꧑. ꦩꦸꦱꦴꦮꦴꦢꦮꦒ꧀ꦒꦺꦴ

꧑. ꦩꦸꦱꦴꦮꦴꦢꦱꦶꦏ꧀ꦑꦴꦥꦢꦮꦟ꧀ꦟꦤꦴ

ꦪꦺꦱꦁ ꦤꦮꦲꦶ ꦮꦒ꧀ꦒꦺꦲꦶ, ꦱꦔ꧀ꦒꦲꦺꦴ ꦱꦸꦥ꧀ꦥꦠꦶꦛ꧀ꦜꦶꦠꦺꦴ;

ꦑꦸꦢ꧀ꦢꦏꦴꦤꦁ ꦄꦪꦁ ꦢꦴꦤꦶ, ꦠꦺꦱꦁ ꦨꦮꦠꦶ ꦮꦟ꧀ꦟꦤꦴ.

꧑. ꦠꦠ꧀ꦡ ꦩꦸꦱꦴꦮꦴꦢꦮꦒ꧀ꦒꦱ꧀ꦱ ꦠꦴꦮ ꦥꦜꦩꦱꦶꦏ꧀ꦑꦴꦥꦢꦺ ꦲꦠ꧀ꦡꦏꦺꦴꦠꦶ ꦠꦱ꧀ꦱ ꦡꦺꦫꦱ꧀ꦱ ꦤꦴꦩꦁ. ꦱꦏ꧀ꦪꦴꦤꦁ ꦥꦸꦠ꧀ꦠꦺꦴꦠꦶ ꦱꦏ꧀ꦪꦥꦸꦠ꧀ꦠꦺꦴ. ꦧꦸꦢ꧀ꦣꦏꦴꦭꦺ ꦏꦶꦫ ꦱꦏ꧀ꦪꦏꦸꦭꦠꦺꦴ ꦄꦱꦷꦠꦶ ꦥꦸꦫꦶꦱꦱꦲꦱ꧀ꦱꦴꦤꦶ ꦥꦧ꧀ꦧꦗꦶꦁꦱꦸ, ꦠꦺꦱꦁ ꦱꦺꦴ ꦄꦚ꧀ꦚꦠꦫꦺꦴꦠꦶ. ꦮꦴꦢꦏ꧀ꦑꦶꦠ꧀ꦠꦺꦴꦠꦶ ‘‘ꦮꦴꦢꦁ ꦏꦫꦶꦱ꧀ꦱꦴꦩꦷ’’ꦠꦶ ꦌꦮꦁ ꦥꦫꦶꦮꦶꦠꦏ꧀ꦏꦶꦠꦺꦤ ꦮꦴꦢꦺꦤ ꦥꦫꦮꦴꦢꦶꦱꦤ꧀ꦠꦶꦏꦁ ꦑꦶꦠ꧀ꦠꦺꦴ ꦥꦏ꧀ꦑꦶꦠ꧀ꦠꦺꦴ ꦥꦲꦶꦠꦺꦴ ꦥꦺꦱꦶꦠꦺꦴꦠꦶ ꦄꦠ꧀ꦡꦺꦴ. ꦮꦴꦢꦩ꧀ꦲꦶ ꦮꦴ ꦱꦏꦺꦤ ꦕꦶꦠ꧀ꦠꦺꦤ ꦑꦶꦠ꧀ꦠꦺꦴ. ꦪꦠ꧀ꦫ ꦪꦠ꧀ꦫ ꦮꦴꦢꦺꦴ ꦠꦠ꧀ꦫ ꦠꦠ꧀ꦫꦺꦮ ꦱꦤ꧀ꦢꦶꦱ꧀ꦱꦠꦷꦠꦶꦥꦶ ꦮꦴꦢꦏ꧀ꦑꦶꦠ꧀ꦠꦺꦴ. ꦄꦮꦗꦴꦤꦶꦠ꧀ꦮꦴ ꦄꦮꦗꦴꦤꦴꦠꦷꦠꦶ ꦄꦠ꧀ꦠꦤꦺꦴ ꦮꦴꦢꦺ ꦏꦚ꧀ꦕꦶ ꦢꦺꦴꦱꦁ ꦱꦭ꧀ꦭꦏ꧀ꦑꦺꦤ꧀ꦠꦺꦴ ‘‘ꦤꦴꦪꦁ ꦩꦩ ꦮꦴꦢꦺꦴ’’ꦠꦶ ꦄꦮꦗꦴꦤꦶꦠ꧀ꦮꦴ ꦥꦸꦤ ꦏꦡꦺꦤ꧀ꦠꦺꦴ ꦏꦡꦺꦤ꧀ꦠꦺꦴ ꦤꦶꦢ꧀ꦢꦺꦴꦱꦠꦁ ꦱꦭ꧀ꦭꦏ꧀ꦑꦺꦠ꧀ꦮꦴ ‘‘ꦩꦩꦺꦮ ꦄꦪꦁ ꦮꦴꦢꦺꦴ’’ꦠꦶ ꦥꦛꦶꦗꦴꦤꦴꦠꦶ. ꦥꦛꦶꦗꦴꦤꦶꦠ꧀ꦮꦴ ꦄꦮꦗꦴꦤꦴꦠꦷꦠꦶ ꦏꦶꦱ꧀ꦩꦶꦚ꧀ꦕꦶꦢꦺꦮ ꦮꦕꦤꦺ ꦄꦴꦤꦶꦱꦁꦱꦁ ꦱꦭ꧀ꦭꦏ꧀ꦑꦺꦤ꧀ꦠꦺꦴ ‘‘ꦄꦪꦁ ꦩꦩ ꦮꦴꦢꦺꦴ’’ꦠꦶ ꦥꦛꦶꦗꦴꦤꦶꦠ꧀ꦮꦴ ꦥꦸꦤ ꦏꦡꦺꦤ꧀ꦠꦺꦴ ꦏꦡꦺꦤ꧀ꦠꦺꦴ ꦠꦠ꧀ꦡ ꦢꦺꦴꦱꦁ ꦱꦭ꧀ꦭꦏ꧀ꦑꦺꦠ꧀ꦮꦴ ‘‘ꦤꦴꦪꦁ ꦩꦩ ꦮꦴꦢꦺꦴ’’ꦠꦶ ꦄꦮꦗꦴꦤꦴꦠꦶ. ꦄꦚ꧀ꦚꦺꦤꦚ꧀ꦚꦁ ꦥꦛꦶꦕꦫꦠꦷꦠꦶ ꦄꦚ꧀ꦚꦺꦤ ꦏꦴꦫꦟꦺꦤ ꦄꦚ꧀ꦚꦁ ꦏꦴꦫꦟꦁ ꦥꦛꦶꦕꦫꦠꦶ ꦥꦛꦶꦕ꧀ꦖꦴꦢꦺꦠꦶ ꦄꦗ꧀ꦙꦺꦴꦠ꧀ꦡꦫꦠꦶ, ‘‘ꦫꦹꦥꦁ ꦄꦤꦶꦕ꧀ꦕꦁ ꦗꦴꦤꦶꦠꦧ꧀ꦧꦠꦺꦴ’’ꦠꦶ ꦮꦠ꧀ꦮꦴ ꦥꦸꦤ ‘‘ꦗꦴꦠꦶꦣꦩ꧀ꦩꦠꦺꦴ’’ꦠꦶꦄꦴꦢꦷꦤꦶ ꦮꦢꦠꦶ. ꦏꦸꦫꦸꦤ꧀ꦢꦶꦪꦁ ꦥꦤ ‘‘ꦌꦠꦱ꧀ꦱ ꦥꦛꦶꦕ꧀ꦖꦴꦢꦤꦲꦺꦠꦸꦁ ꦄꦚ꧀ꦚꦁ ꦧꦲꦸꦁ ꦏꦡꦺꦠꦷ’’ꦠꦶ ꦮꦸꦠ꧀ꦠꦁ. ꦠꦠ꧀ꦫꦴꦪꦁ ꦄꦣꦶꦥ꧀ꦥꦴꦪꦺꦴ – ꦪꦁ ꦠꦁ ꦥꦛꦶꦗꦴꦤꦤꦚ꧀ꦕ ꦄꦮꦗꦴꦤꦤꦚ꧀ꦕ, ꦠꦱ꧀ꦱ ꦥꦛꦶꦕ꧀ꦖꦴꦢꦤꦠ꧀ꦡꦁ ‘‘ꦏꦺꦴ ꦄꦴꦲ, ꦏꦶꦁ ꦄꦴꦲ, ꦏꦶꦱ꧀ꦩꦶꦁ ꦄꦴꦲꦴ’’ꦠꦶ ꦌꦮꦩꦴꦢꦶ ꦧꦲꦸꦁ ꦨꦴꦱꦠꦷꦠꦶ. ꦥꦸꦤ ꦩꦲꦴꦄꦛ꧀ꦜꦏꦡꦴꦪꦁ ‘‘ꦄꦮꦗꦴꦤꦶꦠ꧀ꦮꦴ ꦥꦛꦶꦗꦴꦤꦤ꧀ꦠꦺꦴ ꦥꦛꦶꦗꦴꦤꦶꦠ꧀ꦮꦴ ꦄꦮꦗꦴꦤꦤ꧀ꦠꦺꦴ ꦌꦮ ꦕ ꦄꦚ꧀ꦚꦺꦤꦚ꧀ꦚꦁ ꦥꦛꦶꦕꦫꦠꦷ’’ꦠꦶ ꦮꦸꦠ꧀ꦠꦁ. ꦱꦩ꧀ꦥꦗꦴꦤꦩꦸꦱꦴ ꦨꦴꦱꦠꦷꦠꦶ ꦗꦴꦤꦤ꧀ꦠꦺꦴ ꦩꦸꦱꦴ ꦨꦴꦱꦠꦶ. ꦱꦔ꧀ꦏꦺꦠꦁ ꦏꦠ꧀ꦮꦴ ꦮꦶꦱꦁꦮꦴꦢꦺꦠꦷꦠꦶ ꦥꦸꦫꦺꦨꦠ꧀ꦠꦴꦢꦷꦱꦸ ‘‘ꦄꦱꦸꦏꦱ꧀ꦩꦶꦁ ꦤꦴꦩ ꦏꦴꦭꦺ ꦄꦱꦸꦏꦱ꧀ꦩꦶꦁ ꦤꦴꦩ ꦥꦢꦺꦱꦺ ꦮꦴꦢꦺꦴ ꦲꦺꦴꦠꦹ’’ꦠꦶ ꦱꦔ꧀ꦏꦺꦠꦁ ꦏꦠ꧀ꦮꦴ ꦱꦔ꧀ꦏꦺꦠꦠꦺꦴ ꦥꦸꦫꦺ ꦮꦴ ꦥꦕ꧀ꦖꦴ ꦮꦴ ꦒꦤ꧀ꦠ꧀ꦮꦴ ‘‘ꦥꦱ꧀ꦱꦡ ꦨꦺꦴ, ꦠꦶꦠ꧀ꦡꦶꦪꦴ ꦤ ꦄꦴꦒꦠꦴ ꦥꦫꦴꦗꦶꦠꦴ’’ꦠꦶ ꦥꦏ꧀ꦏꦩꦠꦶ.

꧒. ꦱꦩ꧀ꦥꦗꦴꦤꦩꦸꦱꦴꦮꦴꦢꦺꦠꦶ ꦗꦴꦤꦶꦠ꧀ꦮꦴ ꦗꦴꦤꦤ꧀ꦠꦱ꧀ꦱ ꦕ ꦩꦸꦱꦴ ꦨꦟꦤꦺ.

꧓. ꦮꦶꦱꦁꦮꦴꦢꦤꦥꦸꦫꦺꦏ꧀ꦑꦴꦫꦱ꧀ꦱꦴꦠꦶ ꦮꦶꦱꦁꦮꦴꦢꦤꦕꦶꦠ꧀ꦠꦁ ꦥꦸꦫꦠꦺꦴ ꦏꦠ꧀ꦮꦴ ꦮꦢꦤ꧀ꦠꦱ꧀ꦱ. ꦮꦴꦕꦴꦠꦶ ꦩꦶꦕ꧀ꦖꦴꦮꦴꦕꦴꦥꦫꦶꦪꦴꦥꦤ꧀ꦤꦮꦕꦤꦱꦩꦸꦛ꧀ꦜꦴꦥꦶꦏꦴ ꦕꦺꦠꦤꦴ. ꦒꦶꦫꦴꦠꦶ ꦠꦴꦪ ꦕꦺꦠꦤꦴꦪ ꦱꦩꦸꦛ꧀ꦜꦴꦥꦶꦠꦱꦢ꧀ꦢꦁ ꦢꦱ꧀ꦱꦺꦠꦶ. ꦧ꧀ꦪꦥ꧀ꦥꦡꦺꦴꦠꦶ ꦮꦕꦤꦥꦡꦺꦴ; ꦮꦴꦕꦴꦪꦺꦮ ꦲꦶ ꦄꦚ꧀ꦚꦺꦱꦩ꧀ꦥꦶ ꦢꦶꦛ꧀ꦜꦴꦤꦸꦒꦠꦶꦩꦴꦥꦗ꧀ꦗꦤ꧀ꦠꦴꦤꦁ ꦥꦡꦨꦹꦠꦠꦺꦴ ꦧ꧀ꦪꦥ꧀ꦥꦡꦺꦴꦠꦶ ꦮꦸꦕ꧀ꦕꦠꦶ. ꦮꦕꦷꦨꦺꦢꦺꦴꦠꦶ ꦮꦕꦷꦱꦚ꧀ꦚꦶꦠꦴꦪ ꦮꦴꦕꦴꦪ ꦨꦺꦢꦺꦴ; ꦥꦨꦺꦢꦒꦠꦴ ꦮꦴꦕꦴ ꦌꦮ ꦌꦮꦁ ꦮꦸꦕ꧀ꦕꦠꦶ. ꦮꦴꦕꦱꦶꦏꦴ ꦮꦶꦚ꧀ꦚꦠ꧀ꦠꦷꦠꦶ ꦮꦕꦷꦮꦶꦚ꧀ꦚꦠ꧀ꦠꦶ. ꦌꦮꦁ ꦥꦜꦩꦥꦢꦺꦤ ꦱꦸꦢ꧀ꦣꦕꦺꦠꦤꦴ, ꦩꦗ꧀ꦙꦺ ꦠꦷꦲꦶ ꦠꦁꦱꦩꦸꦛ꧀ꦜꦴꦥꦶꦠꦱꦢ꧀ꦢꦱꦲꦶꦠꦴ ꦕꦺꦠꦤꦴ, ꦄꦤ꧀ꦠꦺ ꦌꦏꦺꦤ ꦮꦶꦚ꧀ꦚꦠ꧀ꦠꦶꦱꦲꦶꦠꦴ ꦕꦺꦠꦤꦴ ‘‘ꦏꦡꦶꦠꦴ’’ꦠꦶ ꦮꦺꦢꦶꦠꦧ꧀ꦧꦴ. ꦄꦤꦫꦶꦪꦮꦺꦴꦲꦴꦫꦴꦠꦶ ꦄꦤꦫꦶꦪꦴꦤꦁ ꦧꦴꦭꦥꦸꦡꦸꦗ꧀ꦗꦤꦴꦤꦁ ꦮꦺꦴꦲꦴꦫꦴ.

ꦌꦮꦁ ꦱꦩ꧀ꦥꦗꦴꦤꦩꦸꦱꦴꦮꦴꦢꦁ ꦢꦱ꧀ꦱꦺꦠ꧀ꦮꦴ ꦆꦢꦴꦤꦶ ꦄꦤ꧀ꦠꦺ ꦮꦸꦠ꧀ꦠꦴꦤꦁ ꦱꦩ꧀ꦥꦗꦴꦤꦩꦸꦱꦴꦮꦴꦢꦱꦔ꧀ꦑꦴꦠꦴꦤꦁ ꦄꦤꦫꦶꦪꦮꦺꦴꦲꦴꦫꦴꦤꦁ ꦭꦏ꧀ꦑꦟꦁ ꦢꦱ꧀ꦱꦺꦤ꧀ꦠꦺꦴ ‘‘ꦄꦢꦶꦛ꧀ꦜꦁ ꦢꦶꦛ꧀ꦜꦁ ꦩꦺ’’ꦠꦶꦄꦴꦢꦶꦩꦴꦲ. ꦠꦠ꧀ꦡ ꦄꦢꦶꦛ꧀ꦜꦁ ꦢꦶꦛ꧀ꦜꦁ ꦩꦺꦠꦶ ꦌꦮꦁ ꦮꦢꦠꦺꦴ ꦮꦕꦤꦁ ꦠꦁꦱꦩꦸꦛ꧀ꦜꦴꦥꦶꦏꦴ ꦮꦴ ꦕꦺꦠꦤꦴ ꦌꦏꦺꦴ ꦄꦤꦫꦶꦪꦮꦺꦴꦲꦴꦫꦺꦴꦠꦶ ꦆꦩꦶꦤꦴ ꦤꦪꦺꦤ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ꦄꦥꦶꦕꦺꦠ꧀ꦡ ꦕꦏ꧀ꦑꦸꦮꦱꦺꦤ ꦄꦒ꧀ꦒꦲꦶꦠꦴꦫꦩ꧀ꦩꦟꦁ ꦄꦢꦶꦛ꧀ꦜꦁ, ꦱꦺꦴꦠꦮꦱꦺꦤ ꦄꦒ꧀ꦒꦲꦶꦠꦁ ꦄꦱꦸꦠꦁ, ꦓꦴꦤꦴꦢꦶꦮꦱꦺꦤ ꦩꦸꦤꦶꦠ꧀ꦮꦴ ꦠꦷꦲꦶ ꦆꦤ꧀ꦢ꧀ꦫꦶꦪꦺꦲꦶ ꦌꦏꦴꦧꦢ꧀ꦣꦁ ꦮꦶꦪ ꦏꦠ꧀ꦮꦴ ꦥꦠ꧀ꦮꦴ ꦄꦒ꧀ꦒꦲꦶꦠꦁ ꦄꦩꦸꦠꦁ, ꦄꦚ꧀ꦚꦠ꧀ꦫ ꦥꦚ꧀ꦕꦲꦶ ꦆꦤ꧀ꦢ꧀ꦫꦶꦪꦺꦲꦶ ꦱꦸꦢ꧀ꦣꦺꦤ ꦮꦶꦚ꧀ꦚꦴꦟꦺꦤꦺꦮ ꦄꦒ꧀ꦒꦲꦶꦠꦁ ꦄꦮꦶꦚ꧀ꦚꦴꦠꦤ꧀ꦠꦶ ꦮꦺꦢꦶꦠꦧ꧀ꦧꦁ. ꦥꦴꦭ꦳ꦶꦪꦁ ꦥꦤ ‘‘ꦄꦢꦶꦛ꧀ꦜꦁ ꦤꦴꦩ ꦤ ꦕꦏ꧀ꦑꦸꦤꦴ ꦢꦶꦛ꧀ꦜ’’ꦤ꧀ꦠꦶ ꦌꦮꦁ ꦎꦭ꦳ꦴꦫꦶꦏꦺꦤꦺꦮ ꦤꦪꦺꦤ ꦢꦺꦱꦤꦴ ꦏꦠꦴꦠꦶ. ꦢꦶꦛ꧀ꦜꦴꦢꦷꦱꦸ ꦕ ꦄꦠ꧀ꦠꦤꦴꦥꦶ ꦥꦫꦺꦤꦥꦶ ꦢꦶꦛ꧀ꦜꦁ ꦢꦶꦛ꧀ꦜꦩꦺꦮ. ꦌꦮꦁ ꦱꦸꦠꦩꦸꦠꦮꦶꦚ꧀ꦚꦴꦠꦴꦤꦷꦠꦶ ꦄꦪꦩꦺꦏꦺꦴ ꦥꦫꦶꦪꦴꦪꦺꦴ. ꦄꦥꦫꦺꦴ ꦤꦪꦺꦴ ꦪꦁ ꦄꦠ꧀ꦠꦤꦴ ꦢꦶꦛ꧀ꦜꦁ ꦢꦶꦛ꧀ꦜꦩꦺꦮ ꦠꦁ. ꦌꦱ ꦤꦪꦺꦴ ꦱꦸꦠꦴꦢꦷꦱꦸ. ꦪꦁ ꦥꦤ ꦥꦫꦺꦤ ꦢꦶꦛ꧀ꦜꦁ, ꦠꦁ ꦄꦠ꧀ꦠꦤꦴ ꦱꦸꦠꦛ꧀ꦜꦴꦤꦺ ꦠꦶꦛ꧀ꦜꦠꦶ. ꦌꦮꦁ ꦩꦸꦠꦴꦢꦷꦤꦶꦥꦶ.

꧔. ꦆꦢꦴꦤꦶ ꦠꦺꦱꦁ ꦄꦤꦫꦶꦪꦮꦺꦴꦲꦴꦫꦴꦤꦁ ꦮꦱꦺꦤ ꦄꦴꦥꦠ꧀ꦠꦶꦁ ꦄꦴꦫꦺꦴꦥꦺꦠ꧀ꦮꦴ ꦢꦱ꧀ꦱꦺꦤ꧀ꦠꦺꦴ ‘‘ꦠꦷꦲꦴꦏꦴꦫꦺꦲꦷ’’ꦠꦶꦄꦴꦢꦶꦩꦴꦲ. ꦠꦱ꧀ꦱꦠ꧀ꦡꦺꦴ ‘‘ꦠꦷꦲꦶ ꦄꦴꦏꦴꦫꦺꦲꦶ ꦥꦜꦩꦁ ꦙꦴꦤꦁ ꦱꦩꦴꦥꦗ꧀ꦗꦶꦤ꧀ꦠꦶ ꦱꦩ꧀ꦥꦗꦴꦤꦩꦸꦱꦴ ꦨꦟꦤ꧀ꦠꦱ꧀ꦱ ꦄꦴꦥꦠ꧀ꦠꦶ ꦥꦴꦫꦴꦗꦶꦏꦱ꧀ꦱꦴ’’ꦠꦶ ꦌꦮꦩꦴꦢꦶꦕꦠꦸꦠ꧀ꦡꦥꦴꦫꦴꦗꦶꦏꦥꦴꦭ꦳ꦶꦮꦟ꧀ꦟꦤꦴꦪꦁ ꦮꦸꦠ꧀ꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦺꦴ. ꦏꦺꦮꦭꦚ꧀ꦲꦶ ꦠꦠ꧀ꦡ ‘‘ꦥꦜꦩꦁ ꦙꦴꦤꦁ ꦱꦩꦴꦥꦗ꧀ꦗꦶ’’ꦤ꧀ꦠꦶ ꦆꦣ ‘‘ꦄꦢꦶꦛ꧀ꦜꦁ ꦢꦶꦛ꧀ꦜꦁ ꦩꦺ’’ꦠꦶ, ꦠꦠ꧀ꦡ ꦕ ‘‘ꦄꦴꦥꦠ꧀ꦠꦶ ꦥꦴꦫꦴꦗꦶꦏꦱ꧀ꦱꦴ’’ꦠꦶ ‘‘ꦆꦣ ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱꦴ’’ꦠꦶ ꦌꦮꦁ ꦮꦠ꧀ꦡꦸꦩꦠ꧀ꦠꦺ ꦄꦴꦥꦠ꧀ꦠꦶꦩꦠ꧀ꦠꦺ ꦕ ꦮꦶꦱꦺꦱꦺꦴ, ꦱꦺꦱꦁ ꦌꦏꦭꦏ꧀ꦑꦟꦩꦺꦮꦴꦠꦶ.

꧙. ꦠꦷꦲꦴꦏꦴꦫꦺꦲꦶ ꦢꦶꦛ꧀ꦜꦺ ꦮꦺꦩꦠꦶꦏꦺꦴꦠꦶꦄꦴꦢꦷꦤꦩ꧀ꦥꦶ ꦄꦠ꧀ꦡꦺꦴ ‘‘ꦢꦶꦛ꧀ꦜꦱ꧀ꦱ ꦲꦺꦴꦠꦶ ꦥꦴꦫꦴꦗꦶꦏꦁ ꦣꦩ꧀ꦩꦁ ꦄꦗ꧀ꦙꦴꦥꦗ꧀ꦗꦤ꧀ꦠꦺꦴ ꦢꦶꦛ꧀ꦜꦺ ꦮꦺꦩꦠꦶꦏꦺꦴ’’ꦠꦶ ꦌꦮꦩꦴꦢꦶꦢꦸꦛ꧀ꦜꦢꦺꦴꦱꦥꦴꦭ꦳ꦶꦮꦟ꧀ꦟꦤꦴꦪꦁ ꦮꦸꦠ꧀ꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦺꦴ. ꦥꦴꦭ꦳ꦶꦩꦠ꧀ꦠꦩꦺꦮ ꦲꦶ ꦌꦠ꧀ꦡ ꦮꦶꦱꦺꦱꦺꦴ, ꦄꦠ꧀ꦡꦺ ꦥꦤ ꦱꦡꦺꦫꦮꦴꦢꦺ ꦏꦶꦚ꧀ꦕꦶ ꦤꦴꦤꦴꦏꦫꦟꦁ ꦤꦠ꧀ꦡꦶ.

꧑꧑. ꦱꦲꦱꦴ ꦨꦟꦠꦷꦠꦶ ꦄꦮꦷꦩꦁꦱꦶꦠ꧀ꦮꦴ ꦄꦤꦸꦥꦣꦴꦫꦺꦠ꧀ꦮꦴ ꦮꦴ ꦮꦺꦒꦺꦤ ꦢꦶꦛ꧀ꦜꦩ꧀ꦥꦶ ‘‘ꦄꦢꦶꦛ꧀ꦜꦁ ꦩꦺ’’ꦠꦶ ꦨꦟꦠꦶ. ꦄꦚ꧀ꦚꦁ ꦨꦟꦶꦱ꧀ꦱꦴꦩꦷꦠꦶ ꦄꦚ꧀ꦚꦁ ꦨꦟꦠꦷꦠꦶ ꦩꦤ꧀ꦢꦠ꧀ꦠꦴ ꦗꦭ꦳ꦠ꧀ꦠꦴ ꦥꦏ꧀ꦑꦭꦤ꧀ꦠꦺꦴ ‘‘ꦕꦷꦮꦫ’’ꦤ꧀ꦠꦶ ꦮꦠ꧀ꦠꦧ꧀ꦧꦺ ‘‘ꦕꦷꦫ’’ꦤ꧀ꦠꦶ ꦄꦴꦢꦶꦁ ꦨꦟꦠꦶ. ꦪꦺꦴ ꦥꦤ ꦱꦴꦩꦟꦺꦫꦺꦤ ‘‘ꦄꦥꦶ ꦨꦤ꧀ꦠꦺ ꦩꦪ꧀ꦲꦁ ꦈꦥꦗ꧀ꦙꦴꦪꦁ ꦥꦱ꧀ꦱꦶꦠ꧀ꦡꦴ’’ꦠꦶ ꦮꦸꦠ꧀ꦠꦺꦴ ꦏꦺꦭ꦳ꦶꦁ ꦏꦸꦫꦸꦩꦴꦤꦺꦴ ‘‘ꦠꦮ ꦈꦥꦗ꧀ꦙꦴꦪꦺꦴ ꦢꦴꦫꦸꦱꦏꦛꦁ ꦪꦺꦴꦗꦺꦠ꧀ꦮꦴ ꦒꦠꦺꦴ ꦨꦮꦶꦱ꧀ꦱꦠꦷ’’ꦠꦶ ꦮꦴ ꦱꦶꦔ꧀ꦒꦴꦭꦱꦢ꧀ꦢꦁ ꦱꦸꦠ꧀ꦮꦴ ‘‘ꦏꦱ꧀ꦱꦴꦪꦁ ꦨꦤ꧀ꦠꦺ ꦱꦢ꧀ꦢꦺꦴ’’ꦠꦶ ꦮꦸꦠ꧀ꦠꦺꦴ ‘‘ꦩꦴꦠꦸꦪꦴ ꦠꦺ ꦪꦴꦤꦺꦤ ꦒꦕ꧀ꦖꦤ꧀ꦠꦶꦪꦴ ꦏꦢ꧀ꦢꦩꦺ ꦭꦒ꧀ꦒꦕꦏ꧀ꦏꦁ ꦈꦢ꧀ꦣꦫꦤ꧀ꦠꦴꦤꦁ ꦄꦪꦁ ꦱꦢ꧀ꦢꦺꦴ’’ꦠꦶ ꦮꦴ ꦌꦮꦁ ꦤꦺꦮ ꦢꦮꦴ ꦤ ꦫꦮꦴ ꦄꦚ꧀ꦚꦁ ꦨꦟꦠꦶ, ꦱꦺꦴ ꦄꦴꦥꦠ꧀ꦠꦶꦁ ꦄꦴꦥꦗ꧀ꦗꦠꦶꦪꦺꦮ. ꦄꦚ꧀ꦚꦴ ꦥꦹꦫꦟꦏꦡꦴ ꦤꦴꦩ ꦲꦺꦴꦠꦶ, ꦌꦏꦺꦴ ꦒꦴꦩꦺ ꦡꦺꦴꦏꦁ ꦠꦺꦭꦁ ꦭꦨꦶꦠ꧀ꦮꦴ ꦮꦶꦲꦴꦫꦁ ꦄꦴꦒꦠꦺꦴ ꦱꦴꦩꦟꦺꦫꦁ ꦨꦟꦠꦶ – ‘‘ꦠ꧀ꦮꦁ ꦄꦗ꧀ꦗ ꦏꦸꦲꦶꦁ ꦒꦠꦺꦴ, ꦒꦴꦩꦺꦴ ꦌꦏꦠꦺꦭꦺꦴ ꦄꦲꦺꦴꦱꦷ’’ꦠꦶ ꦮꦴ ꦥꦕ꧀ꦖꦶꦏꦴꦪ ꦜꦥꦶꦠꦁ ꦥꦹꦮꦑꦟ꧀ꦝꦁ ꦭꦨꦶꦠ꧀ꦮꦴ ‘‘ꦄꦗ꧀ꦗ ꦒꦴꦩꦺ ꦥꦕ꧀ꦖꦶꦏꦴꦲꦶ ꦥꦹꦮꦺ ꦕꦴꦫꦺꦱꦸ’’ꦤ꧀ꦠꦶ ꦮꦴ, ꦄꦪꦁ ꦩꦸꦱꦴꦮꦴꦢꦺꦴꦮ ꦲꦺꦴꦠꦶ. ꦱꦺꦱꦁ ꦈꦠ꧀ꦠꦴꦤꦩꦺꦮꦴꦠꦶ.

ꦠꦶꦱꦩꦸꦛ꧀ꦜꦴꦤꦁ – ꦏꦴꦪꦕꦶꦠ꧀ꦠꦠꦺꦴ ꦮꦴꦕꦴꦕꦶꦠ꧀ꦠꦠꦺꦴ ꦏꦴꦪꦮꦴꦕꦴꦕꦶꦠ꧀ꦠꦠꦺꦴ ꦕ ꦱꦩꦸꦛ꧀ꦜꦴꦠꦶ, ꦏꦶꦫꦶꦪꦁ, ꦱꦚ꧀ꦚꦴꦮꦶꦩꦺꦴꦏ꧀ꦑꦁ, ꦱꦕꦶꦠ꧀ꦠꦏꦁ, ꦭꦺꦴꦏꦮꦗ꧀ꦗꦁ, ꦏꦴꦪꦏꦩ꧀ꦩꦁ, ꦮꦕꦷꦏꦩ꧀ꦩꦁ, ꦄꦏꦸꦱꦭꦕꦶꦠ꧀ꦠꦁ, ꦠꦶꦮꦺꦢꦤꦤ꧀ꦠꦶ.

ꦩꦸꦱꦴꦮꦴꦢꦱꦶꦏ꧀ꦑꦴꦥꦢꦁ ꦥꦜꦩꦁ.

꧒. ꦎꦩꦱꦮꦴꦢꦱꦶꦏ꧀ꦑꦴꦥꦢꦮꦟ꧀ꦟꦤꦴ

꧑꧒. ꦢꦸꦠꦶꦪꦱꦶꦏ꧀ꦑꦴꦥꦢꦺ ꦎꦩꦱꦤ꧀ꦠꦷꦠꦶ ꦎꦮꦶꦗ꧀ꦙꦤ꧀ꦠꦶ. ꦑꦸꦁꦱꦺꦤ꧀ꦠꦷꦠꦶ ꦄꦏ꧀ꦏꦺꦴꦱꦤ꧀ꦠꦶ. ꦮꦩ꧀ꦨꦺꦤ꧀ꦠꦷꦠꦶ ꦥꦣꦁꦱꦺꦤ꧀ꦠꦶ.

꧑꧓. ꦨꦹꦠꦥꦸꦧ꧀ꦧꦤ꧀ꦠꦶ ꦆꦢꦁ ꦮꦠ꧀ꦡꦸꦁ ꦨꦒꦮꦴ ꦎꦩꦱꦮꦴꦢꦒꦫꦲꦟꦠ꧀ꦡꦁ ꦄꦴꦲꦫꦶ. ꦤꦤ꧀ꦢꦶꦮꦶꦱꦴꦭꦺꦴ ꦤꦴꦩꦴꦠꦶ ꦤꦤ꧀ꦢꦷꦠꦶ ꦠꦱ꧀ꦱ ꦧꦭꦷꦧꦢ꧀ꦢꦱ꧀ꦱ ꦤꦴꦩꦁ, ꦮꦶꦱꦴꦟꦴꦤꦶ ꦥꦤꦱ꧀ꦱ ꦮꦶꦱꦴꦭꦴꦤꦶ, ꦠꦱ꧀ꦩꦴ ‘‘ꦤꦤ꧀ꦢꦶꦮꦶꦱꦴꦭꦺꦴ’’ꦠꦶ ꦮꦸꦕ꧀ꦕꦠꦶ. ꦧꦺꦴꦣꦶꦱꦠ꧀ꦠꦺꦴ ꦠꦺꦤ ꦱꦩꦪꦺꦤ ꦤꦤ꧀ꦢꦶꦮꦶꦱꦴꦭꦺꦴ ꦤꦴꦩ ꦲꦺꦴꦠꦶ. ꦧ꧀ꦫꦴꦲ꧀ꦩꦟꦺꦴ ꦠꦁ ꦪꦴꦒꦸꦨꦠ꧀ꦠꦴꦢꦷꦲꦶ ꦄꦠꦶꦮꦶꦪ ꦥꦺꦴꦱꦺꦱꦶ. ꦄꦡ ꦱꦺꦴ ꦧ꧀ꦫꦴꦲ꧀ꦩꦟꦁ ꦄꦤꦸꦏꦩ꧀ꦥꦩꦴꦤꦺꦴ ‘‘ꦒꦕ꧀ꦖ ꦠ꧀ꦮ’’ꦤ꧀ꦠꦶꦄꦴꦢꦶꦩꦴꦲ. ꦠꦠ꧀ꦡꦺꦮ ꦄꦛ꧀ꦜꦴꦱꦷꦠꦶ ꦄꦲꦺꦠꦸꦏꦥꦛꦶꦱꦤ꧀ꦣꦶꦏꦴꦭꦺꦥꦶ ꦥꦫꦑꦸꦁꦱꦤꦁ ꦄꦩꦤꦴꦥꦠꦺꦴꦪꦺꦮ ꦥꦕ꧀ꦕꦺꦱꦶ, ꦠꦱ꧀ꦩꦴ ꦧ꧀ꦫꦴꦲ꧀ꦩꦟꦱ꧀ꦱ ꦢꦺꦴꦱꦁ ꦢꦱ꧀ꦱꦺꦠꦸꦏꦴꦩꦺꦴ ꦄꦛ꧀ꦜꦴꦱꦶ. ꦱꦏꦛꦱꦠꦁ ꦄꦠꦶꦧꦢ꧀ꦣꦁ ꦥꦮꦛ꧀ꦛꦺꦱꦷꦠꦶ ꦥꦛꦶꦥꦴꦛꦶꦪꦴ ꦜꦥꦺꦠ꧀ꦮꦴ ꦲꦺꦛ꧀ꦜꦴꦫꦸꦏ꧀ꦑꦺ ꦢꦠ꧀ꦮꦴ ꦌꦏꦴꦧꦢ꧀ꦣꦁ ꦏꦠ꧀ꦮꦴ ꦩꦸꦒ꧀ꦒꦩꦴꦱꦮꦴꦭꦸꦏꦴꦢꦷꦲꦶ ꦥꦸꦟ꧀ꦟꦁ ꦱꦏꦛꦱꦠꦁ ꦥꦮꦛ꧀ꦛꦺꦤ꧀ꦠꦺꦴ, ꦏꦶꦚ꧀ꦕꦴꦥꦶ ꦥꦸꦧ꧀ꦧꦺ ꦥꦠꦶꦛ꧀ꦜꦶꦠꦴꦫꦥ꧀ꦥꦢꦺꦱꦁ ꦥꦸꦤ ꦄꦫꦺ ꦥꦠ꧀ꦠꦺ ꦥꦮꦛ꧀ꦛꦶꦠꦁ ꦲꦺꦴꦠꦶ, ꦧꦺꦴꦣꦶꦱꦠ꧀ꦠꦺꦴ ꦥꦤ ꦥꦸꦫꦶꦩꦱꦏꦛꦺꦤ ꦥꦠꦶꦛ꧀ꦜꦶꦠꦛ꧀ꦜꦴꦤꦺ ꦥꦕ꧀ꦖꦶꦩꦱꦏꦛꦁ ꦥꦠꦶꦛ꧀ꦜꦴꦥꦺꦠꦸꦁ ꦱꦏꦛꦱꦠꦥ꧀ꦥꦩꦴꦟꦁ ꦥꦢꦺꦱꦁ ꦥꦮꦛ꧀ꦛꦺꦱꦶ. ꦧꦺꦴꦣꦶꦱꦠ꧀ꦠꦴꦤꦚ꧀ꦲꦶ ꦱꦶꦡꦶꦭꦏꦫꦟꦁ ꦤꦴꦩ ꦤꦠ꧀ꦡꦶ. ꦠꦺꦤ ꦕꦠ꧀ꦠꦩꦤꦺꦴ ꦄꦲꦹꦠꦶ ꦠꦺꦤ ꦧ꧀ꦫꦴꦲ꧀ꦩꦟꦱ꧀ꦱ ꦣꦤꦭꦴꦨꦺꦤ ꦄꦠ꧀ꦠꦤꦺꦴ ꦏꦩ꧀ꦩꦺꦤ ꦕ ꦱꦺꦴ ꦤꦤ꧀ꦢꦶꦮꦶꦱꦴꦭꦺꦴ ꦄꦠ꧀ꦠꦩꦤꦺꦴ ꦄꦲꦺꦴꦱꦶ.

꧑꧕. ꦄꦏ꧀ꦏꦺꦴꦱꦺꦤꦥꦷꦠꦶ ꦌꦠ꧀ꦡ ꦥꦤ ꦪꦱ꧀ꦩꦴ ꦥꦫꦠꦺꦴ ‘‘ꦢ꧀ꦮꦺ ꦄꦏ꧀ꦏꦺꦴꦱꦴ – ꦲꦷꦤꦺꦴ ꦕ ꦄꦏ꧀ꦏꦺꦴꦱꦺꦴ ꦈꦏ꧀ꦏꦛ꧀ꦜꦺꦴ ꦕ ꦄꦏ꧀ꦏꦺꦴꦱꦺꦴ’’ꦠꦶ ꦮꦶꦨꦗꦶꦠꦸꦏꦴꦩꦺꦴ, ꦠꦱ꧀ꦩꦴ ꦪꦡꦴ ꦥꦸꦧ꧀ꦧꦺ ‘‘ꦲꦷꦤꦺꦤꦥꦶ ꦄꦏ꧀ꦏꦺꦴꦱꦺꦤ ꦑꦸꦁꦱꦺꦤ꧀ꦠꦷ’’ꦠꦶ ꦮꦸꦠ꧀ꦠꦁ; ꦌꦮꦁ ꦄꦮꦠ꧀ꦮꦴ ‘‘ꦄꦏ꧀ꦏꦺꦴꦱꦺꦤ’’ ꦆꦕ꧀ꦕꦺꦮꦩꦴꦲ. ꦮꦺꦤꦗꦴꦠꦷꦠꦶ ꦠꦕ꧀ꦖꦏꦗꦴꦠꦶ; ꦮꦺꦟꦸꦏꦴꦫꦗꦴꦠꦷꦠꦶꦥꦶ ꦮꦢꦤ꧀ꦠꦶ. ꦤꦺꦱꦴꦢꦗꦴꦠꦷꦠꦶ ꦩꦶꦒꦭꦸꦢ꧀ꦢꦏꦴꦢꦶꦗꦴꦠꦶ.

ꦫꦡꦏꦴꦫꦗꦴꦠꦷꦠꦶ ꦕꦩ꧀ꦩꦏꦴꦫꦗꦴꦠꦶ. ꦥꦸꦏ꧀ꦏꦸꦱꦗꦴꦠꦷꦠꦶ ꦥꦸꦥ꧀ꦦꦖꦝ꧀ꦝꦏꦗꦴꦠꦶ. ꦄꦮꦏꦟ꧀ꦟꦏꦴꦢꦶ ꦢꦴꦱꦴꦤꦁ ꦤꦴꦩꦁ ꦲꦺꦴꦠꦶ; ꦠꦱ꧀ꦩꦴ ꦲꦷꦤꦁ. ꦎꦚ꧀ꦚꦴꦠꦤ꧀ꦠꦶ ꦄꦮꦚ꧀ꦚꦴꦠꦁ; ‘‘ꦈꦚ꧀ꦚꦴꦠ’’ꦤ꧀ꦠꦶꦥꦶ ꦥꦜꦤ꧀ꦠꦶ. ꦄꦮꦚ꧀ꦚꦴꦠꦤ꧀ꦠꦶ ꦮꦩ꧀ꦨꦺꦠ꧀ꦮꦴ ꦚꦴꦠꦁ. ꦲꦷꦭ꦳ꦶꦠꦤ꧀ꦠꦶ ꦗꦶꦒꦸꦕ꧀ꦖꦶꦠꦁ. ꦥꦫꦶꦨꦹꦠꦤ꧀ꦠꦶ ꦏꦶꦩꦺꦠꦺꦤꦴꦠꦶꦠꦶ ꦥꦫꦶꦨꦮꦏꦠꦁ. ꦄꦕꦶꦠ꧀ꦠꦷꦏꦠꦤ꧀ꦠꦶ ꦤ ꦒꦫꦸꦏꦠꦁ.

ꦏꦺꦴꦛ꧀ꦜꦏꦏꦩ꧀ꦩꦤ꧀ꦠꦶ ꦠꦕ꧀ꦖꦏꦏꦩ꧀ꦩꦁ. ꦩꦸꦢ꧀ꦢꦴꦠꦶ ꦲꦠ꧀ꦡꦩꦸꦢ꧀ꦢꦴꦒꦟꦤꦴ. ꦒꦟꦤꦴꦠꦶ ꦄꦕ꧀ꦖꦶꦢ꧀ꦢꦏꦴꦢꦶꦄꦮꦱꦺꦱꦒꦟꦤꦴ. ꦭꦺꦑꦴꦠꦶ ꦄꦏ꧀ꦑꦫꦭꦺꦑꦴ. ꦩꦣꦸꦩꦺꦲꦴꦧꦴꦣꦺꦴ ꦮꦺꦢꦤꦴꦪ ꦄꦨꦴꦮꦠꦺꦴ ‘‘ꦈꦏ꧀ꦏꦛ꧀ꦜꦺꦴ’’ꦠꦶ ꦮꦸꦠ꧀ꦠꦺꦴ. ꦥꦴꦛꦶꦏꦔ꧀ꦑꦴꦠꦶ ꦆꦕ꧀ꦖꦶꦠꦧ꧀ꦧꦴ. ꦪꦏꦴꦫꦺꦤ ꦮꦴ ꦨꦏꦴꦫꦺꦤ ꦮꦴꦠꦶ ꦪꦏꦴꦫꦨꦏꦴꦫꦺ ꦪꦺꦴꦗꦺꦠ꧀ꦮꦴ ꦪꦺꦴ ꦄꦏ꧀ꦏꦺꦴꦱꦺꦴ. ꦏꦴꦛꦏꦺꦴꦛꦕꦶꦏꦴꦪ ꦮꦴꦠꦶ ‘‘ꦏꦴꦛ’’ꦤ꧀ꦠꦶ ꦥꦸꦫꦶꦱꦤꦶꦩꦶꦠ꧀ꦠꦁ, ‘‘ꦏꦺꦴꦛꦕꦶꦏꦴ’’ꦠꦶ ꦆꦠ꧀ꦡꦶꦤꦶꦩꦶꦠ꧀ꦠꦁ; ꦌꦠꦺꦲꦶ ꦮꦴ ꦪꦺꦴ ꦄꦏ꧀ꦏꦺꦴꦱꦺꦴ, ꦌꦱꦺꦴ ꦲꦷꦤꦺꦴ ꦤꦴꦩ ꦄꦏ꧀ꦏꦺꦴꦱꦺꦴꦠꦶ.

꧑꧖. ꦆꦢꦴꦤꦶ ꦠꦺꦱꦁ ꦗꦴꦠꦶꦄꦴꦢꦷꦤꦁ ꦥꦨꦺꦢꦮꦱꦺꦤ ꦄꦴꦥꦠ꧀ꦠꦶꦁ ꦄꦴꦫꦺꦴꦥꦺꦠ꧀ꦮꦴ ꦢꦱ꧀ꦱꦺꦤ꧀ꦠꦺꦴ ‘‘ꦈꦥꦱꦩ꧀ꦥꦤ꧀ꦤꦺꦴ ꦈꦥꦱꦩ꧀ꦥꦤ꧀ꦤ’’ꦤ꧀ꦠꦶꦄꦴꦢꦶꦩꦴꦲ. ꦠꦠ꧀ꦡ ꦑꦸꦁꦱꦺꦠꦸꦏꦴꦩꦺꦴ ꦮꦩ꧀ꦨꦺꦠꦸꦏꦴꦩꦺꦴ ꦩꦔ꧀ꦏꦸꦏꦠ꧀ꦠꦸꦏꦴꦩꦺꦴꦠꦶ ꦄꦏ꧀ꦏꦺꦴꦱꦶꦠꦸꦏꦴꦩꦺꦴ ꦥꦣꦁꦱꦶꦠꦸꦏꦴꦩꦺꦴ ꦒꦫꦲꦶꦠꦸꦏꦴꦩꦺꦴ ꦤꦶꦠ꧀ꦠꦺꦗꦁ ꦏꦠ꧀ꦠꦸꦏꦴꦩꦺꦴꦠꦶ ꦄꦠ꧀ꦡꦺꦴ. ꦲꦷꦤꦺꦤ ꦲꦷꦤꦤ꧀ꦠꦶ ꦲꦷꦤꦺꦤ ꦗꦴꦠꦶꦮꦕꦤꦺꦤ ꦲꦷꦤꦗꦴꦠꦶꦏꦁ. ꦌꦠꦺꦤ ꦈꦥꦴꦪꦺꦤ ꦱꦧ꧀ꦧꦥꦢꦺꦱꦸ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ.

ꦌꦠ꧀ꦡ ꦕ ꦲꦷꦤꦺꦤ ꦲꦷꦤꦁ ꦮꦢꦤ꧀ꦠꦺꦴ ꦏꦶꦚ꧀ꦕꦴꦥꦶ ꦱꦕ꧀ꦕꦁ ꦮꦢꦠꦶ, ꦎꦩꦱꦶꦠꦸꦏꦴꦩꦠꦴꦪ ꦥꦤꦱ꧀ꦱ ꦮꦴꦕꦴꦪ ꦮꦴꦕꦴꦪ ꦥꦴꦕꦶꦠ꧀ꦠꦶꦪꦁ. ꦈꦏ꧀ꦏꦛ꧀ꦜꦺꦤ ꦲꦷꦤꦁ ꦮꦢꦤ꧀ꦠꦺꦴ ꦕ ꦏꦶꦚ꧀ꦕꦴꦥꦶ ꦄꦭꦶꦏꦁ ꦨꦟꦠꦶ, ꦎꦩꦱꦶꦠꦸꦏꦴꦩꦠꦴꦪ ꦥꦤ ꦆꦩꦶꦤꦴꦮ ꦱꦶꦏ꧀ꦑꦴꦥꦢꦺꦤ ꦥꦴꦕꦶꦠ꧀ꦠꦶꦪꦁ ꦄꦴꦥꦗ꧀ꦗꦠꦶ, ꦤ ꦥꦸꦫꦶꦩꦺꦤ. ꦪꦺꦴꦥꦶ ‘‘ꦄꦠꦶꦕꦟ꧀ꦝꦴꦭꦺꦴꦱꦶ, ꦄꦠꦶꦧ꧀ꦫꦴꦲ꧀ꦩꦟꦺꦴꦱꦶ, ꦢꦸꦛ꧀ꦜꦕꦟ꧀ꦝꦴꦭꦺꦴꦱꦶ, ꦢꦸꦛ꧀ꦜꦧ꧀ꦫꦴꦲ꧀ꦩꦟꦺꦴꦱꦷ’’ꦠꦶꦄꦴꦢꦷꦤꦶ ꦮꦢꦠꦶ, ꦱꦺꦴꦥꦶ ꦄꦴꦥꦠ꧀ꦠꦶꦪꦴ ꦏꦴꦫꦺꦠꦧ꧀ꦧꦺꦴ.

꧒꧖. ꦱꦤ꧀ꦠꦶ ꦆꦣꦺꦏꦕ꧀ꦕꦺꦠꦶ ꦮꦴꦫꦺ ꦥꦤ ꦥꦫꦶꦲꦫꦶꦠ꧀ꦮꦴ ꦮꦸꦠ꧀ꦠꦨꦴꦮꦺꦤ ꦢꦸꦏ꧀ꦏꦛꦁ. ꦌꦱꦺꦮ ꦤꦪꦺꦴ ꦪꦺ ꦤꦹꦤ…ꦥꦺ… ꦤ ꦩꦪꦤ꧀ꦠꦶ ꦮꦴꦫꦺꦱꦸꦥꦶ. ꦄꦤꦸꦥꦱꦩ꧀ꦥꦤ꧀ꦤꦺ ꦥꦤ ꦕꦠꦹꦱꦸꦥꦶ ꦮꦴꦫꦺꦱꦸ ꦢꦸꦏ꧀ꦏꦛꦩꦺꦮ. ꦕꦺꦴꦫꦺꦴꦱꦶ ꦒꦟ꧀ꦜꦶꦨꦺꦢꦏꦺꦴꦱꦷꦠꦶꦄꦴꦢꦶꦮꦕꦤꦺꦲꦶ ꦥꦤ ꦈꦥꦱꦩ꧀ꦥꦤ꧀ꦤꦺꦥꦶ ꦄꦤꦸꦥꦩ꧀ꦥꦤ꧀ꦤꦺꦥꦶ ꦱꦧ꧀ꦧꦮꦴꦫꦺꦱꦸ ꦢꦸꦏ꧀ꦏꦛꦩꦺꦮ. ꦢꦮꦏꦩ꧀ꦪꦠꦴꦪ ꦥꦤ ꦈꦥꦱꦩ꧀ꦥꦤ꧀ꦤꦺꦥꦶ ꦄꦤꦸꦥꦱꦩ꧀ꦥꦤ꧀ꦤꦺꦥꦶ ꦱꦧ꧀ꦧꦮꦴꦫꦺꦱꦸ ꦢꦸꦧ꧀ꦨꦴꦱꦶꦠꦁ. ꦢꦮꦏꦩ꧀ꦪꦠꦴ ꦤꦴꦩ ꦏꦺꦭ꦳ꦶꦲꦱꦴꦣꦶꦥ꧀ꦥꦴꦪꦠꦴ. ꦆꦩꦱ꧀ꦩꦶꦚ꧀ꦕ ꦱꦶꦏ꧀ꦑꦴꦥꦢꦺ ꦜꦥꦺꦠ꧀ꦮꦴ ꦨꦶꦏ꧀ꦑꦸꦁ ꦨꦶꦏ꧀ꦑꦸꦤꦷꦄꦴꦢꦪꦺꦴ ꦱꦧ꧀ꦧꦱꦠ꧀ꦠꦴ ꦄꦤꦸꦥꦱꦩ꧀ꦥꦤ꧀ꦤꦛ꧀ꦜꦴꦤꦺ ꦜꦶꦠꦴꦠꦶ ꦮꦺꦢꦶꦠꦧ꧀ꦧꦴ.

꧓꧕. ꦄꦠ꧀ꦡꦥꦸꦫꦺꦏ꧀ꦑꦴꦫꦱ꧀ꦱꦴꦠꦶꦄꦴꦢꦷꦱꦸ ꦥꦴꦭ꦳ꦶꦪꦴ ꦄꦠ꧀ꦡꦁ ꦮꦟ꧀ꦟꦪꦤ꧀ꦠꦺꦴ ꦄꦠ꧀ꦡꦥꦸꦫꦺꦏ꧀ꦑꦴꦫꦺꦴ; ꦥꦴꦭ꦳ꦶꦁ ꦮꦴꦕꦺꦤ꧀ꦠꦺꦴ ꦣꦩ꧀ꦩꦥꦸꦫꦺꦏ꧀ꦑꦴꦫꦺꦴ; ꦄꦤꦸꦱꦶꦛ꧀ꦜꦶꦪꦁ ꦜꦠ꧀ꦮꦴ ‘‘ꦆꦢꦴꦤꦶꦥꦶ ꦕꦟ꧀ꦝꦴꦭꦺꦴꦱꦶ, ꦥꦴꦥꦁ ꦩꦴ ꦄꦏꦴꦱꦶ, ꦩꦴ ꦠꦩꦺꦴ ꦠꦩꦥꦫꦴꦪꦟꦺꦴ ꦄꦲꦺꦴꦱꦷ’’ꦠꦶꦄꦴꦢꦶꦤꦴ ꦤꦪꦺꦤ ꦏꦡꦺꦤ꧀ꦠꦺꦴ ꦄꦤꦸꦱꦴꦱꦤꦷꦥꦸꦫꦺꦏ꧀ꦑꦴꦫꦺꦴ ꦤꦴꦩꦴꦠꦶ ꦮꦺꦢꦶꦠꦧ꧀ꦧꦺꦴ. ꦱꦺꦱꦁ ꦈꦠ꧀ꦠꦴꦤꦩꦺꦮ.

ꦠꦶꦱꦩꦸꦛ꧀ꦜꦴꦤꦁ – ꦏꦴꦪꦕꦶꦠ꧀ꦠꦠꦺꦴ ꦮꦴꦕꦴꦕꦶꦠ꧀ꦠꦠꦺꦴ ꦏꦴꦪꦮꦴꦕꦴꦕꦶꦠ꧀ꦠꦠꦺꦴ ꦕ ꦱꦩꦸꦛ꧀ꦜꦴꦠꦶ. ꦏꦶꦫꦶꦪꦁ, ꦱꦚ꧀ꦚꦴꦮꦶꦩꦺꦴꦏ꧀ꦑꦁ, ꦱꦕꦶꦠ꧀ꦠꦏꦁ, ꦭꦺꦴꦏꦮꦗ꧀ꦗꦁ, ꦏꦴꦪꦏꦩ꧀ꦩꦁ, ꦮꦕꦷꦏꦩ꧀ꦩꦁ, ꦄꦏꦸꦱꦭꦕꦶꦠ꧀ꦠꦁ, ꦢꦸꦏ꧀ꦑꦮꦺꦢꦤꦤ꧀ꦠꦶ. ꦢꦸꦧ꧀ꦨꦴꦱꦶꦠꦴꦥꦠ꧀ꦠꦶ ꦥꦤꦺꦠ꧀ꦡ ꦮꦴꦕꦴꦕꦶꦠ꧀ꦠꦠꦺꦴ ꦱꦩꦸꦛ꧀ꦜꦴꦠꦶ, ꦏꦶꦫꦶꦪꦁ, ꦱꦚ꧀ꦚꦴꦮꦶꦩꦺꦴꦏ꧀ꦑꦁ, ꦱꦕꦶꦠ꧀ꦠꦏꦁ, ꦄꦏꦸꦱꦭꦕꦶꦠ꧀ꦠꦁ, ꦢ꧀ꦮꦶꦮꦺꦢꦤꦁ ꦱꦸꦑꦴ ꦕ ꦩꦗ꧀ꦙꦠ꧀ꦠꦴ ꦕꦴꦠꦶ.

ꦎꦩꦱꦮꦴꦢꦱꦶꦏ꧀ꦑꦴꦥꦢꦁ ꦢꦸꦠꦶꦪꦁ.

꧓. ꦥꦺꦱꦸꦚ꧀ꦚꦱꦶꦏ꧀ꦑꦴꦥꦢꦮꦟ꧀ꦟꦤꦴ

꧓꧖. ꦠꦠꦶꦪꦱꦶꦏ꧀ꦑꦴꦥꦢꦺ – ꦨꦟ꧀ꦝꦤꦗꦴꦠꦴꦤꦤ꧀ꦠꦶ ꦱꦚ꧀ꦗꦴꦠꦨꦟ꧀ꦝꦤꦴꦤꦁ. ꦨꦟ꧀ꦝꦤꦤ꧀ꦠꦶ ꦏꦭꦲꦱ꧀ꦱ ꦥꦸꦧ꧀ꦧꦨꦴꦒꦺꦴ, ‘‘ꦆꦩꦶꦤꦴ ꦕ ꦆꦩꦶꦤꦴ ꦕ ꦆꦢꦁ ꦏꦠꦁ; ꦌꦮꦁ ꦮꦸꦠ꧀ꦠꦺ ꦌꦮꦁ ꦮꦏ꧀ꦑꦴꦩꦴ’’ꦠꦶꦄꦴꦢꦶꦏꦁ ꦱꦏꦱꦏꦥꦏ꧀ꦑꦺ ꦱꦩ꧀ꦩꦤ꧀ꦠꦤꦁ. ꦏꦭꦲꦺꦴꦠꦶ ꦄꦴꦥꦠ꧀ꦠꦶꦒꦴꦩꦶꦏꦺꦴ ꦏꦴꦪꦮꦴꦕꦴꦮꦷꦠꦶꦏ꧀ꦏꦩꦺꦴ. ꦮꦶꦮꦴꦢꦺꦴꦠꦶ ꦮꦶꦒ꧀ꦒꦴꦲꦶꦏꦏꦡꦴ. ꦠꦁ ꦮꦶꦮꦴꦢꦁ ꦄꦴꦥꦤ꧀ꦤꦴꦤꦁ ꦮꦶꦮꦴꦢꦴꦥꦤ꧀ꦤꦴꦤꦁ. ꦥꦺꦱꦸꦚ꧀ꦚꦤ꧀ꦠꦶ ꦥꦶꦱꦸꦟꦮꦴꦕꦁ, ꦥꦶꦪꦨꦴꦮꦱ꧀ꦱ ꦱꦸꦚ꧀ꦚꦏꦫꦟꦮꦴꦕꦤ꧀ꦠꦶ ꦮꦸꦠ꧀ꦠꦁ ꦲꦺꦴꦠꦶ.

꧓꧗. ꦨꦶꦏ꧀ꦑꦸꦥꦺꦱꦸꦚ꧀ꦚꦺꦠꦶ ꦨꦶꦏ꧀ꦑꦹꦤꦁ ꦥꦺꦱꦸꦚ꧀ꦚꦺ; ꦨꦶꦏ꧀ꦑꦸꦠꦺꦴ ꦱꦸꦠ꧀ꦮꦴ ꦨꦶꦏ꧀ꦑꦸꦤꦴ ꦨꦶꦏ꧀ꦑꦸꦱ꧀ꦱ ꦈꦥꦱꦁꦲꦛꦥꦺꦱꦸꦚ꧀ꦚꦺꦠꦶ ꦄꦠ꧀ꦡꦺꦴ.

꧓꧘. ꦢ꧀ꦮꦷꦲꦴꦏꦴꦫꦺꦲꦷꦠꦶ ꦢ꧀ꦮꦷꦲꦶ ꦏꦴꦫꦟꦺꦲꦶ. ꦥꦶꦪꦏꦩ꧀ꦪꦱ꧀ꦱ ꦮꦴꦠꦶ ‘‘ꦌꦮꦁ ꦄꦲꦁ ꦌꦠꦱ꧀ꦱ ꦥꦶꦪꦺꦴ ꦨꦮꦶꦱ꧀ꦱꦴꦩꦷ’’ꦠꦶ ꦄꦠ꧀ꦠꦤꦺꦴ ꦥꦶꦪꦨꦴꦮꦁ ꦥꦠ꧀ꦡꦪꦩꦴꦤꦱ꧀ꦱ ꦮꦴ. ꦨꦺꦢꦴꦣꦶꦥ꧀ꦥꦴꦪꦱ꧀ꦱ ꦮꦴꦠꦶ ‘‘ꦌꦮꦩꦪꦁ ꦌꦠꦺꦤ ꦱꦢ꧀ꦣꦶꦁ ꦨꦶꦗ꧀ꦗꦶꦱ꧀ꦱꦠꦷ’’ꦠꦶ ꦥꦫꦱ꧀ꦱ ꦥꦫꦺꦤ ꦨꦺꦢꦁ ꦆꦕ꧀ꦖꦤ꧀ꦠꦱ꧀ꦱ ꦮꦴ. ꦗꦴꦠꦶꦠꦺꦴꦥꦷꦠꦶꦄꦴꦢꦶ ꦱꦧ꧀ꦧꦁ ꦥꦸꦫꦶꦩꦱꦶꦏ꧀ꦑꦴꦥꦢꦺ ꦮꦸꦠ꧀ꦠꦤꦪꦩꦺꦮ. ꦆꦣꦴꦥꦶ ꦨꦶꦏ꧀ꦑꦸꦤꦶꦁ ꦄꦴꦢꦶꦁ ꦏꦠ꧀ꦮꦴ ꦱꦧ꧀ꦧꦺ ꦄꦤꦸꦥꦱꦩ꧀ꦥꦤ꧀ꦤꦴ ꦤꦴꦩ.

ꦤ ꦥꦶꦪꦏꦩ꧀ꦪꦱ꧀ꦱ ꦤ ꦨꦺꦢꦴꦣꦶꦥ꧀ꦥꦴꦪꦱ꧀ꦱꦴꦠꦶ ꦌꦏꦁ ꦄꦏ꧀ꦏꦺꦴꦱꦤ꧀ꦠꦁ ꦌꦏꦚ꧀ꦕ ꦑꦩꦤ꧀ꦠꦁ ꦢꦶꦱ꧀ꦮꦴ ‘‘ꦄꦲꦺꦴ ꦤꦶꦭ꧀ꦭꦗ꧀ꦗꦺꦴ, ꦇꦢꦶꦱꦩ꧀ꦥꦶ ꦤꦴꦩ ꦨꦮꦤ꧀ꦠꦁ ꦥꦸꦤ ꦮꦠ꧀ꦠꦧ꧀ꦧꦁ ꦩꦚ꧀ꦚꦶꦱ꧀ꦱꦠꦷ’’ꦠꦶ ꦌꦮꦁ ꦏꦺꦮꦭꦁ ꦥꦴꦥꦒꦫꦲꦶꦠꦴꦪ ꦨꦟꦤ꧀ꦠꦱ꧀ꦱ ꦄꦤꦴꦥꦠ꧀ꦠꦶ. ꦱꦺꦱꦁ ꦈꦠ꧀ꦠꦴꦤꦠ꧀ꦡꦩꦺꦮ. ꦠꦶꦱꦩꦸꦛ꧀ꦜꦴꦤꦁ – ꦏꦴꦪꦕꦶꦠ꧀ꦠꦠꦺꦴ ꦮꦴꦕꦴꦕꦶꦠ꧀ꦠꦠꦺꦴ ꦏꦴꦪꦮꦴꦕꦴꦕꦶꦠ꧀ꦠꦠꦺꦴ ꦕ ꦱꦩꦸꦛ꧀ꦜꦴꦠꦶ, ꦏꦶꦫꦶꦪꦁ, ꦱꦚ꧀ꦚꦴꦮꦶꦩꦺꦴꦏ꧀ꦑꦁ, ꦱꦕꦶꦠ꧀ꦠꦏꦁ, ꦭꦺꦴꦏꦮꦗ꧀ꦗꦁ, ꦏꦴꦪꦏꦩ꧀ꦩꦁ, ꦮꦕꦷꦏꦩ꧀ꦩꦁ, ꦄꦏꦸꦱꦭꦕꦶꦠ꧀ꦠꦁ, ꦠꦶꦮꦺꦢꦤꦤ꧀ꦠꦶ.

ꦥꦺꦱꦸꦚ꧀ꦚꦱꦶꦏ꧀ꦑꦴꦥꦢꦁ ꦠꦠꦶꦪꦁ.

꧔. ꦥꦢꦱꦺꦴꦣꦩ꧀ꦩꦱꦶꦏ꧀ꦑꦴꦥꦢꦮꦟ꧀ꦟꦤꦴ

꧔꧔. ꦕꦠꦸꦠ꧀ꦡꦱꦶꦏ꧀ꦑꦴꦥꦢꦺ – ꦄꦥ꧀ꦥꦠꦶꦱ꧀ꦱꦴꦠꦶ ꦄꦥ꧀ꦥꦠꦶꦱ꧀ꦱꦮꦴ. ꦈꦥꦴꦱꦏꦴꦠꦶ ꦮꦸꦠ꧀ꦠꦺ ꦮꦕꦤꦩ꧀ꦥꦶ ꦤ ꦱꦺꦴꦠꦸꦏꦴꦩꦴ; ꦄꦤꦴꦢꦫꦴꦠꦶ ꦄꦠ꧀ꦡꦺꦴ. ꦄꦥ꧀ꦥꦠꦶꦱ꧀ꦱꦪꦴ ꦮꦴ ꦄꦤꦷꦕꦮꦸꦠ꧀ꦠꦶꦤꦺꦴꦠꦶ ꦄꦠ꧀ꦡꦺꦴ. ꦄꦱꦨꦴꦒꦮꦸꦠ꧀ꦠꦶꦏꦴꦠꦶ ꦮꦶꦱꦨꦴꦒꦗꦷꦮꦶꦏꦴ, ꦪꦡꦴ ꦨꦶꦏ꧀ꦑꦹꦱꦸ ꦮꦠ꧀ꦠꦶꦠꦧ꧀ꦧꦁ; ꦌꦮꦁ ꦄꦥ꧀ꦥꦮꦠ꧀ꦠꦮꦸꦠ꧀ꦠꦶꦤꦺꦴꦠꦶ ꦄꦠ꧀ꦡꦺꦴ.

꧔꧕. ꦥꦢꦱꦺꦴ ꦣꦩ꧀ꦩꦁ ꦮꦴꦕꦺꦪ꧀ꦪꦴꦠꦶ ꦌꦏꦠꦺꦴ ꦥꦢꦁ ꦥꦢꦁ ꦣꦩ꧀ꦩꦁ ꦮꦴꦕꦺꦪ꧀ꦪ; ꦏꦺꦴꦛ꧀ꦜꦴꦱꦁ ꦏꦺꦴꦛ꧀ꦜꦴꦱꦁ ꦮꦴꦕꦺꦪ꧀ꦪꦴꦠꦶ ꦄꦠ꧀ꦡꦺꦴ. ꦪꦱ꧀ꦩꦴ ꦥꦤ ꦠꦁ ꦏꦺꦴꦛ꧀ꦜꦴꦱꦤꦴꦩꦏꦁ ꦥꦢꦁ ꦕꦠꦸꦧ꧀ꦧꦶꦣꦁ ꦲꦺꦴꦠꦶ, ꦠꦱ꧀ꦩꦴ ꦠꦁ ꦢꦱ꧀ꦱꦺꦠꦸꦁ ‘‘ꦥꦢꦁ ꦄꦤꦸꦥꦢꦁ ꦄꦤ꧀ꦮꦏ꧀ꦑꦫꦁ ꦄꦤꦸꦧ꧀ꦪꦚ꧀ꦗꦤ’’ꦤ꧀ꦠꦶ ꦥꦢꦨꦴꦗꦤꦁ ꦮꦸꦠ꧀ꦠꦁ. ꦠꦠ꧀ꦡ ꦥꦢꦤ꧀ꦠꦶ ꦌꦏꦺꦴ ꦒꦴꦡꦴꦥꦴꦢꦺꦴ ꦄꦣꦶꦥ꧀ꦥꦺꦠꦺꦴ. ꦄꦤꦸꦥꦢꦤ꧀ꦠꦶ ꦢꦸꦠꦶꦪꦥꦴꦢꦺꦴ. ꦄꦤ꧀ꦮꦏ꧀ꦑꦫꦤ꧀ꦠꦶ ꦌꦏꦺꦏꦩꦏ꧀ꦑꦫꦁ. ꦄꦤꦸꦧ꧀ꦪꦚ꧀ꦗꦤꦤ꧀ꦠꦶ ꦥꦸꦫꦶꦩꦧ꧀ꦪꦚ꧀ꦗꦤꦺꦤ ꦱꦢꦶꦱꦁ ꦥꦕ꧀ꦖꦴꦧ꧀ꦪꦚ꧀ꦗꦤꦁ. ꦪꦁ ꦏꦶꦚ꧀ꦕꦶ ꦮꦴ ꦌꦏꦩꦏ꧀ꦑꦫꦁ ꦄꦤ꧀ꦮꦏ꧀ꦑꦫꦁ, ꦄꦏ꧀ꦑꦫꦱꦩꦹꦲꦺꦴ ꦄꦤꦸꦧ꧀ꦪꦚ꧀ꦗꦤꦁ, ꦄꦏ꧀ꦑꦫꦴꦤꦸꦧ꧀ꦪꦚ꧀ꦗꦤꦱꦩꦹꦲꦺꦴ ꦥꦢꦁ. ꦥꦜꦩꦥꦢꦁ ꦥꦢꦩꦺꦮ, ꦢꦸꦠꦶꦪꦁ ꦄꦤꦸꦥꦢꦤ꧀ꦠꦶ ꦌꦮꦩꦺꦠ꧀ꦡ ꦤꦴꦤꦴꦏꦫꦟꦁ ꦮꦺꦢꦶꦠꦧ꧀ꦧꦁ.

ꦆꦢꦴꦤꦶ ꦥꦢꦁ ꦤꦴꦩ ꦌꦏꦠꦺꦴ ꦥꦛ꧀ꦜꦥꦺꦠ꧀ꦮꦴ ꦌꦏꦠꦺꦴ ꦎꦱꦴꦥꦺꦤ꧀ꦠꦷꦠꦶ ꦒꦴꦡꦴꦧꦤ꧀ꦣꦁ ꦣꦩ꧀ꦩꦁ ꦮꦴꦕꦺꦤ꧀ꦠꦺꦴ ‘‘ꦩꦤꦺꦴꦥꦸꦧ꧀ꦧꦔ꧀ꦒꦩꦴ ꦣꦩ꧀ꦩꦴ’’ꦠꦶ ꦌꦏꦩꦺꦏꦁ ꦥꦢꦁ ꦱꦴꦩꦟꦺꦫꦺꦤ ꦱꦢ꧀ꦣꦶꦁ ꦌꦏꦠꦺꦴ ꦄꦴꦫꦨꦶꦠ꧀ꦮꦴ ꦌꦏꦠꦺꦴꦪꦺꦮ ꦤꦶꦛ꧀ꦜꦴꦥꦺꦠꦶ. ꦌꦮꦁ ꦮꦴꦕꦺꦤ꧀ꦠꦱ꧀ꦱ ꦥꦢꦒꦟꦤꦴꦪ ꦥꦴꦕꦶꦠ꧀ꦠꦶꦪꦴ ꦮꦺꦢꦶꦠꦧ꧀ꦧꦴ. ꦄꦤꦸꦥꦢꦁ ꦤꦴꦩ ꦥꦴꦛꦺꦏ꧀ꦏꦁ ꦥꦛ꧀ꦜꦥꦺꦠ꧀ꦮꦴ ꦌꦏꦠꦺꦴ ꦎꦱꦴꦥꦺꦤ꧀ꦠꦷꦠꦶ ꦡꦺꦫꦺꦤ ‘‘ꦩꦤꦺꦴꦥꦸꦧ꧀ꦧꦔ꧀ꦒꦩꦴ ꦣꦩ꧀ꦩꦴ’’ꦠꦶ ꦮꦸꦠ꧀ꦠꦺ ꦱꦴꦩꦟꦺꦫꦺꦴ ꦠꦁ ꦥꦢꦁ ꦄꦥꦴꦥꦸꦟꦶꦠ꧀ꦮꦴ ‘‘ꦩꦤꦺꦴꦱꦺꦛ꧀ꦜꦴ ꦩꦤꦺꦴꦩꦪꦴ’’ꦠꦶ ꦢꦸꦠꦶꦪꦥꦢꦁ ꦌꦏꦠꦺꦴ ꦨꦟꦠꦶ, ꦆꦩꦺ ꦥꦴꦛꦺꦏ꧀ꦏꦁ ꦥꦛ꧀ꦜꦥꦺꦠ꧀ꦮꦴ ꦌꦏꦠꦺꦴ ꦎꦱꦴꦥꦺꦤ꧀ꦠꦶ ꦤꦴꦩ. ꦌꦮꦁ ꦮꦴꦕꦺꦤ꧀ꦠꦱ꧀ꦱꦴꦥꦶ ꦄꦤꦸꦥꦢꦒꦟꦤꦴꦪ ꦥꦴꦕꦶꦠ꧀ꦠꦶꦪꦴ. ꦄꦤ꧀ꦮꦏ꧀ꦑꦫꦁ ꦤꦴꦩ ꦫꦹꦥꦁ ꦄꦤꦶꦕ꧀ꦕꦤ꧀ꦠꦶ ꦮꦸꦕ꧀ꦕꦩꦴꦤꦺꦴ ‘‘ꦫꦹ’’ꦠꦶ ꦎꦥꦴꦠꦺꦠꦷꦠꦶ ‘‘ꦫꦹꦥꦁ ꦄꦤꦶꦕ꧀ꦕꦤ꧀ꦠꦶ ꦨꦟ ꦱꦴꦩꦟꦺꦫꦴ’’ꦠꦶ ꦮꦸꦕ꧀ꦕꦩꦴꦤꦺꦴ ꦫꦹꦏꦴꦫꦩꦠ꧀ꦠꦩꦺꦮ ꦌꦏꦠꦺꦴ ꦮꦠ꧀ꦮꦴ ꦠꦶꦛ꧀ꦜꦠꦶ. ꦌꦮꦁ ꦮꦴꦕꦺꦤ꧀ꦠꦱ꧀ꦱꦴꦥꦶ ꦄꦤ꧀ꦮꦏ꧀ꦑꦫꦒꦟꦤꦴꦪ ꦥꦴꦕꦶꦠ꧀ꦠꦶꦪꦴ. ꦒꦴꦡꦴꦧꦤ꧀ꦣꦺꦥꦶ ꦕ ꦌꦱ ꦤꦪꦺꦴ ꦭꦧ꧀ꦨꦠꦶꦪꦺꦮ. ꦄꦤꦸꦧ꧀ꦪꦚ꧀ꦗꦤꦁ ꦤꦴꦩ ꦫꦹꦥꦁ ꦄꦤꦶꦕ꧀ꦕꦤ꧀ꦠꦶ ꦮꦸꦕ꧀ꦕꦩꦴꦤꦺꦴ ꦮꦺꦢꦤꦴ ꦄꦤꦶꦕ꧀ꦕꦴꦠꦶ ꦱꦢ꧀ꦢꦁ ꦤꦶꦕ꧀ꦖꦴꦫꦺꦠꦷꦠꦶ ‘‘ꦫꦹꦥꦁ, ꦨꦶꦏ꧀ꦑꦮꦺ, ꦄꦤꦶꦕ꧀ꦕꦁ, ꦮꦺꦢꦤꦴ ꦄꦤꦶꦕ꧀ꦕꦴ’’ꦠꦶ ꦆꦩꦁ ꦱꦸꦠ꧀ꦠꦁ ꦮꦴꦕꦪꦩꦴꦤꦺꦴ ꦡꦺꦫꦺꦤ ‘‘ꦫꦹꦥꦁ ꦄꦤꦶꦕ꧀ꦕ’’ꦤ꧀ꦠꦶ ꦮꦸꦕ꧀ꦕꦩꦴꦤꦺꦴ ꦱꦴꦩꦟꦺꦫꦺꦴ ꦱꦷꦓꦥꦚ꧀ꦚꦠꦴꦪ ‘‘ꦮꦺꦢꦤꦴ ꦄꦤꦶꦕ꧀ꦕꦴ’’ꦠꦶ ꦆꦩꦁ ꦄꦤꦶꦕ꧀ꦕꦥꦢꦁ ꦡꦺꦫꦱ꧀ꦱ ‘‘ꦫꦹꦥꦁ ꦄꦤꦶꦕ꧀ꦕ’’ꦤ꧀ꦠꦶ ꦌꦠꦺꦤ ꦄꦤꦶꦕ꧀ꦕꦥꦢꦺꦤ ꦱꦢ꧀ꦣꦶꦁ ꦌꦏꦠꦺꦴ ꦨꦟꦤ꧀ꦠꦺꦴ ꦮꦴꦕꦁ ꦤꦶꦕ꧀ꦖꦴꦫꦺꦠꦶ. ꦌꦮꦁ ꦮꦴꦕꦺꦤ꧀ꦠꦱ꧀ꦱꦴꦥꦶ ꦄꦤꦸꦧ꧀ꦪꦚ꧀ꦗꦤꦒꦟꦤꦴꦪ ꦥꦴꦕꦶꦠ꧀ꦠꦶꦪꦴ. ꦄꦪꦁ ꦥꦤꦺꦠ꧀ꦡ ꦱꦔ꧀ꦑꦺꦥꦺꦴ – ꦆꦩꦺꦱꦸ ꦥꦢꦴꦢꦷꦱꦸ ꦪꦁ ꦪꦁ ꦌꦏꦠꦺꦴ ꦨꦟꦠꦶ ꦠꦺꦤ ꦠꦺꦤ ꦄꦴꦥꦠ꧀ꦠꦶꦁ ꦄꦴꦥꦗ꧀ꦗꦠꦷꦠꦶ.

ꦧꦸꦢ꧀ꦣꦨꦴꦱꦶꦠꦺꦴꦠꦶ ꦱꦏꦭꦁ ꦮꦶꦤꦪꦥꦶꦛꦏꦁ ꦄꦨꦶꦣꦩ꧀ꦩꦥꦶꦛꦏꦁ ꦣꦩ꧀ꦩꦥꦢꦁ ꦕꦫꦶꦪꦴꦥꦶꦛꦏꦁ ꦈꦢꦴꦤꦁ ꦆꦠꦶꦮꦸꦠ꧀ꦠꦏꦁ ꦗꦴꦠꦏꦁ ꦱꦸꦠ꧀ꦠꦤꦶꦥꦴꦠꦺꦴ ꦮꦶꦩꦴꦤꦮꦠ꧀ꦡꦸ ꦥꦺꦠꦮꦠ꧀ꦡꦸ ꦧ꧀ꦫꦲ꧀ꦩꦗꦴꦭꦴꦢꦷꦤꦶ ꦕ ꦱꦸꦠ꧀ꦠꦴꦤꦶ. ꦱꦴꦮꦏꦨꦴꦱꦶꦠꦺꦴꦠꦶ ꦕꦠꦸꦥꦫꦶꦱꦥꦫꦶꦪꦴꦥꦤ꧀ꦤꦺꦲꦶ ꦱꦴꦮꦏꦺꦲꦶ ꦨꦴꦱꦶꦠꦺꦴ ꦄꦤꦔ꧀ꦒꦟꦱꦩ꧀ꦩꦴꦢꦶꦛ꧀ꦜꦶꦄꦤꦸꦩꦴꦤꦱꦸꦠ꧀ꦠꦕꦸꦭ꦳ꦮꦺꦢꦭ꧀ꦭꦩꦲꦴꦮꦺꦢꦭ꧀ꦭꦴꦢꦶꦏꦺꦴ. ꦆꦱꦶꦨꦴꦱꦶꦠꦺꦴꦠꦶ ꦧꦴꦲꦶꦫꦥꦫꦶꦧ꧀ꦧꦴꦗꦏꦺꦲꦶ ꦨꦴꦱꦶꦠꦺꦴ ꦱꦏꦭꦺꦴ ꦥꦫꦶꦧ꧀ꦧꦴꦗꦏꦮꦒ꧀ꦒꦺꦴ, ꦧꦴꦮꦫꦶꦪꦱ꧀ꦱ ꦄꦤ꧀ꦠꦺꦮꦴꦱꦶꦏꦴꦤꦁ ꦱꦺꦴꦭ꦳ꦱꦤ꧀ꦤꦁ ꦧ꧀ꦫꦴꦲ꧀ꦩꦟꦴꦤꦁ ꦥꦸꦕ꧀ꦖꦴꦠꦶ ꦌꦮꦩꦴꦢꦶ. ꦢꦺꦮꦠꦴꦨꦴꦱꦶꦠꦺꦴꦠꦶ ꦢꦺꦮꦠꦴꦲꦶ ꦨꦴꦱꦶꦠꦺꦴ; ꦱꦺꦴ ꦢꦺꦮꦠꦴꦱꦁꦪꦸꦠ꧀ꦠꦢꦺꦮꦥꦸꦠ꧀ꦠꦱꦁꦪꦸꦠ꧀ꦠꦩꦴꦫꦱꦁꦪꦸꦠ꧀ꦠꦧ꧀ꦫꦲ꧀ꦩꦱꦁꦪꦸꦠ꧀ꦠꦱꦏ꧀ꦏꦱꦁꦪꦸꦠ꧀ꦠꦴꦢꦶꦮꦱꦺꦤ ꦮꦺꦢꦶꦠꦧ꧀ꦧꦺꦴ.

ꦄꦠ꧀ꦡꦹꦥꦱꦚ꧀ꦲꦶꦠꦺꦴꦠꦶ ꦄꦛ꧀ꦜꦏꦡꦴꦤꦶꦱ꧀ꦱꦶꦠꦺꦴ. ꦣꦩ꧀ꦩꦹꦥꦱꦚ꧀ꦲꦶꦠꦺꦴꦠꦶ ꦥꦴꦭ꦳ꦶꦤꦶꦱ꧀ꦱꦶꦠꦺꦴ; ꦈꦨꦪꦺꦤꦴꦥꦶ ꦮꦶꦮꦛ꧀ꦛꦹꦥꦤꦶꦱ꧀ꦱꦶꦠꦩꦺꦮ ꦮꦢꦠꦶ. ꦏꦶꦚ꧀ꦕꦴꦥꦶ ꦮꦶꦮꦛ꧀ꦛꦹꦥꦤꦶꦱ꧀ꦱꦶꦠꦁ ꦮꦢꦠꦶ, ꦠꦶꦱ꧀ꦱꦺꦴ ꦱꦔ꧀ꦒꦷꦠꦶꦪꦺꦴ ꦄꦴꦫꦸꦭ꦳꧀ꦲꦣꦩ꧀ꦩꦁꦪꦺꦮ ꦥꦤ ꦥꦢꦱꦺꦴ ꦮꦴꦕꦺꦤ꧀ꦠꦱ꧀ꦱ ꦄꦴꦥꦠ꧀ꦠꦶ. ꦮꦶꦮꦛ꧀ꦛꦹꦥꦤꦶꦱ꧀ꦱꦶꦠꦺꦥꦶ ꦤꦴꦤꦴꦨꦴꦱꦴꦮꦱꦺꦤ ꦒꦴꦡꦴꦱꦶꦭꦺꦴꦏꦧꦤ꧀ꦣꦴꦢꦷꦲꦶ ꦄꦨꦶꦱꦔ꧀ꦑꦠꦺ ꦄꦤꦴꦥꦠ꧀ꦠꦶ. ꦠꦶꦱ꧀ꦱꦺꦴ ꦱꦔ꧀ꦒꦷꦠꦶꦪꦺꦴ ꦄꦤꦴꦫꦸꦭ꦳꧀ꦲꦺꦥꦶ ꦏꦸꦭꦸꦩ꧀ꦧꦱꦸꦠ꧀ꦠꦁ ꦫꦴꦗꦺꦴꦮꦴꦢꦱꦸꦠ꧀ꦠꦁ ꦠꦶꦏ꧀ꦑꦶꦤ꧀ꦢ꧀ꦫꦶꦪꦁ ꦕꦠꦸꦥꦫꦶꦮꦛ꧀ꦛꦁ ꦤꦤ꧀ꦢꦺꦴꦥꦤꦤ꧀ꦢꦤ꧀ꦠꦶ ꦇꦢꦶꦱꦺ ꦄꦴꦥꦠ꧀ꦠꦶꦪꦺꦮ. ꦄꦥꦭꦴꦭꦢꦩꦤꦩ꧀ꦥꦶ ꦮꦸꦠ꧀ꦠꦁ, ꦩꦲꦴꦥꦕ꧀ꦕꦫꦶꦪꦩ꧀ꦥꦤ ꦥꦛꦶꦱꦶꦢ꧀ꦣꦁ. ꦩꦺꦟ꧀ꦝꦏꦩꦶꦭꦶꦤ꧀ꦢꦥꦚ꧀ꦲꦺꦱꦸ ꦡꦺꦫꦱ꧀ꦱ ꦱꦏꦥꦛꦶꦨꦴꦤꦺ ꦄꦤꦴꦥꦠ꧀ꦠꦶ, ꦪꦁ ꦫꦚ꧀ꦚꦺꦴ ꦱꦚ꧀ꦚꦴꦥꦤꦠ꧀ꦡꦁ ꦄꦴꦲꦫꦶꦠ꧀ꦮꦴ ꦮꦸꦠ꧀ꦠꦁ, ꦠꦠ꧀ꦡ ꦄꦴꦥꦠ꧀ꦠꦶ. ꦮꦟ꧀ꦟꦥꦶꦛꦏꦄꦔ꧀ꦒꦸꦭꦶꦩꦴꦭꦥꦶꦛꦏꦫꦛ꧀ꦜꦥꦴꦭꦒꦄꦗꦠꦄꦴꦭ꦳ꦮꦏꦒꦗ꧀ꦗꦶꦠꦒꦸꦭ꦳꧀ꦲꦩꦒ꧀ꦒꦒꦸꦭ꦳꧀ꦲꦮꦺꦱ꧀ꦱꦤ꧀ꦠꦫꦒꦸꦭ꦳꧀ꦲꦮꦶꦤꦪꦮꦺꦢꦭ꧀ꦭꦥꦶꦛꦏꦴꦤꦶ ꦥꦤ ꦄꦧꦸꦢ꧀ꦣꦮꦕꦤꦴꦤꦶꦪꦺꦮꦴꦠꦶ ꦮꦸꦠ꧀ꦠꦁ. ꦱꦷꦭꦹꦥꦢꦺꦱꦺꦴ ꦤꦴꦩ ꦣꦩ꧀ꦩꦱꦺꦤꦴꦥꦠꦶꦤꦴ ꦮꦸꦠ꧀ꦠꦺꦴꦠꦶ ꦮꦢꦤ꧀ꦠꦶ, ꦠꦱ꧀ꦩꦶꦁ ꦄꦴꦥꦠ꧀ꦠꦶꦪꦺꦮ. ꦄꦚ꧀ꦚꦴꦤꦶꦥꦶ ꦩꦒ꧀ꦒꦏꦡꦴꦄꦴꦫꦩ꧀ꦩꦟꦏꦡꦴꦧꦸꦢ꧀ꦣꦶꦏꦢꦟ꧀ꦝꦏ ꦚꦴꦟꦮꦠ꧀ꦡꦸꦄꦱꦸꦨꦏꦡꦴꦢꦷꦤꦶ ꦄꦠ꧀ꦡꦶ, ꦠꦺꦱꦸ ꦱꦠ꧀ꦠꦠꦶꦁꦱ ꦧꦺꦴꦣꦶꦥꦏ꧀ꦑꦶꦪꦣꦩ꧀ꦩꦴ ꦮꦶꦨꦠ꧀ꦠꦴ, ꦣꦸꦠꦔ꧀ꦒꦥꦚ꧀ꦲꦺ ꦥꦛꦶꦥꦢꦴ ꦮꦶꦨꦠ꧀ꦠꦴ; ꦠꦱ꧀ꦩꦴ ꦠꦺꦱꦸ ꦄꦴꦥꦠ꧀ꦠꦷꦠꦶ ꦮꦸꦠ꧀ꦠꦁ. ꦩꦲꦴꦥꦕ꧀ꦕꦫꦶꦪꦴꦢꦷꦱꦸ ꦥꦤ ꦱꦔ꧀ꦒꦷꦠꦶꦁ ꦄꦤꦴꦫꦸꦭ꦳꧀ꦲꦺꦱꦸ ꦫꦴꦗꦺꦴꦮꦴꦢꦠꦶꦏ꧀ꦑꦶꦤ꧀ꦢ꧀ꦫꦶꦪꦕꦠꦸꦥꦫꦶꦮꦛ꧀ꦛꦤꦤ꧀ꦢꦺꦴꦥꦤꦤ꧀ꦢꦏꦸꦭꦸꦩ꧀ꦧꦱꦸꦠ꧀ꦠꦺꦱꦸꦪꦺꦮ ꦄꦴꦥꦠ꧀ꦠꦷꦠꦶ ꦮꦠ꧀ꦮꦴ ꦄꦮꦱꦺꦱꦺꦱꦸ ꦪꦁ ꦧꦸꦢ꧀ꦣꦮꦕꦤꦠꦺꦴ ꦄꦴꦲꦫꦶꦠ꧀ꦮꦴ ꦮꦸꦠ꧀ꦠꦁ, ꦠꦢꦺꦮ ꦄꦴꦥꦠ꧀ꦠꦶꦮꦠ꧀ꦡꦸ ꦲꦺꦴꦠꦶ, ꦤ ꦆꦠꦫꦤ꧀ꦠꦶ ꦄꦪꦩꦠ꧀ꦡꦺꦴ ꦥꦫꦶꦒ꧀ꦒꦲꦶꦠꦺꦴ.

꧔꧘. ꦌꦏꦠꦺꦴ ꦈꦢ꧀ꦢꦶꦱꦴꦥꦺꦤ꧀ꦠꦺꦴꦠꦶ ꦄꦤꦸꦥꦱꦩ꧀ꦥꦤ꧀ꦤꦺꦤ ꦱꦢ꧀ꦣꦶꦁ ꦌꦏꦠꦺꦴ ꦈꦢ꧀ꦢꦺꦱꦁ ꦒꦟ꧀ꦲꦤ꧀ꦠꦺꦴꦥꦶ ꦌꦏꦠꦺꦴ ꦮꦢꦠꦶ ꦄꦤꦴꦥꦠ꧀ꦠꦷꦠꦶ ꦄꦠ꧀ꦡꦺꦴ.

ꦠꦠ꧀ꦫꦴꦪꦁ ꦮꦶꦤꦶꦕ꧀ꦖꦪꦺꦴ – ꦈꦥꦱꦩ꧀ꦥꦤ꧀ꦤꦺꦴ ꦕ ꦄꦤꦸꦥꦱꦩ꧀ꦥꦤ꧀ꦤꦺꦴ ꦕ ꦤꦶꦱꦷꦢꦶꦠ꧀ꦮꦴ ꦈꦢ꧀ꦢꦶꦱꦴꦥꦺꦤ꧀ꦠꦶ. ꦄꦴꦕꦫꦶꦪꦺꦴ ꦤꦶꦱꦶꦤ꧀ꦤꦴꦤꦁ ꦨꦟꦴꦩꦷꦠꦶ ꦠꦺꦲꦶ ꦱꦢ꧀ꦣꦶꦁ ꦌꦏꦠꦺꦴ ꦮꦢꦠꦶ, ꦄꦴꦕꦫꦶꦪꦱ꧀ꦱ ꦄꦴꦥꦠ꧀ꦠꦶ. ꦄꦤꦸꦥꦱꦩ꧀ꦥꦤ꧀ꦤꦺꦤ ꦱꦢ꧀ꦣꦶꦁ ꦒꦟ꧀ꦲꦤ꧀ꦠꦱ꧀ꦱ ꦄꦤꦴꦥꦠ꧀ꦠꦶ. ꦢ꧀ꦮꦺꦥꦶ ꦜꦶꦠꦴ ꦒꦟ꧀ꦲꦤ꧀ꦠꦶ, ꦌꦱꦺꦮ ꦤꦪꦺꦴ. ꦢꦲꦫꦨꦶꦏ꧀ꦑꦸ ꦤꦶꦱꦶꦤ꧀ꦤꦺꦴ, ꦱꦴꦩꦟꦺꦫꦺꦴ ꦜꦶꦠꦺꦴ, ꦤꦶꦱꦶꦤ꧀ꦤꦱ꧀ꦱ ꦨꦟꦴꦩꦷꦠꦶ ꦨꦟꦠꦺꦴ ꦄꦤꦴꦥꦠ꧀ꦠꦶ. ꦱꦕꦺ ꦢꦲꦫꦺꦴ ꦠꦶꦛ꧀ꦜꦠꦶ, ꦆꦠꦫꦺꦴ ꦤꦶꦱꦷꦢꦠꦶ, ꦜꦶꦠꦱ꧀ꦱ ꦨꦟꦴꦩꦷꦠꦶ ꦨꦟꦠꦺꦴꦥꦶ ꦄꦤꦴꦥꦠ꧀ꦠꦶ. ꦱꦕꦺ ꦧꦲꦹꦤꦁ ꦨꦶꦏ꧀ꦑꦹꦤꦁ ꦄꦤ꧀ꦠꦫꦺ ꦌꦏꦺꦴ ꦱꦴꦩꦟꦺꦫꦺꦴ ꦤꦶꦱꦶꦤ꧀ꦤꦺꦴ ꦲꦺꦴꦠꦶ, ꦠꦱ꧀ꦩꦶꦁ ꦤꦶꦱꦶꦤ꧀ꦤꦺ ꦥꦢꦱꦺꦴ ꦣꦩ꧀ꦩꦁ ꦮꦴꦕꦺꦤ꧀ꦠꦱ꧀ꦱ ꦄꦴꦕꦫꦶꦪꦱ꧀ꦱ ꦄꦕꦶꦠ꧀ꦠꦏꦴꦥꦠ꧀ꦠꦶ. ꦱꦕꦺ ꦱꦴꦩꦟꦺꦫꦺꦴ ꦈꦥꦕꦴꦫꦁ ꦩꦸꦚ꧀ꦕꦶꦠ꧀ꦮꦴ ꦜꦶꦠꦺꦴ ꦮꦴ ꦤꦶꦱꦶꦤ꧀ꦤꦺꦴ ꦮꦴ ꦲꦺꦴꦠꦶ, ꦪꦺꦱꦁ ꦮꦴꦕꦺꦠꦶ, ꦠꦺꦱꦸ ꦄꦥꦫꦶꦪꦴꦥꦤ꧀ꦤꦠ꧀ꦠꦴ ꦌꦏꦺꦤ ꦢꦶꦱꦴꦨꦴꦒꦺꦤ ꦥꦭꦴꦪꦤꦏꦒꦤ꧀ꦡꦁ ꦤꦴꦩ ꦒꦟ꧀ꦲꦴꦠꦷꦠꦶ ꦱꦔ꧀ꦑ꧀ꦪꦁ ꦒꦕ꧀ꦖꦠꦶ, ꦠꦱ꧀ꦩꦴ ꦄꦤꦴꦥꦠ꧀ꦠꦶ. ꦌꦏꦠꦺꦴ ꦱꦗ꧀ꦙꦴꦪꦁ ꦏꦫꦺꦴꦤ꧀ꦠꦺꦴꦥꦶ ꦄꦤꦸꦥꦱꦩ꧀ꦥꦤ꧀ꦤꦺꦤ ꦱꦢ꧀ꦣꦶꦁ ꦈꦥꦱꦩ꧀ꦥꦤ꧀ꦤꦺꦴ ꦌꦏꦠꦺꦴ ꦱꦗ꧀ꦙꦴꦪꦁ ꦏꦫꦺꦴꦤ꧀ꦠꦺꦴ ꦠꦺꦤ ꦱꦢ꧀ꦣꦶꦁꦪꦺꦮ ꦨꦟꦠꦶ, ꦄꦤꦴꦥꦠ꧀ꦠꦶ. ꦄꦤꦸꦥꦱꦩ꧀ꦥꦤ꧀ꦤꦱ꧀ꦱ ꦱꦤ꧀ꦠꦶꦏꦺ ꦈꦢ꧀ꦢꦺꦱꦁ ꦒꦟ꧀ꦲꦤ꧀ꦠꦱ꧀ꦱꦥꦶ ꦠꦺꦤ ꦱꦢ꧀ꦣꦶꦁ ꦌꦏꦠꦺꦴ ꦨꦟꦤ꧀ꦠꦱ꧀ꦱ ꦄꦤꦴꦥꦠ꧀ꦠꦶ. ꦄꦪꦩ꧀ꦥꦶ ꦲꦶ ꦌꦏꦠꦺꦴ ꦱꦗ꧀ꦙꦴꦪꦁ ꦏꦫꦺꦴꦠꦶꦕ꧀ꦕꦺꦮ ꦱꦔ꧀ꦑ꧀ꦪꦁ ꦒꦕ꧀ꦖꦠꦶ.

ꦪꦺꦨꦸꦪ꧀ꦪꦺꦤ ꦥꦒꦸꦟꦁ ꦒꦤ꧀ꦡꦁ ꦨꦟꦤ꧀ꦠꦁ ꦎꦥꦴꦠꦺꦠꦷꦠꦶ ꦱꦕꦺ ꦌꦏꦒꦴꦡꦴꦪ ꦌꦏꦺꦴ ꦥꦴꦢꦺꦴ ꦤ ꦄꦴꦒꦕ꧀ꦖꦠꦶ, ꦱꦺꦱꦁ ꦄꦴꦒꦕ꧀ꦖꦠꦶ, ꦄꦪꦁ ꦪꦺꦨꦸꦪ꧀ꦪꦺꦤ ꦥꦒꦸꦟꦒꦤ꧀ꦡꦺꦴ ꦤꦴꦩ. ꦌꦠꦺꦤ ꦤꦪꦺꦤ ꦱꦸꦠ꧀ꦠꦺꦥꦶ ꦮꦺꦢꦶꦠꦧ꧀ꦧꦺꦴ. ꦠꦁ ꦎꦥꦴꦠꦺꦤ꧀ꦠꦱ꧀ꦱ ꦌꦮꦁ ꦨꦟꦴꦲꦷꦠꦶ ꦌꦏꦠꦺꦴꦥꦶ ꦨꦟꦤ꧀ꦠꦱ꧀ꦱ ꦄꦤꦴꦥꦠ꧀ꦠꦶ. ꦎꦱꦴꦫꦺꦤ꧀ꦠꦁ ꦎꦥꦴꦠꦺꦠꦷꦠꦶ ꦱꦸꦠ꧀ꦠꦁ ꦈꦕ꧀ꦕꦴꦫꦺꦤ꧀ꦠꦁ ꦥꦫꦶꦱꦩꦗ꧀ꦙꦺ ꦥꦫꦶꦱꦔ꧀ꦏꦩꦴꦤꦁ ꦌꦮꦁ ꦮꦢꦺꦲꦷꦠꦶ ꦠꦺꦤ ꦱꦢ꧀ꦣꦶꦁ ꦌꦏꦠꦺꦴꦥꦶ ꦮꦢꦤ꧀ꦠꦱ꧀ꦱ ꦄꦤꦴꦥꦠ꧀ꦠꦶ. ꦪꦁ ꦥꦤ ꦩꦲꦴꦥꦕ꧀ꦕꦫꦶꦪꦴꦢꦷꦱꦸ ‘‘ꦩꦪꦴ ꦱꦢ꧀ꦣꦶꦁ ꦩꦴ ꦮꦢꦴ’’ꦠꦶ ꦮꦸꦠ꧀ꦠꦺꦴ ꦪꦢꦶ ꦮꦢꦠꦶ, ‘‘ꦄꦤꦴꦥꦠ꧀ꦠꦷ’’ꦠꦶ ꦮꦸꦠ꧀ꦠꦁ, ꦠꦁ ꦩꦲꦴꦄꦛ꧀ꦜꦏꦡꦴꦪꦁ ꦤꦠ꧀ꦡꦶ, ꦤꦠ꧀ꦡꦶꦨꦴꦮꦺꦴꦪꦺꦮ ꦕꦱ꧀ꦱ ꦪꦸꦠ꧀ꦠꦺꦴ. ꦏꦱ꧀ꦩꦴ? ꦏꦶꦫꦶꦪꦱꦩꦸꦛ꧀ꦜꦴꦤꦠ꧀ꦠꦴ. ꦆꦠꦫꦡꦴ ꦲꦶ ꦏꦶꦫꦶꦪꦴꦏꦶꦫꦶꦪꦁ ꦨꦮꦺꦪ꧀ꦪ. ꦱꦺꦱꦁ ꦈꦠ꧀ꦠꦴꦤꦠ꧀ꦡꦩꦺꦮ.

ꦥꦢꦱꦺꦴꦣꦩ꧀ꦩꦱꦩꦸꦛ꧀ꦜꦴꦤꦁ – ꦮꦴꦕꦠꦺꦴ ꦕ ꦮꦴꦕꦴꦕꦶꦠ꧀ꦠꦠꦺꦴ ꦕ ꦱꦩꦸꦛ꧀ꦜꦴꦠꦶ, ꦏꦶꦫꦶꦪꦁ, ꦤꦺꦴꦱꦚ꧀ꦚꦴꦮꦶꦩꦺꦴꦏ꧀ꦑꦁ, ꦄꦕꦶꦠ꧀ꦠꦏꦁ, ꦥꦟ꧀ꦟꦠ꧀ꦠꦶꦮꦗ꧀ꦗꦁ, ꦮꦕꦷꦏꦩ꧀ꦩꦁ, ꦠꦶꦕꦶꦠ꧀ꦠꦁ, ꦠꦶꦮꦺꦢꦤꦤ꧀ꦠꦶ.

ꦥꦢꦱꦺꦴꦣꦩ꧀ꦩꦱꦶꦏ꧀ꦑꦴꦥꦢꦁ ꦕꦠꦸꦠ꧀ꦡꦁ.

꧕. ꦱꦲꦱꦺꦪ꧀ꦪꦱꦶꦏ꧀ꦑꦴꦥꦢꦮꦟ꧀ꦟꦤꦴ

꧔꧙. ꦥꦚ꧀ꦕꦩꦱꦶꦏ꧀ꦑꦴꦥꦢꦺ – ꦩꦸꦛ꧀ꦜꦱ꧀ꦱꦠꦷ ꦄꦱꦩ꧀ꦥꦗꦴꦤꦴꦠꦶ ꦥꦸꦧ꧀ꦧꦨꦴꦒꦺ ꦱꦠꦶꦱꦩ꧀ꦥꦗꦚ꧀ꦚꦱ꧀ꦱ ꦄꦏꦫꦟꦮꦱꦺꦤꦺꦠꦁ ꦮꦸꦠ꧀ꦠꦁ, ꦨꦮꦔ꧀ꦒꦺꦴꦠꦶꦟ꧀ꦟꦏꦴꦭꦺ ꦥꦤ ꦏꦸꦠꦺꦴ ꦱꦠꦶꦱꦩ꧀ꦥꦗꦚ꧀ꦚꦤ꧀ꦠꦶ! ꦮꦶꦏꦹꦗꦩꦴꦤꦴꦠꦶ ꦮꦶꦥ꧀ꦥꦭꦥꦩꦴꦤꦴ. ꦏꦴꦏꦕ꧀ꦖꦩꦴꦤꦴꦠꦶ ꦤꦴꦱꦴꦪ ꦏꦴꦏꦱꦢ꧀ꦢꦁ ꦮꦶꦪ ꦤꦶꦫꦠ꧀ꦡꦏꦱꦢ꧀ꦢꦁ ꦩꦸꦚ꧀ꦕꦩꦴꦤꦴ. ꦈꦥꦴꦱꦏꦴꦠꦶ ꦥꦜꦩꦠꦫꦁ ꦈꦛ꧀ꦜꦶꦠꦈꦥꦴꦱꦏꦴ.

꧕꧐. ꦌꦠꦢꦮꦺꦴꦕꦸꦤ꧀ꦠꦶ ‘‘ꦨꦒꦮꦠꦴ ꦄꦴꦮꦸꦱꦺꦴ ꦫꦴꦲꦸꦭ ꦱꦶꦏ꧀ꦑꦴꦥꦢꦁ ꦥꦚ꧀ꦚꦠ꧀ꦠ’’ꦤ꧀ꦠꦶ ꦨꦶꦏ꧀ꦑꦹ ꦱꦶꦏ꧀ꦑꦴꦥꦢꦒꦴꦫꦮꦺꦤꦺꦮ ꦌꦠꦁ ꦄꦮꦺꦴꦕꦸꦁ. ꦥꦏꦠꦶꦪꦴ ꦥꦤ ꦠꦺ ꦨꦒꦮꦠꦶ ꦕ ꦒꦴꦫꦮꦺꦤ ꦄꦴꦪꦱ꧀ꦩꦠꦺꦴ ꦕ ꦫꦴꦲꦸꦭꦱ꧀ꦱ ꦱꦶꦏ꧀ꦑꦴꦏꦴꦩꦠꦴꦪ ꦠꦱ꧀ꦱ ꦄꦴꦪꦱ꧀ꦩꦠꦺꦴ ꦮꦱꦤꦛ꧀ꦜꦴꦤꦁ ꦄꦴꦒꦠꦱ꧀ꦱ ꦕꦹꦭ꦳ꦩꦚ꧀ꦕꦏꦁ ꦮꦴ ꦄꦥꦱ꧀ꦱꦺꦤꦁ ꦮꦴ ꦪꦁ ꦄꦠ꧀ꦡꦶ ꦠꦁ ꦥꦚ꧀ꦚꦥꦺꦠ꧀ꦮꦴ ꦕꦷꦮꦫꦁ ꦮꦴ ꦈꦠ꧀ꦠꦫꦴꦱꦔ꧀ꦒꦁ ꦮꦴ ꦈꦱ꧀ꦱꦷꦱꦏꦫꦟꦠ꧀ꦡꦴꦪ ꦢꦺꦤ꧀ꦠꦶ. ꦠꦠ꧀ꦫꦶꦢꦁ ꦠꦱ꧀ꦱꦴꦪꦱ꧀ꦩꦠꦺꦴ ꦱꦶꦏ꧀ꦑꦴꦏꦴꦩꦠꦴꦪ – ꦨꦶꦏ꧀ꦑꦹ ꦏꦶꦫ ꦠꦁ ꦢꦹꦫꦠꦺꦴꦮ ꦄꦴꦒꦕ꧀ꦖꦤ꧀ꦠꦁ ꦢꦶꦱ꧀ꦮꦴ ꦩꦸꦛ꧀ꦜꦶꦱꦩ꧀ꦩꦸꦚ꧀ꦗꦤꦶꦚ꧀ꦕ ꦏꦕꦮꦫꦖꦝ꧀ꦝꦤꦏꦚ꧀ꦕ ꦧꦲꦶ ꦑꦶꦥꦤ꧀ꦠꦶ. ꦄꦡꦚ꧀ꦚꦺꦲꦶ ‘‘ꦄꦴꦮꦸꦱꦺꦴ ꦏꦺꦤꦶꦢꦁ ꦥꦴꦠꦶꦠ’’ꦤ꧀ꦠꦶ ꦮꦸꦠ꧀ꦠꦺ ꦄꦚ꧀ꦚꦺ ꦌꦮꦁ ꦮꦢꦤ꧀ꦠꦶ – ‘‘ꦨꦤ꧀ꦠꦺ, ꦫꦴꦲꦸꦭꦺꦴ ꦆꦩꦱ꧀ꦩꦶꦁ ꦥꦢꦺꦱꦺ ꦱꦚ꧀ꦕꦫꦶ, ꦠꦺꦤ ꦤꦸ ꦑꦺꦴ ꦥꦴꦠꦶꦠ’’ꦤ꧀ꦠꦶ. ꦱꦺꦴ ꦥꦤꦴꦪꦱ꧀ꦩꦴ ‘‘ꦤ ꦩꦪ꧀ꦲꦁ ꦨꦤ꧀ꦠꦺ ꦆꦢꦁ ꦏꦩ꧀ꦩ’’ꦤ꧀ꦠꦶ ꦌꦏꦢꦶꦮꦱꦩ꧀ꦥꦶ ꦄꦮꦠ꧀ꦮꦴ ꦠꦁ ꦥꦛꦶꦱꦴꦩꦺꦠ꧀ꦮꦴ ꦨꦶꦏ꧀ꦑꦹ ꦑꦩꦴꦥꦺꦠ꧀ꦮꦴ ꦒꦕ꧀ꦖꦠꦶ. ꦮꦕ꧀ꦕꦏꦸꦛꦶꦪꦴ ꦱꦺꦪ꧀ꦪꦁ ꦏꦥ꧀ꦥꦺꦱꦷꦠꦶ ꦠꦁꦪꦺꦮ ꦱꦶꦏ꧀ꦑꦴꦏꦴꦩꦠꦁ ꦄꦤꦸꦧ꧀ꦫꦹꦲꦤ꧀ꦠꦺꦴ ꦣꦩ꧀ꦩꦱꦺꦤꦴꦥꦠꦶꦩꦲꦴꦩꦺꦴꦒ꧀ꦒꦭ꧀ꦭꦴꦤꦄꦴꦤꦤ꧀ꦢꦠ꧀ꦡꦺꦫꦴꦢꦷꦤꦁ ꦱꦤ꧀ꦠꦶꦏꦁ ꦄꦒꦤ꧀ꦠ꧀ꦮꦴ ꦨꦒꦮꦠꦺꦴ ꦮꦭ꦳ꦚ꧀ꦗꦤꦏꦮꦕ꧀ꦕꦏꦸꦛꦶꦪꦁ ꦱꦺꦪ꧀ꦪꦁ ꦏꦥ꧀ꦥꦺꦱꦶ. ꦱꦴ ꦏꦶꦫ ꦏꦸꦛꦶ ꦏꦮꦴꦛꦧꦢ꧀ꦣꦴ ꦒꦤ꧀ꦣꦥꦫꦶꦨꦟ꧀ꦝꦏꦠꦴ ꦱꦩꦺꦴꦱꦫꦶꦠꦥꦸꦥ꧀ꦦꦢꦴꦩꦴ ꦕꦺꦠꦶꦪꦛ꧀ꦜꦴꦤꦩꦶꦮ ꦠꦶꦛ꧀ꦜꦠꦶ, ꦄꦥꦫꦶꦨꦺꦴꦒꦴ ꦄꦚ꧀ꦚꦺꦱꦁ.

꧕꧑. ꦈꦠ꧀ꦠꦫꦶꦢꦶꦫꦠ꧀ꦠꦠꦶꦫꦠ꧀ꦠꦤ꧀ꦠꦶ ꦨꦒꦮꦴ ꦱꦴꦩꦟꦺꦫꦴꦤꦁ ꦱꦔ꧀ꦒꦲꦏꦫꦟꦠ꧀ꦡꦴꦪ ꦠꦶꦫꦠ꧀ꦠꦁ ꦥꦫꦶꦲꦴꦫꦁ ꦄꦢꦴꦱꦶ. ꦤ ꦲꦶ ꦪꦸꦠ꧀ꦠꦁ ꦏꦸꦭꦢꦴꦫꦏꦺ ꦥꦧ꧀ꦧꦴꦗꦺꦠ꧀ꦮꦴ ꦤꦴꦤꦸꦒ꧀ꦒꦲꦺꦠꦸꦤ꧀ꦠꦶ. ꦱꦲꦱꦺꦪ꧀ꦪꦤ꧀ꦠꦶ ꦌꦏꦠꦺꦴ ꦱꦺꦪ꧀ꦪꦁ. ꦱꦺꦪ꧀ꦪꦴꦠꦶ ꦏꦴꦪꦥ꧀ꦥꦱꦴꦫꦟꦱꦔ꧀ꦑꦴꦠꦁ ꦱꦪꦤꦩ꧀ꦥꦶ ꦮꦸꦕ꧀ꦕꦠꦶ, ꦪꦱ꧀ꦩꦶꦁ ꦱꦺꦤꦴꦱꦤꦺ ꦱꦪꦤ꧀ꦠꦶ, ꦠꦩ꧀ꦥꦶ. ꦠꦠ꧀ꦡ ꦱꦺꦤꦴꦱꦤꦁ ꦠꦴꦮ ꦢꦱ꧀ꦱꦺꦠꦸꦁ ‘‘ꦱꦺꦪ꧀ꦪꦴ ꦤꦴꦩ ꦱꦧ꧀ꦧꦕ꧀ꦖꦤ꧀ꦤꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦏꦴꦪꦥ꧀ꦥꦱꦴꦫꦟꦁ ꦢꦱ꧀ꦱꦺꦠꦸꦁ ꦄꦤꦸꦥꦱꦩ꧀ꦥꦤ꧀ꦤꦺ ꦤꦶꦥꦤ꧀ꦤꦺ ꦨꦶꦏ꧀ꦑꦸ ꦤꦶꦥꦗ꧀ꦗꦠꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦱ꧀ꦩꦴ ꦄꦪꦩꦺꦠ꧀ꦡ ꦄꦠ꧀ꦡꦺꦴ – ‘‘ꦱꦺꦤꦴꦱꦤꦱꦔ꧀ꦑꦴꦠꦁ ꦱꦺꦪ꧀ꦪꦁ ꦥꦮꦶꦱꦶꦠ꧀ꦮꦴ ꦏꦴꦪꦥ꧀ꦥꦱꦴꦫꦟꦱꦔ꧀ꦑꦴꦠꦁ ꦱꦺꦪ꧀ꦪꦁ ꦏꦥ꧀ꦥꦺꦪ꧀ꦪ ꦮꦶꦢꦲꦺꦪ꧀ꦪ ꦱꦩ꧀ꦥꦴꦢꦺꦪ꧀ꦪꦴ’’ꦠꦶ. ꦱꦧ꧀ꦧꦕ꧀ꦖꦤ꧀ꦤꦴꦠꦶꦄꦴꦢꦶꦤꦴ ꦥꦤ ꦠꦱ꧀ꦱꦴ ꦱꦺꦤꦴꦱꦤꦱꦔ꧀ꦑꦴꦠꦴꦪ ꦱꦺꦪ꧀ꦪꦴꦪ ꦭꦏ꧀ꦑꦟꦁ ꦮꦸꦠ꧀ꦠꦁ. ꦠꦱ꧀ꦩꦴ ꦪꦁ ꦱꦺꦤꦴꦱꦤꦁ ꦈꦥꦫꦶ ꦥꦚ꧀ꦕꦲꦶ ꦖꦢꦤꦺꦲꦶ ꦄꦚ꧀ꦚꦺꦤ ꦮꦴ ꦏꦺꦤꦕꦶ ꦱꦧ꧀ꦧꦩꦺꦮ ꦥꦛꦶꦕ꧀ꦖꦤ꧀ꦤꦁ, ꦄꦪꦁ ꦱꦧ꧀ꦧꦕ꧀ꦖꦤ꧀ꦤꦴ ꦤꦴꦩ ꦱꦺꦪ꧀ꦪꦴ. ꦄꦛ꧀ꦜꦏꦡꦴꦱꦸ ꦥꦤ ꦥꦴꦏꦛꦮꦺꦴꦲꦴꦫꦁ ꦒꦲꦺꦠ꧀ꦮꦴ ꦮꦴꦕꦸꦒ꧀ꦒꦠꦮꦱꦺꦤ ‘‘ꦱꦧ꧀ꦧꦕ꧀ꦖꦤ꧀ꦤꦴ ꦤꦴꦩ ꦥꦚ꧀ꦕꦲꦶ ꦖꦢꦤꦺꦲꦶ ꦖꦤ꧀ꦤꦴ’’ꦠꦶ ꦮꦸꦠ꧀ꦠꦁ. ꦏꦶꦚ꧀ꦕꦴꦥꦶ ꦮꦸꦠ꧀ꦠꦁ? ꦄꦡ ꦑꦺꦴ ꦢꦸꦱ꧀ꦱꦏꦸꦛꦶꦪꦁ ꦮꦱꦤ꧀ꦠꦱ꧀ꦱꦴꦥꦶ ꦤ ꦱꦏ꧀ꦏꦴ ꦄꦤꦴꦥꦠ꧀ꦠꦶ ꦏꦴꦠꦸꦁ, ꦠꦱ꧀ꦩꦴ ꦪꦁ ꦏꦶꦚ꧀ꦕꦶ ꦥꦛꦶꦕ꧀ꦖꦴꦢꦤꦱꦩꦠ꧀ꦡꦁ ꦆꦣ ꦖꦢꦤꦚ꧀ꦕ ꦥꦫꦶꦕ꧀ꦖꦤ꧀ꦤꦚ꧀ꦕ ꦮꦺꦢꦶꦠꦧ꧀ꦧꦁ. ꦥꦚ꧀ꦕꦮꦶꦣꦕ꧀ꦖꦢꦤꦺꦪꦺꦮ ꦲꦶ ꦒꦪ꧀ꦲꦩꦴꦤꦺ ꦥꦢꦫꦕ꧀ꦖꦤ꧀ꦤꦺꦥꦶ ꦱꦲꦱꦺꦪ꧀ꦪꦴ ꦤ ꦨꦮꦺꦪ꧀ꦪ. ꦪꦁ ꦥꦤ ꦱꦺꦤꦴꦱꦤꦁ ꦨꦹꦩꦶꦠꦺꦴ ꦥꦛ꧀ꦜꦴꦪ ꦪꦴꦮ ꦖꦢꦤꦁ ꦄꦴꦲꦕ꧀ꦕ ꦥꦴꦏꦴꦫꦺꦤ ꦮꦴ ꦄꦚ꧀ꦚꦺꦤ ꦮꦴ ꦏꦺꦤꦕꦶ ꦄꦤ꧀ꦠꦩꦱꦺꦴ ꦮꦠ꧀ꦡꦺꦤꦴꦥꦶ ꦥꦫꦶꦏ꧀ꦑꦶꦠ꧀ꦠꦁ, ꦄꦪꦁ ꦱꦧ꧀ꦧꦥꦫꦶꦕ꧀ꦖꦤ꧀ꦤꦴ ꦤꦴꦩ ꦱꦺꦪ꧀ꦪꦴ. ꦖꦢꦤꦁ ꦄꦤꦴꦲꦕ꧀ꦕ ꦱꦧ꧀ꦧꦤ꧀ꦠꦶꦩꦺꦤ ꦥꦫꦶꦪꦴꦪꦺꦤ ꦢꦶꦪꦝ꧀ꦞꦲꦠ꧀ꦡꦸꦧ꧀ꦧꦺꦣꦺꦤ ꦥꦴꦏꦴꦫꦴꦢꦶꦤꦴ ꦥꦫꦶꦏ꧀ꦑꦶꦠ꧀ꦠꦴꦥꦶ ꦱꦧ꧀ꦧꦥꦫꦶꦕ꧀ꦖꦤ꧀ꦤꦴꦪꦺꦮꦴꦠꦶ ꦏꦸꦫꦸꦤ꧀ꦢꦛ꧀ꦜꦏꦡꦴꦪꦁ ꦮꦸꦠ꧀ꦠꦁ. ꦪꦱ꧀ꦱꦴ ꦥꦤ ꦈꦥꦫꦶ ꦧꦲꦸꦠꦫꦁ ꦜꦴꦤꦁ ꦖꦤ꧀ꦤꦁ, ꦄꦥ꧀ꦥꦁ ꦄꦕ꧀ꦖꦤ꧀ꦤꦁ, ꦱꦩꦤ꧀ꦠꦠꦺꦴ ꦮꦴ ꦧꦲꦸꦠꦫꦁ ꦥꦫꦶꦏ꧀ꦑꦶꦠ꧀ꦠꦁ, ꦄꦥ꧀ꦥꦁ ꦄꦥꦫꦶꦏ꧀ꦑꦶꦠ꧀ꦠꦁ, ꦄꦪꦁ ꦪꦺꦨꦸꦪ꧀ꦪꦺꦤ ꦖꦤ꧀ꦤꦴ ꦪꦺꦨꦸꦪ꧀ꦪꦺꦤ ꦥꦫꦶꦕ꧀ꦖꦤ꧀ꦤꦴ ꦤꦴꦩ. ꦆꦩꦶꦤꦴ ꦲꦶ ꦭꦏ꧀ꦑꦟꦺꦤ ꦱꦩꦤ꧀ꦤꦴꦒꦠꦺꦴ ꦱꦕꦺꦥꦶ ꦱꦠ꧀ꦠꦨꦹꦩꦏꦺꦴ ꦥꦴꦱꦴꦢꦺꦴ ꦌꦏꦹꦥꦕꦴꦫꦺꦴ ꦲꦺꦴꦠꦶ, ꦱꦠꦒꦧ꧀ꦨꦁ ꦮꦴ ꦕꦠꦸꦱ꧀ꦱꦴꦭꦁ ꦮꦴ, ꦌꦏꦱꦺꦪ꧀ꦪꦴꦆꦕ꧀ꦕꦺꦮ ꦱꦔ꧀ꦑ꧀ꦪꦁ ꦒꦕ꧀ꦖꦠꦶ. ꦠꦁ ꦱꦤ꧀ꦣꦴꦪ ꦮꦸꦠ꧀ꦠꦁ ‘‘ꦕꦠꦸꦠ꧀ꦡꦺ ꦢꦶꦮꦱꦺ ꦄꦠ꧀ꦡꦔ꧀ꦒꦠꦺ ꦱꦹꦫꦶꦪꦺ ꦄꦤꦸꦥꦱꦩ꧀ꦥꦤ꧀ꦤꦺ ꦤꦶꦥꦤ꧀ꦤꦺ ꦨꦶꦏ꧀ꦑꦸ ꦤꦶꦥꦗ꧀ꦗꦠꦶ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱꦴ’’ꦠꦶꦄꦴꦢꦶ.

ꦠꦠ꧀ꦡ ꦕ ꦤꦶꦥꦗ꧀ꦗꦤꦩꦠ꧀ꦠꦺꦤꦺꦮ ꦥꦴꦕꦶꦠ꧀ꦠꦶꦪꦁ. ꦱꦕꦺ ꦥꦤ ꦱꦩ꧀ꦧꦲꦸꦭꦴ ꦱꦴꦩꦟꦺꦫꦴ, ꦌꦏꦺꦴ ꦨꦶꦏ꧀ꦑꦸ, ꦱꦴꦩꦟꦺꦫꦒꦟꦤꦴꦪ ꦥꦴꦕꦶꦠ꧀ꦠꦶꦪꦴ. ꦠꦺ ꦕꦺ ꦈꦛ꧀ꦜꦴꦪꦸꦛ꧀ꦜꦴꦪ ꦤꦶꦥꦗ꧀ꦗꦤ꧀ꦠꦶ, ꦠꦺꦱꦁ ꦥꦪꦺꦴꦒꦺ ꦥꦪꦺꦴꦒꦺ ꦨꦶꦏ꧀ꦑꦸꦱ꧀ꦱ ꦄꦴꦥꦠ꧀ꦠꦶ. ꦨꦶꦏ꧀ꦑꦸꦱ꧀ꦱ ꦈꦛ꧀ꦜꦴꦪꦸꦛ꧀ꦜꦴꦪ ꦤꦶꦥꦗ꧀ꦗꦤꦺ ꦥꦤ ꦨꦶꦏ꧀ꦑꦸꦱ꧀ꦱꦺꦮ ꦥꦪꦺꦴꦒꦺꦤ ꦨꦶꦏ꧀ꦑꦸꦱ꧀ꦱ ꦄꦴꦥꦠ꧀ꦠꦶ. ꦱꦕꦺ ꦥꦤ ꦱꦩ꧀ꦧꦲꦸꦭꦴ ꦨꦶꦏ꧀ꦑꦹ ꦌꦏꦺꦴ ꦱꦴꦩꦟꦺꦫꦺꦴ ꦱꦧ꧀ꦧꦺꦱꦁ ꦄꦴꦥꦠ꧀ꦠꦶꦁ ꦏꦫꦺꦴꦠꦶ, ꦠꦱ꧀ꦱ ꦈꦛ꧀ꦜꦴꦪꦸꦛ꧀ꦜꦴꦪ ꦤꦶꦥꦗ꧀ꦗꦤꦺꦤꦥꦶ ꦨꦶꦏ꧀ꦑꦹꦤꦁ ꦄꦴꦥꦠ꧀ꦠꦶꦪꦺꦮ. ꦈꦨꦪꦺꦱꦁ ꦱꦩ꧀ꦧꦲꦸꦭꦨꦴꦮꦺꦥꦶ ꦌꦱꦺꦮ ꦤꦪꦺꦴ.

ꦄꦥꦶꦕꦺꦠ꧀ꦡ ꦌꦏꦴꦮꦴꦱꦴꦢꦶꦏꦩ꧀ꦥꦶ ꦕꦠꦸꦏ꧀ꦏꦁ ꦮꦺꦢꦶꦠꦧ꧀ꦧꦁ. ꦪꦺꦴ ꦲꦶ ꦌꦏꦱ꧀ꦩꦶꦁ ꦄꦴꦮꦴꦱꦺ ꦌꦏꦺꦤꦺꦮ ꦄꦤꦸꦥꦱꦩ꧀ꦥꦤ꧀ꦤꦺꦤ ꦱꦢ꧀ꦣꦶꦁ ꦠꦶꦫꦠ꧀ꦠꦁ ꦱꦲꦱꦺꦪ꧀ꦪꦁ ꦏꦥ꧀ꦥꦺꦠꦶ, ꦠꦱ꧀ꦱ ꦕꦠꦸꦠ꧀ꦡꦢꦶꦮꦱꦠꦺꦴ ꦥꦛ꧀ꦜꦴꦪ ꦢꦺꦮꦱꦶꦏꦴ ꦄꦴꦥꦠ꧀ꦠꦶ. ꦪꦺꦴꦥꦶ ꦌꦏꦱ꧀ꦩꦶꦁꦪꦺꦮ ꦄꦴꦮꦴꦱꦺ ꦤꦴꦤꦴꦄꦤꦸꦥꦱꦩ꧀ꦥꦤ꧀ꦤꦺꦲꦶ ꦱꦢ꧀ꦣꦶꦁ ꦠꦶꦫꦠ꧀ꦠꦁ ꦱꦲꦱꦺꦪ꧀ꦪꦁ ꦏꦥ꧀ꦥꦺꦠꦶ, ꦠꦱ꧀ꦱꦥꦶ. ꦪꦺꦴꦥꦶ ꦤꦴꦤꦴꦄꦴꦮꦴꦱꦺꦱꦸ ꦌꦏꦺꦤꦺꦮ ꦄꦤꦸꦥꦱꦩ꧀ꦥꦤ꧀ꦤꦺꦤ ꦱꦢ꧀ꦣꦶꦁ ꦠꦶꦫꦠ꧀ꦠꦁ ꦱꦲꦱꦺꦪ꧀ꦪꦁ ꦏꦥ꧀ꦥꦺꦠꦶ, ꦠꦱ꧀ꦱꦥꦶ. ꦪꦺꦴꦥꦶ ꦤꦴꦤꦴꦄꦴꦮꦴꦱꦺꦱꦸ ꦤꦴꦤꦴꦄꦤꦸꦥꦱꦩ꧀ꦥꦤ꧀ꦤꦺꦲꦶ ꦱꦢ꧀ꦣꦶꦁ ꦪꦺꦴꦗꦤꦱꦠꦩ꧀ꦥꦶ ꦒꦤ꧀ꦠ꧀ꦮꦴ ꦱꦲꦱꦺꦪ꧀ꦪꦁ ꦏꦥ꧀ꦥꦺꦠꦶ, ꦠꦱ꧀ꦱꦥꦶ ꦕꦠꦸꦠ꧀ꦡꦢꦶꦮꦱꦠꦺꦴ ꦥꦛ꧀ꦜꦴꦪ ꦢꦺꦮꦱꦶꦏꦴ ꦄꦴꦥꦠ꧀ꦠꦶ.

ꦄꦪꦚ꧀ꦕ ꦱꦲꦱꦺꦪ꧀ꦪꦴꦥꦠ꧀ꦠꦶ ꦤꦴꦩ ‘‘ꦨꦶꦏ꧀ꦑꦸꦁ ꦜꦥꦺꦠ꧀ꦮꦴ ꦄꦮꦱꦺꦱꦺꦴ ꦄꦤꦸꦥꦱꦩ꧀ꦥꦤ꧀ꦤꦺꦴ ꦤꦴꦩꦴ’’ꦠꦶ ꦮꦕꦤꦠꦺꦴ ꦠꦶꦫꦕ꧀ꦖꦴꦤꦒꦠꦺꦤꦥꦶ ꦱꦢ꧀ꦣꦶꦁ ꦲꦺꦴꦠꦶ, ꦠꦠ꧀ꦫ ꦠꦶꦫꦕ꧀ꦖꦴꦤꦒꦠꦱ꧀ꦱ ꦥꦫꦶꦕ꧀ꦖꦺꦢꦺꦴ ꦩꦺꦡꦸꦤꦣꦩ꧀ꦩꦴꦥꦠ꧀ꦠꦶꦪꦴ ꦮꦸꦠ꧀ꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦺꦴ. ꦠꦱ꧀ꦩꦴ ꦱꦕꦺꦥꦶ ꦒꦺꦴꦣꦴꦧꦶꦭ꦳ꦴꦭꦩꦔ꧀ꦒꦸꦱꦴꦢꦷꦱꦸ ꦏꦺꦴꦕꦶ ꦥꦮꦶꦱꦶꦠ꧀ꦮꦴ ꦨꦶꦏ꧀ꦑꦸꦤꦺꦴ ꦮꦱꦤꦱꦺꦤꦴꦱꦤꦺ ꦌꦏꦹꦥꦕꦴꦫꦛ꧀ꦜꦴꦤꦺ ꦱꦪꦠꦶ, ꦱꦲꦱꦺꦪ꧀ꦪꦴꦮ ꦲꦺꦴꦠꦶ.

ꦪꦢꦶ ꦥꦤ ꦡꦩ꧀ꦨꦴꦤꦁ ꦈꦥꦫꦶ ꦏꦠꦥꦴꦱꦴꦢꦱ꧀ꦱ ꦈꦥꦫꦶꦩꦠꦭꦺꦤ ꦱꦢ꧀ꦣꦶꦁ ꦄꦱꦩ꧀ꦧꦢ꧀ꦣꦨꦶꦠ꧀ꦠꦶꦏꦱ꧀ꦱ ꦨꦶꦠ꧀ꦠꦶꦪꦴ ꦈꦥꦫꦶ ꦜꦶꦠꦱꦸꦱꦶꦫꦠꦸꦭꦴꦱꦷꦱꦱ꧀ꦱ ꦱꦸꦱꦶꦫꦺꦤ ꦥꦮꦶꦱꦶꦠ꧀ꦮꦴ ꦠꦸꦭꦴꦪ ꦄꦧ꧀ꦨꦤ꧀ꦠꦫꦺ ꦱꦪꦶꦠ꧀ꦮꦴ ꦠꦺꦤꦺꦮ ꦱꦸꦱꦶꦫꦺꦤ ꦤꦶꦏ꧀ꦑꦩꦶꦠ꧀ꦮꦴ ꦒꦕ꧀ꦖꦠꦶ, ꦲꦺꦛ꧀ꦜꦴꦥꦴꦱꦴꦢꦺ ꦱꦪꦶꦠꦨꦶꦏ꧀ꦑꦸꦱ꧀ꦱ ꦄꦤꦴꦥꦠ꧀ꦠꦶ. ꦱꦕꦺ ꦖꦢꦤꦺ ꦖꦶꦢ꧀ꦢꦁ ꦲꦺꦴꦠꦶ, ꦠꦺꦤ ꦥꦮꦶꦱꦶꦠ꧀ꦮꦴ ꦄꦤ꧀ꦠꦺꦴꦖꦢꦤꦺ ꦮꦱꦶꦠ꧀ꦮꦴ ꦠꦺꦤꦺꦮ ꦥꦏ꧀ꦏꦩꦠꦶ, ꦤꦴꦤꦹꦥꦕꦴꦫꦺ ꦈꦥꦫꦶꦩꦠꦭꦺ ꦖꦢꦤꦧ꧀ꦨꦤ꧀ꦠꦫꦺ ꦱꦪꦶꦠꦱ꧀ꦱ ꦄꦴꦥꦠ꧀ꦠꦶ, ꦲꦺꦛ꧀ꦜꦶꦩꦠꦭꦺ ꦱꦪꦶꦠꦱ꧀ꦱ ꦄꦤꦴꦥꦠ꧀ꦠꦶ. ꦱꦕꦺ ꦄꦤ꧀ꦠꦺꦴꦥꦴꦱꦴꦢꦺꦤꦺꦮ ꦄꦴꦫꦺꦴꦲꦶꦠ꧀ꦮꦴ ꦱꦧ꧀ꦧꦠꦭꦴꦤꦶ ꦥꦫꦶꦨꦸꦚ꧀ꦗꦤ꧀ꦠꦶ, ꦌꦏꦹꦥꦕꦴꦫꦴꦤꦶ ꦲꦺꦴꦤ꧀ꦠꦶ, ꦠꦺꦱꦸ ꦪꦠ꧀ꦡ ꦏꦠ꧀ꦡꦕꦶ ꦱꦪꦶꦠꦱ꧀ꦱ ꦄꦴꦥꦠ꧀ꦠꦶ.

ꦱꦨꦴꦱꦔ꧀ꦑꦺꦥꦺꦤ ꦏꦠꦺ ꦄꦝ꧀ꦞꦏꦸꦛ꧀ꦛꦏꦱꦺꦤꦴꦱꦤꦺ ꦱꦪꦶꦠꦱ꧀ꦱ ꦮꦴꦭ꦳ꦱꦔ꧀ꦓꦴꦛꦴꦢꦷꦱꦸ ꦏꦥꦺꦴꦠꦴꦢꦪꦺꦴ ꦥꦮꦶꦱꦶꦠ꧀ꦮꦴ ꦱꦪꦤ꧀ꦠꦶ, ꦄꦴꦥꦠ꧀ꦠꦶꦪꦺꦮ. ꦥꦫꦶꦏ꧀ꦑꦺꦥꦱ꧀ꦱ ꦧꦲꦶꦒꦠꦺ ꦤꦶꦧ꧀ꦧꦏꦺꦴꦱꦧ꧀ꦨꦤ꧀ꦠꦫꦺ ꦱꦪꦤ꧀ꦠꦶ, ꦄꦤꦴꦥꦠ꧀ꦠꦶ. ꦥꦫꦶꦩꦟ꧀ꦝꦭꦁ ꦮꦴ ꦕꦠꦸꦫꦱ꧀ꦱꦁ ꦮꦴ ꦌꦏꦕ꧀ꦖꦢꦤꦴꦪ ꦒꦧ꧀ꦨꦩꦴꦭꦴꦪ ꦱꦠꦒꦧ꧀ꦨꦁ ꦕꦺꦥꦶ ꦱꦺꦤꦴꦱꦤꦁ ꦲꦺꦴꦠꦶ, ꦠꦠ꧀ꦫ ꦕꦺ ꦌꦏꦺꦤ ꦱꦴꦣꦴꦫꦟꦢ꧀ꦮꦴꦫꦺꦤ ꦥꦮꦶꦱꦶꦠ꧀ꦮꦴ ꦮꦶꦱꦸꦁ ꦥꦴꦏꦴꦫꦺꦤ ꦄꦥꦫꦶꦕ꧀ꦖꦶꦤ꧀ꦤꦒꦧ꧀ꦨꦹꦥꦕꦴꦫꦺ ꦱꦧ꧀ꦧꦒꦧ꧀ꦨꦺ ꦥꦮꦶꦱꦤ꧀ꦠꦶ, ꦌꦏꦒꦧ꧀ꦨꦺꦥꦶ ꦄꦤꦸꦥꦱꦩ꧀ꦥꦤ꧀ꦤꦺ ꦤꦶꦥꦤ꧀ꦤꦺ ꦱꦧ꧀ꦧꦒꦧ꧀ꦨꦺꦱꦸ ꦤꦶꦥꦤ꧀ꦤꦴꦤꦁ ꦄꦴꦥꦠ꧀ꦠꦶ. ꦱꦕꦺ ꦱꦥꦩꦸꦑꦴ ꦒꦧ꧀ꦨꦴ ꦲꦺꦴꦤ꧀ꦠꦶ, ꦥꦩꦸꦑꦱ꧀ꦱ ꦈꦥꦫꦶ ꦄꦕ꧀ꦖꦤ꧀ꦤꦁ ꦈꦕ꧀ꦕꦮꦠ꧀ꦡꦸꦏꦁ ꦕꦺꦥꦶ ꦲꦺꦴꦠꦶ, ꦥꦩꦸꦑꦺ ꦱꦪꦶꦠꦺꦴ ꦒꦧ꧀ꦨꦺ ꦱꦪꦶꦠꦴꦤꦁ ꦄꦴꦥꦠ꧀ꦠꦶꦁ ꦤ ꦏꦫꦺꦴꦠꦶ. ꦱꦕꦺ ꦥꦤ ꦒꦧ꧀ꦨꦕ꧀ꦖꦢꦤꦺꦤꦺꦮ ꦱꦢ꧀ꦣꦶꦁ ꦱꦩ꧀ꦧꦢ꧀ꦣꦕ꧀ꦖꦢꦤꦁ ꦲꦺꦴꦠꦶ, ꦠꦠ꧀ꦫ ꦱꦪꦶꦠꦺꦴ ꦱꦧ꧀ꦧꦺꦱꦁ ꦄꦴꦥꦠ꧀ꦠꦶꦁ ꦏꦫꦺꦴꦠꦶ. ꦏꦱ꧀ꦩꦴ? ꦱꦧ꧀ꦧꦕ꧀ꦖꦤ꧀ꦤꦠ꧀ꦠꦴ ꦱꦧ꧀ꦧꦥꦫꦶꦕ꧀ꦖꦤ꧀ꦤꦠ꧀ꦠꦴ ꦕ, ꦒꦧ꧀ꦨꦥꦫꦶꦏ꧀ꦑꦺꦥꦺꦴꦪꦺꦮ ꦲꦶꦱ꧀ꦱ ꦥꦫꦶꦏ꧀ꦑꦺꦥꦺꦴꦠꦶ. ꦌꦠꦺꦤꦺꦮ ꦲꦶ ꦤꦪꦺꦤ ꦄꦛ꧀ꦜꦏꦡꦴꦱꦸ ꦭꦺꦴꦲꦥꦴꦱꦴꦢꦥꦫꦶꦏ꧀ꦑꦺꦥꦱ꧀ꦱ ꦕꦠꦹꦱꦸ ꦢ꧀ꦮꦴꦫꦏꦺꦴꦛ꧀ꦜꦏꦺꦱꦸ ꦄꦴꦥꦠ꧀ꦠꦶ ꦮꦸꦠ꧀ꦠꦴ.

ꦪꦁ ꦥꦤ ꦄꦤ꧀ꦣꦏꦛ꧀ꦜꦏꦡꦴꦪꦁ ‘‘ꦄꦥꦫꦶꦏ꧀ꦑꦶꦠ꧀ꦠꦺ ꦥꦩꦸꦑꦺ ꦄꦤꦴꦥꦠ꧀ꦠꦷꦠꦶ ꦨꦹꦩꦶꦪꦁ ꦮꦶꦤꦴ ꦗꦒꦠꦶꦪꦴ ꦥꦩꦸꦑꦁ ꦱꦤ꧀ꦣꦴꦪ ꦏꦡꦶꦤ’’ꦤ꧀ꦠꦶ ꦮꦸꦠ꧀ꦠꦁ, ꦠꦁ ꦄꦤ꧀ꦣꦏꦫꦛ꧀ꦜꦺ ꦥꦴꦛꦺꦏ꧀ꦏꦱꦤ꧀ꦤꦶꦮꦺꦱꦴ ꦌꦏꦕ꧀ꦖꦢꦤꦴ ꦒꦧ꧀ꦨꦥꦴꦭ꦳ꦶꦪꦺꦴ ꦱꦤ꧀ꦣꦴꦪ ꦮꦸꦠ꧀ꦠꦁ. ꦪꦚ꧀ꦕ ꦠꦠ꧀ꦡ ‘‘ꦨꦹꦩꦶꦪꦁ ꦮꦶꦤꦴ ꦗꦒꦠꦶꦪꦴ’’ꦠꦶ ꦮꦸꦠ꧀ꦠꦁ, ꦠꦁ ꦤꦺꦮ ꦄꦛ꧀ꦜꦏꦡꦴꦱꦸ ꦄꦠ꧀ꦡꦶ; ꦤ ꦥꦴꦭ꦳ꦶꦪꦴ ꦱꦩꦺꦠꦶ. ꦢꦱꦲꦠ꧀ꦡꦸꦧ꧀ꦧꦺꦣꦴꦥꦶ ꦲꦶ ꦗꦒꦠꦶ ꦥꦫꦶꦏ꧀ꦑꦺꦥꦱꦔ꧀ꦑ꧀ꦪꦁ ꦤ ꦒꦕ꧀ꦖꦠꦶ. ꦠꦱ꧀ꦩꦴ ꦪꦩ꧀ꦥꦶ ꦠꦠ꧀ꦡ ꦢꦸꦠꦶꦪꦱꦶꦏ꧀ꦑꦴꦥꦢꦺ ꦗꦒꦠꦶꦪꦴ ꦥꦩꦴꦟꦁ ꦮꦠ꧀ꦮꦴ ‘‘ꦌꦠꦁ ꦌꦏꦹꦥꦕꦴꦫꦁ ꦥꦫꦶꦕ꧀ꦖꦤ꧀ꦤꦁ ꦤꦴꦩ ꦲꦺꦴꦠꦷ’’ꦠꦶ ꦮꦸꦠ꧀ꦠꦁ, ꦠꦁ ꦤ ꦒꦲꦺꦠꦧ꧀ꦧꦁ. ꦪꦺꦥꦶ ꦌꦏꦱꦴꦭꦢ꧀ꦮꦶꦱꦴꦭꦠꦶꦱꦴꦭꦕꦠꦸꦱ꧀ꦱꦴꦭꦱꦤ꧀ꦤꦶꦮꦺꦱꦴ ꦩꦲꦴꦥꦴꦱꦴꦢꦴ ꦌꦏꦱ꧀ꦩꦶꦁ ꦎꦏꦴꦱꦺ ꦥꦴꦢꦺ ꦣꦺꦴꦮꦶꦠ꧀ꦮꦴ ꦥꦮꦶꦛ꧀ꦜꦺꦤ ꦱꦏ꧀ꦏꦴ ꦲꦺꦴꦤ꧀ꦠꦶ ꦱꦧ꧀ꦧꦠ꧀ꦡ ꦄꦤꦸꦥꦫꦶꦒꦤ꧀ꦠꦸꦁ, ꦠꦺꦱꦸꦥꦶ ꦱꦲꦱꦺꦪ꧀ꦪꦴꦥꦠ꧀ꦠꦶꦪꦴ ꦤ ꦩꦸꦕ꧀ꦕꦠꦶ. ꦱꦕꦺ ꦠꦱ꧀ꦩꦶꦁ ꦠꦱ꧀ꦩꦶꦁ ꦜꦴꦤꦺ ꦈꦥꦕꦴꦫꦁ ꦥꦫꦶꦕ꧀ꦖꦶꦤ꧀ꦢꦶꦠ꧀ꦮꦴ ꦏꦠꦴ ꦲꦺꦴꦤ꧀ꦠꦶ, ꦌꦏꦹꦥꦕꦴꦫꦛ꧀ꦜꦴꦤꦺꦪꦺꦮ ꦄꦴꦥꦠ꧀ꦠꦶ.

ꦢ꧀ꦮꦷꦲꦶ ꦢ꧀ꦮꦴꦫꦺꦲꦶ ꦪꦸꦠ꧀ꦠꦱ꧀ꦱ ꦱꦸꦣꦴꦖꦢꦤꦩꦟ꧀ꦝꦥꦱ꧀ꦱ ꦩꦗ꧀ꦙꦺ ꦥꦴꦏꦴꦫꦁ ꦏꦫꦺꦴꦤ꧀ꦠꦶ, ꦌꦏꦺꦤ ꦢ꧀ꦮꦴꦫꦺꦤ ꦥꦮꦶꦱꦶꦠ꧀ꦮꦴ ꦌꦏꦱ꧀ꦩꦶꦁ ꦥꦫꦶꦕ꧀ꦖꦺꦢꦺ ꦄꦤꦸꦥꦱꦩ꧀ꦥꦤ꧀ꦤꦺꦴ ꦱꦪꦠꦶ, ꦌꦏꦱ꧀ꦩꦶꦁ ꦨꦶꦏ꧀ꦑꦸ, ꦄꦤꦴꦥꦠ꧀ꦠꦶ. ꦥꦴꦏꦴꦫꦺ ꦒꦺꦴꦣꦴꦢꦷꦤꦁ ꦥꦮꦶꦱꦤꦩꦠ꧀ꦠꦩ꧀ꦥꦶ ꦖꦶꦢ꧀ꦢꦁ ꦲꦺꦴꦠꦶ, ꦌꦏꦱ꧀ꦩꦶꦚ꧀ꦕ ꦥꦫꦶꦕ꧀ꦖꦺꦢꦺ ꦒꦺꦴꦣꦴ ꦱꦪꦤ꧀ꦠꦶ, ꦄꦤꦴꦥꦠ꧀ꦠꦶꦪꦺꦮ. ꦤ ꦲꦶ ꦖꦶꦢ꧀ꦢꦺꦤ ꦒꦺꦲꦁ ꦌꦏꦹꦥꦕꦴꦫꦁ ꦤꦴꦩ ꦲꦺꦴꦠꦶ. ꦱꦕꦺ ꦥꦴꦏꦴꦫꦩꦗ꧀ꦙꦺ ꦖꦶꦤ꧀ꦢꦶꦠ꧀ꦮꦴ ꦢ꧀ꦮꦴꦫꦁ ꦪꦺꦴꦗꦺꦤ꧀ꦠꦶ, ꦌꦏꦹꦥꦕꦴꦫꦠꦴꦪ ꦄꦴꦥꦠ꧀ꦠꦶ. ꦠꦁ ꦢ꧀ꦮꦴꦫꦁ ꦏꦮꦴꦛꦺꦤ ꦥꦶꦢꦲꦶꦠ꧀ꦮꦴ ꦱꦪꦤ꧀ꦠꦶ, ꦄꦴꦥꦠ꧀ꦠꦶꦪꦺꦮ. ꦤ ꦲꦶ ꦢ꧀ꦮꦴꦫꦥꦶꦢꦲꦤꦺꦤ ꦒꦺꦲꦁ ꦤꦴꦤꦹꦥꦕꦴꦫꦁ ꦤꦴꦩ ꦲꦺꦴꦠꦶ, ꦢ꧀ꦮꦴꦫꦁ ꦮꦴ ꦄꦢ꧀ꦮꦴꦫꦁ. ꦏꦮꦴꦛꦚ꧀ꦲꦶ ꦱꦁꦮꦫꦟꦮꦶꦮꦫꦟꦺꦲꦶ ꦪꦡꦴꦱꦸꦑꦁ ꦮꦭ꦳ꦚ꧀ꦗꦤꦠ꧀ꦡꦴꦪ ꦏꦠꦁ, ꦤ ꦮꦭ꦳ꦚ꧀ꦗꦤꦹꦥꦕ꧀ꦖꦺꦢꦤꦠ꧀ꦡꦴꦪ. ꦱꦕꦺ ꦥꦤ ꦠꦁ ꦢ꧀ꦮꦴꦫꦁ ꦥꦸꦤ ꦆꦛ꧀ꦜꦏꦴꦲꦶ ꦥꦶꦢꦲꦤ꧀ꦠꦶ, ꦄꦢ꧀ꦮꦴꦫꦁ ꦲꦺꦴꦠꦶ, ꦥꦸꦫꦶꦩꦺ ꦤꦴꦤꦹꦥꦕꦴꦫꦨꦴꦮꦺꦪꦺꦮ ꦠꦶꦛ꧀ꦜꦠꦶ. ꦢꦷꦓꦥꦩꦸꦑꦁ ꦕꦺꦠꦶꦪꦓꦫꦁ ꦲꦺꦴꦠꦶ. ꦌꦏꦁ ꦏꦮꦴꦛꦁ ꦄꦤ꧀ꦠꦺꦴ, ꦌꦏꦁ ꦧꦲꦶ, ꦢ꧀ꦮꦶꦤ꧀ꦤꦁ ꦏꦮꦴꦛꦴꦤꦁ ꦄꦤ꧀ꦠꦫꦺ ꦄꦤꦸꦥꦱꦩ꧀ꦥꦤ꧀ꦤꦺꦴ ꦄꦤ꧀ꦠꦺꦴꦕꦺꦠꦶꦪꦓꦫꦺ ꦱꦪꦤ꧀ꦠꦱ꧀ꦱ ꦄꦴꦥꦠ꧀ꦠꦶꦁ ꦏꦫꦺꦴꦠꦶ, ꦌꦏꦹꦥꦕꦴꦫꦠ꧀ꦠꦴ.

ꦠꦠ꧀ꦫ ꦪꦱ꧀ꦱ ‘‘ꦱꦶꦪꦴ ꦄꦪꦁ ꦌꦏꦹꦥꦕꦴꦫꦤꦴꦤꦹꦥꦕꦴꦫꦠꦴ ꦤꦴꦩ ꦈꦢꦺꦴꦱꦶꦠꦱꦶꦏ꧀ꦑꦴꦥꦢꦺ ꦮꦸꦠ꧀ꦠꦴ, ꦆꦣ ꦥꦤ ‘ꦱꦺꦪ꧀ꦪꦴ ꦤꦴꦩ ꦱꦧ꧀ꦧꦕ꧀ꦖꦤ꧀ꦤꦴ ꦱꦧ꧀ꦧꦥꦫꦶꦕ꧀ꦖꦤ꧀ꦤꦴ ꦪꦺꦨꦸꦪ꧀ꦪꦺꦤ ꦖꦤ꧀ꦤꦴ ꦪꦺꦨꦸꦪ꧀ꦪꦺꦤ ꦥꦫꦶꦕ꧀ꦖꦤ꧀ꦤꦴ’ꦠꦶ ꦌꦠ꧀ꦠꦏꦩꦺꦮ ꦮꦸꦠ꧀ꦠꦁ, ꦥꦶꦲꦶꦠꦢ꧀ꦮꦴꦫꦺꦴ ꦕ ꦒꦧ꧀ꦨꦺꦴ ꦱꦧ꧀ꦧꦥꦫꦶꦕ꧀ꦖꦤ꧀ꦤꦺꦴꦮ ꦲꦺꦴꦠꦶ. ꦠꦱ꧀ꦩꦴ ꦠꦠ꧀ꦡ ꦄꦤ꧀ꦠꦺꦴ ꦱꦪꦶꦠꦺꦤꦺꦮ ꦱꦢ꧀ꦣꦶꦁ ꦄꦴꦥꦠ꧀ꦠꦶ, ꦧꦲꦶ ꦱꦪꦶꦠꦺꦤ ꦄꦤꦴꦥꦠ꧀ꦠꦷ’’ꦠꦶ. ꦱꦺꦴ ꦌꦮꦁ ꦮꦠ꧀ꦠꦧ꧀ꦧꦺꦴ – ‘‘ꦄꦥꦶꦲꦶꦠꦢ꧀ꦮꦴꦫꦺ ꦥꦤ ꦏꦱ꧀ꦩꦴ ꦧꦲꦶ ꦱꦪꦶꦠꦺꦤ ꦄꦴꦥꦠ꧀ꦠꦷ’’ꦠꦶ? ꦥꦩꦸꦑꦱ꧀ꦱ ꦒꦧ꧀ꦨꦺꦤ ꦱꦢ꧀ꦣꦶꦁ ꦱꦧ꧀ꦧꦕ꧀ꦖꦤ꧀ꦤꦠ꧀ꦠꦴ. ‘‘ꦏꦶꦁ ꦥꦤ ꦒꦧ꧀ꦨꦺ ꦥꦶꦲꦶꦠꦺ ꦖꦢꦤꦁ ꦮꦶꦢ꧀ꦣꦱ꧀ꦠꦁ ꦲꦺꦴꦠꦷ’’ꦠꦶ? ꦤ ꦮꦶꦢ꧀ꦣꦱ꧀ꦠꦁ, ꦒꦧ꧀ꦨꦺꦤ ꦱꦢ꧀ꦣꦶꦁ ꦥꦩꦸꦑꦱ꧀ꦱ ꦱꦧ꧀ꦧꦥꦫꦶꦕ꧀ꦖꦤ꧀ꦤꦠꦴ ꦤ ꦲꦺꦴꦠꦶ. ‘‘ꦏꦶꦁ ꦥꦫꦶꦏ꧀ꦑꦺꦥꦺꦴ ꦮꦶꦢ꧀ꦣꦱ꧀ꦠꦺꦴ’’ꦠꦶ? ꦄꦢ꧀ꦣꦴ ꦮꦏ꧀ꦑꦠꦶ ‘‘ꦤ ꦮꦶꦢ꧀ꦣꦱ꧀ꦠꦺꦴ, ꦏꦮꦴꦛꦺꦤ ꦈꦥꦕꦴꦫꦺꦴ ꦥꦫꦶꦕ꧀ꦖꦤ꧀ꦤꦺꦴ’’ꦠꦶ. ꦌꦮꦁ ꦢꦹꦫꦩ꧀ꦥꦶ ꦒꦤ꧀ꦠ꧀ꦮꦴ ꦥꦸꦤ ꦌꦏꦹꦥꦕꦴꦫꦤꦴꦤꦹꦥꦕꦴꦫꦠꦁꦪꦺꦮ ꦥꦕ꧀ꦕꦴꦒꦩꦶꦱ꧀ꦱꦠꦶ.

ꦄꦥꦶꦕ ꦪꦢꦶ ꦧ꧀ꦪꦚ꧀ꦗꦤꦩꦠ꧀ꦠꦺꦪꦺꦮ ꦄꦠ꧀ꦡꦺꦴ ꦱꦸꦮꦶꦚ꧀ꦚꦺꦪ꧀ꦪꦺꦴ ꦱꦶꦪꦴ, ꦱꦧ꧀ꦧꦕ꧀ꦖꦤ꧀ꦤꦴꦠꦶ ꦮꦕꦤꦠꦺꦴ ꦥꦚ꧀ꦕꦤ꧀ꦤꦁ ꦄꦚ꧀ꦚꦠꦫꦺꦤ ꦖꦢꦤꦺꦤ ꦖꦤ꧀ꦤꦴ ꦌꦮ ꦱꦺꦪ꧀ꦪꦴ ꦱꦶꦪꦴ, ꦤ ꦄꦚ꧀ꦚꦺꦤ. ꦌꦮꦚ꧀ꦕ ꦱꦠꦶ ꦥꦢꦫꦕ꧀ꦖꦤ꧀ꦤꦴꦢꦷꦱꦸ ꦄꦤꦴꦥꦠ꧀ꦠꦶ ꦱꦶꦪꦴ. ꦠꦠꦺꦴ ꦪꦢꦠ꧀ꦡꦁ ꦱꦶꦏ꧀ꦑꦴꦥꦢꦁ ꦥꦚ꧀ꦚꦠ꧀ꦠꦁ, ꦱ꧀ꦮꦺꦮ ꦄꦠ꧀ꦡꦺꦴ ꦥꦫꦶꦲꦴꦪꦺꦪ꧀ꦪ. ꦥꦫꦶꦲꦴꦪꦠꦸ ꦮꦴ ꦩꦴ ꦮꦴ, ꦏꦡꦁ ꦄꦮꦸꦠ꧀ꦠꦁ ꦒꦲꦺꦠꦧ꧀ꦧꦤ꧀ꦠꦶ; ꦏꦺꦴ ꦮꦴ ꦮꦢꦠꦶ ‘‘ꦄꦮꦸꦠ꧀ꦠꦁ ꦒꦲꦺꦠꦧ꧀ꦧ’’ꦤ꧀ꦠꦶ? ꦮꦸꦠ꧀ꦠꦚ꧀ꦲꦺꦠꦁ ꦄꦤꦶꦪꦠꦺꦱꦸ – ‘‘ꦥꦛꦶꦕ꧀ꦖꦤ꧀ꦤꦁ ꦤꦴꦩ ꦄꦴꦱꦤꦁ ꦏꦸꦛ꧀ꦛꦺꦤ ꦮꦴ ꦏꦮꦴꦛꦺꦤ ꦮꦴ ꦏꦶꦭꦚ꧀ꦗꦺꦤ ꦮꦴ ꦱꦴꦟꦶꦥꦴꦏꦴꦫꦺꦤ ꦮꦴ ꦫꦸꦏ꧀ꦑꦺꦤ ꦮꦴ ꦡꦩ꧀ꦨꦺꦤ ꦮꦴ ꦏꦺꦴꦛ꧀ꦜꦭꦶꦏꦴꦪ ꦮꦴ ꦪꦺꦤ ꦏꦺꦤꦕꦶ ꦥꦛꦶꦕ꧀ꦖꦤ꧀ꦤꦁ ꦲꦺꦴꦠꦷ’’ꦠꦶ. ꦠꦱ꧀ꦩꦴ ꦪꦡꦴ ꦠꦠ꧀ꦡ ꦪꦺꦤ ꦏꦺꦤꦕꦶ ꦥꦛꦶꦕ꧀ꦖꦤ꧀ꦤꦁ ꦥꦛꦶꦕ꧀ꦖꦤ꧀ꦤꦩꦺꦮ, ꦌꦮꦩꦶꦣꦴꦥꦶ ꦒꦲꦺꦠꦧ꧀ꦧꦁ. ꦠꦱ꧀ꦩꦴ ꦱꦺꦤꦴꦱꦤꦁ ꦑꦸꦢ꧀ꦢꦏꦁ ꦮꦴ ꦲꦺꦴꦠꦸ ꦩꦲꦤ꧀ꦠꦁ ꦮꦴ ꦄꦚ꧀ꦚꦺꦤ ꦱꦢ꧀ꦣꦶꦁ ꦱꦩ꧀ꦧꦢ꧀ꦣꦁ ꦮꦴ ꦄꦱꦩ꧀ꦧꦢ꧀ꦣꦁ ꦮꦴ ꦢꦷꦓꦁ ꦮꦴ ꦮꦛ꧀ꦛꦁ ꦮꦴ ꦕꦠꦸꦫꦱ꧀ꦱꦁ ꦮꦴ ꦌꦏꦨꦹꦩꦏꦁ ꦮꦴ, ꦄꦤꦺꦏꦨꦹꦩꦏꦁ ꦮꦴ, ꦪꦁ ꦪꦁ ꦌꦏꦹꦥꦕꦴꦫꦁ ꦱꦧ꧀ꦧꦠ꧀ꦡ ꦪꦺꦤ ꦏꦺꦤꦕꦶ ꦥꦛꦶꦕ꧀ꦖꦴꦢꦤꦺꦤ ꦱꦧ꧀ꦧꦕ꧀ꦖꦤ꧀ꦤꦺ ꦱꦧ꧀ꦧꦥꦫꦶꦕ꧀ꦖꦤ꧀ꦤꦺ ꦪꦺꦨꦸꦪ꧀ꦪꦺꦤ ꦮꦴ ꦖꦤ꧀ꦤꦺ ꦪꦺꦨꦸꦪ꧀ꦪꦺꦤ ꦮꦴ ꦥꦫꦶꦕ꧀ꦖꦤ꧀ꦤꦺ ꦱꦲꦱꦺꦪ꧀ꦪꦴꦥꦠ꧀ꦠꦶ ꦲꦺꦴꦠꦷꦠꦶ.

꧕꧓. ꦈꦥꦝ꧀ꦞꦕ꧀ꦖꦤ꧀ꦤꦺ ꦈꦥꦝ꧀ꦞꦥꦫꦶꦕ꧀ꦖꦤ꧀ꦤꦺ ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱꦴꦠꦶ ꦌꦠ꧀ꦡ ꦱꦧ꧀ꦧꦕ꧀ꦖꦤ꧀ꦤꦺ ꦈꦥꦝ꧀ꦞꦥꦫꦶꦕ꧀ꦖꦤ꧀ꦤꦺꦠꦶ ꦌꦮꦩꦴꦢꦷꦱꦸꦥꦶ ꦩꦲꦴꦥꦕ꧀ꦕꦫꦶꦪꦁ ꦢꦸꦏ꧀ꦏꦛꦩꦺꦮꦴꦠꦶ ꦮꦸꦠ꧀ꦠꦁ. ꦩꦲꦴꦄꦛ꧀ꦜꦏꦡꦴꦪꦁ ꦥꦤ ‘‘ꦱꦧ꧀ꦧꦕ꧀ꦖꦤ꧀ꦤꦺ ꦪꦺꦨꦸꦪ꧀ꦪꦺꦤꦥꦫꦶꦕ꧀ꦖꦤ꧀ꦤꦺ ꦥꦴꦕꦶꦠ꧀ꦠꦶꦪꦁ, ꦱꦧ꧀ꦧꦕ꧀ꦖꦤ꧀ꦤꦺ ꦈꦥꦝ꧀ꦞꦥꦫꦶꦕ꧀ꦖꦤ꧀ꦤꦺ ꦥꦴꦕꦶꦠ꧀ꦠꦶꦪꦁ, ꦪꦺꦨꦸꦪ꧀ꦪꦺꦤꦖꦤ꧀ꦤꦺ ꦈꦥꦝ꧀ꦞꦥꦫꦶꦕ꧀ꦖꦤ꧀ꦤꦺ ꦥꦴꦕꦶꦠ꧀ꦠꦶꦪꦁ, ꦱꦧ꧀ꦧꦥꦫꦶꦕ꧀ꦖꦤ꧀ꦤꦺ ꦪꦺꦨꦸꦪ꧀ꦪꦺꦤꦖꦤ꧀ꦤꦺ ꦥꦴꦕꦶꦠ꧀ꦠꦶꦪꦁ, ꦱꦧ꧀ꦧꦥꦫꦶꦖꦤ꧀ꦤꦺ ꦈꦥꦝ꧀ꦞꦕ꧀ꦖꦤ꧀ꦤꦺ ꦥꦴꦕꦶꦠ꧀ꦠꦶꦪꦁ, ꦪꦺꦨꦸꦪ꧀ꦪꦺꦤꦥꦫꦶꦕ꧀ꦖꦤ꧀ꦤꦺ ꦈꦥꦝ꧀ꦞꦕ꧀ꦖꦤ꧀ꦤꦺ ꦥꦴꦕꦶꦠ꧀ꦠꦶꦪꦁ, ꦥꦴꦭ꦳ꦶꦪꦁ ꦮꦸꦠ꧀ꦠꦥꦴꦕꦶꦠ꧀ꦠꦶꦪꦺꦤ ꦱꦢ꧀ꦣꦶꦁ ꦱꦠ꧀ꦠ ꦥꦴꦕꦶꦠ꧀ꦠꦶꦪꦴꦤꦷ’’ꦠꦶ ꦮꦸꦠ꧀ꦠꦁ. ‘‘ꦱꦧ꧀ꦧꦕ꧀ꦖꦤ꧀ꦤꦺ ꦕꦹꦭ꦳ꦏꦥꦫꦶꦕ꧀ꦖꦤ꧀ꦤꦺ ꦢꦸꦏ꧀ꦏꦛꦁ, ꦪꦺꦨꦸꦪ꧀ꦪꦺꦤꦖꦤ꧀ꦤꦺ ꦕꦹꦭ꦳ꦏꦥꦫꦶꦕ꧀ꦖꦤ꧀ꦤꦺ ꦢꦸꦏ꧀ꦏꦛꦁ, ꦱꦧ꧀ꦧꦥꦫꦶꦕ꧀ꦖꦤ꧀ꦤꦺ ꦕꦹꦭ꦳ꦏꦕ꧀ꦖꦤ꧀ꦤꦺ ꦢꦸꦏ꧀ꦏꦛꦁ, ꦪꦺꦨꦸꦪ꧀ꦪꦺꦤꦥꦫꦶꦕ꧀ꦖꦤ꧀ꦤꦺ ꦕꦹꦭ꦳ꦏꦕ꧀ꦖꦤ꧀ꦤꦺ ꦢꦸꦏ꧀ꦏꦛꦁ, ꦥꦴꦭ꦳ꦶꦪꦁ ꦢꦸꦏ꧀ꦏꦛꦺꦤ ꦱꦲ ꦥꦚ꧀ꦕ ꦢꦸꦏ꧀ꦏꦛꦴꦤꦷ’’ꦠꦶ ꦮꦸꦠ꧀ꦠꦁ.

‘‘ꦈꦥꦝ꧀ꦞꦕ꧀ꦖꦤ꧀ꦤꦺ ꦕꦹꦭ꦳ꦏꦥꦫꦶꦕ꧀ꦖꦤ꧀ꦤꦺ ꦄꦤꦴꦥꦠ꧀ꦠꦶ, ꦈꦥꦝ꧀ꦞꦥꦫꦶꦕ꧀ꦖꦤ꧀ꦤꦺ ꦕꦹꦭ꦳ꦏꦕ꧀ꦖꦤ꧀ꦤꦺ ꦄꦤꦴꦥꦠ꧀ꦠꦶ, ꦕꦹꦭ꦳ꦏꦕ꧀ꦖꦤ꧀ꦤꦺ ꦕꦹꦭ꦳ꦏꦥꦫꦶꦕ꧀ꦖꦤ꧀ꦤꦺ ꦄꦤꦴꦥꦠ꧀ꦠꦶ, ꦱꦧ꧀ꦧꦕ꧀ꦖꦤ꧀ꦤꦺ ꦱꦧ꧀ꦧꦄꦥꦫꦶꦕ꧀ꦖꦤ꧀ꦤꦺꦠꦶ ꦕ ꦌꦠ꧀ꦡ ꦱꦺꦤꦩ꧀ꦧꦩꦟ꧀ꦝꦥꦮꦟ꧀ꦟꦁ ꦲꦺꦴꦠꦷ’’ꦠꦶ ꦮꦸꦠ꧀ꦠꦁ. ꦆꦩꦶꦤꦴꦥꦺꦠꦁ ꦮꦺꦢꦶꦠꦧ꧀ꦧꦁ – ‘‘ꦪꦡꦴ ꦗꦒꦠꦶ ꦥꦫꦶꦏ꧀ꦑꦺꦥꦱꦔ꧀ꦑꦪ ꦤ ꦒꦕ꧀ꦖꦠꦷ’’ꦠꦶ. ꦱꦺꦱꦁ ꦈꦠ꧀ꦠꦴꦤꦠ꧀ꦡꦩꦺꦮ.

ꦌꦭ꦳ꦏꦭꦺꦴꦩꦱꦩꦸꦛ꧀ꦜꦴꦤꦁ – ꦏꦴꦪꦠꦺꦴ ꦕ ꦏꦴꦪꦕꦶꦠ꧀ꦠꦠꦺꦴ ꦕ ꦱꦩꦸꦛ꧀ꦜꦴꦠꦶ, ꦏꦶꦫꦶꦪꦁ, ꦤꦺꦴꦱꦚ꧀ꦚꦴꦮꦶꦩꦺꦴꦏ꧀ꦑꦁ, ꦄꦕꦶꦠ꧀ꦠꦏꦁ, ꦥꦟ꧀ꦟꦠ꧀ꦠꦶꦮꦗ꧀ꦗꦁ, ꦏꦴꦪꦏꦩ꧀ꦩꦁ, ꦠꦶꦕꦶꦠ꧀ꦠꦁ, ꦠꦶꦮꦺꦢꦤꦤ꧀ꦠꦶ.

ꦱꦲꦱꦺꦪ꧀ꦪꦱꦶꦏ꧀ꦑꦴꦥꦢꦁ ꦥꦚ꧀ꦕꦩꦁ.

꧖. ꦢꦸꦠꦶꦪꦱꦲꦱꦺꦪ꧀ꦪꦱꦶꦏ꧀ꦑꦴꦥꦢꦮꦟ꧀ꦟꦤꦴ

꧕꧕. ꦢꦸꦠꦶꦪꦱꦲꦱꦺꦪ꧀ꦪꦱꦶꦏ꧀ꦑꦴꦥꦢꦺ – ꦄꦴꦮꦱꦡꦴꦒꦴꦫꦤ꧀ꦠꦶ ꦄꦴꦒꦤ꧀ꦠꦸꦏꦴꦤꦁ ꦮꦱꦤꦴꦒꦴꦫꦁ. ꦥꦚ꧀ꦚꦠ꧀ꦠꦁ ꦲꦺꦴꦠꦷꦠꦶ ꦥꦸꦚ꧀ꦚꦏꦴꦩꦠꦴꦪ ꦏꦠ꧀ꦮꦴ ꦜꦥꦶꦠꦁ ꦲꦺꦴꦠꦶ. ꦪꦺꦤ ꦱꦴ ꦆꦠ꧀ꦡꦷ ꦠꦺꦤꦸꦥꦱꦔ꧀ꦏꦩꦷꦠꦶ ꦄꦱꦸꦏꦱ꧀ꦩꦶꦁ ꦤꦴꦩ ꦜꦴꦤꦺ ꦄꦴꦮꦱꦡꦴꦒꦴꦫꦁ ꦥꦚ꧀ꦚꦠ꧀ꦠꦁ ꦄꦠ꧀ꦡꦷꦠꦶ ꦩꦤꦸꦱ꧀ꦱꦴꦤꦁ ꦱꦸꦠ꧀ꦮꦴ ꦈꦥꦱꦔ꧀ꦏꦩꦶ. ꦒꦤ꧀ꦣꦒꦤ꧀ꦣꦶꦤꦷꦠꦶ ꦄꦒꦫꦸꦏꦸꦔ꧀ꦏꦸꦩꦴꦢꦷꦤꦁ ꦒꦤ꧀ꦣꦴꦤꦁ ꦒꦤ꧀ꦣꦺꦴ ꦒꦤ꧀ꦣꦒꦤ꧀ꦣꦺꦴ, ꦱꦺꦴ ꦄꦱ꧀ꦱꦴ ꦄꦠ꧀ꦡꦷꦠꦶ ꦒꦤ꧀ꦣꦒꦤ꧀ꦣꦶꦤꦷ. ꦱꦴꦛꦏꦁ ꦤꦶꦏ꧀ꦑꦶꦥꦶꦠ꧀ꦮꦴꦠꦶ ꦄꦥ꧀ꦥꦺꦮ ꦤꦴꦩꦱ꧀ꦱ ꦆꦩꦩ꧀ꦥꦶ ꦮꦶꦥ꧀ꦥꦏꦴꦫꦁ ꦥꦱ꧀ꦱꦤ꧀ꦠꦱ꧀ꦱ ꦫꦴꦒꦺꦴ ꦈꦥ꧀ꦥꦗ꧀ꦗꦺꦪ꧀ꦪꦴꦠꦶ ꦕꦶꦤ꧀ꦠꦺꦠ꧀ꦮꦴ ꦌꦮꦩꦏꦴꦱꦶ. ꦎꦏ꧀ꦑꦶꦥꦶꦠ꧀ꦮꦴꦠꦶ ꦄꦣꦺꦴ ꦑꦶꦥꦶꦠ꧀ꦮꦴ. ꦄꦕ꧀ꦕꦪꦺꦴꦠꦶ ꦄꦥꦫꦴꦣꦺꦴ. ꦩꦁ ꦄꦕ꧀ꦕꦒꦩꦴꦠꦶ ꦩꦁ ꦄꦠꦶꦏ꧀ꦏꦩ꧀ꦩ ꦄꦨꦶꦨꦮꦶꦠ꧀ꦮꦴ ꦥꦮꦠ꧀ꦠꦺꦴ. ꦱꦺꦱꦁ ꦥꦜꦩꦱꦶꦏ꧀ꦑꦴꦥꦢꦺ ꦮꦸꦠ꧀ꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦁ. ꦄꦪꦩꦺꦮ ꦲꦶ ꦮꦶꦱꦺꦱꦺꦴ – ꦥꦜꦩꦱꦶꦏ꧀ꦑꦴꦥꦢꦺ ꦕꦠꦸꦠ꧀ꦡꦢꦶꦮꦱꦺ ꦄꦴꦥꦠ꧀ꦠꦶ ꦆꦣ ꦥꦜꦩꦢꦶꦮꦱꦺꦥꦶ. ꦪꦏ꧀ꦑꦷꦥꦺꦠꦷꦲꦶ ꦢꦶꦱ꧀ꦱꦩꦴꦤꦏꦫꦹꦥꦴꦲꦶ ꦠꦶꦫꦕ꧀ꦖꦴꦤꦒꦠꦶꦠ꧀ꦡꦶꦪꦴ ꦕ ꦩꦺꦡꦸꦤꦣꦩ꧀ꦩꦮꦠ꧀ꦡꦸꦨꦹꦠꦴꦪ ꦌꦮ ꦢꦸꦏ꧀ꦏꦛꦁ. ꦱꦺꦱꦴꦲꦶ ꦄꦤꦴꦥꦠ꧀ꦠꦶ. ꦱꦩꦸꦛ꧀ꦜꦴꦤꦴꦢꦷꦤꦶ ꦥꦜꦩꦱꦢꦶꦱꦴꦤꦺꦮꦴꦠꦶ.

ꦢꦸꦠꦶꦪꦱꦲꦱꦺꦪ꧀ꦪꦱꦶꦏ꧀ꦑꦴꦥꦢꦁ ꦖꦛ꧀ꦜꦁ.

꧗. ꦣꦩ꧀ꦩꦢꦺꦱꦤꦴꦱꦶꦏ꧀ꦑꦴꦥꦢꦮꦟ꧀ꦟꦤꦴ

꧖꧐. ꦱꦠ꧀ꦠꦩꦱꦶꦏ꧀ꦑꦴꦥꦢꦺ – ꦓꦫꦟꦷꦠꦶ ꦓꦫꦱꦴꦩꦶꦤꦷ. ꦤꦶꦮꦺꦱꦤꦢ꧀ꦮꦴꦫꦺꦠꦶ ꦤꦶꦮꦺꦱꦤꦱ꧀ꦱ ꦩꦲꦴꦢ꧀ꦮꦴꦫꦺ. ꦓꦫꦱꦸꦟ꧀ꦲꦴꦠꦶ ꦠꦱ꧀ꦩꦶꦁ ꦓꦫꦺ ꦱꦸꦟ꧀ꦲꦴ. ꦄꦴꦮꦱꦡꦢ꧀ꦮꦴꦫꦺꦠꦶ ꦎꦮꦫꦏꦢ꧀ꦮꦴꦫꦺ. ꦮꦶꦱ꧀ꦱꦛ꧀ꦜꦺꦤꦴꦠꦶ ꦱꦸꦤꦶꦒ꧀ꦒꦠꦺꦤ ꦱꦢ꧀ꦢꦺꦤ. ꦮꦶꦮꦛꦺꦤꦴꦠꦶ ꦱꦸꦛ꧀ꦜꦸ ꦥꦏꦴꦱꦺꦤ ꦄꦱꦁꦮꦸꦠꦺꦤ. ꦣꦩ꧀ꦩꦺꦴ ꦢꦺꦱꦺꦠꦧ꧀ꦧꦺꦴꦠꦶ ꦄꦪꦁ ꦱꦫꦟꦱꦷꦭꦴꦢꦶꦨꦺꦢꦺꦴ ꦣꦩ꧀ꦩꦺꦴ ꦏꦡꦺꦠꦧ꧀ꦧꦺꦴ. ꦄꦚ꧀ꦚꦴꦠꦸꦤ꧀ꦠꦶ ꦄꦴꦗꦴꦤꦶꦠꦸꦁ. ꦮꦶꦚ꧀ꦚꦸꦤꦴ ꦥꦸꦫꦶꦱꦮꦶꦒ꧀ꦒꦲꦺꦤꦴꦠꦶ ꦮꦶꦚ꧀ꦚꦸꦤꦴ ꦥꦸꦫꦶꦱꦺꦤ, ꦥꦸꦫꦶꦱꦮꦶꦒ꧀ꦒꦲꦁ ꦒꦲꦺꦠ꧀ꦮꦴꦥꦶ ꦜꦶꦠꦺꦤ ꦤ ꦪꦏ꧀ꦑꦺꦤ ꦤ ꦥꦺꦠꦺꦤ ꦤ ꦠꦶꦫꦕ꧀ꦖꦴꦤꦒꦠꦺꦤ.

꧖꧖. ꦄꦤꦴꦥꦠ꧀ꦠꦶ ꦮꦶꦚ꧀ꦚꦸꦤꦴ ꦥꦸꦫꦶꦱꦮꦶꦒ꧀ꦒꦲꦺꦤꦴꦠꦶ ꦮꦶꦚ꧀ꦚꦸꦤꦴ ꦥꦸꦫꦶꦱꦮꦶꦒ꧀ꦒꦲꦺꦤ ꦱꦢ꧀ꦣꦶꦁ ꦜꦶꦠꦴꦪ ꦧꦲꦸꦩ꧀ꦥꦶ ꦣꦩ꧀ꦩꦁ ꦢꦺꦱꦺꦤ꧀ꦠꦱ꧀ꦱ ꦄꦤꦴꦥꦠ꧀ꦠꦶ. ꦖꦥ꧀ꦥꦚ꧀ꦕꦮꦴꦕꦴꦲꦷꦠꦶ ꦖꦲꦶ ꦥꦚ꧀ꦕꦲꦶ ꦮꦴꦕꦴꦲꦶ ꦪꦺꦴ ꦢꦺꦱꦺꦠꦶ, ꦠꦱ꧀ꦱꦥꦶ ꦄꦤꦴꦥꦠ꧀ꦠꦶ. ꦠꦠ꧀ꦡ ꦌꦏꦺꦴ ꦒꦴꦡꦴꦥꦴꦢꦺꦴ ꦌꦏꦮꦴꦕꦴꦠꦶ ꦌꦮꦁ ꦱꦧ꧀ꦧꦠ꧀ꦡ ꦮꦴꦕꦴꦥꦩꦴꦟꦁ ꦮꦺꦢꦶꦠꦧ꧀ꦧꦁ. ꦱꦕꦺ ꦄꦛ꧀ꦜꦏꦡꦁ ꦣꦩ꧀ꦩꦥꦢꦁ ꦗꦴꦠꦏꦴꦢꦶꦮꦠ꧀ꦡꦸꦁ ꦮꦴ ꦏꦡꦺꦠꦸꦏꦴꦩꦺꦴ ꦲꦺꦴꦠꦶ, ꦖꦥ꧀ꦥꦚ꧀ꦕꦥꦢꦩꦠ꧀ꦠꦩꦺꦮ ꦏꦡꦺꦠꦸꦁ ꦮꦛ꧀ꦛꦠꦶ. ꦥꦴꦭ꦳ꦶꦪꦴ ꦱꦢ꧀ꦣꦶꦁ ꦏꦡꦺꦤ꧀ꦠꦺꦤ ꦌꦏꦥꦢꦁ ꦥꦴꦭ꦳ꦶꦠꦺꦴ ꦥꦚ꧀ꦕ ꦄꦛ꧀ꦜꦏꦡꦴꦠꦺꦴꦠꦶ ꦌꦮꦁ ꦖ ꦥꦢꦴꦤꦶ ꦄꦤꦠꦶꦏ꧀ꦏꦴꦩꦺꦠ꧀ꦮꦴꦮ ꦏꦡꦺꦠꦧ꧀ꦧꦺꦴ. ꦥꦢꦱꦺꦴꦣꦩ꧀ꦩꦺ ꦮꦸꦠ꧀ꦠꦥ꧀ꦥꦨꦺꦢꦺꦴ ꦲꦶ ꦆꦣꦴꦥꦶ ꦱꦧ꧀ꦧꦺꦴ ꦣꦩ꧀ꦩꦺꦴꦪꦺꦮ. ꦠꦱ꧀ꦩꦶꦁ ꦢꦺꦱꦺꦠꦷꦠꦶ ꦠꦱ꧀ꦩꦶꦁ ꦑꦟꦺ ꦢꦺꦱꦺꦠꦶ. ꦱꦩ꧀ꦥꦢꦴꦤꦠ꧀ꦡꦺ ꦮꦴ ꦌꦠꦁ ꦨꦸꦩ꧀ꦩꦮꦕꦤꦁ. ꦠꦱ꧀ꦱꦴ ꦢꦺꦱꦺꦠꦷꦠꦶ ꦄꦠ꧀ꦡꦺꦴ. ꦄꦚ꧀ꦚꦶꦱ꧀ꦱꦴ ꦩꦴꦠꦸꦒꦴꦩꦱ꧀ꦱꦴꦠꦶ ꦌꦏꦶꦱ꧀ꦱꦴ ꦢꦺꦱꦺꦠ꧀ꦮꦴ ꦥꦸꦤ ꦄꦴꦒꦠꦴꦒꦠꦴꦪ ꦄꦚ꧀ꦚꦶꦱ꧀ꦱꦴꦥꦶ ꦢꦺꦱꦺꦠꦷꦠꦶ ꦌꦮꦁ ꦌꦏꦴꦱꦤꦺ ꦤꦶꦱꦶꦤ꧀ꦤꦺꦴ ꦩꦴꦠꦸꦒꦴꦩꦱꦠꦱꦲꦱ꧀ꦱꦤ꧀ꦤꦩ꧀ꦥꦶ ꦢꦺꦱꦺꦠꦷꦠꦶ ꦄꦠ꧀ꦡꦺꦴ. ꦩꦲꦴꦥꦕ꧀ꦕꦫꦶꦪꦛ꧀ꦜꦏꦡꦴꦪꦁ ꦮꦸꦠ꧀ꦠꦁ ꦱꦩꦁ ꦤꦶꦱꦶꦤ꧀ꦤꦴꦤꦁ ꦩꦴꦠꦸꦒꦴꦩꦴꦤꦁ ‘‘ꦠꦸꦩ꧀ꦲꦴꦏꦁ ꦌꦏꦺꦏꦶꦱ꧀ꦱꦴ ꦌꦏꦺꦏꦁ ꦒꦴꦡꦁ ꦢꦺꦱꦺꦱ꧀ꦱꦴꦩꦶ, ꦠꦁ ꦱꦸꦟꦴꦡꦴꦠꦶ ꦢꦺꦱꦺꦠꦶ, ꦄꦤꦴꦥꦠ꧀ꦠꦶ. ꦥꦜꦩꦁ ꦌꦏꦺꦏꦶꦱ꧀ꦱꦴ ꦌꦏꦺꦏꦁ ꦒꦴꦡꦁ ꦏꦡꦺꦱ꧀ꦱꦴꦩꦷꦠꦶ ꦄꦴꦨꦺꦴꦒꦁ ꦏꦠ꧀ꦮꦴ ꦗꦴꦤꦴꦥꦺꦠ꧀ꦮꦴ ꦏꦡꦺꦠꦸꦁ ꦮꦛ꧀ꦛꦠꦶ, ꦤ ꦥꦕ꧀ꦖꦴꦠꦶ. ꦥꦚ꧀ꦲꦁ ꦥꦸꦕ꧀ꦖꦠꦶ ꦥꦚ꧀ꦲꦁ ꦥꦸꦛ꧀ꦜꦺꦴ ꦏꦡꦺꦠꦷꦠꦶ ꦩꦴꦠꦸꦒꦴꦩꦺꦴ ‘‘ꦢꦷꦓꦤꦶꦏꦴꦪꦺꦴ ꦤꦴꦩ ꦨꦤ꧀ꦠꦺ ꦏꦶꦩꦠ꧀ꦡꦁ ꦢꦷꦥꦺꦠꦷ’’ꦠꦶ ꦥꦸꦕ꧀ꦖꦠꦶ. ꦌꦮꦁ ꦥꦚ꧀ꦲꦁ ꦥꦸꦛ꧀ꦜꦺꦴ ꦨꦶꦏ꧀ꦑꦸ ꦱꦧ꧀ꦧꦁ ꦕꦺꦥꦶ ꦢꦷꦓꦤꦶꦏꦴꦪꦁ ꦏꦡꦺꦠꦶ, ꦄꦤꦴꦥꦠ꧀ꦠꦶ. ꦱꦺꦱꦩꦺꦠ꧀ꦡ ꦈꦠ꧀ꦠꦴꦤꦠ꧀ꦡꦩꦺꦮ.

ꦥꦢꦱꦺꦴꦣꦩ꧀ꦩꦱꦩꦸꦛ꧀ꦜꦴꦤꦁ – ꦮꦴꦕꦠꦺꦴ ꦕ ꦮꦴꦕꦴꦕꦶꦠ꧀ꦠꦠꦺꦴ ꦕ ꦱꦩꦸꦛ꧀ꦜꦴꦠꦶ, ꦏꦶꦫꦶꦪꦴꦏꦶꦫꦶꦪꦁ, ꦤꦺꦴꦱꦚ꧀ꦚꦴꦮꦶꦩꦺꦴꦏ꧀ꦑꦁ, ꦄꦕꦶꦠ꧀ꦠꦏꦁ, ꦥꦟ꧀ꦟꦠ꧀ꦠꦶꦮꦗ꧀ꦗꦁ, ꦮꦕꦷꦏꦩ꧀ꦩꦁ, ꦠꦶꦕꦶꦠ꧀ꦠꦁ, ꦠꦶꦮꦺꦢꦤꦤ꧀ꦠꦶ.

ꦣꦩ꧀ꦩꦢꦺꦱꦤꦴꦱꦶꦏ꧀ꦑꦴꦥꦢꦁ ꦱꦠ꧀ꦠꦩꦁ.

꧘. ꦨꦹꦠꦴꦫꦺꦴꦕꦤꦱꦶꦏ꧀ꦑꦴꦥꦢꦮꦟ꧀ꦟꦤꦴ

꧖꧗. ꦄꦛ꧀ꦜꦩꦱꦶꦏ꧀ꦑꦴꦥꦢꦺ – ꦮꦠ꧀ꦡꦸꦏꦡꦴꦪ ꦠꦴꦮ ꦪꦁ ꦮꦠ꧀ꦠꦧ꧀ꦧꦁ ꦱꦶꦪꦴ, ꦠꦁ ꦱꦧ꧀ꦧꦁ ꦕꦠꦸꦠ꧀ꦡꦥꦴꦫꦴꦗꦶꦏꦮꦟ꧀ꦟꦤꦴꦪꦁ ꦮꦸꦠ꧀ꦠꦤꦪꦩꦺꦮ. ꦄꦪꦩꦺꦮ ꦲꦶ ꦮꦶꦱꦺꦱꦺꦴ – ꦠꦠ꧀ꦡ ꦄꦨꦹꦠꦁ ꦄꦴꦫꦺꦴꦕꦺꦱꦸꦁ, ꦆꦣ ꦨꦹꦠꦁ. ꦨꦹꦠꦩ꧀ꦥꦶ ꦥꦸꦡꦸꦗ꧀ꦗꦤꦴ ꦄꦴꦫꦺꦴꦕꦺꦱꦸꦁ, ꦤ ꦄꦫꦶꦪꦴ. ꦄꦫꦶꦪꦴꦤꦚ꧀ꦲꦶ ꦥꦪꦸꦠ꧀ꦠꦮꦴꦕꦴ ꦤꦴꦩ ꦤꦠ꧀ꦡꦶ, ꦄꦠ꧀ꦠꦤꦺꦴ ꦒꦸꦟꦺ ꦄꦴꦫꦺꦴꦕꦪꦩꦴꦤꦺ ꦥꦤ ꦄꦚ꧀ꦚꦺ ꦤ ꦥꦛꦶꦱꦺꦣꦺꦱꦸꦁ, ꦠꦡꦴꦈꦥ꧀ꦥꦤ꧀ꦤꦺ ꦕ ꦥꦕ꧀ꦕꦪꦺ ꦱꦴꦢꦶꦪꦶꦁꦱꦸ, ꦠꦡꦴꦈꦥ꧀ꦥꦤ꧀ꦤꦨꦴꦮꦁ ꦄꦗꦴꦤꦤ꧀ꦠꦴ.

‘‘ꦄꦡ ꦑꦺꦴ ꦠꦺ ꦨꦶꦏ꧀ꦑꦹ ꦨꦒꦮꦠꦺꦴ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦸ’’ꦤ꧀ꦠꦶꦄꦴꦢꦶꦩ꧀ꦲꦶ ꦥꦤ ꦪꦺ ꦈꦠ꧀ꦠꦫꦶꦩꦤꦸꦱ꧀ꦱꦣꦩ꧀ꦩꦱ꧀ꦱ ꦮꦟ꧀ꦟꦁ ꦨꦴꦱꦶꦁꦱꦸ, ꦠꦺ ꦄꦴꦫꦺꦴꦕꦺꦱꦸꦤ꧀ꦠꦶ ꦮꦺꦢꦶꦠꦧ꧀ꦧꦁ. ‘‘ꦏꦕ꧀ꦕꦶ ꦥꦤ ꦮꦺꦴ ꦨꦶꦏ꧀ꦑꦮꦺ ꦨꦹꦠ’’ꦤ꧀ꦠꦶ ꦥꦸꦕ꧀ꦖꦶꦠꦺ ꦥꦤ ꦱꦧ꧀ꦧꦺꦥꦶ ‘‘ꦨꦹꦠꦁ ꦨꦒꦮꦴ’’ꦠꦶ ꦥꦛꦶꦗꦴꦤꦶꦁꦱꦸ. ꦄꦫꦶꦪꦴꦤꦩ꧀ꦥꦶ ꦲꦶ ꦄꦧ꧀ꦨꦤ꧀ꦠꦫꦺ ꦨꦹꦠꦺꦴ ꦈꦠ꧀ꦠꦫꦶꦩꦤꦸꦱ꧀ꦱꦣꦩ꧀ꦩꦺꦴꦠꦶ. ꦄꦡ ꦨꦒꦮꦴ ꦄꦫꦶꦪꦩꦶꦱ꧀ꦱꦏꦠ꧀ꦠꦴ ‘‘ꦩꦺꦴꦓꦥꦸꦫꦶꦱꦴ’’ꦠꦶ ꦄꦮꦠ꧀ꦮꦴ ‘‘ꦏꦡꦚ꧀ꦲꦶ ꦤꦴꦩ ꦠꦸꦩ꧀ꦲꦺ ꦨꦶꦏ꧀ꦑꦮꦺ’’ꦠꦶ ꦮꦠ꧀ꦮꦴ ‘‘ꦈꦢꦫꦱ꧀ꦱ ꦏꦴꦫꦟꦴ’’ꦠꦶꦄꦴꦢꦶꦩꦴꦲ. ꦠꦠ꧀ꦡ ꦪꦱ꧀ꦩꦴ ꦄꦫꦶꦪꦴ ꦄꦚ꧀ꦚꦺꦱꦁ ꦱꦸꦠ꧀ꦮꦴ ‘‘ꦄꦪ꧀ꦪꦺꦴ ꦏꦶꦫ, ꦨꦤ꧀ꦠꦺ, ꦱꦺꦴꦠꦴꦥꦤ꧀ꦤꦺꦴ’’ꦠꦶꦄꦴꦢꦶꦤꦴ ꦤꦪꦺꦤ ꦥꦱꦤ꧀ꦤꦺꦲꦶ ꦩꦤꦸꦱ꧀ꦱꦺꦲꦶ ꦥꦸꦕ꧀ꦖꦶꦪꦩꦴꦤꦴ ꦄꦥꦚ꧀ꦚꦠ꧀ꦠꦺ ꦱꦶꦏ꧀ꦑꦴꦥꦢꦺ ꦄꦤꦴꦢꦷꦤꦮꦢꦱ꧀ꦱꦶꦤꦺꦴ ꦱꦸꦢ꧀ꦣꦕꦶꦠ꧀ꦠꦠꦴꦪ ꦄꦠ꧀ꦠꦤꦺꦴ ꦕ ꦥꦫꦺꦱꦚ꧀ꦕ ꦮꦶꦱꦺꦱꦴꦣꦶꦒꦩꦁ ꦥꦛꦶꦗꦴꦤꦶꦁꦱꦸ. ꦌꦮꦁ ꦥꦛꦶꦗꦴꦤꦤ꧀ꦠꦺꦲꦶ ꦕ ꦠꦺꦲꦶ ꦪꦁ ꦄꦚ꧀ꦚꦺ ꦈꦢꦫꦱ꧀ꦱ ꦏꦴꦫꦟꦴ ꦈꦠ꧀ꦠꦫꦶꦩꦤꦸꦱ꧀ꦱꦣꦩ꧀ꦩꦱ꧀ꦱ ꦮꦟ꧀ꦟꦁ ꦨꦴꦱꦶꦠ꧀ꦮꦴ ꦥꦶꦟ꧀ꦝꦥꦴꦠꦁ ꦈꦥ꧀ꦥꦴꦢꦺꦱꦸꦁ, ꦠꦁ ꦱꦸꦢ꧀ꦣꦕꦶꦠ꧀ꦠꦠꦴꦪ ꦱꦴꦢꦶꦪꦤ꧀ꦠꦺꦲꦶꦥꦶ ꦈꦢꦫꦱ꧀ꦱ ꦏꦴꦫꦟꦴ ꦈꦠ꧀ꦠꦫꦶꦩꦤꦸꦱ꧀ꦱꦣꦩ꧀ꦩꦱ꧀ꦱ ꦮꦟ꧀ꦟꦺꦴ ꦨꦴꦱꦶꦠꦺꦴ ꦮꦶꦪ ꦲꦺꦴꦠꦶ. ꦠꦱ꧀ꦩꦴ ꦱꦧ꧀ꦧꦱꦔ꧀ꦒꦴꦲꦶꦏꦺꦤꦺꦮ ꦤꦪꦺꦤ ‘‘ꦏꦡꦚ꧀ꦲꦶ ꦤꦴꦩ ꦠꦸꦩ꧀ꦲꦺ, ꦨꦶꦏ꧀ꦑꦮꦺ, ꦈꦢꦫꦱ꧀ꦱ ꦏꦴꦫꦟꦴ ꦒꦶꦲꦷꦤꦁ ꦄꦚ꧀ꦚꦩꦚ꧀ꦚꦁ ꦈꦠ꧀ꦠꦫꦶꦩꦤꦸꦱ꧀ꦱꦣꦩ꧀ꦩꦱ꧀ꦱ ꦮꦟ꧀ꦟꦁ ꦨꦴꦱꦶꦱ꧀ꦱꦡꦴ’’ꦠꦶ ꦄꦴꦲ. ꦱꦺꦱꦁ ꦕꦠꦸꦠ꧀ꦡꦥꦴꦫꦴꦗꦶꦏꦮꦠ꧀ꦡꦸꦱꦢꦶꦱꦩꦺꦮ. ꦱꦶꦏ꧀ꦑꦴꦥꦢꦮꦶꦨꦔ꧀ꦒꦺꦥꦶ ꦏꦺꦮꦭꦁ ꦠꦠ꧀ꦡ ꦥꦴꦫꦴꦗꦶꦏꦚ꧀ꦕꦺꦮ ꦡꦸꦭ꧀ꦭꦕ꧀ꦕꦪꦚ꧀ꦕ ꦆꦣ ꦨꦹꦠꦠ꧀ꦠꦴ ꦥꦴꦕꦶꦠ꧀ꦠꦶꦪꦚ꧀ꦕꦺꦮ ꦢꦸꦏ꧀ꦏꦛꦚ꧀ꦕ ꦄꦪꦁ ꦮꦶꦱꦺꦱꦺꦴ. ꦱꦺꦱꦁ ꦮꦸꦠ꧀ꦠꦤꦪꦩꦺꦮ.

꧗꧗. ‘‘ꦈꦥꦱꦩ꧀ꦥꦤ꧀ꦤꦱ꧀ꦱ ꦨꦹꦠꦁ ꦄꦴꦫꦺꦴꦕꦺꦠꦷ’’ꦠꦶ ꦈꦠ꧀ꦠꦫꦶꦩꦤꦸꦱ꧀ꦱꦣꦩ꧀ꦩꦩꦺꦮ ꦱꦤ꧀ꦣꦴꦪ ꦮꦸꦠ꧀ꦠꦁ. ꦥꦫꦶꦤꦶꦧ꧀ꦧꦴꦤꦏꦴꦭꦺ ꦲꦶ ꦄꦤ꧀ꦠꦫꦴ ꦮꦴ ꦄꦠꦶꦏꦝ꧀ꦞꦶꦪꦩꦴꦤꦺꦤ ꦈꦥꦱꦩ꧀ꦥꦤ꧀ꦤꦱ꧀ꦱ ꦨꦹꦠꦁ ꦄꦴꦫꦺꦴꦕꦺꦠꦸꦁ ꦮꦛ꧀ꦛꦠꦶ. ꦱꦸꦠꦥꦫꦶꦪꦠ꧀ꦠꦶꦱꦷꦭꦒꦸꦟꦁ ꦥꦤ ꦄꦤꦸꦥꦱꦩ꧀ꦥꦤ꧀ꦤꦱ꧀ꦱꦴꦥꦶ ꦄꦴꦫꦺꦴꦕꦺꦠꦸꦁ ꦮꦛ꧀ꦛꦠꦶ. ꦄꦴꦢꦶꦏꦩ꧀ꦩꦶꦏꦱ꧀ꦱ ꦄꦤꦴꦥꦠ꧀ꦠꦶ. ‘‘ꦈꦩ꧀ꦩꦠ꧀ꦠꦏꦱ꧀ꦱꦴ’’ꦠꦶ ꦆꦢꦁ ꦥꦤ ꦆꦣ ꦤ ꦮꦸꦠ꧀ꦠꦁ. ꦏꦱ꧀ꦩꦴ? ꦢꦶꦛ꧀ꦜꦶꦱꦩ꧀ꦥꦤ꧀ꦤꦴꦤꦁ ꦈꦩ꧀ꦩꦴꦢꦱ꧀ꦱ ꦮꦴ ꦕꦶꦠ꧀ꦠꦏ꧀ꦑꦺꦥꦱ꧀ꦱ ꦮꦴ ꦄꦨꦴꦮꦴꦠꦶ. ꦩꦲꦴꦥꦕ꧀ꦕꦫꦶꦪꦩ꧀ꦥꦶ ꦲꦶ ꦮꦶꦕꦴꦫꦶꦠꦁ ‘‘ꦙꦴꦤꦭꦴꦨꦷ ꦥꦤ ꦥꦫꦶꦲꦷꦤꦺ ꦙꦴꦤꦺ ꦈꦩ꧀ꦩꦠ꧀ꦠꦏꦺꦴ ꦨꦮꦺꦪ꧀ꦪ, ꦠꦱ꧀ꦱꦥꦶ ꦨꦹꦠꦴꦫꦺꦴꦕꦤꦥꦕ꧀ꦕꦪꦴ ꦄꦤꦴꦥꦠ꧀ꦠꦶ ꦤ ꦮꦠ꧀ꦠꦧ꧀ꦧꦴ, ꦨꦹꦠꦱ꧀ꦱꦺꦮ ꦄꦨꦴꦮꦠꦺꦴ’’ꦠꦶ. ꦱꦺꦱꦁ ꦈꦠ꧀ꦠꦴꦤꦩꦺꦮ.

ꦨꦹꦠꦴꦫꦺꦴꦕꦤꦁ ꦤꦴꦩꦺꦠꦁ ꦥꦸꦧ꧀ꦧꦺ ꦄꦮꦸꦠ꧀ꦠꦺꦲꦶ ꦠꦷꦲꦶ ꦱꦩꦸꦛ꧀ꦜꦴꦤꦺꦲꦶ ꦱꦩꦸꦛ꧀ꦜꦴꦠꦶ – ꦏꦴꦪꦠꦺꦴ ꦮꦴꦕꦠꦺꦴ ꦏꦴꦪꦮꦴꦕꦠꦺꦴ ꦕꦴꦠꦶ. ꦏꦶꦫꦶꦪꦁ, ꦤꦺꦴꦱꦚ꧀ꦚꦴꦮꦶꦩꦺꦴꦏ꧀ꦑꦁ, ꦄꦕꦶꦠ꧀ꦠꦏꦁ, ꦥꦟ꧀ꦟꦠ꧀ꦠꦶꦮꦗ꧀ꦗꦁ, ꦏꦴꦪꦏꦩ꧀ꦩꦁ, ꦮꦕꦷꦏꦩ꧀ꦩꦁ, ꦏꦸꦱꦭꦴꦧ꧀ꦪꦴꦏꦠꦕꦶꦠ꧀ꦠꦺꦲꦶ ꦢ꧀ꦮꦶꦕꦶꦠ꧀ꦠꦁ, ꦱꦸꦑꦩꦗ꧀ꦙꦠ꧀ꦠꦮꦺꦢꦤꦴꦲꦶ ꦢ꧀ꦮꦶꦮꦺꦢꦤꦤ꧀ꦠꦶ.

ꦨꦹꦠꦴꦫꦺꦴꦕꦤꦱꦶꦏ꧀ꦑꦴꦥꦢꦁ ꦄꦛ꧀ꦜꦩꦁ.

꧙. ꦢꦸꦛ꧀ꦜꦸꦭ꧀ꦭꦴꦫꦺꦴꦕꦤꦱꦶꦏ꧀ꦑꦴꦥꦢꦮꦟ꧀ꦟꦤꦴ

꧗꧘. ꦤꦮꦩꦱꦶꦏ꧀ꦑꦴꦥꦢꦺ – ꦢꦸꦛ꧀ꦜꦸꦭ꧀ꦭꦴ ꦤꦴꦩ ꦄꦴꦥꦠ꧀ꦠꦶ ꦕꦠ꧀ꦠꦴꦫꦶ ꦕ ꦥꦴꦫꦴꦗꦶꦏꦴꦤꦶ ꦠꦺꦫꦱ ꦕ ꦱꦔ꧀ꦓꦴꦢꦶꦱꦺꦱꦴꦠꦶ ꦆꦩꦶꦱ꧀ꦱꦴ ꦥꦴꦭ꦳ꦶꦪꦴ ‘‘ꦥꦴꦫꦴꦗꦶꦏꦴꦤꦶ ꦢꦸꦛ꧀ꦜꦸꦭ꧀ꦭꦱꦢ꧀ꦢꦠ꧀ꦡꦢꦱ꧀ꦱꦤꦠ꧀ꦡꦁ ꦮꦸꦠ꧀ꦠꦴꦤꦶ, ꦱꦔ꧀ꦓꦴꦢꦶꦱꦺꦱꦁ ꦥꦤ ꦆꦣ ꦄꦣꦶꦥ꧀ꦥꦺꦠ’’ꦤ꧀ꦠꦶ ꦄꦛ꧀ꦜꦏꦡꦴꦱꦸ ꦮꦸꦠ꧀ꦠꦁ. ꦠꦠ꧀ꦫꦴꦪꦁ ꦮꦶꦕꦴꦫꦟꦴ – ꦱꦕꦺ ꦥꦴꦫꦴꦗꦶꦏꦁ ꦄꦴꦫꦺꦴꦕꦺꦤ꧀ꦠꦱ꧀ꦱ ꦥꦴꦕꦶꦠ꧀ꦠꦶꦪꦁ ꦤ ꦨꦮꦺꦪ꧀ꦪ, ꦪꦡꦴ ꦱꦩꦴꦤꦺꦥꦶ ꦨꦶꦏ꧀ꦑꦸ-ꦨꦶꦏ꧀ꦑꦸꦤꦷꦤꦁ ꦈꦥꦱꦩ꧀ꦥꦤ꧀ꦤꦱꦢ꧀ꦢꦺ ꦪꦠ꧀ꦡ ꦨꦶꦏ꧀ꦑꦸꦤꦷ ꦄꦤꦣꦶꦥ꧀ꦥꦺꦠꦴ ꦲꦺꦴꦠꦶ, ꦠꦠ꧀ꦡ ꦨꦶꦏ꧀ꦑꦸꦁ ꦜꦥꦺꦠ꧀ꦮꦴ ꦄꦮꦱꦺꦱꦺꦴ ꦄꦤꦸꦥꦱꦩ꧀ꦥꦤ꧀ꦤꦺꦴꦠꦶ ꦮꦸꦕ꧀ꦕꦠꦶ; ꦌꦮꦩꦶꦣ ꦱꦩꦴꦤꦺꦥꦶ ꦥꦴꦫꦴꦗꦶꦏꦱꦔ꧀ꦓꦴꦢꦶꦱꦺꦱꦴꦤꦁ ꦢꦸꦛ꧀ꦜꦸꦭ꧀ꦭꦱꦢ꧀ꦢꦺ ꦪꦢꦶ ꦥꦴꦫꦴꦗꦶꦏꦁ ꦄꦤꦣꦶꦥ꧀ꦥꦺꦠꦁ, ‘‘ꦢꦸꦛ꧀ꦜꦸꦭ꧀ꦭꦴ ꦤꦴꦩ ꦄꦴꦥꦠ꧀ꦠꦶ ꦠꦺꦫꦱ ꦱꦔ꧀ꦓꦴꦢꦶꦱꦺꦱꦴ’’ꦠꦶ ꦌꦠꦢꦺꦮ ꦮꦠ꧀ꦠꦧ꧀ꦧꦁ ꦱꦶꦪꦴ. ꦠꦠ꧀ꦡ ꦨꦮꦺꦪ꧀ꦪ ‘‘ꦪꦺꦴ ꦥꦴꦫꦴꦗꦶꦏꦁ ꦄꦴꦥꦤ꧀ꦤꦺꦴ, ꦱꦺꦴ ꦨꦶꦏ꧀ꦑꦸꦨꦴꦮꦠꦺꦴ ꦕꦸꦠꦺꦴ, ꦠꦱ꧀ꦩꦴ ꦠꦱ꧀ꦱ ꦄꦴꦥꦠ꧀ꦠꦶꦁ ꦄꦴꦫꦺꦴꦕꦺꦤ꧀ꦠꦺꦴ ꦢꦸꦏ꧀ꦏꦛꦁ ꦄꦴꦥꦗ꧀ꦗꦠꦷ’’ꦠꦶ. ꦌꦮꦁ ꦱꦠꦶ ꦄꦏ꧀ꦏꦺꦴꦱꦤ꧀ꦠꦺꦴꦥꦶ ꦢꦸꦏ꧀ꦏꦛꦁ ꦄꦴꦥꦗ꧀ꦗꦺꦪ꧀ꦪ, ꦥꦴꦕꦶꦠ꧀ꦠꦶꦪꦩꦺꦮ ꦕ ꦄꦴꦥꦗ꧀ꦗꦠꦶ. ꦮꦸꦠ꧀ꦠꦚ꧀ꦲꦺꦠꦁ – ‘‘ꦄꦱꦸꦢ꧀ꦣꦺꦴ ꦲꦺꦴꦠꦶ ꦥꦸꦒ꧀ꦒꦭꦺꦴ ꦄꦚ꧀ꦚꦠꦫꦁ ꦥꦴꦫꦴꦗꦶꦏꦁ ꦣꦩ꧀ꦩꦁ ꦄꦗ꧀ꦙꦴꦥꦤ꧀ꦤꦺꦴ, ꦠꦚ꧀ꦕꦺ ꦄꦱꦸꦢ꧀ꦣꦢꦶꦛ꧀ꦜꦶ ꦱꦩꦴꦤꦺꦴ ꦎꦏꦴꦱꦁ ꦏꦴꦫꦴꦥꦺꦠ꧀ꦮꦴ ꦄꦏ꧀ꦏꦺꦴꦱꦴꦣꦶꦥ꧀ꦥꦴꦪꦺꦴ ꦮꦢꦠꦶ, ꦄꦴꦥꦠ꧀ꦠꦶ ꦎꦩꦱꦮꦴꦢꦱ꧀ꦱꦴ’’ꦠꦶ (ꦥꦴꦫꦴ. ꧓꧘꧙). ꦌꦮꦁ ꦥꦴꦭ꦳ꦶꦪꦴ ꦮꦶꦕꦴꦫꦶꦪꦩꦴꦤꦴꦪ ꦥꦴꦫꦴꦗꦶꦏꦁ ꦄꦴꦫꦺꦴꦕꦺꦤ꧀ꦠꦱ꧀ꦱꦴꦥꦶ ꦥꦴꦕꦶꦠ꧀ꦠꦶꦪꦩꦺꦮ ꦢꦶꦱ꧀ꦱꦠꦶ. ꦏꦶꦚ꧀ꦕꦴꦥꦶ ꦢꦶꦱ꧀ꦱꦠꦶ, ꦄꦡ ꦑꦺꦴ ꦱꦧ꧀ꦧꦄꦛ꧀ꦜꦏꦡꦴꦱꦸ ꦮꦸꦠ꧀ꦠꦠ꧀ꦠꦴ ꦄꦛ꧀ꦜꦏꦡꦴꦕꦫꦶꦪꦴꦮ ꦌꦠ꧀ꦡ ꦥꦩꦴꦟꦁ, ꦤ ꦄꦚ꧀ꦚꦴ ꦮꦶꦕꦴꦫꦟꦴ. ꦥꦸꦧ꧀ꦧꦺꦥꦶ ꦕ ꦄꦴꦮꦺꦴꦕꦸꦩ꧀ꦲ – ‘‘ꦧꦸꦢ꧀ꦣꦺꦤ ꦣꦩ꧀ꦩꦺꦴ ꦮꦶꦤꦪꦺꦴ ꦕ ꦮꦸꦠ꧀ꦠꦺꦴ, ꦪꦺꦴ ꦠꦱ꧀ꦱ ꦥꦸꦠ꧀ꦠꦺꦲꦶ ꦠꦡꦺꦮ ꦚꦴꦠꦺꦴ’’ꦠꦶꦄꦴꦢꦶ (ꦥꦴꦫꦴ. ꦄꦛ꧀ꦜ. ꧑.ꦒꦤ꧀ꦡꦴꦫꦩ꧀ꦨꦏꦡꦴ). ꦄꦛ꧀ꦜꦏꦡꦴꦕꦫꦶꦪꦴ ꦲꦶ ꦧꦸꦢ꧀ꦣꦱ꧀ꦱ ꦄꦣꦶꦥ꧀ꦥꦴꦪꦁ ꦗꦴꦤꦤ꧀ꦠꦶ.

ꦆꦩꦶꦤꦴꦥꦶ ꦕꦺꦠꦁ ꦥꦫꦶꦪꦴꦪꦺꦤ ꦮꦺꦢꦶꦠꦧ꧀ꦧꦁ. ꦄꦚ꧀ꦚꦠ꧀ꦫ ꦨꦶꦏ꧀ꦑꦸꦱꦩ꧀ꦩꦸꦠꦶꦪꦴꦠꦶ ꦲꦶ ꦮꦸꦠ꧀ꦠꦁ. ꦨꦶꦏ꧀ꦑꦸꦱꦩ꧀ꦩꦸꦠꦶꦪꦴ ꦕ ꦄꦴꦫꦺꦴꦕꦤꦁ ꦄꦴꦪꦠꦶꦁ ꦱꦁꦮꦫꦠ꧀ꦡꦴꦪ ꦥꦸꦤ ꦠꦡꦴꦫꦹꦥꦁ ꦄꦴꦥꦠ꧀ꦠꦶꦁ ꦄꦤꦴꦥꦗ꧀ꦗꦤꦠ꧀ꦡꦴꦪ ꦨꦒꦮꦠꦴ ꦄꦤꦸꦚ꧀ꦚꦴꦠꦁ, ꦤ ꦠꦱ꧀ꦱ ꦨꦶꦏ꧀ꦑꦸꦤꦺꦴ ꦄꦮꦟ꧀ꦟꦩꦠ꧀ꦠꦥ꧀ꦥꦏꦴꦱꦤꦠ꧀ꦡꦴꦪ, ꦱꦴꦱꦤꦺ ꦕꦱ꧀ꦱ ꦥꦠꦶꦛ꧀ꦜꦴꦤꦶꦱꦺꦣꦤꦠ꧀ꦡꦴꦪ, ꦤ ꦕ ꦥꦴꦫꦴꦗꦶꦏꦁ ꦄꦴꦥꦤ꧀ꦤꦱ꧀ꦱ ꦥꦸꦤ ꦠꦡꦴꦫꦹꦥꦴꦪ ꦄꦴꦥꦠ꧀ꦠꦶꦪꦴ ꦄꦤꦴꦥꦗ꧀ꦗꦤꦺꦤ ꦨꦶꦏ꧀ꦑꦸꦨꦴꦮꦺꦴ ꦤꦴꦩ ꦄꦠ꧀ꦡꦶ. ꦠꦱ꧀ꦩꦴ ‘‘ꦥꦴꦫꦴꦗꦶꦏꦴꦤꦶ ꦢꦸꦛ꧀ꦜꦸꦭ꧀ꦭꦱꦢ꧀ꦢꦠ꧀ꦡꦢꦱ꧀ꦱꦤꦠ꧀ꦡꦁ ꦮꦸꦠ꧀ꦠꦴꦤꦶ, ꦱꦔ꧀ꦓꦴꦢꦶꦱꦺꦱꦁ ꦥꦤ ꦆꦣꦴꦣꦶꦥ꧀ꦥꦺꦠ’’ꦤ꧀ꦠꦶ ꦪꦁ ꦄꦛ꧀ꦜꦏꦡꦴꦱꦸ ꦮꦸꦠ꧀ꦠꦁ, ꦠꦁ ꦱꦸꦮꦸꦠ꧀ꦠꦩꦺꦮ.

꧘꧐. ꦄꦠ꧀ꦡꦶ ꦨꦶꦏ꧀ꦑꦸꦱꦩ꧀ꦩꦸꦠꦶ ꦄꦴꦥꦠ꧀ꦠꦶꦥꦫꦶꦪꦤ꧀ꦠꦴꦠꦶꦄꦴꦢꦷꦱꦸ ꦥꦤ ꦪꦴ ꦄꦪꦁ ꦨꦶꦏ꧀ꦑꦸꦱꦩ꧀ꦩꦸꦠꦶ ꦮꦸꦠ꧀ꦠꦴ, ꦱꦴ ꦤ ꦏꦠ꧀ꦡꦕꦶ ꦄꦴꦒꦠꦴ, ꦆꦣ ꦮꦸꦠ꧀ꦠꦠ꧀ꦠꦴꦪꦺꦮ ꦥꦤ ꦄꦨꦶꦟ꧀ꦲꦴꦥꦠ꧀ꦠꦶꦏꦁ ꦨꦶꦏ꧀ꦑꦸꦁ ꦢꦶꦱ꧀ꦮꦴ ꦌꦮꦩꦺꦱ ꦥꦫꦺꦱꦸ ꦲꦶꦫꦺꦴꦠ꧀ꦠꦥ꧀ꦥꦺꦤꦴꦥꦶ ꦄꦴꦪꦠꦶꦁ ꦱꦁꦮꦫꦁ ꦄꦴꦥꦗ꧀ꦗꦶꦱ꧀ꦱꦠꦷꦠꦶ ꦠꦱ꧀ꦱ ꦨꦶꦏ꧀ꦑꦸꦤꦺꦴ ꦲꦶꦠꦺꦱꦶꦠꦴꦪ ꦠꦶꦏ꧀ꦑꦠ꧀ꦠꦸꦁ ꦄꦥꦭꦺꦴꦏꦺꦠ꧀ꦮꦴ ꦱꦔ꧀ꦓꦺꦤ ꦏꦴꦠꦧ꧀ꦧꦴꦠꦶ ꦮꦺꦢꦶꦠꦧ꧀ꦧꦴꦠꦶ.

꧘꧒. ꦄꦢꦸꦛ꧀ꦜꦸꦭ꧀ꦭꦁ ꦄꦴꦥꦠ꧀ꦠꦶꦁ ꦄꦴꦫꦺꦴꦕꦺꦠꦶ ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱꦴꦠꦶ ꦥꦚ꧀ꦕꦥꦶ ꦄꦴꦥꦠ꧀ꦠꦶꦏ꧀ꦑꦤ꧀ꦣꦺ ꦄꦴꦫꦺꦴꦕꦺꦤ꧀ꦠꦱ꧀ꦱ ꦢꦸꦏ꧀ꦏꦛꦁ. ꦩꦲꦴꦥꦕ꧀ꦕꦫꦶꦪꦁ ꦥꦤ ꦥꦴꦫꦴꦗꦶꦏꦁ ꦄꦴꦫꦺꦴꦕꦺꦤ꧀ꦠꦱ꧀ꦱꦴꦥꦶ ꦢꦸꦏ꧀ꦏꦛꦩꦺꦮ ꦮꦸꦠ꧀ꦠꦁ. ꦄꦤꦸꦥꦱꦩ꧀ꦥꦤ꧀ꦤꦱ꧀ꦱ ꦢꦸꦛ꧀ꦜꦸꦭ꧀ꦭꦁ ꦮꦴ ꦄꦢꦸꦛ꧀ꦜꦸꦭ꧀ꦭꦁ ꦮꦴ ꦄꦗ꧀ꦙꦴꦕꦴꦫꦤ꧀ꦠꦶ ꦌꦠ꧀ꦡ ꦄꦴꦢꦶꦠꦺꦴ ꦥꦚ꧀ꦕ ꦱꦶꦏ꧀ꦑꦴꦥꦢꦴꦤꦶ ꦢꦸꦛ꧀ꦜꦸꦭ꧀ꦭꦺꦴ ꦤꦴꦩ ꦄꦗ꧀ꦙꦴꦕꦴꦫꦺꦴ, ꦱꦺꦱꦴꦤꦶ ꦄꦢꦸꦛ꧀ꦜꦸꦭ꧀ꦭꦺꦴ. ꦱꦸꦏ꧀ꦏꦮꦶꦱ꧀ꦱꦛ꧀ꦜꦶꦏꦴꦪꦱꦁꦱꦒ꧀ꦒꦢꦸꦛ꧀ꦜꦸꦭ꧀ꦭꦄꦠ꧀ꦠꦏꦴꦩꦴ ꦥꦤꦱ꧀ꦱ ꦄꦗ꧀ꦙꦴꦕꦴꦫꦺꦴ ꦤꦴꦩꦴꦠꦶ ꦮꦸꦠ꧀ꦠꦁ.

꧘꧓. ꦮꦠ꧀ꦡꦸꦁ ꦄꦴꦫꦺꦴꦕꦺꦠꦷꦠꦶ ‘‘ꦄꦪꦁ ꦱꦸꦏ꧀ꦏꦮꦶꦱ꧀ꦱꦛ꧀ꦜꦶꦁ ꦄꦴꦥꦤ꧀ꦤꦺꦴ, ꦢꦸꦛ꧀ꦜꦸꦭ꧀ꦭꦁ ꦄꦴꦥꦤ꧀ꦤꦺꦴ, ꦄꦠ꧀ꦠꦏꦴꦩꦁ ꦄꦴꦥꦤ꧀ꦤꦺꦴ’’ ꦏꦴꦪꦱꦁꦱꦒ꧀ꦒꦁ ꦄꦴꦥꦤ꧀ꦤꦺꦴꦠꦶ ꦌꦮꦁ ꦮꦢꦤ꧀ꦠꦱ꧀ꦱ ꦄꦤꦴꦥꦠ꧀ꦠꦶ. ꦄꦴꦥꦠ꧀ꦠꦶꦁ ꦄꦴꦫꦺꦴꦕꦺꦠꦷꦠꦶ ꦌꦠ꧀ꦡ ‘‘ꦄꦪꦁ ꦥꦴꦫꦴꦗꦶꦏꦁ ꦄꦴꦥꦤ꧀ꦤꦺꦴ, ꦱꦔ꧀ꦓꦴꦢꦶꦱꦺꦱꦁ ꦡꦸꦭ꧀ꦭꦕ꧀ꦕꦪꦁ ꦥꦴꦕꦶꦠ꧀ꦠꦶꦪꦁ ꦥꦴꦛꦶꦢꦺꦱꦤꦷꦪꦁ ꦢꦸꦏ꧀ꦏꦛꦁ ꦢꦸꦧ꧀ꦨꦴꦱꦶꦠꦁ ꦄꦴꦥꦤ꧀ꦤꦺꦴ’’ꦠꦶ ꦮꦢꦠꦶ ꦄꦤꦴꦥꦠ꧀ꦠꦶ. ‘‘ꦄꦪꦁ ꦄꦱꦸꦕꦶꦁ ꦩꦺꦴꦕꦺꦠ꧀ꦮꦴ ꦱꦔ꧀ꦓꦴꦢꦶꦱꦺꦱꦁ ꦄꦴꦥꦤ꧀ꦤꦺꦴ’’ꦠꦶꦄꦴꦢꦶꦤꦴ ꦥꦤ ꦤꦪꦺꦤ ꦮꦠ꧀ꦡꦸꦤꦴ ꦱꦢ꧀ꦣꦶꦁ ꦄꦴꦥꦠ꧀ꦠꦶꦁ ꦓꦛꦺꦠ꧀ꦮꦴ ꦄꦴꦫꦺꦴꦕꦺꦤ꧀ꦠꦱ꧀ꦱꦺꦮ ꦄꦴꦥꦠ꧀ꦠꦶ. ꦱꦺꦱꦩꦺꦠ꧀ꦡ ꦈꦠ꧀ꦠꦴꦤꦩꦺꦮ.

ꦠꦶꦱꦩꦸꦛ꧀ꦜꦴꦤꦁ – ꦏꦴꦪꦕꦶꦠ꧀ꦠꦠꦺꦴ ꦮꦴꦕꦴꦕꦶꦠ꧀ꦠꦠꦺꦴ ꦏꦴꦪꦮꦴꦕꦴꦕꦶꦠ꧀ꦠꦠꦺꦴ ꦕ ꦱꦩꦸꦛ꧀ꦜꦴꦠꦶ, ꦏꦶꦫꦶꦪꦁ, ꦱꦚ꧀ꦚꦴꦮꦶꦩꦺꦴꦏ꧀ꦑꦁ, ꦱꦕꦶꦠ꧀ꦠꦏꦁ, ꦭꦺꦴꦏꦮꦗ꧀ꦗꦁ, ꦏꦴꦪꦏꦩ꧀ꦩꦁ, ꦮꦕꦷꦏꦩ꧀ꦩꦁ, ꦄꦏꦸꦱꦭꦕꦶꦠ꧀ꦠꦁ, ꦢꦸꦏ꧀ꦑꦮꦺꦢꦤꦤ꧀ꦠꦶ.

ꦢꦸꦛ꧀ꦜꦸꦭ꧀ꦭꦴꦫꦺꦴꦕꦤꦱꦶꦏ꧀ꦑꦴꦥꦢꦁ ꦤꦮꦩꦁ.

꧑꧐. ꦥꦡꦮꦷꦑꦟꦤꦱꦶꦏ꧀ꦑꦴꦥꦢꦮꦟ꧀ꦟꦤꦴ

꧘꧖. ꦢꦱꦩꦱꦶꦏ꧀ꦑꦴꦥꦢꦺ – ꦗꦴꦠꦴ ꦕ ꦥꦡꦮꦷ ꦄꦗꦴꦠꦴ ꦕ ꦥꦡꦮꦷꦠꦶ ꦆꦩꦺꦲꦶ ꦥꦢꦺꦲꦶ ꦗꦴꦠꦥꦡꦮꦶꦚ꧀ꦕ ꦄꦗꦴꦠꦥꦡꦮꦶꦚ꧀ꦕ ꦢꦱ꧀ꦱꦺꦠꦶ. ꦄꦥ꧀ꦥꦥꦴꦱꦴꦟꦴꦢꦷꦱꦸ ꦄꦥ꧀ꦥꦴ ꦥꦴꦱꦴꦟꦴ ꦌꦠ꧀ꦡꦴꦠꦶ ꦄꦥ꧀ꦥꦥꦴꦱꦴꦟꦴꦠꦶ ꦌꦮꦩꦠ꧀ꦡꦺꦴ ꦢꦛ꧀ꦜꦧ꧀ꦧꦺꦴ. ꦠꦠ꧀ꦡ ꦩꦸꦛ꧀ꦜꦶꦥ꧀ꦥꦩꦴꦟꦠꦺꦴ ꦈꦥꦫꦶ ꦥꦴꦱꦴꦟꦴꦠꦶ ꦮꦺꦢꦶꦠꦧ꧀ꦧꦴ, ꦩꦸꦛ꧀ꦜꦶꦥ꧀ꦥꦩꦴꦟꦴ ꦱꦏ꧀ꦑꦫꦴ. ꦏꦡꦭꦴꦠꦶ ꦏꦥꦴꦭꦑꦟ꧀ꦝꦴꦤꦶ. ꦩꦫꦸꦩ꧀ꦧꦴꦠꦶ ꦏꦛꦱꦏ꧀ꦑꦫꦴ. ꦮꦴꦭꦶꦏꦴꦠꦶ ꦮꦴꦭꦸꦏꦴꦪꦺꦮ. ꦪꦺꦨꦸꦪ꧀ꦪꦺꦤ ꦥꦁꦱꦸꦏꦴꦠꦶ ꦠꦷꦱꦸ ꦏꦺꦴꦛ꧀ꦜꦴꦱꦺꦱꦸ ꦢ꧀ꦮꦺ ꦏꦺꦴꦛ꧀ꦜꦴꦱꦴ ꦥꦁꦱꦸ, ꦌꦏꦺꦴ ꦥꦴꦱꦴꦟꦴꦢꦷꦱꦸ ꦄꦚ꧀ꦚꦠꦫꦺꦴ. ꦄꦢꦝ꧀ꦞꦴꦥꦷꦠꦶ ꦈꦢ꧀ꦣꦤꦥꦠ꧀ꦠꦥꦕꦤꦏꦸꦩ꧀ꦨꦏꦴꦫꦴꦮꦴꦥꦴꦢꦶꦮꦱꦺꦤ ꦠꦡꦴ ꦠꦡꦴ ꦄꦢꦝ꧀ꦞꦴ. ꦱꦴ ꦥꦤ ꦮꦶꦱꦸꦁ ꦤꦠ꧀ꦡꦶ, ꦱꦸꦢ꧀ꦣꦥꦁꦱꦸꦄꦴꦢꦷꦱꦸ ꦄꦚ꧀ꦚꦠꦫꦴꦮ ꦮꦺꦢꦶꦠꦧ꧀ꦧꦴ. ꦪꦺꦨꦸꦪ꧀ꦪꦺꦤꦱꦏ꧀ꦑꦫꦴꦠꦶ ꦧꦲꦸꦠꦫꦴ ꦱꦏ꧀ꦑꦫꦴ. ꦲꦠ꧀ꦡꦶꦏꦸꦕ꧀ꦖꦶꦪꦁ ꦏꦶꦫ ꦌꦏꦥꦕ꧀ꦖꦶꦥꦹꦫꦁ ꦄꦴꦲꦫꦴꦥꦺꦠ꧀ꦮꦴ ꦢꦺꦴꦟꦶꦪꦁ ꦣꦺꦴꦮꦶꦠ꧀ꦮꦴ ꦥꦡꦮꦶꦪꦴ ꦪꦺꦨꦸꦪ꧀ꦪꦺꦤ ꦱꦏ꧀ꦑꦫꦨꦴꦮꦁ ꦚꦠ꧀ꦮꦴ ꦱꦪꦁ ꦨꦶꦏ꧀ꦑꦹ ꦥꦺꦴꦏ꧀ꦑꦫꦟꦶꦁ ꦑꦟꦶꦁꦱꦸ. ꦪꦴꦤꦶ ꦥꦤ ꦩꦗ꧀ꦙꦺ ‘‘ꦄꦥ꧀ꦥꦥꦁꦱꦸ ꦄꦥ꧀ꦥꦩꦠ꧀ꦠꦶꦏꦴ’’ꦠꦶ ꦢ꧀ꦮꦺ ꦥꦢꦴꦤꦶ, ꦠꦴꦤꦶ ꦪꦺꦨꦸꦪ꧀ꦪꦺꦤꦥꦴꦱꦴꦟꦴꦢꦶꦥꦚ꧀ꦕꦏꦩꦺꦮ ꦥꦮꦶꦱꦤ꧀ꦠꦶ ꦠꦺꦱꦁꦪꦺꦮ ꦲꦶ ꦢ꧀ꦮꦶꦤ꧀ꦤꦁ ꦥꦨꦺꦢꦢꦱ꧀ꦱꦤꦩꦺꦠꦁ. ꦱꦪꦁ ꦑꦟꦠꦶ ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱꦴꦠꦶ ꦌꦠ꧀ꦡ ꦥꦲꦴꦫꦺ ꦥꦲꦴꦫꦺ ꦥꦴꦕꦶꦠ꧀ꦠꦶꦪꦁ ꦮꦺꦢꦶꦠꦧ꧀ꦧꦁ. ꦱꦏꦶꦁ ꦄꦴꦟꦠ꧀ꦠꦺꦴ ꦧꦲꦸꦏꦩ꧀ꦥꦶ ꦑꦟꦠꦷꦠꦶ ꦱꦕꦺꦥꦶ ꦱꦏꦭꦢꦶꦮꦱꦁ ꦑꦟꦠꦶ, ꦄꦴꦟꦴꦥꦏꦱ꧀ꦱ ꦌꦏꦁꦪꦺꦮ ꦥꦴꦕꦶꦠ꧀ꦠꦶꦪꦁ. ꦱꦕꦺ ꦥꦤ ꦏꦸꦱꦶꦠꦺꦴ ꦲꦺꦴꦠꦶ, ꦥꦸꦤꦥ꧀ꦥꦸꦤꦁ ꦄꦴꦟꦴꦥꦺꦠꦧ꧀ꦧꦺꦴ. ꦠꦁ ꦄꦴꦟꦴꦥꦺꦠ꧀ꦮꦴ ꦑꦟꦴꦥꦺꦤ꧀ꦠꦱ꧀ꦱ ꦮꦴꦕꦴꦪ ꦮꦴꦕꦴꦪ ꦥꦴꦕꦶꦠ꧀ꦠꦶꦪꦁ. ꦄꦪꦁ ꦠꦴꦮ ꦥꦴꦭ꦳ꦶꦮꦟ꧀ꦟꦤꦴ.

ꦄꦪꦁ ꦥꦤ ꦥꦴꦭ꦳ꦶꦩꦸꦠ꧀ꦠꦏꦮꦶꦤꦶꦕ꧀ꦖꦪꦺꦴ – ‘‘ꦥꦺꦴꦏ꧀ꦑꦫꦟꦶꦁ ꦑꦟꦴ’’ꦠꦶ ꦮꦢꦠꦶ, ꦮꦛ꧀ꦛꦠꦶ. ꦑꦠꦴꦪꦺꦮ ꦲꦶ ꦥꦺꦴꦏ꧀ꦑꦫꦟꦷ ꦤꦴꦩ ꦲꦺꦴꦠꦶ, ꦠꦱ꧀ꦩꦴ ꦄꦪꦁ ꦏꦥ꧀ꦥꦶꦪꦮꦺꦴꦲꦴꦫꦺꦴ. ꦌꦱ ꦤꦪꦺꦴ ‘‘ꦮꦴꦥꦶꦁ ꦠꦭ꦳ꦴꦏꦁ ꦄꦴꦮꦴꦛꦁ ꦑꦟꦴ’’ꦠꦶꦄꦴꦢꦷꦱꦸꦥꦶ. ‘‘ꦆꦩꦁ ꦎꦏꦴꦱꦁ ꦑꦟ, ꦆꦩꦱ꧀ꦩꦶꦁ ꦎꦏꦴꦱꦺ ꦥꦺꦴꦏ꧀ꦑꦫꦟꦶꦁ ꦑꦟꦴ’’ꦠꦶ ꦮꦠ꧀ꦠꦸꦁ ꦥꦤ ꦤ ꦮꦛ꧀ꦛꦠꦶ. ‘‘ꦏꦤ꧀ꦢꦁ ꦑꦟ, ꦩꦹꦭꦁ ꦑꦟꦴ’’ꦠꦶ ꦄꦤꦶꦪꦴꦩꦺꦠ꧀ꦮꦴ ꦮꦠ꧀ꦠꦸꦁ ꦮꦛ꧀ꦛꦠꦶ. ‘‘ꦆꦩꦁ ꦮꦭ꧀ꦭꦶꦁ ꦑꦟ, ꦆꦩꦱ꧀ꦩꦶꦁ ꦎꦏꦴꦱꦺ ꦏꦤ꧀ꦢꦁ ꦮꦴ ꦩꦹꦭꦁ ꦮꦴ ꦑꦟꦴ’’ꦠꦶ ꦮꦠ꧀ꦠꦸꦁ ꦤ ꦮꦛ꧀ꦛꦠꦶ. ꦥꦺꦴꦏ꧀ꦑꦫꦟꦶꦁ ꦱꦺꦴꦣꦺꦤ꧀ꦠꦺꦲꦶ ꦪꦺꦴ ꦏꦸꦛꦺꦲꦶ ꦈꦱ꧀ꦱꦶꦚ꧀ꦕꦶꦠꦸꦁ ꦱꦏ꧀ꦏꦴ ꦲꦺꦴꦠꦶ ꦠꦤꦸꦏꦏꦢ꧀ꦢꦩꦺꦴ, ꦠꦁ ꦄꦥꦤꦺꦠꦸꦁ ꦮꦛ꧀ꦛꦠꦶ, ꦧꦲꦭꦁ ꦤ ꦮꦛ꧀ꦛꦠꦶ. ꦄꦴꦠꦥꦺꦤ ꦱꦸꦏ꧀ꦑꦏꦢ꧀ꦢꦩꦺꦴ ꦦꦭꦠꦶ, ꦠꦠ꧀ꦫ ꦪꦺꦴ ꦲꦺꦛ꧀ꦜꦴ ꦥꦡꦮꦶꦪꦴ ꦄꦱꦩ꧀ꦧꦢ꧀ꦣꦺꦴ, ꦠꦩꦺꦮ ꦄꦥꦤꦺꦠꦸꦁ ꦮꦛ꧀ꦛꦠꦶ. ꦈꦢꦏꦺꦤ ꦒꦠꦛ꧀ꦜꦴꦤꦺ ꦈꦢꦏꦥꦥ꧀ꦥꦛꦏꦺꦴ ꦤꦴꦩ ꦲꦺꦴꦠꦶ, ꦮꦴꦠꦥ꧀ꦥꦲꦴꦫꦺꦤ ꦕꦭꦠꦶ, ꦠꦁ ꦄꦥꦤꦺꦠꦸꦁ ꦮꦛ꧀ꦛꦠꦶ.

ꦥꦺꦴꦏ꧀ꦑꦫꦟꦷꦄꦴꦢꦷꦤꦁ ꦠꦛꦁ ꦨꦶꦗ꧀ꦗꦶꦠ꧀ꦮꦴ ꦈꦢꦏꦱꦴꦩꦤ꧀ꦠꦴ ꦥꦠꦠꦶ, ꦱꦕꦺ ꦎꦩꦏꦕꦴꦠꦸꦩꦴꦱꦁ ꦎꦮꦛ꧀ꦜꦁ, ꦖꦶꦤ꧀ꦢꦶꦠꦸꦁ ꦮꦴ ꦨꦶꦤ꧀ꦢꦶꦠꦸꦁ ꦮꦴ ꦮꦛ꧀ꦛꦠꦶ, ꦕꦴꦠꦸꦩꦴꦱꦠꦺꦴ ꦈꦢ꧀ꦣꦁ ꦤ ꦮꦛ꧀ꦛꦠꦶ. ꦱꦕꦺ ꦥꦤ ꦈꦢꦏꦺꦪꦺꦮ ꦥꦠꦠꦶ, ꦢꦺꦮꦺ ꦄꦠꦶꦫꦺꦏꦕꦴꦠꦸꦩꦴꦱꦁ ꦎꦮꦛ꧀ꦜꦺꦥꦶ ꦈꦢꦏꦺꦪꦺꦮ ꦈꦢꦏꦱ꧀ꦱ ꦥꦠꦶꦠꦠ꧀ꦠꦴ ꦮꦛ꧀ꦛꦠꦶ. ꦥꦴꦱꦴꦟꦥꦶꦛ꧀ꦜꦶꦪꦁ ꦱꦺꦴꦟ꧀ꦝꦶꦁ ꦑꦟꦤ꧀ꦠꦶ, ꦱꦕꦺ ꦠꦠ꧀ꦡ ꦥꦜꦩꦩꦺꦮ ꦱꦸꦑꦸꦩꦫꦗꦁ ꦥꦠꦠꦶ, ꦠꦚ꧀ꦕꦺ ꦢꦺꦮꦺꦤ ꦎꦮꦛ꧀ꦜꦁ ꦲꦺꦴꦠꦶ, ꦕꦴꦠꦸꦩꦴꦱꦕ꧀ꦕꦪꦺꦤ ꦄꦏꦥ꧀ꦥꦶꦪꦥꦡꦮꦷꦱꦔ꧀ꦑ꧀ꦪꦁ ꦒꦕ꧀ꦖꦠꦶ. ꦈꦢꦏꦺ ꦥꦫꦶꦪꦴꦢꦶꦟ꧀ꦟꦺ ꦱꦺꦴꦟ꧀ꦝꦶꦁ ꦱꦺꦴꦣꦺꦤ꧀ꦠꦺꦲꦶ ꦠꦁ ꦮꦶꦏꦺꦴꦥꦺꦠꦸꦁ ꦤ ꦮꦛ꧀ꦛꦠꦶ. ꦱꦕꦺ ꦥꦜꦩꦩꦺꦮ ꦈꦢꦏꦺꦤ ꦥꦹꦫꦠꦶ, ꦥꦕ꧀ꦖꦴ ꦫꦗꦁ ꦥꦠꦠꦶ, ꦠꦁ ꦮꦶꦏꦺꦴꦥꦺꦠꦸꦁ ꦮꦛ꧀ꦛꦠꦶ. ꦠꦠ꧀ꦡ ꦲꦶ ꦢꦺꦮꦺ ꦮꦱ꧀ꦱꦤ꧀ꦠꦺꦥꦶ ꦈꦢꦏꦺꦪꦺꦮ ꦈꦢꦏꦁ ꦥꦠꦠꦷꦠꦶ. ꦥꦶꦛ꧀ꦜꦶꦥꦴꦱꦴꦟꦺ ꦱꦸꦑꦸꦩꦫꦗꦁ ꦲꦺꦴꦠꦶ, ꦢꦺꦮꦺ ꦦꦸꦱꦴꦪꦤ꧀ꦠꦺ ꦄꦭ꧀ꦭꦷꦪꦠꦶ, ꦠꦩ꧀ꦥꦶ ꦕꦴꦠꦸꦩꦴꦱꦕ꧀ꦕꦪꦺꦤ ꦮꦶꦏꦺꦴꦥꦺꦠꦸꦁ ꦤ ꦮꦛ꧀ꦛꦠꦶ. ꦱꦕꦺ ꦥꦤ ꦄꦏꦠꦥꦧ꧀ꦨꦴꦫꦺ ꦮꦩ꧀ꦩꦶꦏꦺꦴ ꦈꦛ꧀ꦜꦶꦠꦺꦴ ꦲꦺꦴꦠꦶ, ꦪꦡꦴꦱꦸꦑꦁ ꦮꦶꦏꦺꦴꦥꦺꦠꦸꦁ ꦮꦛ꧀ꦛꦠꦶ. ꦱꦕꦺ ꦄꦧ꧀ꦨꦺꦴꦏꦴꦱꦺ ꦈꦛ꧀ꦜꦲꦠꦶ, ꦎꦩꦏꦕꦴꦠꦸꦩꦴꦱꦁ ꦎꦮꦛ꧀ꦜꦺꦴꦪꦺꦮ ꦮꦛ꧀ꦛꦠꦶ. ꦫꦸꦏ꧀ꦑꦴꦢꦷꦱꦸ ꦄꦴꦫꦸꦭ꦳꧀ꦲꦈꦥꦕꦶꦏꦴꦩꦠ꧀ꦠꦶꦏꦴꦪꦥꦶ ꦌꦱꦺꦮ ꦤꦪꦺꦴ. ꦒꦟ꧀ꦝꦸꦥ꧀ꦥꦴꦢꦒꦹꦡꦩꦹꦱꦶꦏꦸꦏ꧀ꦏꦫꦒꦺꦴꦏꦟ꧀ꦛꦏꦴꦢꦷꦱꦸꦥꦶ ꦌꦱꦺꦮ ꦤꦪꦺꦴ.

ꦒꦺꦴꦏꦟ꧀ꦛꦏꦺꦴ ꦤꦴꦩ ꦒꦴꦮꦷꦤꦁ ꦑꦸꦫꦕ꧀ꦖꦶꦤ꧀ꦤꦏꦢ꧀ꦢꦩꦺꦴ ꦮꦸꦕ꧀ꦕꦠꦶ. ꦱꦕꦺ ꦥꦤ ꦲꦺꦛ꧀ꦜꦶꦩꦠꦭꦺꦤ ꦨꦹꦩꦶꦱꦩ꧀ꦧꦤ꧀ꦣꦺꦴ ꦲꦺꦴꦠꦶ, ꦌꦏꦢꦶꦮꦱꦩ꧀ꦥꦶ ꦤ ꦮꦛ꧀ꦛꦠꦶ. ꦏꦱꦶꦠꦛ꧀ꦜꦴꦤꦺꦥꦶ ꦤꦔ꧀ꦒꦭꦕ꧀ꦖꦶꦤ꧀ꦤꦩꦠ꧀ꦠꦶꦏꦴꦥꦶꦟ꧀ꦝꦁ ꦒꦟ꧀ꦲꦤ꧀ꦠꦱ꧀ꦱ ꦌꦱꦺꦮ ꦤꦪꦺꦴ. ꦥꦸꦫꦴꦟꦱꦺꦤꦴꦱꦤꦁ ꦲꦺꦴꦠꦶ ꦄꦕ꧀ꦖꦢꦤꦁ ꦮꦴ ꦮꦶꦤꦛ꧀ꦜꦕ꧀ꦖꦢꦤꦁ ꦮꦴ, ꦄꦠꦶꦫꦺꦏꦕꦴꦠꦸꦩꦴꦱꦁ ꦎꦮꦛ꧀ꦜꦁ ꦗꦴꦠꦥꦡꦮꦷꦱꦔ꧀ꦑ꧀ꦪꦩꦺꦮ ꦒꦕ꧀ꦖꦠꦶ. ꦠꦠꦺꦴ ꦄꦮꦱꦺꦱꦁ ꦖꦢꦤꦶꦛ꧀ꦜꦏꦁ ꦮꦴ ꦒꦺꦴꦥꦴꦤꦱꦷꦄꦴꦢꦶꦏꦁ ꦈꦥꦏꦫꦟꦁ ꦮꦴ ‘‘ꦆꦛ꧀ꦜꦏꦁ ꦒꦟ꧀ꦲꦴꦩꦶ ꦒꦺꦴꦥꦤꦱꦶꦁ ꦨꦶꦠ꧀ꦠꦶꦥꦴꦢꦁ ꦥꦢꦫꦠ꧀ꦡꦫꦟꦁ ꦥꦴꦱꦴꦟꦠ꧀ꦡꦩ꧀ꦨꦁ ꦒꦟ꧀ꦲꦴꦩꦷ’’ꦠꦶ ꦱꦚ꧀ꦚꦴꦪ ꦒꦟ꧀ꦲꦶꦠꦸꦁ ꦮꦛ꧀ꦛꦠꦶ. ꦠꦺꦤ ꦱꦢ꧀ꦣꦶꦁ ꦩꦠ꧀ꦠꦶꦏꦴ ꦥꦠꦠꦶ, ꦄꦤꦴꦥꦠ꧀ꦠꦶ. ꦨꦶꦠ꧀ꦠꦶꦩꦠ꧀ꦠꦶꦏꦁ ꦒꦟ꧀ꦲꦤ꧀ꦠꦱ꧀ꦱ ꦥꦤ ꦄꦴꦥꦠ꧀ꦠꦶ. ꦱꦕꦺ ꦪꦴ ꦪꦴ ꦄꦠꦶꦤ꧀ꦠꦴ ꦠꦁ ꦠꦁ ꦒꦟ꧀ꦲꦴꦠꦶ, ꦄꦤꦴꦥꦠ꧀ꦠꦶ.

ꦄꦤ꧀ꦠꦺꦴꦒꦺꦲꦺ ꦩꦠ꧀ꦠꦶꦏꦴꦥꦸꦚ꧀ꦗꦺꦴ ꦲꦺꦴꦠꦶ, ꦠꦱ꧀ꦩꦶꦁ ꦌꦏꦢꦶꦮꦱꦁ ꦎꦮꦛ꧀ꦜꦺ ꦒꦺꦲꦁ ꦖꦴꦢꦺꦤ꧀ꦠꦶ, ꦱꦕꦺ ꦱꦧ꧀ꦧꦺꦴ ꦠꦶꦤ꧀ꦠꦺꦴ ꦕꦴꦠꦸꦩꦴꦱꦕ꧀ꦕꦪꦺꦤ ꦗꦴꦠꦥꦡꦮꦷꦪꦺꦮ. ꦄꦡꦱ꧀ꦱ ꦈꦥꦫꦶꦨꦴꦒꦺꦴꦪꦺꦮ ꦠꦶꦤ꧀ꦠꦺꦴ, ꦄꦤ꧀ꦠꦺꦴ ꦄꦠꦶꦤ꧀ꦠꦺꦴ, ꦪꦠ꧀ꦠꦏꦁ ꦠꦶꦤ꧀ꦠꦁ ꦠꦁ ꦏꦥ꧀ꦥꦶꦪꦏꦴꦫꦏꦺꦲꦶ ꦏꦥ꧀ꦥꦶꦪꦮꦺꦴꦲꦴꦫꦺꦤ ꦄꦥꦤꦴꦩꦺꦠ꧀ꦮꦴ ꦱꦺꦱꦁ ꦪꦡꦴꦱꦸꦑꦁ ꦮꦭ꦳ꦚ꧀ꦗꦺꦠꦸꦁ ꦮꦛ꧀ꦛꦠꦶ. ꦈꦢꦏꦺꦤ ꦠꦺꦩꦺꦠ꧀ꦮꦴ ꦌꦏꦴꦧꦢ꧀ꦣꦴꦪꦺꦮ ꦲꦶ ꦗꦴꦠꦥꦡꦮꦷ ꦲꦺꦴꦠꦶ, ꦤ ꦆꦠꦫꦴꦠꦶ.

ꦄꦧ꧀ꦨꦺꦴꦏꦴꦱꦺ ꦩꦠ꧀ꦠꦶꦏꦴꦥꦴꦏꦴꦫꦺꦴ ꦲꦺꦴꦠꦶ, ꦄꦠꦶꦫꦺꦏꦕꦴꦠꦸꦩꦴꦱꦁ ꦕꦺ ꦎꦮꦛ꧀ꦜꦺꦴ ꦗꦴꦠꦥꦡꦮꦷꦱꦔ꧀ꦑ꧀ꦪꦁ ꦒꦕ꧀ꦖꦠꦶ. ꦠꦠ꧀ꦡ ꦭꦒ꧀ꦒꦥꦁꦱꦸꦁ ꦥꦤ ꦄꦭ꧀ꦭꦲꦠ꧀ꦡꦺꦤ ꦖꦸꦥꦶꦠ꧀ꦮꦴ ꦒꦲꦺꦠꦸꦁ ꦮꦛ꧀ꦛꦠꦶ. ꦱꦕꦺ ꦆꦛ꧀ꦜꦏꦥꦴꦏꦴꦫꦺꦴ ꦲꦺꦴꦠꦶ, ꦪꦺꦨꦸꦪ꧀ꦪꦺꦤꦏꦡꦭꦛ꧀ꦜꦴꦤꦺ ꦠꦶꦛ꧀ꦜꦠꦶ, ꦪꦡꦴꦱꦸꦑꦁ ꦮꦶꦏꦺꦴꦥꦺꦠꦸꦁ ꦮꦛ꧀ꦛꦠꦶ. ꦄꦧ꧀ꦨꦺꦴꦏꦴꦱꦺ ꦜꦶꦠꦩꦟ꧀ꦝꦥꦠ꧀ꦡꦩ꧀ꦨꦁ ꦆꦠꦺꦴ ꦕꦶꦠꦺꦴ ꦕ ꦱꦚ꧀ꦕꦴꦭꦺꦠ꧀ꦮꦴ ꦥꦡꦮꦶꦁ ꦮꦶꦏꦺꦴꦥꦺꦤ꧀ꦠꦺꦤ ꦒꦲꦺꦠꦸꦁ ꦤ ꦮꦛ꧀ꦛꦠꦶ, ꦈꦗꦸꦏꦩꦺꦮ ꦈꦢ꧀ꦣꦫꦶꦠꦸꦁ ꦮꦛ꧀ꦛꦠꦶ. ꦄꦚ꧀ꦚꦩ꧀ꦥꦶ ꦱꦸꦏ꧀ꦑꦫꦸꦏ꧀ꦑꦁ ꦮꦴ ꦱꦸꦏ꧀ꦑꦑꦴꦟꦸꦏꦁ ꦮꦴ ꦒꦟ꧀ꦲꦤ꧀ꦠꦱ꧀ꦱ ꦌꦱꦺꦮ ꦤꦪꦺꦴ. ꦤꦮꦏꦩ꧀ꦩꦠ꧀ꦡꦁ ꦥꦴꦱꦴꦟꦁ ꦮꦴ ꦫꦸꦏ꧀ꦑꦁ ꦮꦴ ꦢꦟ꧀ꦝꦏꦺꦲꦶ ꦈꦕ꧀ꦕꦴꦭꦺꦠ꧀ꦮꦴ ꦥꦮꦛ꧀ꦛꦺꦤ꧀ꦠꦴ ꦒꦕ꧀ꦖꦤ꧀ꦠꦶ, ꦠꦠ꧀ꦡ ꦥꦡꦮꦷ ꦨꦶꦗ꧀ꦗꦠꦶ, ꦱꦕꦺ ꦱꦸꦢ꧀ꦣꦕꦶꦠ꧀ꦠꦴ ꦥꦮꦛ꧀ꦛꦺꦤ꧀ꦠꦶ, ꦄꦤꦴꦥꦠ꧀ꦠꦶ. ꦄꦡ ꦥꦤ ꦠꦺꦤ ꦄꦥꦢꦺꦱꦺꦤ ꦥꦡꦮꦶꦁ ꦨꦶꦤ꧀ꦢꦶꦠꦸꦏꦴꦩꦴꦪꦺꦮ ꦲꦺꦴꦤ꧀ꦠꦶ, ꦄꦴꦥꦠ꧀ꦠꦶ. ꦱꦴꦑꦴꦢꦷꦤꦶ ꦏꦝ꧀ꦞꦤ꧀ꦠꦴꦤꦩ꧀ꦥꦶ ꦥꦡꦮꦶꦪꦁ ꦢꦴꦫꦹꦤꦶ ꦦꦴꦭꦺꦤ꧀ꦠꦴꦤꦩ꧀ꦥꦶ ꦌꦱꦺꦮ ꦤꦪꦺꦴ.

ꦥꦡꦮꦶꦪꦁ ꦄꦛ꧀ꦜꦶꦱꦹꦕꦶꦏꦟ꧀ꦛꦏꦴꦢꦷꦱꦸꦥꦶ ꦪꦁꦏꦶꦚ꧀ꦕꦶ ꦄꦴꦏꦺꦴꦛꦺꦠꦸꦁ ꦮꦴ ꦥꦮꦺꦱꦺꦠꦸꦁ ꦮꦴ ꦤ ꦮꦛ꧀ꦛꦠꦶ. ꦥꦱ꧀ꦱꦴꦮꦣꦴꦫꦴꦪ ꦮꦺꦒꦺꦤ ꦥꦡꦮꦶꦁ ꦨꦶꦤ꧀ꦢꦶꦱ꧀ꦱꦴꦩꦷꦠꦶ ꦌꦮꦁ ꦥꦱ꧀ꦱꦴꦮꦩ꧀ꦥꦶ ꦏꦴꦠꦸꦁ ꦤ ꦮꦛ꧀ꦛꦠꦶ, ꦏꦫꦺꦴꦤ꧀ꦠꦱ꧀ꦱ ꦨꦶꦗ꧀ꦗꦠꦶ, ꦄꦴꦥꦠ꧀ꦠꦶ. ꦮꦶꦱꦩꦨꦹꦩꦶꦁ ꦱꦩꦁ ꦏꦫꦶꦱ꧀ꦱꦴꦩꦷꦠꦶ ꦱꦩ꧀ꦩꦸꦚ꧀ꦗꦤꦶꦪꦴ ꦓꦁꦱꦶꦠꦸꦩ꧀ꦥꦶ ꦤ ꦮꦛ꧀ꦛꦠꦶ, ꦮꦠ꧀ꦠꦱꦷꦱꦺꦤꦺꦮ ꦲꦶ ꦱꦩ꧀ꦩꦗ꧀ꦗꦶꦠꦧ꧀ꦧꦁ. ꦏꦺꦕꦶ ꦏꦠ꧀ꦠꦫꦪꦛ꧀ꦜꦶꦪꦴ ꦨꦹꦩꦶꦁ ꦏꦺꦴꦛ꧀ꦛꦺꦤ꧀ꦠꦶ, ꦥꦴꦢꦔ꧀ꦒꦸꦛ꧀ꦜꦏꦺꦤ ꦮꦶꦭꦶꦑꦤ꧀ꦠꦶ, ‘‘ꦕꦔ꧀ꦏꦩꦶꦠꦛ꧀ꦜꦴꦤꦁ ꦢꦱ꧀ꦱꦺꦱ꧀ꦱꦴꦩꦴ’’ꦠꦶ ꦥꦸꦤꦥ꧀ꦥꦸꦤꦁ ꦨꦹꦩꦶꦁ ꦨꦶꦤ꧀ꦢꦤ꧀ꦠꦴ ꦕꦔ꧀ꦏꦩꦤ꧀ꦠꦶ, ꦱꦧ꧀ꦧꦁ ꦤ ꦮꦛ꧀ꦛꦠꦶ. ꦮꦷꦫꦶꦪꦱꦩ꧀ꦥꦒ꧀ꦒꦲꦠ꧀ꦡꦁ ꦥꦤ ꦱꦩꦟꦣꦩ꧀ꦩꦁ ꦏꦫꦺꦴꦤ꧀ꦠꦺꦤ ꦱꦸꦢ꧀ꦣꦕꦶꦠ꧀ꦠꦺꦤ ꦕꦔ꧀ꦏꦩꦶꦠꦸꦁ ꦮꦛ꧀ꦛꦠꦶ, ‘‘ꦲꦠ꧀ꦡꦁ ꦣꦺꦴꦮꦶꦱ꧀ꦱꦴꦩꦴ’’ꦠꦶ ꦥꦡꦮꦶꦪꦁ ꦓꦁꦱꦤ꧀ꦠꦶ, ꦤ ꦮꦛ꧀ꦛꦠꦶ. ꦄꦓꦁꦱꦤ꧀ꦠꦺꦤ ꦥꦤ ꦄꦭ꧀ꦭꦲꦠ꧀ꦡꦁ ꦥꦡꦮꦶꦪꦁ ꦜꦥꦺꦠ꧀ꦮꦴ ꦫꦗꦁ ꦒꦲꦺꦠꦸꦁ ꦮꦛ꧀ꦛꦠꦶ. ꦏꦺꦕꦶ ꦏꦟ꧀ꦝꦸꦏꦕ꧀ꦖꦸꦄꦴꦢꦷꦲꦶ ꦄꦴꦧꦴꦣꦶꦏꦴ ꦖꦶꦤ꧀ꦤꦠꦛꦴꦢꦷꦱꦸ ꦄꦔ꧀ꦒꦥꦕ꧀ꦕꦔ꧀ꦒꦴꦤꦶ ꦓꦁꦱꦤ꧀ꦠꦶ ꦤ ꦮꦛ꧀ꦛꦠꦶ.

꧘꧗. ꦑꦟꦠꦶ ꦮꦴ ꦑꦟꦴꦥꦺꦠꦶ ꦮꦴꦠꦶ ꦄꦤ꧀ꦠꦩꦱꦺꦴ ꦥꦴꦢꦔ꧀ꦒꦸꦛ꧀ꦜꦏꦺꦤꦥꦶ ꦱꦩ꧀ꦩꦗ꧀ꦗꦤꦷꦱꦭꦴꦏꦴꦪꦥꦶ ꦱꦪꦁ ꦮꦴ ꦑꦟꦠꦶ, ꦄꦚ꧀ꦚꦺꦤ ꦮꦴ ꦑꦟꦴꦥꦺꦠꦶ. ꦨꦶꦤ꧀ꦢꦠꦶ ꦮꦴ ꦨꦺꦢꦴꦥꦺꦠꦶ ꦮꦴꦠꦶ ꦄꦤ꧀ꦠꦩꦱꦺꦴ ꦈꦢꦏꦩ꧀ꦥꦶ ꦖꦝ꧀ꦝꦺꦤ꧀ꦠꦺꦴ ꦱꦪꦁ ꦮꦴ ꦨꦶꦤ꧀ꦢꦠꦶ, ꦄꦚ꧀ꦚꦺꦤ ꦮꦴ ꦨꦶꦤ꧀ꦢꦴꦥꦺꦠꦶ. ꦢꦲꦠꦶ ꦮꦴ ꦢꦲꦴꦥꦺꦠꦶ ꦮꦴꦠꦶ ꦄꦤ꧀ꦠꦩꦱꦺꦴ ꦥꦠ꧀ꦠꦩ꧀ꦥꦶ ꦥꦕꦤ꧀ꦠꦺꦴ ꦱꦪꦁ ꦮꦴ ꦢꦲꦠꦶ, ꦄꦚ꧀ꦚꦺꦤ ꦮꦴ ꦢꦲꦴꦥꦺꦠꦶ. ꦪꦠ꧀ꦠꦏꦺꦱꦸ ꦜꦴꦤꦺꦱꦸ ꦄꦒ꧀ꦒꦶꦁ ꦢꦺꦠꦶ ꦮꦴ ꦢꦴꦥꦺꦠꦶ ꦮꦴ ꦠꦠ꧀ꦠꦏꦴꦤꦶ ꦥꦴꦕꦶꦠ꧀ꦠꦶꦪꦴꦤꦶ. ꦥꦠ꧀ꦠꦁ ꦥꦕꦤ꧀ꦠꦺꦤꦥꦶ ꦲꦶ ꦥꦸꦧ꧀ꦧꦺ ꦥꦏ꧀ꦏꦛ꧀ꦜꦴꦤꦺꦪꦺꦮ ꦲꦶ ꦥꦕꦶꦠꦧ꧀ꦧꦺꦴ. ꦄꦢꦝ꧀ꦞꦴꦪ ꦥꦡꦮꦶꦪꦴ ꦄꦒ꧀ꦒꦶꦁ ꦜꦥꦺꦠꦸꦁ ꦤ ꦮꦛ꧀ꦛꦠꦶ. ꦥꦠ꧀ꦠꦥꦕꦤꦏꦥꦴꦭꦱ꧀ꦱ ꦥꦤ ꦈꦥꦫꦶ ꦄꦒ꧀ꦒꦶꦁ ꦜꦥꦺꦠꦸꦁ ꦮꦛ꧀ꦛꦠꦶ. ꦢꦴꦫꦹꦤꦁ ꦈꦥꦫꦶ ꦜꦥꦺꦠꦶ, ꦱꦺꦴ ꦄꦒ꧀ꦒꦶ ꦠꦴꦤꦶ ꦢꦲꦤ꧀ꦠꦺꦴ ꦒꦤ꧀ꦠ꧀ꦮꦴ ꦥꦡꦮꦶꦁ ꦢꦲꦠꦶ, ꦤ ꦮꦛ꧀ꦛꦠꦶ. ꦆꦛ꧀ꦜꦏꦏꦥꦴꦭꦴꦢꦷꦱꦸꦥꦶ ꦌꦱꦺꦮ ꦤꦪꦺꦴ.

ꦠꦠ꧀ꦫꦴꦥꦶ ꦲꦶ ꦆꦛ꧀ꦜꦏꦴꦢꦷꦤꦁꦪꦺꦮ ꦈꦥꦫꦶ ꦜꦥꦺꦠꦸꦁ ꦮꦛ꧀ꦛꦠꦶ. ꦏꦱ꧀ꦩꦴ? ꦠꦺꦱꦁ ꦄꦤꦸꦥꦴꦢꦴꦤꦠ꧀ꦠꦴ. ꦤ ꦲꦶ ꦠꦴꦤꦶ ꦄꦒ꧀ꦒꦶꦱ꧀ꦱ ꦈꦥꦴꦢꦴꦤꦱꦔ꧀ꦑ꧀ꦪꦁ ꦒꦕ꧀ꦖꦤ꧀ꦠꦶ. ꦱꦸꦏ꧀ꦑꦑꦴꦟꦸꦱꦸꦏ꧀ꦑꦫꦸꦏ꧀ꦑꦴꦢꦷꦱꦸꦥꦶ ꦄꦒ꧀ꦒꦶꦁ ꦢꦴꦠꦸꦁ ꦤ ꦮꦛ꧀ꦛꦠꦶ. ꦱꦕꦺ ꦥꦤ ꦥꦡꦮꦶꦁ ꦄꦥ꧀ꦥꦠ꧀ꦠꦩꦺꦮ ꦤꦶꦧ꧀ꦧꦴꦥꦺꦠ꧀ꦮꦴ ꦒꦩꦶꦱ꧀ꦱꦴꦩꦷꦠꦶ ꦢꦺꦠꦶ, ꦮꦛ꧀ꦛꦠꦶ. ꦥꦕ꧀ꦖꦴ ꦤꦶꦧ꧀ꦧꦴꦥꦺꦠꦸꦁ ꦤ ꦱꦏ꧀ꦏꦺꦴꦠꦶ, ꦄꦮꦶꦱꦪꦠ꧀ꦠꦴ ꦄꦤꦴꦥꦠ꧀ꦠꦶ. ꦠꦶꦟꦸꦏ꧀ꦏꦁ ꦒꦲꦺꦠ꧀ꦮꦴ ꦒꦕ꧀ꦖꦤ꧀ꦠꦺꦴ ꦲꦠ꧀ꦡꦺ ꦝꦪ꧀ꦲꦩꦴꦤꦺ ꦨꦹꦩꦶꦪꦁ ꦥꦴꦠꦺꦠꦶ, ꦄꦤꦴꦥꦠ꧀ꦠꦶ. ꦥꦠꦶꦠꦛ꧀ꦜꦴꦤꦺꦪꦺꦮ ꦈꦥꦴꦢꦴꦤꦁ ꦢꦠ꧀ꦮꦴ ꦄꦒ꧀ꦒꦶꦁ ꦏꦴꦠꦸꦁ ꦮꦛ꧀ꦛꦠꦷꦠꦶ ꦩꦲꦴꦥꦕ꧀ꦕꦫꦶꦪꦁ ꦮꦸꦠ꧀ꦠꦁ. ꦢꦝ꧀ꦞꦥꦡꦮꦶꦪꦴ ꦕ ꦪꦠ꧀ꦠꦏꦁ ꦜꦴꦤꦁ ꦈꦱꦸꦩꦴꦪ ꦄꦤꦸꦒꦠꦁ, ꦱꦧ꧀ꦧꦁ ꦮꦶꦏꦺꦴꦥꦺꦠꦸꦁ ꦮꦛ꧀ꦛꦠꦷꦠꦶ ꦠꦠ꧀ꦡꦺꦮ ꦮꦸꦠ꧀ꦠꦁ. ꦪꦺꦴ ꦥꦤ ꦄꦗꦴꦤꦤꦏꦺꦴ ꦨꦶꦏ꧀ꦑꦸ ꦄꦫꦟꦷꦱꦲꦶꦠꦺꦤ ꦄꦒ꧀ꦒꦶꦁ ꦤꦶꦧ꧀ꦧꦠ꧀ꦠꦺꦠ꧀ꦮꦴ ꦲꦠ꧀ꦡꦺꦤ ꦈꦏ꧀ꦑꦶꦥꦶꦠ꧀ꦮꦴ ‘‘ꦏꦶꦁ ꦏꦫꦺꦴꦩꦷ’’ꦠꦶ ꦮꦢꦠꦶ, ‘‘ꦗꦴꦭꦺꦲꦷ’’ꦠꦶ ꦮꦠ꧀ꦠꦧ꧀ꦧꦺꦴ, ‘‘ꦲꦠ꧀ꦡꦺꦴ ꦝꦪ꧀ꦲꦠꦷ’’ꦠꦶ ꦮꦢꦠꦶ, ‘‘ꦪꦡꦴ ꦤ ꦝꦪ꧀ꦲꦠꦶ ꦠꦡꦴ ꦏꦫꦺꦴꦲꦷ’’ꦠꦶ ꦮꦠ꧀ꦠꦧ꧀ꦧꦺꦴ. ‘‘ꦨꦹꦩꦶꦪꦁ ꦥꦴꦠꦺꦲꦷ’’ꦠꦶ ꦥꦤ ꦤ ꦮꦠ꧀ꦠꦧ꧀ꦧꦺꦴ. ꦱꦕꦺ ꦲꦠ꧀ꦡꦺ ꦝꦪ꧀ꦲꦩꦴꦤꦺ ꦥꦴꦠꦺꦠꦶ ‘‘ꦥꦡꦮꦶꦁ ꦢꦲꦶꦱ꧀ꦱꦴꦩꦷ’’ꦠꦶ ꦄꦥꦴꦠꦶꦠꦠ꧀ꦠꦴ ꦄꦤꦴꦥꦠ꧀ꦠꦶ. ꦥꦠꦶꦠꦛ꧀ꦜꦴꦤꦺ ꦥꦤ ꦄꦒ꧀ꦒꦶꦁ ꦏꦴꦠꦸꦁ ꦮꦛ꧀ꦛꦠꦷꦠꦶ ꦏꦸꦫꦸꦤ꧀ꦢꦶꦪꦁ ꦮꦸꦠ꧀ꦠꦁ.

꧘꧘. ꦄꦤꦴꦥꦠ꧀ꦠꦶ ꦆꦩꦁ ꦗꦴꦤꦴꦠꦶꦄꦴꦢꦷꦱꦸ ‘‘ꦆꦩꦱ꧀ꦱ ꦡꦩ꧀ꦨꦱ꧀ꦱ ꦄꦴꦮꦴꦛꦁ ꦗꦴꦤ, ꦩꦲꦴꦩꦠ꧀ꦠꦶꦏꦁ ꦗꦴꦤ, ꦡꦸꦱꦩꦠ꧀ꦠꦶꦏꦁ ꦗꦴꦤ, ꦩꦲꦴꦩꦠ꧀ꦠꦶꦏꦁ ꦢꦺꦲꦶ, ꦡꦸꦱꦩꦠ꧀ꦠꦶꦏꦁ ꦢꦺꦲꦶ, ꦩꦠ꧀ꦠꦶꦏꦁ ꦄꦴꦲꦫ, ꦥꦁꦱꦸꦁ ꦄꦴꦲꦫ, ꦩꦠ꧀ꦠꦶꦏꦴꦪ ꦄꦠ꧀ꦡꦺꦴ, ꦥꦁꦱꦸꦤꦴ ꦄꦠ꧀ꦡꦺꦴ, ꦆꦩꦱ꧀ꦱ ꦡꦩ꧀ꦨꦱ꧀ꦱ ꦄꦴꦮꦴꦛꦁ ꦏꦥ꧀ꦥꦶꦪꦁ ꦏꦫꦺꦴꦲꦶ, ꦆꦩꦁ ꦩꦠ꧀ꦠꦶꦏꦁ ꦏꦥ꧀ꦥꦶꦪꦁ ꦏꦫꦺꦴꦲꦶ, ꦆꦩꦁ ꦥꦁꦱꦸꦁ ꦏꦥ꧀ꦥꦶꦪꦁ ꦏꦫꦺꦴꦲꦷ’’ꦠꦶ ꦌꦮꦩꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ.

ꦄꦱꦚ꧀ꦕꦶꦕ꧀ꦕꦴꦠꦶ ꦥꦴꦱꦴꦟꦫꦸꦏ꧀ꦑꦴꦢꦷꦤꦶ ꦮꦴ ꦥꦮꦛ꧀ꦛꦺꦤ꧀ꦠꦱ꧀ꦱ ꦏꦠ꧀ꦠꦫꦢꦟ꧀ꦝꦺꦤ ꦮꦴ ꦄꦴꦲꦕ꧀ꦕ ꦄꦴꦲꦕ꧀ꦕ ꦒꦕ꧀ꦖꦤ꧀ꦠꦱ꧀ꦱ ꦥꦡꦮꦷ ꦨꦶꦗ꧀ꦗꦠꦶ, ꦱꦴ ‘‘ꦠꦺꦤ ꦨꦶꦤ꧀ꦢꦶꦱ꧀ꦱꦴꦩꦷ’’ꦠꦶ ꦌꦮꦁ ꦱꦚ꧀ꦕꦶꦕ꧀ꦕ ꦄꦨꦶꦤ꧀ꦤꦠ꧀ꦠꦴ ꦄꦱꦚ꧀ꦕꦶꦕ꧀ꦕ ꦨꦶꦤ꧀ꦤꦴ ꦤꦴꦩ ꦲꦺꦴꦠꦶ. ꦆꦠꦶ ꦄꦱꦚ꧀ꦕꦶꦕ꧀ꦕ ꦨꦶꦤ꧀ꦢꦤ꧀ꦠꦱ꧀ꦱ ꦄꦤꦴꦥꦠ꧀ꦠꦶ. ꦄꦱꦠꦶꦪꦴꦠꦶ ꦄꦚ꧀ꦚꦮꦶꦲꦶꦠꦺꦴ ꦏꦺꦤꦕꦶ ꦱꦢ꧀ꦣꦶꦁ ꦏꦶꦚ꧀ꦕꦶ ꦏꦡꦺꦤ꧀ꦠꦺꦴ ꦥꦴꦢꦔ꧀ꦒꦸꦛ꧀ꦜꦏꦺꦤ ꦮꦴ ꦏꦠ꧀ꦠꦫꦪꦛ꧀ꦜꦶꦪꦴ ꦮꦴ ꦥꦡꦮꦶꦁ ꦮꦶꦭꦶꦑꦤ꧀ꦠꦺꦴ ꦠꦶꦛ꧀ꦜꦠꦶ, ꦌꦮꦁ ꦄꦱꦠꦶꦪꦴ ꦮꦶꦭꦶꦑꦤ꧀ꦠꦱ꧀ꦱ ꦮꦴ ꦨꦶꦤ꧀ꦢꦤ꧀ꦠꦱ꧀ꦱ ꦮꦴ ꦄꦤꦴꦥꦠ꧀ꦠꦶ. ꦄꦗꦴꦤꦤ꧀ꦠꦱ꧀ꦱꦴꦠꦶ ꦄꦤ꧀ꦠꦺꦴꦒꦺꦲꦺ ꦎꦮꦛ꧀ꦜꦁ ꦖꦤ꧀ꦤꦁ ꦥꦡꦮꦶꦁ ‘‘ꦄꦏꦥ꧀ꦥꦶꦪꦥꦡꦮꦷ’’ꦠꦶ ꦤ ꦗꦴꦤꦴꦠꦶ, ‘‘ꦏꦥ꧀ꦥꦶꦪꦥꦡꦮꦷ’’ꦠꦶ ꦱꦚ꧀ꦚꦴꦪ ꦮꦶꦏꦺꦴꦥꦺꦠꦶ, ‘‘ꦑꦟꦴꦩꦶ ꦨꦶꦤ꧀ꦢꦴꦩꦶ ꦢꦲꦴꦩꦷ’’ꦠꦶ ꦮꦴ ꦤ ꦗꦴꦤꦴꦠꦶ, ꦏꦺꦮꦭꦁ ꦱꦔ꧀ꦒꦺꦴꦥꦤꦠ꧀ꦡꦴꦪ ꦑꦟꦶꦠ꧀ꦠꦴꦢꦷꦤꦶ ꦮꦴ ꦜꦥꦺꦠꦶ, ꦝꦪ꧀ꦲꦩꦴꦤꦲꦠ꧀ꦡꦺꦴ ꦮꦴ ꦄꦒ꧀ꦒꦶꦁ ꦥꦴꦠꦺꦠꦶ, ꦌꦮꦁ ꦄꦗꦴꦤꦤ꧀ꦠꦱ꧀ꦱ ꦄꦤꦴꦥꦠ꧀ꦠꦶ. ꦱꦺꦱꦁ ꦈꦠ꧀ꦠꦴꦤꦩꦺꦮ.

ꦠꦶꦱꦩꦸꦛ꧀ꦜꦴꦤꦁ – ꦏꦴꦪꦕꦶꦠ꧀ꦠꦠꦺꦴ ꦮꦴꦕꦴꦕꦶꦠ꧀ꦠꦠꦺꦴ ꦏꦴꦪꦮꦴꦕꦴꦕꦶꦠ꧀ꦠꦠꦺꦴ ꦕ ꦱꦩꦸꦛ꧀ꦜꦴꦠꦶ. ꦏꦶꦫꦶꦪꦁ, ꦱꦚ꧀ꦚꦴꦮꦶꦩꦺꦴꦏ꧀ꦑꦁ, ꦱꦕꦶꦠ꧀ꦠꦏꦁ, ꦥꦟ꧀ꦟꦠ꧀ꦠꦶꦮꦗ꧀ꦗꦁ, ꦏꦴꦪꦏꦩ꧀ꦩꦁ, ꦮꦕꦷꦏꦩ꧀ꦩꦁ, ꦠꦶꦕꦶꦠ꧀ꦠꦁ, ꦠꦶꦮꦺꦢꦤꦤ꧀ꦠꦶ.

ꦥꦡꦮꦷꦑꦟꦤꦱꦶꦏ꧀ꦑꦴꦥꦢꦁ ꦢꦱꦩꦁ.

ꦱꦩꦠ꧀ꦠꦺꦴ ꦮꦟ꧀ꦟꦤꦴꦏ꧀ꦏꦩꦺꦤ ꦩꦸꦱꦴꦮꦴꦢꦮꦒ꧀ꦒꦺꦴ ꦥꦜꦩꦺꦴ.