꧕. ꦱꦴꦤꦸꦱꦸꦠ꧀ꦠꦮꦟ꧀ꦟꦤꦴ

꧒꧓꧙. ꦥꦚ꧀ꦕꦩꦺ ꦪꦏ꧀ꦑꦺꦤ ꦒꦲꦶꦠꦺꦴ ꦲꦺꦴꦠꦷꦠꦶ ꦱꦺꦴ ꦏꦶꦫ ꦠꦱ꧀ꦱꦴ ꦈꦥꦴꦱꦶꦏꦴꦪ ꦌꦏꦥꦸꦠ꧀ꦠꦏꦺꦴ. ꦄꦡ ꦤꦁ ꦱꦴ ꦢꦲꦫꦏꦴꦭꦺꦪꦺꦮ ꦥꦧ꧀ꦧꦴꦗꦺꦱꦶ. ꦱꦺꦴ ꦥꦧ꧀ꦧꦗꦶꦠꦏꦴꦭꦠꦺꦴ ꦥꦛ꧀ꦜꦴꦪ ꦱꦷꦭꦮꦴ ꦄꦲꦺꦴꦱꦶ ꦮꦠ꧀ꦠꦱꦩ꧀ꦥꦤ꧀ꦤꦺꦴ, ꦄꦴꦕꦫꦶꦪꦸꦥꦗ꧀ꦙꦴꦪꦄꦴꦒꦤ꧀ꦠꦸꦏꦴꦢꦷꦤꦁ ꦮꦠ꧀ꦠꦁ ꦏꦠꦩꦺꦮ ꦲꦺꦴꦠꦶ, ꦩꦴꦱꦱ꧀ꦱ ꦄꦛ꧀ꦜꦩꦷꦢꦶꦮꦱꦺ ꦥꦴꦠꦺꦴ ꦮꦸꦛ꧀ꦜꦴꦪ ꦈꦢꦏꦩꦴꦭ꦳ꦏꦺ ꦈꦢꦏꦁ ꦈꦥꦛ꧀ꦜꦴꦥꦺꦠ꧀ꦮꦴ ꦣꦩ꧀ꦩꦱ꧀ꦱꦮꦤꦒ꧀ꦒꦁ ꦱꦩ꧀ꦩꦗ꧀ꦗꦶꦠ꧀ꦮꦴ ꦢꦷꦥꦁ ꦗꦴꦭꦺꦠ꧀ꦮꦴ ꦩꦣꦸꦫꦱ꧀ꦱꦫꦺꦤ ꦣꦩ꧀ꦩꦱ꧀ꦱꦮꦤꦁ ꦓꦺꦴꦱꦺꦠꦶ. ꦨꦶꦏ꧀ꦑꦹ ꦠꦱ꧀ꦱ ꦡꦴꦩꦁ ꦚꦠ꧀ꦮꦴ ‘‘ꦱꦫꦨꦴꦟꦁ ꦨꦟ, ꦱꦴꦩꦟꦺꦫꦴ’’ꦠꦶ ꦄꦗ꧀ꦙꦺꦱꦤ꧀ꦠꦶ. ꦱꦺꦴ ‘‘ꦩꦪ꧀ꦲꦁ ꦲꦢꦪꦮꦴꦠꦺꦴ ꦫꦸꦗꦠꦶ, ꦏꦴꦱꦺꦴ ꦮꦴ ꦧꦴꦣꦠꦷ’’ꦠꦶ ꦏꦶꦚ꧀ꦕꦶ ꦥꦕ꧀ꦕꦴꦲꦴꦫꦁ ꦄꦏꦠ꧀ꦮꦴ ꦣꦩ꧀ꦩꦴꦱꦤꦁ ꦄꦨꦶꦫꦸꦲꦶꦠ꧀ꦮꦴ ꦄꦴꦏꦴꦱꦒꦔ꧀ꦒꦁ ꦎꦠꦴꦫꦺꦤ꧀ꦠꦺꦴ ꦮꦶꦪ ꦱꦫꦨꦴꦟꦁ ꦮꦠ꧀ꦮꦴ ꦎꦠꦫꦤ꧀ꦠꦺꦴ – ‘‘ꦩꦪ꧀ꦲꦁ ꦩꦴꦠꦴꦥꦶꦠꦹꦤꦩ꧀ꦥꦶ ꦆꦩꦱ꧀ꦩꦶꦁ ꦱꦫꦨꦚ꧀ꦚꦺ ꦥꦠ꧀ꦠꦷ’’ꦠꦶ ꦮꦢꦠꦶ. ꦠꦱ꧀ꦱ ꦩꦤꦸꦱ꧀ꦱꦴ ꦩꦴꦠꦴꦥꦶꦠꦫꦺꦴ ꦥꦠ꧀ꦠꦶꦪꦴ ꦢꦶꦤ꧀ꦤꦨꦴꦮꦁ ꦤ ꦗꦴꦤꦤ꧀ꦠꦶ. ꦄꦤꦤ꧀ꦠꦫꦠ꧀ꦠꦨꦴꦮꦺ ꦥꦤꦱ꧀ꦱ ꦩꦴꦠꦴ ꦪꦏ꧀ꦑꦶꦤꦷ ꦗꦴꦠꦴ. ꦱꦴ ꦢꦺꦮꦠꦴꦲꦶ ꦱꦢ꧀ꦣꦶꦁ ꦄꦴꦒꦠꦴ, ꦣꦩ꧀ꦩꦁ ꦱꦸꦠ꧀ꦮꦴ – ‘‘ꦱꦴꦩꦟꦺꦫꦺꦤ ꦢꦶꦤ꧀ꦤꦥꦠ꧀ꦠꦶꦁ ꦄꦤꦸꦩꦺꦴꦢꦴꦩꦶ, ꦠꦴꦠꦴ’’ꦠꦶ ꦮꦢꦠꦶ. ꦱꦷꦭꦱꦩ꧀ꦥꦤ꧀ꦤꦴ ꦕ ꦤꦴꦩ ꦨꦶꦏ꧀ꦑꦹ ꦱꦢꦺꦮꦏꦱ꧀ꦱ ꦭꦺꦴꦏꦱ꧀ꦱ ꦥꦶꦪꦴ ꦲꦺꦴꦤ꧀ꦠꦷꦠꦶ ꦠꦱ꧀ꦩꦶꦁ ꦱꦴꦩꦟꦺꦫꦺ ꦢꦺꦮꦠꦴ ꦱꦭꦗ꧀ꦗꦴ ꦱꦒꦴꦫꦮꦴ ꦩꦲꦴꦧ꧀ꦫꦲ꧀ꦩꦁ ꦮꦶꦪ ꦄꦒ꧀ꦒꦶꦏ꧀ꦑꦤ꧀ꦣꦁ ꦮꦶꦪ ꦕ ꦤꦁ ꦩꦚ꧀ꦚꦤ꧀ꦠꦶ. ꦱꦴꦩꦟꦺꦫꦺ ꦒꦴꦫꦮꦺꦤ ꦠꦁ ꦪꦏ꧀ꦑꦶꦤꦶꦁ ꦒꦫꦸꦁ ꦏꦠ꧀ꦮꦴ ꦥꦱ꧀ꦱꦤ꧀ꦠꦶ. ꦣꦩ꧀ꦩꦱ꧀ꦱꦮꦤꦪꦏ꧀ꦑꦱꦩꦴꦒꦩꦴꦢꦷꦱꦸ ‘‘ꦱꦴꦤꦸꦩꦴꦠꦴ ꦱꦴꦤꦸꦩꦴꦠꦴ’’ꦠꦶ ꦪꦏ꧀ꦑꦶꦤꦶꦪꦴ ꦄꦒ꧀ꦒꦴꦱꦤꦁ ꦄꦒ꧀ꦒꦺꦴꦢꦏꦁ ꦄꦒ꧀ꦒꦥꦶꦟ꧀ꦝꦁ ꦢꦺꦤ꧀ꦠꦶ. ꦩꦲꦺꦱꦏ꧀ꦑꦴꦥꦶ ꦪꦏ꧀ꦑꦴ ꦠꦁ ꦢꦶꦱ꧀ꦮꦴ ꦩꦒ꧀ꦒꦴ ꦎꦏ꧀ꦏꦩꦤ꧀ꦠꦶ, ꦄꦴꦱꦤꦴ ꦮꦸꦛ꧀ꦜꦲꦤ꧀ꦠꦶ.

ꦄꦡ ꦑꦺꦴ ꦱꦴꦩꦟꦺꦫꦺꦴ ꦮꦸꦝ꧀ꦞꦶꦩꦤ꧀ꦮꦴꦪ ꦥꦫꦶꦥꦏ꧀ꦏꦶꦤ꧀ꦢ꧀ꦫꦶꦪꦺꦴ ꦄꦤꦨꦶꦫꦠꦶꦥꦷꦭ꦳ꦶꦠꦺꦴ ꦄꦤꦨꦶꦫꦠꦶꦁ ꦮꦶꦤꦺꦴꦢꦺꦠꦸꦁ ꦄꦱꦏ꧀ꦏꦺꦴꦤ꧀ꦠꦺꦴ ꦥꦫꦹꦭ꦳꧀ꦲꦏꦺꦱꦤꦑꦺꦴ ꦏꦶꦭꦶꦛ꧀ꦜꦤꦶꦮꦴꦱꦤꦥꦴꦫꦸꦥꦤꦺꦴ ꦏꦱ꧀ꦱꦕꦶ ꦄꦤꦴꦫꦺꦴꦕꦺꦠ꧀ꦮꦴ ꦥꦠ꧀ꦠꦕꦷꦮꦫꦩꦴꦢꦴꦪ ꦌꦏꦏꦺꦴꦮ ꦩꦴꦠꦸ ꦓꦫꦁ ꦒꦠꦺꦴ. ꦈꦥꦴꦱꦶꦏꦴ ꦥꦸꦠ꧀ꦠꦁ ꦢꦶꦱ꧀ꦮꦴ, ꦮꦤ꧀ꦢꦶꦠ꧀ꦮꦴ ꦄꦴꦲ – ‘‘ꦠꦴꦠ, ꦠ꧀ꦮꦁ ꦥꦸꦧ꧀ꦧꦺ ꦄꦴꦕꦫꦶꦪꦸꦥꦗ꧀ꦙꦴꦪꦺꦲꦶ ꦮꦴ ꦢꦲꦫꦱꦴꦩꦟꦺꦫꦺꦲꦶ ꦮꦴ ꦱꦢ꧀ꦣꦶꦁ ꦆꦣꦴꦒꦕ꧀ꦖꦱꦶ. ꦏꦱ꧀ꦩꦴ ꦌꦏꦏꦺꦴꦮ ꦄꦗ꧀ꦗ ꦄꦴꦒꦠꦺꦴ’’ꦠꦶ? ꦱꦺꦴ ꦈꦏ꧀ꦏꦟ꧀ꦜꦶꦠꦨꦴꦮꦁ ꦄꦴꦫꦺꦴꦕꦺꦱꦶ. ꦱꦢ꧀ꦣꦴ ꦈꦥꦴꦱꦶꦏꦴ ꦤꦴꦤꦥ꧀ꦥꦏꦴꦫꦺꦤ ꦓꦫꦴꦮꦴꦱꦺ ꦄꦴꦢꦷꦤꦮꦁ ꦢꦱ꧀ꦱꦺꦠ꧀ꦮꦴ ꦥꦸꦠ꧀ꦠꦁ ꦎꦮꦢꦩꦴꦤꦴꦥꦶ ꦠꦁ ꦱꦚ꧀ꦚꦴꦥꦺꦠꦸꦁ ꦄꦱꦏ꧀ꦏꦺꦴꦤ꧀ꦠꦷ, ‘‘ꦄꦥ꧀ꦥꦺꦮ ꦤꦴꦩ ꦄꦠ꧀ꦠꦤꦺꦴ ꦣꦩ꧀ꦩꦠꦴꦪꦥꦶ ꦱꦭ꧀ꦭꦏ꧀ꦑꦺꦱ꧀ꦱꦠꦷ’’ꦠꦶ ꦄꦤꦸꦪꦺꦴꦗꦺꦠ꧀ꦮꦴꦮ – ‘‘ꦠꦶꦛ꧀ꦜ, ꦠꦴꦠ, ꦪꦴꦮ ꦠꦺ ꦪꦴꦒꦸꦨꦠ꧀ꦠꦁ ꦱꦩ꧀ꦥꦴꦢꦺꦩꦶ, ꦪꦴꦒꦸꦁ ꦥꦶꦮꦶꦠ꧀ꦮꦴ ꦏꦠꦨꦠ꧀ꦠꦏꦶꦕ꧀ꦕꦱ꧀ꦱ ꦠꦺ ꦩꦤꦴꦥꦴꦤꦶ ꦮꦠ꧀ꦡꦴꦤꦶ ꦤꦷꦲꦫꦶꦠ꧀ꦮꦴ ꦢꦱ꧀ꦱꦴꦩꦷ’’ꦠꦶ ꦮꦠ꧀ꦮꦴ ꦄꦴꦱꦤꦁ ꦥꦚ꧀ꦚꦴꦥꦺꦠ꧀ꦮꦴ ꦄꦢꦴꦱꦶ. ꦤꦶꦱꦷꦢꦶ ꦱꦴꦩꦟꦺꦫꦺꦴ. ꦈꦥꦴꦱꦶꦏꦴ ꦩꦸꦲꦸꦠ꧀ꦠꦺꦤꦺꦮ ꦪꦴꦒꦸꦑꦗ꧀ꦗꦏꦁ ꦱꦩ꧀ꦥꦴꦢꦺꦠ꧀ꦮꦴ ꦄꦢꦴꦱꦶ. ꦠꦠꦺꦴ ‘‘ꦨꦠ꧀ꦠꦁ ꦱꦩ꧀ꦥꦴꦢꦺꦱ꧀ꦱꦴꦩꦷ’’ꦠꦶ ꦄꦮꦶꦢꦹꦫꦺ ꦤꦶꦱꦶꦤ꧀ꦤꦴ ꦠꦟ꧀ꦝꦸꦭꦺ ꦣꦺꦴꦮꦠꦶ. ꦠꦱ꧀ꦩꦶꦁ ꦱꦩꦪꦺ ꦱꦴ ꦪꦏ꧀ꦑꦶꦤꦷ ‘‘ꦏꦲꦁ ꦤꦸ ꦑꦺꦴ ꦱꦴꦩꦟꦺꦫꦺꦴ? ꦏꦶꦚ꧀ꦕꦶ ꦨꦶꦏ꧀ꦑꦴꦲꦴꦫꦁ ꦭꦨꦠꦶ, ꦈꦢꦴꦲꦸ ꦤꦺꦴ’’ꦠꦶ? ꦄꦴꦮꦗ꧀ꦗꦩꦴꦤꦴ ꦠꦱ꧀ꦱ ꦮꦶꦧ꧀ꦨꦩꦶꦠꦸꦏꦴꦩꦠꦴꦪ ꦤꦶꦱꦶꦤ꧀ꦤꦨꦴꦮꦁ ꦚꦠ꧀ꦮꦴ, ‘‘ꦩꦴ ꦲꦺꦮ ꦑꦺꦴ ꦩꦺ ꦢꦺꦮꦠꦴꦤꦁ ꦄꦤ꧀ꦠꦫꦺ ꦭꦗ꧀ꦗꦁ ꦈꦥ꧀ꦥꦴꦢꦺꦪ꧀ꦪ, ꦒꦕ꧀ꦖꦴꦩꦶꦱ꧀ꦱ ꦮꦶꦧ꧀ꦨꦩꦤꦺ ꦄꦤ꧀ꦠꦫꦴꦪꦁ ꦏꦫꦺꦴꦩꦷ’’ꦠꦶ ꦄꦴꦒꦤ꧀ꦠ꧀ꦮꦴ ꦱꦫꦷꦫꦺ ꦄꦣꦶꦩꦸꦕ꧀ꦕꦶꦠ꧀ꦮꦴ ꦒꦷꦮꦁ ꦥꦫꦶꦮꦠ꧀ꦠꦺꦠ꧀ꦮꦴ ꦨꦹꦩꦶꦪꦁ ꦥꦴꦠꦺꦱꦶ. ꦱꦺꦴ ꦄꦏ꧀ꦑꦷꦲꦶ ꦮꦶꦥꦫꦶꦮꦠ꧀ꦠꦺꦲꦶ ꦑꦺꦭ꦳ꦺꦤ ꦥꦒ꧀ꦓꦫꦤ꧀ꦠꦺꦤ ꦨꦹꦩꦶꦪꦁ ꦮꦶꦥ꧀ꦦꦤ꧀ꦢꦠꦶ. ꦠꦺꦤ ꦮꦸꦠ꧀ꦠꦁ ‘‘ꦪꦏ꧀ꦑꦺꦤ ꦒꦲꦶꦠꦺꦴ ꦲꦺꦴꦠꦷ’’ꦠꦶ.

ꦄꦨꦴꦱꦷꦠꦶ ꦈꦥꦴꦱꦶꦏꦴ ꦥꦸꦠ꧀ꦠꦱ꧀ꦱ ꦠꦁ ꦮꦶꦥ꧀ꦥꦏꦴꦫꦁ ꦢꦶꦱ꧀ꦮꦴ ꦮꦺꦒꦺꦤ ꦒꦤ꧀ꦠ꧀ꦮꦴ ꦥꦸꦠ꧀ꦠꦁ ꦄꦴꦭꦶꦔ꧀ꦒꦺꦠ꧀ꦮꦴ ꦈꦴꦫꦹꦱꦸ ꦤꦶꦥꦗ꧀ꦗꦴꦥꦺꦱꦶ. ꦱꦏꦭꦒꦴꦩꦮꦴꦱꦶꦤꦺꦴ ꦄꦴꦒꦤ꧀ꦠ꧀ꦮꦴ ꦧꦭꦶꦏꦩ꧀ꦩꦴꦢꦷꦤꦶ ꦏꦫꦺꦴꦤ꧀ꦠꦶ. ꦈꦥꦴꦱꦶꦏꦴ ꦥꦫꦶꦢꦺꦮꦩꦴꦤꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶ.

ꦥꦴꦛꦶꦲꦴꦫꦶꦪꦥꦏ꧀ꦑꦚ꧀ꦕꦴꦠꦶ ꦩꦤꦸꦱ꧀ꦱꦴ ‘‘ꦄꦛ꧀ꦜꦩꦷꦈꦥꦺꦴꦱꦡꦱ꧀ꦱ ꦥꦕ꧀ꦕꦸꦒ꧀ꦒꦩꦤꦚ꧀ꦕ ꦄꦤꦸꦒ꧀ꦒꦩꦤꦚ꧀ꦕ ꦏꦫꦶꦱ꧀ꦱꦴꦩꦴ’’ꦠꦶ ꦱꦠ꧀ꦠꦩꦶꦪꦴꦥꦶ ꦤꦮꦩꦶꦪꦴꦥꦶ ꦈꦥꦺꦴꦱꦡꦔ꧀ꦒꦴꦤꦶ ꦱꦩꦴꦢꦶꦪꦤ꧀ꦠꦶ, ꦕꦴꦠꦸꦢ꧀ꦢꦱꦷꦥꦤ꧀ꦤꦫꦱꦷꦤꦁ ꦥꦕ꧀ꦕꦸꦒ꧀ꦒꦩꦤꦴꦤꦸꦒ꧀ꦒꦩꦤꦁ ꦏꦫꦺꦴꦤ꧀ꦠꦴ ꦠꦺꦫꦱꦶꦪꦴꦥꦶ ꦥꦴꦛꦶꦥꦢꦺꦥꦶ ꦱꦩꦴꦢꦶꦪꦤ꧀ꦠꦶ, ‘‘ꦮꦱ꧀ꦱꦴꦮꦴꦱꦱ꧀ꦱ ꦄꦤꦸꦒ꧀ꦒꦩꦤꦁ ꦏꦫꦶꦱ꧀ꦱꦴꦩꦴ’’ꦠꦶ ꦢ꧀ꦮꦶꦤ꧀ꦤꦁ ꦥꦮꦴꦫꦟꦴꦤꦁ ꦄꦤ꧀ꦠꦫꦺ ꦄꦝ꧀ꦞꦩꦴꦱꦁ ꦤꦶꦧꦢ꧀ꦣꦸꦥꦺꦴꦱꦡꦶꦏꦴ ꦨꦮꦤ꧀ꦠꦶ. ꦆꦢꦁ ꦱꦤ꧀ꦣꦴꦪ ꦮꦸꦠ꧀ꦠꦁ ‘‘ꦥꦴꦛꦶꦲꦴꦫꦶꦪꦥꦏ꧀ꦑꦚ꧀ꦕꦴ’’ꦠꦶ. ꦄꦛ꧀ꦜꦔ꧀ꦒꦱꦸꦱꦩꦴꦒꦠꦤ꧀ꦠꦶ ꦄꦛ꧀ꦜꦔ꧀ꦒꦺꦲꦶ ꦱꦸꦛ꧀ꦜꦸ ꦱꦩꦴꦒꦠꦁ, ꦱꦩ꧀ꦥꦪꦸꦠ꧀ꦠꦤ꧀ꦠꦶ ꦄꦠ꧀ꦡꦺꦴ. ꦧ꧀ꦫꦲ꧀ꦩꦕꦫꦶꦪꦤ꧀ꦠꦶ ꦱꦺꦛ꧀ꦜꦕꦫꦶꦪꦁ. ꦤ ꦠꦺ ꦲꦶ ꦪꦏ꧀ꦑꦴ ꦏꦷꦭ꦳ꦤ꧀ꦠꦷꦠꦶ ꦤ ꦠꦺ ꦒꦲꦺꦠ꧀ꦮꦴ ꦪꦏ꧀ꦑꦴ ꦏꦶꦭꦩꦺꦤ꧀ꦠꦶ.

ꦥꦸꦤ ꦕꦴꦠꦸꦢ꧀ꦢꦱꦶꦤ꧀ꦠꦶ ꦆꦩꦴꦪ ꦒꦴꦡꦴꦪ ꦱꦴꦩꦟꦺꦫꦱ꧀ꦱ ꦏꦴꦪꦺ ꦄꦣꦶꦩꦸꦠ꧀ꦠꦴ ꦪꦏ꧀ꦑꦶꦤꦷ ꦄꦴꦲ. ꦄꦴꦮꦶ ꦮꦴ ꦪꦢꦶ ꦮꦴ ꦫꦲꦺꦴꦠꦶ ꦏꦱ꧀ꦱꦕꦶ ꦱꦩ꧀ꦩꦸꦑꦺ ꦮꦴ ꦥꦫꦩ꧀ꦩꦸꦑꦺ ꦮꦴ. ꦥꦩꦸꦠ꧀ꦪꦠ꧀ꦡꦷꦠꦶ ꦥꦩꦸꦠ꧀ꦠꦶ ꦄꦠ꧀ꦡꦶ. ꦈꦥ꧀ꦥꦕ꧀ꦕꦴꦥꦷꦠꦶ ꦈꦥ꧀ꦥꦠꦶꦠ꧀ꦮꦴꦥꦶ. ꦱꦕꦺꦥꦶ ꦱꦏꦸꦟꦺꦴ ꦮꦶꦪ ꦈꦥ꧀ꦥꦠꦶꦠ꧀ꦮꦴ ꦥꦭꦴꦪꦱꦶ, ꦠꦡꦴꦥꦶ ꦠꦺ ꦩꦺꦴꦏ꧀ꦑꦺꦴ ꦤꦠ꧀ꦡꦷꦠꦶ ꦮꦢꦠꦶ. ꦌꦮꦚ꧀ꦕ ꦥꦤ ꦮꦠ꧀ꦮꦴ ꦱꦴꦩꦟꦺꦫꦁ ꦩꦸꦚ꧀ꦕꦶ. ꦱꦴꦩꦟꦺꦫꦺꦴ ꦄꦏ꧀ꦑꦷꦤꦶ ꦈꦩ꧀ꦩꦷꦭꦺꦱꦶ, ꦩꦴꦠꦴ ꦏꦺꦱꦺ ꦥꦏꦶꦫꦶꦪ ꦄꦱ꧀ꦱꦱꦤ꧀ꦠꦷ ꦥꦱ꧀ꦱꦱꦤ꧀ꦠꦷ ꦫꦺꦴꦢꦠꦶ. ꦱꦺꦴ ‘‘ꦄꦩꦤꦸꦱ꧀ꦱꦺꦤ ꦒꦲꦶꦠꦺꦴꦩ꧀ꦲꦷ’’ꦠꦶ ꦤ ꦗꦴꦤꦴꦠꦶ. ꦎꦭꦺꦴꦏꦺꦤ꧀ꦠꦺꦴ ꦥꦤ ‘‘ꦄꦲꦁ ꦥꦸꦧ꧀ꦧꦺ ꦥꦷꦜꦺ ꦤꦶꦱꦶꦤ꧀ꦤꦺꦴ. ꦩꦴꦠꦴ ꦩꦺ ꦄꦮꦶꦢꦹꦫꦺ ꦤꦶꦱꦷꦢꦶꦠ꧀ꦮꦴ ꦠꦟ꧀ꦝꦸꦭꦺ ꦣꦺꦴꦮꦠꦶ. ꦆꦢꦴꦤꦶ ꦥꦤꦩ꧀ꦲꦶ ꦨꦹꦩꦶꦪꦁ ꦤꦶꦱꦶꦤ꧀ꦤꦺꦴ, ꦩꦴꦠꦴꦥꦶ ꦩꦺ ꦄꦱ꧀ꦱꦱꦤ꧀ꦠꦷ ꦥꦱ꧀ꦱꦱꦤ꧀ꦠꦷ ꦫꦺꦴꦢꦠꦶ, ꦱꦏꦭꦒꦴꦩꦮꦴꦱꦶꦤꦺꦴꦥꦶ ꦱꦤ꧀ꦤꦶꦥꦠꦶꦠꦴ. ꦏꦶꦁ ꦤꦸ ꦑꦺꦴ ꦌꦠ’’ꦤ꧀ꦠꦶ? ꦤꦶꦥꦤ꧀ꦤꦏꦺꦴꦮ ꦩꦠꦁ ꦮꦴ ꦄꦩ꧀ꦩꦴꦠꦶ ꦒꦴꦡꦩꦴꦲ.

ꦏꦴꦩꦺ ꦕꦗꦶꦠ꧀ꦮꦴꦤꦴꦠꦶ ꦢꦸꦮꦶꦣꦺꦥꦶ ꦏꦴꦩꦺ ꦥꦲꦴꦪ. ꦥꦸꦤꦫꦴꦒꦕ꧀ꦖꦠꦺꦠꦶ ꦮꦶꦧ꧀ꦨꦩꦤꦮꦱꦺꦤ ꦄꦴꦒꦕ꧀ꦖꦠꦶ. ꦥꦸꦤ ꦗꦷꦮꦁ ꦩꦠꦺꦴ ꦲꦶ ꦱꦺꦴꦠꦶ ꦈꦥ꧀ꦥꦧ꧀ꦧꦗꦶꦠ꧀ꦮꦴ ꦥꦸꦤ ꦗꦷꦮꦤ꧀ꦠꦺꦴꦥꦶ ꦱꦺꦴ ꦩꦠꦏꦺꦴꦮ, ꦠꦱ꧀ꦩꦴ ꦠꦩ꧀ꦥꦶ ꦫꦺꦴꦢꦤ꧀ꦠꦷꦠꦶ ꦮꦢꦠꦶ.

ꦆꦢꦴꦤꦶꦱ꧀ꦱ ꦓꦫꦴꦮꦴꦱꦺ ꦄꦴꦢꦷꦤꦮꦁ ꦢꦱ꧀ꦱꦺꦤ꧀ꦠꦷ ꦏꦸꦏ꧀ꦏꦸꦭ꦳ꦴꦠꦶꦄꦴꦢꦶꦩꦴꦲ. ꦠꦠ꧀ꦡ ꦏꦸꦏ꧀ꦏꦸꦭ꦳ꦴꦠꦶ ꦓꦫꦴꦮꦴꦱꦺꦴ ꦏꦶꦫ ꦈꦟ꧀ꦲꦛ꧀ꦜꦺꦤ ꦏꦸꦏ꧀ꦏꦸꦭ꦳ꦴ ꦤꦴꦩ ꦲꦺꦴꦠꦶ. ꦏꦱ꧀ꦱ ꦈꦗ꧀ꦙꦴꦥꦪꦴꦩꦱꦺꦠꦶ – ‘‘ꦄꦨꦶꦣꦴꦮꦡ, ꦨꦢ꧀ꦢꦁ ꦠꦺ ꦲꦺꦴꦠꦹ’’ꦠꦶ ꦌꦮꦁ ꦮꦠ꧀ꦮꦴ – ‘‘ꦪꦁ ꦠ꧀ꦮꦁ ꦮꦶꦧ꧀ꦨꦩꦶꦠꦸꦏꦴꦩꦺꦴ ꦪꦏ꧀ꦑꦺꦤ ꦥꦴꦥꦶꦠꦺꦴ, ꦆꦩꦁ ꦮꦶꦥ꧀ꦥꦏꦴꦫꦁ ꦏꦱ꧀ꦱ ꦩꦪꦁ ꦈꦗ꧀ꦙꦴꦥꦪꦴꦩ ꦤꦶꦗ꧀ꦙꦴꦥꦪꦴꦩ ꦄꦴꦫꦺꦴꦕꦪꦴꦩꦴ’’ꦠꦶ ꦮꦢꦠꦶ. ꦥꦸꦤ ꦝꦪ꧀ꦲꦶꦠꦸꦩꦶꦕ꧀ꦖꦱꦷꦠꦶꦄꦴꦢꦶꦠ꧀ꦠꦓꦫꦠꦺꦴ ꦤꦷꦲꦛꦨꦟ꧀ꦝꦁ ꦮꦶꦪ ꦓꦫꦴ ꦤꦷꦲꦫꦶꦠ꧀ꦮꦴ ꦧꦸꦢ꧀ꦣꦱꦴꦱꦤꦺ ꦥꦧ꧀ꦧꦗꦶꦠꦺꦴ ꦥꦸꦤ ꦩꦲꦴꦝꦴꦲꦱꦢꦶꦱꦺ ꦓꦫꦴꦮꦴꦱꦺ ꦝꦪ꧀ꦲꦶꦠꦸꦁ ꦆꦕ꧀ꦖꦱꦷꦠꦶ ꦄꦠ꧀ꦡꦺꦴ. ꦱꦺꦴ ꦩꦴꦠꦫꦶ ꦏꦡꦺꦤ꧀ꦠꦶꦪꦴ ꦏꦡꦺꦤ꧀ꦠꦶꦪꦴ ꦱꦭ꧀ꦭꦏ꧀ꦑꦺꦠ꧀ꦮꦴ ꦲꦶꦫꦺꦴꦠ꧀ꦠꦥ꧀ꦥꦁ ꦥꦛꦶꦭꦨꦶꦠ꧀ꦮꦴ, ‘‘ꦤꦠ꧀ꦡꦶ ꦩꦪ꧀ꦲꦁ ꦒꦶꦲꦶꦨꦴꦮꦺꦤ ꦄꦠ꧀ꦡꦺꦴ’’ꦠꦶ ꦄꦴꦲ. ꦄꦡꦱ꧀ꦱ ꦩꦴꦠꦴ ‘‘ꦱꦴꦣꦸ, ꦠꦴꦠꦴ’’ꦠꦶ ꦠꦸꦛ꧀ꦜꦴ ꦥꦟꦷꦠꦨꦺꦴꦗꦤꦁ ꦨꦺꦴꦗꦺꦠ꧀ꦮꦴ, ‘‘ꦏꦠꦶ ꦮꦱ꧀ꦱꦺꦴꦱꦶ, ꦠꦴꦠꦴ’’ꦠꦶ ꦥꦸꦕ꧀ꦖꦶ. ꦥꦫꦶꦥꦸꦟ꧀ꦟꦮꦱ꧀ꦱꦺꦴꦩ꧀ꦲꦶ ꦈꦥꦴꦱꦶꦏꦺꦠꦶ. ‘‘ꦠꦺꦤ ꦲꦶ, ꦠꦴꦠ, ꦈꦥꦱꦩ꧀ꦥꦢꦁ ꦏꦫꦺꦴꦲꦷ’’ꦠꦶ ꦕꦷꦮꦫꦱꦴꦛꦏꦺ ꦄꦢꦴꦱꦶ. ꦱꦺꦴ ꦠꦶꦕꦷꦮꦫꦁ ꦏꦴꦫꦴꦥꦺꦠ꧀ꦮꦴ ꦈꦥꦱꦩ꧀ꦥꦤ꧀ꦤꦺꦴ ꦧꦸꦢ꧀ꦣꦮꦕꦤꦁ ꦈꦒ꧀ꦒꦟ꧀ꦲꦤ꧀ꦠꦺꦴ ꦠꦺꦥꦶꦛꦏꦺꦴ ꦲꦸꦠ꧀ꦮꦴ ꦱꦷꦭꦴꦢꦷꦤꦁ ꦄꦴꦒꦠꦛ꧀ꦜꦴꦤꦺ ꦠꦁ ꦠꦁ ꦥꦹꦫꦺꦤ꧀ꦠꦺꦴ ꦤꦕꦶꦫꦱ꧀ꦱꦺꦮ ꦄꦫꦲꦠ꧀ꦠꦁ ꦥꦠ꧀ꦮꦴ ꦩꦲꦴꦣꦩ꧀ꦩꦏꦡꦶꦏꦺꦴ ꦲꦸꦠ꧀ꦮꦴ ꦮꦷꦱꦮꦱ꧀ꦱꦱꦠꦁ ꦜꦠ꧀ꦮꦴ ꦱꦏꦭꦗꦩ꧀ꦧꦸꦢꦷꦥꦁ ꦑꦺꦴꦨꦺꦠ꧀ꦮꦴ ꦥꦫꦶꦤꦶꦧ꧀ꦧꦴꦪꦶ. ꦥꦚ꧀ꦕꦩꦁ.