꧑꧒. ꦢꦸꦠꦶꦪꦥꦠꦶꦧ꧀ꦧꦠꦴꦮꦶꦩꦴꦤꦮꦟ꧀ꦟꦤꦴ

ꦮꦺꦭ꦳ꦸꦫꦶꦪꦡꦩ꧀ꦨꦤ꧀ꦠꦶ ꦢꦸꦠꦶꦪꦥꦠꦶꦧ꧀ꦧꦠꦴꦮꦶꦩꦴꦤꦁ. ꦠꦱ꧀ꦱ ꦏꦴ ꦈꦥ꧀ꦥꦠ꧀ꦠꦶ? ꦱꦴꦮꦠ꧀ꦡꦶꦪꦁ ꦏꦶꦫ ꦄꦚ꧀ꦚꦠꦫꦴ ꦈꦥꦴꦱꦶꦏꦴ ꦥꦠꦶꦧ꧀ꦧꦠꦴ ꦲꦸꦠ꧀ꦮꦴ ꦱꦢ꧀ꦣꦴ ꦥꦱꦤ꧀ꦤꦴ ꦥꦚ꧀ꦕ ꦱꦷꦭꦴꦤꦶ ꦱꦸꦮꦶꦱꦸꦢ꧀ꦣꦴꦤꦶ ꦏꦠ꧀ꦮꦴ ꦫꦏ꧀ꦑꦶ, ꦪꦡꦴꦮꦶꦨꦮꦚ꧀ꦕ ꦢꦴꦤꦴꦤꦶ ꦄꦢꦴꦱꦶ, ꦱꦴ ꦏꦴꦭꦁ ꦏꦠ꧀ꦮꦴ ꦠꦴꦮꦠꦶꦁꦱꦨꦮꦤꦺ ꦈꦥ꧀ꦥꦗ꧀ꦗꦶ. ꦱꦺꦱꦁ ꦲꦺꦛ꧀ꦜꦴ ꦮꦸꦠ꧀ꦠꦤꦪꦩꦺꦮ.

꧑꧐꧑. ‘‘ꦮꦺꦭ꦳ꦸꦫꦶꦪꦡꦩ꧀ꦨꦁ ꦫꦸꦕꦶꦫꦁ ꦥꦨꦱ꧀ꦱꦫꦁ, ꦮꦶꦩꦴꦤꦩꦴꦫꦸꦪ꧀ꦲ ꦄꦤꦺꦏꦕꦶꦠ꧀ꦠꦁ;

ꦠꦠ꧀ꦡꦕ꧀ꦖꦱꦶ ꦢꦺꦮꦶ ꦩꦲꦴꦤꦸꦨꦴꦮꦺ, ꦈꦕ꧀ꦕꦴꦮꦕꦴ ꦆꦢ꧀ꦣꦶ ꦮꦶꦏꦸꦧ꧀ꦧꦩꦴꦤꦴ;

ꦆꦩꦴ ꦕ ꦠꦺ ꦄꦕ꧀ꦖꦫꦴꦪꦺꦴ ꦱꦩꦤ꧀ꦠꦠꦺꦴ, ꦤꦕ꧀ꦕꦤ꧀ꦠꦶ ꦒꦴꦪꦤ꧀ꦠꦶ ꦥꦩꦺꦴꦢꦪꦤ꧀ꦠꦶ ꦕ.

꧑꧐꧒. ‘‘ꦢꦺꦮꦶꦢ꧀ꦣꦶꦥꦠ꧀ꦠꦴꦱꦶ ꦩꦲꦴꦤꦸꦨꦴꦮꦺ,

ꦩꦤꦸꦱ꧀ꦱꦨꦹꦠꦴ ꦏꦶꦩꦏꦴꦱꦶ ꦥꦸꦚ꧀ꦚꦁ;

ꦏꦺꦤꦴꦱꦶ ꦌꦮꦁ ꦗꦭꦶꦠꦴꦤꦸꦨꦴꦮꦴ,

ꦮꦟ꧀ꦟꦺꦴ ꦕ ꦠꦺ ꦱꦧ꧀ꦧꦢꦶꦱꦴ ꦥꦨꦴꦱꦠꦷ’’ꦠꦶ. – ꦥꦸꦕ꧀ꦖꦶ;

꧑꧐꧓. ‘‘ꦱꦴ ꦢꦺꦮꦠꦴ ꦄꦠ꧀ꦠꦩꦤꦴ, ꦩꦺꦴꦒ꧀ꦒꦭ꧀ꦭꦴꦤꦺꦤ ꦥꦸꦕ꧀ꦖꦶꦠꦴ;

ꦥꦚ꧀ꦲꦁ ꦥꦸꦛ꧀ꦜꦴ ꦮꦶꦪꦴꦏꦴꦱꦶ, ꦪꦱ꧀ꦱ ꦏꦩ꧀ꦩꦱ꧀ꦱꦶꦢꦁ ꦦꦭꦁ’’.

꧑꧐꧔. ‘‘ꦄꦲꦁ ꦩꦤꦸꦱ꧀ꦱꦺꦱꦸ ꦩꦤꦸꦱ꧀ꦱꦨꦹꦠꦴ, ꦈꦥꦴꦱꦶꦏꦴ ꦕꦏ꧀ꦑꦸꦩꦠꦺꦴ ꦄꦲꦺꦴꦱꦶꦁ;

ꦥꦴꦟꦴꦠꦶꦥꦴꦠꦴ ꦮꦶꦫꦠꦴ ꦄꦲꦺꦴꦱꦶꦁ, ꦭꦺꦴꦏꦺ ꦄꦢꦶꦤ꧀ꦤꦁ ꦥꦫꦶꦮꦗ꧀ꦗꦪꦶꦱ꧀ꦱꦁ.

꧑꧐꧕. ‘‘ꦄꦩꦗ꧀ꦗꦥꦴ ꦤꦺꦴ ꦕ ꦩꦸꦱꦴ ꦄꦨꦴꦟꦶꦁ, ꦱꦏꦺꦤ ꦱꦴꦩꦶꦤꦴ ꦄꦲꦺꦴꦱꦶꦁ ꦠꦸꦛ꧀ꦜꦴ;

ꦄꦤ꧀ꦤꦚ꧀ꦕ ꦥꦴꦤꦚ꧀ꦕ ꦥꦱꦤ꧀ꦤꦕꦶꦠ꧀ꦠꦴ, ꦱꦏ꧀ꦏꦕ꧀ꦕ ꦢꦴꦤꦁ ꦮꦶꦥꦸꦭꦁ ꦄꦢꦴꦱꦶꦁ.

꧑꧐꧖. ‘‘ꦠꦺꦤ ꦩꦺꦠꦴꦢꦶꦱꦺꦴ ꦮꦟ꧀ꦟꦺꦴ, ꦠꦺꦤ ꦩꦺ ꦆꦣ ꦩꦶꦗ꧀ꦙꦠꦶ;

ꦈꦥ꧀ꦥꦗ꧀ꦗꦤ꧀ꦠꦶ ꦕ ꦩꦺ ꦨꦺꦴꦒꦴ, ꦪꦺ ꦏꦺꦕꦶ ꦩꦤꦱꦺꦴ ꦥꦶꦪꦴ.

꧑꧐꧗. ‘‘ꦄꦏ꧀ꦑꦴꦩꦶ ꦠꦺ ꦨꦶꦏ꧀ꦑꦸ ꦩꦲꦴꦤꦸꦨꦴꦮ,

ꦩꦤꦸꦱ꧀ꦱꦨꦹꦠꦴ ꦪꦩꦏꦴꦱꦶ ꦥꦸꦚ꧀ꦚꦁ;

ꦠꦺꦤꦩ꧀ꦲꦶ ꦌꦮꦁ ꦗꦭꦶꦠꦴꦤꦸꦨꦴꦮꦴ,

ꦮꦟ꧀ꦟꦺꦴ ꦕ ꦩꦺ ꦱꦧ꧀ꦧꦢꦶꦱꦴ ꦥꦨꦴꦱꦠꦷ’’ꦠꦶ. – ꦮꦶꦱ꧀ꦱꦗ꧀ꦗꦺꦱꦶ;

꧑꧐꧑. ꦠꦠ꧀ꦡ ꦮꦺꦭ꦳ꦸꦫꦶꦪꦡꦩ꧀ꦨꦤ꧀ꦠꦶ ꦮꦺꦭ꦳ꦸꦫꦶꦪꦩꦟꦶꦩꦪꦡꦩ꧀ꦨꦁ. ꦫꦸꦕꦶꦫꦤ꧀ꦠꦶ ꦫꦩꦟꦷꦪꦁ. ꦥꦨꦱ꧀ꦱꦫꦤ꧀ꦠꦶ ꦄꦠꦶꦮꦶꦪ ꦨꦴꦱꦸꦫꦁ. ꦈꦕ꧀ꦕꦴꦮꦕꦴꦠꦶ ꦈꦕ꧀ꦕꦴ ꦕ ꦄꦮꦕꦴ ꦕ, ꦮꦶꦮꦶꦣꦴꦠꦶ ꦄꦠ꧀ꦡꦺꦴ.

꧑꧐꧔-꧕. ꦈꦥꦴꦱꦶꦏꦴꦠꦶ ꦱꦫꦟꦒꦩꦤꦺꦤ ꦈꦥꦴꦱꦶꦏꦴꦭꦏ꧀ꦑꦟꦺ ꦜꦶꦠꦴ. ꦮꦸꦠ꧀ꦠꦚ꧀ꦲꦶ –

‘‘ꦪꦠꦺꦴ ꦑꦺꦴ, ꦩꦲꦴꦤꦴꦩ, ꦄꦫꦶꦪꦱꦴꦮꦏꦺꦴ ꦧꦸꦢ꧀ꦣꦁ ꦱꦫꦟꦁ ꦒꦠꦺꦴ ꦲꦺꦴꦠꦶ, ꦣꦩ꧀ꦩꦁ ꦱꦫꦟꦁ ꦒꦠꦺꦴ ꦲꦺꦴꦠꦶ, ꦱꦔ꧀ꦓꦁ ꦱꦫꦟꦁ ꦒꦠꦺꦴ ꦲꦺꦴꦠꦶ, ꦌꦠ꧀ꦠꦴꦮꦠꦴ ꦑꦺꦴ, ꦩꦲꦴꦤꦴꦩ, ꦄꦫꦶꦪꦱꦴꦮꦏꦺꦴ ꦈꦥꦴꦱꦏꦺꦴ ꦲꦺꦴꦠꦷ’’ꦠꦶ (ꦱꦁ. ꦤꦶ. ꧕.꧑꧐꧓꧓).

ꦕꦏ꧀ꦑꦸꦩꦠꦺꦴꦠꦶ ꦥꦚ꧀ꦕꦲꦶ ꦕꦏ꧀ꦑꦹꦲꦶ ꦕꦏ꧀ꦑꦸꦩꦠꦺꦴ ꦧꦸꦢ꧀ꦣꦱ꧀ꦱ ꦨꦒꦮꦠꦺꦴ. ꦌꦮꦁ ꦈꦥꦴꦱꦶꦏꦴꦨꦴꦮꦏꦶꦠ꧀ꦠꦤꦺꦤ ꦄꦴꦱꦪꦱꦸꦢ꧀ꦣꦶꦁ ꦢꦱ꧀ꦱꦺꦠ꧀ꦮꦴ ꦥꦪꦺꦴꦒꦱꦸꦢ꧀ꦣꦶꦁ ꦢꦱ꧀ꦱꦺꦠꦸꦁ ‘‘ꦥꦴꦟꦴꦠꦶꦥꦴꦠꦴ ꦮꦶꦫꦠꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦱꦏꦺꦤ ꦱꦴꦩꦶꦤꦴ ꦄꦲꦺꦴꦱꦶꦁ ꦠꦸꦛ꧀ꦜꦴꦠꦶ ꦩꦶꦕ꧀ꦖꦴꦕꦴꦫꦴꦮꦺꦫꦩꦟꦶꦩꦴꦲ. ꦱꦺꦱꦁ ꦲꦺꦛ꧀ꦜꦴ ꦮꦸꦠ꧀ꦠꦱꦢꦶꦱꦩꦺꦮ.

ꦢꦸꦠꦶꦪꦥꦠꦶꦧ꧀ꦧꦠꦴꦮꦶꦩꦴꦤꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.