꧒. ꦫꦡꦺꦴꦥꦩꦱꦸꦠ꧀ꦠꦮꦟ꧀ꦟꦤꦴ

꧒꧓꧙. ꦢꦸꦠꦶꦪꦺ ꦱꦸꦑꦱꦺꦴꦩꦤꦱ꧀ꦱꦧꦲꦸꦭꦺꦴꦠꦶ ꦏꦴꦪꦶꦏꦱꦸꦑꦚ꧀ꦕꦺꦮ ꦕꦺꦠꦱꦶꦏꦱꦺꦴꦩꦤꦱ꧀ꦱꦚ꧀ꦕ ꦧꦲꦸꦭꦁ ꦄꦱ꧀ꦱꦴꦠꦶ ꦱꦸꦑꦱꦺꦴꦩꦤꦱ꧀ꦱꦧꦲꦸꦭꦺꦴ. ꦪꦺꦴꦤꦶ ꦕꦱ꧀ꦱ ꦄꦴꦫꦢ꧀ꦣꦴ ꦲꦺꦴꦠꦷꦠꦶ ꦏꦴꦫꦟꦚ꧀ꦕꦱ꧀ꦱ ꦥꦫꦶꦥꦸꦟ꧀ꦟꦁ ꦲꦺꦴꦠꦶ. ꦄꦴꦱꦮꦴꦤꦁ ꦑꦪꦴꦪꦴꦠꦶ ꦆꦣ ꦄꦴꦱꦮꦏ꧀ꦑꦪꦺꦴꦠꦶ ꦄꦫꦲꦠ꧀ꦠꦩꦒ꧀ꦒꦺꦴ ꦄꦣꦶꦥ꧀ꦥꦺꦠꦺꦴ, ꦠꦢꦠ꧀ꦡꦴꦪꦴꦠꦶ ꦄꦠ꧀ꦡꦺꦴ. ꦎꦣꦱ꧀ꦠꦥꦠꦺꦴꦢꦺꦴꦠꦶ ꦫꦡꦩꦗ꧀ꦙꦺ ꦠꦶꦫꦶꦪꦁ ꦜꦥꦶꦠꦥꦠꦺꦴꦢꦺꦴ. ꦪꦺꦤꦶꦕ꧀ꦖꦏꦤ꧀ꦠꦶ ꦪꦺꦤ ꦢꦶꦱꦴꦨꦴꦒꦺꦤ ꦆꦕ꧀ꦖꦠꦶ. ꦪꦢꦶꦕ꧀ꦖꦏꦤ꧀ꦠꦶ ꦪꦁ ꦪꦁ ꦒꦩꦤꦁ ꦆꦕ꧀ꦖꦠꦶ. ꦱꦴꦫꦺꦪ꧀ꦪꦴꦠꦶ ꦥꦺꦱꦺꦪ꧀ꦪ. ꦥꦕ꧀ꦕꦴꦱꦴꦫꦺꦪ꧀ꦪꦴꦠꦶ ꦥꦛꦶꦮꦶꦤꦶꦮꦠ꧀ꦠꦺꦪ꧀ꦪ. ꦄꦴꦫꦏ꧀ꦑꦴꦪꦴꦠꦶ ꦫꦏ꧀ꦑꦟꦠ꧀ꦡꦴꦪ. ꦱꦁꦪꦩꦴꦪꦴꦠꦶ ꦮꦺꦒꦤꦶꦒ꧀ꦒꦲꦟꦠ꧀ꦡꦴꦪ. ꦢꦩꦴꦪꦴꦠꦶ ꦤꦶꦧ꧀ꦧꦶꦱꦺꦮꦤꦠ꧀ꦡꦴꦪ. ꦈꦥꦱꦩꦴꦪꦴꦠꦶ ꦏꦶꦭꦺꦱꦹꦥꦱꦩꦠ꧀ꦡꦴꦪ.

ꦌꦮꦩꦺꦮ ꦑꦺꦴꦠꦶ ꦌꦠ꧀ꦡ ꦪꦡꦴ ꦄꦏꦸꦱꦭꦱ꧀ꦱ ꦱꦴꦫꦡꦶꦤꦺꦴ ꦄꦢꦤ꧀ꦠꦺ ꦱꦶꦤ꧀ꦣꦮꦺ ꦪꦺꦴꦗꦺꦠ꧀ꦮꦴ ꦮꦶꦱꦩꦩꦒ꧀ꦒꦺꦤ ꦫꦡꦁ ꦥꦺꦱꦺꦤ꧀ꦠꦱ꧀ꦱ ꦕꦏ꧀ꦏꦴꦤꦶꦥꦶ ꦨꦶꦗ꧀ꦗꦤ꧀ꦠꦶ, ꦄꦏ꧀ꦑꦺꦴꦥꦶ ꦱꦶꦤ꧀ꦣꦮꦴꦤꦚ꧀ꦕ ꦑꦸꦫꦴ, ꦄꦠ꧀ꦠꦤꦴꦥꦶ ꦄꦤꦪꦧ꧀ꦪꦱꦤꦁ ꦥꦴꦥꦸꦟꦴꦠꦶ, ꦤ ꦕ ꦆꦕ꧀ꦖꦶꦠꦶꦕ꧀ꦖꦶꦠꦺꦤ ꦒꦩꦤꦺꦤ ꦱꦴꦫꦺꦠꦸꦁ ꦱꦏ꧀ꦏꦺꦴꦠꦶ; ꦌꦮꦁ ꦖꦱꦸ ꦆꦤ꧀ꦢ꧀ꦫꦶꦪꦺꦱꦸ ꦄꦒꦸꦠ꧀ꦠꦢ꧀ꦮꦴꦫꦺꦴ ꦨꦶꦏ꧀ꦑꦸ ꦤ ꦆꦕ꧀ꦖꦶꦠꦶꦕ꧀ꦖꦶꦠꦁ ꦱꦩꦟꦫꦠꦶꦁ ꦄꦤꦸꦨꦮꦶꦠꦸꦁ ꦱꦏ꧀ꦏꦺꦴꦠꦶ. ꦪꦡꦴ ꦥꦤ ꦖꦺꦏꦺꦴ ꦱꦴꦫꦡꦶ ꦢꦤ꧀ꦠꦺ ꦱꦶꦤ꧀ꦣꦮꦺ ꦪꦺꦴꦗꦺꦠ꧀ꦮꦴ, ꦱꦩꦺ ꦨꦹꦩꦶꦨꦴꦒꦺ ꦫꦡꦁ ꦎꦠꦴꦫꦺꦠ꧀ꦮꦴ ꦫꦱ꧀ꦩꦶꦪꦺꦴ ꦒꦲꦺꦠ꧀ꦮꦴ, ꦱꦶꦤ꧀ꦣꦮꦴꦤꦁ ꦑꦸꦫꦺꦱꦸ ꦱꦠꦶꦁ ꦜꦥꦺꦠ꧀ꦮꦴ, ꦥꦠꦺꦴꦢꦁ ꦄꦴꦢꦴꦪ ꦤꦶꦧ꧀ꦧꦶꦱꦺꦮꦤꦺ ꦏꦠ꧀ꦮꦴ, ꦥꦺꦱꦺꦤ꧀ꦠꦺꦴ ꦆꦕ꧀ꦖꦶꦠꦶꦕ꧀ꦖꦶꦠꦺꦤ ꦒꦩꦤꦺꦤ ꦱꦴꦫꦺꦠꦶ. ꦌꦮꦩꦺꦮ ꦖꦱꦸ ꦆꦤ꧀ꦢ꧀ꦫꦶꦪꦺꦱꦸ ꦒꦸꦠ꧀ꦠꦢ꧀ꦮꦴꦫꦺꦴ ꦨꦶꦏ꧀ꦑꦸ ꦆꦩꦱ꧀ꦩꦶꦁ ꦱꦴꦱꦤꦺ ꦆꦕ꧀ꦖꦶꦠꦶꦕ꧀ꦖꦶꦠꦁ ꦱꦩꦟꦫꦠꦶꦁ ꦄꦤꦸꦨꦺꦴꦠꦶ, ꦱꦕꦺ ꦄꦤꦶꦕ꧀ꦕꦴꦤꦸꦥꦱ꧀ꦱꦤꦴꦨꦶꦩꦸꦑꦁ ꦚꦴꦟꦁ ꦥꦺꦱꦺꦠꦸꦏꦴꦩꦺꦴ ꦲꦺꦴꦠꦶ, ꦠꦢꦨꦶꦩꦸꦑꦁ ꦚꦴꦟꦁ ꦒꦕ꧀ꦖꦠꦶ. ꦢꦸꦏ꧀ꦑꦴꦤꦸꦥꦱ꧀ꦱꦤꦴꦢꦷꦱꦸꦥꦶ ꦌꦱꦺꦮ ꦤꦪꦺꦴ.

ꦨꦺꦴꦗꦤꦺ ꦩꦠ꧀ꦠꦚ꧀ꦚꦹꦠꦶ ꦨꦺꦴꦗꦤꦩ꧀ꦲꦶ ꦥꦩꦴꦟꦚ꧀ꦚꦹ. ꦠꦠ꧀ꦡ ꦢ꧀ꦮꦺ ꦥꦩꦴꦟꦴꦤꦶ – ꦥꦛꦶꦒ꧀ꦒꦲꦟꦥꦩꦴꦟꦚ꧀ꦕ ꦥꦫꦶꦨꦺꦴꦒꦥꦩꦴꦟꦚ꧀ꦕ. ꦠꦠ꧀ꦡ ꦥꦛꦶꦒ꧀ꦒꦲꦟꦥꦩꦴꦟꦺ ꦢꦴꦪꦏꦱ꧀ꦱ ꦮꦱꦺꦴ ꦮꦺꦢꦶꦠꦧ꧀ꦧꦺꦴ, ꦢꦺꦪ꧀ꦪꦣꦩ꧀ꦩꦱ꧀ꦱ ꦮꦱꦺꦴ ꦮꦺꦢꦶꦠꦧ꧀ꦧꦺꦴ, ꦄꦠ꧀ꦠꦤꦺꦴ ꦡꦴꦩꦺꦴ ꦗꦴꦤꦶꦠꦧ꧀ꦧꦺꦴ. ꦌꦮꦫꦹꦥꦺꦴ ꦲꦶ ꦨꦶꦏ꧀ꦑꦸ ꦱꦕꦺ ꦢꦺꦪ꧀ꦪꦣꦩ꧀ꦩꦺꦴ ꦧꦲꦸꦏꦺꦴ ꦲꦺꦴꦠꦶ, ꦢꦴꦪꦏꦺꦴ ꦄꦥ꧀ꦥꦁ ꦢꦴꦠꦸꦏꦴꦩꦺꦴ, ꦢꦴꦪꦏꦱ꧀ꦱ ꦮꦱꦺꦤ ꦄꦥ꧀ꦥꦁ ꦒꦟ꧀ꦲꦴꦠꦶ. ꦢꦺꦪ꧀ꦪꦣꦩ꧀ꦩꦺꦴ ꦄꦥ꧀ꦥꦺꦴ, ꦢꦴꦪꦏꦺꦴ ꦧꦲꦸꦁ ꦢꦴꦠꦸꦏꦴꦩꦺꦴ, ꦢꦺꦪ꧀ꦪꦣꦩ꧀ꦩꦱ꧀ꦱ ꦮꦱꦺꦤ ꦄꦥ꧀ꦥꦁ ꦒꦟ꧀ꦲꦴꦠꦶ. ꦢꦺꦪ꧀ꦪꦣꦩ꧀ꦩꦺꦴꦥꦶ ꦧꦲꦸ, ꦢꦴꦪꦏꦺꦴꦥꦶ ꦧꦲꦸꦁ ꦢꦴꦠꦸꦏꦴꦩꦺꦴ, ꦄꦠ꧀ꦠꦤꦺꦴ ꦡꦴꦩꦁ ꦚꦠ꧀ꦮꦴ ꦥꦩꦴꦟꦺꦤ ꦒꦟ꧀ꦲꦴꦠꦶ. ꦱꦺꦴ ꦠꦴꦪ ꦥꦛꦶꦒ꧀ꦒꦲꦟꦺ ꦩꦠ꧀ꦠꦚ꧀ꦚꦸꦠꦴꦪ ꦄꦤꦸꦥ꧀ꦥꦤ꧀ꦤꦚ꧀ꦕ ꦭꦴꦨꦁ ꦈꦥ꧀ꦥꦴꦢꦺꦠꦶ, ꦈꦥ꧀ꦥꦤ꧀ꦤꦚ꧀ꦕ ꦡꦴꦮꦫꦁ ꦏꦫꦺꦴꦠꦶ ꦣꦩ꧀ꦩꦶꦏꦠꦶꦱ꧀ꦱꦩꦲꦴꦫꦴꦗꦏꦴꦭꦺ ꦱꦠ꧀ꦠꦮꦱ꧀ꦱꦶꦏꦺꦴ ꦱꦴꦩꦟꦺꦫꦺꦴ ꦮꦶꦪ.

ꦫꦚ꧀ꦚꦺꦴ ꦏꦶꦫ ꦥꦚ꧀ꦕꦲꦶ ꦱꦏꦛꦱꦠꦺꦲꦶ ꦒꦸꦭ꦳ꦁ ꦄꦴꦲꦫꦶꦁꦱꦸ. ꦫꦴꦗꦴ ‘‘ꦩꦤꦴꦥꦺꦴ ꦥꦟ꧀ꦟꦴꦏꦴꦫꦺꦴ, ꦄꦪ꧀ꦪꦺꦲꦶ ꦮꦶꦤꦴ ꦤ ꦑꦴꦢꦶꦱ꧀ꦱꦴꦩꦴ’’ꦠꦶ ꦄꦝ꧀ꦞꦠꦺꦪ꧀ꦪꦴꦤꦶ ꦱꦏꦛꦱꦠꦴꦤꦶ ꦩꦲꦴꦮꦶꦲꦴꦫꦁ ꦥꦺꦱꦺꦠ꧀ꦮꦴ ꦱꦪꦩ꧀ꦥꦶ ꦨꦸꦠ꧀ꦠꦥꦴꦠꦫꦴꦱꦺꦴ ꦄꦒꦩꦴꦱꦶ. ꦨꦺꦫꦶꦪꦴ ꦥꦲꦛꦴꦪ ꦢ꧀ꦮꦴꦢꦱ ꦨꦶꦏ꧀ꦑꦸꦱꦲꦱ꧀ꦱꦴꦤꦶ ꦱꦤ꧀ꦤꦶꦥꦠꦶꦁꦱꦸ. ꦫꦴꦗꦴ ꦌꦏꦩꦤ꧀ꦠꦺ ꦜꦶꦠꦺꦴ ꦄꦴꦫꦴꦩꦶꦏꦁ ꦥꦏ꧀ꦏꦺꦴꦱꦴꦥꦺꦠ꧀ꦮꦴ ꦄꦴꦲ – ‘‘ꦫꦚ꧀ꦚꦺꦴ ꦤꦴꦩ ꦢꦴꦤꦺ ꦥꦠ꧀ꦠꦥꦹꦫꦺꦴꦮ ꦥꦩꦴꦟꦁ, ꦒꦲꦶꦠꦨꦴꦗꦤꦁ ꦥꦹꦫꦺꦠ꧀ꦮꦴꦮ ꦢꦺꦲꦶ, ꦱꦕꦺ ꦏꦺꦴꦕꦶ ꦩꦠ꧀ꦠꦥꦛꦶꦒ꧀ꦒꦲꦟꦺ ꦜꦶꦠꦺꦴ ꦤ ꦒꦟ꧀ꦲꦴꦠꦶ, ꦩꦪ꧀ꦲꦁ ꦄꦴꦫꦺꦴꦕꦺꦪ꧀ꦪꦴꦱꦷ’’ꦠꦶ.

ꦄꦡꦺꦏꦺꦴ ꦩꦲꦴꦡꦺꦫꦺꦴ ‘‘ꦩꦲꦴꦧꦺꦴꦣꦶꦩꦲꦴꦕꦺꦠꦶꦪꦴꦤꦶ ꦮꦤ꧀ꦢꦶꦱ꧀ꦱꦴꦩꦷ’’ꦠꦶ ꦕꦺꦠꦶꦪꦥꦧ꧀ꦧꦠꦴ ꦄꦴꦒꦤ꧀ꦠ꧀ꦮꦴ, ꦮꦶꦲꦴꦫꦁ ꦥꦮꦶꦱꦤ꧀ꦠꦺꦴ ꦩꦲꦴꦩꦟ꧀ꦝꦥꦛ꧀ꦜꦴꦤꦺ ꦨꦶꦏ꧀ꦑꦹ ꦒꦸꦭ꦳ꦁ ꦒꦟ꧀ꦲꦤ꧀ꦠꦺ ꦢꦶꦱ꧀ꦮꦴ ꦥꦕ꧀ꦖꦠꦺꦴ ꦄꦴꦒꦕ꧀ꦖꦤ꧀ꦠꦁ ꦱꦴꦩꦟꦺꦫꦁ ꦄꦴꦲ, ‘‘ꦤꦠ꧀ꦡꦶ ꦠꦺ ꦒꦸꦭ꦳ꦺꦤ ꦄꦠ꧀ꦡꦺꦴ’’ꦠꦶ. ‘‘ꦄꦴꦩ, ꦨꦤ꧀ꦠꦺ, ꦤꦠ꧀ꦡꦷ’’ꦠꦶ. ꦱꦴꦩꦟꦺꦫ ꦩꦪꦁ ꦩꦒ꧀ꦒꦏꦶꦭꦤ꧀ꦠꦴ, ꦌꦏꦺꦤ ꦏꦥꦶꦛ꧀ꦜꦦꦭꦩꦠ꧀ꦠꦺꦤ ꦥꦶꦟ꧀ꦝꦏꦺꦤ ꦄꦩ꧀ꦲꦴꦏꦁ ꦄꦠ꧀ꦡꦺꦴꦠꦶ. ꦱꦴꦩꦟꦺꦫꦺꦴ ꦡꦴꦭꦏꦁ ꦤꦷꦲꦫꦶꦠ꧀ꦮꦴ ꦡꦺꦫꦱ꧀ꦱ ꦮꦱ꧀ꦱꦒ꧀ꦒꦥꦛꦶꦥꦴꦛꦶꦪꦁ ꦄꦛ꧀ꦜꦴꦱꦶ. ꦄꦴꦫꦴꦩꦶꦏꦺꦴ ꦒꦲꦟꦩꦴꦤꦁ ꦥꦹꦫꦺꦠ꧀ꦮꦴ ꦈꦏ꧀ꦑꦶꦥꦶ, ꦱꦴꦩꦟꦺꦫꦺꦴ ꦄꦔ꧀ꦒꦸꦭꦶꦁ ꦕꦴꦭꦺꦱꦶ. ꦠꦴꦠ ꦱꦴꦩꦟꦺꦫ, ꦫꦴꦗꦏꦸꦭꦴꦤꦁ ꦢꦴꦤꦺ ꦨꦴꦗꦤꦥꦹꦫꦩꦺꦮ ꦥꦩꦴꦟꦁ, ꦡꦴꦭꦏꦥꦹꦫꦁ ꦒꦟ꧀ꦲꦴꦲꦷꦠꦶ. ꦄꦴꦩ, ꦈꦥꦴꦱꦏ, ꦫꦴꦗꦴꦤꦺꦴ ꦤꦴꦩ ꦩꦲꦗ꧀ꦙꦴꦱꦪꦴ ꦲꦺꦴꦤ꧀ꦠꦶ, ꦄꦩ꧀ꦲꦴꦏꦁ ꦥꦤ ꦈꦥꦗ꧀ꦙꦴꦪꦱ꧀ꦱ ꦌꦠ꧀ꦠꦏꦺꦤꦺꦮ ꦄꦠ꧀ꦡꦺꦴꦠꦶ.

ꦫꦴꦗꦴ ꦠꦱ꧀ꦱ ꦏꦡꦁ ꦱꦸꦠ꧀ꦮꦴ, ‘‘ꦏꦶꦁ ꦨꦺꦴ ꦱꦴꦩꦟꦺꦫꦺꦴ ꦨꦟꦠꦷ’’ꦠꦶ? ꦠꦱ꧀ꦱ ꦱꦤ꧀ꦠꦶꦏꦁ ꦒꦠꦺꦴ. ꦄꦴꦫꦴꦩꦶꦏꦺꦴ ꦄꦴꦲ – ‘‘ꦱꦴꦩꦶ, ꦱꦴꦩꦟꦺꦫꦱ꧀ꦱ ꦨꦴꦗꦤꦁ ꦑꦸꦢ꧀ꦢꦏꦁ, ꦧꦲꦸꦁ ꦤ ꦒꦟ꧀ꦲꦴꦠꦷ’’ꦠꦶ. ꦫꦴꦗꦴ ꦄꦴꦲ, ‘‘ꦄꦴꦤꦷꦠꦨꦴꦗꦤꦁ ꦥꦹꦫꦺꦠ꧀ꦮꦴ ꦒꦟ꧀ꦲꦡ, ꦨꦤ꧀ꦠꦺ’’ꦠꦶ. ꦩꦲꦴꦫꦴꦗ, ꦫꦴꦗꦴꦤꦺꦴ ꦤꦴꦩ ꦩꦲꦗ꧀ꦙꦴꦱꦪꦴ ꦲꦺꦴꦤ꧀ꦠꦶ, ꦈꦏ꧀ꦑꦶꦠ꧀ꦠꦨꦴꦗꦤꦁ ꦥꦹꦫꦺꦠ꧀ꦮꦴꦮ ꦢꦴꦠꦸꦏꦴꦩꦴ, ꦄꦩ꧀ꦲꦴꦏꦁ ꦥꦤ ꦈꦥꦗ꧀ꦙꦴꦪꦱ꧀ꦱ ꦌꦠ꧀ꦠꦏꦺꦤꦺꦮ ꦄꦠ꧀ꦡꦺꦴꦠꦶ. ꦫꦴꦗꦴ ꦕꦶꦤ꧀ꦠꦺꦱꦶ – ‘‘ꦄꦪꦁ ꦱꦠ꧀ꦠꦮꦱ꧀ꦱꦶꦏꦢꦴꦫꦏꦺꦴ, ꦄꦗ꧀ꦗꦴꦥꦶꦱ꧀ꦱ ꦩꦸꦑꦠꦺꦴ ꦑꦷꦫꦒꦤ꧀ꦣꦺꦴ ꦤ ꦩꦸꦕ꧀ꦕꦠꦶ, ꦒꦲꦺꦠ꧀ꦮꦴ ꦏꦸꦛꦺ ꦮꦴ ꦏꦸꦛꦸꦩ꧀ꦧꦺ ꦮꦴ ꦥꦹꦫꦺꦠ꧀ꦮꦴ ꦱ꧀ꦮꦺꦥꦶ ꦥꦸꦤꦢꦶꦮꦱꦺꦥꦶ ꦑꦴꦢꦶꦱ꧀ꦱꦴꦩꦴꦠꦶ ꦤ ꦮꦢꦠꦶ, ꦱꦏ꧀ꦏꦴ ꦧꦸꦢ꧀ꦣꦱꦴꦱꦤꦁ ꦥꦫꦶꦒ꧀ꦒꦲꦺꦠꦸ’’ꦤ꧀ꦠꦶ ꦥꦸꦫꦶꦱꦺ ꦄꦴꦟꦴꦥꦺꦱꦶ, ‘‘ꦨꦺꦴ, ꦥꦱꦤ꧀ꦤꦺꦴꦩ꧀ꦲꦶ ꦱꦴꦩꦟꦺꦫꦱ꧀ꦱ, ꦆꦠꦫꦴꦤꦶꦥꦶ ꦄꦝ꧀ꦞꦠꦺꦪ꧀ꦪꦴꦤꦶ ꦱꦏꦛꦱꦠꦴꦤꦶ ꦄꦴꦤꦺꦠ꧀ꦮꦴ ꦱꦓꦁꦱ꧀ꦱ ꦢꦺꦡꦴ’’ꦠꦶ.

ꦱꦺꦴꦪꦺꦮ ꦥꦤ ꦫꦴꦗꦴ ꦌꦏꦢꦶꦮꦱꦁ ꦠꦶꦠ꧀ꦠꦶꦫꦩꦁꦱꦁ ꦑꦴꦢꦶꦠꦸꦏꦴꦩꦺꦴ ꦕꦶꦤ꧀ꦠꦺꦱꦶ – ‘‘ꦱꦕꦺ ꦄꦲꦁ ꦄꦔ꧀ꦒꦴꦫꦥꦏ꧀ꦏꦁ ꦠꦶꦠ꧀ꦠꦶꦫꦩꦁꦱꦁ ꦑꦴꦢꦶꦠꦸꦏꦴꦩꦺꦴꦱ꧀ꦩꦷꦠꦶ ꦄꦚ꧀ꦚꦱ꧀ꦱ ꦏꦡꦺꦱ꧀ꦱꦴꦩꦶ, ꦱꦩꦤ꧀ꦠꦴ ꦪꦺꦴꦗꦤꦛ꧀ꦜꦴꦤꦺ ꦠꦶꦠ꧀ꦠꦶꦫꦱꦩꦸꦒ꧀ꦓꦴꦠꦁ ꦏꦫꦶꦱ꧀ꦱꦤ꧀ꦠꦷ’’ꦠꦶ ꦈꦥ꧀ꦥꦤ꧀ꦤꦁ ꦥꦶꦥꦴꦱꦁ ꦄꦣꦶꦮꦴꦱꦺꦤ꧀ꦠꦺꦴ ꦠꦷꦟꦶ ꦱꦁꦮꦕ꧀ꦖꦫꦴꦤꦶ ꦮꦷꦠꦶꦤꦴꦩꦺꦱꦶ. ꦄꦡꦱ꧀ꦱ ꦏꦟ꧀ꦟꦺꦱꦸ ꦥꦸꦧ꧀ꦧꦺꦴ ꦱꦟ꧀ꦜꦴꦱꦶ, ꦱꦺꦴ ꦄꦣꦶꦮꦴꦱꦺꦠꦸꦁ ꦄꦱꦏ꧀ꦏꦺꦴꦤ꧀ꦠꦺꦴ ‘‘ꦄꦠ꧀ꦡꦶ ꦤꦸ ꦑꦺꦴ, ꦨꦺꦴ, ꦄꦩ꧀ꦲꦴꦏꦁ ꦏꦺꦴꦕꦶ ꦈꦥꦛ꧀ꦜꦴꦏꦸꦥꦴꦱꦏꦺꦴ ꦱꦷꦭꦫꦏ꧀ꦑꦏꦺꦴ’’ꦠꦶ ꦥꦸꦕ꧀ꦖꦶ. ꦄꦴꦩ, ꦢꦺꦮ, ꦄꦠ꧀ꦡꦶ, ꦠꦶꦱ꧀ꦱꦺꦴ ꦤꦴꦩ ꦱꦺꦴ ꦄꦑꦟ꧀ꦝꦱꦷꦭꦁ ꦫꦏ꧀ꦑꦠꦷꦠꦶ. ꦄꦡ ꦤꦁ ꦮꦷꦩꦁꦱꦶꦠꦸꦏꦴꦩꦺꦴ ꦥꦏ꧀ꦏꦺꦴꦱꦴꦥꦺꦱꦶ. ꦱꦺꦴ ꦄꦴꦒꦤ꧀ꦠ꧀ꦮꦴ ꦫꦴꦗꦴꦤꦁ ꦮꦤ꧀ꦢꦶꦠ꧀ꦮꦴ ꦄꦛ꧀ꦜꦴꦱꦶ. ꦠꦠꦺꦴ ꦤꦁ ꦄꦴꦲ – ‘‘ꦠ꧀ꦮꦁ, ꦠꦴꦠ, ꦠꦶꦱ꧀ꦱꦺꦴ ꦤꦴꦩꦴ’’ꦠꦶ? ‘‘ꦄꦴꦩ ꦢꦺꦮꦴ’’ꦠꦶ. ꦠꦺꦤ ꦲꦶ ꦒꦕ꧀ꦖꦴꦠꦶ. ꦠꦱ꧀ꦩꦶꦁ ꦒꦠꦺ ꦌꦏꦁ ꦏꦸꦏ꧀ꦏꦸꦛꦁ ꦄꦴꦲꦫꦴꦥꦺꦠ꧀ꦮꦴ ꦌꦏꦁ ꦥꦸꦫꦶꦱꦁ ꦄꦴꦟꦴꦥꦺꦱꦶ, ‘‘ꦒꦕ꧀ꦖ ꦠꦶꦱ꧀ꦱꦁ ꦮꦢꦴꦲꦶ, ꦆꦩꦁ ꦠꦷꦲꦶ ꦥꦴꦏꦺꦲꦶ ꦥꦕꦶꦠ꧀ꦮꦴ ꦄꦩ꧀ꦲꦴꦏꦁ ꦈꦥꦛ꧀ꦜꦴꦥꦺꦲꦷ’’ꦠꦶ. ꦱꦺꦴ ꦒꦤ꧀ꦠ꧀ꦮꦴ ꦠꦡꦴ ꦄꦮꦺꦴꦕ. ꦱꦺꦴ ꦄꦴꦲ – ‘‘ꦱꦕꦺ, ꦨꦺꦴ, ꦄꦪꦁ ꦩꦠꦏꦺꦴ ꦄꦱ꧀ꦱ, ꦪꦡꦴ ꦗꦴꦤꦴꦩꦶ, ꦠꦡꦴ ꦥꦕꦶꦠ꧀ꦮꦴ ꦈꦥꦛ꧀ꦜꦲꦺꦪ꧀ꦪꦁ. ꦥꦴꦟꦴꦠꦶꦥꦴꦠꦁ ꦥꦤꦴꦲꦁ ꦤ ꦏꦫꦺꦴꦩꦷ’’ꦠꦶ. ꦱꦺꦴ ꦄꦴꦒꦤ꧀ꦠ꧀ꦮꦴ ꦫꦚ꧀ꦚꦺꦴ ꦄꦴꦫꦺꦴꦕꦺꦱꦶ.

ꦫꦴꦗꦴ ꦥꦸꦤ ‘‘ꦌꦏꦮꦴꦫꦁ ꦒꦕ꧀ꦖꦴ’’ꦠꦶ ꦥꦺꦱꦺꦱꦶ. ꦱꦺꦴ ꦒꦤ꧀ꦠ꧀ꦮꦴ, ‘‘ꦨꦺꦴ, ꦫꦴꦗꦸꦥꦛ꧀ꦜꦴꦤꦁ ꦤꦴꦩ ꦨꦴꦫꦶꦪꦁ, ꦩꦴ ꦌꦮꦁ ꦏꦫꦶ, ꦥꦸꦤꦥꦶ ꦱꦷꦭꦁ ꦱꦏ꧀ꦏꦴ ꦱꦩꦴꦢꦴꦠꦸꦁ, ꦥꦕꦺꦠ’’ꦤ꧀ꦠꦶ ꦄꦴꦲ. ꦄꦡ ꦤꦁ ꦠꦶꦱ꧀ꦱꦺꦴ ꦄꦮꦺꦴꦕ, ‘‘ꦨꦺꦴ, ꦌꦏꦱ꧀ꦩꦶꦁ ꦤꦴꦩ ꦄꦠ꧀ꦠꦨꦴꦮꦺ ꦣꦸꦮꦁ ꦌꦏꦁ ꦩꦫꦟꦁ, ꦤꦴꦲꦁ ꦥꦴꦟꦴꦠꦶꦥꦴꦠꦁ ꦏꦫꦶꦱ꧀ꦱꦴꦩꦷ’’ꦠꦶ. ꦱꦺꦴ ꦥꦸꦤꦥꦶ ꦫꦚ꧀ꦚꦺꦴ ꦄꦴꦫꦺꦴꦕꦺꦱꦶ. ꦫꦴꦗꦴ ꦠꦠꦶꦪꦩ꧀ꦥꦶ ꦥꦺꦱꦺꦠ꧀ꦮꦴ ꦄꦱꦩ꧀ꦥꦛꦶꦕ꧀ꦖꦤ꧀ꦠꦁ ꦥꦏ꧀ꦏꦺꦴꦱꦴꦥꦺꦠ꧀ꦮꦴ ꦄꦠ꧀ꦠꦤꦴ ꦥꦸꦕ꧀ꦖꦶ. ꦫꦚ꧀ꦚꦺꦴꦥꦶ ꦠꦡꦺꦮ ꦥꦛꦶꦮꦕꦤꦁ ꦄꦢꦴꦱꦶ. ꦄꦡ ꦫꦴꦗꦴ ꦥꦸꦫꦶꦱꦺ ꦄꦴꦟꦴꦥꦺꦱꦶ, ‘‘ꦄꦪꦁ ꦫꦚ꧀ꦚꦺꦴ ꦄꦴꦟꦁ ꦏꦺꦴꦥꦺꦠꦶ, ꦒꦕ꧀ꦖꦡꦺꦠꦱ꧀ꦱ ꦄꦴꦓꦴꦠꦤꦨꦟ꧀ꦝꦶꦏꦴꦪꦁ ꦜꦥꦺꦠ꧀ꦮꦴ, ꦱꦷꦱꦁ ꦖꦶꦤ꧀ꦢꦡꦴ’’ꦠꦶ. ꦫꦲꦺꦴ ꦕ ꦥꦤ ꦤꦺꦱꦁ ꦱꦚ꧀ꦚꦩꦢꦴꦱꦶ – ‘‘ꦆꦩꦁ ꦱꦤ꧀ꦠꦗ꧀ꦗꦪꦩꦴꦤꦴ ꦤꦺꦠ꧀ꦮꦴ ꦱꦷꦱꦩꦱ꧀ꦱ ꦄꦴꦓꦴꦠꦤꦨꦟ꧀ꦝꦶꦏꦴꦪꦁ ꦜꦥꦺꦠ꧀ꦮꦴ ꦄꦴꦒꦤ꧀ꦠ꧀ꦮꦴ ꦩꦪ꧀ꦲꦁ ꦄꦴꦫꦺꦴꦕꦺꦡꦴ’’ꦠꦶ.

ꦠꦺ ꦠꦁ ꦄꦴꦓꦴꦠꦤꦨꦟ꧀ꦝꦶꦏꦴꦪꦁ ꦤꦶꦥꦗ꧀ꦗꦴꦥꦺꦠ꧀ꦮꦴ ꦠꦩꦱ꧀ꦱ ꦏꦸꦏ꧀ꦏꦸꦛꦁ ꦲꦠ꧀ꦡꦺꦱꦸ ꦜꦥꦪꦶꦁꦱꦸ. ꦱꦺꦴ ꦠꦁ ꦲꦢꦪꦺ ꦜꦥꦺꦠ꧀ꦮꦴ ‘‘ꦄꦲꦁ, ꦠꦴꦠ, ꦩꦩ ꦗꦷꦮꦶꦠꦁ ꦠꦸꦪ꧀ꦲꦁ ꦢꦺꦩꦶ, ꦠꦮ ꦗꦷꦮꦶꦠꦁ ꦄꦲꦁ ꦒꦟ꧀ꦲꦴꦩꦶ, ꦠ꧀ꦮꦁ ꦤꦶꦧ꧀ꦨꦪꦺꦴ ꦒꦕ꧀ꦖꦴ’’ꦠꦶ ꦮꦶꦱ꧀ꦱꦗ꧀ꦗꦺꦱꦶ. ꦏꦸꦏ꧀ꦏꦸꦛꦺꦴ ꦥꦏ꧀ꦑꦺ ꦥꦥ꧀ꦦꦺꦴꦛꦺꦠ꧀ꦮꦴ ꦄꦴꦏꦴꦱꦺꦤ ꦒꦤ꧀ꦠ꧀ꦮꦴ ꦮꦛꦫꦸꦏ꧀ꦑꦺ ꦤꦶꦭꦷꦪꦶ. ꦠꦱ꧀ꦱ ꦏꦸꦏ꧀ꦏꦸꦛꦱ꧀ꦱ ꦄꦨꦪꦢꦶꦤ꧀ꦤꦛ꧀ꦜꦴꦤꦁ ꦏꦸꦏ꧀ꦏꦸꦛꦒꦶꦫꦶ ꦤꦴꦩ ꦗꦴꦠꦁ.

ꦫꦴꦗꦴ ꦠꦁ ꦥꦮꦠ꧀ꦠꦶꦁ ꦱꦸꦠ꧀ꦮꦴ ꦄꦩꦕ꧀ꦕꦥꦸꦠ꧀ꦠꦁ ꦥꦏ꧀ꦏꦺꦴꦱꦴꦥꦺꦠ꧀ꦮꦴ ꦱꦧ꧀ꦧꦴꦨꦫꦟꦺꦲꦶ ꦄꦭꦔ꧀ꦏꦫꦶꦠ꧀ꦮꦴ ꦄꦴꦲ – ‘‘ꦠꦴꦠ, ꦩꦪꦴ ꦠ꧀ꦮꦁ ꦌꦠꦢꦠ꧀ꦡꦩꦺꦮ ꦮꦷꦩꦁꦱꦶꦠꦺꦴ, ꦩꦪ꧀ꦲꦁ ꦠꦶꦠ꧀ꦠꦶꦫꦩꦁꦱꦁ ꦑꦴꦢꦶꦠꦸꦏꦴꦩꦱ꧀ꦱ ꦠꦷꦟꦶ ꦱꦁꦮꦕ꧀ꦖꦫꦴꦤꦶ ꦄꦠꦶꦏ꧀ꦏꦤ꧀ꦠꦴꦤꦶ, ꦱꦏ꧀ꦑꦶꦱ꧀ꦱꦱꦶ ꦩꦺ ꦠꦶꦏꦺꦴꦛꦶꦥꦫꦶꦱꦸꦢ꧀ꦣꦁ ꦏꦠ꧀ꦮꦴ ꦈꦥꦛ꧀ꦜꦴꦥꦺꦠꦸ’’ꦤ꧀ꦠꦶ. ‘‘ꦌꦠꦁ ꦤꦴꦩ, ꦢꦺꦮ, ꦩꦪ꧀ꦲꦁ ꦏꦩ꧀ꦩ’’ꦤ꧀ꦠꦶ ꦤꦶꦏ꧀ꦑꦩꦶꦠ꧀ꦮꦴ ꦢ꧀ꦮꦴꦫꦤ꧀ꦠꦫꦺ ꦜꦶꦠꦺꦴ ꦌꦏꦁ ꦥꦸꦫꦶꦱꦁ ꦥꦴꦠꦺꦴꦮ ꦠꦪꦺꦴ ꦠꦶꦠ꧀ꦠꦶꦫꦺ ꦒꦲꦺꦠ꧀ꦮꦴ ꦥꦮꦶꦱꦤ꧀ꦠꦁ ꦢꦶꦱ꧀ꦮꦴ, ꦢ꧀ꦮꦺ ꦏꦲꦴꦥꦟꦺ ꦢꦠ꧀ꦮꦴ ꦠꦶꦠ꧀ꦠꦶꦫꦺ ꦄꦴꦢꦴꦪ ꦥꦫꦶꦱꦺꦴꦣꦺꦠ꧀ꦮꦴ, ꦗꦷꦫꦏꦴꦢꦷꦲꦶ ꦮꦴꦱꦺꦠ꧀ꦮꦴ, ꦄꦔ꧀ꦒꦴꦫꦺꦱꦸ ꦱꦸꦥꦏ꧀ꦏꦺ ꦥꦕꦶꦠ꧀ꦮꦴ ꦫꦚ꧀ꦚꦺꦴ ꦈꦥꦛ꧀ꦜꦴꦥꦺꦱꦶ. ꦫꦴꦗꦴ ꦩꦲꦴꦠꦭꦺ ꦱꦶꦫꦷꦥꦭ꧀ꦭꦔ꧀ꦏꦺ ꦤꦶꦱꦶꦤ꧀ꦤꦺꦴꦮ ꦌꦏꦁ ꦒꦲꦺꦠ꧀ꦮꦴ ꦡꦺꦴꦏꦁ ꦖꦶꦤ꧀ꦢꦶꦠ꧀ꦮꦴ ꦩꦸꦑꦺ ꦥꦏ꧀ꦑꦶꦥꦶ, ꦠꦴꦮꦢꦺꦮꦱ꧀ꦱ ꦱꦠ꧀ꦠꦫꦱꦲꦫꦟꦷꦱꦲꦱ꧀ꦱꦴꦤꦶ ꦦꦫꦶꦠ꧀ꦮꦴ ꦄꦛ꧀ꦜꦴꦱꦶ.

ꦠꦱ꧀ꦩꦶꦁ ꦱꦩꦪꦺ ꦨꦶꦏ꧀ꦑꦸꦱꦔ꧀ꦓꦁ ꦱꦫꦶꦠ꧀ꦮꦴ, ‘‘ꦩꦴꦢꦶꦱꦺꦴ ꦤꦴꦩ ꦥꦡꦮꦶꦱ꧀ꦱꦫꦺꦴ ꦫꦴꦗꦴ ꦠꦶꦠ꧀ꦠꦶꦫꦩꦁꦱꦁ ꦑꦴꦢꦶꦠꦸꦏꦴꦩꦺꦴ ꦠꦷꦟꦶ ꦱꦁꦮꦕ꧀ꦖꦫꦴꦤꦶ ꦤ ꦭꦨꦶ, ꦄꦥꦕ꧀ꦕꦩꦴꦤꦺꦴ ꦨꦶꦏ꧀ꦑꦸꦱꦔ꧀ꦓꦺꦴ ꦏꦸꦠꦺꦴ ꦭꦨꦶꦱ꧀ꦱꦠꦷ’’ꦠꦶ? ꦩꦸꦑꦺ ꦥꦏ꧀ꦑꦶꦠ꧀ꦠꦏ꧀ꦑꦟ꧀ꦝꦁ ꦨꦹꦩꦶꦪꦁ ꦖꦝ꧀ꦝꦺꦱꦶ. ꦄꦩꦕ꧀ꦕꦥꦸꦠ꧀ꦠꦺꦴ ꦗꦟ꧀ꦟꦸꦏꦺꦲꦶ ꦥꦠꦶꦠ꧀ꦮꦴ ꦩꦸꦑꦺꦤ ꦒꦟ꧀ꦲꦶ. ꦫꦴꦗꦴ ‘‘ꦄꦥꦺꦲꦶ, ꦠꦴꦠ, ꦗꦴꦤꦴꦩꦲꦁ ꦠꦮ ꦤꦶꦢ꧀ꦢꦺꦴꦱꦨꦴꦮꦁ, ꦆꦩꦶꦤꦴ ꦤꦴꦩ ꦏꦴꦫꦟꦺꦤ ꦩꦪꦴ ꦌꦠꦁ ꦖꦝ꧀ꦝꦶꦠ’’ꦤ꧀ꦠꦶ ꦏꦡꦺꦠ꧀ꦮꦴ, ‘‘ꦱꦺꦱꦏꦁ ꦠꦡꦺꦮ ꦱꦔ꧀ꦒꦺꦴꦥꦺꦠ꧀ꦮꦴ ꦜꦥꦺꦲꦷ’’ꦠꦶ ꦄꦴꦲ.

ꦥꦸꦤꦢꦶꦮꦱꦺ ꦫꦴꦗꦏꦸꦭꦹꦥꦏꦺꦴ ꦡꦺꦫꦺꦴ ꦥꦶꦟ꧀ꦝꦴꦪ ꦥꦴꦮꦶꦱꦶ. ꦄꦩꦕ꧀ꦕꦥꦸꦠ꧀ꦠꦺꦴ ꦠꦁ ꦢꦶꦱ꧀ꦮꦴ ꦥꦠ꧀ꦠꦁ ꦒꦲꦺꦠ꧀ꦮꦴ ꦫꦴꦗꦒꦺꦲꦁ ꦥꦮꦺꦱꦺꦱꦶ. ꦄꦚ꧀ꦚꦠꦫꦺꦴ ꦮꦸꦝ꧀ꦞꦥꦧ꧀ꦧꦗꦶꦠꦺꦴꦥꦶ ꦡꦺꦫꦱ꧀ꦱ ꦥꦕ꧀ꦖꦴꦱꦩꦟꦺꦴ ꦮꦶꦪ ꦲꦸꦠ꧀ꦮꦴ ꦄꦤꦸꦧꦤ꧀ꦣꦤ꧀ꦠꦺꦴ ꦥꦴꦮꦶꦱꦶ. ꦡꦺꦫꦺꦴ ‘‘ꦫꦚ꧀ꦚꦴ ꦥꦏ꧀ꦏꦺꦴꦱꦴꦥꦶꦠꦨꦶꦏ꧀ꦑꦸ ꦨꦮꦶꦱ꧀ꦱꦠꦷ’’ꦠꦶ ꦥꦩꦗ꧀ꦗꦶ. ꦄꦩꦕ꧀ꦕꦥꦸꦠ꧀ꦠꦺꦴꦥꦶ ‘‘ꦡꦺꦫꦱ꧀ꦱ ꦈꦥꦛ꧀ꦜꦴꦏꦺꦴ ꦨꦮꦶꦱ꧀ꦱꦠꦷ’’ꦠꦶ ꦥꦩꦴꦢꦁ ꦄꦴꦥꦗ꧀ꦗꦶ. ꦠꦺꦱꦁ ꦤꦶꦱꦷꦢꦴꦥꦺꦠ꧀ꦮꦴ ꦪꦴꦒꦸꦁ ꦄꦢꦁꦱꦸ. ꦪꦴꦒꦸꦪꦴ ꦥꦷꦠꦴꦪ ꦫꦴꦗꦴ ꦠꦶꦠ꧀ꦠꦶꦫꦺ ꦈꦥꦤꦺꦱꦶ. ꦡꦺꦫꦺꦴ ꦌꦏꦁ ꦒꦟ꧀ꦲꦶ, ꦆꦠꦫꦺꦴꦥꦶ ꦌꦏꦁ ꦒꦟ꧀ꦲꦶ. ꦫꦴꦗꦴ ‘‘ꦄꦤꦸꦨꦴꦒꦺꦴ ꦄꦠ꧀ꦡꦶ, ꦄꦤꦴꦥꦸꦕ꧀ꦖꦶꦠ꧀ꦮꦴ ꦑꦴꦢꦶꦠꦸꦁ ꦤ ꦪꦸꦠ꧀ꦠ’’ꦤ꧀ꦠꦶ ꦩꦲꦴꦡꦺꦫꦁ ꦄꦴꦥꦸꦕ꧀ꦖꦶ. ꦡꦺꦫꦺꦴ ꦲꦠ꧀ꦡꦁ ꦥꦶꦢꦲꦶ, ꦩꦲꦭ꧀ꦭꦏꦠ꧀ꦡꦺꦫꦺꦴ ꦱꦩ꧀ꦥꦛꦶꦕ꧀ꦖꦶ. ꦫꦴꦗꦴ ꦄꦤꦠ꧀ꦠꦩꦤꦺꦴ ꦲꦸꦠ꧀ꦮꦴ ꦏꦠꦨꦠ꧀ꦠꦏꦶꦕ꧀ꦕꦁ ꦡꦺꦫꦁ ꦥꦠ꧀ꦠꦁ ꦄꦴꦢꦴꦪ ꦄꦤꦸꦒꦕ꧀ꦖꦤ꧀ꦠꦺꦴ ꦄꦴꦲ – ‘‘ꦨꦤ꧀ꦠꦺ, ꦏꦸꦭꦒꦺꦲꦁ ꦄꦴꦒꦕ꧀ꦖꦤ꧀ꦠꦺꦲꦶ ꦈꦒ꧀ꦒꦲꦶꦠꦮꦠ꧀ꦠꦁ ꦨꦶꦏ꧀ꦑꦸꦁ ꦒꦲꦺꦠ꧀ꦮꦴ ꦄꦴꦒꦤ꧀ꦠꦸꦁ ꦮꦛ꧀ꦛꦠꦷ’’ꦠꦶ. ꦡꦺꦫꦺꦴ ꦠꦱ꧀ꦩꦶꦁ ꦑꦟꦺ ꦄꦚ꧀ꦚꦴꦱꦶ ‘‘ꦤ ꦌꦱ ꦫꦚ꧀ꦚꦴ ꦥꦏ꧀ꦏꦺꦴꦱꦴꦥꦶꦠꦺꦴ’’ꦠꦶ.

ꦥꦸꦤꦢꦶꦮꦱꦺ ꦈꦥꦛ꧀ꦜꦴꦏꦱꦴꦩꦟꦺꦫꦁ ꦒꦲꦺꦠ꧀ꦮꦴ ꦥꦴꦮꦶꦱꦶ. ꦫꦴꦗꦴ ꦠꦢꦴꦥꦶ ꦪꦴꦒꦸꦪꦴ ꦥꦷꦠꦴꦪ ꦠꦶꦠ꧀ꦠꦶꦫꦺ ꦈꦥꦤꦴꦩꦺꦱꦶ. ꦡꦺꦫꦺꦴ ꦌꦏꦁ ꦄꦒ꧀ꦒꦲꦺꦱꦶ, ꦱꦴꦩꦟꦺꦫꦺꦴ ꦄꦔ꧀ꦒꦸꦭꦶꦁ ꦕꦴꦭꦺꦠ꧀ꦮꦴ ꦩꦗ꧀ꦙꦺ ꦖꦶꦤ꧀ꦢꦴꦥꦺꦠ꧀ꦮꦴ ꦌꦏꦏꦺꦴꦛ꧀ꦜꦴꦱꦩꦺꦮ ꦄꦒ꧀ꦒꦲꦺꦱꦶ. ꦫꦴꦗꦴ ꦠꦁ ꦏꦺꦴꦛ꧀ꦜꦴꦱꦁ ꦩꦲꦴꦡꦺꦫꦱ꧀ꦱ ꦈꦥꦤꦴꦩꦺꦱꦶ. ꦩꦲꦴꦡꦺꦫꦺꦴ ꦲꦠ꧀ꦡꦁ ꦥꦶꦢꦲꦶ, ꦱꦴꦩꦟꦺꦫꦺꦴꦥꦶ ꦥꦶꦢꦲꦶ. ꦫꦴꦗꦴ ꦄꦮꦶꦢꦹꦫꦺ ꦤꦶꦱꦷꦢꦶꦠ꧀ꦮꦴ ꦑꦟ꧀ꦝꦴꦑꦟ꧀ꦝꦁ ꦖꦶꦤ꧀ꦢꦶꦠ꧀ꦮꦴ ꦑꦴꦢꦤ꧀ꦠꦺꦴ ‘‘ꦈꦒ꧀ꦒꦲꦶꦠꦮꦠ꧀ꦠꦺ ꦤꦶꦱ꧀ꦱꦴꦪ ꦢꦶꦪꦝ꧀ꦞꦠꦶꦠ꧀ꦠꦶꦫꦺ ꦑꦴꦢꦶꦠꦸꦁ ꦭꦨꦶꦩ꧀ꦲꦴ’’ꦠꦶ ꦄꦴꦲ. ꦠꦱ꧀ꦱ ꦩꦁꦱꦺ ꦑꦴꦢꦶꦠꦩꦠ꧀ꦠꦺꦮ ꦏꦟ꧀ꦟꦺꦲꦶ ꦥꦸꦧ꧀ꦧꦺꦴ ꦤꦶꦏ꧀ꦑꦩꦶ. ꦠꦠꦺꦴ ꦩꦸꦑꦁ ꦮꦶꦏ꧀ꦑꦴꦭꦺꦠ꧀ꦮꦴ ꦱꦴꦩꦟꦺꦫꦁ ꦈꦥꦱꦔ꧀ꦏꦩꦶꦠ꧀ꦮꦴ, ‘‘ꦥꦱꦤ꧀ꦤꦺꦴꦱ꧀ꦩꦶ, ꦠꦴꦠ, ꦄꦛ꧀ꦜ ꦠꦺ ꦣꦸꦮꦨꦠ꧀ꦠꦴꦤꦶ ꦢꦺꦩꦷ’’ꦠꦶ ꦄꦴꦲ. ꦄꦲꦁ, ꦩꦲꦴꦫꦴꦗ, ꦈꦥꦗ꧀ꦙꦴꦪꦱ꧀ꦱ ꦢꦩ꧀ꦩꦷꦠꦶ. ꦄꦥꦫꦴꦤꦶ ꦄꦛ꧀ꦜ ꦢꦺꦩꦷꦠꦶ. ꦠꦴꦤꦶ ꦄꦩ꧀ꦲꦴꦏꦁ ꦄꦴꦕꦫꦶꦪꦱ꧀ꦱ ꦢꦩ꧀ꦩꦷꦠꦶ. ꦄꦥꦫꦴꦤꦶꦥꦶ ꦄꦛ꧀ꦜ ꦢꦺꦩꦷꦠꦶ. ꦠꦴꦤꦶ ꦱꦩꦴꦤꦸꦥꦗ꧀ꦙꦴꦪꦴꦤꦁ ꦢꦩ꧀ꦩꦷꦠꦶ. ꦄꦥꦫꦴꦤꦶꦥꦶ ꦄꦛ꧀ꦜ ꦢꦺꦩꦷꦠꦶ. ꦠꦴꦤꦶ ꦨꦶꦏ꧀ꦑꦸꦱꦔ꧀ꦓꦱ꧀ꦱ ꦢꦩ꧀ꦩꦷꦠꦶ. ꦄꦥꦫꦴꦤꦶꦥꦶ ꦄꦛ꧀ꦜ ꦢꦺꦩꦷꦠꦶ. ꦱꦴꦩꦟꦺꦫꦺꦴ ꦄꦣꦶꦮꦴꦱꦺꦱꦶ. ꦌꦮꦁ ꦥꦛꦶꦒ꧀ꦒꦲꦟꦩꦠ꧀ꦠꦁ ꦗꦴꦤꦤ꧀ꦠꦺꦴ ꦄꦤꦸꦥ꧀ꦥꦤ꧀ꦤꦚ꧀ꦕꦺꦮ ꦭꦴꦨꦁ ꦈꦥ꧀ꦥꦴꦢꦺꦠꦶ, ꦈꦥ꧀ꦥꦤ꧀ꦤꦚ꧀ꦕ ꦡꦴꦮꦫꦁ ꦏꦫꦺꦴꦠꦶ. ꦆꦢꦁ ꦥꦛꦶꦒ꧀ꦒꦲꦟꦥꦩꦴꦟꦁ ꦤꦴꦩ. ꦠꦠ꧀ꦡ ꦥꦫꦶꦨꦺꦴꦒꦥꦩꦴꦟꦁ ꦥꦕ꧀ꦕꦮꦺꦏ꧀ꦑꦟꦥꦪꦺꦴꦗꦤꦁ, ‘‘ꦆꦢꦩꦠ꧀ꦡꦶꦪꦁ ꦨꦺꦴꦗꦤꦁ ꦨꦸꦚ꧀ꦗꦴꦩꦷ’’ꦠꦶ ꦥꦤ ꦥꦕ꧀ꦕꦮꦺꦏ꧀ꦑꦶꦠꦥꦫꦶꦨꦺꦴꦒꦱ꧀ꦱꦺꦮ ꦥꦪꦺꦴꦗꦤꦠ꧀ꦠꦴ ꦥꦫꦶꦨꦺꦴꦒꦥꦩꦴꦟꦁꦪꦺꦮ ꦤꦴꦩ, ꦠꦁ ꦆꦣ ꦄꦣꦶꦥ꧀ꦥꦺꦠꦁ. ꦠꦺꦤꦺꦮ ꦥꦛꦶꦱꦔ꧀ꦑꦴ ꦪꦺꦴꦤꦶꦱꦺꦴꦠꦶꦄꦴꦢꦶꦩꦴꦲ, ꦆꦠꦫꦩ꧀ꦥꦶ ꦥꦤ ꦮꦛ꧀ꦛꦠꦶꦪꦺꦮ.

ꦱꦷꦲꦱꦺꦪ꧀ꦪꦤ꧀ꦠꦶ ꦌꦠ꧀ꦡ ꦏꦴꦩꦨꦺꦴꦒꦶꦱꦺꦪ꧀ꦪꦴ, ꦥꦺꦠꦱꦺꦪ꧀ꦪꦴ, ꦱꦷꦲꦱꦺꦪ꧀ꦪꦴ, ꦠꦡꦴꦒꦠꦱꦺꦪ꧀ꦪꦴꦠꦶ ꦕꦠꦱ꧀ꦱꦺꦴ ꦱꦺꦪ꧀ꦪꦴ. ꦠꦠ꧀ꦡ ‘‘ꦪꦺꦨꦸꦪ꧀ꦪꦺꦤ, ꦨꦶꦏ꧀ꦑꦮꦺ, ꦏꦴꦩꦨꦺꦴꦒꦷ ꦮꦴꦩꦺꦤ ꦥꦱ꧀ꦱꦺꦤ ꦱꦺꦤ꧀ꦠꦷ’’ꦠꦶ (ꦄ. ꦤꦶ. ꧔.꧒꧔꧖) ꦄꦪꦁ ꦏꦴꦩꦨꦺꦴꦒꦶꦱꦺꦪ꧀ꦪꦴ. ꦠꦺꦱꦚ꧀ꦲꦶ ꦪꦺꦨꦸꦪ꧀ꦪꦺꦤ ꦢꦏ꧀ꦑꦶꦟꦥꦱ꧀ꦱꦺꦤ ꦱꦪꦴꦤꦺꦴ ꦤꦴꦩ ꦤꦠ꧀ꦡꦶ.

‘‘ꦪꦺꦨꦸꦪ꧀ꦪꦺꦤ, ꦨꦶꦏ꧀ꦑꦮꦺ, ꦥꦺꦠꦴ ꦈꦠ꧀ꦠꦴꦤꦴ ꦱꦺꦤ꧀ꦠꦷ’’ꦠꦶ (ꦄ. ꦤꦶ. ꧔.꧒꧔꧖) ꦄꦪꦁ ꦥꦺꦠꦱꦺꦪ꧀ꦪꦴ. ꦥꦺꦠꦴ ꦲꦶ ꦄꦥ꧀ꦥꦩꦁꦱꦭꦺꦴꦲꦶꦠꦠ꧀ꦠꦴ ꦄꦛ꧀ꦜꦶꦱꦔ꧀ꦓꦴꦛꦗꦛꦶꦠꦴ ꦌꦏꦺꦤ ꦥꦱ꧀ꦱꦺꦤ ꦱꦪꦶꦠꦸꦁ ꦤ ꦱꦏ꧀ꦏꦺꦴꦤ꧀ꦠꦶ, ꦈꦠ꧀ꦠꦴꦤꦴꦮ ꦱꦪꦤ꧀ꦠꦶ.

‘‘ꦪꦺꦨꦸꦪ꧀ꦪꦺꦤ, ꦨꦶꦏ꧀ꦑꦮꦺ, ꦱꦷꦲꦺꦴ ꦩꦶꦒꦫꦴꦗꦴ ꦤꦔ꧀ꦒꦸꦛ꧀ꦜꦁ ꦄꦤ꧀ꦠꦫꦱꦠ꧀ꦡꦶꦩ꧀ꦲꦶ ꦄꦤꦸꦥꦏ꧀ꦑꦶꦥꦶꦠ꧀ꦮꦴ ꦢꦏ꧀ꦑꦶꦟꦺꦤ ꦥꦱ꧀ꦱꦺꦤ ꦱꦪꦠꦷ’’ꦠꦶ ꦄꦪꦁ ꦱꦷꦲꦱꦺꦪ꧀ꦪꦴ. ꦠꦺꦗꦸꦱ꧀ꦱꦢꦠ꧀ꦠꦴ ꦲꦶ ꦱꦷꦲꦺꦴ ꦩꦶꦒꦫꦴꦗꦴ ꦢ꧀ꦮꦺ ꦥꦸꦫꦶꦩꦥꦴꦢꦺ ꦌꦏꦱ꧀ꦩꦶꦁ, ꦥꦕ꧀ꦖꦶꦩꦥꦴꦢꦺ ꦌꦏꦱ꧀ꦩꦶꦁ ꦜꦴꦤꦺ ꦜꦥꦺꦠ꧀ꦮꦴ ꦤꦔ꧀ꦒꦸꦛ꧀ꦜꦁ ꦄꦤ꧀ꦠꦫꦱꦠ꧀ꦡꦶꦩ꧀ꦲꦶ ꦥꦏ꧀ꦑꦶꦥꦶꦠ꧀ꦮꦴ ꦥꦸꦫꦶꦩꦥꦴꦢꦥꦕ꧀ꦖꦶꦩꦥꦴꦢꦤꦔ꧀ꦒꦸꦛ꧀ꦜꦴꦤꦁ ꦜꦶꦠꦺꦴꦏꦴꦱꦁ ꦱꦭ꧀ꦭꦏ꧀ꦑꦺꦠ꧀ꦮꦴ ꦢ꧀ꦮꦶꦤ꧀ꦤꦁ ꦥꦸꦫꦶꦩꦥꦴꦢꦴꦤꦁ ꦩꦠ꧀ꦡꦏꦺ ꦱꦷꦱꦁ ꦜꦥꦺꦠ꧀ꦮꦴ ꦱꦪꦠꦶ, ꦢꦶꦮꦱꦩ꧀ꦥꦶ ꦱꦪꦶꦠ꧀ꦮꦴ ꦥꦧꦸꦗ꧀ꦙꦩꦴꦤꦺꦴ ꦤ ꦈꦠ꧀ꦫꦱꦤ꧀ꦠꦺꦴ ꦥꦧꦸꦗ꧀ꦙꦠꦶ, ꦱꦷꦱꦁ ꦥꦤ ꦈꦏ꧀ꦑꦶꦥꦶꦠ꧀ꦮꦴ ꦥꦸꦫꦶꦩꦥꦴꦢꦴꦢꦷꦤꦁ ꦜꦶꦠꦺꦴꦏꦴꦱꦁ ꦱꦭ꧀ꦭꦏ꧀ꦑꦺꦠꦶ. ꦱꦕꦺ ꦏꦶꦚ꧀ꦕꦶ ꦜꦴꦤꦁ ꦮꦶꦗꦲꦶꦠ꧀ꦮꦴ ꦜꦶꦠꦁ ꦲꦺꦴꦠꦶ, ‘‘ꦤꦪꦶꦢꦁ ꦠꦸꦪ꧀ꦲꦁ ꦗꦴꦠꦶꦪꦴ ꦱꦹꦫꦨꦴꦮꦱ꧀ꦱ ꦕ ꦄꦤꦸꦫꦹꦥ’’ꦤ꧀ꦠꦶ ꦄꦤꦠ꧀ꦠꦩꦤꦺꦴ ꦲꦸꦠ꧀ꦮꦴ ꦠꦠ꧀ꦡꦺꦮ ꦱꦪꦠꦶ, ꦤ ꦒꦺꦴꦕꦫꦴꦪ ꦥꦏ꧀ꦏꦩꦠꦶ. ꦄꦮꦶꦗꦲꦶꦠ꧀ꦮꦴ ꦜꦶꦠꦺ ꦥꦤ ‘‘ꦠꦸꦪ꧀ꦲꦁ ꦗꦴꦠꦶꦪꦴ ꦕ ꦱꦹꦫꦨꦴꦮꦱ꧀ꦱ ꦕ ꦄꦤꦸꦫꦹꦥꦩꦶꦢ’’ꦤ꧀ꦠꦶ ꦲꦛ꧀ꦜꦠꦸꦛ꧀ꦜꦺꦴ ꦈꦛ꧀ꦜꦴꦪ ꦱꦷꦲꦮꦶꦗꦩ꧀ꦨꦶꦠꦁ ꦮꦶꦗꦩ꧀ꦨꦶꦠ꧀ꦮꦴ ꦏꦺꦱꦫꦨꦴꦫꦁ ꦮꦶꦣꦸꦤꦶꦠ꧀ꦮꦴ ꦠꦶꦏ꧀ꦑꦠ꧀ꦠꦸꦁ ꦱꦷꦲꦤꦴꦢꦁ ꦤꦢꦶꦠ꧀ꦮꦴ ꦒꦺꦴꦕꦫꦴꦪ ꦥꦏ꧀ꦏꦩꦠꦶ.

ꦕꦠꦸꦠ꧀ꦡꦗ꧀ꦙꦴꦤꦱꦺꦪ꧀ꦪꦴ ꦥꦤ ꦠꦡꦴꦒꦠꦱꦺꦪ꧀ꦪꦴꦠꦶ ꦮꦸꦕ꧀ꦕꦠꦶ. ꦠꦴꦱꦸ ꦆꦣ ꦱꦷꦲꦱꦺꦪ꧀ꦪꦴ ꦄꦴꦒꦠꦴ. ꦄꦪꦚ꧀ꦲꦶ ꦠꦺꦗꦸꦱ꧀ꦱꦢꦆꦫꦶꦪꦴꦥꦡꦠ꧀ꦠꦴ ꦈꦠ꧀ꦠꦩꦱꦺꦪ꧀ꦪꦴ ꦤꦴꦩ.

ꦥꦴꦢꦺ ꦥꦴꦢꦤ꧀ꦠꦶ ꦢꦏ꧀ꦑꦶꦟꦥꦴꦢꦺ ꦮꦴꦩꦥꦴꦢꦁ. ꦄꦕ꧀ꦕꦴꦣꦴꦪꦴꦠꦶ ꦄꦠꦶꦄꦴꦣꦴꦪ, ꦇꦱꦏꦁ ꦄꦠꦶꦏ꧀ꦏꦩ꧀ꦩ ꦜꦥꦺꦠ꧀ꦮꦴ. ꦒꦺꦴꦥ꧀ꦦꦏꦺꦤ ꦲꦶ ꦒꦺꦴꦥ꧀ꦦꦏꦺ, ꦗꦴꦟꦸꦤꦴ ꦮꦴ ꦗꦴꦟꦸꦩ꧀ꦲꦶ ꦱꦔ꧀ꦓꦛ꧀ꦛꦶꦪꦩꦴꦤꦺ ꦄꦨꦶꦟ꧀ꦲꦁ ꦮꦺꦢꦤꦴ ꦈꦥ꧀ꦥꦗ꧀ꦗꦠꦶ, ꦕꦶꦠ꧀ꦠꦁ ꦌꦏꦒ꧀ꦒꦁ ꦤ ꦲꦺꦴꦠꦶ, ꦱꦺꦪ꧀ꦪꦴ ꦄꦦꦴꦱꦸꦏꦴ ꦲꦺꦴꦠꦶ. ꦪꦡꦴ ꦥꦤ ꦤ ꦱꦔ꧀ꦓꦁꦛ꧀ꦛꦺꦠꦶ, ꦌꦮꦁ ꦄꦠꦶꦏ꧀ꦏꦩ꧀ꦩ ꦜꦥꦶꦠꦺ ꦮꦺꦢꦤꦴ ꦤꦸꦥ꧀ꦥꦗ꧀ꦗꦠꦶ, ꦕꦶꦠ꧀ꦠꦁ ꦌꦏꦒ꧀ꦒꦁ ꦲꦺꦴꦠꦶ, ꦱꦺꦪ꧀ꦪꦴ ꦦꦴꦱꦸꦏꦴ ꦲꦺꦴꦠꦶ. ꦠꦱ꧀ꦩꦴ ꦌꦮꦁ ꦱꦺꦪ꧀ꦪꦁ ꦏꦥ꧀ꦥꦺꦠꦶ.

ꦱꦠꦺꦴ ꦱꦩ꧀ꦥꦗꦴꦤꦺꦴꦠꦶ ꦱꦠꦶꦪꦴ ꦕꦺꦮ ꦱꦩ꧀ꦥꦗꦚ꧀ꦚꦺꦤ ꦕ ꦱꦩꦤ꧀ꦤꦴꦒꦠꦺꦴ. ꦏꦡꦁ ꦤꦶꦢ꧀ꦢꦴꦪꦤ꧀ꦠꦺꦴ ꦱꦠꦺꦴ ꦱꦩ꧀ꦥꦗꦴꦤꦺꦴ ꦲꦺꦴꦠꦷꦠꦶ? ꦱꦠꦶꦱꦩ꧀ꦥꦗꦚ꧀ꦚꦱ꧀ꦱ ꦄꦥ꧀ꦥꦲꦴꦤꦺꦤ. ꦄꦪꦚ꧀ꦲꦶ ꦢꦶꦮꦱꦚ꧀ꦕꦺꦮ ꦱꦏꦭꦪꦴꦩꦚ꧀ꦕ ꦄꦴꦮꦫꦟꦷꦪꦺꦲꦶ ꦣꦩ꧀ꦩꦺꦲꦶ ꦕꦶꦠ꧀ꦠꦁ ꦥꦫꦶꦱꦺꦴꦣꦺꦠ꧀ꦮꦴ ꦥꦜꦩꦪꦴꦩꦴꦮꦱꦴꦤꦺ ꦕꦔ꧀ꦏꦩꦴ ꦎꦫꦸꦪ꧀ꦲ ꦥꦴꦢꦺ ꦣꦺꦴꦮꦤ꧀ꦠꦺꦴꦥꦶ ꦩꦹꦭꦏꦩ꧀ꦩꦛ꧀ꦜꦴꦤꦁ ꦄꦮꦶꦗꦲꦤ꧀ꦠꦺꦴꦮ ꦣꦺꦴꦮꦠꦶ, ꦠꦁ ꦄꦮꦶꦗꦲꦤ꧀ꦠꦺꦴꦮ ꦢ꧀ꦮꦴꦫꦁ ꦮꦶꦮꦫꦠꦶ, ꦩꦚ꧀ꦕꦺ ꦤꦶꦱꦷꦢꦠꦶ, ꦄꦮꦶꦗꦲꦤ꧀ꦠꦺꦴꦮ ꦤꦶꦢ꧀ꦢꦁ ꦎꦏ꧀ꦏꦩꦠꦶ. ꦥꦧꦸꦗ꧀ꦙꦤ꧀ꦠꦺꦴ ꦥꦤ ꦩꦹꦭꦏꦩ꧀ꦩꦛ꧀ꦜꦴꦤꦁ ꦒꦲꦺꦠ꧀ꦮꦴꦮ ꦥꦧꦸꦗ꧀ꦙꦠꦶ. ꦌꦮꦁ ꦤꦶꦢ꧀ꦢꦁ ꦎꦏ꧀ꦏꦩꦤ꧀ꦠꦺꦴꦥꦶ ꦱꦠꦺꦴ ꦱꦩ꧀ꦥꦗꦴꦤꦺꦴ ꦲꦺꦴꦠꦶ. ꦌꦮꦁ ꦥꦤ ꦚꦴꦟꦣꦴꦠꦸꦏꦤ꧀ꦠꦶ ꦤ ꦫꦺꦴꦕꦪꦶꦁꦱꦸ.

ꦮꦸꦠ꧀ꦠꦤꦪꦺꦤ ꦥꦤꦺꦱ ꦕꦶꦠ꧀ꦠꦁ ꦥꦫꦶꦱꦺꦴꦣꦺꦠ꧀ꦮꦴ ꦥꦜꦩꦪꦴꦩꦴꦮꦱꦴꦤꦺ ‘‘ꦈꦥꦴꦢꦶꦤ꧀ꦤꦏꦁ ꦱꦫꦷꦫꦁ ꦤꦶꦢ꧀ꦢꦴꦪ ꦱꦩꦱ꧀ꦱꦴꦱꦺꦱ꧀ꦱꦴꦩꦷ’’ꦠꦶ ꦕꦔ꧀ꦏꦩꦴ ꦎꦫꦸꦪ꧀ꦲ ꦩꦹꦭꦏꦩ꧀ꦩꦛ꧀ꦜꦴꦤꦁ ꦄꦮꦶꦗꦲꦤ꧀ꦠꦺꦴꦮ ꦥꦴꦢꦺ ꦣꦺꦴꦮꦠꦶ, ꦢ꧀ꦮꦴꦫꦁ ꦮꦶꦮꦫꦠꦶ, ꦩꦚ꧀ꦕꦺ ꦥꦤ ꦤꦶꦱꦷꦢꦶꦠ꧀ꦮꦴ ꦩꦹꦭꦏꦩ꧀ꦩꦛ꧀ꦜꦴꦤꦁ ꦥꦲꦴꦪ, ‘‘ꦑꦤ꧀ꦣꦴꦮ ꦑꦤ꧀ꦣꦺꦱꦸ, ꦣꦴꦠꦸꦪꦺꦴꦮ ꦣꦴꦠꦹꦱꦸ ꦥꦛꦶꦲꦚ꧀ꦚꦤ꧀ꦠꦷ’’ꦠꦶ ꦱꦺꦤꦴꦱꦤꦁ ꦥꦕ꧀ꦕꦮꦺꦏ꧀ꦑꦤ꧀ꦠꦺꦴ ꦏꦩꦺꦤ ꦤꦶꦢ꧀ꦢꦁ ꦎꦏ꧀ꦏꦩꦠꦶ, ꦥꦧꦸꦗ꧀ꦙꦤ꧀ꦠꦺꦴ ꦥꦤ ꦩꦹꦭꦏꦩ꧀ꦩꦛ꧀ꦜꦴꦤꦁ ꦒꦲꦺꦠ꧀ꦮꦴꦮ ꦥꦧꦸꦗ꧀ꦙꦠꦶ. ꦌꦮꦁ ꦤꦶꦢ꧀ꦢꦁ ꦎꦏ꧀ꦏꦩꦤ꧀ꦠꦺꦴꦥꦶ ꦱꦠꦺꦴ ꦱꦩ꧀ꦥꦗꦴꦤꦺꦴ ꦤꦴꦩ ꦲꦺꦴꦠꦷꦠꦶ ꦮꦺꦢꦶꦠꦧ꧀ꦧꦺꦴ.

ꦆꦠꦶ ꦆꦩꦱ꧀ꦩꦶꦁ ꦱꦸꦠ꧀ꦠꦺ ꦠꦶꦮꦔ꧀ꦒꦶꦏꦴ ꦥꦸꦧ꧀ꦧꦨꦴꦒꦮꦶꦥꦱ꧀ꦱꦤꦴꦮ ꦏꦡꦶꦠꦴ. ꦌꦠ꧀ꦠꦏꦺꦤꦺꦮ ꦥꦤ ꦮꦺꦴꦱꦴꦤꦁ ꦄꦤꦴꦥꦗ꧀ꦗꦶꦠ꧀ꦮꦴ ꦠꦴꦤꦺꦮ ꦆꦤ꧀ꦢ꧀ꦫꦶꦪꦧꦭꦧꦺꦴꦗ꧀ꦙꦔ꧀ꦒꦴꦤꦶ ꦱꦩꦺꦴꦣꦴꦤꦺꦠ꧀ꦮꦴ ꦮꦶꦥꦱ꧀ꦱꦤꦁ ꦮꦝ꧀ꦞꦺꦠ꧀ꦮꦴ ꦨꦶꦏ꧀ꦑꦸ ꦄꦫꦲꦠ꧀ꦠꦁ ꦥꦴꦥꦸꦟꦴꦠꦷꦠꦶ. ꦌꦮꦁ ꦪꦴꦮ ꦄꦫꦲꦠ꧀ꦠꦴ ꦢꦺꦱꦤꦴ ꦏꦡꦺꦠꦧ꧀ꦧꦴ.