦺꦴ. ꦠꦠꦶꦪꦮꦒ꧀ꦒꦠꦺꦴ ꦥꦜꦩꦥꦠ꧀ꦠꦁ ꦮꦱ꧀ꦱꦶꦏꦱꦴꦛꦶꦏꦁ ꦄꦴꦫꦚ꧀ꦚꦏꦱꦶꦏ꧀ꦑꦴꦥꦢꦤ꧀ꦠꦶ ꦆꦩꦴꦤꦶ ꦠꦷꦟꦶ ꦄꦥꦤꦺꦠ꧀ꦮꦴ ꦥꦠ꧀ꦠꦱꦤ꧀ꦤꦶꦕꦪꦒꦫꦸꦥꦴꦮꦸꦫꦟꦭꦲꦸꦥꦴꦮꦸꦫꦟꦱꦶꦏ꧀ꦑꦴꦥꦢꦺꦲꦶ ꦠꦠꦶꦪꦮꦒ꧀ꦒꦺꦴ ꦥꦹꦫꦺꦠꦧ꧀ꦧꦺꦴ. ꦆꦠꦶ ꦨꦶꦏ꧀ꦑꦸꦤꦷꦤꦁ ꦢ꧀ꦮꦴꦢꦱ ꦱꦶꦏ꧀ꦑꦴꦥꦢꦴꦤꦶ ꦌꦏꦠꦺꦴꦥꦚ꧀ꦚꦠ꧀ꦠꦴꦤꦶ, ꦄꦛ꧀ꦜꦴꦫꦱ ꦈꦨꦠꦺꦴꦥꦚ꧀ꦚꦠ꧀ꦠꦴꦤꦷꦠꦶ ꦌꦮꦁ ꦱꦧ꧀ꦧꦺꦥꦶ ꦥꦴꦠꦶꦩꦺꦴꦏ꧀ꦑꦸꦢ꧀ꦢꦺꦱꦩꦒ꧀ꦒꦺꦤ ‘‘ꦈꦢ꧀ꦢꦶꦛ꧀ꦜꦴ ꦑꦺꦴ ꦄꦪ꧀ꦪꦴꦪꦺꦴ ꦠꦶꦁꦱ ꦤꦶꦱ꧀ꦱꦒ꧀ꦒꦶꦪꦴ ꦥꦴꦕꦶꦠ꧀ꦠꦶꦪꦴ ꦣꦩ꧀ꦩꦴ’’ꦠꦶ ꦌꦮꦩꦺꦠ꧀ꦡ ꦄꦠ꧀ꦡꦺꦴ ꦢꦛ꧀ꦜꦧ꧀ꦧꦺꦴ. ꦱꦺꦱꦁ ꦮꦸꦠ꧀ꦠꦤꦪꦩꦺꦮꦴꦠꦶ.
ꦱꦩꦤ꧀ꦠꦥꦴꦱꦴꦢꦶꦏꦴꦪ ꦮꦶꦤꦪꦱꦁꦮꦟ꧀ꦟꦤꦴꦪ ꦨꦶꦏ꧀ꦑꦸꦤꦷꦮꦶꦨꦔ꧀ꦒꦺ
ꦠꦶꦁꦱꦏꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.
ꦤꦶꦱ꧀ꦱꦒ꧀ꦒꦶꦪꦏꦟ꧀ꦝꦁ ꦤꦶꦛ꧀ꦜꦶꦠꦁ.