꧑꧐. ꦄꦧ꧀ꦪꦴꦏꦠꦱꦁꦪꦸꦠ꧀ꦠꦁ

꧑. ꦑꦺꦩꦴꦱꦸꦠ꧀ꦠꦮꦟ꧀ꦟꦤꦴ

꧔꧑꧐. ꦄꦧ꧀ꦪꦴꦏꦠꦱꦁꦪꦸꦠ꧀ꦠꦱ꧀ꦱ ꦥꦜꦩꦺ ꦑꦺꦩꦴꦠꦶ ꦒꦶꦲꦶꦏꦴꦭꦺ ꦧꦶꦩ꧀ꦧꦶꦱꦴꦫꦱ꧀ꦱ ꦈꦥꦴꦱꦶꦏꦴ ꦱꦢ꧀ꦣꦴꦥꦧ꧀ꦧꦗꦶꦠꦴ ꦩꦲꦴꦡꦺꦫꦷ ‘‘ꦌꦠꦢꦒ꧀ꦒꦁ, ꦨꦶꦏ꧀ꦑꦮꦺ, ꦩꦩ ꦱꦴꦮꦶꦏꦴꦤꦁ ꦨꦶꦏ꧀ꦑꦸꦤꦷꦤꦁ ꦩꦲꦴꦥꦚ꧀ꦚꦴꦤꦁ ꦪꦢꦶꦢꦁ ꦑꦺꦩꦴ’’ꦠꦶ ꦌꦮꦁ ꦨꦒꦮꦠꦴ ꦩꦲꦴꦥꦚ꧀ꦚꦠꦴꦪ ꦌꦠꦢꦒ꧀ꦒꦺ ꦜꦥꦶꦠꦴ. ꦥꦟ꧀ꦝꦶꦠꦴꦠꦶ ꦥꦟ꧀ꦝꦶꦕ꧀ꦕꦺꦤ ꦱꦩꦤ꧀ꦤꦴꦒꦠꦴ. ꦮꦶꦪꦠ꧀ꦠꦴꦠꦶ ꦮꦺꦪ꧀ꦪꦠ꧀ꦠꦶꦪꦺꦤ ꦱꦩꦤ꧀ꦤꦴꦒꦠꦴ. ꦩꦺꦣꦴꦮꦶꦤꦷꦠꦶ ꦩꦺꦣꦴꦪ ꦥꦚ꧀ꦚꦴꦪ ꦱꦩꦤ꧀ꦤꦴꦒꦠꦴ. ꦧꦲꦸꦱ꧀ꦱꦸꦠꦴꦠꦶ ꦥꦫꦶꦪꦠ꧀ꦠꦶꦧꦴꦲꦸꦱꦕ꧀ꦕꦺꦤꦥꦶ ꦥꦛꦶꦮꦺꦣꦧꦴꦲꦸꦱꦕ꧀ꦕꦺꦤꦥꦶ ꦱꦩꦤ꧀ꦤꦴꦒꦠꦴ.

ꦒꦟꦏꦺꦴꦠꦶ ꦄꦕ꧀ꦖꦶꦢ꧀ꦢꦏꦒꦟꦤꦴꦪ ꦏꦸꦱꦭꦺꦴ. ꦩꦸꦢ꧀ꦢꦶꦏꦺꦴꦠꦶ ꦄꦔ꧀ꦒꦸꦭꦶꦩꦸꦢ꧀ꦢꦴꦪ ꦒꦟꦤꦴꦪ ꦏꦸꦱꦭꦺꦴ. ꦱꦔ꧀ꦑꦴꦪꦏꦺꦴꦠꦶ ꦥꦶꦟ꧀ꦝꦒꦟꦤꦴꦪ ꦏꦸꦱꦭꦺꦴ. ꦒꦩ꧀ꦨꦷꦫꦺꦴꦠꦶ ꦕꦠꦸꦫꦴꦱꦷꦠꦶꦪꦺꦴꦗꦤꦱꦲꦱ꧀ꦱꦒꦩ꧀ꦨꦷꦫꦺꦴ. ꦄꦥ꧀ꦥꦩꦺꦪ꧀ꦪꦺꦴꦠꦶ ꦄꦴꦭ꦳꧀ꦲꦏꦒꦟꦤꦴꦪ ꦄꦥ꧀ꦥꦩꦺꦪ꧀ꦪꦺꦴ. ꦢꦸꦥ꧀ꦥꦫꦶꦪꦺꦴꦒꦴꦲꦺꦴꦠꦶ ꦄꦴꦭ꦳꧀ꦲꦏꦒꦟꦤꦴꦪ ꦥꦩꦴꦟꦒꦲꦟꦠ꧀ꦡꦁ ꦢꦸꦫꦺꦴꦒꦴꦲꦺꦴ. ꦪꦺꦤ ꦫꦹꦥꦺꦤ ꦠꦡꦴꦒꦠꦤ꧀ꦠꦶ ꦪꦺꦤ ꦫꦹꦥꦺꦤ ꦢꦷꦓꦺꦴ ꦫꦱ꧀ꦱꦺꦴ ꦱꦴꦩꦺꦴ ꦎꦢꦴꦠꦺꦴꦠꦶ ꦱꦠ꧀ꦠꦱꦔ꧀ꦑꦴꦠꦁ ꦠꦡꦴꦒꦠꦁ ꦥꦚ꧀ꦚꦥꦺꦪ꧀ꦪ. ꦠꦁ ꦫꦹꦥꦁ ꦠꦡꦴꦒꦠꦱ꧀ꦱ ꦥꦲꦷꦤꦤ꧀ꦠꦶ ꦠꦁ ꦮꦸꦠ꧀ꦠꦥ꧀ꦥꦏꦴꦫꦫꦹꦥꦁ ꦱꦩꦸꦢꦪꦥ꧀ꦥꦲꦴꦤꦺꦤ ꦱꦧ꧀ꦧꦚ꧀ꦚꦸꦠꦡꦴꦒꦠꦱ꧀ꦱ ꦥꦲꦷꦤꦁ. ꦫꦹꦥꦱꦔ꧀ꦑꦴꦪ ꦮꦶꦩꦸꦠ꧀ꦠꦺꦴꦠꦶ ꦄꦴꦪꦠꦶꦁ ꦫꦹꦥꦱ꧀ꦱ ꦄꦤꦸꦥ꧀ꦥꦠ꧀ꦠꦶꦪꦴ ꦫꦹꦥꦴꦫꦹꦥꦏꦺꦴꦛ꧀ꦜꦴꦱꦺꦤꦥꦶ ꦌꦮꦫꦹꦥꦺꦴ ꦤꦴꦩ ꦨꦮꦶꦱ꧀ꦱꦠꦷꦠꦶ ꦮꦺꦴꦲꦴꦫꦱ꧀ꦱꦥꦶ ꦥꦛꦶꦥꦱ꧀ꦱꦢ꧀ꦣꦠ꧀ꦠꦴ ꦫꦹꦥꦥꦟ꧀ꦟꦠ꧀ꦠꦶꦪꦴꦥꦶ ꦮꦶꦩꦸꦠ꧀ꦠꦺꦴ. ꦒꦩ꧀ꦨꦷꦫꦺꦴꦠꦶ ꦄꦗ꧀ꦙꦴꦱꦪ ꦒꦩ꧀ꦨꦷꦫꦠꦴꦪ ꦕ ꦒꦸꦟꦒꦩ꧀ꦨꦷꦫꦠꦴꦪ ꦕ ꦒꦩ꧀ꦨꦷꦫꦺꦴ. ꦠꦱ꧀ꦱ ꦌꦮꦁ ꦒꦸꦟꦒꦩ꧀ꦨꦷꦫꦱ꧀ꦱ ꦱꦠꦺꦴ ꦱꦧ꧀ꦧꦚ꧀ꦚꦸꦠꦡꦴꦒꦠꦱ꧀ꦱ ꦪꦁ ꦈꦥꦴꦢꦴꦪ ꦱꦠ꧀ꦠꦱꦔ꧀ꦑꦴꦠꦺꦴ ꦠꦡꦴꦒꦠꦺꦴꦠꦶ ꦥꦚ꧀ꦚꦠ꧀ꦠꦶ ꦲꦺꦴꦠꦶ, ꦠꦢꦨꦴꦮꦺꦤ ꦠꦱ꧀ꦱꦴ ꦥꦚ꧀ꦚꦠ꧀ꦠꦶꦪꦴ ꦄꦨꦴꦮꦁ ꦥꦱ꧀ꦱꦤ꧀ꦠꦱ꧀ꦱ ꦄꦪꦁ ꦱꦠ꧀ꦠꦱꦔ꧀ꦑꦴꦠꦺꦴ ꦲꦺꦴꦠꦶ ꦠꦡꦴꦒꦠꦺꦴ ꦥꦫꦁ ꦩꦫꦟꦴꦠꦶ ꦆꦢꦁ ꦮꦕꦤꦁ ꦤ ꦈꦥꦺꦠꦶ ꦤ ꦪꦸꦗ꧀ꦗꦠꦶ, ꦤ ꦲꦺꦴꦠꦶ ꦠꦡꦴꦒꦠꦺꦴ ꦥꦫꦁ ꦩꦫꦟꦴꦠꦶꦄꦴꦢꦶꦮꦕꦤꦩ꧀ꦥꦶ ꦤ ꦈꦥꦺꦠꦶ ꦤ ꦪꦸꦗ꧀ꦗꦠꦷꦠꦶ ꦄꦠ꧀ꦡꦺꦴ.

ꦱꦁꦱꦤ꧀ꦢꦶꦱ꧀ꦱꦠꦷꦠꦶ ꦌꦏꦁ ꦨꦮꦶꦱ꧀ꦱꦠꦶ. ꦱꦩꦺꦱ꧀ꦱꦠꦷꦠꦶ ꦤꦶꦫꦤ꧀ꦠꦫꦁ ꦨꦮꦶꦱ꧀ꦱꦠꦶ. ꦤ ꦮꦶꦫꦺꦴꦣꦪꦶꦱ꧀ꦱꦠꦷꦠꦶ ꦤ ꦮꦶꦫꦸꦢ꧀ꦣꦁ ꦥꦢꦁ ꦨꦮꦶꦱ꧀ꦱꦠꦶ. ꦄꦒ꧀ꦒꦥꦢꦱ꧀ꦩꦶꦤ꧀ꦠꦶ ꦢꦺꦱꦤꦴꦪ. ꦢꦺꦱꦤꦴ ꦲꦶ ꦆꦣ ꦄꦒ꧀ꦒꦥꦢꦤ꧀ꦠꦶ ꦄꦣꦶꦥ꧀ꦥꦺꦠꦴ.

꧒. ꦄꦤꦸꦫꦴꦣꦱꦸꦠ꧀ꦠꦮꦟ꧀ꦟꦤꦴ

꧔꧑꧑. ꦢꦸꦠꦶꦪꦁ ꦑꦤ꧀ꦣꦶꦪꦮꦒ꧀ꦒꦺ ꦮꦶꦠ꧀ꦡꦴꦫꦶꦠꦩꦺꦮ, ꦄꦧ꧀ꦪꦴꦏꦠꦴꦣꦶꦏꦴꦫꦠꦺꦴ ꦥꦤ ꦆꦣ ꦮꦸꦠ꧀ꦠꦁ.

꧓-꧘. ꦥꦜꦩꦱꦴꦫꦶꦥꦸꦠ꧀ꦠꦏꦺꦴꦛ꧀ꦜꦶꦏꦱꦸꦠ꧀ꦠꦴꦢꦶꦮꦟ꧀ꦟꦤꦴ

꧔꧑꧒-꧔꧑꧗. ꦠꦠꦶꦪꦺ ꦫꦹꦥꦒꦠꦩꦺꦠꦤ꧀ꦠꦶ ꦫꦹꦥꦩꦠ꧀ꦠꦩꦺꦠꦁ. ꦌꦠ꧀ꦡ ꦫꦹꦥꦠꦺꦴ ꦄꦚ꧀ꦚꦺꦴ ꦏꦺꦴꦕꦶ ꦱꦠ꧀ꦠꦺꦴ ꦤꦴꦩ ꦤ ꦈꦥꦭꦧ꧀ꦨꦠꦶ, ꦫꦹꦥꦺ ꦥꦤ ꦱꦠꦶ ꦤꦴꦩꦩꦠ꧀ꦠꦁ ꦌꦠꦁ ꦲꦺꦴꦠꦷꦠꦶ ꦢꦱ꧀ꦱꦺꦠꦶ. ꦮꦺꦢꦤꦴꦒꦠꦩꦺꦠꦤ꧀ꦠꦶꦄꦴꦢꦷꦱꦸꦥꦶ ꦌꦱꦺꦮ ꦤꦪꦺꦴ. ꦄꦪꦁ ꦑꦺꦴ ꦄꦴꦮꦸꦱꦺꦴ ꦲꦺꦠꦹꦠꦶ ꦄꦪꦁ ꦫꦹꦥꦴꦢꦷꦤꦶ ꦩꦸꦚ꧀ꦕꦶꦠ꧀ꦮꦴ ꦄꦤꦸꦥꦭꦧ꧀ꦨꦶꦪꦱꦨꦴꦮꦺꦴ ꦲꦺꦠꦸ, ꦪꦺꦤꦺꦠꦁ ꦄꦧ꧀ꦪꦴꦏꦠꦁ ꦨꦒꦮꦠꦴꦠꦶ. ꦕꦠꦸꦠ꧀ꦡꦴꦢꦷꦤꦶ ꦈꦠ꧀ꦠꦴꦤꦠ꧀ꦡꦴꦤꦺꦮ.

꧙. ꦏꦸꦠꦹꦲꦭꦱꦴꦭꦴꦱꦸꦠ꧀ꦠꦮꦟ꧀ꦟꦤꦴ

꧔꧑꧘. ꦤꦮꦩꦺ ꦏꦸꦠꦹꦲꦭꦱꦴꦭꦴꦪꦤ꧀ꦠꦶ ꦏꦸꦠꦹꦲꦭꦱꦴꦭꦴ ꦤꦴꦩ ꦥꦕ꧀ꦕꦺꦏꦱꦴꦭꦴ ꦤꦠ꧀ꦡꦶ, ꦪꦠ꧀ꦡ ꦥꦤ ꦤꦴꦤꦴꦠꦶꦠ꧀ꦡꦶꦪꦴ ꦱꦩꦟꦧ꧀ꦫꦴꦲ꧀ꦩꦟꦴ ꦤꦴꦤꦴꦮꦶꦣꦁ ꦏꦡꦁ ꦥꦮꦠ꧀ꦠꦺꦤ꧀ꦠꦶ, ꦱꦴ ꦧꦲꦹꦤꦁ ‘‘ꦄꦪꦁ ꦏꦶꦁ ꦮꦢꦠꦶ, ꦄꦪꦁ ꦏꦶꦁ ꦮꦢꦠꦷ’’ꦠꦶ ꦏꦸꦠꦹꦲꦭꦸꦥ꧀ꦥꦮꦠ꧀ꦠꦶꦛ꧀ꦜꦴꦤꦠꦺꦴ ꦏꦸꦠꦹꦲꦭꦱꦴꦭꦴꦠꦶ ꦮꦸꦕ꧀ꦕꦠꦶ. ꦢꦹꦫꦩ꧀ꦥꦶ ꦒꦕ꧀ꦖꦠꦷꦠꦶ ꦪꦴꦮ ꦄꦴꦨꦱ꧀ꦱꦫꦧ꧀ꦫꦲ꧀ꦩꦭꦺꦴꦏꦴ ꦒꦕ꧀ꦖꦠꦶ. ꦆꦩꦚ꧀ꦕ ꦏꦴꦪꦁ ꦤꦶꦏ꧀ꦑꦶꦥꦠꦷꦠꦶ ꦕꦸꦠꦶꦕꦶꦠ꧀ꦠꦺꦤ ꦤꦶꦏ꧀ꦑꦶꦥꦠꦶ. ꦄꦤꦸꦥꦥꦤ꧀ꦤꦺꦴ ꦲꦺꦴꦠꦷꦠꦶ ꦕꦸꦠꦶꦏ꧀ꦑꦟꦺꦪꦺꦮ ꦥꦛꦶꦱꦤ꧀ꦣꦶꦕꦶꦠ꧀ꦠꦱ꧀ꦱ ꦄꦤꦸꦥ꧀ꦥꦤ꧀ꦤꦠ꧀ꦠꦴ ꦄꦤꦸꦥꦥꦤ꧀ꦤꦺꦴ ꦲꦺꦴꦠꦶ.

꧑꧐. ꦄꦴꦤꦤ꧀ꦢꦱꦸꦠ꧀ꦠꦮꦟ꧀ꦟꦤꦴ

꧔꧑꧙. ꦢꦱꦩꦺ ꦠꦺꦱꦩꦺꦠꦁ ꦱꦢ꧀ꦣꦶꦁ ꦄꦨꦮꦶꦱ꧀ꦱꦴꦠꦶ ꦠꦺꦱꦁ ꦭꦢ꧀ꦣꦶꦪꦴ ꦱꦢ꧀ꦣꦶꦁ ꦌꦠꦁ ꦄꦨꦮꦶꦱ꧀ꦱ. ꦄꦤꦸꦭꦺꦴꦩꦁ ꦄꦨꦮꦶꦱ꧀ꦱ ꦚꦴꦟꦱ꧀ꦱ ꦈꦥ꧀ꦥꦴꦢꦴꦪ ꦱꦧ꧀ꦧꦺ ꦣꦩ꧀ꦩꦴ ꦄꦤꦠ꧀ꦠꦴꦠꦶ ꦪꦁ ꦌꦠꦁ ‘‘ꦱꦧ꧀ꦧꦺ ꦣꦩ꧀ꦩꦴ ꦄꦤꦠ꧀ꦠꦴ’’ꦠꦶ ꦮꦶꦥꦱ꧀ꦱꦤꦴꦚꦴꦟꦁ ꦈꦥ꧀ꦥꦗ꧀ꦗꦠꦶ, ꦄꦥꦶ ꦤꦸ ꦩꦺ ꦠꦱ꧀ꦱ ꦄꦤꦸꦭꦺꦴꦩꦁ ꦄꦨꦮꦶꦱ꧀ꦱꦴꦠꦶ ꦄꦠ꧀ꦡꦺꦴ.

꧑꧑. ꦱꦨꦶꦪꦏꦕ꧀ꦕꦴꦤꦱꦸꦠ꧀ꦠꦮꦟ꧀ꦟꦤꦴ

꧔꧒꧐. ꦌꦏꦴꦢꦱꦩꦺ ꦌꦠꦩꦺꦠ꧀ꦠꦏꦺꦤ ꦌꦠ꧀ꦠꦏꦩꦺꦮꦴꦠꦶ ꦄꦴꦮꦸꦱꦺꦴ ꦪꦱ꧀ꦱꦴꦥꦶ ꦌꦠꦁ ꦌꦠ꧀ꦠꦏꦺꦤ ꦏꦴꦭꦺꦤ ‘‘ꦲꦺꦠꦸꦩ꧀ꦲꦶ ꦱꦠꦶ ꦫꦹꦥꦷꦠꦶꦄꦴꦢꦶ ꦥꦚ꧀ꦚꦴꦥꦤꦴ ꦲꦺꦴꦠꦶ, ꦄꦱꦠꦶ ꦤ ꦲꦺꦴꦠꦷ’’ꦠꦶ ꦧ꧀ꦪꦴꦏꦫꦟꦁ ꦨꦮꦺꦪ꧀ꦪ, ꦠꦱ꧀ꦱ ꦌꦠ꧀ꦠꦏꦩꦺꦮ ꦧꦲꦸ. ꦏꦺꦴ ꦥꦤ ꦮꦴꦢꦺꦴ ꦄꦠꦶꦏ꧀ꦏꦤ꧀ꦠꦺꦠꦶ ꦄꦠꦶꦏ꧀ꦏꦤ꧀ꦠꦺ ꦥꦤ ꦄꦠꦶꦩꦤꦴꦥꦺ ꦣꦩ꧀ꦩꦢꦺꦱꦤꦴꦤꦪꦺ ꦮꦴꦢꦺꦴꦪꦺꦮ ꦏꦺꦴ, ꦤꦠ꧀ꦡꦶ ꦮꦴꦢꦺꦴ, ꦖꦶꦤ꧀ꦤꦴ ꦏꦡꦴꦠꦶ.

ꦄꦧ꧀ꦪꦴꦏꦠꦱꦁꦪꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.