꧔. ꦢꦷꦓꦤꦑꦱꦸꦠ꧀ꦠꦮꦟ꧀ꦟꦤꦴ

꧒꧐꧑. ꦌꦮꦁ ꦩꦺ ꦱꦸꦠꦤ꧀ꦠꦶ ꦢꦷꦓꦤꦑꦱꦸꦠ꧀ꦠꦁ. ꦠꦠ꧀ꦡ ꦱꦹꦏꦫꦑꦠꦴꦪꦤ꧀ꦠꦶ ꦱꦹꦏꦫꦑꦠꦴꦠꦶ ꦌꦮꦁꦤꦴꦩꦏꦺ ꦭꦺꦟꦺ. ꦏꦱ꧀ꦱꦥꦧꦸꦢ꧀ꦣꦏꦴꦭꦺ ꦏꦶꦫ ꦠꦁ ꦭꦺꦟꦁ ꦌꦏꦱ꧀ꦩꦶꦁ ꦧꦸꦢ꧀ꦣꦤ꧀ꦠꦫꦺ ꦥꦡꦮꦶꦪꦴ ꦮꦝ꧀ꦞꦩꦴꦤꦴꦪ ꦄꦤ꧀ꦠꦺꦴꦨꦹꦩꦶꦒꦠꦁ ꦗꦴꦠꦁ. ꦄꦡꦺꦏꦢꦶꦮꦱꦁ ꦌꦏꦺꦴ ꦱꦹꦏꦫꦺꦴ ꦠꦱ꧀ꦱ ꦖꦢꦤꦥꦫꦶꦪꦤ꧀ꦠꦱꦩꦷꦥꦺ ꦥꦁꦱꦸꦁ ꦑꦟꦶ. ꦢꦺꦮꦺ ꦮꦸꦛ꧀ꦛꦺ ꦥꦁꦱꦸꦣꦺꦴꦠꦺꦴ ꦖꦢꦤꦥꦫꦶꦪꦤ꧀ꦠꦺꦴ ꦥꦴꦏꦛꦺꦴ ꦄꦲꦺꦴꦱꦶ. ꦌꦏꦺꦴ ꦮꦤꦕꦫꦏꦺꦴ ꦢꦶꦱ꧀ꦮꦴ – ‘‘ꦥꦸꦧ꧀ꦧꦺ ꦱꦷꦭꦮꦤ꧀ꦠꦺꦲꦶ ꦥꦫꦶꦨꦸꦠ꧀ꦠꦭꦺꦟꦺꦤ ꦨꦮꦶꦠꦧ꧀ꦧꦁ, ꦥꦛꦶꦗꦒ꧀ꦒꦶꦱ꧀ꦱꦴꦩꦶ ꦤ’’ꦤ꧀ꦠꦶ ꦱꦩꦤ꧀ꦠꦠꦺꦴ ꦥꦁꦱꦸꦁ ꦄꦥꦤꦺꦠ꧀ꦮꦴ ꦭꦺꦟꦁ ꦱꦺꦴꦣꦺꦠ꧀ꦮꦴ ꦏꦸꦛ꧀ꦛꦥꦫꦶꦏ꧀ꦑꦺꦥꦁ ꦏꦠ꧀ꦮꦴ ꦢ꧀ꦮꦴꦫꦮꦴꦠꦥꦴꦤꦁ ꦪꦺꦴꦗꦺꦠ꧀ꦮꦴ ꦱꦸꦥꦫꦶꦤꦶꦛ꧀ꦜꦶꦠ-ꦱꦸꦣꦴꦏꦩ꧀ꦩꦕꦶꦠ꧀ꦠꦏꦩ꧀ꦩꦫꦗꦠꦥꦛ꧀ꦛꦱꦢꦶꦱꦴꦪ ꦮꦴꦭꦸꦏꦴꦪ ꦱꦤ꧀ꦡꦠꦥꦫꦶꦮꦺꦟꦁ ꦭꦺꦟꦁ ꦏꦠ꧀ꦮꦴ ꦩꦚ꧀ꦕꦥꦷꦜꦁ ꦥꦚ꧀ꦚꦴꦥꦺꦠ꧀ꦮꦴ ꦨꦒꦮꦠꦺꦴ ꦮꦱꦤꦠ꧀ꦡꦴꦪ ꦄꦢꦴꦱꦶ. ꦭꦺꦟꦁ ꦒꦩ꧀ꦨꦷꦫꦁ ꦄꦲꦺꦴꦱꦶ ꦎꦠꦫꦶꦠ꧀ꦮꦴ ꦄꦨꦶꦫꦸꦲꦶꦠꦧ꧀ꦧꦁ. ꦠꦁ ꦱꦤ꧀ꦣꦴꦪꦺꦠꦁ ꦮꦸꦠ꧀ꦠꦁ.

ꦢꦷꦓꦤꦑꦺꦴꦠꦶ ꦠꦱ꧀ꦱ ꦥꦫꦶꦧ꧀ꦧꦴꦗꦏꦱ꧀ꦱ ꦤꦴꦩꦁ. ꦈꦥꦱꦔ꧀ꦏꦩꦷꦠꦶ ꦏꦱ꧀ꦩꦴ ꦈꦥꦱꦔ꧀ꦏꦩꦶ? ꦱꦺꦴ ꦏꦶꦫ ꦡꦺꦫꦺ ꦄꦝ꧀ꦞꦩꦴꦱꦥꦧ꧀ꦧꦗꦶꦠꦺ ꦕꦶꦤ꧀ꦠꦺꦱꦶ – ‘‘ꦩꦪ꧀ꦲꦁ ꦩꦴꦠꦸꦭꦺꦴ ꦄꦚ꧀ꦚꦁ ꦥꦴꦱꦟ꧀ꦝꦁ ꦒꦤ꧀ꦠ꧀ꦮꦴ ꦤ ꦕꦶꦫꦁ ꦠꦶꦛ꧀ꦜꦠꦶ, ꦆꦢꦴꦤꦶ ꦥꦤꦱ꧀ꦱ ꦱꦩꦟꦱ꧀ꦱ ꦒꦺꦴꦠꦩꦱ꧀ꦱ ꦱꦤ꧀ꦠꦶꦏꦁ ꦒꦠꦱ꧀ꦱ ꦄꦝ꧀ꦞꦩꦴꦱꦺꦴ ꦗꦴꦠꦺꦴ. ꦥꦮꦠ꧀ꦠꦶꦩ꧀ꦥꦶꦱ꧀ꦱ ꦤ ꦱꦸꦟꦴꦩꦶ, ꦎꦗꦮꦤ꧀ꦠꦁ ꦤꦸ ꦑꦺꦴ ꦱꦴꦱꦤꦁ, ꦗꦴꦤꦶꦱ꧀ꦱꦴꦩꦶ ꦤ’’ꦤ꧀ꦠꦶ ꦒꦤ꧀ꦠꦸꦏꦴꦩꦺꦴ ꦗꦴꦠꦺꦴ. ꦠꦱ꧀ꦩꦴ ꦈꦥꦱꦔ꧀ꦏꦩꦶ. ꦌꦏꦩꦤ꧀ꦠꦁ ꦜꦶꦠꦺꦴꦠꦶ ꦠꦱ꧀ꦩꦶꦁ ꦏꦶꦫ ꦱꦩꦪꦺ ꦡꦺꦫꦺꦴ ꦨꦒꦮꦤ꧀ꦠꦁ ꦧꦷꦗꦪꦩꦴꦤꦺꦴ ꦜꦶꦠꦺꦴ ꦲꦺꦴꦠꦶ, ꦥꦫꦶꦧ꧀ꦧꦴꦗꦏꦺꦴ ꦩꦴꦠꦸꦭꦺ ꦲꦶꦫꦺꦴꦠ꧀ꦠꦥ꧀ꦥꦺꦤ ꦜꦶꦠꦏꦺꦴꦮ ꦥꦚ꧀ꦲꦁ ꦥꦸꦕ꧀ꦖꦶ. ꦠꦺꦤ ꦮꦸꦠ꧀ꦠꦁ ‘‘ꦌꦏꦩꦤ꧀ꦠꦁ ꦜꦶꦠꦺꦴ’’ꦠꦶ.

ꦱꦧ꧀ꦧꦁ ꦩꦺ ꦤꦏ꧀ꦑꦩꦠꦷꦠꦶ ꦱꦧ꧀ꦧꦴ ꦩꦺ ꦈꦥꦥꦠ꧀ꦠꦶꦪꦺꦴ ꦤꦏ꧀ꦑꦩꦤ꧀ꦠꦶ, ꦥꦛꦶꦱꦤ꧀ꦣꦶꦪꦺꦴ ꦤꦏ꧀ꦑꦩꦤ꧀ꦠꦷꦠꦶ ꦄꦣꦶꦥ꧀ꦥꦴꦪꦺꦤ ꦮꦢꦠꦶ. ꦌꦠ꧀ꦠꦴꦮꦠꦴꦤꦺꦤ ‘‘ꦈꦕ꧀ꦖꦺꦢꦮꦴꦢꦺꦴꦲꦩꦱ꧀ꦩꦷ’’ꦠꦶ ꦢꦷꦥꦶꦠꦁ ꦲꦺꦴꦠꦶ. ꦨꦒꦮꦴ ꦥꦤꦱ꧀ꦱ ꦄꦣꦶꦥ꧀ꦥꦴꦪꦁ ꦩꦸꦚ꧀ꦕꦶꦠ꧀ꦮꦴ ꦄꦏ꧀ꦑꦫꦺ ꦠꦴꦮ ꦢꦺꦴꦱꦁ ꦢꦱ꧀ꦱꦺꦤ꧀ꦠꦺꦴ ꦪꦴꦥꦶ ꦑꦺꦴ ꦠꦺꦠꦶꦄꦴꦢꦶꦩꦴꦲ. ꦠꦠ꧀ꦡ ꦌꦱꦴꦥꦶ ꦠꦺ ꦢꦶꦛ꧀ꦜꦶ ꦤꦏ꧀ꦑꦩꦠꦷꦠꦶ ꦌꦱꦴꦥꦶ ꦠꦺ ꦥꦜꦩꦁ ꦫꦸꦕ꧀ꦕꦶꦠ꧀ꦮꦴ ꦑꦩꦴꦥꦺꦠ꧀ꦮꦴ ꦒꦲꦶꦠꦢꦶꦛ꧀ꦜꦶ ꦤꦏ꧀ꦑꦩꦠꦷꦠꦶ. ꦌꦱꦴ ꦕꦺ ꦩꦺ, ꦨꦺꦴ ꦒꦺꦴꦠꦩ, ꦢꦶꦛ꧀ꦜꦶ ꦑꦩꦺꦪ꧀ꦪꦴꦠꦶ ꦩꦪ꧀ꦲꦚ꧀ꦲꦶ ꦱꦧ꧀ꦧꦁ ꦤꦏ꧀ꦑꦩꦠꦷꦠꦶ ꦢꦶꦛ꧀ꦜꦶ, ꦠꦱ꧀ꦱ ꦩꦪ꧀ꦲꦁ ꦪꦴ ꦌꦱꦴ ꦱꦧ꧀ꦧꦁ ꦩꦺ ꦤꦏ꧀ꦑꦩꦠꦷꦠꦶ ꦢꦶꦛ꧀ꦜꦶ, ꦌꦱꦴ ꦩꦺ ꦑꦩꦺꦪ꧀ꦪ. ꦪꦁ ꦠꦁ ‘‘ꦱꦧ꧀ꦧꦁ ꦩꦺ ꦤꦏ꧀ꦑꦩꦠꦷ’’ꦠꦶ ꦮꦸꦠ꧀ꦠꦁ, ꦠꦩ꧀ꦥꦶꦱ꧀ꦱ ꦠꦴꦢꦶꦱꦩꦺꦮ. ꦪꦡꦴ ꦱꦧ꧀ꦧꦒꦲꦟꦺꦤ ꦒꦲꦶꦠꦴꦥꦶ ꦄꦪꦁ ꦢꦶꦛ꧀ꦜꦶ ꦑꦩꦠꦶ, ꦌꦮꦩꦺꦮꦁ ꦠꦩ꧀ꦥꦶ ꦑꦩꦺꦪ꧀ꦪ. ꦌꦮꦁ ꦄꦠ꧀ꦠꦤꦺꦴ ꦮꦴꦢꦺ ꦄꦴꦫꦺꦴꦥꦶꦠꦁ ꦢꦺꦴꦱꦁ ꦚꦠ꧀ꦮꦴ ꦠꦁ ꦥꦫꦶꦲꦫꦴꦩꦷꦠꦶ ꦱꦚ꧀ꦚꦴꦪ ꦮꦢꦠꦶ, ꦄꦠ꧀ꦡꦠꦺꦴ ꦥꦤꦱ꧀ꦱ ‘‘ꦌꦱꦴ ꦢꦶꦛ꧀ꦜꦶ ꦤ ꦩꦺ ꦑꦩꦠꦷ’’ꦠꦶ ꦄꦴꦥꦗ꧀ꦗꦠꦶ. ꦪꦱ꧀ꦱ ꦥꦤꦺꦱꦴ ꦤ ꦑꦩꦠꦶ ꦤ ꦫꦸꦕ꧀ꦕꦠꦶ, ꦠꦱ꧀ꦱꦴꦪꦁ ꦠꦴꦪ ꦢꦶꦛ꧀ꦜꦶꦪꦴ ꦱꦧ꧀ꦧꦁ ꦩꦺ ꦤ ꦑꦩꦠꦷꦠꦶ ꦢꦶꦛ꧀ꦜꦶ ꦫꦸꦕꦶꦠꦁ. ꦠꦺꦤ ꦲꦶ ꦢꦶꦛ꧀ꦜꦶꦄꦏ꧀ꦑꦩꦺꦤ ꦄꦫꦸꦕꦶꦠꦺꦤ ꦨꦮꦶꦠꦧ꧀ꦧꦤ꧀ꦠꦶ ꦱꦧ꧀ꦧꦁ ꦑꦩꦠꦷꦠꦶ ꦫꦸꦕ꧀ꦕꦠꦷꦠꦶ ꦄꦴꦥꦗ꧀ꦗꦠꦶ. ꦤ ꦥꦤꦺꦱ ꦠꦁ ꦱꦩ꧀ꦥꦛꦶꦕ꧀ꦖꦠꦶ, ꦏꦺꦮꦭꦁ ꦠꦱ꧀ꦱꦴꦥꦶ ꦈꦕ꧀ꦖꦺꦢꦢꦶꦛ꧀ꦜꦶꦪꦴ ꦈꦕ꧀ꦖꦺꦢꦩꦺꦮ ꦒꦟ꧀ꦲꦴꦠꦶ. ꦠꦺꦤꦴꦲ ꦨꦒꦮꦴ ꦄꦠꦺꦴ ꦑꦺꦴ ꦠꦺ, ꦄꦒ꧀ꦒꦶꦮꦺꦱ꧀ꦱꦤ,…ꦥꦺ… ꦄꦚ꧀ꦚꦚ꧀ꦕ ꦢꦶꦛ꧀ꦜꦶꦁ ꦈꦥꦴꦢꦶꦪꦤ꧀ꦠꦷꦠꦶ. ꦠꦠ꧀ꦡ ꦄꦠꦺꦴꦠꦶ ꦥꦗꦲꦤꦏꦺꦱꦸ ꦤꦶꦱ꧀ꦱꦏ꧀ꦏꦁ, ꦪꦺ ꦥꦗꦲꦤ꧀ꦠꦶ, ꦠꦺꦲꦶ ꦪꦺ ꦤꦥ꧀ꦥꦗꦲꦤ꧀ꦠꦷꦠꦶ ꦮꦸꦕ꧀ꦕꦶꦪꦤ꧀ꦠꦶ, ꦠꦺꦮ ꦧꦲꦸꦠꦫꦴꦠꦶ ꦄꦠ꧀ꦡꦺꦴ. ꦧꦲꦹ ꦲꦶ ꦧꦲꦸꦠꦫꦴꦠꦶ ꦌꦠ꧀ꦡ ꦲꦶꦏꦴꦫꦺꦴ ꦤꦶꦥꦴꦠꦩꦠ꧀ꦠꦁ, ꦧꦲꦹ ꦧꦲꦸꦠꦫꦴꦠꦶ ꦄꦠ꧀ꦡꦺꦴ. ꦥꦫꦠꦺꦴ ꦠꦤꦹ ꦲꦶ ꦠꦤꦸꦠꦫꦴꦠꦶ ꦥꦢꦺꦥꦶ ꦌꦱꦺꦮ ꦤꦪꦺꦴ. ꦪꦺ ꦌꦮꦩꦴꦲꦁꦱꦹꦠꦶ ꦪꦺ ꦌꦮꦁ ꦮꦢꦤ꧀ꦠꦶ. ꦠꦚ꧀ꦕꦺꦮ ꦢꦶꦛ꧀ꦜꦶꦁ ꦤꦥ꧀ꦥꦗꦲꦤ꧀ꦠꦶ, ꦄꦚ꧀ꦚꦚ꧀ꦕ ꦢꦶꦛ꧀ꦜꦶꦁ ꦈꦥꦴꦢꦶꦪꦤ꧀ꦠꦷꦠꦶ ꦩꦹꦭꦢꦱ꧀ꦱꦤꦁ ꦤꦥ꧀ꦥꦗꦲꦤ꧀ꦠꦶ, ꦄꦥꦫꦢꦱ꧀ꦱꦤꦁ ꦈꦥꦴꦢꦶꦪꦤ꧀ꦠꦶ.

ꦌꦠ꧀ꦡ ꦕ ꦱꦱ꧀ꦱꦠꦁ ꦒꦲꦺꦠ꧀ꦮꦴ ꦠꦩ꧀ꦥꦶ ꦄꦥ꧀ꦥꦲꦴꦪ ꦈꦕ꧀ꦖꦺꦢꦁ ꦮꦴ ꦌꦏꦕ꧀ꦕꦱꦱ꧀ꦱꦠꦁ ꦮꦴ ꦒꦲꦺꦠꦸꦁ ꦤ ꦱꦏ꧀ꦏꦴ, ꦈꦕ꧀ꦖꦺꦢꦩ꧀ꦥꦶ ꦒꦲꦺꦠ꧀ꦮꦴ ꦠꦁ ꦄꦥ꧀ꦥꦲꦴꦪ ꦱꦱ꧀ꦱꦠꦁ ꦮꦴ ꦌꦏꦕ꧀ꦕꦱꦱ꧀ꦱꦠꦁ ꦮꦴ ꦤ ꦱꦏ꧀ꦏꦴ ꦒꦲꦺꦠꦸꦁ, ꦌꦏꦕ꧀ꦕꦱꦱ꧀ꦱꦠꦩ꧀ꦥꦶ ꦒꦲꦺꦠ꧀ꦮꦴ ꦠꦁ ꦄꦥ꧀ꦥꦲꦴꦪ ꦱꦱ꧀ꦱꦠꦁ ꦮꦴ ꦈꦕ꧀ꦖꦺꦢꦁ ꦮꦴ ꦤ ꦱꦏ꧀ꦏꦴ ꦒꦲꦺꦠꦸꦁ. ꦩꦹꦭꦱꦱ꧀ꦱꦠꦁ ꦥꦤ ꦄꦥ꧀ꦥꦲꦴꦪ ꦄꦚ꧀ꦚꦁ ꦱꦱ꧀ꦱꦠꦩꦺꦮ ꦱꦏ꧀ꦏꦴ ꦒꦲꦺꦠꦸꦁ. ꦏꦡꦁ? ꦌꦏꦱ꧀ꦩꦶꦚ꧀ꦲꦶ ꦱꦩꦪꦺ ‘‘ꦫꦹꦥꦁ ꦱꦱ꧀ꦱꦠ’’ꦤ꧀ꦠꦶ ꦒꦲꦺꦠ꧀ꦮꦴ ꦄꦥꦫꦱ꧀ꦩꦶꦁ ꦱꦩꦪꦺ ‘‘ꦤ ꦱꦸꦢ꧀ꦣꦫꦹꦥꦩꦺꦮ ꦱꦱ꧀ꦱꦠꦁ, ꦮꦺꦢꦤꦴꦥꦶ ꦱꦱ꧀ꦱꦠꦴ, ꦮꦶꦚ꧀ꦚꦴꦟꦩ꧀ꦥꦶ ꦱꦱ꧀ꦱꦠ’’ꦤ꧀ꦠꦶ ꦒꦟ꧀ꦲꦴꦠꦶ. ꦈꦕ꧀ꦖꦺꦢꦺꦥꦶ ꦌꦏꦕ꧀ꦕꦱꦱ꧀ꦱꦠꦺꦥꦶ ꦌꦱꦺꦮ ꦤꦪꦺꦴ. ꦪꦡꦴ ꦕ ꦑꦤ꧀ꦣꦺꦱꦸ, ꦌꦮꦁ ꦄꦴꦪꦠꦤꦺꦱꦸꦥꦶ ꦪꦺꦴꦗꦺꦠꦧ꧀ꦧꦁ. ꦆꦢꦁ ꦱꦤ꧀ꦣꦴꦪ ꦮꦸꦠ꧀ꦠꦁ – ‘‘ꦠꦚ꧀ꦕꦺꦮ ꦢꦶꦛ꧀ꦜꦶꦁ ꦤꦥ꧀ꦥꦗꦲꦤ꧀ꦠꦶ, ꦄꦚ꧀ꦚꦚ꧀ꦕ ꦢꦶꦛ꧀ꦜꦶꦁ ꦈꦥꦴꦢꦶꦪꦤ꧀ꦠꦷ’’ꦠꦶ.

ꦢꦸꦠꦶꦪꦮꦴꦫꦺ ꦄꦠꦺꦴꦠꦶ ꦄꦥ꧀ꦥꦗꦲꦤꦏꦺꦱꦸ ꦤꦶꦱ꧀ꦱꦏ꧀ꦏꦁ, ꦪꦺ ꦤꦥ꧀ꦥꦗꦲꦤ꧀ꦠꦶ, ꦠꦺꦲꦶ, ꦪꦺ ꦥꦗꦲꦤ꧀ꦠꦷꦠꦶ ꦮꦸꦕ꧀ꦕꦶꦪꦤ꧀ꦠꦶ, ꦠꦺꦮ ꦠꦤꦸꦠꦫꦴ ꦄꦥ꧀ꦥꦠꦫꦴꦠꦶ ꦄꦠ꧀ꦡꦺꦴ. ꦠꦚ꧀ꦕꦺꦮ ꦢꦶꦛ꧀ꦜꦶꦁ ꦥꦗꦲꦤ꧀ꦠꦶ, ꦄꦚ꧀ꦚꦚ꧀ꦕ ꦢꦶꦛ꧀ꦜꦶꦁ ꦤ ꦈꦥꦴꦢꦶꦪꦤ꧀ꦠꦷꦠꦶ ꦠꦚ꧀ꦕ ꦩꦹꦭꦢꦱ꧀ꦱꦤꦁ ꦥꦗꦲꦤ꧀ꦠꦶ, ꦄꦚ꧀ꦚꦚ꧀ꦕ ꦢꦱ꧀ꦱꦤꦁ ꦤ ꦒꦟ꧀ꦲꦤ꧀ꦠꦶ. ꦏꦡꦁ? ꦌꦏꦱ꧀ꦩꦶꦚ꧀ꦲꦶ ꦱꦩꦪꦺ ‘‘ꦫꦹꦥꦁ ꦱꦱ꧀ꦱꦠ’’ꦤ꧀ꦠꦶ ꦒꦲꦺꦠ꧀ꦮꦴ ꦄꦥꦫꦱ꧀ꦩꦶꦁ ꦱꦩꦪꦺ ꦠꦠ꧀ꦡ ꦄꦴꦢꦷꦤꦮꦁ ꦢꦶꦱ꧀ꦮꦴ ‘‘ꦎꦭ꦳ꦴꦫꦶꦏꦩꦺꦠꦁ ꦩꦪ꧀ꦲꦁ ꦢꦱ꧀ꦱꦤ’’ꦤ꧀ꦠꦶ ꦥꦗꦲꦠꦶ ‘‘ꦤ ꦏꦺꦮꦭꦚ꧀ꦕ ꦫꦹꦥꦁ ꦱꦱ꧀ꦱꦠꦤ꧀ꦠꦶ ꦢꦱ꧀ꦱꦤꦩꦺꦮ ꦎꦭ꦳ꦴꦫꦶꦏꦁ, ꦮꦺꦢꦤꦴꦥꦶ ꦱꦱ꧀ꦱꦠꦴ…ꦥꦺ… ꦮꦶꦚ꧀ꦚꦴꦟꦩ꧀ꦥꦶ ꦱꦱ꧀ꦱꦠꦤ꧀ꦠꦶ ꦢꦱ꧀ꦱꦤꦁ ꦎꦭ꦳ꦴꦫꦶꦏꦩꦺꦮꦴ’’ꦠꦶ ꦮꦶꦱ꧀ꦱꦗ꧀ꦗꦺꦠꦶ. ꦈꦕ꧀ꦖꦺꦢꦺꦥꦶ ꦌꦏꦕ꧀ꦕꦱꦱ꧀ꦱꦠꦺꦥꦶ ꦌꦱꦺꦮ ꦤꦪꦺꦴ. ꦪꦡꦴ ꦕ ꦑꦤ꧀ꦣꦺꦱꦸ, ꦌꦮꦁ ꦄꦴꦪꦠꦤꦺꦱꦸꦥꦶ ꦪꦺꦴꦗꦺꦠꦧ꧀ꦧꦁ. ꦌꦮꦁ ꦠꦚ꧀ꦕ ꦩꦹꦭꦢꦱ꧀ꦱꦤꦁ ꦥꦗꦲꦤ꧀ꦠꦶ, ꦄꦚ꧀ꦚꦚ꧀ꦕ ꦢꦱ꧀ꦱꦤꦁ ꦤ ꦒꦟ꧀ꦲꦤ꧀ꦠꦶ.

ꦱꦤ꧀ꦠꦒ꧀ꦒꦶꦮꦺꦱ꧀ꦱꦤꦴꦠꦶ ꦏꦱ꧀ꦩꦴ ꦄꦴꦫꦨꦶ? ꦄꦪꦁ ꦈꦕ꧀ꦖꦺꦢꦭꦢ꧀ꦣꦶꦏꦺꦴ ꦄꦠ꧀ꦠꦤꦺꦴ ꦭꦢ꧀ꦣꦶꦁ ꦤꦶꦒꦹꦲꦠꦶ, ꦠꦱ꧀ꦱꦴ ꦥꦤ ꦭꦢ꧀ꦣꦶꦪꦴ ꦮꦟ꧀ꦟꦺ ꦮꦸꦕ꧀ꦕꦩꦴꦤꦺ ꦄꦠ꧀ꦠꦤꦺꦴ ꦭꦢ꧀ꦣꦶꦁ ꦥꦴꦠꦸꦏꦫꦶꦱ꧀ꦱꦠꦷꦠꦶ ꦠꦶꦱ꧀ꦱꦺꦴ ꦭꦢ꧀ꦣꦶꦪꦺꦴ ꦌꦏꦠꦺꦴ ꦢꦱ꧀ꦱꦺꦠ꧀ꦮꦴ ꦮꦶꦨꦗꦶꦠꦸꦁ ꦆꦩꦁ ꦢꦺꦱꦤꦁ ꦄꦴꦫꦨꦶ.

ꦱꦴꦫꦴꦒꦴꦪ ꦱꦤ꧀ꦠꦶꦏꦺꦠꦶꦄꦴꦢꦷꦱꦸ ꦫꦴꦒꦮꦱꦺꦤ ꦮꦛ꧀ꦛꦺ ꦫꦗ꧀ꦗꦤꦱ꧀ꦱ ꦄꦴꦱꦤ꧀ꦤꦴ ꦠꦟ꧀ꦲꦴꦢꦶꦛ꧀ꦜꦶꦱꦁꦪꦺꦴꦗꦤꦺꦤ ꦮꦛ꧀ꦛꦱꦁꦪꦺꦴꦗꦤꦱ꧀ꦱ ꦱꦤ꧀ꦠꦶꦏꦺ. ꦄꦨꦶꦤꦤ꧀ꦢꦤꦴꦪꦴꦠꦶ ꦠꦟ꧀ꦲꦴꦢꦶꦛ꧀ꦜꦶꦮꦱꦺꦤꦺꦮ ꦒꦶꦭꦶꦠ꧀ꦮꦴ ꦥꦫꦶꦪꦴꦢꦶꦪꦤꦱ꧀ꦱ ꦒꦲꦟꦱ꧀ꦱ ꦕ ꦄꦴꦱꦤ꧀ꦤꦴꦠꦶ ꦄꦠ꧀ꦡꦺꦴ. ꦄꦱꦴꦫꦴꦒꦴꦪ ꦱꦤ꧀ꦠꦶꦏꦺꦠꦶꦄꦴꦢꦷꦱꦸ ꦮꦛ꧀ꦛꦺ ꦄꦫꦗ꧀ꦗꦤꦱ꧀ꦱ ꦄꦴꦱꦤ꧀ꦤꦴꦠꦶꦄꦴꦢꦶꦤꦴ ꦤꦪꦺꦤ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ.

ꦌꦠ꧀ꦡ ꦕ ꦱꦱ꧀ꦱꦠꦢꦱ꧀ꦱꦤꦁ ꦄꦥ꧀ꦥꦱꦴꦮꦗ꧀ꦗꦁ ꦢꦤ꧀ꦣꦮꦶꦫꦴꦒꦁ, ꦈꦕ꧀ꦖꦺꦢꦢꦱ꧀ꦱꦤꦁ ꦩꦲꦴꦱꦴꦮꦗ꧀ꦗꦁ ꦑꦶꦥ꧀ꦥꦮꦶꦫꦴꦒꦁ. ꦏꦡꦁ? ꦱꦱ꧀ꦱꦠꦮꦴꦢꦷ ꦲꦶ ꦆꦣꦭꦺꦴꦏꦁ ꦥꦫꦭꦺꦴꦏꦚ꧀ꦕ ꦄꦠ꧀ꦡꦷꦠꦶ ꦗꦴꦤꦴꦠꦶ, ꦱꦸꦏꦠꦢꦸꦏ꧀ꦏꦛꦴꦤꦁ ꦦꦭꦁ ꦄꦠ꧀ꦡꦷꦠꦶ ꦗꦴꦤꦴꦠꦶ, ꦏꦸꦱꦭꦁ ꦏꦫꦺꦴꦠꦶ, ꦄꦏꦸꦱꦭꦁ ꦏꦫꦺꦴꦤ꧀ꦠꦺꦴ ꦨꦴꦪꦠꦶ, ꦮꦛ꧀ꦛꦁ ꦄꦱ꧀ꦱꦴꦢꦺꦠꦶ, ꦄꦨꦶꦤꦤ꧀ꦢꦠꦶ. ꦧꦸꦢ꧀ꦣꦴꦤꦁ ꦮꦴ ꦧꦸꦢ꧀ꦣꦱꦴꦮꦏꦴꦤꦁ ꦮꦴ ꦱꦩ꧀ꦩꦸꦑꦷꦨꦹꦠꦺꦴ ꦱꦷꦓꦁ ꦭꦢ꧀ꦣꦶꦁ ꦗꦲꦶꦠꦸꦁ ꦤ ꦱꦏ꧀ꦏꦺꦴꦠꦶ. ꦠꦱ꧀ꦩꦴ ꦠꦁ ꦱꦱ꧀ꦱꦠꦢꦱ꧀ꦱꦤꦁ ꦄꦥ꧀ꦥꦱꦴꦮꦗ꧀ꦗꦁ ꦢꦤ꧀ꦣꦮꦶꦫꦴꦒꦤ꧀ꦠꦶ ꦮꦸꦕ꧀ꦕꦠꦶ. ꦈꦕ꧀ꦖꦺꦢꦮꦴꦢꦷ ꦥꦤ ꦆꦣꦭꦺꦴꦏꦥꦫꦭꦺꦴꦏꦁ ꦄꦠ꧀ꦡꦷꦠꦶ ꦗꦴꦤꦴꦠꦶ, ꦱꦸꦏꦠꦢꦸꦏ꧀ꦏꦛꦴꦤꦁ ꦦꦭꦁ ꦄꦠ꧀ꦡꦷꦠꦶ ꦗꦴꦤꦴꦠꦶ, ꦏꦸꦱꦭꦁ ꦤ ꦏꦫꦺꦴꦠꦶ, ꦄꦏꦸꦱꦭꦁ ꦏꦫꦺꦴꦤ꧀ꦠꦺꦴ ꦤ ꦨꦴꦪꦠꦶ, ꦮꦛ꧀ꦛꦁ ꦤ ꦄꦱ꧀ꦱꦴꦢꦺꦠꦶ, ꦤꦴꦨꦶꦤꦤ꧀ꦢꦠꦶ, ꦧꦸꦢ꧀ꦣꦴꦤꦁ ꦮꦴ ꦧꦸꦢ꧀ꦣꦱꦴꦮꦏꦴꦤꦁ ꦮꦴ ꦱꦩ꧀ꦩꦸꦑꦷꦨꦴꦮꦺ ꦱꦷꦓꦁ ꦢꦱ꧀ꦱꦤꦁ ꦥꦗꦲꦠꦶ. ꦥꦴꦫꦩꦶꦪꦺꦴ ꦥꦹꦫꦺꦠꦸꦁ ꦱꦏ꧀ꦏꦺꦴꦤ꧀ꦠꦺꦴ ꦧꦸꦢ꧀ꦣꦺꦴ ꦲꦸꦠ꧀ꦮꦴ, ꦄꦱꦏ꧀ꦏꦺꦴꦤ꧀ꦠꦺꦴ ꦄꦨꦶꦤꦷꦲꦴꦫꦁ ꦏꦠ꧀ꦮꦴ ꦱꦴꦮꦏꦺꦴ ꦲꦸꦠ꧀ꦮꦴ ꦥꦫꦶꦤꦶꦧ꧀ꦧꦴꦪꦠꦶ. ꦠꦱ꧀ꦩꦴ ꦈꦕ꧀ꦖꦺꦢꦢꦱ꧀ꦱꦤꦁ ꦩꦲꦴꦱꦴꦮꦗ꧀ꦗꦁ ꦑꦶꦥ꧀ꦥꦮꦶꦫꦴꦒꦤ꧀ꦠꦶ ꦮꦸꦕ꧀ꦕꦠꦶ.

꧒꧐꧒. ꦱꦺꦴ ꦥꦤ ꦥꦫꦶꦧ꧀ꦧꦴꦗꦏꦺꦴ ꦌꦠꦩꦠ꧀ꦡꦁ ꦄꦱꦭ꧀ꦭꦏ꧀ꦑꦺꦠ꧀ꦮꦴ – ‘‘ꦩꦪ꧀ꦲꦁ ꦢꦱ꧀ꦱꦤꦁ ꦱꦁꦮꦟ꧀ꦟꦺꦠꦶ ꦥꦱꦁꦱꦠꦶ, ꦄꦢ꧀ꦣꦴ ꦩꦺ ꦱꦸꦤ꧀ꦢꦫꦁ ꦢꦱ꧀ꦱꦤ’’ꦤ꧀ꦠꦶ ꦱꦭ꧀ꦭꦏ꧀ꦑꦺꦠ꧀ꦮꦴ ꦈꦏ꧀ꦏꦁꦱꦺꦠꦶ ꦩꦺ ꦨꦮꦤ꧀ꦠꦶꦄꦴꦢꦶꦩꦴꦲ.

ꦆꦢꦴꦤꦶ ꦪꦱ꧀ꦩꦴ ꦄꦪꦁ ꦥꦫꦶꦧ꧀ꦧꦴꦗꦏꦺꦴ ꦏꦚ꧀ꦗꦶꦪꦺꦤꦺꦮ ꦠꦶꦠ꧀ꦠꦏꦴꦭꦴꦧꦸ, ꦈꦕ꧀ꦖꦺꦢꦢꦱ꧀ꦱꦤꦺꦤꦺꦮ ꦥꦹꦫꦶꦠꦺꦴ, ꦱꦺꦴ ꦪꦡꦴ ꦏꦚ꧀ꦗꦶꦪꦁ ꦄꦥ꧀ꦥꦲꦴꦪ ꦤ ꦱꦏ꧀ꦏꦴ ꦭꦴꦧꦸꦩ꧀ꦲꦶ ꦠꦺꦭꦦꦴꦟꦶꦠꦴꦢꦷꦤꦶ ꦥꦏ꧀ꦑꦶꦥꦶꦠꦸꦁ, ꦥꦏ꧀ꦑꦶꦠ꧀ꦠꦴꦤꦶꦥꦶ ꦤ ꦒꦟ꧀ꦲꦴꦠꦶ, ꦌꦮꦩꦺꦮꦁ ꦠꦁ ꦭꦢ꧀ꦣꦶꦁ ꦄꦥ꧀ꦥꦲꦴꦪ ꦄꦨꦧ꧀ꦧꦺꦴ ꦩꦒ꧀ꦒꦦꦭꦴꦤꦁ ꦭꦴꦨꦴꦪ, ꦠꦱ꧀ꦩꦴ ꦭꦢ꧀ꦣꦶꦁ ꦗꦲꦴꦥꦤꦠ꧀ꦡꦁ ꦠꦠ꧀ꦫꦒ꧀ꦒꦶꦮꦺꦱ꧀ꦱꦤꦴꦠꦶꦄꦴꦢꦶ ꦄꦴꦫꦢ꧀ꦣꦁ. ꦮꦶꦒ꧀ꦒꦲꦺꦴꦠꦶ ꦏꦭꦲꦺꦴ. ꦌꦮꦩꦺꦠꦴꦱꦁ ꦢꦶꦛ꧀ꦜꦷꦤꦁ ꦥꦲꦴꦤꦁ ꦲꦺꦴꦠꦷꦠꦶ ꦌꦮꦁ ꦮꦶꦒ꧀ꦒꦲꦴꦢꦶꦄꦴꦢꦷꦤꦮꦁ ꦢꦶꦱ꧀ꦮꦴ ꦠꦴꦱꦁ ꦢꦶꦛ꧀ꦜꦷꦤꦁ ꦥꦲꦴꦤꦁ ꦲꦺꦴꦠꦶ. ꦱꦺꦴ ꦲꦶ ꦥꦫꦶꦧ꧀ꦧꦴꦗꦏꦺꦴ ‘‘ꦏꦶꦁ ꦩꦺ ꦆꦩꦶꦤꦴ ꦮꦶꦒ꧀ꦒꦲꦴꦢꦶꦤꦴ’’ꦠꦶ ꦠꦁ ꦈꦕ꧀ꦖꦺꦢꦢꦱ꧀ꦱꦤꦁ ꦥꦗꦲꦠꦶ.

꧒꧐꧕. ꦄꦡꦱ꧀ꦱ ꦨꦒꦮꦴ ꦮꦩꦶꦠꦏꦚ꧀ꦗꦶꦪꦺ ꦭꦴꦧꦸꦩ꧀ꦲꦶ ꦱꦥ꧀ꦥꦶꦦꦴꦟꦶꦠꦴꦢꦷꦤꦶ ꦥꦏ꧀ꦑꦶꦥꦤ꧀ꦠꦺꦴ ꦮꦶꦪ ꦲꦢꦪꦺ ꦄꦩꦠꦺꦴꦱꦣꦁ ꦥꦹꦫꦺꦱ꧀ꦱꦴꦩꦷꦠꦶ ꦮꦶꦥꦱ꧀ꦱꦤꦁ ꦄꦴꦕꦶꦏ꧀ꦑꦤ꧀ꦠꦺꦴ ꦄꦪꦁ ꦑꦺꦴ ꦥꦤ, ꦄꦒ꧀ꦒꦶꦮꦺꦱ꧀ꦱꦤ, ꦏꦴꦪꦺꦴꦠꦶꦄꦴꦢꦶꦩꦴꦲ. ꦠꦱ꧀ꦱꦠ꧀ꦡꦺꦴ ꦮꦩ꧀ꦩꦶꦏꦱꦸꦠ꧀ꦠꦺ ꦮꦸꦠ꧀ꦠꦺꦴ. ꦄꦤꦶꦕ꧀ꦕꦠꦺꦴꦠꦶꦄꦴꦢꦷꦤꦶꦥꦶ ꦲꦺꦛ꧀ꦜꦴ ꦮꦶꦠ꧀ꦡꦴꦫꦶꦠꦴꦤꦺꦮ. ꦪꦺꦴ ꦏꦴꦪꦱ꧀ꦩꦶꦁ ꦏꦴꦪꦖꦤ꧀ꦢꦺꦴꦠꦶ ꦪꦴ ꦏꦴꦪꦱ꧀ꦩꦶꦁ ꦠꦟ꧀ꦲꦴ. ꦱ꧀ꦤꦺꦲꦺꦴꦠꦶ ꦠꦟ꧀ꦲꦴꦱ꧀ꦤꦺꦲꦺꦴꦮ. ꦏꦴꦪꦤ꧀ꦮꦪꦠꦴꦠꦶ ꦏꦴꦪꦴꦤꦸꦒꦩꦤꦨꦴꦮꦺꦴ, ꦏꦴꦪꦁ ꦄꦤꦸꦒꦕ꧀ꦖꦤꦏꦏꦶꦭꦺꦱꦺꦴꦠꦶ ꦄꦠ꧀ꦡꦺꦴ.

ꦌꦮꦁ ꦫꦹꦥꦏꦩ꧀ꦩꦛ꧀ꦜꦴꦤꦁ ꦢꦱ꧀ꦱꦺꦠ꧀ꦮꦴ ꦆꦢꦴꦤꦶ ꦄꦫꦹꦥꦏꦩ꧀ꦩꦛ꧀ꦜꦴꦤꦁ ꦢꦱ꧀ꦱꦺꦤ꧀ꦠꦺꦴ ꦠꦶꦱ꧀ꦱꦺꦴ ꦑꦺꦴꦠꦶꦄꦴꦢꦶꦩꦴꦲ. ꦥꦸꦤ ꦠꦴꦱꦁꦪꦺꦮ ꦮꦺꦢꦤꦴꦤꦁ ꦄꦱꦩ꧀ꦩꦶꦱ꧀ꦱꦨꦴꦮꦁ ꦢꦱ꧀ꦱꦺꦤ꧀ꦠꦺꦴ ꦪꦱ꧀ꦩꦶꦁ, ꦄꦒ꧀ꦒꦶꦮꦺꦱ꧀ꦱꦤ, ꦱꦩꦪꦺꦠꦶꦄꦴꦢꦶꦩꦴꦲ. ꦠꦠ꧀ꦫꦴꦪꦁ ꦱꦔ꧀ꦑꦺꦥꦠ꧀ꦡꦺꦴ – ꦪꦱ꧀ꦩꦶꦁ ꦱꦩꦪꦺ ꦱꦸꦑꦴꦢꦷꦱꦸ ꦌꦏꦁ ꦮꦺꦢꦤꦁ ꦮꦺꦢꦪꦠꦶ, ꦠꦱ꧀ꦩꦶꦁ ꦱꦩꦪꦺ ꦄꦚ꧀ꦚꦴ ꦮꦺꦢꦤꦴ ꦄꦠ꧀ꦠꦤꦺꦴ ꦮꦴꦫꦁ ꦮꦴ ꦎꦏꦴꦱꦁ ꦮꦴ ꦎꦭꦺꦴꦏꦪꦩꦴꦤꦴ ꦤꦶꦱꦶꦤ꧀ꦤꦴ ꦤꦴꦩ ꦤꦠ꧀ꦡꦶ, ꦄꦡ ꦑꦺꦴ ꦄꦤꦸꦥ꧀ꦥꦤ꧀ꦤꦴꦮ ꦲꦺꦴꦤ꧀ꦠꦶ ꦨꦶꦤ꧀ꦤꦈꦢꦏꦥꦸꦥ꧀ꦦꦸꦭ꦳ꦴ ꦮꦶꦪ ꦕ ꦄꦤ꧀ꦠꦫꦲꦶꦠꦴ ꦮꦴ. ꦱꦸꦑꦴꦥꦶ ꦑꦺꦴꦠꦶꦄꦴꦢꦶ ꦠꦴꦱꦁ ꦮꦺꦢꦤꦴꦤꦁ ꦕꦸꦟ꧀ꦟꦮꦶꦕꦸꦟ꧀ꦟꦨꦴꦮꦢꦱ꧀ꦱꦤꦠ꧀ꦡꦁ ꦮꦸꦠ꧀ꦠꦁ.

ꦤ ꦏꦺꦤꦕꦶ ꦱꦁꦮꦢꦠꦷꦠꦶ ꦠꦱ꧀ꦱꦠꦁ ꦒꦲꦺꦠ꧀ꦮꦴ ‘‘ꦱꦱ꧀ꦱꦠꦮꦴꦢꦷ ꦄꦲ’’ꦤ꧀ꦠꦶ ꦈꦕ꧀ꦖꦺꦢꦮꦴꦢꦶꦤꦴꦥꦶ ꦱꦢ꧀ꦣꦶꦁ ꦤ ꦱꦁꦮꦢꦠꦶ, ꦠꦩꦺꦮ ꦒꦲꦺꦠ꧀ꦮꦴ ‘‘ꦱꦱ꧀ꦱꦠꦮꦴꦢꦷ ꦄꦲ’’ꦤ꧀ꦠꦶ ꦌꦏꦕ꧀ꦕꦱꦱ꧀ꦱꦠꦮꦴꦢꦶꦤꦴ ꦱꦢ꧀ꦣꦶꦁ ꦤ ꦮꦶꦮꦢꦠꦶ. ꦌꦮꦁ ꦠꦪꦺꦴꦥꦶ ꦮꦴꦢꦴ ꦥꦫꦶꦮꦠ꧀ꦠꦺꦠ꧀ꦮꦴ ꦪꦺꦴꦗꦺꦠꦧ꧀ꦧꦴ. ꦪꦚ꧀ꦕ ꦭꦺꦴꦏꦺ ꦮꦸꦠ꧀ꦠꦤ꧀ꦠꦶ ꦪꦁ ꦭꦺꦴꦏꦺ ꦏꦡꦶꦠꦁ ꦮꦺꦴꦲꦫꦶꦠꦁ, ꦠꦺꦤ ꦮꦺꦴꦲꦫꦠꦶ ꦄꦥꦫꦴꦩꦱꦤ꧀ꦠꦺꦴ ꦏꦶꦚ꧀ꦕꦶ ꦣꦩ꧀ꦩꦁ ꦥꦫꦴꦩꦴꦱꦒ꧀ꦒꦴꦲꦺꦤ ꦄꦒ꧀ꦒꦟ꧀ꦲꦤ꧀ꦠꦺꦴ. ꦮꦸꦠ꧀ꦠꦩ꧀ꦥꦶ ꦕꦺꦠꦁ –

‘‘ꦪꦺꦴ ꦲꦺꦴꦠꦶ ꦨꦶꦏ꧀ꦑꦸ ꦄꦫꦲꦁ ꦏꦠꦴꦮꦷ,

ꦑꦷꦟꦴꦱꦮꦺꦴ ꦄꦤ꧀ꦠꦶꦩꦢꦺꦲꦣꦴꦫꦷ;

ꦄꦲꦁ ꦮꦢꦴꦩꦷꦠꦶꦥꦶ ꦱꦺꦴ ꦮꦢꦺꦪ꧀ꦪ,

ꦩꦩꦁ ꦮꦢꦤ꧀ꦠꦷꦠꦶꦥꦶ ꦱꦺꦴ ꦮꦢꦺꦪ꧀ꦪ;

ꦭꦺꦴꦏꦺ ꦱꦩꦚ꧀ꦚꦁ ꦏꦸꦱꦭꦺꦴ ꦮꦶꦢꦶꦠ꧀ꦮꦴ,

ꦮꦺꦴꦲꦴꦫꦩꦠ꧀ꦠꦺꦤ ꦱꦺꦴ ꦮꦺꦴꦲꦫꦺꦪ꧀ꦪꦴ’’ꦠꦶ. (ꦱꦁ. ꦤꦶ. ꧑.꧒꧕);

ꦄꦥꦫꦩ꧀ꦥꦶ ꦮꦸꦠ꧀ꦠꦁ – ‘‘ꦆꦩꦴ ꦑꦺꦴ ꦕꦶꦠ꧀ꦠ ꦭꦺꦴꦏꦱꦩꦚ꧀ꦚꦴ ꦭꦺꦴꦏꦤꦶꦫꦸꦠ꧀ꦠꦶꦪꦺꦴ ꦭꦺꦴꦏꦮꦺꦴꦲꦴꦫꦴ ꦭꦺꦴꦏꦥꦚ꧀ꦚꦠ꧀ꦠꦶꦪꦺꦴ, ꦪꦴꦲꦶ ꦠꦡꦴꦒꦠꦺꦴ ꦮꦺꦴꦲꦫꦠꦶ ꦄꦥꦫꦴꦩꦱ’’ꦤ꧀ꦠꦶ (ꦢꦷ. ꦤꦶ. ꧑.꧔꧔꧐).

꧒꧐꧖. ꦄꦨꦶꦚ꧀ꦚꦴꦥꦲꦴꦤꦩꦴꦲꦴꦠꦶ ꦱꦱ꧀ꦱꦠꦴꦢꦷꦱꦸ ꦠꦺꦱꦁ ꦠꦺꦱꦁ ꦣꦩ꧀ꦩꦴꦤꦁ ꦱꦱ꧀ꦱꦠꦁ ꦄꦨꦶꦚ꧀ꦚꦴꦪ ꦗꦴꦤꦶꦠ꧀ꦮꦴ ꦱꦱ꧀ꦱꦠꦱ꧀ꦱ ꦥꦲꦴꦤꦩꦴꦲ, ꦈꦕ꧀ꦖꦺꦢꦁ, ꦌꦏꦕ꧀ꦕꦱꦱ꧀ꦱꦠꦁ ꦄꦨꦶꦚ꧀ꦚꦴꦪ ꦌꦏꦕ꧀ꦕꦱꦱ꧀ꦱꦠꦱ꧀ꦱ ꦥꦲꦴꦤꦁ ꦮꦢꦠꦶ. ꦫꦹꦥꦁ ꦄꦨꦶꦚ꧀ꦚꦴꦪ ꦫꦹꦥꦱ꧀ꦱ ꦥꦲꦴꦤꦁ ꦮꦢꦠꦷꦠꦶꦄꦴꦢꦶꦤꦴ ꦤꦪꦺꦤꦺꦠ꧀ꦡ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ.

ꦥꦛꦶꦱꦚ꧀ꦕꦶꦏ꧀ꦑꦠꦺꦴꦠꦶ ꦥꦕ꧀ꦕꦮꦺꦏ꧀ꦑꦤ꧀ꦠꦱ꧀ꦱ. ꦄꦤꦸꦥꦴꦢꦴꦪ ꦄꦴꦱꦮꦺꦲꦶ ꦕꦶꦠ꧀ꦠꦁ ꦮꦶꦩꦸꦕ꧀ꦕꦷꦠꦶ ꦄꦤꦸꦥ꧀ꦥꦴꦢꦤꦶꦫꦺꦴꦣꦺꦤ ꦤꦶꦫꦸꦢ꧀ꦣꦺꦲꦶ ꦄꦴꦱꦮꦺꦲꦶ ꦄꦒ꧀ꦒꦲꦺꦠ꧀ꦮꦴꦮ ꦕꦶꦠ꧀ꦠꦁ ꦮꦶꦩꦸꦕ꧀ꦕꦶ. ꦌꦠ꧀ꦠꦴꦮꦠꦴ ꦕꦺꦱ ꦥꦫꦱ꧀ꦱ ꦮꦝ꧀ꦞꦶꦠꦁ ꦨꦠ꧀ꦠꦁ ꦨꦸꦚ꧀ꦗꦶꦠ꧀ꦮꦴ ꦑꦸꦢꦁ ꦮꦶꦤꦺꦴꦢꦺꦤ꧀ꦠꦺꦴ ꦮꦶꦪ ꦥꦫꦱ꧀ꦱ ꦄꦴꦫꦢ꧀ꦣꦴꦪ ꦣꦩ꧀ꦩꦢꦺꦱꦤꦴꦪ ꦚꦴꦟꦁ ꦥꦺꦱꦺꦠ꧀ꦮꦴ ꦮꦶꦥꦱ꧀ꦱꦤꦁ ꦮꦝ꧀ꦞꦺꦠ꧀ꦮꦴ ꦄꦫꦲꦠ꧀ꦠꦚ꧀ꦕꦺꦮ ꦥꦠ꧀ꦠꦺꦴ, ꦱꦴꦮꦏꦥꦴꦫꦩꦷꦚꦴꦟꦱ꧀ꦱ ꦕ ꦩꦠ꧀ꦡꦏꦁ, ꦱꦺꦴꦭ꦳ꦱ ꦕ ꦥꦚ꧀ꦚꦴ ꦥꦛꦶꦮꦶꦗ꧀ꦙꦶꦠ꧀ꦮꦴ ꦜꦶꦠꦺꦴ. ꦢꦷꦓꦤꦑꦺꦴ ꦥꦤ ꦱꦺꦴꦠꦴꦥꦠ꧀ꦠꦶꦦꦭꦁ ꦥꦠ꧀ꦮꦴ ꦱꦫꦟꦺꦱꦸ ꦥꦠꦶꦛ꧀ꦜꦶꦠꦺꦴ.

ꦨꦒꦮꦴ ꦥꦤ ꦆꦩꦁ ꦢꦺꦱꦤꦁ ꦱꦹꦫꦶꦪꦺ ꦣꦫꦩꦴꦤꦺꦪꦺꦮ ꦤꦶꦛ꧀ꦜꦴꦥꦺꦠ꧀ꦮꦴ ꦒꦶꦗ꧀ꦙꦏꦹꦛꦴ ꦎꦫꦸꦪ꧀ꦲ ꦮꦺꦭ꦳ꦸꦮꦤꦁ ꦒꦤ꧀ꦠ꧀ꦮꦴ ꦱꦴꦮꦏꦱꦤ꧀ꦤꦶꦥꦴꦠꦩꦏꦴꦱꦶ, ꦕꦠꦸꦫꦔ꧀ꦒꦱꦩꦤ꧀ꦤꦴꦒꦠꦺꦴ ꦱꦤ꧀ꦤꦶꦥꦴꦠꦺꦴ ꦄꦲꦺꦴꦱꦶ. ꦠꦠ꧀ꦫꦶꦩꦴꦤꦶ ꦄꦔ꧀ꦒꦴꦤꦶ – ꦩꦴꦓꦤꦏ꧀ꦑꦠ꧀ꦠꦺꦤ ꦪꦸꦠ꧀ꦠꦺꦴ ꦥꦸꦟ꧀ꦟꦩꦈꦥꦺꦴꦱꦡꦢꦶꦮꦱꦺꦴ, ꦏꦺꦤꦕꦶ ꦄꦤꦴꦩꦤ꧀ꦠꦶꦠꦴꦤꦶ ꦲꦸꦠ꧀ꦮꦴ ꦄꦠ꧀ꦠꦤꦺꦴꦪꦺꦮ ꦣꦩ꧀ꦩꦠꦴꦪ ꦱꦤ꧀ꦤꦶꦥꦠꦶꦠꦴꦤꦶ ꦄꦝ꧀ꦞꦠꦺꦭꦱꦴꦤꦶ ꦨꦶꦏ꧀ꦑꦸꦱꦠꦴꦤꦶ, ꦠꦺꦱꦸ ꦌꦏꦺꦴꦥꦶ ꦥꦸꦡꦸꦗ꧀ꦗꦤꦺꦴ ꦮꦴ ꦱꦺꦴꦠꦴꦥꦤ꧀ꦤ-ꦱꦏꦢꦴꦒꦴꦩꦶ-ꦄꦤꦴꦒꦴꦩꦶ-ꦱꦸꦏ꧀ꦑꦮꦶꦥꦱ꧀ꦱꦏ-ꦄꦫꦲꦤ꧀ꦠꦺꦱꦸ ꦮꦴ ꦄꦚ꧀ꦚꦠꦫꦺꦴ ꦤꦠ꧀ꦡꦶ, ꦱꦧ꧀ꦧꦺ ꦖꦭ꦳ꦨꦶꦚ꧀ꦚꦴꦮ, ꦌꦏꦺꦴꦥꦶ ꦕꦺꦠ꧀ꦡ ꦱꦠ꧀ꦡꦏꦺꦤ ꦏꦺꦱꦺ ꦖꦶꦤ꧀ꦢꦶꦠ꧀ꦮꦴ ꦥꦧ꧀ꦧꦗꦶꦠꦺꦴ ꦤꦴꦩ ꦤꦠ꧀ꦡꦶ, ꦱꦧ꧀ꦧꦺ ꦌꦲꦶꦨꦶꦏ꧀ꦑꦸꦤꦺꦴꦪꦺꦮꦴꦠꦶ.

ꦥꦥꦚ꧀ꦕꦱꦹꦢꦤꦶꦪꦴ ꦩꦗ꧀ꦙꦶꦩꦤꦶꦏꦴꦪꦛ꧀ꦜꦏꦡꦴꦪ

ꦢꦷꦓꦤꦑꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.