꧗. ꦥꦜꦩꦒꦺꦭꦚ꧀ꦚꦱꦸꦠ꧀ꦠꦮꦟ꧀ꦟꦤꦴ

꧒꧕꧕. ꦱꦠ꧀ꦠꦩꦺ ꦪꦺꦤ ꦒꦶꦭꦴꦤꦱꦴꦭꦴ ꦠꦺꦤꦸꦥꦱꦔ꧀ꦏꦩꦷꦠꦶ ‘‘ꦱꦢꦺꦮꦏꦺ ꦭꦺꦴꦏꦺ ꦄꦒ꧀ꦒꦥꦸꦒ꧀ꦒꦭꦺꦴ ꦠꦡꦴꦒꦠꦺꦴꦥꦶ ꦒꦶꦭꦴꦤꦸꦥꦛ꧀ꦜꦴꦤꦁ ꦒꦕ꧀ꦖꦠꦶ, ꦈꦥꦛ꧀ꦜꦴꦠꦧ꧀ꦧꦪꦸꦠ꧀ꦠꦏꦴ ꦤꦴꦩ ꦒꦶꦭꦴꦤꦴꦠꦶ ꦨꦶꦏ꧀ꦑꦹ ꦱꦢ꧀ꦢꦲꦶꦠ꧀ꦮꦴ ꦎꦏꦥ꧀ꦥꦺꦠ꧀ꦮꦴ ꦒꦶꦭꦴꦤꦺ ꦈꦥꦛ꧀ꦜꦴꦠꦧ꧀ꦧꦺ ꦩꦚ꧀ꦚꦶꦱ꧀ꦱꦤ꧀ꦠꦷ’’ꦠꦶ ꦕ ‘‘ꦪꦺ ꦠꦠ꧀ꦡ ꦏꦩ꧀ꦩꦛ꧀ꦜꦴꦤꦱꦥ꧀ꦥꦴꦪꦴ, ꦠꦺꦱꦁ ꦏꦩ꧀ꦩꦛ꧀ꦜꦴꦤꦁ ꦏꦡꦺꦱ꧀ꦱꦴꦩꦷ’’ꦠꦶ ꦕ ꦕꦶꦤ꧀ꦠꦺꦠ꧀ꦮꦴ ꦈꦥꦱꦔ꧀ꦏꦩꦶ. ꦏꦴꦪꦺ ꦏꦴꦪꦴꦤꦸꦥꦱ꧀ꦱꦷꦠꦶꦄꦴꦢꦷꦱꦸ ꦪꦁ ꦮꦠ꧀ꦠꦧ꧀ꦧꦁ, ꦠꦁ ꦥꦫꦠꦺꦴ ꦮꦏ꧀ꦑꦴꦩ. ꦄꦤꦶꦕ꧀ꦕꦴꦤꦸꦥꦱ꧀ꦱꦷꦠꦶ ꦄꦤꦶꦕ꧀ꦕꦠꦁ ꦄꦤꦸꦥꦱ꧀ꦱꦤ꧀ꦠꦺꦴ. ꦮꦪꦴꦤꦸꦥꦱ꧀ꦱꦷꦠꦶ ꦮꦪꦁ ꦄꦤꦸꦥꦱ꧀ꦱꦤ꧀ꦠꦺꦴ. ꦮꦶꦫꦴꦒꦴꦤꦸꦥꦱ꧀ꦱꦷꦠꦶ ꦮꦶꦫꦴꦒꦁ ꦄꦤꦸꦥꦱ꧀ꦱꦤ꧀ꦠꦺꦴ. ꦤꦶꦫꦺꦴꦣꦴꦤꦸꦥꦱ꧀ꦱꦷꦠꦶ ꦤꦶꦫꦺꦴꦣꦁ ꦄꦤꦸꦥꦱ꧀ꦱꦤ꧀ꦠꦺꦴ. ꦥꦛꦶꦤꦶꦱ꧀ꦱꦒ꧀ꦒꦴꦤꦸꦥꦱ꧀ꦱꦷꦠꦶ ꦥꦛꦶꦤꦶꦱ꧀ꦱꦒ꧀ꦒꦁ ꦄꦤꦸꦥꦱ꧀ꦱꦤ꧀ꦠꦺꦴ.

ꦌꦠ꧀ꦠꦴꦮꦠꦴ ꦏꦶꦁ ꦢꦱ꧀ꦱꦶꦠꦁ ꦲꦺꦴꦠꦶ? ꦆꦩꦱ꧀ꦱ ꦨꦶꦏ꧀ꦑꦸꦤꦺꦴ ꦄꦴꦒꦩꦤꦷꦪꦥꦛꦶꦥꦢꦴ, ꦱꦠꦶꦥꦛ꧀ꦜꦴꦤꦴꦥꦶ ꦲꦶ ꦥꦸꦧ꧀ꦧꦨꦴꦒꦴꦪꦺꦮ, ꦱꦩ꧀ꦥꦗꦚ꧀ꦚꦺꦥꦶ ꦄꦤꦶꦕ꧀ꦕꦴꦤꦸꦥꦱ꧀ꦱꦤꦴ ꦮꦪꦴꦤꦸꦥꦱ꧀ꦱꦤꦴ ꦮꦶꦫꦴꦒꦴꦤꦸꦥꦱ꧀ꦱꦤꦴꦠꦶ ꦕ ꦆꦩꦴꦥꦶ ꦠꦶꦱ꧀ꦱꦺꦴ ꦄꦤꦸꦥꦱ꧀ꦱꦤꦴ ꦥꦸꦧ꧀ꦧꦨꦴꦒꦴꦪꦺꦮ, ꦤꦶꦫꦺꦴꦣꦴꦤꦸꦥꦱ꧀ꦱꦤꦴꦥꦶ ꦥꦛꦶꦤꦶꦱ꧀ꦱꦒ꧀ꦒꦴꦤꦸꦥꦱ꧀ꦱꦤꦴꦥꦶ ꦆꦩꦴ ꦢ꧀ꦮꦺ ꦩꦶꦱ꧀ꦱꦏꦴ. ꦌꦠ꧀ꦠꦴꦮꦠꦴ ꦆꦩꦱ꧀ꦱ ꦨꦶꦏ꧀ꦑꦸꦤꦺꦴ ꦨꦴꦮꦤꦴꦏꦴꦭꦺꦴ ꦢꦱ꧀ꦱꦶꦠꦺꦴꦠꦶ. ꦱꦺꦱꦁ ꦮꦸꦠ꧀ꦠꦤꦪꦩꦺꦮ.