꧓. ꦩꦲꦴꦢꦸꦏ꧀ꦑꦏ꧀ꦑꦤ꧀ꦣꦱꦸꦠ꧀ꦠꦮꦟ꧀ꦟꦤꦴ

꧑꧖꧓. ꦌꦮꦁ ꦩꦺ ꦱꦸꦠꦤ꧀ꦠꦶ ꦩꦲꦴꦢꦸꦏ꧀ꦑꦏ꧀ꦑꦤ꧀ꦣꦱꦸꦠ꧀ꦠꦁ. ꦠꦠ꧀ꦡ ꦮꦶꦤꦪꦥꦫꦶꦪꦴꦪꦺꦤ ꦠꦪꦺꦴ ꦗꦤꦴ ꦱꦩ꧀ꦧꦲꦸꦭꦴꦠꦶ ꦮꦸꦕ꧀ꦕꦤ꧀ꦠꦶ, ꦠꦠꦺꦴ ꦥꦫꦁ ꦱꦔ꧀ꦓꦺꦴ. ꦱꦸꦠ꧀ꦠꦤ꧀ꦠꦥꦫꦶꦪꦴꦪꦺꦤ ꦠꦪꦺꦴ ꦠꦪꦺꦴ ꦌꦮ, ꦠꦠꦺꦴ ꦈꦢ꧀ꦣꦁ ꦱꦩ꧀ꦧꦲꦸꦭꦴꦠꦶ ꦮꦸꦕ꧀ꦕꦤ꧀ꦠꦶ. ꦆꦣ ꦱꦸꦠ꧀ꦠꦤ꧀ꦠꦥꦫꦶꦪꦴꦪꦺꦤ ꦱꦩ꧀ꦧꦲꦸꦭꦴꦠꦶ ꦮꦺꦢꦶꦠꦧ꧀ꦧꦴ. ꦥꦶꦟ꧀ꦝꦴꦪ ꦥꦴꦮꦶꦱꦶꦁꦱꦹꦠꦶ ꦥꦮꦶꦛ꧀ꦜꦴ, ꦠꦺ ꦥꦤ ꦤ ꦠꦴꦮ ꦥꦮꦶꦛ꧀ꦜꦴ, ꦥꦮꦶꦱꦶꦱ꧀ꦱꦴꦩꦴꦠꦶ ꦤꦶꦏ꧀ꦑꦤ꧀ꦠꦠ꧀ꦠꦴ ꦥꦤ ꦥꦮꦶꦱꦶꦁꦱꦹꦠꦶ ꦮꦸꦠ꧀ꦠꦴ. ꦪꦡꦴ ꦒꦴꦩꦁ ꦒꦩꦶꦱ꧀ꦱꦴꦩꦷꦠꦶ ꦤꦶꦏ꧀ꦑꦤ꧀ꦠꦥꦸꦫꦶꦱꦺꦴ ꦠꦁ ꦒꦴꦩꦁ ꦄꦥ꧀ꦥꦠ꧀ꦠꦺꦴꦥꦶ ‘‘ꦏꦸꦲꦶꦁ ꦆꦠ꧀ꦡꦤ꧀ꦤꦴꦩꦺꦴ’’ꦠꦶ ꦮꦸꦠ꧀ꦠꦺ ‘‘ꦒꦴꦩꦁ ꦒꦠꦺꦴ’’ꦠꦶ ꦮꦸꦕ꧀ꦕꦠꦶ, ꦌꦮꦁ. ꦥꦫꦶꦧ꧀ꦧꦴꦗꦏꦴꦤꦁ ꦄꦴꦫꦴꦩꦺꦴꦠꦶ ꦗꦺꦠꦮꦤꦠꦺꦴ ꦄꦮꦶꦢꦹꦫꦺ ꦄꦚ꧀ꦚꦠꦶꦠ꧀ꦡꦶꦪꦴꦤꦁ ꦥꦫꦶꦧ꧀ꦧꦴꦗꦏꦴꦤꦁ ꦄꦴꦫꦴꦩꦺꦴ ꦄꦠ꧀ꦡꦶ, ꦠꦁ ꦱꦤ꧀ꦣꦴꦪ ꦌꦮꦩꦴꦲꦁꦱꦸ. ꦱꦩꦟꦺꦴ, ꦄꦴꦮꦸꦱꦺꦴꦠꦶ, ꦄꦴꦮꦸꦱꦺꦴ, ꦠꦸꦩ꧀ꦲꦴꦏꦁ ꦱꦠ꧀ꦡꦴ ꦱꦩꦟꦺꦴ ꦒꦺꦴꦠꦩꦺꦴ. ꦏꦴꦩꦴꦤꦁ ꦥꦫꦶꦚ꧀ꦚꦤ꧀ꦠꦶ ꦏꦴꦩꦴꦤꦁ ꦥꦲꦴꦤꦁ ꦱꦩꦠꦶꦏ꧀ꦏꦩꦁ ꦥꦚ꧀ꦚꦥꦺꦠꦶ. ꦫꦹꦥꦮꦺꦢꦤꦴꦱꦸꦥꦶ ꦌꦱꦺꦮ ꦤꦪꦺꦴ.

ꦠꦠ꧀ꦡ ꦠꦶꦠ꧀ꦡꦶꦪꦴ ꦱꦏꦱꦩꦪꦁ ꦗꦴꦤꦤ꧀ꦠꦴ ꦏꦴꦩꦴꦤꦁ ꦥꦫꦶꦚ꧀ꦚꦁ ꦥꦚ꧀ꦚꦥꦺꦪ꧀ꦪꦸꦁ ꦥꦜꦩꦗ꧀ꦙꦴꦤꦁ ꦮꦢꦩꦴꦤꦴ, ꦫꦹꦥꦴꦤꦁ ꦥꦫꦶꦚ꧀ꦚꦁ ꦥꦚ꧀ꦚꦥꦺꦪ꧀ꦪꦸꦁ ꦄꦫꦹꦥꦨꦮꦁ ꦮꦢꦩꦴꦤꦴ, ꦮꦺꦢꦤꦴꦤꦁ ꦥꦫꦶꦚ꧀ꦚꦁ ꦥꦚ꧀ꦚꦥꦺꦪ꧀ꦪꦸꦁ ꦄꦱꦚ꧀ꦚꦨꦮꦁ ꦮꦢꦩꦴꦤꦴ. ꦠꦺ ꦥꦤ ‘‘ꦆꦢꦁ ꦤꦴꦩ ꦥꦜꦩꦗ꧀ꦙꦴꦤꦁ ꦄꦪꦁ ꦫꦹꦥꦨꦮꦺꦴ ꦄꦪꦁ ꦄꦫꦹꦥꦨꦮꦺꦴ’’ꦠꦶꦥꦶ ꦤ ꦗꦴꦤꦤ꧀ꦠꦶ. ꦠꦺ ꦥꦚ꧀ꦚꦥꦺꦠꦸꦁ ꦄꦱꦏ꧀ꦏꦺꦴꦤ꧀ꦠꦴꦥꦶ ꦏꦺꦮꦭꦁ ‘‘ꦥꦚ꧀ꦚꦥꦺꦩ ꦥꦚ꧀ꦚꦥꦺꦩꦴ’’ꦠꦶ ꦮꦢꦤ꧀ꦠꦶ. ꦠꦡꦴꦒꦠꦺꦴ ꦏꦴꦩꦴꦤꦁ ꦥꦫꦶꦚ꧀ꦚꦁ ꦄꦤꦴꦒꦴꦩꦶꦩꦒ꧀ꦒꦺꦤ ꦥꦚ꧀ꦚꦥꦺꦠꦶ, ꦫꦹꦥꦮꦺꦢꦤꦴꦤꦁ ꦄꦫꦲꦠ꧀ꦠꦩꦒ꧀ꦒꦺꦤ. ꦠꦺ ꦌꦮꦁ ꦩꦲꦤ꧀ꦠꦺ ꦮꦶꦱꦺꦱꦺ ꦮꦶꦗ꧀ꦗꦩꦴꦤꦺꦥꦶ ꦆꦣ ꦤꦺꦴ, ꦄꦴꦮꦸꦱꦺꦴ, ꦏꦺꦴ ꦮꦶꦮꦺꦱꦺꦴꦠꦶꦄꦴꦢꦶꦩꦴꦲꦁꦱꦸ.

ꦠꦠ꧀ꦡ ꦆꦣꦴꦠꦶ ꦆꦩꦱ꧀ꦩꦶꦁ ꦥꦚ꧀ꦚꦴꦥꦤꦺ. ꦣꦩ꧀ꦩꦢꦺꦱꦤꦴꦪ ꦮꦴ ꦣꦩ꧀ꦩꦢꦺꦱꦤꦤ꧀ꦠꦶ ꦪꦢꦶꦢꦁ ꦱꦩꦟꦱ꧀ꦱ ꦮꦴ ꦒꦺꦴꦠꦩꦱ꧀ꦱ ꦣꦩ꧀ꦩꦢꦺꦱꦤꦴꦪ ꦱꦢ꧀ꦣꦶꦁ ꦄꦩ꧀ꦲꦴꦏꦁ ꦣꦩ꧀ꦩꦢꦺꦱꦤꦁ, ꦄꦩ꧀ꦲꦴꦏꦁ ꦮꦴ ꦣꦩ꧀ꦩꦢꦺꦱꦤꦴꦪ ꦱꦢ꧀ꦣꦶꦁ ꦱꦩꦟꦱ꧀ꦱ ꦒꦺꦴꦠꦩꦱ꧀ꦱ ꦣꦩ꧀ꦩꦢꦺꦱꦤꦁ ꦄꦴꦫꦧ꧀ꦨ ꦤꦴꦤꦴꦏꦫꦟꦁ ꦮꦸꦕ꧀ꦕꦺꦡ, ꦠꦁ ꦏꦶꦤ꧀ꦤꦴꦩꦴꦠꦶ ꦮꦢꦤ꧀ꦠꦶ. ꦢꦸꦠꦶꦪꦥꦢꦺꦥꦶ ꦌꦱꦺꦮ ꦤꦪꦺꦴ. ꦆꦠꦶ ꦮꦺꦩꦗ꧀ꦙꦺ ꦨꦶꦤ꧀ꦤꦱꦸꦮꦟ꧀ꦟꦁ ꦮꦶꦪ ꦱꦴꦱꦤꦺꦤ ꦱꦢ꧀ꦣꦶꦁ ꦄꦠ꧀ꦠꦤꦺꦴ ꦭꦢ꧀ꦣꦶꦮꦕꦤꦩꦠ꧀ꦠꦺꦤ ꦱꦩꦣꦸꦫꦁ ꦜꦥꦪꦶꦁꦱꦸ. ꦤꦺꦮ ꦄꦨꦶꦤꦤ꧀ꦢꦶꦁꦱꦹꦠꦶ ꦌꦮꦩꦺꦠꦤ꧀ꦠꦶ ꦤ ꦱꦩ꧀ꦥꦛꦶꦕ꧀ꦖꦶꦁꦱꦸ. ꦤꦥ꧀ꦥꦛꦶꦏ꧀ꦏꦺꦴꦱꦶꦁꦱꦹꦠꦶ ꦤꦪꦶꦢꦁ ꦌꦮꦤ꧀ꦠꦶ ꦤꦥ꧀ꦥꦛꦶꦱꦺꦣꦺꦱꦸꦁ. ꦏꦱ꧀ꦩꦴ? ꦠꦺ ꦏꦶꦫ ꦠꦶꦠ꧀ꦡꦶꦪꦴ ꦤꦴꦩ ꦄꦤ꧀ꦣꦱꦢꦶꦱꦴ, ꦗꦴꦤꦶꦠ꧀ꦮꦴ ꦮꦴ ꦄꦗꦴꦤꦶꦠ꧀ꦮꦴ ꦮꦴ ꦏꦡꦺꦪ꧀ꦪꦸꦤ꧀ꦠꦶ ꦤꦴꦨꦶꦤꦤ꧀ꦢꦶꦁꦱꦸ, ꦥꦫꦶꦚ꧀ꦚꦤ꧀ꦠꦶ ꦮꦕꦤꦺꦤ ꦇꦱꦏꦁ ꦱꦴꦱꦤꦒꦤ꧀ꦣꦺꦴ ꦄꦠ꧀ꦡꦷꦠꦶ ꦤꦥ꧀ꦥꦛꦶꦏ꧀ꦏꦺꦴꦱꦶꦁꦱꦸ. ꦗꦤꦥꦢꦮꦴꦱꦶꦤꦺꦴ ꦮꦴ ꦠꦺ ꦱꦏꦱꦩꦪꦥꦫꦱꦩꦪꦺꦱꦸ ꦤ ꦱꦸꦛ꧀ꦜꦸ ꦏꦸꦱꦭꦴꦠꦶꦥꦶ ꦈꦨꦪꦁ ꦤꦴꦏꦁꦱꦸ.

꧑꧖꧕. ꦤ ꦕꦺꦮ ꦱꦩ꧀ꦥꦴꦪꦶꦱ꧀ꦱꦤ꧀ꦠꦷꦠꦶ ꦱꦩ꧀ꦥꦴꦢꦺꦠ꧀ꦮꦴ ꦏꦡꦺꦠꦸꦁ ꦤ ꦱꦏ꧀ꦑꦶꦱ꧀ꦱꦤ꧀ꦠꦶ. ꦈꦠ꧀ꦠꦫꦶꦚ꧀ꦕ ꦮꦶꦓꦴꦠꦤ꧀ꦠꦶ ꦄꦱꦩ꧀ꦥꦴꦪꦤꦠꦺꦴ ꦈꦠ꧀ꦠꦫꦶꦩ꧀ꦥꦶ ꦢꦸꦏ꧀ꦑꦁ ꦄꦴꦥꦗ꧀ꦗꦶꦱ꧀ꦱꦤ꧀ꦠꦶ. ꦱꦩ꧀ꦥꦴꦢꦺꦠ꧀ꦮꦴ ꦏꦡꦺꦠꦸꦁ ꦄꦱꦏ꧀ꦏꦺꦴꦤ꧀ꦠꦴꦤꦁ ꦤꦴꦩ ꦲꦶ ꦢꦸꦏ꧀ꦑꦁ ꦈꦥ꧀ꦥꦗ꧀ꦗꦠꦶ. ꦪꦡꦴ ꦠꦁ, ꦨꦶꦏ꧀ꦑꦮꦺ, ꦄꦮꦶꦱꦪꦱ꧀ꦩꦶꦤ꧀ꦠꦶ ꦌꦠ꧀ꦡ ꦪꦡꦴꦠꦶ ꦏꦴꦫꦟꦮꦕꦤꦁ, ꦠꦤ꧀ꦠꦶ ꦤꦶꦥꦴꦠꦩꦠ꧀ꦠꦁ. ꦪꦱ꧀ꦩꦴ ꦄꦮꦶꦱꦪꦺ ꦥꦚ꧀ꦲꦺꦴ ꦥꦸꦕ꧀ꦖꦶꦠꦺꦴ ꦲꦺꦴꦠꦷꦠꦶ ꦄꦠ꧀ꦡꦺꦴ. ꦱꦢꦺꦮꦏꦺꦠꦶ ꦱꦲ ꦢꦺꦮꦺꦲꦶ ꦱꦢꦺꦮꦏꦺ. ꦱꦩꦴꦫꦏꦴꦢꦷꦱꦸꦥꦶ ꦌꦱꦺꦮ ꦤꦪꦺꦴ. ꦌꦮꦁ ꦠꦷꦟꦶ ꦜꦴꦤꦴꦤꦶ ꦭꦺꦴꦏꦺ ꦥꦏ꧀ꦑꦶꦥꦶꦠ꧀ꦮꦴ ꦢ꧀ꦮꦺ ꦥꦗꦴꦪꦴꦠꦶ ꦥꦚ꧀ꦕꦲꦶꦥꦶ ꦱꦠ꧀ꦠꦭꦺꦴꦏꦩꦺꦮ ꦥꦫꦶꦪꦴꦢꦶꦪꦶꦠ꧀ꦮꦴ ꦌꦠꦱ꧀ꦩꦶꦁ ꦱꦢꦺꦮꦏꦴꦢꦶꦨꦺꦢꦺ ꦭꦺꦴꦏꦺ ꦠꦁ ꦢꦺꦮꦁ ꦮꦴ ꦩꦤꦸꦱ꧀ꦱꦁ ꦮꦴ ꦤ ꦥꦱ꧀ꦱꦴꦩꦷꦠꦶ ꦢꦷꦥꦺꦠꦶ. ꦆꦠꦺꦴ ꦮꦴ ꦥꦤ ꦱꦸꦠ꧀ꦮꦴꦠꦶ ꦆꦠꦺꦴ ꦮꦴ ꦥꦤ ꦩꦩ ꦱꦴꦱꦤꦠꦺꦴ ꦱꦸꦠ꧀ꦮꦴ ꦄꦠꦡꦴꦒꦠꦺꦴꦥꦶ ꦄꦠꦡꦴꦒꦠꦱꦴꦮꦏꦺꦴꦥꦶ ꦄꦴꦫꦴꦣꦺꦪ꧀ꦪ ꦥꦫꦶꦠꦺꦴꦱꦺꦪ꧀ꦪ. ꦄꦚ꧀ꦚꦡꦴ ꦄꦴꦫꦴꦣꦤꦁ ꦤꦴꦩ ꦤꦠ꧀ꦡꦷꦠꦶ ꦢꦱ꧀ꦱꦺꦠꦶ.

꧑꧖꧖. ꦆꦢꦴꦤꦶ ꦄꦠ꧀ꦠꦤꦺꦴ ꦠꦺꦱꦁ ꦥꦚ꧀ꦲꦴꦤꦁ ꦮꦺꦪ꧀ꦪꦴꦏꦫꦟꦺꦤ ꦕꦶꦠ꧀ꦠꦴꦫꦴꦣꦤꦁ ꦢꦱ꧀ꦱꦺꦤ꧀ꦠꦺꦴ ꦏꦺꦴ ꦕ, ꦨꦶꦏ꧀ꦑꦮꦺꦠꦶꦄꦴꦢꦶꦩꦴꦲ. ꦏꦴꦩꦒꦸꦟꦴꦠꦶ ꦏꦴꦩꦪꦶꦠꦧ꧀ꦧꦛ꧀ꦜꦺꦤ ꦏꦴꦩꦴ. ꦧꦤ꧀ꦣꦤꦛ꧀ꦜꦺꦤ ꦒꦸꦟꦴ. ‘‘ꦄꦤꦸꦗꦴꦤꦴꦩꦶ, ꦨꦶꦏ꧀ꦑꦮꦺ, ꦄꦲꦠꦴꦤꦁ ꦮꦠ꧀ꦡꦴꦤꦁ ꦢ꧀ꦮꦶꦒꦸꦟꦁ ꦱꦔ꧀ꦓꦴꦛꦶ’’ꦤ꧀ꦠꦶ (ꦩꦲꦴꦮ. ꧓꧔꧘) ꦌꦠ꧀ꦡ ꦲꦶ ꦥꦛꦭꦛ꧀ꦜꦺꦴ ꦒꦸꦟꦛ꧀ꦜꦺꦴ. ‘‘ꦄꦕ꧀ꦕꦺꦤ꧀ꦠꦶ ꦏꦴꦭꦴ ꦠꦫꦪꦤ꧀ꦠꦶ ꦫꦠ꧀ꦠꦶꦪꦺꦴ, ꦮꦪꦺꦴꦒꦸꦟꦴ ꦄꦤꦸꦥꦸꦧ꧀ꦧꦁ ꦗꦲꦤ꧀ꦠꦷ’’ꦠꦶ (ꦱꦁ. ꦤꦶ. ꧑.꧔) ꦌꦠ꧀ꦡ ꦫꦴꦱꦛ꧀ꦜꦺꦴ ꦒꦸꦟꦛ꧀ꦜꦺꦴ. ‘‘ꦱꦠꦒꦸꦟꦴ ꦢꦏ꧀ꦑꦶꦟꦴ ꦥꦴꦛꦶꦏꦔ꧀ꦑꦶꦠꦧ꧀ꦧꦴ’’ꦠꦶ (ꦩ. ꦤꦶ. ꧓.꧓꧗꧙) ꦌꦠ꧀ꦡ ꦄꦴꦤꦶꦱꦁꦱꦛ꧀ꦜꦺꦴ ꦒꦸꦟꦛ꧀ꦜꦺꦴ. ‘‘ꦄꦤ꧀ꦠꦁ ꦄꦤ꧀ꦠꦒꦸꦟꦁ (ꦑꦸ. ꦥꦴ. ꧓ ꦢ꧀ꦮꦠ꧀ꦠꦶꦁꦱꦴꦏꦴꦫꦺ; ꦢꦷ. ꦤꦶ. ꧒.꧓꧗꧗) ꦏꦪꦶꦫꦴ ꦩꦴꦭꦴꦒꦸꦟꦺ ꦧꦲꦹ’’ꦠꦶ (ꦣ. ꦥ. ꧕꧓) ꦌꦠ꧀ꦡ ꦧꦤ꧀ꦣꦤꦛ꧀ꦜꦺꦴ ꦒꦸꦟꦛ꧀ꦜꦺꦴ. ꦆꦣꦴꦥꦶ ꦌꦱꦺꦮ ꦄꦣꦶꦥ꧀ꦥꦺꦠꦺꦴ, ꦠꦺꦤ ꦮꦸꦠ꧀ꦠꦁ ‘‘ꦧꦤ꧀ꦣꦤꦛ꧀ꦜꦺꦤ ꦒꦸꦟꦴ’’ꦠꦶ. ꦕꦏ꧀ꦑꦸꦮꦶꦚ꧀ꦚꦺꦪ꧀ꦪꦴꦠꦶ ꦕꦏ꧀ꦑꦸꦮꦶꦚ꧀ꦚꦴꦟꦺꦤ ꦥꦱ꧀ꦱꦶꦠꦧ꧀ꦧꦴ. ꦌꦠꦺꦤꦸꦥꦴꦪꦺꦤ ꦱꦺꦴꦠꦮꦶꦚ꧀ꦚꦺꦪ꧀ꦪꦴꦢꦷꦱꦸꦥꦶ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ꦆꦛ꧀ꦜꦴꦠꦶ ꦥꦫꦶꦪꦶꦛ꧀ꦜꦴ ꦮꦴ ꦲꦺꦴꦤ꧀ꦠꦸ ꦩꦴ ꦮꦴ, ꦆꦛ꧀ꦜꦴꦫꦩ꧀ꦩꦟꦨꦹꦠꦴꦠꦶ ꦄꦠ꧀ꦡꦺꦴ. ꦏꦤ꧀ꦠꦴꦠꦶ ꦏꦩꦤꦷꦪꦴ. ꦩꦤꦴꦥꦴꦠꦶ ꦩꦤꦮꦝ꧀ꦞꦤꦏꦴ. ꦥꦶꦪꦫꦹꦥꦴꦠꦶ ꦥꦶꦪꦗꦴꦠꦶꦏꦴ. ꦏꦴꦩꦹꦥꦱꦁꦲꦶꦠꦴꦠꦶ ꦄꦴꦫꦩ꧀ꦩꦟꦁ ꦏꦠ꧀ꦮꦴ ꦈꦥ꧀ꦥꦗ꧀ꦗꦩꦴꦤꦺꦤ ꦏꦴꦩꦺꦤ ꦈꦥꦱꦁꦲꦶꦠꦴ. ꦫꦗꦤꦷꦪꦴꦠꦶ ꦫꦗ꧀ꦗꦤꦶꦪꦴ, ꦫꦴꦒꦸꦥ꧀ꦥꦠ꧀ꦠꦶꦏꦴꦫꦟꦨꦹꦠꦴꦠꦶ ꦄꦠ꧀ꦡꦺꦴ.

꧑꧖꧗. ꦪꦢꦶ ꦩꦸꦢ꧀ꦢꦴꦪꦴꦠꦶꦄꦴꦢꦷꦱꦸ ꦩꦸꦢ꧀ꦢꦴꦠꦶ ꦄꦔ꧀ꦒꦸꦭꦶꦥꦧ꧀ꦧꦺꦱꦸ ꦱꦚ꧀ꦚꦁ ꦜꦥꦺꦠ꧀ꦮꦴ ꦲꦠ꧀ꦡꦩꦸꦢ꧀ꦢꦴ. ꦒꦟꦤꦴꦠꦶ ꦄꦕ꧀ꦖꦶꦢ꧀ꦢꦒꦟꦤꦴ. ꦱꦔ꧀ꦑꦴꦤꦤ꧀ꦠꦶ ꦥꦶꦟ꧀ꦝꦒꦟꦤꦴ. ꦪꦴꦪ ꦑꦺꦠ꧀ꦠꦁ ꦎꦭꦺꦴꦏꦺꦠ꧀ꦮꦴ ꦆꦣ ꦌꦠ꧀ꦠꦏꦴ ꦮꦷꦲꦷ ꦨꦮꦶꦱ꧀ꦱꦤ꧀ꦠꦶ, ꦫꦸꦏ꧀ꦑꦁ ꦎꦭꦺꦴꦏꦺꦠ꧀ꦮꦴ ꦆꦣ ꦌꦠ꧀ꦠꦏꦴꦤꦶ ꦦꦭꦴꦤꦶ ꦨꦮꦶꦱ꧀ꦱꦤ꧀ꦠꦶ, ꦄꦴꦏꦴꦱꦁ ꦎꦭꦺꦴꦏꦺꦠ꧀ꦮꦴ ꦆꦩꦺ ꦄꦴꦏꦴꦱꦺ ꦱꦏꦸꦟꦴ ꦌꦠ꧀ꦠꦏꦴ ꦤꦴꦩ ꦨꦮꦶꦱ꧀ꦱꦤ꧀ꦠꦷꦠꦶ ꦗꦴꦤꦤ꧀ꦠꦶ.

ꦏꦱꦷꦠꦶ ꦏꦱꦶꦏꦩ꧀ꦩꦁ. ꦮꦟꦶꦗ꧀ꦗꦴꦠꦶ ꦗꦔ꧀ꦓꦮꦟꦶꦗ꧀ꦗꦡꦭꦮꦟꦶꦗ꧀ꦗꦴꦢꦶꦮꦟꦶꦥ꧀ꦥꦡꦺꦴ. ꦒꦺꦴꦫꦏ꧀ꦑꦤ꧀ꦠꦶ ꦄꦠ꧀ꦠꦤꦺꦴ ꦮꦴ ꦥꦫꦺꦱꦁ ꦮꦴ ꦒꦴꦮꦺꦴ ꦫꦏ꧀ꦑꦶꦠ꧀ꦮꦴ ꦥꦚ꧀ꦕꦒꦺꦴꦫꦱꦮꦶꦏ꧀ꦏꦪꦺꦤ ꦗꦷꦮꦤꦏꦩ꧀ꦩꦁ. ꦆꦱ꧀ꦱꦠ꧀ꦡꦺꦴ ꦮꦸꦕ꧀ꦕꦠꦶ ꦄꦴꦮꦸꦣꦁ ꦒꦲꦺꦠ꧀ꦮꦴ ꦈꦥꦛ꧀ꦜꦴꦤꦏꦩ꧀ꦩꦁ. ꦫꦴꦗꦥꦺꦴꦫꦶꦱꦤ꧀ꦠꦶ ꦄꦴꦮꦸꦣꦺꦤ ꦫꦴꦗꦏꦩ꧀ꦩꦁ ꦏꦠ꧀ꦮꦴ ꦈꦥꦛ꧀ꦜꦴꦤꦁ. ꦱꦶꦥ꧀ꦥꦚ꧀ꦚꦠꦫꦤ꧀ꦠꦶ ꦒꦲꦶꦠꦴꦮꦱꦺꦱꦁ ꦲꦠ꧀ꦡꦶꦄꦱ꧀ꦱꦱꦶꦥ꧀ꦥꦴꦢꦶ. ꦱꦷꦠꦱ꧀ꦱ ꦥꦸꦫꦏ꧀ꦑꦠꦺꦴꦠꦶ ꦭꦏ꧀ꦑꦁ ꦮꦶꦪ ꦱꦫꦱ꧀ꦱ ꦱꦷꦠꦱ꧀ꦱ ꦥꦸꦫꦠꦺꦴ, ꦱꦷꦠꦺꦤ ꦧꦴꦣꦷꦪꦩꦴꦤꦺꦴꦠꦶ ꦄꦠ꧀ꦡꦺꦴ. ꦈꦟ꧀ꦲꦺꦥꦶ ꦌꦱꦺꦮ ꦤꦪꦺꦴ. ꦝꦁꦱꦴꦢꦷꦱꦸ ꦝꦁꦱꦴꦠꦶ ꦥꦶꦔ꧀ꦒꦭꦩꦏ꧀ꦑꦶꦏꦴ. ꦩꦏꦱꦴꦠꦶ ꦱꦧ꧀ꦧꦩꦏ꧀ꦑꦶꦏꦴ, ꦱꦫꦷꦱꦥꦴꦠꦶ ꦪꦺ ꦏꦺꦕꦶ ꦱꦫꦶꦠ꧀ꦮꦴ ꦒꦕ꧀ꦖꦤ꧀ꦠꦶ. ꦫꦶꦱ꧀ꦱꦩꦴꦤꦺꦴꦠꦶ ꦫꦸꦥ꧀ꦥꦩꦴꦤꦺꦴ, ꦓꦛ꧀ꦛꦶꦪꦩꦴꦤꦺꦴ. ꦩꦷꦪꦩꦴꦤꦺꦴꦠꦶ ꦩꦫꦩꦴꦤꦺꦴ. ꦄꦪꦁ, ꦨꦶꦏ꧀ꦑꦮꦺꦠꦶ, ꦨꦶꦏ꧀ꦑꦮꦺ, ꦄꦪꦁ ꦩꦸꦢ꧀ꦢꦴꦢꦷꦲꦶ ꦗꦷꦮꦶꦏꦏꦥ꧀ꦥꦤꦁ ꦄꦴꦒꦩ꧀ꦩ ꦱꦷꦠꦴꦢꦶꦥꦕ꧀ꦕꦪꦺꦴ ꦄꦴꦧꦴꦣꦺꦴ. ꦏꦴꦩꦴꦤꦁ ꦄꦴꦢꦷꦤꦮꦺꦴꦠꦶ ꦏꦴꦩꦺꦱꦸ ꦈꦥꦢ꧀ꦢꦮꦺꦴ, ꦈꦥꦱ꧀ꦱꦒ꧀ꦒꦺꦴꦠꦶ ꦄꦠ꧀ꦡꦺꦴ. ꦱꦤ꧀ꦢꦶꦛ꧀ꦜꦶꦏꦺꦴꦠꦶ ꦥꦕ꧀ꦕꦏ꧀ꦑꦺꦴ ꦱꦴꦩꦁ ꦥꦱ꧀ꦱꦶꦠꦧ꧀ꦧꦺꦴ. ꦢꦸꦏ꧀ꦑꦏ꧀ꦑꦤ꧀ꦣꦺꦴꦠꦶ ꦢꦸꦏ꧀ꦑꦫꦴꦱꦶ. ꦏꦴꦩꦲꦺꦠꦹꦠꦶꦄꦴꦢꦷꦱꦸ ꦥꦕ꧀ꦕꦪꦛ꧀ꦜꦺꦤ ꦏꦴꦩꦴ ꦄꦱ꧀ꦱ ꦲꦺꦠꦹꦠꦶ ꦏꦴꦩꦲꦺꦠꦸ. ꦩꦹꦭꦛ꧀ꦜꦺꦤ ꦏꦴꦩꦴ ꦤꦶꦢꦴꦤꦩꦱ꧀ꦱꦴꦠꦶ ꦏꦴꦩꦤꦶꦢꦴꦤꦺꦴ. ꦭꦶꦔ꧀ꦒꦮꦶꦥꦭ꧀ꦭꦴꦱꦺꦤ ꦥꦤ ꦏꦴꦩꦤꦶꦢꦴꦤꦤ꧀ꦠꦶ ꦮꦸꦠ꧀ꦠꦺꦴ. ꦏꦴꦫꦟꦛ꧀ꦜꦺꦤ ꦏꦴꦩꦴ ꦄꦣꦶꦏꦫꦟꦁ ꦄꦱ꧀ꦱꦴꦠꦶ ꦏꦴꦩꦴꦣꦶꦏꦫꦟꦺꦴ. ꦭꦶꦔ꧀ꦒꦮꦶꦥꦭ꧀ꦭꦴꦱꦺꦤꦺꦮ ꦥꦤ ꦏꦴꦩꦴꦣꦶꦏꦫꦟꦤ꧀ꦠꦶ ꦮꦸꦠ꧀ꦠꦺꦴ. ꦏꦴꦩꦴꦤꦩꦺꦮ ꦲꦺꦠꦹꦠꦶ ꦆꦢꦁ ꦤꦶꦪꦩꦮꦕꦤꦁ, ꦏꦴꦩꦥꦕ꧀ꦕꦪꦴ ꦈꦥ꧀ꦥꦗ꧀ꦗꦠꦶꦪꦺꦮꦴꦠꦶ ꦄꦠ꧀ꦡꦺꦴ.

ꦈꦛ꧀ꦜꦲꦠꦺꦴꦠꦶ ꦄꦴꦗꦷꦮꦱꦩꦸꦛ꧀ꦜꦴꦥꦏꦮꦷꦫꦶꦪꦺꦤ ꦈꦛ꧀ꦜꦲꦤ꧀ꦠꦱ꧀ꦱ. ꦓꦛꦠꦺꦴꦠꦶ ꦠꦁ ꦮꦷꦫꦶꦪꦁ ꦥꦸꦧ꧀ꦧꦺꦤꦴꦥꦫꦁ ꦓꦛꦺꦤ꧀ꦠꦱ꧀ꦱ. ꦮꦴꦪꦩꦠꦺꦴꦠꦶ ꦮꦴꦪꦴꦩꦁ ꦥꦫꦏ꧀ꦏꦩꦁ ꦥꦪꦺꦴꦒꦁ ꦏꦫꦺꦴꦤ꧀ꦠꦱ꧀ꦱ. ꦤꦴꦨꦶꦤꦶꦥ꧀ꦦꦗ꧀ꦗꦤ꧀ꦠꦷꦠꦶ ꦤ ꦤꦶꦥ꧀ꦦꦗ꧀ꦗꦤ꧀ꦠꦶ, ꦲꦠ꧀ꦡꦁ ꦤꦴꦨꦶꦫꦸꦲꦤ꧀ꦠꦶ. ꦱꦺꦴꦕꦠꦷꦠꦶ ꦕꦶꦠ꧀ꦠꦺ ꦈꦥ꧀ꦥꦤ꧀ꦤꦧꦭꦮꦱꦺꦴꦏꦺꦤ ꦱꦺꦴꦕꦠꦶ. ꦏꦶꦭꦩꦠꦷꦠꦶ ꦏꦴꦪꦺ ꦈꦥ꧀ꦥꦤ꧀ꦤꦢꦸꦏ꧀ꦑꦺꦤ ꦏꦶꦭꦩꦠꦶ. ꦥꦫꦶꦢꦺꦮꦠꦷꦠꦶ ꦮꦴꦕꦴꦪ ꦥꦫꦶꦢꦺꦮꦠꦶ. ꦈꦫꦠ꧀ꦠꦴꦭ꦳ꦶꦤ꧀ꦠꦶ ꦈꦫꦁ ꦠꦴꦭ꦳ꦺꦠ꧀ꦮꦴ. ꦏꦤ꧀ꦢꦠꦷꦠꦶ ꦫꦺꦴꦢꦠꦶ. ꦱꦩ꧀ꦩꦺꦴꦲꦁ ꦄꦴꦥꦗ꧀ꦗꦠꦷꦠꦶ ꦮꦶꦱꦚ꧀ꦚꦷ ꦮꦶꦪ ꦱꦩ꧀ꦩꦹꦭ꦳꧀ꦲꦺꦴ ꦲꦺꦴꦠꦶ. ꦩꦺꦴꦓꦤ꧀ꦠꦶ ꦠꦸꦕ꧀ꦖꦁ. ꦄꦦꦭꦺꦴꦠꦶ ꦤꦶꦥ꧀ꦦꦭꦺꦴ. ꦄꦴꦫꦏ꧀ꦑꦴꦣꦶꦏꦫꦟꦤ꧀ꦠꦶ ꦄꦴꦫꦏ꧀ꦑꦏꦴꦫꦟꦴ. ꦏꦶꦤ꧀ꦠꦷꦠꦶ ꦏꦺꦤ ꦤꦸ ꦑꦺꦴ ꦈꦥꦴꦪꦺꦤ. ꦪꦩ꧀ꦥꦶ ꦩꦺꦠꦶ ꦪꦩ꧀ꦥꦶ ꦩꦪ꧀ꦲꦁ ꦏꦱꦶꦏꦩ꧀ꦩꦴꦢꦷꦤꦶ ꦏꦠ꧀ꦮꦴ ꦈꦥ꧀ꦥꦴꦢꦶꦠꦁ ꦣꦤꦁ ꦄꦲꦺꦴꦱꦶ. ꦠꦩ꧀ꦥꦶ ꦤꦺꦴ ꦤꦠ꧀ꦡꦷꦠꦶ ꦠꦩ꧀ꦥꦶ ꦄꦩ꧀ꦲꦴꦏꦁ ꦆꦢꦴꦤꦶ ꦤꦠ꧀ꦡꦶ.

꧑꧖꧘. ꦥꦸꦤ ꦕꦥꦫꦁ, ꦨꦶꦏ꧀ꦑꦮꦺ, ꦏꦴꦩꦲꦺꦠꦹꦠꦶꦄꦴꦢꦶꦤꦴꦥꦶ ꦏꦴꦫꦟꦁ ꦢꦱ꧀ꦱꦺꦠ꧀ꦮꦴꦮ ꦄꦴꦢꦷꦤꦮꦁ ꦢꦷꦥꦺꦠꦶ. ꦠꦠ꧀ꦡ ꦏꦴꦩꦲꦺꦠꦹꦠꦶ ꦏꦴꦩꦥꦕ꧀ꦕꦪꦴ ꦫꦴꦗꦴꦤꦺꦴꦥꦶ ꦫꦴꦗꦹꦲꦶ ꦮꦶꦮꦢꦤ꧀ꦠꦶ. ꦏꦴꦩꦤꦶꦢꦴꦤꦤ꧀ꦠꦶ ꦨꦴꦮꦤꦥꦸꦁꦱꦏꦁ, ꦏꦴꦩꦺ ꦤꦶꦢꦴꦤꦁ ꦏꦠ꧀ꦮꦴ ꦮꦶꦮꦢꦤ꧀ꦠꦷꦠꦶ ꦄꦠ꧀ꦡꦺꦴ. ꦏꦴꦩꦴꦣꦶꦏꦫꦟꦤ꧀ꦠꦶꦥꦶ ꦨꦴꦮꦤꦥꦸꦁꦱꦏꦩꦺꦮ, ꦏꦴꦩꦺ ꦄꦣꦶꦏꦫꦟꦁ ꦏꦠ꧀ꦮꦴ ꦮꦶꦮꦢꦤ꧀ꦠꦷꦠꦶ ꦄꦠ꧀ꦡꦺꦴ. ꦏꦴꦩꦴꦤꦩꦺꦮ ꦲꦺꦠꦹꦠꦶ ꦒꦴꦩꦤꦶꦒꦩꦤꦒꦫꦱꦺꦤꦴꦥꦠꦶꦥꦸꦫꦺꦴꦲꦶꦠꦛ꧀ꦜꦴꦤꦤ꧀ꦠꦫꦴꦢꦷꦤꦁ ꦏꦴꦩꦴꦤꦩꦺꦮ ꦲꦺꦠꦸ ꦮꦶꦮꦢꦤ꧀ꦠꦷꦠꦶ ꦄꦠ꧀ꦡꦺꦴ. ꦈꦥꦏ꧀ꦏꦩꦤ꧀ꦠꦷꦠꦶ ꦥꦲꦫꦤ꧀ꦠꦶ. ꦄꦱꦶꦕꦩ꧀ꦩꦤ꧀ꦠꦶ ꦄꦱꦶꦚ꧀ꦕꦺꦮ ꦑꦺꦛꦏꦦꦭꦏꦴꦢꦷꦤꦶ ꦕ. ꦣꦤꦸꦏꦭꦴꦥꦁ ꦱꦤ꧀ꦤꦪ꧀ꦲꦶꦠ꧀ꦮꦴꦠꦶ ꦣꦤꦸꦁ ꦒꦲꦺꦠ꧀ꦮꦴ ꦱꦫꦏꦭꦴꦥꦁ ꦱꦤ꧀ꦤꦪ꧀ꦲꦶꦠ꧀ꦮꦴ. ꦈꦨꦠꦺꦴꦧ꧀ꦪꦹꦭ꦳ꦤ꧀ꦠꦶ ꦈꦨꦠꦺꦴ ꦫꦴꦱꦶꦨꦹꦠꦁ. ꦥꦏ꧀ꦑꦤ꧀ꦢꦤ꧀ꦠꦷꦠꦶ ꦥꦮꦶꦱꦤ꧀ꦠꦶ. ꦈꦱꦹꦱꦹꦠꦶ ꦏꦟ꧀ꦝꦺꦱꦸ. ꦮꦶꦗ꧀ꦗꦺꦴꦠꦭꦤ꧀ꦠꦺꦱꦹꦠꦶ ꦮꦶꦥꦫꦶꦮꦠ꧀ꦠꦤ꧀ꦠꦺꦱꦸ. ꦠꦺ ꦠꦠ꧀ꦡꦴꦠꦶ ꦠꦺ ꦠꦱ꧀ꦩꦶꦁ ꦱꦔ꧀ꦒꦴꦩꦺ.

ꦄꦢ꧀ꦢꦴꦮꦭꦺꦥꦤꦴ ꦈꦥꦏꦴꦫꦶꦪꦺꦴꦠꦶ ꦕꦺꦠ꧀ꦡ ꦩꦤꦸꦱ꧀ꦱꦴ ꦥꦴꦏꦴꦫꦥꦴꦢꦁ ꦄꦱ꧀ꦱꦑꦸꦫꦱꦟ꧀ꦜꦴꦤꦺꦤ ꦆꦛ꧀ꦜꦏꦴꦲꦶ ꦕꦶꦤꦶꦠ꧀ꦮꦴ ꦈꦥꦫꦶ ꦱꦸꦣꦴꦪ ꦭꦶꦩ꧀ꦥꦤ꧀ꦠꦶ. ꦌꦮꦁ ꦏꦠꦴ ꦥꦴꦏꦴꦫꦥꦴꦢꦴ ꦈꦥꦏꦴꦫꦶꦪꦺꦴꦠꦶ ꦮꦸꦕ꧀ꦕꦤ꧀ꦠꦶ. ꦠꦴ ꦠꦶꦤ꧀ꦠꦺꦤ ꦏꦭꦭꦺꦤ ꦱꦶꦠ꧀ꦠꦴ ꦄꦢ꧀ꦢꦴꦮꦭꦺꦥꦤꦴ ꦤꦴꦩ ꦲꦺꦴꦤ꧀ꦠꦶ. ꦥꦏ꧀ꦑꦤ꧀ꦢꦤ꧀ꦠꦷꦠꦶ ꦠꦴꦱꦁ ꦲꦺꦛ꧀ꦜꦴ ꦠꦶꦑꦶꦟꦄꦪꦱꦹꦭꦴꦢꦷꦲꦶ ꦮꦶꦗ꧀ꦙꦷꦪꦩꦴꦤꦴꦥꦶ ꦥꦴꦏꦴꦫꦱ꧀ꦱ ꦥꦶꦕ꧀ꦖꦶꦭꦨꦴꦮꦺꦤ ꦄꦴꦫꦺꦴꦲꦶꦠꦸꦁ ꦄꦱꦏ꧀ꦏꦺꦴꦤ꧀ꦠꦴꦥꦶ ꦈꦥꦣꦴꦮꦤ꧀ꦠꦶꦪꦺꦮ. ꦖꦏꦟꦏꦴꦪꦴꦠꦶ ꦏꦸꦡꦶꦠꦒꦺꦴꦩꦪꦺꦤ. ꦄꦨꦶꦮꦒ꧀ꦒꦺꦤꦴꦠꦶ ꦱꦠꦢꦤ꧀ꦠꦺꦤ. ꦠꦁ ꦄꦛ꧀ꦜꦢꦤ꧀ꦠꦴꦏꦴꦫꦺꦤ ꦏꦠ꧀ꦮꦴ ‘‘ꦤꦒꦫꦢ꧀ꦮꦴꦫꦁ ꦨꦶꦤ꧀ꦢꦶꦠ꧀ꦮꦴ ꦥꦮꦶꦱꦶꦱ꧀ꦱꦴꦩꦴ’’ꦠꦶ ꦄꦴꦒꦠꦺ ꦈꦥꦫꦶꦢ꧀ꦮꦴꦫꦺ ꦜꦶꦠꦴ ꦠꦱ꧀ꦱ ꦧꦤ꧀ꦣꦤꦪꦺꦴꦠ꧀ꦠꦴꦤꦶ ꦖꦶꦤ꧀ꦢꦶꦠ꧀ꦮꦴ ꦠꦺꦤ ꦄꦨꦶꦮꦒ꧀ꦒꦺꦤ ꦎꦩꦢ꧀ꦢꦤ꧀ꦠꦶ.

꧑꧖꧙. ꦱꦤ꧀ꦣꦶꦩ꧀ꦥꦶ ꦖꦶꦤ꧀ꦢꦤ꧀ꦠꦷꦠꦶ ꦓꦫꦱꦤ꧀ꦣꦶꦩ꧀ꦥꦶ ꦖꦶꦤ꧀ꦢꦤ꧀ꦠꦶ. ꦤꦶꦭ꧀ꦭꦺꦴꦥꦤ꧀ꦠꦶ ꦒꦴꦩꦺ ꦥꦲꦫꦶꦠ꧀ꦮꦴ ꦩꦲꦴꦮꦶꦭꦺꦴꦥꦁ ꦏꦫꦺꦴꦤ꧀ꦠꦶ. ꦌꦏꦴꦒꦴꦫꦶꦏꦤ꧀ꦠꦶ ꦥꦟ꧀ꦟꦴꦱꦩꦠ꧀ꦠꦴꦥꦶ ꦱꦛ꧀ꦜꦶꦩꦠ꧀ꦠꦴꦥꦶ ꦥꦫꦶꦮꦴꦫꦺꦠ꧀ꦮꦴ ꦗꦷꦮꦒ꧀ꦒꦴꦲꦁ ꦒꦲꦺꦠ꧀ꦮꦴ ꦄꦴꦲꦫꦴꦥꦺꦤ꧀ꦠꦶ. ꦥꦫꦶꦥꦤ꧀ꦡꦺꦥꦶ ꦠꦶꦛ꧀ꦜꦤ꧀ꦠꦷꦠꦶ ꦥꦤ꧀ꦡꦢꦹꦲꦤꦏꦩ꧀ꦩꦁ ꦏꦫꦺꦴꦤ꧀ꦠꦶ. ꦄꦝ꧀ꦞꦢꦟ꧀ꦝꦏꦺꦲꦷꦠꦶ ꦩꦸꦒ꧀ꦒꦫꦺꦲꦶ ꦥꦲꦴꦫꦱꦴꦣꦤꦠ꧀ꦡꦁ ꦮꦴ ꦕꦠꦸꦲꦠ꧀ꦡꦢꦟ꧀ꦝꦁ ꦢ꧀ꦮꦺꦣꦴ ꦖꦺꦠ꧀ꦮꦴ ꦒꦲꦶꦠꦢꦟ꧀ꦝꦏꦺꦲꦶ. ꦧꦶꦭꦔ꧀ꦒꦡꦴꦭꦶꦏꦤ꧀ꦠꦶ ꦏꦚ꧀ꦗꦶꦪꦈꦏ꧀ꦑꦭꦶꦏꦩ꧀ꦩꦏꦴꦫꦟꦁ, ꦠꦁ ꦏꦫꦺꦴꦤ꧀ꦠꦴ ꦱꦷꦱꦏꦥꦴꦭꦁ ꦈꦥ꧀ꦥꦴꦛꦺꦠ꧀ꦮꦴ ꦠꦠ꧀ꦠꦁ ꦄꦪꦺꦴꦒꦸꦭ꦳ꦁ ꦱꦟ꧀ꦝꦴꦱꦺꦤ ꦒꦲꦺꦠ꧀ꦮꦴ ꦠꦠ꧀ꦡ ꦥꦏ꧀ꦑꦶꦥꦤ꧀ꦠꦶ, ꦠꦺꦤ ꦩꦠ꧀ꦡꦭꦸꦔ꧀ꦒꦁ ꦥꦏ꧀ꦏꦸꦡꦶꦠ꧀ꦮꦴ ꦈꦥꦫꦶ ꦈꦠ꧀ꦠꦫꦠꦶ. ꦱꦔ꧀ꦑꦩꦸꦟ꧀ꦝꦶꦏꦤ꧀ꦠꦶ ꦱꦔ꧀ꦑꦩꦸꦟ꧀ꦝꦏꦩ꧀ꦩꦏꦴꦫꦟꦁ, ꦠꦁ ꦏꦫꦺꦴꦤ꧀ꦠꦴ ꦈꦠ꧀ꦠꦫꦺꦴꦛ꧀ꦜꦈꦨꦠꦺꦴꦏꦟ꧀ꦟꦕꦹꦭ꦳ꦶꦏꦒꦭ꦳ꦮꦴꦛꦥꦫꦶꦕ꧀ꦖꦺꦢꦺꦤ ꦕꦩ꧀ꦩꦁ ꦖꦶꦤ꧀ꦢꦶꦠ꧀ꦮꦴ ꦱꦧ꧀ꦧꦏꦺꦱꦺ ꦌꦏꦠꦺꦴ ꦒꦟ꧀ꦜꦶꦁ ꦏꦠ꧀ꦮꦴ ꦢꦟ꧀ꦝꦏꦺꦤ ꦮꦭ꧀ꦭꦶꦠ꧀ꦮꦴ ꦈꦥ꧀ꦥꦴꦛꦺꦤ꧀ꦠꦶ, ꦱꦲ ꦏꦺꦱꦺꦲꦶ ꦕꦩ꧀ꦩꦁ ꦈꦛ꧀ꦜꦲꦠꦶ. ꦠꦠꦺꦴ ꦱꦷꦱꦏꦛꦴꦲꦁ ꦡꦹꦭꦱꦏ꧀ꦑꦫꦴꦲꦶ ꦓꦁꦱꦶꦠ꧀ꦮꦴ ꦣꦺꦴꦮꦤ꧀ꦠꦴ ꦱꦔ꧀ꦑꦮꦟ꧀ꦟꦁ ꦏꦫꦺꦴꦤ꧀ꦠꦶ.

ꦫꦴꦲꦸꦩꦸꦑꦤ꧀ꦠꦶ ꦫꦴꦲꦸꦩꦸꦑꦏꦩ꧀ꦩꦏꦴꦫꦟꦁ, ꦠꦁ ꦏꦫꦺꦴꦤ꧀ꦠꦴ ꦱꦔ꧀ꦏꦸꦤꦴ ꦩꦸꦑꦁ ꦮꦶꦮꦫꦶꦠ꧀ꦮꦴ ꦄꦤ꧀ꦠꦺꦴꦩꦸꦑꦺ ꦢꦷꦥꦁ ꦗꦴꦭꦺꦤ꧀ꦠꦶ. ꦏꦟ꧀ꦟꦕꦹꦭ꦳ꦶꦏꦴꦲꦶ ꦮꦴ ꦥꦛ꧀ꦜꦴꦪ ꦩꦸꦑꦁ ꦤꦶꦑꦴꦢꦤꦺꦤ ꦑꦟꦤ꧀ꦠꦶ. ꦭꦺꦴꦲꦶꦠꦁ ꦥꦒ꧀ꦓꦫꦶꦠ꧀ꦮꦴ ꦩꦸꦑꦁ ꦥꦹꦫꦺꦠꦶ. ꦗꦺꦴꦠꦶꦩꦴꦭꦶꦏꦤ꧀ꦠꦶ ꦱꦏꦭꦱꦫꦷꦫꦁ ꦠꦺꦭꦥꦶꦭꦺꦴꦠꦶꦏꦴꦪ ꦮꦺꦜꦺꦠ꧀ꦮꦴ ꦄꦴꦭꦶꦩ꧀ꦥꦤ꧀ꦠꦶ. ꦲꦠ꧀ꦡꦥꦗ꧀ꦗꦺꦴꦠꦶꦏꦤ꧀ꦠꦶ ꦲꦠ꧀ꦡꦺ ꦠꦺꦭꦥꦶꦭꦺꦴꦠꦶꦏꦴꦪ ꦮꦺꦜꦺꦠ꧀ꦮꦴ ꦢꦷꦥꦁ ꦮꦶꦪ ꦗꦴꦭꦺꦤ꧀ꦠꦶ. ꦌꦫꦏꦮꦠ꧀ꦠꦶꦏꦤ꧀ꦠꦶ ꦌꦫꦏꦮꦠ꧀ꦠꦏꦩ꧀ꦩꦏꦴꦫꦟꦁ, ꦠꦁ ꦏꦫꦺꦴꦤ꧀ꦠꦴ ꦒꦷꦮꦠꦺꦴ ꦥꦛ꧀ꦜꦴꦪ ꦕꦩ꧀ꦩꦧꦢ꧀ꦣꦺ ꦏꦤ꧀ꦠꦶꦠ꧀ꦮꦴ ꦒꦺꦴꦥ꧀ꦦꦏꦺ ꦜꦥꦺꦤ꧀ꦠꦶ. ꦄꦡ ꦤꦁ ꦪꦺꦴꦠ꧀ꦠꦺꦲꦶ ꦧꦤ꧀ꦣꦶꦠ꧀ꦮꦴ ꦏꦝ꧀ꦞꦤ꧀ꦠꦶ. ꦱꦺꦴ ꦄꦠ꧀ꦠꦤꦺꦴ ꦕꦩ꧀ꦩꦧꦢ꧀ꦣꦺ ꦄꦏ꧀ꦏꦩꦶꦠ꧀ꦮꦴ ꦄꦏ꧀ꦏꦩꦶꦠ꧀ꦮꦴ ꦥꦠꦠꦶ. ꦕꦷꦫꦏꦮꦴꦱꦶꦏꦤ꧀ꦠꦶ ꦕꦷꦫꦏꦮꦴꦱꦶꦏꦏꦩ꧀ꦩꦏꦴꦫꦟꦁ, ꦠꦁ ꦏꦫꦺꦴꦤ꧀ꦠꦴ ꦠꦡꦺꦮ ꦕꦩ꧀ꦩꦧꦢ꧀ꦣꦺ ꦏꦤ꧀ꦠꦶꦠ꧀ꦮꦴ ꦏꦛꦶꦪꦁ ꦜꦥꦺꦤ꧀ꦠꦶ. ꦏꦛꦶꦠꦺꦴ ꦥꦛ꧀ꦜꦴꦪ ꦏꦤ꧀ꦠꦶꦠ꧀ꦮꦴ ꦒꦺꦴꦥ꧀ꦦꦏꦺꦱꦸ ꦜꦥꦺꦤ꧀ꦠꦶ. ꦈꦥꦫꦶꦩꦺꦲꦶ ꦲꦺꦛ꧀ꦜꦶꦩꦱꦫꦷꦫꦁ ꦕꦷꦫꦏꦤꦶꦮꦴꦱꦤꦤꦶꦮꦠ꧀ꦡꦁ ꦮꦶꦪ ꦲꦺꦴꦠꦶ. ꦌꦟꦺꦪ꧀ꦪꦏꦤ꧀ꦠꦶ ꦌꦟꦺꦪ꧀ꦪꦏꦏꦩ꧀ꦩꦏꦴꦫꦟꦁ. ꦠꦁ ꦏꦫꦺꦴꦤ꧀ꦠꦴ ꦈꦨꦺꦴꦱꦸ ꦏꦥ꧀ꦥꦫꦺꦱꦸ ꦕ ꦗꦴꦟꦹꦱꦸ ꦕ ꦄꦪꦮꦭꦪꦴꦤꦶ ꦢꦠ꧀ꦮꦴ ꦄꦪꦱꦹꦭꦴꦤꦶ ꦏꦺꦴꦛ꧀ꦛꦺꦤ꧀ꦠꦶ. ꦱꦺꦴ ꦕꦠꦹꦲꦶ ꦄꦪꦱꦹꦭꦺꦲꦶ ꦨꦹꦩꦶꦪꦁ ꦥꦠꦶꦛ꧀ꦜꦲꦠꦶ. ꦄꦡ ꦤꦁ ꦥꦫꦶꦮꦴꦫꦺꦠ꧀ꦮꦴ ꦄꦒ꧀ꦒꦶꦁ ꦏꦫꦺꦴꦤ꧀ꦠꦶ. ‘‘ꦌꦟꦺꦪ꧀ꦪꦏꦺꦴ ꦗꦺꦴꦠꦶꦥꦫꦶꦒ꧀ꦒꦲꦺꦴ ꦪꦡꦴ’’ꦠꦶ ꦄꦴꦒꦠꦛ꧀ꦜꦴꦤꦺꦥꦶ ꦆꦢꦩꦺꦮ ꦮꦸꦠ꧀ꦠꦁ. ꦠꦁ ꦏꦴꦭꦺꦤ ꦏꦴꦭꦁ ꦱꦹꦭꦴꦤꦶ ꦄꦥꦤꦺꦠ꧀ꦮꦴ ꦕꦠꦹꦲꦶ ꦄꦛ꧀ꦜꦶꦏꦺꦴꦛꦷꦲꦶꦪꦺꦮ ꦜꦥꦺꦤ꧀ꦠꦶ. ꦌꦮꦫꦹꦥꦴ ꦏꦴꦫꦟꦴ ꦤꦴꦩ ꦤꦠ꧀ꦡꦶ.

ꦧꦭ꦳ꦶꦱꦩꦁꦱꦶꦏꦤ꧀ꦠꦶ ꦈꦨꦠꦺꦴꦩꦸꦑꦺꦲꦶ ꦧꦭ꦳ꦶꦱꦺꦲꦶ ꦥꦲꦫꦶꦠ꧀ꦮꦴ ꦕꦩ꧀ꦩꦩꦁꦱꦤ꧀ꦲꦴꦫꦹꦤꦶ ꦈꦥ꧀ꦥꦴꦛꦺꦤ꧀ꦠꦶ. ꦏꦲꦴꦥꦟꦶꦏꦤ꧀ꦠꦶ ꦱꦏꦭꦱꦫꦷꦫꦁ ꦠꦶꦟ꧀ꦲꦴꦲꦶ ꦮꦴꦱꦷꦲꦶ ꦏꦺꦴꦛꦶꦠꦺꦴ ꦥꦛ꧀ꦜꦴꦪ ꦏꦲꦴꦥꦟꦩꦠ꧀ꦠꦁ ꦏꦲꦴꦥꦟꦩꦠ꧀ꦠꦁ ꦥꦴꦠꦺꦤ꧀ꦠꦴ ꦏꦺꦴꦛ꧀ꦛꦺꦤ꧀ꦠꦶ. ꦑꦴꦫꦴꦥꦠꦕ꧀ꦖꦶꦏꦤ꧀ꦠꦶ ꦱꦫꦷꦫꦁ ꦠꦠ꧀ꦡ ꦠꦠ꧀ꦡ ꦄꦴꦮꦸꦣꦺꦲꦶ ꦥꦲꦫꦶꦠ꧀ꦮꦴ ꦏꦺꦴꦕ꧀ꦖꦺꦲꦶ ꦑꦴꦫꦁ ꦓꦁꦱꦤ꧀ꦠꦶ. ꦕꦩ꧀ꦩꦱꦁꦱꦤ꧀ꦲꦴꦫꦹꦤꦶ ꦥꦒ꧀ꦓꦫꦶꦠ꧀ꦮꦴ ꦱꦮꦤ꧀ꦠꦶ. ꦄꦛ꧀ꦜꦶꦏꦱꦔ꧀ꦑꦭꦶꦏꦴꦮ ꦠꦶꦛ꧀ꦜꦠꦶ. ꦥꦭꦶꦓꦥꦫꦶꦮꦠ꧀ꦠꦶꦏꦤ꧀ꦠꦶ ꦌꦏꦺꦤ ꦥꦱ꧀ꦱꦺꦤ ꦤꦶꦥꦗ꧀ꦗꦴꦥꦺꦠ꧀ꦮꦴ ꦏꦟ꧀ꦟꦕ꧀ꦖꦶꦢ꧀ꦢꦺ ꦄꦪꦱꦹꦭꦁ ꦏꦺꦴꦛ꧀ꦛꦺꦠ꧀ꦮꦴ ꦥꦡꦮꦶꦪꦴ ꦌꦏꦴꦧꦢ꧀ꦣꦁ ꦏꦫꦺꦴꦤ꧀ꦠꦶ. ꦄꦡ ꦤꦁ ꦥꦴꦢꦺ ꦒꦲꦺꦠ꧀ꦮꦴ ꦄꦴꦮꦶꦗ꧀ꦙꦤ꧀ꦠꦶ. ꦥꦭꦴꦭꦥꦷꦜꦏꦤ꧀ꦠꦶ ꦖꦺꦏꦺꦴ ꦏꦴꦫꦟꦶꦏꦺꦴ ꦖꦮꦶꦕꦩ꧀ꦩꦁ ꦄꦕ꧀ꦖꦶꦤ꧀ꦢꦶꦠ꧀ꦮꦴ ꦤꦶꦱꦢꦥꦺꦴꦠꦺꦲꦶ ꦄꦛ꧀ꦜꦷꦤꦶ ꦨꦶꦤ꧀ꦢꦶꦠ꧀ꦮꦴ ꦏꦺꦱꦺꦱꦸ ꦒꦲꦺꦠ꧀ꦮꦴ ꦈꦏ꧀ꦑꦶꦥꦤ꧀ꦠꦶ. ꦩꦁꦱꦫꦴꦱꦶꦪꦺꦮ ꦲꦺꦴꦠꦶ, ꦄꦡ ꦤꦁ ꦏꦺꦱꦺꦲꦺꦮ ꦥꦫꦶꦪꦺꦴꦤꦤ꧀ꦣꦶꦠ꧀ꦮꦴ ꦒꦟ꧀ꦲꦤ꧀ꦠꦶ. ꦥꦭꦴꦭꦮꦛ꧀ꦛꦶꦁ ꦮꦶꦪ ꦏꦠ꧀ꦮꦴ ꦥꦤ ꦮꦺꦜꦺꦤ꧀ꦠꦶ. ꦱꦸꦤꦑꦺꦲꦶꦥꦷꦠꦶ ꦏꦠꦶꦥꦪꦴꦤꦶ ꦢꦶꦮꦱꦴꦤꦶ ꦄꦴꦲꦴꦫꦁ ꦄꦢꦠ꧀ꦮꦴ ꦖꦴꦠꦏꦺꦲꦶ ꦱꦸꦤꦑꦺꦲꦶ ꦑꦴꦢꦴꦥꦺꦤ꧀ꦠꦶ. ꦠꦺ ꦩꦸꦲꦸꦠ꧀ꦠꦺꦤ ꦄꦛ꧀ꦜꦶꦱꦔ꧀ꦑꦭꦶꦏꦩꦺꦮ ꦏꦫꦺꦴꦤ꧀ꦠꦶ. ꦱꦩ꧀ꦥꦫꦴꦪꦶꦏꦺꦴꦠꦶ ꦱꦩ꧀ꦥꦫꦴꦪꦺ ꦢꦸꦠꦶꦪꦠ꧀ꦠꦨꦴꦮꦺ ꦮꦶꦥꦴꦏꦺꦴꦠꦶ ꦄꦠ꧀ꦡꦺꦴ.

꧑꧗꧐. ꦖꦤ꧀ꦢꦫꦴꦒꦮꦶꦤꦪꦺꦴ ꦖꦤ꧀ꦢꦫꦴꦒꦥ꧀ꦥꦲꦴꦤꦤ꧀ꦠꦶ ꦤꦶꦧ꧀ꦧꦴꦤꦁ. ꦤꦶꦧ꧀ꦧꦴꦤꦚ꧀ꦲꦶ ꦄꦴꦒꦩ꧀ꦩ ꦏꦴꦩꦺꦱꦸ ꦖꦤ꧀ꦢꦫꦴꦒꦺꦴ ꦮꦶꦤꦷꦪꦠꦶ ꦕꦺꦮ ꦥꦲꦷꦪꦠꦶ ꦕ, ꦠꦱ꧀ꦩꦴ ꦤꦶꦧ꧀ꦧꦴꦤꦁ ꦖꦤ꧀ꦢꦫꦴꦒꦮꦶꦤꦪꦺꦴ ꦖꦤ꧀ꦢꦫꦴꦒꦥ꧀ꦥꦲꦴꦤꦤ꧀ꦠꦶ ꦕ ꦮꦸꦠ꧀ꦠꦁ. ꦱꦴꦩꦁ ꦮꦴ ꦏꦴꦩꦺ ꦥꦫꦶꦗꦴꦤꦶꦱ꧀ꦱꦤ꧀ꦠꦷꦠꦶ ꦱꦪꦁ ꦮꦴ ꦠꦺ ꦏꦴꦩꦺ ꦠꦷꦲꦶ ꦥꦫꦶꦚ꧀ꦚꦴꦲꦶ ꦥꦫꦶꦗꦴꦤꦶꦱ꧀ꦱꦤ꧀ꦠꦶ. ꦠꦡꦠ꧀ꦠꦴꦪꦴꦠꦶ ꦠꦡꦨꦴꦮꦴꦪ. ꦪꦡꦴꦥꦛꦶꦥꦤ꧀ꦤꦺꦴꦠꦶ ꦪꦴꦪ ꦥꦛꦶꦥꦢꦴꦪ ꦥꦛꦶꦥꦤ꧀ꦤꦺꦴ.

꧑꧗꧑. ꦑꦠ꧀ꦠꦶꦪꦏꦚ꧀ꦚꦴ ꦮꦴꦠꦶꦄꦴꦢꦶ ꦄꦥꦫꦶꦠ꧀ꦠꦺꦤ ꦮꦶꦥꦸꦭꦺꦤ ꦏꦸꦱꦭꦺꦤ ꦒꦲꦶꦠꦥꦛꦶꦱꦤ꧀ꦣꦶꦏꦁ ꦮꦠ꧀ꦡꦴꦭꦔ꧀ꦏꦴꦫꦴꦢꦷꦤꦶ ꦭꦨꦤꦛ꧀ꦜꦴꦤꦺ ꦤꦶꦧ꧀ꦧꦠ꧀ꦠꦁ ꦢꦱ꧀ꦱꦺꦠꦸꦁ ꦮꦸꦠ꧀ꦠꦁ. ꦥꦤ꧀ꦤꦫꦱꦮꦱ꧀ꦱꦸꦢ꧀ꦢꦺꦱꦶꦏꦴꦠꦶ ꦥꦤ꧀ꦤꦫꦱꦮꦱ꧀ꦱꦮꦪꦴ. ꦢꦸꦠꦶꦪꦥꦢꦺꦥꦶ ꦌꦱꦺꦮ ꦤꦪꦺꦴ. ꦮꦪꦥꦢꦺꦱꦁ ꦏꦱ꧀ꦩꦴ ꦒꦟ꧀ꦲꦴꦠꦶ? ꦮꦟ꧀ꦟꦱꦩ꧀ꦥꦠ꧀ꦠꦶꦢꦱ꧀ꦱꦤꦠ꧀ꦡꦁ. ꦩꦴꦠꦸꦒꦴꦩꦱ꧀ꦱ ꦲꦶ ꦢꦸꦒ꧀ꦒꦠꦏꦸꦭꦺ ꦤꦶꦧ꧀ꦧꦠ꧀ꦠꦱ꧀ꦱꦴꦥꦶ ꦌꦠꦱ꧀ꦩꦶꦁ ꦏꦴꦭꦺ ꦡꦺꦴꦏꦁ ꦡꦺꦴꦏꦁ ꦮꦟ꧀ꦟꦴꦪꦠꦤꦁ ꦥꦱꦷꦢꦠꦶ. ꦥꦸꦫꦶꦱꦴꦤꦁ ꦥꦤ ꦮꦷꦱꦠꦶꦮꦱ꧀ꦱꦏꦴꦭꦺ ꦥꦚ꧀ꦕꦮꦷꦱꦠꦶꦮꦱ꧀ꦱꦏꦴꦭꦺ ꦥꦱꦤ꧀ꦤꦁ ꦲꦺꦴꦠꦶ. ꦤꦴꦠꦶꦢꦷꦓꦴꦠꦶꦄꦴꦢꦷꦲꦶ ꦖꦢꦺꦴꦱꦮꦶꦫꦲꦶꦠꦁ ꦱꦫꦷꦫꦱꦩ꧀ꦥꦠ꧀ꦠꦶꦁ ꦢꦷꦥꦺꦠꦶ. ꦮꦟ꧀ꦟꦤꦶꦨꦴꦠꦶ ꦮꦟ꧀ꦟꦺꦴꦪꦺꦮ.

ꦗꦶꦟ꧀ꦟꦤ꧀ꦠꦶ ꦗꦫꦴꦗꦶꦟ꧀ꦟꦁ. ꦒꦺꦴꦥꦴꦤꦱꦶꦮꦔ꧀ꦏꦤ꧀ꦠꦶ ꦒꦺꦴꦥꦴꦤꦱꦷ ꦮꦶꦪ ꦮꦔ꧀ꦏꦁ. ꦨꦺꦴꦒ꧀ꦒꦤ꧀ꦠꦶ ꦨꦒ꧀ꦒꦁ, ꦆꦩꦶꦤꦴꦥꦶꦱ꧀ꦱ ꦮꦔ꧀ꦏꦨꦴꦮꦩꦺꦮ ꦢꦷꦥꦺꦠꦶ. ꦢꦟ꧀ꦝꦥꦫꦴꦪꦟꦤ꧀ꦠꦶ ꦢꦟ꧀ꦝꦥꦛꦶꦱꦫꦟꦁ ꦢꦟ꧀ꦝꦢꦸꦠꦶꦪꦁ. ꦥꦮꦺꦣꦩꦴꦤꦤ꧀ꦠꦶ ꦏꦩ꧀ꦥꦩꦴꦤꦁ. ꦄꦴꦠꦸꦫꦤ꧀ꦠꦶ ꦗꦫꦴꦠꦸꦫꦁ. ꦑꦟ꧀ꦝꦢꦤ꧀ꦠꦤ꧀ꦠꦶ ꦗꦶꦟ꧀ꦟꦨꦴꦮꦺꦤ ꦑꦟ꧀ꦝꦶꦠꦢꦤ꧀ꦠꦁ. ꦥꦭꦶꦠꦏꦺꦱꦤ꧀ꦠꦶ ꦥꦟ꧀ꦝꦫꦏꦺꦱꦁ. ꦮꦶꦭꦹꦤꦤ꧀ꦠꦶ ꦭꦸꦚ꧀ꦕꦶꦠ꧀ꦮꦴ ꦒꦲꦶꦠꦏꦺꦱꦁ ꦮꦶꦪ ꦑꦭ꧀ꦭꦴꦛꦁ. ꦑꦭꦶꦠꦱꦶꦫꦤ꧀ꦠꦶ ꦩꦲꦴꦑꦭ꧀ꦭꦴꦛꦱꦷꦱꦁ. ꦮꦭꦶꦤꦤ꧀ꦠꦶ ꦱꦚ꧀ꦗꦴꦠꦮꦭꦶꦁ. ꦠꦶꦭꦏꦴꦲꦠꦒꦠ꧀ꦠꦤ꧀ꦠꦶ ꦱꦺꦠꦏꦴꦭ꦳ꦠꦶꦭꦏꦺꦲꦶ ꦮꦶꦏꦶꦟ꧀ꦟꦱꦫꦷꦫꦁ. ꦄꦴꦧꦴꦣꦶꦏꦤ꧀ꦠꦶ ꦧ꧀ꦪꦴꦣꦶꦏꦁ. ꦢꦸꦏ꧀ꦑꦶꦠꦤ꧀ꦠꦶ ꦢꦸꦏ꧀ꦑꦥꦠ꧀ꦠꦁ.

ꦧꦴꦭ꦳꧀ꦲꦒꦶꦭꦴꦤꦤ꧀ꦠꦶ ꦄꦣꦶꦩꦠ꧀ꦠꦒꦶꦭꦴꦤꦁ. ꦱꦶꦮꦡꦶꦏꦴꦪ ꦖꦝ꧀ꦝꦶꦠꦤ꧀ꦠꦶ ꦄꦴꦩꦏꦱꦸꦱꦴꦤꦺ ꦥꦴꦠꦶꦠꦁ. ꦱꦺꦱꦩꦺꦠ꧀ꦡ ꦱꦠꦶꦥꦛ꧀ꦜꦴꦤꦺ ꦮꦸꦠ꧀ꦠꦩꦺꦮ. ꦆꦣꦴꦥꦶ ꦤꦶꦧ꧀ꦧꦴꦤꦁꦪꦺꦮ ꦖꦤ꧀ꦢꦫꦴꦒꦮꦶꦤꦪꦺꦴ.

꧑꧗꧓. ꦤꦺꦮ ꦠꦱ꧀ꦩꦶꦁ ꦱꦩꦪꦺ ꦄꦠ꧀ꦠꦧ꧀ꦪꦴꦧꦴꦣꦴꦪꦴꦠꦶ ꦠꦱ꧀ꦩꦶꦁ ꦱꦩꦪꦺ ꦄꦠ꧀ꦠꦤꦺꦴꦥꦶ ꦢꦸꦏ꧀ꦑꦠ꧀ꦡꦴꦪ ꦤ ꦕꦺꦠꦺꦠꦶ. ꦄꦧ꧀ꦪꦴꦧꦗ꧀ꦙꦁꦪꦺꦮꦴꦠꦶ ꦤꦶꦢ꧀ꦢꦸꦏ꧀ꦑꦩꦺꦮ.

꧑꧗꧔. ꦪꦁ, ꦨꦶꦏ꧀ꦑꦮꦺ, ꦮꦺꦢꦤꦴ ꦄꦤꦶꦕ꧀ꦕꦴꦠꦶ, ꦨꦶꦏ꧀ꦑꦮꦺ, ꦪꦱ꧀ꦩꦴ ꦮꦺꦢꦤꦴ ꦄꦤꦶꦕ꧀ꦕꦴ, ꦠꦱ꧀ꦩꦴ ꦄꦪꦁ ꦄꦤꦶꦕ꧀ꦕꦴꦢꦶꦄꦴꦏꦴꦫꦺꦴꦮ ꦮꦺꦢꦤꦴꦪ ꦄꦴꦢꦷꦤꦮꦺꦴꦠꦶ ꦄꦠ꧀ꦡꦺꦴ, ꦤꦶꦱ꧀ꦱꦫꦟꦁ ꦮꦸꦠ꧀ꦠꦥ꧀ꦥꦏꦴꦫꦩꦺꦮꦴꦠꦶ.

ꦥꦥꦚ꧀ꦕꦱꦹꦢꦤꦶꦪꦴ ꦩꦗ꧀ꦙꦶꦩꦤꦶꦏꦴꦪꦛ꧀ꦜꦏꦡꦴꦪ

ꦩꦲꦴꦢꦸꦏ꧀ꦑꦏ꧀ꦑꦤ꧀ꦣꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.