꧖. ꦩꦺꦴꦒ꧀ꦒꦭ꧀ꦭꦴꦤꦱꦁꦪꦸꦠ꧀ꦠꦁ

꧑-꧘. ꦥꦜꦩꦙꦴꦤꦥꦚ꧀ꦲꦴꦱꦸꦠ꧀ꦠꦴꦢꦶꦮꦟ꧀ꦟꦤꦴ

꧓꧓꧒-꧓꧓꧙. ꦩꦺꦴꦒ꧀ꦒꦭ꧀ꦭꦴꦤꦱꦁꦪꦸꦠ꧀ꦠꦺ ꦏꦴꦩꦱꦲꦒꦠꦴꦠꦶ ꦥꦚ꧀ꦕꦤꦷꦮꦫꦟꦱꦲꦒꦠꦴ. ꦠꦱ꧀ꦱ ꦲꦶ ꦥꦜꦩꦗ꧀ꦙꦴꦤꦮꦸꦛ꧀ꦜꦶꦠꦱ꧀ꦱ ꦥꦚ꧀ꦕ ꦤꦷꦮꦫꦟꦴꦤꦶ ꦱꦤ꧀ꦠꦠꦺꦴ ꦈꦥꦛ꧀ꦜꦲꦶꦁꦱꦸ. ꦠꦺꦤꦱ꧀ꦱ ꦠꦁ ꦥꦜꦩꦗ꧀ꦙꦴꦤꦁ ꦲꦴꦤꦨꦴꦒꦶꦪꦁ ꦤꦴꦩ ꦄꦲꦺꦴꦱꦶ. ꦠꦁ ꦥꦩꦴꦢꦁ ꦚꦠ꧀ꦮꦴ ꦱꦠ꧀ꦡꦴ ‘‘ꦩꦴ ꦥꦩꦴꦢꦺꦴ’’ꦠꦶ ꦎꦮꦴꦢꦁ ꦄꦢꦴꦱꦶ. ꦢꦸꦠꦶꦪꦗ꧀ꦙꦴꦤꦴꦢꦷꦱꦸꦥꦶ ꦆꦩꦶꦤꦴꦮ ꦤꦪꦺꦤ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ꦄꦴꦫꦩ꧀ꦩꦟꦱꦲꦒꦠꦩꦺꦮ ꦲꦺꦠ꧀ꦡ ‘‘ꦱꦲꦒꦠ’’ꦤ꧀ꦠꦶ ꦮꦸꦠ꧀ꦠꦁ.

꧙. ꦄꦤꦶꦩꦶꦠ꧀ꦠꦥꦚ꧀ꦲꦴꦱꦸꦠ꧀ꦠꦮꦟ꧀ꦟꦤꦴ

꧓꧔꧐. ꦄꦤꦶꦩꦶꦠ꧀ꦠꦁ ꦕꦺꦠꦺꦴꦱꦩꦴꦣꦶꦤ꧀ꦠꦶ ꦤꦶꦕ꧀ꦕꦤꦶꦩꦶꦠ꧀ꦠꦴꦢꦷꦤꦶ ꦥꦲꦴꦪ ꦥꦮꦠ꧀ꦠꦁ ꦮꦶꦥꦱ꧀ꦱꦤꦴꦱꦩꦴꦣꦶꦁꦪꦺꦮ ꦱꦤ꧀ꦣꦴꦪꦺꦠꦁ ꦮꦸꦠ꧀ꦠꦤ꧀ꦠꦶ. ꦤꦶꦩꦶꦠ꧀ꦠꦴꦤꦸꦱꦴꦫꦶ ꦮꦶꦚ꧀ꦚꦴꦟꦁ ꦲꦺꦴꦠꦷꦠꦶ ꦌꦮꦁ ꦆꦩꦶꦤꦴ ꦮꦶꦥꦱ꧀ꦱꦤꦴꦱꦩꦴꦣꦶꦮꦶꦲꦴꦫꦺꦤ ꦮꦶꦲꦫꦠꦺꦴ ꦮꦶꦥꦱ꧀ꦱꦤꦴꦚꦴꦟꦺ ꦠꦶꦏ꧀ꦑꦺ ꦱꦹꦫꦺ ꦮꦲꦩꦴꦤꦺ. ꦪꦡꦴ ꦤꦴꦩ ꦥꦸꦫꦶꦱꦱ꧀ꦱ ꦠꦶꦑꦶꦟꦺꦤ ꦦꦫꦱꦸꦤꦴ ꦫꦸꦏ꧀ꦑꦁ ꦖꦶꦤ꧀ꦢꦤ꧀ꦠꦱ꧀ꦱ ‘‘ꦱꦸꦛ꧀ꦜꦸ ꦮꦠ ꦩꦺ ꦦꦫꦱꦸ ꦮꦲꦠꦷ’’ꦠꦶ ꦑꦟꦺ ꦑꦟꦺ ꦦꦫꦱꦸꦣꦴꦫꦁ ꦎꦭꦺꦴꦏꦺꦤ꧀ꦠꦱ꧀ꦱ ꦖꦺꦗ꧀ꦗꦏꦶꦕ꧀ꦕꦁ ꦤ ꦤꦶꦥ꧀ꦦꦗ꧀ꦗꦠꦶ, ꦌꦮꦁ ꦡꦺꦫꦱ꧀ꦱꦴꦥꦶ ‘‘ꦱꦹꦫꦁ ꦮꦠ ꦩꦺ ꦲꦸꦠ꧀ꦮꦴ ꦚꦴꦟꦁ ꦮꦲꦠꦷ’’ꦠꦶ ꦮꦶꦥꦱ꧀ꦱꦤꦁ ꦄꦴꦫꦧ꧀ꦨ ꦤꦶꦏꦤ꧀ꦠꦶ ꦈꦥ꧀ꦥꦗ꧀ꦗꦠꦶ. ꦄꦡ ꦮꦶꦥꦱ꧀ꦱꦤꦴꦏꦶꦕ꧀ꦕꦁ ꦱꦴꦣꦺꦠꦸꦁ ꦤꦴꦱꦏ꧀ꦑꦶ. ꦠꦁ ꦱꦤ꧀ꦣꦴꦪ ꦮꦸꦠ꧀ꦠꦁ ‘‘ꦤꦶꦩꦶꦠ꧀ꦠꦴꦤꦸꦱꦴꦫꦶ ꦮꦶꦚ꧀ꦚꦴꦟꦁ ꦲꦺꦴꦠꦷ’’ꦠꦶ. ꦱꦧ꧀ꦧꦤꦶꦩꦶꦠ꧀ꦠꦴꦤꦁ ꦄꦩꦤꦱꦶꦏꦴꦫꦴ ꦄꦤꦶꦩꦶꦠ꧀ꦠꦁ ꦕꦺꦠꦺꦴꦱꦩꦴꦣꦶꦁ ꦈꦥꦱꦩ꧀ꦥꦗ꧀ꦗ ꦮꦶꦲꦴꦱꦶꦤ꧀ꦠꦶ ꦱꦧ꧀ꦧꦺꦱꦁ ꦤꦶꦕ꧀ꦕꦱꦸꦑꦄꦠ꧀ꦠꦤꦶꦩꦶꦠ꧀ꦠꦴꦤꦁ ꦄꦩꦤꦱꦶꦏꦴꦫꦺꦤ ꦄꦤꦶꦩꦶꦠ꧀ꦠꦁ ꦮꦸꦛ꧀ꦜꦴꦤꦒꦴꦩꦶꦤꦶꦮꦶꦥꦱ꧀ꦱꦤꦴꦱꦩ꧀ꦥꦪꦸꦠ꧀ꦠꦁ ꦕꦺꦠꦺꦴꦱꦩꦴꦣꦶꦁ ꦤꦶꦧ꧀ꦧꦴꦤꦴꦫꦩ꧀ꦩꦟꦁ ꦈꦥꦫꦶꦩꦒ꧀ꦒꦦꦭꦱꦩꦴꦣꦶꦁ ꦈꦥꦱꦩ꧀ꦥꦗ꧀ꦗ ꦮꦶꦲꦴꦱꦶꦁ.

꧑꧐-꧑꧑. ꦱꦏ꧀ꦏꦱꦸꦠ꧀ꦠꦴꦢꦶꦮꦟ꧀ꦟꦤꦴ

꧓꧔꧑-꧓꧔꧒. ꦄꦮꦺꦕ꧀ꦕꦥ꧀ꦥꦱꦴꦢꦺꦤꦴꦠꦶ ꦄꦕꦭꦥ꧀ꦥꦱꦴꦢꦺꦤ. ꦢꦱꦲꦶ ꦜꦴꦤꦺꦲꦷꦠꦶ ꦢꦱꦲꦶ ꦏꦴꦫꦟꦺꦲꦶ. ꦄꦣꦶꦒꦟ꧀ꦲꦤ꧀ꦠꦷꦠꦶ ꦄꦨꦶꦨꦮꦤ꧀ꦠꦶ, ꦄꦠꦶꦏ꧀ꦏꦩꦶꦠ꧀ꦮꦴ ꦠꦶꦛ꧀ꦜꦤ꧀ꦠꦶ. ꦱꦺꦱꦁ ꦱꦧ꧀ꦧꦠ꧀ꦡ ꦈꦠ꧀ꦠꦴꦤꦠ꧀ꦡꦩꦺꦮꦴꦠꦶ.

ꦩꦺꦴꦒ꧀ꦒꦭ꧀ꦭꦴꦤꦱꦁꦪꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.