꧘. ꦒꦲꦛ꧀ꦜꦮꦤ꧀ꦢꦤꦴꦱꦸꦠ꧀ꦠꦮꦟ꧀ꦟꦤꦴ

꧒꧖꧔. ꦄꦛ꧀ꦜꦩꦺ ꦥꦸꦡꦸꦢ꧀ꦢꦶꦱꦴꦠꦶ ꦕꦠꦱ꧀ꦱꦺꦴ ꦢꦶꦱꦴ ꦕꦠꦱ꧀ꦱꦺꦴ ꦄꦤꦸꦢꦶꦱꦴ ꦕ. ꦨꦸꦩ꧀ꦩꦴꦠꦶ ꦨꦹꦩꦶꦮꦴꦱꦶꦤꦺꦴ. ꦕꦶꦫꦫꦠ꧀ꦠꦱꦩꦴꦲꦶꦠꦺꦠꦶ ꦈꦥꦕꦴꦫꦥ꧀ꦥꦤꦴꦲꦶ ꦕꦶꦫꦫꦠ꧀ꦠꦱꦩꦴꦲꦶꦠꦕꦶꦠ꧀ꦠꦺ. ꦮꦤ꧀ꦢꦺꦠꦶ ꦮꦤ꧀ꦢꦴꦩꦶ. ꦧ꧀ꦫꦲ꧀ꦩꦕꦫꦶꦪꦥꦫꦴꦪꦟꦺꦠꦶ ꦢꦱꦥꦶ ꦮꦱ꧀ꦱꦴꦤꦶ ꦮꦷꦱꦠꦶꦥꦶ ꦮꦱ꧀ꦱꦴꦤꦶ…ꦥꦺ… ꦱꦛ꧀ꦜꦶꦥꦶ ꦮꦱ꧀ꦱꦴꦤꦶ ꦄꦴꦥꦴꦟꦏꦺꦴꦛꦶꦏꦁ ꦌꦏꦱꦺꦪ꧀ꦪꦁ ꦌꦏꦨꦠ꧀ꦠꦤ꧀ꦠꦶꦄꦴꦢꦶꦏꦁ ꦱꦺꦛ꧀ꦜꦕꦫꦶꦪꦁ ꦧ꧀ꦫꦲ꧀ꦩꦕꦫꦶꦪꦁ ꦕꦫꦩꦴꦤꦺꦠꦶ ꦄꦠ꧀ꦡꦺꦴ. ꦥꦸꦚ꧀ꦚꦏꦫꦴꦠꦶ ꦕꦠꦸꦥꦕ꧀ꦕꦪꦢꦴꦤꦁ ꦏꦸꦱꦸꦩ꧀ꦨꦱꦸꦩꦤꦥꦹꦗꦴ ꦢꦷꦥꦱꦲꦱ꧀ꦱꦗꦴꦭꦤ꧀ꦠꦶ ꦌꦮꦩꦴꦢꦶꦥꦸꦚ꧀ꦚꦏꦴꦫꦏꦴ. ꦱꦷꦭꦮꦤ꧀ꦠꦺꦴꦠꦶ ꦈꦥꦴꦱꦏꦠ꧀ꦠꦺ ꦥꦠꦶꦛ꧀ꦜꦴꦪ ꦥꦚ꧀ꦕꦲꦶꦥꦶ ꦢꦱꦲꦶꦥꦶ ꦱꦷꦭꦺꦲꦶ ꦱꦩꦤ꧀ꦤꦴꦒꦠꦴ. ꦣꦩ꧀ꦩꦺꦤ ꦢꦴꦫꦁ ꦥꦺꦴꦱꦺꦤ꧀ꦠꦷꦠꦶ ꦈꦩꦔ꧀ꦒꦨꦶꦤ꧀ꦢꦤꦴꦢꦷꦤꦶ ꦄꦏꦠ꧀ꦮꦴ ꦣꦩ꧀ꦩꦶꦏꦺꦲꦶ ꦏꦱꦶꦒꦺꦴꦫꦏ꧀ꦑꦮꦟꦶꦗ꧀ꦗꦴꦢꦷꦲꦶ ꦥꦸꦠ꧀ꦠꦢꦴꦫꦁ ꦥꦺꦴꦱꦺꦤ꧀ꦠꦶ. ꦥꦩꦸꦑꦺꦴ ꦫꦡꦩꦴꦫꦸꦲꦷꦠꦶ ꦢꦺꦮꦴꦤꦁ ꦥꦩꦸꦑꦺꦴ ꦱꦺꦛ꧀ꦜꦺꦴ ꦫꦡꦁ ꦄꦴꦫꦸꦲꦶ. ꦄꦛ꧀ꦜꦩꦁ.