꧘. ꦢꦸꦧ꧀ꦧꦟ꧀ꦟꦏꦫꦟꦱꦶꦏ꧀ꦑꦴꦥꦢꦮꦟ꧀ꦟꦤꦴ

꧓꧖꧘-꧙. ꦄꦛ꧀ꦜꦩꦺ – ꦤꦮꦁ ꦥꦤ ꦨꦶꦏ꧀ꦑꦸꦤꦴ ꦕꦷꦮꦫꦭꦴꦨꦺꦤꦴꦠꦶ ꦌꦠ꧀ꦡ ꦄꦭꦨꦷꦠꦶ ꦭꦨꦺꦴ; ꦭꦨꦺꦴꦪꦺꦮ ꦭꦴꦨꦺꦴ. ꦏꦶꦁ ꦄꦭꦨꦶ? ꦕꦷꦮꦫꦁ. ꦏꦷꦢꦶꦱꦁ? ꦤꦮꦁ. ꦆꦠꦶ ‘‘ꦤꦮꦕꦷꦮꦫꦭꦴꦨꦺꦤꦴ’’ꦠꦶ ꦮꦠ꧀ꦠꦧ꧀ꦧꦺ ꦄꦤꦸꦤꦴꦱꦶꦏꦭꦺꦴꦥꦁ ꦄꦏꦠ꧀ꦮꦴ ‘‘ꦤꦮꦕꦷꦮꦫꦭꦴꦨꦺꦤꦴ’’ꦠꦶ ꦮꦸꦠ꧀ꦠꦁ; ꦥꦛꦶꦭꦢ꧀ꦣꦤꦮꦕꦷꦮꦫꦺꦤꦴꦠꦶ ꦄꦠ꧀ꦡꦺꦴ. ꦩꦗ꧀ꦙꦺ ꦜꦶꦠꦥꦢꦢ꧀ꦮꦪꦺ ꦥꦤꦴꦠꦶ ꦤꦶꦥꦴꦠꦺꦴ. ꦨꦶꦏ꧀ꦑꦸꦤꦴꦠꦶ ꦪꦺꦤ ꦭꦢ꧀ꦣꦁ ꦠꦱ꧀ꦱ ꦤꦶꦢꦱ꧀ꦱꦤꦁ. ꦥꦢꦨꦴꦗꦤꦺ ꦥꦤ ꦧ꧀ꦪꦚ꧀ꦗꦤꦁ ꦄꦤꦴꦢꦶꦪꦶꦠ꧀ꦮꦴ ꦪꦁ ꦭꦢ꧀ꦣꦁ ꦠꦁ ꦢꦱ꧀ꦱꦺꦠꦸꦁ ‘‘ꦕꦷꦮꦫꦁ ꦤꦴꦩ ꦖꦤ꧀ꦤꦁ ꦕꦷꦮꦫꦴꦤ’’ꦤ꧀ꦠꦶꦄꦴꦢꦶ ꦮꦸꦠ꧀ꦠꦁ. ꦕꦷꦮꦫꦤ꧀ꦠꦶ ꦌꦠ꧀ꦡ ꦪꦁ ꦤꦶꦮꦴꦱꦺꦠꦸꦁ ꦮꦴ ꦥꦴꦫꦸꦥꦶꦠꦸꦁ ꦮꦴ ꦱꦏ꧀ꦏꦴ ꦲꦺꦴꦠꦶ, ꦠꦢꦺꦮ ꦮꦺꦢꦶꦠꦧ꧀ꦧꦁ. ꦠꦺꦤꦺꦮ ‘‘ꦮꦶꦏꦥ꧀ꦥꦤꦸꦥꦒꦥꦕ꧀ꦖꦶꦩ’’ꦤ꧀ꦠꦶ ꦤ ꦮꦸꦠ꧀ꦠꦁ. ꦏꦁꦱꦤꦷꦭꦤ꧀ꦠꦶ ꦕꦩ꧀ꦩꦏꦴꦫꦤꦷꦭꦁ. ꦩꦲꦴꦥꦕ꧀ꦕꦫꦶꦪꦁ ꦥꦤ ‘‘ꦄꦪꦺꦴꦩꦭꦁ ꦭꦺꦴꦲꦩꦭꦁ ꦌꦠꦁ ꦏꦁꦱꦤꦷꦭꦁ ꦤꦴꦩꦴ’’ꦠꦶ ꦮꦸꦠ꧀ꦠꦁ. ꦥꦭꦴꦱꦤꦷꦭꦤ꧀ꦠꦶ ꦪꦺꦴ ꦏꦺꦴꦕꦶ ꦤꦷꦭꦮꦟ꧀ꦟꦺꦴ ꦥꦟ꧀ꦟꦫꦱꦺꦴ. ꦢꦸꦧ꧀ꦧꦟ꧀ꦟꦏꦫꦟꦁ ꦄꦴꦢꦴꦠꦧ꧀ꦧꦤ꧀ꦠꦶ ꦌꦠꦁ ꦏꦥ꧀ꦥꦧꦶꦤ꧀ꦢꦸꦁ ꦱꦤ꧀ꦣꦴꦪ ꦮꦸꦠ꧀ꦠꦁ; ꦤ ꦤꦷꦭꦴꦢꦷꦲꦶ ꦱꦏꦭꦕꦷꦮꦫꦱ꧀ꦱ ꦢꦸꦧ꧀ꦧꦟ꧀ꦟꦏꦫꦟꦁ. ꦠꦚ꧀ꦕ ꦥꦤ ꦏꦥ꧀ꦥꦁ ꦄꦴꦢꦶꦪꦤ꧀ꦠꦺꦤ ꦕꦷꦮꦫꦁ ꦫꦗꦶꦠ꧀ꦮꦴ ꦕꦠꦹꦱꦸ ꦮꦴ ꦏꦺꦴꦟꦺꦱꦸ ꦠꦷꦱꦸ ꦮꦴ ꦢ꧀ꦮꦷꦱꦸ ꦮꦴ ꦌꦏꦱ꧀ꦩꦶꦁ ꦮꦴ ꦏꦺꦴꦟꦺ ꦩꦺꦴꦫꦱ꧀ꦱ ꦄꦏ꧀ꦑꦶꦩꦟ꧀ꦝꦭꦩꦠ꧀ꦠꦁ ꦮꦴ ꦩꦔ꧀ꦏꦸꦭꦥꦶꦛ꧀ꦜꦶꦩꦠ꧀ꦠꦁ ꦮꦴ ꦄꦴꦢꦴꦠꦧ꧀ꦧꦁ. ꦩꦲꦴꦥꦕ꧀ꦕꦫꦶꦪꦁ ‘‘ꦥꦠ꧀ꦠꦺ ꦮꦴ ꦒꦟ꧀ꦜꦶꦪꦁ ꦮꦴ ꦤ ꦮꦛ꧀ꦛꦠꦷ’’ꦠꦶ ꦮꦸꦠ꧀ꦠꦁ. ꦩꦲꦴꦄꦛ꧀ꦜꦏꦡꦴꦪꦁ ꦥꦤ ‘‘ꦮꦛ꧀ꦛꦠꦶꦪꦺꦮꦴ’’ꦠꦶ ꦮꦸꦠ꧀ꦠꦁ. ꦥꦴꦭ꦳ꦶꦏꦥ꧀ꦥꦏꦟ꧀ꦟꦶꦏꦏꦥ꧀ꦥꦴꦢꦪꦺꦴ ꦥꦤ ꦱꦧ꧀ꦧꦠ꧀ꦡ ꦥꦛꦶꦱꦶꦢ꧀ꦣꦴ, ꦠꦱ꧀ꦩꦴ ꦜꦥꦺꦠ꧀ꦮꦴ ꦌꦏꦁ ꦮꦛ꧀ꦛꦧꦶꦤ꧀ꦢꦸꦁ ꦄꦚ꧀ꦚꦺꦤ ꦏꦺꦤꦕꦶꦥꦶ ꦮꦶꦏꦴꦫꦺꦤ ꦏꦥ꧀ꦥꦺꦴ ꦤ ꦏꦴꦠꦧ꧀ꦧꦺꦴ.

꧓꧗꧑. ꦄꦒ꧀ꦒꦭ꦳ꦺꦠꦶꦄꦴꦢꦷꦱꦸ ꦌꦠꦴꦤꦶ ꦄꦒ꧀ꦒꦭ꦳ꦴꦢꦷꦤꦶ ꦏꦥ꧀ꦥꦏꦠꦕꦷꦮꦫꦺ ꦥꦕ꧀ꦖꦴ ꦄꦴꦫꦺꦴꦥꦺꦠ꧀ꦮꦴ ꦏꦥ꧀ꦥꦏꦫꦟꦏꦶꦕ꧀ꦕꦁ ꦤꦠ꧀ꦡꦶ. ꦱꦺꦱꦁ ꦈꦠ꧀ꦠꦴꦤꦩꦺꦮ. ꦌꦭ꦳ꦏꦭꦺꦴꦩꦱꦩꦸꦛ꧀ꦜꦴꦤꦁ – ꦏꦶꦫꦶꦪꦴꦏꦶꦫꦶꦪꦁ, ꦤꦺꦴꦱꦚ꧀ꦚꦴꦮꦶꦩꦺꦴꦏ꧀ꦑꦁ, ꦄꦕꦶꦠ꧀ꦠꦏꦁ, ꦥꦟ꧀ꦟꦠ꧀ꦠꦶꦮꦗ꧀ꦗꦁ; ꦏꦴꦪꦏꦩ꧀ꦩꦁ, ꦠꦶꦕꦶꦠ꧀ꦠꦁ, ꦠꦶꦮꦺꦢꦤꦤ꧀ꦠꦶ.

ꦢꦸꦧ꧀ꦧꦟ꧀ꦟꦏꦫꦟꦱꦶꦏ꧀ꦑꦴꦥꦢꦁ ꦄꦛ꧀ꦜꦩꦁ.