꧕. ꦏꦠꦶꦖꦶꦤ꧀ꦢꦱꦸꦠ꧀ꦠꦮꦟ꧀ꦟꦤꦴ

꧕. ꦥꦚ꧀ꦕꦩꦺ ꦏꦠꦶ ꦖꦶꦤ꧀ꦢꦺꦠꦶ ꦖꦶꦤ꧀ꦢꦤ꧀ꦠꦺꦴ ꦏꦠꦶ ꦖꦶꦤ꧀ꦢꦺꦪ꧀ꦪ. ꦱꦺꦱꦥꦢꦺꦱꦸꦥꦶ ꦌꦱꦺꦮ ꦤꦪꦺꦴ. ꦌꦠ꧀ꦡ ꦕ ‘‘ꦖꦶꦤ꧀ꦢꦺ ꦗꦲꦺ’’ꦠꦶ ꦄꦠ꧀ꦡꦠꦺꦴ ꦌꦏꦁ. ꦒꦴꦡꦴꦧꦤ꧀ꦣꦱ꧀ꦱ ꦥꦤ ꦩꦛ꧀ꦜꦨꦴꦮꦠ꧀ꦡꦁ ꦄꦪꦁ ꦢꦺꦮꦠꦴ ꦱꦢ꧀ꦢꦥꦸꦤꦫꦸꦠ꧀ꦠꦶꦁ ꦮꦗ꧀ꦗꦪꦤ꧀ꦠꦷ ꦌꦮꦩꦴꦲ. ꦏꦠꦶ ꦱꦔ꧀ꦒꦴꦠꦶꦒꦺꦴꦠꦶ ꦏꦠꦶ ꦱꦔ꧀ꦒꦺ ꦄꦠꦶꦒꦠꦺꦴ, ꦄꦠꦶꦏ꧀ꦏꦤ꧀ꦠꦺꦴꦠꦶ ꦄꦠ꧀ꦡꦺꦴ. ꦱꦔ꧀ꦒꦴꦠꦶꦏꦺꦴꦠꦶꦥꦶ ꦥꦴꦜꦺꦴ, ꦄꦪꦩꦺꦮ ꦄꦠ꧀ꦡꦺꦴ. ꦥꦚ꧀ꦕ ꦖꦶꦤ꧀ꦢꦺꦠꦶ ꦖꦶꦤ꧀ꦢꦤ꧀ꦠꦺꦴ ꦥꦚ꧀ꦕ ꦎꦫꦩ꧀ꦨꦴꦒꦶꦪꦱꦁꦪꦺꦴꦗꦤꦴꦤꦶ ꦖꦶꦤ꧀ꦢꦺꦪ꧀ꦪ. ꦥꦚ꧀ꦕ ꦗꦲꦺꦠꦶ ꦗꦲꦤ꧀ꦠꦺꦴ ꦥꦚ꧀ꦕꦸꦢ꧀ꦣꦩ꧀ꦨꦴꦒꦶꦪꦱꦁꦪꦺꦴꦗꦤꦴꦤꦶ ꦗꦲꦺꦪ꧀ꦪ. ꦆꦣꦴꦥꦶ ꦖꦶꦤ꧀ꦢꦤꦚ꧀ꦕ ꦗꦲꦤꦚ꧀ꦕ ꦄꦠ꧀ꦡꦠꦺꦴ ꦌꦏꦩꦺꦮ, ꦨꦒꦮꦴ ꦥꦤ ꦢꦺꦮꦠꦴꦪ ꦄꦴꦫꦺꦴꦥꦶꦠꦮꦕꦤꦴꦤꦸꦫꦹꦥꦺꦤꦺꦮ ꦌꦮꦩꦴꦲ. ꦄꦡ ꦮꦴ ꦥꦴꦢꦺꦱꦸ ꦧꦢ꧀ꦣꦥꦴꦱꦱꦏꦸꦟꦺꦴ ꦮꦶꦪ ꦥꦚ꧀ꦕꦺꦴꦫꦩ꧀ꦨꦴꦒꦶꦪꦱꦁꦪꦺꦴꦗꦤꦴꦤꦶ ꦲꦺꦛ꧀ꦜꦴ ꦄꦴꦏꦝ꧀ꦞꦩꦴꦤꦴꦏꦴꦫꦴꦤꦶ ꦲꦺꦴꦤ꧀ꦠꦶ, ꦠꦴꦤꦶ ꦄꦤꦴꦒꦴꦩꦶꦩꦒ꧀ꦒꦺꦤ ꦖꦶꦤ꧀ꦢꦺꦪ꧀ꦪꦴꦠꦶ ꦮꦢꦠꦶ. ꦲꦠ꧀ꦡꦺꦲꦶ ꦒꦲꦶꦠꦫꦸꦏ꧀ꦑꦱꦴꦑꦴ ꦮꦶꦪ ꦥꦚ꧀ꦕꦸꦢ꧀ꦣꦩ꧀ꦨꦴꦒꦶꦪꦱꦁꦪꦺꦴꦗꦤꦴꦤꦶ ꦈꦥꦫꦶ ꦄꦴꦏꦝ꧀ꦞꦩꦴꦤꦴꦏꦴꦫꦴꦤꦶ ꦲꦺꦴꦤ꧀ꦠꦶ, ꦠꦴꦤꦶ ꦄꦫꦲꦠ꧀ꦠꦩꦒ꧀ꦒꦺꦤ ꦗꦲꦺꦪ꧀ꦪꦴꦠꦶ ꦮꦢꦠꦶ. ꦥꦚ꧀ꦕ ꦕꦸꦠ꧀ꦠꦫꦶ ꦨꦴꦮꦪꦺꦠꦶ ꦌꦠꦺꦱꦁ ꦱꦁꦪꦺꦴꦗꦤꦴꦤꦁ ꦖꦶꦤ꧀ꦢꦤꦠ꧀ꦡꦴꦪ ꦕꦺꦮ ꦥꦲꦴꦤꦠ꧀ꦡꦴꦪ ꦕ ꦈꦠ꧀ꦠꦫꦶ ꦄꦠꦶꦫꦺꦏꦁ ꦮꦶꦱꦺꦱꦁ ꦨꦴꦮꦺꦤ꧀ꦠꦺꦴ ꦱꦢ꧀ꦣꦴꦥꦚ꧀ꦕꦩꦴꦤꦶ ꦆꦤ꧀ꦢ꧀ꦫꦶꦪꦴꦤꦶ ꦨꦴꦮꦺꦪ꧀ꦪꦴꦠꦶ ꦄꦠ꧀ꦡꦺꦴ. ꦥꦚ꧀ꦕ ꦱꦔ꧀ꦒꦴꦠꦶꦒꦺꦴꦠꦶ ꦫꦴꦒꦱꦔ꧀ꦒꦺꦴ ꦢꦺꦴꦱꦱꦔ꧀ꦒꦺꦴ ꦩꦺꦴꦲꦱꦔ꧀ꦒꦺꦴ ꦩꦴꦤꦱꦔ꧀ꦒꦺꦴ ꦢꦶꦛ꧀ꦜꦶꦱꦔ꧀ꦒꦺꦴꦠꦶ ꦆꦩꦺ ꦥꦚ꧀ꦕ ꦱꦔ꧀ꦒꦺ ꦄꦠꦶꦏ꧀ꦏꦤ꧀ꦠꦺꦴ. ꦎꦓꦠꦶꦟ꧀ꦟꦺꦴꦠꦶ ꦮꦸꦕ꧀ꦕꦠꦷꦠꦶ ꦕꦠꦸꦫꦺꦴꦓꦠꦶꦟ꧀ꦟꦺꦴꦠꦶ ꦏꦡꦷꦪꦠꦶ. ꦆꦩꦴꦪ ꦥꦤ ꦒꦴꦡꦴꦪ ꦥꦚ꧀ꦕꦶꦤ꧀ꦢ꧀ꦫꦶꦪꦴꦤꦶ ꦭꦺꦴꦏꦶꦪꦭꦺꦴꦏꦸꦠ꧀ꦠꦫꦴꦤꦶ ꦏꦡꦶꦠꦴꦤꦷꦠꦶ.

ꦏꦠꦶꦖꦶꦤ꧀ꦢꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.