꧔. ꦮꦸꦛ꧀ꦜꦶꦱꦸꦠ꧀ꦠꦮꦟ꧀ꦟꦤꦴ

꧗꧔. ꦕꦠꦸꦠ꧀ꦡꦺ ꦧꦷꦗꦤ꧀ꦠꦶ ꦈꦥ꧀ꦥꦠꦤ꧀ꦠꦴꦤꦁ ꦱꦠ꧀ꦠꦮꦶꦣꦁ ꦣꦚ꧀ꦚꦧꦷꦗꦁ ꦱꦺꦛ꧀ꦜꦁ. ꦠꦱ꧀ꦩꦶꦚ꧀ꦲꦶ ꦈꦒ꧀ꦒꦠꦺ ꦗꦤꦥꦢꦺꦴ ꦑꦺꦩꦺꦴ ꦲꦺꦴꦠꦶ ꦱꦸꦨꦶꦏ꧀ꦑꦺꦴ. ꦤꦶꦥꦠꦠꦤ꧀ꦠꦶ ꦤꦶꦥꦠꦤ꧀ꦠꦴꦤꦁ ꦩꦺꦓꦮꦸꦛ꧀ꦜꦶ ꦱꦺꦛ꧀ꦜꦴ. ꦩꦺꦓꦮꦸꦛ꧀ꦜꦶꦪꦚ꧀ꦲꦶ ꦱꦠꦶ ꦮꦶꦮꦶꦣꦴꦤꦶ ꦱꦱ꧀ꦱꦴꦤꦶ ꦈꦥ꧀ꦥꦗ꧀ꦗꦤ꧀ꦠꦶ, ꦗꦤꦥꦢꦴ ꦦꦷꦠꦴ ꦲꦺꦴꦤ꧀ꦠꦶ ꦑꦺꦩꦴ ꦱꦸꦨꦶꦏ꧀ꦑꦴ. ꦥꦮꦗꦩꦴꦤꦴꦤꦤ꧀ꦠꦶ ꦗꦔ꧀ꦒꦩꦴꦤꦁ ꦥꦢꦱꦴ ꦕꦫꦩꦴꦤꦴꦤꦁ ꦒꦴꦮꦺꦴ ꦱꦺꦛ꧀ꦜꦴ. ꦠꦴ ꦤꦶꦱ꧀ꦱꦴꦪ ꦲꦶ ꦱꦠ꧀ꦠꦴ ꦥꦚ꧀ꦕ ꦒꦺꦴꦫꦱꦺ ꦥꦫꦶꦨꦸꦚ꧀ꦗꦩꦴꦤꦴ ꦱꦸꦑꦁ ꦮꦶꦲꦫꦤ꧀ꦠꦶ. ꦥꦮꦢꦠꦤ꧀ꦠꦶ ꦫꦴꦗꦏꦸꦭꦩꦗ꧀ꦙꦴꦢꦷꦱꦸ ꦮꦢꦤ꧀ꦠꦴꦤꦁ ꦥꦸꦠ꧀ꦠꦺꦴ ꦮꦫꦺꦴ. ꦱꦺꦴ ꦲꦶ ꦩꦴꦠꦴꦥꦶꦠꦹꦤꦁ ꦄꦤꦠ꧀ꦡꦴꦮꦲꦁ ꦤ ꦮꦢꦠꦶ.

ꦮꦶꦗ꧀ꦗꦴ ꦈꦥ꧀ꦥꦠꦠꦁ ꦱꦺꦛ꧀ꦜꦴꦠꦶ ꦥꦸꦫꦶꦩꦥꦚ꧀ꦲꦺ ꦏꦶꦫ ꦱꦸꦠ꧀ꦮꦴ ꦱꦩꦷꦥꦺ ꦜꦶꦠꦴ ꦌꦏꦴ ꦢꦺꦮꦠꦴ ‘‘ꦢꦺꦮꦠꦺ, ꦏꦱ꧀ꦩꦴ ꦠ꧀ꦮꦁ ꦌꦠꦁ ꦥꦚ꧀ꦲꦁ ꦢꦱꦧꦭꦁ ꦥꦸꦕ꧀ꦖꦱꦶ? ꦄꦲꦁ ꦠꦺ ꦏꦡꦺꦱ꧀ꦱꦴꦩꦷ’’ꦠꦶ ꦄꦠ꧀ꦠꦤꦺꦴ ꦑꦤ꧀ꦠꦶꦪꦴ ꦭꦢ꧀ꦣꦶꦪꦴ ꦥꦚ꧀ꦲꦁ ꦏꦡꦺꦱꦶ. ꦄꦡ ꦤꦁ ꦆꦠꦫꦴ ꦢꦺꦮꦠꦴ ꦄꦴꦲ – ‘‘ꦪꦴꦮ ꦥꦣꦁꦱꦷ ꦮꦢꦺꦱꦶ ꦢꦺꦮꦠꦺ ꦪꦴꦮ ꦥꦒꦧ꧀ꦨꦴ ꦩꦸꦑꦫꦴ, ꦄꦲꦁ ꦧꦸꦢ꧀ꦣꦁ ꦨꦒꦮꦤ꧀ꦠꦁ ꦥꦸꦕ꧀ꦖꦴꦩꦶ. ꦠ꧀ꦮꦁ ꦩꦪ꧀ꦲꦁ ꦏꦱ꧀ꦩꦴ ꦏꦡꦺꦱꦷ’’ꦠꦶ? ꦤꦶꦮꦠ꧀ꦠꦺꦠ꧀ꦮꦴ ꦠꦢꦺꦮ ꦥꦚ꧀ꦲꦁ ꦢꦱꦧꦭꦁ ꦥꦸꦕ꧀ꦖꦶ. ꦄꦡꦱ꧀ꦱꦴ ꦱꦠ꧀ꦡꦴ ꦮꦶꦱ꧀ꦱꦗ꧀ꦗꦺꦤ꧀ꦠꦺꦴ ꦮꦶꦗ꧀ꦗꦴ ꦈꦥ꧀ꦥꦠꦠꦤ꧀ꦠꦶꦄꦴꦢꦶꦩꦴꦲ. ꦠꦠ꧀ꦡ ꦮꦶꦗ꧀ꦗꦴꦠꦶ ꦕꦠꦸꦩꦒ꧀ꦒꦮꦶꦗ꧀ꦗꦴ. ꦱꦴ ꦲꦶ ꦈꦥ꧀ꦥꦠꦩꦴꦤꦴ ꦱꦧ꧀ꦧꦴꦏꦸꦱꦭꦣꦩ꧀ꦩꦺ ꦱꦩꦸꦒ꧀ꦓꦴꦠꦺꦠꦶ. ꦠꦱ꧀ꦩꦴ ‘‘ꦈꦥ꧀ꦥꦠꦠꦁ ꦱꦺꦛ꧀ꦜꦴ’’ꦠꦶ ꦮꦸꦠ꧀ꦠꦴ. ꦄꦮꦶꦗ꧀ꦗꦴꦠꦶ ꦮꦛ꧀ꦛꦩꦹꦭꦏꦩꦲꦴꦄꦮꦶꦗ꧀ꦗꦴ. ꦱꦴ ꦲꦶ ꦤꦶꦥꦠꦤ꧀ꦠꦴꦤꦁ ꦎꦱꦷꦢꦤ꧀ꦠꦴꦤꦁ ꦮꦫꦴ. ꦥꦮꦗꦩꦴꦤꦴꦤꦤ꧀ꦠꦶ ꦥꦢꦱꦴ ꦕꦫꦩꦴꦤꦴꦤꦁ ꦗꦔ꧀ꦒꦩꦴꦤꦁ ꦄꦤꦺꦴꦩꦥꦸꦚ꧀ꦚꦏ꧀ꦑꦺꦠ꧀ꦠꦨꦹꦠꦺꦴ ꦱꦔ꧀ꦓꦺꦴ ꦮꦫꦺꦴ. ꦠꦚ꧀ꦲꦶ ꦠꦠ꧀ꦡ ꦠꦠ꧀ꦡ ꦢꦶꦱ꧀ꦮꦴ ꦥꦱꦤ꧀ꦤꦕꦶꦠ꧀ꦠꦴ ꦱꦠ꧀ꦠꦴ ꦱꦺꦴꦠ꧀ꦡꦶꦁ ꦥꦴꦥꦸꦟꦤ꧀ꦠꦶ. ꦧꦸꦢ꧀ꦣꦺꦴꦠꦶ ꦪꦴꦢꦶꦱꦺꦴ ꦥꦸꦠ꧀ꦠꦺꦴ ꦮꦴ ꦲꦺꦴꦠꦸ ꦄꦚ꧀ꦚꦺꦴ ꦮꦴ, ꦪꦺꦱꦁ ꦏꦺꦱꦚ꧀ꦕꦶ ꦮꦢꦩꦴꦤꦴꦤꦁ ꦧꦸꦢ꧀ꦣꦺꦴ ꦮꦫꦺꦴ. ꦠꦱ꧀ꦱ ꦲꦶ ꦣꦩ꧀ꦩꦢꦺꦱꦤꦁ ꦄꦴꦒꦩ꧀ꦩ ꦄꦤꦺꦏꦱꦠꦱꦲꦱ꧀ꦱꦴꦤꦁ ꦥꦴꦟꦴꦤꦁ ꦧꦤ꧀ꦣꦤꦩꦺꦴꦏ꧀ꦑꦺꦴ ꦲꦺꦴꦠꦷꦠꦶ. ꦕꦠꦸꦠ꧀ꦡꦁ.