꧕. ꦩꦲꦴꦫꦸꦏ꧀ꦑꦱꦸꦠ꧀ꦠꦮꦟ꧀ꦟꦤꦴ

꧕꧕. ꦥꦚ꧀ꦕꦩꦺ ꦈꦢ꧀ꦣꦁ ꦎꦗꦁ ꦄꦨꦶꦲꦫꦤ꧀ꦠꦷꦠꦶ ꦥꦡꦮꦷꦫꦱꦚ꧀ꦕ ꦄꦴꦥꦺꦴꦫꦱꦚ꧀ꦕ ꦈꦥꦫꦶ ꦄꦴꦫꦺꦴꦥꦺꦤ꧀ꦠꦶ. ꦎꦗꦴꦪ ꦄꦴꦫꦺꦴꦥꦶꦠꦠ꧀ꦠꦴ ꦲꦠ꧀ꦡꦱꦠꦸꦧ꧀ꦧꦺꦣꦱ꧀ꦱ ꦫꦸꦏ꧀ꦑꦱ꧀ꦱ ꦄꦔ꧀ꦏꦸꦫꦒ꧀ꦒꦺꦱꦸ ꦧꦶꦤ꧀ꦢꦸꦧꦶꦤ꧀ꦢꦹꦤꦶ ꦮꦶꦪ ꦲꦸꦠ꧀ꦮꦴ ꦱꦶꦤꦺꦲꦺꦴ ꦠꦶꦛ꧀ꦜꦠꦶ. ꦆꦢꦁ ꦥꦤꦺꦠ꧀ꦡ ꦎꦥꦩ꧀ꦩꦱꦁꦱꦤ꧀ꦢꦤꦁ – ꦩꦲꦴꦫꦸꦏ꧀ꦑꦺꦴ ꦮꦶꦪ ꦲꦶ ꦠꦺꦨꦹꦩꦏꦮꦛ꧀ꦛꦁ, ꦩꦹꦭꦴꦤꦶ ꦮꦶꦪ ꦄꦴꦪꦠꦤꦴꦤꦶ, ꦩꦹꦭꦺꦲꦶ ꦎꦗꦴꦪ ꦄꦴꦫꦺꦴꦲꦤꦁ ꦮꦶꦪ ꦖꦲꦶ ꦢ꧀ꦮꦴꦫꦺꦲꦶ ꦏꦩ꧀ꦩꦴꦫꦺꦴꦲꦤꦁ, ꦎꦗꦴꦪ ꦄꦨꦶꦫꦸꦭ꦳꧀ꦲꦠ꧀ꦠꦴ ꦩꦲꦴꦫꦸꦏ꧀ꦑꦱ꧀ꦱ ꦪꦴꦮꦏꦥ꧀ꦥꦛ꧀ꦜꦴꦤꦁ ꦮꦶꦪ ꦮꦛ꧀ꦛꦤꦶꦱ꧀ꦱꦶꦠꦧꦴꦭꦥꦸꦡꦸꦗ꧀ꦗꦤꦱ꧀ꦱ ꦖꦲꦶ ꦢ꧀ꦮꦴꦫꦺꦲꦶ ꦏꦩ꧀ꦩꦁ ꦄꦴꦪꦹꦲꦤ꧀ꦠꦱ꧀ꦱ ꦄꦥꦫꦴꦥꦫꦁ ꦮꦛ꧀ꦛꦱ꧀ꦱ ꦮꦝ꧀ꦞꦤꦮꦱꦺꦤ ꦢꦷꦓꦫꦠ꧀ꦠꦁ ꦜꦴꦤꦁ.

ꦏꦸꦢ꧀ꦢꦴꦭꦥꦶꦛꦏꦤ꧀ꦠꦶ ꦏꦸꦢ꧀ꦢꦴꦭꦚ꧀ꦕꦺꦮ ꦥꦕ꧀ꦖꦶꦨꦴꦗꦤꦚ꧀ꦕ. ꦑꦟ꧀ꦝꦴꦑꦟ꧀ꦝꦶꦏꦁ ꦖꦶꦤ꧀ꦢꦺꦪ꧀ꦪꦴꦠꦶ ꦑꦸꦢ꧀ꦢꦏꦩꦲꦤ꧀ꦠꦴꦤꦶ ꦑꦟ꧀ꦝꦴꦑꦟ꧀ꦝꦴꦤꦶ ꦏꦫꦺꦴꦤ꧀ꦠꦺꦴ ꦖꦶꦤ꧀ꦢꦺꦪ꧀ꦪ. ꦆꦢꦁ ꦥꦤꦺꦠ꧀ꦡ ꦎꦥꦩ꧀ꦩꦱꦁꦱꦤ꧀ꦢꦤꦁ – ꦆꦣꦴꦥꦶ ꦲꦶ ꦩꦲꦴꦫꦸꦏ꧀ꦑꦺꦴ ꦮꦶꦪ ꦠꦺꦨꦹꦩꦏꦮꦛ꧀ꦛꦁ, ꦫꦸꦏ꧀ꦑꦁ ꦤꦴꦱꦺꦠꦸꦏꦴꦩꦺꦴ ꦥꦸꦫꦶꦱꦺꦴ ꦮꦶꦪ ꦪꦺꦴꦒꦴꦮꦕꦫꦺꦴ, ꦏꦸꦢ꧀ꦢꦴꦭꦺꦴ ꦮꦶꦪ ꦚꦴꦟꦁ, ꦥꦕ꧀ꦖꦶ ꦮꦶꦪ ꦱꦩꦴꦣꦶ, ꦫꦸꦏ꧀ꦑꦕ꧀ꦖꦺꦢꦤꦦꦫꦱꦸ ꦮꦶꦪ ꦚꦴꦟꦁ, ꦫꦸꦏ꧀ꦑꦱ꧀ꦱ ꦩꦹꦭꦺ ꦖꦶꦤ꧀ꦤꦏꦴꦭꦺꦴ ꦮꦶꦪ ꦪꦺꦴꦒꦶꦤꦺꦴ ꦄꦴꦕꦫꦶꦪꦱꦤ꧀ꦠꦶꦏꦺ ꦏꦩ꧀ꦩꦛ꧀ꦜꦴꦤꦁ ꦒꦲꦺꦠ꧀ꦮꦴ ꦩꦤꦱꦶꦏꦫꦺꦴꦤ꧀ꦠꦱ꧀ꦱ ꦥꦚ꧀ꦚꦴ, ꦑꦟ꧀ꦝꦴꦑꦟ꧀ꦝꦶꦏꦁ ꦖꦶꦤ꧀ꦢꦤꦏꦴꦭꦺꦴ ꦮꦶꦪ ꦱꦔ꧀ꦑꦺꦥꦠꦺꦴ ꦕꦠꦸꦤ꧀ꦤꦁ ꦩꦲꦴꦨꦹꦠꦴꦤꦁ ꦩꦤꦱꦶꦏꦴꦫꦺꦴ, ꦦꦴꦭꦤꦁ ꦮꦶꦪ ꦢ꧀ꦮꦺꦕꦠ꧀ꦠꦴꦭꦷꦱꦴꦪ ꦏꦺꦴꦛ꧀ꦜꦴꦱꦺꦱꦸ ꦮꦶꦠ꧀ꦡꦴꦫꦩꦤꦱꦶꦏꦴꦫꦺꦴ, ꦱꦏꦭꦶꦏꦁ ꦱꦏꦭꦶꦏꦁ ꦏꦫꦟꦏꦴꦭꦺꦴ ꦮꦶꦪ ꦈꦥꦴꦢꦴꦫꦹꦥꦱ꧀ꦱ ꦕꦺꦮ ꦫꦹꦥꦏ꧀ꦑꦤ꧀ꦣꦴꦫꦩ꧀ꦩꦟꦱ꧀ꦱ ꦮꦶꦚ꧀ꦚꦴꦟꦱ꧀ꦱ ꦕꦴꦠꦶ ꦆꦩꦺꦱꦁ ꦮꦱꦺꦤ ꦤꦴꦩꦫꦹꦥꦥꦫꦶꦒ꧀ꦒꦲꦺꦴ, ꦩꦹꦭꦴꦤꦁ ꦈꦥꦕ꧀ꦖꦺꦢꦤꦁ ꦮꦶꦪ ꦠꦱ꧀ꦱꦺꦮ ꦤꦴꦩꦫꦹꦥꦱ꧀ꦱ ꦥꦕ꧀ꦕꦪꦥꦫꦶꦪꦺꦱꦤꦁ, ꦮꦴꦠꦴꦠꦥꦺ ꦮꦶꦱꦺꦴꦱꦺꦠ꧀ꦮꦴ ꦄꦒ꧀ꦒꦶꦤꦴ ꦝꦲꦤꦏꦴꦭꦺꦴ ꦮꦶꦪ ꦄꦤꦸꦥꦸꦧ꧀ꦧꦺꦤ ꦮꦶꦥꦱ꧀ꦱꦤꦁ ꦮꦝ꧀ꦞꦺꦠ꧀ꦮꦴ ꦄꦚ꧀ꦚꦠꦫꦁ ꦱꦥ꧀ꦥꦴꦪꦁ ꦭꦨꦶꦠ꧀ꦮꦴ ꦏꦩ꧀ꦩꦛ꧀ꦜꦴꦤꦺ ꦮꦶꦨꦹꦠꦺ ꦈꦥꦛ꧀ꦜꦲꦩꦴꦤꦺ ꦌꦏꦥꦭ꧀ꦭꦔ꧀ꦏꦺ ꦤꦶꦱꦶꦤ꧀ꦤꦱ꧀ꦱ ꦱꦩꦟꦣꦩ꧀ꦩꦁ ꦏꦫꦺꦴꦤ꧀ꦠꦱ꧀ꦱ ꦄꦒ꧀ꦒꦦꦭꦥ꧀ꦥꦠ꧀ꦠꦶ, ꦩꦱꦶꦏꦫꦟꦁ ꦮꦶꦪ ꦄꦫꦲꦠ꧀ꦠꦥ꧀ꦥꦠ꧀ꦠꦢꦶꦮꦱꦺꦪꦺꦮ ꦄꦥꦫꦶꦤꦶꦧ꧀ꦧꦴꦪꦤ꧀ꦠꦱ꧀ꦱ ꦪꦴꦮꦠꦴꦪꦸꦏꦁ ꦜꦶꦠ ꦏꦴꦭꦺꦴ, ꦩꦲꦴꦮꦴꦠꦺ ꦎꦥꦸꦤꦤꦁ ꦤꦢꦶꦪꦴ ꦥꦮꦴꦲꦤꦁ ꦮꦶꦪ ꦕ ꦈꦥꦴꦢꦶꦟ꧀ꦟꦏꦏ꧀ꦑꦤ꧀ꦣꦨꦺꦢꦺꦤ ꦄꦤꦸꦥꦴꦢꦶꦱꦺꦱꦴꦪ ꦤꦶꦧ꧀ꦧꦴꦤꦣꦴꦠꦸꦪꦴ ꦥꦫꦶꦤꦶꦧ꧀ꦧꦸꦠꦱ꧀ꦱ ꦮꦛ꧀ꦛꦮꦹꦥꦱꦩꦺꦴ ꦮꦺꦢꦶꦠꦧ꧀ꦧꦺꦴ. ꦥꦚ꧀ꦕꦩꦁ.