꧑꧐. ꦱꦹꦫꦶꦪꦱꦸꦠ꧀ꦠꦮꦟ꧀ꦟꦤꦴ

꧙꧑. ꦢꦱꦩꦺ ꦱꦹꦫꦶꦪꦺꦴꦠꦶ ꦱꦹꦫꦶꦪꦮꦶꦩꦴꦤꦮꦴꦱꦷ ꦢꦺꦮꦥꦸꦠ꧀ꦠꦺꦴ. ꦄꦤ꧀ꦣꦏꦴꦫꦺꦠꦶ ꦕꦏ꧀ꦑꦸꦮꦶꦚ꧀ꦚꦴꦟꦸꦥ꧀ꦥꦠ꧀ꦠꦶꦤꦶꦮꦴꦫꦟꦺꦤ ꦄꦤ꧀ꦣꦨꦴꦮꦏꦫꦟꦺ. ꦮꦶꦫꦺꦴꦕꦠꦷꦠꦶ ꦮꦺꦫꦺꦴꦕꦤꦺꦴ. ꦩꦟ꧀ꦝꦭꦷꦠꦶ ꦩꦟ꧀ꦝꦭꦱꦟ꧀ꦜꦴꦤꦺꦴ. ꦩꦴ, ꦫꦴꦲꦸ, ꦒꦶꦭꦷ ꦕꦫꦩꦤ꧀ꦠꦭꦶꦏ꧀ꦑꦺꦠꦶ ꦄꦤ꧀ꦠꦭꦶꦏ꧀ꦑꦺ ꦕꦫꦁ ꦱꦹꦫꦶꦪꦁ, ꦫꦴꦲꦸ, ꦩꦴ ꦒꦶꦭꦷꦠꦶ ꦮꦢꦠꦶ. ꦏꦶꦁ ꦥꦤꦺꦱ ꦠꦁ ꦒꦶꦭꦠꦷꦠꦶ? ꦄꦴꦩ, ꦒꦶꦭꦠꦶ. ꦫꦴꦲꦸꦱ꧀ꦱ ꦲꦶ ꦄꦠ꧀ꦠꦨꦴꦮꦺꦴ ꦩꦲꦴ, ꦈꦕ꧀ꦕꦠ꧀ꦠꦤꦺꦤ ꦄꦛ꧀ꦜꦪꦺꦴꦗꦤꦱꦠꦴꦣꦶꦏꦴꦤꦶ ꦕꦠ꧀ꦠꦴꦫꦶ ꦪꦺꦴꦗꦤꦱꦲꦱ꧀ꦱꦴꦤꦶ, ꦧꦴꦲꦤ꧀ꦠꦫꦩꦱ꧀ꦱ ꦢ꧀ꦮꦴꦢꦱꦪꦺꦴꦗꦤꦱꦠꦴꦤꦶ, ꦧꦲꦭꦠ꧀ꦠꦺꦤ ꦖ ꦪꦺꦴꦗꦤꦱꦠꦴꦤꦶ, ꦱꦷꦱꦁ ꦤꦮ ꦪꦺꦴꦗꦤꦱꦠꦁ, ꦤꦭꦴꦛꦁ ꦠꦶꦪꦺꦴꦗꦤꦱꦠꦁ, ꦨꦩꦸꦏꦤ꧀ꦠꦫꦁ ꦥꦟ꧀ꦟꦴꦱꦪꦺꦴꦗꦤꦁ, ꦩꦸꦑꦁ ꦢ꧀ꦮꦶꦪꦺꦴꦗꦤꦱꦠꦁ, ꦓꦴꦤꦁ ꦠꦶꦪꦺꦴꦗꦤꦱꦠꦁ, ꦩꦸꦑꦴꦣꦴꦤꦁ ꦠꦶꦪꦺꦴꦗꦤꦱꦠꦒꦩ꧀ꦨꦷꦫꦁ ꦲꦠ꧀ꦡꦠꦭꦥꦴꦢꦠꦭꦴꦤꦶ ꦥꦸꦡꦸꦭꦠꦺꦴ ꦢ꧀ꦮꦶꦪꦺꦴꦗꦤꦱꦠꦴꦤꦶ. ꦄꦔ꧀ꦒꦸꦭꦶꦥꦧ꧀ꦧꦴꦤꦶ ꦥꦟ꧀ꦟꦴꦱ ꦪꦺꦴꦗꦤꦴꦤꦶ. ꦱꦺꦴ ꦕꦤ꧀ꦢꦶꦩꦱꦹꦫꦶꦪꦺ ꦮꦶꦫꦺꦴꦕꦩꦴꦤꦺ ꦢꦶꦱ꧀ꦮꦴ ꦆꦱ꧀ꦱꦴꦥꦏꦠꦺꦴ ꦠꦺꦱꦁ ꦒꦩꦤꦮꦷꦡꦶꦁ ꦎꦠꦫꦶꦠ꧀ꦮꦴ ꦩꦸꦑꦁ ꦮꦶꦮꦫꦶꦠ꧀ꦮꦴ ꦠꦶꦛ꧀ꦜꦠꦶ. ꦕꦤ꧀ꦢꦮꦶꦩꦴꦤꦁ ꦱꦹꦫꦶꦪꦮꦶꦩꦴꦤꦁ ꦮꦴ ꦠꦶꦪꦺꦴꦗꦤꦱꦠꦶꦏꦺ ꦩꦲꦴꦤꦫꦏꦺ ꦥꦏ꧀ꦑꦶꦠ꧀ꦠꦁ ꦮꦶꦪ ꦲꦺꦴꦠꦶ. ꦮꦶꦩꦴꦤꦺ ꦄꦣꦶꦮꦠ꧀ꦡꦴ ꦢꦺꦮꦠꦴ ꦩꦫꦟꦨꦪꦠꦗ꧀ꦗꦶꦠꦴ ꦌꦏꦥ꧀ꦥꦲꦴꦫꦺꦤꦺꦮ ꦮꦶꦫꦮꦤ꧀ꦠꦶ. ꦱꦺꦴ ꦥꦤ ꦮꦶꦩꦴꦤꦁ ꦏꦢꦴꦕꦶ ꦲꦠ꧀ꦡꦺꦤ ꦖꦴꦢꦺꦠꦶ, ꦏꦢꦴꦕꦶ ꦲꦤꦸꦏꦱ꧀ꦱ ꦲꦺꦛ꧀ꦜꦴ ꦥꦏ꧀ꦑꦶꦥꦠꦶ, ꦏꦢꦴꦕꦶ ꦗꦶꦮ꧀ꦲꦴꦪ ꦥꦫꦶꦩꦗ꧀ꦗꦠꦶ, ꦏꦢꦴꦕꦶ ꦄꦮꦒꦟ꧀ꦝꦏꦴꦫꦏꦁ ꦨꦸꦚ꧀ꦗꦤ꧀ꦠꦺꦴ ꦮꦶꦪ ꦏꦥꦺꦴꦭꦤ꧀ꦠꦫꦺ ꦜꦥꦺꦠꦶ. ꦮꦺꦒꦁ ꦥꦤ ꦮꦴꦫꦺꦠꦸꦁ ꦤ ꦱꦏ꧀ꦏꦺꦴꦠꦶ. ꦱꦕꦺ ꦮꦴꦫꦺꦱ꧀ꦱꦴꦩꦷꦠꦶ ꦒꦟ꧀ꦝꦏꦁ ꦏꦠ꧀ꦮꦴ ꦠꦶꦛ꧀ꦜꦺꦪ꧀ꦪ, ꦩꦠ꧀ꦡꦏꦁ ꦠꦱ꧀ꦱ ꦨꦶꦤ꧀ꦢꦶꦠ꧀ꦮꦴ ꦤꦶꦏ꧀ꦑꦩꦺꦪ꧀ꦪ, ꦄꦴꦏꦝ꧀ꦞꦶꦠ꧀ꦮꦴ ꦮꦴ ꦤꦁ ꦎꦤꦩꦺꦪ꧀ꦪ. ꦠꦱ꧀ꦩꦴ ꦮꦶꦩꦴꦤꦺꦤ ꦱꦲꦺꦮ ꦒꦕ꧀ꦖꦠꦶ. ꦥꦗꦁ ꦩꦩꦤ꧀ꦠꦶ ꦕꦤ꧀ꦢꦶꦩꦱꦹꦫꦶꦪꦴ ꦏꦶꦫ ꦢ꧀ꦮꦺꦥꦶ ꦢꦺꦮꦥꦸꦠ꧀ꦠꦴ ꦩꦲꦴꦱꦩꦪꦱꦸꦠ꧀ꦠꦏꦡꦤꦢꦶꦮꦱꦺ ꦱꦺꦴꦠꦴꦥꦠ꧀ꦠꦶꦦꦭꦁ ꦥꦠ꧀ꦠꦴ. ꦠꦺꦤ ꦨꦒꦮꦴ ‘‘ꦥꦗꦁ ꦩꦩ’’ꦤ꧀ꦠꦶ ꦄꦴꦲ, ꦥꦸꦠ꧀ꦠꦺꦴ ꦩꦩ ꦌꦱꦺꦴꦠꦶ ꦄꦠ꧀ꦡꦺꦴ. ꦢꦱꦩꦁ.

ꦥꦜꦩꦺꦴ ꦮꦒ꧀ꦒꦺꦴ.