꧓-꧑꧐. ꦥꦜꦩꦄꦴꦤꦤ꧀ꦢꦱꦸꦠ꧀ꦠꦴꦢꦶꦮꦟ꧀ꦟꦤꦴ

꧙꧘꧙-꧙꧙꧖. ꦠꦠꦶꦪꦺ ꦥꦮꦶꦕꦶꦤꦠꦷꦠꦶ ꦄꦤꦶꦕ꧀ꦕꦴꦢꦶꦮꦱꦺꦤ ꦥꦮꦶꦕꦶꦤꦠꦶ. ꦆꦠꦫꦁ ꦥꦢꦢ꧀ꦮꦪꦁ ꦌꦠꦱ꧀ꦱꦺꦮ ꦮꦺꦮꦕꦤꦁ. ꦤꦶꦫꦴꦩꦶꦱꦴꦠꦶ ꦤꦶꦏ꧀ꦏꦶꦭꦺꦱꦴ ꦏꦴꦪꦶꦏꦕꦺꦠꦱꦶꦏꦢꦫꦡꦥꦛꦶꦥꦱ꧀ꦱꦢ꧀ꦣꦶꦪꦴ ꦏꦴꦪꦺꦴꦥꦶ ꦕꦶꦠ꧀ꦠꦩ꧀ꦥꦶ ꦥꦱ꧀ꦱꦩ꧀ꦨꦠꦶ. ꦱꦩꦴꦣꦶꦪꦠꦷꦠꦶ ꦱꦩ꧀ꦩꦴ ꦜꦥꦶꦪꦠꦶ, ꦄꦥ꧀ꦥꦤꦴꦕꦶꦠ꧀ꦠꦁ ꦮꦶꦪ ꦲꦺꦴꦠꦶ. ꦄꦗ꧀ꦙꦸꦥꦺꦏ꧀ꦑꦶꦠꦴ ꦲꦺꦴꦠꦷꦠꦶ ꦱꦲꦗꦴꦠꦄꦗ꧀ꦙꦸꦥꦺꦏ꧀ꦑꦤꦴꦪ ꦄꦗ꧀ꦙꦸꦥꦺꦏ꧀ꦑꦶꦠꦴ ꦲꦺꦴꦠꦶ.

ꦌꦮꦁ ꦕꦸꦢ꧀ꦢꦱꦮꦶꦣꦺꦤ ꦏꦴꦪꦥꦫꦶꦒ꧀ꦒꦴꦲꦏꦱ꧀ꦱ ꦨꦶꦏ꧀ꦑꦸꦤꦺꦴ ꦠꦱ꧀ꦩꦶꦁ ꦏꦴꦪꦺ ꦱꦠꦶ ꦱꦠꦶꦱꦩ꧀ꦧꦺꦴꦗ꧀ꦙꦔ꧀ꦒꦺꦴ, ꦠꦴꦪ ꦱꦠꦶꦪꦴ ꦱꦩ꧀ꦥꦪꦸꦠ꧀ꦠꦚꦴꦟꦁ ꦣꦩ꧀ꦩꦮꦶꦕꦪꦱꦩ꧀ꦧꦺꦴꦗ꧀ꦙꦔ꧀ꦒꦺꦴ, ꦠꦁꦱꦩ꧀ꦥꦪꦸꦠ꧀ꦠꦩꦺꦮ ꦏꦴꦪꦶꦏꦕꦺꦠꦱꦶꦏꦮꦷꦫꦶꦪꦁ ꦮꦷꦫꦶꦪꦱꦩ꧀ꦧꦺꦴꦗ꧀ꦙꦔ꧀ꦒꦺꦴ, ꦥꦷꦠꦶꦥꦱ꧀ꦱꦢ꧀ꦣꦶꦕꦶꦠ꧀ꦠꦺꦏꦒ꧀ꦒꦠꦴ ꦥꦷꦠꦶꦥꦱ꧀ꦱꦢ꧀ꦣꦶꦱꦩꦴꦣꦶꦱꦩ꧀ꦧꦺꦴꦗ꧀ꦙꦔ꧀ꦒꦴ, ꦆꦩꦺꦱꦁ ꦖꦤ꧀ꦤꦁ ꦧꦺꦴꦗ꧀ꦙꦔ꧀ꦒꦴꦤꦁ ꦄꦤꦺꦴꦱꦏ꧀ꦏꦤꦄꦤꦠꦶꦮꦠ꧀ꦠꦤꦱꦔ꧀ꦑꦴꦠꦺꦴ ꦩꦗ꧀ꦙꦠ꧀ꦠꦴꦏꦴꦫꦺꦴ ꦈꦥꦺꦏ꧀ꦑꦴꦱꦩ꧀ꦧꦺꦴꦗ꧀ꦙꦔ꧀ꦒꦺꦴ. ꦪꦡꦺꦮ ꦲꦶ ꦱꦩꦥ꧀ꦥꦮꦠ꧀ꦠꦺꦱꦸ ꦄꦱ꧀ꦱꦺꦱꦸ ꦱꦴꦫꦡꦶꦤꦺꦴ ‘‘ꦄꦪꦁ ꦎꦭꦷꦪꦠꦷ’’ꦠꦶ ꦠꦸꦢꦤꦁ ꦮꦴ, ‘‘ꦄꦪꦁ ꦄꦠꦶꦣꦴꦮꦠꦷ’’ꦠꦶ ꦄꦴꦏꦝ꧀ꦞꦤꦁ ꦮꦴ ꦤꦠ꧀ꦡꦶ, ꦏꦺꦮꦭꦁ ꦌꦮꦁ ꦥꦱ꧀ꦱꦩꦴꦤꦱ꧀ꦱ ꦜꦶꦠꦴꦏꦴꦫꦺꦴꦮ ꦲꦺꦴꦠꦶ, ꦌꦮꦩꦺꦮ ꦆꦩꦺꦱꦁ ꦖꦤ꧀ꦤꦁ ꦧꦺꦴꦗ꧀ꦙꦔ꧀ꦒꦴꦤꦁ ꦄꦤꦺꦴꦱꦏ꧀ꦏꦤꦄꦤꦠꦶꦮꦠ꧀ꦠꦤꦱꦔ꧀ꦑꦴꦠꦺꦴ ꦩꦗ꧀ꦙꦠ꧀ꦠꦴꦏꦴꦫꦺꦴ ꦈꦥꦺꦏ꧀ꦑꦴꦱꦩ꧀ꦧꦺꦴꦗ꧀ꦙꦔ꧀ꦒꦺꦴ ꦤꦴꦩ ꦲꦺꦴꦠꦶ. ꦌꦠ꧀ꦠꦴꦮꦠꦴ ꦏꦶꦁ ꦏꦡꦶꦠꦁ? ꦌꦏꦕꦶꦠ꧀ꦠꦏ꧀ꦑꦟꦶꦏꦴ ꦤꦴꦤꦴꦱꦫꦱꦭꦏ꧀ꦑꦟꦴ ꦮꦶꦥꦱ꧀ꦱꦤꦴꦧꦺꦴꦗ꧀ꦙꦔ꧀ꦒꦴ ꦤꦴꦩ ꦏꦡꦶꦠꦴ.

ꦮꦶꦮꦺꦏꦤꦶꦱ꧀ꦱꦶꦠꦤ꧀ꦠꦶꦄꦴꦢꦷꦤꦶ ꦮꦸꦠ꧀ꦠꦠ꧀ꦡꦴꦤꦺꦮ. ꦌꦠ꧀ꦡ ꦥꦤ ꦱꦺꦴꦭ꦳ꦱꦏ꧀ꦑꦠ꧀ꦠꦸꦏꦴ ꦄꦴꦤꦴꦥꦴꦤꦱ꧀ꦱꦠꦶ ꦩꦶꦱ꧀ꦱꦏꦴ ꦏꦡꦶꦠꦴ, ꦄꦴꦤꦴꦥꦴꦤꦩꦹꦭꦏꦴ ꦱꦠꦶꦥꦛ꧀ꦜꦴꦤꦴ ꦥꦸꦧ꧀ꦧꦨꦴꦒꦴ, ꦠꦺꦱꦁ ꦩꦹꦭꦨꦹꦠꦴ ꦄꦴꦤꦴꦥꦴꦤꦱ꧀ꦱꦠꦶ ꦥꦸꦧ꧀ꦧꦨꦴꦒꦴ. ꦧꦺꦴꦗ꧀ꦙꦔ꧀ꦒꦩꦹꦭꦏꦴ ꦱꦠꦶꦥꦛ꧀ꦜꦴꦤꦴ ꦥꦸꦧ꧀ꦧꦨꦴꦒꦴ, ꦠꦺꦥꦶ ꦧꦺꦴꦗ꧀ꦙꦔ꧀ꦒꦴ ꦥꦸꦧ꧀ꦧꦨꦴꦒꦴꦮ. ꦮꦶꦗ꧀ꦗꦴꦮꦶꦩꦸꦠ꧀ꦠꦶꦥꦹꦫꦏꦴ ꦥꦤ ꦧꦺꦴꦗ꧀ꦙꦔ꧀ꦒꦴ ꦤꦶꦧ꧀ꦧꦠ꧀ꦠꦶꦠꦭꦺꦴꦏꦸꦠ꧀ꦠꦫꦴ, ꦮꦶꦗ꧀ꦗꦴꦮꦶꦩꦸꦠ꧀ꦠꦶꦪꦺꦴ ꦄꦫꦶꦪꦦꦭꦱꦩ꧀ꦥꦪꦸꦠ꧀ꦠꦴ. ꦮꦶꦗ꧀ꦗꦴ ꦮꦴ ꦕꦠꦸꦠ꧀ꦡꦩꦒ꧀ꦒꦱꦩ꧀ꦥꦪꦸꦠ꧀ꦠꦴ, ꦮꦶꦩꦸꦠ꧀ꦠꦶ ꦦꦭꦱꦩ꧀ꦥꦪꦸꦠ꧀ꦠꦴꦠꦶ. ꦕꦠꦸꦠ꧀ꦡꦥꦚ꧀ꦕꦩꦖꦛ꧀ꦜꦴꦤꦶꦥꦶ ꦆꦩꦶꦤꦴꦮ ꦱꦩꦴꦤꦥꦫꦶꦕ꧀ꦖꦺꦢꦴꦤꦶ. ꦱꦺꦱꦁ ꦱꦧ꧀ꦧꦠ꧀ꦡ ꦈꦠ꧀ꦠꦴꦤꦩꦺꦮꦴꦠꦶ.

ꦄꦴꦤꦴꦥꦴꦤꦱꦁꦪꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.