꧕. ꦢꦸꦠꦶꦪꦱꦺꦤꦴꦱꦤꦱꦶꦏ꧀ꦑꦴꦥꦢꦮꦟ꧀ꦟꦤꦴ

꧑꧑꧖. ꦢꦸꦠꦶꦪꦱꦺꦤꦴꦱꦤꦱꦶꦏ꧀ꦑꦴꦥꦢꦺ – ꦨꦶꦱꦷꦠꦶ ꦩꦚ꧀ꦕꦏꦨꦶꦱꦶ ꦮꦴ ꦥꦷꦜꦏꦨꦶꦱꦶ ꦮꦴ. ꦕꦶꦩꦶꦭꦶꦏꦴꦢꦷꦤꦶꦥꦶ ꦥꦸꦫꦶꦩꦱꦶꦏ꧀ꦑꦴꦥꦢꦺ ꦮꦸꦠ꧀ꦠꦥ꧀ꦥꦏꦴꦫꦴꦤꦶꦪꦺꦮ. ꦤꦶꦱꦷꦢꦤꦤ꧀ꦠꦶ ꦱꦢꦱꦁ ꦮꦺꦢꦶꦠꦧ꧀ꦧꦁ. ꦥꦕ꧀ꦕꦠ꧀ꦡꦫꦟꦤ꧀ꦠꦶ ꦥꦴꦮꦴꦫꦺꦴ ꦏꦺꦴꦗꦮꦺꦴꦠꦶ ꦌꦠ꧀ꦠꦏꦩꦺꦮ ꦮꦸꦠ꧀ꦠꦁ. ꦠꦶꦟꦱꦤ꧀ꦡꦴꦫꦺꦴꦠꦶ ꦪꦺꦱꦁ ꦏꦺꦱꦚ꧀ꦕꦶ ꦠꦶꦟꦴꦤꦁ ꦱꦤ꧀ꦡꦴꦫꦺꦴ. ꦌꦱ ꦤꦪꦺꦴ ꦥꦟ꧀ꦟꦱꦤ꧀ꦡꦴꦫꦺ. ꦥꦫꦶꦏ꧀ꦑꦺꦥꦁ ꦄꦠꦶꦏ꧀ꦏꦩꦤ꧀ꦠꦱ꧀ꦱꦴꦠꦶ ꦌꦠ꧀ꦡ ꦥꦜꦩꦥꦴꦢꦁ ꦄꦠꦶꦏ꧀ꦏꦴꦩꦺꦤ꧀ꦠꦱ꧀ꦱ ꦢꦸꦏ꧀ꦏꦛꦁ, ꦢꦸꦠꦶꦪꦴꦠꦶꦏ꧀ꦏꦩꦺ ꦥꦴꦕꦶꦠ꧀ꦠꦶꦪꦁ. ꦄꦥꦫꦶꦏ꧀ꦑꦶꦠ꧀ꦠꦱ꧀ꦱ ꦈꦥꦕꦴꦫꦺꦴ ꦤꦴꦩ ꦱꦺꦤꦴꦱꦤꦠꦺꦴ ꦢ꧀ꦮꦺ ꦭꦺꦝ꧀ꦝꦸꦥꦴꦠꦴ.

ꦄꦤꦴꦥꦸꦕ꧀ꦖꦁ ꦮꦴ ꦒꦕ꧀ꦖꦺꦪ꧀ꦪꦴꦠꦶ ꦌꦠ꧀ꦡ ꦨꦶꦏ꧀ꦑꦸꦩ꧀ꦲꦶ ꦱꦠꦶ ꦨꦶꦏ꧀ꦑꦸ ꦄꦴꦥꦸꦕ꧀ꦖꦶꦠꦧ꧀ꦧꦺꦴ. ꦠꦱ꧀ꦩꦶꦁ ꦄꦱꦠꦶ ꦱꦴꦩꦟꦺꦫꦺꦴ, ꦠꦱ꧀ꦩꦶꦁ ꦄꦱꦠꦶ ꦄꦴꦫꦴꦩꦶꦏꦺꦴ, ꦠꦱ꧀ꦩꦶꦩ꧀ꦥꦶ ꦄꦱꦠꦶ ꦪꦺꦤ ꦮꦶꦲꦴꦫꦺꦴ ꦏꦴꦫꦶꦠꦺꦴ ꦱꦺꦴ ꦮꦶꦲꦴꦫꦱꦴꦩꦶꦏꦺꦴ, ꦠꦱ꧀ꦱ ꦮꦴ ꦏꦸꦭꦺ ꦪꦺꦴ ꦏꦺꦴꦕꦶ ꦄꦴꦥꦸꦕ꧀ꦖꦶꦠꦧ꧀ꦧꦺꦴ. ꦠꦱ꧀ꦩꦶꦩ꧀ꦥꦶ ꦄꦱꦠꦶ ꦕꦠꦹꦱꦸ ꦥꦴꦱꦴꦟꦺꦱꦸ ꦩꦚ꧀ꦕꦁ ꦜꦥꦺꦠ꧀ꦮꦴ ꦩꦚ꧀ꦕꦺ ꦄꦮꦱꦺꦱꦩꦚ꧀ꦕꦥꦷꦜꦴꦤꦶ ꦄꦴꦫꦺꦴꦥꦺꦠ꧀ꦮꦴ ꦈꦥꦫꦶ ꦨꦶꦱꦶꦄꦴꦢꦶꦏꦁ ꦢꦱꦮꦶꦣꦩ꧀ꦥꦶ ꦱꦺꦪ꧀ꦪꦁ ꦫꦴꦱꦶꦁ ꦏꦫꦶꦠ꧀ꦮꦴ ꦢꦴꦫꦸꦨꦟ꧀ꦝꦁ ꦩꦠ꧀ꦠꦶꦏꦴꦨꦟ꧀ꦝꦁ ꦥꦛꦶꦱꦴꦩꦺꦠ꧀ꦮꦴ ꦢ꧀ꦮꦴꦫꦮꦴꦠꦥꦴꦤꦴꦤꦶ ꦥꦶꦢꦲꦶꦠ꧀ꦮꦴ ꦒꦩꦶꦪꦮꦠ꧀ꦠꦁ ꦥꦹꦫꦺꦠ꧀ꦮꦴ ꦒꦤ꧀ꦠꦧ꧀ꦧꦁ. ꦱꦕꦺ ꦥꦤ ꦱꦺꦤꦴꦱꦤꦁ ꦎꦮꦱ꧀ꦱꦠꦶ, ꦖꦢꦤꦠ꧀ꦡꦚ꧀ꦕ ꦠꦶꦟꦁ ꦮꦴ ꦆꦛ꧀ꦜꦏꦴ ꦮꦴ ꦄꦴꦤꦷꦠꦴ ꦲꦺꦴꦤ꧀ꦠꦶ, ꦱꦕꦺ ꦈꦱ꧀ꦱꦲꦠꦶ, ꦖꦴꦢꦺꦠꦧ꧀ꦧꦁ. ꦤꦺꦴ ꦕꦺ ꦱꦏ꧀ꦏꦺꦴꦠꦶ, ꦪꦺꦴ ꦎꦏꦴꦱꦺꦴ ꦄꦤꦺꦴꦮꦱ꧀ꦱꦏꦺꦴ, ꦠꦠ꧀ꦡ ꦩꦚ꧀ꦕꦥꦷꦜꦴꦢꦷꦤꦶ ꦤꦶꦏ꧀ꦑꦶꦥꦶꦠ꧀ꦮꦴ ꦒꦤ꧀ꦠꦧ꧀ꦧꦁ. ꦱꦕꦺ ꦱꦧ꧀ꦧꦩ꧀ꦥꦶ ꦎꦮꦱ꧀ꦱꦠꦶ, ꦈꦱ꧀ꦱꦲꦤ꧀ꦠꦺꦤ ꦄꦤ꧀ꦠꦺꦴꦒꦴꦩꦺ ꦈꦥꦴꦱꦏꦴꦤꦁ ꦓꦫꦺ ꦜꦥꦺꦠꦧ꧀ꦧꦁ. ꦱꦕꦺ ꦠꦺꦥꦶ ‘‘ꦱꦔ꧀ꦓꦶꦏꦁ ꦤꦴꦩ ꦨꦤ꧀ꦠꦺ ꦨꦴꦫꦶꦪꦁ, ꦄꦒ꧀ꦒꦶꦢꦴꦲꦴꦢꦷꦤꦁ ꦨꦴꦪꦴꦩꦴ’’ꦠꦶ ꦤ ꦱꦩ꧀ꦥꦛꦶꦕ꧀ꦖꦤ꧀ꦠꦶ, ꦄꦗ꧀ꦙꦺꦴꦏꦴꦱꦺꦥꦶ ꦥꦴꦱꦴꦟꦴꦤꦁ ꦈꦥꦫꦶ ꦩꦚ꧀ꦕꦁ ꦜꦥꦺꦠ꧀ꦮꦴ ꦱꦺꦱꦁ ꦥꦸꦧ꧀ꦧꦺ ꦮꦸꦠ꧀ꦠꦤꦪꦺꦤꦺꦮ ꦤꦶꦏ꧀ꦑꦶꦥꦶꦠ꧀ꦮꦴ ꦠꦶꦟꦺꦲꦶ ꦕ ꦥꦟ꧀ꦟꦺꦲꦶ ꦕ ꦥꦛꦶꦕ꧀ꦖꦴꦢꦺꦠ꧀ꦮꦴ ꦒꦤ꧀ꦠꦸꦁ ꦮꦛ꧀ꦛꦠꦶ. ꦪꦚ꧀ꦲꦶ ꦠꦠ꧀ꦡ ꦄꦔ꧀ꦒꦩꦠ꧀ꦠꦩ꧀ꦥꦶ ꦄꦮꦱꦶꦱ꧀ꦱꦠꦶ, ꦠꦁ ꦄꦚ꧀ꦚꦺꦱꦁ ꦠꦠ꧀ꦡ ꦄꦴꦒꦠꦴꦤꦁ ꦨꦶꦏ꧀ꦑꦹꦤꦁ ꦈꦥꦏꦴꦫꦁ ꦨꦮꦶꦱ꧀ꦱꦠꦷꦠꦶ.

꧑꧑꧗. ꦮꦶꦲꦴꦫꦱ꧀ꦱ ꦈꦥꦕꦴꦫꦺꦠꦶꦄꦴꦢꦷꦱꦸ ꦮꦶꦲꦴꦫꦱ꧀ꦱꦹꦥꦕꦴꦫꦺꦴ ꦤꦴꦩ ꦥꦫꦶꦮꦺꦟꦁ. ꦈꦥꦛ꧀ꦜꦴꦤꦱꦴꦭꦴꦠꦶ ꦥꦫꦶꦮꦺꦟꦨꦺꦴꦗꦤꦱꦴꦭꦴ. ꦩꦟ꧀ꦝꦥꦺꦴꦠꦶ ꦥꦫꦶꦮꦺꦟꦩꦟ꧀ꦝꦥꦺꦴ. ꦫꦸꦏ꧀ꦑꦩꦹꦭꦤ꧀ꦠꦶ ꦥꦫꦶꦮꦺꦟꦫꦸꦏ꧀ꦑꦩꦹꦭꦁ. ꦄꦪꦁ ꦠꦴꦮ ꦤꦪꦺꦴ ꦏꦸꦫꦸꦤ꧀ꦢꦛ꧀ꦜꦏꦡꦴꦪꦁ ꦮꦸꦠ꧀ꦠꦺꦴ. ꦏꦶꦚ꧀ꦕꦴꦥꦶ ꦮꦸꦠ꧀ꦠꦺꦴ, ꦄꦡ ꦑꦺꦴ ꦮꦶꦲꦴꦫꦺꦴꦠꦶ ꦄꦤ꧀ꦠꦺꦴꦒꦧ꧀ꦨꦺꦴ ꦮꦴ ꦄꦚ꧀ꦚꦁ ꦮꦴ ꦱꦧ꧀ꦧꦥꦫꦶꦕ꧀ꦖꦤ꧀ꦤꦁ ꦒꦸꦠ꧀ꦠꦱꦺꦤꦴꦱꦤꦁ ꦮꦺꦢꦶꦠꦧ꧀ꦧꦁ. ꦮꦶꦲꦴꦫꦱ꧀ꦱ ꦈꦥꦕꦴꦫꦺꦠꦶ ꦠꦱ꧀ꦱ ꦧꦲꦶ ꦄꦴꦱꦤ꧀ꦤꦺ ꦎꦏꦴꦱꦺ. ꦈꦥꦛ꧀ꦜꦴꦤꦱꦴꦭꦴꦪꦁ ꦮꦴꦠꦶ ꦨꦺꦴꦗꦤꦱꦴꦭꦴꦪꦁ ꦮꦴ. ꦩꦟ꧀ꦝꦥꦺ ꦮꦴꦠꦶ ꦄꦥꦫꦶꦕ꧀ꦖꦤ꧀ꦤꦺ ꦥꦫꦶꦕ꧀ꦖꦤ꧀ꦤꦺ ꦮꦴꦥꦶ ꦧꦲꦹꦤꦁ ꦱꦤ꧀ꦤꦶꦥꦴꦠꦩꦟ꧀ꦝꦥꦺ. ꦫꦸꦏ꧀ꦑꦩꦹꦭꦺ ꦮꦠ꧀ꦠꦧ꧀ꦧꦁ ꦤꦠ꧀ꦡꦶ. ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱꦴꦠꦶ ꦮꦸꦠ꧀ꦠꦥ꧀ꦥꦏꦴꦫꦚ꧀ꦲꦶ ꦢꦱꦮꦶꦣꦁ ꦱꦺꦪ꧀ꦪꦁ ꦄꦤ꧀ꦠꦺꦴꦒꦧ꧀ꦨꦴꦢꦶꦩ꧀ꦲꦶ ꦒꦸꦠ꧀ꦠꦛ꧀ꦜꦴꦤꦺ ꦥꦚ꧀ꦚꦥꦺꦠ꧀ꦮꦴ ꦒꦕ꧀ꦖꦤ꧀ꦠꦱ꧀ꦱ ꦪꦱ꧀ꦩꦴ ꦱꦺꦪ꧀ꦪꦴꦥꦶ ꦱꦺꦤꦴꦱꦤꦩ꧀ꦥꦶ ꦈꦥꦕꦶꦏꦴꦲꦶ ꦥꦭꦸꦗ꧀ꦗꦠꦶ, ꦮꦩ꧀ꦩꦶꦏꦫꦴꦱꦶꦪꦺꦮ ꦲꦺꦴꦠꦶ, ꦠꦱ꧀ꦩꦴ ꦥꦴꦕꦶꦠ꧀ꦠꦶꦪꦁ ꦮꦸꦠ꧀ꦠꦁ. ꦧꦲꦶ ꦥꦤ ꦈꦥꦛ꧀ꦜꦴꦤꦱꦴꦭꦴꦢꦷꦱꦸ ꦥꦚ꧀ꦚꦥꦺꦠ꧀ꦮꦴ ꦒꦕ꧀ꦖꦤ꧀ꦠꦱ꧀ꦱ ꦱꦺꦪ꧀ꦪꦴꦩꦠ꧀ꦠꦩꦺꦮ ꦤꦱ꧀ꦱꦺꦪ꧀ꦪ, ꦜꦴꦤꦱ꧀ꦱ ꦄꦒꦸꦠ꧀ꦠꦠꦴꦪ ꦤ ꦱꦺꦤꦴꦱꦤꦁ, ꦠꦱ꧀ꦩꦴ ꦌꦠ꧀ꦡ ꦢꦸꦏ꧀ꦏꦛꦁ ꦮꦸꦠ꧀ꦠꦁ. ꦩꦚ꧀ꦕꦁ ꦮꦴ ꦥꦷꦜꦁ ꦮꦴꦠꦶ ꦌꦠ꧀ꦡ ꦪꦱ꧀ꦩꦴ ꦤ ꦱꦏ꧀ꦏꦴ ꦩꦚ꧀ꦕꦥꦷꦜꦁ ꦱꦲꦱꦴ ꦈꦥꦕꦶꦏꦴꦲꦶ ꦑꦴꦪꦶꦠꦸꦁ, ꦠꦱ꧀ꦩꦴ ꦠꦁ ꦮꦶꦲꦴꦫꦺꦥꦶ ꦱꦤ꧀ꦡꦫꦶꦠ꧀ꦮꦴ ꦒꦕ꧀ꦖꦤ꧀ꦠꦱ꧀ꦱ ꦢꦸꦏ꧀ꦏꦛꦁ ꦮꦸꦠ꧀ꦠꦁ. ꦮꦶꦲꦴꦫꦹꦥꦕꦴꦫꦺ ꦥꦤ ꦠꦁ ꦮꦶꦲꦴꦫꦕꦴꦫꦶꦏꦁ ꦄꦴꦲꦶꦟ꧀ꦝꦤ꧀ꦠꦴꦥꦶ ꦢꦶꦱ꧀ꦮꦴ ꦥꦛꦶꦱꦴꦩꦺꦱ꧀ꦱꦤ꧀ꦠꦶ.

꧑꧑꧘. ꦈꦢ꧀ꦣꦫꦶꦠ꧀ꦮꦴ ꦒꦕ꧀ꦖꦠꦷꦠꦶ ꦌꦠ꧀ꦡ ꦈꦢ꧀ꦣꦫꦶꦠ꧀ꦮꦴ ꦒꦕ꧀ꦖꦤ꧀ꦠꦺꦤ ꦩꦚ꧀ꦕꦥꦷꦜꦏꦮꦴꦛꦁ ꦱꦧ꧀ꦧꦁ ꦄꦥꦤꦺꦠ꧀ꦮꦴ ꦱꦁꦲꦫꦶꦠ꧀ꦮꦴ ꦕꦷꦮꦫꦮꦁꦱꦺ ꦭꦒ꧀ꦒꦺꦠ꧀ꦮꦴ ꦒꦤ꧀ꦠꦧ꧀ꦧꦁ. ꦥꦕ꧀ꦖꦴ ꦄꦴꦒꦤ꧀ꦠ꧀ꦮꦴ ꦮꦱꦤꦏꦨꦶꦏ꧀ꦑꦸꦤꦴꦥꦶ ꦥꦸꦤ ꦩꦚ꧀ꦕꦥꦷꦜꦁ ꦮꦴ ꦥꦚ꧀ꦚꦥꦺꦠ꧀ꦮꦴ ꦱꦪꦶꦠ꧀ꦮꦴ ꦒꦕ꧀ꦖꦤ꧀ꦠꦺꦤ ꦠꦡꦺꦮ ꦏꦴꦠꦧ꧀ꦧꦁ. ꦄꦤ꧀ꦠꦺꦴꦏꦸꦛ꧀ꦛꦠꦺꦴ ꦱꦺꦪ꧀ꦪꦁ ꦧꦲꦶꦏꦸꦛ꧀ꦛꦺ ꦥꦚ꧀ꦚꦥꦺꦠ꧀ꦮꦴ ꦮꦱꦤ꧀ꦠꦺꦤ ꦒꦩꦤꦏꦴꦭꦺ ꦒꦲꦶꦠꦛ꧀ꦜꦴꦤꦺꦪꦺꦮ ꦥꦛꦶꦱꦴꦩꦺꦠꦧ꧀ꦧꦁ. ꦈꦥꦫꦶꦥꦴꦱꦴꦢꦠꦺꦴ ꦎꦫꦺꦴꦥꦺꦠ꧀ꦮꦴ ꦲꦺꦛ꧀ꦜꦴꦥꦴꦱꦴꦢꦺ ꦮꦱꦤ꧀ꦠꦱ꧀ꦱꦥꦶ ꦌꦱꦺꦮ ꦤꦪꦺꦴ. ꦫꦠ꧀ꦠꦶꦛ꧀ꦜꦴꦤꦢꦶꦮꦴꦛ꧀ꦜꦴꦤꦺꦱꦸ ꦩꦚ꧀ꦕꦥꦷꦜꦁ ꦥꦚ꧀ꦚꦥꦺꦠ꧀ꦮꦴꦥꦶ ꦒꦩꦤꦏꦴꦭꦺ ꦥꦸꦤ ꦒꦲꦶꦠꦛ꧀ꦜꦴꦤꦺꦪꦺꦮ ꦜꦥꦺꦠꦧ꧀ꦧꦁ.

ꦄꦴꦥꦸꦕ꧀ꦖꦁ ꦒꦕ꧀ꦖꦠꦷꦠꦶ ꦌꦠ꧀ꦡꦴꦪꦁ ꦄꦴꦥꦸꦕ꧀ꦖꦶꦠꦧ꧀ꦧꦴꦤꦴꦥꦸꦕ꧀ꦖꦶꦠꦧ꧀ꦧꦮꦶꦤꦶꦕ꧀ꦖꦪꦺꦴ – ꦪꦴ ꦠꦴꦮ ꦨꦹꦩꦶꦪꦁ ꦢꦷꦓꦱꦴꦭꦴ ꦮꦴ ꦥꦟ꧀ꦟꦱꦴꦭꦴ ꦮꦴ ꦲꦺꦴꦠꦶ, ꦪꦁ ꦮꦴ ꦫꦸꦏ꧀ꦑꦠ꧀ꦡꦩ꧀ꦨꦺꦱꦸ, ꦏꦠꦒꦺꦲꦁ ꦈꦥꦕꦶꦏꦴꦤꦁ ꦈꦛ꧀ꦜꦴꦤꦛ꧀ꦜꦴꦤꦁ ꦲꦺꦴꦠꦶ, ꦠꦠꦺꦴ ꦥꦏ꧀ꦏꦩꦤ꧀ꦠꦺꦤ ꦠꦴꦮ ꦄꦴꦥꦸꦕ꧀ꦖꦶꦠ꧀ꦮꦴꦮ ꦥꦏ꧀ꦏꦩꦶꦠꦧ꧀ꦧꦁ. ꦠꦱ꧀ꦩꦶꦚ꧀ꦲꦶ ꦏꦠꦶꦥꦪꦴꦤꦶ ꦢꦶꦮꦱꦴꦤꦶ ꦄꦗꦒ꧀ꦒꦶꦪꦩꦴꦤꦺ ꦮꦩ꧀ꦩꦶꦏꦴꦮ ꦱꦤ꧀ꦠꦶꦛ꧀ꦜꦤ꧀ꦠꦶ. ꦪꦁ ꦥꦤ ꦥꦴꦱꦴꦟꦥꦶꦛ꧀ꦜꦶꦪꦁ ꦮꦴ ꦥꦴꦱꦴꦟꦠ꧀ꦡꦩ꧀ꦨꦺꦱꦸ ꦮꦴ ꦏꦠꦱꦺꦤꦴꦱꦤꦁ ꦱꦶꦭꦸꦕ꧀ꦕꦪꦭꦺꦟꦁ ꦮꦴ ꦱꦸꦣꦴꦭꦶꦠ꧀ꦠꦱꦺꦤꦴꦱꦤꦁ ꦮꦴ ꦪꦠ꧀ꦡ ꦈꦥꦕꦶꦏꦴꦱꦔ꧀ꦏꦴ ꦤꦠ꧀ꦡꦶ, ꦠꦠꦺꦴ ꦥꦏ꧀ꦏꦩꦤ꧀ꦠꦱ꧀ꦱ ꦄꦴꦥꦸꦕ꧀ꦖꦶꦠ꧀ꦮꦴꦥꦶ ꦄꦤꦴꦥꦸꦕ꧀ꦖꦶꦠ꧀ꦮꦴꦥꦶ ꦒꦤ꧀ꦠꦸꦁ ꦮꦛ꧀ꦛꦠꦶ, ꦄꦴꦥꦸꦕ꧀ꦖꦤꦁ ꦥꦤ ꦮꦠ꧀ꦠꦁ. ꦱꦕꦺ ꦠꦴꦢꦶꦱꦺꦥꦶ ꦱꦺꦤꦴꦱꦤꦺ ꦌꦏꦺꦤ ꦥꦱ꧀ꦱꦺꦤ ꦈꦥꦕꦶꦏꦴ ꦄꦴꦫꦺꦴꦲꦤ꧀ꦠꦶ, ꦄꦴꦥꦸꦕ꧀ꦖꦶꦠ꧀ꦮꦴꦮ ꦒꦤ꧀ꦠꦧ꧀ꦧꦁ. ꦪꦺꦴ ꦥꦤ ꦄꦴꦒꦤ꧀ꦠꦸꦏꦺꦴ ꦨꦶꦏ꧀ꦑꦸ ꦱꦔ꧀ꦓꦶꦏꦁ ꦱꦺꦤꦴꦱꦤꦁ ꦒꦲꦺꦠ꧀ꦮꦴ ꦮꦱꦤ꧀ꦠꦁ ꦨꦶꦏ꧀ꦑꦸꦁ ꦄꦤꦸꦮꦠ꧀ꦠꦤ꧀ꦠꦺꦴ ꦄꦠ꧀ꦠꦤꦺꦴ ꦱꦺꦤꦴꦱꦤꦁ ꦄꦒ꧀ꦒꦲꦺꦠ꧀ꦮꦴ ꦮꦱꦠꦶ, ꦪꦴꦮ ꦱꦺꦴ ꦤ ꦒꦟ꧀ꦲꦴꦠꦶ, ꦠꦴꦮ ꦠꦁ ꦱꦺꦤꦴꦱꦤꦁ ꦥꦸꦫꦶꦩꦨꦶꦏ꧀ꦑꦸꦱ꧀ꦱꦺꦮ ꦥꦭꦶꦧꦺꦴꦣꦺꦴ. ꦪꦢꦴ ꦥꦤ ꦱꦺꦴ ꦱꦺꦤꦴꦱꦤꦁ ꦒꦲꦺꦠ꧀ꦮꦴ ꦄꦠ꧀ꦠꦤꦺꦴ ꦆꦱ꧀ꦱꦫꦶꦪꦺꦤ ꦮꦱꦠꦶ, ꦠꦠꦺꦴ ꦥꦛ꧀ꦜꦴꦪ ꦄꦴꦒꦤ꧀ꦠꦸꦏꦱ꧀ꦱꦺꦮ ꦥꦭꦶꦧꦺꦴꦣꦺꦴ. ꦱꦕꦺ ꦈꦨꦺꦴꦥꦶ ꦮꦶꦨꦗꦶꦠ꧀ꦮꦴ ꦒꦟ꧀ꦲꦤ꧀ꦠꦶ, ꦈꦨꦶꦤ꧀ꦤꦩ꧀ꦥꦶ ꦥꦭꦶꦧꦺꦴꦣꦺꦴ. ꦩꦲꦴꦥꦕ꧀ꦕꦫꦶꦪꦁ ꦥꦤ ꦮꦸꦠ꧀ꦠꦁ – ‘‘ꦱꦕꦺ ꦢ꧀ꦮꦺ ꦠꦪꦺꦴ ꦌꦏꦠꦺꦴ ꦲꦸꦠ꧀ꦮꦴ ꦥꦚ꧀ꦚꦥꦺꦤ꧀ꦠꦶ, ꦒꦩꦤꦏꦴꦭꦺ ꦱꦧ꧀ꦧꦺꦲꦶꦥꦶ ꦄꦴꦥꦸꦕ꧀ꦖꦶꦠꦧ꧀ꦧꦁ. ꦠꦺꦱꦸ ꦕꦺ ꦥꦜꦩꦁ ꦒꦕ꧀ꦖꦤ꧀ꦠꦺꦴ ‘ꦥꦕ꧀ꦖꦶꦩꦺꦴ ꦗꦒ꧀ꦒꦶꦱ꧀ꦱꦠꦷ’ꦠꦶ ꦄꦴꦨꦺꦴꦒꦁ ꦏꦠ꧀ꦮꦴ ꦒꦕ꧀ꦖꦠꦶ ꦮꦛ꧀ꦛꦠꦶ. ꦥꦕ꧀ꦖꦶꦩꦱ꧀ꦱ ꦄꦴꦨꦺꦴꦒꦺꦤ ꦩꦸꦠ꧀ꦠꦶ ꦤꦠ꧀ꦡꦶ. ꦧꦲꦹ ꦌꦏꦁ ꦥꦺꦱꦺꦠ꧀ꦮꦴ ꦱꦤ꧀ꦡꦫꦴꦥꦺꦤ꧀ꦠꦶ, ꦒꦩꦤꦏꦴꦭꦺ ꦱꦧ꧀ꦧꦺꦲꦶ ꦮꦴ ꦄꦴꦥꦸꦕ꧀ꦖꦶꦠꦧ꧀ꦧꦁ, ꦌꦏꦁ ꦮꦴ ꦥꦺꦱꦺꦠ꧀ꦮꦴ ꦄꦴꦥꦸꦕ꧀ꦖꦶꦠꦧ꧀ꦧꦁ. ꦄꦚ꧀ꦚꦠꦺꦴ ꦩꦚ꧀ꦕꦥꦷꦜꦴꦢꦷꦤꦶ ꦄꦴꦤꦺꦠ꧀ꦮꦴ ꦄꦚ꧀ꦚꦠ꧀ꦫ ꦮꦱꦶꦠ꧀ꦮꦴꦥꦶ ꦒꦩꦤꦏꦴꦭꦺ ꦠꦠ꧀ꦡꦺꦮ ꦤꦺꦠꦧ꧀ꦧꦴꦤꦶ. ꦱꦕꦺ ꦄꦚ꧀ꦚꦴꦮꦴꦱꦠꦺꦴ ꦄꦴꦤꦺꦠ꧀ꦮꦴ ꦮꦱꦩꦴꦤꦱ꧀ꦱ ꦄꦚ꧀ꦚꦺꦴ ꦮꦸꦝ꧀ꦞꦠꦫꦺꦴ ꦄꦴꦒꦕ꧀ꦖꦠꦶ, ꦤ ꦥꦛꦶꦧꦴꦲꦶꦠꦧ꧀ꦧꦺꦴ, ‘ꦩꦪꦴ ꦨꦤ꧀ꦠꦺ ꦄꦚ꧀ꦚꦴꦮꦴꦱꦠꦺꦴ ꦄꦴꦤꦷꦠꦁ, ꦥꦴꦏꦠꦶꦏꦁ ꦏꦫꦺꦪ꧀ꦪꦴꦡꦴ’ꦠꦶ ꦮꦠ꧀ꦠꦧ꧀ꦧꦁ. ꦠꦺꦤ ‘ꦌꦮꦁ ꦏꦫꦶꦱ꧀ꦱꦴꦩꦷ’ꦠꦶ ꦱꦩ꧀ꦥꦛꦶꦕ꧀ꦖꦶꦠꦺ ꦆꦠꦫꦱ꧀ꦱ ꦒꦤ꧀ꦠꦸꦁ ꦮꦛ꧀ꦛꦠꦶ. ꦌꦮꦩꦚ꧀ꦚꦠ꧀ꦡ ꦲꦫꦶꦠ꧀ꦮꦴꦥꦶ ꦱꦔ꧀ꦓꦶꦏꦥꦫꦶꦨꦺꦴꦒꦺꦤ ꦥꦫꦶꦨꦸꦚ꧀ꦗꦤ꧀ꦠꦱ꧀ꦱ ꦤꦛ꧀ꦜꦁ ꦮꦴ ꦗꦶꦟ꧀ꦟꦁ ꦮꦴ ꦕꦺꦴꦫꦺꦲꦶ ꦮꦴ ꦲꦛꦁ ꦒꦷꦮꦴ ꦤ ꦲꦺꦴꦠꦶ, ꦥꦸꦒ꧀ꦒꦭꦶꦏꦥꦫꦶꦨꦺꦴꦒꦺꦤ ꦥꦫꦶꦨꦸꦚ꧀ꦗꦤ꧀ꦠꦱ꧀ꦱ ꦥꦤ ꦒꦷꦮꦴ ꦲꦺꦴꦠꦶ. ꦄꦚ꧀ꦚꦱ꧀ꦱ ꦩꦚ꧀ꦕꦥꦷꦜꦁ ꦥꦤ ꦱꦔ꧀ꦓꦶꦏꦥꦫꦶꦨꦺꦴꦒꦺꦤ ꦮꦴ ꦥꦸꦒ꧀ꦒꦭꦶꦏꦥꦫꦶꦨꦺꦴꦒꦺꦤ ꦮꦴ ꦥꦫꦶꦨꦸꦚ꧀ꦗꦤ꧀ꦠꦱ꧀ꦱ ꦤꦛ꧀ꦜꦁ ꦒꦷꦮꦴꦪꦺꦮ’’.

ꦏꦺꦤꦕꦶ ꦥꦭꦶꦧꦸꦢ꧀ꦣꦁ ꦲꦺꦴꦠꦷꦠꦶ ꦮꦸꦝ꧀ꦞꦠꦫꦨꦶꦏ꧀ꦑꦹꦆꦱ꧀ꦱꦫꦶꦪꦪꦏ꧀ꦑꦱꦷꦲꦮꦴꦭ꦳ꦩꦶꦒꦏꦟ꧀ꦲꦱꦥ꧀ꦥꦴꦢꦷꦱꦸ ꦪꦺꦤ ꦏꦺꦤꦕꦶ ꦱꦺꦤꦴꦱꦤꦁ ꦥꦭꦶꦧꦸꦢ꧀ꦣꦁ ꦲꦺꦴꦠꦶ. ꦱꦴꦥꦺꦏ꧀ꦑꦺꦴ ꦒꦤ꧀ꦠ꧀ꦮꦴ ꦠꦠ꧀ꦡ ꦜꦶꦠꦺꦴ ꦄꦴꦥꦸꦕ꧀ꦖꦠꦶ, ꦏꦺꦤꦕꦶ ꦥꦭꦶꦧꦸꦢ꧀ꦣꦺꦴ ꦲꦺꦴꦠꦷꦠꦶ ꦄꦗ꧀ꦗꦺꦮ ꦄꦴꦒꦤ꧀ꦠ꧀ꦮꦴ ꦥꦛꦶꦗꦒ꧀ꦒꦶꦱ꧀ꦱꦴꦩꦷꦠꦶ ꦌꦮꦁ ꦱꦴꦥꦺꦏ꧀ꦑꦺꦴ ꦤꦢꦷꦥꦴꦫꦁ ꦮꦴ ꦒꦴꦩꦤ꧀ꦠꦫꦁ ꦮꦴ ꦒꦤ꧀ꦠ꧀ꦮꦴ ꦪꦠ꧀ꦡꦱ꧀ꦱ ꦒꦩꦤꦕꦶꦠ꧀ꦠꦁ ꦈꦥ꧀ꦥꦤ꧀ꦤꦁ, ꦠꦠ꧀ꦡꦺꦮ ꦜꦶꦠꦺꦴ ꦏꦚ꧀ꦕꦶ ꦥꦺꦱꦺꦠ꧀ꦮꦴ ꦄꦴꦥꦸꦕ꧀ꦖꦠꦶ, ꦤꦢꦷꦥꦹꦫꦫꦴꦗꦕꦺꦴꦫꦴꦢꦷꦱꦸ ꦮꦴ ꦏꦺꦤꦕꦶ ꦥꦭꦶꦧꦸꦢ꧀ꦣꦺꦴ ꦲꦺꦴꦠꦶ ꦈꦥꦢ꧀ꦢꦸꦠꦺꦴ, ꦤ ꦱꦏ꧀ꦏꦺꦴꦠꦶ ꦥꦕ꧀ꦕꦴꦒꦤ꧀ꦠꦸꦁ, ꦌꦮꦁꦨꦹꦠꦱ꧀ꦱꦥꦶ ꦄꦤꦴꦥꦠ꧀ꦠꦶ. ꦱꦺꦱꦁ ꦥꦜꦩꦱꦶꦏ꧀ꦑꦴꦥꦢꦺ ꦮꦸꦠ꧀ꦠꦤꦪꦩꦺꦮ ꦱꦢ꧀ꦣꦶꦁ ꦱꦩꦸꦛ꧀ꦜꦴꦤꦴꦢꦷꦲꦷꦠꦶ.

ꦢꦸꦠꦶꦪꦱꦺꦤꦴꦱꦤꦱꦶꦏ꧀ꦑꦴꦥꦢꦁ ꦥꦚ꧀ꦕꦩꦁ.