꧒. ꦥꦨꦱ꧀ꦱꦫꦮꦶꦩꦴꦤꦮꦟ꧀ꦟꦤꦴ

ꦥꦨꦱ꧀ꦱꦫꦮꦫꦮꦟ꧀ꦟꦤꦶꦨꦺꦠꦶ ꦥꦨꦱ꧀ꦱꦫꦮꦶꦩꦴꦤꦁ. ꦠꦱ꧀ꦱ ꦏꦴ ꦈꦥ꧀ꦥꦠ꧀ꦠꦶ? ꦨꦒꦮꦴ ꦫꦴꦗꦒꦲꦺ ꦮꦶꦲꦫꦠꦶ. ꦠꦺꦤ ꦕ ꦱꦩꦪꦺꦤ ꦫꦴꦗꦒꦲꦺ ꦄꦚ꧀ꦚꦠꦫꦺꦴ ꦈꦥꦴꦱꦏꦺꦴ ꦩꦲꦴꦩꦺꦴꦒ꧀ꦒꦭ꧀ꦭꦴꦤꦠ꧀ꦡꦺꦫꦺ ꦄꦨꦶꦥ꧀ꦥꦱꦤ꧀ꦤꦺꦴ ꦲꦺꦴꦠꦶ. ꦠꦱ꧀ꦱꦺꦏꦴ ꦣꦷꦠꦴ ꦱꦢ꧀ꦣꦴ ꦥꦱꦤ꧀ꦤꦴ, ꦱꦴꦥꦶ ꦡꦺꦫꦺ ꦒꦫꦸꦕꦶꦠ꧀ꦠꦷꦏꦴꦫꦧꦲꦸꦭꦴ ꦲꦺꦴꦠꦶ. ꦄꦡꦺꦏꦢꦶꦮꦱꦁ ꦄꦴꦪꦱ꧀ꦩꦴ ꦩꦲꦴꦩꦺꦴꦒ꧀ꦒꦭ꧀ꦭꦴꦤꦺꦴ ꦫꦴꦗꦒꦲꦺ ꦥꦶꦟ꧀ꦝꦴꦪ ꦕꦫꦤ꧀ꦠꦺꦴ ꦠꦁ ꦏꦸꦭꦁ ꦈꦥꦱꦔ꧀ꦏꦩꦶ. ꦱꦴ ꦡꦺꦫꦁ ꦢꦶꦱ꧀ꦮꦴ ꦱꦺꦴꦩꦤꦱ꧀ꦱꦗꦴꦠꦴ ꦄꦴꦱꦤꦁ ꦥꦚ꧀ꦚꦴꦥꦺꦠ꧀ꦮꦴ ꦡꦺꦫꦺ ꦠꦠ꧀ꦡ ꦤꦶꦱꦶꦤ꧀ꦤꦺ ꦱꦸꦩꦤꦩꦴꦭꦴꦪ ꦥꦹꦗꦺꦠ꧀ꦮꦴ ꦩꦣꦸꦫꦁ ꦒꦸꦭ꦳ꦦꦴꦟꦶꦠꦁ ꦡꦺꦫꦱ꧀ꦱ ꦥꦠ꧀ꦠꦺ ꦄꦴꦏꦶꦫꦶ, ꦡꦺꦫꦺꦴ ꦄꦤꦸꦩꦺꦴꦢꦶꦠꦸꦏꦴꦩꦺꦴ ꦤꦶꦱꦷꦢꦶ. ꦱꦴ ꦓꦫꦴꦮꦴꦱꦱ꧀ꦱ ꦧꦲꦸꦏꦶꦕ꧀ꦕꦠꦴꦪ ꦄꦤꦺꦴꦏꦴꦱꦠꦁ ꦥꦮꦺꦢꦺꦠ꧀ꦮꦴ ‘‘ꦄꦚ꧀ꦚꦱ꧀ꦩꦶꦁ ꦢꦶꦮꦱꦺ ꦣꦩ꧀ꦩꦁ ꦱꦺꦴꦱ꧀ꦱꦴꦩꦷ’’ꦠꦶ ꦡꦺꦫꦁ ꦮꦤ꧀ꦢꦶꦠ꧀ꦮꦴ ꦈꦪ꧀ꦪꦺꦴꦗꦺꦱꦶ. ꦠꦢꦲꦺꦮ ꦕ ꦱꦴ ꦏꦴꦭꦁ ꦏꦠ꧀ꦮꦴ ꦠꦴꦮꦠꦶꦁꦱꦺꦱꦸ ꦤꦶꦧ꧀ꦧꦠ꧀ꦠꦶ. ꦠꦁ ꦄꦴꦪꦱ꧀ꦩꦴ ꦩꦲꦴꦩꦺꦴꦒ꧀ꦒꦭ꧀ꦭꦴꦤꦺꦴ ꦈꦥꦱꦔ꧀ꦏꦩꦶꦠ꧀ꦮꦴ ꦆꦩꦴꦲꦶ ꦒꦴꦡꦴꦲꦶ ꦥꦸꦕ꧀ꦖꦶ –

꧖꧙꧗. ‘‘ꦥꦨꦱ꧀ꦱꦫꦮꦫꦮꦟ꧀ꦟꦤꦶꦨꦺ, ꦱꦸꦫꦠ꧀ꦠꦮꦠ꧀ꦡꦮꦱꦤꦺ;

ꦩꦲꦶꦢ꧀ꦣꦶꦏꦺ ꦕꦤ꧀ꦢꦤꦫꦸꦕꦶꦫꦒꦠ꧀ꦠꦺ,

ꦏꦴ ꦠ꧀ꦮꦁ ꦱꦸꦨꦺ ꦢꦺꦮꦠꦺ ꦮꦤ꧀ꦢꦱꦺ ꦩꦩꦁ.

꧖꧙꧘. ‘‘ꦥꦭ꧀ꦭꦔ꧀ꦏꦺꦴ ꦕ ꦠꦺ ꦩꦲꦒ꧀ꦓꦺꦴ, ꦤꦴꦤꦴꦫꦠꦤꦕꦶꦠ꧀ꦠꦶꦠꦺꦴ ꦫꦸꦕꦶꦫꦺꦴ;

ꦪꦠ꧀ꦡ ꦠ꧀ꦮꦁ ꦤꦶꦱꦶꦤ꧀ꦤꦴ ꦮꦶꦫꦺꦴꦕꦱꦶ, ꦢꦺꦮꦫꦴꦗꦴꦫꦶꦮ ꦤꦤ꧀ꦢꦤꦺ ꦮꦤꦺ.

꧖꧙꧙. ‘‘ꦏꦶꦁ ꦠ꧀ꦮꦁ ꦥꦸꦫꦺ ꦱꦸꦕꦫꦶꦠꦩꦴꦕꦫꦷ ꦨꦢ꧀ꦢꦺ, ꦏꦶꦱ꧀ꦱ ꦏꦩ꧀ꦩꦱ꧀ꦱ ꦮꦶꦥꦴꦏꦁ;

ꦄꦤꦸꦨꦺꦴꦱꦶ ꦢꦺꦮꦭꦺꦴꦏꦱ꧀ꦩꦶꦁ, ꦢꦺꦮꦠꦺ ꦥꦸꦕ꧀ꦖꦶꦠꦴꦕꦶꦏ꧀ꦑ;

ꦏꦶꦱ꧀ꦱ ꦏꦩ꧀ꦩꦱ꧀ꦱꦶꦢꦁ ꦦꦭ’’ꦤ꧀ꦠꦶ.

꧖꧙꧗. ꦠꦠ꧀ꦡ ꦥꦨꦱ꧀ꦱꦫꦮꦫꦮꦟ꧀ꦟꦤꦶꦨꦺꦠꦶ ꦤꦶꦨꦴꦠꦶ ꦢꦶꦧ꧀ꦧꦠꦷꦠꦶ ꦤꦶꦨꦴ, ꦮꦟ꧀ꦟꦺꦴꦮ ꦤꦶꦨꦴ ꦮꦟ꧀ꦟꦤꦶꦨꦴ, ꦄꦠꦶꦮꦶꦪ ꦎꦨꦴꦱꦤꦠꦺꦴ ꦥꦨꦱ꧀ꦱꦫꦴ ꦖꦮꦶꦢꦺꦴꦱꦴꦨꦴꦮꦺꦤ ꦮꦫꦴ ꦈꦠ꧀ꦠꦩꦴ ꦮꦟ꧀ꦟꦤꦶꦨꦴ ꦌꦠꦶꦱ꧀ꦱꦴꦠꦶ ꦥꦨꦱ꧀ꦱꦫꦮꦫꦮꦟ꧀ꦟꦤꦶꦨꦴ. ꦄꦴꦩꦤ꧀ꦠꦤꦮꦱꦺꦤ ‘‘ꦥꦨꦱ꧀ꦱꦫꦮꦫꦮꦟ꧀ꦟꦤꦶꦨꦺ’’ꦠꦶ ꦮꦸꦠ꧀ꦠꦁ. ꦱꦸꦫꦠ꧀ꦠꦮꦠ꧀ꦡꦮꦱꦤꦺꦠꦶ ꦱꦸꦛ꧀ꦜꦸ ꦫꦠ꧀ꦠꦮꦠ꧀ꦡꦤꦶꦮꦠ꧀ꦡꦺ. ꦕꦤ꧀ꦢꦤꦫꦸꦕꦶꦫꦒꦠ꧀ꦠꦺꦠꦶ ꦕꦤ꧀ꦢꦤꦴꦤꦸꦭꦶꦠ꧀ꦠꦁ ꦮꦶꦪ ꦫꦸꦕꦶꦫꦒꦠ꧀ꦠꦺ, ꦒꦺꦴꦱꦷꦠꦕꦤ꧀ꦢꦤꦺꦤ ꦧꦲꦭꦠꦫꦴꦤꦸꦭꦶꦠ꧀ꦠꦁ ꦮꦶꦪ ꦱꦸꦫꦠ꧀ꦠꦩꦤꦸꦚ꧀ꦚꦱꦫꦷꦫꦴꦮꦪꦮꦺꦠꦶ ꦄꦠ꧀ꦡꦺꦴ, ꦕꦤ꧀ꦢꦤꦴꦤꦸꦭꦺꦥꦺꦤ ꦮꦴ ꦫꦸꦕꦶꦫꦒꦠ꧀ꦠꦺ.

ꦌꦮꦁ ꦡꦺꦫꦺꦤ ꦥꦸꦛ꧀ꦜꦴ ꦢꦺꦮꦠꦴ ꦆꦩꦴꦲꦶ ꦒꦴꦡꦴꦲꦶ ꦧ꧀ꦪꦴꦏꦴꦱꦶ –

꧗꧐꧐. ‘‘ꦥꦶꦟ꧀ꦝꦴꦪ ꦠꦺ ꦕꦫꦤ꧀ꦠꦱ꧀ꦱ, ꦩꦴꦭꦁ ꦦꦴꦟꦶꦠꦚ꧀ꦕ ꦄꦢꦢꦁ ꦨꦤ꧀ꦠꦺ;

ꦠꦱ꧀ꦱ ꦏꦩ꧀ꦩꦱ꧀ꦱꦶꦢꦁ ꦮꦶꦥꦴꦏꦁ, ꦄꦤꦸꦨꦺꦴꦩꦶ ꦢꦺꦮꦭꦺꦴꦏꦱ꧀ꦩꦶꦁ.

꧗꧐꧑. ‘‘ꦲꦺꦴꦠꦶ ꦕ ꦩꦺ ꦄꦤꦸꦠꦴꦥꦺꦴ, ꦄꦥꦫꦢ꧀ꦣꦁ ꦢꦸꦏ꧀ꦑꦶꦠꦚ꧀ꦕ ꦩꦺ ꦨꦤ꧀ꦠꦺ;

ꦱꦴꦲꦁ ꦣꦩ꧀ꦩꦁ ꦤꦴꦱ꧀ꦱꦺꦴꦱꦶꦁ, ꦱꦸꦢꦺꦱꦶꦠꦁ ꦣꦩ꧀ꦩꦫꦴꦗꦺꦤ.

꧗꧐꧒. ‘‘ꦠꦁ ꦠꦁ ꦮꦢꦴꦩꦶ ꦨꦢ꧀ꦢꦤ꧀ꦠꦺ, ꦪꦱ꧀ꦱ ꦩꦺ ꦄꦤꦸꦏꦩ꧀ꦥꦶꦪꦺꦴ ꦏꦺꦴꦕꦶ;

ꦣꦩ꧀ꦩꦺꦱꦸ ꦠꦁ ꦱꦩꦴꦢꦥꦺꦡ, ꦱꦸꦢꦺꦱꦶꦠꦁ ꦣꦩ꧀ꦩꦫꦴꦗꦺꦤ.

꧗꧐꧓. ‘‘ꦪꦺꦱꦁ ꦄꦠ꧀ꦡꦶ ꦱꦢ꧀ꦣꦴ ꦧꦸꦢ꧀ꦣꦺ, ꦣꦩ꧀ꦩꦺ ꦕ ꦱꦔ꧀ꦓꦫꦠꦤꦺ;

ꦠꦺ ꦩꦁ ꦄꦠꦶꦮꦶꦫꦺꦴꦕꦤ꧀ꦠꦶ, ꦄꦴꦪꦸꦤꦴ ꦪꦱꦱꦴ ꦱꦶꦫꦶꦪꦴ.

꧗꧐꧔. ‘‘ꦥꦠꦴꦥꦺꦤ ꦮꦟ꧀ꦟꦺꦤ ꦈꦠ꧀ꦠꦫꦶꦠꦫꦴ, ꦄꦚ꧀ꦚꦺ ꦩꦲꦶꦢ꧀ꦣꦶꦏꦠꦫꦴ ꦩꦪꦴ ꦢꦺꦮꦴ’’ꦠꦶ.

꧗꧐꧐. ꦠꦠ꧀ꦡ ꦩꦴꦭꦤ꧀ꦠꦶ ꦱꦸꦩꦤꦥꦸꦥ꧀ꦦꦁ. ꦦꦴꦟꦶꦠꦤ꧀ꦠꦶ ꦈꦕ꧀ꦖꦸꦫꦱꦁ ꦒꦲꦺꦠ꧀ꦮꦴ ꦏꦠꦦꦴꦟꦶꦠꦁ.

꧗꧐꧑. ꦄꦤꦸꦠꦴꦥꦺꦴꦠꦶ ꦮꦶꦥ꧀ꦥꦛꦶꦱꦴꦫꦺꦴ. ꦠꦱ꧀ꦱ ꦏꦴꦫꦟꦩꦴꦲ ‘‘ꦄꦥꦫꦢ꧀ꦣꦁ ꦢꦸꦏ꧀ꦑꦠꦚ꧀ꦕ ꦩꦺ ꦨꦤ꧀ꦠꦺ’’ꦠꦶ. ꦆꦢꦴꦤꦶ ꦠꦁ ꦱꦫꦹꦥꦠꦺꦴ ꦢꦱ꧀ꦱꦺꦠꦶ ‘‘ꦱꦴꦲꦁ ꦣꦩ꧀ꦩꦁ ꦤꦴꦱ꧀ꦱꦺꦴꦱꦶ’’ꦤ꧀ꦠꦶ, ꦱꦴ ꦄꦲꦁ ꦠꦢꦴ ꦠꦮ ꦢꦺꦱꦺꦠꦸꦏꦴꦩꦱ꧀ꦱ ꦣꦩ꧀ꦩꦁ ꦤ ꦱꦸꦟꦶꦁ. ꦏꦷꦢꦶꦱꦁ? ꦱꦸꦢꦺꦱꦶꦠꦁ ꦣꦩ꧀ꦩꦫꦴꦗꦺꦤꦴꦠꦶ, ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦤ ꦄꦴꦢꦶꦏꦭ꧀ꦪꦴꦟꦴꦢꦶꦠꦴꦪ ꦌꦏꦤ꧀ꦠꦤꦶꦪ꧀ꦪꦴꦤꦶꦏꦠꦴꦪ ꦕ ꦱ꧀ꦮꦴꦑꦴꦠꦤ꧀ꦠꦶ ꦄꦠ꧀ꦡꦺꦴ.

꧗꧐꧒. ꦠꦤ꧀ꦠꦶ ꦠꦱ꧀ꦩꦴ ꦣꦩ꧀ꦩꦫꦴꦗꦺꦤ ꦱꦸꦢꦺꦱꦶꦠꦠ꧀ꦠꦴ ꦄꦱꦮꦤꦱ꧀ꦱ ꦕ ꦩꦴꦢꦶꦱꦴꦤꦁ ꦄꦤꦸꦠꦴꦥꦲꦺꦠꦸꦨꦴꦮꦠꦺꦴ. ꦠꦤ꧀ꦠꦶ ꦠꦸꦮꦁ, ꦠꦸꦪ꧀ꦲꦤ꧀ꦠꦶ ꦄꦠ꧀ꦡꦺꦴ. ꦪꦱ꧀ꦱꦴꦠꦶ ꦪꦺꦴ ꦄꦱ꧀ꦱ. ꦄꦤꦸꦏꦩ꧀ꦥꦶꦪꦺꦴꦠꦶ ꦄꦤꦸꦏꦩ꧀ꦥꦶꦠꦧ꧀ꦧꦺꦴ. ꦏꦺꦴꦕꦷꦠꦶ ꦪꦺꦴ ꦏꦺꦴꦕꦶ. ꦣꦩ꧀ꦩꦺꦱꦹꦠꦶ ꦱꦷꦭꦴꦢꦶꦣꦩ꧀ꦩꦺꦱꦸ. ‘‘ꦣꦩ꧀ꦩꦺ ꦲꦷ’’ꦠꦶ ꦮꦴ ꦥꦴꦜꦺꦴ, ꦱꦴꦱꦤꦣꦩ꧀ꦩꦺꦠꦶ ꦄꦠ꧀ꦡꦺꦴ. ꦲꦷꦠꦶ ꦤꦶꦥꦴꦠꦩꦠ꧀ꦠꦁ, ꦮꦕꦤꦮꦶꦥꦭ꧀ꦭꦴꦱꦺꦴ ꦮꦴ. ꦠꦤ꧀ꦠꦶ ꦄꦤꦸꦏꦩ꧀ꦥꦶꦠꦧ꧀ꦧꦥꦸꦒ꧀ꦒꦭꦁ. ꦱꦸꦢꦺꦱꦶꦠꦤ꧀ꦠꦶ ꦱꦸꦛ꧀ꦜꦸ ꦢꦺꦱꦶꦠꦁ.

꧗꧐꧓-꧔. ꦠꦺ ꦩꦁ ꦄꦠꦶꦮꦶꦫꦺꦴꦕꦤ꧀ꦠꦷꦠꦶ ꦠꦺ ꦫꦠꦤꦠ꧀ꦠꦪꦺ ꦥꦱꦤ꧀ꦤꦴ ꦢꦺꦮꦥꦸꦠ꧀ꦠꦴ ꦩꦁ ꦄꦠꦶꦏ꧀ꦏꦩꦶꦠ꧀ꦮꦴ ꦮꦶꦫꦺꦴꦕꦤ꧀ꦠꦶ. ꦥꦠꦴꦥꦺꦤꦴꦠꦶ ꦠꦺꦗꦱꦴ ꦄꦴꦤꦸꦨꦴꦮꦺꦤ. ꦄꦚ꧀ꦚꦺꦠꦶ ꦪꦺ ꦄꦚ꧀ꦚꦺ. ꦩꦪꦴꦠꦶ ꦤꦶꦱ꧀ꦱꦏ꧀ꦏꦺ ꦏꦫꦟꦮꦕꦤꦁ. ꦮꦟ꧀ꦟꦺꦤ ꦈꦠ꧀ꦠꦫꦶꦠꦫꦴ ꦩꦲꦶꦢ꧀ꦣꦶꦏꦠꦫꦴ ꦕ ꦢꦺꦮꦴ, ꦠꦺ ꦫꦠꦤꦠ꧀ꦠꦪꦺ ꦄꦨꦶꦥ꧀ꦥꦱꦤ꧀ꦤꦴꦪꦺꦮꦴꦠꦶ ꦢꦱ꧀ꦱꦺꦠꦶ. ꦱꦺꦱꦁ ꦮꦸꦠ꧀ꦠꦤꦪꦩꦺꦮ.

ꦥꦨꦱ꧀ꦱꦫꦮꦶꦩꦴꦤꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.