꧓. ꦗꦛꦴꦱꦸꦠ꧀ꦠꦮꦟ꧀ꦟꦤꦴ

꧒꧓. ꦠꦠꦶꦪꦺ ꦄꦤ꧀ꦠꦺꦴꦗꦛꦴꦠꦶ ꦒꦴꦡꦴꦪꦁ ꦗꦛꦴꦠꦶ ꦠꦟ꧀ꦲꦴꦪ ꦗꦴꦭꦶꦤꦶꦪꦴ ꦄꦣꦶꦮꦕꦤꦁ. ꦱꦴ ꦲꦶ ꦫꦹꦥꦴꦢꦷꦱꦸ ꦄꦴꦫꦩ꧀ꦩꦟꦺꦱꦸ ꦲꦺꦛ꧀ꦜꦸꦥꦫꦶꦪꦮꦱꦺꦤ ꦥꦸꦤꦥ꧀ꦥꦸꦤꦁ ꦈꦥ꧀ꦥꦗ꧀ꦗꦤꦠꦺꦴ ꦱꦁꦱꦶꦧ꧀ꦧꦤꦛ꧀ꦜꦺꦤ ꦮꦺꦭ꦳ꦸꦒꦸꦩ꧀ꦧꦴꦢꦷꦤꦁ ꦱꦴꦑꦴꦗꦴꦭꦱꦔ꧀ꦑꦴꦠꦴ ꦗꦛꦴ ꦮꦶꦪꦴꦠꦶ ꦗꦛꦴ. ꦱꦴ ꦥꦤꦺꦱꦴ ꦱꦏꦥꦫꦶꦏ꧀ꦑꦴꦫꦥꦫꦥꦫꦶꦏ꧀ꦑꦴꦫꦺꦱꦸ ꦱꦏꦄꦠ꧀ꦠꦨꦴꦮ-ꦥꦫꦄꦠ꧀ꦠꦨꦴꦮꦺꦱꦸ ꦄꦗ꧀ꦙꦠ꧀ꦠꦶꦏꦴꦪꦠꦤ-ꦧꦴꦲꦶꦫꦴꦪꦠꦤꦺꦱꦸ ꦕ ꦈꦥ꧀ꦥꦗ꧀ꦗꦤꦠꦺꦴ ꦄꦤ꧀ꦠꦺꦴꦗꦛꦴ ꦧꦲꦶꦗꦛꦴꦠꦶ ꦮꦸꦕ꧀ꦕꦠꦶ. ꦠꦴꦪ ꦌꦮꦁ ꦈꦥ꧀ꦥꦗ꧀ꦗꦩꦴꦤꦴꦪ ꦗꦛꦴꦪ ꦗꦛꦶꦠꦴ ꦥꦗꦴ. ꦪꦡꦴ ꦤꦴꦩ ꦮꦺꦭ꦳ꦸꦗꦛꦴꦢꦷꦲꦶ ꦮꦺꦭ꦳ꦸꦄꦴꦢꦪꦺꦴ, ꦌꦮꦁ ꦠꦴꦪ ꦠꦟ꧀ꦲꦴꦗꦛꦴꦪ ꦱꦧ꧀ꦧꦴꦥꦶ ꦄꦪꦁ ꦱꦠ꧀ꦠꦤꦶꦏꦴꦪꦱꦔ꧀ꦑꦴꦠꦴ ꦥꦗꦴ ꦗꦛꦶꦠꦴ ꦮꦶꦤꦢ꧀ꦣꦴ, ꦱꦁꦱꦶꦧ꧀ꦧꦶꦠꦴꦠꦶ ꦄꦠ꧀ꦡꦺꦴ. ꦪꦱ꧀ꦩꦴ ꦕ ꦌꦮꦁ ꦗꦛꦶꦠꦴ, ꦠꦁ ꦠꦁ ꦒꦺꦴꦠꦩ ꦥꦸꦕ꧀ꦖꦴꦩꦷꦠꦶ ꦠꦱ꧀ꦩꦴ ꦠꦁ ꦥꦸꦕ꧀ꦖꦴꦩꦶ. ꦒꦺꦴꦠꦩꦴꦠꦶ ꦨꦒꦮꦤ꧀ꦠꦁ ꦒꦺꦴꦠ꧀ꦠꦺꦤ ꦄꦴꦭꦥꦠꦶ. ꦏꦺꦴ ꦆꦩꦁ ꦮꦶꦗꦛꦪꦺ ꦗꦛꦤ꧀ꦠꦶ ꦆꦩꦁ ꦌꦮꦁ ꦠꦺꦣꦴꦠꦸꦏꦁ ꦗꦛꦺꦠ꧀ꦮꦴ ꦜꦶꦠꦁ ꦗꦛꦁ ꦏꦺꦴ ꦮꦶꦗꦛꦺꦪ꧀ꦪ, ꦮꦶꦗꦛꦺꦠꦸꦁ ꦏꦺꦴ ꦱꦩꦠ꧀ꦡꦺꦴꦠꦶ ꦥꦸꦕ꧀ꦖꦠꦶ.

ꦄꦡꦱ꧀ꦱ ꦨꦒꦮꦴ ꦠꦩꦠ꧀ꦡꦁ ꦮꦶꦱ꧀ꦱꦗ꧀ꦗꦺꦤ꧀ꦠꦺꦴ ꦱꦷꦭꦺ ꦥꦠꦶꦛ꧀ꦜꦴꦪꦴꦠꦶꦄꦴꦢꦶꦩꦴꦲ. ꦠꦠ꧀ꦡ ꦱꦷꦭꦺ ꦥꦠꦶꦛ꧀ꦜꦴꦪꦴꦠꦶ ꦕꦠꦸꦥꦴꦫꦶꦱꦸꦢ꧀ꦣꦶꦱꦷꦭꦺ ꦜꦠ꧀ꦮꦴ. ꦌꦠ꧀ꦡ ꦕ ꦨꦒꦮꦴ ꦗꦛꦴꦮꦶꦗꦛꦤꦁ ꦥꦸꦕ꧀ꦖꦶꦠꦺꦴ ꦱꦷꦭꦁ ꦄꦴꦫꦨꦤ꧀ꦠꦺꦴ ꦤ ‘‘ꦄꦚ꧀ꦚꦁ ꦥꦸꦛ꧀ꦜꦺꦴ ꦄꦚ꧀ꦚꦁ ꦏꦡꦺꦠꦷ’’ꦠꦶ ꦮꦺꦢꦶꦠꦧ꧀ꦧꦺꦴ. ꦗꦛꦴꦮꦶꦗꦛꦏꦱ꧀ꦱ ꦲꦶ ꦥꦠꦶꦛ꧀ꦜꦴꦢꦱ꧀ꦱꦤꦠ꧀ꦡꦩꦺꦠ꧀ꦡ ꦱꦷꦭꦁ ꦏꦡꦶꦠꦁ.

ꦤꦫꦺꦴꦠꦶ ꦱꦠ꧀ꦠꦺꦴ. ꦱꦥꦚ꧀ꦚꦺꦴꦠꦶ ꦏꦩ꧀ꦩꦗꦠꦶꦲꦺꦠꦸꦏꦥꦛꦶꦱꦤ꧀ꦣꦶꦥꦚ꧀ꦚꦴꦪ ꦥꦚ꧀ꦚꦮꦴ. ꦕꦶꦠ꧀ꦠꦁ ꦥꦚ꧀ꦚꦚ꧀ꦕ ꦨꦴꦮꦪꦤ꧀ꦠꦶ ꦱꦩꦴꦣꦶꦚ꧀ꦕꦺꦮ ꦮꦶꦥꦱ꧀ꦱꦤꦚ꧀ꦕ ꦨꦴꦮꦪꦩꦴꦤꦺꦴ. ꦕꦶꦠ꧀ꦠꦱꦷꦱꦺꦤ ꦲꦺꦠ꧀ꦡ ꦄꦛ꧀ꦜ ꦱꦩꦴꦥꦠ꧀ꦠꦶꦪꦺꦴ ꦏꦡꦶꦠꦴ, ꦥꦚ꧀ꦚꦴꦤꦴꦩꦺꦤ ꦮꦶꦥꦱ꧀ꦱꦤꦴ. ꦄꦴꦠꦴꦥꦷꦠꦶ ꦮꦷꦫꦶꦪꦮꦴ. ꦮꦷꦫꦶꦪꦚ꧀ꦲꦶ ꦏꦶꦭꦺꦱꦴꦤꦁ ꦄꦴꦠꦴꦥꦤꦥꦫꦶꦠꦴꦥꦤꦛ꧀ꦜꦺꦤ ‘‘ꦄꦴꦠꦴꦥꦺꦴ’’ꦠꦶ ꦮꦸꦕ꧀ꦕꦠꦶ, ꦠꦢꦱ꧀ꦱ ꦄꦠ꧀ꦡꦷꦠꦶ ꦄꦴꦠꦴꦥꦷ. ꦤꦶꦥꦏꦺꦴꦠꦶ ꦤꦺꦥꦏ꧀ꦏꦁ ꦮꦸꦕ꧀ꦕꦠꦶ ꦥꦚ꧀ꦚꦴ, ꦠꦴꦪ ꦱꦩꦤ꧀ꦤꦴꦒꦠꦺꦴꦠꦶ ꦄꦠ꧀ꦡꦺꦴ. ꦆꦩꦶꦤꦴ ꦥꦢꦺꦤ ꦥꦴꦫꦶꦲꦴꦫꦶꦪꦥꦚ꧀ꦚꦁ ꦢꦱ꧀ꦱꦺꦠꦶ. ꦥꦴꦫꦶꦲꦴꦫꦶꦪꦥꦚ꧀ꦚꦴ ꦤꦴꦩ ‘‘ꦄꦪꦁ ꦏꦴꦭꦺꦴ ꦈꦢ꧀ꦢꦺꦱꦱ꧀ꦱ, ꦄꦪꦁ ꦏꦴꦭꦺꦴ ꦥꦫꦶꦥꦸꦕ꧀ꦖꦴꦪꦴ’’ꦠꦶꦄꦴꦢꦶꦤꦴ ꦤꦪꦺꦤ ꦱꦧ꧀ꦧꦠ꧀ꦡ ꦏꦴꦫꦴꦥꦶꦠꦴ ꦥꦫꦶꦲꦫꦶꦠꦧ꧀ꦧꦥꦚ꧀ꦚꦴ. ꦆꦩꦱ꧀ꦩꦶꦚ꧀ꦲꦶ ꦥꦚ꧀ꦲꦴꦧ꧀ꦪꦴꦏꦫꦟꦺ ꦠꦶꦏ꧀ꦑꦠ꧀ꦠꦸꦁ ꦥꦚ꧀ꦚꦴ ꦄꦴꦒꦠꦴ. ꦠꦠ꧀ꦡ ꦥꦜꦩꦴ ꦗꦴꦠꦶꦥꦚ꧀ꦚꦴ, ꦢꦸꦠꦶꦪꦴ ꦮꦶꦥꦱ꧀ꦱꦤꦴꦥꦚ꧀ꦚꦴ, ꦠꦠꦶꦪꦴ ꦱꦧ꧀ꦧꦏꦶꦕ꧀ꦕꦥꦫꦶꦟꦴꦪꦶꦏꦴ ꦥꦴꦫꦶꦲꦴꦫꦶꦪꦥꦚ꧀ꦚꦴ.

ꦱꦺꦴ ꦆꦩꦁ ꦮꦶꦗꦛꦪꦺ ꦗꦛꦤ꧀ꦠꦶ ꦱꦺꦴ ꦆꦩꦺꦲꦶ ꦱꦷꦭꦴꦢꦷꦲꦶ ꦱꦩꦤ꧀ꦤꦴꦒꦠꦺꦴ ꦨꦶꦏ꧀ꦑꦸ. ꦪꦡꦴ ꦤꦴꦩ ꦥꦸꦫꦶꦱꦺꦴ ꦥꦡꦮꦶꦪꦁ ꦥꦠꦶꦛ꧀ꦜꦴꦪ ꦱꦸꦤꦶꦱꦶꦠꦁ ꦱꦠ꧀ꦡꦁ ꦈꦏ꧀ꦑꦶꦥꦶꦠ꧀ꦮꦴ ꦩꦲꦤ꧀ꦠꦁ ꦮꦺꦭ꦳ꦸꦒꦸꦩ꧀ꦧꦁ ꦮꦶꦗꦛꦺꦪ꧀ꦪ, ꦌꦮꦩꦺꦮꦁ ꦱꦷꦭꦺ ꦥꦠꦶꦛ꧀ꦜꦴꦪ ꦱꦩꦴꦣꦶꦱꦶꦭꦴꦪꦁ ꦱꦸꦤꦶꦱꦶꦠꦁ ꦮꦶꦥꦱ꧀ꦱꦤꦴꦥꦚ꧀ꦚꦴꦱꦠ꧀ꦡꦁ ꦮꦷꦫꦶꦪꦧꦭꦥꦒ꧀ꦒꦲꦶꦠꦺꦤ ꦥꦴꦫꦶꦲꦴꦫꦶꦪꦥꦚ꧀ꦚꦴꦲꦠ꧀ꦡꦺꦤ ꦈꦏ꧀ꦑꦶꦥꦶꦠ꧀ꦮꦴ ꦱꦧ꧀ꦧꦩ꧀ꦥꦶ ꦠꦁ ꦄꦠ꧀ꦠꦤꦺꦴ ꦱꦤ꧀ꦠꦴꦤꦺ ꦥꦠꦶꦠꦁ ꦠꦟ꧀ꦲꦴꦗꦛꦁ ꦮꦶꦗꦛꦺꦪ꧀ꦪ ꦱꦚ꧀ꦖꦶꦤ꧀ꦢꦺꦪ꧀ꦪ ꦱꦩ꧀ꦥꦢꦴꦭꦺꦪ꧀ꦪꦴꦠꦶ.

ꦌꦠ꧀ꦠꦴꦮꦠꦴ ꦱꦺꦑꦨꦹꦩꦶꦁ ꦏꦡꦺꦠ꧀ꦮꦴ ꦆꦢꦴꦤꦶ ꦗꦛꦁ ꦮꦶꦗꦛꦺꦠ꧀ꦮꦴ ꦜꦶꦠꦁ ꦩꦲꦴꦑꦷꦟꦴꦱꦮꦁ ꦢꦱ꧀ꦱꦺꦤ꧀ꦠꦺꦴ ꦪꦺꦱꦤ꧀ꦠꦶꦄꦴꦢꦶꦩꦴꦲ. ꦌꦮꦁ ꦗꦛꦁ ꦮꦶꦗꦛꦺꦠ꧀ꦮꦴ ꦜꦶꦠꦁ ꦑꦷꦟꦴꦱꦮꦁ ꦢꦱ꧀ꦱꦺꦠ꧀ꦮꦴ ꦥꦸꦤ ꦗꦛꦴꦪ ꦮꦶꦗꦛꦤꦺꦴꦏꦴꦱꦁ ꦢꦱ꧀ꦱꦺꦤ꧀ꦠꦺꦴ ꦪꦠ꧀ꦡ ꦤꦴꦩꦚ꧀ꦕꦴꦠꦶꦄꦴꦢꦶꦩꦴꦲ. ꦠꦠ꧀ꦡ ꦤꦴꦩꦤ꧀ꦠꦶ ꦕꦠ꧀ꦠꦴꦫꦺꦴ ꦄꦫꦹꦥꦶꦤꦺꦴ ꦑꦤ꧀ꦣꦴ. ꦥꦛꦶꦓꦁ ꦫꦹꦥꦱꦚ꧀ꦚꦴ ꦕꦴꦠꦶ ꦌꦠ꧀ꦡ ꦥꦛꦶꦓꦱꦚ꧀ꦚꦴꦮꦱꦺꦤ ꦏꦴꦩꦨꦮꦺꦴ ꦒꦲꦶꦠꦺꦴ, ꦫꦹꦥꦱꦚ꧀ꦚꦴꦮꦱꦺꦤ ꦫꦹꦥꦨꦮꦺꦴ. ꦠꦺꦱꦸ ꦢ꧀ꦮꦷꦱꦸ ꦒꦲꦶꦠꦺꦱꦸ ꦄꦫꦹꦥꦨꦮꦺꦴ ꦒꦲꦶꦠꦺꦴꦮ ꦲꦺꦴꦠꦶ ꦨꦮꦱꦔ꧀ꦑꦺꦥꦺꦤꦴꦠꦶ. ꦌꦠ꧀ꦡꦺꦱꦴ ꦖꦶꦗ꧀ꦗꦠꦺ ꦗꦛꦴꦠꦶ ꦌꦠ꧀ꦡ ꦠꦺꦨꦹꦩꦏꦮꦛ꧀ꦛꦱ꧀ꦱ ꦥꦫꦶꦪꦴꦢꦶꦪꦤꦛ꧀ꦜꦴꦤꦺ ꦌꦱꦴ ꦗꦛꦴ ꦖꦶꦗ꧀ꦗꦠꦶ, ꦤꦶꦧ꧀ꦧꦴꦤꦁ ꦄꦴꦒꦩ꧀ꦩ ꦖꦶꦗ꧀ꦗꦠꦶ ꦤꦶꦫꦸꦗ꧀ꦙꦠꦷꦠꦶ ꦄꦪꦁ ꦄꦠ꧀ꦡꦺꦴ ꦢꦱ꧀ꦱꦶꦠꦺꦴ ꦲꦺꦴꦠꦶ. ꦠꦠꦶꦪꦁ.