꧑. ꦆꦤ꧀ꦢꦏꦱꦸꦠ꧀ꦠꦮꦟ꧀ꦟꦤꦴ

꧒꧓꧕. ꦪꦏ꧀ꦑꦱꦁꦪꦸꦠ꧀ꦠꦱ꧀ꦱ ꦥꦜꦩꦺ ꦆꦤ꧀ꦢꦏꦱ꧀ꦱꦴꦠꦶ ꦆꦤ꧀ꦢꦏꦹꦛꦤꦶꦮꦴꦱꦶꦤꦺꦴ ꦪꦏ꧀ꦑꦱ꧀ꦱ. ꦪꦏ꧀ꦑꦠꦺꦴ ꦲꦶ ꦏꦹꦛꦺꦤ, ꦏꦹꦛꦠꦺꦴ ꦕ ꦪꦏ꧀ꦑꦺꦤ ꦤꦴꦩꦁ ꦭꦢ꧀ꦣꦁ. ꦫꦹꦥꦁ ꦤ ꦗꦷꦮꦤ꧀ꦠꦶ ꦮꦢꦤ꧀ꦠꦷꦠꦶ ꦪꦢꦶ ꦧꦸꦢ꧀ꦣꦴ ꦫꦹꦥꦁ ꦗꦷꦮꦤ꧀ꦠꦶ ꦤ ꦮꦢꦤ꧀ꦠꦶ, ꦪꦢꦶ ꦫꦹꦥꦁ ꦱꦠ꧀ꦠꦺꦴ ꦥꦸꦒ꧀ꦒꦭꦺꦴꦠꦶ ꦌꦮꦁ ꦤ ꦮꦢꦤ꧀ꦠꦷꦠꦶ ꦄꦠ꧀ꦡꦺꦴ. ꦏꦡꦁ ꦤ꧀ꦮꦪꦤ꧀ꦠꦶ ꦏꦡꦁ ꦤꦸ ꦄꦪꦁ? ꦏꦸꦠꦱ꧀ꦱ ꦄꦛ꧀ꦜꦷꦪꦏꦥꦶꦟ꧀ꦝꦩꦺꦠꦷꦠꦶ ꦄꦱ꧀ꦱ ꦱꦠ꧀ꦠꦱ꧀ꦱ ꦄꦛ꧀ꦜꦶꦪꦏꦥꦶꦟ꧀ꦝꦚ꧀ꦕ ꦏꦸꦠꦺꦴ ꦄꦴꦒꦕ꧀ꦖꦠꦶ? ꦌꦠ꧀ꦡ ꦕ ꦄꦛ꧀ꦜꦶꦒ꧀ꦒꦲꦟꦺꦤ ꦠꦷꦟꦶ ꦄꦛ꧀ꦜꦶꦱꦠꦴꦤꦶ, ꦪꦏꦥꦶꦟ꧀ꦝꦒ꧀ꦒꦲꦟꦺꦤ ꦤꦮ ꦩꦁꦱꦥꦺꦱꦶꦱꦠꦴꦤꦶ ꦒꦲꦶꦠꦴꦤꦶ. ꦪꦢꦶ ꦫꦹꦥꦁ ꦤ ꦗꦷꦮꦺꦴ, ꦄꦡꦱ꧀ꦱ ꦆꦩꦴꦤꦶ ꦕ ꦄꦛ꧀ꦜꦷꦤꦶ ꦆꦩꦴ ꦕ ꦩꦁꦱꦥꦺꦱꦶꦪꦺꦴ ꦏꦸꦠꦺꦴ ꦄꦴꦒꦕ꧀ꦖꦤ꧀ꦠꦷꦠꦶ ꦥꦸꦕ꧀ꦖꦠꦶ. ꦏꦡꦁ ꦤ꧀ꦮꦪꦁ ꦱꦗ꧀ꦗꦠꦶ ꦒꦧ꧀ꦨꦫꦱ꧀ꦩꦶꦤ꧀ꦠꦶ ꦏꦺꦤ ꦤꦸ ꦏꦴꦫꦟꦺꦤ ꦄꦪꦁ ꦱꦠ꧀ꦠꦺꦴ ꦩꦴꦠꦸꦏꦸꦕ꧀ꦖꦶꦱ꧀ꦩꦶꦁ ꦱꦗ꧀ꦗꦠꦶ ꦭꦒ꧀ꦒꦠꦶ, ꦠꦶꦛ꧀ꦜꦠꦷꦠꦶ? ꦥꦸꦒ꧀ꦒꦭꦮꦴꦢꦷ ꦏꦶꦫꦺꦱ ꦪꦏ꧀ꦑꦺꦴ, ‘‘ꦌꦏꦥ꧀ꦥꦲꦴꦫꦺꦤꦺꦮ ꦱꦠ꧀ꦠꦺꦴ ꦩꦴꦠꦸꦏꦸꦕ꧀ꦖꦶꦱ꧀ꦩꦶꦁ ꦤꦶꦧ꧀ꦧꦠ꧀ꦠꦠꦷ’’ꦠꦶ ꦒꦲꦺꦠ꧀ꦮꦴ ꦒꦧ꧀ꦨꦱꦺꦪ꧀ꦪꦏꦱꦠ꧀ꦠꦱ꧀ꦱ ꦩꦴꦠꦴ ꦩꦕ꧀ꦖꦩꦁꦱꦴꦢꦷꦤꦶ ꦑꦴꦢꦠꦶ, ꦱꦧ꧀ꦧꦴꦤꦶ ꦌꦏꦫꦠ꧀ꦠꦶꦮꦴꦱꦺꦤ ꦥꦕꦶꦠ꧀ꦮꦴ ꦦꦺꦟꦁ ꦮꦶꦪ ꦮꦶꦭꦷꦪꦤ꧀ꦠꦶ. ꦪꦢꦶ ꦫꦹꦥꦁ ꦱꦠ꧀ꦠꦺꦴ ꦤ ꦨꦮꦺꦪ꧀ꦪ, ꦌꦮꦩꦺꦮ ꦮꦶꦭꦷꦪꦺꦪ꧀ꦪꦴꦠꦶ ꦭꦢ꧀ꦣꦶꦪꦴ ꦌꦮꦩꦴꦲ. ꦄꦡꦱ꧀ꦱ ꦨꦒꦮꦴ – ‘‘ꦤ ꦩꦴꦠꦸꦏꦸꦕ꧀ꦖꦶꦱ꧀ꦩꦶꦁ ꦌꦏꦥ꧀ꦥꦲꦴꦫꦺꦤꦺꦮ ꦤꦶꦧ꧀ꦧꦠ꧀ꦠꦠꦶ, ꦄꦤꦸꦥꦸꦧ꧀ꦧꦺꦤ ꦥꦤ ꦮꦝ꧀ꦞꦠꦷ’’ꦠꦶ ꦢꦱ꧀ꦱꦺꦤ꧀ꦠꦺꦴ ꦥꦜꦩꦁ ꦏꦭꦭꦁ ꦲꦺꦴꦠꦷꦠꦶꦄꦴꦢꦶꦩꦴꦲ. ꦠꦠ꧀ꦡ ꦥꦜꦩꦤ꧀ꦠꦶ ꦥꦜꦩꦺꦤ ꦥꦛꦶꦱꦤ꧀ꦣꦶꦮꦶꦚ꧀ꦚꦴꦟꦺꦤ ꦱꦢ꧀ꦣꦶꦁ ꦠꦶꦱ꧀ꦱꦺꦴꦠꦶ ꦮꦴ ꦦꦸꦱ꧀ꦱꦺꦴꦠꦶ ꦮꦴ ꦤꦴꦩꦁ ꦤꦠ꧀ꦡꦶ, ꦄꦡ ꦑꦺꦴ ꦠꦷꦲꦶ ꦗꦴꦠꦶꦈꦟ꧀ꦟꦁꦱꦹꦲꦶ ꦏꦠꦱꦸꦠ꧀ꦠꦒ꧀ꦒꦺ ꦱꦟ꧀ꦜꦶꦠꦠꦺꦭꦧꦶꦤ꧀ꦢꦸꦥ꧀ꦥꦩꦴꦟꦁ ꦏꦭꦭꦁ ꦲꦺꦴꦠꦶ, ꦪꦁ ꦱꦤ꧀ꦣꦴꦪ ꦮꦸꦠ꧀ꦠꦁ –

‘‘ꦠꦶꦭꦠꦺꦭꦱ꧀ꦱ ꦪꦡꦴ ꦧꦶꦤ꧀ꦢꦸ, ꦱꦥ꧀ꦥꦶꦩꦟ꧀ꦝꦺꦴ ꦄꦤꦴꦮꦶꦭꦺꦴ;

ꦌꦮꦁ ꦮꦟ꧀ꦟꦥ꧀ꦥꦛꦶꦨꦴꦒꦁ, ꦏꦭꦭꦁ ꦱꦩ꧀ꦥꦮꦸꦕ꧀ꦕꦠꦷ’’ꦠꦶ.

ꦏꦭꦭꦴ ꦲꦺꦴꦠꦶ ꦄꦧ꧀ꦧꦸꦢꦤ꧀ꦠꦶ ꦠꦱ꧀ꦩꦴ ꦏꦭꦭꦴ ꦱꦠ꧀ꦠꦴꦲꦕ꧀ꦕꦪꦺꦤ ꦩꦁꦱꦣꦺꦴꦮꦤꦈꦢꦏꦮꦟ꧀ꦟꦁ ꦄꦧ꧀ꦧꦸꦢꦁ ꦤꦴꦩ ꦲꦺꦴꦠꦶ, ꦏꦭꦭꦤ꧀ꦠꦶ ꦤꦴꦩꦁ ꦄꦤ꧀ꦠꦫꦣꦴꦪꦠꦶ. ꦮꦸꦠ꧀ꦠꦩ꧀ꦥꦶ ꦕꦺꦠꦁ –

‘‘ꦱꦠ꧀ꦠꦴꦲꦁ ꦏꦭꦭꦁ ꦲꦺꦴꦠꦶ, ꦥꦫꦶꦥꦏ꧀ꦏꦁ ꦱꦩꦹꦲꦠꦁ;

ꦮꦶꦮꦛ꧀ꦛꦩꦴꦤꦁ ꦠꦧ꧀ꦨꦴꦮꦁ, ꦄꦧ꧀ꦧꦸꦢꦁ ꦤꦴꦩ ꦗꦴꦪꦠꦷ’’ꦠꦶ.

ꦄꦧ꧀ꦧꦸꦢꦴ ꦗꦴꦪꦠꦺ ꦥꦺꦱꦷꦠꦶ ꦠꦱ꧀ꦩꦴꦥꦶ ꦄꦧ꧀ꦧꦸꦢꦴ ꦱꦠ꧀ꦠꦴꦲꦕ꧀ꦕꦪꦺꦤ ꦮꦶꦭꦷꦤꦠꦶꦥꦸꦱꦢꦶꦱꦴ ꦥꦺꦱꦶ ꦤꦴꦩ ꦱꦚ꧀ꦗꦴꦪꦠꦶ. ꦱꦴ ꦩꦫꦶꦕꦦꦴꦟꦶꦠꦺꦤ ꦢꦷꦥꦺꦠꦧ꧀ꦧꦴ. ꦒꦴꦩꦢꦴꦫꦶꦏꦴ ꦲꦶ ꦱꦸꦥꦏ꧀ꦏꦴꦤꦶ ꦩꦫꦶꦕꦴꦤꦶ ꦒꦲꦺꦠ꧀ꦮꦴ ꦱꦴꦛꦏꦤ꧀ꦠꦺ ꦨꦟ꧀ꦝꦶꦏꦁ ꦏꦠ꧀ꦮꦴ ꦥꦷꦭ꦳ꦺꦠ꧀ꦮꦴ ꦩꦟ꧀ꦝꦁ ꦄꦴꦢꦴꦪ ꦏꦥꦴꦭꦺ ꦥꦏ꧀ꦑꦶꦥꦶꦠ꧀ꦮꦴ ꦄꦴꦠꦥꦺ ꦜꦥꦺꦤ꧀ꦠꦶ, ꦠꦁ ꦱꦸꦏ꧀ꦑꦩꦴꦤꦁ ꦱꦧ꧀ꦧꦨꦴꦒꦺꦲꦶ ꦩꦸꦕ꧀ꦕꦠꦶ. ꦌꦮꦫꦹꦥꦴ ꦥꦺꦱꦶ ꦲꦺꦴꦠꦶ, ꦄꦧ꧀ꦧꦸꦢꦤ꧀ꦠꦶ ꦤꦴꦩꦁ ꦄꦤ꧀ꦠꦫꦣꦴꦪꦠꦶ. ꦮꦸꦠ꧀ꦠꦩ꧀ꦥꦶ ꦕꦺꦠꦁ –

‘‘ꦱꦠ꧀ꦠꦴꦲꦁ ꦄꦧ꧀ꦧꦸꦢꦁ ꦲꦺꦴꦠꦶ, ꦥꦫꦶꦥꦏ꧀ꦏꦁ ꦱꦩꦹꦲꦠꦁ;

ꦮꦶꦮꦛ꧀ꦛꦩꦴꦤꦁ ꦠꦧ꧀ꦨꦴꦮꦁ, ꦥꦺꦱꦶ ꦤꦴꦩ ꦥꦗꦴꦪꦠꦷ’’ꦠꦶ.

ꦥꦺꦱꦶ ꦤꦶꦧ꧀ꦧꦠ꧀ꦠꦠꦷ ꦓꦤꦺꦴꦠꦶ ꦠꦠꦺꦴ ꦥꦺꦱꦶꦠꦺꦴ ꦱꦠ꧀ꦠꦴꦲꦕ꧀ꦕꦪꦺꦤ ꦏꦸꦏ꧀ꦏꦸꦛꦟ꧀ꦝꦱꦟ꧀ꦜꦴꦤꦺꦴ ꦓꦤꦺꦴ ꦤꦴꦩ ꦩꦁꦱꦥꦶꦟ꧀ꦝꦺꦴ ꦤꦶꦧ꧀ꦧꦠ꧀ꦠꦠꦶ, ꦥꦺꦱꦷꦠꦶ ꦤꦴꦩꦁ ꦄꦤ꧀ꦠꦫꦣꦴꦪꦠꦶ. ꦮꦸꦠ꧀ꦠꦩ꧀ꦥꦶ ꦕꦺꦠꦁ –

‘‘ꦱꦠ꧀ꦠꦴꦲꦁ ꦥꦺꦱꦶ ꦨꦮꦠꦶ, ꦥꦫꦶꦥꦏ꧀ꦏꦁ ꦱꦩꦹꦲꦠꦁ;

ꦮꦶꦮꦛ꧀ꦛꦩꦴꦤꦁ ꦠꦧ꧀ꦨꦴꦮꦁ, ꦓꦤꦺꦴꦠꦶ ꦤꦴꦩ ꦗꦴꦪꦠꦶ.

‘‘ꦪꦡꦴ ꦏꦸꦏ꧀ꦏꦸꦛꦶꦪꦴ ꦄꦟ꧀ꦝꦁ, ꦱꦩꦤ꧀ꦠꦴ ꦥꦫꦶꦩꦟ꧀ꦝꦭꦁ;

ꦌꦮꦁ ꦓꦤꦱ꧀ꦱ ꦱꦟ꧀ꦜꦴꦤꦁ, ꦤꦶꦧ꧀ꦧꦠ꧀ꦠꦁ ꦏꦩ꧀ꦩꦥꦕ꧀ꦕꦪꦴ’’ꦠꦶ.

ꦓꦤꦴ ꦥꦱꦴꦑꦴ ꦗꦴꦪꦤ꧀ꦠꦷꦠꦶ ꦥꦚ꧀ꦕꦩꦺ ꦱꦠ꧀ꦠꦴꦲꦺ ꦢ꧀ꦮꦶꦤ꧀ꦤꦁ ꦲꦠ꧀ꦡꦥꦴꦢꦴꦤꦁ ꦱꦷꦱꦱ꧀ꦱ ꦕꦠ꧀ꦡꦴꦪ ꦥꦚ꧀ꦕ ꦥꦷꦭ꦳ꦏꦴ ꦗꦴꦪꦤ꧀ꦠꦶ, ꦪꦁ ꦱꦤ꧀ꦣꦴꦪꦺꦠꦁ ꦮꦸꦠ꧀ꦠꦁ ‘‘ꦥꦚ꧀ꦕꦩꦺ, ꦨꦶꦏ꧀ꦑꦮꦺ, ꦱꦠ꧀ꦠꦴꦲꦺ ꦥꦚ꧀ꦕ ꦥꦷꦭ꦳ꦏꦴ ꦱꦟ꧀ꦜꦲꦤ꧀ꦠꦶ ꦏꦩ꧀ꦩꦠꦺꦴ’’ꦠꦶ.

ꦆꦠꦺꦴ ꦥꦫꦁ ꦖꦛ꧀ꦜꦱꦠ꧀ꦠꦩꦴꦢꦷꦤꦶ ꦱꦠ꧀ꦠꦴꦲꦴꦤꦶ ꦄꦠꦶꦏ꧀ꦏꦩ꧀ꦩ ꦢꦺꦱꦤꦁ ꦱꦔ꧀ꦑꦶꦥꦶꦠ꧀ꦮꦴ ꦢ꧀ꦮꦴꦕꦠ꧀ꦠꦴꦭꦷꦱꦺ ꦱꦠ꧀ꦠꦴꦲꦺ ꦥꦫꦶꦟꦠꦏꦴꦭꦁ ꦒꦲꦺꦠ꧀ꦮꦴ ꦢꦱ꧀ꦱꦺꦤ꧀ꦠꦺꦴ ꦏꦺꦱꦴꦠꦶꦄꦴꦢꦶꦩꦴꦲ. ꦠꦠ꧀ꦡ ꦏꦺꦱꦴ ꦭꦺꦴꦩꦴ ꦤꦑꦴꦥꦶ ꦕꦴꦠꦶ ꦢ꧀ꦮꦴꦕꦠ꧀ꦠꦴꦭꦷꦱꦺ ꦱꦠ꧀ꦠꦴꦲꦺ ꦌꦠꦴꦤꦶ ꦗꦴꦪꦤ꧀ꦠꦶ.

ꦠꦺꦤ ꦱꦺꦴ ꦠꦠ꧀ꦡ ꦪꦴꦥꦺꦠꦷꦠꦶ ꦠꦱ꧀ꦱ ꦲꦶ ꦤꦴꦨꦶꦠꦺꦴ ꦈꦛ꧀ꦜꦶꦠꦺꦴ ꦤꦴꦭ꦳ꦺꦴ ꦩꦴꦠꦸ ꦈꦢꦫꦥꦛꦭꦺꦤ ꦌꦏꦴꦧꦢ꧀ꦣꦺꦴ ꦲꦺꦴꦠꦶ, ꦱꦺꦴ ꦈꦥ꧀ꦥꦭꦢꦟ꧀ꦝꦏꦺꦴ ꦮꦶꦪ ꦖꦶꦢ꧀ꦢꦺꦴ, ꦠꦺꦤ ꦄꦴꦲꦴꦫꦫꦱꦺꦴ ꦱꦁꦱꦫꦶꦠ꧀ꦮꦴ ꦄꦴꦲꦴꦫꦱꦩꦸꦛ꧀ꦜꦴꦤꦫꦹꦥꦁ ꦱꦩꦸꦛ꧀ꦜꦴꦥꦺꦠꦶ. ꦌꦮꦁ ꦱꦺꦴ ꦢꦱ ꦩꦴꦱꦺ ꦪꦴꦥꦺꦠꦶ. ꦩꦴꦠꦸꦏꦸꦕ꧀ꦖꦶꦒꦠꦺꦴ ꦤꦫꦺꦴꦠꦶ ꦩꦴꦠꦸꦪꦴ ꦠꦶꦫꦺꦴꦏꦸꦕ꧀ꦖꦶꦒꦠꦺꦴ, ꦏꦸꦕ꧀ꦖꦶꦪꦴ ꦄꦧ꧀ꦨꦤ꧀ꦠꦫꦒꦠꦺꦴꦠꦶ ꦄꦠ꧀ꦡꦺꦴ. ꦆꦠꦶ ꦨꦒꦮꦴ ‘‘ꦌꦮꦁ ꦑꦺꦴ, ꦪꦏ꧀ꦑ, ꦄꦪꦁ ꦱꦠ꧀ꦠꦺꦴ ꦄꦤꦸꦥꦸꦧ꧀ꦧꦺꦤ ꦩꦴꦠꦸꦏꦸꦕ꧀ꦖꦶꦪꦁ ꦮꦝ꧀ꦞꦠꦶ, ꦤ ꦌꦏꦥ꧀ꦥꦲꦴꦫꦺꦤꦺꦮ ꦤꦶꦧ꧀ꦧꦠ꧀ꦠꦠꦷ’’ꦠꦶ ꦢꦱ꧀ꦱꦺꦠꦶ. ꦥꦜꦩꦁ.