꧔. ꦩꦣꦸꦫꦱꦸꦠ꧀ꦠꦮꦟ꧀ꦟꦤꦴ

꧓꧑꧗. ꦌꦮꦁ ꦩꦺ ꦱꦸꦠꦤ꧀ꦠꦶ ꦩꦣꦸꦫꦱꦸꦠ꧀ꦠꦁ. ꦠꦠ꧀ꦡ ꦩꦲꦴꦏꦕ꧀ꦕꦴꦤꦺꦴꦠꦶ ꦒꦶꦲꦶꦏꦴꦭꦺ ꦈꦗ꧀ꦗꦺꦤꦶꦏꦫꦚ꧀ꦚꦺꦴ ꦥꦸꦫꦺꦴꦲꦶꦠꦥꦸꦠ꧀ꦠꦺꦴ ꦄꦨꦶꦫꦹꦥꦺꦴ ꦢꦱ꧀ꦱꦤꦷꦪꦺꦴ ꦥꦴꦱꦴꦢꦶꦏꦺꦴ ꦱꦸꦮꦟ꧀ꦟꦮꦟ꧀ꦟꦺꦴ ꦕ. ꦩꦣꦸꦫꦴꦪꦤ꧀ꦠꦶ ꦌꦮꦁꦤꦴꦩꦏꦺ ꦤꦒꦫꦺ. ꦒꦸꦤ꧀ꦢꦴꦮꦤꦺꦠꦶ ꦏꦟ꧀ꦲꦏꦒꦸꦤ꧀ꦢꦴꦮꦤꦺ. ꦄꦮꦤ꧀ꦠꦶꦥꦸꦠ꧀ꦠꦺꦴꦠꦶ ꦄꦮꦤ꧀ꦠꦶꦫꦛ꧀ꦜꦺ ꦫꦚ꧀ꦚꦺꦴ ꦣꦷꦠꦴꦪ ꦥꦸꦠ꧀ꦠꦺꦴ. ꦮꦸꦢ꧀ꦣꦺꦴ ꦕꦺꦮ ꦄꦫꦲꦴ ꦕꦴꦠꦶ ꦢꦲꦫꦁ ꦄꦫꦲꦤ꧀ꦠꦩ꧀ꦥꦶ ꦤ ꦠꦡꦴ ꦱꦩ꧀ꦨꦴꦮꦺꦤ꧀ꦠꦶ ꦪꦡꦴ ꦩꦲꦭ꧀ꦭꦏꦁ, ꦡꦺꦫꦺꦴ ꦥꦤ ꦮꦸꦢ꧀ꦣꦺꦴ ꦕꦺꦮ ꦄꦲꦺꦴꦱꦶ ꦄꦫꦲꦴ ꦕ. ꦧ꧀ꦫꦴꦲ꧀ꦩꦟꦴ, ꦨꦺꦴ ꦏꦕ꧀ꦕꦴꦤꦴꦠꦶ ꦱꦺꦴ ꦏꦶꦫ ꦫꦴꦗꦴ ꦧ꧀ꦫꦴꦲ꧀ꦩꦟꦭꦢ꧀ꦣꦶꦏꦺꦴ, ꦠꦱ꧀ꦩꦴ ꦌꦮꦩꦴꦲ. ꦧ꧀ꦫꦴꦲ꧀ꦩꦟꦺꦴꦮ ꦱꦺꦛ꧀ꦜꦺꦴ ꦮꦟ꧀ꦟꦺꦴꦠꦶꦄꦴꦢꦷꦱꦸ ꦗꦴꦠꦶꦒꦺꦴꦠ꧀ꦠꦴꦢꦷꦤꦁ ꦥꦚ꧀ꦚꦴꦥꦤꦛ꧀ꦜꦴꦤꦺ ꦧ꧀ꦫꦴꦲ꧀ꦩꦟꦴꦮ ꦱꦺꦛ꧀ꦜꦴꦠꦶ ꦢꦱ꧀ꦱꦺꦠꦶ. ꦲꦷꦤꦺꦴ ꦄꦚ꧀ꦚꦺꦴ ꦮꦟ꧀ꦟꦺꦴꦠꦶ ꦆꦠꦫꦺ ꦠꦪꦺꦴ ꦮꦟ꧀ꦟꦴ ꦲꦷꦤꦴ ꦭꦴꦩꦏꦴꦠꦶ ꦮꦢꦠꦶ. ꦱꦸꦏ꧀ꦏꦺꦴꦠꦶ ꦥꦟ꧀ꦝꦫꦺꦴ. ꦏꦟ꧀ꦲꦺꦴꦠꦶ ꦏꦴꦭ꦳ꦏꦺꦴ. ꦱꦸꦗ꧀ꦙꦤ꧀ꦠꦷꦠꦶ ꦗꦴꦠꦶꦒꦺꦴꦠ꧀ꦠꦴꦢꦶꦥꦚ꧀ꦚꦴꦥꦤꦛ꧀ꦜꦴꦤꦺꦱꦸ ꦱꦸꦗ꧀ꦙꦤ꧀ꦠꦶ. ꦧ꧀ꦫꦲ꧀ꦩꦸꦤꦺꦴ ꦥꦸꦠ꧀ꦠꦴꦠꦶ ꦩꦲꦴꦧ꧀ꦫꦲ꧀ꦩꦸꦤꦺꦴ ꦥꦸꦠ꧀ꦠꦴ. ꦎꦫꦱꦴ ꦩꦸꦑꦠꦺꦴ ꦗꦴꦠꦴꦠꦶ ꦈꦫꦺ ꦮꦱꦶꦠ꧀ꦮꦴ ꦩꦸꦑꦠꦺꦴ ꦤꦶꦏ꧀ꦑꦤ꧀ꦠꦴ, ꦈꦫꦺ ꦏꦠ꧀ꦮꦴ ꦱꦁꦮꦢ꧀ꦣꦶꦠꦴꦠꦶ ꦮꦴ ꦎꦫꦱꦴ. ꦧ꧀ꦫꦲ꧀ꦩꦗꦴꦠꦶ ꦧ꧀ꦫꦲ꧀ꦩꦠꦺꦴ ꦤꦶꦧ꧀ꦧꦠ꧀ꦠꦴ. ꦧ꧀ꦫꦲ꧀ꦩꦤꦶꦩ꧀ꦩꦶꦠꦴꦠꦶ ꦧ꧀ꦫꦲ꧀ꦩꦸꦤꦴ ꦤꦶꦩ꧀ꦩꦶꦠꦴ. ꦧ꧀ꦫꦲ꧀ꦩꦢꦴꦪꦴꦢꦴꦠꦶ ꦧ꧀ꦫꦲ꧀ꦩꦸꦤꦺꦴ ꦢꦴꦪꦴꦢꦴ. ꦓꦺꦴꦱꦺꦴꦪꦺꦮ ꦑꦺꦴ ꦌꦱꦺꦴꦠꦶ ꦮꦺꦴꦲꦴꦫꦩꦠ꧀ꦠꦩꦺꦮꦺꦠꦁ.

꧓꧑꧘. ꦆꦗ꧀ꦙꦺꦪ꧀ꦪꦴꦠꦶ ꦱꦩꦶꦗ꧀ꦙꦺꦪ꧀ꦪ, ꦪꦠ꧀ꦠꦏꦴꦤꦶ ꦣꦤꦴꦢꦷꦤꦶ ꦥꦠ꧀ꦡꦺꦪ꧀ꦪ, ꦠꦠ꧀ꦠꦏꦺꦲꦶꦱ꧀ꦱ ꦩꦤꦺꦴꦫꦡꦺꦴ ꦥꦹꦫꦺꦪ꧀ꦪꦴꦠꦶ ꦄꦠ꧀ꦡꦺꦴ. ꦑꦠ꧀ꦠꦶꦪꦺꦴꦥꦶꦱ꧀ꦱꦴꦱ꧀ꦱꦴꦠꦶ ꦑꦠ꧀ꦠꦶꦪꦺꦴꦥꦶ ꦄꦱ꧀ꦱ ꦆꦱ꧀ꦱꦫꦶꦪꦱꦩ꧀ꦥꦠ꧀ꦠꦱ꧀ꦱ ꦥꦸꦧ꧀ꦧꦸꦛ꧀ꦜꦴꦪꦷ ꦄꦱ꧀ꦱ. ꦤꦺꦱꦁ ꦌꦠ꧀ꦡ ꦏꦶꦚ꧀ꦕꦷꦠꦶ ꦤ ꦌꦠꦺꦱꦁ ꦌꦠ꧀ꦡ ꦏꦶꦚ꧀ꦕꦶ.

꧓꧒꧒. ꦄꦴꦱꦤꦺꦤ ꦮꦴ ꦤꦶꦩꦤ꧀ꦠꦺꦪ꧀ꦪꦴꦩꦴꦠꦶ ꦤꦶꦱꦶꦤ꧀ꦤꦴꦱꦤꦁ ꦥꦥ꧀ꦦꦺꦴꦛꦺꦠ꧀ꦮꦴ ꦆꦣ ꦤꦶꦱꦷꦢꦴꦠꦶ ꦮꦢꦺꦪ꧀ꦪꦴꦩ. ꦄꦨꦶꦤꦶꦩꦤ꧀ꦠꦺꦪ꧀ꦪꦴꦩꦥꦶ ꦤꦤ꧀ꦠꦶ ꦄꦨꦶꦲꦫꦶꦠ꧀ꦮꦴ ꦠꦁ ꦤꦶꦩꦤ꧀ꦠꦺꦪ꧀ꦪꦴꦩ. ꦠꦠ꧀ꦡ ꦢꦸꦮꦶꦣꦺꦴ ꦄꦨꦶꦲꦴꦫꦺꦴ ꦮꦴꦕꦴꦪ ꦕꦺꦮ ꦏꦴꦪꦺꦤ ꦕ. ‘‘ꦠꦸꦩ꧀ꦲꦴꦏꦁ ꦆꦕ꧀ꦖꦶꦠꦶꦕ꧀ꦖꦶꦠꦏ꧀ꦑꦟꦺ ꦩꦩꦁ ꦕꦷꦮꦫꦴꦢꦷꦲꦶ ꦮꦢꦺꦪ꧀ꦪꦴꦡ ꦪꦺꦤꦠ꧀ꦡꦺꦴ’’ꦠꦶ ꦮꦢꦤ꧀ꦠꦺꦴ ꦲꦶ ꦮꦴꦕꦴꦪ ꦄꦨꦶꦲꦫꦶꦠ꧀ꦮꦴ ꦤꦶꦩꦤ꧀ꦠꦺꦠꦶ ꦤꦴꦩ. ꦕꦷꦮꦫꦴꦢꦶꦮꦺꦏꦭ꧀ꦭꦁ ꦱꦭ꧀ꦭꦏ꧀ꦑꦺꦠ꧀ꦮꦴ ‘‘ꦆꦢꦁ ꦒꦟ꧀ꦲꦡꦴ’’ꦠꦶ ꦠꦴꦤꦶ ꦢꦺꦤ꧀ꦠꦺꦴ ꦥꦤ ꦏꦴꦪꦺꦤ ꦄꦨꦶꦲꦫꦶꦠ꧀ꦮꦴ ꦤꦶꦩꦤ꧀ꦠꦺꦠꦶ ꦤꦴꦩ. ꦠꦢꦸꦨꦪꦩ꧀ꦥꦶ ꦱꦤ꧀ꦣꦴꦪ ‘‘ꦄꦨꦶꦤꦶꦩꦤ꧀ꦠꦺꦪ꧀ꦪꦴꦩꦥꦶ ꦤ’’ꦤ꧀ꦠꦶ ꦄꦴꦲ. ꦫꦏ꧀ꦑꦴꦮꦫꦟꦒꦸꦠ꧀ꦠꦶꦤ꧀ꦠꦶ ꦫꦏ꧀ꦑꦴꦱꦔ꧀ꦑꦴꦠꦚ꧀ꦕꦺꦮ ꦄꦴꦮꦫꦟꦱꦔ꧀ꦑꦴꦠꦚ꧀ꦕ ꦒꦸꦠ꧀ꦠꦶꦁ. ꦪꦴ ꦥꦤꦺꦱꦴ ꦄꦴꦮꦸꦣꦲꦠ꧀ꦡꦺ ꦥꦸꦫꦶꦱꦺ ꦜꦥꦺꦤ꧀ꦠꦺꦤ ꦫꦏ꧀ꦑꦴ, ꦱꦴ ꦣꦩ꧀ꦩꦶꦏꦴ ꦤꦴꦩ ꦱꦁꦮꦶꦲꦶꦠꦴ ꦤ ꦲꦺꦴꦠꦶ. ꦪꦡꦴ ꦥꦤ ꦄꦮꦺꦭꦴꦪ ꦏꦛ꧀ꦜꦲꦴꦫꦶꦏꦴꦥꦟ꧀ꦟꦲꦴꦫꦶꦏꦴꦢꦪꦺꦴ ꦮꦶꦲꦴꦫꦁ ꦤ ꦥꦮꦶꦱꦤ꧀ꦠꦶ, ꦩꦶꦒꦭꦸꦢ꧀ꦢꦏꦴꦢꦪꦺꦴ ꦮꦶꦲꦴꦫꦱꦷꦩꦴꦪ ꦩꦶꦒꦺ ꦮꦴ ꦩꦕ꧀ꦖꦺ ꦮꦴ ꦤ ꦒꦟ꧀ꦲꦤ꧀ꦠꦶ, ꦌꦮꦁ ꦱꦁꦮꦶꦢꦲꦤ꧀ꦠꦺꦤ ꦣꦩ꧀ꦩꦶꦏꦴ ꦤꦴꦩ ꦱꦁꦮꦶꦲꦶꦠꦴ ꦲꦺꦴꦠꦶ. ꦠꦁ ꦱꦤ꧀ꦣꦴꦪꦴꦲ ‘‘ꦣꦩ꧀ꦩꦶꦏ’’ꦤ꧀ꦠꦶ.

ꦌꦮꦁ ꦱꦤ꧀ꦠꦺꦠꦶ ꦌꦮꦁ ꦕꦠꦸꦤ꧀ꦤꦩ꧀ꦥꦶ ꦮꦟ꧀ꦟꦴꦤꦁ ꦥꦧ꧀ꦧꦗꦶꦠꦴꦤꦁ ꦥꦧ꧀ꦧꦗꦶꦠꦱꦏ꧀ꦏꦴꦫꦺꦤ ꦱꦩꦺ ꦱꦩꦴꦤꦺ. ꦱꦺꦱꦁ ꦱꦧ꧀ꦧꦠ꧀ꦡ ꦈꦠ꧀ꦠꦴꦤꦩꦺꦮꦴꦠꦶ.

ꦥꦥꦚ꧀ꦕꦱꦹꦢꦤꦶꦪꦴ ꦩꦗ꧀ꦙꦶꦩꦤꦶꦏꦴꦪꦛ꧀ꦜꦏꦡꦴꦪ

ꦩꦣꦸꦫꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.