꧒. ꦒꦴꦫꦮꦱꦸꦠ꧀ꦠꦮꦟ꧀ꦟꦤꦴ

꧑꧗꧓. ꦢꦸꦠꦶꦪꦺ ꦈꦢꦥꦴꦢꦷꦠꦶ ꦄꦪꦁ ꦮꦶꦠꦏ꧀ꦏꦺꦴ ꦥꦚ꧀ꦕꦩꦺ ꦱꦠ꧀ꦠꦴꦲꦺ ꦈꦢꦥꦴꦢꦶ. ꦄꦒꦴꦫꦮꦺꦴꦠꦶ ꦄꦚ꧀ꦚꦱ꧀ꦩꦶꦁ ꦒꦴꦫꦮꦫꦲꦶꦠꦺꦴ, ꦏꦚ꧀ꦕꦶ ꦒꦫꦸꦛ꧀ꦜꦴꦤꦺ ꦄꦛ꧀ꦜꦥꦺꦠ꧀ꦮꦴꦠꦶ ꦄꦠ꧀ꦡꦺꦴ. ꦄꦥ꧀ꦥꦠꦶꦱ꧀ꦱꦺꦴꦠꦶ ꦥꦠꦶꦱ꧀ꦱꦪꦫꦲꦶꦠꦺꦴ, ꦏꦚ꧀ꦕꦶ ꦗꦺꦛ꧀ꦜꦏꦛ꧀ꦜꦴꦤꦺ ꦄꦛ꧀ꦜꦥꦺꦠ꧀ꦮꦴꦠꦶ ꦄꦠ꧀ꦡꦺꦴ.

ꦱꦢꦺꦮꦏꦺꦠꦶꦄꦴꦢꦷꦱꦸ ꦱꦢ꧀ꦣꦶꦁ ꦢꦺꦮꦺꦲꦶ ꦱꦢꦺꦮꦏꦺ. ꦢꦺꦮꦒ꧀ꦒꦲꦟꦺꦤ ꦕꦺꦠ꧀ꦡ ꦩꦴꦫꦧ꧀ꦫꦲ꧀ꦩꦺꦱꦸ ꦒꦲꦶꦠꦺꦱꦸꦥꦶ ꦩꦴꦫꦺꦴ ꦤꦴꦩ ꦮꦱꦮꦠ꧀ꦠꦷ ꦱꦧ꧀ꦧꦺꦱꦁ ꦈꦥꦫꦶ ꦮꦱꦁ ꦮꦠ꧀ꦠꦺꦠꦶ, ꦧ꧀ꦫꦲ꧀ꦩꦴ ꦤꦴꦩ ꦩꦲꦴꦤꦸꦨꦴꦮꦺꦴ ꦌꦏꦔ꧀ꦒꦸꦭꦶꦪꦴ ꦌꦏꦱ꧀ꦩꦶꦁ ꦕꦏ꧀ꦏꦮꦴꦭ꦳ꦱꦲꦱ꧀ꦱꦺ ꦄꦴꦭꦺꦴꦏꦁ ꦦꦫꦠꦶ. ꦢ꧀ꦮꦷꦲꦶ ꦢ꧀ꦮꦷꦱꦸ…ꦥꦺ… ꦢꦱꦲꦶ ꦄꦔ꧀ꦒꦸꦭꦷꦲꦶ ꦢꦱꦱꦸꦥꦶ ꦕꦏ꧀ꦏꦮꦴꦭ꦳ꦱꦲꦱ꧀ꦱꦺꦱꦸ ꦄꦴꦭꦺꦴꦏꦁ ꦦꦫꦠꦶ, ꦱꦺꦴ ꦆꦩꦶꦤꦴ ꦱꦷꦭꦱꦩ꧀ꦥꦤ꧀ꦤꦠꦫꦺꦴꦠꦶ ꦮꦠ꧀ꦠꦸꦁ ꦩꦴ ꦭꦨꦠꦹꦠꦶ ꦱꦩꦴꦫꦏꦺ ꦱꦧ꧀ꦫꦲ꧀ꦩꦏꦺꦠꦶ ꦮꦶꦱꦸꦁ ꦮꦸꦠ꧀ꦠꦁ. ꦠꦡꦴ ꦱꦩꦟꦴ ꦤꦴꦩ ꦌꦏꦤꦶꦏꦴꦪꦴꦢꦶꦮꦱꦺꦤ ꦧꦲꦸꦱ꧀ꦱꦸꦠꦴ ꦱꦷꦭꦮꦤ꧀ꦠꦺꦴ ꦥꦟ꧀ꦝꦶꦠꦴ, ꦧ꧀ꦫꦴꦲ꧀ꦩꦟꦴꦥꦶ ꦮꦠ꧀ꦡꦸꦮꦶꦗ꧀ꦗꦴꦢꦶꦮꦱꦺꦤ ꦧꦲꦸꦱ꧀ꦱꦸꦠꦴ ꦥꦟ꧀ꦝꦶꦠꦴ, ꦠꦺ ꦆꦩꦶꦤꦴ ꦱꦷꦭꦱꦩ꧀ꦥꦤ꧀ꦤꦠꦫꦴꦠꦶ ꦮꦠ꧀ꦠꦸꦁ ꦩꦴ ꦭꦨꦤ꧀ꦠꦹꦠꦶ ꦱꦱ꧀ꦱꦩꦟꦧ꧀ꦫꦴꦲ꧀ꦩꦟꦶꦪꦴ ꦥꦗꦴꦪꦴꦠꦶ ꦮꦸꦠ꧀ꦠꦁ. ꦱꦢꦺꦮꦩꦤꦸꦱ꧀ꦱꦴꦪꦴꦠꦶ ꦆꦢꦁ ꦥꦤ ꦤꦶꦥ꧀ꦥꦢꦺꦱꦠꦺꦴ ꦢꦱ꧀ꦱꦤꦠ꧀ꦡꦁ ꦒꦲꦶꦠꦩꦺꦮ ꦒꦲꦺꦠ꧀ꦮꦴ ꦮꦸꦠ꧀ꦠꦁ. ꦄꦥꦶꦕꦺꦠ꧀ꦡ ꦥꦸꦫꦶꦩꦴꦤꦶ ꦠꦷꦟꦶ ꦥꦢꦴꦤꦶ ꦭꦺꦴꦏꦮꦱꦺꦤ ꦮꦸꦠ꧀ꦠꦴꦤꦶ, ꦥꦕ꧀ꦖꦶꦩꦴꦤꦶ ꦢ꧀ꦮꦺ ꦥꦗꦴꦮꦱꦺꦤ. ꦱꦷꦭꦱꦩ꧀ꦥꦤ꧀ꦤꦠꦫꦤ꧀ꦠꦶ ꦱꦷꦭꦺꦤ ꦱꦩ꧀ꦥꦤ꧀ꦤꦠꦫꦁ, ꦄꦣꦶꦏꦠꦫꦤ꧀ꦠꦶ ꦄꦠ꧀ꦡꦺꦴ. ꦱꦺꦱꦺꦱꦸꦥꦶ ꦌꦱꦺꦮ ꦤꦪꦺꦴ. ꦌꦠ꧀ꦡ ꦕ ꦱꦷꦭꦴꦢꦪꦺꦴ ꦕꦠ꧀ꦠꦴꦫꦺꦴ ꦣꦩ꧀ꦩꦴ ꦭꦺꦴꦏꦶꦪꦭꦺꦴꦏꦸꦠ꧀ꦠꦫꦴ ꦏꦡꦶꦠꦴ, ꦮꦶꦩꦸꦠ꧀ꦠꦶꦚꦴꦟꦢꦱ꧀ꦱꦤꦁ ꦭꦺꦴꦏꦶꦪꦩꦺꦮ. ꦥꦕ꧀ꦕꦮꦺꦏ꧀ꦑꦟꦚꦴꦟꦁ ꦲꦺꦠꦁ.

ꦥꦴꦠꦸꦫꦲꦺꦴꦱꦷꦠꦶ – ‘‘ꦄꦪꦁ ꦱꦠ꧀ꦡꦴ ꦄꦮꦷꦕꦶꦠꦺꦴ ꦪꦴꦮ ꦨꦮꦒ꧀ꦒꦴ ꦱꦷꦭꦴꦢꦷꦲꦶ ꦄꦠ꧀ꦠꦤꦴ ꦄꦣꦶꦏꦠꦫꦁ ꦄꦥꦱ꧀ꦱꦤ꧀ꦠꦺꦴ ‘ꦩꦪꦴ ꦥꦛꦶꦮꦶꦢ꧀ꦣꦁ ꦤꦮꦭꦺꦴꦏꦸꦠ꧀ꦠꦫꦣꦩ꧀ꦩꦩꦺꦮ ꦱꦏ꧀ꦏꦠ꧀ꦮꦴ ꦒꦫꦸꦁ ꦏꦠ꧀ꦮꦴ ꦈꦥꦤꦶꦱ꧀ꦱꦴꦪ ꦮꦶꦲꦫꦶꦱ꧀ꦱꦴꦩꦷ’ꦠꦶ ꦕꦶꦤ꧀ꦠꦺꦠꦶ, ꦏꦴꦫꦟꦁ ꦨꦒꦮꦴ ꦕꦶꦤ꧀ꦠꦺꦠꦶ, ꦄꦠ꧀ꦡꦁ ꦮꦸꦝ꧀ꦞꦶꦮꦶꦱꦺꦱꦁ ꦕꦶꦤ꧀ꦠꦺꦠꦶ, ꦒꦕ꧀ꦖꦴꦩꦶꦱ꧀ꦱ ꦈꦱ꧀ꦱꦴꦲꦁ ꦗꦤꦺꦱ꧀ꦱꦴꦩꦷ’’ꦠꦶ ꦕꦶꦤ꧀ꦠꦺꦠ꧀ꦮꦴ ꦥꦸꦫꦠꦺꦴ ꦥꦴꦏꦛꦺꦴ ꦄꦲꦺꦴꦱꦶ, ꦄꦨꦶꦩꦸꦑꦺ ꦄꦛ꧀ꦜꦴꦱꦷꦠꦶ ꦄꦠ꧀ꦡꦺꦴ.

ꦮꦶꦲꦫꦤ꧀ꦠꦶ ꦕꦴꦠꦶ ꦌꦠ꧀ꦡ ꦪꦺꦴ ꦮꦢꦺꦪ꧀ꦪ ‘‘ꦮꦶꦲꦫꦤ꧀ꦠꦷꦠꦶ ꦮꦕꦤꦠꦺꦴ ꦥꦕ꧀ꦕꦸꦥ꧀ꦥꦤ꧀ꦤꦺꦥꦶ ꦧꦲꦹ ꦧꦸꦢ꧀ꦣꦴ’’ꦠꦶ, ꦱꦺꦴ ‘‘ꦨꦒꦮꦴꦥꦶ, ꦨꦤ꧀ꦠꦺ, ꦌꦠꦫꦲꦶ ꦄꦫꦲꦁ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ’’ꦠꦶ ꦆꦩꦶꦤꦴ ꦮꦕꦤꦺꦤ ꦥꦛꦶꦧꦴꦲꦶꦠꦧ꧀ꦧꦺꦴ.

‘‘ꦤ ꦩꦺ ꦄꦴꦕꦫꦶꦪꦺꦴ ꦄꦠ꧀ꦡꦶ, ꦱꦢꦶꦱꦺꦴ ꦩꦺ ꦤ ꦮꦶꦗ꧀ꦗꦠꦶ;

ꦱꦢꦺꦮꦏꦱ꧀ꦩꦶꦁ ꦭꦺꦴꦏꦱ꧀ꦩꦶꦁ, ꦤꦠ꧀ꦡꦶ ꦩꦺ ꦥꦛꦶꦥꦸꦒ꧀ꦒꦭꦺꦴ’’ꦠꦶ. (ꦩꦲꦴꦮ. ꧑꧑; ꦩ. ꦤꦶ. ꧑.꧒꧘꧕) –

ꦄꦴꦢꦷꦲꦶ ꦕꦱ꧀ꦱ ꦱꦸꦠ꧀ꦠꦺꦲꦶ ꦄꦚ꧀ꦚꦺꦱꦁ ꦧꦸꦢ꧀ꦣꦴꦤꦁ ꦄꦨꦴꦮꦺꦴ ꦢꦷꦥꦺꦠꦧ꧀ꦧꦺꦴ. ꦠꦱ꧀ꦩꦴꦠꦶ ꦪꦱ꧀ꦩꦴ ꦱꦧ꧀ꦧꦺꦥꦶ ꦧꦸꦢ꧀ꦣꦴ ꦱꦢ꧀ꦣꦩ꧀ꦩꦒꦫꦸꦤꦺꦴ, ꦠꦱ꧀ꦩꦴ. ꦩꦲꦠ꧀ꦠꦩꦨꦶꦏꦔ꧀ꦑꦠꦴꦠꦶ ꦩꦲꦤ꧀ꦠꦨꦴꦮꦁ ꦥꦠ꧀ꦡꦪꦩꦴꦤꦺꦤ. ꦱꦫꦁ ꦧꦸꦢ꧀ꦣꦴꦤ-ꦱꦴꦱꦤꦤ꧀ꦠꦶ ꦧꦸꦢ꧀ꦣꦴꦤꦁ ꦱꦴꦱꦤꦁ ꦱꦫꦤ꧀ꦠꦺꦤ. ꦢꦸꦠꦶꦪꦁ.