꧘. ꦏꦺꦴꦱꦩ꧀ꦧꦶꦱꦸꦠ꧀ꦠꦮꦟ꧀ꦟꦤꦴ

꧖꧘. ꦄꦛ꧀ꦜꦩꦺ ꦄꦚ꧀ꦚꦠ꧀ꦫꦺꦮꦴꦠꦶ ꦌꦏꦕ꧀ꦕꦺꦴ ꦲꦶ ꦥꦫꦱ꧀ꦱ ꦱꦢ꧀ꦢꦲꦶꦠ꧀ꦮꦴ ꦪꦁ ꦌꦱ ꦨꦟꦠꦶ, ꦠꦁ ꦨꦹꦠꦤ꧀ꦠꦶ ꦒꦟ꧀ꦲꦴꦠꦶ. ꦄꦥꦫꦱ꧀ꦱ ꦤꦶꦱꦷꦢꦶꦠ꧀ꦮꦴ ꦕꦶꦤ꧀ꦠꦺꦤ꧀ꦠꦱ꧀ꦱ ꦪꦁ ꦏꦴꦫꦟꦁ ꦫꦸꦕ꧀ꦕꦠꦶ, ꦱꦺꦴ ‘‘ꦄꦠ꧀ꦡꦶ ꦌꦠ’’ꦤ꧀ꦠꦶ ꦫꦸꦕꦶꦪꦴ ꦒꦟ꧀ꦲꦴꦠꦶ. ꦌꦏꦺꦴ ‘‘ꦕꦶꦫꦏꦴꦭꦠꦺꦴ ꦥꦛ꧀ꦜꦴꦪ ꦌꦮꦁ ꦄꦤꦸꦱ꧀ꦱꦮꦺꦴ ꦄꦠ꧀ꦡꦶ, ꦨꦹꦠꦩꦺꦠ’’ꦤ꧀ꦠꦶ ꦄꦤꦸꦱ꧀ꦱꦮꦺꦤ ꦒꦟ꧀ꦲꦴꦠꦶ. ꦄꦚ꧀ꦚꦱ꧀ꦱ ꦮꦶꦠꦏ꧀ꦏꦪꦠꦺꦴ ꦌꦏꦁ ꦏꦴꦫꦟꦁ ꦈꦥꦛ꧀ꦜꦴꦠꦶ, ꦱꦺꦴ ‘‘ꦄꦠ꧀ꦡꦺꦠ’’ꦤ꧀ꦠꦶ ꦄꦴꦏꦴꦫꦥꦫꦶꦮꦶꦠꦏ꧀ꦏꦺꦤ ꦒꦟ꧀ꦲꦴꦠꦶ. ꦄꦥꦫꦱ꧀ꦱ ꦕꦶꦤ꧀ꦠꦪꦠꦺꦴ ꦌꦏꦴ ꦢꦶꦛ꧀ꦜꦶ ꦈꦥ꧀ꦥꦗ꧀ꦗꦠꦶ, ꦪꦴꦪꦱ꧀ꦱ ꦠꦁ ꦏꦴꦫꦟꦁ ꦤꦶꦗ꧀ꦙꦴꦪꦤ꧀ꦠꦱ꧀ꦱ ꦑꦩꦠꦶ, ꦱꦺꦴ ‘‘ꦄꦠ꧀ꦡꦺꦠ’’ꦤ꧀ꦠꦶ ꦢꦶꦛ꧀ꦜꦶꦤꦶꦗ꧀ꦙꦴꦤꦏ꧀ꦑꦤ꧀ꦠꦶꦪꦴ ꦒꦟ꧀ꦲꦴꦠꦶ. ꦡꦺꦫꦺꦴ ꦥꦤ ꦥꦚ꧀ꦕꦥꦶ ꦌꦠꦴꦤꦶ ꦏꦴꦫꦟꦴꦤꦶ ꦥꦛꦶꦏ꧀ꦑꦶꦥꦶꦠ꧀ꦮꦴ ꦥꦕ꧀ꦕꦏ꧀ꦑꦚꦴꦟꦺꦤ ꦥꦛꦶꦮꦶꦢ꧀ꦣꦨꦴꦮꦁ ꦥꦸꦕ꧀ꦖꦤ꧀ꦠꦺꦴ ꦄꦚ꧀ꦚꦠ꧀ꦫꦺꦮ, ꦄꦴꦮꦸꦱꦺꦴ ꦩꦸꦱꦶꦭ, ꦱꦢ꧀ꦣꦴꦪꦴꦠꦶꦄꦴꦢꦶꦩꦴꦲ. ꦠꦠ꧀ꦡ ꦄꦚ꧀ꦚꦠ꧀ꦫꦺꦮꦴꦠꦶ ꦱꦢ꧀ꦣꦴꦢꦷꦤꦶ ꦏꦴꦫꦟꦴꦤꦶ ꦜꦥꦺꦠ꧀ꦮꦴ, ꦮꦶꦤꦴ ꦌꦠꦺꦲꦶ ꦏꦴꦫꦟꦺꦲꦷꦠꦶ ꦄꦠ꧀ꦡꦺꦴ. ꦨꦮꦤꦶꦫꦺꦴꦣꦺꦴ ꦤꦶꦧ꧀ꦧꦴꦤꦤ꧀ꦠꦶ ꦥꦚ꧀ꦕꦏ꧀ꦑꦤ꧀ꦣꦤꦶꦫꦺꦴꦣꦺꦴ ꦤꦶꦧ꧀ꦧꦴꦤꦁ.

ꦠꦸꦟ꧀ꦲꦷ ꦄꦲꦺꦴꦱꦷꦠꦶ ꦡꦺꦫꦺꦴ ꦑꦷꦟꦴꦱꦮꦺꦴ, ꦄꦲꦁ ꦥꦤ ꦑꦷꦟꦴꦱꦮꦺꦴꦠꦶ ꦮꦴ ꦤ ꦮꦴꦠꦶ ꦮꦴ ꦄꦮꦠ꧀ꦮꦴ ꦠꦸꦟ꧀ꦲꦷꦪꦺꦮ ꦄꦲꦺꦴꦱꦶ. ꦄꦴꦪꦱ꧀ꦩꦴ ꦤꦴꦫꦢꦺꦴ ꦄꦴꦪꦱ꧀ꦩꦤ꧀ꦠꦁ ꦥꦮꦶꦛ꧀ꦜꦁ ꦌꦠꦢꦮꦺꦴꦕꦴꦠꦶ ꦏꦱ꧀ꦩꦴ ꦄꦮꦺꦴꦕ? ꦱꦺꦴ ꦏꦶꦫ ꦕꦶꦤ꧀ꦠꦺꦱꦶ – ‘‘ꦨꦮꦤꦶꦫꦺꦴꦣꦺꦴ ꦤꦶꦧ꧀ꦧꦴꦤꦁ ꦤꦴꦩꦴꦠꦶ ꦱꦺꦑꦺꦲꦶꦥꦶ ꦗꦴꦤꦶꦠꦧ꧀ꦧꦺꦴ ꦥꦚ꧀ꦲꦺꦴ ꦌꦱ, ꦄꦪꦁ ꦥꦤ ꦡꦺꦫꦺꦴ ꦆꦩꦁ ꦡꦺꦫꦁ ꦄꦱꦺꦑꦨꦹꦩꦶꦪꦴ ꦏꦴꦫꦺꦠꦶ, ꦆꦩꦁ ꦜꦴꦤꦁ ꦗꦴꦤꦴꦥꦺꦱ꧀ꦱꦴꦩꦷ’’ꦠꦶ ꦌꦠꦁ ꦄꦮꦺꦴꦕ.

ꦱꦩ꧀ꦩꦥ꧀ꦥꦚ꧀ꦚꦴꦪ ꦱꦸꦢꦶꦛ꧀ꦜꦤ꧀ꦠꦶ ꦱꦲ ꦮꦶꦥꦱ꧀ꦱꦤꦴꦪ ꦩꦒ꧀ꦒꦥꦚ꧀ꦚꦴꦪ ꦱꦸꦛ꧀ꦜꦸ ꦢꦶꦛ꧀ꦜꦁ. ꦤ ꦕꦩ꧀ꦲꦶ ꦄꦫꦲꦤ꧀ꦠꦶ ꦄꦤꦴꦒꦴꦩꦶꦩꦒ꧀ꦒꦺ ꦜꦶꦠꦠ꧀ꦠꦴ ꦄꦫꦲꦁ ꦤ ꦲꦺꦴꦩꦷꦠꦶ ꦢꦷꦥꦺꦠꦶ. ꦪꦁ ꦥꦤꦱ꧀ꦱ ꦆꦢꦴꦤꦶ ‘‘ꦨꦮꦤꦶꦫꦺꦴꦣꦺꦴ ꦤꦶꦧ꧀ꦧꦴꦤ’’ꦤ꧀ꦠꦶ ꦚꦴꦟꦁ, ꦠꦁ ꦌꦏꦹꦤꦮꦷꦱꦠꦶꦪꦴ ꦥꦕ꧀ꦕꦮꦺꦏ꧀ꦑꦟꦚꦴꦟꦺꦲꦶ ꦮꦶꦩꦸꦠ꧀ꦠꦁ ꦥꦕ꧀ꦕꦮꦺꦏ꧀ꦑꦟꦚꦴꦟꦁ. ꦈꦢꦥꦴꦤꦺꦴꦠꦶ ꦮꦷꦱꦠꦶꦁꦱꦲꦠ꧀ꦡꦒꦩ꧀ꦨꦷꦫꦺꦴ ꦥꦴꦤꦷꦪꦏꦹꦥꦺꦴ. ꦈꦢꦏꦮꦴꦫꦏꦺꦴꦠꦶ ꦈꦢꦏꦈꦱ꧀ꦱꦶꦚ꧀ꦕꦤꦮꦴꦫꦏꦺꦴ. ꦈꦢꦏꦤ꧀ꦠꦶ ꦲꦶ ꦑꦺꦴ ꦚꦴꦟꦁ ꦄꦱ꧀ꦱꦴꦠꦶ ꦠꦷꦫꦺ ꦜꦶꦠꦱ꧀ꦱ ꦎꦭꦺꦴꦏꦪꦠꦺꦴ ꦌꦮꦁ ꦚꦴꦟꦁ ꦨꦮꦺꦪ꧀ꦪ. ꦤ ꦕ ꦏꦴꦪꦺꦤ ꦦꦸꦱꦶꦠ꧀ꦮꦴꦠꦶ ꦈꦢꦏꦁ ꦥꦤ ꦤꦷꦲꦫꦶꦠ꧀ꦮꦴ ꦏꦴꦪꦺꦤ ꦦꦸꦱꦶꦠ꧀ꦮꦴ ꦮꦶꦲꦫꦶꦠꦸꦁ ꦤ ꦱꦏ꧀ꦏꦸꦟꦺꦪ꧀ꦪ. ꦈꦢꦥꦴꦤꦺ ꦈꦢꦏꦢꦱ꧀ꦱꦤꦁ ꦮꦶꦪ ꦲꦶ ꦄꦤꦴꦒꦴꦩꦶꦤꦺꦴ ꦤꦶꦧ꧀ꦧꦴꦤꦢꦱ꧀ꦱꦤꦁ, ꦓꦩ꧀ꦩꦴꦨꦶꦠꦠ꧀ꦠꦥꦸꦫꦶꦱꦺꦴ ꦮꦶꦪ ꦄꦤꦴꦒꦴꦩꦷ, ꦈꦢꦏꦮꦴꦫꦏꦺꦴ ꦮꦶꦪ ꦄꦫꦲꦠ꧀ꦠꦩꦒ꧀ꦒꦺꦴ, ꦪꦡꦴ ꦓꦩ꧀ꦩꦴꦨꦶꦠꦠ꧀ꦠꦥꦸꦫꦶꦱꦺꦴ ꦈꦢꦥꦴꦤꦺ ꦈꦢꦏꦁ ꦥꦱ꧀ꦱꦠꦶ. ꦌꦮꦁ ꦄꦤꦴꦒꦴꦩꦷ ꦥꦕ꧀ꦕꦮꦺꦏ꧀ꦑꦟꦚꦴꦟꦺꦤ ‘‘ꦈꦥꦫꦶ ꦄꦫꦲꦠ꧀ꦠꦦꦭꦱꦩꦪꦺꦴ ꦤꦴꦩ ꦄꦠ꧀ꦡꦷ’’ꦠꦶ ꦗꦴꦤꦴꦠꦶ. ꦪꦡꦴ ꦥꦤ ꦱꦺꦴ ꦥꦸꦫꦶꦱꦺꦴ ꦈꦢꦏꦮꦴꦫꦏꦱ꧀ꦱ ꦤꦠ꧀ꦡꦶꦠꦴꦪ ꦈꦢꦏꦁ ꦤꦷꦲꦫꦶꦠ꧀ꦮꦴ ꦏꦴꦪꦺꦤ ꦦꦸꦱꦶꦠꦸꦁ ꦤ ꦭꦨꦠꦶ, ꦌꦮꦁ ꦄꦤꦴꦒꦴꦩꦷ ꦄꦫꦲꦠ꧀ꦠꦩꦒ꧀ꦒꦱ꧀ꦱ ꦤꦠ꧀ꦡꦶꦠꦴꦪ ꦤꦶꦧ꧀ꦧꦴꦤꦁ ꦄꦴꦫꦩ꧀ꦩꦟꦁ ꦏꦠ꧀ꦮꦴ ꦄꦫꦲꦠ꧀ꦠꦦꦭꦱꦩꦴꦥꦠ꧀ꦠꦶꦁ ꦄꦥ꧀ꦥꦺꦠ꧀ꦮꦴ ꦤꦶꦱꦷꦢꦶꦠꦸꦁ ꦤ ꦭꦨꦠꦶ. ꦄꦛ꧀ꦜꦩꦁ.