꧓. ꦪꦩꦏꦱꦸꦠ꧀ꦠꦮꦟ꧀ꦟꦤꦴ

꧘꧕. ꦠꦠꦶꦪꦺ ꦢꦶꦛ꧀ꦜꦶꦒꦠꦤ꧀ꦠꦶ ꦱꦕꦺ ꦲꦶꦱ꧀ꦱ ꦌꦮꦁ ꦨꦮꦺꦪ꧀ꦪ ‘‘ꦱꦔ꧀ꦑꦴꦫꦴ ꦈꦥ꧀ꦥꦗ꧀ꦗꦤ꧀ꦠꦶ ꦕꦺꦮ ꦤꦶꦫꦸꦗ꧀ꦙꦤ꧀ꦠꦶ ꦕ, ꦱꦔ꧀ꦑꦴꦫꦥ꧀ꦥꦮꦠ꧀ꦠꦩꦺꦮ ꦄꦥ꧀ꦥꦮꦠ꧀ꦠꦁ ꦲꦺꦴꦠꦷ’’ꦠꦶ, ꦢꦶꦛ꧀ꦜꦶꦒꦠꦁ ꦤꦴꦩ ꦤ ꦨꦮꦺꦪ꧀ꦪ, ꦱꦴꦱꦤꦴꦮꦕꦫꦶꦏꦁ ꦚꦴꦟꦁ ꦨꦮꦺꦪ꧀ꦪ. ꦪꦱ꧀ꦩꦴ ꦥꦤꦱ꧀ꦱ ‘‘ꦱꦠ꧀ꦠꦺꦴ ꦈꦕ꧀ꦖꦶꦗ꧀ꦗꦠꦶ ꦮꦶꦤꦱ꧀ꦱꦠꦷ’’ꦠꦶ ꦄꦲꦺꦴꦱꦶ, ꦠꦱ꧀ꦩꦴ ꦢꦶꦛ꧀ꦜꦶꦒꦠꦁ ꦤꦴꦩ ꦗꦴꦠꦁ. ꦡꦴꦩꦱꦴ ꦥꦫꦴꦩꦴꦱꦴꦠꦶ ꦢꦶꦛ꧀ꦜꦶꦡꦴꦩꦺꦤ ꦕꦺꦮ ꦢꦶꦛ꧀ꦜꦶꦥꦫꦴꦩꦴꦱꦺꦤ ꦕ.

ꦪꦺꦤꦴꦪꦱ꧀ꦩꦴ ꦱꦴꦫꦶꦥꦸꦠ꧀ꦠꦺꦴꦠꦶ ꦪꦡꦴ ꦤꦴꦩ ꦥꦕ꧀ꦕꦤ꧀ꦠꦺ ꦏꦸꦥꦶꦠꦺ ꦠꦁ ꦮꦹꦥꦱꦩꦺꦠꦸꦁ ꦄꦱꦏ꧀ꦏꦺꦴꦤ꧀ꦠꦴ ꦫꦴꦗꦥꦸꦫꦶꦱꦴ ꦱꦺꦤꦴꦥꦠꦶꦱ꧀ꦱ ꦮꦴ ꦫꦚ꧀ꦚꦺꦴ ꦮꦴ ꦱꦤ꧀ꦠꦶꦏꦁ ꦒꦕ꧀ꦖꦤ꧀ꦠꦶ, ꦌꦮꦁ ꦢꦶꦛ꧀ꦜꦶꦒꦠꦮꦱꦺꦤ ꦠꦱ꧀ꦩꦶꦁ ꦡꦺꦫꦺ ꦏꦸꦥꦶꦠꦺ ꦠꦁ ꦮꦹꦥꦱꦩꦺꦠꦸꦁ ꦄꦱꦏ꧀ꦏꦺꦴꦤ꧀ꦠꦴ ꦠꦺ ꦨꦶꦏ꧀ꦑꦹ ꦪꦺꦤ ꦣꦩ꧀ꦩꦫꦴꦗꦱ꧀ꦱ ꦣꦩ꧀ꦩꦱꦺꦤꦴꦥꦠꦶ ꦄꦴꦪꦱ꧀ꦩꦴ ꦱꦴꦫꦶꦥꦸꦠ꧀ꦠꦺꦴ, ꦠꦺꦤꦸꦥꦱꦔ꧀ꦏꦩꦶꦁꦱꦸ. ꦌꦮꦁꦧ꧀ꦪꦴꦑꦺꦴꦠꦶ ꦠꦺꦱꦁ ꦨꦶꦏ꧀ꦑꦹꦤꦁ ꦱꦤ꧀ꦠꦶꦏꦺ ꦮꦶꦪ ꦡꦺꦫꦱ꧀ꦱ ꦱꦩ꧀ꦩꦸꦑꦴ ꦥꦒ꧀ꦒꦪ꧀ꦲ ꦮꦠ꧀ꦠꦸꦁ ꦄꦱꦏ꧀ꦏꦺꦴꦤ꧀ꦠꦺꦴ ꦎꦭꦩ꧀ꦧꦤ꧀ꦠꦺꦤ ꦲꦢꦪꦺꦤ ‘‘ꦌꦮꦁꦧ꧀ꦪꦴꦑꦺꦴ’’ꦠꦶ ꦄꦴꦲ. ꦠꦁ ꦏꦶꦁ ꦩꦚ꧀ꦚꦱꦶ, ꦄꦴꦮꦸꦱꦺꦴꦠꦶ? ꦆꦢꦁ ꦡꦺꦫꦺꦴ ꦠꦱ꧀ꦱ ꦮꦕꦤꦁ ꦱꦸꦠ꧀ꦮꦴ, ‘‘ꦤꦴꦪꦁ ꦄꦠ꧀ꦠꦤꦺꦴ ꦭꦢ꧀ꦣꦶꦪꦁ ꦢꦺꦴꦱꦁ ꦥꦱ꧀ꦱꦠꦶ, ꦣꦩ꧀ꦩꦢꦺꦱꦤꦴꦪ ꦄꦱ꧀ꦱ ꦠꦁ ꦥꦴꦏꦛꦁ ꦏꦫꦶꦱ꧀ꦱꦴꦩꦷ’’ꦠꦶ ꦕꦶꦤ꧀ꦠꦺꦠ꧀ꦮꦴ ꦠꦶꦥꦫꦶꦮꦛ꧀ꦛꦁ ꦢꦺꦱꦤꦁ ꦢꦺꦱꦺꦠꦸꦁ ꦄꦴꦫꦨꦶ.

ꦠꦁ ꦏꦶꦁ ꦩꦚ꧀ꦚꦱꦶ, ꦄꦴꦮꦸꦱꦺꦴ ꦪꦩꦏ, ꦫꦹꦥꦁ ꦠꦡꦴꦒꦠꦺꦴꦠꦶ ꦆꦢꦁ ꦏꦱ꧀ꦩꦴ ꦄꦴꦫꦢ꧀ꦣꦁ? ꦄꦤꦸꦪꦺꦴꦒꦮꦠ꧀ꦠꦁ ꦢꦴꦥꦤꦠ꧀ꦡꦁ. ꦠꦶꦥꦫꦶꦮꦛ꧀ꦛꦢꦺꦱꦤꦴꦮꦱꦴꦤꦱ꧀ꦩꦶꦚ꧀ꦲꦶ ꦡꦺꦫꦺꦴ ꦱꦺꦴꦠꦴꦥꦤ꧀ꦤꦺꦴ ꦗꦴꦠꦺꦴ. ꦄꦡ ꦤꦁ ꦄꦤꦸꦪꦺꦴꦒꦮꦠ꧀ꦠꦁ ꦢꦴꦥꦺꦠꦸꦁ ‘‘ꦠꦁ ꦏꦶꦁ ꦩꦚ꧀ꦚꦱꦷ’’ꦠꦶꦄꦴꦢꦶꦩꦴꦲ? ꦠꦡꦴꦒꦠꦺꦴꦠꦶ ꦱꦠ꧀ꦠꦺꦴ. ꦫꦹꦥꦁ ꦮꦺꦢꦤꦴ ꦱꦚ꧀ꦚꦴ ꦱꦔ꧀ꦑꦴꦫꦴ ꦮꦶꦚ꧀ꦚꦴꦟꦤ꧀ꦠꦶ ꦆꦩꦺ ꦥꦚ꧀ꦕꦏ꧀ꦑꦤ꧀ꦣꦺ ꦱꦩ꧀ꦥꦶꦟ꧀ꦝꦺꦠ꧀ꦮꦴ ‘‘ꦠꦡꦴꦒꦠꦺꦴ’’ꦠꦶ ꦱꦩꦤꦸꦥꦱ꧀ꦱꦱꦷꦠꦶ ꦥꦸꦕ꧀ꦖꦠꦶ. ꦌꦠ꧀ꦡ ꦕ ꦠꦺ, ꦄꦴꦮꦸꦱꦺꦴꦠꦶ ꦆꦢꦁ ꦡꦺꦫꦱ꧀ꦱ ꦄꦤꦸꦪꦺꦴꦒꦺ ꦨꦸꦩ꧀ꦩꦁ. ꦆꦢꦁ ꦮꦸꦠ꧀ꦠꦁ ꦲꦺꦴꦠꦶ – ꦌꦠ꧀ꦡ ꦕ ꦠꦺ ꦌꦠ꧀ꦠꦏꦺ ꦜꦴꦤꦺ ꦢꦶꦛ꧀ꦜꦺꦮ ꦣꦩ꧀ꦩꦺ ꦱꦕ꧀ꦕꦠꦺꦴ ꦡꦶꦫꦠꦺꦴ ꦱꦠ꧀ꦠꦺ ꦄꦤꦸꦥꦭꦧ꧀ꦨꦶꦪꦩꦴꦤꦺꦠꦶ. ꦱꦕꦺ ꦠꦁ, ꦄꦴꦮꦸꦱꦺꦴꦠꦶ ꦆꦢꦩꦺꦠꦁ ꦄꦚ꧀ꦚꦁ ꦧ꧀ꦪꦴꦏꦫꦴꦥꦺꦠꦸꦏꦴꦩꦺꦴ ꦥꦸꦕ꧀ꦖꦠꦶ. ꦪꦁ ꦢꦸꦏ꧀ꦑꦁ ꦠꦁ ꦤꦶꦫꦸꦢ꧀ꦣꦤ꧀ꦠꦶ ꦪꦁ ꦢꦸꦏ꧀ꦑꦁ, ꦠꦢꦺꦮ ꦤꦶꦫꦸꦢ꧀ꦣꦁ, ꦄꦚ꧀ꦚꦺꦴ ꦱꦠ꧀ꦠꦺꦴ ꦤꦶꦫꦸꦗ꧀ꦙꦤꦏꦺꦴ ꦤꦴꦩ ꦤꦠ꧀ꦡꦶ, ꦌꦮꦁ ꦧ꧀ꦪꦴꦏꦫꦺꦪ꧀ꦪꦤ꧀ꦠꦶ ꦄꦠ꧀ꦡꦺꦴ.

ꦌꦠꦱ꧀ꦱꦺꦮ ꦄꦠ꧀ꦡꦱ꧀ꦱꦴꦠꦶ ꦌꦠꦱ꧀ꦱ ꦥꦜꦩꦩꦒ꧀ꦒꦱ꧀ꦱ. ꦨꦶꦪ꧀ꦪꦺꦴꦱꦺꦴꦩꦠ꧀ꦠꦴꦪ ꦚꦴꦟꦴꦪꦴꦠꦶ ꦄꦠꦶꦫꦺꦏꦥ꧀ꦥꦩꦴꦟꦱ꧀ꦱ ꦚꦴꦟꦱ꧀ꦱ ꦄꦠ꧀ꦡꦴꦪ, ꦱꦲꦮꦶꦥꦱ꧀ꦱꦤꦏꦴꦤꦁ ꦈꦥꦫꦶ ꦕ ꦠꦶꦟ꧀ꦟꦁ ꦩꦒ꧀ꦒꦴꦤꦁ ꦄꦴꦮꦶꦨꦴꦮꦠ꧀ꦡꦴꦪꦴꦠꦶ ꦄꦠ꧀ꦡꦺꦴ. ꦄꦴꦫꦏ꧀ꦑꦱꦩ꧀ꦥꦤ꧀ꦤꦺꦴꦠꦶ ꦄꦤ꧀ꦠꦺꦴꦄꦴꦫꦏ꧀ꦑꦺꦤ ꦕꦺꦮ ꦧꦲꦶꦄꦴꦫꦏ꧀ꦑꦺꦤ ꦕ ꦱꦩꦤ꧀ꦤꦴꦒꦠꦺꦴ. ꦄꦪꦺꦴꦒꦏ꧀ꦑꦺꦩꦏꦴꦩꦺꦴꦠꦶ ꦕꦠꦹꦲꦶ ꦪꦺꦴꦒꦺꦲꦶ ꦑꦺꦩꦨꦴꦮꦁ ꦄꦤꦶꦕ꧀ꦖꦤ꧀ꦠꦺꦴ. ꦥꦱꦪ꧀ꦲꦴꦠꦶ ꦥꦱꦪ꧀ꦲꦶꦠ꧀ꦮꦴ ꦄꦨꦶꦨꦮꦶꦠ꧀ꦮꦴ. ꦄꦤꦸꦥꦑꦗ꧀ꦗꦴꦠꦶ ꦄꦤꦸꦥꦮꦶꦱꦶꦠ꧀ꦮꦴ.

ꦥꦸꦧ꧀ꦧꦸꦛ꧀ꦜꦴꦪꦷꦠꦶꦄꦴꦢꦷꦱꦸ ꦢꦹꦫꦠꦺꦴꦮ ꦄꦴꦒꦕ꧀ꦖꦤ꧀ꦠꦁ ꦢꦶꦱ꧀ꦮꦴ ꦄꦴꦱꦤꦠꦺꦴ ꦥꦜꦩꦠꦫꦁ ꦮꦸꦛ꧀ꦜꦴꦠꦷꦠꦶ ꦥꦸꦧ꧀ꦧꦸꦛ꧀ꦜꦴꦪꦷ. ꦠꦱ꧀ꦱ ꦄꦴꦱꦤꦁ ꦢꦠ꧀ꦮꦴ ꦠꦱ꧀ꦩꦶꦁ ꦤꦶꦱꦶꦤ꧀ꦤꦺ ꦥꦕ꧀ꦖꦴ ꦤꦶꦥꦠꦠꦶ ꦤꦶꦱꦷꦢꦠꦷꦠꦶ, ꦥꦕ꧀ꦖꦴꦤꦶꦥꦴꦠꦷ. ꦥꦴꦠꦺꦴꦮ ꦮꦸꦛ꧀ꦜꦴꦪ ‘‘ꦌꦠ꧀ꦠꦏꦴ ꦏꦱꦶꦠꦸꦁ ꦒꦕ꧀ꦖꦡ, ꦌꦠ꧀ꦠꦏꦴ ꦮꦥꦶꦠꦸ’’ꦤ꧀ꦠꦶ ꦮꦴ ꦱꦧ꧀ꦧꦥꦜꦩꦁ ꦮꦸꦛ꧀ꦜꦴꦠꦷꦠꦶ ꦥꦸꦧ꧀ꦧꦸꦛ꧀ꦜꦴꦪꦷ. ꦱꦴꦪꦁ ꦱꦧ꧀ꦧꦺꦱꦸ ꦄꦠ꧀ꦠꦤꦺꦴ ꦄꦠ꧀ꦠꦤꦺꦴ ꦮꦱꦤꦛ꧀ꦜꦴꦤꦁ ꦒꦠꦺꦱꦸ ꦒꦺꦲꦱ꧀ꦱ ꦱꦩꦤ꧀ꦠꦠꦺꦴ ꦄꦴꦫꦏ꧀ꦑꦁ ꦱꦁꦮꦶꦣꦴꦪ ꦢ꧀ꦮꦴꦫꦴꦤꦶ ꦡꦏꦺꦠ꧀ꦮꦴ ꦱꦧ꧀ꦧꦥꦕ꧀ꦖꦴ ꦤꦶꦥꦗ꧀ꦗꦤꦠꦺꦴꦥꦶ ꦥꦕ꧀ꦖꦴꦤꦶꦥꦴꦠꦷ. ‘‘ꦏꦶꦁ ꦏꦫꦺꦴꦩꦶ, ꦄꦪ꧀ꦪꦥꦸꦠ꧀ꦠ? ꦏꦶꦁ ꦏꦫꦺꦴꦩꦶ ꦄꦪ꧀ꦪꦥꦸꦠ꧀ꦠꦴ’’ꦠꦶ? ꦩꦸꦑꦁ ꦎꦭꦺꦴꦏꦺꦤ꧀ꦠꦺꦴ ꦏꦶꦁꦏꦴꦫꦁ ꦥꦛꦶꦱꦴꦮꦺꦠꦷꦠꦶ ꦏꦶꦁꦏꦴꦫꦥꦛꦶꦱ꧀ꦱꦴꦮꦷ. ꦩꦤꦴꦥꦁ ꦕꦫꦠꦷꦠꦶ ꦩꦤꦴꦥꦕꦴꦫꦷ. ꦥꦶꦪꦁ ꦮꦢꦠꦷꦠꦶ ꦥꦶꦪꦮꦴꦢꦷ. ꦩꦶꦠ꧀ꦠꦠꦺꦴꦥꦶ ꦤꦁ ꦱꦢ꧀ꦢꦲꦺꦪ꧀ꦪꦴꦠꦶ ꦩꦶꦠ꧀ꦠꦺꦴ ꦩꦺ ꦄꦪꦤ꧀ꦠꦶ ꦱꦢ꧀ꦢꦲꦺꦪ꧀ꦪ. ꦮꦶꦱ꧀ꦱꦴꦱꦁ ꦄꦴꦥꦗ꧀ꦗꦺꦪ꧀ꦪꦴꦠꦶ ꦌꦏꦠꦺꦴ ꦥꦴꦤꦨꦺꦴꦗꦤꦴꦢꦶꦁ ꦏꦫꦺꦴꦤ꧀ꦠꦺꦴ ꦮꦶꦱ꧀ꦱꦴꦱꦶꦏꦺꦴ ꦨꦮꦺꦪ꧀ꦪ. ꦱꦁꦮꦶꦱ꧀ꦱꦠ꧀ꦡꦺꦴꦠꦶ ꦱꦸꦛ꧀ꦜꦸ ꦮꦶꦱ꧀ꦱꦠ꧀ꦡꦺꦴ.

ꦌꦮꦩꦺꦮ ꦑꦺꦴꦠꦶ ꦌꦠ꧀ꦡ ꦆꦢꦁ ꦎꦥꦩ꧀ꦩꦱꦁꦱꦤ꧀ꦢꦤꦁ – ꦧꦴꦭꦒꦲꦥꦠꦶꦥꦸꦠ꧀ꦠꦺꦴ ꦮꦶꦪ ꦲꦶ ꦮꦛ꧀ꦛꦱꦤ꧀ꦤꦶꦱ꧀ꦱꦶꦠꦏꦴꦭꦺ ꦄꦱ꧀ꦱꦸꦠꦮꦴ ꦥꦸꦡꦸꦗ꧀ꦗꦤꦺꦴ, ꦮꦣꦏꦥꦕ꧀ꦕꦴꦩꦶꦠ꧀ꦠꦺꦴ ꦮꦶꦪ ꦄꦧꦭꦢꦸꦧ꧀ꦧꦭꦴ ꦥꦚ꧀ꦕꦏ꧀ꦑꦤ꧀ꦣꦴ, ꦮꦣꦏꦥꦕ꧀ꦕꦴꦩꦶꦠ꧀ꦠꦱ꧀ꦱ ‘‘ꦧꦴꦭꦒꦲꦥꦠꦶꦥꦸꦠ꧀ꦠꦁ ꦈꦥꦛ꧀ꦜꦲꦶꦱ꧀ꦱꦴꦩꦷ’’ꦠꦶ ꦈꦥꦒꦠꦏꦴꦭꦺꦴ ꦮꦶꦪ ꦥꦛꦶꦱꦤ꧀ꦣꦶꦏ꧀ꦑꦟꦺ ꦈꦥꦒꦠꦴ ꦥꦚ꧀ꦕꦏ꧀ꦑꦤ꧀ꦣꦴ, ꦠꦱ꧀ꦱ ꦲꦶ ‘‘ꦤ ꦩꦺ ꦄꦪꦁ ꦱꦲꦴꦪꦺꦴ, ꦮꦣꦏꦥꦕ꧀ꦕꦠ꧀ꦡꦶꦏꦺꦴ ꦄꦪ’’ꦤ꧀ꦠꦶ ꦄꦗꦴꦤꦤꦏꦴꦭꦺꦴ ꦮꦶꦪ ꦮꦛ꧀ꦛꦤꦶꦱ꧀ꦱꦶꦠꦥꦸꦡꦸꦗ꧀ꦗꦤꦱ꧀ꦱ ꦥꦚ꧀ꦕꦏ꧀ꦑꦤ꧀ꦣꦺ ‘‘ꦤ ꦆꦩꦺ ꦩꦪ꧀ꦲ’’ꦤ꧀ꦠꦶ ꦄꦒꦲꦺꦠ꧀ꦮꦴ ‘‘ꦩꦩ ꦫꦹꦥꦁ, ꦩꦩ ꦮꦺꦢꦤꦴ, ꦩꦩ ꦱꦚ꧀ꦚꦴ, ꦩꦩ ꦱꦔ꧀ꦑꦴꦫꦴ, ꦩꦩ ꦮꦶꦚ꧀ꦚꦴꦟ’’ꦤ꧀ꦠꦶ ꦒꦲꦶꦠꦏꦴꦭꦺꦴ, ꦮꦣꦏꦥꦕ꧀ꦕꦠ꧀ꦡꦶꦏꦱ꧀ꦱ ‘‘ꦩꦶꦠ꧀ꦠꦺꦴ ꦩꦺ ꦄꦪ’’ꦤ꧀ꦠꦶ ꦒꦲꦺꦠ꧀ꦮꦴ ꦱꦏ꧀ꦏꦴꦫꦏꦫꦟꦏꦴꦭꦺꦴ ꦮꦶꦪ ‘‘ꦩꦩ ꦆꦩꦺ’’ꦠꦶ ꦒꦲꦺꦠ꧀ꦮꦴ ꦥꦚ꧀ꦕꦤ꧀ꦤꦁ ꦑꦤ꧀ꦣꦴꦤꦁ ꦤ꧀ꦲꦴꦥꦤꦨꦺꦴꦗꦤꦴꦢꦷꦲꦶ ꦱꦏ꧀ꦏꦴꦫꦏꦫꦟꦏꦴꦭꦺꦴ, ‘‘ꦄꦠꦶꦮꦶꦱ꧀ꦱꦠ꧀ꦡꦺꦴ ꦩꦺ ꦄꦪ’’ꦤ꧀ꦠꦶ ꦚꦠ꧀ꦮꦴ ꦱꦏ꧀ꦏꦴꦫꦁ ꦏꦫꦺꦴꦤ꧀ꦠꦱ꧀ꦱꦺꦮ ꦄꦱꦶꦤꦴ ꦱꦷꦱꦕ꧀ꦖꦶꦤ꧀ꦢꦤꦁ ꦮꦶꦪ ꦮꦶꦱ꧀ꦱꦠ꧀ꦡꦱ꧀ꦱ ꦧꦴꦭꦥꦸꦡꦸꦗ꧀ꦗꦤꦱ꧀ꦱ ꦠꦶꦑꦶꦟꦺꦲꦶ ꦨꦶꦗ꧀ꦗꦩꦴꦤꦺꦲꦶ ꦑꦤ꧀ꦣꦺꦲꦶ ꦗꦷꦮꦶꦠꦥꦫꦶꦪꦴꦢꦴꦤꦁ ꦮꦺꦢꦶꦠꦧ꧀ꦧꦁ.

ꦈꦥꦺꦠꦷꦠꦶ ꦈꦥꦒꦕ꧀ꦖꦠꦶ. ꦈꦥꦴꦢꦶꦪꦠꦷꦠꦶ ꦒꦟ꧀ꦲꦴꦠꦶ. ꦄꦣꦶꦛ꧀ꦜꦴꦠꦷꦠꦶ ꦄꦣꦶꦠꦶꦛ꧀ꦜꦠꦶ. ꦄꦠ꧀ꦠꦴ ꦩꦺꦠꦶ ꦄꦪꦁ ꦩꦺ ꦄꦠ꧀ꦠꦴꦠꦶ. ꦱꦸꦠꦮꦴ ꦕ ꦑꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴꦠꦶ ꦪꦡꦴ ꦥꦤ ꦥꦟ꧀ꦝꦶꦠꦺꦴ ꦒꦲꦥꦠꦶꦥꦸꦠ꧀ꦠꦺꦴ ꦌꦮꦁ ꦈꦥꦒꦠꦁ ꦥꦕ꧀ꦕꦠ꧀ꦡꦶꦏꦁ ‘‘ꦥꦕ꧀ꦕꦠ꧀ꦡꦶꦏꦺꦴ ꦩꦺ ꦄꦪ’’ꦤ꧀ꦠꦶ ꦚꦠ꧀ꦮꦴ ꦄꦥ꧀ꦥꦩꦠ꧀ꦠꦺꦴ ꦠꦴꦤꦶ ꦠꦴꦤꦶ ꦏꦩ꧀ꦩꦴꦤꦶ ꦏꦴꦫꦺꦠ꧀ꦮꦴ ꦄꦤꦠ꧀ꦡꦁ ꦥꦫꦶꦲꦫꦠꦶ, ꦄꦠ꧀ꦡꦁ ꦥꦴꦥꦸꦟꦴꦠꦶ, ꦌꦮꦁ ꦱꦸꦠꦮꦴ ꦄꦫꦶꦪꦱꦴꦮꦏꦺꦴꦥꦶ ‘‘ꦤ ꦫꦹꦥꦁ ꦄꦠ꧀ꦠꦠꦺꦴ ꦱꦩꦤꦸꦥꦱ꧀ꦱꦠꦷ’’ꦠꦶꦄꦴꦢꦶꦤꦴ ꦤꦪꦺꦤ ꦥꦚ꧀ꦕꦏ꧀ꦑꦤ꧀ꦣꦺ ꦄꦲꦤ꧀ꦠꦶ ꦮꦴ ꦩꦩꦤ꧀ꦠꦶ ꦮꦴ ꦄꦒꦲꦺꦠ꧀ꦮꦴ, ‘‘ꦥꦕ꧀ꦕꦠ꧀ꦡꦶꦏꦴ ꦩꦺ ꦌꦠꦺ’’ꦠꦶ ꦚꦠ꧀ꦮꦴ ꦫꦹꦥꦱꦠ꧀ꦠꦏꦄꦫꦹꦥꦱꦠ꧀ꦠꦏꦴꦢꦶꦮꦱꦺꦤ ꦮꦶꦥꦱ꧀ꦱꦤꦴꦪ ꦪꦺꦴꦗꦺꦠ꧀ꦮꦴꦮ ꦠꦠꦺꦴꦤꦶꦢꦴꦤꦁ ꦢꦸꦏ꧀ꦑꦁ ꦥꦫꦶꦮꦗ꧀ꦗꦺꦠ꧀ꦮꦴ ꦄꦒ꧀ꦒꦦꦭꦁ ꦄꦫꦲꦠ꧀ꦠꦁ ꦥꦴꦥꦸꦟꦴꦠꦶ. ꦱꦺꦱꦩꦺꦠ꧀ꦡ ꦈꦠ꧀ꦠꦴꦤꦩꦺꦮ. ꦠꦠꦶꦪꦁ.