꧓. ꦢꦺꦮꦲꦶꦠꦱꦸꦠ꧀ꦠꦮꦟ꧀ꦟꦤꦴ

꧑꧙꧙. ꦠꦠꦶꦪꦺ ꦮꦴꦠꦺꦲꦷꦠꦶ ꦈꦢꦫꦮꦴꦠꦺꦲꦶ. ꦨꦒꦮꦠꦺꦴ ꦏꦶꦫ ꦖꦧ꧀ꦧꦱ꧀ꦱꦴꦤꦶ ꦢꦸꦏ꧀ꦏꦫꦏꦴꦫꦶꦏꦁ ꦏꦫꦺꦴꦤ꧀ꦠꦱ꧀ꦱ ꦥꦱꦠꦩꦸꦒ꧀ꦒꦪꦹꦱꦴꦢꦷꦤꦶ ꦄꦴꦲꦴꦫꦪꦠꦺꦴ ꦢꦸꦧ꧀ꦨꦺꦴꦗꦤꦺꦤ ꦕꦺꦮ ꦢꦸꦏ꧀ꦑꦱꦺꦪ꧀ꦪꦴꦪ ꦕ ꦈꦢꦫꦮꦴꦠꦺꦴ ꦏꦸꦥ꧀ꦥꦶ. ꦄꦥꦫꦨꦴꦒꦺ ꦱꦩ꧀ꦧꦺꦴꦣꦶꦁ ꦥꦠ꧀ꦮꦴ ꦥꦟꦷꦠꦨꦺꦴꦗꦤꦁ ꦨꦸꦚ꧀ꦗꦤ꧀ꦠꦱ꧀ꦱꦴꦥꦶ ꦄꦤ꧀ꦠꦫꦤ꧀ꦠꦫꦴ ꦱꦺꦴ ꦄꦴꦧꦴꦣꦺꦴ ꦄꦠ꧀ꦠꦴꦤꦁ ꦢꦱ꧀ꦱꦺꦠꦶꦪꦺꦮ. ꦠꦁ ꦱꦤ꧀ꦣꦴꦪꦺꦠꦁ ꦮꦸꦠ꧀ꦠꦁ. ꦈꦥꦛ꧀ꦜꦴꦏꦺꦴ ꦲꦺꦴꦠꦷꦠꦶ ꦥꦜꦩꦧꦺꦴꦣꦶꦪꦁ ꦄꦤꦶꦧꦢ꧀ꦣꦸꦥꦛ꧀ꦜꦴꦏꦏꦴꦭꦺ ꦈꦥꦛ꧀ꦜꦴꦏꦺꦴ ꦲꦺꦴꦠꦶ. ꦠꦱ꧀ꦩꦶꦁ ꦏꦶꦫ ꦏꦴꦭꦺ ꦱꦠ꧀ꦡꦸꦄꦱꦷꦠꦶꦩꦲꦴꦡꦺꦫꦺꦱꦸ ꦈꦥꦛ꧀ꦜꦴꦏꦺꦴ ꦄꦨꦹꦠꦥꦸꦧ꧀ꦧꦺꦴ ꦤꦴꦩ ꦤꦠ꧀ꦡꦶ. ꦤꦴꦒꦱꦩꦴꦭꦺꦴ ꦈꦥꦮꦴꦤꦺꦴ ꦱꦸꦤꦏ꧀ꦑꦠ꧀ꦠꦺꦴ ꦕꦸꦤ꧀ꦢꦺꦴ ꦱꦩꦟꦸꦢ꧀ꦢꦺꦱꦺꦴ ꦱꦴꦒꦠꦺꦴ ꦧꦺꦴꦣꦶ ꦩꦺꦓꦶꦪꦺꦴꦠꦶ ꦆꦩꦺ ꦥꦤ ꦥꦴꦭ꦳ꦶꦪꦁ ꦄꦴꦒꦠꦸꦥꦛ꧀ꦜꦴꦏꦴ. ꦆꦩꦱ꧀ꦩꦶꦁ ꦥꦤ ꦏꦴꦭꦺ ꦈꦥꦮꦴꦤꦠ꧀ꦡꦺꦫꦺꦴ ꦥꦴꦠꦺꦴꦮ ꦈꦛ꧀ꦜꦴꦪ ꦥꦫꦶꦮꦺꦟꦱꦩ꧀ꦩꦗ꧀ꦗꦤꦁ ꦢꦤ꧀ꦠꦏꦛ꧀ꦜꦢꦴꦤꦁ ꦤ꧀ꦲꦴꦤꦺꦴꦢꦏꦥꦫꦶꦪꦴꦢꦤꦁ ꦥꦠ꧀ꦠꦕꦷꦮꦫꦁ ꦒꦲꦺꦠ꧀ꦮꦴ ꦄꦤꦸꦒꦩꦤꦤ꧀ꦠꦶ ꦱꦧ꧀ꦧꦁ ꦨꦒꦮꦠꦺꦴ ꦈꦥꦛ꧀ꦜꦴꦤꦩꦏꦴꦱꦶ. ꦈꦥꦱꦔ꧀ꦏꦩꦷꦠꦶ ꦥꦜꦩꦧꦺꦴꦣꦶꦪꦁ ꦏꦶꦫ ꦮꦷꦱꦠꦶ ꦮꦱ꧀ꦱꦴꦤꦶ ꦤꦶꦢ꧀ꦣꦹꦩꦁ ꦄꦫꦚ꧀ꦚꦩꦺꦮ ꦲꦺꦴꦠꦶ, ꦨꦶꦏ꧀ꦑꦸꦱꦔ꧀ꦓꦱ꧀ꦱ ꦈꦢꦏꦠꦴꦥꦤꦩ꧀ꦥꦶ ꦤ ꦨꦒꦮꦠꦴ ꦄꦤꦸꦚ꧀ꦚꦴꦠꦁ. ꦱꦺꦴ ꦕ ꦧ꧀ꦫꦴꦲ꧀ꦩꦟꦺꦴ ꦈꦢ꧀ꦣꦤꦥꦴꦭ꦳ꦶꦁ ꦧꦤ꧀ꦣꦴꦥꦺꦠ꧀ꦮꦴ ꦩꦲꦴꦕꦴꦛꦶꦪꦺꦴ ꦈꦢ꧀ꦣꦤꦩꦴꦫꦺꦴꦥꦺꦠ꧀ꦮꦴ ꦈꦟ꧀ꦲꦺꦴꦢꦏꦁ ꦏꦴꦫꦺꦠ꧀ꦮꦴ, ꦤ꧀ꦲꦴꦤꦷꦪꦕꦸꦟ꧀ꦟꦴꦢꦷꦲꦶ ꦱꦢ꧀ꦣꦶꦁ ꦠꦁ ꦮꦶꦏ꧀ꦏꦶꦟꦤ꧀ꦠꦺꦴ ꦗꦷꦮꦶꦏꦁ ꦏꦥ꧀ꦥꦺꦠꦶ. ꦤ꧀ꦲꦴꦪꦶꦠꦸꦏꦴꦩꦴ ꦠꦠ꧀ꦡ ꦒꦤ꧀ꦠ꧀ꦮꦴ ꦩꦹꦭꦁ ꦢꦠ꧀ꦮꦴ ꦤ꧀ꦲꦴꦪꦶꦠ꧀ꦮꦴ ꦒꦤ꧀ꦣꦺ ꦮꦶꦭꦶꦩ꧀ꦥꦶꦠ꧀ꦮꦴ ꦩꦴꦭꦁ ꦥꦶꦭ꦳ꦤ꧀ꦣꦶꦠ꧀ꦮꦴ ꦥꦏ꧀ꦏꦩꦤ꧀ꦠꦶ. ꦠꦱ꧀ꦩꦴ ꦡꦺꦫꦺꦴ ꦠꦠ꧀ꦡ ꦈꦥꦱꦔ꧀ꦏꦩꦶ.

ꦏꦶꦁ ꦥꦠ꧀ꦡꦪꦴꦤꦺꦴꦠꦶ ꦏꦶꦁ ꦆꦕ꧀ꦖꦤ꧀ꦠꦺꦴ. ꦏꦶꦁ ꦌꦱꦤ꧀ꦠꦶ ꦏꦶꦁ ꦒꦮꦺꦱꦤ꧀ꦠꦺꦴ. ꦥꦹꦗꦶꦠꦺꦴ ꦥꦹꦗꦤꦺꦪ꧀ꦪꦴꦤꦤ꧀ꦠꦶ ꦆꦢꦁ ꦡꦺꦫꦺꦴ ꦢꦱꦧꦭꦱ꧀ꦱ ꦮꦟ꧀ꦟꦁ ꦏꦡꦺꦠꦸꦩꦴꦫꦨꦶ. ꦒꦶꦭꦴꦤꦨꦺꦱꦗ꧀ꦗꦠ꧀ꦡꦁ ꦒꦠꦺꦤ ꦏꦶꦫ ꦒꦶꦭꦴꦤꦱ꧀ꦱ ꦮꦟ꧀ꦟꦺꦴ ꦏꦡꦺꦠꦧ꧀ꦧꦺꦴꦠꦶ ꦮꦠ꧀ꦠꦩꦺꦠꦁ. ꦮꦟ꧀ꦟꦁ ꦲꦶ ꦱꦸꦠ꧀ꦮꦴ ꦩꦤꦸꦱ꧀ꦱꦴ ꦱꦏ꧀ꦏꦕ꧀ꦕꦁ ꦨꦺꦱꦗ꧀ꦗꦁ ꦢꦴꦠꦧ꧀ꦧꦁ ꦩꦚ꧀ꦚꦤ꧀ꦠꦶ. ꦱꦥ꧀ꦥꦴꦪꦨꦺꦱꦗ꧀ꦗꦁ ꦭꦢ꧀ꦣꦴ ꦒꦶꦭꦴꦤꦺꦴ ꦑꦶꦥ꧀ꦥꦩꦺꦮ ꦮꦸꦛ꧀ꦜꦴꦠꦶ. ꦏꦡꦺꦤ꧀ꦠꦺꦤ ꦕ ꦙꦴꦤꦮꦶꦩꦺꦴꦏ꧀ꦑꦱꦩꦴꦥꦠ꧀ꦠꦶꦩꦒ꧀ꦒꦦꦭꦴꦤꦶ ꦄꦴꦫꦧ꧀ꦨ ꦏꦡꦺꦠꦸꦁ ꦤ ꦮꦛ꧀ꦛꦠꦶ. ‘‘ꦱꦷꦭꦮꦴ ꦭꦗ꧀ꦗꦷ ꦏꦸꦏ꧀ꦏꦸꦕ꧀ꦕꦏꦺꦴ ꦧꦲꦸꦱ꧀ꦱꦸꦠꦺꦴ ꦄꦴꦒꦩꦣꦫꦺꦴ ꦮꦁꦱꦴꦤꦸꦫꦏ꧀ꦑꦏꦺꦴ’’ꦠꦶ ꦌꦮꦁ ꦥꦤ ꦄꦴꦒꦩꦤꦷꦪꦥꦛꦶꦥꦢꦁꦪꦺꦮ ꦏꦡꦺꦠꦸꦁ ꦮꦛ꧀ꦛꦠꦶ. ꦥꦹꦗꦤꦺꦪ꧀ꦪꦴꦤꦤ꧀ꦠꦶ ꦄꦱꦷꦠꦶꦩꦲꦴꦡꦺꦫꦴ ꦱꦢꦺꦮꦏꦺꦤ ꦭꦺꦴꦏꦺꦤ ꦥꦹꦗꦺꦠꦧ꧀ꦧꦴꦠꦶ ꦥꦹꦗꦤꦺꦪ꧀ꦪꦴ. ꦠꦺꦪꦺꦮ ꦱꦏ꧀ꦏꦴꦠꦧ꧀ꦧꦴꦠꦶ ꦱꦏ꧀ꦏꦫꦺꦪ꧀ꦪꦴ. ꦠꦺꦱꦁꦪꦺꦮ ꦄꦥꦕꦶꦠꦶ ꦏꦠ꧀ꦠꦧ꧀ꦧꦴꦠꦶ ꦄꦥꦕꦺꦪ꧀ꦪꦴ. ꦨꦒꦮꦴ ꦠꦺꦱꦁ ꦥꦹꦗꦶꦠꦺꦴ ꦱꦏ꧀ꦏꦠꦺꦴ ꦄꦥꦕꦶꦠꦺꦴ ꦕ, ꦆꦕ꧀ꦕꦱ꧀ꦱ ꦠꦁ ꦒꦸꦟꦁ ꦥꦏꦴꦱꦺꦤ꧀ꦠꦺꦴ ꦡꦺꦫꦺꦴ ꦌꦮꦩꦴꦲ. ꦲꦴꦠꦮꦺꦠꦶ ꦲꦫꦶꦠꦸꦁ.

ꦦꦴꦟꦶꦠꦱ꧀ꦱ ꦕ ꦥꦸꦛꦤ꧀ꦠꦶ ꦩꦲꦤ꧀ꦠꦁ ꦤꦶꦕ꧀ꦖꦴꦫꦶꦏꦁ ꦒꦸꦭ꦳ꦥꦶꦟ꧀ꦝꦁ. ꦱꦺꦴ ꦏꦶꦫ ‘‘ꦏꦶꦁ ꦱꦩꦟꦱ꧀ꦱ ꦒꦺꦴꦠꦩꦱ꧀ꦱ ꦄꦦꦴꦱꦸꦏ’’ꦤ꧀ꦠꦶ? ꦥꦸꦕ꧀ꦖꦶꦠ꧀ꦮꦴ, ‘‘ꦈꦢꦫꦮꦴꦠꦺꦴ’’ꦠꦶ ꦱꦸꦠ꧀ꦮꦴ, ‘‘ꦠꦺꦤ ꦲꦶ ꦩꦪꦩꦺꦠ꧀ꦡ ꦨꦺꦱꦗ꧀ꦗꦁ ꦗꦴꦤꦴꦩ, ꦆꦠꦺꦴ ꦡꦺꦴꦏꦺꦤ ꦈꦢꦏꦺꦤ ꦆꦢꦁ ꦦꦴꦟꦶꦠꦁ ꦄꦴꦭꦺꦴꦭ꦳ꦺꦠ꧀ꦮꦴ ꦤ꧀ꦲꦴꦤꦥꦫꦶꦪꦺꦴꦱꦴꦤꦺ ꦥꦴꦠꦸꦁ ꦢꦺꦡ, ꦆꦠꦶ ꦈꦟ꧀ꦲꦺꦴꦢꦏꦺꦤ ꦧꦲꦶ ꦥꦫꦶꦱꦺꦢꦺꦴ ꦨꦮꦶꦱ꧀ꦱꦠꦶ, ꦆꦩꦶꦤꦴ ꦄꦤ꧀ꦠꦺꦴꦠꦶ ꦌꦮꦁ ꦱꦩꦟꦱ꧀ꦱ ꦒꦺꦴꦠꦩꦱ꧀ꦱ ꦦꦴꦱꦸꦏꦁ ꦨꦮꦶꦱ꧀ꦱꦠꦷ’’ꦠꦶ ꦮꦠ꧀ꦮꦴ ꦡꦺꦫꦱ꧀ꦱ ꦥꦠ꧀ꦠꦺ ꦥꦏ꧀ꦑꦶꦥꦶꦠ꧀ꦮꦴ ꦄꦢꦴꦱꦶ.

ꦈꦥꦱꦔ꧀ꦏꦩꦷꦠꦶ ꦠꦱ꧀ꦩꦶꦁ ꦏꦶꦫ ꦄꦴꦧꦴꦣꦺ ꦥꦛꦶꦥ꧀ꦥꦱ꧀ꦱꦢ꧀ꦣꦺ ‘‘ꦢꦺꦮꦲꦶꦠꦺꦤ ꦠꦡꦴꦒꦠꦱ꧀ꦱ ꦨꦺꦱꦗ꧀ꦗꦁ ꦢꦶꦤ꧀ꦤꦁ, ꦠꦺꦤꦺꦮ ꦫꦺꦴꦒꦺꦴ ꦮꦹꦥꦱꦤ꧀ꦠꦺꦴ, ꦄꦲꦺꦴ ꦢꦴꦤꦁ ꦥꦫꦩꦢꦴꦤꦁ ꦧ꧀ꦫꦴꦲ꧀ꦩꦟꦱ꧀ꦱꦴ’’ꦠꦶ ꦏꦡꦴ ꦮꦶꦠ꧀ꦡꦴꦫꦶꦠꦴ ꦗꦴꦠꦴ. ꦠꦁ ꦱꦸꦠ꧀ꦮꦴ ꦏꦶꦠ꧀ꦠꦶꦏꦴꦩꦺꦴ ꦧ꧀ꦫꦴꦲ꧀ꦩꦟꦺꦴ ‘‘ꦌꦠ꧀ꦠꦏꦺꦤꦥꦶ ꦠꦴꦮ ꦩꦺ ꦄꦪꦁ ꦏꦶꦠ꧀ꦠꦶꦱꦢ꧀ꦢꦺꦴ ꦄꦧ꧀ꦨꦸꦒ꧀ꦒꦠꦺꦴ’’ꦠꦶ ꦱꦺꦴꦩꦤꦱ꧀ꦱꦗꦴꦠꦺꦴ ꦄꦠ꧀ꦠꦤꦴ ꦏꦠꦨꦴꦮꦁ ꦗꦴꦤꦴꦥꦺꦠꦸꦏꦴꦩꦺꦴ ꦠꦴꦮꦠꦏꦺꦤꦺꦮ ꦢꦱꦧꦭꦺ ꦮꦶꦱ꧀ꦱꦴꦱꦁ ꦄꦴꦥꦗ꧀ꦗꦶꦠ꧀ꦮꦴ ꦈꦥꦱꦔ꧀ꦏꦩꦶ.

ꦢꦗ꧀ꦗꦴꦠꦶ ꦢꦢꦺꦪ꧀ꦪ. ꦏꦡꦁ ꦲꦶ ꦪꦗꦩꦴꦤꦱ꧀ꦱꦴꦠꦶ ꦏꦺꦤ ꦏꦴꦫꦟꦺꦤ ꦪꦗꦤ꧀ꦠꦱ꧀ꦱ. ꦆꦗ꧀ꦙꦠꦷꦠꦶ ꦱꦩꦶꦗ꧀ꦙꦠꦶ ꦩꦲꦥ꧀ꦦꦭꦺꦴ ꦲꦺꦴꦠꦶ. ꦪꦺꦴꦮꦺꦢꦷꦠꦶ ꦪꦺꦴ ꦄꦮꦺꦢꦶ ꦄꦚ꧀ꦚꦴꦱꦶ, ꦮꦶꦢꦶꦠꦁ ꦥꦴꦏꦛꦩꦏꦴꦱꦶ ‘‘ꦪꦺꦴꦮꦺꦠꦷ’’ꦠꦶꦥꦶ ꦥꦴꦜꦺꦴ, ꦪꦺꦴ ꦄꦮꦺꦠꦶ ꦗꦴꦤꦴꦠꦷꦠꦶ ꦄꦠ꧀ꦡꦺꦴ. ꦥꦱ꧀ꦱꦠꦷꦠꦶ ꦢꦶꦧ꧀ꦧꦕꦏ꧀ꦑꦸꦤꦴ ꦥꦱ꧀ꦱꦠꦶ. ꦗꦴꦠꦶꦏ꧀ꦑꦪꦤ꧀ꦠꦶ ꦄꦫꦲꦠ꧀ꦠꦁ. ꦄꦨꦶꦚ꧀ꦚꦴꦮꦺꦴꦱꦶꦠꦺꦴꦠꦶ ꦗꦴꦤꦶꦠ꧀ꦮꦴ ꦮꦺꦴꦱꦶꦠꦺꦴ ꦮꦺꦴꦱꦴꦤꦁ ꦏꦠꦏꦶꦕ꧀ꦕꦠꦁ ꦥꦠ꧀ꦠꦺꦴ. ꦌꦮꦁ ꦲꦶ ꦪꦗꦩꦴꦤꦱ꧀ꦱꦴꦠꦶ ꦆꦩꦶꦤꦴ ꦑꦷꦟꦴꦱꦮꦺ ꦪꦗꦤꦴꦏꦴꦫꦺꦤ ꦪꦗꦤ꧀ꦠꦱ꧀ꦱ. ꦠꦠꦶꦪꦁ.