꧓. ꦩꦟꦶꦡꦹꦟꦮꦶꦩꦴꦤꦮꦟ꧀ꦟꦤꦴ

ꦈꦕ꧀ꦕꦩꦶꦢꦁ ꦩꦟꦶꦡꦹꦟꦁ ꦮꦶꦩꦴꦤꦤ꧀ꦠꦶ ꦩꦟꦶꦡꦹꦟꦮꦶꦩꦴꦤꦁ. ꦠꦱ꧀ꦱ ꦏꦴ ꦈꦥ꧀ꦥꦠ꧀ꦠꦶ? ꦨꦒꦮꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ ꦗꦺꦠꦮꦤꦺ. ꦠꦺꦤ ꦱꦩꦪꦺꦤ ꦱꦩ꧀ꦧꦲꦸꦭꦴ ꦡꦺꦫꦴ ꦨꦶꦏ꧀ꦑꦹ ꦄꦫꦚ꧀ꦚꦴꦪꦠꦤꦺ ꦮꦶꦲꦫꦤ꧀ꦠꦶ. ꦠꦺꦱꦁ ꦒꦴꦩꦁ ꦥꦶꦟ꧀ꦝꦴꦪ ꦒꦩꦤꦩꦒ꧀ꦒꦺ ꦌꦏꦺꦴ ꦈꦥꦴꦱꦏꦺꦴ ꦮꦶꦱꦩꦁ ꦱꦩꦁ ꦏꦫꦺꦴꦠꦶ, ꦏꦟ꧀ꦛꦏꦺ ꦤꦷꦲꦫꦠꦶ, ꦒꦕ꧀ꦖꦒꦸꦩ꧀ꦧꦺ ꦄꦥꦤꦺꦠꦶ, ꦈꦢꦏꦏꦴꦭꦺ ꦩꦴꦠꦶꦏꦴꦱꦸ ꦱꦺꦠꦸꦁ ꦧꦤ꧀ꦣꦠꦶ, ꦮꦶꦮꦤꦛ꧀ꦜꦴꦤꦺꦱꦸ ꦖꦴꦪꦴꦫꦸꦏ꧀ꦑꦺ ꦫꦺꦴꦥꦺꦠꦶ, ꦗꦭꦴꦱꦪꦺꦱꦸ ꦩꦠ꧀ꦠꦶꦏꦁ ꦈꦢ꧀ꦣꦫꦶꦠ꧀ꦮꦴ ꦠꦺ ꦥꦸꦡꦸꦭꦒꦩ꧀ꦨꦷꦫꦺ ꦏꦫꦺꦴꦠꦶ, ꦠꦶꦠ꧀ꦡꦺ ꦱꦩ꧀ꦥꦴꦢꦺꦠꦶ, ꦪꦡꦴꦮꦶꦨꦮꦁ ꦢꦴꦤꦁ ꦢꦺꦠꦶ, ꦱꦷꦭꦁ ꦫꦏ꧀ꦑꦠꦶ. ꦱꦺꦴ ꦄꦥꦫꦨꦴꦒꦺ ꦏꦴꦭꦁ ꦏꦠ꧀ꦮꦴ ꦠꦴꦮꦠꦶꦁꦱꦺꦱꦸ ꦢ꧀ꦮꦴꦢꦱꦪꦺꦴꦗꦤꦶꦏꦺ ꦏꦤꦏꦮꦶꦩꦴꦤꦺ ꦤꦶꦧ꧀ꦧꦠ꧀ꦠꦶ. ꦠꦁ ꦄꦴꦪꦱ꧀ꦩꦴ ꦩꦲꦴꦩꦺꦴꦒ꧀ꦒꦭ꧀ꦭꦴꦤꦠ꧀ꦡꦺꦫꦺꦴ ꦈꦥꦱꦔ꧀ꦏꦩꦶꦠ꧀ꦮꦴ ꦆꦩꦴꦲꦶ ꦒꦴꦡꦴꦲꦶ ꦥꦛꦶꦥꦸꦕ꧀ꦖꦶ –

꧑꧑꧒꧖. ‘‘ꦈꦕ꧀ꦕꦩꦶꦢꦁ ꦩꦟꦶꦡꦹꦟꦁ ꦮꦶꦩꦴꦤꦁ, ꦱꦩꦤ꧀ꦠꦠꦺꦴ ꦢ꧀ꦮꦴꦢꦱ ꦪꦺꦴꦗꦤꦴꦤꦶ;

ꦏꦹꦛꦴꦒꦴꦫꦴ ꦱꦠ꧀ꦠꦱꦠꦴ ꦈꦭ꦳ꦴꦫꦴ, ꦮꦺꦭ꦳ꦸꦫꦶꦪꦡꦩ꧀ꦨꦴ ꦫꦸꦕꦏꦠ꧀ꦡꦠꦴ ꦱꦸꦨꦴ.

꧑꧑꧒꧗. ‘‘ꦠꦠ꧀ꦡꦕ꧀ꦖꦱꦶ ꦥꦶꦮꦱꦶ ꦑꦴꦢꦱꦶ ꦕ, ꦢꦶꦧ꧀ꦧꦴ ꦕ ꦮꦷꦟꦴ ꦥꦮꦢꦤ꧀ꦠꦶ ꦮꦒ꧀ꦒꦸꦁ;

ꦢꦶꦧ꧀ꦧꦴ ꦫꦱꦴ ꦏꦴꦩꦒꦸꦟꦺꦠ꧀ꦡ ꦥꦚ꧀ꦕ, ꦤꦴꦫꦶꦪꦺꦴ ꦕ ꦤꦕ꧀ꦕꦤ꧀ꦠꦶ ꦱꦸꦮꦟ꧀ꦟꦕ꧀ꦖꦤ꧀ꦤꦴ.

꧑꧑꧒꧘. ‘‘ꦏꦺꦤ ꦠꦺꦠꦴꦢꦶꦱꦺꦴ ꦮꦟ꧀ꦟꦺꦴ…ꦥꦺ…ꦮꦟ꧀ꦟꦺꦴ ꦕ ꦠꦺ ꦱꦧ꧀ꦧꦢꦶꦱꦴ ꦥꦨꦴꦱꦠꦷ’’ꦠꦶ.

ꦱꦺꦴꦥꦶ ꦠꦱ꧀ꦱ ꦒꦴꦡꦴꦲꦶ ꦧ꧀ꦪꦴꦏꦴꦱꦶ –

꧑꧑꧓꧐. ‘‘ꦱꦺꦴ ꦢꦺꦮꦥꦸꦠ꧀ꦠꦺꦴ ꦄꦠ꧀ꦠꦩꦤꦺꦴ…ꦥꦺ… ꦪꦱ꧀ꦱ ꦏꦩ꧀ꦩꦱ꧀ꦱꦶꦢꦁ ꦦꦭꦁ’’.

꧑꧑꧓꧑. ‘‘ꦄꦲꦁ ꦩꦤꦸꦱ꧀ꦱꦺꦱꦸ ꦩꦤꦸꦱ꧀ꦱꦨꦹꦠꦺꦴ, ꦮꦶꦮꦤꦺ ꦥꦡꦺ ꦱꦔ꧀ꦏꦩꦤꦁ ꦄꦏꦴꦱꦶꦁ;

ꦄꦴꦫꦴꦩꦫꦸꦏ꧀ꦑꦴꦤꦶ ꦕ ꦫꦺꦴꦥꦪꦶꦱ꧀ꦱꦁ, ꦥꦶꦪꦴ ꦕ ꦩꦺ ꦱꦷꦭꦮꦤ꧀ꦠꦺꦴ ꦄꦲꦺꦱꦸꦁ;

ꦄꦤ꧀ꦤꦚ꧀ꦕ ꦥꦴꦤꦚ꧀ꦕ ꦥꦱꦤ꧀ꦤꦕꦶꦠ꧀ꦠꦺꦴ, ꦱꦏ꧀ꦏꦕ꧀ꦕ ꦢꦴꦤꦁ ꦮꦶꦥꦸꦭꦁ ꦄꦢꦴꦱꦶꦁ.

꧑꧑꧓꧒. ‘‘ꦠꦺꦤ ꦩꦺꦠꦴꦢꦶꦱꦺꦴ ꦮꦟ꧀ꦟꦺꦴ…ꦥꦺ…ꦮꦟ꧀ꦟꦺꦴ ꦕ ꦩꦺ ꦱꦧ꧀ꦧꦢꦶꦱꦴ ꦥꦨꦴꦱꦠꦷ’’ꦠꦶ.

꧑꧑꧓꧑. ꦠꦠ꧀ꦡ ꦮꦶꦮꦤꦺꦠꦶ ꦄꦫꦚ꧀ꦚꦺ. ꦄꦴꦫꦴꦩꦫꦸꦏ꧀ꦑꦴꦤꦶ ꦕꦴ ꦄꦴꦫꦴꦩꦨꦹꦠꦺ ꦫꦸꦏ꧀ꦑꦺ, ꦄꦴꦫꦴꦩꦁ ꦏꦠ꧀ꦮꦴ ꦠꦠ꧀ꦡ ꦫꦸꦏ꧀ꦑꦺ ꦫꦺꦴꦥꦺꦱꦶꦤ꧀ꦠꦶ ꦄꦠ꧀ꦡꦺꦴ. ꦱꦺꦱꦁ ꦱꦧ꧀ꦧꦁ ꦮꦸꦠ꧀ꦠꦤꦪꦩꦺꦮ.

ꦩꦟꦶꦡꦹꦟꦮꦶꦩꦴꦤꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.