꧗. ꦥꦶꦪꦗꦴꦠꦶꦏꦱꦸꦠ꧀ꦠꦮꦟ꧀ꦟꦤꦴ

꧓꧕꧓. ꦌꦮꦁ ꦩꦺ ꦱꦸꦠꦤ꧀ꦠꦶ ꦥꦶꦪꦗꦴꦠꦶꦏꦱꦸꦠ꧀ꦠꦁ. ꦠꦠ꧀ꦡ ꦤꦺꦮ ꦏꦩ꧀ꦩꦤ꧀ꦠꦴ ꦥꦛꦶꦨꦤ꧀ꦠꦷꦠꦶ ꦤ ꦱꦧ꧀ꦧꦺꦤ ꦱꦧ꧀ꦧꦁ ꦥꦛꦶꦨꦤ꧀ꦠꦶ, ꦥꦏꦠꦶꦤꦶꦪꦴꦩꦺꦤ ꦥꦤ ꦤ ꦥꦛꦶꦨꦤ꧀ꦠꦶ. ꦢꦸꦠꦶꦪꦥꦢꦺꦥꦶ ꦌꦱꦺꦮ ꦤꦪꦺꦴ. ꦌꦠ꧀ꦡ ꦕ ꦤ ꦥꦛꦶꦨꦴꦠꦷꦠꦶ ꦤ ꦫꦸꦕ꧀ꦕꦠꦶ. ꦄꦴꦭ꦳ꦴꦲꦤꦤ꧀ꦠꦶ ꦱꦸꦱꦴꦤꦁ. ꦄꦚ꧀ꦚꦡꦠ꧀ꦠꦤ꧀ꦠꦶ ꦮꦶꦮꦟ꧀ꦟꦠꦴꦪ ꦄꦚ꧀ꦚꦡꦴꦨꦴꦮꦺꦴ. ꦆꦤ꧀ꦢ꧀ꦫꦶꦪꦴꦤꦶ ꦤꦴꦩ ꦩꦤꦺꦴꦮꦶꦚ꧀ꦚꦺꦪ꧀ꦪꦴ ꦣꦩ꧀ꦩꦴ, ꦥꦠꦶꦛ꧀ꦜꦶꦠꦺꦴꦏꦴꦱꦁ ꦥꦤ ꦱꦤ꧀ꦣꦴꦪ ꦆꦢꦁ ꦮꦸꦠ꧀ꦠꦁ. ꦥꦶꦪꦗꦴꦠꦶꦏꦴꦠꦶ ꦥꦶꦪꦠꦺꦴ ꦗꦴꦪꦤ꧀ꦠꦶ. ꦥꦶꦪꦥ꧀ꦥꦨꦴꦮꦶꦏꦴꦠꦶ ꦥꦶꦪꦠꦺꦴ ꦥꦨꦮꦤ꧀ꦠꦶ.

꧓꧕꧕. ꦱꦕꦺ ꦠꦁ, ꦩꦲꦴꦫꦴꦗꦴꦠꦶ ꦠꦱ꧀ꦱ ꦄꦠ꧀ꦡꦁ ꦄꦱꦭ꧀ꦭꦏ꧀ꦑꦪꦩꦴꦤꦴꦥꦶ ꦱꦠ꧀ꦡꦫꦶ ꦱꦢ꧀ꦣꦴꦪ ꦌꦮꦁ ꦮꦢꦠꦶ. ꦕꦫ ꦥꦶꦫꦺꦠꦶ ꦄꦥꦺꦲꦶ ꦄꦩ꧀ꦲꦴꦏꦁ ꦥꦫꦺ, ꦄꦤꦗ꧀ꦙꦠ꧀ꦠꦶꦏꦨꦹꦠꦺꦠꦶ ꦄꦠ꧀ꦡꦺꦴ. ꦄꦡ ꦮꦴ ꦕꦫ ꦥꦶꦫꦺꦠꦶ ꦥꦫꦠꦺꦴ ꦒꦕ꧀ꦖ, ꦩꦴ ꦆꦣ ꦠꦶꦛ꧀ꦜꦴꦠꦶꦥꦶ ꦄꦠ꧀ꦡꦺꦴ.

꧓꧕꧖. ꦢ꧀ꦮꦶꦣꦴ ꦖꦺꦠ꧀ꦮꦴꦠꦶ ꦄꦱꦶꦤꦴ ꦢ꧀ꦮꦺ ꦏꦺꦴꦛ꧀ꦜꦴꦱꦺ ꦏꦫꦺꦴꦤ꧀ꦠꦺꦴ ꦖꦶꦤ꧀ꦢꦶꦠ꧀ꦮꦴ. ꦄꦠ꧀ꦠꦴꦤꦁ ꦈꦥ꧀ꦦꦴꦭꦺꦱꦷꦠꦶ ꦠꦺꦤꦺꦮ ꦄꦱꦶꦤꦴ ꦄꦠ꧀ꦠꦤꦺꦴ ꦈꦢꦫꦁ ꦦꦴꦭꦺꦱꦶ. ꦪꦢꦶ ꦲꦶ ꦠꦱ꧀ꦱ ꦱꦴ ꦄꦥ꧀ꦥꦶꦪꦴ ꦨꦮꦺꦪ꧀ꦪ, ꦆꦢꦴꦤꦶ ꦄꦚ꧀ꦚꦁ ꦩꦴꦠꦸꦒꦴꦩꦁ ꦒꦟ꧀ꦲꦶꦱ꧀ꦱꦴꦩꦷꦠꦶ ꦄꦠ꧀ꦠꦴꦤꦁ ꦤ ꦓꦴꦠꦺꦪ꧀ꦪ. ꦪꦱ꧀ꦩꦴ ꦥꦤꦱ꧀ꦱ ꦱꦴ ꦥꦶꦪꦴ ꦄꦲꦺꦴꦱꦶ, ꦠꦱ꧀ꦩꦴ ꦥꦫꦭꦺꦴꦏꦺꦥꦶ ꦠꦴꦪ ꦱꦢ꧀ꦣꦶꦁ ꦱꦩꦔ꧀ꦒꦶꦨꦴꦮꦁ ꦥꦠ꧀ꦡꦪꦩꦴꦤꦺꦴ ꦌꦮꦩꦏꦴꦱꦶ.

꧓꧕꧗. ꦥꦶꦪꦴ ꦠꦺ ꦮꦗꦶꦫꦷꦠꦶ ꦌꦮꦁ ꦏꦶꦫꦱ꧀ꦱꦴ ꦄꦲꦺꦴꦱꦶ – ‘‘ꦱꦕꦴꦲꦁ, ‘ꦨꦹꦠꦥꦸꦧ꧀ꦧꦁ, ꦩꦲꦴꦫꦴꦗ, ꦆꦩꦶꦱ꧀ꦱꦴꦪꦺꦮ ꦱꦴꦮꦠ꧀ꦡꦶꦪꦁ ꦄꦚ꧀ꦚꦠꦫꦶꦱ꧀ꦱꦴ ꦆꦠ꧀ꦡꦶꦪꦴ’ꦠꦶꦄꦴꦢꦶꦏꦡꦁ ꦏꦡꦺꦪ꧀ꦪꦁ, ‘ꦏꦺꦴ ꦠꦺ ꦌꦮꦁ ꦄꦏꦴꦱꦶ, ꦄꦥꦺꦲꦶ ꦤꦠ꧀ꦡꦶ ꦌꦠ’ꦤ꧀ꦠꦶ ꦩꦁ ꦥꦛꦶꦱꦺꦣꦺꦪ꧀ꦪ, ꦮꦠ꧀ꦠꦩꦴꦤꦺꦤꦺꦮ ꦤꦁ ꦱꦚ꧀ꦚꦴꦥꦺꦱ꧀ꦱꦴꦩꦷ’’ꦠꦶ ꦕꦶꦤ꧀ꦠꦺꦠ꧀ꦮꦴ ꦌꦮꦩꦴꦲ. ꦮꦶꦥꦫꦶꦟꦴꦩꦚ꧀ꦚꦡꦴꦨꦴꦮꦴꦠꦶ ꦌꦠ꧀ꦡ ꦩꦫꦟꦮꦱꦺꦤ ꦮꦶꦥꦫꦶꦟꦴꦩꦺꦴ, ꦏꦺꦤꦕꦶ ꦱꦢ꧀ꦣꦶꦁ ꦥꦭꦴꦪꦶꦠ꧀ꦮꦴ ꦒꦩꦤꦮꦱꦺꦤ ꦄꦚ꧀ꦚꦡꦴꦨꦴꦮꦺꦴ ꦮꦺꦢꦶꦠꦧ꧀ꦧꦺꦴ.

ꦮꦴꦱꦨꦴꦪꦴꦠꦶ ꦮꦴꦱꦨꦴ ꦤꦴꦩ ꦫꦚ꧀ꦚꦺꦴ ꦌꦏꦴ ꦢꦺꦮꦷ, ꦠꦁ ꦱꦤ꧀ꦣꦴꦪꦴꦲ.

ꦥꦶꦪꦴ ꦠꦺ ꦄꦲꦤ꧀ꦠꦶ ꦏꦱ꧀ꦩꦴ ꦱꦧ꧀ꦧꦥꦕ꧀ꦖꦴ ꦄꦴꦲ? ꦌꦮꦁ ꦏꦶꦫꦱ꧀ꦱꦴ ꦄꦲꦺꦴꦱꦶ – ‘‘ꦄꦪꦁ ꦫꦴꦗꦴ ꦩꦪ꧀ꦲꦁ ꦏꦸꦥꦶꦠꦺꦴ, ꦱꦕꦴꦲꦁ ꦱꦧ꧀ꦧꦥꦜꦩꦁ ‘ꦥꦶꦪꦴ ꦠꦺ ꦄꦲ’ꦤ꧀ꦠꦶ ꦥꦸꦕ꧀ꦖꦺꦪ꧀ꦪꦁ, ‘ꦤ ꦩꦺ ꦠ꧀ꦮꦁ ꦥꦶꦪꦴ, ꦕꦫ ꦥꦶꦫꦺ’ꦠꦶ ꦮꦢꦺꦪ꧀ꦪ, ꦌꦮꦁ ꦱꦤ꧀ꦠꦺ ꦏꦡꦴ ꦥꦠꦶꦛ꧀ꦜꦴꦤꦁ ꦤ ꦭꦨꦶꦱ꧀ꦱꦠꦷ’’ꦠꦶ ꦏꦡꦴꦪ ꦥꦠꦶꦛ꧀ꦜꦴꦤꦠ꧀ꦡꦁ ꦱꦧ꧀ꦧꦥꦕ꧀ꦖꦴ ꦥꦸꦕ꧀ꦖꦶ. ꦏꦴꦱꦶꦏꦺꦴꦱꦭꦺꦱꦸ ꦖꦝ꧀ꦝꦶꦠꦨꦴꦮꦺꦤ ꦮꦶꦥꦫꦶꦟꦴꦩꦺꦴ, ꦥꦛꦶꦫꦴꦗꦹꦤꦁ ꦲꦠ꧀ꦡꦒꦩꦤꦮꦱꦺꦤ ꦄꦚ꧀ꦚꦡꦴꦨꦴꦮꦺꦴ ꦮꦺꦢꦶꦠꦧ꧀ꦧꦺꦴ.

ꦄꦴꦕꦩꦺꦲꦷꦠꦶ ꦄꦴꦕꦩꦤꦺꦴꦢꦏꦁ ꦢꦺꦲꦶ. ꦄꦴꦕꦩꦶꦠ꧀ꦮꦴ ꦲꦠ꧀ꦡꦥꦴꦢꦺ ꦣꦺꦴꦮꦶꦠ꧀ꦮꦴ ꦩꦸꦑꦁ ꦮꦶꦏ꧀ꦑꦴꦭꦺꦠ꧀ꦮꦴ ꦱꦠ꧀ꦡꦴꦫꦁ ꦤꦩꦱ꧀ꦱꦶꦠꦸꦏꦴꦩꦺꦴ ꦌꦮꦩꦴꦲ. ꦱꦺꦱꦁ ꦱꦧ꧀ꦧꦠ꧀ꦡ ꦈꦠ꧀ꦠꦴꦤꦩꦺꦮꦴꦠꦶ.

ꦥꦥꦚ꧀ꦕꦱꦹꦢꦤꦶꦪꦴ ꦩꦗ꧀ꦙꦶꦩꦤꦶꦏꦴꦪꦛ꧀ꦜꦏꦡꦴꦪ

ꦥꦶꦪꦗꦴꦠꦶꦏꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.