꧔. ꦄꦠ꧀ꦡꦶꦫꦴꦒꦱꦸꦠ꧀ꦠꦮꦟ꧀ꦟꦤꦴ

꧖꧔. ꦕꦠꦸꦠ꧀ꦡꦺ ꦫꦴꦒꦺꦴꦠꦶꦄꦴꦢꦷꦤꦶ ꦭꦺꦴꦨꦱ꧀ꦱꦺꦮ ꦤꦴꦩꦴꦤꦶ. ꦱꦺꦴ ꦲꦶ ꦫꦚ꧀ꦗꦤꦮꦱꦺꦤ ꦫꦴꦒꦺꦴ, ꦤꦤ꧀ꦢꦤꦮꦱꦺꦤ ꦤꦤ꧀ꦢꦷ, ꦠꦟ꧀ꦲꦴꦪꦤꦮꦱꦺꦤ ꦠꦟ꧀ꦲꦴꦠꦶ ꦮꦸꦕ꧀ꦕꦠꦶ. ꦥꦠꦶꦛ꧀ꦜꦶꦠꦁ ꦠꦠ꧀ꦡ ꦮꦶꦚ꧀ꦚꦴꦟꦁ ꦮꦶꦫꦹꦭ꦳꧀ꦲꦤ꧀ꦠꦶ ꦏꦩ꧀ꦩꦁ ꦗꦮꦴꦥꦺꦠ꧀ꦮꦴ ꦥꦛꦶꦱꦤ꧀ꦣꦶꦄꦴꦏꦝ꧀ꦞꦤꦱꦩꦠ꧀ꦡꦠꦴꦪ ꦥꦠꦶꦛ꧀ꦜꦶꦠꦚ꧀ꦕꦺꦮ ꦮꦶꦫꦹꦭ꦳꧀ꦲꦚ꧀ꦕ. ꦪꦠ꧀ꦡꦴꦠꦶ ꦠꦺꦨꦹꦩꦏꦮꦛ꧀ꦛꦺ ꦨꦸꦩ꧀ꦩꦁ, ꦱꦧ꧀ꦧꦠ꧀ꦡ ꦮꦴ ꦥꦸꦫꦶꦩꦥꦸꦫꦶꦩꦥꦢꦺ ꦌꦠꦁ ꦨꦸꦩ꧀ꦩꦁ. ꦄꦠ꧀ꦡꦶ ꦠꦠ꧀ꦡ ꦱꦔ꧀ꦑꦴꦫꦴꦤꦁ ꦮꦸꦢ꧀ꦣꦷꦠꦶ ꦆꦢꦁ ꦆꦩꦱ꧀ꦩꦶꦁ ꦮꦶꦥꦴꦏꦮꦛ꧀ꦛꦺ ꦜꦶꦠꦱ꧀ꦱ ꦄꦴꦪꦠꦶꦮꦛ꧀ꦛꦲꦺꦠꦸꦏꦺ ꦱꦔ꧀ꦑꦴꦫꦺ ꦱꦤ꧀ꦣꦴꦪ ꦮꦸꦠ꧀ꦠꦁ. ꦪꦠ꧀ꦡ ꦄꦠ꧀ꦡꦶ ꦄꦴꦪꦠꦶꦁ ꦥꦸꦤꦧ꧀ꦨꦮꦴꦨꦶꦤꦶꦧ꧀ꦧꦠ꧀ꦠꦷꦠꦶ ꦪꦱ꧀ꦩꦶꦁ ꦜꦴꦤꦺ ꦄꦴꦪꦠꦶꦁ ꦥꦸꦤꦧ꧀ꦨꦮꦴꦨꦶꦤꦶꦧ꧀ꦧꦠ꧀ꦠꦶ ꦄꦠ꧀ꦡꦶ.

ꦌꦮꦩꦺꦮ ꦑꦺꦴꦠꦶ ꦌꦠ꧀ꦡ ꦆꦢꦁ ꦎꦥꦩ꧀ꦩꦱꦁꦱꦤ꧀ꦢꦤꦁ – ꦫꦗꦏꦕꦶꦠ꧀ꦠꦏꦴꦫꦴ ꦮꦶꦪ ꦲꦶ ꦱꦲꦏꦩ꧀ꦩꦱꦩ꧀ꦨꦴꦫꦁ ꦏꦩ꧀ꦩꦁ, ꦦꦭꦏꦨꦶꦠ꧀ꦠꦶꦢꦸꦱ꧀ꦱꦥꦛꦴ ꦮꦶꦪ ꦠꦺꦨꦹꦩꦏꦮꦛ꧀ꦛꦁ. ꦪꦡꦴ ꦫꦗꦏꦕꦶꦠ꧀ꦠꦏꦴꦫꦴ ꦥꦫꦶꦱꦸꦢ꧀ꦣꦺꦱꦸ ꦦꦭꦏꦴꦢꦷꦱꦸ ꦫꦹꦥꦁ ꦱꦩꦸꦛ꧀ꦜꦴꦥꦺꦤ꧀ꦠꦶ, ꦌꦮꦩꦺꦮ ꦱꦱꦩ꧀ꦨꦴꦫꦏꦏꦩ꧀ꦩꦁ ꦨꦮꦺꦱꦸ ꦫꦹꦥꦁ ꦱꦩꦸꦛ꧀ꦜꦴꦥꦺꦠꦶ. ꦠꦠ꧀ꦡ ꦪꦡꦴ ꦄꦏꦸꦱꦭꦺꦤ ꦕꦶꦠ꧀ꦠꦏꦴꦫꦺꦤ ꦱꦩꦸꦛ꧀ꦜꦴꦥꦶꦠꦁ ꦫꦹꦥꦁ ꦮꦶꦫꦹꦥꦁ ꦲꦺꦴꦠꦶ ꦢꦸꦱ꧀ꦱꦟ꧀ꦜꦶꦠꦁ ꦄꦩꦤꦴꦥꦁ, ꦌꦮꦩꦺꦮ ꦌꦏꦕ꧀ꦕꦺꦴ ꦏꦩ꧀ꦩꦁ ꦏꦫꦺꦴꦤ꧀ꦠꦺꦴ ꦚꦴꦟꦮꦶꦥ꧀ꦥꦪꦸꦠ꧀ꦠꦺꦤ ꦕꦶꦠ꧀ꦠꦺꦤ ꦏꦫꦺꦴꦠꦶ, ꦠꦁ ꦏꦩ꧀ꦩꦁ ꦫꦹꦥꦁ ꦱꦩꦸꦛ꧀ꦜꦴꦥꦺꦤ꧀ꦠꦁ ꦕꦏ꧀ꦑꦴꦢꦷꦤꦁ ꦱꦩ꧀ꦥꦠ꧀ꦠꦶꦁ ꦄꦢꦠ꧀ꦮꦴ ꦢꦸꦧ꧀ꦧꦟ꧀ꦟꦁ ꦢꦸꦱ꧀ꦱꦟ꧀ꦜꦶꦠꦁ ꦩꦴꦠꦴꦥꦶꦠꦹꦤꦩ꧀ꦥꦶ ꦄꦩꦤꦴꦥꦁ ꦫꦹꦥꦁ ꦱꦩꦸꦛ꧀ꦜꦴꦥꦺꦠꦶ. ꦪꦡꦴ ꦥꦤ ꦏꦸꦱꦭꦺꦤ ꦕꦶꦠ꧀ꦠꦏꦴꦫꦺꦤ ꦱꦩꦸꦛ꧀ꦜꦴꦥꦶꦠꦁ ꦫꦹꦥꦁ ꦱꦸꦫꦹꦥꦁ ꦲꦺꦴꦠꦶ ꦱꦸꦱꦟ꧀ꦜꦶꦠꦁ ꦩꦤꦴꦥꦁ, ꦌꦮꦩꦺꦮ ꦌꦏꦕ꧀ꦕꦺꦴ ꦏꦩ꧀ꦩꦁ ꦏꦫꦺꦴꦤ꧀ꦠꦺꦴ ꦚꦴꦟꦱꦩ꧀ꦥꦪꦸꦠ꧀ꦠꦺꦤ ꦕꦶꦠ꧀ꦠꦺꦤ ꦏꦫꦺꦴꦠꦶ, ꦠꦁ ꦏꦩ꧀ꦩꦁ ꦫꦹꦥꦁ ꦱꦩꦸꦛ꧀ꦜꦴꦥꦺꦤ꧀ꦠꦁ ꦕꦏ꧀ꦑꦴꦢꦷꦤꦁ ꦱꦩ꧀ꦥꦠ꧀ꦠꦶꦁ ꦢꦠ꧀ꦮꦴ ꦱꦸꦮꦟ꧀ꦟꦁ ꦱꦸꦱꦟ꧀ꦜꦶꦠꦁ ꦄꦭꦔ꧀ꦏꦠꦥꦛꦶꦪꦠ꧀ꦠꦁ ꦮꦶꦪ ꦫꦹꦥꦁ ꦱꦩꦸꦛ꧀ꦜꦴꦥꦺꦠꦶ.

ꦌꦠ꧀ꦡ ꦕ ꦄꦴꦲꦴꦫꦁ ꦮꦶꦚ꧀ꦚꦴꦟꦺꦤ ꦱꦢ꧀ꦣꦶꦁ ꦱꦔ꧀ꦑꦶꦥꦶꦠ꧀ꦮꦴ ꦄꦴꦲꦴꦫꦤꦴꦩꦫꦹꦥꦴꦤꦁ ꦄꦤ꧀ꦠꦫꦺ ꦌꦏꦺꦴ ꦱꦤ꧀ꦣꦶ, ꦮꦶꦥꦴꦏꦮꦶꦣꦶꦁ ꦤꦴꦩꦫꦹꦥꦺꦤ ꦱꦔ꧀ꦑꦶꦥꦶꦠ꧀ꦮꦴ ꦤꦴꦩꦫꦹꦥꦱꦔ꧀ꦑꦴꦫꦴꦤꦁ ꦄꦤ꧀ꦠꦫꦺ ꦌꦏꦺꦴ ꦱꦤ꧀ꦣꦶ, ꦱꦔ꧀ꦑꦴꦫꦴꦤꦚ꧀ꦕ ꦄꦴꦪꦠꦶꦨꦮꦱ꧀ꦱ ꦕ ꦄꦤ꧀ꦠꦫꦺ ꦌꦏꦺꦴ ꦱꦤ꧀ꦣꦷꦠꦶ ꦮꦺꦢꦶꦠꦧ꧀ꦧꦺꦴ.

ꦏꦹꦛꦴꦒꦴꦫꦤ꧀ꦠꦶ ꦌꦏꦏꦟ꧀ꦟꦶꦏꦁ ꦒꦴꦲꦴꦥꦺꦠ꧀ꦮꦴ ꦏꦠꦁ ꦄꦒꦴꦫꦁ. ꦏꦹꦛꦴꦒꦴꦫꦱꦴꦭꦴꦠꦶ ꦢ꧀ꦮꦺ ꦏꦟ꧀ꦟꦶꦏꦺ ꦒꦲꦺꦠ꧀ꦮꦴ ꦏꦠꦱꦴꦭꦴ. ꦌꦮꦩꦺꦮ ꦑꦺꦴꦠꦶ ꦌꦠ꧀ꦡ ꦑꦷꦟꦴꦱꦮꦱ꧀ꦱ ꦏꦩ꧀ꦩꦁ ꦱꦹꦫꦶꦪꦫꦱ꧀ꦩꦶꦱꦩꦁ ꦮꦺꦢꦶꦠꦧ꧀ꦧꦁ. ꦱꦹꦫꦶꦪꦫꦱ꧀ꦩꦶ ꦥꦤ ꦄꦠ꧀ꦡꦶ, ꦱꦴ ꦏꦺꦮꦭꦁ ꦥꦠꦶꦛ꧀ꦜꦴꦪ ꦄꦨꦴꦮꦺꦤ ꦄꦥ꧀ꦥꦠꦶꦛ꧀ꦜꦴ ꦤꦴꦩ ꦗꦴꦠꦴ, ꦑꦷꦟꦴꦱꦮꦱ꧀ꦱ ꦏꦩ꧀ꦩꦁ ꦤꦠ꧀ꦡꦶꦠꦴꦪ ꦌꦮ ꦄꦥ꧀ꦥꦠꦶꦛ꧀ꦜꦁ. ꦠꦱ꧀ꦱ ꦲꦶ ꦏꦴꦪꦴꦢꦪꦺꦴ ꦄꦠ꧀ꦡꦶ, ꦠꦺꦲꦶ ꦥꦤ ꦏꦠꦏꦩ꧀ꦩꦁ ꦏꦸꦱꦭꦴꦏꦸꦱꦭꦁ ꦤꦴꦩ ꦤ ꦲꦺꦴꦠꦶ, ꦏꦶꦫꦶꦪꦩꦠ꧀ꦠꦺ ꦜꦠ꧀ꦮꦴ ꦄꦮꦶꦥꦴꦏꦁ ꦲꦺꦴꦠꦶ. ꦌꦮꦩꦱ꧀ꦱ ꦏꦩ꧀ꦩꦁ ꦤꦠ꧀ꦡꦶꦠꦴꦪ ꦌꦮ ꦄꦥ꧀ꦥꦠꦶꦛ꧀ꦜꦁ ꦤꦴꦩ ꦗꦴꦠꦤ꧀ꦠꦶ. ꦕꦠꦸꦠ꧀ꦡꦁ.